Surya Gita

sūrya gītā
|| śrī gaṇeśāya namaḥ ||
|| atha sūryagītā prārabhyate ||
brahmā uvāca -
prapañcasṛṣṭikarmedaṃ mama śrīgurunāyaka |
ahāryaṃ dviparārdhāntamādhikārikatāvaśāt || 1 ||
iti tvadvadanāmbhojātsamyagviditavānaham |
tathāpyatra na me cintā jāyate tvatkṛpābalāt || 2 ||
tvayi prasanne mayyevaṃ bodhānandaḥ svarūpataḥ |
punarjanmabhayābhāvāddhīra evāsmi vṛttiṣu || 3 ||
tathā'pi karmabhāgeṣu śrotavyamavaśiṣyate |
tatsarvaṃ ca viditvaiva sarvajñaḥ syāmahaṃ prabho || 4 ||
jagajjīveśvarādīnāṃ prāgutpatterniraṃjanam |
nirviśeṣamakarmaikaṃ brahmaivāsīttadadvayam || 5 ||
tasya jīveśa sraṣṭṛtvaṃ procyate vedavādibhiḥ |
akarmaṇaḥ kathaṃ sṛṣṭikarmakartṛtvamucyate || 6 ||
sakarmā sendriyo loke dṛśyate na nirindriyaḥ |
brahmaṇo'tīndriyatvaṃ ca sarvaśāstreṣu ghuṣyate || 7 ||
naśyamānatayotpattimatvādādyasya karmaṇaḥ |
na mukhyamavakalpetāpyanāditvopavarṇanam || 8 ||
brahma cetkarmakurvīta yanekenāpi hetunā |
tathā ca saṃsṛtistasya prasajyeta tu nātmanaḥ || 9 ||
tasmādādyasya puṇyasya pāpasya ca dayānidhe |
karmaṇo brūhi me spaṣṭamupapattiṃ gurūttama || 10 ||
ityukto vidhinā devo dakṣiṇāmūrtirīśvaraḥ |
vicitrapraśnasantuṣṭa idaṃ vacanamabravīt || 11 ||
śrīgurumūrtiruvāca -
brahmansādhurayaṃ praśnastava praśnavidāṃ vara |
śa‍ṛṇuṣva sāvadhānena cetasā'syottaraṃ mama || 12 ||
prāgutpatterakarmaikamakartṛ ca nirindriyam |
nirviśeṣaṃ paraṃ brahmaivāsīnnātrāsti saṃśayaḥ || 13 ||
tathā'pi tasya cicchaktisaṃyutatvena hetunā |
praticchāyātmike śaktī māyāvidye babhūvatuḥ || 14 ||
advitīyamapi brahma tayoryatpratibimbitam |
tena dvaividhyamāsādya jīva īśvara ityapi || 15 ||
puṇyapāpādikartṛtvaṃ jagatsṛṣṭyādikartṛtām |
abhajatsendriyatvaṃ ca sakarmatvaṃ viśeṣataḥ || 16 ||
yaḥ svaśaktyā samullāsa udabhūtparamātmanaḥ |
svabandhajanakaṃ sūkṣmaṃ tadādyaṃ karma kathyate || 17 ||
na tena nirviśeṣatvaṃ hīyate tasya kiṃcana |
na ca saṃsārabandhaśca kaścidbrahmanprasajyate || 18 ||
pāramārthikasaṃsārī jīvaḥ puṇyādikarmavān |
prātibhāsikasaṃsārī tvīśaḥ sṛṣṭyādikarmavān || 19 ||
asaṃsāri paraṃ brahma jīveśobhayakāraṇam |
tato'pyatītaṃ nīrūpaṃ avāṅmanasagocaram || 20 ||
karmavantau parityajya jīveśau ye mahādhiyaḥ |
akarmavatparaṃ brahma prayāntyatra samādhibhiḥ || 21 ||
te videhavimuktā vā jīvanmuktā narottamāḥ |
karmākarmobhayātītāstadbrahmārūpamāpnuyuḥ || 22 ||
karmaṇā saṃsṛtau baddhā mucyante te hyakarmaṇā |
bandhamokṣobhayātītāḥ karmiṇo nāpyakarmiṇaḥ || 23 ||
jīvasya karmaṇā bandhastasya mokṣaśca karmaṇā |
tasmāddheyaṃ ca karma syādupādeyaṃ ca karma hi || 24 ||
tyakte karmaṇi jīvatvamātmano gacchati svayam |
gṛhīte karmaṇi kṣipraṃ brahmatvaṃ ca prasidhyati || 25 ||
āvidyakamaśuddhaṃ yatkarma duḥkhāya tannṛṇām |
vidyāsambandhi śuddhaṃ yat tatsukhāya ca kathyate || 26 ||
vidyākarmakṣurāttīkṣṇāt chinatti puruṣottamaḥ |
avidyākarmapāśāṃścetsa mukto nātra saṃśayaḥ || 27 ||
sarvasya vyavahārasya vidhe karmaiva kāraṇam |
iti niścayasiddhyai te sūryagītāṃ vadāmyaham || 28 ||
karmasākṣiṇamādityaṃ sahasrakiraṇaṃ prabhum |
saptāśvaṃ sarvadharmajñamapṛcchadaruṇaḥ purā || 29 ||
aruṇa uvāca -
bhagavan kena saṃsāre prāṇinaḥ saṃbhramantyamī |
kenaiteṣāṃ nivṛttiśca saṃsārādvada sadguro || 30 ||
iti pṛṣṭaḥ sa sarvajñaḥ sahasrakiraṇojvalaḥ |
sūryo'bravīdidaṃ śiṣyamaruṇaṃ nijasārathim || 31 ||
sūrya uvāca -
aruṇa tvaṃ bhavasyadya mama priyatamaḥ khalu |
yataḥ pṛcchasi saṃsārabhramakāraṇamādarāt || 32 ||
bhramanti kevalaṃ sarve saṃsāre prāṇino'niśam |
na tu tatkāraṇaṃ kenāpyaho kiṃcidvicāryate || 33 |
tajjijñāsutayā tvaṃ tu ślāghyo'si vibudhottamaiḥ |
śa‍ṛṇuśvāruṇa vakṣyāmi tava saṃsārakāraṇam || 34 ||
puṇyapāpātmakaṃ karma yatsarvaprāṇisaṃcitam |
anādisukhaduḥkhānāṃ janakaṃ cābhidhīyate || 35 ||
śāstraiḥ sarvaiśca vihitaṃ pratiṣiddhaṃ ca sādaram |
kāmādijanitaṃ tattvaṃ viddhi saṃsārakāraṇam || 36 ||
paśvādīnāmabhāve'pi tayorvidhiniṣedhayoḥ |
saṃsārasya na lopo'sti pūrvakarmānusārataḥ || 37 ||
pūrvaṃ manuṣyabhūtānāṃ pāpakarmāvaśādiha |
śvakharoṣṭrādijanmāni nikṛṣṭāni bhavantyaho || 38 ||
pāpakarmasu bhogena prakṣīṇeṣu punaśca te |
prāpnuvanti manuṣyatvaṃ punaśca śvādijanmitām || 39 ||
jananairmaraṇairevaṃ paunaḥpunyena saṃsṛtau |
bhramantyabdhitaraṃgasthadāruvaddhīmatāṃ vara || 40 ||
aruṇa uvāca -
prakṣīṇapāpakarmāṇaḥ prāptavanto manuṣyatām |
punaśca śvādijanmāni kena gacchanti hetunā || 41 ||
na hi durjanmahetutvaṃ puṇyānāṃ yuktamīritum |
na ca puṇyavatāṃ bhūyaḥ pāpakarmopapadyate || 42 ||
puṇyairviśuddhacittānāṃ jñānayogādisādhanaiḥ |
saṃsāramokṣasaṃsiddhyā pāpakarmāprasaktitaḥ || 43 ||
jīveṣu paunaḥpunyaṃ ceduttamādhamajanmanām |
niyamenābhidhīyeta yena kenāpi hetunā || 44 ||
mokṣaśāstrasya vaiyarthyamāpatatyeva sarvathā |
tasmādapāpināṃ janma punaśceti na yujyate || 45 ||
ityukto bhagavānāha sarvajñaḥ karuṇānidhiḥ |
raviḥ saṃśayavicchedanipuṇo'ruṇamādarāt || 46 ||
raviruvāca -
prakṣīṇeṣvapi bhogena pāpakarmasu dehinaḥ |
punaśca pāpakarmāṇi kurvanto yānti durgatim || 47 ||
tāni durjanmabījāni kāmātpāpāni dehinām |
punarapyupapadyante pūrvapuṇyavatāmapi || 48 ||
sakāmānāṃ ca puṇyānāṃ bhogahetutayā nṛṇām |
na cittaśuddhihetutvaṃ kvacidbhavitumarhati || 49 ||
kutaścāśuddhacittānāṃ jñānayogādisaṃbhavaḥ |
jñānayogādihīnānāṃ kuto mokṣaśca saṃsṛteḥ || 50 ||
kāmena hetunā satsvapyuttamādhamajanmasu |
mokṣaśāstrasya sārthakyaṃ naiṣkāmyodayahetukam || 51 ||
sukhaduḥkhopabhogena yadā nirvedamāgataḥ |
niṣkāmatvamavāpnoti svavivekapurassaram || 52 ||
tataḥprabhṛti kaiścitsyājjanmabhirjñānayogavān |
śravaṇādiprayatnairhi muktiḥ svātmanyavasthitiḥ || 53 ||
karmādhyakṣaṃ parātmānaṃ sarvakarmaikasākṣiṇam |
sarvakarmavidūrantaṃ karmavānkathamāpnuyāt || 54 ||
puṇyeṣvapi ca pāpeṣu paurvikeṣu tu bhogataḥ |
kṣapiteṣu parātmā sa svayamāvirbhaviṣyati || 55 ||
kartṛbhirbhujyate jīvaiḥ sarvakarmaphalaṃ na tu |
sākṣiṇā nirvikalpena nirlepena parātmanā || 56 ||
jīvānāṃ tadananyatvatbhogasyāvasaraḥ kutaḥ |
iti kecana śaṃkante vedāntāpātadarśinaḥ || 57 ||
paramārthadaśāyāṃ hi tadananyatvamiṣyate |
vyavahāradaśāyāṃ nānupapattiśca kācana || 58 ||
paramārthadaśārūḍhe jīvanmukte'pi karmaṇām |
bhogo'ṅgīkriyate samyak dṛśyate ca tathā sati || 59 ||
ajñānāṃ vyavahāraikaniṣṭhānāṃ tadananyatā |
abhoktṛtā ca kenaiva vaktuṃ śakyā manīṣiṇā || 60 ||
jñāninaḥ karmakartṛtvaṃ dṛśyamānamapi sphuṭam |
utpādayetphalaṃ neti manyante svapnakarmavat || 61 ||
tadayuktaṃ na hi svapne pāpakartuḥ svatantratā |
jāgrati prāṇinaḥ karma svātantryaṃ vartate khalu || 62 ||
tiraścāṃ jāgarāvasthā yathā bhogaikakāraṇam |
tathā svapnadaśā nṝṇāṃ phalabhogaikakāraṇam || 63 ||
nṛṇāṃ ca jāgarāvasthā bālānāṃ syāttathā na tu |
yūnāṃ vṛddhatamānāṃ vā kimuta svātmavedinām || 64 ||
bhāvibhogārthakaṃ karma jāgratyeva nṛṇāṃ bhavet |
phalaṃ tu karmaṇaḥ svapne jāgratyapi ca yujyate || 65 ||
karmaṇyadhyasya bhogaṃ ye bhoge'dhyasyātha karma ca |
karma tadbhogayorbhedamajñātvāhuryathepsitam || 66 ||
teṣāṃ mandadhiyāṃ jñānavādināṃ pāpakāriṇām |
kathaṃ kṛtārthatāṃ brūyāmadhyāsakṣayasaṃbhavām || 67 ||
karmaṇyakarmadhīryeṣāmakarmaṇi ca karmadhīḥ |
te cādhyāsavaśā mandā jñāninaḥ svairacāriṇaḥ || 68 ||
varṇāśramādidharmāṇāmadvaitaṃ karmaṇaiva ye |
anutiṣṭhanti te mūḍhāḥ karmākarmobhayacyutāḥ || 69 ||
svānubhūtiṃ variṣṭhāṃ tāṃ sarvānuṣṭhānavarjitām |
sarvānuṣṭhānavanto'pi siddhāmāhurbatātmanām || 70 ||
abhedadhyānasādhyāṃ tāṃ svānubhūtiṃ mahattamām |
vicārasādhyāṃ manyante te mahāpāpakarmiṇaḥ || 71 ||
nididhyāsanamapyātmā bhedābhidhyānalakṣaṇam |
upekṣante vṛthādvaitajñānavādaikamohataḥ || 72 ||
āśrityaiva vicāraṃ ye vākyārthamananātmakam |
manyante kṛtakṛtyatvamātmanāṃ te hi mohitāḥ || 73 ||
ādyajñānodaye kāmyakarmatyāga udīryate |
dvitīyasamyagjñāne tu naimittikanirākṛtiḥ || 74 ||
tṛtīyapūrṇajñāne ca nityakarmanirākṛtiḥ |
caturthādvaitabodhe tu so'tivarṇāśramī bhavet || 75 ||
nityanaimittikopetajñānānmuktiḥ kramādbhavet |
samyagjñānāttu sā jīvanmuktirnityaikasaṃyutāt || 76 ||
pūrṇajñānādvidehākhyā śāśvatī muktiriṣyate |
yathā naiṣkarmyasaṃsiddhirjīvanmukte niraṃkuśā || 77 ||
atraivaṃ sati naiṣkarmyaṃ jñānakarmasamuccayāt |
sidhyetkrameṇa sadyo vā nānyathā kalpakoṭibhiḥ || 78 ||
yāvadvidehamuktiḥ sā na sidhyati śarīriṇaḥ |
tāvatsamuccayaḥ siddho jñānopāsanakarmaṇām || 79 ||
tasmād jñātvā parātmānaṃ dhyānaniṣṭho mahāmatiḥ |
bhūyānnijāśramācāranirataḥ śreyase sadā || 80 ||
jñānopāstī karmasāpekṣake te
       karmopāstī jñānasāpekṣake ca |
karmajñāne cānyasāpekṣake tan-
       muktyai proktaṃ sāhacaryaṃ trayāṇām || 81 ||
jñānopāstī svīyakarmasvapāsyāpekaṃ
       muktirnaiva kasyāpi sidhyet |
tasmāddhīmānāśrayedapramattastrī-
       ṇyuktāni śraddhayā''dehapātāt || 82 ||
|| iti sūryagītāyāṃ prathamo'dhyāyaḥ ||
|| atha dvitīyo'dhyāyaḥ ||
sūrya uvāca -
athātaḥ sampravakṣyāmi karmaṇāṃ paṃcabhūmikāḥ |
uttarottaramutkarṣādviddhi sopānapaṃktivat || 1 ||
prathāmā tāṃtrikī proktā parā paurāṇikī matā |
smārtā tṛtīyā turyā tu śrautā saṃkīrtitā budhaiḥ || 2 ||
paṃcamī tvaupaniṣadā vibudhottamasaṃmatā |
yasyāḥ paraṃ na kiṃcitsyādvācyaṃ jñeyaṃ ca sattama || 3 ||
svecchaṃ karmāṇi kurvanyaḥ pramāṇāśrayaṇaṃ vinā |
tantroktāni karotyeṣa karmī prāthamiko mataḥ || 4 ||
tāni tantroktakarmāṇi tyaktvā paurāṇikāni yaḥ |
karoti tantrasambandhīnyayaṃ karmī dvitīyakaḥ || 5 ||
tyaktvā tānyapi yaḥ smārtānyanutiṣṭhati sarvadā |
śrutisambandhavantyeṣa tṛtīyaḥ karmyudīryate || 6 ||
yaśca tānyapi santyajya śrautānyevācaratyayam |
karmī dharmārthakāmānāṃ sthānaṃ turyo'bhidhīyate || 7 ||
śrautānyapi ca yastyaktvā sadaupaniṣadāni vai |
karoti śraddhayā karmāṇyayaṃ mokṣī tu paṃcamaḥ || 8 ||
yānyaupaniṣadānāṃ syuravirodhīni karmaṇām |
śrautādīni susaṃgrāhyānyamalāni mumukṣubhiḥ || 9 ||
karmāṇyupaniṣatsu syurbrahmaikārthāsu vai katham |
iti śaṃkyannakurvan hi vidhirasti jijīviṣet || 10 ||
īśāvāsyādivedāntaproktānyāmaraṇādapi |
kurvanneva vimucyeta brahmavitpravaro'stu vā || 11 ||
yatayastyaktagārhasthyā api svocitakarmabhiḥ |
āśramaṃ pālayantaḥ svaṃ kaivalyaṃ prāpnuyuḥ param || 12 ||
karma prajādhanānāṃ yastyāgaḥ samabhidhīyate |
kāmaikaviṣayatvena sa yaterna virudhyate || 13 ||
saṃnyāsino hi karmāṇi nityāni vimalāni ca |
śreyorthāni vidhīyante parivrājebjajanmanā || 14 ||
apetakāmyakarmāṇo yatayo'nye'pi vā janāḥ |
sadyaḥ krameṇa vā muktimāpnuyurnātra saṃśayaḥ || 15 ||
paṃcamīṃ bhūmimārūḍhaḥ jñānopāsanakarmabhiḥ |
śokamohādinirmuktaḥ sarvadaiva virājate || 16 ||
na jñānena vinopāstirnopāstyā na vinetarat |
karmāpi tena hetutvaṃ pūrvapūrvasya kathyate || 17 ||
yadvā yāvanna hi jñānaṃ tāvannopāsanaṃ matam |
yāvannopāsanaṃ tāvanna jñānaṃ ca kathaṃcana || 18 ||
jñānaṃ yāvanna karmāpi na tāvanmukhyamīryate |
yāvanna karma tāvacca na jñānaṃ sādhusaṃmatam || 19 ||
yāvannopāsanaṃ tāvanna karmāpi praśasyate |
yāvanna karmopāstiśca na tāvatsāttvikī matā || 20 ||
jñānopāsanakarmāṇi sāpekṣāṇi parasparam |
prayacchanti parāṃ muktiṃ nānyathetyuktameva te || 21 ||
eteṣu sādhaneṣvekaṃ triṣu yatkiṃcidatra yaḥ |
tyajedasadgurūktyā sa nāśnuvīta parāmṛtam || 22 ||
nānāvidhāni jñānāni nānārūpā upāstayaḥ |
nānāvidhāni karmāṇi śrutyantādiṣu saṃviduḥ || 23 ||
sambandhastu trayāṇāṃ syāducitaḥ śiṣṭavartmanā |
nipuṇaiśca suvijñeyamanubandhacatuṣṭayam || 24 ||
anubandhavirodhena trayāṇāṃ cetsamuccayaḥ |
kṛtaḥ sa sadyaḥ prāpnoti tṛptiṃ mānavapuṃgavaḥ || 25 ||
anubandhaparijñānaṃ vinā muktyai prayatnavān |
na muktiṃ vindate ko'pi sādhakādiviparyayāt || 26 ||
bhogādhikārī mokṣaṃ cetphalamicchetkadācana |
anubandhasya vijñānaṃ kathaṃ nu syātsamaṃjasam || 27 ||
adhikārānuguṇyena sambandhaḥ parikīrtitaḥ |
tatsambandhānuguṇyena viṣayaśca prakīrtitaḥ || 28 ||
viṣayānuguṇaṃ proktaṃ prayojanamato budhaiḥ |
anubandhāḥ suvijñeyā jñānopāsanakarmasu || 29 ||
varṇāśramāṇāṃ sarveṣāmanuṣṭheyeṣu karmasu |
avidvān saṃśayātmā cedanuvarteta pūrvakān || 30 ||
vidvān cetsaṃśayātmābhūcchāstre svamatiniścitam |
ācarettu na śiṣṭasyapyabudhasya piturmatam || 31 ||
svakūṭasthabudhācāraḥ sādhusaṃvidito yadi |
vidvānapi tyajetsvīyaṃ tadviruddhamasaṃmatam || 32 ||
pūrvācārānusaraṇaṃ karmamātre niyamyate |
jñānopāstyostvabāhyatvādanyathā'pi ca yujyate || 33 ||
pūrvakeṣvapi sāṃkhyeṣu svasya yujyeta yogitā |
anyathā'pi ca naitena pratyavāyaḥ kiyānapi || 34 ||
yadi pūrvavirodhena kuryātkarmāṇi mānavaḥ |
sa mūrkho bhavati kṣipraṃ pratyavāyī na saṃśayaḥ || 35 ||
naimittikānāmakṛtau kāmyānāṃ ca na kaścana |
pratyavāyo'tra vā'mutra loke bhavitumarhati|| 36 ||
nityānāṃ tvakṛtāvatrāmutra vā pratyavāyabhāk |
bhavedavaśyakāryatvādāśramacyutihetave || 37 ||
na syādakaraṇaṃ heturabhāvātmatayā tataḥ |
nityākaraṇahetuḥ prākkarma cetpratyavāyakṛt || 38 ||
akṛtau pratyavāyasya śravaṇaṃ vyarthameva tat |
pūrvakarmaphalādanyaphalasyānavadhāraṇāt || 39 ||
ato nābhāvatā yuktā nityakarmākṛteryathā |
niṣiddhācaraṇaṃ bhāvastathaivākaraṇaṃ matam || 40 ||
vihitākaraṇasyāpi bhāvātmatvorarīkṛteḥ |
āstikatvamiha prāhuranyathā nāstikatvataḥ || 41 ||
pūrvakarmaphalasyāpi nityākaraṇakarmaṇaḥ |
pāpasya duḥkhahetutvaṃ pṛthagevāvavadhāryate || 42 ||
ajñānādvihite lupte jñānādvā karmaṇi svake |
prāyaścittī bhavenmartyo labheddurjanma vā punaḥ || 43 ||
buddhipūrvaṃ tyajannityamanutāpavivarjitaḥ |
anāśramī naro ghoraṃ rauravaṃ narakaṃ vrajet || 44 ||
jīvanmuktasya nityeṣu yadi luptāni kānicit |
na tena pratyavāyo'sti kaiścitsvāśramasiddhitaḥ || 45 ||
prāyaścittanivartyāni niṣiddhācaraṇāni ca |
prāyaścittamakurvantamapi limpanti naiva tam || 46 ||
karma śuddhamaśuddhaṃ ca dvividhaṃ procyate śrutau |
tatrāśuddhena bandhaḥ syānmokṣaḥ śuddhena dehinām || 47 ||
aśuddhaṃ ca tathā proktaṃ puṇyaṃ pāpamiti dvidhā |
parasparaṃ na bādho'sti tayoratrāvirodhataḥ || 48 ||
sukhaduḥkhe samastasya jantoryābhyāṃ prasidhyataḥ |
tayorna vaśamāgacchecchuddhamātreṇa saṃsthitaḥ || 49 ||
śuddhaṃ nityamanantaṃ yatsatyaṃ karma nigadyate |
nityaśuddhavimuktātmasākṣātkārārthakaṃ viduḥ || 50 ||
viśuddhaiḥ karmabhiḥ śuddhānīndriyāṇi bhavantyalam |
indriyeṣu viśuddheṣu manaḥ śuddhaṃ svato bhavet || 51 ||
śuddhe manasi jīvo'pi viśuddho brahmaṇaikatām |
upetya kevalānandaṃ niṣkalaṃ paramaśnute || 52 ||
bāhyamābhyantaraṃ ceti śuddhaṃ karma dvidhocyate |
bāhyaṃ snānādi nityaṃ syāddhyānādyābhyantaraṃ param || 53 ||
ataḥ śuddheraśuddhānāṃ nāśo bhavitumarhati |
na śuddhavyatirekeṇa prayatnāntaramiṣyate || 54 ||
viśuddhakarmaniṣṭhāste yatayo'nye'pi vā janāḥ |
atraiva parimucyante svātantryeṇa parāmṛtāt || 55 ||
ārūḍhaḥ paṃcamīṃ bhūmiṃ śuddhenaivāvatiṣṭhate |
ato'tra matimānnityaṃ paṃcamyabhyāsamācaret || 56 ||
indriyāṇi viśuddhānyapyaśuddhānāṃ vivarjanāt |
śuddhānāmapyanuṣṭhānāddhīmāṃstāni na viśvaset || 57 ||
aśuddheṣu pravarteran pūrvavāsanayā svataḥ |
tebhyo niyamya śuddheṣu nityaṃ tāni pravartayet || 58 ||
indriyāṇāṃ ca manasaḥ prasādaṃ śuddhakarmabhiḥ |
upalabhyāpi durbuddhiraśuddheha pravartate || 59 ||
prasannamanasaḥ svāsthyātsukhaṃ kiṃcitprajāyate |
tāvanmātreṇa tṛptastu krameṇādhaḥ patennaraḥ || 60 ||
tṛptiralpasukhaprāptau mahānarthaikakāraṇam |
atastṛptimanāpyaiva śuddhaṃ nityaṃ samācaret || 61 ||
yathā viṣayabhogeṣu vinā tṛptiṃ punaḥ punaḥ |
pravartate tathā nityaṃ yaḥ śuddheṣu sa buddhimān || 62 ||
śuddhaṃ śuddhena vardheta śuddhaḥ śuddhaṃ tato vrajet |
aśuddhamapyaśuddhenāśuddho'śuddhaṃ tathā naraḥ || 63 ||
yadendriyamanaḥprāṇāḥ śāntāḥ suptāvivābhavan |
śuddhāśuddhobhayātītastadā tṛptiṃ parāṃ vrajet || 64 ||
yāvannendriyasaṃśāntiryāvanna manaso'pyayaḥ |
yāvanna prāṇaśāntiśca tāvacchuddhaṃ samācaret || 65 ||
parasparopayogitvādbāhyābhyantaraśuddhayoḥ |
viyogo naiva kāryo'tra budhairādehamocanāt || 66 ||
yaḥ śuddhapakṣo haṃsaḥ sa ūrdhvaṃ gacchati cāmbare |
aśuddhapakṣaḥ śyenastu vyomago'pi patatyadhaḥ || 67 ||
chinnaikapakṣo haṃso'pi nordhvaṃ gantumito'rhati |
ataḥ śuddhadvayaṃ mukhyaṃ sādhanaṃ muktaye viduḥ || 68 ||
yadyapyābhyantaraṃ śuddhaṃ bāhyaśuddhanivartakam |
bhavatyetena sāmyaṃ na tayoriti ca kecana || 69 ||
tathā'pi bāhyavilayasamakālalayātparam |
ābhyantaraṃ samaṃ tena bāhyena syātsvakarmaṇā || 70 ||
ābhyantaraṃ ca tacchuddhaṃ karma dvividhamucyate |
samprajñātasamādhyākhyamasamprajñātanāma ca || 71 ||
jīvanmukteḥ purāvṛttamādyaṃ karma svamānasam |
purā videhamuktestu vṛtamanyatsvamānasam || 72 ||
mānasatvātsamādheśca karmatvoktirna dūṣyate |
ananyaviṣayatvācca tatphalaṃ naiva naśvaram || 73 ||
antaḥśuddhirbahiḥśuddhiṃ yathā nṝṇāmapekṣate |
bahiḥśuddhistathaivāntaḥśuddhiṃ ca niyamena hi || 74 ||
yasya karmasu śuddheṣvapyaudāsīnyaṃ vijāyate |
tasyaiva janmasāṃkaryamanumeyaṃ vipaścitā || 75 ||
virodho jāyate yasya jñānakarmasamuccaye |
tasyaiva janmasāṃkaryamanumeyaṃ vipaścitā || 76 ||
yaḥ śrautaṃ karma hitvānyattāntrikaṃ samupāśrayet |
tasyaiva janmasāṃkaryamanumeyaṃ vipaścitā || 77 ||
yaścāntaraṃ ca tatkarma manyate mandagocaram |
tasyaiva janmasāṃkaryamanumeyaṃ vipaścitā || 78 ||
aśuddhakarmaniṣṭhaḥ san śuddhaṃ nindati yaḥ sadā |
tasyaiva janmasāṃkaryamanumeyaṃ vipaścitā || 79 ||
śuddhaṃ paśyati yaḥ śāntamakṣirogīva bhāskaram |
tasyaiva janmasāṃkaryamanumeyaṃ vipaścitā || 80 ||
viśuddhavaṃśaprabhavaṃ mahāmatiṃ
       viśuddhabāhyāntarakarmabhāsvaram |
viśuddhavedāntarahasyavedinaṃ
       vidveṣṭi yaḥ saṃkara eva netaraḥ || 81 ||
aśuddhavaṃśaprabhavaṃ sudurmatiṃ
       svaśuddhakarmadvayanaṣṭatejasam |
aśuddhatantrārthavidaṃ narādhamaṃ
       yaḥ ślāghate saṃkara eva netaraḥ || 82 ||
iti sūryagītāyāṃ dvitīyo'dhyāyaḥ ||
||  atha tṛtīyo'dhyāyaḥ ||
athātaḥ sampravakṣyāmi mamāntaryāmiṇaṃ śivam |
yaḥ sarvakarmaṇāṃ sākṣī nirlepaḥ prabhurīśvaraḥ || 1 ||
trinetraṃ nīlakaṇṭhaṃ yaṃ sāmbaṃ mṛtyuṃjayaṃ haram |
dhyātvā saṃsṛtimokṣaḥ syāttaṃ namāmi maheśvaram || 2 ||
sarveṣāṃ karmaṇāmekaḥ phaladātā ya ucyate |
sa eva mṛḍa īśānaḥ sarvajñaḥ sarvaśaktimān || 3 ||
yasya smaraṇamātreṇa nivartante'khilāpadaḥ |
sampadaśceha labhyante so'ntaryāmī śivo haraḥ || 4 ||
yenaiva sṛṣṭamakhilaṃ jagadetaccarācaram |
yasmiṃstiṣṭhati naśyatyapyeṣa eko maheśvaraḥ || 5 ||
yaṃ namanti surāḥ sarve svasvābhīṣṭaprasiddhaye |
svātantryaṃ yasya sarvatra so'ntaryāmi maheśvaraḥ || 6 ||
umārdhavigrahaḥ śambhuḥ trinetraḥ śaśiśekharaḥ |
gaṃgādharo mahādevaḥ so'ntaryāmi dayānidhiḥ || 7 ||
śrutismṛtipurāṇeṣu yasyaivādhikyamiṣyate |
yasyādhikyasmṛtermuktiḥ so'ntaryāmī purātanaḥ || 8 ||
yannāmajapamātreṇa puruṣaḥ pūjyate suraiḥ |
yamāhuḥ sarvadeveśaṃ so'ntaryāmī gurūttamaḥ || 9 ||
yadākhyāmṛtapānena saṃtṛptā munayo'khilāḥ |
na vāñchanti mahābhogān so'ntaryāmī jagatpatiḥ || 10 ||
aruṇa uvāca -
sadguro bhāskara śrīman sarvatattvārthakovida |
śrutismṛtipurāṇeṣu hyantaryāmyanyathā śrutaḥ || 11 ||
satyaṃ jñānamanantaṃ yatprasiddhaṃ brahma niṣkalam |
nirguṇaṃ niṣkriyaṃ śāntaṃ kevalaṃ sarvagaṃ param || 12 ||
tadeva sarvāntaryāmī śrutaṃ sarvāntaratvataḥ |
vareṇyaṃ savituste ca gāyatryāṃ taddhi kathyate || 13 ||
aśarīrasya tasyaiva hyādimadhyāntavarjanāt |
ākāśavadvibhūtena sarvāntaryāmitocitā || 14 ||
śivasya saśarīrasya sāmbasya saguṇasya tu |
avibhutvena sā naiva yujyate bhāskara prabho || 15 ||
saguṇaikapradhānaiśca viśiṣṭādvaitavādibhiḥ |
kaiścidbrahmaharīśānāmantaryāmitvamucyate || 16 ||
sarvajñatvādidharmāṇāṃ samatvaṃ ca trimūrtiṣu |
matvaivopāsate viprāḥ te gāyatrīparāyaṇāḥ || 17 ||
kecid druhiṇa eva syādantaryāmī vākpatiḥ |
nānyau hariharau karmaprasiddheriti vai viduḥ || 18 ||
kecittu viṣṇureva syādantaryāmī ramāpatiḥ |
na vidhīśau paropāstiprasiddheriti vai viduḥ || 19 ||
kecicca śiva ekaḥ syādantaryāmī hyumāpatiḥ |
nānyau brahmaharī jñānaprasiddheriti saṃviduḥ || 20 ||
tvaduktarītyā tvādhikyaṃ jñānopāsanakarmasu |
karmaṇo'vagataṃ tena vidhereva prasidhyati || 21 ||
eṣa pakṣaḥ samīcīnastava naiva bhaviṣyati |
tasmādaniścitārthaṃ māṃ kuruṣvāsaṃśayaṃ prabho || 22 ||
sūrya uvāca -
samyakpṛṣṭaṃ tvayā dhīmannaruṇa śa‍ṛṇu sādaram |
vakṣyāmi niścitārthaṃ te śrutismṛtyādibhiḥ sphuṭam || 23 ||
antaryāmī dvidhā proktaḥ saguṇo nirguṇo'pi ca |
carasya kevalaṃ tvādyaścarasyānyo'carasya ca || 24 ||
ahaṃ hi cara evāsmi madantaryāmiṇāvubhau |
gāyatryāṃ cāvagantavyau devau saguṇanirguṇau || 25 ||
nirguṇaścāvagantavyaḥ saguṇadvārato'khilaiḥ |
ato'bruvaṃ śivaṃ sākṣānmadantaryāmiṇaṃ tava || 26 ||
kāraṇatvaṃ yathā siddhaṃ brahmaṇaḥ paramātmanaḥ |
yathā śivasya sāmbasya kāryatvaṃ ca satāṃ matam || 27 ||
tathā śivasya hetutvaṃ viṣṇoḥ kāryatvamapyatha |
viṣṇośca hetutāṃ tadvadvidherviddhi ca kāryatām || 28 ||
brahmā viṣṇuḥ śivo brahma hyuttarottarahetavaḥ |
iti jānanti vidvāṃso netare māyayā vṛtāḥ || 29 ||
viśiṣṭādvaitino vā'nye saguṇaikābhimāninaḥ |
aśarīrānabhijñatvānmāyāparavaśā dhruvam || 30 ||
sarvajñatvādidharmāṇāṃ kathaṃ sāmyaṃ trimūrtiṣu |
trayāṇāṃ ca guṇānāṃ hi vaiṣamyaṃ sarvasaṃmatam || 31 ||
guṇatrayavaśātteṣāṃ vaiṣamyaṃ viddhi susthitam |
brahmā hi rājasaḥ prokto viṣṇustāmasa ucyate || 32 ||
rudraḥ sa sāttvikaḥ proktaḥ mūrtivarṇaiśca tādṛśāḥ |
citsvarūpānubhūtyā ca tāratamyaṃ nigadyate || 33 ||
nirviśeṣaparabrahmānanyatvena tu te samāḥ |
tathā'pi śivaśabdasya parabrahmātmakatvataḥ || 34 ||
sākṣiṇā nirvikāreṇa cinmātreṇa mahātmanā |
sadāśivena nityena kevalena samo na hi || 35 ||
sāmbasya candracūḍasya nīlakaṇṭhasya śūlinaḥ |
utkarṣo'sti svataḥsiddhaḥ kiṃ mayā pratipādyate || 36 ||
ādau māṃ janayāmāsa brahmā sākṣāccaturmukhaḥ |
yathā tathā viriṃciṃ taṃ śrīmānnārāyaṇo hariḥ || 37 ||
yato'bhavanmahāviṣṇurmamāruṇa pitāmahaḥ |
tato me suprasiddhabhūtsūryanārāyaṇa abhdhā || 38 ||
naitena sakaleśasya prapitāmahatāvaśāt |
sarvotkṛṣṭatvasaṃsiddhyā lupyate hyāntarātmanā || 39
atha vā yogavṛtyā syācchivo nārāyaṇābhidhaḥ |
taddṛṣṭirmayi kartavyopāsakariti sanmatam || 40 ||
karmopāsanabodheṣu brahmaviṣṇuśivāḥ kramāt |
prasiddhā iti saṃtyajya dhiyaṃ śa‍ṛṇu vaco mama || 41 ||
triṣu trayaḥ prasiddhāḥ syustāratamyena cāruṇa |
kāmyakarmapradhāno'sti svayaṃbhūścaturānanaḥ || 42 ||
naimittikapradhānastu viṣṇuḥ kamalalocanaḥ |
nityakarmapradhānaḥ sa śivaḥ sākṣāttrilocanaḥ || 43 ||
mūrtyupāstau vidhimukhyastvaṃśopāstau harirmataḥ |
niraṃśopāsane mukhyo nīlakaṇṭho haro mataḥ || 44 ||
jñāne śravaṇaje brahmā vijñāne mananodite |
viṣṇuḥ sa samyagjñāne tu nididhyāsanaje śivaḥ || 45 ||
atraivaṃ sati kasyābhūdādhikyamaruṇādhunā |
tvameva samyagālocya viniścinu mahāmate || 46 ||
purā kaścinmahādhīraḥ śivabhaktāgraṇīrdvijaḥ |
śivākhyājapasaṃsaktaścacāra bhuvi nispṛhaḥ || 47 ||
svāśramācāranirato bhasmarudrākṣabhūṣaṇaḥ |
sarvaśāstrārthatattvajñaḥ kāmakrodhādivarjitaḥ || 48 ||
śamādiṣaṭkasampannaḥ śivabhaktajanādaraḥ |
śivasya vaibhavaṃ smṛtvā śrutismṛtipurāṇagam || 49 ||
sarveśvarasya sāmbasya trinetrasya dayānidheḥ |
sadāśivasya māhātmyaṃ svata evedamabravīt || 50 ||
paśvādibhyo variṣṭhāḥ kṣitigatamanujāstebhya evendramukhyaḥ
     devāstebhyo vidhātā harirapi ca tataḥ śaṅkaro yastrinetraḥ |
nānyo'smācchaṃkarāttu śrutiṣu nigadito vā variṣṭhaḥ samo vā
     sarvānviṣṇvādikāṃstaṃ na hi vayamadhunā nūnamevāśrayāmaḥ || 51 ||
mūlādhāre gaṇeśastadupari tu vidhirviṣṇurasmāttato'yaṃ
     rudrasthāne caturthe śrutirapi ca tathā prāha śāntaṃ caturtham |
asmādanyaḥ śivo'sti tripurahara ito vā sadādyaḥ śivo'sti
     svastho'yaṃ dvādaśāntaprabalanaṭanakṛccāpi sākṣātsabheśaḥ || 52 ||
raudrī śaktistathā syādayamapi ca hariḥ śākta evaṃ viriṃco
     mantavyo vaiṣṇavo'mī sanakamukhamahābrāhmaṇā brāhmaṇāśca |
tasmādevaṃ vibhakte na hi bhavati hareraṃśitāṃśāṃśibhāve
     sākṣādapyatra nityaṃ paramaśivamahaṃ cāṃśinaṃ taṃ namāmi || 53 ||
śambhoranyanna paśyāmyahamiha parame vyomni somācchrutau vā
     yasyaivaitena bhāsā jagadakhilamidaṃ bhāsate caityarūpam |
yacchīrṣāṅghrī didṛkṣu druhiṇamuraripu sarvaśaktyāpya dṛṣṭvā
     khedantau jagmatustaṃ paramaśivamamuṃ tvāṃ vinā kaṃ nu vande || 54 ||
yaṃ viṣṇurnāvapaśyatyakhilajanabhayadhvaṃsakaṃ kāśikāyāṃ
     liṃgaṃ copāsta ityapyadhikabhasitarudrākṣasaṃbhūṣitaḥ san |
jābāleye bṛhatyapyatha harijanitā śrūyate soma ekaḥ
     pāyācchrutyantasiddho janimṛtibhayabhṛtsaṃsṛtestārako mām || 55 ||
madhye ko vā'dhikaḥ syāddruhiṇa hariharāṇāmiti praśnapūrvaṃ
     brahmādau paippalādaṃ khalu vadati mahānrudra evādhikaḥ syāt |
ityuktvā śārabhākhye śrutiśirasi namaścāstu rudrāya tasmai
     stutvaivaṃ dhyeyamāha tripuraharamumākāṃtamekaṃ bhaje'ham || 56 ||
dhyātā rudro rameśo harirapi tu tathā dhyānamekaḥ śivastu
     dhyeyo'tharvaśruteḥ sā nikhilarasavatī yā samāptā śikhābhūt |
dhyeyaścinmātra ekaḥ paramaśiva ito vā cidaṃdaśatva-
     masya dhyātuḥ syānna tvamuṣya prakṛtibhavamanovṛttirūpasya viṣṇoḥ || 57 ||
eko rudro maheśaḥ śiva iti ca mahādeva evaiṣa sarva
     vyāpī yaḥ śrūyate'smiṃcchrutiśirasi tathātharvaśīrṣābhidhe ca |
devāḥ sarve yadantasthitijuṣa iha te viṣṇupūrvāstatonyaḥ
     ko vā'syādvyāpako'smānniratiśayacidākāśarūpānmaheśāt || 58 ||
nābhau brahmāṇamuktvā harimapi hṛdaye rudramenaṃ bhruvosta-
     nmadhye śrutyanta evaṃ praṇavavivaraṇe nārasiṃhābhidhe ca |
vijñeyaḥ so'yamātmā śiva iti ca caturtho'dvitīyaḥ
     praśāntaścetyāhānte prajeśastridaśaparipadastatsa īśaḥ prapūjyaḥ || 59 ||
kaivalyaṃ prāpnuyātkaḥ puruṣa iha śivaṃ kevalaṃ tvāṃ vihāya
     svāminnīśaṃ tathānyaṃ jagati sadasatoratra viṣṇorvidhervā |
cinmātraḥ pratyagātmā tvamasi khalu sadā pūrva ekaḥ śivo'ta-
     stvāmevaikaṃ bhaje'haṃ satatamapi jagatsākṣiṇaṃ nirviśeṣam || 60 ||
sūrya uvāca -
evaṃ śivasya māhātmye sarvaśrutyantaniścite |
udbhavetsaṃśayaḥ kasya ko mucyeta saṃśayāt || 61 ||
atoruṇa mahāprājña mukhyāntaryāmiṇaṃ mama |
trinetraṃ bhaja kaivalyasaṃsidhyai parameśvaram || 62 ||
|| iti sūryagītāyāṃ tṛtīyo'dhyāyaḥ ||
|| atha caturtho'dhyāyaḥ ||
sūrya uvāca -
athātaḥ sampravakṣyāmi tasyāntaryāmiṇo guroḥ |
jagatsṛṣṭyādikarmāṇi līlārūpāṇi suvrata || 1 ||
ādau jagatsasarjedaṃ paṃcīkaraṇakarmaṇā |
yaḥ sa īśo mahāmāyaḥ sarvajñaḥ sarvaśaktimān || 2 ||
caturvidheṣu bhūteṣu nijamāyāvaśīkṛtān |
jīvān praveśayitvānanupraviveśa svayaṃ vaśī || 3 ||
līlārūpamapīdaṃ ca karma tasya maheśituḥ |
prārabdhakarmajaṃ jñeyamādhikārikatāvaśāt || 4 ||
sa hyādikārikaḥ śreṣṭhaḥ pūrvaṃ jīvatvamāgataḥ |
samuccayādabhūdīśo jñānopāsanakarmaṇām || 5||
prākkalpādhikṛto devaḥ svārabdhakṣapaṇātsvayam |
apahāya nijāṃ māyāṃ prāptavān paramaṃ padam || 6 ||
atha tāmāśrito jīvaḥ kalpādau pūrvavatkramāt |
sṛṣṭvā sarvādhikārī san jagatpāti ca hanti ca || 7 ||
kriyamāṇatayā tena niyamenaiva karmaṇām |
trayāṇāṃ tasya karmitvamīśasyāpyupapadyate || 8 ||
jīvanmuktasamānatvaṃ yatastasyāvagamyate |
ataḥ prārabdhakarmitvaṃ avaśyaṃ tasya sidhyati || 9 ||
brahmavittvaṃ hi tasya syānna tu brahmatvamīśituḥ |
sṛṣṭyādikarmakartṛtvadarśanānmāyayā'pi vā || 10 ||
jīvasṛṣṭyādikartṛtvaṃ brahmaṇo'pi vartate |
tathāpi pūrvakarmitvaṃ tasya na śrūyate kvacit || 11 ||
karmaṇaḥ prāgabhāvatvādbhāvatvādbrahmaṇo vibhoḥ |
pūrvakarmavato hi syātkarma prārabdhasaṃjñitam || 12 ||
sṛṣṭyādikarmabaddhatve tasya māyāvaśatvataḥ |
vaśyamāyatvavacanaṃ vyarthameveti cenna ca || 13 ||
svādhikārāvasane hi kaivalyaṃ noparudhyate |
atastasya prasiddhaṃ tadvaśyamāyatvamarthavat || 14 ||
sthitau tu tasya māyitvaṃ kāmitvādivadiṣyate |
na dhanitvādivatkarma pāravaśyānnirantaram || 15 ||
jāgradvatsṛṣṭikarma syātsvapnavatsthitikarma ca |
jagatpralayakarma syāt suptivattasya māyinaḥ || 16 ||
avasthātrayavattvena karmatritayavattayā |
śarīratrayavattvena jīvaḥ so'pīti kecana || 17 ||
tadayuktaṃ purā jīvo'pyadya brahmātmavittayā |
sarvajñatvādisampattyā sa hi jīvavilakṣaṇaḥ || 18 ||
jīvanmuktasamānatvānna karmatrayamīśituḥ |
prārabdhamātrabaddhatvādadhikāravaśādiha || 19 ||
adhikārāvasāne tadbrahmatvaṃ sambhaviṣyati |
iti vedāntasiddhe'rthe vyabhicāraḥ kuto bhavet || 20 ||
brahmaivaikamakarmoktaṃ śrutibhiḥ smṛtibhiśca tat |
īśasya karmatoktistu śrūyate hyaupacārikī || 21 ||
sa karmatve'pi tasya syātkarmamocakateśituḥ |
saṃcitāgāmihīnatvātsarvajñatvācca sattama || 22 ||
īśvarabrahmaṇorbhedaṃ sakarmā'karmatādibhiḥ |
suprasiddhamapahnotuṃ kaḥ samartho'sti mānataḥ || 23 ||
īśvarasyāpyakarmatvaṃ yadi brūyānniraṃkuśam |
sa dvaitī na kadāpyasmātsaṃsārānmuktimāpnuyāt || 24 ||
yatastatpadavācyo'rthaḥ sa heya iti kathyate |
atastasya na nityatvaṃ nākarmatvaṃ ca yujyate || 25 ||
anadhyastātmabhāvena na dehenaiva kaścana |
vyāprīyeta tataśca syāddehīśo dhyānasaṃyutaḥ || 26 ||
svadehe'pīśvarasyāsti nādhyāsaḥ pāramārthikaḥ |
prātibhāsikamāśritya sraṣṭṛtvādi nigadyate || 27 ||
dehādhyāsasya satyasya na kadāpyasti saṃgatiḥ |
prāgīśadehābhāvena dehābhāvena cā'pyaye || 28 ||
jagatpralayakāle sa nirvyāpāro'pi suptavat |
adhyāsabījavattvena punaḥ sṛṣṭau pravartate || 29 ||
caturyugasahasrānte vidhāturhi niśocyate |
tadā suptasya tasyāpi jīvasyeva sabījatā || 30 ||
tathā viṣṇoryugāḥ proktāstasmācchataguṇādhikāḥ |
tathā śivasya tasmācca viṣṇoḥ śataguṇādhikāḥ || 31 ||
evaṃ kālairavacchinnāṃstāratamyena jīvavat |
īśvarāṃstān kathaṃ brūyāṃ dehakarmādivarjitān || 32 ||
vyaṣṭidehatrayaṃ svīyaṃ matvā jīvatrayaṃ yathā |
pāramārthikasaṃsāranibaddhaṃ karmitāmagāt || 33 ||
samaṣṭidehatritayaṃ tathā matveśvaratrayam |
prātibhāsikasaṃsāranibaddhaṃ karmitāmagāt || 34 ||
śuddhasattvapradhānāyāṃ māyāyāṃ pratibimbitaḥ |
īśa ityucyate tasya nirupādhikatā katham || 35 ||
aupādhikasya nityatvaṃ kathaṃ vācyaṃ manīṣibhiḥ |
anityasya ca naiṣkarmyaṃ kathaṃ bhavitumarhati || 36 ||
brahmaṇyāropito bhrāntairīśākhyaḥ sarvasṛṣṭikṛt |
ātmayogibhirabhrāntaiḥ sa bhavatyavaropitaḥ || 37 ||
avidyātimirāndhasya sthāṇau coravadīśvaraḥ |
pratibhāti parabrahmaṇyamale svātmarūpiṇi || 38 ||
sadyo mumukṣudṛṣṭyā hi neśvarasyāsti satyatā |
ato vivartavādo'yaṃ sutarāmupayujyate || 39 ||
pariṇāme'pyanityatvasaṃsiddherīśvarasya ca |
advaitabrahmaniṣṭhatvaṃ śroturjīvasya sambhavet || 40 ||
adhikārivibhedena vādāste matātrayaḥ |
tatrottamādhikārī syācchṛṇvannīśe vivartatām || 41 ||
jīve tu pariṇāmitvaṃ śa‍ṛṇvannevottamottamaḥ |
kīṭavadbhṛṅgarūpeṇa pariṇāme vimokṣataḥ || 42 ||
jīvasyeśvaratā'vāptau kramamuktirhi sidhyati |
ato'sya sadyo muktyarthaṃ brahmatāvāptirīryate || 43 ||
turīyaḥ paṃcamo vā''stāmīśvaraḥ ṣaṣṭha eva vā |
tasmādatītaṃ brahmeti siddhānte ko'nusaṃśayaḥ || 44 ||
īśvare tiṣṭhati brahma brahmaṇīśaśca tiṣṭhati |
ata ekatvameva syāddvayoriti na tarkyatām || 45 ||
brahmaṇyeveśvaraḥ prokto na tu brahmeśvare kvacit |
vibhoravibhusaṃsthatvāsaṃbhavātparamātmanaḥ || 46 ||
brahmakṣatramubhe yasya śrutyā bhavata odanaḥ |
yasyopasecanaṃ mṛtyuḥ sa yatra brahmaṇīryate || 47 ||
tadetādṛśamityatra ko vededantayāvyayam |
akhaṇḍaṃ nirguṇaṃ brahma nirādhāraṃ paraṃ mahat || 48 ||
parabrahmāṃśabhūto'pi paramaḥ puruṣottamaḥ |
īśvarādadhikaḥ proktaḥ kiṃ punarbrahma kevalam || 49 ||
kāraṇaṃ jagatāmīśo jīvānāṃ brahma kāraṇam |
evaṃ satīśabrahmaikyaṃ vyavahāre kathaṃ bhavet || 50 ||
īśasya karmitāyāṃ hi puṇyaṃ pāpaṃ ca saṃbhavet |
sukhaṃ duḥkhaṃ ca tenaiva jīvatvamiti cecchṛṇu || 51 ||
īśaḥ pravartate puṇyapāpayorlokasaṃgrahāt |
tathā'pi sukhaduḥkhe sto naivātmajñānavattayā || 52 ||
bhrūṇahatyādipāpāni hyakarodviṣṇurīdṛśaḥ |
na tairduḥkhamabhūttasya samprāptaṃ pāramārthikam || 53 ||
lokakṣemārthakatvena tatkṛtāghasya nindyatā |
na vācyā na ca tenāsti jīvatvaṃ tasya sarvathā || 54 ||
ṛgādivedakartā'pi sa yathoktaṃ samācaret |
anyathā samprasajyeta hyaprāmāṇikateśituḥ || 55 ||
saṃsiddhe śāstrakartṛtve na kārayitṛtā vacaḥ |
vyarthameveti cennaiṣa doṣa eva vicāraṇe || 56 ||
jīvasya kartṛtāyāṃ hi syātkārayitṛteśituḥ |
śāstrasya karmatāyāṃ tu maheśasyāsti kartṛtā || 57 ||
naitena śāstrayonitvaṃ nirguṇasyaiva hīyate |
nirguṇodbhūtaśāstrasya saguṇādvyaktidarśanāt || 58 ||
upacaryata īśasya guṇinaḥ śāstrayonitā |
yadvā'stāmubhayorvedavedāntābhyāṃ ca bījatā || 59 ||
na caitenāsti karmitvasāmyaṃ brahmeśayostayoḥ |
kartuśca kṛtakartuśca bhedo'sti spaṣṭa eva hi || 60 ||
kartṛtvaṃ yasya saṃsiddhaṃ karmitvaṃ tasya siddhyati |
ityatra saṃśayaḥ ko vā tadbrahmeśau ca karmiṇau || 61 ||
iti cetkarmiteśasya kāmitvādivadiṣyate |
brahmaṇo'pi tu karmitvaṃ dhanitvādivadityataḥ || 62 ||
paratantro maheśaḥ syātsvatantraṃ brahma nirguṇam |
ādhārādheyabhāvena kāryakāraṇatayā dvayoḥ || 63 ||
karmitve brahmaṇaḥ siddhe kathaṃ nairguṇyamīryate |
iti cennaiṣa doṣo'sti māyāguṇavivarjanāt || 64 ||
adṛśyādibhirvidyāguṇairānandatādibhiḥ |
saguṇavyapadeśaḥ syādbrahmaṇastviṣṭa eva saḥ || 65 ||
jagatsaṃsārakartṛtvaṃ yathā jīveśayormatam |
tathā jīveśakartṛtvaṃ parasya brahmaṇo matam || 66 ||
brahmaṇo'nyo na kartā'sti prākkarmādivivarjanāt |
anādyanantaṃ brahmaikamakarmākartṛ hīryate || 67 ||
kālatraye'pyakartṛtvaṃ brahmaṇaḥ sammataṃ yadi |
jīveśaracanā na syāt jagatsaṃsārayorapi || 68 ||
pratyakṣasiddhā racanā kartāraṃ samapekṣate |
ato'dya karmakartṛtvādbrahmaṇaḥ karmitocitā || 69 ||
karmitve brahmaṇo'pyevaṃ kiṃ vācyaṃ brahmavedinaḥ |
brahmībhūto na karmī syādityetacca na siddhyati || 70 ||
yādṛśaṃ brahma nirṇītaṃ tadbhūto'pi ca tādṛśaḥ |
iti nirṇaya eva syādyukterapi samaṃjasaḥ || 71 ||
kālatraye'pyakarmitvamakartṛtvamakālatā |
kasya cidbrahmaṇo'nyasya nīrūpasyāsti vastunaḥ || 72 ||
tatra kālatrayātītaṃ neha jñeyaṃ vivakṣitam |
prameyatvapramāṇatvapramātṛtvādivarjanāt || 73 ||
ye tu brahmeśajīvāḥ samproktāḥ kartṛtvasaṃyutāḥ |
vidyayā māyayā te hi karmiṇo'vidyayāpi ca || 74 ||
karmiṣu triṣu cokteṣu brahmaṇaḥ śraiṣṭhyadarśanāt |
akarmatvaṃ śrutismṛtyoḥ procyate yuktameva tat || 75 ||
etena karmiṇaḥ śraiṣṭhyaṃ saṃsiddhamiti ye viduḥ |
audāsīnyaṃ na teṣāṃ syācchrutismṛtyuktakarmasu || 76 ||
jñānādupāstirutkṛṣṭā karmotkṛṣṭamupāsanāt |
iti yo veda vedāntaiḥ sa eva puruṣottamaḥ || 77 ||
iti sūryagītāyāṃ caturtho'dhyāyaḥ || 4 ||
atha pañcamo'dhyāyaḥ ||
sūrya uvāca -
athātaḥ sampravakṣyāmi karmiśreṣṭhasya lakṣaṇam |
yacchrutvā naiva bhūyo'nyacchrotavyaṃ te'vaśiṣyate || 1 ||
yasya dehaḥ svakīyo'pi sarvathā na pratīyate |
nendriyāṇi ca sarvāṇi sa karmiśreṣṭha ucyate || 2 ||
yasya prāṇāḥ praśāntāḥ syurmana ādīni ca svayam |
avyaktāntāni sarvāṇi sa karmiśreṣṭha ucyate || 3 ||
bālonmattapiśācādi ceṣṭitānyapi yatra no |
niṣṭhā'jagaravadyasya sa karmiśreṣṭha ucyate || 4 ||
nāhaṃbhāvaśca yasyāsti nedaṃbhāvaśca kutracit |
sarvadvandvavihīnātmā sa karmiśreṣṭha ucyate || 5 ||
prāgbaddho'haṃ vimukto'dyetyevaṃ yasya smṛtirna ca |
nityamuktasvarūpaḥ san sa karmiśreṣṭha ucyate || 6 ||
videhamukto yaḥ prokto variṣṭho brahmavedinām |
arūpanaṣṭacittāsuḥ sa karmiśreṣṭha ucyate || 7 ||
karmāṇi yasya sarvāṇi vāsanātrayajāni ca |
abhavannapaśāntāni sa karmiśreṣṭha ucyate || 8 ||
karmāṇi karmabhiḥ śuddhairaśuddhānyupamṛdya yaḥ |
sa karmabrahmamātro'bhūt sa karmiśreṣṭha ucyate || 9 ||
jñānināmapi yaḥ śreṣṭhaḥ saptamīṃ bhūmikāṃ gataḥ |
upāsakānāṃ yaścaikaḥ sa karmiśreṣṭha ucyate || 10 ||
yaḥ sarvaiḥ pīḍito'pi syānnirvikāro'pi pūjitaḥ |
sukhaduḥkhe na yasya staḥ sa karmiśreṣṭha ucyate || 11 ||
yaḥ sarvairmanujaiḥ pūjyo yaḥ sarvaiśca surāsuraiḥ |
brahmaviṣṇuśivairyaśca sa karmiśreṣṭha ucyate  || 12 ||
tyaktvā karmāṇi sarvāṇi svātmamātreṇa tiṣṭhataḥ |
kathaṃ karmitvamityevaṃ mā śaṃkiṣṭhā mahāmate || 13 ||
karmaṇāṃ phalameṣā hi svātmamātreṇa saṃsthitiḥ |
ataḥ saphalakarmaiṣa karmiśreṣṭho bhaveddhruvam || 14 ||
jñānena jñāyate yadvā upāstyā copalabhyate |
tatsthiraṃ prāpyate'nena karmaṇā|āto'sya karmitā || 15 ||
dehe'smin vartamāne'pi dehasmṛtivivarjanāt |
videhamukta ityuktaḥ kathaṃ karmīti cecchṛṇu || 16 ||
dehavismṛtimattve'pi karmadehe sthitatvataḥ |
anyadṛṣṭyā'sya dehitvātkarmitvamupapadyate || 17 ||
dehasthatvādapūrṇaḥ syāditi śakyaṃ na kiṃcana |
taṭākamaprakuṃbhasthaṃ jalaṃ pūrṇaṃ hi dṛśyate || 18 ||
prārabdhakarmamukto'pi bhogānmukto'pi cākhilāt |
karmākārye sthitaḥ karmī dehe syādbhogasādhane || 19 ||
sādhane sati dehe'pi sādhyo bhogo na sidhyati |
dehavismṛtimattvena dehahīnasamatvataḥ || 20 ||
āhitāgnitvasaṃsiddhyai jyotiṣṭome kṛte'pi ca |
yathā na svargamāpnoti niṣkāmaḥ puruṣarṣabhaḥ || 21 ||
jāgrasvapnasuṣuptyātmasandhitrayakṛtāmṛtaḥ |
sarvasandhyādirahitaḥ sandhibhirvandyate sadā || 22 ||
yaḥ sarvakarmabhirvandyo nityaṃ sarvairakarmibhiḥ |
sa karmipravaro'karmipravaraśceti kathyate || 23 ||
sarvasāmyamupetyasya svātmārāmasya yoginaḥ |
sahasraśaḥ kṛtaiḥ kiṃ vā vandanairakṛteśca vā || 24 ||
dehādiṣu vikāreṣu svīyatvaṃ svatvapūrvakam |
vihāya nityaniṣṭhābhiḥ svamātraḥ sa virājate || 25 ||
indriyārthairvimūḍhānāṃ duṣkarmatvaṃ nigadyate |
tairapetaḥ sukarmyeṣa videha iti kathyate || 26 ||
yaḥ sarvadvandvanirmuktaḥ sarvatripuṭivarjitaḥ |
sarvāvasthāvihīnaḥ sa videha iti kathyate || 27 ||
laukikaṃ vaidikaṃ karma sarvaṃ yasminkṣayaṃ gatam |
yasmānnaivāṇumātraṃ ca videha iti kathyate || 28 ||
yasyendriyāṇi sarvāṇi na calanti kadācana |
bhittisthacitrāṃgānīva videha iti kathyate || 29 ||
ātmānaṃ satyamadvaitaṃ kevalaṃ nirguṇāmṛtam |
sampaśyataḥ sadā svānyavikārasphuraṇaṃ kutaḥ || 30 ||
ātmetaradasatyaṃ ca dvaitaṃ nānāguṇānvitam |
apaśyataḥ sadānandasvarūpāsphuraṇaṃ kutaḥ || 31 ||
ādimadhyāntarahitacidānandasvarūpiṇaḥ |
sthitaprajñasya ko bādhaḥ śarīreṇa svayoginaḥ || 32 ||
karmāṇi karmaṇā tyaktvā brahmaṇā brahmaṇi sthitaḥ |
karmaṇā śarma satataṃ samprāptaḥ sa virājate || 33 ||
buddhestaikṣṇyaṃ ca mauḍhyaṃ ca yasya naivāsti kiṃcana |
buddheḥ pāraṃgataḥ so'yaṃ prabuddhaḥ śobhatetarām || 34 ||
manastathaiva saṃlīnaṃ citīva lavaṇaṃ jale |
yathā nirantarātmīyaniṣṭhayā so'dvayo'bhavat || 35 ||
samanastvānmahadduḥkhamamanaskasya tatkutaḥ |
samanasko hi saṃkalpān karute duḥkhakāriṇaḥ || 36 ||
prārabdhakarmajaṃ duḥkhaṃ jīvanmuktasya kathyate |
karmatrayavihīnasya videhasya kathaṃ nu tat || 37 ||
karma kartavyamiti vā na kartavyamitīha vā |
yadi manyeta vaidehīṃ na muktiṃ prāptavāṃstu saḥ || 38 ||
samādhirvā'tha kartavyo na kartavya itīha vā |
yadi manyeta vaidehīṃ na muktiṃ prāptavāṃstu saḥ || 39 ||
pūrvaṃ baddho'dhunā mukto'smyahamityeva bandhanāt |
yadi manyeta vaidehīṃ na muktiṃ prāptavāṃstu saḥ || 40 ||
pūrvamapyabhavanmukto madhye bhrāntistu bandhavat |
yadi manyeta vaidehīṃ na muktiṃ prāptavāṃstu saḥ || 41 ||
vandhyāputrādivatsarvaṃ mayyabhūdasadityapi |
yadi manyeta vaidehīṃ na muktiṃ prāptavāṃstu saḥ || 42 ||
āvidyakaṃ tamo dhvastaṃ svaprakāśena vā iti |
yadi manyeta vaidehīṃ na muktiṃ prāptavāṃstu saḥ || 43 ||
svapne'pi nāhaṃbhāvo'sti mama dehendriyādiṣu |
yadi manyeta vaidehīṃ na muktiṃ prāptavāṃstu saḥ || 44 ||
arūpanaṣṭamanaso videhatvaṃ prakīrtyate |
tatkathaṃ manyamānasya yatkiṃcitsyādanātmanaḥ || 45 ||
mano naśyati niḥśeṣaṃ mananasya visarjanāt |
amanaskasvabhāvaṃ tatpadaṃ tasyāvaśiṣyate || 46 ||
mananena viniścitya vaidehīṃ muktimātmanaḥ |
naiṣkarmyasiddhiṃ vadatāṃ kā tṛptiravivekinām || 47 ||
śrutvā vedāntavākyāni modante'nubhavaṃ vinā |
līḍhena tāḍapatreṇa guḍākṣarayutena kim || 48 ||
svānubhūtiṃ vinā śāstraiḥ paṇḍitāḥ samalaṃkṛtāḥ |
kacahīneva vidhavā bhūṣaṇairbhūṣitottamaiḥ || 49 ||
svānubhūtiṃ vinā karmāṇyācarantyakhilānyapi |
svarṇayaḥkumbhakārāditulyā evopavītinaḥ || 50 ||
svānubhūtiṃ vinā vedān paṭhanti vividhā dvijāḥ |
prāvṛṇṇiśāyāṃ parito maṇḍūkā iva dussvarāḥ || 51 ||
svānubhūtiṃ vinā dehaṃ bibhratyadhyāsadārḍhyataḥ |
śākalyasya mṛtaṃ dehaṃ dhanabuddhyeva taskarāḥ || 52 ||
svānubhūtiṃ vinā dhyānaṃ kurvantyāsanasaṃyutāḥ |
bakā ivāṃbhasastīre matsyavaṃcanatatparāḥ || 53 ||
svānubhūtiṃ vinā śvāsānnirundhanti haṭhātsadā |
ayaskāro'nilaṃ bāhyaṃ drutikāyāmivādhikam || 54 ||
svānubhūtiṃ vinā yogadaṇḍapaṭṭādidhāriṇaḥ |
jīrṇakandhābharaṃ bhagnadaṇḍabhāṇḍādi pittavat || 55 ||
svānubhūtiṃ vinā yadyatkurvanti bhuvi mānavāḥ |
tattatsarvaṃ vṛthaiva syānmarubhūmau kṛṣiryathā || 56 ||
svānubhūtyarthakaṃ karma nikṛṣṭamapi sarvathā |
uttamaṃ vibudhaiḥ ślāghyaṃ śveva coranivartakaḥ || 57 ||
svānubhūtyupayuktebhya itarāṇi bahūnyapi |
karmādīnyācaranmartyo bhrāntavadvyarthaceṣṭitaḥ || 58 ||
śrutismṛtipurāṇeṣu kāmyakarmāṇyanekadhā |
procyante teṣu saṃsaktastyājyaḥ śiṣṭairviṭo yathā || 59 ||
kāmyakarmasamāsaktaḥ svaniṣṭhāṃ svasya manyate |
jātyandhaḥ svasya ratnādiparīkṣādakṣatāmiva || 60 ||
avaśendriyamātmārthagurubuddhyaiva sevate |
bālātantusutaṃ loke'gaṇitaṃ bhuktaye yathā || 61 ||
yastu vaśyendriyaṃ śāntaṃ niṣkāmaṃ sadguruṃ sadā |
svātmaikarasikaṃ muktyai sa dhīmānupagacchati || 62 ||
kāmyakarmāṇi cotsṛjya niṣkāmo yo mumukṣayā |
śāntyādiguṇasaṃyuktaṃ guruṃ prāptaḥ sa mucyate || 63 ||
iti śrutvā'ruṇaḥ sūryātsaṃtuṣṭaḥ svātmaniṣṭhayā |
kṛtakṛtya idaṃ prāha bhāskaraṃ vinayānvitaḥ || 64 ||
aruṇa uvāca -
śrīmanguruvara svāmiṃstvanmukhātpāramārthikam |
niṣkāmakarmamāhātmyaṃ śrutvā dhanyo'smyasaṃśayam || 65 ||
sakarmatvamakarmatvaṃ videhasya ca lakṣaṇam |
śrutaṃ rahasyaṃ nāto'nyatkiṃcidapyavaśiṣyate || 66 ||
tathā'pi mama sākṣāttvaṃ kartavyaṃ brūhi niścitam |
maccittaparipākaṃ hi ṣetsi sarvajña sadguro || 67 ||
iti pṛṣṭa uvācedaṃ bhagavānbhāskaro'ruṇam |
svasārathiṃ nijagrasthaṃ baddhabāhuṃ natānanam || 68 ||
sūrya uvāca -
aruṇa tvaṃ paraṃ brahma sākṣāddṛṣṭvā'dhunā kṛtī |
tathā'pyādehapatanādbrahmābhidhyānamādarāt || 69 ||
svādhikārocitaṃ śuddhaṃ karmāpyācara sattama |
pramādo mā'stu te svapne'pyuktayorbrahmakarmaṇoḥ || 70 ||
saṃvādamāvayoretaṃ sarvapāpaharaṃ śubham |
yaḥ śa‍ṛṇoti sakṛdvā sa kṛtārtho nātra saṃśayaḥ || 71 ||
śrīgurumūrtiruvāca -
iti dinakaravaktrādbrahmakarmainiṣṭhāṃ
     sphuṭataramavagamya prājña eko'ruṇaḥ saḥ |
abhavadakhilalokaiḥ pūjanīyaḥ kṛtārtha-
     stvamapi bhava tathaiva kṣipramaṃbhojajanman || 72 ||
vimalaviguṇayogābhyāsadārḍhyena yuktaḥ
     sakalagatacidātmanyadvitīye budho'pi |
satatamapi kuruṣvārabdhaduḥkhopaśāntyai
     rahasi nijasamādhīnsvoktakarmāpi dhātaḥ || 73 ||
iti tattvasārāyaṇakarmakāṇḍoktaśrīsūryagītāyāṃ paṃcamo'dhyāyaḥ ||
|| iti sūryagītā samāptā ||