Ganesh Gita

|| oṃ namaḥ śrīgaṇeśāya ||
|| atha śrīmadgaṇeśagītā prārabhyate ||
1
|| prathamo'dhyāyaḥ ||
|| sāṅkhyasārārtha yogaḥ ||
ka uvāca -
evameva purā pṛṣṭaḥ śaunakena mahātmanā |
sa sūtaḥ kathayāmāsa gītāṃ vyāsamukhācchrutām ||1 ||
sūta uvāca -
aṣṭādaśapurāṇoktamamṛtaṃ prāśitaṃ tvayā |
tato'tirasavatpātumicchāmyamṛtamuttamam ||2 ||
yenāmṛtamayo bhūtvā pumānbrahmāmṛtaṃ yataḥ |
yogāmṛtaṃ mahābhāga tanme karuṇayā vada ||3 ||
vyāsa uvāca -
atha gītāṃ pravakṣyāmi yogamārgaprakāśinīm |
niyuktā pṛcchate sūta rājñe gajamukhena yā ||4 ||
vareṇya uvāca -
vighneśvara mahābāho sarvavidyāviśārada |
sarvaśāstrārthatattvajña yogaṃ me vaktumarhasi ||5 ||
śrīgajānana uvāca -
samyagvyavasitā rājanmatiste'nugrahānmama |
śa‍ṛṇu gītāṃ pravakṣyāmi yogāmṛtamayīṃ nṛpa ||6 ||
na yogaṃ yogamityāhuryogo yogo na ca śriyaḥ |
na yogo viṣayairyogo na ca mātrādibhistadā ||7 ||
yogo yaḥ pitṛmātrāderna sa yogo narādhipa |
yo yogo bandhuputrāderyaścāṣṭabhūtibhiḥ saha ||8 ||
na sa yogastriyā yogo jagadadbhutarūpayā |
rājyayogaśca no yogo na yogo gajavājibhiḥ ||9 ||
yogo nendrapadasyāpi yogo yogārthinaḥ priyaḥ |
yogo yaḥ satyalokasya na sa yogo mato mama ||10 ||
śaivasya yogo no yogo vaiṣṇavasya padasya yaḥ |
na yogo bhūpa sūryatvaṃ candratvaṃ na kuberatā ||11 ||
nānilatvaṃ nānalatvaṃ nāmaratvaṃ na kālatā |
na vāruṇyaṃ na nairṛtyaṃ yogo na sārvabhaumatā ||12 ||
yogaṃ nānāvidhaṃ bhūpa yuñjanti jñāninastatam |
bhavanti vitṛṣā loke jitāhārā viretasaḥ ||13 ||
pāvayantyakhilānlokānvaśīkṛtajagattrayāḥ |
karuṇāpūrṇahṛdayā bodhayantyapi kāṃścana ||14 ||
jīvanmuktā hṛde magnāḥ paramānandarūpiṇi |
nimīlyākṣīṇi paśyantaḥ paraṃ brahma hṛdi sthitam ||15 ||
dhyāyantaḥ paramaṃ brahma citte yogavaśīkṛtam |
bhūtāni svātmanā tulyaṃ sarvāṇi gaṇayanti te ||16 ||
yena kenacidācchinnā yena kenacidāhatāḥ |
yena kenacidākṛṣṭā yena kenacidāśritāḥ ||17 ||
karuṇāpūrṇahṛdayā bhramanti dharaṇītale |
anugrahāya lokānāṃ jitakrodhā jitendriyāḥ ||18 ||
dehamātrabhṛto bhūpa samaloṣṭāśmakāñcanāḥ |
etādṛśā mahābhāgyāḥ syuścakṣurgocarāḥ priya ||19 ||
tamidānīmahaṃ vakṣye śa‍ṛṇu yogamanuttamam |
śrutvā yaṃ mucyate jantuḥ pāpebhyo bhavasāgarāt ||20 ||
śive viṣṇau ca śaktau ca sūrye mayi narādhipa |
yā'bhedabuddhiryogaḥ sa samyagyogo mato mama ||21 ||
ahameva jagadyasmātsṛjāmi pālayāmi ca |
kṛtvā nānāvidhaṃ veṣaṃ saṃharāmi svalīlayā ||22 ||
ahameva mahāviṣṇurahameva sadāśivaḥ |
ahameva mahāśaktirahamevāryamā priya ||23 ||
ahameko nṛṇāṃ nātho jātaḥ pañcavidhaḥ purā |
ajñānānmā na jānanti jagatkāraṇakāraṇam ||24 ||
matto'gnirāpo dharaṇī matta ākāśamārutau |
brahmā viṣṇuśca rudraśca lokapālā diśo daśa ||25 ||
vasavo manavo gāvo manavaḥ paśavo'pi ca |
saritaḥ sāgarā yakṣā vṛkṣāḥ pakṣigaṇā api ||26 ||
tathaikaviṃśatiḥ svargā nāgāḥ sapta vanāni ca |
manuṣyāḥ parvatāḥ sādhyāḥ siddhā rakṣogaṇāstathā ||27 ||
ahaṃ sākṣī jagaccakṣuraliptaḥ sarvakarmabhiḥ |
avikāro'prameyo'hamavyakto viśvago'vyayaḥ ||28 ||
ahameva paraṃ brahmāvyayānandātmakaṃ nṛpa |
mohayatyakhilānmāyā śreṣṭhānmama narānamūn ||29 ||
sarvadā ṣaḍvikāreṣu tāniyaṃ yojayet bhṛśam |
hitvājāpaṭalaṃ janturanekairjanmabhiḥ śanaiḥ ||30 ||
virajya vindati brahma viṣayeṣu subodhataḥ |
acchedyaṃ śastrasaṅghātairadāhyamanalena ca ||31 ||
akledyaṃ bhūpa bhuvanairaśoṣyaṃ mārutena ca |
avadhyaṃ vadhyamāne'pi śarīre'sminnarādhipa ||32 ||
yāmimāṃ puṣpitāṃ vācaṃ praśaṃsanti śrutīritām |
trayīvādaratā mūḍhāstato'nyanmanvate'pi na ||33 ||
kurvanti satataṃ karma janmamṛtyuphalapradam |
svargaiśvaryaratā dhvastacetanā bhogabuddhayaḥ ||34 ||
sampādayanti te bhūpa svātmanā nijabandhanam |
saṃsāracakraṃ yuñjanti jaḍāḥ karmaparā narāḥ ||35 ||
yasya yadvihitaṃ karma tatkartavyaṃ madarpaṇam |
tato'sya karmabījānāmucchinnāḥ syurmahāṅkurāḥ ||36 ||
cittaśuddhiśca mahatī vijñānasādhikā bhavet |
vijñānena hi vijñātaṃ paraṃ brahma munīśvaraiḥ ||37 ||
tasmātkarmāṇi kurvīta buddhiyukto narādhipa |
na tvakarmā bhavetko'pi svadharmatyāgavāṃstathā ||38 ||
jahāti yadi karmāṇi tataḥ siddhiṃ na vindati |
ādau jñāne nādhikāraḥ karmaṇyeva sa yujyate ||39 ||
karmaṇā śuddhahṛdayo'bhedabuddhimupaiṣyati |
sa ca yogaḥ samākhyāto'mṛtatvāya kalpate ||40 ||
yogamanyaṃ pravakṣyāmi śa‍ṛṇu bhūpa tamuttamam |
paśau putre tathā mitre śatrau bandhau suhṛjjane ||41 ||
bahirdṛṣṭyā ca samayā hṛtsthayālokayetpumān |
sukhe duḥkhe tathā'marṣe harṣe bhītau samo bhavet ||42 ||
rogāptau caiva bhogāptau jaye vā vijaye'pi ca |
śriyo'yoge ca yoge ca lābhālābhe mṛtāvapi ||43 ||
samo māṃ vastujāteṣu paśyannantarbahiḥsthitam |
sūrye some jale vahnau śive śaktau tathānile ||44 ||
dvije hṛdi mahānadyāṃ tīrthe kṣetre'ghanāśini |
viṣṇau ca sarvadeveṣu tathā yakṣorageṣu ca ||45 ||
gandharveṣu manuṣyeṣu tathā tiryagbhaveṣu ca |
satataṃ māṃ hi yaḥ paśyetso'yaṃ yogaviducyate ||46 ||
samparāhṛtya svārthebhya indriyāṇi vivekataḥ |
sarvatra samatābuddhiḥ sa yogo bhūpa me mataḥ ||47 ||
ātmānātmavivekena yā buddhirdaivayogataḥ |
svadharmāsaktacittasya tadyogo yoga ucyate ||48 ||
dharmādharamau jahātīha tayā yukta ubhāvapi |
ato yogāya yuñjīta yogo vaidheṣu kauśalam ||49 ||
dharmādharmaphale tyaktvā manīṣī vijitendriyaḥ |
janmabandhavinirmuktaḥ sthānaṃ saṃyātyanāmayam ||50 ||
yadā hyajñānakāluṣyaṃ jantorbuddhiḥ kramiṣyati |
tadāsau yāti vairāgyaṃ vedavākyādiṣu kramāt ||51 ||
trayīvipratipannasya sthāṇutvaṃ yāsyate yadā |
parātmanyacalā buddhistadāsau yogamāpnuyāt ||52 ||
mānasānakhilānkāmānyadā dhīmāṃstyajetpriya |
svātmani svena santuṣṭaḥ sthirabuddhistadocyate ||53 ||
vitṛṣṇaḥ sarvasaukhyeṣu nodvigno duḥkhasaṅgame |
gatasādhvasaruḍrāgaḥ sthirabuddhistadocyate ||54 ||
yathā'yaṃ kamaṭho'ṅgāni saṃkocayati sarvataḥ |
viṣayebhyastathā khāni saṃkarpedyogatatparaḥ ||55 ||
vyāvartante'sya viṣayāstyaktāhārasya varṣmiṇaḥ |
vinā rāgaṃ ca rāgo'pi dṛṣṭvā brahma vinaśyati ||56 ||
vipaścidyatate bhūpa sthitimāsthāya yoginaḥ |
manthayitvendriyāṇyasya haranti balato manaḥ ||57 ||
yuktastāni vaśe kṛtvā sarvadā matparo bhavet |
saṃyatānīndriyāṇīha yasyāsau kṛtadhīrmataḥ ||58 ||
cintayānasya viṣayānsaṃgasteṣūpajāyate |
kāmaḥ saṃjāyate tasmāttataḥ krodho'bhivartate ||59 ||
krodhādajñānasaṃbhūtirvibhramastu tataḥ smṛteḥ |
bhraṃśātsmṛtermaterdhvaṃsastaddhvaṃsātso'pi naśyati ||60 ||
vinā dveṣaṃ ca rāgaṃ ca gocarānyastu khaiścaret |
svādhīnahṛdayo vaśyaiḥ saṃtoṣaṃ sa samṛcchati ||61 ||
trividhasyāpi duḥkhasya saṃtoṣe vilayo bhavet |
prajñayā saṃsthitaścāyaṃ prasannahṛdayo bhavet ||62 ||
vinā prasādaṃ na matirvinā matyā na bhāvanā |
vinā tāṃ na śamo bhūpa vinā tena kutaḥ sukham ||63 ||
indriyāśvānvicarato viṣayānanu vartate |
yanmanastanmatiṃ hanyādapsu nāvaṃ marudyathā ||64 ||
yā rātriḥ sarvabhūtānāṃ tasyāṃ nidrāti naiva saḥ |
na svapantīha te yatra sā rātristasya bhūmipa ||65 ||
saritāṃ patimāyānti vanāni sarvato yathā |
āyānti yaṃ tathā kāmā na sa śāntiṃ kvacillabhet ||66 ||
atastānīha saṃrudhya sarvataḥ khāni mānavaḥ |
svasvārthebhyaḥ pradhāvanti buddhirasya sthirā tadā ||67 ||
mamatāhaṃkṛtī tyaktvā sarvānkāmāṃśca yastyajet |
nityaṃ jñānarato bhūtvā jñānānmuktiṃ sa yāsyati ||68 ||
evaṃ brahmadhiyaṃ bhūpa yo vijānāti daivataḥ |
turyāmavasthāṃ prāpyāpi jīvanmuktiṃ prayāsyati ||69 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
sāṃkhyasārārthayogo nāma prathamo'dhyāyaḥ ||
2
|| dvitīyo'dhyāyaḥ ||
|| karmayogaḥ ||
vareṇya uvāca -
jñānaniṣṭhā karmaniṣṭhā dvayaṃ proktaṃ tvayā vibho |
avadhārya vadaikaṃ me niḥśreyasakaraṃ nu kim ||1 ||
gajānana uvāca -
asmiṃścarācare sthityau purokte dve mayā priya |
sāṃkhyānāṃ buddhiyogena vaidhayogena karmiṇām ||2 ||
anārambheṇa vaidhānāṃ niṣkriyaḥ puruṣo bhavet |
na siddhiṃ yāti saṃtyāgātkevalātkarmaṇo nṛpa ||3 ||
kadācidakriyaḥ ko'pi kṣaṇaṃ naivāvatiṣṭhate |
asvatantraḥ prakṛtijairguṇaiḥ karma ca kāryate ||4 ||
karmakārīndriyagrāmaṃ niyamyāste smaranpumān |
tadgocarānmandacitto dhigācāraḥ sa bhāṣyate ||5 ||
tadgrāmaṃ saṃniyamyādau manasā karma cārabhet |
indriyaiḥ karmayogaṃ yo vitṛṣṇaḥ sa paro nṛpa ||6 ||
akarmaṇaḥ śreṣṭhatamaṃ karmānīhākṛtaṃ tu yat |
varṣmaṇaḥ sthitirapyasyākarmaṇo naiva setsyati ||7 ||
asamarpya nibadhyante karma tena janā mayi |
kurvīta satataṃ karmānāśo'saṅgo madarpaṇam ||8 ||
madarthe yāni karmāṇi tāni badhnanti na kvacit |
savāsanamidaṃ karma badhnāti dehinaṃ balāt ||9 ||
varṇānsṛṣṭvāvadaṃ cāhaṃ sayajñāṃstānpurā priya |
yajñena ṛdhyatāmeṣa kāmadaḥ kalpavṛkṣavat ||10 ||
surāṃścānnena prīṇadhvaṃ surāste prīṇayantu vaḥ |
labhadhvaṃ paramaṃ sthānamanyonyaprīṇanātsthiram ||11 ||
iṣṭā devāḥ pradāsyanti bhogāniṣṭānsutarpitāḥ |
tairdattāṃstānnarastebhyo'datvā bhuṅkte sa taskaraḥ ||12 ||
hutāvaśiṣṭabhoktāro muktāḥ syuḥ sarvapātakaiḥ |
adantyeno mahāpāpā ātmahetoḥ pacanti ye ||13 ||
ūrjo bhavanti bhūtāni devādannasya saṃbhavaḥ |
yajñācca devasaṃbhūtistadutpattiśca vaidhataḥ ||14 ||
brahmaṇo vaidhamutpannaṃ matto brahmasamudbhavaḥ |
ato yajñe ca viśvasmin sthitaṃ māṃ viddhi bhūmipa ||15 ||
saṃsṛtīnāṃ mahācakraṃ krāmitavyaṃ vicakṣaṇaiḥ |
sa mudā prīṇate bhūpendriyakrīḍo'dhamo janaḥ ||16 ||
antarātmani yaḥ prīta ātmārāmo'khilapriyaḥ |
ātmatṛpto naro yaḥ syāttasyārtho naiva vidyate ||17
kāryākāryakṛtīnāṃ sa naivāpnoti śubhāśubhe |
kiṃcidasya na sādhyaṃ syātsarvajantuṣu sarvadā ||18 ||
ato'saktatayā bhūpa kartavyaṃ karma jantubhiḥ |
sakto'gatimavāpnoti māmavāpnoti tādṛśaḥ ||19 ||
paramāṃ siddhimāpannāḥ purā rājarṣayo dvijāḥ |
saṃgrahāya hi lokānāṃ tādṛśaṃ karma cārabhet ||20 ||
śreyānyatkurute karma tatkarotyakhilo janaḥ |
manute yatpramāṇaṃ sa tadevānusaratyasau ||21 ||
viṣṭape me na sādhyo'sti kaścidartho narādhipa |
anālabdhaśca labdhavyaḥ kurve karma tathāpyaham ||22 ||
na kurve'haṃ yadā karma svatantro'lasabhāvitaḥ |
kariṣyanti mama dhyānaṃ sarve varṇā mahāmate ||23 ||
bhaviṣyanti tato lokā ucchinnāḥ sampradāyinaḥ |
haṃtā syāmasya lokasya vidhātā saṃkarasya ca ||24 ||
kāmino hi sadā kāmairajñānātkarmakāriṇaḥ |
lokānāṃ saṃgrahāyaitadvidvān kuryādasaktadhīḥ ||25 ||
vibhinnatvamatiṃ jahyādajñānāṃ karmacāriṇām
|bhāgādguṇakarma
yogayuktaḥ sarvakarmāṇyarpayenmayi karmakṛt ||26 ||
avidyāguṇasācivyātkurvankarmāṇyatandritaḥ |
ahaṃkārādbhinnabuddhirahaṃkarteti yo'bravīt ||27 ||
yastu vettyātmanastattvaṃ vibhāgādguṇakarmaṇoḥ |
karaṇaṃ viṣaye vṛttamiti matvā na sajjate ||28 ||
kurvanti saphalaṃ karma guṇaistribhirvimohitāḥ |
aviśvastaḥ svātmadruho viśvavinnaiva laṃghayet ||29 ||
nityaṃ naimittikaṃ tasmānmayi karmārpayedbudhaḥ |
tyaktvāhaṃmamatābuddhiṃ parāṃ gatimavāpnuyāt ||30 ||
anīrṣyanto bhaktimanto ye mayoktamidaṃ śubham |
anutiṣṭhanti ye sarve muktāste'khilakarmabhiḥ ||31 ||
ye caiva nānutiṣṭhanti tvaśubhā hatacetasaḥ |
īrṣyamāṇānmahāmūḍhānnaṣṭāṃstānviddhi me ripūn ||32 ||
tulyaṃ prakṛtyā kurute karma yajjñānavānapi |
anuyāti ca tāmevāgrahastatra mudhā mataḥ ||33 ||
kāmaścaiva tathā krodhaḥ khānāmartheṣu jāyate |
naitayorvaśyatāṃ yāyādamyavidhvaṃsakau yataḥ ||34 ||
śasto'guṇo nijo dharmaḥ sāṃgādanyasya dharmataḥ |
nije tasminmṛtiḥ śreyo'paratra bhayadaḥ paraḥ ||35 ||
vareṇya uvāca -
pumānyatkurute pāpaṃ sa hi kena niyujyate |
akāṅkṣannapi heramba preritaḥ prabalādiva ||36 ||
śrīgajānana uvāca -
kāmakrodhau mahāpāpau guṇadvayasamudbhavau |
nayantau vaśyatāṃ lokān viddhyetau dveṣiṇau varau ||37 ||
āvṛṇoti yathā māyā jagadbāṣpo jalaṃ yathā |
varṣāmegho yathā bhānuṃ tadvatkāmo'khilāṃśca ruṭ ||38 ||
pratipattimato jñānaṃ chāditaṃ satataṃ dviṣā |
icchātmakena tarasā duṣpoṣyeṇa ca śuṣmiṇā ||39 ||
āśritya buddhimanasī indriyāṇi sa tiṣṭhati |
tairevācchāditaprajño jñāninaṃ mohayatyasau ||40 ||
tasmānniyamya tānyādau samanāṃsi naro jayet |
jñānavijñānayoḥ śāntikaraṃ pāpaṃ manobhavam ||41 ||
yatastāni parāṇyāhustebhyaśca paramaṃ manaḥ |
tato'pi hi parā buddhirātmā buddheḥ paro mataḥ ||42 ||
buddhvaivamātmanātmānaṃ saṃstabhyātmānamātmanā |
hatvā śatruṃ kāmarūpaṃ paraṃ padamavāpnuyāt ||43 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
karmayogo nāma dvitīyo'dhyāyaḥ ||
3
|| tṛtīyo'dhyāyaḥ ||
|| vijñānapratipādana ||
śrīgajānana uvāca -
purā sargādisamaye traiguṇyaṃ tritanūruham |
nirmāya cainamavadaṃ viṣṇave yogamuttamam ||1 ||
aryamṇe so'bravītso'pi manave nijasūnave |
tataḥ paramparāyātaṃ vidurenaṃ maharṣayaḥ ||2 ||
kālena bahunā cāyaṃ naṣṭaḥ syāccarame yuge |
aśraddheyo hyaviśvāsyo vigītavyaśca bhūmipa ||3 ||
evaṃ purātanaṃ yogaṃ śrutavānasi manmukhāt |
guhyādguhyataraṃ vedarahasyaṃ paramaṃ śubham ||4 ||
vareṇya uvāca -
sāṃprataṃ cāvatīrṇo'si garbhatastvaṃ gajānana |
proktavānkathametaṃ tvaṃ viṣṇave yogamuttamam ||5 ||
gaṇeśa uvāca -
anekāni ca te janmānyatītāni mamāpi ca |
saṃsmare tāni sarvāṇi na smṛtistava vartate ||6 ||
matta eva mahābāho jātā viṣṇvādayaḥ surāḥ |
mayyeva ca layaṃ yānti pralayeṣu yuge yuge ||7 ||
ahameva paro brahma mahārudro'hameva ca  |
ahameva jagatsarvaṃ sthāvaraṃ jaṅgamaṃ ca yat ||8 ||
ajo'vyayo'haṃ bhūtātmā'nādirīśvara eva ca |
āsthāya triguṇāṃ māyāṃ bhavāmi bahuyoniṣu ||9 ||
adharmopacayo dharmāpacayo hi yadā bhavet |
sādhūnsaṃrakṣituṃ duṣṭāṃstāḍituṃ saṃbhavāmyaham ||10 ||
ucchidyādharmanicayaṃ dharmaṃ saṃsthāpayāmi ca |
hanmi duṣṭāṃśca daityāṃśca nānālīlākaro mudā ||11 ||
varṇāśramānmunīnsādhūnpālaye bahurūpadhṛk |
evaṃ yo vetti saṃbhūtirmama divyā yuge yuge ||12 ||
tattatkarma ca vīryaṃ ca mama rūpaṃ samāsataḥ |
tyaktāhaṃmamatābuddhiṃ na punarbhūḥ sa jāyate ||13 ||
nirīhā nirbhiyoroṣā matparā madvyapāśrayāḥ |
vijñānatapasā śuddhā aneke māmupāgatāḥ ||14 ||
yena yena hi bhāvena saṃsevante narottamāḥ |
tathā tathā phalaṃ tebhyaḥ prayacchāmyavyayaḥ sphuṭam ||15 ||
janāḥ syuritare rājanmama mārgānuyāyinaḥ |
tathaiva vyavahāraṃ te sveṣu cānyeṣu kurvate ||16 ||
kurvanti devatāprītiṃ kāṅkṣantaḥ karmaṇāṃ phalam |
prāpnubaṃtīha te loke śīghraṃ siddhiṃ hi karmajām ||17 ||
catvāro hi mayā varṇā rajaḥsattvatamoṃ'śataḥ |
karmāṃśataśca saṃsṛṣṭā mṛtyuloke mayānagha ||18 ||
kartāramapi teṣāṃ māmakartāraṃ vidurbudhāḥ |
anādimīśvaraṃ nityamaliptaṃ karmajairguṇaiḥ ||19 ||
nirīhaṃ yo'bhijānāti karma badhnāti naiva tam |
cakruḥ karmāṇi buddhyaivaṃ pūrvaṃ pūrvaṃ mumukṣavaḥ ||20 ||
vāsanāsahitādādyātsaṃsārakāraṇāddṛḍhāt |
ajñānabandhanājjanturbuddhvāyaṃ mucyate'khilāt ||21 ||
tadakarma ca karmāpi kathayāmyadhunā tava |
yatra maunaṃ gatā mohādṛṣayo buddhiśālinaḥ ||22 ||
tattvaṃ mumukṣuṇā jñeyaṃ karmākarmavikarmaṇām |
trividhānīha karmāṇi sunimnaiṣāṃ gatiḥ priya ||23 ||
kriyāyāmakriyājñānamakriyāyāṃ kriyāmatiḥ |
yasya syātsa hi martye'smi~lloke mukto'khilārthakṛt ||24 ||
karmāṃkuraviyogena yaḥ karmāṇyārabhennaraḥ |
tattvadarśananirdagdhakriyamāhurbudhā budham ||25 ||
phalatṛṣṇāṃ vihāya syātsadā tṛpto visādhanaḥ |
udyukto'pi kriyāṃ kartuṃ kiṃcinnaiva karoti saḥ ||26 ||
nirīho nigṛhītātmā parityaktaparigrahaḥ |
kevalaṃ vai gṛhaṃ karmācarannāyāti pātakam ||27 ||
advandvo'matsaro bhūtvā siddhyasiddhyoḥ samaśca yaḥ |
yathāprāptyeha saṃtuṣṭaḥ kurvankarma na badhyate ||28 ||
akhilairviṣayairmukto jñānavijñānavānapi |
yajñārthaṃ tasya sakalaṃ kṛtaṃ karma vilīyate ||29 ||
ahamagnirhavirhotā hutaṃ yanmayi cārpitam |
brahmāptavyaṃ ca tenātha brahmaṇyeva yato rataḥ ||30 ||
yoginaḥ kecidapare diṣṭaṃ yajñaṃ vadanti ca |
brahmāgnireva yajño vai iti kecana menire ||31 ||
saṃyamāgnau pare bhūpa indriyāṇyupajuhvati |
khāgniṣvanye tadviṣayāṃśchabdādīnupajuhvati ||32 ||
prāṇānāmindriyāṇāṃ ca pare karmāṇi kṛtsnaśaḥ |
nijātmaratirūpe'gnau jñānadīpte prajuhvati ||33 ||
dravyeṇa tapasā vāpi svādhyāyenāpi kecana |
tīvravratena yatino jñānenāpi yajanti mām ||34 ||
prāṇe'pānaṃ tathā prāṇamapāne prakṣipanti ye |
ruddhvā gatīścobhayaste prāṇāyāmaparāyaṇāḥ ||35 ||
jitvā prāṇānprāṇagatīrupajuhvati teṣu ca |
evaṃ nānāyajñaratā yajñadhvaṃsitapātakāḥ ||36 ||
nityaṃ brahma prayāntyete yajñaśiṣṭāmṛtāśinaḥ |
ayajñakāriṇo loko nāyamanyaḥ kuto bhavet ||37 ||
kāyikāditridhābhūtānyajñānvede pratiṣṭhitān |
jñātvā tānakhilānbhūpa mokṣyase'khilabandhanāt ||38 ||
sarveṣāṃ bhūpa yajñānāṃ jñānayajñaḥ paro mataḥ |
akhilaṃ līyate karma jñāne mokṣasya sādhane ||39 ||
tajjñeyaṃ puruṣavyāghra praśnena natitaḥ satām |
śuśrūṣayā vadiṣyanti saṃtastattvaviśāradāḥ ||40 ||
nānāsaṃgāñjanaḥ kurvannaikaṃ sādhusamāgamam |
karoti tena saṃsāre bandhanaṃ samupaiti saḥ ||41 ||
satsaṃgādguṇasaṃbhūtirāpadāṃ laya eva ca |
svahitaṃ prāpyate sarvairiha loke paratra ca ||42 ||
itaratsulabhaṃ rājansatsaṃgo'tīva durlabhaḥ |
yajjñātvā punarvedhameti jñeyaṃ tatastataḥ ||43 ||
tataḥ sarvāṇi bhūtāni svātmanyevābhipaśyati |
atipāparato jaṃtustatastasmātpramucyate ||44 ||
dvividhānyapi karmāṇi jñānāgnirdahati kṣaṇāt |
prasiddho'gniryathā sarvaṃ bhasmatāṃ nayati kṣaṇāt ||45 ||
na jñānasamatāmeti pavitramitarannṛpa |
ātmanyevāvagacchanti yogātkālena yoginaḥ ||46 ||
bhaktimānindriyajayī tatparo jñānamāpnuyāt |
labdhvā tatparamaṃ mokṣaṃ svalpakālena yātyasau ||47 ||
bhaktihīno'śraddadhānaḥ sarvatra saṃśayī tu yaḥ |
tasya śaṃ nāpi vijñānamiha loko'tha vā paraḥ ||48 ||
ātmajñānarataṃ jñānanāśitākhilasaṃśayam |
yogāstākhilakarmāṇaṃ badhnanti bhūpa tāni na ||49 ||
jñānakhaḍgaprahāreṇa saṃbhūtāmajñatāṃ balāt |
chitvāntaḥsaṃśayaṃ tasmādyogayukto bhavennaraḥ ||50 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
vijñānapratipādano nāma tṛtīyo'dhyāyaḥ ||
4
|| caturtho'dhyāyaḥ ||
|| vaidhasaṃnyāsayogaḥ ||
vareṇya uvāca  -
saṃnyastiścaiva yogaśca karmaṇāṃ varṇyate tvayā |
ubhayorniścitaṃ tvekaṃ śreyo yadvada me prabho ||1 ||
śrīgajānana uvāca  -
kriyāyogo viyogaścāpyubhau mokṣasya sādhane |
tayormadhye kriyāyogastyāgāttasya viśiṣyate ||2 ||
dvandvaduḥkhasaho'dveṣṭā yo na kāṅkṣati kiṃcana |
mucyate bandhanātsadyo nityaṃ saṃnyāsavānsukham ||3 ||
vadanti bhinnaphalakau karmaṇastyāgasaṃgrahau |
mūḍhālpajñāstayorekaṃ saṃyuñjīta vicakṣaṇaḥ ||4 ||
yadeva prāpyate tyāgāttadeva yogataḥ phalam |
saṃgrahaṃ karmaṇo yogaṃ yo vindati sa vindati ||5 ||
kevalaṃ karmaṇāṃ nyāsaṃ saṃnyāsaṃ na vidurbudhāḥ |
kurvannanicchayā karma yogī brahmaiva jāyate ||6 ||
nirmalo yatacittātmā jitakho yogatatparaḥ |
ātmānaṃ sarvabhūtasthaṃ paśyankurvanna lipyate  ||7 ||
tattvavidyogayuktātmā karomīti na manyate |
ekādaśānīndriyāṇi kurvanti karmasaṃkhyayā ||8 ||
tatsarvamarpayedbrahmaṇyapi karma karoti yaḥ |
na lipyate puṇyapāpairbhānurjalagato yathā ||9 ||
kāyikaṃ vācikaṃ bauddhamaindriyaṃ mānasaṃ tathā |
tyaktvāśāṃ karma kurvanti yogajñāścittaśuddhaye ||10 ||
yogahīno naraḥ karma phalehayā karotyalam |
badhyate karmabījaiḥ sa tato duḥkhaṃ samaśnute ||11 ||
manasā sakalaṃ karma tyaktvā yogī sukhaṃ vaset |
na kurvankārayanvāpi nandanśvabhre supattane ||12 ||
na kriyā na ca kartṛtvaṃ kasya citsṛjyate mayā |
na kriyābījasamparkaḥ śaktyā tatkriyate'khilam ||13 ||
kasyacitpuṇyapāpāni na spṛśāmi vibhurnṛpa |
jñānamūḍhā vimuhyante mohenāvṛtabuddhayaḥ ||14 ||
vivekenātmano'jñānaṃ yeṣāṃ nāśitamātmanā |
teṣāṃ vikāśamāyāti jñānamādityavatparam ||15 ||
manniṣṭhā maddhiyo'tyantaṃ maccittā mayi tatparāḥ |
apunarbhavamāyānti vijñānānnāśitainasaḥ ||16 ||
jñānavijñānasaṃyukte dvije gavi gajādiṣu |
samekṣaṇā mahātmānaḥ paṇḍitāḥ śvapace śuni ||17 ||
vaśyaḥ svargo jagatteṣāṃ jīvanmuktāḥ samekṣaṇāḥ |
yato'doṣaṃ brahma samaṃ tasmāttairviṣayīkṛtam ||18 ||
priyāpriye prāpya harṣadveṣau ye prāpnuvanti na |
brahmāśritā asaṃmūḍhā brahmajñāḥ samabuddhayaḥ ||19 ||
vareṇya uvāca -
kiṃ sukhaṃ triṣu lokeṣu devagandharvayoniṣu |
bhagavankṛpayā tanme vada vidyāviśārada ||20 ||
śrīgajānana uvāca -
ānandamaśnute'saktaḥ svātmārāmo nijātmani |
avināśi sukhaṃ taddhi na sukhaṃ viṣayādiṣu ||21 ||
viṣayotthāni saukhyāni duḥkhānāṃ tāni hetavaḥ |
utpattināśayuktāni tatrāsakto na tattvavit ||22 ||
kāraṇe sati kāmasya krodhasya sahate ca yaḥ |
tau jetuṃ varṣmavirahātsa sukhaṃ ciramaśnute ||23 ||
antarniṣṭho'ntaḥprakāśo'ntaḥsukho'ntāratirlabhet |
asaṃdigdho'kṣayaṃ brahma sarvabhūtahitārthakṛt ||24 ||
jetāraḥ ṣaḍripūṇāṃ ye śamino daminastathā |
teṣāṃ samantato brahma svātmajñānāṃ vibhātyaho ||25 ||
āsaneṣu samāsīnastyaktvemānviṣayānbahiḥ |
saṃstabhya bhṛkuṭīmāste prāṇāyāmaparāyaṇaḥ ||26 ||
prāṇāyāmaṃ tu saṃrodhaṃ prāṇāpānasamudbhavam |
vadanti munayastaṃ ca tridhābhūtaṃ vipaścitaḥ ||27 ||
pramāṇaṃ bhedato viddhi laghumadhyamamuttamam |
daśabhirdvyadhikairvarṇaiḥ prāṇāyāmo laghuḥ smṛtaḥ ||28 ||
caturviṃśatyakṣaro yo madhyamaḥ sa udāhṛtaḥ |
ṣaṭtriṃśallaghuvarṇo ya uttamaḥ so'bhidhīyate ||29 ||
siṃhaṃ śārdūlakaṃ vāpi mattebhaṃ mṛdutāṃ yathā |
nayanti prāṇinastadvatprāṇāpānau susādhayet ||30 ||
pīḍayanti mṛgāste na lokānvaśyaṃ gatā nṛpa |
dahatyenastathā vāyuḥ saṃstabdho na ca tattanum ||31 ||
yathā yathā naraḥ kaścitsopānāvalimākramet |
tathā tathā vaśīkuryātprāṇāpānau hi yogavit ||32 ||
pūrakaṃ kumbhakaṃ caiva recakaṃ ca tato'bhyaset |
atītānāgatajñānī tataḥ syājjagatītale ||33 ||
prāṇāyāmairdvādaśabhiruttamairdhāraṇā matā |
yogastu dhāraṇe dve syādyogīśaste sadābhyaset ||34 ||
evaṃ yaḥ kurute rājaṃstrikālajñaḥ sa jāyate |
anāyāsena tasya syādvaśyaṃ lokatrayaṃ nṛpa ||35 ||
brahmarūpaṃ jagatsarvaṃ paśyati svāntarātmani |
evaṃ yogaśca saṃnyāsaḥ samānaphaladāyinau ||36 ||
jantūnāṃ hitakartāraṃ karmaṇāṃ phaladāyinam |
māṃ jñātvā muktimāpnoti trailokyasyeśvaraṃ vibhum ||37 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
vaidhasaṃnyāsayogo nāma caturtho'dhyāyaḥ ||
5
|| pañcamo'dhyāyaḥ ||
|| yogāvṛttipraśaṃsanaḥ ||
śrīgajānana uvāca  -
śrautasmārtāni karmāṇi phalaṃ necchansamācaret |
śastaḥ sa yogī rājendra akriyādyogamāśritāt ||1 ||
yogaprāptyai mahābāho hetuḥ karmaiva me matam |
siddhiyogasya saṃsiddhyai hetū śamadamau matau ||2 ||
indriyārthāṃśca saṃkalpya kurvansvasya ripurbhavet |
etānanicchanyaḥ kurvansiddhiṃ yogī sa siddhyati ||3 ||
suhṛtve ca riputve ca uddhāre caiva bandhane |
ātmanaivātmani hyātmā nātmā bhavati kaścana ||4 ||
māne'pamāne duḥkhe ca sukhe'suhṛdi sādhuṣu |
mitre'mitre'pyudāsīne dveṣye loṣṭhe ca kāñcane ||5 ||
samo jitātmā vijñānī jñānīndriyajayāvahaḥ |
abhyasetsatataṃ yogaṃ yadā yuktatamo hi saḥ ||6 ||
taptaḥ śrānto vyākulo vā kṣudhito vyagracittakaḥ |
kāle'tiśīte'tyuṣṇe vānilāgnyambusamākule ||7 ||
sadhvanāvatijīrṇe goḥsthāne sāgnau jalāntike |
kūpakūle śmaśāne ca nadyāṃ bhittau ca marmare ||8 ||
caitye savalmike deśe piśācādisamāvṛte |
nābhyasedyogavidyogaṃ yogadhyānaparāyaṇaḥ ||9 ||
smṛtilopaśca mūkatvaṃ bādhiryaṃ mandatā jvaraḥ |
jaḍatā jāyate sadyo doṣājñānāddhi yoginaḥ ||10 ||
ete doṣāḥ parityājyā yogābhyasanaśālinā |
anādare hi caiteṣāṃ smṛtilopādayo dhruvam ||11 ||
nātibhuñjansadā yogī nābhuñjannātinidritaḥ |
nātijāgratsiddhimeti bhūpa yogaṃ sadābhyasan ||12 ||
saṃkalpajāṃstyajetkāmānniyatāhārajāgaraḥ |
niyamya khagaṇaṃ buddhyā virameta śanaiḥ śanaiḥ ||13 ||
tatastataḥ kṛṣedetadyatra yatrānugacchati |
dhṛtyātmavaśagaṃ kuryāccittaṃ cañcalamādṛtaḥ ||14 ||
evaṃ kurvansadā yogī parāṃ nirvṛtimṛcchati |
viśvasminnijamātmānaṃ viśvaṃ ca svātmanīkṣate ||15 ||
yogena yo māmupaiti tamupaimyahamādarāt |
mocayāmi na muñcāmi tamahaṃ māṃ sa na tyajet ||16 ||
sukhe sukhetare dveṣe kṣudhi toṣe samastṛṣi |
ātmasāmyena bhūtāni sarvagaṃ māṃ ca vetti yaḥ ||17 ||
jīvanmuktaḥ sa yogīndraḥ kevalaṃ mayi saṃgataḥ |
brahmādīnāṃ ca devānāṃ sa vandyaḥ syājjagatraye ||18 ||
vareṇya uvāca -
dvividho'pi hi yogo'yamasaṃbhāvyo hi me mataḥ |
yato'ntaḥkaraṇaṃ duṣṭaṃ cañcalaṃ durgrahaṃ vibho ||19 ||
śrīgajānana uvāca -
yo nigrahaṃ durgrahasya manasaḥ samprakalpayet |
ghaṭīyantrasamādasmānmuktaḥ saṃsṛticakrakāt ||20 ||
viṣayaiḥ krakacairetatsaṃsṛṣṭaṃ cakrakaṃ dṛḍham |
janaśchettuṃ na śaknoti karmakīlaḥ susaṃvṛtam ||21 ||
atiduḥkhaṃ ca vairāgyaṃ bhogādvaitṛṣṇyameva ca |
guruprasādaḥ satsaṅga upāyāstajjaye amī ||22 ||
abhyāsādvā vaśīkuryānmano yogasya siddhaye |
vareṇya durlabho yogo vināsya manaso jayāt ||23 ||
vareṇya uvāca -
yogabhraṣṭasya ko lokaḥ kā gatiḥ kiṃ phalaṃ bhavet |
vibho sarvajña me chindhi saṃśayaṃ buddhicakrabhṛt ||24 ||
śrīgajānana uvāca -
divyadehadharo yogādbhraṣṭaḥ svarbhogamuttamam |
bhuktvā yogikule janma labhecchuddhimatāṃ kule ||25 ||
punaryogī bhavatyeṣa saṃskārātpūrvakarmajāt |
na hi puṇyakṛtāṃ kaścinnarakaṃ pratipadyate ||26 ||
jñānaniṣṭhāttaponiṣṭhātkarmaniṣṭhānnarādhipa |
śreṣṭho yogī śreṣṭhatamo bhaktimānmayi teṣu yaḥ ||27 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
yogāvṛttipraśaṃsano nāma pañcamo'dhyāyaḥ ||
6
|| ṣaṣṭho'dhyāyaḥ ||
|| buddhiyogaḥ ||
śrīgajānana uvāca -
īdṛśaṃ viddhi me tattvaṃ madgatenāntarātmanā |
yajjñātvā māmasandigdhaṃ vetsi mokṣyasi sarvagam ||1 ||
tatte'haṃ śa‍ṛṇu vakṣyāmi lokānāṃ hitakāmyayā |
asti jñeyaṃ yato nānyanmukteśca sādhanaṃ nṛpa ||2 ||
jñeyā matprakṛtiḥ pūrvaṃ tataḥ syāṃ jñānagocaraḥ |
tato vijñānasampattirmayi jñāte nṛṇāṃ bhavet ||3 ||
kvanalau khamahaṅkāraḥ kaṃ cittaṃ dhīsamīraṇau |
ravīndū yāgakṛccaikādaśadhā prakṛtirmama ||4 ||
anyāṃ matprakṛtiṃ vṛddhā munayaḥ saṃgiranti ca |
tathā triviṣṭapaṃ vyāptaṃ jīvatvaṃ gatayānayā ||5 ||
ābhyāmutpādyate sarvaṃ carācaramayaṃ jagat |
saṃgādviśvasya saṃbhūtiḥ paritrāṇaṃ layo'pyaham ||6 ||
tattvametanniboddhuṃ me yatate kaścideva hi |
varṇāśramavatāṃ puṃsāṃ purā cīrṇena karmaṇā ||7 ||
sākṣātkaroti māṃ kaścidyatnavatsvapi teṣu ca |
matto'nyannekṣate kiṃcinmayi sarvaṃ ca vīkṣate ||8 ||
kṣitau sugandharūpeṇa tejorūpeṇa cāgniṣu |
prabhārūpeṇa pūṣṇyabje rasarūpeṇa cāpsu ca ||9 ||
dhītapobalināṃ cāhaṃ dhīstapobalameva ca |
trividheṣu vikāreṣu madutpanneṣvahaṃ sthitaḥ ||10 ||
na māṃ vindati pāpīyānmāyāmohitacetanaḥ |
trivikārā mohayati prakṛtirme jagattrayam ||11 ||
yo me tattvaṃ vijānāti mohaṃ tyajati so'khilam |
anekairjanmabhiścaivaṃ jñātvā māṃ mucyate tataḥ ||12 ||
anye nānāvidhāndevānbhajante tānvrajanti te |
yathā yathā matiṃ kṛtvā bhajate māṃ jano'khilaḥ ||13 ||
tathā tathāsya taṃ bhāvaṃ pūrayāmyahameva tam |
ahaṃ sarvaṃ vijānāmi māṃ na kaścidvibudhyate ||14 ||
avyaktaṃ vyaktimāpannaṃ na viduḥ kāmamohitāḥ |
nāhaṃ prakāśatāṃ yāmi ajñānāṃ pāpakarmaṇām ||15 ||
yaḥ smṛtvā tyajati prāṇamante māṃ śraddhayānvitaḥ |
sa yātyapunarāvṛttiṃ prasādānmama bhūbhuja ||16 ||
yaṃ yaṃ devaṃ smaranbhaktyā tyajati svaṃ kalevaram |
tattatsālokyamāyāti tattadbhaktyā narādhipa ||17 ||
ataścāharniśaṃ bhūpa smartavyo'nekarūpavān |
sarveṣāmapyahaṃ gamyaḥ srotasāmarṇavo yathā ||18 ||
brahmaviṣṇuśivendrādyā~llokānprāpya punaḥ patet |
yo māmupaityasaṃdigdhaḥ patanaṃ tasya na kvacit ||19 ||
ananyaśaraṇo yo māṃ bhaktyā bhajati bhūmipa |
yogakṣemau ca tasyāhaṃ sarvadā pratipādaye ||20 ||
dvividhā gatiruddiṣṭā śuklā kṛṣṇā nṛṇāṃ nṛpa |
ekayā paramaṃ brahma parayā yāti saṃsṛtim ||21 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
buddhiyogo nāma ṣaṣṭho'dhyāyaḥ ||
7
|| saptamo'dhyāyaḥ ||
|| upāsanā yogaḥ ||
vareṇya uvāca -
kā śuklā gatiruddiṣṭā kā ca kṛṣṇā gajānana |
kiṃ brahma saṃsṛtiḥ kā me vaktumarhasyanugrahāt ||1 ||
śrīgajānana uvāca -
agnirjyotirahaḥ śuklā karmārhamayanaṃ gatiḥ |
cāndraṃ jyotistathā dhūmo rātriśca dakṣiṇāyanam ||2 ||
kṛṣṇaite brahmasaṃsṛtyoravāpteḥ kāraṇaṃ gatī |
dṛśyādṛśyamidaṃ sarvaṃ brahmaivetyavadhāraya ||3 ||
kṣaraṃ pañcātmakaṃ viddhi tadantarakṣaraṃ smṛtam |
ubhābhyāṃ yadatikrāntaṃ śuddhaṃ viddhi sanātanam ||4 ||
anekajanmasaṃbhūtiḥ saṃsṛtiḥ parikīrtitā |
saṃsṛtiṃ prāpnuvantyete ye tu māṃ gaṇayanti na ||5 ||
ye māṃ samyagupāsante paraṃ brahma prayānti te |
dhyānādyairupacārairmāṃ tathā pañcāmṛtādibhiḥ ||6 ||
snānavastrādyalaṃkārasugandhadhūpadīpakaiḥ |
naivedyaiḥ phalatāṃbūlairdakṣiṇābhiśca yo'rcayet ||7 ||
bhaktyaikacetasā caiva tasyeṣṭaṃ pūrayāmyaham |
evaṃ pratidinaṃ bhaktyā madbhakto māṃ samarcayet ||8 ||
athavā mānasīṃ pūjāṃ kurvīta sthiracetasā |
athavā phalapatrādyaiḥ puṣpamūlajalādibhiḥ ||9 ||
pūjayenmāṃ prayatnena tattadiṣṭaṃ phalaṃ labhet |
trividhāsvapi pūjāsu śreyasī mānasī matā ||10 ||
sāpyuttamā matā pūjānicchayā yā kṛtā mama |
brahmacārī gṛhastho vā vānaprastho yatiśca yaḥ ||11 ||
ekāṃ pūjāṃ prakurvāṇo'pyanyo vā siddhimṛcchati |
madanyadevaṃ yo bhaktyā dviṣanmāmanyadevatām ||12 ||
so'pi māmeva yajate paraṃ tvavidhito nṛpa |
yo hyanyadevatāṃ māṃ ca dviṣannanyāṃ samarcayet ||13 ||
yāti kalpasahasraṃ sa nirayānduḥkhabhāk sadā |
bhūtaśuddhiṃ vidhāyādau prāṇānāṃ sthāpanaṃ tataḥ ||14 ||
ākṛṣya cetaso vṛttiṃ tato nyāsaṃ upakramet |
kṛtvāntarmātṛkānyāsaṃ bahiścātha ṣaḍaṅgakam ||15 ||
nyāsaṃ ca mūlamantrasya tato dhyātvā japenmanum |
sthiracitto japenmantraṃ yathā gurumukhāgatam ||16 ||
japaṃ nivedya devāya stutvā stotrairanekadhā |
evaṃ māṃ ya upāsīta sa labhenmokṣamavyayam ||17 ||
ya upāsanayā hīno dhiṅnaro vyarthajanmabhāk |
yajño'hamauṣadhaṃ manro'gnirājyaṃ ca havirhutam ||18 ||
dhyānaṃ dhyeyaṃ stutiṃ stotraṃ natirbhaktirupāsanā |
trayījñeyaṃ pavitraṃ ca pitāmahapitāmahaḥ ||19 ||
oṃkāraḥ pāvanaḥ sākṣī prabhurmitraṃ gatirlayaḥ |
utpattiḥ poṣako bījaṃ śaraṇaṃ vāsa eva ca ||20 ||
asanmṛtyuḥ sadamṛtamātmā brahmāhameva ca |
dānaṃ homastapo bhaktirjapaḥ svādhyāya eva ca ||21 ||
yadyatkaroti tatsarvaṃ sa me mayi nivedayet |
yoṣito'tha durācārāḥ pāpāstraivarṇikāstathā ||22 ||
madāśrayā vimucyante kiṃ madbhaktyā dvijādayaḥ |
na vinaśyati madbhakto jñātvemā madvibhūtayaḥ ||23 ||
prabhavaṃ me vibhūtiśca na devā ṛṣayo viduḥ |
nānāvibhūtibhirahaṃ vyāpya viśvaṃ pratiṣṭhitaḥ ||24 ||
yadyacchreṣṭhatamaṃ loke sa vibhūtirnibodha me ||25 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
upāsanāyogo nāma saptamo'dhyāyaḥ ||
8
|| aṣṭamo'dhyāyaḥ ||
|| viśvarūpadarśana ||
vareṇya uvāca -
bhagavannārado mahyaṃ tava nānā vibhūtayaḥ |
uktavāṃstā ahaṃ veda na sarvāḥ so'pi vetti tāḥ ||1 ||
tvameva tattvataḥ sarvā vetsi tā dviradānana |
nijaṃ rūpamidānīṃ me vyāpakaṃ cāru darśaya ||2 ||
śrīgajānana uvāca -
ekasminmayi paśya tvaṃ viśvametaccarācaram |
nānāścaryāṇi divyāni purā'dṛṣṭāni kenacit ||3 ||
jñānacakṣurahaṃ te'dya sṛjāmi svaprabhāvataḥ |
carmacakṣuḥ kathaṃ paśyenmāṃ vibhuṃ hyajamavyayam ||4 ||
ka uvāca -
tato rājā vareṇyaḥ sa divyacakṣuravaikṣata |
īśituḥ paramaṃ rūpaṃ gajāsyasya mahādbhutam ||5 ||
asaṃkhyavaktraṃ lalitamasaṃkhyāṃghrikaraṃ mahat |
anuliptaṃ sugandhena divyabhūṣāmbarasrajam ||6 ||
asaṃkhyanayanaṃ koṭisūryaraśmidhṛtāyudham |
tadvarṣmaṇi trayo lokā dṛṣṭāstena pṛthagvidhāḥ ||7 ||
dṛṣṭvaiśvaraṃ paraṃ rūpaṃ praṇamya sa nṛpo'bravīt |
vareṇya uvāca -
vīkṣe'haṃ tava dehe'smindevānṛṣigaṇānpitṝn ||8 ||
pātālānāṃ samudrāṇāṃ dvīpānāṃ caiva bhūbhṛtām |
maharṣīṇāṃ saptakaṃ ca nānārthaiḥ saṃkulaṃ vibho ||9 ||
bhuvo'ntarikṣasvargāṃśca manuṣyoragarākṣasān |
brahmāviṣṇumaheśendrāndevānjantūnanekadhā ||10 ||
anādyanantaṃ lokādimanantabhujaśīrṣakam |
pradīptānalasaṃkāśamaprameyaṃ purātanam ||11 ||
kirīṭakuṇḍaladharaṃ durnirīkṣyaṃ mudāvaham |
etādṛśaṃ ca vīkṣe tvāṃ viśālavakṣasaṃ prabhum ||12 ||
suravidyādharairyakṣaiḥ kinnarairmunimānuṣaiḥ |
nṛtyadbhirapsarobhiśca gandharvairgānatatparaiḥ ||13 ||
vasurudrādityagaṇaiḥ siddhaiḥ sādhyairmudā yutaiḥ |
sevyamānaṃ mahābhaktyā vīkṣyamāṇaṃ suvismitaiḥ ||14 ||
vettāramakṣaraṃ vedyaṃ dharmagoptāramīśvaram |
pātālāni diśaḥ svargānbhuvaṃ vyāpyā'khilaṃ sthitam ||15 ||
bhītā lokāstathā cāhamevaṃ tvāṃ vīkṣya rūpiṇam |
nānādaṃṣṭrākarālaṃ ca nānāvidyāviśāradam ||16 ||
pralayānaladīptāsyaṃ jaṭilaṃ ca nabhaḥspṛśam |
dṛṣṭvā gaṇeśa te rūpamahaṃ bhrānta ivābhavam ||17 ||
devā manuṣyanāgādyāḥ khalāstvadudareśayāḥ |
nānāyonibhujaścānte tvayyeva praviśanti ca ||18 ||
abdherutpadyamānāste yathājīmūtabindavaḥ |
tvamindro'gniryamaścaiva nirṛtirvaruṇo marut ||19 ||
guhyakeśastatheśānaḥ somaḥ sūryo'khilaṃ jagat |
namāmi tvāmataḥ svāminprasādaṃ kuru me'dhunā ||20 ||
darśayasva nijaṃ rūpaṃ saumyaṃ yatpūrvamīkṣitam |
ko veda līlāste bhūman kriyamāṇā nijecchayā ||21 ||
anugrahānmayā dṛṣṭamaiśvaraṃ rūpamīdṛśam |
jñānacakṣuryato dattaṃ prasannena tvayā mama ||22 ||
śrīgajānana uvāca -
nedaṃ rūpaṃ mahābāho mama paśyantyayoginaḥ |
sanakādyā nāradādyāḥ paśyanti madanugrahāt || 23 ||
caturvedārthatattvajñāḥ sarvaśāstraviśāradāḥ |
yajñadānataponiṣṭhā na me rūpaṃ vidanti te ||24 ||
śakyo'haṃ vīkṣituṃ jñātuṃ praveṣṭuṃ bhaktibhāvataḥ |
tyaja bhītiṃ ca mohaṃ ca paśya māṃ saumyarūpiṇam ||25 ||
madbhakto matparaḥ sarvasaṃgahīno madarthakṛt |
niṣkrodhaḥ sarvabhūteṣu samo māmeti bhūbhuja ||26 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
viśvarūpadarśano nāmāṣṭamo'dhyāyaḥ ||
9
|| navamo'dhyāyaḥ ||
|| kṣetrajñātṛjñeyavivekayogaḥ ||
vareṇya uvāca -
ananyabhāvastvāṃ samyaṅmūrtimantamupāsate |
yo'kṣaraṃ paramavyaktaṃ tayoḥ kaste mato'dhikaḥ ||1 ||
asi tvaṃ sarvavitsākṣī bhūtabhāvana īśvaraḥ |
atastvāṃ paripṛcchāmi vada me kṛpayā vibho ||2 ||
śrīgajānana uvāca -
yo māṃ mūrtidharaṃ bhaktyā madbhaktaḥ parisevate |
sa me mānyo'nanyabhaktirniyujya hṛdayaṃ mayi ||3 ||
khagaṇaṃ svavaśaṃ kṛtvākhilabhūtahitārthakṛt |
dhyeyamakṣaramavyaktaṃ sarvagaṃ kūṭagaṃ sthiram ||4 ||
so'pi māmetyanirdeśyaṃ matparo ya upāsate |
saṃsārasāgarādasmāduddharāmi tamapyaham ||5 ||
avyaktopāsanādduḥkhamadhikaṃ tena labhyate |
vyaktasyopāsanātsādhyaṃ tadevāvyaktabhaktitaḥ ||6 ||
bhaktiścaivādaraścātra kāraṇaṃ paramaṃ matam |
sarveṣāṃ viduṣāṃ śreṣṭho hyakiṃcijjño'pi bhaktimān ||7 ||
bhajanbhaktyā vihīno yaḥ sa cāṇḍālo'bhidhīyate |
cāṇḍālo'pi bhajanbhaktyā brāhmaṇebhyo'dhiko mataḥ ||8 ||
śukādyāḥ sanakādyāśca purā muktā hi bhaktitaḥ |
bhaktyaiva māmanuprāptā nāradādyāścirāyuṣaḥ ||9 ||
ato bhaktyā mayi mano vidhehi buddhimeva ca |
bhaktyā yajasva māṃ rājaṃstato māmeva yāsyasi ||10 ||
asamartho'rpituṃ svāntaṃ evaṃ mayi narādhipa |
abhyāsena ce yogena tato gantuṃ yatasva mām ||11 ||
tatrāpi tvamaśaktaścetkuru karma madarpaṇam |
māmanugrahataścaivaṃ parāṃ nirvṛtimeṣyasi ||12 ||
athaitadapyanuṣṭhātuṃ na śakto'si tadā kuru |
prayatnataḥ phalatyāgaṃ trividhānāṃ hi karmaṇām ||13 ||
śreyasī buddhirāvṛttestato dhyānaṃ paraṃ matam |
tato'khilaparityāgastataḥ śāntirgarīyasī ||14 ||
nirahaṃmamatābuddhiradveṣaḥ śaraṇaḥ samaḥ |
lābhālābhe sukhe duḥkhe mānāmāne sa me priyaḥ ||15 ||
yaṃ vīkṣya na bhayaṃ yāti janastasmānna ca svayam |
udvegabhīḥ kopamudbhīrahito yaḥ sa me priyaḥ ||16 ||
ripau mitre'tha garhāyāṃ stutau śoke samaḥ samut |
maunī niścaladhībhaktirasaṃgaḥ sa ca me priyaḥ ||17 ||
saṃśīlayati yaścainamupadeśaṃ mayā kṛtam |
sa vandyaḥ sarvalokeṣu muktātmā me priyaḥ sadā ||18 ||
aniṣṭāptau ca na dveṣṭīṣṭaprāptau ca na tuṣyati |
kṣetratajjñau ca yo vetti same priyatamo bhavet ||19 ||
vareṇya uvāca -
kiṃ kṣetraṃ kaśca tadvetti kiṃ tajjñānaṃ gajānana |
etadācakṣva mahyaṃ tvaṃ pṛcchate karuṇāmbudhe ||20 ||
śrīgajānana uvāca -
pañca bhūtāni tanmātrāḥ pañca karmendriyāṇi ca |
ahaṃkāro mano buddhiḥ pañca jñānendriyāṇi ca ||21 ||
icchāvyaktaṃ dhṛtidveṣau sukhaduḥkhe tathaiva ca |
cetanāsahitaścāyaṃ samūhaḥ kṣetramucyate ||22 ||
tajjñaṃ tvaṃ viddhi māṃ bhūpa sarvāntaryāmiṇaṃ vibhum |
ayaṃ samūho'haṃ cāpi yajjñānaviṣayau nṛpa ||23 ||
ārjavaṃ guruśuśrūṣā viraktiścendriyārthataḥ |
śaucaṃ kṣāntiradambhaśca janmādidoṣavīkṣaṇam ||24 ||
samadṛṣṭirdṛḍhā bhaktirekāntitvaṃ śamo damaḥ |
etairyacca yutaṃ jñānaṃ tajjñānaṃ viddhi bāhuja ||25 ||
tajjñānaviṣayaṃ rājanbravīmi tvaṃ śa‍ṛṇuṣva me |
yajjñātvaiti ca nirvāṇaṃ muktvā saṃsṛtisāgaram ||26 ||
yadanādīndriyairhīnaṃ guṇabhugguṇavarjitam |
avyaktaṃ sadasadbhinnamindriyārthāvabhāsakam || 27 ||
viśvabhṛccākhilavyāpi tvekaṃ nāneva bhāsate |
bāhyābhyantarataḥ pūrṇamasaṃgaṃ tamasaḥ param ||28 ||
durjñeyaṃ cātisūkṣmatvāddīptānāmapi bhāsakam |
jñeyametādṛśaṃ viddhi jñānagamyaṃ purātanam ||29 ||
etadeva paraṃ brahma jñeyamātmā paro'vyayaḥ |
guṇānprakṛtijānbhuṅkte puruṣaḥ prakṛteḥ paraḥ ||30 ||
guṇaistribhiriyaṃ dehe badhnāti puruṣaṃ dṛḍham |
yadā prakāśaḥ śāntiśca vṛddhe sattvaṃ tadādhikam ||31 ||
lobho'śamaḥ spṛhārambhaḥ karmaṇāṃ rajaso guṇaḥ |
moho'pravṛttiścājñānaṃ pramādastamaso guṇaḥ ||32 ||
sattvādhikaḥ sukhaṃ jñānaṃ karmasaṃgaṃ rajo'dhikaḥ |
tamo'dhikaśca labhate nidrālasyaṃ sukhetarat ||33 ||
eṣu triṣu pravṛddheṣu muktisaṃsṛtidurgatīḥ |
prayānti mānavā rājaṃstasmātsattvayuto bhava ||34 ||
tataśca sarvabhāvena bhaja tvaṃ māṃ nareśvara |
bhaktyā cāvyabhicāriṇyā sarvatraiva ca saṃsthitam ||35 ||
agnau sūrye tathā some yacca tārāsu saṃsthitam |
viduṣi brāhmaṇe tejo viddhi tanmāmakaṃ nṛpa ||36 ||
ahamevākhilaṃ viśvaṃ sṛjāmi visṛjāmi ca |
auṣadhīstejasā sarvā viśvaṃ cāpyāyayāmyaham ||37 ||
sarvendriyāṇyadhiṣṭhāya jāṭharaṃ ca dhanaṃjayam |
bhunajmi cākhilānbhogānpuṇyapāpavivarjitaḥ ||38 ||
ahaṃ viṣṇuśca rudraśca brahmā gaurī gaṇeśvaraḥ |
indrādyā lokapālāśca mamaivāṃśasamudbhavāḥ ||39 ||
yena yena hi rūpeṇa jano māṃ paryupāsate |
tathā tathā darśayāmi tasmai rūpaṃ subhaktitaḥ ||40 ||
iti kṣetraṃ tathā jñātā jñānaṃ jñeyaṃ mayeritam |
akhilaṃ bhūpate samyagupapannāya pṛcchate ||41 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
kṣetrajñātṛjñeyavivekayogo nāma navamo'dhyāyaḥ ||
10
|| daśamo'dhyāyaḥ ||
|| upadeśayogaḥ ||
śrīgajānana uvāca -
daivyāsurī rākṣasī ca prakṛtistrividhā nṛṇām |
tāsāṃ phalāni cinhāni saṃkṣepātte'dhunā bruve ||1 ||
ādyā saṃsādhayenmuktiṃ dve pare bandhanaṃ nṛpa |
cinhaṃ bravīmi cādyāyāstanme nigadataḥ śa‍ṛṇu ||2 ||
apaiśūnyaṃ dayā'krodhaścāpalyaṃ dhṛtirārjavam |
tejo'bhayamahiṃsā ca kṣamā śaucamamānitā ||3 ||
ityādi cinhamādyāyā āsuryāḥ śa‍ṛṇu sāṃpratam |
ativādo'bhimānaśca darpo jñānaṃ sakopatā ||4 ||
āsuryā evamādyāni cinhāni prakṛternṛpa |
niṣṭhuratvaṃ mado moho'haṃkāro garva eva ca ||5 ||
dveṣo hiṃsā'dayā krodha auddhatyaṃ durvinītatā |
ābhicārikakartṛtvaṃ krūrakarmaratistathā ||6 ||
aviśvāsaḥ satāṃ vākye'śucitvaṃ karmahīnatā |
nindakatvaṃ ca vedānāṃ bhaktānāmasuradviṣām ||7 ||
muniśrotriyaviprāṇāṃ tathā smṛtipurāṇayoḥ |
pākhaṇḍavākye viśvāsaḥ saṃgatirmalinānmanām ||8 ||
sadambhakarmakartṛtvaṃ spṛhā ca paravastuṣu |
anekakāmanāvattvaṃ sarvadā'nṛtabhāṣaṇam ||9 ||
parotkarṣāsahiṣṇutvaṃ parakṛtyaparāhatiḥ |
ityādyā bahavaścānye rākṣasyāḥ prakṛterguṇāḥ ||10 ||
pṛthivyāṃ svargaloke ca parivṛtya vasanti te |
madbhaktirahitā lokā rākṣasīṃ prakṛtiṃ śritāḥ ||11 ||
tāmasīṃ ye śritā rājanyānti te rauravaṃ dhruvam |
anirvācyaṃ ca te duḥkhaṃ bhuñjate tatra saṃsthitāḥ ||12 |
daivānniḥsṛtya narakājjāyante bhuvi kubjakāḥ |
jātyandhāḥ paṅgavo dīnā hīnajātiṣu te nṛpa ||13 ||
punaḥ pāpasamācārā mayyabhaktāḥ patanti te |
utpatanti hi madbhaktā yāṃ kāṃcidyonimāśritāḥ ||14 ||
labhante svargatiṃ yajñairanyairdharmaśca bhūmipa |
sulabhāstāḥ sakāmānāṃ mayi bhaktiḥ sudurlabhā ||15 ||
vimūḍhā mohajālena baddhāḥ svena ca karmaṇā |
ahaṃ hantā ahaṃ kartā ahaṃ bhokteti vādinaḥ ||16 ||
ahameveśvaraḥ śāstā ahaṃ vettā ahaṃ sukhī |
etādṛśī matirnṝṇāmadhaḥ pātayatīha tān ||17 ||
tasmādetatsamutsṛjya daivīṃ prakṛtimāśraya |
bhaktiṃ kuru madīyāṃ tvamaniśaṃ dṛḍhacetasā ||18 ||
sāpi bhaktistridhā rājansāttvikī rājasītarā |
yaddevānbhajate bhaktyā sāttvikī sā matā śubhā ||19 ||
rājasī sā tu vijñeyā bhaktirjanmamṛtipradā |
yadyakṣāṃścaiva rakṣāṃsi yajante sarvabhāvataḥ ||20 ||
vedenāvihitaṃ krūraṃ sāhaṃkāraṃ sadambhakam |
bhajante pretabhūtādīnkarma kurvanti kāmukam ||21 ||
śoṣayanto nijaṃ dehamantaḥsthaṃ māṃ dṛḍhāgrahāḥ |
tāmasyetādṛśī bhaktirnṛṇāṃ sā nirayapradā ||22 ||
kāmo lobhastathā krodho dambhaścatvāra ityamī |
mahādvārāṇi vīcīnāṃ tasmādetāṃstu varjayet ||23 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
upadeśayogo nāma daśamo'dhyāyaḥ ||
11
|| ekādaśo'dhyāyaḥ ||
|| trividhavastuvivekanirūpaṇam ||
śrīgajānana uvāca -
tapo'pi trividhaṃ rājankāyikādiprabhedataḥ |
ṛjutārjavaśaucāni brahmacaryamahiṃsanam ||1 ||
guruvijñadvijātīnāṃ pūjanaṃ cāsuradviṣām |
svadharmapālanaṃ nityaṃ kāyikaṃ tapa īdṛśam ||2 ||
marmāspṛkca priyaṃ vākyamanudvegaṃ hitaṃ ṛtam |
adhītirvedaśāstrāṇāṃ vācikaṃ tapa īdṛśam ||3 ||
antaḥprasādaḥ śāntatvaṃ maunamindriyanigrahaḥ |
nirmalāśayatā nityaṃ mānasaṃ tapa īdṛśam ||4 ||
akāmataḥ śraddhayā ca yattapaḥ sāttvikaṃ ca tat |
ṛdhyai satkārapūjārthaṃ sadambhaṃ rājasaṃ tapaḥ ||5 ||
tadasthiraṃ janmamṛtī prayacchati na saṃśayaḥ |
parātmapīḍakaṃ yacca tapastāmasamucyate ||6 ||
vidhivākyapramāṇārthaṃ satpātre deśakālataḥ |
śraddhayā dīyamānaṃ yaddānaṃ tatsāttvikaṃ matam ||7 ||
upakāraṃ phalaṃ vāpi kāṅkṣadbhirdīyate naraiḥ |
kleśato dīyamānaṃ vā bhaktyā rājasamucyate ||8 ||
akāladeśato'pātre'vajñayā dīyate tu yat |
asatkārācca yaddattaṃ taddānaṃ tāmasaṃ smṛtam ||9 ||
jñānaṃ ca trividhaṃ rājan śa‍ṛṇuṣva sthiracetasā |
tridhā karma ca kartāraṃ bravīmi te prasaṃgataḥ ||10 ||
nānāvidheṣu bhūteṣu māmekaṃ vīkṣate tu yaḥ |
nāśavatsu ca nityaṃ māṃ tajjñānaṃ sātvikaṃ nṛpa ||11 ||
teṣu vetti pṛthagbhūtaṃ vividhaṃ bhāvamāśritaḥ |
māmavyayaṃ ca tajjñānaṃ rājasaṃ parikīrtitam ||12 ||
hetuhīnamasatyaṃ ca dehātmaviṣayaṃ ca yat |
asadalpārthaviṣayaṃ tāmasaṃ jñānamucyate ||13 ||
bhedatastrividhaṃ karma viddhi rājanmayeritam |
kāmanādveṣadambhairyadrahitaṃ nityakarma yat ||14 ||
kṛtaṃ vinā phalecchāṃ yatkarma sāttvikamucyate |
yadbahukleśataḥ karma kṛtaṃ yacca phalecchayā ||15 ||
kriyamāṇaṃ nṛbhirdambhātkarma rājasamucyate |
anapekṣya svaśaktiṃ yadarthakṣayakaraṃ ca yat ||16 ||
ajñānātkriyamāṇaṃ yatkarma tāmasamīritam |
kartāraṃ trividhaṃ viddhi kathyamānaṃ mayā nṛpa ||17 ||
dhairyotsāhī samo'siddhau siddhau cāvikriyastu yaḥ |
ahaṃkāravimukto yaḥ sa kartā sāttviko nṛpa ||18 ||
kurvanharṣaṃ ca śokaṃ ca hiṃsāṃ phalaspṛhāṃ ca yaḥ |
aśucirlubdhako yaśca rājaso'sau nigadyate ||19 ||
pramādājñānasahitaḥ parocchedaparaḥ śaṭhaḥ |
alasastarkavānyastu kartāsau tāmaso mataḥ ||20 ||
sukhaṃ ca trividhaṃ rājanduḥkhaṃ ca kramataḥ śa‍ṛṇu |
sāttvikaṃ rājasaṃ caiva tāmasaṃ ca mayocyate ||21 ||
viṣavadbhāsate pūrvaṃ duḥkhasyāntakaraṃ ca yat |
iṣyamānaṃ tathā''vṛttyā yadante'mṛtavadbhavet ||22 ||
prasādātsvasya buddheryatsāttvikaṃ sukhamīritam |
viṣayāṇāṃ tu yo bhogo bhāsate'mṛtavatpurā ||23 ||
hālāhalamivānte yadrājasaṃ sukhamīritam |
tandripramādasaṃbhūtamālasyaprabhavaṃ ca yat ||24 ||
sarvadā mohakaṃ svasya sukhaṃ tāmasamīdṛśam |
na tadasti yadetairyanmuktaṃ syāttrividhairguṇaiḥ ||25 ||
rājanbrahmāpi trividhamoṃtatsaditi bhedataḥ |
trilokeṣu tridhā bhūtamakhilaṃ bhūpa vartate ||26 ||
brahmakṣatriyaviṭśūdrāḥ svabhāvādbhinnakarmiṇaḥ |
tāni teṣāṃ tu karmāṇi saṃkṣepātte'dhunā vade ||27 ||
antarbāhyendriyāṇāṃ ca vaśyatvamārjavaṃ kṣamā |
nānātapāṃsi śaucaṃ ca dvividhaṃ jñānamātmanaḥ ||28 ||
vedaśāstrapurāṇānāṃ smṛtīnāṃ jñānameva ca |
anuṣṭhānaṃ tadarthānāṃ karma brāhmamudāhṛtam ||29 ||
dārḍhyaṃ śauryaṃ ca dākṣyaṃ ca yuddhe pṛṣṭhāpradarśanam |
śaraṇyapālanaṃ dānaṃ dhṛtistejaḥ svabhāvajam ||30 ||
prabhutā mana aunatyaṃ sunītirlokapālanam |
pañcakarmādhikāritvaṃ kṣātraṃ karma samīritam ||31 ||
nānāvastukrayo bhūmeḥ karṣaṇaṃ rakṣaṇaṃ gavām |
tridhā karmādhikāritvaṃ vaiśyakarma samīritam ||32 ||
dānaṃ dvijānāṃ śuśrūṣā sarvadā śivasevanam |
etādṛśaṃ naravyāghra karma śaudramudīritam ||33 ||
svasvakarmaratā ete mayyarpyākhilakāriṇaḥ |
matprasādātsthiraṃ sthānaṃ yānti te paramaṃ nṛpa || 34||
iti te kathito rājanprasādādyogauttamaḥ |
sāṃgopāṃgaḥ savistāro'nādisiddho mayā priya || 35 ||
yuṅkṣva yogaṃ mayākhyātaṃ nākhyātaṃ kasyacinnṛpa |
gopayainaṃ tataḥ siddhiṃ parāṃ yāsyasyanuttamām ||36 ||
vyāsa uvāca -
iti tasya vacaḥ śrutvā prasannasya mahātmanaḥ |
gaṇeśasya vareṇyaḥ sa cakāra ca yathoditam ||37 ||
tyaktvā rājyaṃ kuṭumbaṃ ca kāntāraṃ prayayau rayāt |
upadiṣṭaṃ yathā yogamāsthāya muktimāpnavān ||38 ||
imaṃ gopyatamaṃ yogaṃ śa‍ṛṇoti śraddhayā tu yaḥ |
so'pi kaivalyamāpnoti yathā yogī tathaiva saḥ ||39 ||
ya imaṃ śrāvayedyogaṃ kṛtvā svārthaṃ subuddhimān |
yathā yogī tathā so'pi paraṃ nirvāṇamṛcchati ||40 ||
yo gītāṃ samyagabhyasya jñātvā cārthaṃ gurormukhāt |
kṛtvā pūjāṃ gaṇeśasya pratyahaṃ paṭhate tu yaḥ ||41 ||
ekakālaṃ dvikālaṃ vā trikālaṃ vāpi yaḥ paṭhet |
brahmībhūtasya tasyāpi darśanānmucyate naraḥ ||42 ||
na yajñairna vratairdānairnāgnihotrairmahādhanaiḥ |
na vedaiḥ samyagabhyastaiḥ sahāṅgakaiḥ ||43 ||
purāṇaśravaṇairnaiva na śāstraiḥ sādhucintitaiḥ |
prāpyate brahma paramamanayā prāpyate naraiḥ ||44 ||
brahmaghno madyapaḥ steyī gurutalpagamo'pi yaḥ |
caturṇāṃ yastu saṃsargī mahāpātakakāriṇām ||45 ||
strīhiṃsāgovadhādīnāṃ kartāro ye ca pāpinaḥ |
te sarve pratimucyante gītāmetāṃ paṭhanti cet ||46 ||
yaḥ paṭhetprayato nityaṃ sa gaṇeśo na saṃśayaḥ |
caturthyāṃ yaḥ paṭhedbhaktyā so'pi mokṣāya kalpate ||47 ||
tattatkṣetraṃ samāsādya snātvābhyarcya gajānanam |
sakṛdgītāṃ paṭhanbhaktyā brahmabhūyāya kalpate ||48 ||
bhādre māse site pakṣe caturthyāṃ bhaktimānnaraḥ |
kṛtvā mahīmayīṃ mūrtiṃ gaṇeśasya caturbhujām ||49 ||
savāhanāṃ sāyudhāṃ ca samabhyarcya yathāvidhi |
yaḥ paṭhetsaptakṛtvastu gītāmetāṃ prayatnataḥ ||50 ||
dadāti tasya santuṣṭo gaṇeśo bhogamuttamam |
putrānpautrāndhanaṃ dhānyaṃ paśuratnādisampadaḥ ||51 ||
vidyārthino bhavedvidyā sukhārthī sukhamāpnuyāt |
kāmānanyā~llabhetkāmī muktimante prayānti te ||52 ||
iti śrīmadgaṇeśagītāsūpaniṣadarthagarbhāsu
yogāmṛtārthaśāstre
śrīgaṇeśapurāṇe uttarakhaṇḍe gajānanavareṇyasaṃvāde
trividhavastuvivekanirūpaṇaṃ nāma ekādaśo'dhyāyaḥ ||
|| iti gaṇeśa gītā samāptā ||