Valmiki Ramayana — Uttara Kanda

prāptarājyasya rāmasya rākṣasānāṃ vadhe kṛte |ājagmurṛṣayaḥ sarve rāghavaṃ pratinanditum || 7.1.1 ||
kauśiko 'tha yavakrīto gārgyo gālava eva ca |kaṇvo medhātitheḥ putraḥ pūrvasyāṃ diśi ye śritāḥ || 7.1.2 ||
svastyātreyo 'tha bhagavānnamuciḥ pramucistathā |ājagmuste sahāgastyā ye śritā dakṣiṇāṃ diśam || 7.1.3 ||
nṛṣadguḥ kavaṣo dhaumyo raudreyaśca mahānṛṣiḥ |te 'pyājagmuḥ saśiṣyā vai ye śritāḥ paścimāṃ diśam || 7.1.4 ||
vasiṣṭhaḥ kaśyapo 'thātrirviśvāmitraḥ sagautamaḥ |jamadagnirbharadvājaste 'pi saptarṣayastathā || 7.1.5 ||
udīcyāṃ diśi saptaite nityameva nivāsinaḥ || 7.1.6 ||
samprāpya te mahātmāno rāghavasya niveśanam |viṣṭitāḥ pratihārārthaṃ hutāśanasamaprabhāḥ |vedavedāṅgaviduṣo nānāśāstraviśāradāḥ || 7.1.7 ||
dvāḥsthaṃ provāca dharmātmā agastyo munisattamaḥ |nivedyatāṃ dāśaratherṛṣīnasmānsamāgatān || 7.1.8 ||
pratīhārastatastūrṇamagastyavacanāddrutam |samīpaṃ rāghavasyāśu praviveśa mahātmanaḥ || 7.1.9 ||
nayeṅgitajñaḥ sadvṛtto dakṣo dhairyasamanvitaḥ |sa rāmaṃ dṛśya sahasā pūrṇacandrasamaprabham || 7.1.10 ||
agastyaṃ kathayāmāsa samprāptamṛṣibhiḥ saha || 7.1.11 ||
śrutvā prāptānmunīṃstāṃstu bālasūryasamaprabhān |pratyuvāca tato dvāssthaṃ praveśaya yathāsukham || 7.1.12 ||
tān samprāptān munīn dṛṣṭvā pratyutthāya kṛtāñjaliḥ |pādyārghyādibhirānarca gāṃ nivedya ca sādaram || 7.1.13 ||
rāmo 'bhivādya prayata āsanānyādideśa ha |teṣu kāñcanacitreṣu mahatsu ca vareṣu ca || 7.1.14 ||
kuśāntardhānadatteṣu mṛgacarmayuteṣu ca |yathārhamupaviṣṭāste āsaneṣvṛṣipuṅgavāḥ || 7.1.15 ||
rāmeṇa kuśalaṃ pṛṣṭāḥ saśiṣyāḥ sapurogamāḥ |maharṣayo vedavido rāmaṃ vacanamabruvan || 7.1.16 ||
kuśalaṃ no mahābāho sarvatra raghunandana |tvāṃ tu diṣṭyā kuśalinaṃ paśyāmo hataśātravam || 7.1.17 ||
diṣṭyā tvayā hato rājanrāvaṇo lokarāvaṇaḥ |na hi bhāraḥ sa te rāma rāvaṇaḥ putrapautravān || 7.1.18 ||
sadhanustvaṃ hi lokāṃstrīnvijayethā na saṃśayaḥ |diṣṭyā tvayā hato rāma rāvaṇo rākṣaseśvaraḥ || 7.1.19 ||
diṣṭyā vijayinaṃ tvādya paśyāmaḥ saha sītayā |lakṣmaṇena ca dharmātmanbhrātrā tvaddhitakāriṇā || 7.1.20 ||
mātṛbhirbhrātṛsahitaṃ paśyāmo 'dya vayaṃ nṛpa |diṣṭyā prahasto vikaṭo virūpākṣo mahodaraḥ |akampanaśca durdharṣo nihatāste niśācarāḥ || 7.1.21 ||
yasya pramāṇādvipulaṃ pramāṇaṃ neha vidyate |diṣṭyā te samare rāma kumbhakarṇo nipātitaḥ || 7.1.22 ||
triśirāścātikāyaśca devāntakanarāntakau |diṣṭyā te nihatā rāma mahāvīryā niśācarāḥ || 7.1.23 ||
kumbhaścaiva nikumbhaśca rākṣasau bhīmadarśanau |diṣṭyā tau nihatau rāma kumbhakarṇasutau mṛdhe || 7.1.24 ||
yuddhonmattaśca mattaśca kālāntakayamopamau |yajñakopaśca balavāndhūmrākṣo nāma rākṣasaḥ || 7.1.25 ||
kurvantaḥ kadanaṃ ghoramete śastrāstrapāragāḥ |antakapratimairbāṇairdiṣṭyā vinihatāstvayā || 7.1.26 ||
diṣṭyā tvaṃ rākṣasendreṇa dvandvayuddhamupāgataḥ |devatānāmavadhyena vijayaṃ prāptavānasi || 7.1.27 ||
saṅkhye tasya na kiñcittu rāvaṇasya parābhavaḥ |dvandvayuddhamanuprāpto diṣṭyā te rāvaṇirhataḥ || 7.1.28 ||
diṣṭyā tasya mahābāho kālasyevābhidhāvataḥ |muktaḥ surariporvīra prāptaśca vijayastvayā || 7.1.29 ||
abhinandāma te sarve saṃśrutyendrajito vadham |so 'vadhyaḥ sarvabhūtānāṃ mahāmāyādharo yudhi || 7.1.30 ||
vismayastveṣa cāsmākaṃ tacchrutvendrajitaṃ hatam || 7.1.31 ||
ete cānye ca bahavo rākṣasāḥ kāmarūpiṇaḥ |diṣṭyā tvayā hatā vīrā raghūṇāṃ kulavarddhana || 7.1.32 ||
dattvā puṇyāmimāṃ vīra saumyāmabhayadakṣiṇām ||
diṣṭyā vardhasi kākutstha jayenāmitrakarśana || 7.1.33 ||
śrutvā tu teṣāṃ vacanamṛṣīṇāṃ bhāvitātmanām |vismayaṃ paramaṃ gatvā rāmaḥ prāñjalirabravīt || 7.1.34 ||
bhagavantaḥ kumbhakarṇaṃ rāvaṇaṃ ca niśācaram |atikramya mahāvīryau kiṃ praśaṃsatha rāvaṇim || 7.1.35 ||
mahodaraṃ prahastaṃ ca virūpākṣaṃ ca rākṣasam |mattonmattau ca durdharṣau devāntakanarāntakau ||
atikramya mahāvīryān kiṃ praśaṃsatha rāvaṇim || 7.1.36 ||
atikāyaṃ triśirasaṃ dhūmrākṣaṃ ca niśācaram |atikramya mahāvīryānkiṃ praśaṃsatha rāvaṇim || 7.1.37 ||
kīdṛśo vai prabhāvo 'sya kiṃ balaṃ kaḥ parākramaḥ |kena vā kāraṇenaiṣa rāvaṇādatiricyate || 7.1.38 ||
śakyaṃ yadi mayā śrotuṃ na khalvājñāpayāmi vaḥ |yadi guhyaṃ na cedvaktuṃ śrotumicchāmi kathyatām || 7.1.39 ||
śakro 'pi vijitastena kathaṃ labdhavaraśca saḥ |kathaṃ ca balavānanputro na pitā tasya rāvaṇaḥ || 7.1.40 ||
kathaṃ pituścābhyadhiko mahāhave śakrasya jetā hi kathaṃ sa rākṣasaḥ |varāśca labdhāḥ kathayasva me 'dya tatpṛcchataścāsya munīndra sarvam || 7.1.41 ||
tasya tadvacanaṃ śrutvā rāghavasya mahātmanaḥ |kumbhayonirmihātejā rāmametaduvāca ha || 7.2.1 ||
śṛṇu rāma kathāvṛttaṃ tasya tejobalaṃ mahat |jaghāna śatrūnyenāsau na ca vadhyaḥ sa śatrubhiḥ || 7.2.2 ||
tāvatte rāvaṇasyedaṃ kulaṃ janma ca rāghava |varapradānaṃ ca tathā tasmai dattaṃ bravīmi te || 7.2.3 ||
purā kṛtayuge rāma prajāpatisutaḥ prabhuḥ |pulastyo nāma brahmarṣiḥ sākṣādiva pitāmahaḥ || 7.2.4 ||
nānukīrtyā guṇāstasya dharmataḥ śīlatastathā |prajāpateḥ putra iti vaktuṃ śakyaṃ hi nāmataḥ || 7.2.5 ||
prajāpatisutatvena devānāṃ vallabho hi saḥ |hṛṣṭaḥ sarvasya lokasya guṇaiḥ śubhrairmahāmatiḥ || 7.2.6 ||
sa tu dharmaprasaṅgena meroḥ pārśve mahāgireḥ |tṛṇavindvāśramaṃ gatvā nyavasanmunipuṅgavaḥ || 7.2.7 ||
tapastepe sa dharmātmā svādhyāyaniyatendriyaḥ |gatvāśramapadaṃ tasya vighnaṃ kurvanti kanyakāḥ || 7.2.8 ||
devapannagakanyāśca rājarṣitanayāśca yāḥ |krīḍantyo 'psarasaścaiva taṃ deśamupapedire || 7.2.9 ||
sarvartuṣṛpabhogyatvādramyatvātkānanasya ca |nityaśastāstu taṃ deśaṃ gatvā krīḍanti kanyakāḥ || 7.2.10 ||
deśasya ramaṇīyatvātpulastyo yatra sa dvijaḥ |gāyantyo vādayantyaśca lāsayantyastathaiva ca |munestapasvinastasya vighnaṃ cakruraninditāḥ || 7.2.11 ||
atha kruddho mahātejā vyājahāra mahāmuniḥ |yā me darśanamāgacchetsā garbhaṃ dhārayiṣyati || 7.2.12 ||
tāstu sarvāḥ pratiśrutya tasya vākyaṃ mahātmanaḥ |brahmaśāpabhayādbhītāstaṃ deśaṃ nopacakramuḥ || 7.2.13 ||
tṛṇabindostu rājarṣestanayā na śṛṇoti tat || 7.2.14 ||
gatvāśramapadaṃ tatra vicacāra sunirbhayā |na sāpaśyatsthitā tatra kāñcidabhyāgatāṃ sakhīm || 7.2.15 ||
tasminkāle mahātejāḥ prājāpatyo mahānṛṣiḥ |svādhyāyamakarottatra tapasā bhāvitaḥ svayam || 7.2.16 ||
sā tu vedaśrutiṃ śrutvā dṛṣṭvā vai tapaso nidhim |abhavatpāṇḍudehā sā suvyañjitaśarīrajā || 7.2.17 ||
vabhūva ca samudvignā dṛṣṭvā taddoṣamātmanaḥ |idaṃ me kintviti jñātvā piturgatvā ' 'śrame sthitā || 7.2.18 ||
tāṃ tu dṛṣṭvā tathābhūtāṃ tṛṇavindurathābravīt |kiṃ tvametattvasadṛśaṃ dhārayasyātmano vapuḥ || 7.2.19 ||
sā tu kṛtvāñjaliṃ dīnā kanyovāca tapodhanam |na jāne kāraṇaṃ tāta yena me rūpamīdṛśam || 7.2.20 ||
kiṃ tu pūrvaṃ gatāsmyekā maharṣerbhāvitātmanaḥ |pulastyasyāśramaṃ divyamanveṣṭuṃ svasakhījanam || 7.2.21 ||
na ca paśyāmyahaṃ tatra kāñcidabhyāgatāṃ sakhīm |rūpasya tu viparyāsaṃ dṛṣṭvā trāsādihāgatā || 7.2.22 ||
tṛṇabindustu rājarṣistapasā dyotitaprabhaḥ |dhyānaṃ viveśa taccāpi hyapaśyadṛṣikarmajam || 7.2.23 ||
sa tu vijñāya taṃ śāpaṃ maharṣerbhāvitātmanaḥ |gṛhītvā tanayāṃ gatvā pulastyamidamabravīt || 7.2.24 ||
bhagavaṃstanayāṃ me tvaṃ guṇaiḥ svaireva bhūṣitām |bhikṣāṃ pratigṛhāṇemāṃ maharṣe svayamudyatām || 7.2.25 ||
tapaścaraṇayuktasya śramyamāṇendriyasya te |śuśrūṣaṇaparā nityaṃ bhaviṣyati na saṃśayaḥ || 7.2.26 ||
taṃ bruvāṇaṃ tu tadvākyaṃ rājarṣiṃ dhārmikaṃ tadā |jighṛkṣurabravītkanyāṃ bāḍhamityeva sa dvijaḥ || 7.2.27 ||
dattvā sa tu yathānyāyaṃ svamāśramapadaṃ gataḥ |sāpi tatrāvasatkanyā toṣayantī patiṃ guṇaiḥ || 7.2.28 ||
tasyāstu śīlavṛttābhyāṃ tutoṣa munipuṅgavaḥ |prītaḥ sa tu mahātejā vākyametaduvāca ha || 7.2.29 ||
parituṣṭo 'smi suśroṇi guṇānāṃ sampadā bhṛśam |tasmāddevi dadāmyadya putramātmasamaṃ tava || 7.2.30 ||
ubhayorvaṃśakartāraṃ paulastya iti viśrutam |yasmāttu viśruto vedastvayaiṣo 'dhyayato mama || 7.2.31 ||
tasmātsa viśravā nāma bhaviṣyati na saṃśayaḥ |evamuktā tu sā devī prahṛṣṭenāntarātmanā || 7.2.32 ||
acireṇaiva kālenāsūta viśravasaṃ sutam |triṣu lokeṣu vikhyātaṃ yaśodharmasamanvitam || 7.2.33 ||
śrutimānsamadarśī ca vratācāraratastathā |piteva tapasā yukto hyabhavadviśravā muniḥ || 7.2.34 ||
atha putraḥ pulastyasya viśravā munipuṅgavaḥ |acireṇaiva kālena piteva tapasi sthitaḥ || 7.3.1 ||
satyavāñchīlavāñchāntaḥ svādhyāyanirataḥ śuciḥ |sarvabhogeṣvasaṃsakto nityaṃ dharmaparāyaṇaḥ || 7.3.2 ||
jñātvā tasya tu tadvṛttaṃ bharadvājo mahāmuniḥ |dadau viśravase bhāryāṃ svasutāṃ devavarṇinīm || 7.3.3 ||
pratigṛhya tu dharmeṇa bharadvājasutāṃ tadā |prajānvekṣikayā buddhyā śreyo hyasya vicintayan || 7.3.4 ||
mudā paramayā yukto viśravā munipuṅgavaḥ |sa tasyāṃ vīryasampannamapatyaṃ paramādbhutam || 7.3.5 ||
janayāmāsa dharmajñaḥ sarvairbrahmaguṇairyutam |tasmiñjāte tu saṃhṛṣṭaḥ sambabhūva pitāmahaḥ || 7.3.6 ||
dṛṣṭvā śreyaskarīṃ buddhiṃ dhanādhyakṣo bhaviṣyati |nāma tasyākarotprītaḥ sārdhaṃ devarṣibhistadā || 7.3.7 ||
yasmādviśravaso 'patyaṃ sādṛśyādviśravā iva |tasmādvaiśravaṇo nāma bhaviṣyatveṣa viśrutaḥ || 7.3.8 ||
sa tu vaiśravaṇastatra tapovanagatastadā |avardhatāhutihuto mahātejā yathānalaḥ || 7.3.9 ||
tasyāśramapadasthasya buddhirjajñe mahātmanaḥ |cariṣye paramaṃ dharmaṃ dharmo hi paramā gatiḥ || 7.3.10 ||
sa tu varṣasahasrāṇi tapastaptvā mahāvane |yantrito niyamairugraiścakāra sumahattapaḥ || 7.3.11 ||
pūrṇe varṣasahasrānte taṃ taṃ vidhimakalpayat |jalāśī mārutāhāro nirāhārastathaiva ca || 7.3.12 ||
evaṃ varṣasahasrāṇi jagmustānyekavarṣavat |atha prīto mahātejāḥ sendraiḥ suragaṇaiḥ saha || 7.3.13 ||
gatvā tasyāśramapadaṃ brahmedaṃ vākyamabravīt |parituṣṭo 'smi te vatsa karmaṇānena suvrata |varaṃ vṛṇīṣva bhadraṃ te varārhastvaṃ mahāmate || 7.3.14 ||
athābravīdvaiśravaṇaḥ pitāmahamupasthitam |bhagava~llokapālatvamiccheyaṃ vittarakṣaṇam || 7.3.15 ||
athābravīdvaiśravaṇaṃ parituṣṭena cetasā |brahmā suragaṇaiḥ sārdhaṃ bāḍhamityeva hṛṣṭavat || 7.3.16 ||
ahaṃ vai lokapālānāṃ caturthaṃ sraṣṭumudyataḥ || 7.3.17 ||
yamendravaruṇānāṃ ca padaṃ yattava cepsitam |tadgaccha tvaṃ hi dharmajña nidhīśatvamavāpnuhi |śakrāmbupayamānāṃ ca caturthastvaṃ bhaviṣyasi || 7.3.18 ||
etacca puṣpakaṃ nāma vimānaṃ sūryasannibham |pratigṛhṇīṣva yānārthaṃ tridaśaiḥ samatāṃ vraja || 7.3.19 ||
svasti te 'stu gamiṣyāmaḥ sarva eva yathāgatam |kṛtakṛtyā vayaṃ tāta dattvā tava varadvayam || 7.3.20 ||
ityuktvā sa gato brahmā svasthānaṃ tridaśaiḥ saha || 7.3.21 ||
gateṣu brahmapūrveṣu deveṣvatha nabhasthalam |vane sa pitaraṃ prāha prāñjaliḥ prayatātmavān |nivāsanaṃ na me devo vidadhe sa prajāpatiḥ || 7.3.22 ||
bhagava~llabdhavānasmi varamiṣṭaṃ pitāmahāt |taṃ paśya bhagavankañcinnivāsaṃ sādhu me prabho || 7.3.23 ||
na ca pīḍā bhavedyatra prāṇino yasya kasyacit |evamuktastu putreṇa viśravā munipuṅgavaḥ || 7.3.24 ||
vacanaṃ prāha dharmajñaḥ śrūyatāmiti sattamaḥ |dakṣiṇasyodadhestīre trikūṭo nāma parvataḥ || 7.3.25 ||
tasyāgre tu viśālā sā mahendrasya purī yathā |laṅkā nāma purī ramyā nirmitā viśvakarmaṇā || 7.3.26 ||
rākṣasānāṃ nivāsārthaṃ yathendrasyāmarāvatī |tatra tvaṃ vasa bhadraṃ te laṅkāyāṃ nātra saṃśayaḥ || 7.3.27 ||
hemaprākāraparighā yantraśastrasamāvṛtā |ramaṇīyā purī sā hi rukmavaiḍūryatoraṇā || 7.3.28 ||
rākṣasaiḥ sā parityaktā purā viṣṇubhayārditaiḥ |śūnyā rakṣogaṇaiḥ sarvai rasātalatalaṃ gataiḥ || 7.3.29 ||
śūnyā samprati laṅkā sā prabhustasyā na vidyate |sa tvaṃ tatra nivāsāya gaccha putra yathāsukham || 7.3.30 ||
nirdoṣastatra te vāso na bādhāstatra kasyacit |etacchutvā sa dharmātmā dharmiṣṭhaṃ vacanaṃ pituḥ || 7.3.31 ||
nivāsayāmāsa tadā laṅkāṃ parvatamūrdhani |nairṛtānāṃ sahasraistu hṛṣṭaiḥ pramudutaiḥ saha || 7.3.32 ||
acireṇaiva kālena sampūrṇā tasya śāsanāt || 7.3.33 ||
sa tu tatrāvasatprīto dharmātmā nairṛtarṣabhaḥ |samudraparighāyāṃ tu laṅkāyāṃ viśravātmajaḥ || 7.3.34 ||
kāle kāle tu dharmātmā puṣpakeṇa dhaneśvaraḥ |abhyāgacchadvinītātmā pitaraṃ mātaraṃ ca hi || 7.3.35 ||
sa devagandharvagaṇairabhiṣṭutastathāpsaronṛtyavibhūṣitālayaḥ |gabhastibhiḥ sūrya ivāvabhāsayanpituḥ samīpaṃ prayayau sa vittapaḥ || 7.3.36 ||
śrutvāgastyeritaṃ vākyaṃ rāmo vismayamāgataḥ |kathamāsīttu laṅkāyāṃ sambhavo rakṣasāṃ purā || 7.4.1 ||
tataḥ śiraḥ kampayitvā tretāgnisamavigraham |tamagastyaṃ muhurdṛṣṭvā smayamāno 'bhyabhāṣata || 7.4.2 ||
bhagavanpūrvamapyeṣā laṅkāsītpiśitāśinām |śrutvedaṃ bhagavadvākyaṃ jāto me vismayaḥ paraḥ || 7.4.3 ||
pulastyavaṃśādudbhūtā rākṣasā iti naḥ śrutam |idānīmanyataścāpi sambhavaḥ kīrtitastvayā || 7.4.4 ||
rāvaṇātkumbhakarṇācca prahastādvikaṭādapi |rāvaṇasya ca putrebhyaḥ kiṃ nu te balavattarāḥ || 7.4.5 ||
ka eṣāṃ pūrvako brahmankinnāmā ca balotkaṭaḥ |aparādhaṃ ca kaṃ prāpya viṣṇunā drāvitāḥ katham || 7.4.6 ||
etadvistarataḥ sarvaṃ kathayasva mamānagha |kutūhalamidaṃ mahyaṃ nuda bhānuryathā tamaḥ || 7.4.7 ||
rāghavasya vacaḥ śrutvā saṃskārālaṅkṛtaṃ śubham |īṣadvismayamānastamagastyaḥ prāha rāghavam || 7.4.8 ||
prajāpatiḥ purā sṛṣṭvā hyapaḥ salilasambhavaḥ |tāsāṃ gopāyane sattvānasṛjatpadmasambhavaḥ || 7.4.9 ||
te sattvāḥ sattvakartāraṃ vinītavadupasthitāḥ |kiṃ kurma iti bhāṣantaḥ kṣutpipāsābhayārditāḥ || 7.4.10 ||
prajāpatistu tānyāha satvāni prahasanniva |ābhāṣya vācā yatnena rakṣadhvamiti mānadaḥ || 7.4.11 ||
rakṣāmeti ca tatrānye jakṣāma iti cāpare |bhukṣitābhukṣitairuktastatastānāha bhūtakṛt || 7.4.12 ||
rakṣāmeti ca yairuktaṃ rākṣasāste bhavantu vaḥ |jakṣāma iti yairuktaṃ yakṣā eva bhavantu vaḥ || 7.4.13 ||
tatra hetiḥ prahetiśca bhrātarau rākṣasādhipau |madhukaiṭabhasaṅkāśau babhūvaturarindamau || 7.4.14 ||
prahetirdhārmikastatra tapovanagatastadā |hetirdārakriyārthe tu paraṃ yatnamathākarot || 7.4.15 ||
sa kālabhaginīṃ kanyāṃ bhayāṃ nāma bhayāvahām |udāvahadameyātmā svayameva mahāmatiḥ || 7.4.16 ||
sa tasyāṃ janayāmāsa hetī rākṣasapuṅgavaḥ |putraṃ putravatāṃ śreṣṭho vidyutkeśa iti śrutam || 7.4.17 ||
vidyutkeśo hetiputraḥ sa dīptārkasamaprabhaḥ |vyavardhata mahātejāstoyamadhya ivāmbudaḥ || 7.4.18 ||
sa yadā yauvanaṃ bhadramanuprāpto niśācaraḥ |tato dārakriyāṃ tasya kartuṃ vyavasitaḥ pitā || 7.4.19 ||
sandhyāyāstanayāṃ so 'tha sandhyātulyāṃ prabhāvataḥ |varayāmāsa putrārthaṃ hetī rākṣasapuṅgavaḥ || 7.4.20 ||
avaśyameva dātavyā parasmai seti sandhyayā |cintayitvā sutā dattā vidyutkeśāya rāghava || 7.4.21 ||
sandhyāyāstanayāṃ labdhvā vidyutkeśo niśācaraḥ |ramate sma tayā sārdhaṃ paulomyā maghavāniva || 7.4.22 ||
kenacittvatha kālena rāma sālakaṭaṅkaṭā |vidyutkeśādgarbhamāpa ghanarājirivārṇavāt || 7.4.23 ||
tataḥ sā rākṣasī garbhaṃ ghanagarbhasamaprabham |prasūtā mandaraṃ gatvā gaṅgā garbhamivāgnijam || 7.4.24 ||
samutsṛjya tu sā garbhaṃ vidyutkeśaratārthinī |reme tu sārdhaṃ patinā vismṛtya sutamātmajam || 7.4.25 ||
utsṛṣṭastu tadā garbho ghanaśabdasamasvanaḥ |tayotsṛṣṭaḥ sa tu śiśuḥ śaradarkasamadyutiḥ |nidhāyāsye svayaṃ muṣṭiṃ ruroda śanakaistadā || 7.4.26 ||
tato vṛṣabhamāsthāya pārvatyā sahitaḥ śivaḥ |vāyumārgeṇa gacchanvai śuśrāva ruditasvanam || 7.4.27 ||
apaśyadumayā sārdhaṃ rudantaṃ rākṣasātmajam |kāruṇyabhāvātpārvatyā bhavastripurasūdanaḥ || 7.4.28 ||
taṃ rākṣasātmajaṃ cakre mātureva vayaḥsamam |amaraṃ caiva taṃ kṛtvā mahādevo 'kṣaro 'vyayaḥ || 7.4.29 ||
puramākāśagaṃ prādātpārvatyāḥ priyakāmyayā |umayāpi varo datto rākṣasānāṃ nṛpātmaja || 7.4.30 ||
sadyopalabdhirgarbhasya prasūtiḥ sadya eva ca |sadya eva vayaḥprāptirmātureva vayassamam || 7.4.31 ||
tataḥ sukeśo varadānagarvitaḥ śriyaṃ prabhoḥ prāpya harasya pārśvataḥ |cacāra sarvatra mahānmahāmatiḥ khagaṃ puraṃ prāpya purandaro yathā || 7.4.32 ||
sukeśaṃ dhārmikaṃ dṛṣṭvā varalabdhaṃ ca rākṣasam |grāmaṇīrnāma gandharvo viśvāvasusamaprabhaḥ || 7.5.1 ||
tasya devavatī nāma dvitīyā śrīrivātmajā |triṣu lokeṣu vikhyātā rūpayauvanaśālinī |tāṃ sukeśāya dharmeṇa dadau rakṣaḥśriyaṃ yathā || 7.5.2 ||
varadānakṛtaiśvaryaṃ sā taṃ prāpya patiṃ priyam |āsīddevavatī tuṣṭā dhanaṃ prāpyeva nirdhanaḥ || 7.5.3 ||
sa tayā saha saṃyukto rarāja rajanīcaraḥ |añjanādabhiniṣkrāntaḥ kareṇveva mahāgajaḥ || 7.5.4 ||
devavatyāṃ sukeśastu janayāmāsa rāghava || 7.5.5 ||
trīn putrān janayāmāsa tretāgnisamavigrahān |mālyavantaṃ sumāliṃ ca māliṃ ca balināṃ varam |trīṃstrinetrasamānputrānrākṣasānrākṣasādhipaḥ || 7.5.6 ||
trayo lokā ivāvyagrāḥ sthitāstraya ivāgnayaḥ |trayo mantrā ivātyugrāstrayo ghorā ivāmayāḥ || 7.5.7 ||
trayaḥ sukeśasya sutāstretāgnisamatejasaḥ |vivṛddhimagamaṃstatra vyādhayopekṣitā iva || 7.5.8 ||
varaprāptiṃ pituste tu jñātveśvaratapobalāt |tapastaptuṃ gatā meruṃ bhrātaraḥ kṛtaniścayāḥ || 7.5.9 ||
pragṛhya niyamānghorānrākṣasā nṛpasattama |viceruste tapo ghoraṃ sarvabhūtabhayāvaham || 7.5.10 ||
satyārjavaśamopetaistapobhiratiduṣkaraiḥ |santāpayantastrīllo~kānsadevāsuramānuṣān || 7.5.11 ||
tato vibhuścaturvaktro vimānavaramāsthitaḥ |sukeśaputrānāmantrya varado 'smītyabhāṣata || 7.5.12 ||
brahmāṇaṃ varadaṃ jñātvā sendrairdevagaṇairvṛtam |ūcuḥ prāñjalayaḥ sarve vepamānā iva drumāḥ || 7.5.13 ||
tapasārādhito deva yadi no diśase varam |ajeyāḥ śatruhantārastathaiva cirajīvinaḥ || 7.5.14 ||
prabhaviṣṇvo bhavāmeti parasparamanuvratāḥ || 7.5.15 ||
evaṃ bhaviṣyatītyuktvā sukeśatanayānvibhuḥ |sa yayau brahmalokāya brahmā brāhmaṇavatsalaḥ || 7.5.16 ||
varaṃ labdhvā tu te sarve rāma rātriñcarāstadā |surāsurānprabādhante varadānasunirbhayāḥ || 7.5.17 ||
tairvadhyamānāstridaśāḥ sarṣisaṅghāḥ sacāraṇāḥ |trātāraṃ nādhigacchanti nirayasthā yathā narāḥ || 7.5.18 ||
atha te viśvakarmāṇaṃ śilpināṃ varamavyayam |ūcuḥ sametya saṃhṛṣṭā rākṣasā raghusattama || 7.5.19 ||
ojastejobalavatāṃ mahatāmātmatejasā |gṛhakartā bhavāneva devānāṃ hṛdayepsitam || 7.5.20 ||
asmākamapi tāvattvaṃ gṛhaṃ kuru mahāmate |himavantamapāśritya merumandarameva vā |maheśvaragṛhaprakhyaṃ gṛhaṃ naḥ kriyatāṃ mahat || 7.5.21 ||
viśvakarmā tatasteṣāṃ rākṣasānāṃ mahābhujaḥ |nivāsaṃ kathayāmāsa śakrasyevāmarāvatīm || 7.5.22 ||
dakṣiṇasyodadhestīre trikūṭo nāma parvataḥ |suvela iti cāpyanyo dvitīyastatra sattamāḥ || 7.5.23 ||
śikhare tasya śailasya madhyame 'mbudasannibhe |śakunairapi duṣprāpe ṭaṅkacchinnacaturdiśi || 7.5.24 ||
triṃśadyojanakstīrṇā śatayojanamāyatā |svarṇaprākārasaṃvītā hematoraṇasaṃvṛtā || 7.5.25 ||
mayā laṅketi nagarī śakrājñaptena nirmitā |tasyāṃ vasata durdharṣā yūyaṃ rākṣasapuṅgavāḥ || 7.5.26 ||
amarāvatīṃ samāsādya sendrā iva divaukasaḥ |laṅkādurgaṃ samāsādya rākṣasairbahubhirvṛtāḥ || 7.5.27 ||
bhaviṣyatha durādharṣāḥ śatrūṇāṃ śatrusūdanāḥ || 7.5.28 ||
viśvakarmavacaḥ śrutvā tataste rākṣasottamāḥ |sahasrānucarā bhūtvā gatvā tāmavasanpurīm || 7.5.29 ||
dṛḍhaprākāraparikhāṃ haimairgṛhaśatairvṛtām |laṅkāmavāpya te hṛṣṭā nyavasanrajanīcarāḥ || 7.5.30 ||
etasminneva kāle tu yathākāmaṃ ca rāghava |narmadā nāma gandharvī babhūva raghunandana || 7.5.31 ||
tasyāḥ kānyātrayaṃ hyāsīt dhīśrīkirtisamadyuti |jyeṣṭhakrameṇa sā teṣāṃ rākṣasānāmarākṣasī || 7.5.32 ||
kanyāstāḥ pradadau hṛṣṭā pūrṇacandranibhānanāḥ |trayāṇāṃ rākṣasendrāṇāṃ tisro gandharvakanyakāḥ || 7.5.33 ||
dattā mātrā mahābhāgā nakṣatre bhagadaivate |kutadārāstu te rāma sukeśatanayāstadā || 7.5.34 ||
cikrīḍuḥ saha bhāryābhirapsarobhirivāmarāḥ |tato mālyavato bhāryā sundarī nāma sundarī || 7.5.35 ||
sa tasyāṃ janayāmāsa yadapatyaṃ nibodha tat |vajramuṣṭirvirūpākṣodurmukhaścaiva rākṣasaḥ || 7.5.36 ||
suptaghno yajñakopaśca mattonmattau tathaiva ca |analā cābhavatkanyā sundaryāṃ rāma sundarī || 7.5.37 ||
sumālino 'pi bhāryāsītpūrṇacadranibhānanā |nāmnā ketumatī rāma prāṇebhyo 'pi garīyasī || 7.5.38 ||
sumālī janayāmāsa yadapatyaṃ niśācaraḥ |ketumatyāṃ mahārāja tannibodhānupūrvaśaḥ || 7.5.39 ||
prahasto 'kampanaścaiva vikaṭaḥ kālakārmukhaḥ |dhūmrākṣaścaiva daṇḍaśca supārśvaśca mahābalaḥ || 7.5.40 ||
saṃhrādiḥ praghasaścaiva bhāsakarṇaśca rākṣasaḥ |rākā puṣpotkaṭā caiva kaikasī ca śucismitā ||
kumbhīnasī ca ityete sumāleḥ prasavāḥ smṛtāḥ || 7.5.41 ||
mālestu vasudhā nāma gandharvī rūpaśālinī |bhāryāsītpadmapatrākṣī svakṣī yakṣīvaropamā || 7.5.42 ||
sumāleranujastasyāṃ janayāmāsa yat prabho |apatyaṃ kathyamānaṃ tu mayā tvaṃ śṛṇu rāghava || 7.5.43 ||
anilaścānalaścaiva haraḥ sampātireva ca |ete vibhīṣaṇāmātyā māleyāstu niśācaraḥ || 7.5.44 ||
tatastu te rākṣasapuṅgavāstrayo niśācaraiḥ putraśataiśca saṃvṛtāḥ |surānsahendrānṛṣināgayakṣānbabādhire tānbahuvīryadarpitāḥ || 7.5.45 ||
jagadbhramanto 'nilavaddurāsadā raṇeṣu mṛtyupratimānatejasaḥ |varapradānādatigarvitā bhṛśaṃ kratukriyāṇāṃ praśamaṅkarāḥ sadā || 7.5.46 ||
tairvadhyamānā devāśca ṛṣayaśca tapodhanāḥ |bhayārtāḥ śaraṇaṃ jagmurdevadevaṃ maheśvaram || 7.6.1 ||
jagatsṛṣṭyantakartāramajamavyaktarūpiṇam |ādhāraṃ sarvalokānāmārādhyaṃ paramaṃ gurum || 7.6.2 ||
te sametya tu kāmāriṃ tripurāriṃ trilocanam |ūcuḥ prāñjalayo devā bhayagadgadabhāṣiṇaḥ || 7.6.3 ||
sukeśaputrairbhagavanpitāmahavaroddhataiḥ |prajādhyakṣa prajāḥ sarvā bādhyante ripubādhanaiḥ || 7.6.4 ||
śaraṇyānyaśaraṇyāni hyāśramāṇi kṛtāni naḥ |svargācca devānpracyāvya svarge krīḍanti devavat || 7.6.5 ||
ahaṃ viṣṇurahaṃ rudro brahmāhaṃ devarāḍaham |ahaṃ yamaśca varuṇaścandro 'haṃ ravirapyaham || 7.6.6 ||
iti mālī sumālī ca mālyavāṃścaiva rākṣasāḥ |bādhante samaroddharṣā ye ca teṣāṃ puraḥsarāḥ |tanno deva bhayārtānāmabhayaṃ dātumarhasi || 7.6.7 ||
aśivaṃ vapurāsthāya jahi vai devakaṇṭakān || 7.6.8 ||dhante samaroddharṣā ye ca teṣāṃ puraḥsarāḥ |ityuktastu suraiḥ sarvaiḥ kapardī nīlalohitaḥ |sukeśaṃ prati sāpekṣaḥ prāha devagaṇānprabhuḥ || 7.6.9 ||
ahaṃ tānna haniṣyāmi mayāvadhyā hi te surāḥ |kiṃ tu mantraṃ pradāsyāmi yo vai tānnihaniṣyati || 7.6.10 ||
etameva samudyogaṃ puraskṛtya maharṣayaḥ |gacchadhvaṃ śaraṇaṃ viṣṇuṃ haniṣyati sa tānprabhuḥ || 7.6.11 ||
tatastu jayaśabdena pratinandya maheśvaram |viṣṇoḥ samīpamājagmurniśācarabhayārditāḥ || 7.6.12 ||
śaṅkhacakradharaṃ devaṃ praṇamya bahumānya ca |ūcuḥ sambhrāntavadvākyaṃ sukeśatanayānprati || 7.6.13 ||
sukeśatanayairdeva tribhistretāgnisannibhaiḥ |ākramya varadānena sthānānyapahṛtāni naḥ || 7.6.14 ||
laṅkā nāma purī durgā trikūṭaśikhare sthitā |tatra sthitāḥ prabādhante sarvānnaḥ kṣaṇadācarāḥ || 7.6.15 ||
sa tvamasmaddhitārthāya jahi tānmadhusūdana |śaraṇaṃ tvāṃ vayaṃ prāptā gatirbhava sureśvara || 7.6.16 ||
cakrakṛttāsyakamalānnivedaya yamāya vai |bhayeṣvabhayado 'smākaṃ nānyo 'sti bhavatā vinā || 7.6.17 ||
rākṣasānsamare duṣṭānsānubandhānmadoddhatān |nudaṃ tvaṃ no bhayaṃ deva nīhāramiva bhāskaraḥ || 7.6.18 ||
ityevaṃ daivatairukto devadevo janārdanaḥ |abhayaṃ bhayado 'rīṇāṃ dattvā devānuvāca ha || 7.6.19 ||
sukeśaṃ rākṣasaṃ jāne īśānavaradarpitam |tāṃścāsya tanayāñjāne yeṣāṃ jyeṣṭhaḥ sa mālyavān || 7.6.20 ||
tānahaṃ samatikrāntamaryādānrākṣasādhamān |nihaniṣyāmi saṅkruddhaḥ surā bhavata vijvarāḥ || 7.6.21 ||
ityuktāste surāḥ sarve viṣṇunā prabhaviṣṇunā |yathāvāsaṃ yayurhṛṣṭāḥ praśaṃsanto janārdanam || 7.6.22 ||
vibudhānāṃ samudyogaṃ mālyavāṃstu niśācaraḥ |śrutvā tau bhrātarau vīrāvidaṃ vacanamabravīt || 7.6.23 ||
amarā ṛṣayaścaiva saṅgamya kila śakaram |asmadvadhaṃ parīpsanta idaṃ vacanamabruvan || 7.6.24 ||
sukeśatanayā deva varadānabaloddhatāḥ |bādhante 'smānsamuddṛptā ghorarūpāḥ pade pade || 7.6.25 ||
rākṣasairabhibhūtāḥ sma na śaktāḥ sma prajāpate |sveṣu sadmasu saṃsthātuṃ bhayātteṣāṃ durātmanām || 7.6.26 ||
tadasmākaṃ hitārthāya jahi tāṃśca trilocana |rākṣasānhuṅkṛtenaiva daha pradahatāṃ vara || 7.6.27 ||
ityevaṃ tridaśairukto niśamyāndhakasūdanaḥ |śiraḥ karaṃ ca dhunvāna idaṃ vacanamabravīt || 7.6.28 ||
avadhyā mama te devāḥ sukeśatanayā raṇe |mantraṃ tu vaḥ pradāsyāmi yastānvai nihaniṣyati || 7.6.29 ||
yo 'sau cakragadāpāṇiḥ pītavāsā janārdanaḥ |harirnārāyaṇaḥ śrīmān śaraṇaṃ taṃ prapadyatha || 7.6.30 ||
harādavāpya te mantraṃ kāmārimabhivādya ca |nārāyaṇālayaṃ prāpya tasmai sarvaṃ nyavedayan || 7.6.31 ||
tato nārāyaṇenoktā devā indrapurogamāḥ |surārīṃstānhaniṣyāmi surā bhavata vijvarāḥ || 7.6.32 ||
devānāṃ bhayabhītānāṃ hariṇā rākṣasarṣabhau |pratijñāto vadho 'smākaṃ cintyatāṃ yadiha kṣamam || 7.6.33 ||
hiraṇyakaśipormṛtyuranyeṣāṃ ca suradviṣām |namuciḥ kālanemiśca saṃhrādo vīrasattamaḥ || 7.6.34 ||
rādheyo bahumāyī ca lokapālo 'tha dhārmikaḥ |yamalārjunau ca hārdikyaḥ śumbhaścaiva niśumbhakaḥ || 7.6.35 ||
asurā dānavāścaiva sattvavanto mahābalāḥ |sarve samaramāsādya na śrūyante 'parājitāḥ || 7.6.36 ||
sarvaiḥ kratuśatairiṣṭaṃ sarve māyāvidastathā |sarve sarvāstrakuśalāḥ sarve śatrubhayaṅkarāḥ || 7.6.37 ||
nārāyaṇena nihatāḥ śataśo 'tha sahasraśaḥ |etajjñātvā tu sarveṣāṃ kṣamaṃ kartumihārhatha || 7.6.38 ||
tataḥ sumālī mālī ca śrutvā mālyavato vacaḥ |ūcaturbhrātaraṃ jyeṣṭhaṃ bhagāṃśāviva vāsavam || 7.6.39 ||
svadhītaṃ dattamiṣṭaṃ cāpyaiśvaryaṃ paripālitam |āyurnirāmayaṃ prāptaṃ sudharmaḥ prāpitaḥ pathi || 7.6.40 ||
devasāgaramakṣobhyaṃ śastraiḥ samavagāhya ca |jitā dviṣo hyapratimāstanno mṛtyukṛtaṃ bhayam || 7.6.41 ||
nārāyaṇaśca rudraśca śakraścāpi yamastathā |asmākaṃ pramukhe sthātuṃ sarve bibhyati sarvadā || 7.6.42 ||
viṣṇordevasya nāstyeva kāraṇaṃ rākṣaseśvara |devānāmeva doṣeṇa viṣṇoḥ pracalitaṃ manaḥ || 7.6.43 ||
tasmādadya samudyuktāḥ sarvasainyasamāvṛtāḥ |devāneva jighāṃsāma ebhyo doṣaḥ samutthitaḥ || 7.6.44 ||
evaṃ sammantrya balinaḥ sarve sainyasamāvṛtāḥ |udyogaṃ ghoṣayitvā tu sarve nairṛtapuṅgavāḥ ||
yuddhāya niryayuḥ kruddhā jambhavṛtrabalā iva || 7.6.45 ||
iti te rāma sammantrya sarvodyogena rākṣasāḥ |yuddhāya niryayuḥ sarve mahākāyā mahābalāḥ || 7.6.46 ||
syandanairvāraṇaiścaiva hayaiśca girisannibhaiḥ |kharairgobhī rathoṣṭraiśca śiṃśumārairbhujaṅgamaiḥ || 7.6.47 ||
makaraiḥ kacchapairmīnairvihaṅgairgaruḍopamaiḥ |siṃhairvyāghrairvarāhaiśca sṛmaraiścamarairapi || 7.6.48 ||
tyaktvā laṅkāṃ gatāḥ sarve rākṣasā balagarvitāḥ |prayātā devalokāya yoddhuṃ daivataśatravaḥ || 7.6.49 ||
laṅkāviparyayaṃ dṛṣṭvā yāni laṅkālayānyatha |bhūtāni bhayadarśīni vimanaskāni sarvaśaḥ || 7.6.50 ||
rathottamairuhyamānāḥ śataśo 'tha sahasraśaḥ || 7.6.51 ||
prayātā rākṣasāstūrṇaṃ devalokaṃ prayatnataḥ |rakṣasāmeva mārgeṇa daivatānyapacakramuḥ || 7.6.52 ||
bhaumāścaivāntarikṣāśca kālājñaptā bhayāvahāḥ |utpātā rākṣasendrāṇāmabhāvāya samutthitāḥ || 7.6.53 ||
asthīni meghā vavṛṣuruṣṇaṃ śoṇitameva ca |velāṃ samudrāścotkrāntāśceluścāpyatha bhūdharāḥ || 7.6.54 ||
aṭṭahāsānvimuñcanto ghananādasamasvanāḥ |vāśyantyaśca śivāstatra dāruṇaṃ ghoradarśanāḥ || 7.6.55 ||
sampatantyatha bhūtāni dṛśyante ca yathākramam |gṛdhracakraṃ mahaccātra jvalanodgāribhirmukhaiḥ || 7.6.56 ||
rākṣasānāmupari khe bhramate 'lātacakravat |kapotā raktapādāśca śārikā vidrutā yayuḥ ||
kākā vāśyanti tatraiva biḍālā vai dvipādayaḥ || 7.6.57 ||
utpātāṃstānanādṛtya rākṣasā balagarvitāḥ |yāntyeva na nivarttante mṛtyupāśāvapāśitāḥ || 7.6.58 ||
mālyavāṃśca sumālī ca mālī ca sumahābalāḥ |āsanpuraḥsarāsteṣāṃ kratūnāmiva pāvakāḥ || 7.6.59 ||
mālyavantaṃ ca te sarve mālyavantamivācalam |niśācarā hyāśrayanti dhātāramiva devatāḥ || 7.6.60 ||
tadbalaṃ rākṣasendrāṇāṃ mahābhraghananāditam |jayepsayā devalokaṃ yayau mālivaśe sthitam || 7.6.61 ||
rākṣasānāṃ samudyogaṃ taṃ tu nārāyaṇaḥ prabhuḥ |devadūtādupaśrutya cakre yuddhe tadā manaḥ || 7.6.62 ||
sa sajjāyudhatūṇīro vainateyopari sthitaḥ |āsajjya kavacaṃ divyaṃ sahasrārkasamadyuti || 7.6.63 ||
ābadhya śarasampūrṇe iṣudhī vimale tadā |śroṇisūtraṃ ca khaḍgaṃ ca vimalaṃ kamalekṣaṇaḥ ||
śaṅkhacakragadāśārṅgakhaḍgākhyapravarāyudhān || 7.6.64 ||
suparṇaṃ girisaṅkāśaṃ vainateyamathāsthitaḥ |rākṣasānāmabhāvāya yayau tūrṇataraṃ prabhuḥ || 7.6.65 ||
suparṇapṛṣṭhe sa babhau śyāmaḥ pītāmbaro hariḥ |kāñcanasya gireḥ śṛṅge sataḍittoyado yathā || 7.6.66 ||
sa siddhadevarṣimahoragaiśca gandharvayakṣairupagīyamānaḥ |samāsasādāsurasainyaśatrūṃścakrāsiśārṅgāyudhaśaṅkhapāṇiḥ || 7.6.67 ||
suparṇapakṣānilanunnapakṣaṃ bhramatpatākaṃ pravikīrṇaśastram |cacāla tadrākṣasarājasainyaṃ calopalaṃ nīla ivācalendraḥ || 7.6.68 ||
tataḥ śaraiḥ śoṇitamāṃsarūṣitairyugāntavaiśvānaratulyavigrahaiḥ |niśācarāḥ samparivārya mādhavaṃ varāyudhairnirbibhiduḥ sahasraśaḥ || 7.6.69 ||
nārāyaṇagiriṃ te tu garjanto rākṣasāmbudāḥ |vavarṣuḥ śaravarṣeṇa varṣeṇevādrimambudāḥ || 7.7.1 ||
śyāmāvadātastairviṣṇurnīlairnaktañcarottamaiḥ |vṛto 'ñjanagirīvāsīt varṣamāṇaiḥ payodharaiḥ || 7.7.2 ||
śalabhā iva kedāraṃ maśakā iva parvatam |yathāmṛtaghaṭaṃ daṃśā makarā iva cārṇavam || 7.7.3 ||
tathā rakṣodhanurmuktā vajrānilamanojavāḥ |hariṃ viśanti sma śarā lokā iva viparyaye || 7.7.4 ||
syandanaiḥ syandanagatā gajaiśca gajapṛṣṭhagāḥ |aśvārohāstathāśvaiśca pādātāścāmbare sthitāḥ || 7.7.5 ||
rākṣasendrā girinibhāḥ śaraiḥ śaktyṛṣṭitomaraiḥ |niruchvāsaṃ hariṃ cakruḥ prāṇāyāmā iva dvijam || 7.7.6 ||
niśācaraistāḍyamāno mīnairiva mahodadhiḥ |śārṅgamāyamya durdharṣo rākṣasebhyo 'sṛjaccharān || 7.7.7 ||
śaraiḥ pūrṇāyatotsṛṣṭairvajravaktrairmanojavaiḥ |ciccheda viṣṇurniśitaiḥ śataśo 'tha sahasraśaḥ || 7.7.8 ||
vidrāvya śaravarṣeṇa varṣā vāyurivotthitam |pāñcajanyaṃ mahāśaṅkhaṃ pradadhmau puruṣottamaḥ || 7.7.9 ||
so 'mbujo hariṇā dhmātaḥ sarvaprāṇena śaṅkharāṭ |rarāsa bhīmanirhādastrailokyaṃ vyathayanniva || 7.7.10 ||
śaṅkharājaravaḥ so 'tha trāsayāmāsa rākṣasān |mṛgarāja ivāraṇye samadāniva kuñjarān || 7.7.11 ||
na śekuraśvāḥ saṃsthātuṃ vimadāḥ kuñjarābhavan |syandanebhyaścyutā vīrāḥ śaṅkharāvitadurbalāḥ || 7.7.12 ||
śārṅgacāpavinirmuktā vajratulyānanāḥ śarāḥ |vidārya tāni rakṣāṃsi supuṅkhā viviśuḥ kṣitim || 7.7.13 ||
bhidyamānāḥ śaraiḥ saṅkhye nārāyaṇakaracyutaiḥ |nipetū rākṣasā bhūmau śailā vajrahatā iva || 7.7.14 ||
vraṇāni paragātrebhyo viṣṇucakrakṛtāni vai |asṛkkṣaranti dhārābhiḥ svarṇadhārā ivācalāḥ || 7.7.15 ||
śaṅkharājaravaścāpi śārṅgacāparasvastathā |rākṣasānāṃ ravāṃścāpi grasate vaiṣṇavo ravaḥ || 7.7.16 ||
teṣāṃ śirodharāndhūtāñcharadhvajadhanūṃṣi ca |rathānpatākāstūṇīrāṃściccheda sa hariḥ śaraiḥ || 7.7.17 ||
sūryādiva karā ghorā ūrmayaḥ sāgarādiva |parvatādiva nāgendrā dhāraughā iva cāmbudāt || 7.7.18 ||
tathā śārṅgavinirmuktāḥ śarā nārāyaṇeritāḥ |nirdhāvantīṣavastūrṇaṃ śataśotha sahasraśaḥ || 7.7.19 ||
śarabheṇa yathā siṃhāḥ siṃhena dviradā yathā |dviradena yathā vyāghrā vyāghreṇa dvīpino yathā || 7.7.20 ||
dvīpineva yathā śvānaḥ śunā mārjārakā yathā |mārjāreṇa yathā sarpāḥ sarpeṇa ca yathā ' 'khavaḥ || 7.7.21 ||
tathā te rākṣasāḥ sarve viṣṇunā prabhaviṣṇunā |dravanti drāvitāścanye śāyitāśca mahītale || 7.7.22 ||
rākṣasānāṃ sahasrāṇi nihatya madhusūdanaḥ |vārijaṃ pūrayāmāsa toyadaṃ surarāḍiva || 7.7.23 ||
nārāyaṇaśaratrastaṃ śaṅkhanādasuvihvalam |yayau laṅkāmabhimukhaṃ prabhagnaṃ rākṣasaṃ balam || 7.7.24 ||
prabhagne rākṣasabale nārāyaṇaśarāhate |sumālī śaravarṣeṇa nivavāra raṇe harim || 7.7.25 ||
sa tu taṃ chādayāmāsa nīhāra iva bhāskaram |rākṣasāḥ sattvasampannāḥ punardhairyaṃ samādadhuḥ || 7.7.26 ||
atha so 'bhyapatadroṣādrākṣaso baladarpitaḥ |mahānādaṃ prakurvāṇo rākṣasāñjīvayanniva || 7.7.27 ||
utkṣipya lambābharaṇaṃ dhunvankaramiva dvipaḥ |rarāsa rākṣaso harṣātsataḍittoyado yathā || 7.7.28 ||
sumālernardatastasya śiro jvalitakuṇḍalam |ciccheda yanturaśvāśca bhrāntāstasya tu rakṣasaḥ || 7.7.29 ||
tairaśvairbhrāmyate bhrāntaiḥ sumālī rākṣaseśvaraḥ |indriyāśvaiḥ paribhrāntairdhṛtihīno yathā naraḥ || 7.7.30 ||
tato viṣṇuṃ mahābāhuṃ prapatantaṃ raṇājire |hṛte sumāleraśvaiśca rathe viṣṇurathaṃ prati || 7.7.31 ||
mālī cābhyadravadyuktaḥ pragṛhya saśaraṃ dhanuḥ |mālerdhanuścyutā bāṇāḥ kārtasvaravibhūṣitāḥ |viviśurharimāsādya krauñcaṃ patrarathā iva || 7.7.32 ||
ardyamānaḥ śaraiḥ so 'tha mālimuktaiḥ sahasraśaḥ |cukṣubhe na raṇe viṣṇurjitendriya ivādhibhiḥ || 7.7.33 ||
atha maurvīsvanaṃ kṛtvā bhagavānbhūtabhāvanaḥ |mālinaṃ prati bāṇaughānsasarjāriniṣūdanaḥ || 7.7.34 ||
te mālidehamāsādya vajravidyutprabhāḥ śarāḥ |pibanti rudhiraṃ tasya nāgā iva sudhārasam || 7.7.35 ||
mālinaṃ vimukhaṃ kṛtvā śaṅkhacakragadādharaḥ |mālimauliṃ dhvajaṃ cāpaṃ vājinaścāpyapātayat || 7.7.36 ||
virathastu gadāṃ gṛhya mālī naktañcarottamaḥ |āpupluve gadāpāṇirgiryagrādiva kesarī || 7.7.37 ||
gadayā garuḍeśānamīśānamiva cāntakaḥ |lalāṭadeśe 'bhyahanadvajreṇendro yathā 'calam || 7.7.38 ||
gadayābhihatastena mālinā garuḍo bhṛśam |raṇātparāṅmukhaṃ devaṃ kṛtavānvedanāturaḥ || 7.7.39 ||
parāṅmukhe kṛte deve mālinā garuḍena vai |udatiṣṭhanmahāñchabdo rakṣasāmabhinardatām || 7.7.40 ||
rakṣasāṃ ravatāṃ rāvaṃ śrutvā harihayānujaḥ || 7.7.41 ||
tiryagāsthāya saṅkruddhaḥ pakṣīśe bhagavānhariḥ |parāṅmukho 'pyutsasarja māleścakraṃ jighāṃsayā || 7.7.42 ||
tatsūryamaṇḍalābhāsaṃ svabhāsā bhāsayannabhaḥ |kālacakranibhaṃ cakraṃ māleḥ śīrṣamapātayat || 7.7.43 ||
tacchiro rākṣasendrasya cakrotkṛttaṃ bibhīṣaṇam |papāta rudhirodgāri purā rāhuśiro yathā || 7.7.44 ||
tataḥ suraiḥ saṃsahṛṣṭaiḥ sarvaprāṇasamīritaḥ |siṃhanādaravonmuktaḥ sādhu devetivādibhiḥ || 7.7.45 ||
mālinaṃ nihataṃ dṛṣṭvā sumālī mālyavānapi |sabalau śokasantaptau laṅkāmeva pradhāvitau || 7.7.46 ||
garuḍastu samāśvastaḥ sannivṛtya yathā purā |rākṣasāndrāvayāmāsa pakṣavātena kopitaḥ || 7.7.47 ||
cakrakṛttāsyakamalā gadāsañcūrṇitorasaḥ |lāṅgalaglapitagrīvā musalairbhinnamastakāḥ || 7.7.48 ||
keciccaivāsinā chinnāstathānye śarapīḍitāḥ |nipeturambarāttūrṇaṃ rākṣasāḥ sāgarāmbhasi || 7.7.49 ||
nārāyaṇo bāṇavarāśanībhirvidārayāmāsa dhanurvimuktaiḥ |naktañcarānmuktavidhūtakeśānyathā 'śanībhiḥ sataḍinmahābhrāḥ || 7.7.50 ||
bhinnātapatraṃ patamānamastraṃ śarairapadhvastavinītaveṣam |vinissṛtāntraṃ bhayalolanetraṃ balaṃ tadunmattataraṃ babhūva || 7.7.51 ||
siṃhārditānāmiva kuñjarāṇāṃ niśācarāṇāṃ saha kuñjarāṇām |ravāśca vegāśca samaṃ babhūvuḥ purāṇasiṃhena vimarditānām || 7.7.52 ||
te vāryamāṇā haribāṇajālaiḥ sabāṇajālāni samutsṛjantaḥ |dhāvanti naktañcarakālameghā vāyuprabhinnā iva kālameghāḥ || 7.7.53 ||
cakrapahārairvinikṛttaśīrṣāḥ sañcūrṇitāṅgāśca gadāprahāraiḥ |abhiprahārairdvividhā vibhinnāḥ patanti śailā iva rākṣasendrāḥ || 7.7.54 ||
vilambamānairmaṇihārakuṇḍalairniśācarairnīlabalāhakopamaiḥ |nipātyamānairdadṛśe nirantaraṃ nipātyamānairiva nīlaparvataiḥ || 7.7.55 ||
hanyamāne bale tasminpadmanābhena pṛṣṭhataḥ |mālvānsannivṛtto 'tha velāmetya ivārṇavaḥ || 7.8.1 ||
saṃraktanayanaḥ kopāccalanmaulirniśācaraḥ |padmanābhamidaṃ prāha vacanaṃ puruṣottamam || 7.8.2 ||
nārāyaṇa na jānīṣe kṣātradharmaṃ purātanam |ayuddhamanaso bhītānasmānhaṃsi yathetaraḥ || 7.8.3 ||
parāṅmukhavadhaṃ pāpaṃ yaḥ karotyasuretaraḥ |sa hantā na gataḥ svargaṃ labhate puṇyakarmaṇām || 7.8.4 ||
yuddhaśraddhā 'thavā te 'sti śaṅkhacakragadādhara | 4ahaṃ sthito 'smi paśyāmi balaṃ darśaya yattava || 7.8.5 ||
mālyavantaṃ sthitaṃ dṛṣṭvā mālyavantamivācalam |uvāca rākṣasendraṃ taṃ devarājānujo balī || 7.8.6 ||
yuṣmatto bhayabhītānāṃ devānāṃ vai mayā 'bhayam |rākṣasotsādanaṃ dattaṃ tadetadanupālyate || 7.8.7 ||
prāṇairapi priyaṃ kāryaṃ devānāṃ hi sadā mayā |so 'haṃ vo nihaniṣyāmi rasātalagatānapi || 7.8.8 ||
devadevaṃ bruvāṇaṃ taṃ raktāmburuhalocanam |śaktyā bibheda saṅkruddho rākṣasendro bhujāntare || 7.8.9 ||
mālyavadbhujanirmuktā śaktirghaṇṭākṛtasvanā |harerurasi babhrāja meghastheva śatahradā || 7.8.10 ||
tatastāmeva cotkṛṣya śaktiṃ śaktidharapriyaḥ |mālyavantaṃ samuddiśya cikṣepāmburuhekṣaṇaḥ || 7.8.11 ||
skandotsṛṣṭeva sā śaktirgovindakaranissṛtā |kāṅkṣantī rākṣasaṃ prāyānmāhendrīvāñjanācalam || 7.8.12 ||
sā tasyorasi vistīrṇe hārabhārā 'vabhāsite |apatadrākṣasendrasya girikūṭa ivāśaniḥ || 7.8.13 ||
tayā bhinnatanutrāṇaḥ prāviśadvipulaṃ tamaḥ |mālyavānpunarāśvastastasthau giririvācalaḥ || 7.8.14 ||
tataḥ kārṣṇāyasaṃ śūlaṃ kaṇṭakairbahubhirvatam |pragṛhyābhyahanaddevaṃ stanayorantare dṛḍham || 7.8.15 ||
tathaiva raṇaraktastu muṣṭinā vāsavānujam |tāḍayitvā dhanurmātramapakrānto niśācaraḥ || 7.8.16 ||
tato 'mbare mahāñchabdaḥ sādhusādhviti coditaḥ |āhatya rākṣaso viṣṇuṃ garuḍaṃ cāpyatāḍayat || 7.8.17 ||
vainateyastataḥ kruddhaḥ pakṣavātena rākṣasam |vyapohadbalavānvāyuḥ śuṣkaparṇacayaṃ yathā || 7.8.18 ||
dvijendrapakṣavātena drāvitaṃ dṛśya pūrvajam |sumālī svabalaiḥ sārdhaṃ laṅkāmabhimukho yayau || 7.8.19 ||
pakṣavātabaloddhūto mālyavānapi rākṣasaḥ |svabalena samāgamya yayau laṅkāṃ hriyā vṛtaḥ || 7.8.20 ||
evaṃ te rākṣasā tena hariṇā kamalekṣaṇa |bahuśaḥ saṃyuge bhagnā hatapravaranāyakāḥ || 7.8.21 ||
aśaknuvantaste viṣṇuṃ pratiyoddhuṃ bhayārditāḥ |tyaktvā laṅkāṃ gatā vastuṃ pātālaṃ sahapatnayaḥ || 7.8.22 ||
sumālinaṃ samāsādya rākṣasaṃ raghusattama |sthitāḥ prakhyātavīryāste vaṃśe sālakaṭaṅkaṭe || 7.8.23 ||
ye tvayā nihatāste tu paulastyā nāma rākṣasāḥ sumālī mālyavānmālī ye ca teṣāṃ puraḥsarāḥ |sarve tebhyo mahābhāgā rāvaṇādbalavattarāḥ || 7.8.24 ||
na cānyo rākṣasānhantā surārīndevakaṇṭakān |ṛte nārāyaṇaṃ devaṃ śaṅkhacakragadādharam || 7.8.25 ||
bhavānnārāyaṇo devaścaturbāhuḥ sanātanaḥ |rākṣasānhantumutpanno hyajeyaḥ prabhuravyayaḥ || 7.8.26 ||
naṣṭadharmavyavasthātā kāle kāle prajākaraḥ |utpadyate dasyuvadhe śaraṇāgatavatsalaḥ || 7.8.27 ||
eṣā mayā tava narādhipa rākṣasānāmutpattiradya kathitā sakalā yathāvat |bhūyo nibodha raghusattama rāvaṇasya janmaprabhāvamatulaṃ sasutasya sarvam || 7.8.28 ||
cirātsumālī vyacaradrasātalaṃ sa rākṣaso viṣṇubhayārditastadā |putraiśca pautraiśca samanvito balī tatastu laṅkāmavasaddhaneśvaraḥ || 7.8.29 ||
kasyacittvatha kālasya sumālī nāma rākṣasaḥ |rasātalānmartyalokaṃ sarvaṃ vai vicacāra ha || 7.9.1 ||
nīlajīmūtasaṅkāśastaptakāñcanakuṇḍalaḥ |kanyāṃ duhitaraṃ gṛhya vinā padmamiva śriyam || 7.9.2 ||
rākṣasendraḥ sa tu tadā vicaranvai mahītalam |tadāpaśyatsa gacchantaṃ puṣpakeṇa dhaneśvaram || 7.9.3 ||
gacchantaṃ pitaraṃ draṣṭuṃ pulastyatanayaṃ vibhum |taṃ dṛṣṭvā 'marasaṅkāśaṃ svacchandaṃ tapanopamam || 7.9.4 ||
rasātalaṃ praviṣṭaḥ sanmartyalokātsavismayaḥ |ityevaṃ cintayāmāsa rākṣasānāṃ mahāmatiḥ || 7.9.5 ||
kiṃ kṛtaṃ śreya ityevaṃ vardhemahi kathaṃ vayam |athābravītsutāṃ rakṣaḥ kaikasīṃ nāma nāmataḥ || 7.9.6 ||
putri pradānakālo 'yaṃ yauvanaṃ vyativartate |pratyākhyānācca bhītaistvaṃ na varaiḥ pratigṛhyase || 7.9.7 ||
tvatkṛte ca vayaṃ sarve yantritā dharmabuddhayaḥ |tvaṃ hi sarvaguṇopetā śrīḥ sākṣādiva putrike |kanyāpitṛtvaṃ duḥkhaṃ hi sarveṣāṃ mānakāṅkṣiṇām || 7.9.8 ||
na jñāyate ca kaḥ kanyāṃ varayediti kanyake || 7.9.9 ||
tvaṃ hi sarvaguṇopetā śrīḥ sākṣādiva putrike | mātuḥ kulaṃ pitṛkulaṃ yatra caiva pradīyate |kulatrayaṃ sadā kanyā saṃśaye sthāpya tiṣṭhati || 7.9.10 ||
sā tvaṃ munivaraṃ śreṣṭhaṃ prajāpatikulodbhavam |bhaja viśravasaṃ putri paulastyaṃ varaya svayam || 7.9.11 ||
īdṛśāste bhaviṣyanti putrāḥ putri na saṃśayaḥ |tejasā bhāskarasamo yādṛśo 'yaṃ dhaneśvaraḥ || 7.9.12 ||
sā tu tadvacanaṃ śrutvā kanyakā pitṛgauravāt |tatropāgamya sā tasthau viśravā yatra tapyate || 7.9.13 ||
etasminnantare rāma pulastyatanayo dvijaḥ |agnihotramupātiṣṭhaccaturtha iva pāvakaḥ || 7.9.14 ||
avicintya tu tāṃ velāṃ dāruṇāṃ pitṛgauravāt |upasṛtyāgratastasya caraṇādhomukhī sthitā |vilikhantī muhurbhūmimaṅguṣṭhāgreṇa bhāminī || 7.9.15 ||
sa tu tāṃ vīkṣya suśroṇīṃ pūrṇacandranibhānanām |abravītparamodāro dīpyamānāṃ svatejasā || 7.9.16 ||
bhadre kasyāsi duhitā kuto vā tvamihāgatā |kiṃ kāryaṃ kasya vā hetostattvato brūhi śobhane || 7.9.17 ||
evamuktā tu sā kanyā kṛtāñjalirathābravīt |ātmaprabhāveṇa mune jñātumarhasi me matam || 7.9.18 ||
kiṃ tu māṃ viddhi brahmarṣe śāsanātpiturāgatām |kaikasī nāma nāmnāhaṃ śeṣaṃ tvaṃ jñātumarhasi || 7.9.19 ||
sa tu gatvā munirdhyānaṃ vākyametaduvāca ha |vijñātaṃ te mayā bhadre kāraṇaṃ yanmanogatam || 7.9.20 ||
sutābhilāṣo mattaste mattamātaṅgagāmini |dāruṇāyāṃ tu velāyāṃ yasmāttvaṃ māmupasthitā || 7.9.21 ||
śṛṇu tasmātsutānbhadre yādṛśāñjanayiṣyasi |dāruṇāndāruṇākārāndāruṇābhijanapriyān || 7.9.22 ||
prasaviṣyasi suśroṇi rākṣasānkrūrakarmaṇaḥ |sā tu tadvacanaṃ śrutvā praṇipatyābravīdvacaḥ || 7.9.23 ||
bhagavannīdṛśānputrāṃstvatto 'haṃ brahmavādinaḥ |necchāmi sudurācārānprasādaṃ kartumarhasi || 7.9.24 ||
kanyayā tvevamuktastu viśravā munipuṅgavaḥ |uvāca kaikasīṃ bhūyaḥ pūrṇenduriva rohiṇīm || 7.9.25 ||
paścimo yastava suto bhaviṣyati śubhānane |mama vaṃśānurūpaḥ sa dharmātmā ca bhaviṣyati || 7.9.26 ||
evamuktā tu sā kanyā rāma kālena kenacit |janayāmāsa bībhatsaṃ rakṣorūpaṃ sudāruṇam || 7.9.27 ||
daśagrīvaṃ mahādaṃṣṭraṃ nīlāñjanacayopamam |tāmroṣṭhaṃ viṃśatibhujaṃ mahāsyaṃ dīptamūrdhajam || 7.9.28 ||
tasmiñjāte tu tatkāle sajvālakavalāḥ śivāḥ |kravyādāścāpasavyāni maṇḍalāni pracakramuḥ || 7.9.29 ||
vavarṣa rudhiraṃ devo meghāśca kharaniḥsvanāḥ |prababhau na ca sūryo vai maholkāścāpatanbhuvi || 7.9.30 ||
cakampe jagatī caiva vavurvātāḥ sudāruṇāḥ |akṣobhyaḥ kṣubhitaścaiva samudraḥ saritāṃ patiḥ || 7.9.31 ||
atha nāmākarottasya pitāmahasamaḥ pitā |daśagrīvaḥ prasūto 'yaṃ daśagrīvo bhaviṣyati || 7.9.32 ||
tasya tvanantaraṃ jātaḥ kumbhakarṇo mahābalaḥ |pramāṇādyasya vipulaṃ pramāṇaṃ neha vidyate || 7.9.33 ||
tataḥ śūrpaṇakhā nāma sañjajñe vikṛtānanā |vibhīṣaṇaśca dharmātmā kaikasyāḥ paścimaḥ sutaḥ || 7.9.34 ||
tasmiñjāte mahāsattve puṣpavarṣaṃ papāta ha || 7.9.35 ||
nabhaḥsthāne dundubhayo devānāṃ prāṇadaṃstadā |vākyaṃ caivāntarikṣe ca sādhu sādhviti tattadā || 7.9.36 ||
tau tu tatra mahāraṇye vavṛdhāte mahaujasau |kumbhakarṇadaśagrīvau lokodvegakarau tadā || 7.9.37 ||
kumbhakarṇaḥ pramattastu maharṣīndharmavatsalān |trailokyaṃ bhakṣayannityāsantuṣṭo vicacāra ha || 7.9.38 ||
vibhīṣaṇastu dharmātmā nityaṃ dharme vyavasthitaḥ |svādhyāyaniyatāhāra uvāsa vijitendriyaḥ || 7.9.39 ||
atha vaiśravaṇo devastatra kālena kenacit |āgataḥ pitaraṃ draṣṭuṃ puṣpakeṇa dhaneśvaraḥ || 7.9.40 ||
taṃ dṛṣṭvā kaikasī tatra jvalantamiva tejasā |āgamya rākṣasī tatra daśagrīvamuvāca ha || 7.9.41 ||
putra vaiśravaṇaṃ paśya bhrātaraṃ tejasā vṛtam |bhrātṛbhāve same cāpi paśyātmānaṃ tvamīdṛśam || 7.9.42 ||
daśagrīva tathā yatnaṃ kuruṣvāmitavikrama |yathā tvamasi me putra bhava rvaiśravaṇopamaḥ || 7.9.43 ||
mātustadvacanaṃ śrutvā daśagrīvaḥ pratāpavān |amarṣamatulaṃ lebhe pratijñāṃ cākarottadā || 7.9.44 ||
satyaṃ te pratijānāmi bhrātṛtulyo 'dhiko 'pi vā |bhaviṣyāmyojasā caiva santāpaṃ tyaja hṛdgatam || 7.9.45 ||
tatastenaiva kopena daśagrīvaḥ sahānujaḥ |cikīrṣurduṣkaraṃ karma tapase dhṛtamānasaḥ || 7.9.46 ||
prāpsyāmi tapasā kāmamiti kṛtvā 'dhyavasya ca |āgacchadātmasiddhyarthaṃ gokarṇasyāśramaṃ śubham || 7.9.47 ||
sa rākṣasastatra sahānujastadā tapaścakārātulamugravikramaḥ |atoṣayaccāpi pitāmahaṃ vibhuṃ dadau sa tuṣṭaśca varāñjayāvahān || 7.9.48 ||
athābravīnmuniṃ rāmaḥ kathaṃ te bhrātaro vane |kīdṛśaṃ tu tadā brahmaṃstapastepurmahābalāḥ || 7.10.1 ||
agastyastvabravīttatra rāmaṃ suprītamānasam |tāṃstāndharmavidhīṃstatra bhrātaraste samāviśan || 7.10.2 ||
kumbhakarṇastato yatto nityaṃ dharmapathe sthitaḥ |tatāpa grīṣmakāle tu pañcāgnīnparitaḥ sthitaḥ || 7.10.3 ||
meghāmbusikto varṣāsu vīrāsanamasevata |nityaṃ ca śiśire kāle jalamadhyapratiśrayaḥ || 7.10.4 ||
evaṃ varṣasahasrāṇi daśa tasyāticakramuḥ |dharme prayatamānasya satpathe niṣṭhitasya ca || 7.10.5 ||
vibhīṣaṇastu dharmātmā nityaṃ dharmaparaḥ śuciḥ |pañcavarṣasahasrāṇi pādenaikena tasthivān || 7.10.6 ||
samāpte niyame tasya nanṛtuścāpsarogaṇāḥ |papāta puṣpavarṣaṃ ca kṣubhitāścāpi devatāḥ || 7.10.7 ||
pañcavarṣasahasrāṇi sūryaṃ caivānvavartata |tasthau cordhvaśirobāhuḥ svādhyāyadhṛtamānasaḥ || 7.10.8 ||
evaṃ vibhīṣaṇasyāpi svargasthasyeva nandane |daśavarṣasahasrāṇi gatāni niyatātmanaḥ || 7.10.9 ||
daśavarṣasahasraṃ tu nirāhāro daśānanaḥ |pūrṇe varṣasahasre tu śiraścāgnau juhāva saḥ || 7.10.10 ||
evaṃ varṣasahasrāṇi nava tasyāticakramuḥ |śirāṃsi nava cāpyasya praviṣṭāni hutāśanam || 7.10.11 ||
atha varṣasahasre tu daśame daśamaṃ śiraḥ |chettukāme daśagrīve prāptastatra pitāmahaḥ || 7.10.12 ||
pitāmahastu suprītaḥ sārdhaṃ devairupasthitaḥ |tava tāvaddaśagrīva prīto 'smītyabhyabhāṣata || 7.10.13 ||
śīghraṃ varaya dharmajña varo yaste 'bhikāṅkṣitaḥ |kaṃ te kāmaṃ karomyadya na vṛthā te pariśramaḥ || 7.10.14 ||
athābravīdṛśagrīvaḥ prahṛṣṭenāntarātmanā |praṇamya śirasā devaṃ harṣagadgadayā girā || 7.10.15 ||
bhagavanprāṇināṃ nityaṃ nānyatra maraṇādbhayam |nāsti mṛtyusamaḥ śatruramaratvamahaṃ vṛṇe || 7.10.16 ||
evamuktastadā brahmā daśagrīvamuvāca ha |nāsti sarvāmaratvaṃ te varamanyaṃ vṛṇīṣva me || 7.10.17 ||
evamukte tadā rāma brahmaṇā lokakartṛṇā |daśagrīva uvācedaṃ kṛtāñjalirathāgrataḥ || 7.10.18 ||
suparṇanāgayakṣāṇāṃ daityadānavarakṣasām |avadhyo 'haṃ prajādhyakṣa devatānāṃ ca śāśvata || 7.10.19 ||
nahi cintā mamānyeṣu prāṇiṣvamarapūjita |tṛṇabhūtā hi te manye prāṇino mānuṣādayaḥ || 7.10.20 ||
evamuktastu dharmātmā daśagrīveṇa rakṣasā |uvāca vacanaṃ devaḥ saha devaiḥ pitāmahaḥ || 7.10.21 ||
bhaviṣyatyevametatte vaco rākṣasapuṅgava |evamuktvā tu taṃ rāma daśagrīvaṃ pitāmahaḥ || 7.10.22 ||
śṛṇu cāpi varo bhūyaḥ prītasyeha śubho mama |hutāni yāni śīrṣāṇi pūrvamagnau tvayānagha || 7.10.23 ||
punastāni bhaviṣyanti tathaiva tava rākṣasa |vitarāmīha te saumya varaṃ cānyaṃ durāsadam || 7.10.24 ||
chandatastava rūpaṃ ca manasā yadyathepsitam |bhaviṣyati na sandeho madvarāttavarākṣasa || 7.10.25 ||
evaṃ pitāmahoktasya daśagrīvasya rakṣasaḥ |agnau hutāni śīrṣāṇi punastānyutthitāni vai || 7.10.26 ||
evamuktvā tu taṃ rāma daśagrīvaṃ pitāmahaḥ |vibhīṣaṇamathovāca vākyaṃ lokapitāmahaḥ || 7.10.27 ||
vibhīṣaṇa tvayā vatsa dharmasaṃhitabuddhinā |parituṣṭo 'smi dharmātmanvaraṃ varaya suvrata || 7.10.28 ||
vibhīṣaṇastu dharmātmā vacanaṃ prāha sāñjaliḥ |vṛtaḥ sarvaguṇairnityaṃ candramā raśmibhiryathā || 7.10.29 ||
bhagavankṛtakṛtyo 'haṃ yanme lokaguruḥ svayam |prītena yadi dātavyo varo me śṛṇu suvrata || 7.10.30 ||
paramāpadgatasyāpi dharme mama matirbhavet |aśikṣitaṃ ca brahmāstraṃ bhagavanpratibhātu me || 7.10.31 ||
yā yā me jāyate buddhiryeṣu yeṣvāśrameṣu ca |sā sā bhavatu dharmiṣṭhā taṃ tu dharmaṃ ca pālaye || 7.10.32 ||
eṣa me paramodāra varaḥ paramako mataḥ |nahi dharmābhiraktānāṃ loke kiñcana durlabham || 7.10.33 ||
punaḥ prajāpatiḥ prīto vibhīṣaṇamuvāca ha |dharmiṣṭhastvaṃ yathā vatsa tathā caitadbhaviṣyati || 7.10.34 ||
yasmādrākṣasayonau te jātasyāmitranāśana |nādharme jāyate buddhiramaratvaṃ dadāmi te || 7.10.35 ||
ityuktvā kumbhakarṇāya varaṃ dātumupasthitam |prajāpatiṃ surāḥ sarve vākyaṃ prāñjalayo 'bruvan || 7.10.36 ||
na tāvatkumbhakarṇāya pradātavyo varastvayā |jānīṣe hi yathā lokāṃstrāsayatyeṣa durmatiḥ || 7.10.37 ||
nandane 'psarasaḥ sapta mahendrānucarā daśa |anena bhakṣitā brahmannṛṣayo mānuṣāstathā || 7.10.38 ||
alabdhavarapūrveṇa yatkṛtaṃ rākṣasena tu |tadeṣa varalabdhaḥ syādbhakṣayedbhuvanatrayam || 7.10.39 ||
varavyājena moho 'smai dīyatāmamitaprabha |lokānāṃ svasti caivaṃ syādbhavedasya ca sannatiḥ || 7.10.40 ||
evamuktaḥ surairbrahmā 'cintayat padmasambhavaḥ |cintitā copatasthe 'sya pārśvaṃ devī sarasvatī || 7.10.41 ||
prāñjaliḥ sā tu pārśvasthā prāha vākyaṃ sarasvatī |iyamasmyāgatā deva kiṃ kāryaṃ karavāṇyaham || 7.10.42 ||
prajāpatistuṃ tāṃ prāptāṃ prāha vākyaṃ sarasvatīm |vāṇi tvaṃ rākṣasendrasya bhava yā devatepsitā || 7.10.43 ||
tathetyuktvā praviṣṭā sā prajāpatirathābravīt |kumbhakarṇa mahābāho varaṃ varaya yo mataḥ || 7.10.44 ||
kumbhakarṇastu tadvākyaṃ śrutvā vacanamabravīt |svaptuṃ varṣāṇyanekāni devadeva mamepsitam || 7.10.45 ||
evamastviti taṃ coktvā prāyādbrahmā suraiḥ samam |devī sarasvatī caiva rākṣasaṃ taṃ jahau punaḥ || 7.10.46 ||
brahmaṇā saha deveṣu gateṣu ca nabhaḥsthalam |vimukto 'sau sarasvatyā svāṃ sañjñāṃ ca tato gataḥ || 7.10.47 ||
kumbhakarṇastu duṣṭātmā cintayāmāsa duḥkhitaḥ |īdṛśaṃ kimidaṃ vākyaṃ mamādya vadanāccyutam || 7.10.48 ||
ahaṃ vyāmohito devairiti manye tadā ' 'gataiḥ |evaṃ labdhavarāḥ sarve bhrātaro dīptatejasaḥ |śleṣmātakavanaṃ gatvā tatra te nyavasansukham || 7.10.49 ||
sumālī varalabdhāṃstu jñātvā caitānniśācarān |udatiṣṭhadbhayaṃ tyaktvā sānugaḥ sa rasātalāt || 7.11.1 ||
mārīcaśca prahastaśca virūpākṣo mahodaraḥ |udatiṣṭhansusaṃrabdhāḥ sacivāstasya rakṣasaḥ || 7.11.2 ||
sumālī sacivaiḥ sārdhaṃ vṛto rākṣasapuṅgavaiḥ |abhigamya daśagrīvaṃ pariṣvajyedamabravīt || 7.11.3 ||
diṣṭyā te vatsa samprāptaścintito 'yaṃ manorathaḥ |yastvaṃ tribhuvanaśreṣṭhāllabdhavānvaramuttamam || 7.11.4 ||
yatkṛte ca vayaṃ laṅkāṃ tyakatvā yātā rasātalam |tadgataṃ no mahābāho mahadviṣṇukṛtaṃ bhayam || 7.11.5 ||
asakṛttadbhayādbhītāḥ parityajya svamālayam |vidrutāḥ sahitāḥ sarve praviṣṭāḥ sma rasātalam || 7.11.6 ||
asmadīyā ca laṅkeyaṃ nagarī rākṣasocitā |niveśitā tava bhrātrā dhanādhyakṣeṇa dhīmatā || 7.11.7 ||
yadi nāmātra śakyaṃ syātsāmnā dānena vānagha |tarasā vā mahābāho pratyānetuṃ kṛtaṃ bhavet || 7.11.8 ||
tvaṃ tu laṅkeśvarastāta bhaviṣyasi na saṃśayaḥ |tvayā rākṣasavaṃśo 'yaṃ nimagno 'pi samuddhṛtaḥ |sarveṣāṃ naḥ prabhuścaiva bhaviṣyasi mahābala || 7.11.9 ||
athābravīddaśagrīvo mātāmahamupasthitam |vitteśo gururasmākaṃ nārhase vaktumīdṛśam || 7.11.10 ||
sāmnāpi rākṣasendreṇa pratyākhyāto garīyasā |kiñcinnāha tadā rakṣo jñātvā tasya cakīrṣitam || 7.11.11 ||
kasyacittvatha kālasya vasantaṃ rāvaṇaṃ tataḥ |uktavantaṃ tathā vākyaṃ daśagrīvaṃ niśācaraḥ || 7.11.12 ||
prahastaḥ praśritaṃ vākyamidamāha sa kāraṇam || 7.11.13 ||
daśagrīva mahābāho nārhastvaṃ vaktumīdṛśam |saubhrātraṃ nāsti śūrāṇāṃ śṛṇu cedaṃ vaco mama || 7.11.14 ||
aditiśca ditiścaiva bhaginyau sahite hi te |bhārye paramarūpiṇyau kaśyapasya prajāpateḥ || 7.11.15 ||
aditirjanayāmāsa devāṃstribhuvaneśvarān |ditistvajanayatputrānkaśyapasyātmasambhavān || 7.11.16 ||
daityānāṃ kila dharmajña purīyaṃ savanārṇavā |saparvatā mahī vīra te 'bhavanprabhaviṣṇavaḥ || 7.11.17 ||
nihatya tāṃstu samare viṣṇunā prabhaviṣṇunā |devānāṃ vaśamānītaṃ trailokyamidamavyayam || 7.11.18 ||
naitadeko bhavāneva kariṣyati viparyayam |surāsurairācaritaṃ tatkuruṣva vaco mama || 7.11.19 ||
evamukto daśagrīvaḥ prahṛṣṭenāntarātmanā |cintayitvā muhūrtaṃ vai bāḍhamityeva so 'bravīt || 7.11.20 ||
sa tu tenaiva harṣeṇa tasminnahani vīryavān |vanaṃ gato daśagrīvaḥ saha taiḥ kṣaṇadācaraiḥ || 7.11.21 ||
trikūṭasthaḥ sa tu tadā daśagrīvo niśācaraḥ |preṣayāmāsa dautyena prahastaṃ vākyakovidam || 7.11.22 ||
prahasta śīghraṃ gaccha tvaṃ brūhi nairṛtapuṅgavam |vacasā mama vitteśaṃ sāmapūrvamidaṃ vacaḥ || 7.11.23 ||
iyaṃ laṅkā purī rājanrākṣasānāṃ mahātmanām |tvayā niveśitā saumya naitadyuktaṃ tavānagha || 7.11.24 ||
tadbhavānyadi no hyadya dadyādatulavikrama |kṛtā bhavenmama prītirdhurmaścaivānupālitaḥ || 7.11.25 ||
sa tu gatvā purīṃ laṅkāṃ dhanadena surakṣitām |abravītparamodāraṃ vittapālamidaṃ vacaḥ || 7.11.26 ||
preṣito 'haṃ tava bhrātrā daśagrīveṇa suvrata |tvatsamīpaṃ mahābāho sarvaśastrabhṛtāṃ vara || 7.11.27 ||
tacchrūyatāṃ mahāprājña sarvaśāstraviśārada |vacanaṃ mama vitteśa yadbravīti daśānanaḥ || 7.11.28 ||
iyaṃ kila purī ramyā sumālipramukhaiḥ purā |bhuktapūrvā viśālākṣa rākṣasairbhīmavikramaiḥ || 7.11.29 ||
tena vijñāpyate so 'yaṃ sāmprataṃ viśravātmaja |tadeṣā dīyatāṃ tāta yācatastasya sāmataḥ || 7.11.30 ||
prahastādabhisaṃśrutya devo vaiśravaṇo vacaḥ |pratyuvāca prahastaṃ taṃ vākyaṃ vākyaviśāradaḥ || 7.11.31 ||
dattā mameyaṃ pitrā tu laṅkā śūnyā niśācaraiḥ |nivāsite ca me yakṣairdānamānādibhirguṇaiḥ || 7.11.32 ||
brūhi gaccha daśagrīvaṃ puraṃ rājyaṃ ca yanmama |tavāpyetanmahābāho bhuṅkṣva rājyamakaṇṭakam || 7.11.33 ||
evamuktvā dhanādhyakṣo jagāma piturantikam || 7.11.34 ||
abhivādya guruṃ prāha rāvaṇasya yadīpsitam |eṣa tāta daśagrīvo dūtaṃ preṣitavānmama || 7.11.35 ||
dīyatāṃ nagarī laṅkā pūrvaṃ rakṣogaṇoṣitā |mayātra yadanuṣṭheyaṃ tanmamācakṣva suvrata || 7.11.36 ||
brahmarṣistvevamukto 'sau viśravā munipuṅgavaḥ |prāñjaliṃ dhanadaṃ prāha śṛṇu putra vaco mama || 7.11.37 ||
daśagrīvo mahābāhuruktavānmama sannidhau |mayā nirbhartsitaścāsīdbahuśoktaḥ sudurmatiḥ || 7.11.38 ||
sa krodhena mayā cokto dhvaṃsate ca punaḥ punaḥ |śreyo 'bhiyuktaṃ dharmyaṃ ca śṛṇu putra vaco mama || 7.11.39 ||
varapradānasammūḍho mānyā 'mānyān sa durmatiḥ |na vetti mama śāpācca prakṛtiṃ dāruṇāṃ gataḥ || 7.11.40 ||
tasmādgaccha mahābāho kailāsaṃ dharaṇīdharam |niveśaya nivāsārthaṃ tyaktvā laṅkāṃ sahānugaḥ || 7.11.41 ||
tatra mandākinī ramyā nadīnāmuttamā nadī |kāñcanaiḥ sūryasaṅkāśaiḥ paṅkajaiḥ saṃvṛtodakā || 7.11.42 ||
kumudairutpalaiścaiva tathā 'nyaiśca sugandhibhiḥ || 7.11.43 ||
tatra devāḥ sagandharvāḥ sāpsaroragakiṃnarāḥ |vihāraśīlāḥ satataṃ ramante sarvadā ' 'śritāḥ || 7.11.44 ||
na hi kṣamaṃ tavānena vairaṃ dhanada rakṣasā |jānīṣe hi yathā 'nena labdhaḥ paramako varaḥ || 7.11.45 ||
evamukto gṛhītvā ' 'śu tadvacaḥ pitṛgauravāt |sadāraputraḥ sāmānyaḥ savāhanadhano gataḥ || 7.11.46 ||
prahasto 'tha daśagrīvaṃ gatvā vacanamabravīt |prahṛṣṭātmā mahātmānaṃ sahāmātyaṃ sahānujam || 7.11.47 ||
śūnyā sā nagarī laṅkā tyakttvaināṃ dhanado gataḥ |praviśya tāṃ sahāsmābhiḥ svadharmaṃ pratipālaya || 7.11.48 ||
evamukto daśagrīvaḥ prahastena mahābalaḥ |viveśa nagarīṃ laṅkāṃ bhrātṛbhiḥ sabalānugaiḥ || 7.11.49 ||
dhanadena parityaktāṃ suvibhaktamahāpathām |āruroha sa devāriḥ svargaṃ devādhipo yathā || 7.11.50 ||
sa cābhiṣiktaḥ kṣaṇadācaraistadā niveśayāmāsa purīṃ daśānanaḥ |nikāmapūrṇā ca babhūva sā purī niśācarairnīlabalāhakopamaiḥ || 7.11.51 ||
dhaneśvarastvatha pitṛvākyagauravānnyaveśayacchaśivimale girau purīm |svalaṅkṛtairbhavanavarairvibhūṣitāṃ purandarasveva tadā 'marāvatīm || 7.11.52 ||
rākṣasendro 'bhiṣiktastu bhrātṛbhyāṃ sahitastadā |tataḥ pradānaṃ rākṣasyā bhaginyāḥ samacintayat || 7.12.1 ||
svasāraṃ kālakeyāya dānavendrāya rākṣasīm |dadau śūrpaṇakhāṃ nāma vidyujjihvāya nāmataḥ || 7.12.2 ||
atha dattvā svayaṃ rakṣo mṛgayāmaṭate sma tat |tatrāpaśyattato rāma mayaṃ nāma diteḥ sutam || 7.12.3 ||
kanyāsahāyaṃ taṃ dṛṣṭvā daśagrīvo niśācaraḥ |apṛcchatko bhavāneko nirmanuṣyamṛge vane |anayā mṛgaśāvākṣyā kimarthaṃ saha tiṣṭhasi || 7.12.4 ||
mayastathābravīdrāma pṛcchantaṃ taṃ niśācaram |śrūyatāṃ sarvamākhyāsye yathāvṛttamidaṃ mama || 7.12.5 ||
hemā nāmāpsarāstāta śrutapūrvā yadi tvayā |daivatairmama sā dattā paulomīva śatakratoḥ || 7.12.6 ||
tasyāṃ saktamanāstāta pañcavarṣaśatānyaham |sā ca daivatakāryeṇa trayodaśa samā gatāḥ || 7.12.7 ||
varṣaṃ caturdaśaṃ caiva tato hemamayaṃ puram |vajravaiḍūryacitraṃ ca māyayā nirmitaṃ mayā || 7.12.8 ||
tatrāhamavasaṃ dīnastayā hīnaḥ suduḥkhitaḥ || 7.12.9 ||
tasmātpurādduhitaraṃ gṛhītvā vanamāgataḥ |iyaṃ mamātmajā rājaṃstasyāḥ kukṣau vivardhitā || 7.12.10 ||
bhartāramanayā sārdhamasyāḥ prāpto 'smi mārgitum |kanyāpitṛtvaṃ duḥkhaṃ hi sarveṣāṃ mānakāṅkṣiṇām || 7.12.11 ||
kanyā hi dve kule nityaṃ saṃśaye sthāpya tiṣṭhati |putradvayaṃ mamāpyasyāṃ bhāryāyāṃ sambabhūva ha || 7.12.12 ||
māyāvī prathamastāta dundubhistadanantaraḥ |evaṃ te sarvamākhyātaṃ yāthātathyena pṛcchataḥ || 7.12.13 ||
tvāmidānīṃ kathaṃ tāta jānīyāṃ ko bhavāniti |evamuktastu tadrakṣo vinītamidamabravīt || 7.12.14 ||
ahaṃ paulastyatanayo daśagrīvaśca nāmataḥ |munerviśravaso yastu tṛtīyo brahmaṇo 'bhavat || 7.12.15 ||
evamuktastadā rāma rākṣasendreṇa dānavaḥ |maharṣestanayaṃ jñātvā mayo harṣamupāgataḥ |dātuṃ duhitaraṃ tasmai rocayāmāsa yatra vai || 7.12.16 ||
kareṇa tu karaṃ tasyā grāhayitvā mayastadā |prahasanprāha daityendro rākṣasendramidaṃ vacaḥ || 7.12.17 ||
iyaṃ mamātmajā rājanhemayā 'psarasā dhṛtā |kanyā mandodarī nāma patnyarthaṃ pratigṛhyatām || 7.12.18 ||
bāḍhamityeva taṃ rāma daśagrīvo 'bhyabhāṣata |prajcālya tatra caivāgnimakarotpāṇisaṅgraham || 7.12.19 ||
sa hi tasya mayo rāma śāpābhijñastapodhanāt |viditvā tena sā dattā tasya paitāmahaṃ kulam || 7.12.20 ||
amoghāṃ tasya śaktiṃ ca pradadau paramādbhutām |pareṇa tapasā labdhāṃ jaghnivā~llakṣmaṇaṃ yayā || 7.12.21 ||
evaṃ sīkṛtadāro vai laṅkāyā īśvaraḥ prabhuḥ |gatvā tu nagarīṃ bhārye bhrātṛbhyāṃ samupāharat || 7.12.22 ||
vairocanasya dauhitrīṃ vajrajvāleti nāmataḥ |tāṃ bhāryāṃ kumbhakarṇasya rāvaṇaḥ samakalpayat || 7.12.23 ||
gandharvarājasya sutāṃ śailūṣasya mahātmanaḥ |saramāṃ nāma dharmajñāṃ lebhe bhāryāṃ vibhīṣaṇaḥ || 7.12.24 ||
tīre tu saraso vai tu sañjajñe mānasasya hi |sarastadā mānasaṃ tu vavṛdhe jaladāgame || 7.12.25 ||
mātrā tu tasyāḥ kanyāyāḥ snehenākranditaṃ vacaḥ |saro mā vardhayasveti tataḥ sā saramā 'bhavat || 7.12.26 ||
evaṃ te kṛtadārā vai remire tatra rākṣasāḥ |svāṃ svāṃ bhāryāmupāgamya gandharvā iva nandane || 7.12.27 ||
tato mandodarī putraṃ meghanādamajījanat |sa eṣa indrajinnāma yuṣmābhirabhidhīyate || 7.12.28 ||
jātamātreṇa hi purā tena rāvaṇasūnunā |rudatā sumahānmukto nādo jaladharopamaḥ || 7.12.29 ||
jaḍīkṛtā ca sā laṅkā tasya nādena rāghava |pitā tasyākaronnāma meghanāda iti svayam || 7.12.30 ||
so 'vardhata tadā rāma rāvaṇāntaḥpure śubhe |rakṣyamāṇo varastrībhiśchannaḥ kāṣṭhairivānalaḥ || 7.12.31 ||
mātāpitrormahāharṣaṃ janayanrāvaṇātmajaḥ || 7.12.32 ||
atha lokeśvarotsṛṣṭā tatra kālena kenacit |nidrā samabhavattīvrā kumbhakarṇasya rūpiṇī || 7.13.1 ||
tato bhrātaramāsīnaṃ kumbhakarṇo 'bravīdvacaḥ |nidrā māṃ bādhate rājankārayasva mamālayam || 7.13.2 ||
viniyuktāstato rājñā śilpino viśvakarmavat |vistīrṇaṃ yojanaṃ śubhraṃ tato dviguṇamāyatam || 7.13.3 ||
darśanīyaṃ nirābādhaṃ kumbhakarṇasya cakrire |sphāṭikaiḥ kāñcanaiścitraiḥ stambhaiḥ sarvatra śobhitam || 7.13.4 ||
vaiḍūryakṛtasopānaṃ kiṅkiṇījālakaṃ tathā |dāntatoraṇavinyastaṃ vajrasphaṭikavedikam || 7.13.5 ||
manoharaṃ sarvasukhaṃ kārayāmāsa rākṣasaḥ |sarvatra sukhadaṃ nityaṃ meroḥ puṇyāṃ guhāmiva || 7.13.6 ||
tatra nidrāṃ samāviṣṭaḥ kumbhakarṇo mahābalaḥ |bahūnyabdasahasrāṇi śayāno na prabuddhyate || 7.13.7 ||
nidrābhibhūte tu tadā kumbhakarṇe daśānanaḥ |devarṣiyakṣagandharvānsañjaghne hi niraṅkuśaḥ || 7.13.8 ||
udyānāni ca citrāṇi nandanādīni yāni ca |tāni gatvā susaṅakruddho bhinatti sma daśānanaḥ || 7.13.9 ||
nadīṃ gaja iva krīḍanvṛkṣānvāyuriva kṣipan |nagānvrajra ivotsṛṣṭo vidhvaṃsayati rākṣasaḥ || 7.13.10 ||
tathāvṛttaṃ tu vijñāya daśagrīvaṃ dhaneśvaraḥ |kulānurūpaṃ dharmajño vṛttaṃ saṃsmṛtya cātmanaḥ || 7.13.11 ||
saubhrātradarśanārthaṃ tu dūtaṃ vaiśravaṇastadā |laṅkāṃ sampreṣayāmāsa daśagrīvasya vai hitam || 7.13.12 ||
sa gatvā nagarīṃ laṅkāmāsasāda vibhīṣaṇam |mānitastena dharmeṇa pṛṣṭaścāgamanaṃ prati || 7.13.13 ||
pṛṣṭvā ca kuśalaṃ rājño jñātīnāṃ ca bibhīṣaṇaḥ |sabhāyāṃ darśayāmāsa tamāsīnaṃ daśānanam || 7.13.14 ||
sa dṛṣṭvā tatra rājānaṃ dīpyamānaṃ svatejasā |jayeti vācā sampūjya tūṣṇīṃ samabhivartata || 7.13.15 ||
taṃ tatrottamaparyaṅke varāstaraṇaśobhite |upaviṣṭaṃ daśagrīvaṃ dūto vākyamathābravīt || 7.13.16 ||
rājanvadāmi te sarvaṃ bhrātā tava yadabravīt |ubhayoḥ sadṛśaṃ vīra vṛttasya ca kulasya ca || 7.13.17 ||
sādhu paryāptametāvatkṛtaścāritrasaṅgrahaḥ |sādhu dharme vyavasthānaṃ kriyatāṃ yadi śakyate || 7.13.18 ||
dṛṣṭaṃ me nandanaṃ bhagnamṛṣayo nihatāḥ śrutāḥ |devatānāṃ samudyogastvatto rājanmama śrutaḥ || 7.13.19 ||
nirākṛtaśca bahuśastvayā 'haṃ rākṣasādhipa |aparāddhā hi bālyācca ramaṇīyāḥ svabāndhavāḥ || 7.13.20 ||
ahaṃ tu himavatpṛṣṭhaṃ gato dharmamupāsitum |raudraṃ vrattaṃ samāsthāya niyato niyatendriyaḥ || 7.13.21 ||
tatra devo mayā dṛṣṭaḥ saha devyā mayā prabhuḥ |savyaṃ cakṣurmayā daivāttatra devyāṃ nipātitam || 7.13.22 ||
kā nviyaṃ syāditi śubhā na khalvanyena hetunā |rūpaṃ hyanupamaṃ kṛtvā rudrāṇī tatra tiṣṭhati || 7.13.23 ||
devyā divyaprabhāveṇa dagdhaṃ savyaṃ mamekṣaṇam |reṇudhvastamiva jyotiḥ piṅgulatvamupāgatam || 7.13.24 ||
tato 'hamanyadvistīrṇaṃ gatvā tasya girestaṭam |tūṣṇīṃ varṣaśatānyaṣṭau samādhāraṃ mahāvratam || 7.13.25 ||
samāpte niyame tasmiṃstatra devo maheśvaraḥ |prītaḥ prītena manasā prāha vākyamidaṃ prabhuḥ || 7.13.26 ||
paiṅgalyaṃ yadavāptaṃ hi devyā rūpanirīkṣaṇāt |prīto 'smi tava dharmajña tapasā nena suvrata || 7.13.27 ||
mayā caitadvrataṃ cīrṇaṃ tvayā caiva dhanādhipa |tṛtīyaḥ puruṣo nāsti yaścarevratamīdṛśam || 7.13.28 ||
vrataṃ suniścayaṃ hyetanmayā hyutpāditaṃ purā |tatsakhitvaṃ mayā saumya rocayasva dhaneśvara || 7.13.29 ||
tapasā nirjitaścaiva sakhā bhava mamānagha |devyā dagdhaṃ prabhāveṇa yacca savyaṃ tavekṣaṇam || 7.13.30 ||
ekākṣipiṅgaletyeva nāma sthāsyati śāśvatam |evaṃ tena sakhitvaṃ ca prāpyānujñāṃ ca śaṅkarāt || 7.13.31 ||
āgatya ca śruto 'yaṃ me tava pāpaviniścayaḥ || 7.13.32 ||
tadadharmiṣṭhasaṃyogānnivarta kuladūṣaṇāt |cintyate hi vadhopāyaḥ sarṣisaṅghaiḥ suraistava || 7.13.33 ||
evamukto daśagrīvaḥ kruddhasaṃraktalocanaḥ |hastau dantāṃśca sampīḍya vākyametaduvāca ha || 7.13.34 ||
vijñātaṃ te mayā dūta vākyaṃ yasya prabhāṣase |naitattvamasi naivāsau bhrātrā yenāsi coditaḥ || 7.13.35 ||
hitaṃ naiṣa mamaitaddhi bravīti dhanarakṣakaḥ |maheśvarasakhitvaṃ tu mūḍha śrāvayate kila || 7.13.36 ||
na cedaṃ kṣamaṇīyaṃ me yadetadbhāṣitaṃ tvayā |yadetāvanmayā kālaṃ dūta tasya tu marṣitam || 7.13.37 ||
na hantavyo gururjyeṣṭho mayā 'yamiti manyate |tasya tvidānīṃ śrutvā me vākyameṣā kṛtā matiḥ || 7.13.38 ||
trī~llokānapi jeṣyāmi bāhuvīryamupāśritaḥ || 7.13.39 ||
etanmuhūrtamevāhaṃ tasyaikasya tu vai kṛte |caturo lokapālāṃstānnayiṣyāmi yamakṣayam || 7.13.40 ||
evamuktvā tu laṅkeśo dūtaṃ khaḍgena jaghnivān |dadau bhakṣayituṃ hyenaṃ rākṣasānāṃ durātmanām || 7.13.41 ||
evaṃ kṛtasvastyayano rathamāruhya rāvaṇaḥ |trailokyavijayākāṅkṣī yayau yatra dhaneśvaraḥ || 7.13.42 ||
tatastu sacivaiḥ sārdhaṃ ṣaḍbhirnityaṃ baloddhataiḥ |mahodaraprahastābhyāṃ mārīcaśukasāraṇaiḥ || 7.14.1 ||
dhūmrākṣeṇa ca vīreṇa nityaṃ samaragṛdhnunā |vṛtaḥ saṃprayayau śrīmānkrodhāllokāndahanniva || 7.14.2 ||
purāṇi sa nadīḥ śailānvanānyupavanāni ca |atikramya muhūrtena kailāsaṃ girimāgamat || 7.14.3 ||
sanniviṣṭaṃ girau tasminrākṣasendraṃ niśamya tu |yuddhe 'tyarthakṛtotsāhaṃ durātmānaṃ samantriṇam || 7.14.4 ||
yakṣā na śekuḥ saṃsthātuṃ pramukhe tasya rakṣasaḥ |rājño bhrāteti vijñāya gatā yatra dhaneśvaraḥ || 7.14.5 ||
te gatvā sarvamācakhyurbhrātustasya cikīrṣitam |anujñātā yayurhaṣṭā yuddhāya dhanadena te || 7.14.6 ||
tato balānāṃ saṅkṣobho vyavardhata mahodadheḥ |tasya nairṛtarājasya śailaṃ sañcālayanniva || 7.14.7 ||
tato yuddhaṃ samabhavadyakṣarākṣasasaṅkulam |vyathitāścābhavaṃstatra sacivā rākṣasasya te || 7.14.8 ||
sa dṛṣṭvā tādṛśaṃ sainyaṃ daśagrīvo niśācaraḥ |harṣanādānbahūnkṛtvā sa krodhādabhyadhāvata || 7.14.9 ||
ye tu te rākṣasendrasya sacivā ghoravikramāḥ |teṣāṃ sahasramekaikaṃ yakṣāṇāṃ samayodhayan || 7.14.10 ||
tato gadābhirmusalairasibhiḥ śaktitomaraiḥ |hanyamāno daśagrīvastatsainyaṃ samagāhata || 7.14.11 ||
sa nirucchvāsavattatra vadhyamāno daśānanaḥ |varṣadbhiriva jīmūtairdhārābhiravarudhyata || 7.14.12 ||
na cakāra vyathāṃ caiva yakṣaśastraiḥ samāhataḥ |mahīdhara ivāmbhodairdhārāśatasamukṣitaḥ || 7.14.13 ||
sa durātmā samudyamya kāladaṇḍopamāṃ gadām |praviveśa tataḥ sainyaṃ nayanyakṣānyamakṣayam || 7.14.14 ||
sa kakṣamiva vistīrṇaṃ śuṣkendhanamivākulam |vātenāgnirivāyatto yakṣasainyaṃ dadāha tat || 7.14.15 ||
taistu tatra mahāmātyairmahodaraśukādibhiḥ |alpāvaśeṣāste yakṣāḥ kṛtā vātairivāmbudāḥ || 7.14.16 ||
kecitsamāhatā bhagnāḥ patitāḥ samarakṣitau |oṣṭhāṃśca daśanaistīkṣṇairadaśankupitā raṇe || 7.14.17 ||
śrāntāścānyonyamāliṅgya bhraṣṭaśastrā raṇājire |sīdanti ca tadā yakṣāḥ kūlā iva jalena ha || 7.14.18 ||
hatānāṃ gacchatāṃ svargaṃ yudhyatāṃ pṛthivītale |prekṣatāmṛṣisaṅghānāṃ na babhūvāntaraṃ divi || 7.14.19 ||
bhagnāṃstu tānsamālakṣya yakṣendrāṃstu mahābalān |dhanādhyakṣo mahābāhuḥ preṣayāmāsa yakṣakān || 7.14.20 ||
etasminnantare rāma vistīrṇabalavāhanaḥ |preṣito nyapatadyakṣo nāmnā saṃyodhakaṇṭakaḥ || 7.14.21 ||
tena cakreṇa mārīco viṣṇuneva raṇe hataḥ |patito bhūtale śailātkṣīṇapuṇya iva grahaḥ || 7.14.22 ||
sasañjñastu muhūrtena sa viśramya niśācaraḥ |taṃ yakṣaṃ yodhayāmāsa sa ca bhagnaḥ pradudruve || 7.14.23 ||
tataḥ kāñcanacitrāṅgaṃ vaiḍūryarajasokṣitam |maryādāṃ pratihārāṇāṃ toraṇāntaramāviśat || 7.14.24 ||
taṃ tu rājandaśagrīvaṃ praviśantaṃ niśācaram |sūryabhānuriti khyāto dvārapālo nyavārayat || 7.14.25 ||
sa vāryamāṇo yakṣeṇa praviveśa niśācaraḥ |yadā tu vārito rāma na vyatiṣṭhatsa rākṣasaḥ || 7.14.26 ||
tatastoraṇamutpāṭya tena yakṣeṇa tāḍitaḥ |rudhiraṃ prasravanbhāti śailo dhātusravairiva || 7.14.27 ||
sa śailaśikharābheṇa toraṇena samāhataḥ |jagāma na kṣatiṃ vīro varadānātsvayambhuvaḥ || 7.14.28 ||
tenaiva toraṇenātha yakṣastenābhitāḍitaḥ |nādṛśyata tadā yakṣo bhasmīkṛtatanustadā || 7.14.29 ||
tataḥ pradudruvuḥ sarve dṛṣṭvā rakṣaḥparākramam |tato nadīrguhāścaiva viviśurbhayapīḍitāḥ |tyaktapraharaṇāḥ śrāntā vivarṇavadanāstadā || 7.14.30 ||
tatastā~llakṣya vitrastānyakṣendrāṃśca sahasraśaḥ |dhanādhyakṣo mahāyakṣaṃ māṇicāramathābravīt || 7.15.1 ||
rāvaṇaṃ jahi yakṣendra durvṛttaṃ pāpacetasam |śaraṇaṃ bhava vīrāṇāṃ yakṣāṇāṃ yuddhaśālinām || 7.15.2 ||
evamukto mahābāhurmāṇibhadraḥ sudurjayaḥ |vṛto yakṣasahasraistu caturbhiḥ samayodhayat || 7.15.3 ||
te gadāmusalaprāsaiḥ śaktitomaramudgaraiḥ |abhighnantastadā yakṣā rākṣasānsamupādravan || 7.15.4 ||
kurvantastumulaṃ yuddhaṃ carantaḥ śyenavallaghu |bāḍhaṃ prayacchannecchāmi dīyatāmiti bhāṣiṇaḥ || 7.15.5 ||
tato devāḥ sagandharvā ṛṣayo brahmavādinaḥ |dṛṣṭvā tattumulaṃ yuddhaṃ paraṃ vismayamāgaman || 7.15.6 ||
yakṣāṇāṃ tu prahastena sahasraṃ nihataṃ raṇe |mahodareṇa cānindyaṃ sahasramaparaṃ hatam || 7.15.7 ||
kruddhena ca tadā rājanmārīcena yuyutsunā |nimeṣāntaramātreṇa dve sahasre nipātite || 7.15.8 ||
kva ca yakṣārjavaṃ yuddhaṃ kva ca māyābalāśrayam |rakṣasāṃ puruṣavyāghra tena te 'bhyadhikā yudhi || 7.15.9 ||
dhūmrākṣeṇa samāgamya māṇibhadro mahāraṇe |musalenorasi krodhāttaḍito na ca kampitaḥ || 7.15.10 ||
tato gadāṃ samāvidhya māṇibhadreṇa rākṣasaḥ |dhūmrākṣastāḍito mūrdhni vihvalaḥ sa papāta ha || 7.15.11 ||
dhūmrākṣaṃ tāḍitaṃ dṛṣṭvā patitaṃ śoṇitokṣitam |abhyadhāvata saṅgrāme māṇibhadraṃ daśānanaḥ || 7.15.12 ||
taṃ kruddhamabhidhāvantaṃ māṇibhadro daśānanam |śaktibhistāḍayāmāsa tisṛbhiryakṣapuṅgavaḥ || 7.15.13 ||
tāḍito māṇibhadrasya mukuṭe prāharadraṇe |tasya tena prahārema mukuṭaṃ pārśvamāgatam || 7.15.14 ||
tataḥ saṃyudhyamānena viṣṭabdho na vyakampata |tadāprabhṛti yakṣo 'sau pārśvamauliriti smṛtaḥ |sannādaḥ sumahānrājaṃstasminśaile 'bhyavartata || 7.15.15 ||
tato dūrātpradadṛśe dhanādhyakṣo gadādharaḥ |śukraprauṣṭhapadābhyāṃ ca padmaśaṅkhasamāvṛtaḥ || 7.15.16 ||
sa dṛṣṭvā bhrātaraṃ saṅkhye śāpādvibhraṣṭagauravam |uvāca vacanaṃ dhīmānyuktaṃ paitāmahe kule || 7.15.17 ||
yanmayā vāryamāṇastvaṃ nāvagacchasi durmate |paścādasya phalaṃ prāpya jñāsyase nirayaṃ gataḥ || 7.15.18 ||
yo hi mohādviṣaṃ pītvā nāvagacchati durmatiḥ |sa tasya pariṇāmānte jānīte karmaṇaḥ phalam || 7.15.19 ||
devatā nābhinandanti dharmayuktena kenacit |yena tvamīdṛśaṃ bhāvaṃ nītassannāvabuddhyase || 7.15.20 ||
mātaraṃ pitaraṃ yo hi ācāryaṃ cāvamanyate |sa paśyati phalaṃ tasya pretarājavaśaṃ gataḥ || 7.15.21 ||
adhruve hi śarīre yo na karoti taporjanam |sa paścāttapyate mūḍho mṛto dṛṣṭvā ' 'tmano gatim || 7.15.22 ||
dharmādrājyaṃ dhanaṃ saukhyamadharmādduḥkhameva ca |tasmāddharmaṃ sukhārthāya kuryātpāpaṃ visarjayet || 7.15.23 ||
pāpasya hi phalaṃ duḥkhaṃ tadbhoktavyamihātmanā |tasmādātmāpaghātārthaṃ mūḍhaḥ pāpaṃ kariṣyati || 7.15.24 ||
kasya cinna hi durbuddheśchandato jāyate matiḥ |devaṃ ceṣṭayate sarvaṃ hato daivena hanyate |yādṛśaṃ kurute karma tādṛśaṃ phalamaśnute || 7.15.25 ||
buddhirūpaṃ phalaṃ putrāñchauryaṃ dhīratvameva ca |prāpnuvanti narā loke nirjitaṃ puṇyakarmabhiḥ || 7.15.26 ||
evaṃ nirayagāmī tvaṃ yasya te matirīdṛśī |na tvāṃ samabhibhāṣiṣye 'sadvṛtteṣveva nirṇayaḥ || 7.15.27 ||
evamuktāstatastena tasyāmātyāḥ samāhatāḥ |mārīcapramukhāḥ sarve vimukhā vipradudruvuḥ || 7.15.28 ||
tatastena daśagrīvo yakṣendreṇa mahātmanā |gadayābhihato mūrdhni na ca sthānātprakampitaḥ || 7.15.29 ||
tatastau rāma nighnantau tadānyonyaṃ mahāmṛdhe |na vihvalau na ca śrāntau babhūvaturamarṣaṇau || 7.15.30 ||
āgneyamastraṃ tasmai sa mumoca dhanadastadā |rākṣasendro vāruṇena tadastraṃ pratyavārayat || 7.15.31 ||
tato māyāṃ praviṣṭo 'sau rākṣasīṃ rākṣaseśvaraḥ |rūpāṇāṃ śatasāhasraṃ vināśāya cakāra ca || 7.15.32 ||
vyāghro varāho jīmūtaḥ parvataḥ sāgaro drumaḥ |yakṣo daityasvarūpī ca so 'dṛśyata daśānanaḥ || 7.15.33 ||
bahūni ca karoti sma dṛśyante na tvasau tataḥ |pratigṛhya tato rāma mahadastraṃ daśānanaḥ || 7.15.34 ||
jaghāna mūrdhni dhanadaṃ vyāviddhya mahatīṃ gadām |evaṃ sa tenābhihato vihvalaḥ śoṇitokṣitaḥ || 7.15.35 ||
kṛttamūla ivāśoko nipapāta dhanādhipaḥ || 7.15.36 ||
tataḥ padmādibhistatra nidhibhiḥ sa tadā vṛtaḥ |dhanadocchvāsitastaistu vanamānīya nandanam || 7.15.37 ||
nirjitya rākṣasendrastaṃ dhanadaṃ hṛṣṭamānasaḥ |puṣpakaṃ tasya jagrāha vimānaṃ jayalakṣaṇam || 7.15.38 ||
kāñcanastambhasaṃvītaṃ vaiḍūryamaṇitoraṇam |muktājālapraticchannaṃ sarvakāmaphaladrumam || 7.15.39 ||
manojavaṃ kāmagamaṃ kāmarūpaṃ vihaṅgamam |maṇikāñcanasopānaṃ taptakāñcanavedikam || 7.15.40 ||
devopavāhyamakṣayyaṃ sadādṛṣṭimanaḥsukham |bahvāścaryaṃ bhakticitraṃ brahmaṇā parinirmitam || 7.15.41 ||
nirmitaṃ sarvakāmaistu manoharamanuttamam |na tu śītaṃ na coṣṇaṃ ca sarvartusukhadaṃ śubham || 7.15.42 ||
sa taṃ rājā samāruhya kāmagaṃ vīryanirjitam |jitaṃ tribhuvanaṃ mene darpotsekātsudurmatiḥ || 7.15.43 ||
jitvā vaiśravaṇaṃ devaṃ kailāsātsamavātarat || 7.15.44 ||
svatejasā vipulamavāpya taṃ jayaṃ pratāpavānvimalakirīṭahāravān |rarāja vai paramavimānamāsthito niśācaraḥ sadasi gato yathānalaḥ || 7.15.45 ||
sa jitvā dhanadaṃ rāma bhrātaraṃ rākṣasādhipaḥ |mahāsenaprasūtiṃ tadyayau śaravaṇaṃ mahat || 7.16.1 ||
athāpaśyadṛśagrīvo raukmaṃ śaravaṇaṃ mahat |gabhastijālasaṃvītaṃ dvitīyamiva bhāskaram || 7.16.2 ||
sa parvataṃ samāruhya kañcidramyavanāntaram |apaśyat puṣpakaṃ tatra rāmaviṣṭambhitaṃ tadā || 7.16.3 ||
viṣṭabdhaṃ puṣpakaṃ dṛṣṭvā hyagamaṃ kāmāgaṃ kṛtam |acintayadrākṣasendraḥ sacivaistaiḥ samāvṛtaḥ || 7.16.4 ||
kinnimittaṃ cecchayā me nedaṃ gacchati puṣpakam |parvatasyopariṣṭhasya karmedaṃ kasyacidbhavet || 7.16.5 ||
tato 'bravīttadā rāma mārīco buddhikovidaḥ |nedaṃ niṣkāraṇaṃ rājanpuṣpakaṃ yanna gacchati || 7.16.6 ||
athavā puṣpakamidaṃ dhanadānnānyavāhanam |ato niṣpandamabhavaddhanādhyakṣavinākṛtam || 7.16.7 ||
iti vākyāntare tasya karālaḥ kṛṣṇapiṅgalaḥ |vāmano vikaṭo muṇḍī nandī prahvabhujo balī || 7.16.8 ||
tataḥ pārśvamupāgamya bhavasyānucaro 'bravīt |nandīśvaro vacaścedaṃ rākṣasendramaśaṅkitaḥ || 7.16.9 ||
nivartasva daśagrīva śaile krīḍati śaṅkaraḥ |suparṇanāgayakṣāṇāṃ devagandharvarakṣasām || 7.16.10 ||
sarveṣāmeva bhūtānāmagamyaḥ parvataḥ kṛtaḥ |iti nandivacaḥ śrutvā krodhātkampitakuṇḍalaḥ || 7.16.11 ||
roṣāttu tāmranayanaḥ puṣpakādavaruhya saḥ |ko 'yaṃ śaṅkara ityuktvā śailamūlamupāgataḥ || 7.16.12 ||
so 'paśyannandinaṃ tatra devasyādūrataḥ sthitam |dīptaṃ śūlamavaṣṭabhya dvitīyamiva śaṅkaram || 7.16.13 ||
taṃ dṛṣṭvā vānaramukhamavajñāya sa rākṣasaḥ |prahāsaṃ mumuce tatra satoya iva toyadaḥ || 7.16.14 ||
taṃ kruddho bhagavānnandī śaṅkarasyāparā tanuḥ |abravīttatra tadrakṣo daśānanamupasthitam || 7.16.15 ||
yasmādvānararūpaṃ māmavajñāya daśānana |aśanīpātasaṅkāśamapahāsaṃ pramuktavān || 7.16.16 ||
tasmānmadrūpasampannā madvīryasamatejasaḥ |utpatsyanti vadhārthaṃ hi kulasya tava vānarāḥ || 7.16.17 ||
nakhadaṃṣṭrāyudhāḥ krūrā manaḥsampātaraṃhasaḥ |yuddhonmattā balodriktāḥ śailā iva visarpiṇaḥ || 7.16.18 ||
te tava prabalaṃ darpamutsedhaṃ ca pṛthagvidham |vyapaneṣyanti sambhūya sahāmātyasutasya ca || 7.16.19 ||
kiṃ tvidānīṃ mayā śakyaṃ hantuṃ tvāṃ he niśācara |na hantavyo hatastvaṃ hi pūrvameva svakarmabhiḥ || 7.16.20 ||
ityudīritavākye tu deve tasminmahātmani |devadundubhayo neduḥ puṣpavṛṣṭiśca khāccyutā || 7.16.21 ||
acintayitvā sa tadā nandivākyaṃ mahābalaḥ |parvataṃ tu samāsādya vākyamāha daśānanaḥ || 7.16.22 ||
puṣpakasya gatiśchinnā yatkṛte mama gacchataḥ |tamimaṃ śailamunmūlaṃ karomi tava gopate || 7.16.23 ||
kena prabhāveṇa bhavo nityaṃ krīḍati rājavat |vijñātavyaṃ na jānīte bhayasthānamupasthitam || 7.16.24 ||
evamuktvā tato rāma bhujānvikṣipya parvate |tolayāmāsa taṃ śīghraṃ sa śailaṃ samakampata || 7.16.25 ||
cālanātparvatasyaiva gaṇā devasya kampitāḥ |cacāla pārvatī cāpi tadā ' 'śliṣṭā maheśvaram || 7.16.26 ||
tato rāma mahādavo devānāṃ pravaro haraḥ |pādāṅguṣṭhena taṃ śailaṃ pīḍayāmāsa līlayā || 7.16.27 ||
pīḍitāstu tatastasya śailasyādhogatā bhujāḥ |vismitāścābhavaṃstatra sacivāstasya rakṣasaḥ || 7.16.28 ||
rakṣasā tena roṣācca bhujānāṃ pīḍanāttadā |mukto virāvaḥ sahasā trailokyaṃ yena kampitam || 7.16.29 ||
menire vajraniṣpeṣaṃ tasyāmātyā yugakṣaye |tadā vartmasthacalitā devā indrapurogamāḥ || 7.16.30 ||
samudrāścāpi saṅkṣubdhāścalitāścāpi parvatāḥ |yakṣā vidyādharāḥ siddhāḥ kimetaditi cābruvan || 7.16.31 ||
atha te mantriṇastasya vikrośantamathābruvan |toṣayasva mahādevaṃ nīlakaṇṭhamumāpatim || 7.16.32 ||
tamṛte śaraṇaṃ nānyaṃ paśyāmo 'tra daśānana |stutibhiḥ praṇato bhūtvā tameva śaraṇaṃ vraja || 7.16.33 ||
kṛpāluḥ śaṅkarastuṣṭaḥ prasādaṃ te vidhāsyati |evamuktastadāmātyaistuṣṭāva vṛṣabhadhvajam || 7.16.34 ||
sāmabhirvividhaiḥ stotraiḥ praṇamya sa daśānanaḥ |saṃvatsarasahasraṃ tu rudato rakṣaso gatam || 7.16.35 ||
tataḥ prīto mahādevaḥ śailāgre viṣṭhitaḥ prabhuḥ |muktvā cāsya bhujānrāma prāha vākyaṃ daśānanam || 7.16.36 ||
prīto 'smi tava vīryasya śauṇḍāryācca daśānana |śailākrāntena yo muktastvayā rāvaḥ sudāruṇaḥ || 7.16.37 ||
yasmāllokatrayaṃ caitadrāvitaṃ bhayamāgatam |tasmāttvaṃ rāvaṇo nāma nāmnā rājanbhaviṣyasi || 7.16.38 ||
devatā mānuṣā yakṣā ye cānye jagatītale |evaṃ tvāmabhidhāsyanti rāvaṇaṃ lokarāvaṇam || 7.16.39 ||
gaccha paulastya visrabdhaṃ pathā yena tvamicchasi |mayā caivābhyanujñāto rākṣasādhipa gamyatām || 7.16.40 ||
evamuktastu laṅkeśaḥ śambhunā svayamabravīt |prīto yadi mahādeva varaṃ me dehi yācataḥ || 7.16.41 ||
avadhyatvaṃ mayā prāptaṃ devagandharvadānavaiḥ |rākṣasairguhyakairnāgairye cānye balavattarāḥ || 7.16.42 ||
mānuṣānna gaṇe deva svalpāste mama sammatāḥ |dīrghamāyuśca me prāptaṃ brahmaṇastripurāntaka || 7.16.43 ||
vāñchitaṃ cāyuṣaḥ śeṣaṃ śastraṃ tvaṃ ca prayaccha me |evamuktastatastena rāvaṇena sa śaṅkaraḥ || 7.16.44 ||
dadau khaḍgaṃ mahādīptaṃ candrahāsamiti śrutam |āyuṣaścāvaśeṣaṃ ca sthitvā bhūtapatistadā || 7.16.45 ||
dattvovāca tataḥ śambhurnāvajñeyamidaṃ tvayā |avajñātaṃ yadi hi te māmevaiṣyatyasaṃśayaḥ || 7.16.46 ||
evaṃ maheśvareṇaiva kṛtanāmā sa rāvaṇaḥ |abhivādya mahādevamārurohātha puṣpakam || 7.16.47 ||
tato mahītale rāma paryakrāmata rāvaṇaḥ |kṣatऺitrayānsumahāvīryānbādhamāna itastataḥ || 7.16.48 ||
kecittejasvinaḥ śūrāḥ kṣatऺitrayā yuddhadurmadāḥ |tacchāsanamakurvanto vineśuḥ saparicchadāḥ || 7.16.49 ||
apare durjayaṃ rakṣo jānantaḥ prājñasammatāḥ |jitāḥ sma ityabhāṣanta rākṣasaṃ baladarpitam || 7.16.50 ||
atha rājanmahābāhurvicaransa mahītale |himavadvanamāsādya paricakrāma rāvaṇaḥ || 7.17.1 ||
tatrāpaśyatsa vai kanyāṃ kṛṣṇājinajaṭādharām |ārṣeṇa vidhinā yuktāṃ dīpyantīṃ devatāmiva || 7.17.2 ||
sa dṛṣṭvā rūpasampannāṃ kanyāṃ tāṃ sumahāvratām |kāmamohaparītātmā papraccha prahasanniva || 7.17.3 ||
kimidaṃ vartase bhadre viruddhaṃ yauvanasya te |nahi yuktā tavaitasya rūpasyaiva pratikriyā || 7.17.4 ||rūpaṃ te 'nupamaṃ bhīru kāmonmādakaraṃ nṛṇām |na yuktaṃ tapasi sthātuṃ nirgato hyeṣa nirṇayaḥ || 7.17.5 ||
kasyāsi kimidaṃ bhadre kaśca bhartā varānane |yena sambhujyase bhīru sa naraḥ puṇyabhāgbhuvi || 7.17.6 ||
pṛcchataḥ śaṃsa me sarvaṃ kasya hetoḥ pariśramaḥ |evamuktā tu sā kanyā rāvaṇena yaśasvinī || 7.17.7 ||
abravīdvidhivatkṛtvā tasyātithyaṃ tapodhanā |kuśadhvajo mama pitā brahmarṣiramitaprabhaḥ |bṛhaspatisutaḥ śrīmānbuddhyā tulyo bṛhaspateḥ || 7.17.8 ||
tasyāhaṃ kurvato nityaṃ vedābhyāsaṃ mahātmanaḥ |sambhūya vāṅmayī kanyā nāmnā vedavatī smṛtā || 7.17.9 ||
tato devāḥ sagandharvā yakṣarākṣasapannagāḥ |te 'pi gatvā hi pitaraṃ varaṇaṃ rocayanti me || 7.17.10 ||
na ca māṃ sa pitā tebhyo dattavānrākṣasarṣabha |kāraṇaṃ tadvadiṣyāmi niśācara niśāmaya || 7.17.11 ||
pitustu mama jāmātā viṣṇuḥ kila sureśvaraḥ |abhipretastrilokeśastasmānnānyasya me pitā || 7.17.12 ||
dātumicchati tasmai tu tacchrutvā baladarpitaḥ |dambhurnāma tato rājā daityānāṃ kupito 'bhavat || 7.17.13 ||
tena rātrau śayāno me pitā pāpena hiṃsitaḥ || 7.17.14 ||
tato me jananī dīnā taccharīraṃ piturmama |pariṣvajya mahābhāgā praviṣṭā havyavāhanam || 7.17.15 ||
tato manorathaṃ satyaṃ piturnārāyaṇaṃ prati |karomīti tamevāhaṃ hṛdayena samudvahe || 7.17.16 ||
iti pratijñāmāruhya carāmi vipulaṃ tapaḥ |etatte sarvamākhyātaṃ mayā rākṣasapuṅgava || 7.17.17 ||
nārāyaṇo mama patirna tvanyaḥ puruṣottamāt |āśraye niyamaṃ ghoraṃ nārāyaṇaparīpsayā |vijñātastvaṃ hi me rājangaccha paulastyanandana || 7.17.18 ||
jānāmi tapasā sarvaṃ trailokye yaddhi vartate || 7.17.19 ||
so 'bravīdrāvaṇo bhūyastāṃ kanyāṃ sumahāvratām |avaruhya vimānāgrātkandarpaśarapīḍitaḥ || 7.17.20 ||
avaliptā 'si suśroṇi yasyāste matirīdṛśī |vṛddhānāṃ mṛgaśāvākṣi bhrājate puṇyasañcayaḥ || 7.17.21 ||
tvaṃ sarvaṃguṇasampannā nārhase vaktumīdṛśam |trailokyasundarī bhīru yauvanaṃ te nivartate || 7.17.22 ||
ahaṃ laṅkāpatirbhadre daśagrīva iti śrutaḥ |tasya me bhava bhāryā tvaṃ bhuṅkṣva bhogānyathāsukham || 7.17.23 ||
kaśca tāvadasau yaṃ tvaṃ viṣṇurityabhibhāṣase |vīryeṇa tapasā caiva bhogena ca balena ca ||
na mayā sa samo bhadre yaṃ tvaṃ kāmayase 'ṅgane || 7.17.24 ||
ityuktavati tasmiṃstu vedavatyatha sā 'bravīt || 7.17.25 ||aiva bhogena ca balena ca ||
mā maivamiti sā kanyā tamuvāca niśācaram |trailokyādhipati viṣṇuṃ sarvalokanamaskṛtam |tvadṛte rākṣasendrānyaḥ ko 'vamanyeta buddhimān || 7.17.26 ||
evamuktastayā tatra vedavatyā niśācaraḥ |mūrdhajeṣu tadā kanyāṃ karāgreṇa parāmṛśat || 7.17.27 ||
tato vedavatī kruddhā keśānhastena sā 'cchinat |asirbhūtvā karastasyāḥ keśāṃśchinnāṃstadā 'karot || 7.17.28 ||
sā jvalantīva roṣeṇa dahantīva niśācaram |uvācāgniṃ samādhāya maraṇāya kṛtatvarā || 7.17.29 ||
dharṣitāyāstvayānārya na me jīvitamiṣyate |rakṣastasmātpravekṣyāmi paśyataste hutāśanam || 7.17.30 ||
yasmāttu dharṣitā cāhaṃ tvayā pāpātmanā vane |tasmāttava vadhārthaṃ hi samutpatsye hyahaṃ punaḥ || 7.17.31 ||
na hi śakyaṃ striyā hantuṃ puruṣaḥ pāpaniścaḥ |śāpe tvayi mayotsṛṣṭe tapasaśca vyayo bhavet || 7.17.32 ||
yadi tvasti mayā kiñcitkṛtaṃ dattaṃ hutaṃ tathā |tasmāttvayonijā sādhvī bhaveyaṃ dharmiṇaḥ sutā || 7.17.33 ||
evamuktvā praviṣṭā sā jvalitaṃ jātavedasam |papāta ca divo divyā puṣpavṛṣṭiḥ samantataḥ || 7.17.34 ||
punareva samudbhūtā padme padmasamaprabhā |tasmādapi punaḥ prāptā pūrvavattena rakṣasā || 7.17.35 ||
kanyāṃ kamalagarbhābhāṃ pragṛhya svagṛhaṃ yayau |pragṛhya rāvaṇastvetāṃ darśayāmāsa mantriṇe || 7.17.36 ||
lakṣaṇajño nirīkṣyaiva rāvaṇaṃ caivamabravīt |gṛhasthaiṣāṃ hi suśroṇī tvadvadhāyaiva dṛśyate || 7.17.37 ||
etacchrutvā 'rṇave rāma tāṃ pracikṣepa rāvaṇaḥ |sā caiva kṣitimāsādya yajñāyatanamadhyagā || 7.17.38 ||
rājño halamukhotkṛṣṭā punarapyutthitā satī |saiṣā janakarājasya prasūtā tanayā prabho |tava bhāryā mahābāho viṣṇustvaṃ hi sanātanaḥ || 7.17.39 ||
pūrvaṃ krodhāhitaḥ śatruryayā 'sau nihatastathā |upāśrayitvā śailabhastava vīryamamānuṣam || 7.17.40 ||
evameṣā mahābhāgā martyeṣūtpatsyate punaḥ |kṣetre halamukhotkṛṣṭe vedyāmagniśikhopamā || 7.17.41 ||
eṣā vedavatī nāma pūrvamāsītkṛte yuge |tretāyugamanuprāpya vadhārthaṃ tasya rakṣasaḥ || 7.17.42 ||
utpannā maithilakule janakasya mahātmanaḥ |sītotpannā tu sīteti mānuṣaiḥ punarucyate || 7.17.43 ||
praviṣṭāyāṃ hutāśaṃ tu vedavatyāṃ sa rāvaṇaḥ |puṣpakaṃ tu samāruhya paricakrāma medinīm || 7.18.1 ||
tato maruttaṃ nṛpatiṃ yajantaṃ saha daivataiḥ |uśīrabījamāsādya dadarśa sa tu rāvaṇaḥ || 7.18.2 ||
saṃvarto nāma brahmarṣiḥ sākṣādbhrātā bṛhaspateḥ |yājayāmāsa dharmajñaḥ sarvairdevagaṇairvṛtaḥ || 7.18.3 ||
dṛṣṭvā devāstu tadrakṣo varadānena durjayam |tiryagyoniṃ samāviṣṭāstasya darśanabhīravaḥ || 7.18.4 ||
indro mayūraḥ saṃvṛtto dharmarājastu vāyasaḥ |kṛkalāso dhanādhyakṣo haṃsaśca varuṇo 'bhavat || 7.18.5 ||
anyeṣvapi gateṣvevaṃ deveṣvariniṣūdana |rāvaṇaḥ prāviśadyajñaṃ sārameya ivāśuciḥ || 7.18.6 ||
taṃ ca rājānamāsādya rāvaṇo rākṣasādhipaḥ |prāha yuddhaṃ prayaccheti nirjito 'smīti vā vada || 7.18.7 ||
tato marutto nṛpatiḥ ko bhavānityuvāca tam |apahāsaṃ tato muktvā rāvaṇo vākyamabravīt || 7.18.8 ||
akutūhalabhāvena prīto 'smi tava pārthiva |dhanadasyānujaṃ yo māṃ nāvagacchasi rāvaṇam || 7.18.9 ||
triṣu lokeṣu ko 'nyo 'sti yo na jānāti me balam |bhrātaraṃ yena nirjitya vimānamidamāhṛtam |tato maruttaḥ sa nṛpastaṃ rāvaṇamathābravīt || 7.18.10 ||
dhanyaḥ khalu bhavānyena jyeṣṭho bhrātā raṇe jitaḥ |na tvayā sadṛśaḥ ślādhyastriṣu lokeṣu vidyate || 7.18.11 ||
nādharmasahitaṃ ślādhyaṃ tallokaṃ pratisaṃhitam |karma daurātmyakaṃ kṛtvā ślāghyase bhrātṛnirjayāt || 7.18.12 ||
ka tvaṃ prākkevalaṃ dharmaṃ caritvā labdhavānvaram |śrūtapūrvaṃ hi na mayā bhāṣase yādṛśaṃ svayam || 7.18.13 ||
tiṣṭhedānīṃ na me jīvanpratiyāsyasi durmate |adya tvāṃ niśitairbāṇaiḥ preṣayāmi yamakṣayam || 7.18.14 ||
tataḥ śarāsanaṃ gṛhya sāyakāṃśca narādhipaḥ |raṇāya niryayau kruddhaḥ saṃvarto mārgamāvṛṇot || 7.18.15 ||
so 'bravītsnehasaṃyuktaṃ maruttaṃ taṃ mahānṛṣiḥ |śrotavyaṃ yadi madvākyaṃ samprahāro na te kṣamaḥ || 7.18.16 ||
māheśvaramidaṃ satramasamāptaṃ kulaṃ dahet || 7.18.17 ||
dīkṣitasya kuto yuddhaṃ krodhitvaṃ dīkṣite kutaḥ |saṃśayaśca jaye nityaṃ rākṣasaśca sudurjayaḥ || 7.18.18 ||
sa nivṛtto gurorvākyānmaruttaḥ pṛthivīpatiḥ |visṛjya saśaraṃ cāpaṃ svastho makhamukho 'bhavat || 7.18.19 ||
tatastaṃ nirjitaṃ matvā ghoṣayāmāsa vai śukaḥ |rāvaṇo jayatītyuccairharṣānnādaṃ vimuktavān || 7.18.20 ||
tānbhakṣayitvā tatrasthānmaharṣīnyajñamāgatān |vitṛpto rudhiraisteṣāṃ punaḥ samprayayau mahīm || 7.18.21 ||
rāvaṇe tu gate devāḥ sendrāścaiva divaukasaḥ |tataḥ svāṃ yonimāsādya tāni sattvāni cābruvan || 7.18.22 ||
harṣāttadābravīdindro mayūraṃ nīlabarhiṇam |prīto 'smi tava dharmajña bhujaṅgāddhi na te bhayam || 7.18.23 ||
idaṃ netrasahasraṃ tu yattvadbarhe bhaviṣyati |varṣamāṇe mayi mudaṃ prāpsyase prītilakṣaṇām |evamindro varaṃ prādānmayūrasya sureśvaraḥ || 7.18.24 ||
nīlāḥ kila purā barhā mayūrāṇāṃ narādhipa |surādhipādvaraṃ prāpya gatāḥ sarve 'pi barhiṇaḥ || 7.18.25 ||
dharmarājo 'bravīdrāma prāgvaṃśe vāyasaṃ sthitam |pakṣiṃstavāsmi suprītaḥ prītasya vacanaṃ śṛṇu || 7.18.26 ||
yathānye vividhai rogai; pīḍyante prāṇino mayā |te na te prabhaviṣyanti mayi prīte na saṃśayaḥ || 7.18.27 ||
mṛtyutaste bhayaṃ nāsti varānmama vihaṅgama |yāvattvāṃ na vadhiṣyanti narāstāvadbhaviṣyasi || 7.18.28 ||
ete madviṣayasthā vai mānavāḥ kṣudbhayārditāḥ |tvayi bhukte tu tṛptāste bhaviṣyanti sabāndhavāḥ || 7.18.29 ||
varuṇastvabravīddhaṃsaṃ gaṅgātoyavihāriṇam |śrūyatāṃ prītisaṃyuktaṃ vacaḥ patraratheśvara || 7.18.30 ||
varṇo manoharaḥ saumyaścandramaṇḍalasannibhaḥ |bhaviṣyati tavodagraḥ śuddhaphenasamaprabhaḥ || 7.18.31 ||
maccharīraṃ samāsādya kānto nityaṃ bhaviṣyasi |prāpsyase cātulāṃ prītimetanme prītilakṣaṇam || 7.18.32 ||
haṃsānāṃ hi purā rāma nīlavarṇaḥ sapāṇḍuraḥ |pakṣā nīlāgrasaṃvītāḥ kroḍāḥ śaṣpāgranirmalāḥ || 7.18.33 ||
athābravīdvaiśravaṇaḥ kṛkalāsaṃ girau sthitam |hairaṇyaṃ samprayacchāmi varṇaṃ prītastavāpyaham || 7.18.34 ||
sadravyaṃ ca śiro nityaṃ bhaviṣyati tavākṣayam |eṣa kāñcanako varṇo matprītyā te bhaviṣyati || 7.18.35 ||
evaṃ dattvā varāṃstebhyastasminyajñotsave surāḥ |nivṛttāḥ saha rājñā te punaḥ svabhavanaṃ gatāḥ || 7.18.36 ||
atha jitvā maruttaṃ sa prayayau rākṣasādhipaḥ |nagarāṇi narendrāṇāṃ yuddhakāṅkṣī daśānanaḥ || 7.19.1 ||
samāsādya tu rājendrānmahendravaruṇopamān |abravīdrākṣasendrastu yuddhaṃ me dīyatāmiti || 7.19.2 ||
nirjitāḥ smeti vā brūta eṣa me hi suniścayaḥ |anyathā kurvatāmevaṃ mokṣo naivopapadyate || 7.19.3 ||tatastvabhīravaḥ prājñāḥ pārthivā dharmaniścayāḥ |mantrayitvā tato 'nyonyaṃ rājānaḥ sumahābalāḥ |nirjitāḥ smetyabhāṣanta jñātvā varabalaṃ ripoḥ || 7.19.4 ||
duṣyantaḥ suratho gādhirgayo rājā purūravāḥ |ete sarve 'bruvaṃstāta nirjitāḥ smeti pārthivāḥ || 7.19.5 ||
athāyodhyāṃ samāsādya rāvaṇo rākṣasādhipaḥ || 7.19.6 ||
suguptāmanaraṇyena śakreṇevāmarāvatīm |sa taṃ puruṣaśārdūlaṃ purandarasamaṃ bale || 7.19.7 ||
prāha rājānamāsādya yuddhaṃ dehīti rāvaṇaḥ |nirjito 'smīti vā brūhi tvamevaṃ mama śāsanam || 7.19.8 ||
ayodhyādhipatistasya śrutvā pāpātmano vacaḥ |anaraṇyastu saṅkruddho rākṣasendramathābravīt || 7.19.9 ||
dīyate dvandvayuddhaṃ te rākṣasādhipate mayā |santiṣṭha kṣipramāyatto bhava caivaṃ bhavāmyaham || 7.19.10 ||
atha pūrvaṃ śrutārthena nirjitaṃ sumahadbalam |niṣkrāmattannarendrasya balaṃ rakṣovadhodyatam || 7.19.11 ||
nāgānāṃ daśasāhasraṃ vājināṃ niyutaṃ tathā |rathānāṃ bahusāhasraṃ pattīnāṃ ca narottama || 7.19.12 ||
mahīṃ sañchādya niṣkrāntaṃ sapadātirathaṃ raṇe |tataḥ pravṛttaṃ sumahadyuddhaṃ yuddhaviśārada || 7.19.13 ||
anaraṇyasya nṛpate rākṣasendrasya cādbhutam |tadrāvaṇabalaṃ prāpya balaṃ tasya mahīpateḥ || 7.19.14 ||
prāṇaśyata tadā sarvaṃ havyaṃ hutamivānale |yuddhvā ca suciraṃ kālaṃ kṛtvā vikramamuttamam || 7.19.15 ||
prajvalantaṃ tamāsādya kṣipramevāvaśeṣitam |prāviśatsaṅkulaṃ tatra śalabhā iva pāvakam |naśyati sma balaṃ tatra havyaṃ hutamivānale || 7.19.16 ||
so 'paśyattannarendrastu naśyamānaṃ mahābalam |mahārṇavaṃ samāsādya vanāpagaśataṃ yathā || 7.19.17 ||
tataḥ śakradhanuḥprakhyaṃ dhanurvisphārayansvayam |āsasāda narendrastaṃ rāvaṇaṃ krodhamūrcchitaḥ || 7.19.18 ||
anaraṇyena te 'mātyā mārīcaśukasāraṇāḥ |prahastasahitā bhagnā vyadravanta mṛgā iva || 7.19.19 ||
tato bāṇaśatānyaṣṭau pātayāmāsa mūrdhani |tasya rākṣasarājasya ikṣvākukulanandanaḥ || 7.19.20 ||
tasya bāṇāḥ patantaste cakrire na kṣataṃ kvacit |vāridhārā ivābhrebhyaḥ patantyo girimūrdhani || 7.19.21 ||
tato rākṣasarājena kruddhena nṛpatistadā |talenābhihato mūrdhni sa rathānnipapāta ha || 7.19.22 ||
sa rājā patito bhūmau vihvalāṅgaḥ pravepitaḥ |vajradagdha ivāraṇye sālo nipatito yathā || 7.19.23 ||
taṃ prahasyābravīddrakṣa ikṣvākuṃ pṛthivīpatim |kimidānīṃ phalaṃ prāptaṃ tvayā māṃ prati yuddhyatā || 7.19.24 ||
trailokye nāsti yo dvandvaṃ mama dadyānnarādhipa |śaṅke prasakto bhogeṣu na śṛṇoṣi balaṃ mama || 7.19.25 ||
tasyaivaṃ bruvato rājā mandāsurvākyamabravīt |kiṃ śakyamiha kartuṃ vai kālo hi duratikramaḥ || 7.19.26 ||
nahyahaṃ nirjito rakṣastvayā cātmapraśaṃsinā |kālenaiva vipanno 'haṃ hetubhūtastu me bhavān || 7.19.27 ||
kiṃ tvidānīṃ mayā śakyaṃ kartuṃ prāṇaparikṣaye |nahyahaṃ vimukhī rakṣo yudhyamānastvayā hataḥ || 7.19.28 ||
ikṣvākuparibhāvitvādvaco vakṣyāmi rākṣasa |yadi dattaṃ yadi hutaṃ yadi me sukṛtaṃ tapaḥ ||
yadi guptāḥ prajāḥ samyaktadā satyaṃ vaco 'stu me || 7.19.29 ||
utpatsyate kule hyasminnikṣvākūṇāṃ mahātmanām |rāmo dāśarathirnāma yaste prāṇānhariṣyati || 7.19.30 ||
tato jaladharodagrastāḍito devadundubhiḥ |tasminnudāhṛte śāpe puṣpavṛṣṭiśca khāccyutā || 7.19.31 ||
tataḥ sa rājā rājendra gataḥ sthānaṃ triviṣṭapam |svargate ca nṛpe tasminrākṣasaḥ so 'pasarpata || 7.19.32 ||
tato vitrāsayanmartyānpṛthivyāṃ rākṣasādhipaḥ |āsasāda ghane tasminnāradaṃ munipuṅgavam || 7.20.1 ||
tasyābhivādanaṃ kṛtvā daśagrīvo niśācaraḥ |abravītkuśalaṃ pṛṣṭvā hetumāgamanasya ca || 7.20.2 ||
nāradastu mahātejā devarṣiramitaprabhaḥ |abravīnmeghapṛṣṭhastho rāvaṇaṃ puṣpake sthitam || 7.20.3 ||
rākṣasādhipate saumya tiṣṭha viśravasaḥ suta |prīto 'smyabhijanopetavikramairūrjitaistava || 7.20.4 ||
viṣṇunā daityaghātaiśca gandharvoragadharṣaṇaiḥ |tvayā samaṃ vimardaiśca bhṛśaṃ hi paritoṣitaḥ || 7.20.5 ||
kiṃcidvakṣyāmi tāvatte śrotavyaṃ śroṣyase yadi |śrutvā cānantaraṃ kāryaṃ tvayā rākṣasasattama |tanme nigadatastāta samādhiṃ śravaṇe kuru || 7.20.6 ||
kimayaṃ vadhyate tāta tvayā 'vadhyena daivataiḥ |hata eva hyayaṃ loko yadā mṛtyuvaśaṃ gataḥ || 7.20.7 ||tama |devadānavadaityānāṃ yakṣagandharvarakṣasām |avadhyena tvayā lokaḥ kleṣṭuṃ yukto na mānuṣaḥ || 7.20.8 ||
nityaṃ śreyasi sammūḍhaṃ mahadbhirvyasanairvṛtam |hanyātkastādṛśaṃ lokaṃ jarāvyādhiśatairyutam || 7.20.9 ||
taistairaniṣṭopagamairajasraṃ yatra kutra kaḥ |matimānmānuṣe loke yuddhena praṇayī bhavet || 7.20.10 ||
kṣīyamāṇaṃ daivahataṃ śrutpipāsājarādibhiḥ |viṣādaśokasammūḍhaṃ lokaṃ tvaṃ kṣapayasva mā || 7.20.11 ||
paśya tāvanmahābāho rākṣaseśvara mānuṣam |mūḍhamevaṃ vicitrārthaṃ yasya na jñāyate gatiḥ || 7.20.12 ||
kvacidvāditranṛtyādi sevyate muditairjanaiḥ |rudyate cāparairārtairdhārāśrunayanānanaiḥ || 7.20.13 ||
mātāpitṛsutasnehairbhāryābandhumanoramaiḥ |mohito 'yaṃ jano dhvastaḥ kleśaṃ svaṃ nāvabudhyate || 7.20.14 ||
alamenaṃ parikliśya lokaṃ mohanirākṛtam |jita eva tvayā saumya martyaloko na saṃśayaḥ || 7.20.15 ||
avaśyamebhiḥ sarvaiśca gantavyaṃ yamasādanam |tannigṛhṇīṣva paulastya yamaṃ parapurañjaya || 7.20.16 ||
tasmiñjite jitaṃ sarvaṃ bhavatyeva na saṃśayaḥ |evamuktastu laṅkeśo dīpyamānaṃ svatejasā |abravīnnāradaṃ tatra samprahasyābhivādya ca || 7.20.17 ||
maharṣe devagandharvavihāra samarapriya |ahaṃ samudyato gantuṃ vijayārthaṃ rasātalam || 7.20.18 ||
tato lokatrayaṃ jitvā sthāpya nāgānsurānvaśe |samudramamṛtārthaṃ ca mathiṣyāmi rasālayam || 7.20.19 ||
athābravīdṛśagrīvaṃ nārado bhagavānṛṣiḥ |kva khalvidānīṃ mārgeṇa tvayā hyanyena gamyate || 7.20.20 ||
ayaṃ khalu sudurgamyaḥ pretarājapuraṃ prati |mārgo gacchati durdharṣo yamasyāmitrakarśana || 7.20.21 ||
sa tu śāradameghābhaṃ hāsaṃ muktvā daśānanaḥ |uvāca kṛtamityeva vacanaṃ cedamabravīt || 7.20.22 ||
tasmādevamahaṃ brahman vaivasvatavadhodyataḥ |gacchāmi dakṣiṇāmāśāṃ yatra sūryātmajo nṛpaḥ || 7.20.23 ||
mayā hi bhagavankrodhātpratijñātaṃ raṇārthinā |avajeṣyāmi caturo lokapālāniti prabho || 7.20.24 ||
tadiha prasthito 'haṃ vai pretarājapuraṃ prati |prāṇisaṅkleśakartāraṃ yojayiṣyāmi mṛtyunā || 7.20.25 ||
evamuktvā daśagrīvo muniṃ tamabhivādya ca |prayayau dakṣiṇāmāśāṃ praviṣṭaḥ saha mantribhiḥ || 7.20.26 ||
nāradastu mahātejā muhūrtaṃ dhyānamāsthitaḥ |cintayāmāsa viprendro vidhūma iva pāvakaḥ || 7.20.27 ||
yena lokāstrayaḥ sendrāḥ kliśyante sacarācarāḥ |kṣīṇe cāyuṣi dharmeṇa sa kālo jeṣyate katham || 7.20.28 ||
svadattakṛtasākṣī yo dvitīya iva pāvakaḥ |labdhasañjñā vijeṣyante lokā yasya mahātmanaḥ || 7.20.29 ||
yasya nityaṃ trayo lokā vidravanti bhayārditāḥ |taṃ kathaṃ rākṣasendro 'sau svayameva gamiṣyati || 7.20.30 ||
yo vidhātā ca dhātā ca sukṛtaṃ duṣkṛtaṃ tathā |trailokyaṃ vijitaṃ yena taṃ kathaṃ vijayiṣyate || 7.20.31 ||
aparaṃ kintu kṛtvāyaṃ vidhānaṃ saṃvidhāsyati |kautūhalasamutpanno yāsyāmi yamasādanam || 7.20.32 ||
vimardaṃ draṣṭumanayoryamarākṣasayoḥ svayam || 7.20.33 ||
evaṃ sañcintya viprendo jagāma laghuvikramaḥ |ākhyātuṃ tadyathāvṛttaṃ yamasya sadanaṃ prati || 7.21.1 ||
apaśyatsa yamaṃ tatra devamagnipuraskṛtam |vidhānamupatiṣṭhantaṃ prāṇino yasya yādṛśam || 7.21.2 ||
sa tu dṛṣṭvā yamaḥ prāptaṃ maharṣiṃ tatra nāradam |abravītsukhamāsīnamarghyamāvedya dharmataḥ || 7.21.3 ||
kaccitkṣemaṃ tu devarṣe kacciddharmo na naśyati |kimāgamanakṛtyaṃ te devagandharvasevita || 7.21.4 ||
abravīttu tadā vākyaṃ nārado bhagavānṛṣiḥ |śrūyatāmabhidhāsyāmi vidhānaṃ ca vidhīyatām || 7.21.5 ||
eṣa nāmno daśagrīvaḥ pitṛrāja niśācaraḥ |upayāti vaśaṃ netuṃ vikramaistvāṃ sudurjayam || 7.21.6 ||
etena kāraṇenāhaṃ tvarito hyāgataḥ prabho |daṇḍapraharaṇasyādya tava kiṃ nu bhaviṣyati || 7.21.7 ||
etasminnantare durādaṃśumantamivoditam |dadṛśurdīptamāyāntaṃ vimānaṃ tasya rakṣasaḥ || 7.21.8 ||
taṃ deśaṃ prabhayā tasya puṣpakasya mahābalaḥ |kṛtvā vitimiraṃ sarvaṃ samīpaṃ so 'bhyavartata || 7.21.9 ||
so 'paśyatsa mahābāhurdaśagrīvastatastataḥ |prāṇinaḥ sukṛtaṃ karma bhuñjānāṃścaiva duṣkṛtam || 7.21.10 ||
apaśyatsainikāṃścāsya yamasyānucaraiḥ saha |yamasya puruṣairugrairghorarūpairbhayānakaiḥ || 7.21.11 ||
dadarśa vadhyamānāṃśca kliśyamānāṃśca dehinaḥ |krośataśca mahānādaṃ tīvraniṣṭanatatparān || 7.21.12 ||
kṛmibhirbhakṣyamāṇāṃśca sārameyaiśca dāruṇaiḥ || 7.21.13 ||
kṣotrāyāsakarā vāco vadataśca bhayāvahāḥ |santāryamāṇānvaitaraṇīṃ bahuśaḥ śoṇitodakām || 7.21.14 ||
vālukāsu ca taptāsu tapyamānānmuhūrmuhuḥ |asipatravane caiva bhidyamānānadhārmikān || 7.21.15 ||
raurave kṣāranadyāṃ ca kṣuradhārāsu caiva hi |pānīyaṃ yācamānāṃśca tṛṣitānkṣudhitānapi || 7.21.16 ||
śavabhūtānkṛśāndīnānvivarṇānmuktamūrdhajān |malapaṅkadharāndīnānrūkṣāṃśca paridhāvataḥ || 7.21.17 ||
dadarśa rāvaṇo mārge śataśo 'tha sahasraśaḥ |kāṃścicca gṛhamukhyeṣu gītavāditraniḥsvanaiḥ |pramodamānānadrākṣīdrāvaṇaḥ sukṛtaiḥ svakaiḥ || 7.21.18 ||
gaurasaṃ gopradātāro hyannaṃ caivānnadāyinaḥ |gṛhāṃśca gṛhadātāraḥ svakarmaphalamaśnataḥ || 7.21.19 ||
suvarṇamaṇimuktābhiḥ pramadābhiralaṅkṛtān || 7.21.20 ||
dhārmikānaparāṃstatra dīpyamānānsvatejasā |dadarśa sumahābāhū rāvaṇo rākṣasādhipaḥ || 7.21.21 ||
tatastānbhidyamānāṃśca karmabhirduṣkṛtaiḥ svakaiḥ |rāvaṇo mocayāmāsa vikrameṇa balādbalī || 7.21.22 ||
prāṇino mocitāstena daśagrīveṇa rakṣasā |sukhamāpurmuhūrtaṃ te hyatarkitamacintitam || 7.21.23 ||
preteṣu mucyamāneṣu rākṣasena mahīyasā |pretagopāḥ susaṅkruddhā rākṣasendramabhidravan || 7.21.24 ||
tato halahalāśabdaḥ sarvadigbhyaḥ samutthitaḥ |dharmarājasya yodhānāṃ śūrāṇāṃ sampradhāvatām || 7.21.25 ||
te prāsaiḥ parighaiḥ śūlairmusalaiḥ śaktitomaraiḥ |puṣpakaṃ samavarṣanta śūrāḥ śatasahasraśaḥ || 7.21.26 ||
tasyāsanāni prāsādānvedikāstoraṇāni ca |puṣpakasya babhañjuste śīghraṃ madhukarā iva || 7.21.27 ||
devaniṣṭhānabhūtaṃ tadvimānaṃ puṣpakaṃ mṛdhe |bhajyamānaṃ tathaivāsīdakṣayaṃ brahmatejasā || 7.21.28 ||
asaṅkhyā sumahatyāsīttasya senā mahātmanaḥ |śūrāṇāmagrayāta'ṇāṃ sahasrāṇi śatāni ca || 7.21.29 ||
tato vṛkṣaiśca śailaiśca prāsādānāṃ śataistathā |tataste sacivāstasya yathākāmaṃ yathābalam |ayudhyanta mahāvīrāḥ sa ca rājā daśānanaḥ || 7.21.30 ||
te tu śoṇitadigdhāṅgāḥ sarvaśastrasamāhatāḥ |amātyā rākṣasendrasya cakrurāyodhanaṃ mahat || 7.21.31 ||
anyonyaṃ te mahābhāgā jaghnuḥ praharaṇairbhṛśam |yamasya ca mahābāho rāvaṇasya ca mantriṇaḥ || 7.21.32 ||
amātyāṃstāṃstu santyajya yamayodhā mahābalāḥ |tameva cābhyadhāvanta śūlavarṣairdaśānanam || 7.21.33 ||
tataḥ śoṇitadigdhāṅgaḥ prahārairjarjarīkṛtaḥ |phullāśoka ivābhāti puṣpake rākṣasādhipaḥ || 7.21.34 ||
sa tu śūlagadāpāsāñchaktitomarasāyakān |musalāni śilāvṛkṣānmumocāstrabalādbalī || 7.21.35 ||
tarūṇāṃ ca śilānāṃ ca śastrāṇāṃ cātidāruṇam |yamasainyeṣu tadvarṣaṃ papāta dharaṇītale || 7.21.36 ||
tāṃstu sarvānvinirbhidya tadastramapahatya ca |jaghnuste rākṣasaṃ ghoramekaṃ śatasahasraśaḥ || 7.21.37 ||
parivārya ca taṃ sarve śailaṃ moghotkarā iva |bhindipālaiśca śūlaiśca nirucchvāsamapothayan || 7.21.38 ||
vimuktakavacaḥ kruddhaḥ siktaḥ śoṇitavisravaiḥ |tataḥ sa puṣpakaṃ tyaktvā pṛthivyāmavatiṣṭhata || 7.21.39 ||
tataḥ sa kārmukī vāṇī samare cābhivartata |labdhasañjño muhūrtena kruddhastasthau yathāntakaḥ || 7.21.40 ||
tataḥ pāśupataṃ divyamastraṃ sandhāya kārmuke |tiṣṭha tiṣṭheti tānuktvā taccāpaṃ vicakarṣa sa || 7.21.41 ||
ākarṇātsa vikṛṣyātha cāpamindrārirāhave |mumoca taṃ śaraṃ kruddhastripure śaṅkaro yathā || 7.21.42 ||
tasya rūpaṃ śarasyāsītvidhūmajvālamaṇḍalam |vanaṃ dahiṣyato gharme dāvāgneriva mūrcchataḥ || 7.21.43 ||
jvālāmālī sa tu śaraḥ kravyādānugato raṇe |mukto gulmāndrumāṃścāpi bhasma kṛtvā pradhāvati || 7.21.44 ||
te tasya tejasā dagdhāḥ sainyā vaivasvatasya tu |raṇe tasminnipatitā dāvadagdhā nagā iva || 7.21.45 ||
tatastu sicavaiḥ sārdhaṃ rākṣaso bhīmavikramaḥ |nanāda sumahānādaṃ kampayanniva medinīm || 7.21.46 ||
sa tasya tu mahānādaṃ śrutvā vaivasvataḥ prabhuḥ |śatruṃ vijayinaṃ mene svabalasya ca saṅkṣayam || 7.22.1 ||
sa hi yodhānhatānmatvā krodhasaṃraktalocanaḥ |abravīttvaritaṃ sūtaṃ ratho 'yamupanīyatām || 7.22.2 ||
tasya sūtastadā divyamupasthāpya mahāratham |sthitaḥ sa ca mahātejā hyadhyārohata taṃ ratham |prāśamudgarahastaśca mṛtyustasyāgrataḥ sthitaḥ || 7.22.3 ||
yena saṅkṣipyate sarvaṃ trailokyamidamavyayam |kāladaṇḍastu pārśvastho mūrtimānasya cābhavat |yamapraharaṇaṃ divyaṃ tejasā jvaladagnimat || 7.22.4 ||
tasya pārśveṣu nicchidrāḥ kālapāśāḥ pratiṣṭhitāḥ || 7.22.5 ||pāvakasparśasaṅkāśaḥ sthito mūrtaśca mudgaraḥ || 7.22.6 ||
tato lokatrayaṃ kṣubdhamakampanta divaukasaḥ |kālaṃ dṛṣṭvā tathā kruddhaṃ sarvalokabhayāvaham || 7.22.7 ||
tataḥ pracodayansūtastānaśvānruciraprabhān |prayayau bhīmasannādo yatra rakṣaḥpatiḥ sthitaḥ || 7.22.8 ||
muhūrtena yamaṃ te tu hayā harihayopamāḥ |prāpayanmanasastulyā yatra tatprastutaṃ raṇam || 7.22.9 ||
dṛṣṭvā tathaiva vikṛtaṃ rathaṃ mṛtyusamanvitam |sacivā rākṣasendrasya sahasā vipradudruvuḥ || 7.22.10 ||
laghusattvatayā te hi naṣṭasañjñā bhayārditāḥ |neha yoddhuṃ samarthāḥ sma ityuktvā prayayurdiśaḥ || 7.22.11 ||
sa tu taṃ tādṛśaṃ dṛṣṭvā rathaṃ lokabhayāvaham |nākṣubhyata daśagrīvo na cāpi bhayamāviśat || 7.22.12 ||
sa tu rāvaṇamāsādya vyasṛjacchaktitomarān |yamo marmāṇi saṅkruddho rāvaṇasyopakṛntata || 7.22.13 ||
rāvaṇastu tataḥ svasthaḥ śaravarṣaṃ mumoca ha |tasminvaivasvatarathe toyavarṣamivāmbudaḥ || 7.22.14 ||
tato mahāśaktiśaraiḥ pātyamānairmahorasi (pātyamāno) |nāśaknotpratikartuṃ sa rākṣasaḥ śalyapīḍitaḥ || 7.22.15 ||
evaṃ nānāpraharaṇairyamenāmitrakarṣiṇā |saptarātraṃ kṛtaḥ saṅkhye visañjño vimukho ripuḥ || 7.22.16 ||
tadāsīttumulaṃ yuddhaṃ yamarākṣasayordvayoḥ |jayamākāṅkṣatorvīra samareṣvanivartinoḥ || 7.22.17 ||
tato devāḥ sagandharvāḥ siddhāśca paramarṣayaḥ |prajāpatiṃ puraskṛtya sametāstadraṇājiram || 7.22.18 ||
saṃvarta iva lokānāṃ krudhyatorabhavattadā |rākṣasānāṃ ca mukhyasya pretānāmīśvarasya ca || 7.22.19 ||
rākṣasendro 'pi visphārya cāpamindrāśaniprabham |nirantaramivākāśaṃ kurvanbāṇāṃstato 'sṛjat || 7.22.20 ||
mṛtyuṃ caturbhirviśikhaiḥ sūtaṃ saptabhirārdayat |yamaṃ śatasahasreṇa śīghraṃ marmasvatāḍayat || 7.22.21 ||
tataḥ kruddhasya vadanādyamasya samajāyata |jvālāmālī saniḥśvāsaḥ sadhūmaḥ kopapāvakaḥ || 7.22.22 ||
tadāścaryamatho dṛṣṭvā devadānavasannidhau |praharṣitau susaṃrabdhau mṛtyukālau babhūvatuḥ || 7.22.23 ||
tato mṛtyuḥ kruddhataro vaivasvatamabhāṣata |muñca māṃ samare yāvaddhanmīmaṃ pāparākṣasam |naiṣā rakṣo bhavedadya maryādā hi nisargataḥ || 7.22.24 ||
hiraṇyakaśipuḥ śrīmānnamuciḥ śambarastathā |visandhirdhūmaketuśca balirvairocano 'pi ca || 7.22.25 ||
dambhurdaityamahārājo vṛtro bāṇastathaiva ca |rājarṣayaḥ śāstravido gandharvāḥ samahoragāḥ || 7.22.26 ||
ṛṣayaḥ pannagā daityā yakṣāścāpyapsarogaṇāḥ |yugāntaparivarte ca pṛthivī samahārṇavā || 7.22.27 ||
kṣayaṃ nītā mahārāja saparvatasariddrumā |ete cānye ca bahavo balavanto durāsadāḥ || 7.22.28 ||
vinipannā mayā dṛṣṭāḥ kimutāyaṃ niśācaraḥ || 7.22.29 ||
muñcaṃ māṃ sādhu dharmajña yāvadenaṃ nihanmyaham |nahi kaścinmayā dṛṣṭo balavānapi jīvati || 7.22.30 ||
balaṃ mama na khalvetanmaryādaiṣā nisargataḥ |sa dṛṣṭo na mayā kālaṃ muhurtamāpi jīvati || 7.22.31 ||
tasyaivaṃ vacanaṃ śrutvā dharmarājaḥ pratāpavān |abravīttatra taṃ mutyuṃ tvaṃ tiṣṭhainaṃ nihanmyaham || 7.22.32 ||
tataḥ saṃraktanayanaḥ kruddho vaivasvataḥ prabhuḥ |kāladaṇḍamamoghaṃ tu tolayāmāsa pāṇinā || 7.22.33 ||
yasya pārśveṣu nikhilā kālapāśāḥ pratiṣṭhitāḥ |pāvakāśanisaṅkāśo mudgaro mūrtimānsthitaḥ || 7.22.34 ||
darśanādeva yaḥ prāṇānprāṇināmapakarṣati |kiṃ punaḥ spṛśyamānasya pātyamānasya vā punaḥ || 7.22.35 ||
sa jvālāparivārastu nirdahanniva rākṣasam |tena spṛṣṭo balavatā mahāpraharaṇo 'sphurat || 7.22.36 ||
tato vidudruvuḥ sarve tasmātrastā raṇājire |surāśca kṣubhitāḥ sarve dṛṣṭvā daṇḍodyataṃ yamam || 7.22.37 ||
tasminprahartukāme tu yame daṇḍena rāvaṇam |yamaṃ pitāmahaḥ sākṣāddarśayitvedamabravīt || 7.22.38 ||
vaivasvata mahābāho na khalvamitavikrama |na hantavyastvayā tena daṇḍenaiva niśācaraḥ || 7.22.39 ||
varaḥ khalu mayaitasmai dattastridaśapuṅgava |sa tvayā nānṛtaḥ kāryo yanmayā vyāhṛtaṃ vacaḥ || 7.22.40 ||
yo hi māmanṛtaṃ kuryāddevo vā mānuṣo 'pi vā |trailokyamanṛtaṃ tena kṛtaṃ syānnātra saṃśayaḥ || 7.22.41 ||
kruddhena vipramukto 'yaṃ nirviśeṣaṃ priyāpriye |prajāḥ saṃharate raudro lokatrayabhayāvahaḥ || 7.22.42 ||
amogho hyeṣa sarveṣāṃ prāṇināmamitaprabhaḥ |kāladaṇḍo mayā sṛṣṭaḥ pūrvaṃ mṛtyupuraskṛtaḥ || 7.22.43 ||
tanna khalveṣa te saumya pātyo rāvaṇamūrdhani |nahyasminpatite kaścinmuhūrtamapi jīvati || 7.22.44 ||
yadi hyanminnipatite na mriyetaiṣa rākṣasaḥ |mriyate vā daśagrīvastadāpyubhayato 'nṛtam || 7.22.45 ||
tannivartaya laṅkeśaṃ ddaṇḍametaṃ samudyatam |satyaṃ ca māṃ kuruṣvādya lokāṃstvaṃ yadyavekṣase || 7.22.46 ||
evamuktastu dharmātmā pratyuvāca yamastadā |eṣa vyāvartito daṇḍaḥ prabhaviṣṇurhi no bhavān || 7.22.47 ||
kiṃ nvidānīṃ mayā śakyaṃ kartuṃ raṇagatena hi |na mayā yadyayaṃ śakyo hantuṃ varapuraskṛtaḥ || 7.22.48 ||
eṣa tasmātpraṇaśyāmi darśanādasya rakṣasaḥ |ityuktvā sarathaḥ sāśvastatraivāntaradhīyata || 7.22.49 ||
daśagrīvastu taṃ jitvā nāma viśrāvya cātmanaḥ |āruhya puṣpakaṃ bhūyo niṣkrānto yamasādanāt || 7.22.50 ||
sa tu vaivasvato devaiḥ saha brahmapurogamaiḥ |jagāma tridivaṃ hṛṣṭo nāradaśca mahāmuniḥ || 7.22.51 ||
tato jitvā daśagrīvo yamaṃ tridaśapuṅgavam |rāvaṇastu raṇaślāghī svasahāyāndadarśa ha || 7.23.1 ||
tato rudhirasiktāṅgaṃ prahārairjarjarīkṛtam |rāvaṇaṃ rākṣasā dṛṣṭvā hyaṣṭavat samupāgaman || 7.23.2 ||
jayena vardhayitvā ca mārīcapramukhāstataḥ |puṣpakaṃ bhejire sarve sāntvitā rāvaṇena tu || 7.23.3 ||
tato rasātalaṃ gacchan praviṣṭaḥ payasāṃ nidhim |daityoragagaṇādhyuṣṭaṃ varuṇena surakṣitam || 7.23.4 ||
sa tu bhogavatīṃ gatvā purīṃ vāsukipālitām |kṛtvā nāgānvaśe hṛṣṭo yayau maṇimayīṃ purīm || 7.23.5 ||
nivātakavacāstatra daityā labdhavarā vasan |rākṣasāntānsamāgamya yuddhāya samupāhvayat || 7.23.6 ||
te tu sarve suvikrāntā daiteyā balaśālinaḥ |nānāpraharaṇāstatra prahṛṣṭā yuddhadurmadāḥ || 7.23.7 ||
śūlaistriśūlaiḥ kuliśaiḥ paṭṭiśāsiparaśvadhaiḥ |anyonyaṃ bibhiduḥ kruddhā rākṣasā dānavāstathā || 7.23.8 ||
teṣāṃ tu yudhyamānānāṃ sāgraḥ saṃvatsaro gataḥ |na cānyatarayostatra vijayo vā kṣayo 'pi vā || 7.23.9 ||
tataḥ pitāmahastatra trailokyagatiravyayaḥ |ājagāma drutaṃ devo vimānavaramāsthitaḥ || 7.23.10 ||
nivātakavacānāṃ tu nivārya raṇakarma tat |vṛddhaḥ pitāmaho vākyamuvāca viditārthavat || 7.23.11 ||
nahyayaṃ rāvaṇo yuddhe śakyo jetuṃ surāsuraiḥ |na bhavantaḥ kṣayaṃ netumapi sāmaradānavaiḥ || 7.23.12 ||
rākṣasasya sakhitvaṃ ca bhavadbhiḥ saha rocate |avibhaktāśca sarvārthāḥ suhṛdāṃ nātra saṃśayaḥ || 7.23.13 ||
tato 'gnisākṣikaṃ sakhyaṃ kṛtavāṃstatra rāvaṇaḥ |nivātakavacaiḥ sārdhaṃ prītimānabhavattadā || 7.23.14 ||
arthatastairyathānyāyaṃ saṃvatsaramathoṣitaḥ |svapurānnirviśeṣaṃ ca priyaṃ prāpto daśānanaḥ || 7.23.15 ||
tatopadhārya māyānāṃ śatamekaṃ samāptavān |salilendrapurānveṣī bhramati sma rasātalam || 7.23.16 ||
tato 'śmanagaraṃ nāma kālakeyairadhiṣṭhitam |gatvā tu kālakeyāṃśca hatvā tatra balotkaṭān || 7.23.17 ||
śūrpaṇakhyāśca bhartāramasinā prācchinattadā |śyālaṃ ca balavantaṃ ca vidyujjihvaṃ balotkaṭam |jihvayā saṃlihantaṃ ca rākṣasaṃ samare tathā || 7.23.18 ||
taṃ vijitya muhūrtena jaghne daityāṃścatuḥśatam || 7.23.19 ||
tataḥ pāṇḍurameghābhaṃ kailāsamiva bhāsvaram |varuṇasyālayaṃ divyamapaśyadrākṣasādhipaḥ || 7.23.20 ||
kṣarantīṃ ca payastatra surabhiṃ gāmavasthitām |yasyāḥ payobhiniṣyandātkṣīrodo nāma sāgaraḥ || 7.23.21 ||
dadarśa rāvaṇastatra govṛṣendravarāraṇim |yasmāccandraḥ prabhavati śītaraśmirniśākaraḥ || 7.23.22 ||
yaṃ samāśritya jīvanti phenapāḥ paramarṣayaḥ |amṛtaṃ yatra cotpannaṃ svadhā ca svadhabhojinām || 7.23.23 ||
yāṃ bruvanti narā loke surabhiṃ nāma nāmataḥ |pradakṣiṇaṃ tu tāṃ kṛtvā rāvaṇaḥ paramādbhutām || 7.23.24 ||
praviveśa mahāghoraṃ guptaṃ bahuvidhairbalaiḥ |tato dhārāśatākīrṇaṃ śāradābhranibhaṃ tadā |nityaprahṛṣṭaṃ dadṛśe varuṇasya gṛhottamam || 7.23.25 ||
tato hatvā balādhyakṣānsamare taiśca tāḍitaḥ |abravīcca tato yodhānrājā śīghraṃ nivedyatām || 7.23.26 ||
yuddhārthī rāvaṇaḥ prāptastasya yuddhaṃ pradīyatām |vada vā na bhayaṃ te 'sti nirjito 'smīti sāñjaliḥ || 7.23.27 ||
etasminnantare kruddhā varuṇasya mahātmanaḥ |putrāḥ pautrāśca niṣkrāmangauśca puṣkara eva ca || 7.23.28 ||
te tu vīryaguṇopetā balaiḥ parivṛtāḥ svakaiḥ |yuṅktvā rathānkāmagamānudyadbhāsvaravarcasaḥ || 7.23.29 ||
tato yuddhaṃ samabhavaddāruṇaṃ romaharṣaṇam |salilendrasya putrāṇāṃ rāvaṇasya ca dhīmataḥ || 7.23.30 ||
amātyaiśca mahāvīryairdaśagrīvasya rakṣasaḥ |vāruṇaṃ tadbalaṃ kṛtsnaṃ kṣaṇena vinipātitam || 7.23.31 ||
samīkṣya svabalaṃ saṅkhye varuṇasya sutāstadā |arditāḥ śarajālena nivṛttā raṇakarmaṇaḥ || 7.23.32 ||
mahītalagatāste tu rāvaṇaṃ dṛśya puṣpake |ākāśamāśu viviśuḥ syandanaiḥ śīghragāmibhiḥ || 7.23.33 ||
mahādāsīttatasteṣāṃ tulyaṃ sthānamavāpya tat |ākāśayuddhaṃ tumulaṃ devadānavayoriva || 7.23.34 ||
tataste rāvaṇaṃ yuddhe śaraiḥ pāvakasannibhaiḥ |vimukhīkṛtya santuṣṭā vinedurvividhānravān || 7.23.35 ||
tato mahodaraḥ kruddho rājānaṃ dṛśya dharṣitam |tyaktvā mṛtyubhayaṃ vīro yuddhakāṅkṣī vyalokayat || 7.23.36 ||
tena te dāruṇā yuddhe kāmagāḥ pavanopamāḥ |mahodareṇa gadayā hatā vai prayayuḥ kṣitim || 7.23.37 ||
teṣāṃ varuṇaputrāṇāṃ hatvā yodhānhayāñchatān |mumocāśu mahānādaṃ virathānprekṣya tānsthitān || 7.23.38 ||
te tu teṣāṃ rathāḥ sāśvāḥ saha sārathibhirhataiḥ |mahodareṇa nihatāḥ patitāḥ pṛthivītale || 7.23.39 ||
te tu tyaktvā rathānputrā varuṇasya mahātmanaḥ |ākāśe viṣṭhitāḥ śūrāḥ svaprabhāvānna vivyathuḥ || 7.23.40 ||
dhanūṃṣi kṛtvā sajjāni vinirbhidya mahodaram |rāvaṇaṃ samare kruddhāḥ sahitāḥ samabhidravan || 7.23.41 ||
sāyakaiścāpavibhraṣṭairvajrakalpaiḥ sudāruṇaiḥ |dārayanti sma saṅkruddhā meghā iva mahāgirim || 7.23.42 ||
tataḥ kruddho daśagrīvaḥ kālāgniriva nirgataḥ |śaravarṣairmahāghoraisteṣāṃ marmasvatāḍayat || 7.23.43 ||
tatastenaiva sahasā sīdanti sma padātayaḥ |musalāni vicitrāṇi tato bhallaśatāni ca || 7.23.44 ||
paṭṭiśāṃścaiva śaktīśca śataghnīstomarāṃstathā |pātayāmāsa durdharṣasteṣāmupari viṣṭhitaḥ || 7.23.45 ||
apaviddhāstu te vīrā viniṣpetuḥ padātayaḥ |mahāpaṅkamivāsādya kuñjarāṣṣaṣṭihāyanāḥ || 7.23.46 ||
sīdamānānsutāndṛṣṭvā vihvalānsumahaujasaḥ |nanāda rāvaṇo harṣānmahānambudharo yathā || 7.23.47 ||
tato rakṣo mahānādānmuktvā hanti sma vāruṇān |nānāpraharaṇopetairdhārāpātairivāmbudaḥ || 7.23.48 ||
tataste vimukhāḥ sarve patitā dharaṇītale |raṇātsvapuruṣaiḥ śīghraṃ gṛhāṇyeva praveśitāḥ || 7.23.49 ||
tānabravīttato rakṣo varuṇāya nivedyatām || 7.23.50 ||
rāvaṇaṃ tvabravīnmantrī prahasto (prahaso) nāma vāruṇaḥ |gataḥ khalu mahārājo brahmalokaṃ jaleśvaraḥ || 7.23.51 ||
gāndharvaṃ varuṇaḥ śrotuṃ yaṃ tvamāhvayase yudhi |tatkiṃ tava vṛthā vīra pariśramya gate nṛpe |ye tu sannihitā vīrāḥ kumārāste parājitāḥ || 7.23.52 ||
rākṣasendrastu tacchrutvā nāma viśrāvya cātmanaḥ |harṣānnādaṃ vimuñcanvai niṣkrānto varuṇālayāt || 7.23.53 ||
āgatastu pathā yena tenaiva vinivṛtya saḥ |laṅkāmabhimukho rakṣo nabhastalagato yayau || 7.23.54 ||
nivartamānaḥ saṃhṛṣṭo rāvaṇassudurātmavān |jahre pathi narendrarṣidevagandharvakanyakāḥ || 7.24.1 ||
darśanīyāṃ hi rakṣaḥ sa kanyāṃ strīṃ vāpi paśyati |hatvā bandhujanaṃ tasyā vimāne tāṃ rurodha ha || 7.24.2 ||
evaṃ pannagakanyāśca rākṣasāsuramānuṣīḥ |yakṣadānavakanyāśca vimāne so 'dhyaropayat || 7.24.3 ||
tāśca sarvāḥ samaṃ duḥkhānmumucurbāṣpajaṃ jalam |tulyamagnyarciṣāṃ tatra śokāgnibhayasambhavam || 7.24.4 ||
tābhiḥ sarvānavadyābhirnadībhiriva sāgaraḥ |āpūritaṃ vimānaṃ tadbhayaśokāśivāśrubhiḥ || 7.24.5 ||
nāgagandharvakanyāśca maharṣitanayāśca yāḥ |daityadānavakanyāśca vimāne śataśo 'rudan || 7.24.6 ||
dīrghakeśyaḥ sucārvaṅgyaḥ pūrṇacandranibhānanāḥ |pīnastanyastathā vajravedimadhyasamaprabhāḥ || 7.24.7 ||
rathakūbarasaṅkāśaiḥ śroṇideśairmanoharāḥ |striyaḥ surāṅganāprakhyā niṣṭaptakanakaprabhāḥ || 7.24.8 ||
śokaduḥkhabhayatrastā vihvalāśca sumadhyamāḥ |tāsāṃ niśvāsavātena sarvataḥ sampradīpitam || 7.24.9 ||
agnihotramivābhāti sanniruddhāgnipuṣpakam |daśagrīvavaśaṃ prāptāstāstu śokākulāḥ striyaḥ || 7.24.10 ||
dīnavakrekṣaṇāḥ śyāmā mṛgyaḥ siṃhavaśā iva |kāciccintayatī tatra kiṃ nu māṃ bhakṣayiṣyati || 7.24.11 ||
kāciddadhyau suduḥkhārtā api māṃ mārayedayam |iti mātṛpita'nsmṛtvā bharta'nbhrāta'ṃstathaiva ca |duḥkhaśokasamāviṣṭā vilepuḥ sahitāḥ striyaḥ || 7.24.12 ||
kathaṃ nu khalu me putro bhaviṣyati mayā vinā |kathaṃ mātā kathaṃ bhrātā nimagnāḥ śokasāgare || 7.24.13 |||
hā kathaṃ nu kariṣyāmi bhartustasmādahaṃ vinā |mṛtyo prasādayāmi tvāṃ naya māṃ duḥkhabhāginīm || 7.24.14 ||
kinnu tadduṣkṛtaṃ karma purā dehāntare kṛtam || 7.24.15 ||
evaṃ sma duḥkhitāḥ sarvāḥ patitāḥ śokasāgare |na khalvidānīṃ paśyāmo duḥkhasyāsyāntamātmanaḥ || 7.24.16 ||
aho dhiṅmānuṣaṃ lokaṃ nāsti khalvadhamaḥ paraḥ |yaddurbalā balavatā bhartāro rāvaṇena naḥ || 7.24.17 ||
sūryeṇodayatā kāle nakṣatrāṇīva nāśitāḥ |aho subalavadrakṣo vadhopāyeṣu yujyate || 7.24.18 ||
aho durvṛttamāsthāya nātmānaṃ vaijugupsate |sarvathā sadṛśastāvadvikramo 'sya durātmanaḥ || 7.24.19 ||
idaṃ tvasadṛśaṃ karma paradārābhimarśanam |yasmādeṣa parakyāsu ramate rākṣasādhamaḥ || 7.24.20 ||
tasmādvai strīkṛtenaiva prāpsyate durmatirvadham |satībhirvaranārībhirevaṃ vākye 'bhyudīrite || 7.24.21 ||
nedurdundubhayaḥ khasthāḥ puṣpavṛṣṭiḥ papāta ca |śaptaḥ strībhiḥ sa tu samaṃ hataujā iva niṣprabhaḥ || 7.24.22 ||
pativratābhiḥ sādhvībhirbabhūva vimanā iva |evaṃ vilapitaṃ tāsāṃ śṛṇvanrākṣasapuṅgavaḥ |praviveśa purīṃ laṅkāṃ pūjyamāno niśācaraiḥ || 7.24.23 ||
etasminnantare ghorā rākṣasī kāmarūpiṇī |sahasā patitā bhūmau bhaginī rāvaṇasya sā || 7.24.24 ||
tāṃ svasāraṃ samutthāpya rāvaṇaḥ parisāntvayan |abravītkimidaṃ bhadre vaktukāmā 'si me drutam || 7.24.25 ||
sā bāṣpapariruddhākṣī raktākṣī vākyamabravīt |kṛtā 'smi vidhavā rājaṃstvayā balavatā balāt || 7.24.26 ||
ete rājaṃstvayā vīrā daityā vinihatā raṇe |kālakeyā iti khyātāḥ sahasrāṇi caturdaśa || 7.24.27 ||
prāṇebhyo 'pi garīyānme tatra bhartā mahābalaḥ || 7.24.28 ||
so 'pi tvayā hatastāta ripuṇā bhrātṛgṛdhnunā |tvayā 'smi nihatā rājansvayameva hi bandhunā || 7.24.29 ||
rājanvaidhavyaśabdaṃ ca bhokṣyāmi tvatkṛte hyaham |nanu nāma tvayā rakṣyo jāmātā samareṣvapi |sa tvayā nihato yuddhe svayameva na lajjase || 7.24.30 ||
evamukto daśagrīvo bhaginyā krośamānayā |abravītsāntvayitvā tāṃ sāmapūrvamidaṃ vacaḥ || 7.24.31 ||
alaṃ vatse ruditvā te na bhetavyaṃ ca sarvaśaḥ |dānamānaprasādaistvāṃ toṣayiṣyāmi yatnataḥ || 7.24.32 ||
yuddhapramatto vyākṣipto jayākāṅkṣī kṣipañcharān |nāvagacchāmi yuddheṣu svānparānvāpyahaṃ śubhe || 7.24.33 ||
jāmātaraṃ na jāne sma praharanyuddhadurmadaḥ |tenāsau nihataḥ saṅkhye mayā bhartā tava svasaḥ || 7.24.34 ||
asminkāle tu yatprāptaṃ tatkariṣyāmi te hitam |bhrāturaiśvaryayuktasya kharasya vasa pārśvataḥ || 7.24.35 ||
caturdaśānāṃ bhrātā te sahasrāṇāṃ bhaviṣyati |prabhuḥ prayāṇe dāne ca rākṣasānāṃ mahābalaḥ || 7.24.36 ||
tatra mātṛṣvaseyaste bhrātā 'yaṃ vai kharaḥ prabhuḥ |bhaviṣyati tavādeśaṃ sadā kurvanniśācaraḥ || 7.24.37 ||
śīghraṃ gacchatvayaṃ vīro daṇḍakānparirakṣitum |dūṣaṇo 'sya balādhyakṣo bhaviṣyati mahābalaḥ || 7.24.38 ||
tatra te vacanaṃ śūraḥ kariṣyati sadā kharaḥ |rakṣasāṃ kāmarūpāṇāṃ prabhureṣa bhaviṣyati || 7.24.39 ||
evamuktvā daśagrīvaḥ sainyamasyādideśa ha |caturdaśa sahasrāṇi rakṣasāṃ vīryaśālinām || 7.24.40 ||
sa taiḥ parivṛtassarvai rākṣasairghoradarśanaiḥ |āgacchata kharaḥ śīghraṃ daṇḍakānakutobhayaḥ || 7.24.41 ||
sa tatra kārayāmāsa rājyaṃ nihatakaṇṭakam |sā ca śūrpaṇakhā tatra nyavasaddaṇḍakāvane || 7.24.42 ||
sa tu dattvā daśagrīvo vanaṃ ghoraṃ svarasya tat |bhaginīṃ ca samāśvāsya hṛṣṭaḥ svasthataro 'bhavat || 7.25.1 ||
tato nikumbhilā nāma laṅkopavanamuttamam |tadrākṣasendro balavānpraviveśa sahānugaḥ || 7.25.2 ||
tato yūpaśatākīrṇaṃ saumyacaityopaśobhitam |dadarśa viṣṭhitaṃ yajñaṃ śriyā samprajvalanniva || 7.25.3 ||
tataḥ kṛṣṇājinadharaṃ kamaṇḍaluśikhādhvajam |dadarśa svasutaṃ tatra meghanādaṃ bhayāvaham || 7.25.4 ||
taṃ samāsādya laṅkeśaḥ pariṣvajvātha bāhubhiḥ |abravītkimidaṃ vatsa vartase brūhi tattvataḥ || 7.25.5 ||
uśanā tvabravīttatra yajñasampatsamṛddhaye |rāvaṇaṃ rākṣasaśreṣṭhaṃ dvijaśreṣṭho mahātapāḥ || 7.25.6 ||
ahamākhyāmi te rājañchrūyatāṃ sarvameva tat |yajñāste sapta putreṇa prāptāssubahuvistarāḥ || 7.25.7 ||
agniṣṭomo 'śvamedhaśca yajño bahusuvarṇakaḥ |rājasūyastathā yajño gomedho vaiṣvavastathā || 7.25.8 ||
māheśvare pravṛtte tu yajñe pumbhiḥ sudurlabhe |varāṃste labdhavānputraḥ sākṣātpaśupateriha || 7.25.9 ||
kāmagaṃ syandanaṃ divyamantarikṣacaraṃ dhruvam |māyāṃ ca tāmasīṃ nāma yayā sampadyate tamaḥ || 7.25.10 ||
etayā kila saṅgrāme māyayā rākṣaseśvara |prayuktayā gatiḥ śakyā nahi jñātuṃ surāsuraiḥ || 7.25.11 ||
akṣayāviṣudhī bāṇaiścāpaṃ cāpi sudurjayam |astraṃ ca balavadrājañchatruvidhvaṃsanaṃ raṇe || 7.25.12 ||
etānsarvānvarāṃllabdhvā putraste 'yaṃ daśānana |adya yajñasamāptau ca tvāṃ didṛkṣussthito hyaham || 7.25.13 ||
tato 'bravīdṛśagrīvo na śobhanamidaṃ kṛtam |pūjitāḥ śatravo yasmāddravyairindrapurogamāḥ || 7.25.14 ||
ehīdānīṃ kṛtaṃ viddhi sukṛtaṃ tanna saṃśayaḥ |āgaccha saumya gacchāmaḥ svameva bhavanaṃ prati || 7.25.15 ||
tato gatvā daśagrīvaḥ saputraḥ savibhīṣaṇaḥ |striyo 'vatārayāmāsa sarvāstā bāṣpagadgadāḥ || 7.25.16 ||
lakṣiṇyo ratnabhūtāśca devadānavarakṣasām |tasya tāsu matiṃ jñātvā dharmatmā vākyamabravīt || 7.25.17 ||
īdṛśaistvaṃ samācārairyaśorthakulanāśanaiḥ |dharṣaṇaṃ jñātināṃ jñātvā svamatena viceṣṭase || 7.25.18 ||
jñātīṃstāndharṣayitvemāstvayā ' 'nītā varāṅganāḥ |tvāmatikramya madhunā rājankumbhīnasī hṛtā || 7.25.19 ||
rāvaṇastvabravīdvākyaṃ nāvagacchāmi kiṃ tvidam |ko 'yaṃ yastu tvayā ' 'khyāto madhurityeva nāmataḥ || 7.25.20 ||
vibhīṣaṇastu saṅkruddho bhrātaraṃ vākyamabravīt |śrūyatāmasya pāpasya karmaṇaḥ phalamāgatam || 7.25.21 ||
mātāmahasya yo bhrātā jyeṣṭho bhrātā sumālinaḥ |mālyavāniti vikhyāto vṛddhaḥ prājño niśācaraḥ || 7.25.22 ||
pitā jyeṣṭho jananyā no hyasmākaṃ cāryako 'bhavat |tasya kumbhīnasī nāma duhiturduhitā 'bhavat || 7.25.23 ||
mātṛṣvasurathāsmākaṃ sā ca kanyā 'nalodbhavā |bhavatyasmākamevaiṣā bhrātṛṇāṃ dharmataḥ svasā || 7.25.24 ||
sā hṛtā, madhunā rājanrākṣasena balīyasā |yajñapravṛtte putre tu mayi cāntarjaloṣite || 7.25.25 ||
kumbhakarṇe mahārāja nidrāmanubhavatyatha |nihatya rākṣasaśreṣṭhānamātyāniha sammatān || 7.25.26 ||
dharṣayitvā hṛtā sā tu suptāpyantaḥpure tava |śrutvā 'pi tanmahārāja kṣāntameva hato na saḥ || 7.25.27 ||
yasmādavaśyaṃ dātavyā kanyā bhartre hi bhrātṛbhiḥ |tadetatkarmaṇo hyasya phalaṃ pāpasya durmate || 7.25.28 ||
asminnevābhisamprāptaṃ loke viditamastu te |vibhīṣaṇavacaḥ śrutvā rākṣasendraḥ sa rāvaṇaḥ |daurātmyenātmanoddhūtastaptāmbha iva sāgaraḥ || 7.25.29 ||
tato 'bravīdṛśagrīvaḥ kruddhaḥ saṃraktalocanaḥ |kalpyatāṃ me rathaḥ śīghraṃ śūrāḥ sajjībhavantu naḥ || 7.25.30 ||
bhrātā me kumbhakarṇaśca ye ca mukhyā niśācarāḥ |vāhanānyadhirohantu nānāpraharaṇāyudhāḥ || 7.25.31 ||
adya taṃ samare hatvā madhuṃ rāvaṇanirbhayam |suralokaṃ gamiṣyāmi yuddhakāṅkṣī suhṛdvṛtaḥ || 7.25.32 ||
akṣauhiṇīsahasrāṇi catvāryagryāṇi rakṣasām |nānāpraharaṇānyāśu niryayuryuddhakāṅkṣiṇām || 7.25.33 ||
indrajittvagrataḥ (agrataḥ) sainyātsainikānparigṛhya ca |jagāma rāvaṇo madhye kumbhakarṇaśca pṛṣṭhataḥ || 7.25.34 ||
vibhīṣaṇaśca dharmātmā laṅkāyāṃ dharmāmācarat |śoṣāḥ sarve mahābhāgā yayurmadhupuraṃ prati || 7.25.35 ||
kharairuṣṭrairhayairdīptaiḥ śiṃśumārairmahoragaiḥ |rākṣasāḥ prayayuḥ sarve kṛtvā ' 'kāśaṃ nirantaram || 7.25.36 ||
daityāśca śataśastatra kṛtavairāśca daivataiḥ |rāvaṇaṃ prekṣya gacchantamanvagacchanhi pṛṣṭhataḥ || 7.25.37 ||
sa tu gatvā madhupuraṃ praviśya ca daśānanaḥ |na dadarśa madhuṃ tatra bhaginīṃ tatra dṛṣṭavān || 7.25.38 ||
sā ca prahvāñjalirbhūtvā śirasā caraṇau gatā || 7.25.39 ||
tasya rākṣasarājasya trastā kumbhīnasī tadā |tāṃ samutthāpayāmāsa na bhetavyamiti bruvan || 7.25.40 ||
rāvaṇo rākṣasaśreṣṭhaḥ kiṃ cāpi karavāṇi te |sābravīdyadi me rājanprasannastvaṃ mahābhuja |bhartāraṃ na mamehādya hanturmahasi mānada || 7.25.41 ||
na hīdṛśaṃ bhayaṃ kiñcitkulastrīṇāmihocyate |bhayānāmapi sarveṣāṃ vaidhavyaṃ vyasanaṃ mahat || 7.25.42 ||
satyavāgbhava rājendra māmavekṣasva yācatīm |tvayāpyuktaṃ mahārāja na bhetavyamiti svayam || 7.25.43 ||
rāvaṇastvabravīddhṛṣṭaḥ svasāraṃ tatra saṃsthitām |kva cāsau tava bhartā vai mama śīghraṃ nivedyatām || 7.25.44 ||
saha tena gamiṣyāmi suralokaṃ jayāvahe |tava kāruṇyasauhārdānnivṛtto 'smi madhorvadhāt || 7.25.45 ||
ityuktā sā samutthāpya prasuptaṃ taṃ niśācaram |abravītsamprahṛṣṭeva rākṣasī sā patiṃ vacaḥ || 7.25.46 ||
eṣa prāpto daśagrīvo mama bhrātā mahābalaḥ |suralokajayākāṅkṣī sāhāyye tvāṃ vṛṇoti ca || 7.25.47 ||
tadasya tvaṃ sahāyārthaṃ sabandhurgaccha rākṣasa |snigdhasya bhajamānasya yuktamarthāya kalpitum || 7.25.48 ||
tasyāstadvacanaṃ śrutvā tathetyāha madhurvacaḥ || 7.25.49 ||
dadarśa rākṣasaśreṣṭhaṃ yathānyāyamupetya saḥ |pūjayamāsa dharmeṇa rāvaṇaṃ rākṣasādhipam || 7.25.50 ||
prāpya pūjāṃ daśagrīvo madhuveśmāni vīryavān |tatra caikāṃ niśāmuṣya gamanāyopacakrame || 7.25.51 ||
tataḥ kailāsamāsādya śailaṃ vaiśravaṇālayam |rākṣasendro mahendrābhaḥ senāmupaniveśayat || 7.25.52 ||
sa tu tatra daśagrīvaḥ saha sainyena vīryavān |astaṃ prāpte dinakare nivāsaṃ samarocayat || 7.26.1 ||
udite vimale candre tulyaparvatavarcasi |prasuptaṃ sumahatsainyaṃ nānāpraharaṇāyudham || 7.26.2 ||
rāvaṇastu mahāvīryo niṣaṇṇaḥ śailamūrdhani |sa dadarśa guṇāṃstatra candrapādapaśobhitān || 7.26.3 ||
karṇikāravanairdīptaiḥ kadambagahanaistathā |padminībhiśca phullābhirmandākinyā jalairapi || 7.26.4 ||
campakāśokapunnāgamandāratarubhistathā |cūtapāṭalalodhraiśca priyaṅgvarjunaketakaiḥ |tagarairnārikailaiśca priyālapanasaistathā || 7.26.5 ||
āragvadhaistamālaiśca priyālavakulairapi |etairanyaiśca tarubhirudbhāsitavanāntare |kinnarā madanenārtā raktā madhurakaṇṭhinaḥ || 7.26.6 ||
samaṃ samprajaguryatra manastuṣṭivivardhanam || 7.26.7 ||
bhirudbhāsitavanāntare |vidyādharā madakṣībā madaraktāntalocanāḥ |yoṣidbhiḥ saha saṅkrāntāścikrīḍurjahṛṣuśca vai || 7.26.8 ||
ghaṇṭānāmiva sannādaḥ śuśruve madhurasvaraḥ |apsarogaṇasaṅghānāṃ gāyatāṃ dhanadālaye || 7.26.9 ||
puṣpavarṣāṇi muñcanto nagāḥ pavanatāḍitāḥ |śailaṃ taṃ vāsayantīva madhumādhavagandhinaḥ || 7.26.10 ||
madhupuṣparajaḥpṛktaṃ gandhamādāya puṣkalam |pravavau vardhayankāmaṃ rāvaṇasya sukho 'nilaḥ || 7.26.11 ||
geyātpuṣpasamṛddhyā ca śaityādvāyorgirerguṇāt |pravṛttāyāṃ rajanyāṃ ca candrasyodayanena ca || 7.26.12 ||
rāvaṇastu mahāvīryaḥ kāmasya vaśamāgataḥ |viniḥśvasya viniḥśvasya śaśinaṃ samavaikṣata || 7.26.13 ||
etasminnantare tatra divyābharaṇabhūṣitā |sarvāpsarovarā rambhā divyapuṣpavibhūṣitā || 7.26.14 ||
divyacandanaliptāṅgī mandārakṛtamūrdhajā |divyotsavakṛtārambhā pūrṇacandranibhānanā || 7.26.15 ||
cakṣurmanoharaṃ pīnaṃ mekhalādāmabhūṣitam |samudvahantī jaghanaṃ ratiprābhṛtamuttamam || 7.26.16 ||
kṛtairviśeṣakairārdraiḥ ṣaḍartukusumodbhavaiḥ || 7.26.17 ||
babhāvanyatameva śrīkāntidyutimatihriyām |nīlaṃ satoyameghābhaṃ vastraṃ samavakuṇṭhitā || 7.26.18 ||
yasyā vaktraṃ śaśinibhaṃ bhruvau cāpanibhe śubhe |ūrū karikarākārau karau pallavakomalau |sainyamadhyena gacchantī rāvaṇenopavīkṣitā || 7.26.19 ||
tāṃ samutthāya gacchantīṃ kāmabāṇavaśaṃ gataḥ |kare gṛhītvā lajjantīṃ smayamāno 'bhyabhāṣata || 7.26.20 ||
kva gacchasi varārohe kāṃ siddhiṃ bhajase svayam |kasyābhyudayakālo 'yaṃ yastvāṃ samupabhokṣyate || 7.26.21 ||
tvadānanarasasyādya padmotpalasugandhinaḥ |sudhāmṛtarasasyeva ko 'dya tṛptiṃ gamiṣyati || 7.26.22 ||
svarṇakumbhanibhau pīnau śubhau bhīru nirantarau |kasyorasthalasaṃsparśaṃ dāsyataste kucāvimau || 7.26.23 ||
suvarṇacakrapratimaṃ svarṇadāmacitaṃ pṛthu |adhyārohati kaste 'dya jaghanaṃ svargarūpiṇam || 7.26.24 ||
madviśiṣṭaḥ pumānko 'dya śakro viṣṇurathāśvinau |māmatītya hi yaṃ ca tvaṃ yāsi bhīru na śobhanam || 7.26.25 ||
viśrama tvaṃ pṛthuśroṇi śilātalamidaṃ śubham || 7.26.26 ||
trailokye yaḥ prabhuścaiva madanyo naiva vidyate || 7.26.27 ||
tadevaṃ prāñjaliḥ prahvo yācate tvāṃ daśānanaḥ |bharturbhartā vidhātā ca trailokyasya bhajasva mām || 7.26.28 ||
evamuktā 'bravīdrambhā vepamānā kṛtāñjaliḥ |prasīda nārhase vaktumīdṛśaṃ tvaṃ hi me guruḥ || 7.26.29 ||
anyebhyo hi tvayā rakṣyā prāpnuyāṃ dharṣaṇaṃ yadi |taddharmataḥ snuṣā te 'haṃ tattvameva bravīmi te || 7.26.30 ||
athābravīddaśagrīvaścaraṇādhomukhīṃ sthitām |romaharṣamanuprāptāṃ dṛṣṭamātreṇa tāṃ tadā || 7.26.31 ||
sutasya yadi me bhāryā tatastvaṃ hi snuṣā bhaveḥ |bāḍhamityeva sā rambhā prāha rāvaṇamuttaram || 7.26.32 ||
dharmataste sutasyāhaṃ bhāryā rākṣasapuṅgava |putraḥ priyataraḥ prāṇairbhrāturvaiśravaṇasya te |vikhyātastriṣu lokeṣu nalakūbara ityayam || 7.26.33 ||
dharmato yo bhavedvipraḥ kṣatriyo vīryato bhavet |krodhādyaśca bhavedagniḥ kṣāntyā ca vasudhāsamaḥ || 7.26.34 ||
tasyāsmi kṛtasaṅketā lokapālasutasya vai |tamuddiśya tu me sarvaṃ vibhūṣaṇamidaṃ kṛtam || 7.26.35 ||
tathā tasya hi nānyasya bhāvo māṃ prati tiṣṭhati || 7.26.36 ||
tena satyena māṃ rājanmoktumarhasyarindama || 7.26.37 ||
sa hi tiṣṭhati dharmātmā māṃ pratīkṣya samutsukaḥ |tatra vighnaṃ sutasyeha kartuṃ nārhasi muñca mām || 7.26.38 ||
sadbhirācaritaṃ mārgaṃ gaccha rākṣasupuṅgava |mānanīyo mama tvaṃ hi pālanīyā tathā 'smi te || 7.26.39 ||
evamukto daśagrīvaḥ pratyuvāca vinītavat |snuṣā 'smi yadavocastvamekapatnīṣvayaṃ kramaḥ |devalokasthitiriyaṃ surāṇāṃ śāśvatī matā || 7.26.40 ||
patirapsarasāṃ nāsti na caikastrīparigrahaḥ || 7.26.41 ||
smi yadavocastvamekapatnīṣvayaṃ kramaḥ |evamuktvā sa tāṃ rakṣo niveśya ca śilātale |kāmabhogābhisaṃsakto maithunāyopacakrame || 7.26.42 ||
sā vimuktā tato rambhā bhraṣṭamālyavibhūṣaṇā |gajendrākrīḍamathitā nadīvākulatāṃ gatā || 7.26.43 ||
lulitākulakeśāntā karavepitapallavā |pavanenāvadhūteva latā kusumaśālinī || 7.26.44 ||
sā vepamānā lajjantī bhītā karakṛtāñjaliḥ |nalakūbaramāsādya pādayornipapāta ha || 7.26.45 ||
tadavasthāṃ ca tāṃ dṛṣṭvā mahātmā nalakūbaraḥ |abravītkimidaṃ bhadre pādayoḥ patitā 'si me || 7.26.46 ||
sā vai niḥśvasamānā tu vepamānā kṛtāñjaliḥ |tasmai sarvaṃ yathātattvamākhyātumupacakrame || 7.26.47 ||
eṣa deva daśagrīvaḥ prāpto gantuṃ triviṣṭapam |tena sainyasahāyena niśeyaṃ pariṇāmitā || 7.26.48 ||
āyantī tena dṛṣṭā 'smi tvatsakāśamarindama |gṛhītā tena pṛṣṭā 'smi kasya tvamiti rakṣasā || 7.26.49 ||
mayā tu sarvaṃ yatsatyaṃ tasmai sarvaṃ niveditam |kāmamohābhibhūtātmā nāśrauṣīttadvaco mama || 7.26.50 ||
yācyamāno mayā deva snuṣā te 'hamiti prabho |tatsarvaṃ pṛṣṭhataḥ kṛtvā balāttenāsmi dharṣitā || 7.26.51 ||
evaṃ tvamaparādhaṃ me kṣantumarhasi suvrata |na hi tulyaṃ balaṃ saumya striyāśca puruṣasya ca || 7.26.52 ||
etachutvā tu saṅkruddhastadā vaiśravaṇātmajaḥ |dharṣaṇāṃ tāṃ parāṃ śrutvā dhyānaṃ sampraviveśa ha || 7.26.53 ||
tasya tatkarma vijñāya tadā vaiśravaṇātmajaḥ |muhūrtātkrodhatāmrākṣastoyaṃ jagrāha pāṇinā || 7.26.54 ||
gṛhītvā salilaṃ sarvamupaspṛśya yathāvidhi |utsasarja yathā śāpaṃ rākṣasendrāya dāruṇam || 7.26.55 ||
akāmā tena yasmāttvaṃ balādbhadre pradharṣitā |tasmātsa yuvatīmanyāṃ nākāmāmupayāsyati || 7.26.56 ||
yadā hyakāmāṃ kāmārto dharṣayiṣyati yoṣitam |mūrdhā tu saptadhā tasya śakalībhavitā tadā || 7.26.57 ||
tasminnudāhṛte śāpe jvalitāgnisamaprabhe |devadundubhayo neduḥ puṣpavṛṣṭiśca khāccyutā |pitāmahamukhāścaiva sarve devāḥ praharṣitāḥ || 7.26.58 ||
jñātvā lokagatiṃ sarvāṃ tasya mṛtyuṃ ca rakṣasaḥ |ṛṣayaḥ pitaraścaiva prītimāpuranuttamām || 7.26.59 ||
śrutvā tu sa daśagrīvastaṃ śāpaṃ romaharṣaṇam |nārīṣu maithune bhāvaṃ nākāmāsvabhyarocayat || 7.26.60 ||
tena nītāḥ striyaḥ prītimāpuḥ sarvāḥ pativratāḥ |nalakūbaranirmuktaṃ śāpaṃ śrutvā manaḥpriyam || 7.26.61 ||
kailāsaṃ laṅghayitvātha daśagrīvaḥ sa rāvaṇaḥ |āsasāda mahātejā indralokaṃ niśācaraḥ || 7.27.1 ||
tasya rākṣasasainyasya samantādupayāsyataḥ |devalokaṃ yayau śabdo mathyamānārṇavopamaḥ || 7.27.2 ||
śrutvā tu rāvaṇaṃ prāptamindraścalita āsanāt |abravīttatra tān devān sarvāneva samāgatān || 7.27.3 ||
ādityānsavasūnrudrānviśvānsādhyānmarudgaṇān |sajjībhavata yuddhārthaṃ rāvaṇasya durātmanaḥ || 7.27.4 ||
evamuktāstu śakreṇa devāḥ śakrasamā yudhi |sannahya sumahāsattvā yuddhaśraddhāsamanvitāḥ || 7.27.5 ||
sa tu dīnaḥ paritrasto mahendro rāvaṇaṃ prati |viṣṇoḥ samīpamāgatya vākyametaduvāca ha || 7.27.6 ||
viṣṇo kathaṃ kariṣyāmi mahāvīryaparākramaḥ |asau hi balavadrakṣo yuddhārthamabhivartate || 7.27.7 ||
varapradānādbalavānna khalvanyena hetunā |tattu satyavacaḥ kāryaṃ yaduktaṃ padmayoninā || 7.27.8 ||
tadyathā namucirvṛtro balirnarakaśambarau |tvadbalaṃ samavaṣṭabhya mayā dagdhāstathā kuru || 7.27.9 ||
nahyanyo devadeveśa tvāmṛte madhusūdana |gatiḥ parāyaṇaṃ nāsti trailokye sacarācare || 7.27.10 ||
tvaṃ hi nārāyaṇaḥ śrīmānpadmanābhaḥ sanātanaḥ |tvayeme sthāpitā lokāḥ śakraścāhaṃ sureśvaraḥ || 7.27.11 ||
tvayā sṛṣṭamidaṃ sarvaṃ trailokyaṃ sacarācaram |tvāmeva bhagavansarve praviśanti yugakṣaye || 7.27.12 ||
tadācakṣva yathā tattvaṃ devadeva mama svayam |api cakrasahāyastvaṃ yotsyase rāvaṇaṃ prabho || 7.27.13 ||
evamuktaḥ sa śakreṇa devo nārāyaṇaḥ prabhuḥ |abravīnna paritrāsaḥ kartavyaḥ śrūyatāṃ ca me || 7.27.14 ||
na tāvadeṣa duṣṭātmā śakyo jetuṃ surāsuraiḥ |hantuṃ cāpi samāsādya varadānena durjayaḥ || 7.27.15 ||
sarvathā tu mahatkarma kariṣyati balotkaṭaḥ |rākṣasaḥ putrasahito dṛṣṭametannisargataḥ || 7.27.16 ||
yattu māṃ tvamabhāṣiṣṭha yuddhyasveti sureśvara |nāhaṃ taṃ pratiyotsyāmi rāvaṇaṃ rākṣasaṃ yudhi || 7.27.17 ||
nāhatvā samare śatruṃ viṣṇuḥ pratinivartate |durlabhaścaiva kāmo 'dya varaguptāddhi rāvaṇāt || 7.27.18 ||
pratijāne ca devendra tvatsamīpe śatakrato |bhavitā 'smi yathā 'syāhaṃ rakṣaso mṛtyukāraṇam || 7.27.19 ||
ahameva nihantā 'smi rāvaṇaṃ sapuraḥsaram |devatā nandayiṣyāmi jñātvā kālamupāgatam |etatte kathitaṃ tattvaṃ devarāja śacīpate || 7.27.20 ||
yuddhyasva vigatatrāsaḥ sarvaiḥ sārdhaṃ mahābala || 7.27.21 ||
yāmi jñātvā kālamupāgatam |tato rudrāḥ sahādityā vasavo maruto 'śvanau |sannaddhā niryayustūrṇaṃ rākṣasānabhitaḥ purāt || 7.27.22 ||
etasminnantare nādaḥ śuśruve rajanīkṣaye |tasya rāvaṇasainyasya prayuddhasya samantataḥ || 7.27.23 ||
te prayuddhā mahāvīryā hyanyonyamabhivīkṣya vai |saṅgrāmamevābhimukhā hyabhavartanta hṛṣṭavat || 7.27.24 ||
tato daivatasainyanāṃ saṅkṣobhaḥ samajāyata |tadakṣayaṃ mahāsainyaṃ dṛṣṭvā samaramūrdhani || 7.27.25 ||
tato yuddhaṃ samabhaveddevadānavarakṣasām |ghoraṃ tumulanirhrādaṃ nānāpraharaṇodyatam || 7.27.26 ||
etasminnantare śūrā rākṣasā ghoradarśanāḥ |yuddhārthaṃ samavartanta sacivā rāvaṇasya te || 7.27.27 ||
mārīcaśca prahastaśca mahāpārśvamahodarau |akampano nikumbhaśca śukaḥ sāraṇa eva ca || 7.27.28 ||
saṃhlādo dhūmaketuśca mahādaṃṣṭro ghaṭodaraḥ |jambumālī mahāhrādo virūpākṣaśca rākṣasaḥ || 7.27.29 ||
suptaghno yajñakopaśca durmukho dūṣaṇaḥ kharaḥ |triśirāḥ karavīrākṣaḥ sūryaśatruśca rākṣasaḥ || 7.27.30 ||
mahākāyo 'tikāyaśca devāntakanarāntakau |etaiḥ sarvaiḥ parivṛto mahāvīryo mahābalaḥ || 7.27.31 ||
rāvaṇasyāryakaḥ sainyaṃ sumālī praviveśa ha |sa daivatagaṇānsarvānnānāpraharaṇaiḥ śitaiḥ |vyadhvaṃsayatsusaṅkruddho vāyurjaladharāniva || 7.27.32 ||
taddaivatabalaṃ rāma hanyamānaṃ niśācaraiḥ |praṇunnaṃ sarvato digbhyaḥ siṃhanunnā mṛgā iva || 7.27.33 ||
etasminnantare śūro vasūnāmaṣṭamo vasuḥ |sāvitra iti vikhyātaḥ praviveśa raṇājiram || 7.27.34 ||
tathā ' 'dityau mahāvīryau tvaṣṭā pūṣā ca daṃśitau |niṃrbhayau saha sainyena tadā prāviśatāṃ raṇe || 7.27.35 ||
tato yuddhaṃ samabhavatsurāṇāṃ saha rākṣasaiḥ |kruddhānāṃ rakṣasāṃ kīrtiṃ samareṣvanivartinām || 7.27.36 ||
tataste rākṣasāḥ sarve vibudhānsamare sthitān |nānāpraharaṇairghorairjaghnuḥ śatasahasraśaḥ || 7.27.37 ||
devāśca rākṣasānghorānmahābalaparākramān |samare vimalaiḥ śastrairupaninyuryamakṣayam || 7.27.38 ||
etasminnantare rāma sumālī nāma rākṣasaḥ |nānāpraharaṇaiḥ kruddhastatsainyaṃ so 'bhyavartata || 7.27.39 ||
sa daivatabalaṃ sarvaṃ nānāprahaṇaiḥ śitaiḥ |vyadhvaṃsayata saṅkruddho vāyurjaladharaṃ yathā || 7.27.40 ||
te mahābāṇavarṣaiśca śūlaprāsaiḥ sudāruṇaiḥ |hanyamānāḥ surāḥ sarve na vyatiṣṭhanta saṃhatāḥ || 7.27.41 ||
tato vidrāvyamāṇeṣu daivateṣu sumālinā |vasūnāmaṣṭamaḥ kruddhaḥ sāvitro vai vyavasthitaḥ || 7.27.42 ||
saṃvṛtaḥ svairathānīkaiḥ praharantaṃ niśācaram |vikrameṇa mahātejā vārayāmāsa saṃyuge || 7.27.43 ||
tatastayormahāyuddhamabhavadromaharṣaṇam || 7.27.44 ||
sumālino vasoścaiva samareṣvanivartinoḥ |tatastasya mahābāṇairvasunā sumahātmanā |nihataḥ pannagarathaḥ kṣaṇena vinipātitaḥ || 7.27.45 ||
hatvā tu saṃyuge tasya rathaṃ bāṇaśataiścitam |gadāṃ tasya vadhārthāya vasurjagrāha pāṇinā || 7.27.46 ||
tataḥ pragṛhya dīptāgrāṃ kāladaṇḍopamāṃ gadām |tāṃ mūrdhni pātayāmāsa sāvitro vai sumālinaḥ || 7.27.47 ||
sā tasyopari colkābhā patantīva babhau gadā |indrapramuktā garjantī girāviva mahāśaniḥ || 7.27.48 ||
tasya naivāsthi na śiro na māṃsaṃ dadṛśe tadā |gadayā bhasmatāṃ nītaṃ nihatasya raṇājire || 7.27.49 ||
taṃ dṛṣṭvā nihataṃ saṅkhye rākṣasāste samantataḥ |vyadravansahitāḥ sarve krośamānāḥ parasparam |vidrāvyamāṇā vasunā rākṣasā nāvatasthire || 7.27.50 ||
sumālinaṃ hataṃ dṛṣṭvā vasunā bhasmasātkṛtam |svasainyaṃ vidrutaṃ cāpi lakṣayitvā 'rditaṃ suraiḥ || 7.28.1 ||
tataḥ sa balavānkruddho rāvaṇasya sutastadā |nivartya rākṣasānsarvānmeghanādo vyavasthitaḥ || 7.28.2 ||
surathenāgnivarṇena kāmagena mahārathaḥ |abhidudrāva senāṃ tāṃ vanānyagniriva jvalan || 7.28.3 ||
tataḥ praviśatastasya vividhāyudhadhāriṇaḥ |vidudruvurdiśaḥ sarvā darśanādeva devatāḥ || 7.28.4 ||
na babhūva tadā kaścidyuyutsorasya sammukhe |sarvānāviddhya vitrastāṃstataḥ śakro 'bravītsurān || 7.28.5 ||
na bhetavyaṃ na gantavyaṃ nivartadhvaṃ raṇe surāḥ |eṣa gacchati putro me yuddhārthamaparājitaḥ || 7.28.6 ||
tataḥ śakrasuto devo jayanta iti viśrutaḥ |rathenādbhutakalpena saṅgrāme so 'bhyavartata || 7.28.7 ||
tataste tridaśāḥ sarve parivārya śacīsutam |rāvaṇasya sutaṃ yuddhe samāsādya prajaghnire || 7.28.8 ||
teṣāṃ yuddhaṃ samabhavatsadṛśaṃ devarakṣasām |mahendrasya ca putrasya rākṣasendrasutasya ca || 7.28.9 ||
tato mātaliputre tu gomukhe rākṣasātmajaḥ |sārathau pātayāmāsa śarānkanakabhūṣaṇān || 7.28.10 ||
śacīsutaścāpi tathā jayantastasya sārathim |taṃ cāpi rāvaṇiḥ kruddhaḥ samantātpratyavidhyata || 7.28.11 ||
sa hi krodhasamāviṣṭo balī visphāritekṣaṇaḥ |rāvaṇiḥ śakratanayaṃ śaravarṣairavākirat || 7.28.12 ||
tato nānāpraharaṇāñchitadhārānsahasraśaḥ |pātayāmāsa saṅkruddhaḥ surasainyeṣu rāvaṇiḥ || 7.28.13 ||
śataghnīmusalaprāsagadākhaḍgaparaśvadhān |mahānti giriśṛṅgāṇi pātayāmāsa rāvaṇiḥ || 7.28.14 ||
tataḥ pravyathitā lokāḥ sañjajñe ca tamo 'bhavat |tasya rāvaṇaputrasya śatrusainyāni nighnataḥ || 7.28.15 ||
tatastaddaivatabalaṃ samantāttaṃ śacīsutam |bahuprakāramasvasthamabhavaccharapīḍitam || 7.28.16 ||
nābhyajānanta cānyonyaṃ rakṣo vā devatā 'thavā |tatra tatra viparyastaṃ samantātparidhāvati || 7.28.17 ||
devā devānnijaghnuste rākṣasānrākṣasāstathā |sammūḍhāstamasācchannā vyadravannapare tathā || 7.28.18 ||
etasminnantare vīraḥ pulomā nāma vīryavān |daityendrastena saṅgṛhya śacīputro 'pavāhitaḥ || 7.28.19 ||
saṅgṛhya taṃ tu dauhitraṃ praviṣṭaḥ sāgaraṃ tadā |āryakaḥ sa hi tasyāsītpulomā yena sā śacī || 7.28.20 ||
jñātvā praṇāśaṃ tu tadā jayantasyātha devatāḥ |aprahṛṣṭāstataḥ sarvā vyathitāḥ sampradudruvuḥ || 7.28.21 ||
rāvaṇistvatha saṅkruddho balaiḥ parivṛtaḥ svakaiḥ |abhyadhāvata devāṃstānmumoca ca mahāsvanam || 7.28.22 ||
dṛṣṭvā praṇāśaṃ putrasya daivateṣu ca vidrutam |mātaliṃ cāha deveśo rathaḥ samupanīyatām || 7.28.23 ||
sa tu divyo mahābhīmaḥ sajja eva mahārathaḥ |upasthito mātalinā vāhyamāno mahājavaḥ || 7.28.24 ||
tato meghā rathe tasmiṃstaḍittvanto mahābalāḥ |agrato vāyucapalā neduḥ paramaniḥsvanāḥ || 7.28.25 ||
nānāvādyāni vādyanta gandharvāśca samāhitāḥ |nanṛtuścāpsaraḥsaṅghā niryāte tridaśeśvare || 7.28.26 ||
rudrairvasubhirādityaissādhyaiśca samarudgaṇaiḥ |vṛto nānāpraharaṇairniryayau tridaśādhipaḥ || 7.28.27 ||
nirgacchatastu śakrasya paruṣaṃ pavano vavau |bhāskaro niṣprabhaścāsīnmaholkāśca prapedire || 7.28.28 ||
etasminnantare śūro daśagrīvaḥ pratāpavān |āruroha rathaṃ divyaṃ nirmitaṃ viśvakarmaṇā || 7.28.29 ||
pannagaiḥ sumahākāryairveṣṭitaṃ romaharṣaṇaiḥ |teṣāṃ niḥśvāsavātena pradīptamiva saṃyuge || 7.28.30 ||
daityairniśācaraiścaiva sa rathaḥ parivāritaḥ |samarābhimukho daityo mahendraṃ so 'bhyavartata || 7.28.31 ||
putraṃ taṃ vārayitvā tu svayameva vyavasthitaḥ |so 'pi yuddhādviniṣkramya rāvaṇiḥ samupāviśat || 7.28.32 ||
tato yuddhaṃ pravṛttaṃ tu surāṇāṃ rākṣasaiḥ saha |śastrāṇi varṣatāṃ ghoraṃ meghānāmiva saṃyuge || 7.28.33 ||
kumbhakarṇastu duṣṭātmā nānāpraharaṇodyataḥ |nājñāyata tadā yuddhe saha kenāpyayudhyata || 7.28.34 ||
dantaiḥ bhujābhyāṃ padmāṃ ca śaktitomarasāyakaiḥ |yena kenaiva saṃrabdhastāḍayāmāsa vai surān || 7.28.35 ||
tato rudrairmahāghoraiḥ saṅgamyātha niśācaraḥ |prayuddhastaiśca saṅgrāme kṣataḥ śastrairnirantaram || 7.28.36 ||
babhau śastrācitatanuḥ kumbhakarṇaḥ kṣarannasṛk |vidyutstanitanirghoṣo dhāravāniva toyadaḥ || 7.28.37 ||
tatastadrākṣasaṃ sainyaṃ prayuddhaṃ samarudgaṇaiḥ |raṇe vidrāvitaṃ sarvaṃ nānāpraharaṇaiḥ śitaiḥ || 7.28.38 ||
kecidvinihatāḥ kṛttāśceṣṭanti sma mahītale |vāhaneṣvavasaktāśca sthitā evāpare raṇe || 7.28.39 ||
rathānnāgānkharānuṣṭrānpannagāṃsturagān raṇe |śiṃśumārānvarāhāṃśca piśācavadanāntathā || 7.28.40 ||
tānsamāliṅgya bāhubhyāṃ viṣṭabdhāḥ keciducchrutāḥ |devaistu śastrasambhinnā mamrire ca niśācarāḥ || 7.28.41 ||
citrakarma ivābhāti sa teṣāṃ raṇasamplavaḥ |nihatānāṃ pramattānāṃ rākṣasānāṃ mahītale || 7.28.42 ||
śoṇitodakaniṣpandakaṅkagṛdhrasamākulā |pravṛttā saṃyugamukhe śastragrāhavatī nadī || 7.28.43 ||
etasminnantare kruddho daśagrīvaḥ pratāpavān |nirīkṣya tadbalaṃ kṛtsnaṃ daivatairvinipātitam || 7.28.44 ||
sa taṃ prati vigāhyāśu pravṛddhaṃ sainyasāgaram |tridaśānsamare nighnañchakramevābhyavartata || 7.28.45 ||
āgācchakro mahaccāpaṃ visphārya sumahāsvanam |yasya visphāraghoṣeṇa stananti sma diśo daśa || 7.28.46 ||
tadvikṛṣya mahaccāpamindro rāvaṇamūrdhani |nipātayāmāsa śarānpāvakādityavarcasaḥ || 7.28.47 ||
tathaiva ca mahābāhurdaśagrīvo vyavasthitaḥ |śakraṃ kārmukavibhraṣṭaiḥ śaravarṣairavākirat || 7.28.48 ||
prayudhyatoratha tayorbāṇavarṣaiḥ samantataḥ |na jñāyate tadā kiñcitsarvaṃ hi tamasā vṛtam || 7.28.49 ||
tatastamasi sañjāte sarve te devarākṣasāḥ |ayuddhyanta balonmattāḥ sūdayantaḥ parasparam || 7.29.1 ||
tatastu devasainyena rākṣasānāṃ bṛhadbalam |daśāṃśaṃ sthāpitaṃ yuddhe śeṣaṃ nītaṃ yamakṣayam || 7.29.2 ||
tasmiṃstu tāmase yuddhe sarve te devarākṣasāḥ |anyonyaṃ nābhyajānanta yudhyamānāḥ parasparam || 7.29.3 ||
indraśca rāvaṇaścaiva rāvaṇiśca mahābalaḥ |tasmiṃstamojālavṛte mohamīyurna te trayaḥ || 7.29.4 ||
sa tu dṛṣṭvā balaṃ sarvaṃ rāvaṇo nihataṃ kṣaṇāt |krodhamabhyagamattīvraṃ mahānādaṃ ca muktavān || 7.29.5 ||
krodhātsūtaṃ ca durdharṣaḥ syandanasthamuvāca ha |parasainyasya madhyena yāvadanto nayasva mām || 7.29.6 ||
adyaitān tridaśānsarvānvikramaiḥ samare svayam |nānāśastrairmahāghorairnayāmi yamasādanam || 7.29.7 ||
ahamindraṃ vadhiṣyāmi dhanadaṃ varuṇaṃ yamam |tridaśānvinihatyātha svayaṃ sthāsyāmyathopari |viṣādo na ca kartavyaḥ śīghraṃ vāhaya me ratham || 7.29.8 ||
dviḥ khalu tvāṃ bravīmyadya yāvadanto nayasva mām || 7.29.9 ||
ayaṃ sa nandanoddeśo yatra vartāmahe vayam |naya māmadya tatra tvamudayo yatra parvataḥ || 7.29.10 ||
tasya tadvacanaṃ śrutvā turagānsa manojavān |ādideśātha śatraṇāṃ madhyenaiva ca sārathiḥ || 7.29.11 ||
tasya taṃ niścayaṃ jñātvā śakro deveśvarastadā |rathasthaḥ samarasthastāndevānvākyamathābravīt || 7.29.12 ||
surāḥ śṛṇuta madvākyaṃ yattāvanmama rocate |jīvanneva daśagrīvaḥ sādhu rakṣo nigṛhyatām || 7.29.13 ||
eṣa hyatibalaḥ sainyai rathena pavanaujasā |gamiṣyati pravṛddhormiḥ samudra iva parvaṇi || 7.29.14 ||
nahyeṣa hantuṃ śakyo 'dya varadānātsunirbhayaḥ |tadgrahīṣyāmahe rakṣo yattā bhavata saṃyuge || 7.29.15 ||
yathā balau niruddhe ca trailokyaṃ bhujyate mayā |evametasya pāpasya nirodho mama rocate || 7.29.16 ||
tato 'nyaṃ deśamāsthāya śakraḥ santyajya rāvaṇam |ayudhyata mahārāja rākṣasāṃstrāsayanraṇe || 7.29.17 ||
uttareṇa daśagrīvaḥ praviveśānivartakaḥ |dakṣiṇena tu pārśvena praviveśa śatakratuḥ || 7.29.18 ||
tataḥ sa yojanaśataṃ praviṣṭo rākṣasādhipaḥ |devatānāṃ balaṃ sarvaṃ śaravarṣairavākirat || 7.29.19 ||
tataḥ śakro nirīkṣyātha pranaṣṭaṃ tu svakaṃ balam |nyavartayadasambhrāntaḥ samāvṛtya daśānanam || 7.29.20 ||
etasminnantare nādo mukto dānavarākṣasaiḥ |hā hatāḥ sma iti grastaṃ dṛṣṭvā śakreṇa rāvaṇam || 7.29.21 ||
tato rathaṃ samāsthāya rāvaṇiḥ krodhamūrcchitaḥ |tatsainyamatisaṅkruddhaḥ praviveśa sudāruṇam || 7.29.22 ||
tāṃ praviśya mahāmāyāṃ prāptāṃ gopatinā purā |praviveśa susaṃrabdhastatsainyaṃ samabhidravat || 7.29.23 ||
sa sarvā devatāstyaktvā śakramevābhyadhāvata |mahendraśca mahātejā nāpaśyacca sutaṃ ripoḥ || 7.29.24 ||
vimuktakavacastatra vadhyamāno 'pi rāvaṇiḥ |tridaśaiḥ sumahāvīryairna cakāra ca kiñcana || 7.29.25 ||
sa mātaliṃ samāyāntaṃ tāḍayitvā śarottamaiḥ |mahendraṃ bāṇavarṣeṇa bhūya evābhyavākirat || 7.29.26 ||
tatastyaktvā rathaṃ śakro visasarja ca sārathim |airāvataṃ samāruhya mṛgayāmāsa rāvaṇim || 7.29.27 ||
sa tatra māyābalavānadṛśyo 'thāntarikṣagaḥ |indraṃ māyāparikṣiptaṃ kṛtvā sa prādravaccharaiḥ || 7.29.28 ||
sa taṃ yadā pariśrāntamindraṃ jajñe 'tha rāvaṇiḥ |tadainaṃ māyayā baddhvā svasainyamabhito 'nayat || 7.29.29 ||
taṃ tu dṛṣṭvā balāttena nīyamānaṃ mahāraṇāt |mahendramamarāḥ sarve kiṃ nu syādityacintayan || 7.29.30 ||
dṛśyate na sa māyāvī śakrajitsamitiñjayaḥ |vidyāvānapi yenendro māyayā nīyate balāt || 7.29.31 ||
etasminnantare kruddhāḥ sarve suragaṇāstadā |rāvaṇaṃ vimukhīkṛtya śaravarṣairavākiran || 7.29.32 ||
rāvaṇastu samāsādya ādityāṃśca vasūṃstadā |na śaśāka sa saṅgrāme yoddhuṃ śatrubhirarditaḥ || 7.29.33 ||
sa taṃ dṛṣṭvā parimlānaṃ prahārairjarjarīkṛtam |rāvaṇiḥ pitaraṃ yuddhe darśanastho 'bravīdidam || 7.29.34 ||
āgaccha tāta gacchāmo raṇakarma nivartatām |jitaṃ no viditaṃ te 'stu svastho bhava gatajvaraḥ || 7.29.35 ||
ayaṃ hi surasainyasya trailokyasya ca yaḥ prabhuḥ |sa gṛhīto daivabalādbhagnadarpāḥ surāḥ kṛtāḥ || 7.29.36 ||
yatheṣṭaṃ bhuṅkṣva lokāṃstrīnnigṛhyārātimojasā |vṛthā kiṃ te śrameṇeha yuddhamadya tu niṣphalam || 7.29.37 ||
tataste daivatagaṇā nivṛttā raṇakarmaṇaḥ |tacchrutvā rāvaṇervākyaṃ svasthacetāḥ babhūva ha || 7.29.38 ||
atha sa raṇavigatajvaraḥ prabhurvijayamavāpya niśācarādhipaḥ |svabhavanamabhito jagāma hṛṣṭaḥ svasutamavāpya ca vākyamabravīt || 7.29.39 ||
atibalasadṛśaiḥ parākramaistairmama kulamānavivardhanaṃ kṛtam |yadayamatulyabalastvayādya vai tridaśapatistridaśāśca nirjitāḥ || 7.29.40 ||
naya rathamadhiropya vāsavaṃ nagaramito vraja senayā vṛtastvam |ahamapi tava gacchato drutaṃ saha sacivairanuyāmi pṛṣṭhataḥ || 7.29.41 ||
atha sa balavṛtaḥ savāhanastridaśapatiṃ parigṛhya rāvaṇiḥ |svabhavanamabhigamya vīryavānkṛtasamarānvisasarja rākṣasān || 7.29.42 ||
jite mahendre 'tibale rāvaṇasya sutena vai |prajāpatiṃ puraskṛtya yayurlaṅkāṃ surāstadā || 7.30.1 ||
tatra rāvaṇamāsādya putrabhrātṛbhirāvṛtam |abravīdgagane tiṣṭhansāmapūrvaṃ prajāpatiḥ || 7.30.2 ||
vatsa rāvaṇa tuṣṭo 'smi putrasya tava saṃyuge |aho 'sya vikramaudāryaṃ tava tulyo 'dhiko 'pi vā || 7.30.3 ||
jitaṃ hi bhavatā sarvaṃ trailokyaṃ svena tejasā |kṛtā pratijñā saphalā prīto 'smi svasutena vai || 7.30.4 ||
ayaṃ ca putro 'tibalastava rāvaṇa vīryavān |jagatīndrajidityeva parikhyāto bhaviṣyati || 7.30.5 ||
balavāndurjayaścaiva bhaviṣyatyeva rākṣasaḥ |yaṃ samāśritya te rājansthāpitāstridaśā vaśe || 7.30.6 ||
tanmucyatāṃ mahābāho mahendraḥ pākaśāsanaḥ |kiñcāsya mokṣaṇārthāya prayacchantu divaukasaḥ || 7.30.7 ||
athābravīnmahātejā indrajitsamitiñjayaḥ |amaratvamahaṃ deva vṛṇe yadyeṣa mucyate || 7.30.8 ||
catuṣpadāṃ khecarāṇāmanyeṣāṃ vā mahaujasām |vṛkṣagulmakṣupalatātṛṇopalamahībhṛtām || 7.30.9 ||
sarve 'pi jantavo 'nyonyaṃ bhetavye sati bibhyati |ato 'tra loke sarveṣāṃ sarvasmācca bhavedbhayam || 7.30.10 ||
tato 'bravīnmahātejā meghanādaṃ prajāpatiḥ |nāsti sarvāmaratvaṃ hi kasyacitprāṇino bhuvi |catuṣpadaḥ pakṣiṇaśca bhūtānāṃ vā mahaujasām || 7.30.11 ||
śrutvā pitāmahenoktamindrajitprabhuṇāvyayam || 7.30.12 ||
vaṃ hi kasyacitprāṇino bhuvi |athābravītsa tatrasthaṃ meghanādo mahābalaḥ |śrūyatāṃ vā bhavetsiddhiḥ śatakratuvimokṣaṇe || 7.30.13 ||
mameṣṭaṃ nityaśo harvyairmantraiḥ sampūjya pāvakam |saṅgrāmamavatarttuṃ ca śatrunirjayakāṅkṣiṇaḥ || 7.30.14 ||
aśvayukto ratho mahyamuttiṣṭhettu vibhāvasoḥ |tatsthasyāmaratā syānme eṣa me niścayo varaḥ || 7.30.15 ||
tasminyadyasamāpte ca japyahome vibhāvasau |yudhyeyaṃ deva saṅgrāme tadā me syādvināśanam || 7.30.16 ||
sarvo hi tapasā deva vṛṇotyamaratāṃ pumān |vikrameṇa mayā tvetadamaratvaṃ pravartitam || 7.30.17 ||
evamastviti taṃ cāha vākyaṃ devaḥ pitāmahaḥ |muktaścendrajitā śakro gatāśca tridivaṃ surāḥ || 7.30.18 ||
etasminnantare rāma dīno bhraṣṭāmbaradyutiḥ |indraścintāparītātmā dhyānatatparatāṃ gataḥ || 7.30.19 ||
taṃ tu dṛṣṭvā tathābhūtaṃ prāha devaḥ prajāpatiḥ |śatakrato kimu purā karoti sma suduṣkṛtam || 7.30.20 ||
amarendra mayā bahvyaḥ prajāḥ sṛṣṭāstathā prabho |ekavarṇāḥ samābhāṣā ekarūpāśca sarvaśaḥ || 7.30.21 ||
tāsāṃ nāsti viśeṣo hi darśane lakṣaṇe 'pi vā |tato 'hamekāgramanāstāḥ prajāḥ paricintayam || 7.30.22 ||
so 'haṃ tāsāṃ viśeṣārthaṃ striyamekāṃ vinirmame |yadyatprajānāṃ pratyaṅgaṃ viśiṣṭaṃ tattaduddhṛtam || 7.30.23 ||
tato mayā rūpaguṇairahalyā strī vinirmitā |halaṃ nāmeha vairūpaṃ halyaṃ tatprabhavaṃ bhavet || 7.30.24 ||
yasmānna vidyate halyaṃ tenāhalyeti viśrutā |ahalyeti mayā śakra tasyā nāma pravartitam || 7.30.25 ||
nirmitāyāṃ ca devendra tasyāṃ nāryāṃ surarṣabha |bhaviṣyatīti kasyaiṣā mama cintā tato 'bhavat || 7.30.26 ||
tvaṃ tu śakra tadā nārīṃ jānīṣe manasā prabho |sthānādhikatayā patnī mamaiṣeti purandara || 7.30.27 ||
sā mayā nyāsabhūtā tu gautamasya mahātmanaḥ |nyastā bahūni varṣāṇi tena niryātitā ca ha || 7.30.28 ||
tatastasya parijñāya mahāsthairyaṃ mahāmuneḥ |jñātvā tapasi siddhiṃ ca patnyarthaṃ sparśitā tadā || 7.30.29 ||
saṅkruddhastvaṃ hi dharmātman gatvā tasyāśramaṃ muneḥ |dṛṣṭavāṃśca tadā tāṃ strīṃ dīptāmagniśikhāmiva || 7.30.30 ||
sā tvayā dharṣitā śakra kāmārtena samanyunā |dṛṣṭastvaṃ ca tadā tena hyāśrame paramarṣiṇā || 7.30.31 ||
tataḥ kruddhena tenā 'si śaptaḥ paramatejasā |gato 'si yena devendra daśābhāgaviparyayam || 7.30.32 ||
yasmānme dharṣitā patnī tvayā vāsava nirbhayam |tasmāttvaṃ samare rājañchatruhastaṃ gamiṣyasi || 7.30.33 ||
ayaṃ tu bhāvo durbuddhe yastvayeha pravartitaḥ |mānuṣeṣvapi lokeṣu bhaviṣyati na saṃśayaḥ || 7.30.34 ||
tatrārdhaṃ tasya yaḥ kartā tvayyardhaṃ nipatiṣyati |na ca te sthāvaraṃ sthānaṃ bhaviṣyati na saṃśayaḥ || 7.30.35 ||
yaśca yaśca surendraḥ syāddhruvaḥ sa na bhaviṣyati |eṣa śāpo mayā mukta ityasau tvāṃ tadā 'bravīt || 7.30.36 ||
tāṃ tu bhāryāṃ sa nirbhartsya so 'bravītsumahātapāḥ |durvinīte vinidhvaṃsa mamāśramasamīpataḥ || 7.30.37 ||
rūpayauvanasampannā yasmāttvamanavasthitā |tasmādrūpavatī loke na tvamekā bhaviṣyati || 7.30.38 ||
rūpaṃ ca te prajāḥ sarvā gamiṣyanti na saṃśayaḥ |yattadekaṃ samāśritya vibhramo 'yamupasthitaḥ || 7.30.39 ||
tadāprabhṛti bhūyiṣṭhaṃ prajā rūpasamanvitāḥ |sā taṃ prasādayāmāsa maharṣiṃ gautamaṃ tadā || 7.30.40 ||
ajñānāddharṣitā vipra tvadrūpeṇa divaukasā |na kāmakārādviprarṣe prasādaṃ kartumarhasi || 7.30.41 ||
ahalyayā tvevamuktaḥ pratyuvāca sa gautamaḥ |utpatsyati mahātejā ikṣvākūṇāṃ mahārathaḥ || 7.30.42 ||
rāmo nāma śruto loke vanaṃ cāpyupayāsyati |brāhmaṇārthe mahābāhurviṣṇurmānuṣavigrahaḥ |taṃ drakṣyasi yadā bhadre tataḥ pūtā bhaviṣyasi || 7.30.43 ||
sa hi pāvayituṃ śaktastvayā yadduṣkṛtaṃ kṛtam |tasyātithyaṃ ca kṛtvā vai matsamīpaṃ gamiṣyasi || 7.30.44 ||
vatsyasi tvaṃ mayā sārdhaṃ tadā hi varavarṇini |evamuktvā sa viprarṣirājagāma svamāśramam || 7.30.45 ||
tapaścācāra sumahatsā patnī brahmavādinaḥ |śāpotsargāddhi tasyedaṃ muneḥ sarvamupasthitam || 7.30.46 ||
tatsmara tvaṃ mahābāho duṣkṛtaṃ yattvayā kṛtam |tena tvaṃ grahaṇaṃ śatroryāto nānyena vāsava || 7.30.47 ||
śīghraṃ vai yaja yajñaṃ tvaṃ vaiṣṇavaṃ susamāhitaḥ |pāvitastena yajñena yāsyase tridivaṃ tataḥ || 7.30.48 ||
putraśca tava devendra na vinaṣṭo mahāraṇe |nītaḥ sannihitaścaiva āryakeṇa mahodadhau || 7.30.49 ||
etacchrutvā mahendrastu yajñamiṣṭvā ca vaiṣṇavam |punastridivamākrāmadanvaśāsacca devarāṭ || 7.30.50 ||
etadindrajito nāma balaṃ yatkīrtitaṃ mayā |nirjitastena devendraḥ prāṇino 'nye tu kiṃ punaḥ || 7.30.51 ||
āścaryamiti rāmaśca lakṣmaṇaścābravīttadā |agastyavacanaṃ śrutvā vānarā rākṣasāstadā || 7.30.52 ||
vibhīṣaṇastu rāmasya pārśvastho vākyamabravīt |āścaryaṃ smārito 'smyadya yattaddṛṣṭaṃ purātanam || 7.30.53 ||
agastyaṃ tvabravīdrāmaḥ satyametacchrutaṃ ca me || 7.30.54 ||
evaṃ rāma samudbhūto rāvaṇo lokakaṇṭakaḥ |saputro yena saṅgrāme jitaḥ śakraḥ sureśvaraḥ || 7.30.55 ||
tato rāmo mahātejā vismayātpunareva hi |uvāca praṇato vākyamagastyamṛṣisattamam || 7.31.1 ||
bhagavanrākṣasaḥ krūro yadāprabhṛti medinīm |paryaṭatkiṃ tadā lokāḥ śūnyā āsandvijottama || 7.31.2 ||
rājā vā rājamātro vā kiṃ tadā nātra kaścana |dharṣaṇaṃ yatra na prāpto rāvaṇo rākṣaseśvaraḥ || 7.31.3 ||
utāho hatavīryāste babhūvuḥ pṛthivīkṣitaḥ |bahiṣkṛtā varāstraiśca bahavo nirjitā nṛpāḥ || 7.31.4 ||
rāghavasya vacaḥ śrutvā hyagastyo bhagavānṛṣiḥ |uvāca rāmaṃ prahasanpitāmaha iveśvaram || 7.31.5 ||
ityevaṃ bādhamānastu pārthivānpārthivarṣabha |cacāra rāvaṇo rāma pṛthivīṃ pṛthivīpate || 7.31.6 ||
tato māhiṣmatīṃ nāma purīṃ svargapurīprabhām |samprāpto yatra sānnidhyaṃ sadāsīdvasuretasaḥ || 7.31.7 ||
tulya āsīnnṛpastasya prabhāvādvasuretasaḥ |arjuno nāma yatrāgniḥ śarakuṇḍeśayaḥ sadā || 7.31.8 ||
tameva divasaṃ so 'tha haihayādhipatirbalī |arjuno narmadāṃ rantuṃ gataḥ strībhiḥ saheśvaraḥ || 7.31.9 ||
tameva divasaṃ so 'tha rāvaṇastatra āgataḥ |rāvaṇo rākṣasendrastu tasyāmātyānapṛcchata || 7.31.10 ||
kvārjuno nṛpatiḥ śīghraṃ samyagākhyātumarhatha |rāvaṇo 'hamanuprāpto yuddhepsurnṛvareṇa ha |mamāgamanamapyagre yuṣmābhiḥ sannivedyatām || 7.31.11 ||
ityevaṃ rāvaṇenoktāste 'mātyāḥ suvipaścitaḥ |abruvanrākṣasapatimasānnidhyaṃ mahīpateḥ || 7.31.12 ||
śrutvā viśravasaḥ putraḥ paurāṇāmarjunaṃ gatam |apasṛtyāgato vindhyaṃ himavatsannibhaṃ girim || 7.31.13 ||
sa tamabhramivāviṣṭamudbhrantamiva medinīm |apaśyadrāvaṇo vindhyamālikhantamivāmbaram || 7.31.14 ||
sahasraśikharopetaṃ siṃhādhyuṣitakandaram |prapātapatitaistoyaiḥ sāṭṭahāsamivāmbudhim || 7.31.15 ||
devadānavagandharvaiḥ sāpsarogaṇakinnaraiḥ |svastrībhiḥ krīḍamānaiśca svargabhūtaṃ mahocchrayam || 7.31.16 ||
nadībhiḥ syandamānābhiḥ sphaṭikapratimaṃ jalam |phaṇābhiścalajihvābhiranantamiva viṣṭhitam || 7.31.17 ||
utkrāmantaṃ darīvantaṃ himavatsannibhaṃ girim |paśyamānastato vindhyaṃ rāvaṇo narmadāṃ yayau || 7.31.18 ||
calopalajalāṃ puṇyāṃ paścimodadhigāminīm || 7.31.19 ||
mahiṣaiḥ sṛmaraiḥ siṃhaiḥ śārdūlarkṣagajottamaiḥ |uṣṇābhitaptaistṛṣitaiḥ saṅkṣobhitajalāśayām || 7.31.20 ||
cakravākaiḥ sakāraṇḍaiḥ sahaṃsajalakukkuṭaiḥ |sārasaiśca sadā mattaiḥ sukūjadbhiḥ samāvṛtām || 7.31.21 ||
phulladrumakṛtottaṃsāṃ cakravākayugastanīm |vistīrṇapulinaśroṇīṃ haṃsāvalisumekhalām || 7.31.22 ||
puṣpareṇvanuliptāṅgīṃ jalaphenāmalāṃśukām |jalāvagāhasaṃsparśāṃ phullotpalaśubhekṣaṇām |puṣpakādavaruhyāśu narmadāṃ saritāṃ varām || 7.31.23 ||
iṣṭāmiva varāṃ nārīmavagāhya daśānanaḥ |sa tasyāḥ puline ramye nānāmuniniṣevite || 7.31.24 ||
upopaviṣṭaiḥ sacivaiḥ sārdhaṃ rākṣasapuṅgavaḥ |prakhyāya narmadāṃ so 'tha gaṅgeyamiti rāvaṇaḥ || 7.31.25 ||
narmadādarśajaṃ harṣamāptavān rākṣasādhipaḥ |uvāca sacivāṃstatra salīlaṃ śukasāraṇau || 7.31.26 ||
eṣa raśmisahasreṇa jagatkṛtvaiva kāñcanam |tīkṣṇatāpakaraḥ sūryo nabhaso 'rdhaṃ samāśritaḥ || 7.31.27 ||
māmāsīnaṃ viditvaiva candrāyati divākaraḥ || 7.31.28 ||
narmadājalaśītaśca sugandhiḥ śramanāśanaḥ |madbhayādanilo 'pyatra vātyeṣa susamāhitaḥ || 7.31.29 ||
iyaṃ vāpi saricchreṣṭhā narmadā narmavardhinī |nakramīnavihaṅgormiḥ sabhayevāṅganā sthitā || 7.31.30 ||
tadbhavantaḥ kṣatāḥ śastrairnṛpairindrasamairyudhi |candanasya raseneva rudhireṇa samukṣitāḥ || 7.31.31 ||
te yūyamavagāhadhvaṃ narmadāṃ śarmadāṃ śubhām |mahāpadmamukhā mattā gaṅgāmiva gahāgajāḥ |asyāṃ snātvā mahānadyāṃ pāpmānaṃ vipramokṣyatha || 7.31.32 ||
ahamapyadya puline śaradindusamaprabhe |puṣpopahāraṃ śanakaiḥ kariṣyāmi kapardinaḥ || 7.31.33 ||
rāvaṇenaivamuktāstu prahastaśukasāraṇāḥ |samahodaradhūmrākṣā narmadāṃ vijagāhire || 7.31.34 ||
rākṣasendragajaistaistu kṣobhitā narmadā nadī |vāmanāñjanapadmādyairgaṅgā iva mahāgajaiḥ || 7.31.35 ||
tataste rākṣasāḥ snātvā narmadāyāṃ mahābalāḥ |uttīrya puṣpāṇyājahrurbalyarthaṃ rāvaṇasya tu || 7.31.36 ||
narmadāpuline hṛdye śubhrābhrasadṛśaprabhe |rākṣasaistu muhūrtena kṛtaḥ puṣpamayo giriḥ || 7.31.37 ||
puṣpeṣūpahṛteṣvevaṃ rāvaṇo rākṣaseśvaraḥ |avatīrṇo nadīṃ snātuṃ gaṅgāmiva mahāgajaḥ || 7.31.38 ||
tatra snātvā ca vidhivajjaptvā japyamanuttamam |narmadāsalilāttasmāduttatāra sa rāvaṇaḥ || 7.31.39 ||
tataḥ klinnāmbaraṃ tyaktvā śuklavastrasamāvṛtam |rāvaṇaṃ prāñjaliṃ yāntamanvayuḥ sarvarākṣasāḥ || 7.31.40 ||
tadgatīvaśamāpannā mūrtimanta ivācalāḥ |yatra yatra ca yāti sma rāvaṇo rākṣaseśvaraḥ |jāmbūnadamayaṃ liṅgaṃ tatra tatra sma nīyate || 7.31.41 ||
vālukāvedimadhye tu talliṅgaṃ sthāpya rāvaṇaḥ |arcayāmāsa gandhaiśca puṣpaiścāmṛtagandhibhiḥ || 7.31.42 ||
tataḥ satāmārtiharaṃ paraṃ varaṃ varapradaṃ candramayūkhabhūṣaṇam |samarcayitvā sa niśācaro jagau prasārya hastānpraṇanarta cāgrataḥ || 7.31.43 ||
narmadāpuline yatra rākṣasendraḥ sudāruṇaḥ |puṣpopahāraṃ kurute tasmāddeśādadūrataḥ || 7.32.1 ||
arjuno jayatāṃ śreṣṭho māhiṣmatyāḥ patiḥ prabhuḥ |krīḍate saha nārībhirnarmadātoyamāśritaḥ || 7.32.2 ||
tāsāṃ madhyagato rājā rarāja ca tadārjunaḥ |kareṇūnāṃ sahasrasya madhyastha iva kuñjaraḥ || 7.32.3 ||
jijñāsuḥ sa tu bāhūnāṃ sahasrasyottamaṃ balam |rurodha narmadāvegaṃ bāhubhirbahubhirvṛtaḥ || 7.32.4 ||
kārtavīryabhujāsaktaṃ tajjalaṃ prāpya nirmalam |kūlopahāraṃ kurvāṇaṃ pratisrotaḥ pradhāvati || 7.32.5 ||
samīnanakramakaraḥ sapuṣpakuśasaṃstaraḥ |sa narmadāmbhaso vegaḥ prāvṛṭkāla ivābabhau || 7.32.6 ||
sa vegaḥ kārtavīryeṇa sampreṣita ivāmbhasaḥ |puṣpopahāraṃ sakalaṃ rāvaṇasya jahāra ha || 7.32.7 ||
rāvaṇo 'rdhasamāptaṃ tamutsṛjya niyamaṃ tadā |narmadāṃ paśyate kāntāṃ pratikūlāṃ yathā priyām || 7.32.8 ||
paścimena tu taṃ dṛṣṭvā sāgarodgārasannibham |vardhantamambhaso vegaṃ pūrvāmāśāṃ praviśya tu || 7.32.9 ||
tato 'nubhrāntaśakunāṃ svabhāvoparame sthitām |nirvikārāṅganābhāsāmapaśyadrāvaṇo nadīm || 7.32.10 ||
savyetarakarāṅgulyā saśabdaṃ ca daśānanaḥ |vegaprabhāvamanveṣṭuṃ so 'diśacchukasāraṇau || 7.32.11 ||
tau tu rāvaṇasandiṣṭau bhrātarau śukasāraṇau |vyomāntaragatau vīrau prasthitau paścimāmukhau || 7.32.12 ||
ardhayojanamātraṃ tu gatvā tau rajanīcarau |paśyetāṃ puruṣaṃ toye krīḍantaṃ sahayoṣitam || 7.32.13 ||
bṛhatsālapratīkāśaṃ toyavyākulamūrdhajam |madaraktāntanayanaṃ madavyākulatejasam || 7.32.14 ||
nadīṃ bāhusahasreṇa rundhantamarimardanam |giriṃ pādasahasreṇa rundhantamiva medinīm || 7.32.15 ||
bālānāṃ varanārīṇāṃ sahasreṇa samāvṛtam |samadānāṃ kareṇūnāṃ sahasreṇeva kuñjaram || 7.32.16 ||
tamadbhutatamaṃ dṛṣṭvā rākṣasau śukasāraṇau |sannivṛttāvupāgamya rāvaṇaṃ tamathocatuḥ || 7.32.17 ||
bṛhatsālapratīkāśaḥ ko 'pyasau rākṣaseśvara |narmadāṃ rodhavadruddhvā krīḍāpayati yoṣitaḥ || 7.32.18 ||
tena bāhusahasreṇa sanniruddhajalā nadī |sāgarodgārasaṅkāśānudgārānsṛjate muhuḥ || 7.32.19 ||
ityevaṃ bhāṣamāṇau tau niśāmya śukasāraṇau |rāvaṇo 'rjuna ityuktvā prayayau yuddhalālasaḥ || 7.32.20 ||
arjunābhimukhe tasminrāvaṇe rākṣasādhipe |caṇḍaḥ pravāti pavanaḥ sanādaḥ surajāstathā || 7.32.21 ||
sakṛdeva kṛto rāvaḥ saraktaḥ preṣito ghanaiḥ |mahodaramahāpārśvadhūmrākṣaśukasāraṇaiḥ || 7.32.22 ||
saṃvṛto rākṣasendrastu tatrāgādyatra cārjunaḥ |adīrgheṇaiva kālena sa tadā rākṣaso balī |taṃ narmadāhradaṃ bhīmamājagāmāñjanaprabhaḥ || 7.32.23 ||
sa tatra strīparivṛtaṃ vāśitābhiriva dvipam |narendraṃ paśyate rājā rākṣasānāṃ tadārjunam || 7.32.24 ||
sa roṣādraktanayano rākṣasendro baloddhataḥ || 7.32.25 ||
ityevamarjunāmātyanāha gambhīrayā girā |amātyāḥ kṣipramākhyāta haihayasya nṛpasya vai || 7.32.26 ||
yuddhārthī samanuprāpto rāvaṇo nāma rākṣasaḥ |rāvaṇasya vacaḥ śrutvā mantriṇo 'thārjunasya te |uttasthuḥ sāyudhāstrāśca rāvaṇaṃ vākyamabruvan || 7.32.27 ||
yuddhasya kālo vijñeyaḥ sādhu bhoḥ sādhu rāvaṇa || 7.32.28 ||
caḥ śrutvā mantriṇo 'thārjunasya te |yaḥ kṣībaṃ strīvṛtaṃ caiva yoddhumutsahate nṛpam |strīsamakṣaṃ kathaṃ yattadyoddhumutsahase 'rjunam |vāśitāmadhyagaṃ mattaṃ śārdūla iva kuñjaram || 7.32.29 ||
kṣamasvādya daśagrīva coṣyatāṃ rajanī tvayā |yuddhe śraddhā ca yadyasti śvastāta samare 'rjunam || 7.32.30 ||
yadyadyāsti matiryoddhuṃ yuddhatṛṣṇāsamāvṛtā |nihatyāsmāṃstato yuddhamarjunenopayāsyasi || 7.32.31 ||
tataste rāvaṇāmātyairamātyāḥ pārthivasya tu |sūditāścāpi te yuddhe bhakṣitāśca bubhukṣitaiḥ || 7.32.32 ||
tato halahalāśabdo narmadātīra ābabhau |arjunasyānuyāta'ṇāṃ rāvaṇasya ca mantriṇām || 7.32.33 ||
iṣubhistomaraiḥ śūlaistriśūlairvajrakarṣaṇaiḥ |sarāvaṇānardayantaḥ samantātsamabhidrutāḥ || 7.32.34 ||
haihayādhipayodhānāṃ vega āsītsudāruṇaḥ |sanakramīnamakarasamudrasyeva niḥsvanaḥ || 7.32.35 ||
rāvaṇasya tu te 'mātyāḥ prahastaśukasāraṇāḥ |kārtavīryabalaṃ kruddhā nirdahanti sma tejasā || 7.32.36 ||
arjunāya tu tatkarma rāvaṇasya samantriṇaḥ |krīḍamānāya kathitaṃ puruṣairdvārarakṣibhiḥ || 7.32.37 ||
śrutvā na bhetavyamiti strījanaṃ taṃ tato 'rjunaḥ |uttatāra jalāttasmādgaṅgātoyādivāñjanaḥ || 7.32.38 ||
krodhadūṣitanetrastu sa tato 'rjunapāvakaḥ |prajajvāla mahāghoro yugānta iva pāvakaḥ || 7.32.39 ||
sa tūrṇataramādāya varahemāṅgado gadām |abhidudrāva rakṣāṃsi tamāṃsīva divākaraḥ || 7.32.40 ||
bāhuvikṣepakaraṇāṃ samudyamya mahāgadām |gāruḍaṃ vegamāsthāya cāpapātaiva so 'rjunaḥ || 7.32.41 ||
tasya mārgaṃ samāruddhya vindhyo 'rkasyeva parvataḥ |sthito vindhya ivākampyaḥ prahasto musalāyudhaḥ || 7.32.42 ||
tato 'sya musalaṃ ghoraṃ lohabaddhaṃ mahoddhataḥ |prahastaḥ preṣayankruddho rarāsa ca yathāmbudaḥ || 7.32.43 ||
tasyāgre musalasyāgniraśokāpīḍasannibhaḥ |prahastakaramuktasya babhūva pradahanniva || 7.32.44 ||
athāyāntaṃ tu musalaṃ kārtavīryastadārjunaḥ |nipuṇaṃ vañcayāmāsa sagado 'gadavikramaḥ || 7.32.45 ||
tatastamabhidudrāva prahastaṃ haihayādhipaḥ |bhrāmayāno gadāṃ gurvīṃ pañcabāhuśatocchrayām || 7.32.46 ||
tathā hato 'tivegena prahasto gadayā tadā |nipapāta sthitaḥ śailo vajrivajrahato yathā || 7.32.47 ||
prahastaṃ patitaṃ dṛṣṭvā mārīcaśukasāraṇāḥ |samahodaradhūmrākṣā hyapasṛṣṭā raṇājirāt || 7.32.48 ||
apakrānteṣvamātyeṣu prahaste vai nipātite |rāvaṇo 'bhyadravattūrṇamarjunaṃ nṛpasattamam || 7.32.49 ||
sahasrabāhostadyuddhaṃ viṃśadbāhośca dāruṇam |nṛparākṣasayostatra cārabdhaṃ romaharṣaṇam || 7.32.50 ||
sāgarāviva saṃrabdhau calanmūlāvivācalau |tejoyuktāvivādityau pradahantāvivānalau || 7.32.51 ||
baloddhatau yathā nāgau vāśitārthe yathā vṛṣau |meghāviva vinardantau siṃhāviva balotkaṭau || 7.32.52 ||
rudrakālāviva kruddhau tadā tau rākṣasārjunau |parasparaṃ gadābhyāṃ tau tāḍayāmāsaturbhṛśam || 7.32.53 ||
vajraprahārānacalā yathā ghorānviṣehire |gadāprahārāṃstau tatra sehāte nararākṣasau || 7.32.54 ||
yathā ' śaniravebhyastu jāyate 'tha pratiśrutiḥ |tathā tayorgadāpothairdiśaḥ sarvāḥ pratiśrutāḥ || 7.32.55 ||
arjunasya gadā sā tu pātyamānā 'hitorasi |kāñcanābhaṃ nabhaścakre vidyutsaudāminī yathā || 7.32.56 ||
tathaiva rāvaṇenāpi pātyamānā muhurmuhuḥ |arjunorasi nirbhāti gadolkeva mahāgirau || 7.32.57 ||
nārjunaḥ khedamāyāti na rākṣasagaṇeśvaraḥ |idamāsīttayoryuddhaṃ yathā pūrvaṃ balīndrayoḥ || 7.32.58 ||
śṛṅgairiva vṛṣāyudhyandantāgrairiva kuñjarau |parasparaṃ tau nighnantau nararākṣasasattamau || 7.32.59 ||
tato 'rjunena kruddhena sarvaprāṇena sā gadā |stanayorantare muktā rāvaṇasya mahorasi || 7.32.60 ||
varadānakṛtatrāṇe sā gadā rāvaṇorasi |durbaleva yathāvegaṃ dvidhābhūtvā 'patatkṣitau || 7.32.61 ||
sa tvarjunapramuktena gadāpātena rāvaṇaḥ |apāsarpaddhanurmātraṃ niṣasāda ca niṣṭanan || 7.32.62 ||
sa vihvalaṃ tadālakṣya daśagrīvaṃ tato 'rjunaḥ |sahasotpatya jagrāha garutmāniva pannagam || 7.32.63 ||
sa tu bāhusahasreṇa balādgṛhya daśānanam |babandha balavānrājā baliṃ nārāyaṇo yathā || 7.32.64 ||
badhyamāne daśagrīve siddhacāraṇadevatāḥ |sādhvītivādinaḥ puṣpaiḥ kirantyarjunamūrdhani || 7.32.65 ||
vyāghro mṛgamivādāya mṛgarāḍiva dantinam |nanāda haihayo rājā harṣādambudavanmuhuḥ || 7.32.66 ||
prahastastu samāśvasto dṛṣṭvā baddhaṃ daśānanam |saha tai rākṣasaiḥ kruddhaścābhidudrāva pārthivam || 7.32.67 ||
naktañcarāṇāṃ vegastu teṣāmāpatatāṃ babhau |udbhūta ātapāpāye payodānāmivāmbudhau || 7.32.68 ||
muñca muñceti bhāṣantastiṣṭhatiṣṭheti cāsakṛt |musalāni saśūlāni sotsasarja tadārjune || 7.32.69 ||
aprāptānyeva tānyāśu asambhrāntastadārjunaḥ |āyudhānyamarārīṇāṃ jagrāhāriniṣūdanaḥ || 7.32.70 ||
tatastaireva rakṣāṃsi durdharaiḥ pravarāyudhaiḥ |bhittvā vidrāvayāmāsa vāyurambudharāniva || 7.32.71 ||
rākṣasāṃstrāsayitvā tu kārtavīryo 'rjunastadā |rāvaṇaṃ gṛhya nagaraṃ praviveśa suhṛdvṛtaḥ || 7.32.72 ||
sa kīryamāṇaḥ kusumākṣatotkarairdvijaiḥ sapauraiḥ puruhūtasannibhaḥ |tadā 'rjunaḥ sampraviveśa tāṃ purīṃ baliṃ nigṛhyeva sahasralocanaḥ || 7.32.73 ||
rāvaṇagrahaṇaṃ tattu vāyugrahaṇasannibham |tataḥ pulastyaḥ śuśrāva kathitaṃ divi daivataiḥ || 7.33.1 ||
tataḥ putrakṛtasnehātkampyamāno mahādhṛtiḥ |māhiṣmatīpatiṃ draṣṭumājagāma mahānṛṣiḥ || 7.33.2 ||
sa vāyumārgamāsthāya vāyutulyagatirdvijaḥ |purīṃ māhiṣmatīṃ prāpto manaḥsampātavikramaḥ || 7.33.3 ||
so 'marāvatisaṅkāśāṃ hṛṣṭapuṣṭajanākulām |praviveśa purīṃ brahmā indrasyevāmarāvatīm || 7.33.4 ||
pādacāramivādityaṃ niṣpatantaṃ sudurdaśam |tataste pratyabhijñāya arjunāya nivedayan || 7.33.5 ||
pulastya iti vijñāya vacanāddhaihayādhipaḥ |śirasyañjalimādhāya pratyudgacchattapasvinam || 7.33.6 ||
purohito 'sya gṛhyārghyaṃ madhuparkaṃ tathaiva ca |purastātprayayau rājñaḥ śakrasyeva bṛhaspatiḥ || 7.33.7 ||
tatastamṛṣimāyāntamudyantamiva bhāskaram |arjuno dṛśya sambhrānto vavandendra iveśvaram || 7.33.8 ||
sa tasya madhuparkaṃ gāṃ pādyamarghyaṃ nivedya ca |pulastyamāha rājendro harṣagadgadayā girā || 7.33.9 ||
adyaivamamarāvatyā tulyā māhiṣmatī kṛtā |adyāhaṃ tu dvijendra tvāṃ yasmātpaśyāmi durdaśam || 7.33.10 ||
adya me kuśalaṃ deva adya me kuśalaṃ vratam |adya me saphalaṃ janma adya me saphalaṃ tapaḥ |yasmāddevagaṇairvandyau vande 'haṃ caraṇau tava || 7.33.11 ||
idaṃ rājyamime putrā ime dārā ime vayam |brahmankiṃ kurmi kiṃ kāryamājñāpayatu no bhavān || 7.33.12 ||
taṃ dharme 'gniṣu putreṣu śivaṃ pṛṣṭvā ca pārthivam |pulastyovāca rājānaṃ haihayānāṃ tathā 'rjunam || 7.33.13 ||
narendrāmbujapatrākṣa pūrṇacandranibhānana |atulaṃ te balaṃ yena daśagrīvastvayā jitaḥ || 7.33.14 ||
bhayādyasyopatiṣṭhetāṃ niṣpandau sāgarānilau |so 'yaṃ mṛdhe tvayā baddhaḥ pautro me raṇadurjayaḥ || 7.33.15 ||
putrakasya yaśaḥ pītaṃ nāma viśrāvitaṃ tvayā |madvākyādyācyamāno 'dya muñca vatsaṃ daśānanam || 7.33.16 ||
pulastyājñāṃ pragṛhyoce na kiñcana vaco 'rjunaḥ |mumoca vai pārthivendro rākṣasendraṃ prahṛṣṭavat || 7.33.17 ||
sa taṃ pramucya tridaśārimarjunaḥ prapūjya divyābharaṇasragambaraiḥ |ahiṃsakaṃ sakhyamupetya sāgnikaṃ praṇamya taṃ brahmasutaṃ gṛhaṃ yayau || 7.33.18 ||
pulastyenāpi santyakto rākṣasendraḥ pratāpavān |pariṣvaktaḥ kṛtātithyo lajjamāno vinirjitaḥ || 7.33.19 ||
pitāmahasutaścāpi pulastyo munipuṅgavaḥ |mocayitvā daśagrīvaṃ brahmalokaṃ jagāma ha || 7.33.20 ||
evaṃ sa rāvaṇaḥ prāptaḥ kārtavīryātpradharṣaṇam |pulastyavacanāccāpi punarmukto mahābalaḥ || 7.33.21 ||
evaṃ balibhyo balinaḥ santi rāghavanandana |nāvajñā hi pare kāryā ya icchet priyamātmanaḥ || 7.33.22 ||
tataḥ sa rājā piśitāśanānāṃ sahasrabāhorupalabhya maitrīm |punarnṛpāṇāṃ kadanaṃ cakāra cacāra sarvāṃ pṛthivīṃ ca darpāt || 7.33.23 ||
arjunena vimuktastu rāvaṇo rākṣasādhipaḥ |cacāra pṛthivīṃ sarvāmanirviṇṇastathā kṛtaḥ || 7.34.1 ||
rākṣasaṃ vā manuṣyaṃ vā śṛṇute 'yaṃ balādhikam |rāvaṇastaṃ samāsādya yuddhe hvayati darpitaḥ || 7.34.2 ||
tataḥ kadācitkiṣkindhāṃ nagarīṃ vālipālitām |gatvā hvayati yuddhāya vālinaṃ hemamālinam || 7.34.3 ||
tatastu vānarāmātyastārastārāpitā prabhuḥ |uvāca vānaro vākyaṃ yuddhaprepsumupāgatam || 7.34.4 ||
rākṣasenda gato vālī yaste pratibalo bhavet |ko 'nyaḥ pramukhataḥ sthātuṃ tava śaktaḥ plavaṅgamaḥ || 7.34.5 ||
caturbhyo 'pi samudrebhyaḥ sandhyāmanvāsya rāvaṇa |imaṃ muhūrtamāyāti vālī tiṣṭha muhūrtakam || 7.34.6 ||
etānasthicayānpaśya ya ete śaṅkhapāṇḍurāḥ |yuddhārthināmime rājanvānarādhipatejasā || 7.34.7 ||
yadvā 'mṛtarasaḥ pītastvayā rāvaṇa rākṣasa |tadā vālinamāsādya tadantaṃ tava jīvitam || 7.34.8 ||
paśyedānīṃ jagaccitramimaṃ viśravasaḥ suta |idaṃ muhūrtaṃ tiṣṭhasva durlabhaṃ te bhaviṣyati || 7.34.9 ||
athavā tvarase martuṃ gaccha dakṣiṇasāgaram |vālinaṃ drakṣyase tatra bhūmisthamiva pāvakam || 7.34.10 ||
sa tu tāraṃ vinirbhartsya rāvaṇo lokarāvaṇaḥ |puṣpakaṃ tatsamāruhya prayayau dakṣiṇārṇavam || 7.34.11 ||
tatra hemagiriprakhyaṃ taruṇārkanibhānanam |rāvaṇo vālinaṃ dṛṣṭvā sandhyopāsanatatparam || 7.34.12 ||
puṣpakādavaruhyātha rāvaṇo 'ñjanasannibhaḥ |grahītuṃ vālinaṃ tūrṇaṃ niḥśabdapadamāvrajat || 7.34.13 ||
yadṛcchayā tadā dṛṣṭo vālināpi sa rāvaṇaḥ |pāpābhiprāyavān dṛṣṭvā cakāra na tu sambhramam || 7.34.14 ||
śaśamālakṣya siṃho vā pannagaṃ garuḍo yathā |na cintayati taṃ vālī rāvaṇaṃ pāpaniścayam || 7.34.15 ||
jighṛkṣamāṇamāyāntaṃ rāvaṇaṃ pāpacetasam |kakṣāvalambinaṃ kṛtvā gamiṣye trīnmahārṇavān || 7.34.16 ||
drakṣyantyariṃ mamāṅkasthaṃ sraṃsadūrukarāmbaram |lambamānaṃ daśagrīvaṃ garuḍasyeva pannagam || 7.34.17 ||
ityevaṃ matimāsthāya vālī karṇamupāśritaḥ |japanvai naigamānmantrāṃstasthau parvatarāḍiva || 7.34.18 ||
tāvanyonyaṃ jighṛkṣantau harirākṣasapārthivau |prayatnavantau tatkarma īhaturbaladarpitau || 7.34.19 ||
hastagrāhaṃ tu taṃ matvā pādaśabdena rāvaṇam |parāṅmukho 'pi jagrāha vālī sarpamivāṇḍajaḥ || 7.34.20 ||
grahītukāmaṃ taṃ gṛhya rakṣasāmīśvaraṃ hariḥ |khamutpapāta vegena kṛtvā kakṣāvalambinam || 7.34.21 ||
taṃ cāpīḍayamānaṃ tu vitudantaṃ nakhairmuhuḥ |jahāra rāvaṇaṃ vālī pavanastoyadaṃ yathā || 7.34.22 ||
atha te rākṣasāmātyā hriyamāṇaṃ daśānanam |mumokṣayiṣavo vāliṃ ravamāṇā abhidrutāḥ || 7.34.23 ||
anvīyamānastairvālī bhrājate 'mbaramadhyagaḥ |anvīyamāno meghaughairambarastha ivāṃśumān || 7.34.24 ||
te 'śaknuvantaḥ samprāptuṃ vālinaṃ rākṣasottamāḥ |tasya bāhūruvegena pariśrāntā vyavasthitāḥ || 7.34.25 ||
vālimārgādapākrāmanparvatendro hi gacchataḥ |kiṃ punarjīvitaprepsurbibhradvai māṃsaśoṇitam || 7.34.26 ||
apakṣigaṇasampātānvānarendro mahājavaḥ |kramaśaḥ sāgarānsarvānsandhyākālamavandata || 7.34.27 ||
sabhājyamāno bhūtaistu khaicaraiḥ khaicarottamaḥ |paścimaṃ sāgaraṃ vālī hyājagāma sarāvaṇaḥ || 7.34.28 ||
tasminsandhyāmupāsitvā snātvā japtvā ca vānaraḥ |uttaraṃ sāgaraṃ prāyādvahamāno daśānanam || 7.34.29 ||
bahuyojanasāhasraṃ vahamāno mahāhariḥ |vāyuvacca manovacca jagāma saha śatruṇā || 7.34.30 ||
uttare sāgare sandhyāmupāsitvā daśānanam |vahamāno 'gamadvālī pūrvaṃ vai sa mahodadhim || 7.34.31 ||
tatrāpi sandhyāmanvāsya vāsaviḥ saharīśvaraḥ |kiṣkindhāmabhito gṛhya rāvaṇaṃ punarāgamat || 7.34.32 ||
caturṣvapi samudreṣu sandhyāmanvāsya vānaraḥ |rāvaṇodvahanaśrāntaḥ kiṣkindhopavane 'patat || 7.34.33 ||
rāvaṇaṃ tu mumocātha svakakṣātkapisattamaḥ |kutastvamiti covāca prahasanrāvaṇaṃ muhuḥ || 7.34.34 ||
vismayaṃ tu mahadgatvā śramalolanirīkṣaṇaḥ |rākṣasendro harīndraṃ tamidaṃ vacanamabravīt || 7.34.35 ||
vānarendra mahendrābha rākṣasendro 'smi rāvaṇaḥ |yuddhepsuriha samprāptaḥ sa cādyāsāditastvayā || 7.34.36 ||
aho balamaho vīryamaho gāmbhīryameva ca |yenāhaṃ paśuvadgṛhya bhrāmitaścaturo 'rṇavān || 7.34.37 ||
evamaśrāntavadvīra śīghrameva mahārṇavān |māṃ caivodvahamānastu ko 'nyo vīraḥ kramiṣyati || 7.34.38 ||
trayāṇāmeva bhūtānāṃ gatireṣā plavaṅgama |manonilasuparṇānāṃ tava cātra na saṃśayaḥ || 7.34.39 ||
so 'haṃ dṛṣṭabalastubhyamicchāmi haripuṅgava |tvayā saha ciraṃ sakhyaṃ susnigdhaṃ pāvakāgrataḥ || 7.34.40 ||
dārāḥ putrāḥ puraṃ rāṣṭraṃ bhogācchādanabhojanam |sarvamevāvibhaktaṃ nau bhaviṣyati harīśvara || 7.34.41 ||
tataḥ prajvālayitvāgniṃ tāvubhau harīrākṣasau |bhrātṛtvamupasampannau pariṣvajya parasparam || 7.34.42 ||
anyonyaṃ lambitakarau tatastau harirākṣasau |kiṣkindhāṃ viśaturhṛṣṭau siṃhau giriguhāmiva || 7.34.43 ||
sa tatra māsamuṣitaḥ sugrīva iva rāvaṇaḥ |amātyairāgatairnītastrailokyotsādanārthibhiḥ || 7.34.44 ||
evametatpurāvṛttaṃ vālinā rāvaṇaḥ prabho |dharṣitaśca kṛtaścāpi bhrātā pāvakasannidhau || 7.34.45 ||
balamapratimaṃ rāma vālino 'bhavaduttamam |so 'pi tvayā vinirdagdhaḥ śalabho vahninā yathā || 7.34.46 ||
apṛcchata tadā rāmo dakṣiṇāśāśramaṃ munim |prāñjalirvinayopeta idamāha vaco 'rthavat || 7.35.1 ||
atulaṃ balametadvai vālino rāvaṇasya ca |na tvetābhyāṃ hanumatā samaṃ tviti matirmama || 7.35.2 ||
śauryaṃ dākṣyaṃ balaṃ dhairyaṃ prājñatā nayasādhanam |vikramaśca prabhāvaśca hanūmati kṛtālayāḥ || 7.35.3 ||
dṛṣṭvaiva sāgaraṃ vīkṣya sīdantīṃ kapivāhinīm |samāśvāsya mahābāhuryojanānāṃ śataṃ plutaḥ || 7.35.4 ||
dharṣayitvā purīṃ laṅkāṃ rāvaṇāntaḥpuraṃ tadā |dṛṣṭvā sambhāṣitā cāpi sītā hyāśvāsitā tathā || 7.35.5 ||
senāgragā mantrisutāḥ kiṅkarā rāvaṇātmajaḥ |ete hanumatā tatra hyekena vitipātitāḥ || 7.35.6 ||
bhūyo bandhādvimuktena bhāṣayitvā daśānanam |laṅkā bhasmīkṛtā yena pāvakeneva medinī || 7.35.7 ||
na kālasya na śakrasya na viṣṇorvittapasya ca |karmāṇi tāni śrūyante yāni yuddhe hanūmataḥ || 7.35.8 ||
etasya bāhuvīryeṇa laṅkā sītā ca lakṣmaṇaḥ |prāptā mayā jayaścaiva rājyaṃ mitrāṇi bāndhavāḥ || 7.35.9 ||
hanūmānyadi me naḥ syādvānarādhipateḥ sakhā |pravṛttimapi ko vettuṃ jānakyāḥ śaktimānbhavet || 7.35.10 ||
kimarthaṃ vālyanenaiva sugrīvapriyakāmyayā |tadā vaire samutpanne na dagdho vīrudho yathā || 7.35.11 ||
nahi veditavānmanye hanūmānātmano balam |yaddṛṣṭavāñjīviteṣṭaṃ kliśyantaṃ vānarādhipam || 7.35.12 ||
etanme bhagavansarvaṃ hanūmati mahāmatau |vistareṇa yathātattvaṃ kathayāmarapūjita || 7.35.13 ||
rāghavasya vacaḥ śrutvā hetuyuktamṛṣistadā |hanūmataḥ samakṣaṃ tamidaṃ vacanamabravīt || 7.35.14 ||
satyametadraghuśreṣṭha yadbravīṣi hanūmataḥ |na bale vidyate tulyo na gatau na matau paraḥ || 7.35.15 ||
amoghaśāpaiḥ śaptastu datto 'sya munibhiḥ purā |na vettā hi balaṃ yena balī sannirimardanaḥ || 7.35.16 ||
bālye 'pyetena yatkarma kṛtaṃ rāma mahābala |tanna varṇayituṃ śakyamiti bālatayā ' 'syate || 7.35.17 ||
yadi vā 'sti tvabhiprāyastacchrotuṃ tava rāghava |samādhāya matiṃ rāma niśāmaya vadāmyaham || 7.35.18 ||
sūryadattavarasvarṇaḥ sumerurnāma parvataḥ |yatra rājyaṃ praśāstyasya kesarī nāma vai pitā || 7.35.19 ||
tasya bhāryā babhūvaiṣā hyañjaneti pariśrutā |janayāmāsa tasyāṃ vai vāyurātmajamuttamam || 7.35.20 ||
śāliśūkanibhābhāsaṃ prāsūtāmuṃ tadā 'ñjanā |phalānyāhartukāmā vai niṣkrāntā gahanecarā || 7.35.21 ||
eṣa māturviyogācca kṣudhayā ca bhṛśārditaḥ |ruroda śiśuratyarthaṃ śiśuḥ śaravaṇe yathā || 7.35.22 ||
tadodyantaṃ vivasvantaṃ japāpuṣpotkaropamam |dadarśa phalalobhācca hyutpapāta raviṃ prati || 7.35.23 ||
bālārkābhimukho bālo bālārka iva mūrtimān |grahītukāmo bālārkaṃ plavate 'mbaramadhyagaḥ || 7.35.24 ||
etasminplavamāne tu śiśubhāve hanūmati |devadānavayakṣāṇāṃ vismayaḥ sumahānabhūt || 7.35.25 ||
nāpyevaṃ vegavānvāyurgaruḍo vā manastathā |yathā 'yaṃ vāyuputrastu kramate 'mbaramuttamam || 7.35.26 ||
yadi tāvacchiśorasya tvīdṛśo gativikramaḥ |yauvanaṃ balamāsādya kathaṃ vego bhaviṣyati || 7.35.27 ||
tamanuplavate vāyuḥ plavantaṃ putramātmanaḥ |sūryadāhabhayādrakṣaṃstuṣāracayaśītalaḥ || 7.35.28 ||
bahuyojanasāhasraṃ kramatyeṣa gatombaram |piturbalācca bālyācca bhāskarābhyāśamāgataḥ || 7.35.29 ||
śiśureṣa tvadoṣajña iti matvā divākaraḥ |kāryaṃ cātra samāyattamityevaṃ na dadāha saḥ || 7.35.30 ||
yameva divasaṃ hyeṣa grahītuṃ bhāskaraṃ plutaḥ |tameva divasaṃ rāhurjighṛkṣati divākaram || 7.35.31 ||
anena sa parāmṛṣṭo rāma sūryarathopari |apakrāntastatastrasto rāhuścandrārkamardanaḥ || 7.35.32 ||
sa indrabhavanaṃ gatvā saroṣaḥ siṃhikāsutaḥ |abravīdbhrukuṭiṃ kṛtvā devaṃ devagaṇairvṛtam || 7.35.33 ||
bubhukṣāpanayaṃ dattvā candrārkau mama vāsava |kimidaṃ tattvayā dattamanyasya balavṛtrahan || 7.35.34 ||
adyāhaṃ parvakāle tu jighṛkṣuḥ sūryamāgataḥ |athānyo rāhurāsādya jagrāha sahasā ravim || 7.35.35 ||
sa rāhorvacanaṃ śrutvā vāsavaḥ sambhramānvitaḥ |utpapātāsanaṃ hitvā codvahankāñcanīṃ srajam || 7.35.36 ||
tataḥ kailāsakūṭābhaṃ caturdantaṃ madasravam |śṛṅgāradhāriṇaṃ prāṃśuṃ svarṇaghaṇṭāṭṭahāsinam || 7.35.37 ||
indraḥ karīndramāruhya rāhuṃ kṛtvā puraḥsaram |prāyādyatrābhavatsūryaḥ sahānena hanūmatā || 7.35.38 ||
athātirabhasenāgādrāhurutsṛjya vāsavam |anena ca sa vai dṛṣṭaḥ pradhāvañchailakūṭavat || 7.35.39 ||
tataḥ sūryaṃ samutsṛjya rāhuṃ phalamavekṣya ca |utpapāta punarvyoma grahītuṃ siṃhikāsutam || 7.35.40 ||
utsṛjyārkamimaṃ rāma pradhāvantaṃ plavaṅgamam |avekṣyaivaṃ parāvṛttya mukhaśeṣaḥ parāṅmukhaḥ || 7.35.41 ||
indramāśaṃsamānastu trātāraṃ siṃhikāsutaḥ |indra indreti saṃtrāsānmuhurmahurabhāṣata || 7.35.42 ||
rāhorvikrośamānasya prāgevālakṣitaṃ svaram |śrutvendrovāca mā bhaiṣīrahamenaṃ niṣūdaye || 7.35.43 ||
airāvataṃ tato dṛṣṭvā mahattadidamityapi |phalaṃ matvā hastirājamabhidudrāva mārutiḥ || 7.35.44 ||
tathāsya dhāvato rūpamairāvatajighṛkṣayā |muhūrtamabhavadghoramindrāgnyoriva bhāsvaram || 7.35.45 ||
evamādhāvamānaṃ tu nātikruddhaḥ śacīpatiḥ |hastāntādatimuktena kuliśenābhyatāḍayat || 7.35.46 ||
tato girau papātaiṣa indravajrābhitāḍitaḥ |patamānasya caitasya vāmo hanurabhajyata || 7.35.47 ||
tasmiṃstu patite bāle vajratāḍanavihvale |cukrodhendrāya pavanaḥ prajānāmahitāya saḥ || 7.35.48 ||
pracāraṃ sa tu saṅgṛhya prajāsvantargataḥ prabhuḥ |guhāṃ praviṣṭaḥ svasutaṃ śiśumādāya mārutaḥ || 7.35.49 ||
viṇmūtrāśayamāvṛtya prajānāṃ paramārtikṛt |rurodha sarvabhūtāni yathā varṣāṇi vāsavaḥ || 7.35.50 ||
vāyuprakopādbhūtāni nirucchvāsāni sarvataḥ |sandhibhirbhidyamānaiśca kāṣṭhabhūtāni jajñire || 7.35.51 ||
niḥsvādhyāyavaṣaṭkāraṃ niṣkriyaṃ dharmavarjitam |vāyuprakopātऺtrailokyaṃ nirayasthamivābhavat || 7.35.52 ||
tataḥ prajāḥ sagandharvāḥ sadevāsuramānuṣāḥ |prajāpatiṃ samādhāvanduḥkhitāśca sukhecchayā || 7.35.53 ||
ūcuḥ prāñjalayo devā mahodaranibhodarāḥ |tvayā nu bhagavansṛṣṭāḥ prajānātha caturvidhāḥ || 7.35.54 ||
tvayā datto 'yamasmākamāyuṣaḥ pavanaḥ patiḥ |so 'smānprāṇeśvaro bhūtvā kasmādeṣo 'dya sattama || 7.35.55 ||
rurodha duḥkhaṃ janayannantaḥpura iva striyaḥ |tasmāttvāṃ śaraṇaṃ prāptā vāyunohatā vayam || 7.35.56 ||
etatprajānāṃ śrutvā tu prajānāthaḥ prajāpatiḥ |kāraṇāditi coktvāsau prajāḥ punarabhāṣata || 7.35.57 ||
yasmiṃśca kāraṇe vāyuścukrodha ca rurodha ca |prajāḥ śṛṇudhvaṃ tatsarvaṃ śrotavyaṃ cātmanaḥ kṣamam || 7.35.58 ||
putrastasyāmareśena indreṇādya nipātitaḥ |rāhorvacanamāsthāya tataḥ sa kupito 'nilaḥ || 7.35.59 ||
aśarīraḥ śarīreṣu vāyuścarati pālayan |śarīraṃ hi vinā vāyuṃ samatāṃ yāti dārubhiḥ || 7.35.60 ||
vāyuḥ prāṇaḥ sukhaṃ vāyurvāyuḥ sarvamidaṃ jagat |vāyunā samparityaktaṃ na sukhaṃ vindate jagat || 7.35.61 ||
adyaiva ca parityaktaṃ vāyunā jagadāyuṣā |adyaiva te nirucchvāsāḥ kāṣṭhakuḍyopamāḥ sthitāḥ || 7.35.62 ||
tadyāmastatra yatrāste māruto rukprado hi naḥ |mā vināśaṃ gamiṣyāma aprasādyāditeḥ sutāḥ || 7.35.63 ||
tataḥ prajābhiḥ sahitaḥ prajāpatiḥ sadevagandharvabhujaṅgaguhyakaiḥ |jagāma tatrāsyati yatra mārutaḥ sutaṃ surendrābhihataṃ pragṛhya saḥ || 7.35.64 ||
tato 'rkavaiśvānarakāñcanaprabhaṃ sutaṃ tadotsaṅgagataṃ sadāgateḥ |caturmukho vīkṣya kṛpāmathākarotsadevagandharvarṣiyakṣarākṣasaiḥ || 7.35.65 ||
tataḥ pitāmahaṃ dṛṣṭvā vāyuḥ putravadhārditaḥ |śiśukaṃ taṃ samādāya uttasthau dhāturagrataḥ || 7.36.1 ||
calakuṇḍalamaulisraktapanīyavibhūṣaṇaḥ |pādayornyapatadvāyustisropasthāya vedhase || 7.36.2 ||
taṃ tu vedavidā tena lambābharaṇaśobhinā |vāyumutthāpya hastena śiśuṃ taṃ parimṛṣṭavān || 7.36.3 ||
spṛṣṭamātrastataḥ so 'tha salīlaṃ padmayoninā |jalasiktaṃ yathā sasyaṃ punarjīvitamāptavān || 7.36.4 ||
prāṇavantamimaṃ dṛṣṭvā prāṇo gandhavaho mudā |cacāra sarvabhūteṣu sanniruddhaṃ yathā purā || 7.36.5 ||
marudrodhādvinirmuktāstāḥ prajā muditā 'bhavan |śītadāhavinirmuktāḥ padminya iva sāmbujāḥ || 7.36.6 ||
tatastriyugmastrikakutऺitradhāmā tridaśārcitaḥ |uvāca devatā brahmā mārutapriyakāmyayā || 7.36.7 ||
bho mahendreśavaruṇaprajeśvaradhaneśvarāḥ |jānatāmapi vaḥ sarvaṃ vakṣyāmi śrūyatāṃ hitam || 7.36.8 ||
anena śiśunā kāryaṃ kartavyaṃ vo bhaviṣyati |tadvadadhvaṃ varānsarve mārutasyāsya tuṣṭaye || 7.36.9 ||
tataḥ sahasranayanaḥ prītiyuktaḥ śubhānanaḥ |kuśeśayamayīṃ mālāmutkṣipyedaṃ vaco 'bravīt || 7.36.10 ||
matkarotsṛṣṭavajreṇa hanurasya yathā hataḥ |nāmnā vai kapiśārdūlo bhavitā hanumāniti || 7.36.11 ||
ahamasya pradāsyāmi paramaṃ varamadbhutam |itaḥ prabhṛti vajrasya mamāvadhyo bhaviṣyati || 7.36.12 ||
mārtaṇḍastvabravīttatra bhagavāṃstimirāpahaḥ |tejaso 'sya madīyasya dadāmi śatikāṃ kalām || 7.36.13 ||
yadā tu śāstrāṇyadhyetuṃ śaktirasya bhaviṣyati |tadāsya śāstraṃ dāsyāmi yena vāggmī bhaviṣyati || 7.36.14 ||
nacāsya bhavitā kaścitsadṛśaḥ śāstradarśane |varuṇaśca varaṃ prādānnāsya mṛtyurbhaviṣyati |varṣāyutaśatenāpi matpāśādudakādapi || 7.36.15 ||
yamo daṇḍādavadhyatvamarogatvaṃ ca nityaśaḥ |varaṃ dadāmi santuṣṭa aviṣādaṃ ca saṃyuge || 7.36.16 ||
gadeyaṃ māmikā nainaṃ saṃyugeṣu vadhiṣyati |ityevaṃ varadaḥ prāha tadā hyekākṣipiṅgalaḥ || 7.36.17 ||
matto madāyudhānāṃ ca na vadhyo 'yaṃ bhaviṣyati |ityevaṃ śaṅkareṇāpi datto 'sya paramo varaḥ || 7.36.18 ||
sarveṣāṃ brahmadaṇḍānāmavadhyo 'yaṃ bhaviṣyati |dīrghāyuśca mahātmā ca iti brahmābravīdvacaḥ || 7.36.19 ||
viśvakarmā ca dṛṣṭvainaṃ bālasūryopamaṃ śiśum |śilpināṃ pravaraḥ prādādvaramasya mahāmatiḥ || 7.36.20 ||
matkṛtāni ca śastrāṇi yāni divyāni saṃyuge |tairavadhyatvamāpannaścirajīvī bhaviṣyati || 7.36.21 ||
tataḥ surāṇāṃ tu varairdṛṣṭvā hyenamalaṅkṛtam |caturmukhastuṣṭamanā vāyumāha jagadguruḥ || 7.36.22 ||
amitrāṇāṃ bhayakaro mitrāṇāmabhayaṅkaraḥ |ajeyo bhavitā putrastava māruta mārutiḥ || 7.36.23 ||
kāmarūpaḥ kāmacārī kāmagaḥ plavatāṃ varaḥ |bhavatyavyāhatagatiḥ kīrtimāṃśca bhaviṣyati || 7.36.24 ||
rāvaṇotsādanārthāni rāmapriyakaraṇi ca |romaharṣakarāṇyeṣa kartā karmāṇi saṃyuge || 7.36.25 ||
evamuktvā tamāmantrya mārutaṃ tvamaraiḥ saha |yathāgataṃ yayuḥ sarve pitāmahapurogamāḥ || 7.36.26 ||
so 'pi gandhavahaḥ putraṃ pragṛhya gṛhamānayat |añjanāyāstamācakhyau varadattaṃ vinirgataḥ || 7.36.27 ||
prāpya rāma varāneṣa varadānasamanvitaḥ |balenātmani saṃsthena so 'pūryata yathā 'rṇavaḥ || 7.36.28 ||
tarasā pūryamāṇo 'pi tadā vānarapuṅgavaḥ |āśrameṣu maharṣīṇāmaparādhyati nirbhayaḥ || 7.36.29 ||
srugbhāṇḍānyagnihotraṃ ca valkalājinasañcayān |bhagnavicchinnavidhvastānsaṃśāntānāṃ karotyayam || 7.36.30 ||
evaṃvidhāni karmāṇi prāvartata mahābalaḥ |sarveṣāṃ brahmadaṇḍānāmavadhyaḥ śambhunā kṛtaḥ || 7.36.31 ||
jānanta ṛṣayastaṃ vai sahante tasya śaktitaḥ || 7.36.32 ||
yathā kesariṇā tveṣa vāyunā so 'ñjanāsutaḥ |pratiṣiddho 'pi maryādāṃ laṅghayatyeva vānaraḥ || 7.36.33 ||
tato maharṣayaḥ kruddhā bhṛgvaṅgirasavaṃśajāḥ |śepurenaṃ raghuśreṣṭha nātikruddhātimanyavaḥ || 7.36.34 ||
bādhase yatsamāśritya balamasmānplavaṅgama |taddīrghakālaṃ vettāsi nāsmākaṃ śāpamohitaḥ |yadā te smāryate kīrtistadā te vardhate balam || 7.36.35 ||
tatassa hṛtatejaujā maharṣivacanaujasā |eṣośramāṇi tānyeva mṛdubhāvaṃ gato 'carat || 7.36.36 ||
atharkṣarajaso nāma vālisugrīvayoḥ pitā |sarvavānararājā ' 'sīttejasā bhāskaraprabhaḥ || 7.36.37 ||
sa tu rājyaṃ ciraṃ kṛtvā vānarāṇāṃ harīśvaraḥ |sa ca ṛkṣarajā nāma kāladharmeṇa saṅgataḥ || 7.36.38 ||
tasminnastamite cātha mantribhirmantrakovidaiḥ |pitrye pade kṛto vālī sugrīvo vālinaḥ pade || 7.36.39 ||
sugrīveṇa samaṃ tvasya advaidhaṃ chidravarjitam |ābālyaṃ sakhyamabhavadanilasyāgninā yathā || 7.36.40 ||
eṣa śāpavaśādeva na veda balamātmanaḥ |vālisugrīvayorvairaṃ yadā rāma samutthitam || 7.36.41 ||
na hyeṣa rāma sugrīvo bhrāmyamāṇo 'pi vālinā || 7.36.42 ||
deva jānāti na hyeṣa balamātmani mārutiḥ |ṛṣiśāpāhṛtabalastadaiṣa kapisattamaḥ || 7.36.43 ||
siṃhaḥ kuñjararuddho vā āsthitaḥ sahito raṇe || 7.36.44 ||
parākramotsāhamatipratāpasauśīlyamādhuryanayānayaiśca |gāmbhīryacāturyasuvīryadhairyairhanūmataḥ ko 'bhyadhiko 'sti loke || 7.36.45 ||
asau punarvyākaraṇaṃ grahīṣyansūryonmukhaḥ praṣṭumanā kapīndraḥ |udyadgirerastagiriṃ jagāma granthaṃ mahaddhārayanaprameyaḥ || 7.36.46 ||
sasūtravṛttyarthapadaṃ mahārthaṃ sasaṅgrahaṃ sāddhyati vai kapīndraḥ |nahyasya kaścitsadṛśo 'sti śāstre vaiśārade cchandagatau tathaiva || 7.36.47 ||
sarvāsu vidyāsu tapovidhāne praspardhate 'yo hi guruṃ surāṇām |so 'yaṃ navavyākaraṇārthavettā brahmā bhaviṣyatyapi te prasādāt || 7.36.48 ||
pravīvivakṣoriva sāgarasya lokāndidhakṣoriva pāvakasyayugakṣaye hyeva yathāntakasya hanūmataḥ sthāsyati kaḥ purastāt || 7.36.49 ||
eṣeva cānye ca mahākapīndrāḥ sugrīvamaindadvividāḥ sanīlāḥ |satāratāreyanalāḥ sarambhāstvatkāraṇādrāma surairhi sṛṣṭāḥ || 7.36.50 ||
tadetkathitaṃ sarvaṃ yanmāṃ tvaṃ paripṛcchasi |hanūmato bālabhāve karmaitatkathitaṃ mayā || 7.36.51 ||
śrutvā 'gastyasya kathitaṃ rāmaḥ saumitrireva ca |vismayaṃ paramaṃ jagmurvānarā rākṣasaiḥ saha || 7.36.52 ||
agastyastvabravīdrāmaṃ sarvametachrutaṃ tvayā |dṛṣṭaḥ sambhāṣitaścāsi rāma gacchāmahe vayam || 7.36.53 ||
śrutvaitadrāghavo vākyamagastyasyogratejasaḥ |prāñjaliḥ praṇataścāpi maharṣimidamabravīt || 7.36.54 ||
adya me devatā hṛṣṭāḥ pitaraḥ prapitāmahāḥ |yuṣmākaṃ darśanādeva nityaṃ tuṣṭāḥ sabāndhavāḥ || 7.36.55 ||
vijñāpyaṃ tu mamaitaddhi yadvadāmyāgataspṛhaḥ |tadbhavadbhirmama kṛte kartavyamanukampayā || 7.36.56 ||
paurajānapadānsthāpya svakāryeṣvahamāgataḥ |kratūneva kariṣyāmi prabhāvādbhavatāṃ satām || 7.36.57 ||
sadasyā mama yajñeṣu bhavanto nityameva tat |bhaviṣyatha mahāvīryā mamānugrahakāṅkṣiṇaḥ || 7.36.58 ||
ahaṃ yuṣmānsamāśritya taponirdhūtakalmaṣān |anugrahītaḥ pitṛbhirbhaviṣyāmi sunirvṛtaḥ || 7.36.59 ||
tadāgantavyamaniśaṃ bhavadbhiriha saṅgataiḥ |agastyādyāstu tacchrutvā ṛṣayaḥ saṃśitavratāḥ || 7.36.60 ||
evamastviti taṃ coktvā prayātumupacakramuḥ || 7.36.61 ||
evamuktvā gatāḥ sarve ṛṣayaste yathāgatam |rāghavaśca tamevārthaṃ cintayāmāsa vismitaḥ || 7.36.62 ||
tato 'staṃ bhāskare yāte visṛjya nṛpavānarān |sandhyāmupāsya vidhivattadā naravarottamaḥ |pravṛttāyāṃ rajanyāṃ tu so 'ntaḥpuracaro 'bhavat || 7.36.63 ||
abhiṣikte tu kākutsthe dharmeṇa viditātmani |vyatītā yā niśā pūrvā paurāṇāṃ harṣavardhinī || 7.37.1 ||
tasyāṃ rajanyāṃ vyuṣṭāyāṃ prātarnṛpatibodhakāḥ |vandinaḥ samupātiṣṭhansaumyā nṛpativeśmani || 7.37.2 ||
te raktakaṇṭhinaḥ sarve kinnarā iva śikṣitāḥ |tuṣṭuvurnapatiṃ vīraṃ yathāvat sampraharṣiṇaḥ || 7.37.3 ||
vīra saumya prabudhyasva kausalyāprītivardhana |jagaddhi sarvaṃ svapiti tvayi supte narādhipa || 7.37.4 ||
vikramaste yathā viṣṇo rūpaṃ caivāśvinoriva |buddhyā bṛhaspatestulyaḥ prajāpatisamo hyasi || 7.37.5 ||
kṣamā te pṛthivītulyā tejasā bhāskaropamaḥ |vegaste vāyunā tulyo gāmbhīryamudadheriva || 7.37.6 ||
aprakampyo yatā sthāṇuścandre saumyatvamīdṛśam |nedṛśāḥ pārthivāḥ pūrvaṃ bhavitāro narādhipa || 7.37.7 ||
yathā tvamatidurdharṣo dharmanityaḥ prajāhitaḥ |na tvāṃ jahāti kīrtiśca lakṣmīśca puruṣarṣabha || 7.37.8 ||
śrīśca dharmaśca kākutstha tvayi nityaṃ pratiṣṭhitau |etāścānyāśca madhurā vandibhiḥ parikīrtitāḥ || 7.37.9 ||
sūtāśca saṃstavairdivyairbodhayanti sma rāghavam |stutibhiḥ stūyamānābhiḥ pratyabudhyata rāghavaḥ || 7.37.10 ||
sa tadvihāya śayanaṃ pāṇḍarācchādanāstṛtam |uttasthau nāgaśayanāddharirnārāyaṇo yathā || 7.37.11 ||
tamutthitaṃ mahātmānaṃ prahvāḥ prāñjalayo narāḥ |salilaṃ bhājanaiḥ śubhrairupatasthuḥ sahasraśaḥ || 7.37.12 ||
kṛtodakaśucirbhūtvā kāle hutahutāśanaḥ |devāgāraṃ jagāmāśu puṇyamikṣvākusevitam || 7.37.13 ||
tatra devānpita'nviprānarcayitvā yathāvidhi |bāhyakakṣāntaraṃ rāmo nirjagāma janairvṛtaḥ || 7.37.14 ||
upatasthurmahātmāno mantriṇaḥ sapurohitāḥ |vasiṣṭhapramukhāḥ sarve dīpyamānā ivāgnayaḥ || 7.37.15 ||
kṣatriyāśca mahātmāno nānājanapadeśvarāḥ |rāmasyopāviśanpārśve śakrasyeva yathā 'marāḥ || 7.37.16 ||
bharato lakṣmaṇaścātra śatrughnaśca mahāyaśāḥ |upāsāñcakrire hṛṣṭā vedāstraya ivādhvaram || 7.37.17 ||
yātāḥ prāñjalayo bhūtvā kiṅkarā muditānanāḥ |muditā nāma pārśvasthā bahavaḥ samupāviśan || 7.37.18 ||
vānarāśca mahāvīryā viṃśatiḥ kāmarūpiṇaḥ |sugrīvapramukhā rāmamupāsante mahaujasaḥ || 7.37.19 ||
vibhīṣaṇaśca rakṣobhiścaturbhiḥ parivāritaḥ |upāsate mahātmānaṃ dhaneśamiva guhyakāḥ || 7.37.20 ||
tathā nigamavṛddhāśca kulīnā ye ca mānavāḥ |śirasā ' 'vandya rājānamupāsante vicakṣaṇāḥ || 7.37.21 ||
tathā parivṛto rājā śrīmadbhirṛṣibhirvṛtaḥ |rājabhiśca mahāvīryairvānaraiśca sarākṣasaiḥ || 7.37.22 ||
yathā deveśvaro nityamṛṣibhiḥ samupāsyate |adhikastena rūpeṇa sahasrākṣādvirocate || 7.37.23 ||
teṣāṃ samupaviṣṭānāṃ tāstāḥ sumadhurāḥ kathāḥ |kathyante dharmasaṃyuktāḥ purāṇajñairmahātmabhiḥ || 7.37.24 ||
evamāste mahābāhurahanyahani rāghavaḥ |praśāsatsarvakāryāṇi paurajānapadeṣu ca || 7.38.1 ||
tataḥ katipayāhaḥsu vaidehaṃ mithilādhipam |rāghavaḥ prāñjalirbhūtvā vākyametaduvāca ha || 7.38.2 ||
bhavānhi gatiravyagrā bhavatā pālitā vayam |bhavatastejasogreṇa rāvaṇo nihato mayā || 7.38.3 ||
ikṣvākūṇāṃ ca sarveṣāṃ maithilānāṃ ca sarvaśaḥ |atulāḥ prītayo rājansambandhakapurogamāḥ || 7.38.4 ||
tadbhavānsvapuraṃ yātu ratnānyādāya pārthiva |bharataśca sahāyārthaṃ pṛṣṭhataste 'nuyāsyati || 7.38.5 ||
sa tatheti nṛpaḥ kṛtvā rāghavaṃ vākyamabravīt |prīto 'smi bhavato rājandarśanena nayena ca || 7.38.6 ||
yānyetāni tu ratnāni madarthaṃ sañcitāni vai |duhitre tāni vai rājansarvāṇyeva dadāmi ca || 7.38.7 ||
evamuktvā tu kākutsthaṃ janako hṛṣṭamānasaḥ |prayayau mithilāṃ śrīmāṃstamanujñāya rāghavam || 7.38.8 ||
tataḥ prayāte janake kekayaṃ mātulaṃ prabhuḥ |rāghavaḥ prāñjalirbhūtvā vākyametaduvāca ha || 7.38.9 ||
idaṃ rājyamahaṃ caiva bharataśca salakṣmaṇaḥ |āyattāstvaṃ hi no rājangatiśca puruṣarṣabha || 7.38.10 ||
rājā hi vṛddhaḥ santāpaṃ tvadarthamupayāsyati |tasmādgamanamadyaiva rocate tava pārthiva || 7.38.11 ||
lakṣmaṇenānuyātreṇa pṛṣṭhato 'nugamiṣyate |dhanamādāya vipulaṃ ratnāni vividhāni ca || 7.38.12 ||
yudhājittu tathetyāha gamanaṃ prati rāghavam |ratnāni ca dhanaṃ caiva tvayyevākṣayyamastviti || 7.38.13 ||
pradakṣiṇaṃ sa rājānaṃ kṛtvā kekayavardhanaḥ |rāmeṇa hi kṛtaḥ pūrvamabhivādya pradakṣiṇam || 7.38.14 ||
lakṣmaṇena sahāyena prayātaḥ kekayeśvaraḥ |hate 'sure yathā vṛtre viṣṇunā saha vāsavaḥ || 7.38.15 ||
taṃ visṛjya tato rāmo vayasyamakutobhayam |pratardanaṃ kāśipatiṃ pariṣvajyedamabravīt || 7.38.16 ||
darśitā bhavatā prītirdarśitaṃ sauhṛdaṃ param |udyogaśca kṛto rājanbharatena tvayā saha || 7.38.17 ||
tadbhavānadya kāśeya purīṃ vārāṇasīṃ vraja |ramaṇīyāṃ tvayā guptāṃ suprakāśāṃ sutoraṇām || 7.38.18 ||
etāvaduktvā cotthāya kākutsthaḥ paramāsanāt |paryaṣvajata dharmātmā nirantaramurogatam || 7.38.19 ||
visarjayāmāsa tadā kausalyānandavardhanaḥ |rāghaveṇābhyanujñātaḥ kāśīśo 'pyakutobhayaḥ |vārāṇasīṃ yayau tūrṇaṃ rāghaveṇa visarjitaḥ || 7.38.20 ||
visṛjya taṃ kāśipatiṃ triśataṃ pṛthivīpatīn |prahasanrāghavo vākyamuvāca madhurākṣaram || 7.38.21 ||
bhavatāṃ prītiravyagrā tejasā parirakṣitā |dharmaśca niyato nityaṃ satyaṃ ca bhavatāṃ sadā || 7.38.22 ||
yuṣmākaṃ cānubhāvena tejasā ca mahātmanām |hato durātmā durbuddhī rāvaṇo rākṣasādhamaḥ || 7.38.23 ||
hetumātramahaṃ tatra bhavatāṃ tejasā hataḥ |rāvaṇaḥ sagaṇo yuddhe saputrāmātyabāndhavaḥ || 7.38.24 ||
bhavantaśca samānītā bharatena mahātmanā |śrutvā janakarājasya kānanāttanayāṃ hṛtām || 7.38.25 ||
udyuktānāṃ ca sarveṣāṃ pārthivānāṃ mahātmanām |kālo vyatītaḥ sumahāngamanaṃ rocayāmyataḥ || 7.38.26 ||
pratyūcustaṃ ca rājāno harṣeṇa mahatā vṛtāḥ |diṣṭyāṃ tvaṃ vijayī rāma svarājye 'pi pratiṣṭhitaḥ || 7.38.27 ||
diṣṭyā pratyāhṛtā sītā diṣṭyā śatruḥ parājitaḥ |eṣa naḥ paramaḥ kāma eṣā naḥ pītiruttamā || 7.38.28 ||
yattvāṃ vijayinaṃ rāma paśyāmo hataśātravam || 7.38.29 ||
etattvayyupapannaṃ ca yadasmāṃstvaṃ praśaṃsase |praśaṃsārha na jānīmaḥ praśaṃsāṃ vaktumīdṛśīm || 7.38.30 ||
āpṛcchāmo gamiṣyāmo hṛdistho naḥ sadā bhavān |vartāmahe mahābāho prītyātra mahatā vṛtāḥ |bhavecca te mahārāja prītirasmāsu nityadā || 7.38.31 ||
bāḍhamityeva rājāno harṣeṇa paramānvitāḥ |ucuḥ prāñjalayaḥ sarve rāghavaṃ gamanotsukāḥ || 7.38.32 ||
pūjitāścaiva rāmeṇa jagmurdeśānsvakānsvakān || 7.38.33 ||
te prayātā mahātmānaḥ pārthivāste prahṛṣṭavat |gajavājisahasraughaiḥ kampayanto vasundharām || 7.39.1 ||
akṣauhiṇyo hi tatrāsanrāghavārthe samudyatāḥ |bharatasyājñayā 'nekāḥ prahṛṣṭā balavāhanāḥ || 7.39.2 ||
ūcuste ca mahīpālā baladarpasamanvitāḥ |na rāmarāvaṇaṃ yuddhe paśyāmaḥ purataḥ sthitam || 7.39.3 ||
bharatena vayaṃ paścātsamānītā nirarthakam |hatā hi rākṣasāḥ kṣipraṃ pārthivaiḥ syurna saṃśayaḥ || 7.39.4 ||
rāmasya bāhuvīryeṇa rakṣitā lakṣmaṇasya ca |sukhaṃ pāresamudrasya yudhyema vigatajvarāḥ || 7.39.5 ||
etāścānyāśca rājānaḥ kathāstatra sahasraśaḥ |kathayantaḥ svarājyāni jagmurharṣasamanvitāḥ || 7.39.6 ||
svāni rājyāni mukhyāni ṛddhāni muditāni ca |samṛddhadhanadhānyāni pūrṇāni vasumanti ca || 7.39.7 ||
yathāpurāṇi te gatvā ratnāni vividhānyatha |rāmasya priyakāmārthamupahārān nṛpā daduḥ || 7.39.8 ||
aśvānyānāni ratnāni hastinaśca madotkaṭān |candanāni ca mukhyāni divyānyābharaṇāni ca || 7.39.9 ||
maṇimuktāpravālāṃstu dāsyo rūpasamanvitāḥ |ajāvikāṃśca vividhān rathāṃstu vividhāndaduḥ || 7.39.10 ||
bharato lakṣmaṇaścaiva śatrughnaśca mahābalāḥ |ādāya tāni ratnāni svāṃ purīṃ punarāgatāḥ || 7.39.11 ||
āgamya ca purīṃ ramyāmayodhyāṃ puruṣarṣabhāḥ |tāni ratnāni citrāṇi rāmāya samupāharan || 7.39.12 ||
pratigṛhya ca tatsarvaṃ rāmaḥ prītisamanvitaḥ |sugrīvāya dadau rājñe mahātmā kṛtakarmaṇe || 7.39.13 ||
bibhīṣaṇāya ca dadau tathānyebhyo 'pi rāghavaḥ |rākṣasebhyaḥ kapibhyaśca yairvṛto jayamāptavān || 7.39.14 ||
te sarve rāmadattāni ratnāni kapirākṣasāḥ |śirobhirdhārayāmāsurbāhubhiśca mahābalāḥ || 7.39.15 ||
hanūmantaṃ ca nṛpatirikṣvākūṇāṃ mahārathaḥ |aṅgadaṃ ca mahābāhumaṅkamāropya vīryavān || 7.39.16 ||
rāmaḥ kamalapatrākṣaḥ sugrīvamidamabravīt |aṅgadaste suputro 'yaṃ mantrī cāpyanilātmajaḥ || 7.39.17 ||
sugrīvamantrite yuktau mama cāpi hite ratau |arhato vividhāṃ pūjāṃ tvatkṛte vai harīśvara || 7.39.18 ||
ityuktvā vyavamucyāṅgādbhūṣaṇāni mahāyaśāḥ |sa babandha mahārhāṇi tadāṅgadahanūmatoḥ || 7.39.19 ||
ābhāṣya ca mahāvīryānrāghavo yūthaparṣabhān |nīlaṃ nalaṃ kesariṇaṃ kumudaṃ gandhamādanam || 7.39.20 ||
suṣeṇaṃ panasaṃ vīraṃ maindaṃ dvividameva ca |jāmbavantaṃ gavākṣaṃ ca vinataṃ dhūmrameva ca || 7.39.21 ||
valīmukhaṃ prajaṅghaṃ ca sannādaṃ ca mahābalam |darīmukhaṃ dadhimukhamindrajānuṃ ca yūthapam || 7.39.22 ||
madhuraṃ ślakṣṇayā vācā netrābhyāmāpibanniva |suhṛdo me bhavantaśca śarīraṃ bhrātarastathā || 7.39.23 ||
yuṣmābhiruddhṛtaścāhaṃ vyasanātkānanaukasaḥ |dhanyo rājā ca sugrīvo bhavadbhiḥ suhṛdāṃ varaiḥ || 7.39.24 ||
evamuktvā dadau tebhyo bhūṣaṇāni yathārhataḥ |vajrāṇi ca mahārhāṇi sasvaje ca nararṣabhaḥ || 7.39.25 ||
te pibantaḥ sugandhīni madhūni madhupiṅgalāḥ |māṃsāni ca sumṛṣṭāni mūlāni ca phalāni ca || 7.39.26 ||
evaṃ teṣāṃ nivasatāṃ māsaḥ sāgro yayau tadā |muhūrtamiva te sarve rāmabhaktyā ca menire || 7.39.27 ||
rāmo 'pi reme taiḥ sārdhaṃ vānaraiḥ kāmarūpibhiḥ |rākṣasaiśca mahāvīryairṛkṣaiścaiva mahābalaiḥ || 7.39.28 ||
evaṃ teṣāṃ yayau māso dvitīyaḥ śiśiraḥ sukham |vānarāṇāṃ prahṛṣṭānāṃ rākṣasānāṃ ca sarvaśaḥ || 7.39.29 ||
ikṣvākunagare ramye parāṃ prītimupāsatām |rāmasya prītikaraṇaiḥ kālasteṣāṃ sukhaṃ yayau || 7.39.30 ||
tathā sma teṣāṃ vasatāmṛkṣavānararakṣasām |rāghavastu mahātejāḥ sugrīvamidamabravīt || 7.40.1 ||
gamyatāṃ saumya kiṣkindhāṃ durādharṣāṃ surāsuraiḥ |pālayasva sahāmātyo rājyaṃ nihatakaṇṭakam || 7.40.2 ||
aṅgadaṃ ca mahābāho prītyā paramayā yutaḥ |paśya tvaṃ hanumantaṃ ca nalaṃ ca sumahābalam || 7.40.3 ||
suṣeṇaṃ śvaśuraṃ vīraṃ tāraṃ ca balināṃ varam |kumudaṃ caiva durdharṣaṃ nīlaṃ caiva mahābalam || 7.40.4 ||
vīraṃ śatavaliṃ caiva maindaṃ dvividameva ca |gajaṃ gavākṣaṃ gavayaṃ śarabhaṃ ca mahābalam |paśya prītisamāyukto gandhamādanameva ca || 7.40.5 ||
ṛṣabhaṃ ca suvikrāntaṃ jāmbavantaṃ mahābalam |ye ceme sumahātmāno madarthe tyaktajīvitāḥ || 7.40.6 ||
paśya tvaṃ prītisaṃyukto mā caiṣāṃ vipriyaṃ kṛthāḥ || 7.40.7 ||
evamuktvā tu sugrīvamāśliṣya ca punaḥ punaḥ |vibhīṣaṇamuvācātha rāmo madhurayā girā || 7.40.8 ||
laṅkāṃ praśādhi dharmeṇa dharmajñastvaṃ mato mama |purasya rākṣasānāṃ ca svabhrātussammato hyasi || 7.40.9 ||
mā ca buddhimadharme tvaṃ kuryā rājankathañcana |buddhimanto hi rājāno dhruvamaśnanti medinīm || 7.40.10 ||
ahaṃ ca nityaśo rājansugrīvasahitastvayā |smartavyaḥ parayā prītyā gaccha tvaṃ vigatajvaraḥ || 7.40.11 ||
rāmasya bhāṣitaṃ śrutvā ṛkṣavānararākṣasāḥ |sādhusādhviti kākutsthaṃ praśaśaṃsuḥ punaḥ punaḥ || 7.40.12 ||
tava buddhirmahābāho vīryamadbhutameva ca |mādhuryaṃ paramaṃ rāma svayambhoriva nityadā || 7.40.13 ||
teṣāmevaṃ bruvāṇānāṃ vānarāṇāṃ ca rākṣasām |hanūmānpravaṇaḥ bhūtvā rāghavaṃ vākyamabravīt || 7.40.14 ||
sneho me paramo rājaṃstvayi tiṣṭhatu nityadā |bhaktiśca niyatā vīra bhāvo nānyatra gacchatu || 7.40.15 ||
vāyadrāmakathā vīra cariṣyati mahītale |tāvaccharīre vatsyanti prāṇā mama na saṃśayaḥ || 7.40.16 ||
yaccaitaccaritaṃ divyaṃ kathā te raghunandana |tanmayāpsaraso nāma śrāvayeyurnararṣabha || 7.40.17 ||
tacchrutvāhaṃ tato vīra tava caryāmṛtaṃ prabho |utkaṇṭhāṃ tāṃ hariṣyāmi meghalekhāmivānilaḥ || 7.40.18 ||
evaṃ bruvāṇaṃ rāmastu hanūmantaṃ varāsanāt |utthāya sasvaje snehādvākyametaduvāca ha || 7.40.19 ||
evametatkapiśreṣṭha bhavitā nātra saṃśayaḥ |cariṣyati kathā yāvadeṣā loke ca māmikā |tāvatte bhavitā kīrtiḥ śarīre 'pyasavastathā || 7.40.20 ||
lokā hi yāvatsthāsyanti tāvatsthāsyati me kathā || 7.40.21 ||
loke ca māmikā |ekaikasyopakārasya prāṇāndāsyāmi te kape |naraḥ pratyupakārāṇāmāpastvāyāti pātratām || 7.40.22 ||
tato 'sya hāraṃ candrābhaṃ mucya kaṇṭhātsa rāghavaḥ |vaiḍūryataralaṃ kaṇṭhe babandha ca hanūmataḥ || 7.40.23 ||
tenorasi nibaddhena hāreṇa mahatā kapiḥ |rarāja hemaśailendraścandreṇākrāntamastakaḥ || 7.40.24 ||
śrutvā tu rāghavasyaitadutthāyotthāya vānarāḥ |praṇamya śirasā pādau nirjagmuste mahābalāḥ || 7.40.25 ||
sugrīvaḥ sa ca rāmeṇa nirantaramurogataḥ |vibhīṣaṇaśca dharmātmā sarve te bāṣpaviklavāḥ || 7.40.26 ||
sarve ca te bāṣpakalāḥ sāśrunetrā vicetasaḥ |sammūḍhā iva duḥkhena tyajanto rāghavaṃ tadā || 7.40.27 ||
kṛtaprasādāstenaivaṃ rāghaveṇa mahātmanā |jagmuḥ svaṃ svaṃ gṛhaṃ sarve dehī dehamiva tyajan || 7.40.28 ||
tatastu te rākṣasaṛkṣavānarāḥ praṇamya rāmaṃ raghuvaṃśavardhanam |viyogajāśrupratipūrṇalocanāḥ pratiprayātāstu yathā nivāsinaḥ || 7.40.29 ||
ityārṣe śrīmadrāmāyaṇe vālmīkīye ādikāvye śrīmaduttarakāṇḍe catvāriṃśaḥ sargaḥ || 40 ||
visṛjya ca mahābāhurṛkṣavānararākṣasān |bhrātṛbhiḥ sahito rāmaḥ pramumoda sukhaṃ sukhī || 7.41.1 ||
athāparāhṇasamaye bhrātṛbhiḥ saha rāghavaḥ |śuśrāva madhurāṃ vāṇīmantarikṣāt prabhāṣitām || 7.41.2 ||
saumya rāma nirīkṣasva saumyena vadanena mām |kuberabhavanātprāptaṃ viddhi māṃ puṣpakaṃ prabho || 7.41.3 ||
tava śāsanamājñāya gato 'smi bhavanaṃ prati |upasthātuṃ naraśreṣṭha sa ca māṃ pratyabhāṣata || 7.41.4 ||
nirjitastvaṃ narendreṇa rāghaveṇa mahātmanā |nihatya yudhi durdharṣaṃ rāvaṇaṃ rākṣaseśvaram || 7.41.5 ||
mamāpi paramā prītarhate tasmindurātmani |rāvaṇe sagaṇe caiva saputre sahabāndhave || 7.41.6 ||
sa tvaṃ rāmeṇa laṅkāyāṃ nirjitaḥ paramātmanā |vaha saumya tameva tvamahamājñāpayāmi te || 7.41.7 ||
paramo hyeṣa me kāmo yattvaṃ rāghavanandanam |vaherlokasya saṃyānaṃ gacchasva vigatajvaraḥ || 7.41.8 ||
so 'haṃ śāsanamājñāya dhanadasya mahātmanaḥ |tvatsakāśamanuprāpto nirviśaṅkaḥ pratīkṣa mām || 7.41.9 ||
adṛṣyaḥ sarvabhūtānāṃ sarveṣāṃ dhanadājñayā |carāmyahaṃ prabhāveṇa tavājñāṃ paripālayan || 7.41.10 ||
evamuktastadā rāmaḥ puṣpakeṇa mahābalaḥ |uvāca puṣpakaṃ dṛṣṭvā vimānaṃ punarāgatam || 7.41.11 ||
yadyevaṃ svāgataṃ te 'stu vimānavara puṣpaka |ānukūlyāddhaneśasya vṛttadoṣo na no bhavet || 7.41.12 ||
lājaiścaiva tathā puṣpairdhūpaiścaiva sugandhibhiḥ |pūjayitvā mahābāhū rāghavaḥ puṣpakaṃ tadā || 7.41.13 ||
gamyatāmiti covāca āgaccha tvaṃ smare yadā |siddhānāṃ ca gatau saumya mā viṣādena yojaya |pratighātaśca te mā bhūdyatheṣṭaṃ gacchato diśaḥ || 7.41.14 ||
evamastviti rāmeṇa pūjayitvā visarjitam |abhipretāṃ diśaṃ tasmātprāyāttatpuṣpakaṃ tadā || 7.41.15 ||
evamantarhite tasminpuṣpake sukṛtātmani |bharataḥ prāñjalirvākyamuvāca raghunandanam || 7.41.16 ||
vividhātmani dṛśyante tvayi vīra praśāsati |amānuṣāṇāṃ sattvānāṃ vyāhṛtāni muhurmuhuḥ || 7.41.17 ||
anāmayaśca satvānāṃ sāgro māso gato hyayam |jīrṇānāmapi sattvānāṃ mṛtyurnāyāti rāghava || 7.41.18 ||
arogaprasavā nāryo vapuṣmanto hi mānavāḥ |harṣaścābhyadhiko rājañjanasya puravāsinaḥ || 7.41.19 ||
kāle varṣati parjanyaḥ pātayannamṛtaṃ payaḥ |vātāścāpi pravāntyete sparśayuktāḥ sukhāḥ śivāḥ || 7.41.20 ||
īdṛśo 'naśvaro rājā bhavediti nareśvaraḥ |kathayanti pure rājanpaurajānapadāstathā || 7.41.21 ||
etā vācaḥ sumadhurā bharatena samīritāḥ |śrutvā rāmo mudā yukto babhūva nṛpasattamaḥ || 7.41.22 ||
sa visṛjya tato rāmaḥ puṣpakaṃ hemabhūṣitam |praviveśa mahābāhuraśokavanikāṃ tadā || 7.42.1 ||
candanāgurucūtaiśca tuṅgakāleyakairapi |devadāruvanaiścāpi samantādupaśobhitām || 7.42.2 ||
campakāśokapunnāgamadhūkapanasāsanaiḥ |śobhitāṃ pārijātaiśca vidhūmajvalanaprabhaiḥ || 7.42.3 ||
lodhranīpārjunairnāgaiḥ saptaparṇātimuktakaiḥ |mandārakadalīgulmalatājālasamāvṛtām || 7.42.4 ||
priyaṅgubhiḥ kadambaiśca tathā ca vakulairapi |jambūbhirdāḍimaiścaiva kovidāraiśca śobhitām || 7.42.5 ||
sarvadā kusumai ramyaiḥ phalavadbhirmanoramaiḥ |divyagandharasopetaistaruṇāṅkurapallavaiḥ || 7.42.6 ||
tathaiva tarubhirdivyaiḥ śilpibhiḥ parikalpitaiḥ |cārupallavapuṣpāḍhyairmattabhramarasaṅkulaiḥ || 7.42.7 ||
kokilairbhṛṅgarājaiśca nānāvarṇaiśca pakṣibhiḥ |śobhitāṃ śataśaścitrāṃ cūtavṛkṣāvataṃsakaiḥ || 7.42.8 ||
śātakumbhanibhāḥ kecitkecidagniśikhopamāḥ |nīlāñjananibhāścānye bhānti tatratyapādapāḥ || 7.42.9 ||
surabhīṇi ca puṣpāṇi mālyāni vividhāni ca |dīrghikā vividhākārāḥ pūrṇāḥ paramavāriṇā || 7.42.10 ||
māṇikyakṛtasopānāḥ sphāṭikāntarakuṭṭimāḥ |phullapadmotpalavanāścakravākopaśobhitāḥ || 7.42.11 ||
dātyūhaśukasaṅghuṣṭā haṃsasārasanāditāḥ |tarubhiḥ puṣpavadbhiśca tīrajairupaśobhitāḥ || 7.42.12 ||
prākārairvividhākāraiḥ śobhitāśca śilātalaiḥ |tatraiva ca vanoddeśe vaiḍūryamaṇisannibhaiḥ || 7.42.13 ||
śādvalaiḥ paramopetāṃ puṣpitadrumakānanām |tatra saṅgharṣajātānāṃ vṛkṣāṇāṃ puṣpaśālinām || 7.42.14 ||
prastarāḥ puṣpaśabalā nabhastārāgaṇairiva |nandanaṃ hi yathendrasya brāhmaṃ caitrarathaṃ yathā |tathābhūtaṃ hi rāmasya kānanaṃ sanniveśanam || 7.42.15 ||
bahvāsanagṛhopetāṃ latāgṛhasamāvṛtām |aśokavanikāṃ sphītāṃ praviśya raghunandanaḥ || 7.42.16 ||
āsane ca śubhākāre puṣpaprakarabhūṣite |kuśāstaraṇasaṃstīrṇe rāmaḥ sanniṣasāda ha || 7.42.17 ||
sītāmādāyaṃ hastena madhumaireyakaṃ śuci |pāyayāmāsa kākutsthaḥ śacīmiva purandaraḥ || 7.42.18 ||
māṃsāni ca samṛṣṭāni phalāni vividhāni ca |rāmasyābhyavahārārthaṃ kiṅkarāstūrṇamāharan || 7.42.19 ||
upānṛtyaṃśca rājānaṃ nṛtyagītaviśāradāḥ |bālāśca rūpavatyaśca striyaḥ pānavaśānugāḥ || 7.42.20 ||
manobhirāmā rāmāstā rāmo ramayatāṃ varaḥ |ramayāmāsa dharmātmā nityaṃ paramabhūṣitaḥ || 7.42.21 ||
sa tayā sītayā sārdhamāsīno virarāja ha |arundhatyā sahāsīno vasiṣṭha iva tejasā || 7.42.22 ||
evaṃ rāmo mudā yuktaḥ sītāṃ surasutopamām |ramayāmāsa vaidehīmahanyahani devavat || 7.42.23 ||
tathā tayorviharatoḥ sītārāghavayościram |atyakrāmacchubhaḥ kālaḥ śaiśiro bhogadaḥ sadā || 7.42.24 ||
daśavarṣasahasrāṇi gatāni sumahātmanoḥ |prāptayorvividhānbhogānatītaḥ śiśirāgamaḥ || 7.42.25 ||
pūrvāhṇe dharmakāryāṇi kṛtvā dharmeṇa dharmavit |śeṣaṃ divasabhāgārdhamantaḥpuragato 'bhavat || 7.42.26 ||
sītāpi devakāryāṇi kṛtvā paurvāhṇikāni vai |śvaśrūṇāmakarotpūjāṃ sarvāsāmaviśeṣataḥ || 7.42.27 ||
abhyagacchattato rāmaṃ vicitrābharaṇāmbarā |triviṣṭape sahasrākṣamupaviṣṭaṃ yathā śacī || 7.42.28 ||
dṛṣṭvā tu rāghavaḥ patnīṃ kalyāṇena samanvitām |praharṣamatulaṃ lebhe sādhu sādhviti cābravīt || 7.42.29 ||
abravīcca varārohāṃ sītāṃ surasutopamām |apatyalābho vaidehi tvayi me samupasthitaḥ || 7.42.30 ||
kimicchasi varārohe kāmaḥ kiṃ kriyatāṃ tava || 7.42.31 ||
smitaṃ kṛtvā tu vaidehī rāmaṃ vākyamathābravīt |tapovanāni puṇyāni draṣṭumicchāmi rāghava || 7.42.32 ||
gaṅgātīropaviṣṭānāmṛṣīṇāmugratejasām |phalamūlāśināṃ deva pādamūleṣu vartitum || 7.42.33 ||
eṣa me paramaḥ kāmo yanmūlaphalabhojinām |apyekarātraṃ kākutstha nivaseyaṃ tapovane || 7.42.34 ||
tatheti ca pratijñātaṃ rāmeṇākliṣṭakarmaṇā |visrabdhā bhava vaidehi śvo gamiṣyasyasaṃśayam || 7.42.35 ||
evamuktvā tu kākutstho maithilīṃ janakātmajām |madhyakakṣāntaraṃ rāmo nirjagāma suhṛdvṛtaḥ || 7.42.36 ||
tatropaviṣṭaṃ rājānamupāsante vicakṣaṇāḥ |kathānāṃ bahurūpāṇāṃ hāsyakārāḥ samantataḥ || 7.43.1 ||
vijayo madhumattaśca kāśyapo maṅgalaḥ kuṭaḥ |surājaḥ kāliyo bhadro dantavakraḥ sumāgadhaḥ || 7.43.2 ||
ete kathā bahuvidhāḥ parihāsasamanvitāḥ |kathayanti sma saṃhṛṣṭā rāghavasya mahātmanaḥ || 7.43.3 ||
tataḥ kathāyāṃ kasyāñcidrāghavaḥ samabhāṣata |kāḥ kathā nagare bhadra vartante viṣayeṣu ca || 7.43.4 ||
māmāśritāni kānyāhuḥ paurajānapadā janāḥ |kiṃ ca sītāṃ samāśritya bharataṃ kiṃ ca lakṣmaṇam || 7.43.5 ||
kiṃ nu śatrughnamuddiśya kaikayīṃ kiṃ nu mātaram |vaktavyatāṃ ca rājāno vare rājye vrajanti ca || 7.43.6 ||
evamukte tu rāmeṇa bhadraḥ prāñjalirabravīt |sthitāḥ kathā śubhāḥ rājanvartante puravāsinām || 7.43.7 ||
amuṃ tu vijayaṃ saumya daśagrīvavadhārjitam |bhūyiṣṭhaṃ svapure pauraiḥ kathyante puruṣarṣabha || 7.43.8 ||
evamuktastu bhadreṇa rāghavo vākyamabravīt |kathayasva yathātattvaṃ sarvaṃ niravaśeṣataḥ || 7.43.9 ||
śubhāśubhāni vākyāni yānyāhuḥ puravāsinaḥ |śrutvedānīṃ śubhaṃ kuryāṃ nakuryāmaśubhāni ca || 7.43.10 ||
kathayasva ca visrabdho nirbhayaṃ vigatajvaraḥ |kathayanti yathā paurāḥ pāpā janapadeṣu ca || 7.43.11 ||
rāghaveṇaivamuktastu bhadraḥ suruciraṃ vacaḥ |pratyuvāca mahābāhuṃ prāñjaliḥ susamāhitaḥ || 7.43.12 ||
śṛṇu rājanyathā paurāḥ kathayanti śubhāśubham |catvarāpaṇarathyāsu vaneṣūpavaneṣu ca || 7.43.13 ||
duṣkaraṃ kṛtavānrāmaḥ samudre setubandhanam |aśrutaṃ pūrvakaiḥ kaiściddevairapi sadānavaiḥ || 7.43.14 ||
rāvaṇaśca durādharṣo hataḥ sabalavāhanaḥ |vānarāśca vaśaṃ nītā ṛkṣāśca saha rākṣasaiḥ || 7.43.15 ||
hatvā ca rāvaṇaṃ saṅkhye sītāmāhṛtya rāghavaḥ |amarṣaṃ pṛṣṭhataḥ kṛtvā svaveśma punarānayat || 7.43.16 ||
kīdṛśaṃ hṛdaye tasya sītāsambhogajaṃ sukham |aṅkamāropya tu purā rāvaṇena balāddhṛtām || 7.43.17 ||
laṅkāmapi purā nītāmaśokavanikāṃ gatām |rakṣasāṃ vaśamāpannāṃ kathaṃ rāmo na kutsate || 7.43.18 ||
asmākamapi dāreṣu sahanīyaṃ bhaviṣyati |yathā hi kurute rājā prajā tamanuvartate || 7.43.19 ||
evaṃ bahuvidhā vāco vadanti puravāsinaḥ |nagareṣu ca sarveṣu rājañjanapadeṣu ca || 7.43.20 ||
tasyaivaṃ bhāṣitaṃ śrutvā rāghavaḥ paramārtavat |uvāca suhṛdaḥ sarvānkathametadbravītha mām || 7.43.21 ||
sarve tu śirasā bhūmāvabhivādya praṇamya ca |pratyūcū rāghavaṃ dīnamevametanna saṃśayaḥ || 7.43.22 ||
śrutvā tu vākyaṃ kākutsthaḥ sarveṣāṃ samudīritam |visarjayāmāsa tadā vayasyāñchatrusūdanaḥ || 7.43.23 ||
visṛjya tu suhṛdvargaṃ buddhyā niścitya rāghavaḥ |samīpe dvāḥsthamāsīnamidaṃ vacanamabravīt || 7.44.1 ||
śīghramānaya saumitriṃ lakṣmaṇaṃ śubhalakṣaṇam |bharataṃ ca mahābhāgaṃ śatrughnamaparājitam || 7.44.2 ||
rāmasya vacanaṃ śrutvā dvāḥstho mūrdhni kṛtāñjaliḥ |lakṣmaṇasya gṛhaṃ gatvā praviveśānivāritaḥ || 7.44.3 ||
uvāca sumahātmānaṃ vardhayitvā kṛtāñjaliḥ |draṣṭumicchati rājā tvāṃ gamyatāṃ tatra mā ciram || 7.44.4 ||
bāḍhamityeva saumitriḥ śrutvā rāghavaśāsanam |prādravadrathamāruhya rāghavasya niveśanam || 7.44.5 ||
prayāntaṃ lakṣmaṇaṃ dṛṣṭvā dvāḥstho bharatamantikāt |uvāca bharataṃ tatra vardhayitvā kṛtāñjaliḥ || 7.44.6 ||
vinayāvanato bhūtvā rājā tvāṃ draṣṭumicchati |bharatastu vacaḥśrutvā dvāḥsthādrāmasamīritam || 7.44.7 ||
utpapātāsanāttūrṇaṃ padbhyāmeva yayau balī |dṛṣṭvā prayāntaṃ bharataṃ tvaramāṇaḥ kṛtāñjaliḥ || 7.44.8 ||
śatrughnabhavanaṃ gatvā tato vākyamuvāca ha |ehyāgaccha raghuśreṣṭha rājā tvāṃ draṣṭumicchati || 7.44.9 ||
gato hi lakṣmaṇaḥ pūrvaṃ bharataśca mahāyaśāḥ |śrutvā tu vacanaṃ tasya śatrughnaḥ paramāsanāt || 7.44.10 ||
śirasā dharaṇīṃ prāpya prayayau yatra rāghavaḥ |dvāḥsthastvāgamya rāmāya sarvāneva kṛtāñjaliḥ |nivedayāmāsa tadā bhrāta'nsvānsamupasthitān || 7.44.11 ||
kumārānāgatāñchrutvā cintāvyākulitendriyaḥ |avāṅmukho dīnamanā dvāḥsthaṃ vacanamabravīt || 7.44.12 ||
praveśaya kumārāṃstvaṃ matsamīpaṃ tvarānvitaḥ |eteṣu jīvitaṃ mahyamete prāṇāḥ priyā mama || 7.44.13 ||
ājñaptāstu narendreṇa kumārāḥ śakratejasaḥ |prahvāḥ prāñjalayo bhūtvā viviśuste samāhitāḥ || 7.44.14 ||
te tu dṛṣṭvā mukhaṃ tasya sagrahaṃ śaśinaṃ yathā |sandhyāgatamivādityaṃ prabhayā parivarjitam || 7.44.15 ||
bāṣpapūrṇe ca nayane dṛṣṭvā rāmasya dhīmataḥ |hataśobhaṃ yathā padmaṃ mukhaṃ vīkṣya ca tasya te || 7.44.16 ||
tato 'bhivādya tvaritāḥ pādau rāmasya mūrdhabhiḥ |tasthuḥ samāhitāḥ sarve rāmastvaśrūṇyavartayat || 7.44.17 ||
tānpariṣvajya bāhubhyāmutthāpya ca mahābalaḥ |āsaneṣvāsatetyuktvā tato vākyaṃ jagāda ha || 7.44.18 ||
bhavanto mama sarvasvaṃ bhavanto jīvitaṃ mama |bhavadbhiśca kṛtaṃ rājyaṃ pālayāmi nareśvarāḥ || 7.44.19 ||
bhavantaḥ kṛtaśāstrārthā buddhyā ca pariniṣṭhitāḥ |sambhūya ca madartho 'yamanveṣṭavyo nareśvarāḥ || 7.44.20 ||
tathā vadati kākutsthe avadhānaparāyaṇāḥ |udvignamanasaḥ sarve kiṃ nu rājābhidhāsyati || 7.44.21 ||
teṣāṃ samupaviṣṭānāṃ sarveṣāṃ dīnacetasām |uvāca vākyaṃ kākutstho mukhena pariśuṣyatā || 7.45.1 ||
sarve śṛṇuta bhadraṃ vo mā kurudhvaṃ mano 'nyathā |paurāṇāṃ mama sītāyāṃ yādṛśī vartate kathā || 7.45.2 ||
paurāpavādaḥ sumahāṃstathā janapadasya ca |vartate mayi bībhatsā sā me marmāṇi kṛntati || 7.45.3 ||
ahaṃ kila kule jāta ikṣvākūṇāṃ mahātmanām |sītā 'pi satkule jātā janakānāṃ mahātmanām || 7.45.4 ||
jānāsi tvaṃ yathā saumya daṇḍake vijane vane |rāvaṇena hṛtā sītā sa ca vidhvaṃsito mayā || 7.45.5 ||
tatra me buddhirutpannā janakasya sutāṃ prati |atroṣitāmimāṃ sītāmānayeyaṃ kathaṃ purīm || 7.45.6 ||
pratyayārthaṃ tataḥ sītā viveśa jvalanaṃ tadā |pratyakṣaṃ tava saumitre devānāṃ havyavāhanaḥ |apāpāṃ maithilīmāha vāyuścākāśagocaraḥ || 7.45.7 ||
candrādityau ca śaṃsete surāṇāṃ sannidhau purā |ṛṣīṇāṃ caiva sarveṣāmapāpāṃ janakātmajām || 7.45.8 ||
evaṃ śuddhasamācārā devagandharvasannidhau |laṅkādvīpe mahendreṇa mama haste niveśitā || 7.45.9 ||
antarātmā ca me vetti sītāṃ śuddhāṃ yaśasvinīm |tato gṛhītvā vaidehīmayodhyāmahamāgataḥ || 7.45.10 ||
ayaṃ tu me mahānvādaḥ śokaśca hṛdi vartate |paurāpavādaḥ sumahāṃstathā janapadasya ca || 7.45.11 ||
akīrtiryasya gīyeta loke bhūtasya kasyacit |patatyevādhamā~llokānyāvacchabdaḥ prakīrtyate || 7.45.12 ||
akīrtirnindyate devaiḥ kīrtirlokeṣu pūjyate |kīrtyarthaṃ tu samārambhaḥ sarveṣāṃ sumahātmanām || 7.45.13 ||
apyahaṃ jīvitaṃ jahyāṃ yuṣmānvā puruṣarṣabhāḥ |apavādabhayādbhītaḥ kiṃ punarjanakātmajām || 7.45.14 ||
tasmādbhavantaḥ paśyantu patitaṃ śokasāgare |nahi paśyāmyahaṃ bhūtaṃ kiñcidduḥkhamato 'dhikam || 7.45.15 ||
śvastvaṃ prabhāte saumitre sumantrādhiṣṭhitaṃ ratham |āruhya sītāmāropya viṣayānte samutsṛja || 7.45.16 ||
gaṅgāyāstu pare pāre vālmīkestu mahātmanaḥ |āśramo divyasaṅkāśastamasātīramāśritaḥ || 7.45.17 ||
tatraināṃ vijane deśe visṛjya raghunandana |śīghramāgaccha bhadraṃ te kuruṣva vacanaṃ mama || 7.45.18 ||
na cāsmin prativaktavyaḥ sītāṃ prati kathañcana |tasmāttvaṃ gaccha saumitre nātra kāryā vicāraṇā || 7.45.19 ||
aprītirhi parā mahyaṃ tvayetatprativārite |śāpitā hi mayā yūyaṃ bhujābhyāṃ jīvitena ca || 7.45.20 ||
ye māṃ vākyāntare brūyuranunetuṃ kathañcana |ahitā nāma te nityaṃ madabhīṣṭavighātanāt || 7.45.21 ||
mānayantu bhavanto māṃ yadi macchāsane sthitāḥ |ito 'dya nīyatāṃ sītā kuruṣva vacanaṃ mama || 7.45.22 ||
pūrvamukto 'hamanayā gaṅgātīre 'hamāśramān |paśyeyamiti tasyāśca kāmaḥ saṃvartyatāmayam || 7.45.23 ||
evamuktvā tu kākutstho bāṣpeṇa pihitānanaḥ |praviveśa sa dharmātmā bhrātṛbhiḥ parivāritaḥ || 7.45.24 ||
śokasaṃlagnahṛdayo niśaśvāsa yathā dvipaḥ || 7.45.25 ||
tato rajanyāṃ vyuṣṭāyāṃ lakṣmaṇo dīnacetanaḥ |sumantramabravīdvākyaṃ mukhena pariśuṣyatā || 7.46.1 ||
sārathe turagāñchīghraṃ yojayasva rathottame |svāstīrṇaṃ rājabhavanātsītāyāścāsanaṃ kuru || 7.46.2 ||
sītā hi rājavacanādāśramaṃ puṇyakarmaṇām |mayā neyā maharṣīṇāṃ śrīghramānīyatāṃ rathaḥ || 7.46.3 ||
sumantrastu tathetyuktvā yuktaṃ paramavājibhiḥ |rathaṃ suruciraprakhyaṃ svāstīrṇaṃ sukhaśayyayā || 7.46.4 ||
ānīyovāca saumitriṃ mitrāṇāṃ mānavardhanam |ratho 'yaṃ samanuprāpto yatkāryaṃ kriyatāṃ prabho || 7.46.5 ||
evamuktaḥ sumantreṇa rājaveśmani lakṣmaṇaḥ |praviśya sītāmāsādya vyājahāra nararṣabhaḥ || 7.46.6 ||
tvayā kilaiṣa nṛpatirvaraṃ vai yācitaḥ prabhuḥ |nṛpeṇa ca pratijñātamājñaptaścāśramaṃ prati || 7.46.7 ||
gaṅgītīre mayā devi ṛṣīṇāmāśramāñchubhān |śīghraṃ gatvā tu vaidehi śāsanātpārthivasya naḥ |araṇye munibhirjuṣṭe apaneyā bhaviṣyasi || 7.46.8 ||
evamuktā tu vaidehī lakṣmaṇena mahātmanā |praharṣamatulaṃ lebhe gamanaṃ cāpyarocayat || 7.46.9 ||
vāsāṃsi ca mahārhāṇi ratnāni vividhāni ca |gṛhītvā tāni vaidehī gamanāyopacakrame || 7.46.10 ||
imāni munipatnīnāṃ dāsyāmyābharaṇānham |vastrāṇi ca mahārhāṇi dhanāni vividhāni ca || 7.46.11 ||
saumitristu tathetyuktvā rathamāropya maithilīm |prayayau śīghraturagai rāmasyājñāmanusmaran || 7.46.12 ||
abravīcca tadā sītā lakṣmaṇaṃ lakṣmivardhanam |aśubhāni bahūnyeva paśyāmi raghunandana || 7.46.13 ||
nayanaṃ me sphuratyadya gātrotkampaśca jāyate |hṛdayaṃ caiva saumitre asvasthamiva lakṣaye || 7.46.14 ||
autsukyaṃ paramaṃ cāpi adhṛtiśca parā mama |śūnyāmeva ca paśyāmi pṛthivīṃ pṛthulocana || 7.46.15 ||
api svasti bhavettasya bhrātuste bhrātṛvatsala |śvaśrūṇāṃ caiva me vīra sarvāsāmaviśeṣataḥ || 7.46.16 ||
pure janapade caiva kuśalaṃ prāṇināmapi |ityañjalikṛtā sītā devatā abhyayācata || 7.46.17 ||
lakṣmaṇo 'rthaṃ tataḥ śrutvā śirasā vandya maithilīm |śivamityabravīddhṛṣṭo hṛdayena viśuṣyatā || 7.46.18 ||
tato vāsamupāgamya gomatītīra āśrame |prabhāte punarutthāya saumitriḥ sūtamabravīt || 7.46.19 ||
yojayasva rathaṃ śīghramadya bhāgīrathījalam |śirasā dhārayiṣyāmi tryambakaḥ parvate yathā || 7.46.20 ||
so 'śvān rajvātha caturo rathe yuṅktvā manojavān |ārohasveti vaidehīṃ sūtaḥ prāñjalirabravīt || 7.46.21 ||
sā tu sūtasya vacanādāruroha rathottamam |sītā saumitriṇā sārdhaṃ sumantreṇa ca dhīmatā || 7.46.22 ||
āsasāda viśālākṣī gaṅgāṃ pāpavināśinīm |athārdhadivasaṃ gatvā bhāgīrathyā jalāśayam || 7.46.23 ||
nirīkṣya lakṣmaṇo dīnaḥ praruroda mahāsvanaḥ || 7.46.24 ||
sītā tu paramāyattā dṛṣṭvā lakṣmaṇamāturam |uvāca vākyaṃ dharmajñā kimidaṃ rudyate tvayā || 7.46.25 ||
jāhnavītīramāsādya cirābhilaṣitaṃ mama |harṣakāle kimarthaṃ māṃ viṣādayasi lakṣmaṇa || 7.46.26 ||
nityaṃ tvaṃ rāmapārśveṣu vartase puruṣarṣabha |kaccidvinākṛtastena dvirātraṃ śokamāgataḥ || 7.46.27 ||
mamāpi dayito rāmo jīvitādapi lakṣmaṇa |na cāhamevaṃ śocāmi maivaṃ tvaṃ bāliśo bhava || 7.46.28 ||
tārayasva ca māṃ gaṅgāṃ darśayasva ca tāpasān |tato munibhyo dāsyāmi vāṃsāsyābharaṇāni ca || 7.46.29 ||
tataḥ kṛtvā maharṣīṇāṃ yathārhamabhivādanam |tatra caikāṃ niśāmuṣya yāsyāmastāṃ purīṃ punaḥ || 7.46.30 ||
mamāpi padmapatrākṣaṃ siṃhoraskaṃ kṛśodaram |tvarate hi mano draṣṭuṃ rāmaṃ ramayatāṃ varam || 7.46.31 ||
tasyāstadvacanaṃ śrutvā pramṛjya nayane śubhe |nāvikānāhvayāmāsa lakṣmaṇaḥ paravīrahā || 7.46.32 ||
iyaṃ ca sajjā nauśceti dāśāḥ prāñjalayo 'bruvan || 7.46.33 ||
titīrṣurlakṣmaṇo gaṅgāṃ śubhāṃ nāvamupāruhat |gaṅgāṃ santārayāmāsa lakṣmaṇastāṃ samāhitaḥ || 7.46.34 ||
atha nāvaṃ suvistīrṇāṃ naiṣādīṃ rāghavānujaḥ |āruroha samāyuktāṃ pūrvamāropya maithilīm || 7.47.1 ||
sumantraṃ caiva sarathaṃ sthīyatāmiti lakṣmaṇaḥ |uvāca śokasantaptaḥ prayāhīti ca nāvikam || 7.47.2 ||
tatastīramupāgamya bhāgīrathyāḥ sa lakṣmaṇaḥ |uvāca maithilīṃ vākyaṃ prāñjalirbāṣpasamplutaḥ || 7.47.3 ||
hṛdgataṃ me mahacchalyaṃ yasmādāryeṇa dhīmatā |asminnimitte vaidehi lokasya vacanīkṛtaḥ || 7.47.4 ||
śreyo hi maraṇaṃ me 'dya mṛtyurvā yatparaṃ bhavet |na cāsminnīdṛśe kārye niyojyo lokanindite || 7.47.5 ||
prasīda ca na me pāpaṃ kartumarhasi śobhane |ityañjalikṛto bhūmau nipapāta sa lakṣmaṇaḥ || 7.47.6 ||
rudantaṃ prāñjaliṃ dṛṣṭvā kāṅkṣantaṃ mṛtyumātmanaḥ |maithilī bhṛśasaṃvignā lakṣmaṇaṃ vākyamabravīt || 7.47.7 ||
kimidaṃ nāvagacchāmi brūhi tattvena lakṣmaṇa |paśyāmi tvāṃ na ca svasthamapi kṣemaṃ mahīpateḥ || 7.47.8 ||
śāpito 'si narendreṇa yattvaṃ santāpamāgataḥ |tadbrūyāḥ sannidhau mahyamahamājñāpayāmi te || 7.47.9 ||
vaidehyā codyamānastu lakṣmaṇo dīnacetanaḥ |avāṅmukho bāṣpakalaṃ vākyametaduvāca ha || 7.47.10 ||
śrutvā pariṣado madhye hyapavādaṃ sudāruṇam |pure janapade caiva tvatkṛte janakātmaje |rāmaḥ santaptahṛdayo mā nivedya gṛhaṃ gataḥ || 7.47.11 ||
na tāni vacanīyāni mayā devi tavāgrataḥ |yāni rājñā hṛdi nyastānyamarṣātpṛṣṭhataḥ kṛtaḥ || 7.47.12 ||
sā tvaṃ tyaktā nṛpatinā nirdoṣā mama sannidhau |paurāpavādabhītena grāhyaṃ devi na te 'nyathā || 7.47.13 ||
āśramānteṣu ca mayā tyaktavyā tvaṃ bhaviṣyasi |rājñaḥ śāsanamājñāya tavedaṃ kila daurhṛdam || 7.47.14 ||
tadetajjāhnavītīre brahmarṣīṇāṃ tapovanam |puṇyaṃ ca ramaṇīyaṃ ca mā viṣādaṃ kṛthāḥ śubhe || 7.47.15 ||
rājño daśarathasyeṣṭaḥ piturme munipuṅgavaḥ |sakhā paramako vipro vālmīkiḥ sumahāyaśāḥ || 7.47.16 ||
pādacchāyāmupāgamya sukhamasya mahātmanaḥ |upavāsaparaikāgrā vasa tvaṃ janakātmaje || 7.47.17 ||
pativratātvamāsthāya rāmaṃ kṛtvā sadā hṛdi |śreyaste paramaṃ devi tathā kṛtvā bhaviṣyati || 7.47.18 ||
lakṣmaṇasya vacaḥ śrutvā dāruṇaṃ janakātmajā |paraṃ viṣādamāgamya vaidehī nipapāta ha || 7.48.1 ||
sā muhūrtamivāsañjñā bāṣpaparyākulekṣaṇā |lakṣmaṇaṃ dīnayā vācā uvāca janakātmajā || 7.48.2 ||
māmikeyaṃ tanurnūnaṃ sṛṣṭā duḥkhāya lakṣmaṇa |dhātrā yasyāstathā me 'dya duḥkhamūrtiḥ pradṛśyate || 7.48.3 ||
kiṃ nu pāpaṃ kṛtaṃ pūrvaṃ ko vā dārairviyojitaḥ |yā 'haṃ śuddhasamācārā tyaktā nṛpatinā satī || 7.48.4 ||
purā 'hamāśrame vāsaṃ rāmapādānuvartinī |anurudhyāpi saumitre duḥkhe ca parivartinī || 7.48.5 ||
sā kathaṃ hyāśrame saumya vatsyāmi vijanīkṛtā |ākhyāsyāmi ca kasyāhaṃ duḥkhaṃ duḥkhaparāyaṇā || 7.48.6 ||
kiṃ nu vakṣyāmi muniṣu karma vā satkṛtaṃ ca kim |kasmiṃścit kāraṇe tyaktā rāghaveṇa mahātmanā || 7.48.7 ||
na khalvadyaiva saumitre jīvitaṃ jāhnavījale |tyajeyaṃ rājavaṃśastu bharturme parihāsyate || 7.48.8 ||
yathājñaṃ kuru somitre tyaja māṃ duḥkhabhāginīm |nideśe sthīyatāṃ rājñaḥ śṛṇu cedaṃ vaco mama || 7.48.9 ||
śvaśrūṇāmaviśeṣeṇa prāñjalipragraheṇa ca |śirasā ' 'vandya caraṇau kuśalaṃ brūhi pārthivam || 7.48.10 ||
śirasā 'bhinato brūyāḥ sarvāsāmeva lakṣmaṇa |vaktavyaścāpi nṛpatirdharmeṣu susamāhitaḥ || 7.48.11 ||
jānāsi ca yathā śuddhā sītā tattvena rāghava |bhaktyā ca parayā yuktā hitā ca tava nityaśaḥ || 7.48.12 ||
ahaṃ tyaktā tvayā vīra ayaśobhīruṇā jane |yacca te vacanīyaṃ syādapavādasamutthitam |mayā ca parihartavyaṃ tvaṃ hi me paramā gatiḥ || 7.48.13 ||
vaktavyaśceti nṛpatirdhameṇa susamāhitaḥ |yathā bhrātṛṣu vartethāstathā paureṣu nityadā || 7.48.14 ||
paramo hyeṣa dharmaste tasmātkīrtiranuttamā || 7.48.15 ||
yattu paurajano rājandharmeṇa samavāpnuyāt |ahaṃ tu nānuśocāmi svaśarīraṃ nararṣabha || 7.48.16 ||
yathāpavādaṃ paurāṇāṃ tathaiva raghunandana |patirhi devatā nāryāḥ patirbandhuḥ patirguruḥ || 7.48.17 ||
prāṇairapi priyaṃ tasmādbhartuḥ kāryaṃ viśeṣataḥ |iti madvacanādrāmo vaktavyo mama saṅgrahaḥ |nirīkṣya mā 'dya gaccha tvamṛtukālātivartinīm || 7.48.18 ||
evaṃ bruvantyāṃ sītāyāṃ lakṣmaṇo dīnacetanaḥ |śirasā ' 'vandya dharaṇīṃ vyāhartuṃ na śaśāka ha || 7.48.19 ||
pradakṣiṇaṃ ca tāṃ kṛtvā rudanneva mahāsvanaḥ |dhyātvā muhūrtaṃ tāmāha kiṃ māṃ vakṣyasi śobhane || 7.48.20 ||
dṛṣṭapūrvaṃ na te rūpaṃ pādau dṛṣṭau tavānaghe |kathamatra hi paśyāmi rāmeṇa rahitāṃ vane || 7.48.21 ||
ityuktvā tāṃ namaskṛtya punarnāvamupāruhat |āruhya ca punarnāvaṃ nāvikaṃ cābhyacodayat || 7.48.22 ||
sa gatvā cottaraṃ tīraṃ śokabhārasamanvitaḥ |sammūḍha iva duḥkhena rathamadhyāruhaddrutam || 7.48.23 ||
muhurmuhuḥ parāvṛtya dṛṣṭvā sītāmanāthavat |ceṣṭantīṃ paratīrasthāṃ lakṣmaṇaḥ prayayāvatha || 7.48.24 ||
dūrasthaṃ rathamālokya lakṣmaṇaṃ ca muhūrmuhuḥ |nirīkṣamāṇāṃ tūdvignāṃ sītāṃ śokaḥ samāviśat || 7.48.25 ||
sā duḥkhabhārāvanatā yaśasvinī yaśodhanā nāthamapaśyatī satī |ruroda sā barhiṇanādite vane mahāsvanaṃ duḥkhaparāyaṇā satī || 7.48.26 ||
sītāṃ tu rudatīṃ dṛṣṭvā te tatra munidārakāḥ |prādravanyatra bhagavānāste vālmīkirugradhīḥ || 7.49.1 ||
abhivādya muneḥ pādau muniputrā maharṣaye |sarvaṃ nivedayāmāsustasyāstu ruditasvanam || 7.49.2 ||
adṛṣṭapūrvā bhagavankasyāpyeṣā mahātmanaḥ |patnī śrīriva sammohādvirauti vikṛtānanā || 7.49.3 ||
bhagavansādhu paśya tvaṃ devatāmiva khāccyutām |nadyāstu tīre bhagavanvarastrī kāpi duḥkhitā || 7.49.4 ||
dṛṣṭāsmābhiḥ praruditā dṛḍhaṃ śokaparāyaṇā |anarhā duḥkhaśokābhyāmekāṃ dīnāṃ hyanāthavat || 7.49.5 ||
na hyenāṃ mānuṣīṃ vidmaḥ satkriyā 'syāḥ prayujyatām |āśramasyāvidūre ca tvāmiyaṃ śaraṇaṃ gatā || 7.49.6 ||
trātāramicchate sādhvī bhagavaṃstrātumarhasi |teṣāṃ tu vacanaṃ śrutvā buddhyā niścitya dharmavit |tapasā labdhacakṣuṣmān prādravadyatra maithilī || 7.49.7 ||
taṃ prayāntamabhipretya śiṣyā hyenaṃ mahāmatim |taṃ tu deśamabhi pretya kiñcitpadbhyāṃ mahāmatiḥ || 7.49.8 ||
arghyamādāya ruciraṃ jāhnavītīramāgamat |dadarśa rāghavasyeṣṭāṃ sītāṃ patnīmanāthavat || 7.49.9 ||
tāṃ sītāṃ śokabhārārtāṃ vālmīkirmunipuṅgavaḥ |uvāca madhurāṃ vāṇīṃ hlādayanniva tejasā || 7.49.10 ||
snuṣā daśarathasya tvaṃ rāmasya mahiṣī priyā |janakasya sutā rājñaḥ svāgataṃ te pativrate || 7.49.11 ||
āyāntī cāsi vijñātā mayā dharmasamādhinā |kāraṇaṃ caiva sarvaṃ me hṛdayenopalakṣitam || 7.49.12 ||
tava caiva mahābhāge viditaṃ mama tattvataḥ |sarvaṃ ca viditaṃ mahyaṃ trailokye yaddhi vartate || 7.49.13 ||
apāpāṃ vedmi sīte tvāṃ tapolabdhena cakṣuṣā |visrabdhā bhava vaidehi sāmprataṃ mayi vartase || 7.49.14 ||
āśramasyāvidūre me tāpasyastapasi sthitāḥ |tāstvāṃ vatse yathā vatsaṃ pālayiṣyanti nityaśaḥ || 7.49.15 ||
idamardhyaṃ pratīccha tvaṃ visrabdhā vigatajvarā |yathā svagṛhamabhyetya viṣādaṃ caiva mā kṛthāḥ || 7.49.16 ||
śrutvā tu bhāṣitaṃ sītā muneḥ paramamadbhutam |śirasā ' 'vandya caraṇau tathetyāha kṛtāñjaliḥ || 7.49.17 ||
taṃ prayāntaṃ muniṃ sītā prāñjaliḥ pṛṣṭhato 'nvagāt || 7.49.18 ||
taṃ dṛṣṭvā munimāyāntaṃ vaidehyā munipatnayaḥ |upājagmurmudā yuktā vacanaṃ cedamabruvan || 7.49.19 ||
svāgataṃ te muniśreṣṭha cirasyāgamanaṃ ca te |abhivādayāmastvāṃ sarvā ucyatāṃ ki ca kurmahe || 7.49.20 ||
tāsāṃ tadvacanaṃ śrutvā vālmīkiridamabravīt |sīteyaṃ samanuprāptā patnī rāmasya dhīmataḥ || 7.49.21 ||
snuṣā daśarathasyaiṣā janakasya sutā satī |apāpā patinā tyaktā paripālyā mayā sadā || 7.49.22 ||
imāṃ bhavantyaḥ(?) paśyantu snehena parameṇa hi |gauravānmama vākyācca pūjyā vo 'stu viśeṣataḥ || 7.49.23 ||
muhurmuhuśca vaidehīṃ praṇidhāya mahāyaśāḥ |svamāśramaṃ śiṣyavṛtaḥ punarāyānmahātapāḥ || 7.49.24 ||
dṛṣṭvā tu maithilīṃ sītāmāśrame sampraveśitām |santāpamagamadghoraṃ lakṣmaṇo dīnacetanaḥ || 7.50.1 ||
abravīcca mahātejāḥ sumantraṃ mantrasārathim |sītāsantāpajaṃ duḥkhaṃ paśya rāmasya sārathe || 7.50.2 ||
tato duḥkhataraṃ kiṃ nu rāghavasya bhaviṣyati |patnīṃ śuddhasamācārāṃ visṛjya janakātmajām || 7.50.3 ||
vyaktaṃ daivādahaṃ manye rāghavasya vinā bhavam |vaidehyā sārathe nityaṃ daivaṃ hi duratikramam || 7.50.4 ||
yo hi devānsagandharvānasurānsaha rākṣasaiḥ |nihanyādrāghavaḥ kruddhaḥ sa daivamanuvartate || 7.50.5 ||
purā rāmaḥ piturvākyāddaṇḍake vijane vane |uṣitvā nava varṣāṇi pañca caiva mahāvane || 7.50.6 ||
tato duḥkhataraṃ bhūyaḥ sītāyā vipravāsanam |paurāṇāṃ vacanaṃ śrutvā nṛśaṃsaṃ pratibhāti me || 7.50.7 ||
ko nu dharmāśrayaḥ sūta karmaṇyasminyaśohare |maithilīṃ pratisamprāptaḥ paurairhīnārthavādibhiḥ || 7.50.8 ||
etā vāco bahuvidhāḥ śrutvā lakṣmaṇabhāṣitāḥ |sumantraḥ śraddhayā prājño vākyametaduvāca ha || 7.50.9 ||
na santāpastvayā kāryaḥ saumitre maithilīṃ prati |dṛṣṭametatpurā vipraiḥ pituste lakṣmaṇāgrataḥ || 7.50.10 ||
bhaviṣyati dṛḍhaṃ rāmo duḥkhaprāyo 'pi saukhyabhāk |prāpsyate ca mahābāhurviprayogaṃ priyairdhruvam || 7.50.11 ||
tvāṃ caiva maithilīṃ caiva śatrughnabharatāvubhau |santyajiṣyati dharmātmā kālena mahatā mahān || 7.50.12 ||
idaṃ tvayi na vaktavyaṃ saumitre bharate 'pi vā |rājñā vo vyāhṛtaṃ vākyaṃ durvāsā yaduvāca ha || 7.50.13 ||
mahājanasamīpe ca mama caiva nararṣabha |ṛṣiṇā vyāhṛtaṃ vākyaṃ vasiṣṭhasya ca sannidhau || 7.50.14 ||
ṛṣestu vacanaṃ śrutvā māmāha puruṣarṣabhaḥ |sūta na kvacidevaṃ te vaktavyaṃ janasannidhau || 7.50.15 ||
tasyāhaṃ lokapālasya vākyaṃ tatsusamāhitaḥ |naiva jātvanṛtaṃ kāryamiti me saumya darśanam || 7.50.16 ||
sarvathaiva na vaktavyaṃ mayā saumya tavāgrataḥ |yadi te śravaṇe śraddhā śrūyatāṃ raghunandana || 7.50.17 ||
yadyapyahaṃ narendreṇa rahasyaṃ śrāvitaḥ purā |tathāpyudāhariṣyāmi daivaṃ hi duratikramam || 7.50.18 ||
yenedamīdṛśaṃ prāptaṃ duḥkhaṃ śokasamanvitam |na tvayā bharate vācyaṃ śatrughnasyāpi sannidhau || 7.50.19 ||
tacchrutvā bhāṣitaṃ tasya gambhīrārthapadaṃ mahat |tathyaṃ brūhīti saumitriḥ sūtaṃ vākyamathābravīt || 7.50.20 ||
tathā sañcoditaḥ sūto lakṣmaṇena mahātmanā |tadvākyamṛṣiṇā proktaṃ vyāhartumupacakrame || 7.51.1 ||
purā nāmnā hi durvāsā atreḥ putro mahāmuniḥ |vasiṣṭhasyāśrame puṇye vārṣikyaṃ samuvāsa ha || 7.51.2 ||
tamāśramaṃ mahātejāḥ pitā te sumahāyaśāḥ |purohitaṃ mahātmānaṃ didṛkṣuragamastvayam || 7.51.3 ||
sa dṛṣṭvā sūryasaṅkāśaṃ jvalantamiva tejasā |upaviṣṭaṃ vasiṣṭhasya savyapārśve mahāmunim || 7.51.4 ||
tau munī tāpasaśreṣṭhau vinīto hyabhivādayat |sa tābhyāṃ pūjito rājā svāgatenāsanena ca ||
pādyena phalamūlaiśca uvāsa munibhiḥ saha || 7.51.5 ||
teṣāṃ tatropaviṣṭānāṃ tāstāḥ sumadhurāḥ kathāḥ |babhūvuḥ paramarṣīṇāṃ madhyādityagate 'hani || 7.51.6 ||
tataḥ kathāyāṃ kasyāñcitprāñjaliḥ pragraho nṛpaḥ |uvāca taṃ mahātmānamatreḥ putraṃ tapodhanam || 7.51.7 ||
bhagavankiṃ pramāṇena mama vaṃśo bhaviṣyati |kimāyuśca hi me rāmaḥ putrāścānye kimāyuṣaḥ || 7.51.8 ||
rāmasya ca sutā ye syusteṣāmāyuḥ kiyadbhavet |kāmyayā bhagavanbūhi vaṃśasyāsya gatiṃ mama || 7.51.9 ||
tacchrutvā vyāhṛtaṃ vākyaṃ rājño daśarathasya ca |durvāsāḥ sumahātejā vyāhartumupacakrame || 7.51.10 ||
śṛṇu rājanpurāvṛttaṃ tadā devāsure yudhi |daityāḥ surairbhartsyamānā bhṛgupatnīṃ samāśritāḥ || 7.51.11 ||
tayā dattābhayāstatra nyavasannabhayāstadā || 7.51.12 ||
tayā parigṛhītāṃstāndṛṣṭvā kruddhaḥ sureśvaraḥ |cakreṇa śitadhāreṇa bhṛgupatnyāḥ śiro 'harat || 7.51.13 ||
tatastāṃ nihatāṃ dṛṣṭvā patnīṃ bhṛgukulodvahaḥ |śaśāpa sahasā kruddho viṣṇuṃ ripukulārdanam || 7.51.14 ||
yasmādavadhyāṃ me patnīmavadhīḥ krodhamūrcchitaḥ |tasmāttvaṃ mānuṣe loke janiṣyasi janārdana || 7.51.15 ||
tatra patnīviyogaṃ tvaṃ prāpsyase bahuvārṣikam || 7.51.16 ||
śāpābhihatacetāssa svātmanā bhāvito 'bhavat || 7.51.17 ||
arcayāmāsa taṃ devaṃ bhṛguḥ śāpena pīḍitaḥ |tapasārādhito devo hyabravīdbhaktavatsalaḥ |lokānāṃ saṃhitārthaṃ tu taṃ śāpaṃ grāhyamuktavān || 7.51.19 ||
iti śapto mahātejā bhṛguṇā pūrvajanmani |ihāgato hi putratvaṃ tava pārthivasattama || 7.51.20 ||
rāma ityabhivikhyātastriṣu lokeṣu mānada |tatphalaṃ prāpsyate cāpi bhṛguśāpakṛtaṃ mahat || 7.51.21 ||
ayodhyāyāḥ patī rāmo dīrghakālaṃ bhaviṣyati |sukhinaśca samṛddhāśca bhaviṣyantyasya ye 'nugāḥ || 7.51.22 ||
daśa varṣasahasrāṇi daśa varṣaśatāni ca |rāmo rājyamupāsitvā brahmalokaṃ gamiṣyati || 7.51.23 ||
samṛddhaiścāśvamedhaiśca iṣṭvā paramadurjayaḥ |rājavaṃśāṃśca bahuśo bahūnsaṃsthāpayiṣyati || 7.51.24 ||
dvau putrau tu bhaviṣyete sītāyāṃ rāghavasya tu |anyatra na tvayodhyāyāṃ satyametannasaṃśayaḥ || 7.51.25 ||
sītāyāśca tataḥ putrāvabhiṣekṣyati rāghavaḥ || 7.51.26 ||
sa sarvamakhilaṃ rājño vaṃśasyāha gatāgatam |ākhyāya sumahātejāstūṣṇīmāsīnmahāmuniḥ || 7.51.27 ||
tūṣṇīmbhūte tadā tasminrājā daśaratho munau |abhivādya mahātmānau punarāyātpurottamam || 7.51.28 ||
etadvaco mayā tatra muninā vyāhṛtaṃ purā |śrutaṃ hṛdi ca nikṣiptaṃ nānyathā tadbhaviṣyati || 7.51.29 ||
evaṃ gate na santāpaṃ kartumarhasi rāghava |sītārthe rāghavārthe vā dṛḍho bhava narottama || 7.51.30 ||
śrutvā tu vyāhṛtaṃ vākyaṃ sūtasya paramādbhutam |praharṣamatulaṃ lebhe sādhu sādhviti cābravīt || 7.51.31 ||
tataḥ saṃvadatorevaṃ sūtalakṣmaṇayoḥ pathi |astamarke gate vāsaṃ keśinyāṃ tāvathoṣatuḥ || 7.51.32 ||
tatra tāṃ rajanīmuṣya keśinyāṃ raghunandanaḥ |prabhāte punarutthāya lakṣmaṇaḥ prayayau tadā || 7.52.1 ||
tato 'rdhadivase prāpte praviveśa mahārathaḥ |ayodhyāṃ ratnasampūrṇāṃ hṛṣṭapuṣṭajanāvṛtām || 7.52.2 ||
saumitristu paraṃ dainyaṃ jagāma sumahāmatiḥ |rāmapādau samāsādya vakṣyāmi kimahaṃ gataḥ || 7.52.3 ||
tasyaivaṃ cintayānasya bhavanaṃ śaśisannibham |rāmasya paramodāraṃ purastānsamadṛśyata || 7.52.4 ||
rājñastu bhavanadvāri so 'vatīrya rathottamāt |avāṅmukho dīnamanāḥ praviveśānivāritaḥ || 7.52.5 ||
sa dṛṣṭvā rāghavaṃ dīnamāsīnaṃ paramāsane |netrābhyāmaśrupūrṇābhyāṃ dadarśāgrajamagrataḥ || 7.52.6 ||
jagrāha caraṇau tasya lakṣmaṇo dīnacetanaḥ |uvāca dīnayā vācā prāñjaliḥ susamāhitaḥ || 7.52.7 ||
āryasyājñāṃ puraskṛtya visṛjya janakātmajām |gaṅgātīre yathoddiṣṭe vālmīkerāśrame śucau || 7.52.8 ||
tatra tāṃ ca śubhācārāmāśramānte yaśasvinīm |punarapyāgato vīra pādamūlamupāsitum || 7.52.9 ||
mā śucaḥ puruṣavyāghra kālasya gatirīdṛśī |tvadvidhā na hi śocanti buddhimanto manasvinaḥ || 7.52.10 ||
sarve kṣayāntā nicayāḥ patanāntāḥ samucchrayāḥ |saṃyogā viprayogāntā maraṇāntaṃ ca jīvitam || 7.52.11 ||
tasmātputreṣu dāreṣu mitreṣu ca dhaneṣu ca |nātiprasaṅgaḥ kartavyo viprayogo hi tairdhruvam || 7.52.12 ||
śaktastvamātmanā ' 'tmānaṃ vinetuṃ manasaiva hi |lokānsarvāṃśca kākutstha kiṃ punaḥ śokamātmanaḥ || 7.52.13 ||
nedṛśeṣu vimuhyanti tvadvidhāḥ puruṣarṣabhāḥ |apavādaḥ sa kila te punareṣyati rāghava || 7.52.14 ||
yadarthaṃ maithilī tyaktā apavādabhayānnṛpa |so 'pavādaḥ pure rājanbhaviṣyati na saṃśayaḥ || 7.52.15 ||
sa tvaṃ puruṣaśārdūla dhairyeṇa susamāhitaḥ |tyajaināṃ durbalāṃ buddhiṃ santāpaṃ mā kuruṣva ha || 7.52.16 ||
evamuktaḥ sa kākutstho lakṣmaṇena mahātmanā |uvāca parayā prītyā saumitriṃ mitravatsalaḥ || 7.52.17 ||
evametannaraśreṣṭha yathā vadasi lakṣmaṇa |paritoṣaśca me vīra mama kāryānuśāsane || 7.52.18 ||
nivṛttiścāgatā saumya santāpaśca nirākṛtaḥ |bhavadvākyaiḥ surucirairanunīto 'smi lakṣmaṇa || 7.52.19 ||
lakṣmaṇasya tu tadvākyaṃ niśamya paramādbhutam |suprītaścābhavadrāmo vākyametaduvāca ha || 7.53.1 ||
durlabhastvīdṛśo bandhurasminkāle viśeṣataḥ |yādṛśastvaṃ mahābuddhermama saumya mano 'nugaḥ || 7.53.2 ||
yacca me hṛdaye kiñcidvartate śubhalakṣaṇa |tanniśāmaya ca śrutvā kuruṣva vacanaṃ mama || 7.53.3 ||
catvāro divasāḥ saumya kāryaṃ paurajanasya vai |akurvāṇasya saumitre tanme marmāṇi kṛntati || 7.53.4 ||
āhūyantāṃ prakṛtayaḥ purodhā mantriṇastathā |kāryārthinaśca puruṣāḥ striyaśca puruṣarṣabha || 7.53.5 ||
paurakāryāṇi yo rājā na karoti dine dine |saṃvṛte narake ghore patito nātra saṃśayaḥ || 7.53.6 ||
śrūyate hi purā rājā nṛgo nāma mahāyaśāḥ |babhūva pṛthivīpālo brahmaṇyaḥ satyavāk śuciḥ || 7.53.7 ||
sa kadācidgavāṃ koṭīḥ savatsāḥ svarṇabhūṣitāḥ |nṛdevo bhūmidevebhyaḥ puṣkareṣu dadau nṛpaḥ || 7.53.8 ||
tataḥ saṅgādgatā dhenuḥ savatsā sparśitā 'nagha |brāhmaṇasyāhitāgneśca daridrasyoñchavartinaḥ || 7.53.9 ||
sa naṣṭāṃ gāṃ kṣudhārto vai anviṣaṃstatra tatra ca |nāpaśyatsarvarājyeṣu saṃvatsaragaṇānbahūn || 7.53.10 ||
tataḥ kanakhalaṃ gatvā jīrṇavatsāṃ nirāmayām |dadarśa gāṃ svakāṃ dhenuṃ brāhmaṇasya niveśane || 7.53.11 ||
atha tāṃ nāmadheyena svakenovāca sa dvijaḥ |āgaccha śabaletyevaṃ sā tu śuśrāva gauḥ svaram || 7.53.12 ||
tasya taṃ svaramājñāya kṣudhārtasya dvijasya vai |anvagātpṛṣṭhataḥ sā gaurgacchantaṃ pāvakopamam || 7.53.13 ||
yo 'pi pālayate vipraḥ so 'pi gāmanvagāddrutam |gatvā tamṛṣimācaṣṭa mama gauriti satvaram || 7.53.14 ||
sparśitā rājasiṃhena mama dattā nṛgeṇa ha |tayorbrāhmaṇayorvādo mahānāsīdvipaścitoḥ || 7.53.15 ||
vivadantau tato 'nyonyaṃ dātāramabhijagmatuḥ |tau rājabhavanadvāri na prāptau nṛgaśāsanam || 7.53.16 ||
ahorātrāṇyanekāni vasantau krodhamīyatuḥ |ūcatuśca mahātmānau tāvubhau dvijasattamau ||kruddhau paramasamprāptau vākyaṃ ghorābhisaṃhitam || 7.53.17 ||
arthināṃ kāryasiddhyarthaṃ yasmāttvaṃ naiṣi darśanam |adṛśyaḥ sarvabhūtānāṃ kṛkalāso bhaviṣyasi || 7.53.18 ||
bahuvarṣasahasrāṇi bahuvarṣaśatāni ca |śvabhre 'smin kṛkalāso vai dīrghakālaṃ vasiṣyasi || 7.53.19 ||
utpatsyate hi loke 'sminyadūnāṃ kīrtivardhanaḥ |vāsudeva iti khyāto viṣṇuḥ puruṣavigrahaḥ || 7.53.20 ||
sa te mokṣayitā rājaṃstasmācchāpādbhaviṣyasi |kṛtā ca tena kālena niṣkṛtiste bhaviṣyati || 7.53.21 ||
bhārāvataraṇārthaṃ hi naranārāyaṇāvubhau |utpatsyete mahāvīryau kalau yuga upasthite || 7.53.22 ||
evaṃ tau śāpamutsṛjya brāhmaṇau vigatajvarau |tāṃ gāṃ hi durbalāṃ vṛddhāṃ dadaturbrāhmaṇāya vai || 7.53.23 ||
evaṃ sa rājā taṃ śāpamupabhuṅkte sudāruṇam || 7.53.24 ||
kāryārthināṃ vimardo hi rājñāṃ doṣāya kalpate |tacchīghraṃ darśanaṃ mahyamabhivartantu kāryiṇaḥ || 7.53.25 ||
sukṛtasya hi kāryasya phalaṃ nāpaiti pārthivaḥ |tasmādgaccha pratīkṣasva saumitre kāryavāñjanaḥ || 7.53.26 ||
rāmasya bhāṣitaṃ śrutvā lakṣmaṇaḥ paramārthavit |uvāca prāñjalirvākyaṃ rāghavaṃ dīptatejasam || 7.54.1 ||
alpāparādhe kākutstha dvijābhyāṃ śāpa īdṛśaḥ |mahānnṛgasya rājarṣeryamadaṇḍa ivāparaḥ || 7.54.2 ||
śrutvā tu pāpasaṃyuktamātmānaṃ puraṣarṣabha |kimuvāca nṛgo rājā dvijau krodhasamanvitau || 7.54.3 ||
lakṣmaṇenaivamuktastu rāghavaḥ punarabravīt |śṛṇu saumya yathā pūrvaṃ sa rājā śāpavikṣataḥ || 7.54.4 ||
athādhvani gatau viprau vijñāya sa nṛgastadā |āhūya mantriṇaḥ sarvānnaigamānsapurodhasaḥ || 7.54.5 ||
tānuvāca nṛgo rājā sarvāśca prakṛtīstathā |duḥkhena susamāviṣṭaḥ śrūyatāṃ me samāhitaiḥ || 7.54.6 ||
nāradaḥ parvataścaiva mama dattvā mahadbhayam |gatau tribhuvanaṃ bhadrau vāyubhūtāvaninditau || 7.54.7 ||
kumāro 'yaṃ vasurnāma sa devo 'dyābhiṣicyatām |śvabhraṃ ca yatsukhasparśaṃ kriyatāṃ śilpibhirmama |yatrāhaṃ saṅkṣayiṣyāmi śāpaṃ brāhmaṇaniḥsṛtam || 7.54.8 ||
varṣaghnamekaṃ śvabhraṃ tu himaghnamaparaṃ tathā |grīṣmaghnaṃ tu sukhasparśamekaṃ kurvantu śilpinaḥ || 7.54.9 ||
phalavantaśca ye vṛkṣāḥ puṣpavatyaśca yā latāḥ |viropyantāṃ bahuvidhāśchāyāvantaśca gulminaḥ || 7.54.10 ||
kriyatāṃ ramaṇīyaṃ ca śvabhrāṇāṃ sarvatodiśam |sukhamatra vasiṣyāmi yāvatkālasya paryayaḥ || 7.54.11 ||
puṣpāṇi ca sugandhīni kriyatāṃ teṣu nityaśaḥ |parivārya yathā me syuradhyardhaṃ yojanaṃ tathā || 7.54.12 ||
evaṃ kṛtvā vidhānaṃ sa sandideśa vasaṃ tadā |dharmanityaḥ prajāḥ putra kṣatradharmeṇa pālaya || 7.54.13 ||
pratyakṣaṃ te yathā śāpo dvijābhyāṃ mayi pātitaḥ |naraśreṣṭha saroṣābhyāmaparādhe 'pi tādṛśe || 7.54.14 ||
mā kṛthāstanusantāpaṃ matkṛte 'pi nararṣabha |kṛtāntaḥ kuśalaḥ putra yenāsmi vyasanīkṛtaḥ || 7.54.15 ||
prāptavyānyeva prāpnoti gantavyānyeva gacchati |labdhavyānyeva labhate duḥkhāni ca sukhāni ca || 7.54.16 ||
pūrve jātyantare vatsa mā viṣādaṃ kuruṣva ha || 7.54.17 ||
evamuktvā nṛpastatra sutaṃ rājā mahāyaśāḥ |śvabhraṃ jagāma sukṛtaṃ vāsāya puruṣarṣabha || 7.54.18 ||
evaṃ praviśyaiva nṛpastadānīṃ śvabhraṃ mahāratnavibhūṣitaṃ tat |sampādayāmāsa tadā mahātmā śāpaṃ dvijābhyāṃ hi ruṣā vimuktam || 7.54.19 ||
eṣa te nṛgaśāpasya vistaro 'bhihito mayā |yadyasti śravaṇe śraddhā śṛṇuṣvehāparāṃ kathām || 7.55.1 ||
evamuktastu rāmeṇa saumitriḥ punarabravīt |tṛptirāścaryabhūtānāṃ kathānāṃ nāsti me nṛpa || 7.55.2 ||
lakṣmaṇenaivamuktastu rāma ikṣvākunandanaḥ |kathāṃ paramadharmiṣṭhāṃ vyāhartumupacakrame || 7.55.3 ||
āsīdrājā nimirnāma ikṣvākūṇāṃ mahātmanām |putro dvādaśamo vīrye dharme ca pariniṣṭhitaḥ || 7.55.4 ||
sa rājā vīryasampannaḥ puraṃ devapuropamam |niveśayāmāsa tadā abhyāśe gautamasya tu || 7.55.5 ||
purasya sukṛtaṃ nāma vaijayantamiti śrutam |niveśaṃ yatra rājarṣirnimiścakre mahāyaśāḥ || 7.55.6 ||
tasya buddhiḥ samutpannā niveśya sumahāpuram |yajeyaṃ dīrghasatreṇa pituḥ prahlādayanmanaḥ || 7.55.7 ||
tataḥ pitaramāmantrya ikṣvākuṃ hi manoḥ sutam |vasiṣṭhaṃ varayāmāsa pūrvaṃ brahmarṣisattamam || 7.55.8 ||
anantaraṃ sa rājarṣirnimirikṣvākunandanaḥ |atrimaṅgirasaṃ caiva bhṛguṃ caiva tapodhanam || 7.55.9 ||
tamuvāca vasiṣṭhastu nimiṃ rājarṣisattamam |vṛto 'haṃ pūrvamindreṇa antaraṃ pratipālaya || 7.55.10 ||
anantaraṃ mahāvipro gautamaḥ pratyapūrayat |vasiṣṭho 'pi mahātejā indrayajñamathākarot || 7.55.11 ||
nimistu rājā viprāṃstānsamānīya narādhipaḥ |ayajaddhimavatpārśve svapurasya samīpataḥ |pañcavarṣasahasrāṇi rājā dīkṣāmupāgamat || 7.55.12 ||
indrayajñāvasāne tu vasiṣṭho bhagavanṛṣiḥ |sakāśamāgato rājño hautraṃ kartumaninditaḥ || 7.55.13 ||
tadantaramathāpaśyadgautamenābhipūritam |kopena mahatāviṣṭo vasiṣṭho brahmaṇaḥ sutaḥ || 7.55.14 ||
sa rājño darśanākāṅkṣī muhūrtaṃ samupāviśat |tasminnahani rājarṣirnidrayā 'pahṛto bhṛśam || 7.55.15 ||
tato manyurvasiṣṭhasya prādurāsīnmahātmanaḥ |adarśanena rājarṣervyāhartumupacakrame || 7.55.16 ||
yasmāttvamanyaṃ vṛtavānmāmavajñāya pārthiva |cetanena vinābhūto dehastava bhaviṣyati || 7.55.17 ||
tataḥ prabuddho rājarṣiḥ śrutvā śāpamudāhṛtam |brahmayonimathovāca saṃrambhāt krodhamūrcchitaḥ || 7.55.18 ||
ajānataḥ śayānasya krodhena kaluṣīkṛtaḥ |muktavānmayi śāpāgniṃ yamadaṇḍamivāparam || 7.55.19 ||
tasmāttavāpi brahmarṣe cetanena vinā kṛtaḥ |dehaḥ suruciraprakhyo bhaviṣyati na saṃśayaḥ || 7.55.20 ||
iti roṣavaśādubhau tadānīmanyonyaṃ śapitau nṛpadvijendrau |sahasaiva babhūvaturvidehau tattulyādhigataprabhāvavantau || 7.55.21 ||
rāmasya bhāṣitaṃ śrutvā lakṣmaṇaḥ paravīrahā |uvāca prāñjalirvākyaṃ rāghavaṃ dīptatejasam || 7.56.1 ||
nikṣiptadehau kākutsya kathaṃ tau dvijapārthivau |punardehena saṃyogaṃ jagmaturdevasammatau || 7.56.2 ||
lakṣmaṇenaivamuktastu rāmaścekṣvākunandanaḥ |pratyuvāca mahātejā lakṣmaṇaṃ puruṣarṣabhaḥ || 7.56.3 ||
tau parasparaśāpena dehāvutsṛjya dhārmikau |abhūtāṃ nṛpaviprarṣī vāyubhūtau tapodhanau || 7.56.4 ||
aśarīraḥ śarīrasya kṛte 'nyasya mahāmuniḥ |vasiṣṭhaḥ sumahātejā jagāma piturantikam || 7.56.5 ||
so 'bhivādya tataḥ pādau devadevasya dharmavit |pitāmahamathovāca vāyubhūta idaṃ vacaḥ || 7.56.6 ||
bhagavannimiśāpena videhatvamupāgamam |lokanātha mahādeva aṇḍajo 'pi tvamabjajaḥ || 7.56.7 ||
sarveṣāṃ dehahīnānāṃ mahadduḥkhaṃ bhaviṣyati |lupyante sarvakāryaṇi hīnadehasya vai prabho |dehasyānyasya sadbhāve prasādaṃ kartumarhasi || 7.56.8 ||
tamuvāca tato brahmā svayambhūramitaprabhaḥ |mitrāvaruṇajaṃ teja praviśa tvaṃ mahāyaśaḥ || 7.56.9 ||
ayonijastvaṃ bhavitā tatrāpi dvijasattama |dharmeṇa mahatā yuktaḥ punareṣyasi me vaśam || 7.56.10 ||
evamuktastu devena cābhivādya pradakṣiṇam |kṛtvā pitāmahaṃ tūrṇaṃ prayayau varuṇālayam || 7.56.11 ||
tameva kālaṃ mitro 'pi varuṇatvamakārayat |kṣīrodena sahopetaḥ pūjyamānaḥ surottamaiḥ || 7.56.12 ||
etasminneva kāle tu urvaśī paramāpsarāḥ |yadṛcchayā tamuddeśamāyayau sakhibhirvṛtā || 7.56.13 ||
tāṃ dṛṣṭvā rūpasampannāṃ krīḍantīṃ varuṇālaye |āviśatparamo harṣo varuṇaṃ corvaśīkṛte || 7.56.14 ||
sa tāṃ padmapalāśākṣīṃ pūrṇacandranibhānanām |varuṇo varayāmāsa maithunāyāpsarovarām || 7.56.15 ||
pratyuvāca tataḥ sā tu varuṇaṃ prāñjaliḥ sthitā |mitreṇāhaṃ vṛtā sākṣātpūrvameva sureśvara || 7.56.16 ||
varuṇastvabravīdvākyaṃ kandarpaśarapīḍitaḥ |idaṃ tejaḥ samutsrakṣye kumbhe 'smindevanirmite || 7.56.17 ||
evamutsṛjya suśroṇi tvayyahaṃ varavarṇini |kṛtakāmo bhaviṣyāmi yadi necchasi saṅgamam || 7.56.18 ||
tasya tallokapālasya varuṇasya subhāṣitam |urvaśī paramaprītā śrutvā vākyamuvāca ha || 7.56.19 ||
kāmametadbhavatvevaṃ hṛdayaṃ me tvayi sthitam |bhāvaścāpyadhikastubhyaṃ deho mitrasya tu prabho || 7.56.20 ||
urvaśyā evamuktastu retastanmahadadbhutam |jvaladagniśikhāprakhyaṃ tasminkumbhe hyapāsṛjat || 7.56.21 ||
urvaśī tvagamattatra mitro vai yatra devatā |tāṃ tu mitraḥ susaṅkramya urvaśīmidamabravīt || 7.56.22 ||
mayā nimantritā pūrvaṃ kasmāttvamavasarjitā |patimanyaṃ vṛtavatī tasmāttvaṃ duṣṭacāriṇī || 7.56.23 ||
anena duṣkṛtena tvaṃ matkrodhakaluṣīkṛtā |manuṣyalokamāsthāya kañcitkālaṃ nivatsyasi || 7.56.24 ||
budhasya putro rājarṣiḥ kāśīrājaḥ purūravāḥ |tamadya gaccha durbuddhe sa te bhartā bhaviṣyati || 7.56.25 ||
tataḥ sā śāpadoṣeṇa purūravasamabhyagāt |pratiyāte purūravaṃ budhasyātmajamaurasam || 7.56.26 ||
tasya jajñe tataḥ śrīmānāyuḥ putro mahābalaḥ |nahuṣo yasya putrastu babhūvendrasamadyutiḥ || 7.56.27 ||
vajramutsṛjya vṛtrāya bhrānte 'tha tridiveśvare |śataṃ varṣasahasrāṇi yenendratvaṃ praśāsitam || 7.56.28 ||
sā tena śāpena jagāma bhūmiṃ tadorvaśī cārudatī sunetrā |bahūni varṣāṇyavasacca subhrūḥ śāpakṣayādindrasado yayau ca || 7.56.29 ||
tāṃ śrutvā divyasaṅkāśāṃ kathāmadbhutadarśanām |lakṣmaṇaḥ paramaprīto rāghavaṃ vākyamabravīt || 7.57.1 ||
nikṣiptadehau kākutstha kathaṃ tau dvijapārthivau |punardehena saṃyogaṃ jagmurdevasammatau || 7.57.2 ||
tasya tadbhāṣitaṃ śrutvā rāmaḥ satyaparākramaḥ |tāṃ kathāṃ kathayāmāsa vasiṣṭhasya mahātmanaḥ || 7.57.3 ||
yastu kumbho raghuśreṣṭha tejaḥpūrṇo mahātmanoḥ |tasmiṃstejomayau viprau sambhūtāvṛṣisattamau || 7.57.4 ||
pūrvaṃ samabhavattatra hyagastyo bhagavānṛṣiḥ |nāhaṃ sutastavetyuktvā mitraṃ tasmādapākramat || 7.57.5 ||
taddhi tejastu mitrasya urvasyāḥ pūrvamāhitam |tasminsamabhavatkumbhe tattejo yatra vāruṇam || 7.57.6 ||
kasyacittvatha kālasya mitrāvaruṇasambhavaḥ |vasiṣṭhastejasā yukto jajñe ikṣvākudaivatam || 7.57.7 ||
tamikṣvākurmahātejā jātamātramaninditam |vavre purodhasaṃ saumya vaṃśasyāsya bhavāya naḥ || 7.57.8 ||
evaṃ tvapūrvadehasya vasiṣṭhasya mahātmanaḥ |kathito nirgamaḥ saumya nimeḥ śṛṇu yathā 'bhavat || 7.57.9 ||
dṛṣṭvā videhaṃ rājānamṛṣayaḥ sarva eva te |taṃ ca te yojayāmāsuryāgadīkṣāṃ manīṣiṇaḥ || 7.57.10 ||
taṃ ca dehaṃ narendrasya rakṣanti sma dvijottamāḥ |gandhairmālyaiśca vastraiśca paurabhṛtyasamanvitāḥ || 7.57.11 ||
tato yajñe samāpte tu bhṛgustatredamabravīt |ānayiṣyāmi te cetastuṣṭo 'smi tava pārthiva || 7.57.12 ||
suprītāśca surāḥ sarve nimeścetastathābruvan |varaṃ varaya rājarṣe kva te ceto nirūpyatām || 7.57.13 ||
evamuktaḥ suraiḥ sarvairnimeścetastadābravīt |netreṣu sarvabhūtānāṃ vaseyaṃ surasattamāḥ || 7.57.14 ||
bāḍhamityeva vibudhā nimeścetastadā 'bruvan |netreṣu sarvabhūtānāṃ vāyubhūtaścariṣyasi || 7.57.15 ||
tvatkṛte ca nimiṣyanti cakṣūṃṣi pṛthivīpate |vāyubhūtena caratā viśramārthaṃ muhurmuhuḥ || 7.57.16 ||
evamuktvā tu vibudhāḥ sarve jagmuryathāgatam |ṛṣayo 'pi mahātmāno nimerdehaṃ samāharan || 7.57.17 ||
araṇiṃ tatra nikṣipya mathanaṃ cakrurojasā |mantrahomairmahātmānaḥ putrahetornimestadā || 7.57.18 ||
araṇyāṃ mathyāmānāyāṃ prādurbhūto mahātapāḥ |mathanānmithirityāhurjananājjanako 'bhavat |yasmādvidehātsambhūto vaidehastu tataḥ smṛtaḥ || 7.57.19 ||
evaṃ videharājaśca janakaḥ pūrvako 'bhavat |mithirnāma mahātejāstenāyaṃ maithilo 'bhavat || 7.57.20 ||
evaṃ bruvati rāme tu lakṣmaṇaḥ paravīrahā |pratyuvāca mahātmānaṃ jvalantamiva tejasā || 7.58.1 ||
mahadadbhutamāścaryaṃ videhasya purātanam |nirvṛttaṃ rājaśārdūla vasiṣṭhasya nimessaha || 7.58.2 ||
nimistu kṣatriyaḥ śūro viśeṣeṇa ca dīkṣitaḥ |na kṣamāṃ kṛtavānrājā vasiṣṭhasya mahātmanaḥ || 7.58.3 ||
evamuktastu tenāyaṃ śrīmān kṣatriyapuṅgavaḥ |uvāca lakṣmaṇaṃ vākyaṃ sarvaśāstraviśāradam || 7.58.4 ||
rāmo ramayatāṃ śreṣṭho bhrātaraṃ dīptatejasam |na sarvatra kṣamā vīra puruṣeṣu pradṛśyate || 7.58.5 ||
saumitre duḥsaho roṣo yathā kṣānto yayātinā |sattvānugaṃ puraskṛtya tannibodha samāhitaḥ || 7.58.6 ||
nahuṣasya suto rājā yayātiḥ pauravardhanaḥ |tasya bhāryādvayaṃ saumya rūpeṇāpratimaṃ bhuvi || 7.58.7 ||
ekā tu tasya rājarṣernāhuṣasya puraskṛtā |śarmiṣṭhā nāma daiteyī duhitā vṛṣaparvaṇaḥ || 7.58.8 ||
anyā tūśanasaḥ patnī yayāteḥ puruṣarṣabha |na tu sā dayitā rājño devayānī sumadhyamā || 7.58.9 ||
tayoḥ putrau tu sambhūtau rūpavantau samāhitau |śarmiṣṭhā 'janayatpūruṃ devayānī yaduṃ tadā || 7.58.10 ||
pūrustu dayito rājño guṇairmātṛkṛtena ca |tato duḥkhasamāviṣṭo yadurmātaramabravīt || 7.58.11 ||
bhārgavasya kule jātā devasyākliṣṭakarmaṇaḥ |sahase hṛdgataṃ duḥkhamavamānaṃ ca duḥsaham || 7.58.12 ||
āvāṃ ca sahitau devi praviśāva hutāśanam |rājā tu ramatāṃ sārdhaṃ daityaputryā bahukṣapāḥ || 7.58.13 ||
yadi vā sahanīyaṃ te māmanujñātumarhasi |kṣama tvaṃ na kṣamiṣye 'haṃ mariṣyāmi na saṃśayaḥ || 7.58.14 ||
putrasya bhāṣitaṃ śrutvā paramārtasya rodataḥ |devayānī tu saṅkruddhā sasmāra pitaraṃ tadā || 7.58.15 ||
iṅgitaṃ tadabhijñāya duhiturbhārgavastadā |āgatastvaritaṃ tatra devayānī tu yatra sā || 7.58.16 ||
dṛṣṭvā cāprakṛtisthāṃ tāmaprahṛṣṭāmacetanām |pitā duhitaraṃ vākyaṃ kimetaditi cābravīt || 7.58.17 ||
pṛcchantamasakṛttaṃ vai bhārgavaṃ dīptatejasam |devayānī tu saṅkruddhā pitaraṃ vākyamabravīt || 7.58.18 ||
ahamagniṃ viṣaṃ tīkṣṇamapo vā munisattama |bhakṣayiṣye pravekṣyāmi na tu śakṣyāmi jīvitum || 7.58.19 ||
na māṃ tvamavajānīṣe duḥkhitāmavamānitām |vṛkṣasyāvajñayā brahmaṃśchidyante vṛkṣajīvinaḥ || 7.58.20 ||
avajñayā ca rājarṣiḥ paribhūya ca bhārgava |mayyavajñāṃ prayuṅkte hi na ca māṃ bahu manyate || 7.58.21 ||
tasyāstadvacanaṃ śrutvā kopenābhipariplutaḥ |vyāhartumupacakrāma bhārgavo nahuṣātmajam || 7.58.22 ||
yasmānmāmavajānīṣe nāhuṣa tvaṃ durātmavān |jarayā parayā jīrṇaḥ śaithilyamupayāsyasi || 7.58.23 ||
evamuktvā duhitaraṃ samāśvāsya ca bhārgavaḥ |punarjagāma brahmarṣirbhavanaṃ svaṃ mahāyaśāḥ || 7.58.24 ||
sa evamuktvā dvijapuṅgavāgryaḥ sutāṃ samāśvāsya ca devayānīm |punaryayau sūryasamānatejā dattvā ca śāpaṃ nahuṣātmajāya || 7.58.25 ||
śrutvā tūśanasaṃ kruddhaṃ tadā ' 'rto nahuṣātmajaḥ |jarāṃ paramikāṃ prāpya yaduṃ vacanamabravīt || 7.59.1 ||
yado tvamasi dharmajño madarthaṃ pratigṛhyatām |jarāṃ paramikāṃ putra bhogai raṃsye mahāyaśaḥ || 7.59.2 ||
na tāvatkṛtakṛtyo 'smi viṣayeṣu nararṣabha |anubhūya tadā kāmaṃ tataḥ prāpsyāmyahaṃ jarām || 7.59.3 ||
yadustadvacanaṃ śrutvā pratyuvāca nararṣabham |putraste dayitaḥ pūruḥ pratigṛhṇātu vai jarām || 7.59.4 ||
bahiṣkṛto 'hamartheṣu sannikarṣācca pārthiva |pratigṛhṇātu vai rājanka sahāśnāti bhojanam || 7.59.5 ||
tasya tadvacanaṃ śrutvā rājā pūrumathābravīt |iyaṃ jarā mahābāho madarthaṃ pratigṛhyatām || 7.59.6 ||
nāhuṣeṇaivamuktastu pūruḥ prāñjalirabravīt |dhanyo 'smyanugṛhīto 'smi śāsane 'smi tava sthitaḥ || 7.59.7 ||
pūrorvacanamājñāya nāhuṣaḥ parayā mudā |praharṣamatulaṃ lebhe jarāṃ saṅkrāmayacca tām || 7.59.8 ||
tataḥ sa rājā taruṇaḥ prāpya yajñānsahasraśaḥ |bahuvarṣasahasrāṇi pālayāmāsa medinīm || 7.59.9 ||
atha dīrghasya kālasya rājā pūrumathābravīt |ānayasva jarāṃ putra nyāsaṃ niryātayasva me || 7.59.10 ||
nyāsabhūtā mayā putra tvayi saṅkrāmitā jarā |tasmātpratigrahīṣyāmi tāṃ jarāṃ mā vyathāṃ kṛthāḥ || 7.59.11 ||
prītaścāsmi mahābāho śāsanasya pratigrahāt |tvāṃ cāhamabhiṣekṣyāmi prītiyukto narādhipam || 7.59.12 ||
evamuktvā sutaṃ pūruṃ yayātirnahuṣātmajaḥ |devayānīsutaṃ kruddho rājā vākyamuvāca ha || 7.59.13 ||
rākṣasastvaṃ mayā jātaḥ putrarūpo durāsadaḥ |pratihaṃsi mamājñāṃ yat prajārthe viphalo bhava || 7.59.14 ||
pitaraṃ gurubhūtaṃ māṃ yasmāttvamavamanyase |rākṣasānyātudhānāṃstvaṃ janayiṣyasi dāruṇān || 7.59.15 ||
na tu somakulotpanne vaṃśe sthāsyati durmateḥ |vaṃśo 'pi bhavatastulyo durvinīto bhaviṣyati || 7.59.16 ||
tamevamuktvā rājarṣiḥ pūruṃ rājyavivardhanam |abhiṣekeṇa sampūjya āśramaṃ praviveśa ha || 7.59.17 ||
tataḥ kālena mahatā diṣṭāntamupajagmivān |tridivaṃ saṅgato rājā yayātirnahuṣātmajaḥ || 7.59.18 ||
pūruścakāra tadrājyaṃ dharmeṇa mahatā vṛtaḥ |pratiṣṭhāne puravare kāśirājye mahāyaśāḥ || 7.59.19 ||
yadustu janayāmāsa yātudhānānsahasraśaḥ |pure krauñcavane durge rājavaṃśabahiṣkṛtaḥ || 7.59.20 ||
eṣa tūśanasā muktaḥ śāpotsargo yayātinā |dhāritaḥ kṣatradharmeṇa yannimiśca na cakṣame || 7.59.21 ||
etatte sarvamākhyātaṃ darśanaṃ sarvakāriṇām |anuvartāmahe saumya doṣo na syādyathā nṛge || 7.59.22 ||
iti kathayati rāme candratulyānane ca praviralataratāraṃ vyoma jajñe tadānīm |aruṇakiraṇaraktā digbabhau caiva pūrvā kusumarasavimuktaṃ vastramākuṇṭhiteva || 7.59.23 ||
tayoḥ saṃvadatorevaṃ rāmalakṣmaṇayostadā |vāsantikī niśā prāptā na śītā na ca gharmadā || 7.60.1 ||
tataḥ prabhāte vimale kṛtapaurvāhṇikakriyaḥ |abhicakrāma kākutstho darśanaṃ paurakāryavit || 7.60.2 ||
tataḥ sumantrastvāgamya rāghavaṃ vākyamabravīt |ete pratihatā rājandvāri tiṣṭhanti tāpasāḥ || 7.60.3 ||
bhārgavacyavanaṃ caiva puraskṛtya maharṣayaḥ |darśanaṃ te mahārājñaścodayanti kṛtatvarāḥ |prīyamāṇā naravyāghra yamunātīravāsinaḥ || 7.60.4 ||
tasya tadvacanaṃ śrutvā rāmaḥ provāca dharmavit |praveśyantāṃ mahābhāgā bhārgavapramukhā dvijāḥ || 7.60.5 ||
rājñastvājñāṃ puraskṛtya dvāḥstho mūrdhni kṛtāñjaliḥ |praveśayāmāsa tadā tāpasānsudurāsadān || 7.60.6 ||
śataṃ samadhikaṃ tatra dīpyamānaṃ svatejasā |praviṣṭaṃ rājabhavanaṃ tāpasānāṃ mahātmanām || 7.60.7 ||
te dvijāḥ pūrṇakalaśaiḥ sarvatīrthāmbusatkṛtaiḥ |gṛhītvā phalamūlaṃ ca rāmasyābhyāharanbahu || 7.60.8 ||
pratigṛhya tu tatsarvaṃ rāmaḥ prītipuraskṛtaḥ |tīrthodakāni sarvāṇi phalāni vividhāni ca || 7.60.9 ||
uvāca ca mahābāhuḥ sarvāneva mahāmunīn |imānyāsanamukhyāni yathārhamupaviśyatām || 7.60.10 ||
rāmasya bhāṣitaṃ śrutvā sarva eva maharṣayaḥ |bṛsīṣu rucirākhyāsu niṣeduḥ kāñcanīṣu te || 7.60.11 ||
upaviṣṭānṛṣīṃstatra dṛṣṭvā parapurañjayaḥ |prayataḥ prāñjalirbhūtvā rāghavo vākyamabravīt || 7.60.12 ||
kimāgamanakāryaṃ vaḥ kiṃ karomi samāhitaḥ |ājñāpyo 'haṃ maharṣīṇāṃ sarvakāmakaraḥ sukham || 7.60.13 ||
idaṃ rājyaṃ ca sakalaṃ jīvitaṃ ca hṛdi sthitam |sarvametaddvidārthaṃ me satyametadbravīmi vaḥ || 7.60.14 ||
tasya tadvacanaṃ śrutvā sādhukāro mahānabhūt |ṛṣīṇāmugratapasāṃ yamunātīravāsinām || 7.60.15 ||
ūcuśca te mahātmāno harṣeṇa mahatā vṛtāḥ |upapannaṃ naraśreṣṭha tavaiva bhuvi nānyataḥ || 7.60.16 ||
bahavaḥ pārthivā rājannatikrāntā mahābalāḥ |kāryasya gauravaṃ matvā pratijñāṃ nābhyarocayan || 7.60.17 ||
tvayā punarbrāhmaṇagauravādiyaṃ kṛtā pratijñā hyanavekṣya kāraṇam |tataśca kartā hyasi nātra saṃśayo mahābhayātऺtrātumṛṣīṃstvamarhasi || 7.60.18 ||
evaṃ bruvadbhirṛṣibhiḥ kākutstho vākyamabravīt |kiṃ kāryaṃ brūta munayo bhayaṃ tāvadapaitu vaḥ || 7.61.1 ||
tathā bruvati kākutsthe bhārgavo vākyamabravīt |bhayānāṃ śṛṇu yanmūlaṃ deśasya ca nareśvara || 7.61.2 ||
pūrvaṃ kṛtayuge rājandaiteyaḥ sumahābalaḥ |lolāputro 'bhavajjyeṣṭho madhurnāma mahāsuraḥ || 7.61.3 ||
brahmaṇyaśca śaraṇyaśca buddhyā ca pariniṣṭhitaḥ |suraiśca paramodāraiḥ prītistasyātulā 'bhavat || 7.61.4 ||
sa madhurvīryasampanno dharme ca susamāhitaḥ |bahuvarṣasahasrāṇi rudraprītyā 'karottapaḥ || 7.61.5 ||
rudraḥ prīto 'bhavattasmai varaṃ dātuṃ yayau ca saḥ |bahumānācca rudreṇa dattastasyādbhuto varaḥ || 7.61.6 ||
śūlaṃ śūlādviniṣkṛṣya mahāvīryaṃ mahāprabham |dadau mahātmā suprīto vākyaṃ caitaduvāca ha || 7.61.7 ||
tvayāyamatulo dharmo matprasādakaraḥ kṛtaḥ |prītyā paramayā yukto dadāmyāyudhamuttamam || 7.61.8 ||
yāvatsuraiśca vipraiśca na virudhyermahāsura |tāvacchūlaṃ tavedaṃ syādanyathā nāśamepyati || 7.61.9 ||
yaśca tvāmabhiyuñjīta yuddhāya vigatajvaraḥ |taṃ śūlo bhasmasātkṛtvā punareṣyati te karam || 7.61.10 ||
evaṃ rudrādvaraṃ labdhvā bhūya eva mahāsuraḥ |praṇipatya mahādevaṃ vākyametaduvāca ha || 7.61.11 ||
bhagavanmama vaṃśasya śūlametadanuttamam |bhavettu satataṃ deva surāṇāmīśvaro hyasi || 7.61.12 ||
taṃ bruvāṇaṃ madhuṃ devaḥ sarvabhūtapatiḥ śivaḥ |pratyuvāca mahātejā naitadevaṃ bhaviṣyati || 7.61.13 ||
mā bhūtte viphalā vāṇī matprasādakṛtā śubhā |bhavataḥ putramekaṃ tu śūlametadbhajiṣyate || 7.61.14 ||
yāvatkarasthaḥ śūlo 'yaṃ bhaviṣyati sutasya te |avadhyaḥ sarvabhūtānāṃ śūlahasto bhaviṣyati || 7.61.15 ||
evaṃ madhurvaraṃ labdhvā devātsumahadadbhutam |bhavanaṃ so 'suraśreṣṭhaḥ kārayāmāsa suprabham || 7.61.16 ||
tasya patnī mahābhāgā priyā kumbhīnasīti yā |viśvāvasorapatyaṃ sā hyanalāyāṃ mahāprabhā || 7.61.17 ||
tasyāḥ putro mahāvīryo lavaṇo nāma dāruṇaḥ |bālyātprabhṛti duṣṭātmā pāpānyeva samācarat || 7.61.18 ||
taṃ putraṃ durvinītaṃ tu dṛṣṭvā krodhasamanvitaḥ |madhuḥ sa śokamāpede na cainaṃ kiñcidabravīt || 7.61.19 ||
sa vihāya tvimaṃ lokaṃ praviṣṭo varuṇālayam |śūlaṃ niveśya lavaṇe varaṃ tasmai nyavedayat || 7.61.20 ||
sa prabhāveṇa śūlasya daurātmyenātmanastathā |santāpayati lokāṃstrīnviśeṣeṇa ca tāpasān || 7.61.21 ||
evaṃprabhāvo lavaṇaḥ śūlaṃ caiva tathāvidham |śrutvā pramāṇaṃ kākutstha tvaṃ hi naḥ paramā gatiḥ || 7.61.22 ||
bahavaḥ pārthivā rāma bhayārtairṛṣibhiḥ purā |abhayaṃ yācitā vīra trātāraṃ na ca vidmahe || 7.61.23 ||
te vayaṃ rāvaṇaṃ śrutvā hataṃ sabalavāhanam |trātāraṃ vidmahe tāta nānyaṃ bhuvi narādhipam |tatparitrātumicchāmo lavaṇādbhayapīḍitān || 7.61.24 ||
iti rāma niveditaṃ tu te bhayajaṃ kāraṇamutthitaṃ ca yat |vinivārayituṃ bhavānkṣamaḥ kuru taṃ kāmamahīnavikrama || 7.61.25 ||
tathokte tānṛṣīnrāmaḥ pratyuvāca kṛtāñjaliḥ |kimāhāraḥ kimācāro lavaṇaḥ kva ca vartate || 7.62.1 ||
rāghavasya vacaḥ śrutvā ṛṣayaḥ sarva eva te |tato nivedayāmāsurlavaṇo vavṛdhe yathā || 7.62.2 ||
āhāraḥ sarvasattvāni viśeṣeṇa ca tāpasāḥ |ācāro raudratā nityaṃ vāso madhuvane tathā || 7.62.3 ||
hatvā bahusahasrāṇi siṃhavyāghramṛgadvipān |mānuṣāṃścaiva kurute nityamāhāramāhnikam || 7.62.4 ||
tato 'ntarāṇi sattvāni khādate sa mahābalaḥ |saṃhāre samanuprāpte vyāditāsya ivāntakaḥ || 7.62.5 ||
tacchrutvā rāghavo vākyamuvāca sa mahāmunīn |ghātayiṣyāmi tadrakṣo hyapagacchatu vo bhayam || 7.62.6 ||
pratijñāya tathā teṣāṃ munīnāmugratejasām |sa bhrāta'nsahitānsarvānuvāca raghunandanaḥ || 7.62.7 ||
ko hantā lavaṇaṃ vīraḥ kasyāṃśaḥ sa vidhīyatām |bharatasya mahābāhoḥ śatrughnasya ca dhīmataḥ || 7.62.8 ||
rāghaveṇaivamuktastu bharato vākyamabravīt |ahamenaṃ vadhiṣyāmi mamāṃśaḥ sa vidhīyatām || 7.62.9 ||
bharatasya vacaḥ śrutvā dhairyaśauryasamanvitam |lakṣmaṇāvarajastasthau hitvā sauvarṇamāsanam || 7.62.10 ||
śatrughnastvabravīdvākyaṃ praṇipatya narādhipam |kṛtakarmā mahābāhurmadhyamo raghunandanaḥ || 7.62.11 ||
āryeṇa hi purā śūnyā tvayodhyā paripālitā |santāpaṃ hṛdaye kṛtvā āryasyāgamanaṃ prati || 7.62.12 ||
duḥkhāni ca bahūnīha hyanubhūtāni pārthiva |śayāno duḥkhaśayyāsu nandigrāme 'vasatpurā || 7.62.13 ||
phalamūlāśano bhūtvā jaṭī cīradharastathā |anubhūyedṛśaṃ duḥkhameṣa rāghavanandanaḥ |preṣye mayi sthite rājanna bhūyaḥ kleśamāpnuyāt || 7.62.14 ||
tathā bruvati śatrughne rāghavaḥ punarabravīt |evaṃ bhavatu kākutstha kriyatāṃ mama śāsanam || 7.62.15 ||
rājye tvāmabhiṣekṣyāmi madhostu nagare śubhe |niveśaya mahābāho bharataṃ yadyavekṣase || 7.62.16 ||
śūrastvaṃ kṛtavidyaśca samarthaśca niveśane || 7.62.17 ||
yo hi śatruṃ samutpāṭya pārthivasya punaḥ kṣaye |na vidhatte nṛpaṃ tatra narakaṃ sa hi gacchati || 7.62.18 ||
sa tvaṃ hatvā madhusutaṃ lavaṇaṃ pāpaniścayam |rājyaṃ praśādhi dharmeṇa vākyaṃ me yadyavekṣase || 7.62.19 ||
uttaraṃ ca na vaktavyaṃ śūra vākyāntare mama |bālena pūrvajasyājñā kartavyā nātra saṃśayaḥ || 7.62.20 ||
abhiṣekaṃ ca kākutstha pratīcchasva mayodyatam |vasiṣṭhapramukhairviprairvidhimantrapuraskṛtam || 7.62.21 ||
evamuktastu rāmeṇa parāṃ vrīḍāmupāgamat |śatrughno vīryasampanno mandaṃ mandamuvāca ha || 7.63.1 ||
adharmaṃ vidma kākutstha hyasminnarthe nareśvara |kathaṃ tiṣṭhatsu jyeṣṭheṣu kanīyānabhiṣicyate || 7.63.2 ||
avaśyaṃ karaṇīyaṃ ca śāsanaṃ puruṣarṣabha |tava caiva mahābhāga śāsanaṃ duratikramam || 7.63.3 ||
tvatto mayā śrutaṃ vīra śrutibhyaśca mayā śrutam |nottaraṃ hi mayā vācyaṃ madhyame pratijānati || 7.63.4 ||
vyāhṛtaṃ durvaco ghoraṃ hantāsmi lavaṇaṃ mṛdhe |tasyaivaṃ me duruktasya durgatiḥ puruṣarṣabha || 7.63.5 ||
uttaraṃ nahi vaktavyaṃ jyeṣṭhenābhihite punaḥ |adharmasahitaṃ caiva paralokavivarjitam || 7.63.6 ||
so 'haṃ dvitīyaṃ kākutstha na vakṣyāmi tavottaram |mā dvitīyena daṇḍo vai nipatenmayi mānada || 7.63.7 ||
kāmakāro hyahaṃ rājaṃstavāsmi puruṣarṣabha |adharmaṃ jahi kākutstha matkṛte raghunandana || 7.63.8 ||
evamukte tu śūreṇa śatrughnena mahātmanā |uvāca rāmaḥ saṃhṛṣṭo bharataṃ lakṣmaṇaṃ tathā || 7.63.9 ||
sambhārānabhiṣekasya ānayadhvaṃ samāhitāḥ |adyaiva puruṣavyāghramabhiṣekṣyāmi rāghavam || 7.63.10 ||
purohitaṃ ca kākutsthaṃ naigamānṛtvijastathā |mantriṇaścaiva tānsarvānānayadhvaṃ mamājñayā || 7.63.11 ||
rājñaḥ śāsanamājñāya tathā 'kurvanmahārathāḥ |abhiṣekasamārambhaṃ puraskṛtya purodhasam |praviṣṭā rājabhavanaṃ rājāno brāhmaṇāstathā || 7.63.12 ||
tatho 'bhiṣeko vavṛdhe śatrughnasya mahātmanaḥ |sampraharṣakaraḥ śrīmānrāghavasya purasya ca || 7.63.13 ||
abhiṣiktastu śatrughno babhau cādityasannibhaḥ |abhiṣiktaḥ purā skandaḥ sendrairiva marudgaṇaiḥ || 7.63.14 ||
abhiṣikte tu śatrughne rāmeṇākliṣṭakarmaṇā |paurāḥ pramuditāścāsanbrāhmaṇāśca bahuśrutāḥ || 7.63.15 ||
kausalyā ca sumitrā ca maṅgalaṃ kekayī tathā |cakrustā rājabhavane yāścānyā rājayoṣitaḥ || 7.63.16 ||
ṛṣayaśca mahātmāno yamunātīravāsinaḥ |hataṃ lavaṇamāśaṃsuḥ śatrughnasyābhiṣecanāt || 7.63.17 ||
tato 'bhiṣiktaṃ śatrughnamaṅkamāropya rāghavaḥ |uvāca madhurāṃ vāṇīṃ tejastasyābhipūrayan || 7.63.18 ||
ayaṃ śarastvamoghaste divyaḥ parapurañjayaḥ |anena lavaṇaṃ saumya hantā 'si raghunandana || 7.63.19 ||
sṛṣṭaḥ śaro 'yaṃ kākutstha yadā śete mahārṇave || 7.63.20 ||
svayambhūrajito devo yannāpaśyansurāsurāḥ |adṛśyaḥ sarvabhūtānāṃ tenāyaṃ tu śarottamaḥ || 7.63.21 ||
sṛṣṭaḥ krodhābhibhūtena vināśārthaṃ durātmanoḥ |madhukaiṭabhayorvīra vighāte vartamānayoḥ |sraṣṭukāmena lokāṃstrīṃstau cānena hatau yudhi || 7.63.22 ||
tau hatvā janabhogārthaṃ kaiṭabhaṃ tu madhuṃ tathā |anena śaramukhyena tato lokāṃścakāra saḥ || 7.63.23 ||
nāyaṃ mayā śaraḥ pūrvaṃ rāvaṇasya vadhārthinā |muktaḥ śatrughna bhūtānāṃ mahāṃstrāso bhavediti || 7.63.24 ||
yacca tasya mahacchūlaṃ tryambakeṇa mahātmanā |dattaṃ śatruvināśāya madhorāyudhamuttamam || 7.63.25 ||
sa taṃ nikṣipya bhavane pūjyamāna punaḥ punaḥ |diśaḥ sarvāḥ samāsādya prāpnotyāhāramuttamam || 7.63.26 ||
yadā tu yuddhamākāṅkṣan kaścidenaṃ samāhvayet |tadā śūlaṃ gahītvā taṃ bhasma rakṣaḥ karoti hi || 7.63.27 ||
sa tvaṃ puruṣaśārdūla tamāyudhavinākṛtam |apraviṣṭaṃ puraṃ pūrvaṃ dvāri tiṣṭha dhṛtāyudhaḥ || 7.63.28 ||
apraviṣṭaṃ ca bhavanaṃ yuddhāya puruṣarṣabha |āhvayethā mahābāho tato hantāsi rākṣasam || 7.63.29 ||
anyathā kriyamāṇe tu avadhyaḥ sa bhaviṣyati |yadi tvevaṃ kṛte vīra vināśamupayāsyati || 7.63.30 ||
etatte sarvamākhyātaṃ śūlasya ca viparyayaḥ |śrīmataḥ śitikaṇṭhasya kṛtyaṃ hi duratikramam || 7.63.31 ||
evamuktvā ca kākutsthaṃ praśasya ca punaḥ punaḥ |punarevāparaṃ vākyamuvāca raghunandanaḥ || 7.64.1 ||
imānyaśvasahasrāṇi catvāri puruṣarṣabha |rathānāṃ dve sahasre ca gajānāṃ śatamuttamam || 7.64.2 ||
antarā paṇavīthyaśca nānāpaṇyopaśobhitāḥ |anugacchantu kākutsthaṃ tathaiva naṭanartakāḥ || 7.64.3 ||
hiraṇyasya suvarṇasya niyutaṃ puruṣarṣabha |ādāya gaccha śatrughna paryāptadhanavāhanaḥ || 7.64.4 ||
balaṃ ca subhṛtaṃ vīra hṛṣṭapuṣṭamanuddhatam |sambhāṣāsampradānena rañjayasva nagettama || 7.64.5 ||
na hyarthāstatra tiṣṭhanti na dārā na ca bāndhavāḥ |suprīto bhṛtyavargaśca yatra tiṣṭhasi rāghava || 7.64.6 ||
tato hṛṣṭajanākīrṇāṃ prasthāpya mahatīṃ camūm |eka eva dhanuṣpāṇirgaccha tvaṃ madhuno vanam || 7.64.7 ||
yathā tvāṃ na prajānāti gacchantaṃ yuddhakāṅkṣiṇam |lavaṇastu madhoḥ putrastathā gaccheraśaṅkitam || 7.64.8 ||
na tasya mūtyuranyo 'sti kaściddhi puruṣarṣabha |darśanaṃ yo 'bhigaccheta sa vadhyo lavaṇena hi || 7.64.9 ||
sa hi grīṣmo 'payāte tu varṣārātra upāgate |hanyāstvaṃ lavaṇaṃ saumya sahi kālo 'sya durmateḥ || 7.64.10 ||
maharṣīṃstu puratkṛtya prayāntu tava saunikāḥ |yathā grīṣmāvaśeṣeṇa tareyurjāhnavījalam || 7.64.11 ||
tatra sthāpya balaṃ sarvaṃ nadītīre samāhitaḥ |agrato dhanuṣā sārdhaṃ gaccha tvaṃ laghuvikramaḥ || 7.64.12 ||
evamuktastu rāmeṇa śatrughnastānmahābalān |senāmukhyānsamānīya tato vākyamuvāca ha || 7.64.13 ||
ete vo gaṇitā vāsā yatra tatra nivatsyatha |sthātavyaṃ cāvirodhena yathā bādhā na kasyacit || 7.64.14 ||
tathā tāṃstu samājñāpya prasthāpya ca mahadbalam |kausalyāṃ ca sumitrāṃ ca kaikeyīṃ cābhyavādayat || 7.64.15 ||
rāmaṃ pradakṣiṇīkṛtya śirasā 'bhipraṇamya ca |rāmeṇa cābhyanujñātaḥ śatrughnaḥ śatrutāpanaḥ || 7.64.16 ||
lakṣmaṇaṃ bharataṃ caiva praṇipatya kṛtāñjaliḥ |purohitaṃ vasiṣṭhaṃ ca śatrughnaḥ prayatātmavān |pradakṣiṇamatho kṛtvā nirjagāma mahābalaḥ || 7.64.17 ||
prasthāpya senāmatha so 'gratastadā gajendravājipravaraughasaṅkulām |upāsa māsaṃ tu narendrapārśvatastvatha prayāto raghuvaṃśavardhanaḥ || 7.64.18 ||
prasthāpya ca balaṃ sarvaṃ māsamātroṣitaḥ pathi |eka evāśu śatrughno jagāma tvaritaṃ tadā || 7.65.1 ||
dvirātramantare śūra uṣya rāghavanandanaḥ |vālmīkerāśramaṃ puṇyamagacchadvāsamuttamam || 7.65.2 ||
so 'bhivādya mahātmānaṃ vālmīkiṃ munisattamam |kṛtāñjaliratho bhūtvā vākyametaduvāca ha || 7.65.3 ||
bhagavanvastumicchāmi guroḥ kṛtyādihāgataḥ |śvaḥ prabhāte gamiṣyāmi pratīcīṃ vāruṇīṃ diśam || 7.65.4 ||
śatrughnasya vacaḥ śrutvā prahasya munipuṅgavaḥ |pratyuvāca mahātmānaṃ svāgataṃ te mahāyaśaḥ || 7.65.5 ||
svamāśramamidaṃ saumya rāghavāṇāṃ kulasya hi |āsanaṃ pādyamardhyaṃ ca nirviśaṅkaḥ pratīccha me || 7.65.6 ||
pratigṛhya tadā pūjāṃ phalamūlaṃ ca bhojanam |bhakṣayāmāsa kākutsthastṛptiṃ ca paramāṃ gataḥ || 7.65.7 ||
sa bhuktvā phalamūlaṃ ca maharṣiṃ tamuvāca ha |iyaṃ yajñavibhūtiste kasyāśramasamīpataḥ || 7.65.8 ||
tattasya bhāṣitaṃ śrutvā vālmīkirvākyamabravīt |śatrughna śṛṇu yasyedaṃ babhūvāyatanaṃ purā || 7.65.9 ||
yuṣmākaṃ pūrvako rājā saudāsastasya bhūpateḥ |putro vīrasaho nāma vīryavānatidhārmikaḥ || 7.65.10 ||
sa bāla eva saudāso mṛgayāmupacakrame |cañcūryamāṇaṃ dadṛśe sa śūro rākṣasadvayam || 7.65.11 ||
śārdūlarūpiṇau ghorau mṛgānbahusahasraśaḥ |bhakṣamāṇāvasantuṣṭau paryāptiṃ naiva jagmatuḥ || 7.65.12 ||
sa tu tau rākṣasau dṛṣṭvā nirmṛgaṃ ca vanaṃ kṛtam |krodhena mahatā ' 'viṣṭo jaghānaikaṃ maheṣuṇā || 7.65.13 ||
vinipātya tamekaṃ tu saudāsaḥ puruṣarṣabhaḥ |vijvaro vigatāmārṣo hataṃ rakṣo hyudaikṣata || 7.65.14 ||
nirīkṣamāṇaṃ taṃ dṛṣṭvā sahāyaṃ tasya rakṣasaḥ |santāpamakarodghoraṃ saudāsaṃ cedamabravīt || 7.65.15 ||
yasmādanaparādhaṃ tvaṃ sahāyaṃ mama jaghnivān |tasmāttavāpi pāpiṣṭha pradāsyāmi pratikriyām || 7.65.16 ||
evamuktvā tu tadrākṣastatraivāntaradhīyata |kālaparyāyayogena rājā mitrasaho 'bhavat || 7.65.17 ||
rājāpi yajate yajñamasyāśramasamīpataḥ |aśvamedhaṃ mahāyajñaṃ taṃ vasiṣṭho 'bhyapālayat || 7.65.18 ||
tatra yajño mahānāsīdbahuvarṣagaṇāyutaḥ |samṛddhaḥ parayā lakṣmyā devayajñasamo 'bhavat || 7.65.19 ||
athāvasāne yajñasya pūrvavairamanusmaran |vasiṣṭharūpī rājānamiti hovāca rākṣasaḥ || 7.65.20 ||
asya yajñasya jāto 'ntaḥ sāmiṣaṃ bhojanaṃ mama |dīyatāmiha śīghraṃ vai nātra kāryā vicāraṇā || 7.65.21 ||
tacchrutvā vyāhṛtaṃ vākyaṃ rakṣasā brahmarūpiṇā |bhakṣyasaṃskārakuśalamuvāca pṛthivīpatiḥ || 7.65.22 ||
haviṣyaṃ sāmiṣaṃ svādu yathā bhavati bhojanam |tathā kuruṣva śīghraṃ vai parituṣyedyathā guruḥ || 7.65.23 ||
śāsanātpārthivendrasya sūdaḥ sambhrāntamānasaḥ |sa rākṣasaḥ punastatra sūdaveṣamathākarot || 7.65.24 ||
sa mānuṣamatho māṃsaṃ pārthivāya nyavedayat |idaṃ svādu haviṣyaṃ ca sāmiṣaṃ cānnamāhṛtam || 7.65.25 ||
sa bhojanaṃ vasiṣṭhāya patnyā sārdhamupāharat |madayantyā naravyāghra sāmiṣaṃ rakṣasā hṛtam || 7.65.26 ||
jñātvā tadāmiṣaṃ vipro mānuṣaṃ bhājanaṃ gatam |krodhena mahatā ' 'viṣṭo vyāhartumupacakrame || 7.65.27 ||
yasmāttvaṃ bhojanaṃ rājanmamaitaddātumicchasi |tasmādbhojanametatte bhaviṣyati na saṃśayaḥ || 7.65.28 ||
tataḥ kruddhastu saudāsastoyaṃ jagrāha pāṇinā |vasiṣṭhaṃ śaptumārebhe bhāryā cainamavārayat || 7.65.29 ||
rājanprabhuryato 'smākaṃ vasiṣṭho bhagavānṛṣiḥ |pratiśaptuṃ na śaktastvaṃ devatulyaṃ purodhasam || 7.65.30 ||
tataḥ krodhamayaṃ toyaṃ tejobalasamanvitam |vyasarjayata dharmātmā tataḥ pādau siṣeca ca || 7.65.31 ||
tenāsya rājñastau pādau tadā kalmāṣatāṃ gatau |tadāprabhṛti rājā 'sau saudāsaḥ sumahāyaśāḥ |kalmāṣapādaḥ saṃvṛttaḥ khyātaścaiva tathā nṛpaḥ || 7.65.32 ||
sa rājā saha patnyā vai praṇipatya muhurmuhuḥ |punarvasiṣṭhaṃ provāca yaduktaṃ brahmarūpiṇā || 7.65.33 ||
tacchrutvā pārthivendrasya rakṣasā vikṛtaṃ ca tat |punaḥ provāca rājānaṃ vasiṣṭhaḥ puruṣarṣabham || 7.65.34 ||
mayā roṣaparītena yadidaṃ vyāhṛtaṃ vacaḥ |naitacchakyaṃ vṛthā kartuṃ pradāsyāmi ca te varam || 7.65.35 ||
kālo dvādaśa varṣāṇi śāpasyānto bhaviṣyati |matprāsādācca rājendra vyatītaṃ na smariṣyasi || 7.65.36 ||
evaṃ sa rājā taṃ śāpamupabhujyārisūdanaḥ |pratilebhe punā rājyaṃ prajāścaivānvapālayat || 7.65.37 ||
tasya kalmāṣapādasya yajñasyāyatanaṃ śubham |āśramasya samīpe 'sya yanmāṃ pṛcchasi rāghava || 7.65.38 ||
tasya tāṃ pārthivendrasya kathāṃ śrutvā sudāruṇām |viveśa parṇaśālāyāṃ maharṣimabhivādya ca || 7.65.39 ||
yāmeva rātriṃ śatrughnaḥ parṇaśālāmupāviśat |tāmeva rātriṃ sītāpi prasūtā dārakadvayam || 7.66.1 ||
tato 'rdharātrasamaye bālakā munidārakāḥ |vālmīkeḥ priyamācakhyuḥ sītāyāḥ prasavaṃ śubham || 7.66.2 ||
bhagavanrāmapatnī sā prasūtā dārakadvayam |tato rakṣāṃ mahātejaḥ kuru bhūtavināśinīm || 7.66.3 ||
teṣāṃ tadvacanaṃ śrutvā maharṣiḥ samupāgamat |bālacandrapratīkāśau devaputrau mahaujasau || 7.66.4 ||
jagāma tatra hṛṣṭātmā dadarśa ca kumārakau |bhūtaghnīṃ cākarottābhyāṃ rakṣāṃ rakṣovināśinīm || 7.66.5 ||
kuśamuṣṭimupādāya lavaṃ caiva tu sa dvijaḥ |vālmīkiḥ pradadau tābhyāṃ rakṣāṃ bhūtavināśinīm || 7.66.6 ||
yastayoḥ pūrvajo jātaḥ sa kuśairmantrasatkṛtaiḥ |nirmārjanīyastu tadā kuśa ityasya nāma tat || 7.66.7 ||
yaścāvaro bhavettābhyāṃ lavena sa samāhitaḥ |nirmārjanīyo vṛddhābhirlava ityeva nāmataḥ || 7.66.8 ||
evaṃ kuśalavau nāmnā tāvubhau yamajātakau |matkṛtābhyāṃ ca nāmabhyāṃ khyātiyuktau bhaviṣyataḥ || 7.66.9 ||
tāṃ rakṣāṃ jagṛhustāśca munihastātsamāhitāḥ |akurvaṃśca tato rakṣāṃ tayorvigatakalmaṣāḥ || 7.66.10 ||
tathā tāṃ kriyamāṇāṃ ca vṛddhābhirjanma nāma ca |saṅkīrtanaṃ ca rāmasya sītāyāḥ prasavau śubhau || 7.66.11 ||
ardharātre tu śatrughnaḥ śuśrāva sumahatpriyam |parṇaśālāṃ tato gatvā mātardiṣṭyeti cābravīt || 7.66.12 ||
tathā tasya prahṛṣṭasya śatrughnasya mahātmanaḥ |vyatītā vārṣikī rātriḥ śrāvaṇī laghuvikramaḥ || 7.66.13 ||
prabhāte sumahāvīryaḥ kṛtvā paurvāhṇikīṃ kriyām |muniṃ prāñjalirāmantrya yayau paścānmukhaḥ punaḥ || 7.66.14 ||
sa gatvā yamunātīraṃ saptarātroṣitaḥ pathi |ṛṣīṇāṃ puṇyakīrtīnāmāśrame vāsamabhyayāt || 7.66.15 ||
sa tatra munibhiḥ sārdhaṃ bhārgavapramukhairnṛpaḥ |kathābhirabhirūpābhirvāsaṃ cakre mahāyaśāḥ || 7.66.16 ||
sa kāñcanādyairmunibhiḥ sameto raghupravīro rajanīṃ tadānīm |kathāprakārairbahubhirmahātmā virāmayāmāsa narendrasūnuḥ || 7.66.17 ||
atha rātryāṃ pravṛttāyāṃ śatrughno bhṛgunandanam |papraccha cyavanaṃ vipraṃ lavaṇasya yathā balam || 7.67.1 ||
śūlasya ca balaṃ brahmanke ca pūrvaṃ vināśitāḥ |anena śūlamukhyena dvandvayuddhamupāgatāḥ || 7.67.2 ||
tasya tadvacanaṃ śrutvā śatrughnasya mahātmanaḥ |pratyuvāca mahātejāścyavano raghunandanam || 7.67.3 ||
asaṅkhyeyāni karmāṇi yānyasya raghunandana |ikṣvākuvaṃśaprabhave yadvṛttaṃ tacchṛṇaṣva me || 7.67.4 ||
ayodhyāyāṃ purā rājā yuvanāśvasuto balī |māndhāteti sa vikhyātastriṣu lokeṣu vīryavān || 7.67.5 ||
sa kṛtvā pṛthivīṃ kṛtsnāṃ śāsane pṛthivīpatiḥ |suralokamito jetumudyogamakaronnṛpaḥ || 7.67.6 ||
indrasya ca bhayaṃ tīvraṃ surāṇāṃ ca mahātmanām |māndhātari kṛtodyoge devalokajigīṣayā || 7.67.7 ||
ardhāsanena śakrasya rājyārdhena ca pārthivaḥ |vandyamānaḥ suragaṇaiḥ pratijñāmadhyarohata || 7.67.8 ||
tasya pāpamabhiprāyaṃ viditvā pākaśāsanaḥ |sāntvapūrvamidaṃ vākyamuvāca yuvanāśvajam || 7.67.9 ||
rājā tvaṃ mānuṣe loke na tāvatpuruṣarṣabha |akṛtvā pṛthivīṃ vaśyāṃ devarājyamihecchasi || 7.67.10 ||
yadi vīra samagrā te medinī nikhilā vaśe |devarājyaṃ kuruṣveha sabhṛtyabalavāhanaḥ || 7.67.11 ||
indramevaṃ bruvāṇaṃ taṃ māndhātā vākyamabravīt |kva me śakra pratihataṃ śāsanaṃ pṛthivītale || 7.67.12 ||
tamuvāca sahasrākṣo lavaṇo nāma rākṣasaḥ |madhuputro madhuvane na te ' 'jñāṃ kurute 'nagha || 7.67.13 ||
tacchrutvā vipriyaṃ ghoraṃ sahasrākṣeṇa bhāṣitam |vrīḍito 'vāṅmukho rājā vyāhartuṃ na śaśāka ha || 7.67.14 ||
āmantrya tu sahasrākṣaṃ hriyā kiñcidavāṅmukhaḥ |punarevāgamacchrīmānimaṃ lokaṃ nareśvaraḥ || 7.67.15 ||
sa kṛtvā hṛdaye 'marṣaṃ sabhṛtyabalavāhanaḥ |ājagāma madhoḥ putraṃ vaśe kartumarindamaḥ || 7.67.16 ||
sa kāṅkṣamāṇo lavaṇaṃ yuddhāya puruṣarṣabhaḥ |dūtaṃ sampreṣayāmāsa sakāśaṃ lavaṇasya hi || 7.67.17 ||
sa gatvā vipriyāṇyāha bahūni madhunaḥ sutam |vadantamevaṃ taṃ dūtaṃ bhakṣayāmāsa rākṣasaḥ || 7.67.18 ||
cirāyamāṇe dūte tu rājā krodhasamanvitaḥ |ardayāmāsa tadrakṣaḥ śaravṛṣṭyā samantataḥ || 7.67.19 ||
tataḥ prahasya tadrakṣaḥ śūlaṃ jagrāha pāṇinā |vadhāya sānubandhasya mumocāyudhamuttamam || 7.67.20 ||
tacchūlaṃ dīpyamānaṃ tu sabhṛtyabalavāhanam |bhasmīkṛtvā nṛpaṃ bhūyo lavaṇasyāgamatkaram || 7.67.21 ||
evaṃ sa rājā sumahānhataḥ sabalavāhanaḥ |śūlasya tu balaṃ saumya aprameyamanuttamam || 7.67.22 ||
śvaḥ prabhāte tu lavaṇaṃ vadhiṣyasi na saṃśayaḥ |agṛhītāyudhaṃ kṣipraṃ dhruvo hi vijayastava || 7.67.23 ||
lokānāṃ svasti caiva syātkṛte karmaṇi ca tvayā |etatte sarvamākhyātaṃ lavaṇasya durātmanaḥ || 7.67.24 ||
śūlasya ca balaṃ ghoramaprameyaṃ nararṣabha |vināśaścaiva māndhāturyattenābhūcca pārthiva || 7.67.25 ||
tvaṃ śvaḥ prabhāte lavaṇaṃ mahātmanvadhiṣyase nātra tu saṃśayo me |śūlaṃ vinā nirgatamāmiṣārthe dhruvo jayaste bhavitā narendra || 7.67.26 ||
kathāṃ kathayatāṃ teṣāṃ jayaṃ cākāṅkṣatāṃ śubham |vyatītā rajanī śīghraṃ śatrughnasya mahātmanaḥ || 7.68.1 ||
tataḥ prabhāte vimale tasminkāle sa rākṣasaḥ |nirgatastu purāddhīro bhakṣyāhārapracoditaḥ || 7.68.2 ||
etasminnantare vīraḥ śatrughno yamunāṃ nadīm |tīrtvā madhupuradvāri dhanuṣpāṇiratiṣṭhata || 7.68.3 ||
tato 'rdhadivase prāpte krūrakarmā sa rākṣasaḥ |āgacchadbahusāhasraṃ prāṇināṃ bhāramudvahan || 7.68.4 ||
tato dadarśa śatrughnaṃ sthitaṃ dvāri dhṛtāyudham |tamuvāca tato rakṣaḥ kimanena kariṣyasi || 7.68.5 ||
īdṛśānāṃ sahasrāṇi sāyudhānāṃ narādhama |bhakṣitāni mayā roṣātkālamākāṅkṣase nu kim || 7.68.6 ||
āhāraścāsya sampūrṇo mamāyaṃ puruṣādhama |svayaṃ praviṣṭo 'dya mukhaṃ kathamāsādya durmate || 7.68.7 ||
tasyaivaṃ bhāṣamāṇasya hasataśca muhurmuhuḥ |śatrughno vīryasampanno roṣādaśrūṇyavāsṛjat || 7.68.8 ||
tasya roṣābhibhūtasya śatrughnasya mahātmanaḥ |tejomayā marīcyastu sarvagātrairviniṣpatan || 7.68.9 ||
uvāca ca susaṅkruddhaḥ śatrughnastaṃ niśācaram |yoddhumicchāmi durbuddhe dvandvayuddhaṃ tvayā saha || 7.68.10 ||
putro daśarathasyāhaṃ bhrātā rāmasya dhīmataḥ |śatrughno nityaśatrughno vadhākāṅkṣī tavāgataḥ || 7.68.11 ||
tasya me yuddhakāmasya dvandvayuddhaṃ pradīyatām |śatrustvaṃ sarvabhūtānāṃ na me jīvangamiṣyasi || 7.68.12 ||
tasmiṃstathā bruvāṇe tu rākṣasaḥ prahasanniva |pratyuvāca naraśreṣṭhaṃ diṣṭyā prāpto 'si durmate || 7.68.13 ||
mama mātṛṣvasurbhrātā rāvaṇo rākṣasādhipaḥ |hato rāmeṇa durbuddhe strīhetoḥ puruṣādhama || 7.68.14 ||
tacca sarvaṃ mayā kṣāntaṃ rāvaṇasya kulakṣayam |avajñāṃ purataḥ kṛtvā mayā yūyaṃ viśeṣataḥ || 7.68.15 ||
nihatāśca hi me sarve paribhūtāstṛṇaṃ yathā |bhūtāścaiva bhaviṣyāśca yūyaṃ ca puruṣādhamāḥ || 7.68.16 ||
tasya te yuddhakāmasya yuddhaṃ dāsyāmi durmate |tiṣṭhaṃ tvaṃ ca muhūrtaṃ tu yāvadāyudhamānaye |īpsitaṃ yādṛśaṃ tubhyaṃ sajjaye yāvadāyudham || 7.68.17 ||
tamuvācāśu śatrughnaḥ kva me jīvangamiṣyasi |śatruryadṛcchayā dṛṣṭo na moktavyaḥ kṛtātmanā || 7.68.18 ||
yo hi viklavayā buddhyā prasaraṃ śatrave dadau |sa hato mandabuddhitvādyathā kāpuruṣastathā || 7.68.19 ||
tasmātsudṛṣṭaṃ kuru jīvalokaṃ śaraiḥ śitaistvāṃ vividhairnayāmi |yamasya gehābhimukhaṃ hi pāpaṃ ripuṃ trilokasya ca rāghavasya || 7.68.20 ||
tacchrutvā bhāṣitaṃ tasya śatrughnasya mahātmanaḥ |krodhāmāhārayattīvraṃ tiṣṭha tiṣṭheti cābravīt || 7.69.1 ||
pāṇau pāṇiṃ viniṣpiṣya dantānkaṭakaṭāyya ca |lavaṇo raghuśārdūlamāhvayāmāsa cāsakṛt || 7.69.2 ||
taṃ bruvāṇaṃ tathā vākyaṃ lavaṇaṃ ghoradarśanam |śatrughno devaśatrughna idaṃ vacanamabravīt || 7.69.3 ||
na śatrughnastathā jāto yathā 'nye nirjitāstvayā |tadadya bāṇābhihato vraja tvaṃ yamasādanam || 7.69.4 ||
ṛṣayo 'pyadya pāpātmanmayā tvāṃ nihataṃ raṇe |paśyantu viprā vidvāṃsastridaśā iva rāvaṇam || 7.69.5 ||
tvayi madbāṇanirdagdhe patite 'dya niśācara |pure janapade cāpi kṣemameva bhaviṣyati || 7.69.6 ||
adya madbāhuniṣkrāntaḥ śaro vajranibhānanaḥ |pravekṣyate te hṛdayaṃ padmamaṃśurivārkajaḥ || 7.69.7 ||
evamukto mahāvṛkṣaṃ lavaṇaḥ krodhamūrcchitaḥ |śatrughnorasi cikṣepa sa ca taṃ śatadhācchinat || 7.69.8 ||
taddṛṣṭvā viphalaṃ karma rākṣasaḥ punareva tu |pādapānsubahūngṛhya śatrughnāyāsṛjadbalī || 7.69.9 ||
śatrughnaścāpi tejasvī vṛkṣānāpatato bahūn |tribhiścaturbhirekaikaṃ ciccheda nataparvabhiḥ || 7.69.10 ||
tato bāṇamayaṃ varṣaṃ vyasṛjadrākṣasorasi |śatrughno vīryasampanno vivyathe na sa rākṣasaḥ || 7.69.11 ||
tataḥ prahasya lavaṇo vṛkṣamudyamya vīryavān |śirasyabhyahanacchūraṃ srastāṅgaḥ sa mumoha vai || 7.69.12 ||
tasminnipatite vīre hāhākāro mahānabhūt |ṛṣīṇāṃ devasaṅghānāṃ gandharvāpsarasāṃ tathā || 7.69.13 ||
tamavajñāya tu hataṃ śatrughnaṃ bhuvi pātitam |rakṣo labdhāntaramapi na viveśa svamālayam || 7.69.14 ||
nāpi śūlaṃ prajagrāha taṃ dṛṣṭvā bhuvi pātitam |tato hata iti jñātvā tānbhakṣānsamudāvahat || 7.69.15 ||
muhūrtāllabdhasañjñastu punastasthau dhṛtāyudhaḥ |śatrughno vai puradvāri ṛṣibhiḥ samprapūjitaḥ || 7.69.16 ||
tato divyamamoghaṃ taṃ jagrāha śaramuttamam |jvalantaṃ tejasā ghoraṃ pūrayantaṃ diśo daśa || 7.69.17 ||
vajrānanaṃ vajravegaṃ merumandarasannibham |nataṃ parvasu sarveṣu saṃyugeṣvaparājitam || 7.69.18 ||
asṛkcandanadigdhāṅgaṃ cārupatraṃ patatriṇam |dānavendrācalendrāṇāmasurāṇāṃ ca dāraṇam || 7.69.19 ||
taṃ dīptamiva kālāgniṃ yugānte samupasthite |dṛṣṭvā sarvāṇi bhūtāni paritrāsamupāgaman || 7.69.20 ||
sadevāsuragandharvaṃ munibhiḥ sāpsarogaṇam |jagaddhi sarvamasvasthaṃ pitāmahamupasthitam || 7.69.21 ||
uvāca devadeveśaṃ varadaṃ prapitāmaham |devānāṃ bhayasaṃmoho lokānāṃ saṅkṣayaṃ prati || 7.69.22 ||
nedṛśaṃ dṛṣṭapūrvaṃ ca na śrutaṃ prapitāmaha |devānāṃ bhayasammoho lokānāṃ saṅkṣayaṃ prati || 7.69.23 ||
teṣāṃ tadvacanaṃ śrutvā brahmā lokapitāmahaḥ |bhayakāraṇamācaṣṭa lokānāmabhayaṅkaraḥ |uvāca madhurāṃ vāṇīṃ śṛṇudhvaṃ sarvadevatāḥ || 7.69.24 ||
vadhāya lavaṇasyājau śaraḥ śatrughnadhāritaḥ |tejasā tasya sammūḍhāḥ sarve smaḥ surasattamāḥ || 7.69.25 ||
eṣa pūrvasya devasya lokakartuḥ sanātanaḥ |śarastejomayo vatsā yena vai bhayamāgatam || 7.69.26 ||
eṣa vai kaiṭabhasyārthe madhunaśca mahāśaraḥ |sṛṣṭo mahātmanā tena vadhārthe daityayostayoḥ || 7.69.27 ||
eka eva prajānāti viṣṇustejomayaṃ śaram |eṣā eva tanuḥ pūrvā viṣṇostasya mahātmanaḥ || 7.69.28 ||
ito gacchata paśyadhvaṃ vadhyamānaṃ mahātmanā |rāmānujena vīreṇa lavaṇaṃ rākṣasottamam || 7.69.29 ||
tasya te devadevasya niśamya vacanaṃ surāḥ |ājagmuryatra yudhyete śatrughnalavaṇāvubhau || 7.69.30 ||
taṃ śaraṃ divyasaṅkāśaṃ śatrughnakaradhāritam |dadṛśuḥ sarvabhūtāni yugāntāgnimivotthitam || 7.69.31 ||
akāśamāvṛtaṃ dṛṣṭvā devairhi raghunandanaḥ |siṃhanādaṃ bhṛśaṃ kṛtvā dadarśa lakṣaṇaṃ punaḥ || 7.69.32 ||
āhūtaśca punastena śatrughnena mahātmanā |lavaṇaḥ krodhasaṃyukto yuddhāya samupasthitaḥ || 7.69.33 ||
ākarṇātsa vikṛṣyātha taddhanurdhanvināṃ varaḥ |taṃ mumoca mahābāṇaṃ lavaṇasya mahorasi || 7.69.34 ||
urastasya vidāryāśu praviveśa rasātalam || 7.69.35 ||
gatvā rasātalaṃ divyaḥ śaro vibudhapūjitaḥ |punarevāgamattūrṇamikṣvākukulanandanam || 7.69.36 ||
śatrughnaśaranirbhinno lavaṇaḥ sa niśācaraḥ |papāta sahasā bhūmau vajrāhata ivācalaḥ || 7.69.37 ||
tacca śūlaṃ mahattena hate lavaṇarākṣase |paśyatāṃ sarvadevānāṃ rudrasya vaśamanvagāt || 7.69.38 ||
ekeṣupātena bhṛśaṃ nipātya lokatrayasyāpi raghupravīraḥ |vinirbabhāvuttamacāpabāṇastamaḥ praṇudyeva sahasraraśmiḥ || 7.69.39 ||
tato hi devā ṛṣipannagāśca prapūjire hyapsarasaśca sarvāḥ |diṣṭyā jayo dāśaratheravāptastyaktvā bhayaṃ sarpa iva praśāntaḥ || 7.69.40 ||
hate tu lavaṇe devāḥ sendrāḥ sāgnipurogamāḥ |ūcuḥ sumadhurāṃ vāṇīṃ śatrughnaṃ śatrutāpanam || 7.70.1 ||
diṣṭyā te vijayo vatsa diṣṭyā lavaṇarākṣasaḥ |hataḥ puruṣaśārdūla varaṃ varaya suvrata || 7.70.2 ||
varadāstu mahābāho sarva eva samāgatāḥ |vijayākāṅkṣiṇastubhyamamoghaṃ darśanaṃ hi naḥ || 7.70.3 ||
devānāṃ bhāṣitaṃ śrutvā śūro mūrdhni kṛtāñjaliḥ |pratyuvāca mahābāhuḥ śatrughnaḥ prayatātmavān || 7.70.4 ||
iyaṃ madhupurī rasyā madhurā devanirmitā |niveśaṃ prāpnuyācchīghrameṣa me 'stu varaḥ paraḥ || 7.70.5 ||
taṃ devāḥ prītamanaso bāḍhamityeva rāghavam |bhaviṣyati purī ramyā śūrasenā na saṃśayaḥ || 7.70.6 ||
te tathoktvā mahātmāno divamāruruhustadā |śatrughno 'pi mahātejāstāṃ senāṃ samupānayat || 7.70.7 ||
sā senā śīghramāgacchacchrutvā śatrughnaśāsanam |niveśanaṃ ca śatrughnaḥ śrāvaṇena samārabhat || 7.70.8 ||
sā purā divyasaṅkāśā varṣe dvādaśame śubhe |niviṣṭā śūrasenānāṃ viṣayaścākutobhayaḥ || 7.70.9 ||
kṣetrāṇi sasyayuktāni kāle varṣati vāsavaḥ |arogavīrapuruṣā śatrughnabhujapālitā || 7.70.10 ||
ardhacandrapratīkāśā yamunātīraśobhitā |śobhitā gṛhamukhyaiśca catvarāpaṇavīthikaiḥ |cāturvarṇyasamāyuktā nānāvāṇijyaśobhitā || 7.70.11 ||
yacca tena purā śubhraṃ lavaṇena kṛtaṃ mahat |tacchobhayati śatrughno nānāvarṇopaśobhitām || 7.70.12 ||
ārāmaiśca vihāraiśca śobhamānaṃ samantataḥ |śobhitāṃ śobhanīyaiśca tathā 'nyairdaivamānuṣaiḥ || 7.70.13 ||
tāṃ purīṃ divyasaṅkāśāṃ nānāpaṇyopaśobhitām |nānādeśāgataiścāpi vaṇigbhirupaśobhitām || 7.70.14 ||
tāṃ samṛddhāṃ samṛddhārthaḥ śatrughno bharatānujaḥ |nirīkṣya paramaprītaḥ paraṃ harṣamupāgamat || 7.70.15 ||
tasya buddhiḥ samutpannā niveśya madhurāṃ purīm |rāmapādau nirīkṣe 'haṃ varṣe dvādaśa āgate || 7.70.16 ||
tataḥ sa tāmamarapuropamāṃ purīṃ niveśya vai vividhajanābhisaṃvṛtām |narādhipo raghupatipādadarśane dadhe matiṃ raghukulavaṃśavardhanaḥ || 7.70.17 ||
tato dvādaśame varṣe śatraghno rāmapālitām |ayodhyāṃ cakame gantumalpabhṛtyabalānugaḥ || 7.71.1 ||
tato mantripurogāṃśca balamukhyānnivartya ca |jagāma hayamukhyaiśca rathānāṃ ca śatena saḥ || 7.71.2 ||
sa gatvā gaṇitānvāsānsaptāṣṭau raghunandanaḥ |vālmīkyāśramamāgatya vāsaṃ cakre mahāyaśāḥ || 7.71.3 ||
so 'bhivādya tataḥ pādau vālmīkeḥ puruṣarṣabhaḥ |pādyamardhyaṃ tathātithyaṃ jagrāha munihastataḥ || 7.71.4 ||
bahurūpāḥ sumadhurāḥ kathāstatra sahasraśaḥ |kathayāmāsa sa muniḥ śatrughnāya mahātmane || 7.71.5 ||
uvāca ca munirvākyaṃ lavaṇasya vadhāśritam |suduṣkaraṃ kṛtaṃ karma lavaṇaṃ nighnatā tvayā || 7.71.6 ||
bahavaḥ pārthivāḥ saumya hatāḥ sabalavāhanāḥ |lavaṇena mahābāho yudhyamānā mahābalāḥ || 7.71.7 ||
sa tvayā nihataḥ pāpo līlayā puruṣarṣabha |jagataśca bhayaṃ tatra praśāntaṃ tava tejasā || 7.71.8 ||
rāvaṇasya vadho ghoro yatnena mahatā kṛtaḥ |idaṃ tu sumahatkarma tvayā kṛtamayatnataḥ || 7.71.9 ||
prītiścāsminparā jātā devānāṃ lavaṇe hate |bhūtānāṃ caiva sarveṣāṃ jagataśca priyaṃ kṛtam || 7.71.10 ||
tacca yuddhaṃ mayā dṛṣṭaṃ yathāvatpuruṣarṣabha |sabhāyāṃ vāsavasyātha upaviṣṭena rāghava || 7.71.11 ||
mamāpi paramā prītirhṛdi śatrughna vartate |upāghrāsyāmi te mūrdhni snehasyaiṣā parā gatiḥ || 7.71.12 ||
ityuktvā mūrdhni śatrughnamupāghrāya mahāmuniḥ |ātithyamakarottasya ye ca tasya padānugāḥ || 7.71.13 ||
sa bhuktavānnaraśreṣṭho gītamādhuryamuttamam |śuśrāva rāmacaritaṃ tasminkāle yathākṛmam || 7.71.14 ||
tantrīlayasamāyuktaṃ tristhānakaraṇānvitam |saṃskṛtaṃ lakṣaṇopetaṃ samatālasamanvitam |śuśrāva rāmacaritaṃ tasminkāle purā kṛtam || 7.71.15 ||
tānyakṣarāṇi satyāni yathāvṛttāni pūrvaśaḥ |śrutvā puruṣaśārdūlo visañjño bāṣpalocanaḥ || 7.71.16 ||
sa muhūrtamivāsañjño viniḥśvasya muhurmuhuḥ |tasmin gīte yathāvṛttaṃ vartamānamivāśṛṇot || 7.71.17 ||
padānugāśca ye rājñastāṃ śrutvā gītisampadam |avāṅmukhāśca dīnāśca hyāścaryamiti cābruvan || 7.71.18 ||
parasparaṃ ca ye tatra sainikāḥ sambabhāṣire |kimidaṃ kva ca vartāmaḥ kimetatsvapnadarśanam || 7.71.19 ||
artho yo naḥ purā dṛṣṭastamāśramapade punaḥ |śṛṇumaḥ kimidaṃ svapno gītabandhaṃ śriyo bhavet || 7.71.20 ||
vismayaṃ te paraṃ gatvā śatrughnamidamabruvan |sādhu pṛccha naraśreṣṭha vālmīkiṃ munipuṅgavam || 7.71.21 ||
śatrughnastvabravītsarvānkautūhalasamanvitān |sainikā na kṣamo 'smākaṃ paripraṣṭumihedṛśaḥ || 7.71.22 ||
āścaryāṇi bahūnīha bhavantyasyāśrame muneḥ |na tu kautūhalādyuktamanveṣṭuṃ taṃ mahāmunim || 7.71.23 ||
evaṃ tadvākyamuktvā ca sainikānraghunandanaḥ |abhivādya maharṣiṃ taṃ svaṃ niveśaṃ yayau tadā || 7.71.24 ||
taṃ śayānaṃ naravyāghraṃ nidrā nābhyāgamattadā |cintayantamanekārthaṃ rāmagītamanuttamam || 7.72.1 ||
tasya śabdaṃ sumadhuraṃ tantrīlayasamanvitam |śrutvā rātrirjagāmāśu śatrughnasya mahātmanaḥ || 7.72.2 ||
tasyāṃ niśāyāṃ vyuṣṭāyāṃ kṛtvā paurvāhṇikaṃ kramam |uvāca prāñjalirvākyaṃ śatrughno munipuṅgavam || 7.72.3 ||
bhagavandraṣṭumicchāmi rāghavaṃ raghunandanam |tvayā 'nujñātumicchāmi sahaibhiḥ saṃśitavrataiḥ || 7.72.4 ||
ityevaṃvādinaṃ taṃ tu śatrughnaṃ śatrutāpanam |vālmīkiḥ sampariṣvajya visasarja ca rāghavam || 7.72.5 ||
so 'bhivādya muniśreṣṭhaṃ rathamāruhya suprabham |ayodhyāmagamattūrṇaṃ rāghavotsukadarśanaḥ || 7.72.6 ||
sa praviṣṭaḥ purīṃ ramyāṃ śrīmānikṣvākunandanaḥ |praviveśa mahābāhuryatra rāmo mahādyutiḥ || 7.72.7 ||
sa rāmaṃ mantrimadhyasthaṃ pūrṇacandranibhānanam |paśyannamaramadhyasthaṃ sahasranayanaṃ yathā || 7.72.8 ||
so 'bhivādya mahātmānaṃ jvalantamiva tejasā |uvāca prāñjalirvākyaṃ rāmaṃ satyaparākramam || 7.72.9 ||
yadājñaptaṃ mahārāja sarvaṃ tatkṛtavānaham |hataḥ sa lavaṇaḥ pāpaḥ purī cāsya niveśitā || 7.72.10 ||
dvādaśaite gatā varṣāstvāṃ vinā raghunandana |notsaheyamahaṃ vastuṃ tvayā virahito nṛpa || 7.72.11 ||
sa me prasādaṃ kākutstha kuruṣvāmitavikrama |mātṛhīno yathā vatso na ciraṃ pravasāmyaham || 7.72.12 ||
evaṃ bruvāṇaṃ śatrughnaṃ pariṣvajyedamabravīt |mā viṣādaṃ kṛthāḥ śūra naitatkṣatriyaceṣṭitam || 7.72.13 ||
nāvasīdanti rājāno vipravāseṣu rāghava |prajā naḥ paripālyā hi kṣatradharmeṇa rāghava || 7.72.14 ||
kāle kāle tu māṃ vīra ayodhyāmavalokitum |āgaccha tvaṃ naraśreṣṭha gantāsi ca puraṃ tava || 7.72.15 ||
mamāpi tvaṃ sudayitaḥ prāṇairapi na saṃśayaḥ |avaśyaṃ karaṇīyaṃ ca rājyasya paripālanam || 7.72.16 ||
tasmāttvaṃ vasa kākutstha saptarātramihāvasa |ūrdhvaṃ gantāsi madhurāṃ sabhṛtyabalavāhanaḥ || 7.72.17 ||
rāmasyaitadvacaḥ śrutvā dharmayuktaṃ manogatam |śatrughno dīnayā vācā bāḍhamityeva cābravīt || 7.72.18 ||
saptarātraṃ ca kākutstho rāghavasya yathājñayā |uṣya tatra maheṣvāso gamanāyopacakrame || 7.72.19 ||
āmantrya tu mahātmānaṃ rāmaṃ satyaparākramam |bharataṃ lakṣmaṇaṃ caiva mahārathamupāruhat || 7.72.20 ||
dūramābhyāmanugato lakṣmaṇena mahātmanā |bharatena ca śatrughno jagāmāśu puraṃ tataḥ || 7.72.21 ||
prasthāpya tu sa śatrughnaṃ bhrātṛbhyāṃ saha rāghavaḥ |pramumoda sukhī rājyaṃ dharmeṇa paripālayan || 7.73.1 ||
tataḥ katipayāhaḥsu vṛddho jānapado dvijaḥ |mṛtaṃ bālamupādāya rājadvāramupāgamat || 7.73.2 ||
rudanbahuvidhā vācaḥ snehaduḥkhasamanvitāḥ |asakṛtputra putreti vākyametaduvāca ha || 7.73.3 ||
kiṃ nu me duṣkṛtaṃ karma purā dehāntare kṛtam |yadahaṃ putramekaṃ tvāṃ paśyāmi nidhanaṃ gatam || 7.73.4 ||
aprāptayauvanaṃ bālaṃ pañcavarṣasahasrakam |akāle kālamāpannaṃ mama duḥkhāya putraka || 7.73.5 ||
alpairahobhirnidhanaṃ gamiṣyāmi na saṃśayaḥ |ahaṃ ca jananī caiva tava śokena putraka || 7.73.6 ||
na smarāmyanṛtaṃ hyuktaṃ na ca hiṃsāṃ smarāmyaham |sarveṣāṃ prāṇināṃ pāpaṃ kṛtaṃ naiva smarāmyaham || 7.73.7 ||
kenādya duṣkṛtenāyaṃ bāla eva mamātmajaḥ |akṛtvā pitṛkāryāṇi gato vaivasvatakṣayam || 7.73.8 ||
nedṛśaṃ dṛṣṭapūrvaṃ me śrutaṃ vā ghoradarśanam |mṛtyuraprāptakālānāṃ rāmasya viṣaye yathā || 7.73.9 ||
rāmasya duṣkṛtaṃ kiñcinmahadasti na saṃśayaḥ |yathā hi viṣayasthānāṃ bālānāṃ mṛtyurāgataḥ || 7.73.10 ||
nahyanyaviṣayasthānāṃ bālānāṃ mṛtyuto bhayam |tvaṃ rājañjīvayasvainaṃ bālaṃ mṛtyuvaśaṃ gatam || 7.73.11 ||
rājadvāri mariṣyāmi patnyā sārdhamanāthavat |brahmahatyāṃ tato rāma samupetya sukhī bhava || 7.73.12 ||
bhrātṛbhiḥ sahito rājandīrghamāyuravāpsyasi |uṣitāḥ sma sukhaṃ rājye tavāsminsumahābala || 7.73.13 ||
idaṃ tu patitaṃ tasmāttava rāma vaśe sthitāḥ |kālasya vaśamāpannāḥ svalpaṃ hi nahi naḥ sukham || 7.73.14 ||
sampratyanātho viṣaya ikṣvākūṇāṃ mahātmanām |rāmaṃ nāthamihāsādya bālāntakaraṇaṃ dhruvam || 7.73.15 ||
rājadoṣairvipadyante prajā hyavidhipālitāḥ |asadvṛtte tu nṛpatāvakāle mriyate janaḥ || 7.73.16 ||
yadvā pureṣvayuktāni janā janapadeṣu ca |kurvate na ca rakṣā 'sti tadā kālakṛtaṃ bhayam || 7.73.17 ||
suvyaktaṃ rājadoṣo hi bhaviṣyati na saṃśayaḥ |pure janapade cāpi tato bālavadho hyayam || 7.73.18 ||
evaṃ bahuvidhairvākyairuparudhya muhurmuhuḥ |rājānaṃ duḥkhasantaptaḥ sutaṃ tamupagūhate || 7.73.19 ||
tathā tu karuṇaṃ tasya dvijasya paridevanam |śuśrāva rāghavaḥ sarvaṃ duḥkhaśokasamanvitam || 7.74.1 ||
sa duḥkhena ca santapto mantriṇastānupāhvayat |vasiṣṭhaṃ vāmadevaṃ ca bhrātarau saha naigamān || 7.74.2 ||
tato dvijā vasiṣṭhena sārdhamaṣṭau praveśitāḥ |rājānaṃ devasaṅkāśaṃ vardhasveti tato 'bruvan || 7.74.3 ||
mārkaṇḍeyo 'tha maudgalyo vāmadevaśca kāśyapaḥ |kātyāyano 'tha jābālirgautamo nāradastathā |ete dvijarṣabhāḥ sarve āsaneṣūpaveśitāḥ || 7.74.4 ||
maharṣīnsamanuprāptānabhivādya kṛtāñjaliḥ |mantriṇo naigamāṃścaiva yathārhamanukūlataḥ || 7.74.5 ||
teṣāṃ samupaviṣṭānāṃ sarveṣāṃ dīptatejasām |rāghavaḥ sarvamācaṣṭe dvijo 'yamuparodhate || 7.74.6 ||
tasya tadvacanaṃ śrutvā rājño dīnasya nāradaḥ |pratyuvāca śubhaṃ vākyamṛṣīṇāṃ sannidhau nṛpam || 7.74.7 ||
śṛṇu rājanyathākāle prāpto bālasya saṅkṣayaḥ |śrutvā kartavyatāṃ rājankuruṣvaraghunandana || 7.74.8 ||
purā kṛtayuge rājanbrāhmaṇā vai tapasvinaḥ |abrāhmaṇastadā rājanna tapasvī kathañcana || 7.74.9 ||
tasminyuge prajvalite brahmabhūte tvanāvṛte |amṛtyavastadā sarve jajñire dīrghadarśinaḥ || 7.74.10 ||
tatastretāyugaṃ nāma mānavānāṃ vapuṣmatām |kṣatriyāstatra jāyante pūrṇena tapasā 'nvitāḥ || 7.74.11 ||
vīryeṇa tapasā caiva te 'dhikāḥ pūrvajanmani |mānavā ye mahātmānastvatra tretāyuge yuge || 7.74.12 ||
brahmakṣatraṃ ca tatsarvaṃ yatpūrvamaparaṃ ca yat |yugayorubhayorāsītsamavīryasamanvitam || 7.74.13 ||
apaśyaṃstu na te sarve viśeṣamadhikaṃ tataḥ |sthāpanaṃ cakrire tatra cāturvarṇyasya sammatam || 7.74.14 ||
tasminyuge prajvalite dharmabhūte hyanāvṛte |adharmaḥ pādamekaṃ tu pātayatpṛthivītale || 7.74.15 ||
adharmeṇa hi saṃyuktastejo mandaṃ bhaviṣyati || 7.74.16 ||
āmiṣaṃ yacca pūrveṣāṃ rājasaṃ ca malaṃ bhṛśam |anṛtaṃ nāma tadbhūtaṃ pādena pṛthivītale || 7.74.17 ||
anṛtaṃ pātayitvā tu pādamekamadharmataḥ |tataḥ prāduṣkṛtaṃ pūrvamāyuṣaḥ pariniṣṭhitam || 7.74.18 ||
patite tvanṛte tasminnadharme ca mahītale |śubhānyevācara~llokaḥ satyadharmaparāyaṇaḥ || 7.74.19 ||
tretāyuge ca vartante brāhmaṇāḥ kṣatriyāśca ye |tapo 'tapyanta te sarve śuśrūṣāmapare janāḥ || 7.74.20 ||
sa dharmaḥ paramasteṣāṃ vaiśyaśūdraṃ samāgamat |pūjāṃ ca sarvavarṇānāṃ śūdrāścakrurviśeṣataḥ || 7.74.21 ||
etasminnantare teṣāmadharme cānṛte ca ha |tataḥ pūrve bhṛśaṃ hrāsamagamannṛpasattama || 7.74.22 ||
tataḥ pādamadharmassa dvitīyamavatārayat |tato dvāparasañjñā 'sya yugasya samajāyata || 7.74.23 ||
tasmindvāparasañjñe tu vartamāne yugakṣaye |adharmaścānṛtaṃ caiva vavṛdhe puruṣarṣabha || 7.74.24 ||
tasmindvāparasaṅkhyāte tapo vaiśyānsamāviśat |tribhyo yugebhyastrīnvarṇānkramādvai tapa āviśat || 7.74.25 ||
tribhyo yugebhyastrīnvarṇāndharmaśca pariniṣṭhitaḥ |na śuddho labhate dharmaṃ yugatastu nararṣabha |hīnavarṇo nṛpaśreṣṭha tapyate sumahattapaḥ || 7.74.26 ||
bhaviṣyacchūdrayonyāṃ vai tapaścaryā kalau yuge |adharmaḥ paramo rājandvāpare śūdrajanmanaḥ || 7.74.27 ||
sa vai viṣayaparyante tava rājanmahātapāḥ |adya tapyati durbuddhistena bālavadho hyayam || 7.74.28 ||
yo hyadharmamakāryaṃ vā viṣaye pārthivasya tu |karoti cāśrīmūlaṃ tatpure vā durmatirnaraḥ |kṣipraṃ ca narakaṃ yāti sa ca rājā na saṃśayaḥ || 7.74.29 ||
adhītasya ca taptasya karmaṇaḥ sukṛtasya ca |ṣaṣṭhaṃ bhajati bhāgaṃ tu prajā dharmeṇa pālayan || 7.74.30 ||
ṣaṅbhāgasya na bhoktā 'sau rakṣate na prajāḥ katham || 7.74.31 ||
sa tvaṃ puruṣaśārdūla mārgasva viṣayaṃ svakam |duṣkṛtaṃ yatra paśyethāstatra yatnaṃ samācara || 7.74.32 ||
evaṃ ceddharmavṛddhiśca nṛṇāṃ cāyurvivardhanam |bhaviṣyati naraśreṣṭha bālasyāsya ca jīvitam || 7.74.33 ||
nāradasya tu tadvākyaṃ śrutvā 'mṛtamayaṃ tadā |praharṣamatulaṃ lebhe lakṣmaṇaṃ cedamabravīt || 7.75.1 ||
gaccha saumya dvijaśreṣṭhaṃ samāśvāsaya suvratam |bālasya tu śarīraṃ tattailadroṇyāṃ nidhāpaya || 7.75.2 ||
gandhaiśca paramodāraistailaiścāpi sugandhibhiḥ |yathā na kṣīyate bālastathā saumya vidhīyatām || 7.75.3 ||
yathā śarīro bālasya guptaḥ san śiṣṭakarmaṇaḥ |vipattiḥ paribhedo vā na bhavecca tathā kuru || 7.75.4 ||
evamādiśya kākutstho lakṣmaṇaṃ śubhalakṣaṇam |manasā puṣpakaṃ dadhyāvāgaccheti mahāyaśāḥ || 7.75.5 ||
iṅgitaṃ sa tu vijñāya puṣpako hemabhūṣitaḥ |ājagāma muhūrtena samīpe rāghavasya vai || 7.75.6 ||
so 'bravītpraṇato bhūtvā ayamasmi narādhipa |vaśyastava mahābāho kiṅkaraḥ samupasthitaḥ || 7.75.7 ||
bhāṣitaṃ ruciraṃ śrutvā puṣpakasya narādhipaḥ |abhivādya maharṣīṃstān vimānaṃ so 'dhyarohata || 7.75.8 ||
dhanurgṛhītvā tūṇī ca khaḍgaṃ ca ruciraprabham |nikṣipya nagare vīrau saumitribharatāvubhau || 7.75.9 ||
prāyātpratīcīṃ haritaṃ vicinvaṃśca tatastataḥ |uttarāmagamacchrīmāndiśaṃ himavatā vṛtām || 7.75.10 ||
apaśyamānastatrāpi svalpamapyatha duṣkṛtam |pūrvāmapi diśaṃ sarvāmatho 'paśyannarādhipaḥ || 7.75.11 ||
praviśuddhasamācārāmādarśatalanirmalām |puṣpakastho mahābāhustadāpaśyannarādhipaḥ || 7.75.12 ||
dakṣiṇāṃ diśamākrāmattato rājarṣinandanaḥ |śaivalasyottare pārśve dadarśa sumahatsaraḥ || 7.75.13 ||
tasminsarasi tapyantaṃ tāpasaṃ sumahattapaḥ |dadarśa rāghavaḥ śrīmā~llambamānamadhomukham || 7.75.14 ||
rāghavastamupāgamya tapyantaṃ tapa uttamam |uvāca sa tadā vākyaṃ dhanyastvamasi suvrata || 7.75.15 ||
kasyāṃ yonyāṃ tapovṛddha vartase dṛḍhavikrama |kautūhalāttvāṃ pṛcchāmi rāmo dāśarathirhyaham || 7.75.16 ||
ko 'rtho manīṣitastubhyaṃ svargalābhaḥ paro 'thavā |varāśrayo yadarthaṃ tvaṃ tapasyasi suduṣkaram |yamāśritya tapastaptaṃ śrotumicchāmi tāpasa || 7.75.17 ||
brāhmaṇo vā 'si bhadraṃ te kṣatriyo vā 'si durjayaḥ |vaiśyastṛtīyavarṇo vā śūdro vā satyavāgbhava || 7.75.18 ||
ityevamuktaḥ sa narādhipena hyavākchirā dāśarathāya tasmai |uvāca jātiṃ nṛpapuṅgavāya yatkāraṇe caiva tapaḥprayatnaḥ || 7.75.19 ||
tasya tadvacanaṃ śrutvā rāmasyākliṣṭakarmaṇaḥ |avākchirāstathābhūtvā vākyametaduvāca ha || 7.76.1 ||
śūdrayonyāṃ prasūto 'smi śambūko nāma nāmataḥ |devatvaṃ pārthaye rāma saśarīro mahāyaśaḥ || 7.76.2 ||
na mithyā 'haṃ vade rāma devalokajigīṣayā |śūdraṃ māṃ viddhi kākutstha tapa ugraṃ samāsthitam || 7.76.3 ||
bhāṣatastasya śūdrasya khaḍgaṃ suruciraprabham |niṣkṛṣya kośādvimalaṃ śiraściccheda rāghavaḥ || 7.76.4 ||
tasmiñchūdre hate devāḥ sendrāḥ sāgnipurogamāḥ |sādhu sādhviti kākutsthaṃ praśaśaṃsurmuhurmuhuḥ || 7.76.5 ||
puṣpavṛṣṭirmahatyāsīddivyānāṃ susugandhinām |puṣpāṇāṃ vāyumuktānāṃ sarvataḥ prapapāta ha || 7.76.6 ||
suprītāścābruvanrāmaṃ devāḥ satyaparākramam |surakāryamidaṃ saumya sukṛtaṃ te mahāmate || 7.76.7 ||
gṛhāṇa ca varaṃ saumya yattvamicchasyarindama |svargabhāṅnahi śūdro 'yaṃ tvatkṛte raghunandana || 7.76.8 ||
devānāṃ bhāṣitaṃ śrutvā rāghavaḥ susamāhitaḥ |uvāca prāñjalirvākyaṃ sahasrākṣaṃ purandaram || 7.76.9 ||
yadi devāḥ prasannā me dvijaputraḥ sa jīvatu |diśantu varametaṃ me ipsitaṃ paramaṃ mama || 7.76.10 ||
mamāpacārādyāto 'sau brāhmaṇasyaikaputrakaḥ |aprāptakālaḥ kālena nīto vaivasvatakṣayam || 7.76.11 ||
taṃ jīvayatha bhadraṃ vo nānṛtaṃ kartumarhatha |dvijasya saṃśruto 'rtho me jīvayiṣyāmi te sutam || 7.76.12 ||
rāghavasya tu tadvākyaṃ śrutvā vibudhasattamāḥ |pratyucū rāghavaṃ prītā devāḥ prītisamanvitam || 7.76.13 ||
nirvṛto bhava kākutstha so 'sminnahani bālakaḥ |jīvitaṃ prāptavānbhūyaḥ sametaścāpi bandhubhiḥ || 7.76.14 ||
yasminmuhūrte kākutstha śūdro 'yaṃ vinipātitaḥ |tasminmuhūrte bālo 'sau jīvena samayujyata || 7.76.15 ||
svasti prāpnuhi bhadraṃ te sādhu yāma nararṣabha |agastyasyāśramapadaṃ draṣṭumicchāma rāghava || 7.76.16 ||
tasya dīkṣā samāptā hi brahmarṣeḥ sumahādyuteḥ |dvādaśaṃ hi gataṃ varṣaṃ jalaśayyāṃ samāsataḥ || 7.76.17 ||
kākutstha tadgamiṣyāmo muniṃ samabhinanditum |tvaṃ cāpyāgaccha bhadraṃ te draṣṭuṃ tamṛṣisattamam || 7.76.18 ||
sa tatheti pratijñāya devānāṃ raghunandanaḥ |āruroha vimānaṃ taṃ puṣpakaṃ hemabhūṣitam || 7.76.19 ||
tato devāḥ prayātāste vimānairbahuvistaraiḥ |rāmo 'pyanujagāmāśu kumbhayonestapovanam || 7.76.20 ||
dṛṣṭvā tu devānsamprāptānagastyastapasāṃ nidhiḥ |arcayāmāsa dharmātmā sarvāṃstānaviśeṣataḥ || 7.76.21 ||
pratigṛhya tataḥ pūjāṃ sampūjya ca mahāmunim |jagmuste tridaśā hṛṣṭā nākapṛṣṭhaṃ sahānugaiḥ || 7.76.22 ||
gateṣu teṣu kākutsthaḥ puṣpakādavaruhya ca |tato 'bhivādayāmāsa hyagastyamṛṣisattamam || 7.76.23 ||
so 'bhivādya mahātmānaṃ jvalantamiva tejasā |ātithyaṃ paramaṃ prāpya niṣasāda narādhipaḥ || 7.76.24 ||
tamuvāca mahātejāḥ kumbhayonirmahātapāḥ |svāgataṃ te naraśreṣṭha diṣṭyā prāpto 'si rāghava || 7.76.25 ||
tvaṃ me bahumato rāma guṇairbahubhiruttamaiḥ |atithiḥ pūjanīyaśca mama nityaṃ hṛdi sthitaḥ || 7.76.26 ||
surā hi kathayanti tvāmāgataṃ śūdraghātinam |brāhmaṇasya tu dharmeṇa tvayā jīvāpitaḥ sutaḥ || 7.76.27 ||
uṣyatāṃ ceha rajanī sakāśe mama rāghava |prabhāte puṣpakeṇa tvaṃ gantā 'si purameva hi || 7.76.28 ||
tvaṃ hi nārāyaṇaḥ śrīmāṃstvayi sarvaṃ pratiṣṭhitam |tvaṃ prabhuḥ sarvadevānāṃ puruṣastvaṃ sanātanaḥ || 7.76.29 ||
idaṃ cābharaṇaṃ saumya nirmitaṃ viśvakarmaṇā |divyaṃ divyena vapuṣā dīpyamānaṃ svatejasā |pratigṛhṇīṣva kākutstha matpriyaṃ kuru rāghava || 7.76.30 ||
dattasya hi punardāne sumahatphalamucyate |bharaṇe hi bhavān śaktaḥ sendrāṇāṃ marutāmapi || 7.76.31 ||
tvaṃ hi śaktastārayituṃ sendrānapi divaukasaḥ |tasmātpradāsye vidhivattatpratīccha narādhipa || 7.76.32 ||
divyamābharaṇaṃ citraṃ pradīptamiva bhāskaram || 7.76.33 ||
athovāca mahātmānamikṣvākūṇāṃ mahārathaḥ |rāmo matimatāṃ śreṣṭhaḥ kṣatradharmamanusmaran || 7.76.34 ||
pratigraho 'yaṃ bhagavanbrāhmaṇasyāvigarhitaḥ |gṛhṇīyāṃ kṣatriyo 'haṃ vai kathaṃ brāhmaṇapuṅgava || 7.76.35 ||
brāhmaṇena viśeṣeṇa dattaṃ tadvaktumarhasi |evamuktastu rāmeṇa pratyuvāca mahānṛṣiḥ || 7.76.36 ||
āsankṛtayuge rāma brahmabhūte purāyuge |apārthivāḥ prajāḥ sarvāḥ surāṇāṃ tu śatakratuḥ || 7.76.37 ||
tāḥ prajā devadeveśaṃ rājārthaṃ samupādravan |surāṇāṃ sthāpito rājā tvayā deva śatakratuḥ || 7.76.38 ||
prayaccha no hi lokeśa pārthivaṃ narapuṅgavam |yasmai pūjāṃ prayuñjānā dhūtapāpāścaremahi |na vasāmo vinā rājñā eṣa no niścayaḥ paraḥ || 7.76.39 ||
prajānāṃ vacanaṃ śrutvā niścayitvā 'rthamuttamam || 7.76.40 ||
tato brahmā suraśreṣṭho lokapālānsavāsavān |samāhūyābravītsarvāṃstejobhāgānprayacchata || 7.76.41 ||
tato dadurlokapālāḥ sarve bhāgānsvatejasaḥ |akṣupacca tato brahmā yato jātaḥ kṣupo nṛpaḥ || 7.76.42 ||
taṃ brahmā lokapālānāṃ sahāṃśaiḥ samayojayat |tato dadau nṛpaṃ tāsāṃ prajānāmīśvaraṃ kṣupam || 7.76.43 ||
tatraindreṇa ca bhāgena mahīmājñāpayannṛpaḥ |vāruṇena tu bhāgena vapuḥ puṣyati pārthivaḥ || 7.76.44 ||
kaubereṇa tu bhāgena vittamāsāṃ dadau tadā |yastu yāmyo 'bhavadbhāgastena śāsti sma sa prajāḥ || 7.76.45 ||
tatraindreṇa naraśreṣṭha bhāgena raghunandana |pratigṛhṇīṣva bhadraṃ te tāraṇārthaṃ mama prabho || 7.76.46 ||
tasya tadvacanaṃ śrutvā ṛṣeḥ paramadhārmikam |tadrāmaḥ pratijagrāha munerābharaṇaṃ varam || 7.76.47 ||
pratigṛhya tato rāmastadābharaṇamuttamam |āgamaṃ tasya dīptasya praṣṭumevopacakrame || 7.76.48 ||
atyadbhutamidaṃ divyaṃ vapuṣā yuktamuttamam |kathaṃ vā bhagavatā prāptaṃ kuto vā kena vā hṛtam || 7.76.49 ||
kutūhalitayā brahmanpṛcchāmi tvāṃ mahāyaśaḥ |āścaryāṇāṃ bahūnāṃ hi nidhiḥ paramako bhavān || 7.76.50 ||
evaṃ bruvati kākutsthe munirvākyamathābravīt |śṛṇu rāma yathāvṛttaṃ purā tretāyuge yuge || 7.76.51 ||
ramaṇīyapradeśe 'smin vane yaddṛṣṭavānaham |āścaryaṃ me mahābāho dānamāśritya kevalam || 7.76.52 ||
purā tretāyuge rāma babhūva bahuvistaram |samantādyojanaśataṃ vimṛgaṃ pakṣivarjitam || 7.77.1 ||
tasminnirmānuṣe 'raṇye kurvāṇastapa uttamam |ahamākramituṃ saumya tadaraṇyamupāgamam || 7.77.2 ||
tasya rūpamaraṇyasya nirdeṣṭuṃ na śaśāka ha |phalamūlaiḥ sukhāsvādairbahurūpaiśca pādapaiḥ || 7.77.3 ||
tasyāraṇyasya madhye tu saro yojanamāyatam |haṃsakāraṇḍavākīrṇaṃ cakravākopaśobhitam || 7.77.4 ||
padmotpalasamākīrṇaṃ samatikrāntaśaivalam |tadāścaryamivātyarthaṃ sukhāsvādamanuttamam || 7.77.5 ||
arajaskaṃ tathā 'kṣobhyaṃ śrīmatpakṣigaṇāyutam |samīpe tasya saraso mahadadbhutamāśramam || 7.77.6 ||
purāṇaṃ puṇyamatyarthaṃ tapasvijanavarjitam |tatrāhamavasaṃ rātriṃ naidāghīṃ puruṣarṣabha || 7.77.7 ||
prabhāte kālyamutthāya sarastadupacakrame |athāpaśyaṃ śavaṃ tatra supuṣṭamajaraṃ kvacit || 7.77.8 ||
paṅkibhedena puṣṭāṅgaṃ samāśritasarovaram |tiṣṭhantaṃ parayā lakṣmyā tasmiṃstoyāśaye nṛpa || 7.77.9 ||
tamarthaṃ cintayāno 'haṃ muhūrtaṃ tatra rāghava |uṣito 'smi sarastīre kinnvidaṃ syāditi prabho || 7.77.10 ||
athāpaśyaṃ muhūrtena divyamadbhutadarśanam |vimānaṃ paramodāraṃ haṃsayuktaṃ manojavam || 7.77.11 ||
atyarthaṃ svargiṇaṃ ta vimāne raghunandana |upāste 'psarasāṃ vīra sahasraṃ divyabhūṣaṇam || 7.77.12 ||
gāyanti divyageyāni vādayanti tathā 'parāḥ |kṣvelayanti tathā cānyā nṛtyanti ca tathā 'parāḥ || 7.77.13 ||
aparāścandraraśmyābhairhemadaṇḍaiśca cāmaraiḥ |dodhūyurvadanaṃ tasya puṇḍarīkanibhekṣaṇam || 7.77.14 ||
tataḥ siṃhāsanaṃ tyaktvā merukūṭamivāṃśumān |paśyato me tadā rāma vimānādavaruhya ca |taṃ śavaṃ bhakṣayāmāsa sa svargī raghunandana || 7.77.15 ||
tathā bhuktvā yathākāmaṃ māṃsaṃ bahu supīvaram |avatīrya saraḥ svargī saṃspraṣṭumupacakrame || 7.77.16 ||
upaspṛśya yathānyāyaṃ sa svargī raghupuṅgava |āroḍhumupacakrāma vimānavaramuttamam || 7.77.17 ||
tamahaṃ devasaṅkāśamārohantamudīkṣya vai |athāhamabruvaṃ vākyaṃ svargiṇaṃ puruṣarṣabha || 7.77.18 ||
ko bhavāndevasaṅkāśa āhāraśca vigarhitaḥ |tvayedaṃ bhujyate saumya kimarthaṃ vaktumarhasi || 7.77.19 ||
kasya syādīdṛśo bhāva āhāro devasammataḥ |āścaryaṃ vartate saumya śrotumicchāmi tattvataḥ || 7.77.20 ||
nāhamaupayikaṃ manye tava bhakṣyamidaṃ śavam || 7.77.21 ||
ityevamuktaḥ sa narendra nākī kautūhalātsūnṛtayā girā ca |śrutvā ca vākyaṃ mama sarvametatsarvaṃ tathā cākathayanmameti || 7.77.22 ||
śrutvā tu bhāṣitaṃ vākyaṃ mama rāma śubhākṣaram |prāñjaliḥ pratyuvācedaṃ sa svargī raghunandana || 7.78.1 ||
śṛṇu brahmanpurā vṛttaṃ mamaitatsukhaduḥkhayoḥ |anatikramaṇīyaṃ hi yathā pṛcchasi māṃ dvija || 7.78.2 ||
purā vaidarbhako rājā pitā mama mahāyaśāḥ |sudeva iti vikhyātastriṣu lokeṣu vīryavān || 7.78.3 ||
tasya putradvayaṃ brahmandvābhyāṃ strībhyāmajāyata |ahaṃ śveta iti khyāto yavīyānsuratho 'bhavat || 7.78.4 ||
tataḥ pitari svaryāte paurā māmabhyaṣecayan |tatrāhaṃ kṛtavānrājyaṃ dharmyaṃ ca susamāhitaḥ || 7.78.5 ||
evaṃ varṣasahasrāṇi samatītāni suvrata |rājyaṃ kārayato brahmanprajā dharmeṇa rakṣataḥ || 7.78.6 ||
so 'haṃ nimitte kasmiṃścidvijñātāyurdvijottama |kāladharmaṃ hṛdi nyasya tato vanamupāgamam || 7.78.7 ||
so 'haṃ vanamidaṃ durgaṃ mṛgapakṣivivarjitam |tapaścartuṃ praviṣṭo 'smi samīpe sarasaḥ śubhe || 7.78.8 ||
bhrātaraṃ surathaṃ rājye hyabhiṣicya mahīpatim |idaṃ saraḥ samāsādya tapastaptaṃ mayā ciram || 7.78.9 ||
so 'haṃ varṣasahasrāṇi tapastrīṇi mahāvane |taptvā suduṣkaraṃ prāpto brahmalokamanuttamam || 7.78.10 ||
tasya me svargabhūtasya kṣutpipāse dvijottama |bādhete paramodāra tato 'haṃ vyathitendriyaḥ |gatvā tribhuvanaśreṣṭhaṃ pitāmahamuvāca ha || 7.78.11 ||
bhagavanbrahmaloko 'yaṃ kṣutpipāsāvivarjitaḥ |kasyāyaṃ karmaṇaḥ pākaḥ kṣutpipāsānugo hyaham || 7.78.12 ||
āhāraḥ kaśca me deva tanme brūhi pitāmaha || 7.78.13 ||
pitāmahastu māmāha tavāhāraḥ sudevaja |svādūni svāni māṃsāni tāni bhakṣaya nityaśaḥ || 7.78.14 ||
svaśarīraṃ tvayā puṣṭaṃ kurvatā tapa uttamam |anuptaṃ rohate śveta na kadācinmahāmate || 7.78.15 ||
tṛptirna te 'sti sūkṣmā 'pi vane satvaniṣevite |purā tu bhikṣamāṇāya bhikṣā vai yataye nṛpa |na hi dattā tvayendrābha yasmādatithaye 'pi vai || 7.78.16 ||
dattaṃ na te 'sti sūkṣmo 'pi tapa eva niṣevase |tena svargagato vatsa bādhyase kṣutpipāsayā || 7.78.17 ||
sa tvaṃ supuṣṭamāhāraiḥ svaśarīramanuttamam |bhakṣayitvāmṛtarasaṃ tena tṛptirbhaviṣyati || 7.78.18 ||
yadā tu tadvanaṃ śveta agastyaḥ sumahānṛṣiḥ |āgamiṣyati durdharṣastadā kṛcchrādvimokṣyate || 7.78.19 ||
sa hi tārayituṃ saumya śaktaḥ suragaṇānapi |kiṃ punastvāṃ mahābāho kṣutpipāsāvaśaṃ gatam || 7.78.20 ||
so 'haṃ bhagavataḥ śrutvā devadevasya niścayam |āhāraṃ garhitaṃ svaśarīraṃ dvijottama || 7.78.21 ||
bahūnvarṣagaṇānbrahmanbhujyamānamidaṃ mayā |kṣayaṃ nābhyeti brahmarṣe tṛptiścāpi mamottamā || 7.78.22 ||
tasya me kṛcchrabhūtasya kṛcchrādasmādvimocaya |anyeṣāṃ na gatirhyatra kumbhayonimṛte dvijam || 7.78.23 ||
idamābharaṇaṃ saumya tāraṇārthaṃ dvijottama |pratigṛhṇīṣva bhadraṃ te prasādaṃ kartumarhasi || 7.78.24 ||
idaṃ tāvatsuvarṇaṃ ca dhanaṃ vastrāṇi ca dvija |bhakṣyaṃ bhojyaṃ ca brahmarṣe dadātyābharaṇāni ca || 7.78.25 ||
sarvānkāmānprayacchāmi bhogāṃśca munipuṅgava |tāraṇe bhagavanmahyaṃ prasādaṃ kartumarhasi || 7.78.26 ||
tasyāhaṃ svargiṇo vākyaṃ śrutvā duḥkhasamanvitam |tāraṇāyopajagrāha tadābharaṇamuttamam || 7.78.27 ||
mayā pratigṛhīte tu tasminnābharaṇe śubhe |mānuṣaḥ pūrvako deho rājarṣervinanāśa ha || 7.78.28 ||
pranaṣṭe tu śarīre 'sau rājarṣiḥ parayā mudā |tṛptaḥ pramudito rājā jagāma tridivaṃ sukham || 7.78.29 ||
tenedaṃ śakratulyena divyamābharaṇaṃ mama |tasminnimitte kākutstha dattamadbhutadarśanam || 7.78.30 ||
tadadbhutatamaṃ vākyaṃ śrutvāgastyasya rāghavaḥ |gauravādvismayāccaiva punaḥ praṣṭuṃ pracakrame || 7.79.1 ||
bhagavaṃstadvanaṃ ghoraṃ tapastapyati yatra saḥ |śveto vaidarbhako rājā kathaṃ syādamṛgadvijam || 7.79.2 ||
tadvanaṃ sa katha rājā śūnyaṃ manujavarjitam |tapaścartuṃ praviṣṭaḥ sa śrotumicchāmi tattvataḥ || 7.79.3 ||
rāmasya vacanaṃ śrutvā kautūhalasamanvitam |vākyaṃ paramatejasvī vaktumevopacakrame || 7.79.4 ||
purā kṛtayuge rāma manurdaṇḍadharaḥ prabhuḥ |tasya putro mahānāsīdikṣvākuḥ kulanandanaḥ || 7.79.5 ||
taṃ putraṃ pūrvaṃkaṃ rājye nikṣipya bhuvi durjayam |pṛthivyāṃ rājavaṃśānāṃ bhava kartetyuvāca ha || 7.79.6 ||
tathaiveti pratijñātaṃ pituḥ putreṇa rāghava |tataḥ paramasantuṣṭo manuḥ putramuvāca ha || 7.79.7 ||
prīto 'smi paramodāra tvaṃ kartā 'si na saṃśayaḥ |daṇḍena ca prajā rakṣa mā ca daṇḍamakāraṇe || 7.79.8 ||
aparādhiṣu yo daṇḍaḥ pātyate mānaveṣu vai |sa daṇḍo vidhivanmuktaḥ svargaṃ nayati pārthivam || 7.79.9 ||
tasmāddaṇḍe mahābāho yatnavānbhava putraka |dharmo hi paramo loke kurvataste bhaviṣyati || 7.79.10 ||
iti taṃ bahu sandiśya manuḥ putraṃ samādhinā |jagāma tridivaṃ hṛṣṭo brahmalokaṃ sanātanam || 7.79.11 ||
prayāte tridivaṃ tasminnikṣvākuramitaprabhaḥ |janayiṣye kathaṃ putrāniti cintāparo 'bhavat || 7.79.12 ||
karmabhirbahurūpaiśca taistairmanusutassutān |janayāmāsa dharmātmā śataṃ devasutopamān || 7.79.13 ||
teṣāmavarajastāta sarveṣāṃ raghunandana |mūḍhaścākṛtavidyaśca na śuśrūṣati pūrvajān || 7.79.14 ||
nāma tasya ca daṇḍeti pitā cakre 'lpamedhasaḥ |avaśyaṃ daṇḍapatanaṃ śarīre 'sya bhaviṣyati || 7.79.15 ||
apaśyamānastaṃ deśaṃ ghoraṃ putrasya rāghava |vindhyaśaivalayormadhye rājyaṃ prādādarindama || 7.79.16 ||
sa daṇḍastatra rājābhūdramye parvatarodhasi |puraṃ cāpratimaṃ rāma nyaveśayadanuttamam || 7.79.17 ||
purasya cākaronnāma madhumantamiti prabho |purohitaṃ tūśanasaṃ varayāmāsa suvratam || 7.79.18 ||
evaṃ sa rājā tadrājyamakarotsapurohitaḥ |prahṛṣṭamanujākīrṇaṃ devarājaṃ yathā vṛṣā || 7.79.19 ||
tataḥ sa rājā manujendraputraḥ sārdhaṃ ca tenośanasā tadānīm |cakāra rājyaṃ sumahānmahātmā śakro divīvośanasā sametaḥ || 7.79.20 ||
etadākhyāya rāmāya maharṣiḥ kumbhasambhavaḥ |asyāmevāparaṃ vākyaṃ kathāyāmupacakrame || 7.80.1 ||
tataḥ sa daṇḍaḥ kākutstha bahuvarṣagaṇāyutam |akarottatra dāntātmā rājyaṃ nihatakaṇṭakam || 7.80.2 ||
atha kāle tu kasmiṃścidrājā bhārgavamāśramam |ramaṇīyamupākrāmaccaitre māsi manorame || 7.80.3 ||
tatra bhārgavakanyāṃ sa rūpeṇāpratimāṃ bhuvi |vicarantīṃ vanoddeśe daṇḍo 'paśyadanuttamām || 7.80.4 ||
sa dṛṣṭvā tāṃ sudurmedhā anaṅgaśarapīḍitaḥ |abhigamya susaṃvignāṃ kanyāṃ vacanamabravīt || 7.80.5 ||
kutastvamasi suśroṇi kasya vā 'si sutā śubhe |pīḍito 'hamanaṅgena gacchāmi tvāṃ śubhānane || 7.80.6 ||
tasya tvevaṃ bruvāṇasya mohonmattasya kāminaḥ |bhārgavī pratyuvācedaṃ vacaḥ sānunayaṃ nṛpam || 7.80.7 ||
bhārgavasya sutāṃ viddhi devasyākliṣṭakarmaṇaḥ |arajāṃ nāma rājendra jyeṣṭhāmāśramavāsinīm || 7.80.8 ||
mā māṃ spṛśa balādrājankanyā pitṛvaśā hyaham |guruḥ pitā me rājendra tvaṃ ca śiṣyo mahātmanaḥ |vyasanaṃ sumahatkruddhaḥ sa te dadyānmahātapāḥ || 7.80.9 ||
yadi vānyanmayā kāryaṃ dharmadṛṣṭena satpathā |varayasva naraśreṣṭha pitaraṃ me mahādyutim || 7.80.10 ||
anyathā tu phalaṃ tubhyaṃ bhavedghorābhisaṃhitam |krodhena hi pitā me 'sau trailokyamapi nirdahet || 7.80.11 ||
dāsyate cānavadyāṅga tava mā yācitaḥ pitā || 7.80.12 ||
evaṃ bruvāṇāmarajāṃ daṇḍaḥ kāmavaśaṃ gataḥ |pratyuvāca madonmattaḥ śirasyādhāya cāñjalim || 7.80.13 ||
prasādaṃ kuru suśroṇi na kālaṃ kṣeptumarhasi |tvatkṛte hi mama prāṇā vidīryante varānane || 7.80.14 ||
tvāṃ prāpya me vadho vā syācchāpo vā yadi dāruṇaḥ |bhaktaṃ bhajasva māṃ bhīru bhajamānaṃ suvihvalam || 7.80.15 ||
evamuktvā tu tāṃ kanyāṃ dorbhyāṃ gṛhya balādbalī |visphurantīṃ yathākāmaṃ maithunāyopacakrame || 7.80.16 ||
etamarthaṃ mahāghoraṃ daṇḍaḥ kṛtvā sudāruṇam |nagaraṃ prayayāvāśu madhumantamanuttamam || 7.80.17 ||
arajā 'pi rudantī sā āśramasyāvidūrataḥ |pratīkṣanti susaṃtrastā pitaraṃ devasannibham || 7.80.18 ||
sa muhūrtādupaśrutya devarṣiramitaprabhaḥ |svamāśramaṃ śiṣyavṛtaḥ kṣudhārtaḥ sannyavartata || 7.81.1 ||
so 'paśyadarajāṃ dīnāṃ rajasā samabhiplutām |jyotsnāmiva grahagrastāṃ pratyūṣe na virājatīm || 7.81.2 ||
tasya roṣaḥ samabhavatkṣudhārtasya viśeṣataḥ |nirdahanniva lokāṃstrīñchiṣyāṃścaitaduvāca ha || 7.81.3 ||
paśyadhvaṃ viparītasya daṇḍasyāvijitātmanaḥ |vipattiṃ ghorasaṅkāśāṃ kruddhāmagniśikhāmiva || 7.81.4 ||
kṣayo 'sya durmateḥ prāptaḥ sānugasya durātmanaḥ |yaḥ pradīptāṃ hutāśasya śikhāṃ vai spraṣṭumicchati || 7.81.5 ||
yasmātsa kṛtavānpāpamīdṛśaṃ ghorasaṃhitam |tasmātprāpsyati durmedhāḥ phalaṃ pāpasya karmaṇaḥ || 7.81.6 ||
saptarātreṇa rājāsau sabhṛtyabalavāhanaḥ |pāpakarmasamācāro vadhaṃ prāpsyati durmatiḥ || 7.81.7 ||
samantādyojanaśataṃ viṣayaṃ cāsya durmateḥ |dhakṣyate pāṃsuvarṣeṇa mahatā pākaśāsanaḥ || 7.81.8 ||
sarvasatvāni yānīha sthāvarāṇi carāṇi ca |mahatā pāṃsuvarṣeṇa vilayaṃ sarvato 'gaman || 7.81.9 ||
daṇḍasya viṣayo yāvattāvatsarvasamucchrayam |pāṃsuvarṣamivālakṣyaṃ saptarātraṃ bhaviṣyati || 7.81.10 ||
ityuktvā krodhatāmrākṣastadāśramanivāsinam |janaṃ janapadānteṣu sthīyatāmiti cābravīt || 7.81.11 ||
śrutvā tūśanaso vākyaṃ so ' 'śramāvasatho janaḥ |niṣkrānto viṣayāttasmātsthānaṃ cakre 'tha bāhyataḥ || 7.81.12 ||
sa tathoktvā munijanamarajāmidamabravīt |ihaiva vasa durmedhe āśrame susamāhitā || 7.81.13 ||
idaṃ yojanaparyantaṃ saraḥ suruciraprabham |araje vijvarā bhuṅkṣva kālaścātra pratīkṣyatām || 7.81.14 ||
tvatsamīpe ca ye sattvā vāsameṣyanti tāṃ niśām |avadhyāḥ pāṃsuvarṣeṇa te bhaviṣyanti nityadā || 7.81.15 ||
śrutvā niyogaṃ brahmarṣeḥ sā 'rajā bhārgavī tadā |tatheti pitaraṃ prāha bhārgavaṃ bhṛśaduḥkhitā |ityuktvā bhārgavo vāsamanyatra samakārayat || 7.81.16 ||
tacca rājyaṃ narendrasya sabhṛtyabalavāhanam |saptāhādbhasmasādbhūtaṃ yathoktaṃ brahmavādinā || 7.81.17 ||
tasyāsau daṇḍaviṣayo vindhyaśaivalayornṛpa |śapto brahmarṣiṇā tena vaidharmye sahite kṛte || 7.81.18 ||
tataḥ prabhṛti kākutstha daṇḍakāraṇyamucyate |tapasvinaḥ sthitā hyatra janasthānamato 'bhavat || 7.81.19 ||
etatte sarvamākhyātaṃ yanmāṃ pṛcchasi rāghava |sandhyāmupāsituṃ vīra samayo hyativartate || 7.81.20 ||
ete maharṣayaḥ sarve pūrṇakumbhāḥ samantataḥ |kṛtodakā naravyāghra ādityaṃ paryupāsate || 7.81.21 ||
sa tairbrāhmaṇamabhyastaṃ sahitairbrahmavittamaiḥ |ravirastaṃ gato rāma gacchodakamupaspṛśa || 7.81.22 ||
ṛṣervacanamājñāya rāmaḥ sandhyāmupāsitum |upākramatsaraḥ puṇyamapsarogaṇasevitam || 7.82.1 ||
tatrodakamupaspṛśya sandhyāmanvāsya paścimām |āśramaṃ prāviśadrāmaḥ kumbhayonermahātmanaḥ || 7.82.2 ||
tasyāgastyo bahuguṇaṃ kandamūlaṃ tathauṣadhim |śālyādīni pavitrāṇi bhojanārthamakalpayat || 7.82.3 ||
sa bhuktavānnaraśreṣṭhastadannamamṛtopamam |prītaśca parituṣṭaśca tāṃ rātriṃ samupāviśat || 7.82.4 ||
prabhāte kālyamutthāya kṛtvā ' 'hnikamarindamaḥ |ṛṣiṃ samupacakrāma gamanāya raghūttamaḥ || 7.82.5 ||
abhivādyābravīdrāmo maharṣiṃ kumbhasambhavam |āpṛcche svāṃ purīṃ gantuṃ māmanujñātumarhasi || 7.82.6 ||
dhanyo 'smyanugṛhīto 'smi darśanena mahātmanaḥ |draṣṭuṃ caivāgamiṣyāmi pāvanārthamihātmanaḥ || 7.82.7 ||
tathā vadati kākutsthe vākyamadbhutadarśanam |uvāca paramaprīto dharmanetrastapodhanaḥ || 7.82.8 ||
atyadbhutamidaṃ vākyaṃ tava rāma śubhākṣaram |pāvanaḥ sarvabhūtānāṃ tvameva raghunandana || 7.82.9 ||
muhūrtamapi rāma tvāṃ ye ca paśyanti kecana |pāvitāḥ svargabhūtāśca pūjyāste sarvadaivataiḥ || 7.82.10 ||
ye ca tvāṃ ghoracakṣurbhiḥ paśyanti prāṇino bhuvi |hatāste yamadaṇḍena sadyo nirayagāminaḥ || 7.82.11 ||
īdṛśastvaṃ raghuśreṣṭha pāvanaḥ sarvadehinām |bhuvi tvāṃ kathayanto 'pi siddhimeṣyanti rāghava || 7.82.12 ||
gaccha cāriṣṭamavyāgraḥ panthānamakutobhayam |praśādhi rājyaṃ dharmeṇa gatirhi jagato bhavān || 7.82.13 ||
evamuktastu muninā prāñjaliḥ pragraho nṛpaḥ |abhyavādayata prājñastamṛṣiṃ puṇyaśālinam || 7.82.14 ||
abhivādya muniśreṣṭhaṃ tāṃśca sarvāṃstapodhanān |adhyārohattadavyagraḥ puṣpakaṃ hemabhūṣitam || 7.82.15 ||
taṃ prayāntaṃ munigaṇā hyāśīrvādaiḥ samantataḥ |apūjayanmahendrābhaṃ sahasrākṣamivāmarāḥ || 7.82.16 ||
svasthaḥ sa dadṛśe rāmaḥ puṣpake hemabhūṣite |śaśī meghasamīpastho yathā jaladharāgame || 7.82.17 ||
tato 'rdhadivase prāpte pūjyamānastatastataḥ |ayodhyāṃ prāpya kākutstho madhyakakṣyāmavāruhat || 7.82.18 ||
tato visṛjya ruciraṃ puṣpakaṃ kāmagāmi tat |visarjayitvā gaccheti svasti te 'stviti ca prabhuḥ || 7.82.19 ||
kakṣāntaravinikṣiptaṃ dvāssthaṃ rāmo 'bravīdvacaḥ |lakṣmaṇaṃ bharataṃ caiva gatvā tau laghuvikramau |mamāgamanamākhyāya śabdāpayata mā ciram || 7.82.20 ||
tacchrutvā bhāṣitaṃ tasya rāmasyākliṣṭa karmaṇaḥ |dvāssthaḥ kumārāvāhūya rāghavāya nyavedayat || 7.83.1 ||
dṛṣṭvā tu rāghavaḥ prāptau priyau bharatalakṣmaṇau |pariṣvajya tadā rāmo vākyametaduvāca ha || 7.83.2 ||
kṛtaṃ mayā yathā tathyaṃ dvijakāryamanuttamam |dharmasetumatho bhūyaḥ kartumicchāmi rāghavau || 7.83.3 ||
akṣayyaścāvyayaścaiva dharmaseturmato mama |dharmaprasādhakaṃ hyetat sarvapāpapraṇāśanam || 7.83.4 ||
yuvābhyāmātmabhūtābhyāṃ rājasūyamanuttamam |sahito yaṣṭumicchāmi tatra dharmo hi śāśvataḥ || 7.83.5 ||
iṣṭvā tu rājasūyena mitraḥ śatrunibarhaṇaḥ |suhutena suyajñena varuṇatvamupāgamat || 7.83.6 ||
somaśca rājasūyena iṣṭvā dharmeṇa dharmavit |prāptaśca sarvalokeṣu kīrtisthānaṃ ca śāśvatam || 7.83.7 ||
asminnahani yacchreyaścintyatāṃ tanmayā saha |hitaṃ cāyatiyuktaṃ ca prayatau kartumarhathaḥ || 7.83.8 ||
śrutvā tu rāghavasyaitadvākyaṃ vākyaviśāradaḥ |bharataḥ prāñjalirbhūtvā vākyametaduvāca ha || 7.83.9 ||
tvayi dharmaḥ paraḥ sādho tvayi sarvā vasundharā |pratiṣṭhitā mahābāho yaśaścāmitavikrama || 7.83.10 ||
mahīpālāśca sarve tvāṃ prajāpatimivāmarāḥ |nirīkṣante mahātmānaṃ lokānāthaṃ yathā vayam || 7.83.11 ||
putrāśca pitṛvadrājanpaśyanti tvāṃ mahābala |pṛthivyā gatibhūto 'si prāṇināmapi rāghava || 7.83.12 ||
sa tvamevaṃvidhaṃ yajñamāhartāsi kathaṃ nṛpa |pṛthivyāṃ rājavaṃśānāṃ vināśo yatra dṛśyate || 7.83.13 ||
pṛthivyāṃ ye ca puruṣā rājanpauruṣamāgatāḥ |sarveṣāṃ bhavitā tatra saṅkṣayaḥ sarvakopajaḥ || 7.83.14 ||
sa tvaṃ puruṣaśārdūla guṇairatulavikrama |pṛthivīṃ nārhase hantuṃ vaśe hi tava vartate || 7.83.15 ||
bharatasya tu tadvākyaṃ śrutvā 'mṛtamayaṃ tadā |praharṣamatulaṃ lebhe rāmaḥ satyaparākramaḥ || 7.83.16 ||
uvāca ca śubhaṃ vākyaṃ kaikeyyānandavardhanam |prīto 'smi parituṣṭo 'smi tavādya vacane 'nagha || 7.83.17 ||
idaṃ vacanamaklībaṃ tvayā dharmasamāhitam |vyāhṛtaṃ puruṣavyāghra pṛthivyāḥ paripālanam || 7.83.18 ||
eṣyadasmadabhiprāyādrājasūyātkratūttamāt |nivartayāmi dharmajña tava suvyāhṛtena ca || 7.83.19 ||
lokapīḍākaraṃ karma na kartavyaṃ vicakṣaṇaiḥ |bālānāṃ tu śubhaṃ vākyaṃ grāhya lakṣmaṇapūrvaja |tasmācchṛṇomi te vākyaṃ sādhu yuktaṃ mahāmate || 7.83.20 ||
tathoktavati rāme tu bharate ca mahātmani |lakṣmaṇo 'tha śubhaṃ vākyamuvāca raghunandanam || 7.84.1 ||
aśvamedho mahāyajñaḥ pāvanaḥ sarvapāpmanām |pāvanastava durdharṣo rocatāṃ raghunandana || 7.84.2 ||
śrūyate hi purāvṛttaṃ vāsave sumahātmani |brahmahatyāvṛtaḥ śakro hayamedhena pāvitaḥ || 7.84.3 ||
purā kila mahābāho devāsurasamāgame |vṛtro nāma mahānāsīddaiteyo lokasammataḥ || 7.84.4 ||
vistīrṇo yojanaśatamucchritastriguṇaṃ tataḥ |anurāgeṇa lokāṃstrīnsnehātpaśyati sarvataḥ || 7.84.5 ||
dharmajñaśca kṛtajñaśca buddhyā ca pariniṣṭhitaḥ |śaśāsa pṛthivīṃ sphītāṃ dharmeṇa susamāhitaḥ || 7.84.6 ||
tasminpraśāsati tadā sarvakāmadughā mahī |rasavanti prabhūnāni mūlāni ca phalāni ca || 7.84.7 ||
akṛṣṭapacyā pṛthivī susampannā mahātmanaḥ |sa rājyaṃ tādṛśaṃ bhuṅkte sphītamadbhutadarśanam || 7.84.8 ||
tasya buddhiḥ samuptannā tapaḥ kuryāmanuttamam |tapo hi paramaṃ śreyaḥ sammohamitaratsukham || 7.84.9 ||
sa nikṣipya sutaṃ jyeṣṭhaṃ paureṣu madhureśvaram |tapa ugraṃ samātiṣṭhattāpayansarvadevatāḥ || 7.84.10 ||
tapastapyati vṛtre tu vāsavaḥ paramārtavat |viṣṇuṃ samupasaṅkramya vākyametaduvāca ha || 7.84.11 ||
tapasyatā mahābāho lokāḥ vṛtreṇa nirjitāḥ |balavānsa hi dharmātmā nainaṃ śakṣyāmi śāsitum || 7.84.12 ||
yadyasau tapa ātiṣṭhedbhūya evāsureśvara |yāvallokā dhariṣyanti tāvadasya vaśānugāḥ || 7.84.13 ||
taṃ cainaṃ paramodāramupekṣasi mahābalam |kṣaṇaṃ hi na bhavedvṛtraḥ kruddhe tvayi sureśvara || 7.84.14 ||
yadā hi prītisaṃyogaṃ tvayā viṣṇo samāgataḥ |tadāprabhṛti lokānāṃ nāthatvamupalabdhavān || 7.84.15 ||
sa tvaṃ prasādaṃ lokānāṃ kuruṣva susamāhitaḥ |tvatkṛtena hi sarvaṃ syāpraśāntamarujaṃ jagat || 7.84.16 ||
ime hi sarve viṣṇo tvāṃ nirīkṣante divaukasaḥ |vṛtraghātena mahatā teṣāṃ sāhyaṃ kuruṣva ha || 7.84.17 ||
tvayā hi nityaśaḥ sāhyaṃ kṛtameṣāṃ mahātmanām |asahyamidamanyeṣāmagatīnāṃ gatirbhavān || 7.84.18 ||
lakṣmaṇasya tu tadvākyaṃ śrutvā śatrunibarhaṇaḥ |vṛtraghātamaśeṣeṇa kathayetyāha suvrata || 7.85.1 ||
rāghaveṇaivamuktastu sumitrānandavardhanaḥ |bhūya eva kathāṃ divyāṃ kathayāmāsa suvrataḥ || 7.85.2 ||
sahasrākṣavacaḥ śrutvā sarveṣāṃ ca divaukasām |viṣṇurdevānuvācedaṃ sarvānindrapurogamān || 7.85.3 ||
pūrvaṃ sauhṛdabaddho 'smi vṛtrasya ha mahātmanaḥ |tena yuṣmatpriyārthaṃ hi nāhaṃ hanmi mahāsuram || 7.85.4 ||
avaśyaṃ karaṇīyaṃ ca bhavatāṃ sukhamuttamam |tasmādupāyamākhyāsye yena vṛtro nihanyate || 7.85.5 ||
tridhābhūtaṃ kariṣyāmi hyātmānaṃ surasattamāḥ |tena vṛtraṃ sahasrākṣo vadhiṣyati na saṃśayaḥ || 7.85.6 ||
ekāṃśo vāsavaṃ yātu dvitīyo vajrameva tu |tṛtīyo bhūtalaṃ śakrastadā vṛtraṃ vadhiṣyati || 7.85.7 ||
tathā bruvati deveśe devā vākyamathābruvan |evametanna sandeho yathā vadasi daityahan || 7.85.8 ||
bhadraṃ te 'stu gamiṣyāmo vṛtrāsuravadhaiṣiṇaḥ |bhajasva paramodāra vāsavaṃ svena tejasā || 7.85.9 ||
tataḥ sarve mahātmānaḥ sahasrākṣapurogamāḥ |tadāraṇyamupākrāmanyatra vṛtro mahāsuraḥ || 7.85.10 ||
te paśyaṃstejasā bhūtaṃ tapyantamasurottamam |pibantamiva lokāṃstrīnnirdahantamivāmbaram || 7.85.11 ||
dṛṣṭvaiva cāsuraśreṣṭhaṃ devāstrāsamupāgaman |kathamenaṃ vadhiṣyāmaḥ kathaṃ na syātparājayaḥ || 7.85.12 ||
teṣāṃ cintayatāṃ tatra sahasrākṣaḥ purandaraḥ |vajraṃ pragṛhya pāṇibhyāṃ prāhiṇodvṛtramūrdhani || 7.85.13 ||
kālāgnineva ghoreṇa taptenaiva mahārciṣā |patatā vṛtraśirasā jagatऺtrāsamupāgamat || 7.85.14 ||
asambhāvyaṃ vadhaṃ tasya vṛtrasya vibudhādhipaḥ |cintayāno jagāmāśu lokasyāntaṃ mahāyaśāḥ || 7.85.15 ||
tamindraṃ brahmahatyā ' 'śu gacchantamanugacchati |apataccāsya gātreṣu tamindraṃ duḥkhamāviśat || 7.85.16 ||
hatārayaḥ pranaṣṭendrā devāḥ sāgnipurogamāḥ |viṣṇuṃ tribhuvaneśānaṃ muhurmuhurapūjayan || 7.85.17 ||
tvaṃ gatiḥ parameśāna pūrvajo jagataḥ pitā |rakṣārthaṃ sarvabhūtānāṃ viṣṇutvamupajagmivān || 7.85.18 ||
hataścāyaṃ tvayā vṛtro brahmahatyā ca vāsavam |bādhate suraśārdūla mokṣaṃ tasyā vinirdiśa || 7.85.19 ||
teṣāṃ tadvacanaṃ śrutvā devānāṃ viṣṇurabravīt |māmeva yajatāṃ śakraḥ pāvayiṣyāmi vajriṇam || 7.85.20 ||
puṇyena hayamedhena māmiṣṭvā pākaśāsanaḥ |punareṣyati devānāmindratvamakutobhayam || 7.85.21 ||
evaṃ sandiśya tāṃ vāṇīṃ devānāmamṛtopamām |jagāma viṣṇurdeveśaḥ stūyamānastriviṣṭapam || 7.85.22 ||
tadā vṛtravadhaṃ sarvamakhilena sa lakṣmaṇaḥ |kathayitvā naraśreṣṭhaḥ kathāśeṣaṃ pracakrame || 7.86.1 ||
tato hate mahāvīrye vṛtre devabhayaṅkare |brahmahatyāvṛtaḥ śakraḥ sañjñāṃ lebhe na vṛtrahā || 7.86.2 ||
so 'ntamāśritya lokānāṃ naṣṭasañjño vicetanaḥ |kālaṃ tatrāvasatkañcidveṣṭamāna ivoragaḥ || 7.86.3 ||
atha naṣṭe sahasrākṣe udvignamabhavajjagat |bhūmiśca dhvastasaṅkāśā niḥsnehā śuṣkakānanā || 7.86.4 ||
niḥsrotasaśca te sarve tu hradāśca saritastathā |saṅkṣobhaścaiva sattvānāmanāvṛṣṭikṛto 'bhavat || 7.86.5 ||
kṣīyamāṇe tu loke 'sminsambhrāntamanasaḥ surāḥ |yaduktaṃ viṣṇunā pūrvaṃ taṃ yajñaṃ samupānayan || 7.86.6 ||
tataḥ sarve suragaṇāḥ sopādhyāyāḥ saharṣibhiḥ |taṃ deśaṃ samupājagmuryatrendro bhayamohitaḥ || 7.86.7 ||
te tu dṛṣṭvā sahasrākṣamāvṛtaṃ brahmahatyayā |taṃ puraskṛtya deveśamaśvamedhamupākraman || 7.86.8 ||
tato 'śvamedhaḥ sumahānmahendrasya mahātmanaḥ |vavṛdhe brahmahatyayāḥ pāvanārthaṃ nareśvara || 7.86.9 ||
tato yajñe samāpte tu brahmahatyā mahātmanaḥ |abhigamyābravīdvākyaṃ kva me sthānaṃ vidhāsyatha || 7.86.10 ||
te tāmūcustadā devāstuṣṭāḥ prītisamanvitāḥ |caturdhā vibhajātmānamātmanaiva durāsade || 7.86.11 ||
devānāṃ bhāṣitaṃ śrutvā brahmahatyā mahātmanām |sannidhau sthānamanyatra varayāmāsa durvasā || 7.86.12 ||
ekenāṃśena vatsyāmi pūrṇodāsu nadīṣu vai |caturo vārṣikānmāsāndarpaghnī kāmavāriṇī || 7.86.13 ||
bhūmyāmahaṃ sarvakālamekenāṃśena sarvadā |vasiṣyāmi na sandehaḥ satyenaitadbravīmi vaḥ || 7.86.14 ||
yo 'yamaṃśastṛtīyo me strīṣu yauvanaśāliṣu |trirātraṃ darpapūrṇāsu vaśiṣye darpaghātinī || 7.86.15 ||
hantāro brāhmaṇānye tu mṛṣāpūrvamadūṣakān |tāṃścaturthena bhāgena saṃśrayiṣye surarṣabhāḥ || 7.86.16 ||
pratyūcustāṃ tato devā yathā vadasi durvase |tathā bhavatu tatsarvaṃ sādhayasva yadīpsitam || 7.86.17 ||
tataḥ prītyā 'nvitā devāḥ sahasrākṣaṃ vavandire |vijvaraḥ sa ca pūtātmā vāsavaḥ samapadyata || 7.86.18 ||
praśāntaṃ ca jagatsarvaṃ sahasrākṣe pratiṣṭhite |yajñaṃ cādbhutasaṅkāśaṃ tadā śakro 'bhyapūjayat || 7.86.19 ||
īdṛśo hyaśvamedhasya prasādo raghunandana |yajasva sumahābhāga hayamedhena pārthiva || 7.86.20 ||
iti lakṣmaṇavākyamuttamaṃ nṛpatiratīva manoharaṃ mahātmā |paritoṣamavāpa hṛṣṭacetā niśamayyendrasamānavikramaujāḥ || 7.86.21 ||
tacchrutvā lakṣmaṇenoktaṃ vākyaṃ vākyaviśāradaḥ |pratyuvāca mahātejāḥ prahasanrāghavo vacaḥ || 7.87.1 ||
evameva naraśreṣṭha yathā vadasi lakṣmaṇa |vṛtraghātamaśeṣeṇa vājimedhaphalaṃ ca yat || 7.87.2 ||
śrūyate hi purā saumya kardamasya prajāpateḥ |putro bāhlīśvaraḥ śrīmānilo nāma mahāśayāḥ || 7.87.3 ||
sa rājā pṛthivīṃ sarvāṃ vaśe kṛtvā sudhārmikaḥ |rājyaṃ caiva naravyāghra putravatparyapālayat || 7.87.4 ||
suraiśca paramodārairdaiteyaiśca mahādhanaiḥ |nāgarākṣasagandharvairyakṣaiśca sumahātmabhiḥ || 7.87.5 ||
pūjyate nityaśaḥ saumya bhayārtai raghunandana |abibhyaṃśca trayo lokāḥ saroṣasya mahātmanaḥ || 7.87.6 ||
sa rājā tādṛśo hyāsīddharme vīrye ca niṣṭhitaḥ |buddhyā ca paramodāro bāhlīkeśo mahāyaśāḥ || 7.87.7 ||
sa pracakre mahābāhurmṛgayāṃ rucire vane |caitre manorame māsi sabhṛtyabalavāhanaḥ || 7.87.8 ||
prajaghne ca nṛpo 'raṇye mṛgāñchatasahasraśaḥ |hatvaiva tṛptirnābhūcca rājñastasya mahātmanaḥ || 7.87.9 ||
nānāmṛgāṇāmayutaṃ vadhyamānaṃ mahātmanā |yatra jāto māhāsenastaṃ deśamupacakrame || 7.87.10 ||
tasminpradeśe deveśa śailarājasutāṃ haraḥ |ramayāmāsa durdharṣaḥ sarvairanucaraiḥ saha || 7.87.11 ||
kṛtvā strīrūpamātmānamumeśo gopatidhvajaḥ |devyāḥ priyacikīrṣuḥ saṃstasminparvatanirjhare || 7.87.12 ||
ye tu tatra vanoddeśe sattvāḥ puruṣavādinaḥ |vṛkṣāḥ puruṣanāmānaste 'bhavan strījanāstadā || 7.87.13 ||
yacca kiñcana tatsarvaṃ nārīsañjñaṃ babhūva ha |etasminnantare rājā sa ilaḥ kardamātmajaḥ |nighnanmṛgasahasrāṇi taṃ deśamupacakrame || 7.87.14 ||
sa dṛṣṭvā strīkṛtaṃ sarvaṃ savyālamṛgapakṣakam |ātmanaṃ strīkṛtaṃ caiva sānugaṃ raghunandana || 7.87.15 ||
tasya duḥkhaṃ mahaccāsīddṛṣṭvā ' 'tmānaṃ tathāgatam |umāpateśca tatkarma jñātvā trāsamupāgamat || 7.87.16 ||
tato devaṃ mahātmānaṃ śitikaṇṭhaṃ kapardinam |jagāma śaraṇaṃ rājā sabhṛtyabalavāhanaḥ || 7.87.17 ||
tataḥ prahasya varadaḥ saha devyā maheśvaraḥ |prajāpatisutaṃ vākyamuvāca varadaḥ svayam || 7.87.18 ||
uttiṣṭhottiṣṭha rājarṣe kārdameya mahābala |puruṣatvamṛte saumya varaṃ varaya suvrata || 7.87.19 ||
tataḥ sa rājā duḥkhārtaḥ pratyākhyāto mahātmanā |na ca jagrāha strībhūto varamanyaṃ surottamāt || 7.87.20 ||
tataḥ śokena mahatā śailarājasutāṃ nṛpaḥ |praṇipatya hyumāṃ devīṃ sarveṇaivāntarātmanā || 7.87.21 ||
īśe varāṇāṃ varade lokānāmasi bhāminī |amoghadarśane devī bhaja saumyena cakṣuṣā || 7.87.22 ||
hṛdgataṃ tasya rājarṣervijñāya harasannidhau |pratyuvāca śubhaṃ vākyaṃ devī rudrasya saṃmatā || 7.87.23 ||
ardhasya devo varado varārdhasya tava hyaham |tasmādardhaṃ gṛhāṇa tvaṃ strīpuṃsoryāvadicchasi || 7.87.24 ||
tadadbhutataraṃ śrutvā devyā varamanuttamam |samprahṛṣṭamanā bhūtvā rājā vākyamathābravīt || 7.87.25 ||
yadi devi prasannā me rūpeṇāpratimā bhuvi |māsaṃ strītvamupāsitvā māsaṃ syāṃ puruṣaḥ punaḥ || 7.87.26 ||
īpsitaṃ tasya vijñāya devī surucirānanā |pratyuvāca śubhaṃ vākyamevameva bhaviṣyati || 7.87.27 ||
rājanpuruṣabhūtastvaṃ strībhāvaṃ na smariṣyasi |strībhūtaśca paraṃ māsaṃ na smariṣyasi pauruṣam || 7.87.28 ||
evaṃ sa rājā puruṣo māsaṃ bhūtvātha kārdamiḥ |trailokyasundarī nārī māsamekamilā 'bhavat || 7.87.29 ||
tāṃ kathāmilasambaddhāṃ rāmeṇa samudīritām |lakṣmaṇo bharataścaiva śrutvā paramavismitau || 7.88.1 ||
tau rāmaṃ prāñjalī bhūtvā tasya rājño mahātmanaḥ |vistaraṃ tasya bhāvasya tadā papracchatuḥ punaḥ || 7.88.2 ||
kathaṃ sa rājā strībhūto vartayāmāsa durgatiḥ |puruṣaḥ sa yadā bhūtaḥ kāṃ vṛttiṃ vartayatyasau || 7.88.3 ||
tayostadbhāṣitaṃ śrutvā kautūhalasamanvitam |kathayāmāsa kākutsthastasya rājño yathāgatam || 7.88.4 ||
tameva prathamaṃ māsaṃ strībhūtā lokasundarī |tābhiḥ parivṛtā strībhirye ca pūrvapadānugāḥ || 7.88.5 ||
tatkānanaṃ vigāhvāśu vijahre lokasundarī |drumagulmalatākīrṇaṃ padbhyāṃ padmadalekṣaṇā || 7.88.6 ||
vāhanāni ca sarvāṇi sā tyaktvā vai samantataḥ |parvatābhogavivare tasminreme ilā tadā || 7.88.7 ||
atha tasminvanoddeśe parvatasyāvidūrataḥ |saraḥ suruciraprakhyaṃ nānāpakṣigaṇairyutam || 7.88.8 ||
dadarśa sā tvilā tasminbudhaṃ somasutaṃ tadā |jvalantaṃ svena vapuṣā pūrṇasomamivoditam || 7.88.9 ||
tapantaṃ ca tapastīvramambhomadhye durāsadam |yaśaskaraṃ kāmakaraṃ kāruṇye paryavasthitam || 7.88.10 ||
sā taṃ jalāśayaṃ sarvaṃ kṣobhayāmāsa vismitā |sahagaiḥ pūrvapuruṣaiḥ strībhūtai raghunandana || 7.88.11 ||
budhastu tāṃ samīkṣyaiva kāmabāṇavaśaṃ gataḥ |nopalebhe tadā ' 'tmānaṃ sañcacāla tadā ' 'mbhasi || 7.88.12 ||
ilāṃ nirīkṣamāṇastu trailokyābhyadhikāṃ śubhām |cintāṃ samabhyatikrāmat kā nviyaṃ devatādhikā || 7.88.13 ||
na devīṣu na nāgīṣu nāsurīṣvapsaraḥsu ca |dṛṣṭapūrvā mayā kācidrūpeṇānena śobhitā || 7.88.14 ||
sadṛśīyaṃ mama bhavedyadi nānyaparigrahaḥ |iti buddhiṃ samāsthāya jalātkūlamupāgamat || 7.88.15 ||
āśramaṃ samupāgamya tatastāḥ pramadottamāḥ |śabdāpayata dharmātmā tāścainaṃ ca vavandire || 7.88.16 ||
sa tāḥ papraccha dharmātmā kasyaiṣā lokasundarī |kimarthamāgatā caiva sarvamākhyāta mā ciram || 7.88.17 ||
śubhaṃ tu tasya tadvākyaṃ madhuraṃ madhurākṣaram |śrutvā striyaśca tāḥ sarvā ūcurmadhurayā girā || 7.88.18 ||
asmākameṣā suśroṇī prabhutve vartate sadā |apatiḥ kānanānteṣu sahāsmābhiścaratyasau || 7.88.19 ||
tadvākyamavyaktapadaṃ tāsāṃ strīṇāṃ niśamya ca |vidyāmāvartanīṃ puṇyāmāvartayata sa dvijaḥ || 7.88.20 ||
so 'rthaṃ viditvā sakalaṃ tasya rājño yathāgatam |sarvā eva striyastāśca babhāṣe munipuṅgavaḥ || 7.88.21 ||
atra kimpuruṣīrbhūtvā śailarodhasi vatsyatha |āvāsastu girāvasmiñchīghrameva vidhīyatām || 7.88.22 ||
mūlapatraphalaiḥ sarvā vartayiṣyatha nityadā |striyaḥ kimpuruṣānnāma bharta'nsamupalapsyatha || 7.88.23 ||
tāḥ śrutvā somaputrasya vācaṃ kimpuruṣīkṛtāḥ |upāsāñcakrire śailaṃ vadhvastā bahulāstadā || 7.88.24 ||
śrutvā kimpuruṣotpattiṃ lakṣmaṇo bharatastadā |āścaryamiti cābrūtāmubhau rāmaṃ janeśvaram || 7.89.1 ||
atha rāmaḥ kathāmetāṃ bhūya eva mahāyaśāḥ |kathayāmāsa dharmātmā prajāpatisutasya vai || 7.89.2 ||
sarvāstā vidrutā dṛṣṭvā kinnarīrṛṣisattamaḥ |uvāca rūpasampannāṃ tāṃ striyaṃ prahasanniva || 7.89.3 ||
somasyāhaṃ sudayitaḥ sutaḥ surucirānane |bhajasva māṃ varārohe bhaktyā snigdhena cakṣuṣā || 7.89.4 ||
tasya tadvacanaṃ śrutvā śūnye svajanavarjite |ilā suruciraprakhyaṃ pratyuvāca mahāgraham || 7.89.5 ||
ahaṃ kāmacarī saumya tavāsmi vaśavartinī |praśādhi māṃ somasuta yathecchasi tathā kuru || 7.89.6 ||
tasyāstadadbhutaprakhyaṃ śrutvā harṣamupāgataḥ |sa vai kāmī saha tayā reme candramasaḥ sutaḥ || 7.89.7 ||
budhasya mādhavo māsastāmilāṃ rucirānanām |gato ramayato 'tyarthaṃ kṣaṇavattasya kāminaḥ || 7.89.8 ||
atha māse tu sampūrṇe pūrṇendusadṛśānanaḥ |prajāpatisutaḥ śrīmāñchayane pratyabudhyata || 7.89.9 ||
so 'paśyatsomajaṃ tatra tapantaṃ salilāśaye |ūrdhvabāhuṃ nirālambaṃ taṃ rājā pratyabhāṣata || 7.89.10 ||
bhagavanparvataṃ durgaṃ praviṣṭo 'smi sahānugaḥ |na ca paśyāmi tatsainyaṃ kva nu te māmakā gatāḥ || 7.89.11 ||
tacchrutvā tasya rājarṣernaṣṭasañjñasya bhāṣitam |pratyuvāca śubhaṃ vākyaṃ sāntvayanparayā girā || 7.89.12 ||
aśmavarṣeṇa mahatā bhṛtyāste vinipātitāḥ |tvaṃ cāśramapade supto vātavarṣabhayārditaḥ || 7.89.13 ||
samāśvasihi bhadraṃ te nirbhayo vigatajvaraḥ |phalamūlāśano vīra nivaseha yathāsukham || 7.89.14 ||
sa rājā tena vākyena pratyāśvasto mahāmatiḥ |pratyuvāca tato vākyaṃ dīno bhṛtyakṣayād bhṛśam || 7.89.15 ||
tyakṣyāmyahaṃ svakaṃ rājyaṃ nāhaṃ bhṛtyairvinākṛtaḥ |vartayeyaṃ kṣaṇaṃ brahmansamanujñātumarhasi || 7.89.16 ||
suto dharmaparo brahmañjyeṣṭho mama mahāyaśāḥ |śaśabinduriti khyātaḥ sa me rājyaṃ prapatsyate || 7.89.17 ||
na hi śakṣyāmyahaṃ hitvā bhṛtyadārānsukhānvitān |prativaktuṃ mahātejaḥ kiñcidapyaśubhaṃ vacaḥ || 7.89.18 ||
tathā bruvati rājendre budhaḥ paramamadbhutam |sāntvapūrvamathovāca vāsasta iha rocatām || 7.89.19 ||
na santāpastvayā kāryaḥ kārdameya mahābala |saṃvatsaroṣitasyeha kārayiṣyāmi te hitam || 7.89.20 ||
tasya tadvacanaṃ śrutvā budhasyākliṣṭakarmaṇaḥ |vāsāya vidadhe buddhiṃ yaduktaṃ brahmavādinā || 7.89.21 ||
māsaṃ sa strī tadā bhūtvā ramayatyaniśaṃ śudā |māsaṃ puruṣabhāvena dharmabuddhiṃ cakāra saḥ || 7.89.22 ||
tataḥ sā navame māsi ilā somasutātsutam |janayāmāsa suśroṇī purūravasamūrjitam || 7.89.23 ||
jātamātraṃ tu suśroṇī piturhaste nyaveśayat |budhasya samavarṇabhamilā putraṃ mahābalam || 7.89.24 ||
budhastu puruṣībhūtaṃ sa vai saṃvatsarāntaram |kathābhī ramayāmāsa dharmayuktābhirātmavān || 7.89.25 ||
tathoktavati rāme tu tasya janma tadadbhutam |uvāca lakṣmaṇo bhūyo bharataśca mahāyaśāḥ || 7.90.1 ||
ilā sā somaputrasya saṃvatsaramathoṣitā |akarotkiṃ naraśreṣṭha tattvaṃ śaṃsitumarhasi || 7.90.2 ||
tayostadvākyamādhuryaṃ niśamya paripṛcchatoḥ |rāmaḥ punaruvācemāṃ prajāpatisute kathām || 7.90.3 ||
puruṣatvaṃ gate śūre budhaḥ paramabuddhimān |saṃvartaṃ paramodāramājuhāva mahāyaśāḥ || 7.90.4 ||
cyavanaṃ bhṛguputraṃ ca muniṃ cāriṣṭaneminam |pramodanaṃ modakaraṃ tato durvāsasaṃ munim || 7.90.5 ||
etānsarvānsamānīya vākyajñastattvadarśanaḥ |uvāca sarvānsuhṛdo dhairyeṇa susamāhitān || 7.90.6 ||
ayaṃ rājā mahābāhuḥ kardamasya ilaḥ sutaḥ |jānītainaṃ yathābhūtaṃ śreyo hyatra vidhīyatām || 7.90.7 ||
teṣāṃ saṃvadatāmeva tamāśramamupāgamat |kardamastu mahātejā dvijaiḥ saha mahātmabhiḥ || 7.90.8 ||
pulastyaśca kratuścaiva vaṣaṭkārastathaiva ca |oṅkāraśca mahātejāstamāśramamupāgamat || 7.90.9 ||
te sarve hṛṣṭamanasaḥ parasparasamāgame |hitaiṣiṇo bālhipateḥ pṛthagvākyānyathābruvan || 7.90.10 ||
kardamastvabravīdvākyaṃ sutārthaṃ paramaṃ hitam |dvijāḥ śṛṇuta madvākyaṃ yacchreyaḥ pārthivasya hi || 7.90.11 ||
nānyaṃ paśyāmi bhaiṣajyamantarā vṛṣabhadhvajam |nāśvamedhātparo yajñaḥ priyaścaiva mahātmanaḥ |tasmādyajāmahe sarve pārthivārthe durāsadam || 7.90.12 ||
kardamenaivamuktāstu sarva eva dvijarṣabhāḥ |rocayanti sma taṃ yajñaṃ rudrasyārādhanaṃ prati || 7.90.13 ||
saṃvartasya tu rājarṣeḥ śiṣyaḥ purapurañjayaḥ |marutta iti vikhyātastaṃ yajñaṃ samupāharat || 7.90.14 ||
tato yajño mahānāsīdbudhāśramasamīpataḥ |rudraśca paramaṃ toṣamājagāma mahāyaśāḥ || 7.90.15 ||
atha yajñe samāpte tu prītaḥ paramayā mudā |umāpatirdvijānsarvānuvāca ilasannidhau || 7.90.16 ||
prīto 'smi hayamedhena bhaktyā ca dvijasattamāḥ |asya bāhlipateścaiva kiṃ karomi priyaṃ śubham || 7.90.17 ||
tathā vadati deveśe dvijāste susamāhitāḥ |prasādayanti deveśaṃ yathā syātpuruṣastvilā || 7.90.18 ||
tataḥ prīto mahādevaḥ puruṣatvaṃ dadau punaḥ |ilāyai sumahātejā dattvā cāntaradhīyata || 7.90.19 ||
nivṛtte hayamedhe ca gataścādarśanaṃ haraḥ |yathāgataṃ dvijāḥ sarve hyagacchandīrghadarśinaḥ || 7.90.20 ||
rājā tu bāhlimutsṛjya madhyadeśe hyanuttamam |niveśayāmāsa puraṃ pratiṣṭhānaṃ yaśaskaram || 7.90.21 ||
śaśabinduśca rājarṣirbāhliṃ purapurañjayaḥ |pratiṣṭhāne ilo rājā prajāpatisuto balī || 7.90.22 ||
sa kāle prāptavā~llokamilo brāhmamanuttamam |ailaḥ purūravā rājā pratiṣṭhānamavāptavān || 7.90.23 ||
īdṛśo hyaśvamedhasya prabhāvaḥ puruṣarṣabhau |strībhūtaḥ pauruṣaṃ lebhe yaccānyadapi durlabham || 7.90.24 ||
etadākhyāya kākutstho bhrātṛbhyāmamitaprabhaḥ |lakṣmaṇaṃ punarevāha dharmayuktamidaṃ vacaḥ || 7.91.1 ||
vasiṣṭhaṃ vāmadevaṃ ca jābālimatha kaśyapam |dvijāṃśca sarvapravarānaśvamedhapuraskṛtān || 7.91.2 ||
etānsarvānsamānīya mantrayitvā ca lakṣmaṇa |hayaṃ lakṣaṇasampannaṃ vimokṣyāmi samādhinā || 7.91.3 ||
tadvākyaṃ rāghaveṇoktaṃ śrutvā tvaritavikramaḥ |dvijānsarvānsamāhūya darśayāmāsa rāghavam || 7.91.4 ||
te dṛṣṭvā devasaṅkāśaṃ kṛtapādābhivandanam |rāghavaṃ sudurādharṣamāśīrbhiḥ samapūjayan || 7.91.5 ||
prāñjaliḥ sa tadā bhūtvā rāghavo dvijasattamān |ācacakṣe 'śvamedhasya hyabhiprāyaṃ mahāyaśāḥ || 7.91.6 ||
te tu rāmasya tacchrutvā namaskṛtvā vṛṣadhvajam |aśvamedhaṃ dvijāḥ sarve pūjayanti sma sarvaśaḥ || 7.91.7 ||
sa teṣāṃ dvijamukhyānāṃ vākyamadbhutadarśanam |aśvamedhāśritaṃ śrutvā bhṛśaṃ prīto 'bhavattadā || 7.91.8 ||
vijñāya karma tatteṣāṃ rāmo lakṣmaṇamabravīt |preṣayasva drutaṃ dūtān sugrīvāya mahātmane || 7.91.9 ||
yathā mahadbhirharibhirbahubhiśca vanaukasām |sārdhamāgaccha bhadraṃ te hyanubhoktuṃ mahotsavam || 7.91.10 ||
bibhīṣaṇaśca rakṣobhiḥ kāmagairbahubhirvṛtaḥ |aśvamedhaṃ mahāyajñamāyātvatulavikramaḥ || 7.91.11 ||
rājānaśca mahābhāgā ye me priyacikīrṣavaḥ |sānugāḥ kṣipramāyāntu yajñaṃ draṣṭumanuttamam || 7.91.12 ||
deśāntaragatā ye ca dvijā dharmasamāhitāḥ |āmantrayasva tānsarvānaśvamedhāya lakṣmaṇa || 7.91.13 ||
ṛṣayaśca mahābāho āhūyantāṃ tapodhanāḥ |deśāntaragatāḥ sarve sadārāśca dvijātayaḥ |tathaiva tālāvacarāstathaiva naṭanartakāḥ || 7.91.14 ||
yajñavāṭaśca sumahāngomatyā naimiśe vane |ājñāpyatāṃ mahābāho taddhi puṇyamanuttamam || 7.91.15 ||
śāntayaśca mahābāho pravartyantāṃ samantataḥ || 7.91.16 ||
śataśaścāpi dharmajñāḥ kratumukhyamanuttamam |anubhūya mahāyajñaṃ naimiśe raghunandana || 7.91.17 ||
tuṣṭaḥ puṣṭaśca sarvo 'sau mānitaśca yathāvidhi |prītiṃ yāsyati dharmajña śīghramāmantryatāṃ janaḥ || 7.91.18 ||
śataṃ vāhasahasrāṇāṃ taṇḍulānāṃ vapuṣmatām |ayutaṃ tilamudgānāṃ prayātvagre mahābala || 7.91.19 ||
caṇakānāṃ kulitthānāṃ māṣāṇāṃ lavaṇasya ca |ato 'nurūpaṃ snehaṃ ca gandhaṃ saṅkṣiptameva ca || 7.91.20 ||
suvarṇakoṭyo bahulā hiraṇyasya śatottarāḥ |agrato bharataḥ kṛtvā gacchatvagre samādhinā || 7.91.21 ||
antarā paṇyavīthyaśca sarve ca naṭanartakāḥ |sūdā nāryaśca bahavo nityaṃ yauvanaśālinaḥ || 7.91.22 ||
bharatena tu sārdhaṃ te yāntu sainyāni cāgrataḥ |naigamā balavṛddhāśca dvijāśca susamāhitāḥ || 7.91.23 ||
karmāntikānvardhakinaḥ kośādhyakṣāṃśca naigamān |mama māta'stathā sarvāḥ kumārāntaḥpurāṇi ca || 7.91.24 ||
kāñcanīṃ mama patnīṃ ca dīkṣāyāṃ jñāṃśca karmaṇi |agrato bharataḥ kṛtvā gacchatvagre mahāyaśāḥ || 7.91.25 ||
upakāryā mahārhāśca pārthivānāṃ mahaujasām |sānugānāṃ naraśreṣṭho vyādideśa mahābalaḥ || 7.91.26 ||
tatsarvamakhilenāśu prasthāpya bharatāgrajaḥ |hayaṃ lakṣaṇasampannaṃ kṛṣṇasāraṃ mumoca ha || 7.92.1 ||
ṛtvigbhirlakṣmaṇaṃ sārdhamaśvatantre niyojya ca |tato 'bhyagacchatkākutsthaḥ saha sainyena naimiśam || 7.92.2 ||
yajñavāṭaṃ mahābāhurdṛṣṭvā paramamadbhutam |prabarṣamatulaṃ lebhe śrīmāniti vaco 'bravīt || 7.92.3 ||
naimiṣe vasatastasya sarva eva narādhipāḥ |āninyurupahārāṃśca tānrāmaḥ pratyapūjayat || 7.92.4 ||
upakāryā mahārhāśca pārthivānāṃ mahātmanām |sānugānāṃ naraśreṣṭho vyādideśa mahāmatiḥ || 7.92.5 ||
annapānāni vastrāṇi sānugānāṃ mahātmanām |bharataḥ sandadāvāśu śatrughnasahitastadā || 7.92.6 ||
vānarāśca mahātmānaḥ sugrīvasahitāstadā |viprāṇāṃ praṇatāḥ sarve cakrire pariveṣaṇam || 7.92.7 ||
bibhīṣaṇaśca rakṣobhirbahubhiḥ sragvibhirvṛtaḥ |ṛṣīṇāmugratapasāṃ pūjāṃ cakre mahātmanām || 7.92.8 ||
evaṃ suvihito yajño hayamedho 'bhyavartata |lakṣmaṇenāguptā ca hayacaryā pravartata |īdṛśaṃ rājasiṃhasya yajñapravaramuttamam || 7.92.9 ||
nānyaḥ śabdo 'bhavattatra hayamedhe mahātmanaḥ |chandato dehi visrabdho yāvattuṣyanti yācakāḥ || 7.92.10 ||
tāvatsarvāṇi dattāni kratumadhye mahātmanaḥ |vividhāni ca gauḍāni khāṇḍavāni tathaiva ca || 7.92.11 ||
na nissṛtaṃ bhatatyoṣṭhādvacanaṃ yāvadarthinām |tāvadvānararakṣobhirdattamevābhyadṛśyata || 7.92.12 ||
na kaścinmalinastatra dīno vā 'pyatha kṛrśataḥ |tasminyajñavare rājño hṛṣṭapuṣṭajanāvṛte || 7.92.13 ||
ye ca tatra mahātmāno munayaścirajīvinaḥ |nāsmaraṃstādṛśaṃ yajñaṃ nāpyāsīt sa kadācana || 7.92.14 ||
yaḥ kṛtyavānsuvarṇena suvarṇaṃ labhate sma saḥ |vittārthī labhate vittaṃ ratnārthī ratnameva ca || 7.92.15 ||
rajatānāṃ suvarṇānāmaśmanāmatha vāsasām |aniśaṃ dīyamānānāṃ rāśiḥ samupadṛśyate || 7.92.16 ||
na śakrasya dhaneśasya yamasya varuṇasya vā |īdṛśo dṛṣṭapūrvo na evamūcustapodhanāḥ || 7.92.17 ||
sarvatra vānarāstasthuḥ sarvatraiva ca rākṣasāḥ |vāsodhanānnamarthibhyaḥ pūrṇahastā dadurbhṛśam || 7.92.18 ||
īdṛśo rājasiṃhasya yajñaḥ sarvaguṇānvitaḥ |saṃvatsaramatho sāgraṃ vartate na ca hīyate || 7.92.19 ||
vartamāne tathābhūte yajñe ca paramādbhute |saśiṣya ājagāmāśu vālmīkirmunipuṅgavaḥ || 7.93.1 ||
sa dṛṣṭvā divyasaṅkāśaṃ yajñamadbhutadarśanam |ekānte ṛṣivāṭānāṃ cakāra uṭajāñchubhān || 7.93.2 ||
śakaṭāṃśca bahūnpūrṇānphalamūlaiśca śobhanān |vālmīkivāṭe rucire sthāpayannavidūrataḥ || 7.93.3 ||
āsītsupūjito rājñā munibhiśca mahātmabhiḥ |vālmīkiḥ sumahātejā nyavasatparamātmavān || 7.93.4 ||
sa śiṣyāvabravīddhṛṣṭau yuvāṃ gatvā samāhitau |kṛtsnaṃ rāmāyaṇaṃ kāvyaṃ gāyethāṃ parayā mudā || 7.93.5 ||
ṛṣivāṭeṣu puṇyeṣu brāhmaṇāvasatheṣu ca |rathyāsu rājamārgeṣu pārthivānāṃ gṛheṣu ca || 7.93.6 ||
rāmasya bhavanadvāri yatra karma ca kurvate |ṛtvijāmagrataścaiva tatra geyaṃ viśeṣataḥ || 7.93.7 ||
imāni ca phalānyatra svādūni vividhāni ca |jātāni parvatāgreṣu cāsvādyāsvādya gāyatām || 7.93.8 ||
na yāsyathaḥ śramaṃ vatsau bhakṣayitvā phalāni vai |mūlāni ca sumṛṣṭāni nagarādbahirāsyathaḥ || 7.93.9 ||
yadi śabdāpayedrāmaḥ śravaṇāya mahīpatiḥ |ṛṣīṇāmupaviṣṭānāṃ tato geyaṃ pravartatām || 7.93.10 ||
divase viṃśatiḥ sargā geyā madhurayā girā |pramāṇairbahubhistatra yathoddiṣṭā mayā purā || 7.93.11 ||
lobhaścāpi na kartavyaḥ svalpo 'pi dhanakāṅkṣayā |kiṃ dhanenāśramasthānāṃ phalamūlopajīvinā || 7.93.12 ||
yadi pṛcchetsa kākutstho yuvāṃ kasyeti dārakau |āvāṃ vālmīkiśiṣyau svo brūtamevaṃ narādhipam || 7.93.13 ||
imāstantrīḥ sumadhurāḥ sthānaṃ vā 'pūrvadarśanam |mūrcchayitvā sumadhuraṃ gāyatāṃ vigatajvarau || 7.93.14 ||
ādiprabhṛti geyaṃ syānna cāvajñāya pārthivam |pitā hi sarvabhūtānāṃ rājā bhaviti dharmataḥ || 7.93.15 ||
tadyuvāṃ hṛṣṭamanasau śvaḥ prabhāte samāsthitau |gāyethāṃ madhuraṃ geyaṃ tantrīlayasamanvitam || 7.93.16 ||
iti sandiśya bahuśo muniḥ prācetasastadā |vālmīkiḥ paramodārastūṣṇīmāsīnmahāyaśāḥ || 7.93.17 ||
sandiṣṭau muninā tena tāvubhau maithilīsutau |tathaiva karavāveti nirjagmaturarindamau || 7.93.18 ||
tāmadbhutāṃ tau hṛdaye kumārau niveśya vāṇīmṛṣibhāṣitāṃ tadā |samutsukau tau samamūṣaturniśāṃ yathā 'śvinau bhārgavanītisaṃhitām || 7.93.19 ||
tau rajanyāṃ prabhātāyāṃ snātau hutahutāśanau |yathoktamṛṣiṇā pūrvaṃ sarvaṃ tatropagāyatām || 7.94.1 ||
tāṃ sa śuśrāva kākutsthaḥ pūrvācāryavijirmitām |apūrvāṃ pāṭhyajātiṃ ca geyena samalaṅkṛtām || 7.94.2 ||
pramāṇairbahubhirbaddhāṃ tantrīlayasamanvitām |bālābhyāṃ rāghavaḥ śrutvā kautūhalaparo 'bhavat || 7.94.3 ||
atha karmāntare rājā samāhūya mahāmunīn |pārthivāṃśca naravyāghraḥ paṇḍitānnaigamāṃstathā || 7.94.4 ||
paurāṇikāñchabdavido ye ca vṛddhā dvijātayaḥ |svarāṇāṃ lakṣaṇajñāṃśca utsukāndvijasattamān || 7.94.5 ||
lakṣaṇajñāṃśca gāndharvānnaigamāṃśca viśeṣataḥ |pādākṣarasamāsajñāṃśchandaḥsu pariniṣṭhitān || 7.94.6 ||
kalāmātrāviśeṣajñāñjyotiṣe ca paraṃ gatān |kriyākalpavidaścaiva tathā kāryavido janān || 7.94.7 ||
bhāṣājñāniṅgitajñāṃśca naigamāṃścāpyaśeṣataḥ |hetūpacārakuśalān vacane cāpi haitukān || 7.94.8 ||
chandovidaḥ purāṇajñānvaidikāndvijasattamān |citrajñānvṛttasūtrajñāngītanṛtyaviśāradān || 7.94.9 ||
śāstrajñānnītinipuṇānvedāntārthaprabodhakān |etānsarvānsamānīya gātārau samaveśayat || 7.94.10 ||
dṛṣṭvā munigaṇāḥ sarve pārthivāśca mahaujasaḥ |pibanta iva cakṣurbhyāṃ rājānaṃ gāyakau ca tau || 7.94.11 ||
ūcuḥ parasparaṃ cedaṃ sarva eva samantataḥ |ubhau rāmasya sadṛśau bimbādbimbamivotthitau || 7.94.12 ||
jaṭilau yadi na syātāṃ na valkaladharau yadi |viśeṣaṃ nādhigacchāmo gāyato rāghavasya ca || 7.94.13 ||
teṣāṃ saṃvadatāmevaṃ śrota'ṇāṃ harṣavardhanam |geyaṃ pracakratustatra tāvubhau munidārakau || 7.94.14 ||
tataḥ pravṛttaṃ madhuraṃ gāndharvamatimānuṣam |na ca tṛptiṃ yayuḥ sarve śrotāro gānasampadā || 7.94.15 ||
pravṛttamāditaḥ pūrvasargaṃ nāradadarśitam |tataḥ prabhṛti sargāṃśca yāvadviṃśatyagāyatām || 7.94.16 ||
tato 'parāhṇasamaye rāghavaḥ samabhāṣata |śrutvā viṃśatisargāṃstānbhrātaraṃ bhrātṛvatsalaḥ || 7.94.17 ||
aṣṭādaśasahasrāṇi suvarṇasya mahātmanoḥ |prayaccha śīghraṃ kākutstha yadanyadabhikāṅkṣitam |dadau śīghraṃ sa kākutstho bālayorvai pṛthakpṛthak || 7.94.18 ||
dīyamānaṃ suvarṇaṃ tu nāgṛhṇītāṃ kuśīlavau |ūcatuśca mahātmānau kimaneneti vismitau || 7.94.19 ||
vanyena phalamūlena niratau vanavāsinau |suvarṇena hiraṇyena kiṃ kariṣyāvahe vane || 7.94.20 ||
tathā tayoḥ prabruvatoḥ kautūhalasamanvitāḥ |śrotāraścaiva rāmaśca sarva eva suvismitāḥ || 7.94.21 ||
tasya caivāgamaṃ rāmaḥ kāvyasya śrotumutsukaḥ |papraccha tau mahātejāstāvubhau munidārakau || 7.94.22 ||
kimpramāṇamidaṃ kāvyaṃ kā pratiṣṭhā mahātmanaḥ |kartā kāvyasya mahataḥ kva cāsau munipuṅgavaḥ || 7.94.23 ||
pṛcchantaṃ rāghavaṃ vākyamūcaturmunidārakau || 7.94.24 ||
vālmīkirbhagavānkartā samprāpto yajñasaṃvidham |yenedaṃ caritaṃ tubhyamaśeṣaṃ sampradarśitam || 7.94.25 ||
sannibaddhaṃ hi ślokānāṃ caturviśatsahasrakam |upākhyānaśataṃ caiva bhārgaveṇa tapasvinā || 7.94.26 ||
ādiprabhṛti vai rājanpañcasargaśatāni ca |kāṇḍāni ṣaṭ kṛtānīha sottarāṇi mahātmanā |kṛtāni guruṇāsmākamṛṣiṇā caritaṃ tava || 7.94.27 ||
pratiṣṭhā ' 'jīvitaṃ yāvattāvatsarvasya vartate || 7.94.28 ||
sottarāṇi mahātmanā |yadi buddhiḥ kṛtā rājañchravaṇāya mahāratha |karmāntare kṣaṇībhūtastacchṛṇuṣva sahānujaḥ || 7.94.29 ||
bāḍhamityabravīdrāmastau cānujñāpya rāghavam |prahṛṣṭau jagmatuḥ sthānaṃ yatrāste munipuṅgavaḥ || 7.94.30 ||
rāmo 'pi munibhiḥ sārdhaṃ pārthivaiśca mahātmabhiḥ |śrutvā tadgītimādhuryaṃ karmaśālāmupāgamat || 7.94.31 ||
śuśrāva tattālalayopapannaṃ sargānvitaṃ sa svaraśabdayuktam |tantrīlayavyañjanayogayuktaṃ kuśīlavābhyāṃ parigīyamānam || 7.94.32 ||
rāmo bahūnyahānyevaṃ tadgītaṃ paramaṃ śubham |śuśrāva munibhiḥ sārdhaṃ pārthivaiḥ saha vānaraiḥ || 7.95.1 ||
tasmingīte tu vijñāya sītāputrau kuśīlavau |tasyāḥ pariṣado madhye rāmo vacanamabravīt |dūtāñchuddhasamācārānāhūyātmamanīṣayā || 7.95.2 ||
madvaco brūta gacchadhvamito bhagavato 'ntikam || 7.95.3 ||pariṣado madhye rāmo vacanamabravīt |yadi śuddhasamācārā yadi vā vītakalmaṣā |karotvihātmanaḥ śuddhimanumānya mahāmunim || 7.95.4 ||
chandaṃ muneśca vijñāya sītāyāśca manogatam |pratyayaṃ dātukāmāyāstataḥ śaṃsata me laghu || 7.95.5 ||
śvaḥ prabhāte tu śapathaṃ maithilī janakātmajā |karotu pariṣanmadhye śodhanārthaṃ mamaiva ca || 7.95.6 ||
śrutvā tu ṟāgavasyaitadvacaḥ paramamadbhutam |dūtāḥ samprayayurbāṭaṃ yatrāste munipuṅgavaḥ || 7.95.7 ||
te praṇamya mahātmānaṃ jvalantamamitaprabham |ūcuste rāmavākyāni mṛdūni madhurāṇi ca || 7.95.8 ||
teṣāṃ tadvyāhṛtaṃ śrutvā rāmasya ca manogatam |vijñāya sumahātejā munirvākyamathābravīt || 7.95.9 ||
evaṃ bhavatu bhadraṃ vo yathā vadati rāghavaḥ |tathā kariṣyate sītā daivataṃ hi patiḥ striyāḥ || 7.95.10 ||
tathoktā muninā sarve rājadūtā mahaujasam |pratyetya rāghavaṃ kṣipraṃ munivākyaṃ babhāṣire || 7.95.11 ||
tataḥ prahṛṣṭaḥ kākutsthaḥ śrutvā vākyaṃ mahātmanaḥ |ṛṣīṃstatra sametāṃśca rājñaścaivābhyabhāṣata || 7.95.12 ||
bhagavantaḥ saśiṣyā vai sānugāśca narādhipāḥ |paśyantu sītāśapathaṃ yaścaivānyo 'pi kāṅkṣate || 7.95.13 ||
tasya tadvacanaṃ śrutvā rāghavasya mahātmanaḥ |sarveṣāmṛṣimukhyānāṃ sādhuvādo mahānabhūt || 7.95.14 ||
rājānaśca mahātmānaḥ praśaṃsanti sma rāghavam |upapannaṃ naraśreṣṭha tvayyeva bhuvi nānyataḥ || 7.95.15 ||
evaṃ viniścayaṃ kṛtvā śvobhūta iti rāghavaḥ |visarjayāmāsa tadā sarvāṃstāñchatrusūdanaḥ || 7.95.16 ||
iti sampravicārya rājasiṃhaḥ śvobhūte śapathasya niścayaṃ vai |visasarja munīnnṛpāṃśca sarvānsa mahātmā mahato mahānubhāvaḥ || 7.95.17 ||
tasyāṃ rajanyāṃ vyuṣṭāyāṃ yajñavāṭagato nṛpaḥ |ṛṣīnsarvānmahātejāḥ śabdāpayati rāghavaḥ || 7.96.1 ||
vasiṣṭho vāmadevaśca jābāliratha kāśyapaḥ |viśvāmitro dīrghatapā durvāsāśca mahātapāḥ || 7.96.2 ||
pulastyo 'pi tathā śaktirbhārgavaścaiva vāmanaḥ |mārkaṇḍeyaśca dīrghāyurmaudgalyaśca mahāyaśāḥ || 7.96.3 ||
gargaśca cyavanaścaiva śatānandaśca dharmavit |bharadvājaśca tejasvī hyagniputraśca suprabhaḥ || 7.96.4 ||
nāradaḥ parvataścaiva gautamaśca mahāyaśāḥ |kātyāyanaḥ suyajñaśca hyagastyastapasāṃ nidhiḥ || 7.96.5 ||
ete cānye ca bahavo munayaḥ saṃśitavratāḥ |kautūhalasamāviṣṭāḥ sarva eva samāgatāḥ || 7.96.6 ||
rākṣasāśca mahāvīryā vānarāśca mahābalāḥ |sarva eva samājagmurmahātmānaḥ kutūhalāt || 7.96.7 ||
kṣatriyā ye ca śūdrāśca vaiśyāścaiva sahasraśaḥ |nānādeśagatāścaiva brāhmaṇāḥ saṃśitavratāḥ || 7.96.8 ||
jñānaniṣṭhāḥ karmaniṣṭhāḥ yoganiṣṭhāstathāpare |sītāśapathavīkṣārthaṃ sarva eva samāgatāḥ || 7.96.9 ||
tadā samāgataṃ sarvamaśmabhūtamivācalam |śrutvā munivarastūrṇaṃ sasītaḥ samupāgamat || 7.96.10 ||
tamṛṣiṃ pṛṣṭhataḥ sītā tvanvagacchadavāṅmukhī |kṛtāñjalirbāṣpagalā kṛtvā rāmaṃ manogatam || 7.96.11 ||
dṛṣṭvā śrutimivāyāntīṃ brahmāṇamanugāminīm |vālmīkeḥ pṛṣṭhataḥ sītāṃ sādhuvādo mahānabhūt || 7.96.12 ||
tato halahalāśabdaḥ sarveṣāmevamābabhau |duḥkhajanmaviśālena śokenākulitātmanām || 7.96.13 ||
sādhu rāmeti kecittu sādhu sīteti cāpare |ubhāveva ca tatrānye prekṣakāḥ sampracukruśuḥ || 7.96.14 ||
tato madhye janaughasya praviśya munipuṅgavaḥ |sītāsahāyo vālmīkiriti hovāca rāghavam || 7.96.15 ||
iyaṃ dāśarathe sītā suvratā dharmacāriṇī |apavādaiḥ parityaktā mamāśramasamīpataḥ || 7.96.16 ||
lokāpavādabhītasya tava rāma mahāvrata |pratyayaṃ dāsyate sītā tadanujñātumarhasi || 7.96.17 ||
imau tu jānakīputrāvubhau ca yamajātakau |sutau tavaiva durdharṣau satyametadbravīmi te || 7.96.18 ||
pracetaso 'haṃ daśamaḥ putro rāghavanandana |na smarāmyanṛtaṃ vākyamimau tu tava putrakau || 7.96.19 ||
bahuvarṣasahasrāṇi tapaścaryā mayā kṛtā |nopāśnīyāṃ phalaṃ tasyā duṣṭeyaṃ yadi maithilī || 7.96.20 ||
manasā karmaṇā vācā bhūtapūrvaṃ na kilbiṣam |tasyāḥ phalamupāśnīyāmapāpā maithilī yadi || 7.96.21 ||
ahaṃ pañcasu bhūteṣu manaṣṣaṣṭheṣu rāghava |vicintya sītāṃ śuddheti jagrāha vananirjhare || 7.96.22 ||
iyaṃ śuddhasamācārā apāpā patidevatā |lokāpavādabhītasya pratyayaṃ tava dāsyati || 7.96.23 ||
tasmādiyaṃ naravarātmaja śuddhabhāvā divyena dṛṣṭiviṣayeṇa tadā praviṣṭā |lokāpavādakaluṣīkṛtacetasā yā tyaktā tvayā priyatamā viditā 'pi śuddhā || 7.96.24 ||
vālmīkinaivamuktastu rāghavaḥ pratyabhāṣata |prāñjalirjagato madhye dṛṣṭvā tāṃ varavarṇinīm || 7.97.1 ||
evametanmahābhāga yathā vadasi dharmavit |pratyayastu mama brahmaṃstava vākyairakalmaṣaiḥ || 7.97.2 ||
pratyayastu purā vṛtto vaidehyāḥ surasannidhau |śapathastu kṛtastatra tena veśma praveśitā |lokāpavādo balavānyena tyaktā hi maithilī || 7.97.3 ||
seyaṃ lokabhayādbrahmannapāpetyabhijānatā |parityaktā mayā sītā tadbhāvankṣantumarhati || 7.97.4 ||
jānāmi cemau putrau me yamajātau kuśīlavau |śuddhāyāṃ jagato madhye maithilyāṃ prītirastu me || 7.97.5 ||
abhiprāyaṃ tu vijñāya rāmasya surasattamāḥ |sītāyāḥ śapathe tasmin mahendrādyā mahaujasaḥ || 7.97.6 ||
pitāmahaṃ puraskṛtya sarva eva samāgatāḥ || 7.97.7 ||
ādityā vasavo rudrā hyaśvinau samarudgaṇāḥ |gandharvāpsarasaścaiva sarva eva samāgatāḥ || 7.97.8 ||
sādhyāśca viśvedevāśca sarve ca paramarṣayaḥ |nāgāḥ suparṇāḥ siddhāśca te sarve hṛṣṭamānasāḥ |sītāśapathasambhrāntāḥ sarva eva samāgatāḥ || 7.97.9 ||
dṛṣṭvā devānṛṣīṃścaiva rāghavaḥ punarabravīt |pratyayo me naraśreṣṭhā ṛṣivākyairakalmaṣaiḥ || 7.97.10 ||
śuddhāyāṃ jagato madhye vaidehyāṃ prītirastu me || 7.97.11 ||
tato vāyuḥ śubhaḥ puṇyo divyagandho manoramaḥ |tajjanaughaṃ suraśreṣṭho hlādayāmāsa sarvataḥ || 7.97.12 ||
tadadbhutamivācintyaṃ niraikṣanta samāgatāḥ |mānavāḥ sarvarāṣṭrebhyaḥ pūrvaṃ kṛtayuge yathā || 7.97.13 ||
sarvānsamāgatāndṛṣṭvā sītā kāṣāyavāsinī |abravītprāñjalirvākyamadhodṛṣṭiravāṅmukhī || 7.97.14 ||
yathā 'haṃ rāghavādanyaṃ manasāpi na cintaye |tathā me mādhavī devī vivaraṃ dātumarhati || 7.97.15 ||
manasā karmaṇā vācā yathā rāmaṃ samarcaye |tathā me mādhavī devī vivaraṃ dātumarhati || 7.97.16 ||
yathaitatsatyamuktaṃ me vedmi rāmātparaṃ na ca |tathā me mādhavī devī vivaraṃ dātumarhati || 7.97.17 ||
tathā śapantyāṃ vaidehyāṃ prādurāsīttadadbhutam |bhūtalādutthitaṃ divyaṃ siṃhāsanamanuttamam || 7.97.18 ||
dhriyamāṇaṃ śirobhistu nāgairamitavikramaiḥ |divyaṃ divyena vapuṣā divyaratnavibhūṣitaiḥ || 7.97.19 ||
tasmiṃstu dharaṇī devī bāhubhyāṃ gṛhya maithilīm |svāgatenābhinandyaināmāsane copaveśayat || 7.97.20 ||
tāmāsanagatāṃ dṛṣṭvā praviśantīṃ rasātalam |puṣpavṛṣṭiravicchinnā divyā sītāmavākirat || 7.97.21 ||
sādhukāraśca sumahāndevānāṃ sahasotthitaḥ |sādhu sādhviti vai sīte yasyāste śīlamīdṛśam || 7.97.22 ||
evaṃ bahuvidhā vāco hyantarikṣagatāḥ surāḥ |vyājahrurhṛṣṭamanaso dṛṣṭvā sītāpraveśanam || 7.97.23 ||
yajñavāṭagatāścāpi munayaḥ sarva eva te |rājānaśca naravyāghrā vismayānnoparemire || 7.97.24 ||
antarikṣe ca bhūmau ca sarve sthāvarajaṅgamāḥ |dānavāśca mahākāyāḥ pātāle pannagādhipāḥ || 7.97.25 ||
kecidvineduḥ saṃhṛṣṭāḥ keciddhyānaparāyaṇāḥ |kecidrāmaṃ nirīkṣante kecitsītāmacetanāḥ || 7.97.26 ||
sītāpraveśanaṃ dṛṣṭvā teṣāmāsītsamāgamaḥ |tanmuhūrtamivātyarthaṃ samaṃ sammohitaṃ jagat || 7.97.27 ||
rasātalaṃ praviṣṭāyāṃ vaidehyāṃ sarvavānarāḥ |cukruśuḥ sādhu sādhvīti munayo rāmasannidhau || 7.98.1 ||
daṇḍakāṣṭhamavaṣṭabhya bāṣpavyākulitekṣaṇaḥ |avākchirā dīnamanā rāmo hyāsītsuduḥkhitaḥ || 7.98.2 ||
sa ruditvā ciraṃ kālaṃ bahuśo bāṣpamutsṛjan |krodhaśokasamāviṣṭo rāmo vacanamabravīt || 7.98.3 ||
abhūtapūrvaṃ śokaṃ me manaḥ spraṣṭumivecchati |paśyato me yathā naṣṭā sītā śrīriva rūpiṇī || 7.98.4 ||
sā 'darśanaṃ purā sītā laṅkāpāre mahodadheḥ |tataścāpi mayānītā kiṃ punarvasudhātalāt || 7.98.5 ||
vasudhe devi bhavati sītā niryātyatāṃ mama |darśayiṣyāmi vā roṣaṃ yathā māmavagacchasi || 7.98.6 ||
kāmaṃ śvaśrūrmamaiva tvaṃ tvatsakāśāddhi maithilī |karṣatā halahastena janakenoddhṛtā purā || 7.98.7 ||
tasmānniryātyatāṃ sītā vivaraṃ vā prayaccha me |pātāle nākapṛṣṭhe vā vaseyaṃ sahitastayā || 7.98.8 ||
ānaya tvaṃ hi tāṃ sītāṃ matto 'haṃ maithilīkṛte |na me dāsyasi cetsītāṃ yathārūpāṃ mahītale || 7.98.9 ||
saparvatavanāṃ kṛtsnāṃ vidhamiṣyāmi te sthitam |nāśayiṣyāmyahaṃ bhūmiṃ sarvamāpo bhavatviha || 7.98.10 ||
evaṃ bruvāṇe kākutsthe krodhaśokasamanvite |brahmā suragaṇaiḥ sārdhamuvāca raghunandanam || 7.98.11 ||
rāma rāma na santāpaṃ kartumarhasi suvrata |smara tvaṃ pūrvakaṃ bhāvaṃ mantraṃ cāmitrakarśana || 7.98.12 ||
na khalu tvāṃ mahābāho smārayeyamanuttamam |imaṃ muhūrtaṃ durdharṣa smara tvaṃ janma vaiṣṇavam || 7.98.13 ||
sītā hi vimalā sādhvī tava pūrvaparāyaṇā |nāgalokaṃ sukhaṃ prāyāttvadāśrayatapobalāt || 7.98.14 ||
svarge te saṅgamo bhūyo bhaviṣyati na saṃśayaḥ |asyāstu pariṣanmadhye yadbravīmi nibodha tat || 7.98.15 ||
etadeva hi kāvyaṃ te kāvyānāmuttamaṃ śrutam |sarvaṃ vistarato rāma vyākhyāsyati na saṃśayaḥ || 7.98.16 ||
janmaprabhṛti te vīra sukhaduḥkhopasevanam |bhaviṣyaduttaraṃ ceha sarvaṃ vālmīkinā kṛtam || 7.98.17 ||
ādikāvyamidaṃ rāma tvayi sarvaṃ pratiṣṭhitam |nahyanyo 'rhati kāvyānāṃ yaśobhāgrāghavādṛte || 7.98.18 ||
śrutaṃ te pūrvametaddhi mayā sarvaṃ suraiḥ saha |divyamadbhutarūpaṃ ca satyavākyamanāvṛtam || 7.98.19 ||
sa tvaṃ puruṣaśārdūla dharmeṇa susamāhitaḥ |śeṣaṃ bhaviṣyaṃ kākutstha kāvyaṃ rāmāyaṇaṃ śṛṇu || 7.98.20 ||
uttaraṃ nāma kāvyasya śeṣamatra mahāyaśaḥ |tacchṛṇuṣva mahāteja ṛṣibhiḥ sārdhamuttamam || 7.98.21 ||
na khalvanyena kākutstha śrotavyamidamuttamam |paramam ṛṣiṇā vīra tvayaiva raghunandana || 7.98.22 ||
etāvaduktvā vacanaṃ brahmā tribhuvaneśvaraḥ |jagāma tridivaṃ devo devaiḥ saha sabāndhavaiḥ || 7.98.23 ||
ye ca tatra mahātmāna ṛṣayo brāhmalaukikāḥ |brahmaṇā samanujñātā nyavartanta mahaujasaḥ |uttaraṃ śrotumanaso bhaviṣyaṃ yacca rāghave || 7.98.24 ||
tato rāmaḥ śubhāṃ vāṇīṃ devadevasya bhāṣitām |śrutvā paramatejasvī vālmīkimidamabravīt || 7.98.25 ||
bhagavan śrotumanasa ṛṣayo brāhmalaukikāḥ |bhaviṣyaduttaraṃ yanme śvobhūte sampravartatām || 7.98.26 ||
evaṃ viniścayaṃ kṛtvā sampragṛhya kuśīlavau |taṃ janaughaṃ visṛjyātha parṇaśālāmupāgamat |tāmeva śocataḥ sītāṃ sā vyatīyāya śarvarī || 7.98.27 ||
rajanyāṃ tu prabhātāyāṃ samānīya mahāmunīn |gīyatāmaviśaṅkābhyāṃ rāmaḥ putrāvuvāca ha || 7.99.1 ||
tataḥ samupaviṣṭeṣu brahmarṣiṣu mahātmasu |bhaviṣyaduttaraṃ kāvyaṃ jagatustau kuśīlavau || 7.99.2 ||
praviṣṭāyāṃ tu sītāyāṃ bhūtalaṃ satyasampadā |tasyāvasāne yajñasya rāmaḥ paramadurmanāḥ || 7.99.3 ||
apaśyamāno vaidehīṃ mene śūnyamidaṃ jagat |śokena paramāyasto na śāntiṃ manasā 'gamat || 7.99.4 ||
visṛjya pārthivānsarvānṛkṣavānararākṣasān |janaughaṃ vipramukhyānāṃ vittapūrvaṃ visṛjya ca || 7.99.5 ||
evaṃ samāpya yajñaṃ tu vidhivatsa tu rāghavaḥ |tato visṛjya tānsarvānrāmo rājīvalocanaḥ || 7.99.6 ||
hṛdi kṛtvā tadā sītāmayodhyāṃ praviveśa ha |iṣṭayajño narapatiḥ putradvayasamanvitaḥ || 7.99.7 ||
na sītāyāḥ parāṃ bhāryāṃ vavre sa raghunandanaḥ |yajñe yajñe ca patnyarthaṃ jānakī kāñcanī bhavat || 7.99.8 ||
daśavarṣasahasrāṇi vājimeghānathākarot |vājapeyāndaśaguṇāṃstathā bahusuvarṇakān || 7.99.9 ||
agniṣṭomātirātrābhyāṃ gosavaiśca mahādhanaiḥ |īje kratubhiranyaiśca sa śrīmānāptadakṣiṇaiḥ || 7.99.10 ||
evaṃ sa kālaḥ sumahānrājyasthasya mahātmanaḥ |dharme prayatamānasya vyatīyādrāghavasya tu || 7.99.11 ||
anurañjanti rājānamahanyahani rāghavam |ṛkṣavānararakṣāṃsi sthitā rāmasya śāsane || 7.99.12 ||
kāle varṣati parjanyaḥ subhikṣaṃ vimalā diśaḥ |hṛṣṭapuṣṭajanākīrṇaṃ puraṃ janapadāstathā || 7.99.13 ||
nākāle mriyate kaścinna vyādhiḥ prāṇināṃ tathā |nānartho vidyate kaścidrāme rājyaṃ praśāsati || 7.99.14 ||
atha dīrghasya kālasya rāmamātā yaśasvinī |putrapautraiḥ parivṛtā kāladharmamupāgamat || 7.99.15 ||
anviyāya sumitrā ca kaikeyī ca yaśasvinī |dharmaṃ kṛtvā bahuvidhaṃ tridive paryavasthitā || 7.99.16 ||
sarvāḥ pramuditāḥ svarge rājñā daśarathena ca |samāgatā mahābhāgāḥ sarvadharmaṃ ca lebhire || 7.99.17 ||
tāsāṃ rāmo mahādānaṃ kāle kāle prayacchati |māta'ṇāmaviśeṣeṇa brāhmaṇeṣu tapasviṣu || 7.99.18 ||
pitryāṇi brahmaratnāni yajñānparamadustarān |cakāra rāmo dharmātmā pita'ndevānvivardhayan || 7.99.19 ||
evaṃ varṣasahasrāṇi bahūnyatha yayuḥ sukham |yajñairbahuvidhaṃ dharmaṃ vardhayānasya sarvadā || 7.99.20 ||
kasyacittvatha kālasya yudhājitkekayo nṛpaḥ |svaguruṃ preṣayāmāsa rāghavāya mahātmane |gārgyamaṅgirasaḥ putraṃ brahmarṣimamitaprabham || 7.100.1 ||
daśa cāśvasahasrāṇi prītidānamanuttamam || 7.100.2 ||
kambalāni ca ratnāni citravastramathottamam |rāmāya pradadau rājā śubhānyābharaṇāni ca || 7.100.3 ||
śrutvā tu rāghavo dhīmānmaharṣiṃ gārgyamāgatam |mātulasyāśvapatinaḥ prahitaṃ tanmahādhanam || 7.100.4 ||
pratyudgamya ca kākutsthaḥ krośamātraṃ sahānujaḥ |gārgyaṃ sampūjayāmāsa yathā śakro bṛhaspatim || 7.100.5 ||
tathā sampūjya tamṛṣiṃ taddhanaṃ pratigṛhya ca |pṛṣṭvā pratipadaṃ sarvaṃ kuśalaṃ mātulasya ca |upaviṣṭaṃ mahābhāgaṃ rāmaḥ praṣṭuṃ pracakrame || 7.100.6 ||
kimāha mātulo vākyaṃ yadarthaṃ bhagavāniha |prāpto vākyavidāṃ śreṣṭhaḥ sākṣādiva bṛhaspatiḥ || 7.100.7 ||
rāmasya bhāṣitaṃ śrutvā maharṣiḥ kāryavistaram |vaktumadbhutasaṅkāśaṃ rāghavāyopacakrame || 7.100.8 ||
mātulaste mahābāho vākyamāha nararṣabhaḥ |yudhājitprītisaṃyuktaṃ śrūyatāṃ yadi rocate || 7.100.9 ||
ayaṃ gandharvaviṣayaḥ phalamūlopaśobhitaḥ |sindhorubhayataḥ pārśve deśaḥ paramaśobhanaḥ || 7.100.10 ||
taṃ ca rakṣanti gandharvāḥ sāyudhā yuddhakovidāḥ |śailūṣasya sutā vīra trikoṭyo vai mahābalāḥ || 7.100.11 ||
tānvinirjitya kākutstha gandharvanagaraṃ śubham |niveśaya mahāboho sve pure susamāhite || 7.100.12 ||
anyasya na gatistatra deśaḥ paramaśobhanaḥ |rocatāṃ te mahābāho nāhaṃ tvāmahitaṃ vade || 7.100.13 ||
tacchrutvā rāghavaḥ prīto maharṣermātulasya ca |uvāca bāḍhamityeva bharataṃ cānvavaikṣata || 7.100.14 ||
so 'bravīdrāghavaḥ prītaḥ sāñjalipragraho dvijam |imau kumārau taṃ deśaṃ brahmarṣe vicariṣyataḥ || 7.100.15 ||
bharatasyātmajau vīrau takṣaḥ puṣkala eva ca |mātulena suguptau tu dharmeṇa susamāhitau || 7.100.16 ||
bharataṃ cāgrataḥ kṛtvā kumārau sabalānugau |nihatya gandharvasutāndve pure vibhajiṣyataḥ || 7.100.17 ||
niveśya te puravare ātmajau sanniveśya ca |āgamiṣyati me bhūyaḥ sakāśamatidhārmikaḥ || 7.100.18 ||
brahmarṣimevamuktvā tu bharataṃ sabalānugam |ājñāpayāmāsa tadā kumārau cābhyaṣecayat || 7.100.19 ||
nakṣatreṇa ca saumyena puraskṛtyāṅgirassutam |bharataḥ saha sainyena kumārābhyāṃ viniryayau || 7.100.20 ||
sā senā śakrayukteva nagarānniryayāvatha |rāghavānugatā dūraṃ durādharṣā surairapi || 7.100.21 ||
māṃsādāni ca sattvāni rakṣāṃsi sumahānti ca |anujagmurhi bharataṃ rudhirasya pipāsayā || 7.100.22 ||
bhūtagrāmāśca bahavo māṃsabhakṣāḥ sudāruṇāḥ |gandharvaputramāṃsāni bhoktukāmāḥ sahasraśaḥ || 7.100.23 ||
siṃhavyāghravarāhāṇāṃ khecarāṇāṃ ca pakṣiṇām |bahūni vai sahasrāṇi senāyā yayuragrataḥ || 7.100.24 ||
adhyardhamāsamuṣitā pathi senā nirāmayā |hṛṣṭapuṣṭajanākīrṇā kekayaṃ samupāgamat || 7.100.25 ||
śrutvā senāpatiṃ prāptaṃ bharataṃ kekayādhipaḥ |yudhājidgārgyasahitaṃ parāṃ prītimupāgamat || 7.101.1 ||
sa niryayau janaughena mahatā kekayādhipaḥ |tvaramāṇo 'bhicakrāma gandharvānkāmarūpiṇaḥ || 7.101.2 ||
bharataśca yudhājicca sametau laghuvikramaiḥ |gandharvanagaraṃ prāptau sabalau sapadānugau || 7.101.3 ||
śrutvā tu bharataṃ prāptaṃ gandharvāste samāgatāḥ |yoddhukāmā mahāvīryā vyanadan vai samantataḥ || 7.101.4 ||
tataḥ samabhavadyuddhaṃ tumulaṃ romaharṣaṇam |saptarātraṃ mahābhīmaṃ na cānyatarayorjayaḥ || 7.101.5 ||
khaḍgaśaktidhanurgrāhā nadyaḥ śoṇitasaṃsravāḥ |nṛkalevaravāhinyaḥ pravṛttāḥ sarvatodiśam || 7.101.6 ||
tato rāmānujaḥ kruddhaḥ kālasyāstraṃ sudāruṇam |saṃvartaṃ nāma bharato gandharveṣvabhyacodayat || 7.101.7 ||
te baddhāḥ kālapāśena saṃvartena vidāritāḥ |kṣaṇenābhihatāstena tisraḥ koṭyo mahātmanām || 7.101.8 ||
taṃ ghātaṃ ghorasaṅkāśaṃ na smaranti divaukasaḥ |nimeṣāntaramātreṇa tādṛśānāṃ mahātmanām || 7.101.9 ||
hateṣu teṣu sarveṣu bharataḥ kekayīsutaḥ |niveśayāmāsa tadā samṛddhe dve purottame || 7.101.10 ||
takṣaṃ takṣaśilāyāṃ tu puṣkalaṃ puṣkalāvate |gandharvadeśe rucire gāndhāraviṣaye ca saḥ || 7.101.11 ||
dhanaratnaughasaṅkīrṇe kānanairupaśobhite |anyonyasaṅgharṣakṛte spardhayā guṇavistaraiḥ || 7.101.12 ||
ubhe suruciraprakhye vyavahārairakilbiṣaiḥ |udyānayānasampūrṇe suvibhaktāntarāpaṇe || 7.101.13 ||
ubhe puravare ramye vistarairupaśobhite |gṛhamukhyaiḥ surucirairvimānasamavarṇibhiḥ || 7.101.14 ||
śobhite śobhanīyaiśca devāyatanavistaraiḥ |tālaistamālaistilakairvakulairupaśobhite || 7.101.15 ||
niveśya pañcabhirvarṣairbharato rāghavānujaḥ |punarāyānmahābāhurayodhyāṃ kekayīsutaḥ || 7.101.16 ||
so 'bhivādya mahātmānaṃ sākṣāddharmamivāparam |rāghavaṃ bharataḥ śrīmānbrahmāṇamiva vāsavaḥ || 7.101.17 ||
śaśaṃsa ca yathāvṛttaṃ gandharvavadhamuttamam |niveśanaṃ ca deśasya śrutvā prīto 'sya rāghavaḥ || 7.101.18 ||
tacchrutvā harṣamāpede rāghavo bhrātṛbhiḥ saha |vākyaṃ cādbhutasaṅkāśaṃ tadā provāca lakṣmaṇam || 7.102.1 ||
imau kumārau saumitre tava dharmaviśāradau |aṅgadaścandraketuśca rājyārthe dṛḍhavikramau || 7.102.2 ||
imau rājye 'bhiṣekṣyāmi deśaḥ sādhu vidhīyatām |ramaṇīyo hyasambādho rametāṃ yatra dhanvinau || 7.102.3 ||
na rājño yatra pīḍā syānnāśramāṇāṃ vināśanam |sa deśo dṛśyatāṃ saumya nāparādhyāmahe yathā || 7.102.4 ||
tathoktavati rāme tu bharataḥ pratyuvāca ha |ayaṃ kārupatho deśo ramaṇīyo nirāmayaḥ || 7.102.5 ||
niveśyatāṃ tatra puramaṅgadasya mahātmanaḥ |candraketoḥ suruciraṃ candrakāntaṃ nirāmayam || 7.102.6 ||
tadvākyaṃ bharatenoktaṃ pratijagrāha rāghavaḥ |taṃ ca kṛtvā vaśe deśamaṅgadasya nyaveśayat || 7.102.7 ||
aṅgadīyā purī ramyāpyaṅgadasya niveśitā |ramaṇīyā suguptā ca rāmeṇākliṣṭakarmaṇā || 7.102.8 ||
candraketośca mallasya mallabhūmyāṃ niveśitā |candrakānteti vikhyātā divyā svargapurī yathā || 7.102.9 ||
tato rāmaḥ parāṃ prītiṃ lakṣmaṇo bharatastathā |yayuryuddhe durādharṣā abhiṣekaṃ ca cakrire || 7.102.10 ||
abhiṣicya kumārau sa prasthāpayati rāghavaḥ |aṅgadaṃ paścimāṃ bhūmiṃ candraketumudaṅmukham || 7.102.11 ||
aṅgadaṃ cāpi saumitrirlakṣmaṇo 'nujagāma ha |candraketostu bharataḥ pārṣṇigrāho babhūva ha || 7.102.12 ||
lakṣmaṇastvaṅgadīyāyāṃ saṃvatsaramathoṣitaḥ |putre sthite durādharṣe ayodhyāṃ punarāgamat || 7.102.13 ||
bharato 'pi tathaivoṣya saṃvatsaramato 'dhikam |ayodhyāṃ punarāgamya rāmapādāvupāsta saḥ || 7.102.14 ||
ubhau saumitribharatau rāmapādāvanuvratau |kālaṃ gatamapi snehānna jajñāte 'tidhārmikau || 7.102.15 ||
evaṃ varṣasahasrāṇi daśa teṣāṃ yayustadā |dharme prayatamānānāṃ paurakāryeṣu nityadā || 7.102.16 ||
vihṛtya kālaṃ paripūrṇamānasāḥ śriyā vṛtā dharmapure susaṃsthitāḥ |trayaḥ samiddhā iva dīptatejaso mahādhvare sādhu hutāstrayo 'gnayaḥ || 7.102.17 ||
kasyacittvatha kālasya rāme dharmapare sthite |kālastāpasarūpeṇa rājadvāramupāgamat || 7.103.1 ||
so 'bravīllakṣmaṇaṃ vākyaṃ dhṛtimantaṃ yaśaśvinam |māṃ nivedaya rāmāya samprāptaṃ kāryagauravāt || 7.103.2 ||
dūto 'smyatibalasyāhaṃ maharṣeramitaujasaḥ |rāmaṃ didṛkṣurāyātaḥ kāryeṇa hi mahābala || 7.103.3 ||
tasya tadvacanaṃ śrutvā saumitristvarayā 'nvitaḥ |nyavedayata rāmāya tāpasaṃ taṃ samāgatam || 7.103.4 ||
jayasva rāma dharmeṇa ubhau lokau mahādyute |dūtastvāṃ draṣṭumāyātastapasā bhāskaraprabhaḥ || 7.103.5 ||
tadvākyaṃ lakṣmaṇenoktaṃ śrutvā rāma uvāca ha |praveśyatāṃ munistāta mahaujāstasya vākyadhṛt || 7.103.6 ||
saumitristu tathetyuktvā prāveśayata taṃ munim |jvalantameva tejobhiḥ pradahantamivāṃśubhiḥ || 7.103.7 ||
so 'bhigamya raghuśreṣṭhaṃ dīpyapānaṃ svatejasā |ṛṣirmadhurayā vācā vardhasvetyāha rāghavam || 7.103.8 ||
tasmai rāmo mahātejāḥ pūjāmarghyapurogamām |dadau kuśalamavyagraṃ praṣṭumevopacakrame || 7.103.9 ||
pṛṣṭaśca kuśalaṃ tena rāmeṇa vadatāṃ varaḥ |āsane kāñcane divye niṣasāda mahāyaśāḥ || 7.103.10 ||
tamuvāca tato rāmaḥ svāgataṃ te mahāmune |prāpayāsya ca vākyāni yato dūtastvamāgataḥ || 7.103.11 ||
codito rājasiṃhena munirvākyamabhāṣata |dvandvametatpravaktavyaṃ hitaṃ vai yadyapekṣase || 7.103.12 ||
yaḥ śṛṇoti nirīkṣedvā sa vadhyo bhavitā tava |bhavedvai munimukhyasya vacanaṃ yadyapekṣase || 7.103.13 ||
sa tatheti pratijñāya rāmo lakṣmaṇamabravīt |dvāri tiṣṭha mahābāho pratihāraṃ visarjaya || 7.103.14 ||
sa me vadhyaḥ khalu bhavet kathādvandvaṃ samīritam |ṛṣermama ca saumitre paśyedvā śṛṇuyācca yaḥ || 7.103.15 ||
tato nikṣipya kākutstho lakṣmaṇaṃ dvāri saṅgraham |tamuvāca mune vākyaṃ kathayasveti rāghavaḥ || 7.103.16 ||
yatte manīṣitaṃ vākyaṃ yena vā 'si samāhitaḥ |kathayasvāviśaṅkastvaṃ mamāpi hṛdi vartate || 7.103.17 ||
śṛṇu rājanmahāsatva yadarthamahamāgataḥ |pitāmahena devena preṣito 'smi mahābala || 7.104.1 ||
tavāhaṃ pūrvasadbhāve putraḥ parapurañjaya |māyāsambhāvito vīra kālaḥ sarvasamāharaḥ || 7.104.2 ||
pitāmahaśca bhagavānāha lokapatiḥ prabhuḥ |samayaste kṛtaḥ saumya lokānsamparirakṣitum || 7.104.3 ||
saṅkṣipya hi purā lokānmāyayā svayameva hi |mahārṇave śayāno 'psu māṃ tvaṃ pūrvamajījanaḥ || 7.104.4 ||
bhogavantaṃ tato nāgamanantamudakeśayam |māyayā janayitvā tvaṃ dvau ca sattvau mahābalau || 7.104.5 ||
madhuṃ ca kaiṭabhaṃ caiva yayorasthicayairvṛtā |iyaṃ parvatasambādhā medinī cābhavanmahī || 7.104.6 ||
padme divye 'rkasaṅkāśe nābhyāmutpādya māmapi |prājāpatyaṃ tvayā karma mayi sarvaṃ niveśitam || 7.104.7 ||
so 'haṃ sannyastabhāro hi tvāmupāse jagatpatim |rakṣāṃ vidhatsva bhūteṣu mama tejaskaro bhavān || 7.104.8 ||
tatastvamapi durdharṣāttasmādbhāvātsanātanāt |rakṣārthaṃ sarvabhūtānāṃ viṣṇutvamupajagmivān || 7.104.9 ||
adityāṃ vīryavānputro bhrāta'ṇāṃ vīryavardhanaḥ |samutpanneṣu kṛtyeṣu teṣāṃ sāhyāya kalpase || 7.104.10 ||
sa tvaṃ vitrāsyamānāsu prajāsu jagatāṃ vara |rāvaṇasya vadhākāṅkṣī mānuṣeṣu mano 'dadhāḥ || 7.104.11 ||
daśa varṣasahasrāṇi daśa varṣaśatāni ca |kṛtvā vāsasya niyatiṃ svayamevātmanā purā || 7.104.12 ||
sa tvaṃ manomayaḥ putraḥ pūrṇāyurmānuṣeṣviha |kālo 'yaṃ te naraśreṣṭha samīpamupavartitum || 7.104.13 ||
yadi bhūyo mahārāja prajā icchasyupāsitum |vasa vā vīra bhadraṃ ta evamāha pitāmahaḥ || 7.104.14 ||
atha vā vijigīṣā te suralokāya rāghava |sanāthā viṣṇunā devā bhavantu vigatajvarāḥ || 7.104.15 ||
śrutvā pitāmahenoktaṃ vākyaṃ kālasamīritam |rāghavaḥ prahasanvākyaṃ sarvasaṃhāramabravīt || 7.104.16 ||
śrutvā me devadevasya vākyaṃ paramamadbhutam |prītirhi mahatī jātā tavāgamanasambhavā || 7.104.17 ||
trayāṇāmapi lokānāṃ kāryārthaṃ mama sambhavaḥ |bhadraṃ te 'stu gamiṣyāmi yata evāhamāgataḥ || 7.104.18 ||
hadgato hyasi samprāpto na me tatra vicāraṇā |mayā hi sarvakṛtyeṣu devānāṃ vaśavartinām |sthātavyaṃ sarvasaṃhāra yathā hyāha pitāmahaḥ || 7.104.19 ||
tathā tayoḥ saṃvadatordurvāsā bhagavānṛṣiḥ |rāmasya darśanākāṅkṣī rājadvāramupāgamat || 7.105.1 ||
so 'bhigamya tu saumitrimuvāca ṛṣisattamaḥ |rāmaṃ darśaya me śīghraṃ purā me 'rtho 'tivartate || 7.105.2 ||
munestu bhāṣitaṃ śrutvā lakṣmaṇaḥ paravīrahā |abhivādya mahātmānaṃ vākyametaduvāca ha || 7.105.3 ||
kiṃ kāryaṃ brūhi bhagavanko vā 'rthaḥ kiṃ karomyaham |vyagro hi rāghavo brahmanmuhūrtaṃ pratipālyatām || 7.105.4 ||
tacchrutvā ṛṣiśārdūlaḥ krodhena kaluṣīkṛtaḥ |uvāca lakṣmaṇaṃ vākyaṃ nirdahanniva cakṣuṣā || 7.105.5 ||
asminkṣaṇe māṃ saumitre rāmāya prativedaya |asminkṣaṇe māṃ saumitre na nivedayase yadi || 7.105.6 ||
viṣayaṃ tvāṃ puraṃ caiva śapiṣye rāghavaṃ tathā |bharataṃ caiva saumitre yuṣmākaṃ yā ca santatiḥ || 7.105.7 ||
na hi śakṣyāmyahaṃ bhūyo manyuṃ dhārayituṃ hṛdi |tacchrutvā ghorasaṅkāśaṃ vākyaṃ tasya mahātmanaḥ |cintayāmāsa manasā tasya vākyasya niścayam || 7.105.8 ||
ekasya maraṇaṃ me 'stu mā bhūtsarvavināśanam |iti buddhyā viniścitya rāghavāya nyavedayat || 7.105.9 ||
lakṣmaṇasya vacaḥ śrutvā rāmaḥ kālaṃ visṛjya ca |nissṛtya tvaritaṃ rājā atreḥ putraṃ dadarśa ha || 7.105.10 ||
so 'bhivādya mahātmānaṃ jvalantamiva tejasā |kiṃ kāryamiti kākutsthaḥ kṛtāñjalirabhāṣata || 7.105.11 ||
tadvākyaṃ rāghaveṇoktaṃ śrutvā munivaraḥ prabhum |pratyāha rāmaṃ durvāsāḥ śrūyatāṃ dharmavatsala || 7.105.12 ||
adya varṣasahasrasya samāptistapaso mama |so 'haṃ bhojanamicchāmi yathāsiddhaṃ tavānagha || 7.105.13 ||
tacchrutvā vacanaṃ rājā rāghavaḥ prītamānasaḥ |bhojanaṃ munimukhyāya yathāsiddhamupāharat || 7.105.14 ||
sa tu bhuktvā muniśreṣṭhastadannamamṛtopamam |sādhu rāmeti sambhāṣya svamāśramamupāgamat || 7.105.15 ||
tasmin gate munivare svāśramaṃ lakṣmaṇāgrajaḥ |saṃsmṛtya kālavākyāni tato duḥkhamupāgamat || 7.105.16 ||
duḥkhena ca susantaptaḥ smṛtvā tadghoradarśanam |avāṅmukho dīnamanā vyāhartuṃ na śaśāka ha || 7.105.17 ||
tato buddhyā viniścitya kālavākyāni rāghavaḥ |naitadastīti niścitya tūṣṇīmāsīnmahāyaśāḥ || 7.105.18 ||
avāṅmukhamatho dīnaṃ dṛṣṭvā somamivāplutam |rāghavaṃ lakṣmaṇo vākyaṃ hṛṣṭo madhuramabravīt || 7.106.1 ||
na saṃtāpaṃ mahābāho madarthaṃ kartumarhasi |pūrvanirmāṇabaddhā hi kālasya gatirīdṛśī || 7.106.2 ||
jahi māṃ saumya visrabdhaṃ pratijñāṃ paripālaya |hīnapratijñāḥ kākutstha prayānti narakaṃ narāḥ || 7.106.3 ||
yadi prītirmahārāja yadyanugrāhyatā mayi |jahi māṃ nirviśaṅkastvaṃ dharmaṃ vardhaya rāghava || 7.106.4 ||
lakṣmaṇena tathoktastu rāmaḥ pracalitendriyaḥ |mantriṇaḥ samupānīya tathaiva ca purodhasam || 7.106.5 ||
abravīcca tadā vṛttaṃ teṣāṃ madhye sa rāghavaḥ |durvāsobhigamaṃ caiva pratijñāṃ tāpasasya ca || 7.106.6 ||
tacchrutvā mantriṇaḥ sarve sopādhyāyāḥ samāsata |vasiṣṭhastu mahātejā vākyametaduvāca ha || 7.106.7 ||
dṛṣṭametanmahābāho kṣayaṃ te romaharṣaṇam |lakṣmaṇena viyogaśca tava rāma mahāyaśaḥ || 7.106.8 ||
tyajainaṃ balavānkālo mā pratijñāṃ vṛthā kṛtāḥ |vinaṣṭāyāṃ pratijñāyāṃ dharmo 'pi ca layaṃ vrajet || 7.106.9 ||
tato dharme vinaṣṭe tu trailokyaṃ sacarācaram |sadevarṣigaṇaṃ sarvaṃ vinaśyettu na saṃśayaḥ || 7.106.10 ||
sa tvaṃ puruṣaśārdūla trailokyasyābhipālanāt |lakṣmaṇena vinā cādya jagatsvasthaṃ kuruṣva ha || 7.106.11 ||
teṣāṃ tatsamavetānāṃ vākyaṃ dharmārthasaṃhitam |śrutvā pariṣado madhye rāmo lakṣmaṇamabravīt || 7.106.12 ||
visarjaye tvāṃ saumitre mā bhūddharmaviparyayaḥ |tyāgo vadho vā vihitaḥ sādhūnāṃ tūbhayaṃ samam || 7.106.13 ||
rāmeṇa bhāṣite vākye bāṣpavyākulitendriyaḥ |lakṣmaṇastvaritaṃ prāyātsvagṛhaṃ na viveśa ha || 7.106.14 ||
sa gatvā sarayūtīramupaspṛśya kṛtāñjaliḥ |nigṛhya sarvasrotāṃsi niḥśvāsaṃ na mumoca ha || 7.106.15 ||
aniḥśvasantaṃ yuktaṃ taṃ saśakrāḥ sāpsarogaṇāḥ |devāḥ sarṣigaṇāḥ sarve puṣpairabhyakiraṃstadā || 7.106.16 ||
adṛśyaṃ sarvamanujaiḥ saśarīraṃ mahābalam |pragṛhya lakṣmaṇaṃ śakrastridivaṃ saṃviveśa ha || 7.106.17 ||
tato viṣṇoścaturbhāgamāgataṃ surasattamāḥ |dṛṣṭvā pramuditāḥ sarve 'pūjayan samaharṣayaḥ || 7.106.18 ||
visṛjya lakṣmaṇaṃ rāmo duḥkhaśokasamanvitaḥ |purodhasaṃ mantriṇaśca naigamāṃścedamabravīt || 7.107.1 ||
adya rājye 'bhiṣekṣyāmi bharataṃ dharmavatsalam |ayodhyāyāḥ patiṃ vīraṃ tato yāsyāmyahaṃ vanam || 7.107.2 ||
praveśayata sambhārānmābhūtkālasya paryayaḥ |adyaivāhaṃ gamiṣyāmi lakṣmaṇena gatāṃ gatim || 7.107.3 ||
tacchrutvā rāghaveṇoktaṃ sarvāḥ prakṛtayo bhṛśam |mūrdhabhiḥ praṇatā bhūmau gatasattvā ivābhavan || 7.107.4 ||
bharataśca visañjño 'bhūcchrutvā rāmasya bhāṣitam |rājyaṃ vigarhayāmāsa rāghavaṃ cedamabravīt || 7.107.5 ||
satyenāhaṃ śape rājansvargaloke na caiva hi |na kāmaye yathā rājyaṃ tvāṃ vinā raghunandana || 7.107.6 ||
imau kuśalavau rājannabhiṣiñca narādhipa |kosaleṣu kuśaṃ vīramuttareṣu tathā lavam || 7.107.7 ||
śatrughnasya tu gacchantu dūtāstvaritavikramāḥ |idaṃ gamanamasmākaṃ svargāyākhyātu mā ciram || 7.107.8 ||
tacchrutvā bharatenoktaṃ dṛṣṭvā cāpi hyadhomukhān |paurānduḥkhena santaptānvasiṣṭho vākyamabravīt || 7.107.9 ||
vatsa rāma imāḥ paśya dharaṇīṃ prakṛtīrgatāḥ |jñātvaiṣāmīpsitaṃ kāryaṃ mā caiṣāṃ vipriyaṃ kṛthāḥ || 7.107.10 ||
vasiṣṭhasya tu vākyena utthāpya prakṛtījanam |kiṃ karomīti kākutsthaḥ sarvā vacanamabravīt || 7.107.11 ||
tataḥ sarvāḥ prakṛtayo rāmaṃ vacanamabruvan |gacchantamanugacchāmo yatra rāma gamiṣyasi || 7.107.12 ||
paureṣu yadi te prītiryadi sneho hyanuttamaḥ |saputradārāḥ kākutstha samāgacchāma satpatham || 7.107.13 ||
tapovanaṃ vā durgaṃ vā nadīmambhonidhiṃ tathā |vayaṃ te yadi na tyājyāḥ sarvānno naya īśvara || 7.107.14 ||
eṣā naḥ paramā prītireṣa naḥ paramo varaḥ |hṛdgatā naḥ sadā prītistavānugamane nṛpa || 7.107.15 ||
paurāṇāṃ dṛḍhabhaktiṃ ca bāḍhamityeva so 'bravīt |svakṛtāntaṃ cānvavekṣya tasminnahani rāghavaḥ || 7.107.16 ||
kosaleṣu kuśaṃ vīramuttareṣu tathā lavam |abhiṣicya mahātmānāvubhau rāmaḥ kuśīlavau || 7.107.17 ||
abhiṣiktau sutāvaṅke pratiṣṭhāpya pure tataḥ |pariṣvajya mahābāhurmūrdhnyupāghrāya cāsakṛt || 7.107.18 ||
rathānāṃ tu sahasrāṇi nāgānāmayutāni ca |daśāyutāni cāśvānāmekaikasya dhanaṃ dadau || 7.107.19 ||
bahuratnau bahudhanau hṛṣṭapuṣṭajanāvṛtau |sve pure preṣayāmāsa bhrātarau tu kuśīlavau || 7.107.20 ||
abhiṣicya sutau vīrau pratiṣṭhāpya pure tadā |dūtānsampreṣayāmāsa śatrughnāya mahātmane || 7.107.21 ||
te dūtā rāmavākyena coditā laghuvikramāḥ |prajagmurmadhurāṃ śīghraṃ cakrurvāsaṃ na cādhvani || 7.108.1 ||
te tu tribhirahorātraiḥ samprāpya madhurāmatha |śatrughnāya yathātattvamācakhyuḥ sarvameva tat || 7.108.2 ||
lakṣmaṇasya parityāgaṃ pratijñāṃ rāghavasya ca |putrayorabhiṣekaṃ ca paurānugamanaṃ tathā || 7.108.3 ||
kuśasya nagarī ramyā vindhyaparvatarodhasi |kuśāvatīti nāmnā sā kṛtā rāmeṇa dhīmatā |śrāvastīti purī ramyā śrāvitā ca lavasya ha || 7.108.4 ||
ayodhyāṃ vijanāṃ kṛtvā rāghavo bharatastathā |svargasya gamanodyogaṃ kṛtavantau mahārathau || 7.108.5 ||
evaṃ sarvaṃ nivedyāśu śatrughnāya mahātmane |viremuste tato dūtāstvara rājeti cābruvan || 7.108.6 ||
tacchrutvā ghorasaṅkāśaṃ kulakṣayamupasthitam |prakṛtīstu samānīya kāñcanaṃ ca purodhasam || 7.108.7 ||
teṣāṃ sarvaṃ yathāvṛttamabravīdraghanandanaḥ |ātmanaśca viparyāsaṃ bhaviṣyaṃ bhrātṛbhiḥ saha || 7.108.8 ||
tataḥ putradvayaṃ vīraḥ so 'bhyaṣiñcannarādhipaḥ |subāhurmadhurāṃ lebhe śatrughātī ca vaidiśam || 7.108.9 ||
dvidhā kṛtvā tu tāṃ senāṃ mādhurīṃ putrayordvayoḥ |dhanaṃ ca yuktaṃ kṛtvā vai sthāpayāmāsa pārthivaḥ || 7.108.10 ||
subāhuṃ madhurāyāṃ ca vaideśe śatrughātinam |yayau sthāpya tadā 'yodhyāṃ rathenaikena rāghavaḥ || 7.108.11 ||
sa dadarśa mahātmānaṃ jvalantamiva pāvakam |sūkṣmakṣaumāmbaradharaṃ munibhiḥ sārdhamakṣayaiḥ || 7.108.12 ||
so 'bhivādya tato rāmaṃ prāñjaliḥ prayatendriyaḥ |uvāca vākyaṃ dharmajñaṃ dharmamevānucintayan || 7.108.13 ||
kṛtvābhiṣekaṃ sutayordvayo rāghavanandana |tavānugamane rājanviddhi māṃ kṛtaniścayam || 7.108.14 ||
na cānyadapi vaktavyamato vīra na śāsanam |vilokyamānamicchāmi madvidhena viśeṣataḥ || 7.108.15 ||
tasya tāṃ buddhimaklībāṃ vijñāya raghunandanaḥ |bāḍhamityeva śatrughnaṃ rāmo vākyamuvāca ha || 7.108.16 ||
tasya vākyasya vākyānte vānarāḥ kāmarūpiṇaḥ |ṛkṣarākṣasasaṅghāśca samāpeturanekaśaḥ || 7.108.17 ||
sugrīvaṃ te puraskṛtya sarva eva samāgatāḥ |taṃ rāmaṃ draṣṭumanasaḥ svargāyābhimukhaṃ sthitam || 7.108.18 ||
devaputrā ṛṣisutā gandharvāṇāṃ sutāstathā |rāmakṣayaṃ viditvā te sarva eva samāgatāḥ || 7.108.19 ||
te rāmamabhivādyocuḥ sarve vānararākṣasāḥ |tavānugamane rājansamprāptāḥ kṛtaniścayāḥ || 7.108.20 ||
yadi rāma vināsmābhirgacchestvaṃ puruṣottama |yamadaṇḍamivodyamya tvayā sma vinipātitāḥ || 7.108.21 ||
tairevamuktaḥ kākutstho bāḍhamityabravīt smayan || 7.108.22 ||
etasminnantare rāmaṃ sugrīvo 'pi mahābalaḥ |praṇamya vidhivadvīraṃ vijñāpayitumudyataḥ || 7.108.23 ||
abhiṣicyāṅgadaṃ vīramāgato 'smi nareśvara |tavānugamane rājanviddhi māṃ kṛtaniścayam || 7.108.24 ||
tasya tadvacanaṃ śrutvā rāmo ramayatāṃ varaḥ |vānarendramathovācaṃ maitraṃ tasyānucintayan || 7.108.25 ||
sakhe śṛṇuṣva sugrīva na tvayā 'haṃ vinākṛtaḥ |gaccheyaṃ devalokaṃ vā paramaṃ vā padaṃ mahat || 7.108.26 ||
bibhīṣaṇamathovāca rākṣasendraṃ mahāyaśāḥ |yāvatprajā dhariṣyanti tāvattvaṃ vai bibhīṣaṇa |rākṣasendra mahāvīrya laṅkāsthastvaṃ dhariṣyasi || 7.108.27 ||
yāvaccandraśca sūryaśca yāvattiṣṭhati medinī |yāvacca matkathā loke tāvadrājyaṃ tavāstviha || 7.108.28 ||
śāsitastvaṃ sakhitvena kāryaṃ te mama śāsanam |prajāḥ saṃrakṣa dharmeṇa nottaraṃ vaktumarhasi || 7.108.29 ||
kiñcānyadvaktumicchāmi rākṣasendra mahāmate || 7.108.30 ||
ārādhaya jagannāthamikṣvākukuladaivatam |ārādhanīyamaniśaṃ sarvairdaivaiḥ savāsavaiḥ || 7.108.31 ||
tatheti pratijagrāha rāmavākyaṃ vibhīṣaṇaḥ |rājā rākṣasamukhyānāṃ rāghavājñāmanusmaran || 7.108.32 ||
tamevamuktvā kākutstho hanūmantamathābravīt |jīvite kṛtabuddhistvaṃ mā pratijñāṃ vilopaya || 7.108.33 ||
matkathāḥ pracariṣyanti yāvalloke harīśvara |tāvadramasva suprīto madvākyamanupālayan || 7.108.34 ||
evamuktastu hanumānrāghaveṇa mahātmanā |vākyaṃ vijñāpayāmāsa paraṃ harṣamavāpya ca || 7.108.35 ||
yāvattava kathā loke vicariṣyati pāvanī |tāvatsthāsyāmi medinyāṃ tavājñāmanupālayan || 7.108.36 ||
jāmbavantaṃ tathoktvā tu vṛddhaṃ brahmasutaṃ tathā |maindaṃ ca dvividaṃ caiva pañca jāmbavatā saha |yāvatkaliśca samprāptastāvajjīvata sarvadā || 7.108.37 ||
tānevamuktvā kākutsthaḥ sarvāṃstānṛkṣavānarān |uvāca bāḍhaṃ gacchadhvaṃ mayā sārdhaṃ yathepsitam || 7.108.38 ||
prabhātāyāṃ tu śarvaryāṃ pṛthuvakṣā mahāyaśāḥ |rāmaḥ kamalapatrākṣaḥ purodhasamathābravīt || 7.109.1 ||
agnihotraṃ vrajatvagre dīpyamānaṃ saha dvijaiḥ |vājapeyātapatraṃ ca śobhamānaṃ mahāpathe || 7.109.2 ||
tato vasiṣṭhastejasvī sarvaṃ niravaśeṣataḥ |cakāra vidhivaddharmaṃ mahāprāsthānikaṃ vidhim || 7.109.3 ||
tataḥ sūkṣmāmbaradharo brahmamāvartayanparam |kuśāngṛhītvā pāṇibhyāṃ prasajya prayayāvatha || 7.109.4 ||
avyāharankvacitkiñcinniśceṣṭo niḥsukhaḥ pathi |nirjagāma gṛhāttasmāddīpyamāna ivāṃśumān || 7.109.5 ||
rāmasya dakṣiṇe pārśve sapadmā śrīrapāśritā |savye tu hrīrmahādevī vyavasāyastathāgrataḥ || 7.109.6 ||
śarā nānāvidhāścāpi dhanurāyatamuttamam |tathā ' 'yudhāni te sarve yayuḥ puruṣavigrahāḥ || 7.109.7 ||
vedā brāhmaṇarūpeṇa gāyatrī sarvarakṣiṇī |oṅkāro 'tha vaṣaṭkāraḥ sarve rāmamanuvratāḥ || 7.109.8 ||
ṛṣayaśca mahātmānaḥ sarva eva mahīsurāḥ |anvagacchanmahātmānaṃ svargadvāramapāvṛtam || 7.109.9 ||
taṃ yāntamanugacchanti hyantaḥpuracarāḥ striyaḥ |savṛddhabāladāsīkāḥ savarṣavarakiṅkarāḥ || 7.109.10 ||
sāntaḥpuraśca bharataḥ śatrughnasahito yayau |rāmaṃ gatimupāgamya sāgnihotramanuvrataḥ || 7.109.11 ||
te ca sarve mahātmānaḥ sāgnihotrāḥ samāgatāḥ |saputradārāḥ kākutsthamanujagmurmahāmatim || 7.109.12 ||
mantriṇo bhṛtyavargāśca saputrapaśubāndhavāḥ |sarve sahānugā rāmamanvagacchanprahṛṣṭavat || 7.109.13 ||
tataḥ sarvāḥ prakṛtayo hṛṣṭapuṣṭajanāvṛtāḥ |gacchantamanvagachaṃstaṃ rāghavaṃ guṇarañjitāḥ || 7.109.14 ||
tataḥ sastrīpumāṃsaste sapakṣipaśuvāhanāḥ |rāghavasyānugāḥ sarve hṛṣṭā vigatakalmaṣāḥ || 7.109.15 ||
snātāḥ pramuditāḥ sarve hṛṣṭāḥ puṣṭāśca vānarāḥ |dṛḍhaṃ kilakilāśabdaiḥ sarvaṃ rāmamanuvratam || 7.109.16 ||
na tatra kaściddīno vā vrīḍito vā 'pi duḥkhitaḥ |hṛṣṭaṃ samuditaṃ sarvaṃ babhūva paramādbhutam || 7.109.17 ||
draṣṭukāmo 'tha niryāntaṃ rāmaṃ jānapado janaḥ |yaḥ prāptaḥ so 'pi dṛṣṭvaiva svargāyānugato mudā || 7.109.18 ||
ṛkṣavānararakṣāṃsi janāśca puravāsinaḥ |āgacchanparayā bhaktyā pṛṣṭhataḥ susamāhitāḥ || 7.109.19 ||
yāni bhūtāni nagare 'pyantardhānagatāni ca |rāghavaṃ tānyanuyayuḥ svargāya samupasthitam || 7.109.20 ||
yāni paśyanti kākutsthaṃ sthāvarāṇi carāṇi ca |sarvāṇi rāmagamane hyanujagmurhi tānyapi || 7.109.21 ||
nocchvasattadayodhyāyāṃ susūkṣmamapi dṛśyate |tiryagyonigatāścāpi sarve rāmamanuvratāḥ || 7.109.22 ||
adhyardhayojanaṃ gatvā nadīṃ paścānmukhāśritām |sarayūṃ puṇyasalilāṃ dadarśa raghunandanaḥ || 7.110.1 ||
tāṃ nadīmākulāvartāṃ sarvatrānusarannṛpaḥ |āgataḥ saprajo rāmastaṃ deśaṃ raghunandanaḥ || 7.110.2 ||
atha tasminmuhūrte tu brahmā lokapitāmahaḥ |sarvaiḥ parivṛto devairṛṣibhiśca mahātmabhiḥ || 7.110.3 ||
āyayau yatra kākutsthaḥ svargāya samupasthitaḥ |vimānaśatakoṭībhirdivyābhirabhisaṃvṛtaḥ || 7.110.4 ||
divyatejovṛtaṃ vyoma jyotirbhūtamanuttamam |svayamprabhaiḥ svatejobhiḥ svargibhiḥ puṇyakarmabhiḥ || 7.110.5 ||
puṇyā vātā vavuścaiva gandhavantaḥ sukhapradāḥ |papāta puṣpavṛṣṭiśca devairmuktā mahaughavat || 7.110.6 ||
tasmiṃstūryaśataiḥ kīrṇe gandharvāpsarasaṅkule |sarayūsalilaṃ rāmaḥ padbhyāṃ samupacakrame || 7.110.7 ||
tataḥ pitāmaho vāṇīmantarikṣādabhāṣata |āgaccha viṣṇo bhadraṃ te diṣṭyā prāpto 'si rāghava || 7.110.8 ||
bhrātṛbhiḥ saha devābhaiḥ praviśasva svikāṃ tanum |yāmicchasi mahābāho tāṃ tanuṃ praviśa svikām |vaiṣṇavīṃ tāṃ mahātejastadvākāśaṃ sanātanam || 7.110.9 ||
tvaṃ hi lokagatirdeva na tvāṃ kecitprajānate |ṛte māyāṃ viśālākṣīṃ tava pūrvaparigrahām |tvāmacintyaṃ mahadbhūtamakṣayaṃ sarvasaṅgraham || 7.110.10 ||
yāmicchasi mahātejastāṃ tanuṃ praviśa svayam || 7.110.11 ||
āṃ viśālākṣīṃ tava pūrvaparigrahām |pitāmahavacaḥ śrutvā viniścitya mahāmatiḥ |viveśa vaiṣṇavaṃ tejaḥ saśarīraḥ sahānujaḥ || 7.110.12 ||
tato viṣṇumayaṃ devaṃ pūjayanti sma devatāḥ |sādhyā marudgaṇāścaiva sendrāḥ sāgnipurogamāḥ || 7.110.13 ||
ye ca divyā ṛṣigaṇā gandharvāpsarasaśca yāḥ |suparṇanāgayakṣāśca daityadānavarākṣasāḥ || 7.110.14 ||
sarvaṃ puṣṭaṃ pramuditaṃ susampūrṇamanoratham |sādhu sādhviti tairdevaistridivaṃ gatakalmaṣam || 7.110.15 ||
atha viṣṇurmahātejāḥ pitāmahamuvāca ha |eṣāṃ lokaṃ janaughānāṃ dātumarhasi suvrata || 7.110.16 ||
ime hi sarve snehānmāmanuyātā yaśasvinaḥ |bhaktā hi bhajitavyāśca tyaktātmānaśca matkṛte || 7.110.17 ||
tacchrutvā viṣṇuvacanaṃ brahmā lokaguruḥ prabhuḥ |lokānsāntānikānnāma yāsyantīme samāgatāḥ || 7.110.18 ||
yacca tiryaggataṃ kiñcittvāmevamanucintayat |prāṇāṃstyakṣyati bhaktyā vai tatsantāne nivatsyati || 7.110.19 ||
sarvairbrahmaguṇairyukte brahmalokādanantare || 7.110.20 ||
vānarāśca svikāṃ yonimṛkṣāścaiva tathā yayuḥ |yebhyo vinissṛtāḥ sarve surebhyaḥ surasambhavāḥ || 7.110.21 ||
teṣu praviviśe caiva sugrīvaḥ sūryamaṇḍalam |paśyatāṃ sarvadevānāṃ svānpita'npratipedire || 7.110.22 ||
tathoktavati deveśe gopratāramupāgatāḥ |bhejire sarayūṃ sarve harṣapūrṇāśruviklavāḥ || 7.110.23 ||
avagāhya jalaṃ yo yaḥ prāṇī hyāsīt prahṛṣṭavat |mānuṣaṃ dehamutsṛjya vimānaṃ so 'dhyarohata || 7.110.24 ||
tiryagyonigatānāṃ ca śatāni sarayūjalam |samprāpya tridivaṃ jagmuḥ prabhāsuravapūṃṣi ca |divyā divyena vapuṣā devā dīptā ivābhavan || 7.110.25 ||
gatvā tu sarayūtoyaṃ sthāvarāṇi carāṇi ca |prāpya tattoyavikledaṃ devalokamupāgaman || 7.110.26 ||
tasminnapi samāpannā ṛkṣavānararākṣasāḥ |te 'pi svargaṃ praviviśurdehānnikṣipya cāmbhasi || 7.110.27 ||
tataḥ samāgatānsarvānsthāpya lokagururdivi |jagāma tridaśaiḥ sārdhaṃ sadā hṛṣṭairdivaṃ mahat || 7.110.28 ||
etāvadetadākhyānaṃ sottaraṃ brahmapūjitam |rāmāyaṇamiti khyātaṃ mukhyaṃ vālmīkīnā kṛtam || 7.111.1 ||
tataḥ pratiṣṭhito viṣṇuḥ svargaloke yathā puram |yena vyāptamidaṃ sarvaṃ trailokyaṃ sacarācaram || 7.111.2 ||
tato devāḥ sagandharvāḥ siddhāśca paramarṣayaḥ |nityaṃ śṛṇvanti santuṣṭāḥ divyaṃ rāmāyaṇaṃ divi || 7.111.3 ||
idamākhyānamāyuṣyaṃ saubhāgyaṃ pāpanāśanam |rāmāyaṇaṃ vedasamaṃ śrāddheṣu śrāvayedbudhaḥ || 7.111.4 ||
aputro labhate putramadhano labhate dhanam |sarvapāpaiḥ pramucyeta padamapyasya yaḥ paṭhet || 7.111.5 ||
pāpānyapi ca yaḥ kuryādahanyahani mānavaḥ |paṭhatyekamapi ślokaṃ pāpātsa parimucyate || 7.111.6 ||
vācakāya ca dātavyaṃ vastraṃ dhenuṃ hiraṇyakam |vācake parituṣṭe tu tuṣṭāḥ syuḥ sarvadevatāḥ || 7.111.7 ||
etadākhyānamāyuṣyaṃ paṭhanrāmāyaṇaṃ naraḥ |saputrapautro loke 'sminpretya ceha mahīyate || 7.111.8 ||
ayodhyā 'pi purī ramyā śūnyā varṣagaṇānbahūn |ṛṣabhaṃ prāpya rājānaṃ nivāsamupayāsyati || 7.111.9 ||
etadākhyānamāyuṣyaṃ sabhaviṣyaṃ sahottaram |kṛtavānpracetasaḥ putrastadbrahmāpyanvamanyata || 7.111.10 ||
aśvamedhasahasrasya vājapeyāyutasya ca |labhate śrāvaṇādeva sargasyaikasya mānavaḥ || 7.111.11 ||
prayāgādīni tīrthāni gaṅgādyāḥ saritastathā |naimiśādīnyaraṇyāni kurukṣetrādikānyapi |gatāni tena loke 'sminyena rāmāyaṇaṃ śrutam || 7.111.12 ||
hemabhāraṃ kurukṣetre graste bhānau prayacchati |yaśca rāmāyaṇaṃ loke śṛṇoti sadṛśāvubhau || 7.111.13 ||
samyakchraddhāsamāyuktaḥ śṛṇute rāghavīṃ kathām |sarvapāpātpramucyeta viṣṇulokaṃ sa gacchati || 7.111.14 ||
ādikāvyamidaṃ tvārṣaṃ purā vālmīkinā kṛtam |yaḥ śṛṇoti sadā bhaktyā sa gacchedvaiṣṇavīṃ tanum || 7.111.15 ||
putradārāśca vardhante sampadaḥ santatistathā |satyametadviditvā tu śrotavyaṃ niyatātmabhiḥ || 7.111.16 ||
gāyatryāśca svarūpaṃ tadrāmāyaṇamanuttamam || 7.111.17 ||
aputro labhate putramadhano labhate dhanam |sarvapāpaiḥ pramucyeta padamapyasya yaḥ paṭhet || 7.111.18 ||
yaḥ paṭhecchṛṇuyānnityaṃ caritaṃ rāghavasya ha |bhaktyā niṣkalmaṣo bhūtvā dīrghamāyuravāpnuyāt || 7.111.19 ||
cintayedrāghavaṃ nityaṃ śreyaḥ prāptuṃ ya icchati |śrāvayedidamākhyānaṃ brāhmaṇebhyo dine dine || 7.111.20 ||
yastvidaṃ raghunāthasya caritaṃ sakalaṃ paṭhet |so 'sukṣaye viṣṇulokaṃ gacchatyeva na saṃśayaḥ || 7.111.21 ||
pitā pitāmahastasya tathaiva prapitāmahaḥ |tatpitā tatpitā caiva viṣṇuṃ yānti na saṃśayaḥ || 7.111.22 ||
caturvargapradaṃ nityaṃ caritaṃ rāghavasya tu |tasmādyatnavatā nityaṃ śrotavyaṃ paramaṃ sadā || 7.111.23 ||
śṛṇvanrāmāyaṇaṃ bhaktyā yaḥ pādaṃ padameva vā |sa yāti brahmaṇaḥ sthānaṃ brahmaṇā pūjyate sadā || 7.111.24 ||
evametatpurāvṛttamākhyānaṃ bhadramastu vaḥ |pravyāharata visrabdhaṃ balaṃ viṣṇoḥ pravardhatām || 7.111.25 ||