Ram Gita

rāmagītā adbhutarāmāyaṇāntargatam
ekādaśaḥ sargaḥ |
hanūmate śrīrāmakṛtaṃ sāṅkhyayogavarṇanam -
rāmaḥprāha hanūmantamātmānaṃ puruṣottamaḥ |
vatsa vatsa hanūmanstvaṃ bhakto yatpṛṣṭaśanasi || 1||
tatte'haṃ sampravakṣyāmi śa‍ṛṇuṣvāvahito mama |
avācyametadvijñānamātmaguhyaṃ sanātanam || 2||
yanna devā vijānanti yatanto'pi dvijātayaḥ |
idaṃ jñānaṃ samāśritya brahmabhūtā dvijottamāḥ || 3||
na saṃsāraṃ prapaśyanti pūrve'pi brahmavādinaḥ |
guhyādguhyatamaṃ sākṣādgopanīyaṃ prayatnataḥ || 4||
vaṃśe bhaktimato hyasya bhavanti brahmavādinaḥ |
ātmā yaḥ kevalaḥ svacchaḥ śāntaḥ sūkṣmaḥ sanātanaḥ || 5||
asti sarvāntaraḥ sākṣāccinmātrastamasaḥ paraḥ |
so'ntaryāmī sa puruṣaḥ sa prāṇaḥ sa maheśvaraḥ || 6||
sa kālāgnistadavyaktaṃ sadyo vedayati śrutiḥ |
tasmādvijāyate viśvamatraiva pravilīyate || 7||
māyāvī māyayā baddhaḥ karoti vividhāstanūḥ |
na cāpyayaṃ saṃsarati na ca saṃsārayetprabhum || 8||
nāyaṃ pṛthvī na salilaṃ na tejaḥ pavano nabhaḥ |
na prāṇo na mano vyaktaṃ na śabdaḥ sparśa eva ca || 9||
na rūparasagandhāśca nāhaṅkartā nā vāgapi |
na pāṇipādau no pāyurna copasthaṃ plavaṅgama || 10||
na kartā na ca bhoktā ca na ca prakṛtipūrūṣau |
na māyā naiva ca prāṇaścaitanyaṃ paramārthataḥ || 11||
tathā prakāśatamasoḥ sambandho nopapadyate |
tadvadeva na sambandhaḥ prapañcaparamātmanoḥ || 12||
chāyātarū yathā loke parasparavilakṣaṇau |
tadvatprañcapuruṣau vibhinnau paramārthataḥ || 13||
yadyātmā malino'vasthau vikārī syātsvabhāvataḥ |
nahi tasya bhavenmuktirjanmāntaraśatairapi || 14||
paśyanti munayo muktāḥ svātmānaṃ paramārthataḥ |
vikārahīnaṃ nirduḥkhamānandātmānamavyayayam || 15||
ahaṃ kartā sukhī duḥkhī kṛśaḥ sthūleti yā matiḥ |
sāpyahaṅkṛtisambandhādātmanyāropyate janaiḥ || 16||
vadanti vedavidvānsaḥ sākṣiṇaṃ prakṛteḥ param |
bhoktāramakṣayaṃ buddhvā sarvatra samavasthitam || 17||
tasmādajñāna mūlo'yaṃ saṃsāraḥ sarva dehinām |
ajñānādanyathā jñātaṃ tacca prakṛtisaṅgatam || 18||
nityoditaḥ svayañjyotiḥ sarvagaḥ puruṣaḥ paraḥ |
ahaṅkārī'vivekena kartāhamiti manyate || 19||
paśyanti ṛṣayo vyaktaṃ nityaṃ sadasadātmakam |
pradhānaṃ prakṛtiṃ buddhvā kāraṇaṃ brahmavādinaḥ || 20||
tenātra saṅgato hyātmā kūṭastho'pi nirañjanaḥ |
ātsānamakṣaraṃ brahma nāvabud‍dhyanti tattvataḥ || 21||
anātmanyātmavijñānaṃ tasmādduḥkhaḥ tathetarat |
rāgadveṣādayo doṣāḥ sarvabhrāntinibandhanāḥ || 22||
kārye hyasya bhavedeṣā puṇyāpuṇyamiti śrutiḥ |
tadvaśādeva sarveṣāṃ sarvadehasamudbhavaḥ || 23||
nitya sarvatrago hyātmā kūṭastho doṣavarjitaḥ |
ekaḥ sa bhidyate śaktyā māyayā na svabhāvataḥ || 24||
tasmādadvaitamevāhurmunayaḥ paramārthataḥ |
bhedo'vyaktasvabhāvena sā ca māyā''tmasaṃśrayā || 25||
yathāhi dhūmasamparkānnākāśo malino bhavet |
antaḥkaraṇajairbhāvairātmā tadvanna lipyate || 26||
yathā svaprabhayā bhāti kevalaḥ sphaṭikopalaḥ |
upādhihīno vimalastathaivātmā prakāśate || 27||
jñānasvarūpamevāhurjagadetadvicakṣaṇāḥ |
arthasvarūpamevājñāḥ paśyantyanye kubuddhayaḥ || 28||
kūṭastho nirguṇo vyāpī caitanyātmā svabhāvataḥ |
dṛśyate hyartharūpeṇa puruṣaṃ bhrāntadṛṣṭibhiḥ || 29||
yathā saṃlakṣyate vyaktaḥ kevalaḥ sphaṭiko janaiḥ |
raktikāvyavadhānena tadvatparamapūruṣaḥ || 30||
tasmādātmākṣaraḥ śuddho nityaḥ sarvagato'vyayaḥ |
upāsitavyo mantavyaḥ śrotavyaśca mumukṣubhiḥ || 31||
yadā manasi caitanyaṃ bhāti sarvatragaṃ sadā |
yogino'vyavadhānena tadā sampadyate svayam || 32||
yadā sarvāṇi bhūtāni svātmanyevābhi paśyati |
sarvabhūteṣu cātmānaṃ brahma sampadyate svayam || 33||
yadā sarvāṇi bhūtāni svātmanyevābhipaśyati |
ekībhūtaḥ pareṇāsau tadā bhavati kevalaḥ || 34||
yadā sarve pramucyante kāmā ye'sya hṛdi sthitāḥ |
tadāsāvamṛtībhūtaḥ kṣemaṃ gacchati paṇḍitaḥ || 35||
yadā bhūtapṛthagbhāvamekasthamanupaśyati |
tata eva ca vistāraṃ brahma sampadyate tadā || 36||
yadā paśyati cātmāyaṃ kevalaṃ paramārthataḥ |
māyāmātraṃ jagatkṛtsnaṃ tadā bhavati nirvṛtaḥ || 37||
yadā janmajarāduḥkhavyādhīnāmekabheṣajam |
kevalaṃ brahmavijñānaṃ jāyate'sau tadā śivaḥ || 38||
yathā nadīnadā loke sāgareṇaikatāṃ yayuḥ |
tadvadātmākṣareṇāsau niṣkalenaikatāṃ vrajet || 39||
tasmādvijñānamevāsti na prapañco na saṃsthitiḥ |
ajñānenāvṛtaṃ lokaṃ vijñānaṃ tena muhyati || 40||
tajjñānaṃ nirmalaṃ sūkṣmaṃ nirvikalpaṃ yadavyayam |
ajñānamiti tatsarvaṃ vijñānamiti me matam || 41||
etatte paramaṃ sāṅkhyaṃ bhāvitaṃ jñānamuttamam |
sarvavedāntasāraṃ hi yogastatraikacittatā || 42||
yogātsañjāyate jñānaṃ jñānādyogaḥ prajāyate |
yogajñānābhiyuktasya nāvāpyaṃ vidyate kvacit || 43||
yadeva yogino yānti sāṅkhyaṃ tadabhigamyate |
ekaṃ sāṅkhyaṃ ca yogaṃ ca yaḥ paśyati sa tattvavit || 44||
anye ca yogino vatsa aiśvaryāsaktacetasaḥ |
majjanti tatra tatraiva sattvātmaikyamiti śrutiḥ || 45||
yattatsarvagataṃ divyamaiśvaryamacalaṃ mahat |
jñānayogābhiyuktastu dehānte tadavāpnuyāt || 46||
eṣa ātmāhamavyakto māyāvī parameśvaraḥ |
kīrtitaḥ sarvavedeṣu sarvātmā sarvatomukhaḥ || 47||
sarvakāmaḥ sarvarasaḥ sarvagandho'jaro'maraḥ |
sarvataḥ pāṇipādo'hamantaryāmī sanātanaḥ || 48||
apāṇipādo javano gṛhīto hṛdi saṃsthitaḥ |
acakṣurapi paśyāmi tathā'karṇaḥ śa‍ṛṇomyaham || 49||
vedāhaṃ sarvamevedaṃ na māṃ jānāti kaścana |
prāhurmahāntaṃ puruṣaṃ māmekaṃ tattvadarśinaḥ || 50||
nirguṇāmalarūpasya yattadaiśvaryamuttamam |
yatra devā vijānanti mohitā māyayā mama || 51||
yanme guhyatamaṃ dehaṃ sarvagaṃ tattvadarśinaḥ |
praviṣṭā mama sāyujyaṃ labhante yogino'vyayam || 52||
yeṣāṃ hi na samāpannā māyā vai viśvarūpiṇī |
labhante paramaṃ śuddhaṃ nirvāṇaṃ te mayā saha || 53||
na teṣāṃ punarāvṛttiḥ kalpakoṭiśatairapi |
prasādānmama te vatsa etadvedānuśāsanam || 54||
nāputraśiṣyayogibhyo dātavyaṃ hanumankvacit |
yaduktametadvijñānaṃ sāṅkhyayogasamāśrayam || 55||
ityārṣe śrīmadrāmāyaṇe vālmīkīye ādikāvye
adbhutottarakāṇḍe sāṅkhyayogo nāmaikādaśaḥ sargaḥ || 11||
dvādaśaḥ sargaḥ |
upaniṣatkathanam -
punaḥ rāmaḥ pravacanamuvāca dvijapuṅgava |
avyaktādabhavatkālaḥ pradhānaṃ puruṣaḥ paraḥ || 1||
tebhyaḥ sarvamidaṃ jātaṃ tasmātsarvamidaṃ jagat |
sarvataḥ pāṇipādaṃ tatsarvato'kṣiśiromukham || 2||
sarvata śrutimalloke sarvamāvṛtya tiṣṭhati |
sarvendriyaguṇābhāsaṃ sarvendriyavivarjitam || 3||
sarvādhāraṃ sthirānandamavyaktaṃ dvaitavarjitam |
sarvopamānarahitaṃ pramāṇātītagocaram || 4||
nirvikalpaṃ nirābhāsaṃ sarvābhāsaṃ parāmṛtam |
abhinnaṃ bhinnasaṃsthānaṃ śāśvataṃ dhruvamavyayam || 5||
nirguṇaṃ paramaṃ vyoma tajjñānaṃ sūrayo viduḥ |
sa ātmā sarvabhūtānāṃ sa bāhyābhyantarātparaḥ || 6||
so'haṃ sarvatragaḥ śānto jñānātmā parameśvaraḥ |
mayā tatamidaṃ viśvaṃ jagadavyaktarūpiṇā || 7||
matsthāni sarvabhūtāni yastaṃ veda sa vedavit |
pradhānaṃ puruṣaṃ caiva tattvadvayamudāhṛtam || 8||
tayoranādinirdiṣṭaḥ kālaḥ saṃyojakaḥ paraḥ |
trayametadanādyantamavyaktaṃ samavasthitam || 9||
tadātmakaṃ tadanyatsyāttadrūpaṃ māmakaṃ viduḥ |
mahadādyaṃ viśeṣāntaṃ samprasūte'khilaṃ jagat || 10||
yā sā prakṛtiruddiṣṭā mohinī sarvadehinām |
puruṣaḥ prakṛtisthoto'pibhuṅkte yaḥ prākṛtānguṇān || 11||
ahaṅkāro viviktatvātprocyate pañcaviṃśakaḥ |
ādyo vikāraḥ prakṛtirmahanātmeti kathyate || 12||
vijñānaśaktirvijñānādahaṅkārastadutthitaḥ |
eka eva mahānātmā sohaṅkāro'bhidhīyate || 13||
rā jīvaḥ so'ntarātmeti gīyate tattvacintakaiḥ |
tena vedayate sarvaṃ sukhaṃ duḥkhaṃ ca janmasu || 14||
sa vijñānātmakastasya manaḥ syādupakārakam |
tenāvivekatastasmātsaṃsāraṃ puruṣasya tu || 15||
sa cāvivekaḥ prakṛtau saṅgātkālena so'bhavat |
kālaḥ sṛjati bhūtāni kālaḥ saṃharate prajāḥ || 16||
sarve kālasya vaśagā na kālaḥ kasyacidvaśe |
so'ntarā sarvamevedaṃ niyacchati sanātanaḥ || 17||
procyate bhagavānprāṇaḥ sarvajñaḥ puruṣaḥ paraḥ |
sarvendriyebhyaḥ paramaṃ manaḥ prāhurmanīṣiṇaḥ || 18||
manasaścāpyahaṅkāramahaṅkārānmahān paraḥ |
mahataḥ paramavyaktamavyaktātpuruṣaḥ paraḥ || 19||
puruṣādbhagavānprāṇastasya sarvamidaṃ jagat |
prāṇātparataraṃ vyoma vyomātīto'gnirīśvaraḥ || 20||
so'haṃ sarvatragaḥ śānto jñānātmā parameśvaraḥ |
nāsti matparamaṃ bhūtaṃ māṃ vijñāya vimucyate || 21||
nityaṃ hi nāsti jagati bhūtaṃ sthāvarajaṅgamam |
ṛte māmekamavyaktaṃ vyomarūpaṃ maheśvaram || 22||
so'haṃ sṛjāmi sakalaṃ saṃharāmi sadā jagat |
māyī māyāmayo devaḥ kālena saha saṅgataḥ || 23||
matsannidhāveṣa kālaḥ karoti sakalaṃ jagat |
niyojayatyanantātmā hyetadvedānuśāsanam || 24||
ityārṣe śrīmadrāmāyaṇe vālmīkīye ādikāvye
adbhutottarakāṇḍe upaniṣatkathanaṃ nāma dvādaśaḥ sargaḥ || 12||
trayodaśaḥ sargaḥ
bhaktiyogakathanam -
vakṣye samāhitamanāḥ śa‍ṛṇuṣva pavanātmaja |
yenedaṃ līyate rūpaṃ yenedaṃ sampravartate || 1||
nāhaṃ tapobhirvividhairna dānena naca cejyayā |
śakyo hi puruṣairjñātumṛte bhaktimanuttamām || 2||
ahaṃ hi sarvabhāvānāmantastiṣṭhāmi sarvagaḥ |
māṃ sarvasākṣiṇaṃ loke na jānanti plavaṅgama || 3||
yasyāntarā sarvamidaṃ yo hi sarvāntaraḥ paraḥ |
so'haṃ dhātā vidhātā ca loke'sminviśvatomukhaḥ || 4||
na māṃ paśyanti munayaḥ sarve'pi tridivaukasaḥ |
brāhmaṇā manavaḥ śakrā ye cānye prathitaujasaḥ || 5||
gṛṇanti satataṃ vedā māmekaṃ parameśvaram |
yajanti vividhairagnau brāhmaṇā vaidikairmakhaiḥ || 6||
sarvelokā namasyanti brahmaloke pitāmaham |
dhyāyanti yogino devaṃ bhūtādhipatimīśvaram || 7||
ahaṃ hi sarvayajñānāṃ bhoktā caiva phalapradaḥ |
sarvadevatanurbhūtvā sarvātmā sarvasaṃstutaḥ || 8||
māṃ paśyantīha vidvānso dhārmikā vedavādinaḥ |
teṣāṃ sannihito nityaṃ ye bhaktā māmupāsate || 9||
brāhmaṇāḥ kṣatriyā vaiśyā dhārmikā māmupāsate |
teṣāṃ dadāmi tatsthānamānandaṃ paramaṃ padam || 10||
anye'pi ye vikarmasthāḥ śūdrādyā nīcajātayaḥ |
bhaktimantaḥ pramucyante kālena mayi saṅgatāḥ || 11||
na madbhaktā vinaśyante madbhaktā vītakalmaṣāḥ |
ādāvetatpratijñātaṃ na me bhaktaḥ praṇaśyati || 12||
yo vā nindati taṃ mūḍho devadevaṃ sa nindati |
yo hi taṃ pūjayedbhaktyā sa pūjayati māṃ sadā || 13||
patraṃ puṣpaṃ phalaṃ toyaṃ madārādhanakāraṇāt |
yo me dadāti niyataḥ sa me bhaktaḥ priyo mataḥ || 14||
ahaṃ hi jagatāmādau brahmāṇaṃ parameṣṭhinam |
vidhāya dattavānvedānaśeṣānāsyaniḥsṛtān || 15||
ahameva hi sarveṣāṃ yogināṃ gururavyayaḥ |
dhārmikānāṃ ca goptāhaṃ nihantā vedavidviṣām || 16||
ahaṃ vai sarvasaṃsārānmocako yogināmiha |
saṃsāraheturevāhaṃ sarvasaṃsāravarjitaḥ || 17||
ahameva hi saṃhartā straṣṭāhaṃ paripālakaḥ |
māyāvī māmikā śaktirmāyā lokavimohinī || 18||
mamaiva ca parāśaktiryā sā vidyeti gīyate |
nāśayāmi tayā māyāṃ yogināṃ hṛdi saṃsthitaḥ || 19||
ahaṃ hi sarvaśaktīnāṃ pravartakanivartakaḥ |
ādhārabhūtaḥ sarveṣāṃ nidhānamamṛtasya ca || 20||
ekā sarvāntarā śaktiḥ karoti vividhaṃ jagat |
bhūtvā nārāyaṇo'nanto jagannātho jaganmayaḥ || 21||
tṛtīyā mahatī śaktirnihanti sakalaṃ jagat |
tāmasī me samākhyātā kālātmā rudrakapiṇī || 22||
dhyānena māṃ prapaśyanti kecijjñānena cāpare |
apare bhaktiyogena karmayogena cāpare |
sarveṣāmeva bhaktānāmeṣa priyataro mama || 23||
yo vijñānena māṃ nityamārādhayati nānyathā
anye ca ye trayo bhaktā madārādhanakāṅkṣiṇaḥ || 24||
te'pi māṃ prāpnuvantyeva nāvartate ca vai punaḥ |
mayā tatamidaṃ kṛtsnaṃ pradhānapuruṣātmakam |
mayyeva saṃsthitaṃ viśvaṃ mayā sampreryate jagat || 25||
nāhaṃ prerayitā kīśa paramaṃ yogamāśritaḥ |
prerayāmi jagatkṛtsnametadyo veda so'mṛtaḥ || 26||
paśyāmyaśeṣamevedaṃ vartamānaṃ svabhāvataḥ |
karoti kāle bhagavānmahāyogeśvaraḥ svayam || 27||
yogaṃ samprocyate yogī māyī śāstreṣu sūribhiḥ |
yogeśvaro'sau bhagavānmahādevo mahāprabhuḥ || 28||
mahatvātsarvasattvānāṃ varatvātparameśvaraḥ |
procyate bhagavānbrahmā mahānbrahmamayo yataḥ || 29||
yo māmevaṃ vijānāti mahāyogeśvareśvaram |
so'vikampena yogena yujyate nātra saṃśayaḥ || 30||
so'haṃ prerayitā devaḥ paramānandamāśritaḥ |
tiṣṭhāmi satataṃ yogī yastadveda sa vedavit || 31||
iti guhyatamaṃ jñānaṃ sarvavedeṣu niścitam |
prasannacetase deyaṃ dhārmikāyāhitāgnaye || 32||
ityārṣe śrīmadrāmāyaṇe vālmīkīye ādikāvye
adbhutottarakāṇḍe bhaktiyogo nāma trayodaśaḥ sargaḥ || 13||
caturdaśaḥ sargaḥ |
śrīrāmacandrahanumatsaṃvādavarṇanam -
sarvalokaikanirmātā sarvalokaikarakṣitā |
sarvalokaikasaṃhartā sarvātmā'haṃ sanātanaḥ || 1||
sarveṣāmeva vastūnāmantaryāmī pitā hyaham |
mayyevāntaḥsthitaṃ sarvaṃ nāhaṃ sarvatra saṃsthitaḥ || 2||
bhavatā cādbhutaṃ dṛṣṭaṃ yatsvarūpaṃ tu māmakam |
mamaiṣā hyupamā vatsa māyayā darśitā mayā || 3||
sarveṣāmeva bhāvānāmantarā samavasthitaḥ |
prerayāmi jagatsarvaṃ kriyāśaktiriyaṃ mama || 4||
mayedaṃ ceṣṭate viśvaṃ matsvabhāvānuvarti ca |
so'haṃ kāle jagatkṛtsnaṃ karomi hanuman kila || 5||
saṃharāmyekarūpeṇa dvidhāvasthā mamaiva tu |
ādimadhyāntanirmukto māyātattvapravartakaḥ || 6||
kṣobhayāmi ca sargādau pradhānapuruṣāvubhau |
tābhyāṃ sañjāyate sarvaṃ saṃyuktābhyāṃ parasparam || 7||
mahadādikrameṇaiva mama tejovijṛmbhitam |
yo hi sarvajagatsākṣī kālacakrapravartakaḥ || 8||
hiraṇyagarbho mārtaṇḍaḥ so'pi maddehasambhavaḥ |
tasmai divyaṃ svamaiśvaryaṃ jñānayogaṃ sanātanam || 9||
dattavānātmajān vedān kalpādau vaturaḥ kila |
sa manniyogato brahmā sadā madbhāvabhāvitaḥ || 10||
divyaṃ tanmāmakaiśvaryaṃ sarvadā vahati svayam |
sa sarvalokanirmātā manniyogena sarvavit || 11||
bhūtvā caturmukhaḥ sarvaṃ sṛjatyevātmasambhavaḥ |
yo'pi nārāyaṇo'nanto lokānāṃ prabhavāvyayaḥ || 12||
mamaiva paramā mūrtiḥ karoti paripālanam |
yo'ntakaḥ sarvabhūtānāṃ rudraḥ kālātmakaḥ prabhuḥ || 13||
madājñayā'sau satataṃ saṃhāratyeva me tanuḥ |
havyaṃ vahati devānāṃ kavyaṃ kavyāśināmapi || 14||
pākaṃ ca kurute vahniḥ so'pi macchakticoditaḥ |
bhuktamāhārajātaṃ yatpacatyetadaharniśam || 15||
vaiśvānaro'gnirbhagavānīśvarasya niyogataḥ |
yo hi sarvāmbhasāṃ yonirvaruṇo devapuṅgavaḥ || 16||
sa sañjīvayate sarvamīśasyaiva niyogataḥ |
yo'ntastiṣṭhati bhūtānāṃ bahirdevo nirañjanaḥ || 17||
madājñayāsau bhūtānāṃ śarīrāṇi bibharti hi |
yo'pi sañjīvano nṛṇāṃ devānāmamṛtākaraḥ || 18||
somaḥ sa manniyogena coditaḥ kila vartate |
yaḥ svabhāsā jagatkṛtsnaṃ prakāśayati sarvadā || 19||
sūryo vṛṣṭiṃ vitanute śāstreṇaiva svayambhuvaḥ |
yo'pyaśeṣajagacchāstā śakraḥ sarvāmareśvaraḥ || 20||
yajñānāṃ phalado devo vartate'sau madājñayā |
yaḥ praśāstā hyasādhūnāṃ vartate niyamādiha || 21||
yamo vaivasvato devo devadevaniyogataḥ |
yo'pi sarvadhanādhyakṣo dhanānāṃ sampradāyakaḥ || 22||
so'pīśvaraniyogena kubero vartate sadā |
yaḥ sarvarakṣasāṃ nāthastāpasānāṃ phalapradāḥ || 23||
manniyogādasau devo vartate nirṛtiḥ sadā |
vaitālagaṇabhūtānāṃ svāmī bhogaphalapradaḥ || 24||
īśānaḥ sarvabhaktānāṃ so'pi tiṣṭhenmamājñayā |
yo vāmadevo'ṅgirasaḥ śiṣyo rudragaṇāgraṇīḥ || 25||
rakṣako yogināṃ nityaṃ vartate'sau madājñayā |
yaśca sarvajagatpūjyayo vartate vighnakārakaḥ || 26||
vināyako dharmanetā so'pi madvacanātkila |
yo'pi vedavidāṃ śreṣṭho devasenāpatiḥ prabhuḥ || 27||
skando'sau vartate nityaṃ svayambhūpraticoditaḥ |
ye ca prajānāṃ patayo marīcyādyā maharṣayaḥ || 28||
sṛjanti vividhān lokān parasyaiva niyogataḥ |
yā ca śrī sarvabhūtānāṃ dadāti vipulāṃ śriyam || 29||
patnī nārāyaṇasyāsau vartate madanugrahāt |
vācaṃ dadāti vipulāṃ yā ca devī sarasvatī || 30||
sāpīśvaraniyogena coditā sampravartate |
yāśeṣapuruṣān ghorānnarakāttārayatyapi || 31||
sāvitrī saṃsmṛtā devī devājñānuvidhāyinī |
pārvatī paramā devī brahmavidyāpradāyinī || 32||
yāpi dhyātā viśeṣeṇa sāpi madvacanānugā |
yo'nanto mahimānantaḥ śeṣo'śeṣāmaraḥ prabhuḥ || 33||
dadhāti śirasā lokaṃ so'pi devaniyogataḥ |
yo'gniḥ saṃvartako nityaṃ vaḍavārūpasaṃsthitaḥ || 34||
pibatyakhilamambhodhimīśvarasya niyogataḥ |
ādityā vasavo rudrā marutaśca tathāśvinau || 35||
anyāśca devatāḥ sarvā macchāsanamadhiṣṭhitāḥ |
gandharvā uragā yakṣāḥ siddhāḥ sādhyāśca cāraṇāḥ || 36||
bhūtarakṣaḥpiśācāśca sthitāḥ śāstre svayambhuvaḥ |
kalākāṣṭhānimeṣāśca muhūrtā divasāḥ kṣaṇāḥ || 37||
ṛtvabdamāsapakṣāśca sthitāḥ śāstre prajāpateḥ |
yugamanvantarāṇyeva mama tiṣṭhanti śāsane || 38||
parāścaiva parārddhāśca kālabhedāstathāpare |
caturvidhāni bhūtāni sthāvarāṇi carāṇi ca || 39||
niyogādeva vartante sarvāṇyeva svayambhuvaḥ |
pattanāni ca sarvāṇi bhuvanāni ca śāsanāt || 40||
brahmāṇḍāni ca vartante devasya paramātmanaḥ |
atītānyapyasaṅkhyāni brahmāṇḍāni madājñayā || 41||
pravṛttāni padārthaughaiḥ sahitāni samaṃ tataḥ |
brahmāṇḍāni bhaviṣyanti saha vastubhirātmajaiḥ || 42||
hariṣyanti sahaivājñāṃ parasya paramātmanaḥ |
bhūmirāpo'nalo vāyuḥ khaṃ mano buddhireva ca || 43||
bhūtādirādiprakṛtirniyogānmama vartate |
yā'śeṣasarvajagatāṃ mohinīṃ sarvadehinām || 44||
māyāpi vartate nityaṃ sāpīśvaraniyogataḥ |
vidhūya mohakalilaṃ yathā paśyati tatpadam || 45||
sāpi vidyā maheśasya niyogādvaśavartinī |
bahunātra kimuktena mama śaktyātmakaṃ jagat || 46||
mayaiva pūryate viśvaṃ mayaiva pralayaṃ vrajet |
ahaṃ hi bhagavānīśaḥ svayañjyotiḥ sanātanaḥ || 47||
paramātmā parambrahma matto hyanyanna vidyate |
ityetatparamaṃ jñānaṃ bhavate kathitaṃ mayā || 48||
jñātvā vimucyate janturjanma saṃsārabandhanāt |
māyāmāśritya jāto'haṃ gṛhe daśarathasya hi || 49||
rāmo'haṃ lakṣmaṇo hyeṣa śatrughno bhārato'pi ca |
caturdhā samprabhūto'haṃ kathitaṃ te'nilātmaja || 50||
māyāsvarūpaṃ ca tava kathitaṃ yatplavaṅgama |
kṛpayā taddhṛdā dhāryaṃ na vismartavyameva hi || 51||
yenāyaṃ paṭhyate nityaṃ saṃvādo bhavato mama |
jīvanmukto bhavetso'pi sarvapāpaiḥ pramucyate || 52||
śrāvayedvā dvijāñchuddhānbrahmacaryaparāyaṇān |
yo vā vicārayedarthaṃ sa yāti paramāṃ gatim || 53||
yaścaitacchṛṇuyānnityaṃ bhaktiyukto dṛḍhavrataḥ |
sarvapāpavinirmukto brahmaloke mahīyate || 54||
tasmātsarvaprayatnena paṭhitavyo manīṣibhiḥ |
śrotavyaścāpi mantavyo viśeṣādbrāhmaṇaiḥ sadā || 55||
ityārṣe śrīmadrāmāyaṇe vālmīkīye ādikāvye
adbhutottarakāṇḍe bhagavaddhanūmatsaṃvādo nāma caturdaśaḥ sargaḥ || 14||