Uttara Gita

(akhaṇḍaṃ saccidānandamavāṅmanasagocaram |
ātmānamakhilādhāramāśraye'bhīṣṭasiddhaye ||)
arjuna uvāca -
yadekaṃ niṣkalaṃ brahma vyomātītaṃ nirañjanam |
apratarkyamavijñeyaṃ vināśotpattivarjitam || 1||
kaivalyaṃ kevalaṃ śāntaṃ śuddhamatyantanirmalam |
kāraṇaṃ yoganirmuktaṃ hetusādhanavarjitam || 2||
hṛdayāmbujamadhyasthaṃ jñānajñeyasvarūpakam |
tatkṣaṇādeva mucyeta yajjñānādbrūhi keśava || 3||
śrībhagavānuvāca -
sādhu pṛṣṭaṃ mahābāho buddhimānasi pāṇḍava
yanmāṃ pṛcchasi tattvārthamaśeṣaṃ pravadāmyaham || 4||
ātmamantrasya haṃsasya parasparasamanvayāt |
yogena gatakāmānāṃ bhāvanā brahma cakṣate || 5||
śarīriṇāmajasyāntaṃ haṃsatvaṃ pāradarśanam |
haṃso haṃsākṣaraṃ caitatkūṭasthaṃ yattadakṣaram |
tadvidvānakṣaraṃ prāpya jahyānmaraṇajanmanī || 6||
kākīmukhaṃ kakārāntamukāraścetanākṛtiḥ |
akārasya tu luptasya ko'rthaḥ sampratipadyate || 7||
gacchaṃstiṣṭhansadā kālaṃ vāyusvīkaraṇaṃ param |
sarvakālaprayogena sahasrāyurbhavennaraḥ || 8||
yāvatpaśyetkhagākāraṃ tadākāraṃ vicintayet |
khamadhye kuru cātmānamātmamadhye ca khaṃ kuru |
ātmānaṃ khamayaṃ kṛtvā na kiñcidapi cintayet || 9||
sthirabuddhirasammūḍho brahmavidbrahmaṇi sthitaḥ |
bahirvyomasthitaṃ nityaṃ nāsāgre ca vyavasthitam |
niṣkalaṃ taṃ vijānīyācchvāso yatra layaṃ gataḥ || 10||
puṭadvayavinirmukto vāyuryatra vilīyate |
tatra saṃsthaṃ manaḥ kṛtvā taṃ dhyāyetpārtha īśvaram | 11
nirmalaṃ taṃ vijānīyātṣaḍūrmirahitaṃ śivam |
prabhāśūnyaṃ manaḥśūnyaṃ buddhiśūnyaṃ nirāmayam | 12
sarvaśūnyaṃ nirābhāsaṃ samādhistasya lakṣaṇam |
triśūnyaṃ yo vijānīyātsa tu mucyeta bandhanāt | 13
svayamuccalite dehe dehī nyastasamādhinā |
niścalaṃ tadvijānīyātsamādhisthasya lakṣaṇam | 14
amātraṃ śabdarahitaṃ svaravyañjanavarjitam |
bindunādakalātītaṃ yastaṃ veda sa vedavit | 15
prāpte jñānena vijñāne jñeye ca hṛdi saṃsthite |
labdhaśāntipade dehe na yogo naiva dhāraṇā | 16
yo vedādau svaraḥ prokto vedānte ca pratiṣṭhitaḥ |
tasya prakṛtilīnasya yaḥ paraḥ sa maheśvaraḥ | 17
nāvārthī ca bhavettāvadyāvatpāraṃ na gacchati |
uttīrṇe ca saritpāre nāvayā kiṃ prayojanam || 18||
granthamabhyasya medhāvī jñānavijñānatatparaḥ |
palālamiva dhānyārthī tyajedgranthamaśeṣataḥ || 19||
ulkāhasto yathā kaściddravyamālokya tāṃ tyajet |
jñānena jñeyamālokya paścājjñānaṃ parityajet || 20||
yathāmṛtena tṛptasya payasā kiṃ prayojanam |
evaṃ taṃ paramaṃ jñātvā vedairnāsti prayojanam || 21||
jñānāmṛtena tṛptasya kṛtakṛtyasya yoginaḥ |
na cāsti kiñcitkartavyamasti cenna sa tattvavit || 22||
tailadhārāmivācchinnaṃ dīrghaghaṇṭāninādavat |
avācyaṃ praṇavasyāgraṃ yastaṃ veda sa vedavit || 23||
ātmānamaraṇiṃ kṛtvā praṇavaṃ cottarāraṇim |
dhyānanirmathanābhyāsādevaṃ paśyennigūḍhavat || 24||
tādṛśaṃ paramaṃ rūpaṃ smaretpārtha hyananyadhīḥ |
vidhūmāgninibhaṃ devaṃ paśyedantyantanirmalam || 25||
dūrastho'pi na dūrasthaḥ piṇḍasthaḥ piṇḍavarjitaḥ |
vimalaḥ sarvadā dehī sarvavyāpī nirañjanaḥ || 26||
kāyastho'pi na kāyasthaḥ kāyastho'pi na jāyate |
kāyastho'pi na bhuñjānaḥ kāyastho'pi na badhyate || 27||
(kāyastho'pi na liptaḥ syātkāyastho'pi na bādhyate |)
tilamadhye yathā tailaṃ kṣīramadhye yathā ghṛtam |
puṣpamadhye yathā gandhaḥ phalamadhye yathā rasaḥ | 28
tathā sarvagato dehī dehamadhye vyavasthitaḥ |
manastho deśināṃ devo manomadhye vyavasthitaḥ |
kāṣṭhāgnivatprakāśeta ākāśe vāyuvaccaret || 29||
manasthaṃ manamadhyasthaṃ madhyasthaṃ manavarjitam |
manasā mana ālokya svayaṃ sidhyanti yoginaḥ || 30||
ākāśaṃ mānasaṃ kṛtvā manaḥ kṛtvā nirāspadam |
niścalaṃ tadvijānīyātsamādhisthasya lakṣaṇam || 31||
yogāmṛtarasaṃ pītvā vāyubhakṣaḥ sadā sukhī |
yamamabhyasyate nityaṃ samādhirmṛtyunāśakṛt || 32||
ūrdhvaśūnyamadhaḥśūnyaṃ madhyaśūnyaṃ yadātmakam |
sarvaśūnyaṃ sa ātmeti samādhisthasya lakṣaṇam |
śūnyabhāvitabhāvātmā puṇyapāpaiḥ pramucyate || 33||
arjuna uvāca-
adṛśye bhāvanā nāsti dṛśyametadvinaśyati |
avarṇamasvaraṃ brahma kathaṃ dhyāyanti yoginaḥ || 34||
śrībhagavānuvāca-
ūrdhvapūrṇamadhaḥpūrṇaṃ madhyapūrṇaṃ yadātmakam |
sarvapūrṇaṃ sa ātmeti samādhisthasya lakṣaṇam || 35||
arjuna uavāca-
sālambasyāpyanityatvaṃ nirālambasya śūnyatā |
ubhayorapi duṣṭatvātkathaṃ dhyāyanti yoginaḥ || 36||
śrībhagavānuvāca-
hṛdayaṃ nirmalaṃ kṛtvā cintayitvāpyanāmayam |
ahameva idaṃ sarvamiti paśyetparaṃ sukham || 37||
arjuna uvāca-
akṣarāṇi samātrāṇi sarve bindusamāśritāḥ |
bindubhirbhidyate nādaḥ sa nādaḥ kena bhidyate || 38||
śrībhagavānuvāca-
anāhatasya śabdasya tasya śabdasya yo dhvaniḥ |
dhvanerantargataṃ jyotirjyotirantargataṃ manaḥ |
tanmano vilayaṃ yāti tadviṣṇoḥ paramaṃ padam || 39||
oṃkāradhvaninādena vāyoḥ saṃharaṇāntikam |
nirālambaṃ samuddiśya yatra nādo layaṃ gataḥ || 40||
arjuna uvāca-
bhinne pañcātmake dehe gate pañcasu pañcadhā |
prāṇairvimukte dehe tu dharmādharmau kva gacchataḥ || 41||
śrībhagavānuvāca-
dharmādharmau manaścaiva pañcabhūtāni yāni ca |
indriyāṇi ca pañcaiva yāścānyāḥ pañca devatāḥ || 42||
tāścaiva manasā sarve nityamevābhimānataḥ |
jīvena saha gacchanti yāvattattvaṃ na vindati || 43||
arjuna uvāca-
sthāvaraṃ jaṅgamaṃ caiva yatkiñcitsacarācaram |
jīvā jīvena sidhyanti sa jīvaḥ kena sidhyati || 44||
śrībhagavānuvāca-
mukhanāsikayormadhye prāṇaḥ sañcarate sadā |
ākāśaḥ pibate prāṇaṃ sa jīvaḥ kena jīvati || 45||
arjuna uvāca-
brahmāṇḍavyāpitaṃ vyoma vyomnā cāveṣṭitaṃ jagat |
antarbahiśca tadvyoma kathaṃ devo nirañjanaḥ || 46||
śrībhagavānuvāca-
ākāśo hyavakāśaśca ākāśavyāpitaṃ ca yat |
ākāśasya guṇaḥ śabdo niḥśabdo brahma ucyate || 47||
arjuna uvāca-
dantoṣṭhatālujihvānāmāspadaṃ yatra dṛśyate |
akṣaratvaṃ kutasteṣāṃ kṣaratvaṃ vartate sadā || 48||
aghoṣamavyañjanamasvaraṃ cāpyatālukaṇṭhoṣṭhamanāsikaṃ ca |
arekhajātaṃ paramūṣmavarjitaṃ tadakṣaraṃ na kṣarate kathañcit || 49||
arjuna uvāca-
jñātvā sarvagataṃ brahma sarvabhūtādhivāsitam |
indriyāṇāṃ nirodhena kathaṃ sidhyanti yoginaḥ || 50||
śrībhagavānuvāca-
indriyāṇāṃ nirodhena dehe paśyanti mānavāḥ |
dehe naṣṭe kuto buddhirbuddhināśe kuto jñatā || 51||
tāvadeva nirodhaḥ syādyāvattattvaṃ na vindati |
vidite tu pare tattve ekamevānupaśyati || 52||
navacchidrakṛtā dehāḥ sravanti galikā iva |
naiva brahma na śuddhaṃ syātpumānbrahma na vindati || 53||
atyantamalino deho dehī cātyantanirmalaḥ |
ubhayorantaraṃ jñātvā kasya śaucaṃ vidhīyate || 54||
iti uttaragītāyāṃ prathamo'dhyāyaḥ |
atha dvitīyo'dhyāyaḥ
(arūḍhasyārurukṣośca svarūpe parikīrtite |
tatrārūḍhasya bimbaikyaṃ kathaṃ syāditi pṛcchati ||)
arjuna uvāca-
jñātvā sarvagataṃ brahma sarvajñaṃ parameśvaram |
ahaṃ brahmeti nirdeṣṭuṃ pramāṇaṃ tatra kiṃ bhavet || 1||
śrībhagavānuvāca-
yathā jalaṃ jale kṣiptaṃ kṣīre kṣīraṃ ghṛte ghṛtam |
aviśeṣo bhavettadvajjīvātmaparamātmanoḥ || 2||
jīve pareṇa tādātmyaṃ sarvagaṃ jyotirīśvaram |
pramāṇalakṣaṇairjñeyaṃ svayamekāgravedinā || 3||
arjuna uvāca-
jñānādeva bhavejjñeyaṃ viditvā tatkṣaṇena tu |
jñānamātreṇa mucyeta kiṃ punaryogadhāraṇā || 4||
śrībhagavānuvāca-
jñānena dīpite dehe buddhirbrahmasamanvitā |
brahmajñānāgninā vidvānnirdahetkarmabandhanam || 5||
tataḥ pavitraṃ parameśvarākhyamadvaitarūpaṃ vimalāmbarābham |
yathodake toyamanupraviṣṭaṃ tathātmarūpo nirupādhisaṃsthaḥ || 6||
ākāśavatsūkṣmaśarīra ātmā na dṛśyate vāyuvadantarātmā |
sa bāhyamabhyantaraniścalātmā antarmukhaṃ paśyati tattvamaikyam || 7||
yatra yatra mṛto jñānī yena kenāpi mṛtyunā |
yathā sarvagataṃ vyoma tatra tatra layaṃ gataḥ || 8||
(śarīravyāpitaṃ vyoma bhuvanāni caturdaśa |
niścalo nirmalo dehī sarvavyāpī nirañjanaḥ || 9||)
śarīravyāpi caitanyaṃ jāgradādi prabhedataḥ |
na tvekadeśavarttvaṃ anvayavyatirekataḥ || 9||
muhūrtamapi yo gacchennāsāgre manasā saha |
sarvaṃ tarati pāpmānaṃ tasya janma śatārjitam || 10||
dakṣiṇe piṅgalā nāḍī vahnimaṇḍalagocarā |
devayānamiti jñeyā puṇyakarmānusāriṇī || 11||
ilā ca vāmaniśvāsasomamaṇḍalagocarā |
pitṛyānamiti jñeyaṃ vāmamāśritya tiṣṭhati || 12||
gudasya pṛṣṭhabhāge'sminvīṇādaṇḍasya dehabhṛt |
dīrghāsthi mūrdhniparyantaṃ brahmadaṇḍīti kathyate || 13||
tasyānte suṣiraṃ sūkṣmaṃ brahmanāḍīti sūribhiḥ || 14||
ilāpiṅgalayormadhye suṣumnā sūkṣmarūpiṇī |
sarvaṃ pratiṣṭhitaṃ yasminsarvagaṃ sarvatomukham || 15||
tasya madhyagatāḥ sūryasomāgniparameśvarāḥ |
bhūtalokā diśaḥ kṣetrasamudrāḥ parvatāḥ śilāḥ ||
dvīpāśca nimnagā vedāḥ śāstravidyākalākṣarāḥ |
svaramantrapurāṇāni guṇāścaite ca sarvaśaḥ ||
bījaṃ bījātmakāsteṣāṃ kṣetrajñāḥ prāṇavāyavaḥ |
suṣumnāntargataṃ viśvaṃ tasminsarvaṃ pratiṣṭhitam || 16||
nānānāḍīprasavakaṃ sarvabhūtāntarātmani |
ūrdhvamūlamadhaḥ śākhaṃ vāyumārgeṇa sarvagam || 17||
dvisaptatisahasrāṇi nāḍyaḥ syurvāyugocarāḥ |
karmamārgeṇa suṣirāstiryañcaḥ suṣirātmakāḥ || 18||
adhaścordhvagatāstāsu navadvārāṇi śodhayan |
vāyunā saha jīvordhvajñānī mokṣamavāpnuyāt || 19||
amarāvatīndraloko'sminnāsāgre pūrvato diśi |
agniloko hṛdi jñeyaścakṣustejovatī purī || 20||
yāmyā saṃyamanī śrotre yamalokaḥ pratiṣṭhitaḥ |
nairṛto hyatha tatpārśve nairṛto loka āśritaḥ || 21||
vibhāvarī pratīcyāṃ tu pṛṣṭhe vāruṇikā purī |
vāyorgandhavatī karṇapārśve lokaḥ pratiṣṭhitaḥ || 22||
saumyā puṣpavatī saumye somalokastu kaṇṭhataḥ |
vāmakarṇe tu vijñeyo dehamāśritya tiṣṭhati || 23||
vāme cakṣuṣi caiśānī śivaloko manonmanī |
mūrdhni brahmapurī jñeyā brahmāṇḍaṃ dehamāśritam || 24||
pādādadhaḥ śivo'nantaḥ kālāgnipralayātmakaḥ |
anāmayamadhaścordhvaṃ madhyamaṃ tu bahiḥ śivam || 25||
adhaḥ pado'talaṃ vidyātpādaṃ ca vitalaṃ viduḥ |
nitalaṃ pādasandhiśca sutalaṃ jaṅghamucyate || 26||
mahātalaṃ tu jānu syādūrudeśo rasātalam |
kaṭistālatalaṃ proktaṃ sapta pātālasaṃjñayā || 27||
kālāgninarakaṃ ghoraṃ mahāpātālasaṃjñayā |
pātālaṃ nābhyadhobhāgo bhogīndraphaṇimaṇḍalam |
veṣṭitaḥ sarvato'nantaḥ sa bibhrajjīvasaṃjñakaḥ || 28||
bhūlokaṃ nābhideśaṃ tu bhuvarlokaṃ tu kukṣitaḥ |
hṛdayaṃ svargalokaṃ tu sūryādigrahatārakāḥ || 29||
sūryasomasunakṣatraṃ budhaśukrakujāṅgirāḥ |
mandaśca saptamo hyeṣa dhruvo'taḥ svargalokataḥ |
hṛdaye kalpayanyogī tasminsarvasukhaṃ labhet || 30||
hṛdayasya maharlokaṃ janolokaṃ tu kaṇṭhataḥ |
tapolokaṃ bhruvormadhye mūrdhni satyaṃ pratiṣṭhitam || 31||
brahmāṇḍarūpiṇī pṛthvī toyamadhye vilīyate |
agninā pacyate toyaṃ vāyunā grasyate'nalaḥ || 32||
ākāśaṃ tu pibedvāyuṃ manaścākāśameva ca |
buddhyahaṅkāracittaṃ ca kṣetrajñaḥ paramātmani || 33||
ahaṃ brahmeti māṃ dhyāyedekāgramanasā sakṛt |
sarvaṃ tarati pāpmānaṃ kalpakoṭiśataiḥ kṛtam || 34||
ghaṭasaṃvṛtamākāśaṃ nīyamāne ghaṭe yathā |
ghaṭo naśyati nākāśaṃ tadvajjīva ihātmani || 35||
ghaṭākāśamivātmānaṃ vilayaṃ vetti tattvataḥ |
sa gacchati nirālambaṃ jñānālokyaṃ na saṃśayaḥ || 36||
tapedvarṣasahasrāṇi ekapādasthito naraḥ |
ekasya dhyānayogasya kalāṃ nārhanti ṣoḍaśīm ||
āloḍya caturo vedāndharmaśāstrāṇi sarvadā |
yo vai brahma na jānāti darvī pākarasaṃ yathā ||
yathā kharaścandanabhāravāhī
       sārasya vāhī na tu candanasya |
evaṃ hi śāstrāṇi bahūnyadhītya
       sāraṃ tvajānankharavadvahetsaḥ || 37||
anantakarma śaucaṃ ca japo yajñastathaiva ca |
tīrthayātrādigamanaṃ yāvattattvaṃ na vindati || 38||
svayamuccalite dehe ahaṃ brahmātra saṃśayī |
caturvedadharo vipraḥ sūkṣmaṃ brahma na vindati || 39||
gavāmanekavarṇānāṃ kṣīraṃ syādekavarṇakam |
kṣīravaddṛśyate jñānaṃ dehināṃ ca gavāṃ yathā || 40||
āhāranidrābhayamaithunaṃ ca samānametat paśubhirnarāṇām |
jñānaṃ narāṇāmadhikaṃ viśeṣo jñānena hīnāḥ paśubhiḥ samānāḥ || 41||
prātaramutra purīṣābhyāṃ madhyāhne kṣutpipāsayā |
tṛptāḥ kāmena vardhante cānte vā niśi nidrayā || 42||
nādabindusahasrāṇi jīvakoṭiśatāni ca |
sarvaṃ ca bhasmanirdhūtaṃ yatra devo nirañjanaḥ || 43||
ahaṃ brahmeti niyato mokṣaheturmahātmanām || 44||
dve pade bandhamokṣāya na mameti mameti ca |
mameti badhyate janturna mameti vimucyate || 45||
manaso hyunmanībhāvāddvaitaṃ naivopalabhyate |
yadā yātyunmanībhāvaṃ tadā tatparamaṃ padam || 46||
hanyānmuṣṭibhirākāśaṃ kṣudhārtaḥ khaṇḍayettuṣam |
nāhaṃ brahmeti jānāti tasya muktirna jāyate || 47||
iti uttaragītāyāṃ dvitīyo'dhyāyaḥ ||
tṛtīyo'dhyāyaḥ
(yogī vyarthakriyālāpaparityāgena śāntadhīḥ |
tṛtīye śaraṇaṃ yāyāddharimeveti kīrtyate ||)
śrībhagavānuvāca-
anantaśāstraṃ bahuveditavyamalpaśca kālo bahavaśca vighnāḥ |
yatsārabhūtaṃ tadupāsitavyaṃ haṃso yathā kṣīramivāmbumiśram || 1||
purāṇaṃ bhārataṃ vedaśāstrāṇi vividhāni ca |
putradārādisaṃsāro yogābhyāsasya vighnakṛt || 2||
idaṃ jñānamidaṃ jñeyaṃ yaḥ sarvaṃ jñātumicchati |
api varṣasahasrāyuḥ śāstrāntaṃ nādhigacchati || 3||
vijñeyo'kṣaratanmātraṃ jīvitaṃ cāpi cañcalam |
vihāya śāstrajālāni yatsatyaṃ tadupāsyatām || 4||
pṛthivyāṃ yāni bhūtāni jihvopasthanimittikam |
jihvopasthaparityāge pṛthivyāṃ kiṃ prayojanam || 5||
tīrthāni toyapūrṇāni devānpāṣāṇamṛṇmayān |
yogino na prapadyante ātmadhyānaparāyaṇāḥ || 6||
agnirdevo dvijātīnāṃ munīnāṃ hṛdi daivatam |
pratimā svalpabuddhīnāṃ sarvatra samadarśinām || 7||
sarvatrāvasthitaṃ śāntaṃ na prapaśyejjanārdanam |
jñānacakṣurvihīnatvādandhaḥ sūryamivoditam || 8||
yatra yatra mano yāti tatra tatra paraṃ padam |
tatra tatra paraṃ brahma sarvatra samavasthitam || 9||
dṛśyante dṛśi rūpāṇi gaganaṃ bhāti nirmalam |
ahamityakṣaraṃ brahma paramaṃ viṣṇumavyayam || 10||
ahamekamidaṃ sarvaṃ iti paśyet paraṃ sukham |
dṛśyate tatkhagākāraṃ khagākāraṃ vicintayet ||
sakalaṃ niṣkalaṃ sūkṣmaṃ mokṣadvāreṇa nirgatam |
apavargasya nirvāṇaṃ paramaṃ viṣṇumavyayam ||
sarvato jyotirākāśaṃ sarvabhūtādhivāsinam |
sarvatra paramātmānaṃ brahmātmā paramātmanām || 11||
ahaṃ brahmeti yaḥ sarvaṃ vijānāti naraḥ sadā |
hanyātsvayamimānkāmānsarvāśī sarvavikrayī || 12||
nimiṣaṃ nimiṣārdhaṃ vā yatra tiṣṭhanti yoginaḥ |
tatra tatra kurukṣetraṃ prayāgo naimiṣaṃ vanam ||
nimiṣaṃ nimiṣārdhaṃ vā prāṇino'dhyātmacintakāḥ |
kratukoṭisahasrāṇāṃ dhyānamekaṃ viśiṣyate || 13||
brahmajñānānnānyadasti nirdahet puṇyapāpake |
mitrāmitre sukhaṃ duḥkhaṃ iṣṭāniṣṭe śubhāśubhe |
evaṃ mānāpamāne ca tathā nindāpraśaṃsane || 14||
śatacchidrānvitā kanthā śītāśītanivāraṇā |
acalā keśave bhaktirvibhavaiḥ kiṃ prayojanam || 15||
bhikṣānnaṃ deharakṣārthaṃ vastraṃ śītanivāraṇam |
aśmānaṃ ca hiraṇyaṃ ca śākaṃ śālyodanaṃ tathā |
samānaṃ cintayedyogī yadi cintyamapekṣate || 16||
bhūtavastunyaśocitve punarjanma na vidyate || 17||
(ātmayogamavocadyo bhaktiyogaśiromaṇim |
taṃ vande paramānandaṃ nandanandanamīśvaram ||)
iti uttaragītāyāṃ tṛtīyo'dhyāyaḥ ||
iti uttaragītā samāptā |