Varaha Purana

khuramadhyagato yasya meruḥ khaṇakhaṇāyate || 1.1 ||
daṃṣṭrāgreṇoddhṛtā gaurudadhiparivṛtā parvatairnimnagābhiḥ
sākaṃ mṛtpiṇḍavat prāgbṛhaduruvapuṣā'nantarūpeṇa yena|
so'yaṃ kaṃsāsurārirmuranarakadaśāsyāntakṛtsarvasaṃsthaḥ
kṛṣṇo viṣṇuḥ sureśo nudatu mama ripūnādidevo varāhaḥ|| 1.2 ||
yaḥ saṃsārārṇave nauriva maraṇajarāvyādhinakrormibhīme
bhaktānāṃ bhītihartā muranarakadaśāsyāntakṛt kolarūpī|
viṣṇuḥ sarveśvaro'yaṃ yamiha kṛtadhiyo līlayā prāpnuvanti
muktātmāno napāpaṃ bhavattu nuditārātipakṣaḥ kṣitīśaḥ || 1.3 ||
sūta uvāca|
yasmin kāle kṣitiḥ pūrvaṃ varāhavapuṣā tu sā|
uddhṛtā viṣṇunā bhaktyā papraccha parameśvaram || 1.4 ||
dharaṇyuvāca|
kalpe kalpe bhavāneva māṃ samuddharate vibho|
na cāhaṃ veda te mūrtiṃ nādisargaṃ ca keśava|| 1.5 ||
vedeṣu caiva naṣṭeṣu matsyo bhūtvā rasātalam|
praviśya tānapākṛṣya brahmaṇe dattavānasi || 1.6 ||
anyat surāsuramayaṃ tvaṃ samudrasya manthane|
dhṛtavānasi kaurmyeṇa mandaraṃ madhusūdana || 1.7 ||
punarvārāharūpeṇa māṃ gacchantīṃ rasātalam |
ujjahāraikadaṃṣṭreṇa bhagavān vai mahārṇavāt|| 1.8 ||
anyaddhiraṇyakaśipurvaradānena darpitaḥ|
ābādhamānaḥ pṛthivīṃ sa tvayā vinipātitaḥ |
balistu baddho bhagavaṃstvayā vāmanarūpiṇā || 1.9 ||
punarniḥkṣatriyā deva tvayā cāpi purā kṛtā |
jāmadagnyena rāmeṇa tvayā bhūtvā'sakṛtprabho || 1.10 ||
punaśca rāvaṇo rakṣaḥ kṣapitaṃ kṣātratejasā |
na ca jānāmyahaṃ deva tava kiñcidviceṣṭitam || 1.11 ||
uddhṛtya māṃ kathaṃ sṛṣṭiṃ sṛjase kiṃ ca sā tvayā|
sakṛd dhriyeta kṛtvā ca pālyate cāpi kena ca || 1.12 ||
kena vā sulabho deva jāyase satataṃ vibho |
kathaṃ ca sṛṣṭerādiḥ syādavasānaṃ kathaṃ bhavet || 1.13 ||
kathaṃ yugasya gaṇanā saṃkhyā'syānucaturyugam |
ke vā viśeṣāsteṣvasmin kā vā'vasthā maheśvara || 1.14 ||
yajvānaḥ ke ca rājānaḥ ke ca siddhiṃ parāṃ gatāḥ |
etatsarvaṃ samāsena kathayasva prasīda me || 1.15 ||
ityuktaḥ kroḍarūpeṇa jahāsa parameśvaraḥ |
hasatastasya kukṣau tu jagaddhātrī dadarśa ha ||
rudrān devān savasavaḥ siddhasaṃghān maharṣibhiḥ || 1.16 ||
sacandrasūryagrahasaptalokā-
nantaḥ sthitāṃstāvadupāttadharmān |
itīdṛśaṃ paśyati sā samastaṃ
yāvatkṣitirvepitasarvagātrā || 1.17 ||
unmīlitāsyastu yadā mahātmā
dṛṣṭo dharaṇyā'malasarvagātryā |
tāvatsvarūpeṇa caturbhujena
mahodadhau suptamatho'nvapaśyat || 1.18 ||
śeṣaparyaṅkaśayane suptaṃ devaṃ janārdanam |
dṛṣṭvā tannābhipaṅkasthamantaḥsthaṃ ca caturmukham|
kṛtāñjalipuṭā devī stutiṃ dhātrī jagāda ha || 1.19 ||
dharaṇyuvāca|
namaḥ kamalapatrākṣa namaste pītavāsase|
namaḥ surārividhvaṃsakāriṇe paramātmane || 1.20 ||
śeṣaparyaṅkaśapane dhṛtavakṣasthalaśriye |
namaste sarvadeveśa namaste mokṣakāriṇe || 1.21 ||
namaḥ śārṅgāsicakrāya janmamṛtyuvivarjite|
namo nābhyutthitamahatkamalāsanajanmane || 1.22 ||
namo vidrumaraktāsyapāṇipallavaśobhine |
śaraṇaṃ tvāṃ prasannā'smi trāhi nārīmanāgasam || 1.23 ||
pūrṇanīlāñjanākāraṃ vārāhaṃ te janārdana|
dṛṣṭvā bhītā'smi bhūyo'pi jagat tvaddehagocaram|
idānīṃ kuru me nātha dayāṃ trāhi mahābhayāt|| 1.24 ||
keśavaḥ pātu me pādau jaṅghe nārāyaṇo mama |
mādhavo me kaṭiṃ pātu govindo guhyameva ca || 1.25 ||
nābhiṃ viṣṇustu me pātu udaraṃ madhusūdanaḥ |
ūruṃ trivikramaḥ pātu hṛdayaṃ pātu vāmanaḥ || 1.26 ||
śrīdharaḥ pātu me kaṇṭhaṃ hṛṣīkeśo mukhaṃ mama |
padmanābhastu nayane śiro dāmodaro mama || 1.27 ||
evaṃ nyasya harernyāsamāmāni jagatī tadā |
namaste bhagavan viṣṇo ityuktvā virarāma ha || 1.28 ||
iti śrīvarāhapurāṇe bhagavacchāstre prathamo'dhyāyaḥ || 1 ||
<b>sūta uvāca |</b>
tatastuṣṭo harirbhaktyā dharaṇyātmaśarīragām |
māyāṃ prakāśya tenaiva sthito vārāhamūrttinā || 2.1 ||
jagāda kiṃ te suśroṇi praśnamenaṃ sudurlabham |
kathayāmi purāṇasya viṣayaṃ sarvaśāstrataḥ || 2.2 ||
purāṇānāṃ hi sarveṣāmayaṃ sādhāraṇaḥ smṛtaḥ |
ślokaṃ dharaṇi niścitya niḥśeṣaṃ tvaṃ punaḥ śrṛṇu || 2.3 ||
śrīvarāha uvāca |
sargaśca pratisargaśca vaṃśo manvantarāṇi ca |
vaṃśānucaritaṃ caiva purāṇaṃ pañcalakṣaṇam || 2.4 ||
ādisargamahaṃ tāvat kathayāmi varānane |
yasmādārabhya devānāṃ rājñāṃ caritameva ca |
jñāyate caturaṃśaśca paramātmā sanātanaḥ || 2.5 ||
ādāvahaṃ vyoma mahat tato'ṇuṃ-
rekaiva mattaḥ prababhūva buddhiḥ |
tridhā tu sā sattvarajastamobhiḥ
pṛthakpṛthaktattvarūpairupetā || 2.6 ||
tasmiṃstrike'haṃ tamaso mahān sa
sadocyate sarvavidāṃ pradhānaḥ |
utasmādapi kṣetravidūrjito'bhūd
babhūva vuddhistu tato babhūva || 2.7 ||
tasmāttu tebhyo śravaṇādihetavas
tato'kṣamālā jagato vyavasthitā |
bhūtairgataireva ca piṇḍamūrti-
rmayā bhadre vihitā tvātmanaiva || 2.8 ||
śūnyaṃ tvāsīt tatra śabdastu khaṃ ca
tasmād vāyustata evānu tejaḥ |
tasmādāpastata evānu devi
mayā sṛṣṭā bhavatī bhūtadhātrī || 2.9 ||
yoge pṛthivyā jalavat tato'pi
sabudbudaṃ kalalaṃ tvaṇḍameva |
tasmin pravṛtte dvigate'hamāsī-
dāpomayaścātmanātmānamādau || 2.10 ||
sṛṣṭvā nārāstā atho tatra cāhaṃ
yena syānme nāma nārāyaṇeti |
kalpe kalpe tatra saṃyāmi bhūyaḥ
suptasya me nābhijaḥ syād yathādyaḥ || 2.11 ||
evaṃbhūtasya me devi nābhipadme caturmukhaḥ |
uttasthau sa mayā proktaḥ prajāḥ sṛja mahāmate || 2.12 ||
evamuktvā tirobhāvaṃ gato'haṃ so'pi cintayan |
āste yāvajjagaddhātri nādhyagacchata kiṃcana || 2.13 ||
tāvat tasya mahāroṣo brahmaṇo'vyaktajanmanaḥ|
saṃbhūya tena bālaḥ syādaṅke roṣātmasaṃbhavaḥ || 2.14 ||
yo rudan vāritastena brahmaṇā'vyaktamūrttinā |
bravīti nāma me dehi tasya rudreti so dadau || 2.15 ||
so'pi tena sṛjasveti prokto lokamimaṃ śubhe |
aśaktaḥ so'tha salile mamajja tapase dhṛtaḥ || 2.16 ||
tasmin salilamagne tu punaranyaṃ prajāpatim |
brahmā sasarjja bhūteṣu dakṣiṇāṅguṣṭhato varam |
vāme caiva tathā'ṅguṣṭhe tasya patnīmathāsṛjat || 2.17 ||
sa tasyāṃ janayāmāsa manuṃ svāyaṃbhuvaṃ prabhuḥ |
tasmāt saṃbhāvitā sṛṣṭiḥ prajānāṃ brahmaṇā purā || 2.18 ||
<i>dharaṇyuvāca |</i>
vistareṇa mamācakṣva ādisargaṃ sureśvara |
brahmā nārāyaṇākhyo'yaṃ kalpādau cābhavad yathā || 2.19 ||
śrībhagavānuvāca |
sasarja sarvabhūtāni yathā nārāyaṇātmakaḥ |
kathyamānaṃ mayā devi tadaśeṣaṃ kṣite śrṛṇu || 2.20 ||
gatakalpāvasāne tu niśi suptotthitaḥ śubhe |
sattvodriktastathā brahmā śūnyaṃ lokamavaikṣata || 2.21 ||
nārāyaṇaḥ paro'cintyaḥ parāṇāmapi pūrvajaḥ |
brahmasvarūpī bhagavānanādiḥ sarvasaṃbhavaḥ || 2.22 ||
idaṃ codāharantyatra ślokaṃ nārāyaṇaṃ prati |
brahmasvarūpiṇaṃ devaṃ jagataḥ prabhavāpyayam || 2.23 ||
āpo nārā iti proktā āpo vai narasūnavaḥ |
ayanaṃ tasya tāḥ pūrvaṃ tena nārāyaṇaḥ smṛtaḥ || 2.24 ||
sṛṣṭiṃ cintayatastasya kalpādiṣu yathā purā |
abuddhipūrvakastasya prādurbhūtastamomayaḥ || 2.25 ||
tamo moho mahāmohastāmistro hyandhasaṃjñitaḥ |
avidyā pañcaparvaiṣā prādurbhūtā mahātmanaḥ || 2.26 ||
pañcadhā'vasthitaḥ sargo dhyāyato'pratibodhavān |
bahiranto'prakāśaśca saṃvṛtātmā nagātmakaḥ |
sa mukhyasargo vijñeyaḥ sargavidbhirvicakṣaṇaiḥ || 2.27 ||
punaranyadabhūt tasya dhyāyataḥ sargamuttamam|
tiryakstrotastu vai yasmāt tiryakstrotastu vai smṛtaḥ || 2.28 ||
paśvādayaste vikhyātā utpathagrāhiṇastu te|
tamapyasādhakaṃ matvā tiryakstrotaṃ caturmukhaḥ || 2.29 ||
ūrdhvastrotastridhā yastu sāttviko dharmavarttanaḥ |
tatordhvacāriṇo devāḥ sarvagarbhasamudbhavāḥ || 2.30 ||
te sukhaprītivahulā bahirantastvanāvṛtāḥ |
tasmin sarge'bhavat prītirniṣpadyante prajāstadā || 2.30 ||
tadā sṛṣṭvā'nyasargaṃ tu tadā dadhyau prajāpatiḥ |
asādhakāṃstu tān matvā mukhyasargādisaṃbhavān || 2.31 ||
tataḥ sa cintayāmāsa arvākstrotastu sa prabhuḥ |
arvākstrotasi cotpannā manuṣyāḥ sādhakā matāḥ || 2.32 ||
te ca prakāśabahulāstamodriktā rajodhikāḥ |
tasmāt tu dukhaḥ bahulā bhūyobhūyaśca kāriṇaḥ || 2.33 ||
ityete kathitāḥ sargāḥ ṣaḍete subhage tava |
prathamo mahataḥ sargastanmātrāṇi dvitīyakaḥ || 2.34 ||
vaikārikastṛtīyastu sargaścaindriyakaḥ smṛtaḥ |
ityeṣa prākṛtaḥ sargaḥ saṃbhūto buddhipūrvakaḥ || 2.35 ||
mukhyasargaścaturthastu mukhyā vai sthāvarāḥ smṛtāḥ |
tiryakstrotaśca yaḥ proktastairyakstrotaḥ sa ucyate || 2.36 ||
tathordhvastrotasāṃ śreṣṭhaḥ saptamaḥ sa tu mānavaḥ |
aṣṭamo'nugrahaḥ sargaḥ sāttvikastāmasaśca saḥ || 2.37 ||
pañcaite vaikṛtāḥ sargāḥ prākṛtāstu trayaḥ smṛtāḥ |
prākṛto vaikṛtaścaiva kaumāro navamaḥ smṛtaḥ || 2.38 ||
ityete vai samākhyātā nava sargāḥ prajāpateḥ |
prākṛtā vaikṛtāścaiva jagato mūlahetavaḥ |
ityete kathitāḥ sargāḥ kimanyacchrotumicchasi || 2.39 ||
<i>dharaṇyuvāca |</i>
navadhā sṛṣṭirutpannā brahmaṇo'vyaktajanmanaḥ |
kathaṃ sā vavṛdhe deva etanme kathayācyuta || 2.40 ||
<i>śrīvarāha uvāca |</i>
prathamaṃ brahmaṇā sṛṣṭā rudrādyāstu tapodhanāḥ|
sanakādayastataḥ sṛṣṭā marīcyādaya eva ca || 2.41 ||
marīciratriśca tathā aṅgirāḥ pulahaḥ kratuḥ |
pulastyaśca mahātejāḥ pracetā bhṛgureva ca |
nārado daśamaścaiva vasiṣṭhaśca mahātapāḥ || 2.42 ||
sanakādayo nivṛttyākhye tena dharme prayojitāḥ |
pravṛttyākhye marīcyādyā muktvaikaṃ nāradaṃ munim || 2.43 ||
yo'sau prajāpatistvādyo dakṣiṇāṅguṣṭhasaṃbhavaḥ |
tasyādau tatra vaṃśena jagadetaccarācaram || 2.44 ||
devāśca dānavāścaiva gandharvoragapakṣiṇaḥ |
sarve dakṣasya kanyāsu jātāḥ paramadhārmikāḥ || 2.45 ||
yo'sau rudreti vikhyātaḥ putraḥ krodhasamudbhavaḥ |
bhrukuṭīkuṭilāt tasya lalāṭāt parameṣṭhinaḥ || 2.46 ||
arddhanārīnaravapuḥ pracaṇḍo'tibhayaṃkaraḥ |
vibhajātmānamityukto brahmaṇā'ntardadhe punaḥ || 2.47 ||
tathokto'sau dvidhā strītvaṃ puruṣatvaṃ cakāra saḥ |
bibheda puruṣatvaṃ ca daśadhā caikadhā ca saḥ |
tatastvekādaśa khyātā rudrā brahmasamudbhavāḥ || 2.48 ||
ayamuddeśataḥ prokto rudrasargo mayā'naghe |
idānīṃ yugamāhātmyaṃ kathayāmi samāsataḥ || 2.49 ||
kṛtaṃ tretā dvāparaśca kaliśceti caturyugam |
etasmin ye mahāsattvā rājāno bhūridakṣiṇāḥ |
devāsurāśca yaṃ cakrurdharmaṃ karma ca tacchṛṇu || 2.50 ||
āsīt prathamakalpe tu manuḥ svāyaṃbhuvaḥ purā |
tasya putradvayaṃ jajñe atimānuṣaceṣṭitam|
priyavratottānapādanāmānaṃ dharmavatsalam || 2.51 ||
tatra priyavrato rājā mahāyajvā tapobalaḥ |
sa ceṣṭvā vividhairyajñairvipulairbhūridakṣiṇaiḥ || 2.52 ||
saptadvīpeṣu saṃsthāpya bharatādīn sutān nijān |
svayaṃ viśālāṃ varadāṃ gatvā tepe mahat tapaḥ || 2.53 ||
tasmin sthitasya tapasi rājño vai cakravarttinaḥ |
upeyānnāradastatra didṛkṣurdharmacāriṇam || 2.54 ||
sa dṛṣṭvā nāradaṃ vyomni jvaladbhāskaratejasam |
abhyutthānena rājendra uttasthau harṣitastadā || 2.55 ||
tasyāsanaṃ ca pādyaṃ ca samyak tasya nivedya vai |
svāgatādibhirālāpaiḥ parasparamavocatām |
kathānte nāradaṃ rājā papraccha brahmavādinam || 2.56 ||
<i>priyavrata uvāca |</i>
bhagavan kiñcidāścaryametasmin kṛtasaṃjñite |
yuge dṛṣṭaṃ śrutaṃ vā'pi tanme kathaya nārada || 2.57 ||
<i>nārada uvāca |</i>
āścaryamekaṃ dṛṣṭaṃ me tacchṛṇuṣva priyavrata |
hyastane'hani rājendra śvetākhyaṃ gatavānaham |
dvīpaṃ tatra saro dṛṣṭaṃ phullapaṅkajamālinam || 2.58 ||
sarasastasya tīre tu kumārīṃ pṛthulocanām |
dṛṣṭvā'haṃ vismayāpannastāṃ kanyāmāyatekṣaṇām || 2.59 ||
pṛṣṭavānasmi rājendra tadā madhurabhāṣiṇīm |
kā'si bhadre kathaṃ vā'si kiṃ vā kāryamiha tvayā |
karttavyaṃ cārusarvāṅgi tanmamācakṣva śobhane || 2.60 ||
evamuktā mayā sā hi māṃ dṛṣṭvā'nimiṣekṣaṇā |
smṛtvā tūṣṇīṃ sthitā yāvat tāvanme jñānamuttamam || 2.61 ||
vismṛtaṃ sarvavedāśca sarvaśāstrāṇi caiva ha |
yogaśāstrāṇi śikṣāśca vedānāṃ smṛtayastathā || 2.62 ||
sarvaṃ dṛṣṭvaiva me rājan kumāryā'pahṛtaṃ kṣaṇāt |
tato'haṃ vismayārviṣṭaścintāśokasamanvitaḥ || 2.63 ||
tāmeva śaraṇaṃ gatvā yāvat paśyāmi pārthiva |
tāvad divyaḥ pumāṃstasyāḥ śarīre samadṛśyata || 2.64 ||
tasyāpi paṃso hṛdaye tvaparastasya corasi |
anyo raktekṣaṇaḥ śrīmān dvādaśādityasannibhaḥ || 2.65 ||
evaṃ dṛṣṭvā pumāṃso'tra trayaḥ kanyāśarīragāḥ |
kṣaṇena tatra kanyaikā na tān paśyāmi suvrata || 2.66 ||
tataḥ pṛṣṭā mayā devī sā kumārī kathaṃ mama |
vedā naṣṭā mamācakṣva bhadre tannāśakāraṇam || 2.67 ||
kanyovāca |
mātā'haṃ sarvavedānāṃ sāvitrī nāma nāmataḥ |
māṃ na jānāsi yena tvaṃ tato vedā hṛtāstava || 2.68 ||
evamukte tayā rājan vismayena tapodhana |
pṛṣṭā ka ete puruṣā etatkathaya śobhane || 69 ||
<i>kanyovāca</i>
ya eṣa maccharīrasthaḥ sarvāṅgaiścārulocanaḥ |
eṣa ṛgvedanāmā tu devo nārāyaṇaḥ svayam |
vahnibhūto dahatyāśu pāpānyuccāraṇādanu || 2.70 ||
etasya hṛdaye yo'yaṃ dṛṣṭa āsīt tvayātmajaḥ |
sa yajurvedarūpeṇa sthito brahmā mahābalaḥ || 2.71 ||
tasyāpyurasi saṃviṣṭo ya eṣa śucirujjvalaḥ |
sa sāmavedanāmā tu rudrarūpī vyavasthitaḥ |
eṣa ādityavat pāpānyāśu nāśayate smṛtaḥ || 2.72 ||
ete trayo mahāvedā brahman devāstrayaḥ smṛtāḥ |
ete varṇā akārādyāḥ savanānyatra vai dvija || 2.73 ||
etatsarvaṃ samāsena kathitaṃ te dvijottama |
gṛhāṇa vedān śāstrāṇi sarvajñatvaṃ ca nārada || 2.74 ||
etasmin vedasarasi snānaṃ kuru mahāvrata |
kṛte snāne'nyajanmīyaṃ yena smarasi sattama || 2.75 ||
evamuktvā tirobhāvaṃ gatā kanyā narādhipa |
ahaṃ tatra kṛtasnānastvāṃ didṛkṣurihāgataḥ || 2.76 ||
|| iti śrīvarāhapurāṇe bhagavacchāstre dvitīyo'dhyāyaḥ || 2 ||
priyavrata uvāca |
anyasmin bhagavan janmanyāsīd yat tad viceṣṭitam |
sarvaṃ kathaya devarṣe mahat kautūhalaṃ hi me || 3.1 ||
nādarada uvāca |
snātasya mama rājendra tasmin vedasarasyatha |
sāvitryāśca vacaḥ śrutvā tasmin janmasahastrakam |
smaraṇaṃ tatkṣaṇājjātaṃ śrṛṇu janmāntaraṃ mama || 3.2 ||
astyavantīpuraṃ rājaṃstatrāhaṃ prāg dvijottamaḥ |
nāmnā sārasvataḥ pūrvaṃ vedavedāṅgapāragaḥ || 3.3 ||
bahubhṛtyaparīvāro bahudhānyaśca pārthiva |
anyasmin kṛtasaṃjñe tu yuge paramabuddhimān || 3.4 ||
tato dhyātaṃ mayaikānte kimanena karomyaham |
dvandvena sarvametaddhi nyastvā putreṣu yāmyaham |
tapase dhṛtasaṃkalpaḥ saraḥ sārasvataṃ drutam || 3.5 ||
evaṃ cintya mayā iṣṭaḥ karmakāṇḍena keśavaḥ |
śrāddhaiśca pitaro devā yajñaiścānye tathā janāḥ || 3.6 ||
tato'haṃ nirgato rājaṃstapase dhṛtamānasaḥ |
sārasvataṃ nāma saro yadetat puṣkaraṃ smṛtam || 3.7 ||
tatra gatvā mayā viṣṇuḥ purāṇaḥ puruṣaḥ śivaḥ |
ārādhito mayā bhaktyā japaṃ nārāyaṇātmakam || 3.8 ||
brahmapāramayaṃ rājan japatā paramaṃ stavam |
tato me bhagavāṃstuṣṭaḥ pratyakṣatvaṃ jagāma ha || 3.9 ||
priyavrata uvāca |
kīdṛśaṃ brahmapāraṃ tu śrotumicchāmi sattama |
kathayasva prasādena devarṣe suprasannadhīḥ || 3.10 ||
nārada uvāca |
paraṃ parāṇāmamṛtaṃ purāṇaṃ
pāraṃ paraṃ viṣṇumanantavīryam |
namāmi nityaṃ puruṣaṃ purāṇaṃ
parāyaṇaṃ pāragataṃ parāṇām || 3.11 ||
purātanaṃ tvapratimaṃ purāṇaṃ
parāparaṃ pāragamugratejasam |
gambhīragambhīradhiyāṃ pradhānaṃ
nato'smi devaṃ harimīśitāram || 3.12 ||
parātparaṃ cāparamaṃ pradhānaṃ
parāspadaṃ śuddhapadaṃ viśālam |
parātpareśaṃ puruṣaṃ purāṇaṃ
nārāyaṇaṃ staumi viśuddhabhāvaḥ || 3.13 ||
purā puraṃ śūnyamidaṃ sasarjja
tadā sthitatvāt puruṣaḥ pradhānaḥ |
jane prasiddhaḥ śaraṇaṃ mamāstu
nārāyaṇo vītamalaḥ purāṇaḥ || 3.14 ||
pāraṃ paraṃ viṣṇumapārarūpaṃ
purātanaṃ nītimatāṃ pradhānam |
dhṛtakṣamaṃ śāntidharaṃ kṣitīśaṃ
śubhaṃ sadā staumi mahānubhāvam || 3.15 ||
sahastramūrdhānamanantapāda-
manekabāhuṃ śaśisūryanetram |
kṣarākṣaraṃ kṣīrasamudranidraṃ
nārāyaṇaṃ staumyamṛtaṃ pareśam || 3.16 ||
trivedagamyaṃ trinavaikamūrtiṃ
triśuklasaṃsthaṃ trihutāśabhedam |
tritattvalakṣyaṃ triyugaṃ trinetraṃ
namāmi nārāyaṇamaprameyam || 3.17 ||
kṛte sitaṃ raktatanuṃ tathā ca
tretāyuge pūtatanuṃ purāṇam |
tathā hariṃ dvāparataḥ kalau ca
kṛṣṇīkṛtātmānamatho namāmi || 3.18 ||
sasarja yo vaktrata eva viprān
bhujāntare kṣatramathoruyugme |
viśaḥ padāgreṣu tathaiva śūdrān
namāmi taṃ viśvatanuṃ purāṇam || 3.19 ||
parātparaṃ pāragataṃ prameyaṃ
yudhāṃpatiṃ kāryata eva kṛṣṇam|
gadāsicarmaṇyabhṛtotthapāṇiṃ
namāmi nārāyaṇamaprameyam || 3.20 ||
iti stuto devavaraḥ prasanno
jagāda māṃ nīradatulyaghoṣaḥ |
varaṃ vṛṇīṣvetyasakṛt tato'haṃ
tasyaiva dehe layamiṣṭavāṃśca || 3.21 ||
iti śrutvā vaco mahyaṃ devadevaḥ sanātanaḥ |
uvāca prakṛtiṃ vipra saṃsarasvākṣayāmimām || 3.22 ||
brahmaṇo yugasāhastraṃ tatte tasmāt samudbhavaḥ |
bhavitā te tathā nāma dāsyate saṃprayojanam || 3.23 ||
nāraṃ pānīyamityuktaṃ taṃ pitṝṇāṃ sadā bhavān |
dadāti tena te nāma nāradeti bhaviṣyati || 3.24 ||
evamuktvā gato devaḥ sadyo'darśanamuccakaiḥ |
ahaṃ kalevaraṃ tyaktvā kālena tapasā tadā || 3.25 ||
brahmaṇo'ṅge layaṃ prāptastadotpattiṃ ca pārthiva |
divase tu punaḥ sṛṣṭo daśabhistanayaiḥ saha || 3.26 ||
dinādiryo hi devasya brahmaṇo'vyaktajanmanaḥ |
sa sṛṣṭyādiḥ samastānāṃ devādīnāṃ na saṃśayaḥ || 3.27 ||
sarvasya jagataḥ sṛṣṭireṣaiva prabhudharmataḥ |
etanme prākṛtaṃ janma yanmāṃ pṛcchasi pārthiva || 3.28 ||
tasmānnārāyaṇaṃ dhyātvā prāpto'smi parato nṛpa |
tasmāt tvamapi rājendra bhava viṣṇuparāyaṇaḥ || 3.29 ||
|| iti śrīvarāhapurāṇe bhagavacchāstre tṛtīyo'dhyāyaḥ || 3 ||
dharaṇyuvāca |
yo'sau nārāyaṇo devaḥ paramātmā sanātanaḥ |
bhagavan sarvabhāvena utāho neti śaṃsa me || 4.1 ||
śrīvarāha uvāca |
matsyaḥ kūrmo varāhaśca narasiṃho'tha vāmanaḥ |
rāmo rāmaśca kṛṣṇaśca buddhaḥ kalkī ca te daśa || 4.2 ||
ityetāḥ kathitāstasya mūrttayo bhūtadhāriṇi |
darśanaṃ prāptumicchūnāṃ sopānānīva śobhate || 4.3 ||
yat tasya paramaṃ rūpaṃ tanna paśyanti devatāḥ |
asmadādisvarūpeṇa pūrayanti tato dhṛtim || 4.4 ||
brahmā bhagavato mūrtyā rajasastamasastathā |
yābhiḥ saṃsthāpyate viśvaṃ sthitau saṃcālyate ca ha || 4.5 ||
tvamekā tasya devasya mūrtirādyā dharādhare |
dvitīyā salilaṃ mūrtistṛtīyā taijasī smṛtā || 4.6 ||
caturthī vāyumūrtiḥ syādākāśākhyā tu pañcamī |
etāstu mūratyastasya kṣetrajñatvaṃ hi maddhiyām |
mūrttitrayaṃ tathā tasya ityetāścāṣṭamūrtayaḥ || 4.7 ||
ābhivyaptimidaṃ sarvaṃ jagannārāyaṇena ha |
ityetat kathitaṃ devi kimanyacchrotumicchasi || 4.8 ||
dharaṇyuvāca |
nāradenaivamuktastu tadā rājā priyavrataḥ |
kṛtavān kiṃ mamācakṣva prasādāt parameśvara || 4.9 ||
śrīvarāha uvāca |
bhavatīṃ saptadhā kṛtvā putrāṇāṃ ca pradāya saḥ |
priyavratastapastepe nāradācchrutavismayaḥ || 4.10 ||
nārāyaṇātmakaṃ brahma paraṃ japtvā svayaṃbhuvaḥ |
tatastuṣṭamanāḥ pāraṃ paraṃ nirvāṇamāptavān || 4.11 ||
śrṛṇu cānyad varārohe yad vṛttaṃ parameṣṭhinaḥ |
ārādhanāya yatataḥ purākāle nṛpasya ha || 4.12 ||
āsīdaśvaśirā nāma rājā paramadhārmikaḥ |
so'śvamedhena yajñena yaṣṭvā subahudakṣiṇaḥ || 4.13 ||
snātaścāvabhṛthe so'tha brāhmaṇaiḥ parivāritaḥ |
yāvadāste sa rājarṣistāvad yogivaro muniḥ |
āyayau kapilaḥ śrīmān jaigīṣavyaśca yogirāṭ || 4.14 ||
tatastvaritamutthāya sa rājā svāgatakriyām |
cakāra parayā yuktaḥ sa mudā rājasattamaḥ || 4.15 ||
tāvarccitāvāsanagau dṛṣṭvā rājā mahābalaḥ |
papraccha tau tigmadhiyau yogajñau svecchayāgatau || 4.16 ||
bhavantau saṃśayaṃ viprau pṛcchāmi puruṣottamau |
kathamārādhayed devaṃ hariṃ nārāyaṇaṃ param || 4.17 ||
viprāvūcatuḥ |
ka eṣa procyate rājaṃstvayā nārāyaṇo guruḥ |
āvāṃ nārāyaṇau dvau tu tvatpratyakṣagatau nṛpa || 4.18 ||
aśvaśirā uvāca |
bhavantau brāhmaṇau siddhau tapasā dagdhakilbiṣau |
kathaṃ nārāyaṇāvāvāmiti vākyamatheritam || 4.19 ||
śaṅkhacakragadāpāṇiḥ pītavāsā janārdanaḥ |
garuḍastho mahādevaḥ kastasya sadṛśo bhuvi || 4.20 ||
tasya rājño vacaḥ śrutvā tau viprau saṃśitavratau |
jahasatuḥ paśya viṣṇuṃ rājanniti jajalpatuḥ || 4.21 ||
evamuktvā sa kapilaḥ svayaṃ viṣṇurbabhūva ha |
jaigīṣavyaśca garuḍastatkṣaṇāt samajāyata || 4.22 ||
tato hāhākṛtaṃ tvāsīt tatkṣaṇād rājamaṇḍalam |
dṛṣṭvā nārāyaṇaṃ devaṃ garuḍasthaṃ sanātanam || 4.23 ||
kṛtāñjalipuṭo bhūtvā tato rājā mahāyaśāḥ |
uvāca śāmyatāṃ viprau nāyaṃ viṣṇurathedṛśaḥ || 4.24 ||
yasya brahmā samutpanno nābhipaṅkajamadhyataḥ |
tasmācca brahmaṇo rudraḥ sa viṣṇuḥ parameśvaraḥ || 4.25 ||
iti rājavacaḥ śrutvā tadā tau munipuṃgavau |
cakratuḥ paramāṃ māyāṃ yogamāyāṃ viśeṣataḥ || 4.26 ||
kapilaḥ padmanābhastu jaigīṣavyaḥ prajāpatiḥ |
kamalastho babhau hrasvastasya cāṅke kumārakaḥ || 4.27 ||
dadarśa rājā raktākṣaṃ kālānalasamadyutim |
netthaṃ bhavati viśveśo māyaiṣā yogināṃ sadā |
sarvavyāpī hariḥ śrīmāniti rājā jagāda ha || 4.28 ||
tato vākyāvasāne tu tasya rājño hi saṃsadi |
maśakā matkuṇā yūkā bhramarāḥ pakṣiṇoragāḥ || 4.29 ||
aśvā gāvo dvipāḥ siṃhā vyāghrā gomāyavo mṛgāḥ |
anye'pi paśavaḥ kīṭā grāmyāraṇyāśca sarvaśaḥ |
dṛśyante rājabhavane koṭiśo bhūtadhāriṇi || 4.30 ||
taṃ dṛṣṭvā bhūtasaṃghātaṃ rājā vismitamānasaḥ |
yāvaccintayate kiṃ syādetadityavagamya ca |
jaigīṣavyasya māhātmyaṃ kapilasya ca dhīmataḥ || 4.31 ||
kṛtāñjalipuṭo bhūtvā sa rājā'śvaśirāstadā |
papraccha tāvṛṣī bhaktyā kimidaṃ dvijasattamau || 4.32 ||
dvijāvūcatuḥ |
āvāṃ pṛṣṭau tvayā rājan kathaṃ viṣṇurihejyate |
prāpyate vā mahārāja tenedaṃ darśitaṃ tava || 4.33 ||
sarvajñasya guṇā hyete ye rājaṃstava darśitāḥ |
sa ca nārāyaṇo devaḥ sarvajñaḥ kāmarūpavān || 4.34 ||
saumyastu saṃsthitaḥ kvāpi prāpyate manujaiḥ kila |
ārādhanena caitasya vākyamarthavadiṣyate || 4.35 ||
kintu sarvaśarīrasthaḥ paramātmā jagatpatiḥ |
svadehe dṛśyate bhaktyā naikasthānagatastu saḥ || 4.36 ||
ato'rthaṃ darśitaṃ rūpaṃ devasya paramātmanaḥ |
āvayostava rājendra pratītiḥ syād yathā tava |
evaṃ sarvagato viṣṇustava dehe janeśvara || 4.37 ||
mantriṇāṃ bhṛtyasaṅghasya surādyā ye pradarśitāḥ |
paśavaḥ kīṭasaṅghāśca te'pi viṣṇumayā nṛpa || 4.38 ||
bhāvanāṃ tu dṛḍhāṃ kuryād yathā sarvagato hariḥ |
nānyat tat sadṛśaṃ bhūtamiti bhāvena sevyate || 4.39 ||
eṣa te jñānasadbhāvastava rājan prakīrtitaḥ |
paripūrṇena bhāvena smaran nārāyaṇaṃ harim || 4.40 ||
paripūrṇena bāvena smara nārāyaṇaṃ gurum |
puṣpopahārairdhūpaiśca brāhmaṇānāṃ ca tarpaṇaiḥ |
dhyānena susthitenāśu prāpyate parameśvaraḥ || 4.41 ||
|| iti śrīvarāhapurāṇe bhagavacchāstre caturtho'dhyāyaḥ || 4 ||
aśvaśirā uvāca |
bhavantau mama saṃdehamekaṃ chettumihārhataḥ |
yena chinnena jāyeta mama saṃsāravicyutiḥ || 5.1 ||
evamukte nṛpatinā tadā yogivaro muniḥ |
kapilaḥ prāha dharmātmā rājānaṃ yajatāṃ varam || 5.2 ||
kapila uvāca |
kaste manasi saṃdeho rājan paramadhārmika |
chindāmi yena tacchrutvā brūhi yatte'bhivāñchitam || 5.3 ||
rājovāca |
karmaṇā prāpyate mokṣa utāho jñāninā mune |
etanme saṃśayaṃ chindhi yadi me'nugrahaḥ kṛtaḥ || 5.4 ||
kapila uvāca |
imaṃ praśnaṃ mahārāja purā pṛṣṭo bṛhaspatiḥ |
raibhyeṇa brahmaputreṇa rājñā ca vasunā purā |
vasurāsīnnṛpaśreṣṭho vidvān dānapatiḥ purā || 5.5 ||
cākṣuṣasya manoḥ kāle brahmaṇo'nvayavarddhanaḥ |
vasuśca brahmaṇaḥ sadma gatavāṃstaddidṛkṣayā || 5.6 ||
pathi caitrarathaṃ dṛṣṭvā vidyādharavaraṃ nṛpa |
apṛcchacca vasuḥ prītyā brahmaṇo'vasaraṃ prabho || 5.7 ||
so'bravīd devasamitirvartate brahmaṇo gṛhe |
evaṃ śrutvā vasustasthau dvāri brahmaukasastadā |
tāvat tatraiva raibhyastu ājagāma mahātapāḥ || 5.8 ||
sa rājā prītamanasā vasuḥ saṃpūrṇamānasaḥ |
uvāca pūjayitvāgre kva prayāto'si vai mune || 5.9 ||
raibhya uvāca |
ahaṃ bṛhaspateḥ pārśve āgato'smi mahānṛpa |
kiñcitkāryāntaraṃ praṣṭumahaṃ devapurohitam || 5.10 ||
evaṃ vadati raibhye tu brahmaṇastanmahatsadaḥ |
uttasthau svāni dhiṣṇyāni gatā devagaṇāḥ prabho || 5.11 ||
tāvad bṛhaspatistatra raibhyeṇa saha saṃvidam |
kṛtvā svadhiṣṇyamagamad vasunā ca supūjitaḥ || 5.12 ||
raibhya āṅgiraso rājā vasuścopaviveśa ha |
upaviṣṭeṣu rājendra teṣu teṣvapi so'bravīt || 5.13 ||
bṛhaspatirdevagurū raibhyaṃ vacanamantike |
kiṃ karomi mahābhāga vedavedāṅgapāraga || 5.14 ||
raibhya uvāca |
bṛhaspate karmaṇā kiṃ prāpyate jñāninā'thavā |
mokṣa etanmamācakṣva pṛcchataḥ saṃśayaṃ prabho || 5.15 ||
bṛhaspatiruvāca |
yatkiṃcit kurute karma puruṣaḥ sādhvasādhu vā |
sarvaṃ nārāyaṇe nyasya kurvan naiva ca lipyate || 5.16 ||
śrūyate ca dvijaśreṣṭha saṃvādo vipralubdhayoḥ |
ātreyo brāhmaṇaḥ kaścid vedābhyāsarato muniḥ || 5.17 ||
vasatyavirataṃ prātaḥsnāyī triṣavaṇe rataḥ |
nāmnā saṃyamanaḥ pūrvamekasmin divase nadīm |
dharmāraṇye gataḥ snātuṃ dhanyāṃ bhāgīrathīṃ śubhām || 5.18 ||
tatrāsīnaṃ mahāyūthaṃ hariṇānāṃ vicakṣaṇaḥ |
lubdho niṣṭhurako nāma dhanuḥpāṇiḥ kṛtāntavat |
āyayau taṃ jighāṃsuḥ sa dhanuṣyāyojya sāyakam || 5.19 ||
tataḥ saṃyamano vipro dṛṣṭvā taṃ mṛgayāratam |
vārayāmāsa mā bhadra jīvaghātamimaṃ kuru || 5.20 ||
etacchrutvā vaco vyādhaḥ smitapūrvamidaṃ vacaḥ |
uvāca nāhaṃ hiṃsāmi pṛthagjīvaṃ dvijottama || 5.21 ||
paramātmā tvayaṃ bhūtaiḥ krīḍate bhagavān svayam |
kṛtā mṛdā balīvarddāstadvadetanna saṃśayaḥ || 5.22 ||
ahe bhāvaḥ sadā brahmannavidyeyaṃ mumukṣuṇām |
yātrāprāṇarataṃ sarvaṃ jagadetad viceṣṭitam |
tatrāhamiti yaḥ śabdaḥ sa sādhutvaṃ na gacchati || 5.23 ||
ityākarṇya sa viprendro dvijaḥ saṃyamanastadā |
vismayenābravīd vākyaṃ lubdhaṃ niṣṭhurakaṃ dvijaḥ || 5.24 ||
kimetaducyate bhadra pratyakṣaṃ hetumadvacaḥ |
tataḥ śrutvā munervipraṃ lubdhakaḥ prāha dharmavit |
kutvā lohamayaṃ jālaṃ tasyādho jvalanaṃ dadau || 5.25 ||
dattvā vahniṃ dvijaṃ prāha jvālyatāṃ kāṣṭhasacayaḥ |
tato vipro mukhenāgniṃ prajvālya virarāma ha || 5.26 ||
jvalite tu punarvahnau taṃ jālaṃ lohasaṃbhavam |
pṛthakpṛthak sahastrāṇi ninye'ntarjālakairdvija |
ekasthānagatasyāpi vahnerāyasajālakaiḥ || 5.27 ||
tato lubdho'bravīdvipramekāṃ jvālāṃ mahāmune |
gṛhāṇa yena śeṣāṇāṃ kariṣyāmīha nāśanam || 5.28 ||
evamuktvā hutāśe tu toyapūrṇaṃ ghaṭaṃ drutam |
cikṣepa sahasā vahniḥ praśaśāmāśu pūrvavat || 5.29 ||
tato'bravīllubdhakastu brāhmaṇaṃ taṃ tapodhanam |
bhagavan yā tvayā jvālā gṛhotāsīddhutāśanāt |
prayaccha yena mārgāṇi māṃsānyānāyya bhakṣaye || 5.30 ||
evamuktastadā vipro yāvadāyasajālakam |
paśyatyeva na tatrāgnirmūlanāśe gataḥ kṣayam || 5.31 ||
tato vilakṣabhāvena brāhmaṇaḥ śaṃsitavrataḥ |
tūṣṇīṃbhūtasthitastāvallubdhako vākyamabravīt || 5.32 ||
etasmiñjvalito vahnirbahuśākhaśca sattama |
mūlanāśe bhavennāśastadvadetadapi dvija || 5.33 ||
ātmā sa prakṛtisthaśca bhūtānāṃ saṃśrayo bhavet |
bhūya eṣā jagatsṛṣṭistatraiva jagato bhavet || 5.34 ||
piṇḍagrahaṇadharmeṇa yadasya vihitaṃ vratam |
tattadātmani saṃyojya kurvāṇo nāvasīdati || 5.35 ||
evamukte tu vyādhena brāhmaṇe rājasattama |
puṣpavṛṣṭirathākāśāt tasyopari papāta ha || 5.36 ||
vimānāni ca divyāni kāmagāni mahānti ca |
bahuratnāni mukhyāni dadṛśe brāhmaṇottamaḥ || 5.37 ||
teṣu niṣṭhurakaṃ lubdhaṃ sarveṣu samavasthitam |
dadṛśe brāhmaṇastatra kāmarūpiṇamuttamam || 5.38 ||
advaitavāsanāsiddhaṃ yogād bahuśarīrakam |
dṛṣṭvā vipro mudā yuktaḥ prayayau nijamāśramam || 5.39 ||
evaṃ jñānavataḥ karmma kurvato'pi svajātikam |
bhavenmuktirdvijaśreṣṭha raibhya rājan vaso dhruvam || 5.40 ||
evaṃ tau saṃśayacchedaṃ prāptau raibhyavasū nṛpa |
bṛhaspatestato dhiṣṇyājjagmaturnijamāśramam || 5.41 ||
tasmāt tvamapi rājendra devaṃ nārāyaṇaṃ prabhum |
abhedena svadehasthaṃ paśyannārādhaya prabhum || 5.42 ||
kapilasya vacaḥ śrutvā sa rājā'śvaśirā vibhuḥ |
jyeṣṭhaṃ putraṃ samāhūya dhanyaṃ sthūlaśirāhvayam |
abhiṣicya nije rājye sa rājā prayayau vanam || 5.43 ||
naimiṣākhyaṃ varārohe tatra yajñatanuṃ gurum |
tapasārādhayāmāsa yajñamūrtiṃ stavena ca || 5.44 ||
dharaṇyuvāca |
kathaṃ yajñatanoḥ stotraṃ rājñā nārāyaṇasya ha |
stutiḥ kṛtā mahābhāga punaretacca śaṃsa me || 5.45 ||
śrīvarāha uvāca |
namāmi yājyaṃ tridaśādhipasya
bhavasya sūryasya hutāśanasya |
somasya rājño marutāmaneka-
rūpaṃ hariṃ yajñanaraṃ namasye || 5.46 ||
subhīmadaṃṣṭraṃ śaśisūryanetraṃ
saṃvatsare cāyanayugmakukṣam |
darbhāṅgaromāṇamathedhmaśaktiṃ
sanātanaṃ yajñanaraṃ namāmi || 5.47 ||
dyāvāpṛthivyoridamantaraṃ hi
vyāptaṃ śarīreṇa diśaśca sarvāḥ |
tamīḍyamīśaṃ jagatāṃ prasūtiṃ
janārdanaṃ taṃ praṇato'smi nityam || 5.48 ||
surāsurāṇāṃ ca jayājayāya
yuge yuge yaḥ svaśarīramādyam |
sṛjatyanādiḥ parameśvaro ya-
staṃ yajñamūrtiṃ praṇato'smi nātham || 5.49 ||
dadhāra māyāmayamugratejā
jayāya cakraṃ tvamalāṃśuśubhram |
gadāsiśārṅgādicaturbhujo'yaṃ
taṃ yajñamūrtiṃ praṇato'smi nityam || 5.50 ||
kvacit sahastraṃ śirasāṃ dadhāra
kvacinmahāparvatatulyakāyam |
kvacit sa eva trasareṇutulyo
yastaṃ sadā yajñanaraṃ namāmi || 5.51 ||
caturmukho yaḥ sṛjate samagraṃ
rathāṅgapāṇiḥ pratipālanāya |
kṣayāya kālānalasannibho ya-
staṃ yajñamūrtiṃ praṇato'smi nityam || 5.52 ||
saṃsāracakrakramaṇakriyāyai
ya ijyate sarvagataḥ purāṇaḥ |
yo yogibhirdhyāyate cāprameyas
taṃ yajñamūrtiṃ praṇato'smi nityam || 5.53 ||
samyaṅmanasyarpitavānahaṃ te
yadā sudṛśyaṃ svatanau nu tattvam |
na cānyadastoti matiḥ sthirā me
yatastato māvatu śuddhabhāvam || 5.54 ||
itīritastasya hutāśanārciḥ -
prakhyaṃ tu tejaḥ purato babhūva |
tasmin sa rājā praviveśa buddhiṃ
kṛtvā layaṃ prāptavān yajñamūrtau || 5.55 ||
|| iti śrīvarāhapurāṇe bhagavacchāstre pañcamo'dhyāyaḥ || 5 ||
dharaṇyuvāca |
sa vasuḥ saṃśayacchedaṃ prāpya raibhyaśca sattamaḥ |
ubhau kiṃ cakraturdeva śrutvā cāṅgirasaṃ vacaḥ || 6.1 ||
śrīvarāha uvāca |
sa vasuḥ sarvadharmajñaḥ svarājyaṃ pratipālayan |
ayajad bahubhiryajñairmahadbhirbhūridakṣiṇaiḥ || 6.2 ||
karmakāṇḍena deveśaṃ hariṃ nārāyaṇaṃ prabhum |
toṣayāmāsa rājendrastamabhedena cintayan || 6.3 ||
tataḥ kālena mahatā tasya rājño matiḥ kila |
nivṛttarājyabhogasya dndvasyāntamupeyuṣī || 6.4 ||
tataḥ putraṃ vivasvantaṃ śreṣṭhaṃ bhrātṛśatasya ha |
abhiṣicya svake rājye tapovanamupāgamat || 6.5 ||
puṣkaraṃ nāma tīrthānāṃ pravaraṃ yatra keśavaḥ |
puṇḍarīkākṣanāmā tu pūjyate tatparāyaṇaiḥ || 6.6 ||
tatra gatvā sa rājarṣiḥ kāśmīrādhipatirvasuḥ |
atitīvreṇa tapasā svaśarīramaśoṣayat || 6.7 ||
puṇḍarīkākṣapāraṃ tu stavaṃ bhaktyā japan budhaḥ |
ārirādhayiṣurdevaṃ nārāyaṇamakalmaṣam |
stotrānte tallayaṃ prāptaḥ sa rājā rājasattamaḥ || 6.8 ||
dharaṇyuvāca |
puṇḍarīkākṣapāraṃ tu stotraṃ deva kathaṃ smṛtam |
kīdṛśaṃ tanmamācakṣva parameśvara tattvataḥ || 6.9 ||
śrīvarāha uvāca |
namaste puṇḍarīkākṣa namaste madhusūdana |
namaste sarvalokeśa namaste tigmacakriṇe || 6.10 ||
viśvamūrtiṃ mahābāhuṃ varadaṃ sarvatejasam |
namāmi puṇḍarīkākṣaṃ vidyā'vidyātmakaṃ vibhum || 6.11 ||
ādidevaṃ mahādevaṃ vedavedāṅgapāragam |
gambhīraṃ sarvadevānāṃ namāmi madhusūdanam || 6.12 ||
viśvamūrtiṃ mahāmūrtiṃ vidyāmūrtiṃ trimūrtikam |
kavacaṃ sarvadevānāṃ namasye vārijekṣaṇam || 6.13 ||
sahastraśīrṣiṇaṃ devaṃ sahastrākṣaṃ mahābhujam |
jagatsaṃvyāpya tiṣṭhantaṃ namasye parameśvaram || 6.14 ||
śaraṇyaṃ śaraṇaṃ devaṃ viṣṇuṃ jiṣṇuṃ sanātanam |
nīlameghapratīkāśaṃ namasye cakrapāṇinam || 6.15 ||
śuddhaṃ sarvagataṃ nityaṃ vyomarūpaṃ sanātanam |
bhāvābhāvavinirmuktaṃ masye sarvagaṃ harim || 6.16 ||
nānyat kiṃcit prapaśyāmi vyatiriktaṃ tvayā'cyuta |
tvanmayaṃ ca prapaśyāmi sarvametaccarācaram || 6.17 ||
evaṃ tu vadatastasya mūrttimān puruṣaḥ kila |
nirgatya dehānnīlābho ghanacaṇḍo bhayaṃkaraḥ || 6.18 ||
raktākṣo hrasvakāyastu dagdhasthūṇāsamaprabhaḥ |
uvāca prāñjalirbhūtvā kiṃ karomi narādhipa || 6.19 ||
rājovāca |
ko'si kiṃ kāryamiha te kasmādāgatavānasi |
etanme kathaya vyādha etadicchāmi veditum || 6.20 ||
vyādha uvāca |
pūrvaṃ kaliyuge rājan rājā tvaṃ dakṣiṇāpathe |
pūrṇadharmodbhavaḥ śrīmāñjanasthāne vicakṣaṇaḥ || 6.21 ||
sa kadācid bhavān vīra turagaiḥ parivāritaḥ |
araṇyamāgato hantuṃ śvāpadāni viśeṣataḥ || 6.22 ||
tatra tvayā'nyakāmena mṛgaveṣadharo muniḥ |
daṇḍayugmena dūre tu pātito dharaṇītale || 6.23 ||
sadyo mṛtaśca viprendrastvaṃ ca rājan mudā yutaḥ |
hariṇo'yaṃ hata iti yāvat paśyasi pārthiva |
tāvanmṛgavapurvipro mṛtaḥ prastravaṇe girau || 6.24 ||
taṃ dṛṣṭvā tvaṃ mahārāja kṣubhitendriyamānasaḥ |
gṛhaṃ gatastato'nyasya kasyacit kathitaṃ tvayā || 6.25 ||
tataḥ katipayāhasya tvayā rātrau nareśvara |
brahmahatyābhayādbhītacitenaitad vicintitam |
kṛtyaṃ karomi śāntyarthaṃ mucyate yena pātakāt || 6.26 ||
tatastvayā mahārāja sakṛnnārāyaṇaṃ prabhum |
saṃcintya dvādaśī śuddhā tvayā rājannupoṣitā || 6.27 ||
nārāyaṇo me suprīta iti proktvā śubhe'hani |
gaurdattā vidhinā sadyo mṛto'syudaraśūlataḥ || 6.28 ||
abhukto dvādaśīdharme yat tatrāpi ca kāraṇam |
kathayāmi bhavatpatnī nāmnā nārāyaṇī śubhā || 6.29 ||
sā kaṇṭhagena prāṇena vyāhṛtā tena te gatiḥ |
kalpamekaṃ mahārāja jātā viṣṇupure tava || 6.30 ||
ahaṃ ca tava dehasthaḥ sarvaṃ jānāmi cākṣayam |
brahmagraho mahāghoraḥ pīḍayāmīti me matiḥ || 6.31 ||
tāvadviṣṇostu puruṣaiḥ kiṅkarairmusalairaham |
prahataḥ saṃkṣayaṃ yātastataste romakūpataḥ |
svargasthasyāpi rājendra sthito'haṃ svena tejasā || 6.32 ||
tato'haḥkalpanirvṛtte rātrikalpe ca sattama |
idānīmādisṛṣṭau tu kṛte nṛpatisattama || 6.33 ||
saṃbhūtastvaṃ mahārāja rājñaḥ sumanaso gṛhe |
kāśmīradeśādhipaterahaṃ cāṅgaruhaistava || 6.34 ||
yajñairiṣṭaṃ tvayānekairbahubhiścāptadakṣiṇaiḥ |
na cāhaṃ tairapahato viṣṇusmaraṇavarjitaiḥ || 6.35 ||
idānīṃ yat tvayā stotraṃ puṇḍarīkākṣapārakam |
paṭhitaṃ tatprabhāvena vihāyāṅgaruhāṇyaham |
ekībhūtaḥ punarjāto vyādharūpo nṛpottama || 6.36 ||
ahaṃ bhagavataḥ stotraṃ śrutvā prākpāpamūrttinā |
mukto'smi dharmabuddhirme varttate sāmprataṃ vibho || 6.37 ||
etacchrutvā vaco rājā paraṃ vismayamāgataḥ |
vareṇa chandayāmāsa taṃ vyādhaṃ rājasattamaḥ || 6.38 ||
rājovāca |
smārito'smi yathā vyādha tvayā janmāntaraṃ gatam |
tathā tvaṃ matprasādena dharmavyādho bhaviṣyasi || 6.39 ||
yaścaitat puṇḍarīkākṣapāragaṃ śrṛṇuyāt param |
tasya puṣkarayātrāyāṃ vidhisnānaphalaṃ bhavet || 6.40 ||
śrīvarāha uvāca |
evamuktvā tato rājā vimānavaramāsthitaḥ |
pareṇa tejasā yogamavāpāśeṣadhāriṇi || 6.41 ||
|| iti śrīvarāhapurāṇe bhagavacchāstre ṣaṣṭho'dhyāyaḥ || 6 ||
dharaṇyuvāca |
raibhyo'sau muniśārdūlaḥ śrutvā siddhaṃ vasuṃ tadā |
svayaṃ kimakarod deva saṃśayo me mahānayam || 7.1 ||
śrīvarāha uvāca |
sa raibhyo muniśārdūlaḥ śrutvā siddhaṃ vasuṃ tadā |
ājagāma gayāṃ puṇyāṃ pitṛtīrthaṃ tapodhanaḥ |
tatra gatvā pitṝn bhaktyā piṇḍadānena tarpayat || 7.2 ||
tato vai suhamattīvraṃ tapaḥ paramaduścaram |
caratastasya tattīvraṃ tapo raibhyasya dhīmataḥ |
ājagāma mahāyogī vimānastho'tidīptimān || 7.3 ||
trasareṇusame śuddhe vimāne sūryasannibhe |
paramāṇupramāṇena puruṣastatra dīptimān || 7.4 ||
so'bravīd raibhya kiṃ kāryaṃ tapaścarasi suvrata |
evamuktvā divo bhūmiṃ māpayāmāsa vai pumān || 7.5 ||
tatrāpi rathapañcābhaṃ vimānaṃ sūryasannibham |
yugapad brahmabhuvanaṃ vyāpnuvantaṃ dadarśa saḥ || 7.6 ||
tataḥ sa vismayāviṣṭo raibhyaḥ praṇatipūrvakam |
papraccha taṃ mahāyogin ko bhavān prabravītu me || 7.7 ||
puruṣa uvāca |
ahaṃ rudrādavarajo brahmaṇo mānasaḥ sutaḥ |
nāmnā sanatkumāreti janaloke vasāmyaham || 7.8 ||
bhavataḥ pārśvamāyātaḥ praṇayena tapodhana |
dhanyo'si sarvathā vatsa brahmaṇaḥ kulavardhanaḥ || 7.9 ||
raibhya uvāca |
namo'stu te yogivara prasīda
dayāṃ mahyaṃ kuruṣe viśvarūpa |
kimatra kṛtyaṃ vada yogisiṃha
kathaṃ hi dhanyo'hamuktastvayā ca || 7.10 ||
sanatkumāra uvāca |
dhanyastvameva dvijavaryamukhya
yad vedavādābhirataḥ pitṝṃśca |
prīṇāsi mantravratajapyahomai-
rgayāṃ samāsādya tathā'nnapiṇḍaiḥ || 7.11 ||
śrṛṇuṣva cānyaṃ nṛpatirbabhūva
viśālanāmā sa purīṃ viśālām |
uvāsa dhanyo dhṛtimānaputraḥ
svayaṃ viśālādhipatirdvijāgryān |
papraccha putrārthamamitrasāha -
ste brāhmaṇāścocuradīnasattvāḥ || 7.12 ||
rgatvā gayāmannadānairanekaiḥ |
dhruvaṃ sutaste bhavitā nṛpeśa
susaṃpradātā sakalakṣitīśaḥ || 7.13 ||
itīrito brāhmaṇaiḥ sa prahṛṣṭo
rājā viśālādhipatiḥ prayatnāt |
āgatya tena pravareṇa tīrthe
maghāsu bhaktyā'tha kṛtaṃ pitṝṇām || 7.14 ||
piṇḍapradānaṃ vidhinā prayatnā-
dadadviyatyuttamamūrtayastān |
paśyan sa puṃsaḥ sitapītakṛṣṇā-
nuvāca rājā kimidaṃ bhavadbhiḥ |
upekṣyate śaṃsata sarvameva
kautūhalaṃ me manasi pravṛttam || 7.15 ||
sita uvāca |
ahaṃ sitaste janako'smi tāta
nāmnā ca vṛttena ca karmaṇā ca |
ayaṃ ca me janako raktavarṇo
nṛśaṃsakṛd brahmahā pāpakārī || 7.16 ||
adhīśvaro nāma paraḥ pitā'sya
kṛṣṇo vṛttyā karmaṇā cāpi kṛṣṇaḥ |
etena kṛṣṇena hatāḥ purā vai
janmanyaneke ṛṣayaḥ purāṇāḥ || 7.17 ||
etau mṛtau dvāvapi putra raudra-
mavīcisaṃjñaṃ narakaṃ prapannau |
adhīśvaro me janakaḥ paro'sya
kṛṣṇaḥ pitā dvāvapi dīrghakālam |
ahaṃ ca śuddhena nijena karmaṇā
śakrāsanaṃ prāpito durlabhaṃ tataḥ || 7.18 ||
tvayā punarmantravidā gayāyāṃ
piṇḍapradānena balādimau ca |
melāpitau tīrthapiṇḍapradāna -
prabhāvato me narakāśritāvapi || 7.19 ||
pitṝn pitāmahāṃstatra tathaiva prapitāmahān |
prīṇayāmīti tattoyaṃ tvayā dattamariṃdama || 7.20 ||
tenāsmadyugapadyogo jāto vākyena sattama |
tīrthaprabhāvād gacchāmaḥ pitṛlokaṃ na saṃśayaḥ || 7.21 ||
atra piṇḍapradānena etau tava pitāmahau |
durgatāvapi saṃsiddhau pāpakṛdvikṛtiṃ gatau || 7.22 ||
tīrthaprabhāva eṣo'smin brahmaghnasyāpi tatsutaḥ |
putaḥ piṇḍapradānena kuryāduddharaṇaṃ punaḥ || 7.23 ||
etasmāt kāraṇāt putra ahametau vigṛhya vai |
āgato'smi bhavantaṃ vai draṣṭuṃ yāsyāmi sāmpratam |
etasmāt kāraṇād raibhya bhavān dhanyo mayocyate || 7.24 ||
sakṛd gayābhigamanaṃ sakṛtpiṇḍapradāpanam |
durlabhaṃ tvaṃ punarnityamasminneva vyavasthitaḥ || 7.25 ||
kimanu procyate raibhya tava puṇyamidaṃ prabho |
yena sākṣād gadāpāṇirdṛṣṭo nārāyaṇaḥ svayam || 7.26 ||
tato gadādharaḥ sākṣādasmiṃstīrthe vyavasthitaḥ |
ato'tivikhyātatamaṃ tīrthametad dvijottama || 7.27 ||
śrīvarāha uvāca |
evamuktvā mahāyogī tatraivāntaradhīyata |
raibhyo'pi ca gadāpāṇerhareḥ stotramathākarot || 7.28 ||
raibhya uvāca |
gadādharaṃ vibudhajanairabhiṣṭutaṃ
dhṛtakṣamaṃ kṣudhitajanārttināśanam |
śivaṃ viśālāsurasainyamardanaṃ
namāmyahaṃ hatasakalāśubhaṃ smṛtau || 7.29 ||
purāṇapūrvaṃ puruṣaṃ puruṣṭṛtaṃ
purātanaṃ vimalamalaṃ nṛṇāṃ gatim |
trivikramaṃ dhṛtadharaṇiṃ balerhaṃ
gadādharaṃ rahasi namāmi keśavam || 7.30 ||
suśuddhabhāvaṃ vibhavairupāvṛtaṃ
śriyāvṛtaṃ vigatamalaṃ vicakṣaṇam |
kṣitīśvarairapagatakilbiṣaiḥ stutaṃ
gadādharaṃ praṇamati yaḥ sukhaṃ vaset || 7.31 ||
surāsurairarccitapādapaṅkajaṃ
keyūrahārāṅgadamaulidhāriṇam |
abdhau śayānaṃ ca rathāṅgapāṇinaṃ
gadādharaṃ praṇamati yaḥ sukhaṃ vaset || 7.32 ||
sitaṃ kṛte tretāyuge'ruṇaṃ vibhuṃ
tathā tṛtīye pītavarṇamacyutam |
kalau ghanālipratimaṃ maheśvaraṃ
gadādharaṃ praṇamati yaḥ sukhaṃ vaset || 7.33 ||
bījodbhavo yaḥ sṛjate caturmukha-
stathaiva nārāyaṇarūpato jagat |
prapālayed rudravapustathāntakṛd
gadādharo jayatu ṣaḍarddhamūrtimān || 7.34 ||
sattvaṃ rajaścaiva tamo guṇāstraya-
stveteṣu nānyasya samudbhavaḥ kila |
sa caika eva trividho gadādharo
dadhātu dhairyaṃ mama dharmamokṣayoḥ || 7.35 ||
saṃsāratoyārṇavaduḥkhatantubhi-
rviyoganakrakramaṇaiḥ subhīṣaṇaiḥ |
majjantamuccaiḥ sutarāṃ mahāplave
gadādharo māmu dadhātu potavat || 7.36 ||
svayaṃ trimūrtiḥ svamivātmanātmani
svaśaktitaścāṇḍamidaṃ sasarjja ha |
tasmiñjalotthāsanamāryatejasaṃ
sasarjja yastaṃ praṇato'smi bhūdharam || 7.37 ||
matsyādināmāni jagatsu kevalaṃ
surādisaṃrakṣaṇato vṛṣākapiḥ |
mukhyasvarūpeṇa samantato vibhu-
rgadādharo me vidadhātu sadgatim || 7.38 ||
śrīvarāha uvāca |
evaṃ stutastadā viṣṇurbhaktyā raibhyeṇa dhīmatā |
prādurbabhūva sahasā pītavāsā janārdanaḥ || 7.39 ||
śaṅkhacakragadāpāṇirgaruḍastho viyadgataḥ |
uvāca meghagambhīradhīravāk puruṣottamaḥ || 7.40 ||
tuṣṭo'smi raibhya bhaktyā te stutyā ca dvijasattama |
tīrthasnānena ca vibho brūhi yatte'bhivāñchitam || 7.41 ||
raibhya uvāca |
gatiṃ me dehi deveśa yatra te sanakādayaḥ |
vaseyaṃ tatra yenāhaṃ tvatprasādād gadādhara || 7.42 ||
deva uvāca |
evamastviti te brahmannityuktvā'ntaradhīyata |
bhagavānapi raibhyastu divyajñānasamanvitaḥ || 7.43 ||
kṣaṇād babhūva devena parituṣṭena cakriṇā |
jagāma yatra te siddhāḥ sanakādyā maharṣayaḥ || 7.44 ||
etacca raibhyanirddiṣṭaṃ stotraṃ viṣṇorgadābhṛtaḥ |
yaḥ paṭhet sa gayāṃ gatvā piṇḍadānād viśiṣyate || 7.45 ||
|| iti śrīvarāhapurāṇe bhagavacchāstre saptamo'dhyāyaḥ || 7 ||
śrīvarāha uvāca |
yo'sau vasoḥ śarīre tuvyādho bhūtvā nṛpasya ha |
sa svavṛttyāṃ sthitaḥ kālaṃ caturvarṣasahastrikam || 8.1 ||
ekaikaṃ svakuṭumbārthe hatvā vanacaraṃ mṛgam |
bhṛtyātithihutāśānāṃ prīṇanaṃ kurute sadā || 8.2 ||
mithilāyāṃ varārohe sadā parvaṇi parvaṇi |
pitṝṇāṃ kurute śrāddhaṃ svācāreṇa vicakṣaṇaḥ || 8.3 ||
agniṃ paricaran nityaṃ vadan satyaṃ subhāṣitam |
prāṇayātrānusaktastu yo'sau jīvaṃ na pātayet || 8.4 ||
evaṃ tu vasatastasya dharmabuddhirmahātapāḥ |
putrastvarjunako nāma babhūva munivadvaśī || 8.5 ||
tasya kālena mahatā cāritreṇa ca dhīmataḥ |
babhūvārjjunakī nāma kanyā ca varavarṇinī || 8.6 ||
tasyā yauvanakāle tu cintayāmāsa dharmavit |
kasyeyaṃ dīyate kanyā ko vā yogyaśca vai pumān || 8.7 ||
iti cintayatastasya mataṅgasya sutaṃ prati |
dharmavyādhasya suvyaktaṃ prasannākhyaṃ prati bruvan || 8.8 ||
evaṃ saṃcintya mātaṅgaḥ prasannaṃ prati sodyataḥ |
uvāca tasya pitaraṃ prasannāyārjjunīṃ bhavān |
gṛhāṇa tapatāṃ śreṣṭha svayaṃ dattāṃ mahātmane || 8.9 ||
mataṅga uvāca |
prasanno'yaṃ mama sutaḥ sarvaśāstraviśāradaḥ |
gṛhṇāmyarjunakīṃ kanyāṃ tvatsutāṃ vyādhasattama || 8.10 ||
evamukte tadā kanyāṃ dharmavyādho mahātapāḥ |
mataṅgaputrāya dadau prasannāya ca dhīmate || 8.11 ||
dharmavyādhastadā kanyāṃ datvā svagṛhamīyivān |
sā'pi śvaśurayorbhartuḥ śuśrīṣaṇaparā'bhavat || 8.12 ||
atha kālena mahatā sā kanyā'rjunakī śubhā |
uktā śvaśruvā sutā putri jīvahantustvamīdṛśī |
na jānāsi tapaścartuṃ bhartturārādhanaṃ tathā || 8.13 ||
sā'pi svalpāparādhena bhartsitā tanumadhyamā |
piturveśmagatā bālā rodamānā muhurmuhuḥ || 8.14 ||
pitrā pṛṣṭā kimetat te putri rodanakāraṇam |
evamuktā tadā sā tu kathayāmāsa bhāminī || 8.15 ||
śvaśvrā'hamuktā tīvreṇa kopena mahatā pitaḥ |
jīvahantuḥ sutetyuccairasakṛd vyādhajeti ca || 8.16 ||
etacchrutvā sa dharmātmā dharmavyādho ruṣānvitaḥ |
mataṅgasya gṛhaṃ so'tha gatvā janapadairvṛtam || 8.17 ||
tasyāgatasya saṃbandhī mataṅgo jayatāṃ varaḥ |
āsanādyardhyapādyena pūjayitvedamabravīt |
kimāgamanakṛtyaṃ te kiṃ karomyāgatakriyām || 8.18 ||
vyādha uvāca |
bhojanaṃ kiṃcidicchāmi bhoktuṃ caitanyavarjitam |
kautūhalena yenāhamāgato bhavato gṛham || 8.19 ||
mataṅga uvāca |
godhūmā vrīmayaścaiva saṃskṛtā mama veśmani |
bhujyatāṃ dharmavicchreṣṭha yathākāmaṃ tapodhana || 8.20 ||
vyādha uvāca |
paśyāmi kīdṛśāste hi godhūmā vrīhayo yavāḥ |
svarūpeṇa ca santyete yena vo vedmi sattama || 8.21 ||
śrīvarāha uvāca |
evamukte mataṅgena śūrpaṃ godhūmapūritam |
aparaṃ tatra vrīhīṇāṃ dharmavyādhāya darśitam || 8.22 ||
dṛṣṭvā vrīhīn sagodhūmān dharmavyādho varāsanāt |
utthāya gantumārebhe mataṅgena nivāritaḥ || 8.23 ||
kimarthaṃ gantumārabdhaṃ tvayā vada mahāmate |
abhuktenaiva saṃsiddhaṃ madgṛhe cānnamuttamam |
pācayitvā svayaṃ caiva kasmāt tvaṃ nādya bhuñjase || 8.24 ||
vyādha uvāca |
sahastraśaḥ koṭiśaśca jīvān haṃsi dine dine |
athedṛśasya pāpasya ko'nnaṃ bhuñjati satpumān || 8.25 ||
acaitanyaṃ yadi gṛhe vidyate'nnaṃ susaṃskṛtam |
idānīmatra saṃdṛṣṭā ete tu jalajantavaḥ || 8.26 ||
(uptāḥ sahastratāṃ yānti pratisaṃvatsaraṃ mune |) || 8.26 (1)||
ahamekaṃ kuṭumbārthe hanmyaraṇye paśuṃ dine |
taṃ cet pitṛbhyaḥ saṃskṛtya dattvā bhuñjāmi sānugaḥ || 8.27 ||
tvaṃ tu jīvān bahūn hatvā svakuṭumbena sānugaḥ |
bhuñjannetena satatamabhojyaṃ tanmataṃ mama || 8.28 ||
brahmaṇā tu purā sṛṣṭā oṣadhyaḥ sarvavīrudhaḥ |
yajñārthaṃ tattu bhūtānāṃ bhakṣyamityeva vai śrutiḥ || 8.29 ||
divyo bhautastathā paitro mānuṣo brāhma eva ca |
ete pañca mahāyajñā brahmaṇā nirmitāḥ purā || 8.30 ||
brāhmaṇānāṃ hitārthāya itareṣāṃ ca tanmukham |
itareṣāṃ tu varṇānāṃ brāhmaṇaiḥ kāritāḥ śubhāḥ || 8.31 ||
evaṃ yadi vibhāgaḥ syād varānnaṃ tad viśudhyati |
anyathā vrīhayo'pyete ekaike mṛgapakṣiṇaḥ |
mantavyā dātṛbhoktṛṇāṃ mahāmāṃsaṃ tu tat smṛtam || 8.32 ||
mayā te duhitā dattā putrārthe devarūpiṇī |
sā ca tvadbhāryayā proktā duhitā jantughātinaḥ || 8.33 ||
ato'rthamāgato'haṃ te gṛhaṃ prati samīkṣitum |
ācāraṃ devapūjāṃ ca atithīnāṃ ca tarpaṇam || 8.34 ||
eteṣāmekamapyatra kurvannapi na dṛśyate |
tad gṛhaṃ gantumicchāmi pitṝṇāṃ śrāddhakāmyayā || 8.35 ||
svagṛhe naiva bhuñjāmi pitṝṇāṃ kāryamityuta |
ahaṃ vyādho jīvaghātī na tu tvaṃ lokahiṃsakaḥ || 8.36 ||
matsutā jīvaghātasya yadoḍhā tvatsutena ca |
tanmahattvaṃ ca saṃjātaṃ prāyaścitaṃ tapodhana || 8.37 ||
evamuktvā sa cotthāya śaptvā nārīṃ tadā dhare |
mā snuṣābhiḥ samaṃ śvaśrvā viśvāso bhavatu kvacit || 8.38 ||
mā ca snuṣā kadācit syād yā śvaśrūṃ jīvatīmiṣet |
evamuktvā gato vyādhaḥ svagṛhaṃ prati bhāmini || 8.39 ||
tato devān pitṝn bhaktayā pūjayitvā vicakṣaṇaḥ |
putraṃ cārjunakaṃ sthāpya svasantāne mahātapāḥ || 8.40 ||
dharmavyādho jagāmāśu tīrthaṃ trailokyaviśrutam |
puruṣottamākhyaṃ ca paraṃ tatra gatvā samāhitaḥ |
tapaścacāra niyataḥ paṭhan stotramidaṃ dhare || 8.41 ||
namāmi viṣṇuṃ tridaśārināśanaṃ
viśālavakṣasthalasaṃśritaśriyam |
suśāsanaṃ nītimatāṃ parāṃ gatiṃ
trivikramaṃ mandaradhāriṇaṃ sadā || 8.42 ||
dāmodaraṃ rañjitabhūtalaṃ dhiyā
yaśoṃśuśubhraṃ bhramarāṅgasaprabham |
dharādharaṃ narakaripuṃ puruṣṭutaṃ
namāmi viṣṇuṃ śaraṇaṃ janārdanam || 8.43 ||
(naraṃ nṛsiṃhaṃ harimīśvaraṃ prabhuṃ
tridhāmanāmānamanantavarcasam |
susaṃskṛtāsyaṃ śaraṇaṃ narottamaṃ
vrajāmi devaṃ satataṃ tamacyutam || 8.43 (1))
tridhā sthitaṃ tigmarathāṅgapāṇinaṃ
nayasthitaṃ tṛptamanuttamairguṇaiḥ |
niḥśreyasākhyaṃ kṣapitetaraṃ guruṃ
namāmi viṣṇuṃ puruṣottamaṃ tvaham || 8.44 ||
(hatau purāṇau madhukaiṭabhāvubhau
bibhartti ca kṣmāṃ śirasā sadā hi saḥ |
yathā stuto me prasabhaṃ sanātano
dadhātu viṣṇuḥ sukhamūrjitaṃ mama || 8.44 (1))
mahāvarāho haviṣāmbubhojano
janārdano me hitakṛccitīmukhaḥ |
kṣitīdharo māmudadhikṣayo mahān
sa pātu viṣṇuḥ śaraṇārthinaṃ tu mām || 8.45 ||
māyātataṃ yena jagattrayaṃ kṛtaṃ
yathāgninaikena tataṃ carācaram |
carācarasya svayameva sarvataḥ
sa me'stu viṣṇuḥ śaraṇaṃ jagatpatiḥ || 8.46 ||
bhave bhave yaśca sasarjja kaṃ tato
jagat prasūtaṃ sacarācaraṃ tvidam |
tataśca rudrātmavati pralīyate-
'nvato harirviṣṇuharastathocyate || 8.47 ||
khātmendupṛthvīpavanāgnibhāskarā
jalaṃ ca yasya prabhavanti mūrttayaḥ |
sa sarvadā me bhagavān sanātano
dadātu śaṃ viṣṇuracintyarūpadhṛk || 8.48 ||
itīrite tasya sanātanaḥ svayaṃ
puro babhūvādbhutarūpadarśanaḥ |
dharaṇyuvāca |
ādau kṛtayuge nātha kiṃ kṛtaṃ viśvamūrttinā |
nārāyaṇena tatsarvaṃ śrotumicchāmi tattvataḥ || 9.1 ||
śrīvarāha uvāca |
pūrvaṃ nārāyaṇastveko nāsīt kiñciddhareḥ param |
saika eva ratiṃ lebhe naiva svacchandakarmakṛt || 9.2 ||
tasya dvitīyamicchantaścintā buddhyātmikā babhau |
asāvityeva saṃjñāyā kṣaṇaṃ bhāskarasannibhā || 9.3 ||
tasyā api dvidhā bhūtā cintā'bhūda brahmavādinī |
umeti saṃjñayā yattatsadā martye vyavasthitā || 9.4 ||
omityekākṣarībhūtā sasarjemāṃ mahīṃ tadā |
bhūḥ sasarja bhuvaṃ so'pi svaḥ sasarja tato mahaḥ || 9.5 ||
tataśca jana ityeva tapaścātmā pralīyate |
etadotaṃ tathā protaṃ sūtre maṇigaṇā iva || 9.6 ||
jagat praṇavato bhūtaṃ śūnyametat sthitaṃ tadā |
yeyaṃ mūrtirbhagavataḥ śaṃkaraḥ sa svayaṃ hariḥ || 9.7 ||
śūnyā~llokānimān dṛṣṭvā sisṛkṣurmūrttimuttamām |
kṣobhayitvā manodhāma tatrākāraḥ svamātrataḥ || 9.8 ||
sthitastasmin yadā kṣubdhe brahmāṇḍamabhavattadā |
tasmiṃstu śakalībhūte bhūrlokaṃ ca vyavasthitam || 9.9 ||
aparaṃ bhuvanaṃ prāyānmadhye bhāskarasannibham |
purāṇapuruṣo vyāpya padmakośe vyavasthitaḥ || 9.10 ||
sa hi nārāyaṇo devaḥ prājāpatyena tejasā |
akārādyaṃ svaraṃ nābhyāṃ halaṃ ca visasarja ha || 9.11 ||
amūrttasṛṣṭau śāstrāṇi udagāyat tadā diśaḥ |
suṣṭvā punarameyātmā cintayāmāsa dhāraṇam || 9.12 ||
tasya cintayato netrāt tejaḥ samabhavanmahat |
dakṣiṇaṃ vahnisaṅkāśaṃ vāmaṃ tuhinasannibham || 9.13 ||
taṃ dṛṣṭvā candrasūryau tu kalpitau parameṣṭhinā |
tataḥ prāṇaḥ samuttasthau vāyuśca parameṣṭhinaḥ || 9.14 ||
sa eva vāyurbhagavān yo'dyāpi hṛdigo vibhuḥ |
tasmād vahniḥ samuttasthau tasmādagnerjalaṃ mahat || 9.15 ||
ya evāgniḥ sa vai tejo brāhmaṃ paramakāraṇam |
bāhubhyāmapyasau tejaḥ kṣātraṃ tejaḥ sasarja ha || 9.16 ||
ūrubhyāmapi vaiśyāṃśca padbhyāṃ śūdrāṃstathā vibhuḥ |
tatastu sasṛje yakṣān rākṣasāṃśca tathā vibhuḥ || 9.17 ||
caturvidhaistu bhūrlokaṃ bhuvarlokaṃ viyaccaraiḥ |
bhūtaiḥ svarmārgagairanyaiḥ svarlokaṃ samapūrayat || 9.18 ||
maharlokaṃ tathā taistairbhūtaiśca sanakādibhiḥ |
janolokaṃ tataścaiva vairājaiḥ samapūrayat || 9.19 ||
tapolokaṃ tato devastaponiṣṭhairapūrayat |
apunarmārakairdevaiḥ satyalokamapūrayat || 9.20 ||
sṛṣṭiṃ sṛṣṭvā tathā devo bhagavān bhūtabhāvanaḥ |
kalpasaṃjñaṃ svakaṃ ghastraṃ jāgarti parameśvaraḥ || 9.21 ||
tasmin jagati bhūrloko bhuvarlokaśca jāyate |
svarlokaśca trayo'pyete jāyante nātra saṃśayaḥ || 9.22 ||
supte tu deve kalpānte tāvatī rātririṣyate |
trai lokyametat suptaṃ syāt tathopaplavatāṃ gatam || 9.23 ||
tato rātryāṃ vyatītāyāmutthitaḥ kamalekṣaṇaḥ |
cintayāmāsa tān vedān mātaraṃ ca caturṣvapi |
cintayānaḥ sa deveśastān vedān nādhyagacchata || 9.24 ||
lokamārgasthitiṃ karttuṃ nidrājñānena mohitaḥ |
cintayāmāsa deveśo nātra vedā vyavasthitāḥ || 9.25 ||
tataḥ svamūrtau toyākhye līnān dṛṣṭvā sureśvaraḥ |
jighṛkṣuścintayāmāsa matsyo bhūtvāviśajjalam || 9.26 ||
evaṃ dhyātvā mahāmatsyastatkṣaṇāt samajāyata |
viveśa ca jalaṃ devaḥ samantāt kṣobhayanniva || 9.27 ||
tasmin praviṣṭe sahasā jalaṃ tu
mahāmahīdhṛgvapuṣi prakāśam |
mātsyaṃ gate devavare mahodadhiṃ
hariṃ stavaistuṣṭuvuruddhṛtakṣitim || 9.28 ||
namo'stu vedāntaragāpratarkya
namo'stu nārāyaṇa matsyarūpa |
namo'stu te susvara viśvamūrtte
namo'stu vidyādvayarūpadhārin || 9.29 ||
namo'stu candrārkamarutsvarūpa
jalāntaviśvasthita cārunetra |
namo'stu viṣṇoḥ śaraṇaṃ vrajāmaḥ
prapāhi no matsyatanuṃ vihāya || 9.30 ||
tvayā tataṃ viśvamanantamūrtte
pṛthaggate kiñcidihāsti deva |
bhavān na cāsya vyatiriktamūrtti-
stvatto vayaṃ te śaraṇaṃ prapannāḥ || 9.31 ||
khātmenduvahniśca manaśca rūpaṃ
purāṇamūrttestava cābjanetra |
kṣamasva śaṃbho yadi bhaktihīnaṃ
tvayā jagadbhāsati devadeva || 9.32 ||
viruddhametat tava devarūpaṃ
subhīṣaṇaṃ susvanamadritulyam |
purāṇa deveśa jagannivāsa
śamaṃ prayāhyacyuta tīvrabhāno || 9.33 ||
vayaṃ hi sarve śaraṇaṃ prapannā
bhayācca te rūpamidaṃ prapaśya |
loke samastaṃ bhavatā vinā tu
na vidyate dehagataṃ purāṇam || 9.34 ||
evaṃ stutastadā devo jalasthān jagṛhe ca saḥ |
vedān sopaniṣacchāstrānantaḥsthaṃ rūpamāsthitaḥ || 9.35 ||
yāvatsvamūrtirbhagavāṃstāvadeva jagat tvidam |
kūṭasthe tallayaṃ yāti vikṛtisthe vivarddhate || 9.36 ||
|| iti śrīvarāhapurāṇe bhagavacchāstre navamo'dhyāyaḥ || 9 ||
śrīvarāha uvāca |
evaṃ sṛṣṭvā jagatsarvaṃ bhagavān lokabhāvanaḥ |
virarāma tataḥ sṛṣṭirvyavarddhata dhare tadā || 10.1 ||
vṛddhāyāmatha sṛṣṭau tu sarve devāḥ purātanam |
nārāyaṇākhyaṃ puruṣaṃ yajanto vividhairmakhaiḥ || 10.2 ||
dvīpeṣu caiva sarveṣu varṣeṣu ca makhairharim |
devāḥ satrairmahadbhiste yajantaḥ śraddhayā'nvitāḥ |
toṣayāmāsuratyarthaṃ svaṃ pūjyaṃ kartumīpsavaḥ || 10.3 ||
evaṃ toṣayatāṃ teṣāṃ bahuvarṣasahastrikam |
kāle devastadā tuṣṭaḥ pratyakṣatvaṃ jagāma ha || 10.4 ||
anekabāhūdaravaktranetro
mahāgireḥ śrṛṅgamivollikhaṃstadā |
uvāca kiṃ kāryamatho sureśo
brūtāṃ varaṃ devavarā varaṃ vaḥ || 10.5 ||
devā ūcuḥ |
jayasva govinda mahānubhāva
tvayā vayaṃ nātha vareṇa devāḥ |
manuṣyaloke'pi bhavantamādyaṃ
vihāya nāsmānbhavate ha kaścit || 10.6 ||
rudrādityā vasavo ye ca sādhyā
viśve'śvinau marutaścoṣmapāśca |
sarve bhavantaṃ śaraṇaṃ gatāḥ sma
kuruṣva pūjyāniha viśvamūrte || 10.7 ||
evamuktastadā taistu mahāyogeśvaro hariḥ |
karomi sarvān vaḥ pūjyānityuktvā'ntaradhīyata || 10.8 ||
devā api nijaukāṃsi gatavantaḥ sanātanam |
stuvantaḥ parameśo'pi trividhaṃ bhāvamāsthitaḥ || 10.9 ||
evaṃ tridhā jagaddhātā bhūtvā devān maheśvaraḥ |
ārādhya sāttvikaṃ rājaṃ tāmasaṃ ca tridhā sthitam || 10.10 ||
sāttvikena paṭhed vedān yajed yajñena devatāḥ |
ātmano'vayavo bhūtvā rājasenāpi keśavaḥ || 10.11 ||
sa kālarūpiṇaṃ raudraṃ prakṛtyā śūlapāṇinam |
ātmano rājasīṃ mūrtiṃ pūjayāmāsa bhaktitaḥ |
tāmasenāpi bhāvena asureṣu vyavasthitaḥ || 10.12 ||
evaṃ tridhā jagaddhātā bhūtvā devān maheśvaraḥ |
ārādhayāmāsa tato loko'pi trividho'bhavat || 10.13 ||
brahmaviṣṇumaheśānanāmnā gṛhya vyavasthitaḥ |
sa ca nārāyaṇo devaḥ kṛte yugavare prabhuḥ || 10.14 ||
tretāyāṃ rudrarūpastu dvāpare yajñamūrtimān |
kalau nārāyaṇo devo bahurūpo vyajāyata || 10.15 ||
tasyādikṛttato viṣṇoścaritaṃ bhūritejasaḥ |
śrṛṇuṣva sarvaṃ suśroṇi gadato mama bhāmini || 10.16 ||
āsīt kṛtayuge rājā supratīko mahābalaḥ |
tasya bhāryādvayaṃ cāsīdaviśiṣṭaṃ manoramam || 10.17 ||
vidyutprabhā kāntimatī tayorete tu nāmanī |
tayoḥ putraṃ samaṃ rājā na lebhe yatnavānapi || 10.18 ||
yadā tadā muniśreṣṭhamātreyaṃ vītakalmaṣam |
toṣayāmāsa vidhinā citrakūṭe nagottame || 10.19 ||
saka ṛṣistoṣitastena dīrghakālaṃ varārthinā |
varaṃ diditsayā yāvadabravīdatrijo muniḥ || 10.20 ||
tāvadindro'pi kariṇā gataḥ pārśvena tasya ha |
devasainyaiḥ parivṛtastūṣṇīmeva mahābalaḥ || 10.21 ||
taṃ dṛṣṭvā'ntargataprītimaprītiṃ prītavān muniḥ |
cukopa devarājāya śāpamugraṃ sasarja ha || 10.22 ||
yasmāt tvayā mamāvajñā kṛtā mūḍha divaspate |
tatastvaṃ cālito rājyādanyaloke vasiṣyasi || 10.23 ||
evamuktvā'pi kopena sureśaṃ taṃ ca bhūpatim |
uvāca rājan putraste bhavitā dṛḍhavikramaḥ || 10.24 ||
indrarūpopamaḥ śrīmānudyacchastraḥ pratāpavān |
vidyāprabhāvakarmmajñaḥ krūrakarmā bhaviṣyati |
durjayo'tibalī rājā evamuktvā gato muniḥ || 10.25 ||
so'pi rājā supratīko bhāryāyāṃ garbhamāvahat |
vidyutprabhāyāṃ dharmajñaḥ sā'pi kāle tvasūyata || 10.26 ||
tasyāḥ putraḥ samabhavad durjayākhyo mahābalaḥ |
jātakarmādisaṃskāraṃ tasya cakre muniḥ svayam |
(durvāsā nāma tapaso tasya dehamakalmaṣaḥ || 10.27 ||)
tasya ceṣṭerbalenāsau muneḥ saumyo babhūva ha |
vedaśāstrārthavidyāyāṃ pārago dharmavān śuciḥ || 10.28 ||
yā dvitīyā'bhavat patnī tasya rājño mahātmanaḥ |
nāmnā kīrttimatī dhanyā tasyāḥ putro babhūva ha |
nāmnā sudyumna ityevaṃ vedavedāṅgapāragaḥ || 10.29 ||
atha kālena mahatā sa rājā rājasattamaḥ |
supratīkaḥ sutaṃ dṛṣṭvā durjayaṃ yogyamantike || 10.30 ||
ātmano vṛddhabhāvaṃ ca vārāṇasyādhipo balī |
cintayāmāsa rājyārthaṃ durjayaṃ prati bhāmini || 10.31 ||
evaṃ saṃcintya dharmātmā tasya rājyaṃ dadau nṛpaḥ |
svayaṃ ca citrakūṭākhyaṃ parvataṃ sa jagāma ha || 10.32 ||
durjayo'pi mahadrājyaṃ hastyaśvarathavājibhiḥ |
saṃyojya cintayāmāsa rājyavṛddhiṃ prati prabhuḥ || 10.33 ||
evaṃ saṃcintya medhāvī hastyaśvarathapattibhiḥ |
sametāṃ vāhinīṃ kṛtvā uttarāṃ diśamāśritaḥ |
tasya cottarato deśāḥ sarve siddhā mahātmanaḥ || 10.34 ||
bhāratākhyamidaṃ varṣaṃ sādhayitvā sudurjayaḥ |
tataḥ kiṃpuruṣaṃ nāma varṣaṃ tenāpi sādhitam || 10.35 ||
tataḥ parataraṃ cānyaddharivarṣaṃ jigāya saḥ |
ramyaṃ hiraṇmayaṃ cāpi kurubhadrāśvameva ca |
ilāvṛtaṃ merumadhyametat sarvaṃ jigāya saḥ || 10.36 ||
jitvā jambvākhyametaddhi dvīpaṃ yāvadasau nṛpaḥ |
jagāma devarājānaṃ jetuṃ sarvasurānvitam || 10.37 ||
meruparvatamāruhya devagandharvadānavān |
guhyakān kiṃ narān daityāṃstato brahmasuto muniḥ |
nārado durjayajayaṃ devarājāya śaṃsata || 10.38 ||
tata indrastvarāyukto lokapālaiḥ samanvitaḥ |
jagāma durjayaṃ hantuṃ so'cireṇāstranirjjitam |
vihāya parvataṃ meruṃ martyalokamihāgataḥ || 10.39 ||
pūrvadeśe ca devendro lokapālaiḥ samaṃ prabhuḥ |
sthitavāṃstasya sumahaccaritaṃ saṃbhaviṣyati || 10.40 ||
durjayaśca surāñjitvā yāvat pratinivarttate |
gandhamādanapṛṣṭhe tu skandhāvāraniveśanam |
kṛtvā'vasthitasaṃbhāramāgataṃ tāpasau tu tam || 10.41 ||
tāvagatāvathābrūtāṃ rājan durjjaya lokapāḥ |
nivāritāstvayā sarvaṃ lokapālairvinā jagat |
na pravarttata tasmān nau dehi tatpadamuttamam || 10.42 ||
evamukte tatastau tu durjjayaḥ prāha dharmavit |
kau bhavantāviti tatastāvūcaturariṃdamau |
vidyutsuvidyunnāmānāvasurāviti mānada || 10.43 ||
tvayā samprati cecchāmo dharmyaṃ satsu susaṃskṛtau |
lokapālamataṃ sarvamāvāṃ kurma sudurjaya || 10.44 ||
evamukte durjjayena tau svarge sanniveśitau |
laukapālau kṛtau sadyastato'ntardhānaṃ jagmatuḥ || 10.45 ||
tayorapi mahatkarma caritaṃ ca dharādhare |
bhaviṣyati mahārājo durjayo mandaropari || 10.46 ||
dhanadasya vanaṃ divyaṃ dṛṣṭvā nandanasannibham |
mudā babhrāma ramye'smin sa yāvadrājasattamaḥ || 10.47 ||
tāvatsuvarṇavṛkṣādhaḥ kanyādvayamapaśyata |
atīvarūpasaṃpannamatīvādbhutadarśanam || 10.48 ||
dṛṣṭvā tu vismayāviṣṭaḥ ka ime śubhalocane |
evaṃ saṃcintya yāvat sa kṣaṇamekaṃ vyavasthitaḥ |
tasmin vane tāvadubhau tāpasau so'valokayat || 10.49 ||
tau dṛṣṭvā sahasā rājā yayau prītyā parāṃ mudam |
avatīrya dvipāt tūrṇaṃ namaścakre tayoḥ svayam || 10.50 ||
upaviṣṭaḥ sa tābhyāṃ tu kauśye datte varāsane |
pṛṣṭaḥ kastvaṃ kutaścāsi kasya vā kimiha sthitaḥ || 10.51 ||
tau prahasyābravīd rājā supratīketi viśrutaḥ |
tasya putraḥ samutpanno durjayo nāma nāmataḥ || 10.52 ||
pṛthivyāṃ sarvarājāno jigīṣanniha sattamau |
āgato'smi dhruvaṃ caiva smarttavyo'haṃ tapodhanau |
bhavantau kau samākhyātaṃ mamānugrahakāṅkṣayā || 10.53 ||
tāpasāvūcatuḥ |
āvāṃ hetṛprahetrākhyau manoḥ svāyaṃbhuvaḥ sutau |
āvāṃ devavināśāya gatau svo meruparvatam || 10.54 ||
tatrāvayormahāsainyaṃ gajāśvarathasaṃkulam |
jigāya sarvadevānāṃ śataśo'tha sahastraśaḥ || 10.55 ||
te ca devā mahatsainyaṃ dṛṣṭvā sarvaṃ nipātitam |
asurairujjhitaprāṇaṃ tataste śaraṇaṃ gatāḥ || 10.56 ||
kṣīrābdhau yatra deveśo hariḥ śete svayaṃ prabhuḥ |
tatra vijñāpayāmāsuḥ sarve praṇatipūrvakam || 10.57 ||
devadeva hare sarvaṃ sainyaṃ tvasurasattamaiḥ |
parājitaṃ paritrāhi bhītaṃ vihvallocanam || 10.58 ||
tvayā devāsure yuddhe pūrvaṃ trātāḥ sma keśava |
sahastrabāhoḥ krūrasya samare kālaneminaḥ || 10.59 ||
idānīmapi deveśa asurau devakaṇṭakau |
hetṛprahetṛnāmānau bahusainyaparicchadau |
tau hatvā trāhi naḥ sarvān devadeva jagatpate || 10.60 ||
evamuktastato devo viṣṇurnārāyaṇaḥ prabhuḥ |
ahaṃ yāsyāmi tau hantumityuvāca jagatpatiḥ || 10.61 ||
evamuktāstato devā meruparvatasannidhau |
pratasthuste'tha manasā cintayanto janārdanam || 10.62 ||
taiḥ saṃcintitamātrastu devaścakragadādharaḥ |
āvayoḥ sainyamāviśya eka eva mahābalaḥ || 10.63 ||
ekadhā daśadhātmānaṃ śatadhā ca sahastradhā |
lakṣadhā koṭidhā kṛtvā svabhūtyā ca jagatpatiḥ || 10.64 ||
evaṃ sthite devavare asmatsainye mahābalaḥ |
yaḥ kaścidasuro rājannāvayorbalamāśritaḥ |
sa hataḥ patito bhūmau dṛśyate gatacetanaḥ || 10.65 ||
evaṃ tat sahasā sainyaṃ māyayā viśvamūrtinā |
nihataṃ sāśvakalilaṃ pattidvipasamākulam || 10.66 ||
caturaṅgaṃ balaṃ sarvaṃ hatvā devo rathāṅgadhṛk |
āvāṃ śoṣāvatho dṛṣṭvā gato'ntarddhānamīśvaraḥ || 10.67 ||
āvayorīdṛśaṃ karma dṛṣṭaṃ devasya śārṅgiṇaḥ |
tatastameva śaraṇaṃ gatāvārādhanāya vai || 10.68 ||
tvaṃ cāsmanmitratanayaḥ supratīkātmajo nṛpa |
ime ca āvayoḥ kanye gṛhāṇa manujeśvara |
hetṛkanyā sukeśī tu miśrakeśī prahetṛṇaḥ || 10.69 ||
durjayastvevamuktastu hetṛṇā te ubhe śubhe |
kanye jagrāha dharmeṇa bhāryārthaṃ manujeśvaraḥ || 10.70 ||
te labdhvā sahasā rājā mudā paramayā yutaḥ |
ājagāma svakaṃ rāṣṭraṃ nijasainyasamāvṛtaḥ || 10.71 ||
tataḥ kālena mahatā tasya putradvayaṃ babhau |
sukeśyāḥ suprabhaḥ putro miśrakeśyāḥ sudarśanaḥ || 10.72 ||
sa rājā durjayaḥ śrīmā~llabdhvā putradvayaṃ śubham |
svayaṃ kālāntare śrīmāñjagāmāraṇyamantike || 10.73 ||
tatrastho vanajātīrhi badhayan vai bhayaṃkarāḥ |
dadarśāraṇyamāśritya muniṃ sthitamakalmaṣam || 10.74 ||
tapasyantaṃ mahābhāgaṃ nāmnā gauramukhaṃ śubham |
ṛṣivṛndasya goptāraṃ trātāraṃ pāpinaḥ svayam || 10.75 ||
tasyāśrame vimalajalāvilemaru-
tsugandhivṛkṣapravare dvijanmanaḥ |
rarāja jīmūta ivāmbarānmahī-
mupāgataḥ pravaravimānavad gṛhaḥ || 10.76 ||
jvalanamakhāgnipratibhāṣitāmbaraḥ
suśuddhasaṃvāsitaveśakuṭṭakaḥ |
śiṣyaiḥ samuccāritasāmanādakaḥ
surūpayoṣidṛṣikanyakākulaḥ |
itīdṛśo'syāvasātho varāśrame
supuṣpitāśeṣataruprasūnaḥ || 10.77 ||
|| iti śrīvarāhapurāṇe bhagavacchāstre daśamo'dhyāyaḥ || 10 ||
śrīvarāha uvāca |
tatastamīdṛśaṃ dṛṣṭvā tadā gauramukhāśramam |
durjjayaścintayāmāsa ramyamāśramamaṇḍalam || 11.1 ||
praviśāmyatra paśyāmi ṛṣīn paramadhārmikān |
cintayitvā tadā rājā praviveśa tamāśramam || 11.2 ||
tasya praviṣṭasya tato rājñaḥ paramaharṣitaḥ |
cakāra pūjāṃ dharmātmā tadā gauramukho muniḥ || 11.3 ||
svāgatādikriyāḥ kṛtvā kathānte taṃ mahāmuniḥ |
svaśaktyā'haṃ nṛpaśreṣṭha sānugasya ca bhojanam || 11.4 ||
kariṣyāmi pramucyantāṃ sādhu vāhā iti dvijaḥ |
evamuktvā sthitastūṣṇīṃ sa muniḥ saṃśitavrataḥ || 11.5 ||
rājā'pi tasthau tadbhaktyā svasahāyaiḥ samanvitaḥ |
akṣauhiṇyo balasyāsya pañcamātrāstadā sthitāḥ |
ayaṃ ca tāpasaḥ kiṃ me dāsyate bhojanaṃ tviha || 11.6 ||
nimantrya durjayaṃ viprastadā gauramukho nṛpam |
cintayāmāsa kiṃ cāsya mayā deyaṃ tu bhojanam || 11.7 ||
evaṃ cintayatastasya maharṣerbhāvitātmanaḥ |
sthito manasi deveśo harirnārāyaṇaḥ prabhuḥ || 11.8 ||
tataḥ saṃsmṛtya manasā devaṃ nārāyaṇaṃ tadā |
toṣayāmāsa gaṅgāyāṃ praviśya munisattamaḥ || 11.9 ||
dharaṇyuvāca |
kathaṃ gauramukho viṣṇuṃ toṣayāmāsa bhūdhara |
etanme kautukaṃ śrotuṃ samyagicchā pravarttate || 11.10 ||
namo'stu viṣṇave nityaṃ namaste pītavāsase |
namaste cādyarūpāya namaste jalarūpiṇe || 11.11 ||
namaste sarvasaṃsthāya namaste jalaśāyine |
namaste kṣitirūpāya namaste tejasātmane || 11.12 ||
namaste vāyurūpāya namaste vyomarūpiṇe |
tvaṃ devaḥ sarvabhūtānāṃ prabhustvamasi hṛcchayaḥ || 11.13 ||
tvamoṅkāro vaṣaṭkāraḥ sarvatraiva ca saṃsthitaḥ |
tvamādiḥ sarvadevānāṃ tava cādirna vidyate || 11.14 ||
tvaṃ bhūstvaṃ ca bhuvo deva tvaṃ janastvaṃ mahaḥ smṛtaḥ |
tvaṃ tapastvaṃ ca satyaṃ ca tvayi deva carācaram || 11.15 ||
tvatto bhūtamidaṃ viśvaṃ tvadudbhūtā ṛgādayaḥ |
tvattaḥ śāstrāṇi jātāni tvatto yajñāḥ pratiṣṭhitāḥ || 11.16 ||
tvatto vṛkṣā vīrudhaśca tvattaḥ sarvā vanauṣadhīḥ |
paśavaḥ pakṣiṇaḥ sarpāstvatta eva janārdana || 11.17 ||
mamāpi devadeveśa rājā durjayasaṃjñitaḥ |
āgato'bhyāgatastasya ātithyaṃ karttumutsahe || 11.18 ||
tasya me nirdhanasyādya devadeva jagatpate |
bhaktinamrasya deveśa kuruṣvānnādyasaṃcayam || 11.19 ||
yaṃ yaṃ spṛśāmi hastena yaṃ yaṃ paśyāmi cakṣuṣā |
vṛkṣaṃ vā tṛṇakandaṃ vā tattadannaṃ caturvidham || 11.20 ||
tathā tvanyatamaṃ vā'pi yad dhyātaṃ manasā mayā |
tat sarvaṃ siddhyatāṃ mahyaṃ namaste parameśvara || 11.21 ||
iti stutyā tu deveśastutoṣa jagatāṃ patiḥ |
munestasya svakaṃ rūpaṃ darśayāmāsa keśavaḥ || 11.22 ||
uvāca suprasannātmā brūhi vipra varaṃ param |
evaṃ śrutvā'kṣiṇī yāvadunmīlayati vai muniḥ || 11.23 ||
tadā śaṅkhagadāpāṇiḥ pītavāsā janārdanaḥ |
garuḍastho'pi tejasvī dvādaśādityasaprabhaḥ || 11.24 ||
divi sūryasahastrasya bhavedyugapadutthitā |
yadi bhāḥ sadṛśī sā syādbhāsastasya mahātmanaḥ || 11.25 ||
tatraikasthaṃ jagat kṛtsnaṃ pravibhaktamanekadhā |
dadarśa sa munirdevi vismayotphullalocanaḥ || 11.26 ||
jagāma śirasā devaṃ kṛtāñjalirathābravīt |
yadi me varado devo bhūyād bhaktasya keśava || 11.27 ||
idānīmeṣa nṛpatiryathā sabalavāhanaḥ |
mamāśrame kṛtāhāraḥ śvaḥ prayātā svakaṃ gṛham || 11.28 ||
ityuktastasya deveśo varadaḥ saṃbabhūva ha |
cittasiddhiṃ dadau tasmai maṇiṃ ca sumahāprabham || 11.29 ||
taṃ dattvā'ntardadhe devaḥ sa ca gauramukho muniḥ |
jagāma cāśramaṃ puṇyaṃ nānā ṛṣiniṣevitam || 11.30 ||
tatra gatvā sa viprendraścintayamāsa vai muniḥ |
himavacchikharākāraṃ mahābhramiva connatam |
śaśāṅkaraśmisaṅkāśaṃ gṛhaṃ vai śatabhūmikam || 11.31 ||
tādṛśānāṃ sahastrāṇi lakṣakoṭyaśca sarvaśaḥ |
gṛhāṇi nirmame vipro viṣṇorlabdhavarastadā || 11.32 ||
prākārāṇi tatopānte tallagnodyānakāni ca |
kokilākulaghuṣṭāni nānādvijavarāṇi ca |
campakāśokapunnāganāgakeśaravanti ca || 11.33 ||
nānājātyastathā vṛkṣā gṛhodyāneṣu sarvaśaḥ |
hastināṃ hastiśālāśca turagāṇāṃ ca mandurāḥ || 11.34 ||
cakāra saṃcayān vipro nānābhakṣyāṇi sarvaśaḥ |
bhakṣyaṃ bhojyaṃ tathā lehyaṃ coṣyaṃ bahuvidhaṃ tathā |
cakārānnādyanicayaṃ hemapātryaśca sarvataḥ || 11.35 ||
evaṃ kṛtvā sa viprastu rājānaṃ bhūritejasam |
uvāca sarvasainyāni praviśantu gṛhāniti || 11.36 ||
evamuktastato rājā tadgṛhaṃ parvatopamam |
praviveśāntareṣvanye bhṛtyā viviśurāśu vai || 11.37 ||
tatasteṣu praviṣṭeṣu tadā gauramukho muniḥ |
pragṛhya taṃ maṇiṃ divyaṃ rājānaṃ cedamabravīt || 11.38 ||
majjanābhyavahārārthaṃ pathi śramakṛte tathā |
vilāsinīstathā dāsān preṣayiṣyāmi te nṛpa || 11.39 ||
evamuktvā sa viprendrastaṃ maṇiṃ vaiṣṇavaṃ śubham |
ekānte sthāpayāmāsa rājñastasya prapaścataḥ || 11.40 ||
tasmin sthāpitamātre tu maṇau śuddhasamaprabhe |
niśceruryoṣitastatra divyarūpāḥ sahastraśaḥ || 11.41 ||
sukumārāṅgarāgādyāḥ sukumāravarāṅaganāḥ |
sukapolāḥ sucārvyaṅgyaḥ sukeśāntāḥ sulocanāḥ |
kāścitsauvarṇapātrīśca gṛhītvā saṃpratasthire || 11.42 ||
evaṃ yoṣidgaṇāstatra narāḥ karmakarāstathā |
nirjagmustasya nṛpateḥ sarve bhṛtyā nṛpasya ha |
kevalaṃ bhojanaṃ pūrvaṃ paridhānaṃ ca sarvaśaḥ || 11.43 ||
tāḥ striyaḥ sarvabhṛtyānāṃ rājamārgeṇa majjanam |
daduste ca narāśvānāṃ hastināṃ ca tvarānvitāḥ || 11.44 ||
nānāvidhāni tūryāṇi tatrāvādyanta sarvaśaḥ |
majjane nṛpatestatra nanṛtuścānyayoṣitaḥ |
aparāśca jagustatra śakrasyeva pramajjataḥ || 11.45 ||
evaṃ divyopacāreṇa snātvā rājā mahāmanāḥ |
cintayāmāsa rājendro vismayāviṣṭacetanaḥ |
kimidaṃ munisāmarthyaṃ tapaso vā'tha vā maṇeḥ || 11.46 ||
evaṃ snātvā śubhe vastre paridhāyottame tathā |
vividhānnaṃ tu vidhinā bubhuje sa nṛpottamaḥ || 11.47 ||/50
yathā ca nṛpateḥ pūjā kṛtā tena maharṣiṇā |
tadvad bhṛtyajanasyāpi cakāra munisattamaḥ || 11.48 ||
yāvat sa rājā bubhuje sabhṛtyabalavāhanaḥ |
tāvadastagiriṃ bhānurjagāmāruṇasaprabhaḥ || 11.49 ||
tatastu rātriḥ samapadyatā'dhunā
śaracchaśāṅkojjvalaṛkṣamaṇḍitā |
karoti rāgaṃ sa ca rohiṇīdhavaḥ
susaṅgataṃ saumyaguṇeṣu tāpi ca || 11.50 ||
bhṛgūdvahaḥ kṛṣṇatarāṃśubhānunā
sahodyato daityaguruḥ surādhipaḥ |
athāntarātpakṣagato na rājate
svabhāvayogena matistu dehinām || 11.51 ||
suraktatāṃ bhūmisutaśca muñcate
rāhuḥ sitī candramasoṃśubhiḥ sitaiḥ |
muktaḥ svabhāvo jagataḥ surāsurai-
ranusvabhāvo balavān sukṛnnṛpaḥ || 11.52 ||
siteśvarākhyāpitaraśmimaṇḍale
sūryatvasiddhāntakaṣeva nirmale |
karoti keturna pare mahattama-
stadā kuśīleṣu gatiśca nirmalā || 11.53 ||
budhoccabuddhirjagato vibhāvayan
rarāja rājño tanayaḥ svakarmabhiḥ |
bhṛtecchakaḥ kakṣavivāhitaściraṃ
bhavediyaṃ sādhuṣu sammitirdhruvam || 11.54 ||
karoti ketuḥ kapilaṃ viyacciraṃ
rājñaḥ surāṇāṃ pathi saṃsthitaṃ bhṛśam |
na durjanaḥ sajjanasaṃsadi kvacit
karoti śuddhaṃ nijakarmakauśalam || 11.55 ||
śaśāṅkaraśmipravibhāsitā api
prakāśamīyurniratāḥ pade pade |
kulaṃbhavāḥ saṃbhavadharmapattayo
mahāṃśuyogānmahatāṃ samunnatim || 11.56 ||
tridoṣasaktānnikṛto'sya sarvaśaḥ
sutena rājño varuṇasya sūryajaḥ |
virājate kauśikasanniveśitā
na vedakarma kvacidanyathā bhavet || 11.57 ||
dvandvaḥ sametān mama yaḥ śiśuḥ purā
harirya ārādhitavān nṛpāsanam |
lakṣmyāpi buddhyā suciraṃ prakāśate
dhruveṇa viṣṇusmaraṇena durlabham || 11.58 ||
itīdṛśī rātrirabhūdṛṣeḥ śubhe
varāśrame durjayabhūpateḥ śubhā |
sabhṛtyasāmantavarāśvadantinaḥ
subhaktavastrābharaṇādipūjayā || 11.59 ||
itīdṛśāyāṃ vararatnacitritāḥ
supaṭṭasaṃvītavarāstṛtāstadā |
gṛheṣu paryaṅkavarāḥ samāśritāḥ
surūpayoṣitkṛtabhaṅgabhāsurāḥ || 11.60 ||
sa tatra rājā visasarja bhūbhṛtaḥ
svayaṃ sabhṛtyānapi sarvato gṛhān |
gateṣu suṣvāpa varastriyā vṛtaḥ
sureśavatsvargagataḥ pratāpavān || 11.61 ||
evaṃ sumanasastasya sabhṛtyasya mahātmanaḥ |
ṛṣestasya prabhāvena hṛṣṭāstu suṣupustadā || 11.62 ||
tato rātryāṃ vyatītāyāṃ sa rājā tāḥ striyaḥ punaḥ |
antarddhānaṃ gatāstatra dṛṣṭvā tāni gṛhāṇi ca || 11.63 ||
adṛśyāni mahārhāṇi varāsanajalāni ca |
rājā sa vismayāviṣṭaścintayāmāsa duḥkhitaḥ || 11.64 ||
kathamevaṃ maṇirmahyaṃ bhavatīti punaḥ punaḥ |
cintayannadhigamyātha sa rājā durjayastadā || 11.65 ||
cintāmaṇimimaṃ cāsya harāmīti vicintya saḥ |
prayāṇaṃ nodayāmāsa sa rājāśramabāhyataḥ |
āśramasya bahirgatvā nātidūre savāhanaḥ || 11.66 ||
tato virocanākhyaṃ vai preṣayāmāsa mantriṇam |
ṛṣergauramukhasyāpi maṇeryācanakarmaṇi || 11.67 ||
ṛṣiṃ taṃ ca samāgatya maṇiṃ yācitumudyataḥ |
ratnānāṃ bhājanaṃ rājā maṇiṃ tasmai pradīyatām || 11.68 ||
amātyenaivamuktastu kruddho gauramukho'bravīt |
pratigṛhṇāti viprastu rājā caiva dadāti ca |
tvaṃ ca rājā punarbhūtvā yācase dīnavat katham || 11.69 ||
evaṃ brūhi durācāraṃ rājānaṃ durjayaṃ svayam |
gaccha drutaṃ durācāra mā tvāṃ loko'tyagāditi || 11.70 ||
(evamuktvā muniḥ prāgāt kuśedhmāharaṇāya vai |
cintayan manasā taṃ ca maṇiṃ śatruvināśanam ) || 11.71 ||
evamuktastadā dūto jagāma ca nṛpāntikam |
kathayāmāsa tatsarvaṃ yaduktaṃ brāhmaṇena ca || 11.72 ||
tataḥ krodhaparītātmā śrutvā brāhmaṇabhāṣitam |
durjayaḥ prāha nīlākhyaṃ sāmantaṃ gaccha māciram |
brāhmaṇasya maṇiṃ gṛhya tūrṇamehi yadṛcchayā || 11.73 ||
evamuktastadā nīlo bahusenāparicchadaḥ |
jagāma sa ca viprasya vanyamāśramamaṇḍalam || 11.74 ||
tatrāgnihotraśālāyāṃ dṛṣṭvā taṃ maṇimāhitam |
uttīrya syandanānnīlaḥ so'varohata bhūtale || 11.75 ||
avatīrṇe tatastasmin nīle paramadāruṇe |
krūrabuddhyā maṇestasmānnirjagmuḥ śastrapāṇayaḥ || 11.76 ||
sarathāḥ sadhvajāḥ sāśvāḥ sabāṇāḥ sāsicarmiṇaḥ |
sadhanuṣkāḥ satūṇīrā yodhāḥ paramadurjayāḥ |
niścerustaṃ maṇiṃ bhitvā asaṃkhyeyā mahābalāḥ || 11.77 ||
tatra sajjā mahāśūrā daśa pañca ca saṃkhyayā |
nāmabhistān mahābhāge kathayāmi śrṛṇuṣva tān || 11.78 ||
suprabho dīptatejāśca suraśmiḥ śubhadarśanaḥ |
sukāntiḥ sundaraḥ sundaḥ pradyumnaḥ sumanāḥ śubhaḥ || 11.79 ||
suśīlaḥ sukhadaḥ śambhuḥ sudāntaḥ soma eva ca |
ete pañcadaśa proktā nāyakā maṇitotthitāḥ || 11.80 ||
tato virocanaṃ dṛṣṭvā bahusainyapariṣkṛtam |
yodhayāmāsuravyagrā vividhāyudhapāṇayaḥ || 11.81 ||
dhanūṃṣi teṣāṃ kanakaprabhāṇi
śarān sujāmbūnadapuṅkhanaddhān |
patanti khaṅgāni vibhīṣaṇāni
bhuśuṇḍiśūlāḥ paramapradhānāḥ || 11.82 ||
ratho rathaṃ saṃparivārya tasthau
gajo gajasyāpi hayo harasya |
padātiratyugraparākramaśca
padātimeva prasasāra cāgryam || 11.83 ||
dvandvanyanekāni tathaiva yuddhe
dravanti śūrāḥ paribhartsayantaḥ |
vibhīṣaṇaṃ nirgatacāpamārgaṃ
babhūva bāhuprabhavaṃ sughoram || 11.84 ||
tathā pravṛtte tumule'tha yuddhe
hataḥ sa rājñaḥ sacivo visaṃjñaḥ |
sahānugaḥ sarvabalairupeto
jagāma vaivasvatamandirāya || 11.85 ||
tasmin hate durjayarājamantriṇi
upāyayau svena balena rājā |
sa durjayaḥ sāśvaratho'titīvraḥ
pratāpavāṃstairmaṇijairyuyodha || 11.86 ||
tatastasmiṃstadā rājño mahatkadanamābabhau |
tato hetuprahetṛbhyāṃ śrutvā jāmātaraṃ raṇe || 11.87 ||
yudhyamānaṃ mahābāhuṃ tatastvāyayatuścamūḥ |
tasmin bale tu daityā ye tān śrṛṇuṣva dhareritān || 11.88 ||
praghaso vighasaścaiva saṅghaso'śanisaprabhaḥ |
vidyutprabhaḥ sughoṣaśca unmattākṣo bhayaṃkaraḥ || 11.89 ||
agnidanto'gnitejāśca bāhuśakraḥ pratardanaḥ |
virādho bhīmakarmā ca vipracittistathaiva ca || 11.90 ||
ete pañcadaśa śreṣṭhā asurāḥ paramāyudhāḥ |
akṣauhiṇīparīvāra ekaiko'tra pṛthakpṛthak || 11.91 ||
mahāmāyāstu samare durjjayasya mahātmanaḥ |
yuyudhurmaṇijaiḥ sārddhaṃ mahāsainyaparicchadāḥ || 11.92 ||
(suprabhaḥ praghasaṃ tvājau tāḍayāmāsa pañcabhiḥ |
śarairāśīviṣākāraiḥ prataptaiḥ patagairiva || ) || 11.93 ||
taptatejāstribhirbāṇairvighasaṃ saṃpravidhyata |
saṃghasaṃ daśabhirbāṇaiḥ suraśmiḥ pratyavidhyata || 11.94 ||
aśaniprabhaṃ raṇe'vidhyat pañcabhiḥ śubhadarśanaḥ |
vidyutprabhaṃ sukāntistu sughoṣaṃ sundarastathā || 11.95 ||
unmattākṣaṃ tathāvidhyat sundaḥ pañcabhirāśugaiḥ |
cakartta ca dhanustasya śitena nataparvaṇā || 11.96 ||
sumanā agnidaṃṣṭraṃ tu suśubhaścāgnitejasam |
suśīlo vāyuśakraṃ tu sumukhaśca pratardanam || 11.97 ||
(virādhena tathā śambhuḥ sukīrtirbhīmakarmmaṇā |
vipracittistathā somaṃ etad yuddhaṃ mahānabhūt ||) || 11.98 ||
parasparaṃ suyuddhena yodhayitvā'stralāghavāt |
yathāsaṃkhyena te daityāḥ punarmaṇibhavairhatāḥ || 11.99 ||
yāvat saṃgrāmaghoro vai mahāṃsteṣāṃ vyavarddhata |
tāvat samitkuśādīni kṛtvā gauramukho muniḥ || 11.100 ||
āgato mahadāścaryaṃ saṃgrāmaṃ bhīmadarśanam |
bahusainyaparīvāraṃ sthitaṃ taṃ cāpi durjjayam || 11.101 ||
taṃ dṛṣṭvā sa munirdvāri cintāparama eva hi |
upaviśyādhigamyātha maṇeḥ kāraṇameva ha || 11. 102 ||
evaṃ kṛtvā maṇikṛtaṃ raudraṃ gāḍhaṃ ca saṃyugam |
cintayāmāsa deveśaṃ hariṃ gauramukho muniḥ || 11.103 ||
sa devaḥ puratastasya pītavāsāḥ khagāsanaḥ |
kimatra te mayā kāryamiti vāṇīmudīrayat || 11.104 ||
sa ṛṣiḥ prāñjalirbhūtvā uvāca puruṣottamam |
jahīmaṃ durjjayaṃ pāpaṃ sasainyaṃ parivāriṇam || 11.105 ||
evamuktastadā tena cakraṃ jvalanasannibham |
(mumoca durjayabale kālacakraṃ sudarśanam) || 11.106 ||
tena cakreṇa tatsainyamāsuraṃ daurjayaṃ kṣaṇāt |
nimeṣāntaramātreṇa bhasmavad bahudhā kṛtam || 11.107 ||
evaṃ kṛtvā tato devo muniṃ gauramukhaṃ tadā |
uvāca nimiṣeṇedaṃ nihataṃ dānavaṃ balam || 11.108 ||
araṇye'smiṃstatastvevaṃ naimiṣāraṇyasaṃjñitam |
bhaviṣyati yathārthaṃ vai brāhmaṇānāṃ viśeṣataḥ || 11.109 ||
ahaṃ ca yajñapuruṣa etasmin vanagocare |
nāmnā yājyā sadā ceme daśa pañca ca nāyakāḥ |
kṛte yuge bhaviṣyanti rājāno maṇijā mune || 11.110 ||
evamuktvā tato devo gato'ntardhānamīśvaraḥ |
dvijo'pi svāśrame tasthau mudā paramayā yutaḥ || 11.111 ||
|| iti śrīvarāhapurāṇe bhagavacchāstre ekādaśo'dhyāyaḥ || 11 ||
śrīvarāha uvāca |
tataḥ putraṃ rathāṅgāgnidagdhaṃ śrutvā nṛpottamaḥ |
supratīkaḥ pratītātmā cintayāmāsa pārthivaḥ |
tasya cintayatastvevaṃ tadā buddhirajāyata || 12.1 ||
citrakūṭe girau viṣṇuḥ sadā rāmeti kīrtyate |
tato'haṃ rāmasaṃjñena nāmnā staumi jagatpatim || 12.2 ||
supratīka uvāca |
namāmi rāmaṃ naranāthamacyutaṃ
kaviṃ purāṇaṃ tridaśārināśanam |
śivasvarūpaṃ prabhavaṃ maheśvaraṃ
sadā prapannārtiharaṃ dhṛtaśriyam || 12.3 ||
bhavān sadā deva samastatejasāṃ
karoṣi tejāṃsi samastarūpadhṛk |
kṣitau bhavān pañcaguṇastathā jale
catuḥprakārastrividho'tha tejasi |
dvidhā'tha vāyau viyati pratiṣṭhito
bhavān hare śabdavapuḥ pumānasi || 12.4 ||
bhavān śaśī sūryahutāśano'si
tvayi pralīnaṃ jagadetaducyate |
bhavatpratiṣṭhaṃ ramate jagat yataḥ
stuto'si rāmeti jagat pratiṣṭhitam || 12.5 ||
bhavārṇave duḥkhatarormisaṃkule
tathākṣamānagrahaṇe'tibhīṣaṇe |
na majjati tvatsmaraṇaplavo naraḥ
smṛto'si rāmeti tathā tapovane || 12.6 ||
vedeṣu naṣṭeṣu bhavāṃstathā hare
karoṣi mātsyaṃ vapurātmanaḥ sadā |
yugakṣaye rañjitasarvadiṅmukho
bhavāṃstathāgnirbahurūpadhṛg vibho || 12.7 ||
kaurmaṃ tathā te vapurāsthitaḥ sadā
yuge yuge mādhava toyamanthane |
na cānyadastīti bhavatsamaṃ kvaci-
jjanārdanād yaḥ svayaṃ bhūtamuttamam || 12.8 ||
tvayā tataṃ viśvamidaṃ mahātman
svakākhilān veda diśaśca sarvāḥ |
kathaṃ tvamādyaṃ paramaṃ tu dhāma
vihāya cānyaṃ śaraṇaṃ vrajāmi || 12.9 ||
bhavānekaḥ pūrvamāsīt tataśca
tvatto mahī salilaṃ vahniruccaiḥ |
vāyustathā khaṃ ca mano'pi buddhi-
ścetoguṇāstatprabhavaṃ ca sarvam || 12.10 ||
tvayā tataṃ viśvamidaṃ samastaṃ
sanātanastvaṃ puruṣo mato me |
samastaviśveśvara viśvamūrte
sahastrabāho jaya deva deva |
namo'stu rāmāya mahānubhāva || 12.11 ||
iti stuto devavaraḥ prasannaḥ
tadā rājñaḥ supratīkasya mūrtim |
saṃdarśayāmāsa tato'bhyuvāca
varaṃ vṛṇīṣveti ca supratīkam || 12.12 ||
evaṃ śrutvā vacanaṃ tasya rājā
sasaṃbhramaṃ devadevaṃ praṇamya |
uvāca deveśvara me prayaccha
layaṃ yadāste paramaṃ vapuste || 12.13 ||
itīrite rājavaraḥ kṣaṇena
layaṃ tathā'gādasuraghnamūrtau |
sthitastasminnātmabhūto vimuktaḥ
sa bhūmipaḥ karmakāṇḍairanekaiḥ || 12.14 ||
śrīvarāha uvāca |
itīritaṃ te tu mayā purāṇaṃ
svāyambhuve cādikṛtaikadeśam |
śakyaṃ na cāsyairbahubhiḥ sahastrai-
rapīha kenāpi mukhena vaktum || 12.15 ||
uddeśataḥ saṃsmṛtamātrameta-
nmayā bhadre kathitaṃ te purāṇam |
samudratoyāt parimāṇasṛṣṭiḥ
kvacit kvacid vṛttamatho hyanardhyam || 12.16 ||
svayambhuvā kathitaṃ brahmaṇā'pi
nārāyaṇenāpi kuto bhave'nyaḥ |
aśakyamasmābhiritīritaṃ te
tanmūrttitvāt smaraṇenedamādyam || 12.17 ||
samudre bālukāsaṃkhyā vidyate rajasaḥ kṣitau |
na tu sṛṣṭeḥ punaḥ saṃkhyā krīḍataḥ parameṣṭhinaḥ || 12.18 ||
eṣa nārāyaṇasyāṃśo mayā proktaḥ śucismite |
kṛte vṛttānta eṣaśca kimanyacchrotumicchasi || 12.19 ||
|| iti śrīvarāhapurāṇe bhagavacchāstre dvādaśo'dhyāyaḥ || 12 ||
dharaṇyuvāca |
etat tanmahadāścaryaṃ dṛṣṭvā gauramukho muniḥ |
te cāpi maṇijāḥ prāptāḥ kiṃ phalaṃ tu varaṃ guroḥ || 13.1 ||
ko'sau gauramukhaḥ śrīmān muniḥ paramadhārmmikaḥ |
kiṃ cakāra hareḥ karmma dṛṣṭvā'sau munipuṃgavaḥ || 13.2 ||
śrīvarāha uvāca |
nimiṣeṇa kṛtaṃ karma dṛṣṭvā bhagavato muniḥ |
ārirādhayiṣurdevaṃ tameva prayayau vanam |
prabhāsaṃ nāma somasya tīrthaṃ paramadurlabham || 13.3 ||
tatra daityāntakṛd devaḥ procyate tīrthacintakaiḥ |
ārādhayāmāsa hariṃ daityasūdanasaṃjñitam || 13.4 ||
tasyārādhayato devaṃ hariṃ nārāyaṇaṃ prabhum |
ājagāma mahāyogī mārkaṇḍeyo mahāmuniḥ || 13.5 ||
taṃ dṛṣṭvā'bhyāgataṃ dūrādarghapādyena so muniḥ |
arcayāmāsa taṃ bhaktyā mudā paramayā yutaḥ || 13.6 ||
kauśyāṃ vṛṣyāṃ tadāsīnaṃ papracchedaṃ munistadā |
śādhiṃ māṃ muniśārdūla kiṃ karomi mahāvrata || 13.7 ||
evamuktaḥ sa viprendro mārkaṇḍeyo mahātapāḥ |
uvāca ślakṣṇayā vācā muniṃ gauramukhaṃ tadā || 13.8 ||
mārkaṇḍeya uvāca |
etadeva mahatkṛtyaṃ yatsatāṃ saṃgamo bhavet |
yattu sāndehikaṃ kāryaṃ tatpṛcchasva mahāmune || 13.9 ||
gauramukha uvāca |
ete hi pitaro nāma procyante vedavādibhiḥ |
sarvavarṇaṣu sāmānyā utāhosvit pṛthak pṛthak || 13.10 ||
mārkaṇḍeyaḥ |
sarveṣāmeva devānāmādyo nārāyaṇo guruḥ |
tasmād brahmā samutpannaḥ so'pi saptāsṛjanmunīn || 13.11 ||
māṃ yajasveti tenoktāstadā te parameṣṭhinā |
ātmanātmānamevāgre ayajanta iti śrutiḥ || 13.12 ||
teṣāṃ vai brahmajātānāṃ mahāvaikārikarmaṇām |
aśapad vyabhicāro hi mahāneṣa kṛto yataḥ |
prabhraṣṭajñāninaḥ sarve bhaviṣyatha na saṃśayaḥ || 13.13 ||
evaṃ śaptāstataste vai brahmaṇātmasamudbhavāḥ |
sadyo vaṃśakarān putrānutpādya tridivaṃ yayuḥ || 13.14 ||
tatasteṣu prayāteṣu tridivaṃ brahmavādiṣu |
tatputrāḥ śrāddhadānena tarpayāmāsurañjasā || 13.15 ||
te ca vaimānikāḥ sarve brahmaṇaḥ sapta mānasāḥ |
tat piṇḍadānaṃ mantroktaṃ prapaśyanto vyavasthitāḥ || 13.16 ||
gauramukha uvāca |
ye ca te pitaro brahman yaṃ ca kālaṃ samāsate |
kiṃ yato vai pitṛgaṇāstasmiṃlloke vyavasthitāḥ || 13.17 ||
mārkaṇḍeya uvāca |
pravarttante varāḥ kecid devānāṃ somavarddhanāḥ |
te marīcyādayaḥ sapta svarge te pitaraḥ smṛtāḥ || 13.18 ||
catvāro mūrttimanto vai trayastvanye hyamūrttayaḥ |
teṣāṃ lokanisargaṃ ca kīrttayiṣyāmi tacchṛṇu || 13.19 ||
prabhāvaṃ ca mahardhi ca vistareṇa nibodha me |
dharmamūrtidharāsteṣāṃ trayo'nye paramā gaṇāḥ |
teṣāṃ nāmāni lokāṃśca kīrtayiṣyāmi tacchṛṇu || 13.20 ||
lokāḥ saṃtānakā nāma yatra tiṣṭhanti bhāsvarāḥ |
amūrttayaḥ pitṛgaṇāste vai putrāḥ prajāpateḥ || 13.21 ||
virājasya prajāśreṣṭhā vairājā iti te smṛtāḥ ||
devānāṃ pitaraste hi tān yajantīha devatāḥ || 13.22 ||
ete vai lokavibhraṣṭā lokān prāpya sanātanān |
punaryugaśatānteṣu jāyante brahmavādinaḥ || 13.23 ||
te prāpya tāṃ smṛtiṃ bhūyaḥ sādhya yogamanuttamam |
cintya yogagatiṃ śuddhāṃ punarāvṛttidurlabhām || 13.24 ||
ete sma pitaraḥ śrāddhe yogināṃ yogavarddhanāḥ |
āpyāyitāstu te pūrvaṃ yogaṃ yogabale ratau || 13.25 ||
tasmācchrāddhāni deyāni yogināṃ yogisattama |
eṣa vai prathamaḥ sargaḥ somapānāmanuttamaḥ || 13.26 ||
ete ta ekatanavo vartante dbijasattamāḥ |
bhūrlokavāsināṃ yājyāḥ svargalokanivāsinaḥ ||
brahmaputrā marīcyādyāsteṣāṃ yājyā mahadgatāḥ || 13.27 ||
kalpavāsikasaṃjñānāṃ teṣāmapi jane gatāḥ |
sanakādyāstatasteṣāṃ vairājāstapasi sthitāḥ |
teṣāṃ satyagatā muktā ityeṣā pitṛsaṃtatiḥ || 13.28 ||
agniṣvātteti mārīcyā vairājā barhisaṃjñitāḥ |
sukāleyāpi pitaro vasiṣṭhasya prajāpateḥ |
te'pi yājyāstribhirvarṇairna śūdreṇa pṛthakkṛtam || 13.29 ||
varṇatrayābhyanujñātaḥ śūdraḥ sarvān pitṛn yajet |
na tu tasya pṛthak santi pitaraḥ śūdrajātayaḥ || 13.30 ||
muktaścetanako brahman nanu vipreṣu dṛśyate |
viśeṣaśāstradṛṣṭyā tu purāṇānāṃ ca darśanāt || 13.31 ||
evaṃ ṛṣistutaiḥ śāstraṃ jñātvā yājyakasaṃbhavān |
svayaṃ sṛṣṭyāṃ smṛtirlabdhā putrāṇāṃ brahmaṇā tataḥ |
paraṃ nirvāṇamāpannāste'pi jñānena eva ca || 13.32 ||
vasvādīnāṃ kaśyapādyā varṇānāṃ vasavādayaḥ |
aviśeṣeṇa vijñeyā gandharvādyā api dhruvam || 13.33 ||
eṣa te paitṛkaḥ sarga uddeśena mahāmune |
kathito nānta evāsya varṣakoṭyā hi dṛśyate || 13.34 ||
śrāddhasya kālān vakṣyāmi tān śrṛṇuṣva dvijottama |
śrāddhārhamāgataṃ dravyaṃ viśiṣṭamathavā dvijam || 13.35 ||
śrāddhaṃ kurvīta vijñāya vyatīpāte'yane tathā |
viṣuve caiva saṃprāpte grahaṇe śaśisūryayoḥ |
samasteṣveva viprendra rāśiṣvarke'tigacchati || 13.36 ||
nakṣatragrahapīḍāsu duṣṭasvapnāvalokane |
icchāśrāddhāni kurvīta navasasyāgame tathā || 13.37 ||
amāvāsyā yadā ārdrāviśākhāsvātiyogino |
śrāddhaiḥ pitṛgaṇastṛptiṃ tadāpnotyaṣṭavārṣikīm || 13.38 ||
amāvasyā yadā puṣye raudre'tharkṣe punarvasau |
dvādaśābdaṃ tathā tṛptiṃ prayānti pitaro'rccitāḥ || 13.39 ||
vāsavājaikapādarkṣe pitṝṇāṃ tṛptimicchatām |
vāruṇe cāpyamāvāsyā devānāmapi durlabhā || 13.40 ||
navasvarkṣeṣvamāvāsyā yadā teṣu dvijottama |
tadā śrāddhāni deyāni akṣayyaphalamicchatām |
api koṭisahastreṇa puṇyasyānto na vidyate || 13.41 ||
athāparaṃ pitaraḥ śrāddhakālaṃ
rahasyamasmat pravadanti puṇyam |
vaiśākhamāsasya tu yā tṛtīyā
navamyasau kārttikaśuklapakṣe || 13.42 ||
nabhasyamāsasya tamistrapakṣe
trayodaśī pañcadaśī ca māghe |
upaplave candramaso raveśca
tathāṣṭakāsvapyayanadvaye ca || 13.43 ||
pānīyamapyatra tilairvimiśraṃ
dadyātpitṛbhyaḥ prayato manuṣyaḥ |
śrāddhaṃ kṛtaṃ tena samāḥsahastraṃ
rahasyametat pitaro vadanti || 13.44 ||
māghāsite pañcadaśī kadāci-
dupaiti yogaṃ yadi vāruṇena |
ṛkṣeṇa kālaḥ paramaḥ pitṝṇāṃ
na tvalpapuṇyairdvija labhyate'sau || 13.45 ||
kāle dhaniṣṭhā yadi nāma tasmin
bhavettu viprendra sadā pitṛbhyaḥ |
dattaṃ jalānnaṃ pradadāti tṛptiṃ
varṣāyutaṃ tatkulajairmanuṣyaiḥ || 13.46 ||
tatraiva ced bhādrapadāstu pūrvāḥ
kāle tadā yaiḥ kriyate pitṛbhyaḥ |
śrāddhaṃ parā tṛptimupetya tena
yugaṃ samagraṃ pitaraḥ svapanti ||
śrāddhaṃ tu yatpakṣamudāharanti
tatpaitṛkaṃ munigaṇāḥ pravadanti tuṣṭim || 13.47 ||
gaṅgāsarayūmathavā vipāśāṃ
sarasvatīṃ naimiṣagomatīṃ vā |
tato'vagāhyārcanamādareṇa
kṛtvā pitṝṇāmahitāni hanti || 13.48 ||
gāyanti caitat pitaraḥ kadā tu
varṣāmaghātṛptimavāpya bhūyaḥ |
māghāsitānte śubhatīrthatoyai-
ryāsyāma tṛptiṃ tanayādidattaiḥ || 13.49 ||
cittaṃ ca vittaṃ ca nṛṇāṃ viśuddhaṃ
śastaśca kālaḥ kathito vidhiśca |
pātraṃ yathoktaṃ paramā ca bhakti-
rnṛṇāṃ prayacchantyabhivāñchitāni || 13.50 ||
pitṛgītāstathaivātra ślokāstān śrṛṇu sattama |
śrutvā tathaiva bhavitā bhāvyaṃ tatra vidhātmanā || 13.51 ||
api dhanyaḥ kule jāyādasmākaṃ matimān naraḥ |
akurvan vittaśāṭhyaṃ yaḥ piṇḍān yo nirvapiṣyati || 13.52 ||
ratnavastramahāyānaṃ sarvaṃ bhogādikaṃ vasu |
vibhave sati viprebhyo asmānuddiśya dāsyati || 13.53 ||
annena vā yathāśaktyā kāle'smin bhaktinamradhīḥ |
bhojayiṣyati viprāgryāṃstanmātravibhavo naraḥ || 13.54 ||
asamartho'nnadānasya vanyaśākaṃ svaśaktitaḥ |
pradāsyatidvijāgryebhyaḥ svalpāṃ yo vāpi dakṣiṇām || 13.55 ||
tatrāpyasāmarthyayutaḥ karāgrāgrasthitāṃstilān |
praṇamya dvijamukhyāya kasmaicid dvija dāsyati || 13.56 ||
tilaiḥ saptāṣṭabhirvāpi samavetāṃ jalāñjalim |
bhaktinamraḥ samuddiśyāpyasmākaṃ saṃpradāsyati || 13.57 ||
yataḥ kutaścit saṃprāpya gobhyo vāpi gavāhnikam |
abhāve prīṇayatyasmān bhaktyā yuktaḥ pradāsyati || 13.58 ||
sarvābhāve vanaṃ gatvā kakṣāmūlapradarśakaḥ |
sūryādilokapālānāmidamuccaiḥ paṭhiṣyati || 13.59 ||
na me'sti vittaṃ na dhanaṃ na cānya-
cchrāddhasya yogyaṃ svapitṝn nato'smi |
tṛpyantu bhaktyā pitaro mayaitau
bhujau tatau vartmani mārutasya || 13.60 ||
ityetat pitṛbhirgītaṃ bhāvābhāvaprayojanam |
kṛtaṃ tena bhavecchrāddhaṃ ya evaṃ kurute dvija || 13.61 ||
|| iti śrīvarāhapurāṇe bhagavacchāstre trayodaśo'dhyāyaḥ || 13 ||
mārkaṇḍeya uvāca |
etanme kathitaṃ pūrvaṃ brahmaputreṇa dhīmatā |
sanakānujena viprarṣe brāhmaṇān śrṛṇu sāṃpratam || 14.1 ||
triṇāciketastrimadhustrisuparṇaḥ ṣaḍaṅgavit |
vedavit śrotriyo yogī tathā vai jyoṣṭhasāmagaḥ || 14.2 ||
ṛtvijaṃ bhāgineyaṃ ca dauhitraṃ śvasuraṃ tathā |
jāmātaraṃ mātulaṃ ca taponiṣṭhaṃ ca brāhmaṇam || 14.3 ||
pañcāgnyabhirataṃ caiva śiṣyaṃ saṃbandhinaṃ tathā |
mātāpitṛrataṃ caiva etāñchrāddhe niyojayet || 14.4 ||
mitradhruk kunakhī caiva śyāvadantastathā dvijaḥ |
kanyādūṣayitā vahnivedojjhaḥ somavikrayī || 14.5 ||
abhiśaptastathā stenaḥ piśuno grāmayājakaḥ |
bhṛtakādhyāpakaścaiva bhṛtakādhyāpitaśca yaḥ || 14.6 ||
parapūrvāpatiścaiva mātāpitrostathojjhakaḥ |
vṛṣalīsūtipoṣyaśca vṛṣalīpatireva ca |
tathā devalakaścāpi śrāddhe nārhanti ketanam || 14.7 ||
prathame'hni budhaḥ kuryād viprāgryāṇāṃ nimantraṇam |
ānimantrya dvijān gehamāgatān bhojayed yatīn || 14.8 ||
pādaśaucādinā gehamāgatān bhojayed dvijān |
pavitrapāṇirācāntānāsaneṣūpaveśayet || 14.9 ||
pitṝṇāmayujo yugmān devānāmapi yojayet |
devānāmekamekaṃ vā pitṝṇāṃ ca niyojayet || 14.10 ||
tathā mātāmahaśrāddhaṃ vaiśvadevasamanvitam |
kurvīta bhaktisaṃpannasaktantraṃ vā vaiśvadevikam || 14.11 ||
prāṅmukhaṃ bhojabhed vipraṃ devānāmubhayātmakam |
pitṛpaitāmahānāṃ ca bhojayeccāpyudaṅmukhān || 14.12 ||
pṛthak tayoḥ kecidāhuḥ śrāddhasya karaṇaṃ dvija |
ekatraikena pākena vadantyanye maharṣayaḥ || 14.13 ||
viṣṭarārthaṃ kuśān dattvā saṃpūjyārghavidhānataḥ |
kuryādāvāhanaṃ prājño devānāṃ tadanujñayā || 14.14 ||
yavāmbunā ca devānāṃ dadyādarghyaṃ vidhānavit |
sugandhadhūpadīpāṃśca dattvā tebhyo yathāvidhi |
pitṝṇāmapasakavyena sarvamevopakalpayet || 14.15 ||
anujñāṃ ca tataḥ prāpya dattvā darbhān dvidhākṛtān |
mantrapūrvaṃ pitṝṇāṃ tu kuryādāvāhanaṃ budhaḥ |
tilāmbunā cāpasavyaṃ dadyādardhyādikaṃ budhaḥ || 14.16 ||
kāle tatrātithiṃ prāptamannakāmaṃ dvijādhvagam |
brāhmaṇairabhyanujñātaḥ kāmaṃ tamapi pūjayet || 14.17 ||
yogino vividhai rūpairnarāṇāmupakāriṇaḥ |
bhramanti pṛthivīmetāmavijñātasvarūpiṇaḥ || 14.18 ||
tasmādabhyarcayet prāptaṃ śrāddhakāle'tithiṃ budhaḥ |
śrāddhakriyāphalaṃ hanti dvijendrāpūjito'tithiḥ || 14.19 ||
juhuyād vyañjanaṃ kṣārairvarjyamannaṃ tato'nale |
anujñāto dbijaistaistu triḥ kṛtvā puruṣarṣabha || 14.20 ||
agnaye kavyavāhanāya svāheti prathamāhutiḥ |
somāya vai pitṛmate dātavyā tadanantaram || 14.21 ||
vaivasvatāya caivānyā tṛtīyā dīyatāhutiḥ |
hutāvaśiṣṭamalpālpaṃ viprapātreṣu nirvapet || 14.22 ||
tato'nnaṃ mṛṣṭamatyarthamabhīṣṭamabhisaṃskṛtam |
dattvā juṣadhvamicchāto vācyametadaniṣṭhuram || 14.23 ||
bhoktavyaṃ taiśca taccittairmaunibhiḥ sumukhaiḥ sukham |
akrudhyatā atvaratā deyaṃ tenāpi bhaktitaḥ || 14.24 ||
rakṣoghnamantrapaṭhanaṃ bhūmerāstaraṇaṃ tilaiḥ |
kṛtvā'dhyeyāśca pitarasta eva dvijasattamāḥ || 14.25 ||
pitā pitāmahaścaiva tathaiva prapitāmahaḥ |
mama tṛptiṃ prayāntvadya homāpyāyitamūrttayaḥ || 14.26 ||
pitāpitāmahaścaiva tathaiva prapitāmahaḥ |
mama tṛptiṃ prayāntvadya vipradeheṣu saṃsthitāḥ || 14.27 ||
pitā pitāmahaścaiva tathaiva prapitāmahaḥ |
tṛptiṃ prayāntu piṇḍeṣu mayā datteṣu bhūtale || 14.28 ||
pitā pitāmahaścaiva tathaiva prapitāmahaḥ |
tṛptiṃ prayāntu me bhaktyā yanmayaitadudāhṛtam || 14.29 ||
mātāmahastṛptimupaitu tasya
tathā pitā tasya pitā tato'nyaḥ |
viśve'tha devāḥ paramāṃ prayāntu
tṛptiṃ praṇaśyantu ca yātudhānāḥ || 14.30 ||
yajñeśvaro havyasamastakavya-
bhoktā'vyayātmā harirīśvaro'tra |
tatsannidhānādapayāntu sadyo
rakṣāṃsyaśeṣāṇyasurāśca sarve || 14.31 ||
tṛpteṣveteṣu vipreṣu kiredannaṃ mahītale |
dadyādācamanārthāya tebhyo vāri sakṛtsakṛt || 14.32 ||
sutṛptaistairanujñātaḥ sarveṇānnena bhūtale |
salilena tataḥ piṇḍān samāgṛhya samāhitaḥ || 14.33 ||
pitṛtīrthena salilaṃ tathaiva salilāñjalim |
mātāmahebhyastenaiva piṇḍāṃstīrthena nirvapet|
dakṣiṇāgreṣu darbheṣu puṣpadhūpādipūjitām || 14.34 ||
svapitre prathamaṃ piṇḍaṃ dadyāducchiṣṭasannidhau |
pitāmahāya caivānyaṃ tatpitre ca tathā'param || 14.35 ||
darbhamūle lepabhujaḥ prīṇayellepagharṣaṇāt |
piṇḍe mātāmahe tadvad gandhamālyādisaṃyutaiḥ || 14.36 ||
pūjayitvā dvijāgryāṇāṃ dadyādācamanaṃ budhaḥ |
paitrebhyaḥ prathamaṃ bhaktyā tanmanasko dvijeśvara || 14.37 ||
susvadhetyāśiṣā yuktāṃ dadyācchaktyā ca dakṣiṇām |
dattvā ca dakṣiṇāṃ tebhyo vācayed vaiśvadevikān |
prīyantāmiti ye viśve devāstena itīrayet || 14.38 ||
tatheti cokte tairvipraiḥ prārthanīyāstathāśiṣaḥ |
paścād visarjayed devān pūrvaṃ paitrānmahāmate || 14.39 ||
mātāmahānāmapyevaṃ saha devaiḥ kramaḥ smṛtaḥ |
bhojane ca svaśaktyā ca dāne tadvad visarjjane |
āpādaśaucanāt pūrvaṃ kuryādeva dvijanmasu || 14.40 ||
jānantaṃ prathamaṃ pitryaṃ tathā mātāmaheṣu ca |
visarjayet prītivacaḥ saṃmānyābhyarthitāṃstataḥ |
nivarttetābhyanujñāta ādvārāntamanuvrajet || 14.41 ||
tatastu vaiśvadevākhyāṃ kuryānnityakriyāṃ tataḥ |
bhuñjīyācca samaṃ pūjya bhṛtyabandhubhirātmanā || 14.42 ||
evaṃ śrāddhaṃ budhaḥ kuryāt pitryaṃ mātāmahaṃ tathā |
śrāddhairāpyāyitā dadyuḥ sarvān kāmān pitāmahāḥ || 14.43 ||
trīṇi śrāddhe pavitrāṇi dauhitraḥ kutapastilāḥ |
rajatasya tathā dānaṃ tathā saṃdarśanādikam || 14.44 ||
varjyastu kurvatā śrāddhaṃ krodho'dhvagamamaṃ tvarā |
bhokturapyatra viprendra trayametanna saṃśayaḥ || 14.45 ||
viśvedevāḥ sapitarastathā mātāmahā dvija |
kulaṃ cāpyāyate puṃsāṃ sarvaṃ śrāddhaṃ prakurvatām || 14.46 ||
somādhāraḥ pitṛgaṇo yogādhāraśca candramāḥ |
śrāddhaṃ yoginiyuktaṃ tu tasmad viprendra śasyate || 14.47 ||
sahastrasyāpi viprāṇāṃ yogī cet purataḥ sthitaḥ |
sarvān bhoktṝṃstārayati yajamānaṃ tathā dvija || 14.48 ||
mahyaṃ sanatkumāreṇa pūrvakalpe dvijottama |
kathitaṃ vāyunā cāpi devānāṃ śaṃbhunā tathā || 14.49 ||
ṛṣīṇāṃ śaktiputreṇa tathā maitreyasaṃjñite |
bhaviṣyati kramād yāvan mayā te kathitaṃ dvija || 14.50 ||)
iyaṃ sarvapurāṇeṣu sāmānyā paitṛkī kriyā |
etat kramāt karmakāṇḍaṃ jñātvā mucyeta bandhanāt || 14.51 ||
etadāśritya nirvāṇaṃ ṛṣayaḥ saṃśitavratāḥ |
prāptā gauramukhedānīṃ tvamapyevaṃ paro bhava || 14.52 ||
iti te kathitaṃ bhaktyā pṛcchato dvijasattama |
pitṝn yaṣṭvā hariṃ dhyāyed yastasya kimataḥ param |
na tasmāt parataḥ pitryaṃ tantramastīti niścayaḥ || 14.53 ||
|| iti śrīvarāhapurāṇe bhagavacchāstre caturdaśo'dhyāyaḥ || 14 ||
dharaṇyuvāca |
evaṃ śrāddhavidhiṃ śrutvā mārkaṇḍeyānmahāmuniḥ |
tadā gauramukho deva kimūrdhvaṃ kṛtavān vibho || 15.1 ||
śrīvarāha uvāca |
etacchrutvā tadā dhātri pitṛtantraṃ mahāmuniḥ |
saṃsmārito janmaśataṃ mārkaṇḍeyena dhīmatā || 15.2 ||
dharaṇyuvāca |
bhagavan gauramukhaḥ ko'sau anyajanmani kaḥ smṛtaḥ |
kathaṃ ca smṛtavān smṛtvā kiṃ cakāra ca sattamaḥ || 15.3 ||
śrīvarāha uvāca |
bhṛgurāsīt svayaṃ sākṣādanyasmin brahma janmani |
tadanvayātmajastveṣa mārkaṇḍeyo mahāmuniḥ || 15.4 ||
putraistu bodhitā yūyaṃ sugatiṃ prāpsyatheti yat |
prāguktaṃ brahmaṇā tena mārkaṇḍeyena bodhitaḥ || 15.5 ||
sasmāra sarvajanmāni smṛtvā caiva tu yatkṛtam |
tacchṛṇuṣva varārohe kathayāmi samāsataḥ || 15.6 ||
evaṃ śrāddhavidhānena dvādaśābdaṃ tataḥ pitṝn |
iṣṭvā paścāddhareḥ stotraṃ sa munistūpacakrame || 15.7 ||
prabhāsaṃ nāma yattīrthaṃ triṣu lokeṣu viśrutam |
tatra daityāntakaṃ devaṃ stotuṃ gauramukhaḥ sthitaḥ || 15.8 ||
gauramukha uvāca |
stoṣye mahendraṃ ripudarpahaṃ śivaṃ
nārāyaṇaṃ brahmavidāṃ pratiṣṭhitam |
ādityacandrāśviyugasthamādyaṃ
purātanaṃ daityaharaṃ sadā harim || 15.9 ||
cakāra mātsyaṃ vapurātmano yaḥ
purākṛtaṃ vedavināśakāle |
mahāmahīdhṛgvapuragrapuccha -
chaṭāhavārcciḥ suraśatruhādyaḥ || 15.10 ||
tathābdhimanthānakṛte girīndraṃ
dadhāra yaḥ kaurmmavapuḥ purāṇam |
hitecchayā yaḥ puruṣaḥ purāṇaḥ
prapātu māṃ daityaharaḥ sureśaḥ || 15.11 ||
mahāvarāhaḥ satataṃ pṛthivyās
talāttalaṃ prāviśad yo mahātmā |
yajñāṅgasaṃjñaḥ surasiddhavandyaḥ
sa pātu māṃ daityaharaḥ purāṇaḥ || 15.12 ||
nṛsiṃharūpī ca bhavatyajastraṃ
yuge yuge yogivarograbhīmaḥ |
karālavaktraḥ kanakāgravarcā
ratnāśayo'smānasurāntako'vyāt || 15.13 ||
balermakhadhvaṃsakṛte mahātmā
svāṃ gūḍhatāṃ yogavapuḥsvarūpaḥ |
sa daṇḍakāṣṭhā'jinalakṣaṇaḥ punaḥ
kṣitiṃ ca padā krāntavān yaḥ sa pātu || 15.14 ||
triḥsaptakṛtvo jagatīṃ jigāya
jitvā dadau kaśyapāya pracaṇḍaḥ |
sa jāmadagnyo'bhijanasya goptā
hiraṇyagarbho'surahā prapātu || 15.15 ||
catuḥprakāraṃ ca vapurya ādyaṃ
hairaṇyagarbhapratimānalakṣyam |
rāmādirūpairbahurūpabheda-
ścakāra so'smānasurāntako'vyāt || 15.16 ||
cāṇūrakaṃsāsuradarpabhīte-
rbhītāmarāṇāmabhayāya devaḥ |
yuge yuge vāsudevo babhūva
kalpe bhavatyadbhutarūpakārī |
yuge yuge kalkināmnā mahātmā
varṇasthitiṃ karttumanekamūrttiḥ || 15.17 ||
sanātano brahmamayaḥ purāṇo
na yasya rūpaṃ surasiddhadaityāḥ |
paśyanti vijñānagatiṃ vihāya
athopyanekāni samarcvayanti |
matsyādirūpāṇi carāṇi so'vyāt || 15.18 ||
namo namaste puruṣottamāya
punaśca bhūyo'pi namo namaste |
namaḥ purastādatha pṛṣṭhataste
nayasva māṃ muktipadaṃ namaste || 15.19 ||
evaṃ namasyatastasya maharṣerbhāvitātmanaḥ |
pratyakṣatāṃ gato devaḥ svayaṃ cakragadādharaḥ || 15.20 ||
taṃ dṛṣṭvā tasya vijñānaṃ nistaraṅgaṃ svadehataḥ |
uttasthau so'pi taṃ labdhvā tasmin brahmaṇi śāśvate |
layaṃ jagāma devātmā tvapunarbhavasaṃjñite || 15.21 ||
|| iti śrīvarāhapurāṇe bhagavacchāstre pañcadaśo'dhyāyaḥ || 15 ||
dharaṇyuvāca |
tadā durvāsasā śapto devarājaḥ śatakratuḥ |
vasiṣyasi tvaṃ marttyeṣu supratīkasutena tu || 16.1 ||
utsādito divo mūḍhetyevamuktastu bhūdhara |
indro marttyamupāgamya sarvadevasamanvitaḥ || 16.2 ||
kiṃ cakāra ca tasmiṃstu durjaye ca nipātite |
parameṣṭhinā bhagavatā tena yogaviduttamau || 16.3 ||
svarge vidyutsuvidyucca tau ca kiṃ cakratustadā |
etanme saṃśayaṃ deva kathayasva prasādataḥ || 16.4 ||
śrīvarāha uvāca |
dūrjayena jito dhātri devarājaḥ śatakratuḥ |
bhārate hi tadā varṣe vārāṇasyāṃ tu pūrvataḥ |
āśritya saṃsthito devaiḥ saha yakṣamahoragaiḥ || 16.5 ||
vidyutsuvidyucca tadā yogamāsthāya śobhane |
dīrghatāpajvaraṃ vāyukarmayogena saṃśritau ||
lokapālāyitaṃ kṛtsnaṃ cakraturyogamāyayā || 16.6 ||
taṃ durjayaṃ mṛtaṃ śrutvā samudrāntaḥsthitaṃ tadā |
ānīya caturaṅgaṃ tu devān prati vijagmatuḥ || 16.7 ||
āgatya tau tadā daityau mahatsainyena parvatam |
himavantaṃ samāśritya saṃsthitau tu babhūvatuḥ || 16.8 ||
devā api mahatsainyaṃ saṃhatya kṛtadaṃśitāḥ |
mantrayāñcakruravyagrā aindraṃ padamabhīpsavaḥ || 16.9 ||
abravīt tatra devānāṃ gururāṅgiraso muniḥ |
gomedhena yajaghvaṃ vai prathamena tadantaram || 16.10 ||
yaṣṭavyaṃ kratubhiḥ sarvairekasthitirathāmarāḥ |
upadeśo mayā dattaḥ kriyatāṃ śīghrameṣa vai || 16.11 ||
evamuktāstadā devā gāḥ paśūṃścānukalpya te |
mumucuścaraṇārthāya rakṣārthaṃ saramāṃ daduḥ || 16.12 ||
tāśca gāvo devaśunyā rakṣyamāṇā dharādhare |
tatra jagmustadā gāvaścarantyo yatra te'surāḥ || 16.13 ||
te ca gāvastu tā dṛṣṭvā śukramūcuḥ purohitam |
paśvarthaṃ devagā brahmaṃścāryante rakṣamāṇayā |
devaśūnyā saramayā vada kiṃ kriyate'dhunā || 16.14 ||
evamuktastadā śukraḥ pratyuvācāsurāṃstadā |
etā gā hriyatāṃ śīghramasurā mā vilambatha || 16.15 ||
evamuktāstadā daityā jahrustā gā yadṛcchayā |
hṛtāsu tāsu saramā mārgamanveṣaṇe ratā || 16.16 ||
apaśyat sā diteḥ putrairnītā gāvo dharādhare |
daityairapi śunī dṛṣṭā dṛṣṭamārgā viśeṣataḥ || 16.17 ||
dṛṣṭvā te tāṃ ca sāmnaiva sāmapūrvamidaṃ vacaḥ |
āsāṃ gavāṃ tu dugdhvaiva kṣīraṃ tvaṃ sarame śubhe || 16.18 ||
pibasvaivamiti proktā tasyai tad dadurañjasā |
dattvā tu kṣīrapānaṃ tu tasyai te daityanāyakāḥ || 16.19 ||
mā bhadre devarājāya gāścemā vinivedaya |
evamuktvā tato daityā mumucustāṃ śunīṃ vane || 16.20 ||
tairmuktā sā surāṃstūrṇaṃ jagāma khalu vepatī |
namaścakre ca devendraṃ saramā surasattamam || 16.21 ||
tasyāśca maruto devā devendreṇa nirūpitāḥ |
gūḍhaṃ gacchata rakṣārthaṃ devaśunyā mahābalāḥ || 16.22 ||
ityuktāstena sūkṣmeṇa vapuṣā jagmurañjasā |
te'pyāgamya surendrāya namaśrakrurdharādhare || 16.23 ||
tāṃ devarājaḥ papraccha kva gāvaḥ sarame'bhavan |
evamuktā tu saramā na jānāmīti cābravīt || 16.24 ||
tata indro ruṣā yukto yajñārthamupakalpitāḥ |
gāvaḥ kva ceti marutaḥ provācedaṃ śunī katham || 16.25 ||
evamuktāstu maruto devendreṇa dharādhare |
kathayāmāsuravyagrāḥ karmma tat saramākṛtam || 16.26 ||
tata indraḥ samutthāya padā saṃtāḍayacchunīm |
krodhena mahatāviṣṭo devendraḥ pākaśāsanaḥ || 16.27 ||
kṣīraṃ pītaṃ tvayā mūḍhe gāvastāścāsurairhṛtāḥ |
evamuktvā padā tena tāḍitā saramā dhare || 16.28 ||
tasyendrapādaghātena kṣīraṃ vaktrāt prasustruve |
stravatā tena payasā sā śunī yatra gā bhavan |
jagāma tatra devendraḥ sahasainyastadā dhare || 16.29 ||
gatvā cāpaśyad devendrastā gā daityairupāhṛtāḥ |
pālanāṃ cakrurye daityā balino bhṛśam |
te sainyairnihatāḥ sadyastatyajurgāḥ svamūrttibhiḥ || 16.30 ||
sāmantaiśca surendro'tha vṛtaḥ paramaharṣitaiḥ |
tāśca labdhvā mahendrastu mudā paramayā yutaḥ || 16.31 ||
cakāra yajñān vividhān sahastrānapi sa prabhuḥ |
kriyamāṇaistato yajñairvavṛdhendrasya tad balam || 16.32 ||
varddhitena balenendro devasainyamuvāca ha |
sannahyantāṃ surāḥ śīghraṃ daityānāṃ vadhakarmaṇi || 16.33 ||
evamuktāstato devāḥ sannaddhāstatkṣaṇe'bhavan |
asurāṇāmabhāvāya jagmurdevāḥ savāsavāḥ || 16.34 ||
gatvā tu yuyudhustūrṇaṃ vijigyustvāsurīṃ camūm |
jitāśca devairasurā hataśeṣā dharādhare |
mamajjuḥ sāgarajale bhayatrastā vicetasaḥ || 16.35 ||
devarājo'pi tridivaṃ lokapālaiḥ samaṃ dhare |
āruhya bubhuje prāgvat sa devo devarāṭ prabhuḥ || 16.36 ||
ya enaṃ śrṛṇuyānnityaṃ saramākhyānamuttamam |
sa gomedhasya yajñasya phalaṃ prāpnoti mānavaḥ || 16.37 ||
bhraṣṭarājyaśca yo rājā śrṛṇotīdaṃ samāhitaḥ |
sa devendra iva svargaṃ rājyaṃ svaṃ labhate naraḥ || 16.38 ||
|| iti śrīvarāhapurāṇe bhagavacchātre ṣoḍaśo'dhyāyaḥ || 16 ||
dharaṇyuvāca |
ye te maṇau tadā deva utpannā narapuṃgavāḥ |
teṣāṃ varo bhagavatā dattastretāyuge kila || 17.1 ||
rājāno bhavitāro vai kathaṃ teṣāṃ samudbhavaḥ |
kiṃ ca cakrurhi te karma pṛthaṅ nāmāni śaṃsa me || 17.2 ||
śrīvarāha uvāca |
suprabho maṇijo yastu rājā nāmnā mahāmanāḥ |
tasyotpattiṃ varārohe śrṛṇu tvaṃ bhūtadhāriṇi || 17.3 ||
āsīd rājā mahābāhurādau kṛtayuge purā |
śrutakīrtiriti khyātastrailokye balavattaraḥ || 17.4 ||
tasya putratvamāpede suprabho maṇijo dhare |
prajāpāleti vai nāmnā śrutakīrtirmahābalaḥ || 17.5 ||
saikasmiṃścid dine prāyād vipinaṃ śvāpadākum |
tatrāpaśyadṛṣerdhanyaṃ mahadāśramamaṇḍalam || 17.6 ||
tasmin mahātapā nāma ṛṣiḥ paradhārmikaḥ |
tapastepe nirāhāro japan brahma sanātanam || 17.7 ||
tatrāsau pārthivaḥ śrīmān praveśāya matiṃ tadā |
cakāra cāviśad rājā prajāpālo mahātapāḥ || 17.8 ||
tasmin varāśramapade vanavṛkṣajātyā
dharāprasūtorjitamārgajuṣṭāḥ |
latāgṛhā induraviprakāśino
nāyāsitajñāḥ kulabhṛṅgarājāḥ || 17.9 ||
suraktapadmodarakomalāgra-
nakhāṅgulībhiḥ prasṛtaiḥ surāṇām |
varāṅganābhiḥ padapaṅktimuccai-
viṃhāya bhūmiṃ tvapi vṛtraśatroḥ || 17.10 ||
kvacit samīpe tamatīva hṛṣṭai-
rnānādvijaiḥ ṣaṭcṛraṇaiśca mattaiḥ |
vāsadbhiruccairvividhapramāṇāḥ
śākhāḥ supuṣpāḥ samayogayuktāḥ || 17.11 ||
kadambanīpārjjunaśīlaśāla-
latāgṛhasthairmadhurasvareṇa |
juṣṭaṃ vihaṅgaiḥ sujanaprayogā
nirākulā kāryadhṛtiryathāsthaiḥ || 17.12 ||
makhāgnidhūmairuditāgnihomai-
stataḥ samantāt gṛhamedhibhirdvijaiḥ |
siṃhairivādharmmakarī vidāritaḥ
sa tīkṣṇadaṃṣṭrairvaramattakesaraiḥ || 17.13 ||
evaṃ sa rājā vividhānupāyān
varāśrame prekṣamāṇo viveśa |
tasmid praviṣṭe tu sa tīvratejā
mahātapāḥ puṇyakṛtāṃ pradhānaḥ |
dṛṣṭo yathā bhānuranantabhānuḥ
kauśyāsane brahmavidāṃ pradhānaḥ || 17.14 ||
dṛṣṭvā sa rājā vijayī mṛgāṇāṃ
matiṃ visasmāra muneḥ prasaṅgāt |
cakāra dharmaṃ prati mānasaṃ so
anuttamaṃ prāpya nṛpo muniṃ saḥ || 17.15 ||
sa munistaṃ nṛpaṃ dṛṣṭvā prajāpālamakalmaṣam |
abhyāgatakriyāṃ cakre āsanasvāgatādibhiḥ || 17.16 ||
tataḥ kṛtāsano rājā praṇamya ṛṣipuṅgavam |
papraccha vasudhe praśnamimaṃ paramadurlabham || 17.17 ||
bhagavan duḥkhasaṃsāramagnaiḥ pumbhistitīrṣubhiḥ |
yatkāryaṃ tanmamācakṣva praṇate śaṃsitavrata || 17.18 ||
mahātapā uvāca |
saṃsārārṇavamajjamānamanujaiḥ potaḥ sthiro'tidhruvaḥ
kāryaḥ pūjanadānahomavividhairyajñaiḥ samaṃ dhyāyanaiḥ |
kīlaiḥ kīlitamokṣabhiḥ surabhaṭairūrdhvaṃ mahārajjubhiḥ
prāṇādyairadhunā kuruṣva nṛpate potaṃ trilokeśvaram || 17.19 ||
nārāyaṇaṃ narakaharaṃ sureśaṃ
bhaktyā namaskurvati yo nṛpeśa |
sa vītaśokaḥ paramaṃ viśokaṃ
prāpnoti viṣṇoḥ padamavyayaṃ tat || 17.20 ||
nṛpa uvāca |
bhagavan sarvadharmajña kathaṃ viṣṇuḥ sanātanaḥ |
pūjyate mokṣamicchadbhiḥ puruṣairvada tattvataḥ || 17.21 ||
mahātapā uvāca |
śrṛṇu rājan mahāprājña yathā viṣṇuḥ prasīdati |
puruṣāṇāṃ tathā strīṇāṃ sarvayogīśvaro hariḥ || 17.22 ||
sarve devāḥ sapitaro brahmādyāścāṇḍamadhyagāḥ |
viṣṇoḥ sakāśādutpannā itīyaṃ vaidikī śrutiḥ || 17.23 ||
agnistathāśvinau gaurī gajavaktrabhujaṃgamāḥ |
kārtikeyastathādityo mātaro durgayā saha || 17.24 ||
diśo dhanapatirviṣṇuryamo rudraḥ śaśī tathā |
pitaraśceti saṃbhūtāḥ prādhānyena jagatpateḥ || 17.25 ||
hiraṇyagarbhasya tanau sarvaṃ eva samudbhavāḥ |
pṛthakpṛthak tato garvaṃ vahamānāḥ samantataḥ || 17.26 ||
ahaṃ yogyastvahaṃ yājya iti teṣāṃ svano mahān |
śrūyate devasamitau sāgarakṣubdhasannibhaḥ || 17.27 ||
teṣāṃ vivadamānānāṃ vahnirutthāya pārthiva |
uvāca māṃ yajasveti dhyāyadhvaṃ māmiti bruvan || 17.28 ||
prājāpatyamidaṃ nūnaṃ śarīraṃ madvinākṛtam |
vināśamupapadyeta yato nāhaṃ mahānaham || 17.29 ||
evamuktvā śarīraṃ tu tyaktvā vahnirviniryayau |
nirgate'pi tatastasmiṃstaccharīraṃ na śīryate || 17.30 ||
tato'śvinau mūrtimantau prāṇāpānau śarīragau |
āvāṃ pradhānāvityevamūcaturyājyasattamau || 17.31 ||
evamuktvā śarīraṃ tu vihāya kvacidāsthitau |
tayorapi kṣayaṃ kṛtvā kṣetrī tatpuramāsthitaḥ || 17.32 ||
tato vāgabrabīd gaurī prādhānyaṃ mayi saṃsthitam |
sā'pyevamuktvā kṣetrāt tu niścakrāma bahiḥ śubhā || 17.33 ||
tayā vināpi tatkṣetraṃ vāgūnaṃ vyavatiṣṭhata |
tato gaṇapatirvākyamākāśākhyo'bravīt tadā || 17.34 ||
na mayā rahitaṃ kiñciccharīraṃ sthāyi dūrataḥ |
kālāntaretyevamuktvā so'pi niṣkramya dehataḥ || 17.35 ||
pṛthagbhūtastathāpyetaccharīraṃ nāpyanīnaśat |
vinākāśākhyatattvena tathāpi na viśīryate || 17.36 ||
suṣiraistu vihīnaṃ tu dṛṣṭvā kṣetraṃ vyavasthitam |
śarīradhātavaḥ sarve te brūyurvākyameva hi || 17.37 ||
asmābhirvyatiriktasya na śarīrasya dhāraṇam |
bhavatītyevamuktvā te jahuḥ sarve śarīriṇaḥ || 17.38 ||
tairvyapetamapi kṣetraṃ puruṣeṇa prapālyate |
taṃ dṛṣṭvā tvabravīt skandaḥ so'haṃkāraḥ prakīrtitaḥ || 17.39 ||
mayā vinā śarīrasya saṃbhūtirapi neṣyate |
evamuktvā śarīrāt tu so'bhyapetaḥ pṛthak sthitaḥ || 17.40 ||
tenākṣatena tatkṣetraṃ vinā muktavadāsthitam |
taṃ dṛṣṭvā kupito bhānuḥ sa ādityaḥ prakīrtitaḥ || 17.41 ||
mayā vinā kathaṃ kṣetramimaṃ kṣaṇamapīṣyate |
evamuktvā prayātaḥ sa taccharīraṃ na śīryate || 17.42 ||
tataḥ kāmādirutthāya gaṇo mātṛvisaṃjñitaḥ |
na mayā vyatiriktasya śarīrasya vyavasthitiḥ |
evamuktvā sa yātastu śarīraṃ tanna śīryate || 17.43 ||
tato māyā'bravītkopāt sā ca durgā prakīrtitā |
na mayā'sya vinā bhūtirityuktvā'ntardadhe punaḥ || 17.44 ||
tato diśaḥ samuttasthurūcuścedaṃ vaco mahat |
nāsmābhī rahitaṃ kāryaṃ bhavatīti na saṃśayaḥ |
catastra āgatāḥ kāṣṭhā apayātāḥ kṣaṇāt tadā || 17.45 ||
tato dhanapatirvāyurmayyapete kva saṃbhavaḥ |
śarīrasyeti sopyevamuktvā mūrdhānago'bhavat || 17.46 ||
tato viṣṇurmano brūyānnāyaṃ deho mayā vinā |
kṣaṇamapyutsahet sthātumityuktvā'ntardadhe punaḥ || 17.47 ||
tato dharmo'bravīt sarvamidaṃ pālitavānaham |
idānīmapyupagate kathametadbhaviṣyati || 17.48 ||
evamuktvā gato dharmastaccharīraṃ na śīryate |
tatobravīnmahādevaḥ avyakto bhūtanāyakaḥ || 17.49 ||
mahatsaṃjño mayā hīnaṃ śarīraṃ no bhaved yathā |
evamuktvā gataḥ śambhustaccharīraṃ na śīryate || 17.50 ||
taṃ dṛṣṭvā pitaraścocustanmātrā yāvadasmabhiḥ |
pragatairebhiretacca śarīraṃ śīryate dhruvam |
evamuktvā tu te dehaṃ tyaktvā'ntarddhānamāgatāḥ || 17.51 ||
agniḥ prāṇo apānaśca ākāśaṃ sarvadhātavaḥ |
kṣetraṃ tadvadahaṃkāro bhānuḥ kāmādayo mayā |
kāṣṭhā vāyurviṣṇurdharma śambhustathendriyārthakāḥ || 17.52 ||
etairmuktaṃ tu tatkṣetraṃ tat tathaiva vyavasthitam |
somena pālyamānaṃ tu puruṣeṇendurūpiṇā || 17.53 ||
evaṃ vyavasthite some ṣoḍaśātmanyathākṣare |
prāgvat tatra guṇopetaṃ kṣetramutthāya babhrama || 17.54 ||
prāgavasthaṃ śarīraṃ tu dṛṣṭvā sarvajñapālitam |
tāḥ kṣetradevatāḥ sarvā vailakṣaṃ bhāvamāśritāḥ || 17.55 ||
tamevaṃ tuṣṭuvuḥ sarvāstaṃ devaṃ parameśvaram |
svasthānamīyiṣuḥ sarvāstadā nṛpatisattama || 17.56 ||
tvamagnistvaṃ tathā prāṇastvamapānaḥ sarasvatī |
tvamākāśaṃ dhanādhyakṣastvaṃ śarīrasya dhātavaḥ || 17.57 ||
ahaṃkāro bhavān deva tvamādityo'ṣṭako gaṇaḥ |
tvaṃ māyā pṛthivī durgā tvaṃ diśastvaṃ marutpatiḥ || 17.58 ||
tvaṃ viṣṇustvaṃ tathā dharmastvaṃ jiṣṇustvaṃ parājitaḥ |
akṣarārthasvarūpeṇa parameśvarasaṃjñitaḥ || 17.59 ||
asmābhirapayātaistu kathametadbhaviṣyati |
evamatra śarīraṃ tu tyaktamasmābhireva ca || 17.60 ||
tat paraṃ bhavatā deva tadavasthaṃ prapālyate |
sthānabhaṅgo na naḥ kāryaḥ svayaṃ sṛṣṭvā prajāpate || 17.61 ||
evaṃ stutastato devasteṣāṃ toṣaṃ paraṃ yayau |
uvāca caitān krīḍārthaṃ bhavantotpāditā mayā || 17.62 ||
kṛtakṛtyasya me kiṃ nu bhavadbhirviprayojanam |
tathāpi dadmi vo rūpe dve dve pratyekaśo'dhunā || 17.63 ||
bhūtakāryeṣvamūrtena devaloke tu mūrtinā |
tiṣṭhadhvamapi kālānte layaṃ tvāviśata drutam || 17.64 ||
śarīrāṇi punarnaivaṃ karttavyo'hamiti kvacit |
mūrttīnāṃ ca tathā tubhyaṃ dadmi nāmāni vo'dhunā || 17.65 ||
agnervaiśvānaro nāma prāṇāpānau tathāśvinau |
bhaviṣyati tathā gaurī himaśailasutā tathā || 17.66 ||
pṛthivyādigaṇastveṣa gajavaktro bhaviṣyati |
śarīradhātavaśceme nānābhūtāni eva tu |
ahaṃkārastathā skandaḥ kārttikeyo bhaviṣyati || 17.67 ||
bhānuścādityarūpo'sau mūrttāmūrtta ca cakṣuṣī |
kāmādyo'yaṃ gaṇo bhūyo mātṛrūpo bhaviṣyati || 17.68 ||
śarīramāyā durgaiṣā kāraṇānte bhaviṣyati |
daśa kanyā bhaviṣyanti kāṣṭhāstvetāstu vāruṇāḥ || 17.69 ||
ayaṃ vāyurdhaneśastu kāraṇānte bhaviṣyati |
ayaṃ mano viṣṇunāmā bhaviṣyati na saṃśayaḥ || 17.70 ||
dharmo'pi yamanāmā ca bhaviṣyati na saṃśayaḥ |
mahattattvaṃ ca bhagavān mahādevo bhaviṣyati || 17.71 ||
indriyārthāśca pitaro bhaviṣyanti na saṃśayaḥ |
ayaṃ somaḥ svayaṃ bhūtvā yāmitraṃ sarvadāmarāḥ || 17.72 ||
evaṃ vedāntapuruṣaḥ prokto nārāyaṇātmakaḥ |
svasthāne devatāḥ sarvā devastu virarāma ha || 17.73 ||
evaṃ prabhāvo devo'sau vedavedyo janārdanaḥ |
kathito nṛpate tubhyaṃ kimanyacchrotumicchasi || 17.74 ||
|| iti śrīvarāhapurāṇe bhagavacchāstre saptadaśo'dhyāyaḥ || 17 ||
prajāpāla uvāca |
kathamagneḥ samutpattiraśvinorvā mahāmune |
gauryā gaṇapatervā'pi nāgānāṃ vā guhasya ca || 18.1 ||
ādityacandramātṝṇāṃ durgāyā vā diśāṃ tathā |
dhanadasya ca viṣṇorvā dharmasya parameṣṭhinaḥ || 18.2 ||
śambhorvāpi pitṝṇāṃ ca tathā candramaso mune |
śarīradevatā hyetāḥ kathaṃ mūrttitvamāgatāḥ || 18.3 ||
kiṃ ca tāsāṃ mune bhojyaṃ kā vā saṃjñā tithiśca kā |
yasyāṃ yaṣṭāstvamī puṃsāṃ phalaṃ yacchantyanāmayam |
etanme sarahasyaṃ tu mune tvaṃ vaktumarhasi || 18.4 ||
mahātapā uvāca |
yogasādhyaḥ svarūpeṇa ātmā nārāyaṇātmakaḥ |
sarvajñaḥ krīḍatastasya bhogecchā cātmanātmani |
kṣobhite'bhūnmahābhūte etacchabdaṃ tadadbhutam || 18.5 ||
tamapyaprītimattoyaṃ vikāraṃ samarocayat |
vikurvatastasya tadā mahānagniḥ samutthitaḥ |
koṭijvālāparīvāraḥ śabdavān dahanātmakaḥ || 18.6 ||
asāvapyatitejasvī vikāraṃ samarocayat |
vikurvato babhau vahnervāyuḥ paramadāruṇaḥ |
tasmādapi vikārasthādākāśaṃ samapadyata || 18.7 ||
tacchabdalakṣaṇaṃ vyoma sa ca vāyuḥ pratāpavān |
tacca tejo'mbhasā yuktaṃ śliṣṭamanyonyatastadā || 18.8 ||
tejasā śoṣitaṃ toyaṃ vāyunā ugragāminā |
bādhitena tathā vyomnā mārge datte tu tatkṣaṇāt || 18.9 ||
piṇḍībhūtaṃ tathā sarvaṃ kāṭhinyaṃ samapadyata |
seyaṃ pṛthvī mahābhāga teṣāṃ vṛddhatarā'bhavat || 18.10 ||
caturṇāṃ yogakāṭhinyādekaikaguṇavṛddhitaḥ |
pṛthvī pañcaguṇā jñeyā te'pyetasyāṃ vyavasthitāḥ || 18.11 ||
sa ca kāṭhinyakaṃ kurvan brahmāṇḍaṃ samapadyata |
tasmin nārāyaṇo devaścaturmūrtiścaturbhujaḥ || 18.12 ||
prājāpatyena rūpeṇa sisṛkṣurvividhāḥ prajāḥ |
cintayan nādhigaccheta sṛṣṭiṃ lokapitāmahaḥ || 18.13 ||
tato'sya sumahān kopo jajñe paramadāruṇaḥ |
tasmāt kopāt sahastrārciruttasthau dahanātmakaḥ || 18.14 ||
sa taṃ didhakṣurbrahmāṇaṃ brahmaṇoktastadā nṛpa |
havyaṃ kavyaṃ vahasveti tato'sau havyavāhanaḥ || 18.15 ||
brahmāṇaṃ kṣudhitaḥ prāyāt kiṃ karomi prasādhi mām |
sa brahmā pratyuvācātha tridhā tṛptimavāpsyasi || 18.16 ||
dattāsu dakṣiṇāsvādau tṛptirbhūtvā yato'marān |
nayase dakṣiṇābhāgaṃ dakṣiṇāgnistato'bhavat || 18.17 ||
ā samantāddhutaṃ kiṃcid yat triloke vibhāvaso |
tad vahasva surārthāya tatastvaṃ havyavāhanaḥ || 18.18 ||
gṛhaṃ śarīramityuktaṃ tatpatistvaṃ yato'dhunā |
ato vai gārhapatyastvaṃ bhava sarvagato vibho || 18.19 ||
viśvān narān huto yena nayase sadgatiṃ prabho |
ato vaiśvānaro nāma tava vākyaṃ bhaviṣyati || 18.20 ||
draviṇaṃ balamityuktaṃ dhanaṃ ca draviṇaṃ yataḥ |
dadāti tad bhavāneva draviṇodāstato'bhavat || 18.21 ||
tanuṃ pāsyatanuṃ pāsi yena tvaṃ sarvadā vibho |
tatastanūnapānnāma tava vatsa bhaviṣyati || 18.22 ||
bhavān jātāni vai veda ajātāni ca yena vai |
ataste nāma bhavatu jātavedā iti prabho || 18.23 ||
nārāḥ sāmānyataḥ puṃso viśeṣeṇa dvijātayaḥ |
te śaṃsanti yatastvāṃ tu nārāśaṃsastato bhava || 18.24 ||
agas tirobhavennityaṃ niḥśabdo niścayātmakaḥ |
agastvaṃ sarvagatvācca tenāgnistvaṃ bhaviṣyasi || 18.25 ||
dhmā prapūraṇaśabdo ya idhmā nāma prakīrtyate |
pūritasyāgatiryena tenedhmastvaṃ bhaviṣyasi || 18.26 ||
yājyānyetāni nāmāni tava putra mahāmakhe |
yajantastvāṃ narāḥ kāmaistarpayiṣyantyasaṃśayam || 18.27 ||
|| iti śrīvarāhapurāṇe bhagavacchāstre aṣṭādaśo'dhyāyaḥ || 18 ||
mahātapā uvāca |
viṣṇorvibhūtimāhātmyaṃ kathitaṃ te prasaṅgataḥ |
tithīnāṃ śrṛṇu māhātmyaṃ kathyamānaṃ mayā nṛpa || 19.1 ||
itthaṃbhūto mahānagnirbrahmakrodhodbhavo mahān |
uvāca devaṃ brahmāṇaṃ tithirme dīyatāṃ vibho |
yasyāmahaṃ samastasya jagataḥ khyātimāpnuyām || 19.2 ||
brahmovāca |
devānāmatha yakṣāṇāṃ gandharvāṇāṃ ca sattama |
ādau pratipadā yena tvamutpanno'si pāvaka || 19.3 ||
tvatpadāt pratipadaṃ cānyā saṃbhaviṣyanti devatāḥ |
ataste pratipannāma tithireṣā bhaviṣyati || 19.4 ||
tasyāṃ tithau haviṣyeṇa prājāpatyena mūrtinā |
hoṣyanti teṣāṃ prītāḥ syuḥ pitaraḥ sarvadevatāḥ || 19.5 ||
caturvidhāni bhūtāni manuṣyāḥ paśavo'surāḥ |
devāḥ sarve sagandharvāḥ prītāḥ syustarpite tvayi || 19.6 ||
yaścopavāsaṃ kurvīta tvadbhaktaḥ pratipaddine |
kṣīrāśano vā vartteta śrṛṇu tasya phalaṃ mahat || 19.7 ||
caturyugāni ṣaṭtriṃśat svarloke'sau mahīyate |
tejasvī rūpasaṃpanno dravyavān jāyate naraḥ || 19.8 ||
iha janmanyasau rājā pretya svarge mahīyate |
tūṣṇīṃ babhūva sopyagnirbrahmadattāśrayaṃ yayau || 19.9 ||
ya idaṃ śrṛṇuyānnityaṃ prātarutthāya mānavaḥ |
agnerjanma sa pāpebhyo mucyate nātra saṃśayaḥ || 19.10 ||
|| iti śrīvarāhapurāṇe bhagavacchāstre ekonaviṃśo'dhyāyaḥ || 19 ||
prajāpāla uvāca |
evamagneḥ samutpattirjātā brahman mahātmanaḥ |
prāṇāpānau kathaṃ devāvaśvinau saṃbabhūvatuḥ || 20.1 ||
marīcirbrahmaṇaḥ putraḥ svayaṃ brahmā dvisaptabhiḥ |
rūpairvyavasthitasteṣāṃ marīciḥ śreṣṭhatāmagāt || 20.2 ||
tasya putro mahātejāḥ kaśyapo nāma vai muniḥ |
svayaṃ prajāpatiḥ śrīmān devatānāṃ pitā'bhavat || 20.3 ||
tasya putrā babhūvurhi ādityā dvādaśa prabho |
adityapatyāni te sarve ādityāstena kīrtitāḥ || 20.4 ||
teṣāṃ madhye mahātejā mārttaṇḍo lokaviśrutaḥ |
nārāyaṇātmakaṃ tejo dvādaśaṃ saṃprakīrtitam || 20.5 ||
ye te māsāsta ādityāḥ svayaṃ saṃvatsaro hariḥ |
evaṃ te dvādaśādityā mārttaṇḍaśca pradhānavān || 20.6 ||
tasya tvaṣṭā dadau kanyāṃ saṃjñāṃ nāma mahāprabhām |
tasyāpatyadvayaṃ jajñe yamaśca yamunā tathā || 20.7 ||
tasya tejo'pyasahatī babhūvāśvī manojavā |
svāṃ chāyāṃ tatra saṃsthāpya sā jagamottarān kurūn || 20.8 ||
tadrūpāṃ tāṃ savarṇāṃ tu bheje mārttaṇḍabhāskaraḥ |
tasyā api dvayaṃ jajñe śaniṃ tapatimeva ca || 20.9 ||
yadā tvasadṛśaṃ bheje putrān prati narottama |
saṃjñāṃ provāca bhagavān krodhasaṃraktalocanaḥ |
asamatvaṃ na karttavyaṃ sveṣvapatyeṣu bhāmini || 20.10 ||
evamuktā yadā sā tu asamatvaṃ vyarocata |
tadā yamaḥ svapitaraṃ provāca bhṛśaduḥkhitaḥ || 20.11 ||
neyaṃ mātā bhavet tāta asmākaṃ śatruvat sadā |
sapatnīva vṛthācārā svesvapatyeṣu vatsalā || 20.12 ||
evaṃ yamavacaḥ śrutvā sā chāyā krodhamūrcchitā |
śaśāpa pretarājastvaṃ bhaviṣyasyacirādiva || 20.13 ||
evaṃ śrutvā'tha mārttaṇḍastadā putrahitaiṣayā |
uvāca madhyavartī tvaṃ bhavitā dharmapāpayoḥ |
lokapālaśca bhavitā tvaṃ putra divi śobhase || 20.14 ||
śaniṃ śaśāpa mārttaṇḍaśchāyākopapradharṣitaḥ |
tvaṃ krūradṛṣṭirbhavitā mātṛdoṣeṇa putraka || 20.15 ||
evamuktvā samutthāya yogaṃ bhānurdidṛkṣayā |
tāmapaśyattvasau sāśvī uttareṣu kuruṣvatha || 20.16 ||
tato'śvarūpaṃ kṛtvā sa gatvā tatrottarān kurūn |
prājāpatyena mārgeṇa yuyojātmānamātmanā || 20.17 ||
tasyāṃ tvāṣṭryāmaśvarūpyāṃ mārttaṇḍastīvratejasaḥ |
bījaṃ nirvāpayāmāsa tajjvalantaṃ dvidhā'patat || 20.18 ||
tatra prāṇastvapānaśca yonau cātmajitau purā |
varadānena ca punarmūrttimantau babhūvatuḥ || 20.19 ||
tau tvāṣṭryāmaśvarūpiṇyāṃ jātau yena narottamau |
tatastāvaśvinau devau kīrttyete ravinandanau || 20.20 ||
prajāpatiḥ svayaṃ bhānustvāṣṭrī śaktiḥ parāparā |
tasyāḥ prāgvaccharīrasthāvamūrttau mūrtimāśritau || 20.21 ||
tatastāvaśvinau devau mārttaṇḍamupatasthatuḥ |
ūcatuḥ svaruciṃ tāvat kiṃ karttavyamathāvayoḥ || 20.22 ||
mārttaṇḍa uvāca |
putrau prajāpatiṃ devaṃ bhaktyārādhayatāṃ varam |
nārāyaṇaṃ sa vo dātā varaṃ nūnaṃ bhaviṣyati || 20.23 ||
evaṃ tāvaśvinau proktau mārttaṇḍena mahātmanā |
tepatustīvratapasau tapaḥ paramaduścaram |
brahmapāramayaṃ stotraṃ japantau tu samāhitau || 20.24 ||
tayoḥ kālena mahatā brahmā nārāyaṇātmakaḥ |
tutoṣa paramaprītyā varaṃ caitaṃ dadau tayoḥ || 20.25 ||
prajāpāla uvāca |
aśvibhyāmīritaṃ stotraṃ brahmaṇo'vyaktajanmanaḥ |
śrotumicchāmyahaṃ brahmaṃstvatprasādānmahāmune || 20.26 ||
mahātapā uvāca |
śrṛṇu rājan yathā stotramaśvibhyāṃ brahmaṇaḥ kṛtam |
īdṛśaṃ ca phalaṃ prāptaṃ tayoḥ stotrasya cānagha || 20.27 ||
oṃnamaste niṣkriya niṣprapañca nirāśraya nirapekṣa nirālamba
nirguṇa nirāloka nirādhāra nirjaya nirākāra |
brahman mahābrahman brāhmaṇapriya puruṣa mahāpuruṣottama |
deva mahādevottama sthāṇo sthitasthāpaka |
bhūta mahābhūta bhūtādhipati yakṣa mahāyakṣa yakṣādhipate |
guhya mahāguhyādhipate saumya mahāsaumya saumyādhipate |
pakṣi mahāpakṣipate daitya mahādaityādhipate |
rudra mahārudrādhipate viṣṇu mahāviṣṇupate |
parameśvara nārāyaṇa prajāpataye namaḥ |
evaṃ stutastadā tābhyāmaśvibhyāṃ sa prajāpatiḥ |
tutoṣa paramaprītyā vākyaṃ cedamuvāca ha || 20.28 ||
varaṃ varayatāṃ śīghraṃ devaiḥ paramadurlabham |
yena me varadānena caratastridivaṃ sukham || 20.29 ||
aśvināvūcatuḥ |
āvayoryajñabhāgaṃ tu dehi deva prajāpate |
somapatvaṃ ca devānāṃ sāmānyatvaṃ ca śāśvatam || 20.30 ||
brahmovāca |
rūpaṃ kāntiranaupamyaṃ bhiṣaktvaṃ sarvavastuṣu |
somapatvaṃ ca lokeṣu sarvametad bhaviṣyati || 20.31 ||
etat sarvaṃ dvitīyāyāmaśvibhyāṃ brahmaṇā purā |
dattaṃ yasmādatasteṣāṃ tithīnāmuttamā tithiḥ || 20.32 ||
etasyāṃ rūpakāmastu puṣpāhāro bhavennaraḥ |
saṃvatsaraṃ śucirnityaṃ susvarūpī bhavennaraḥ |
aśvibhyāṃ ye guṇāḥ proktāste tasyāpi bhavanti ca || 20.33 ||
ya idaṃ śrṛṇuyānnityamaśvibhyāṃ janma cottamam |
sarvapāpavinirmuktaḥ putravān jāyate naraḥ || 20.34 ||
|| iti śrīvarāhapurāṇe bhagavacchāstre viṃśo'dhyāyaḥ || 20 ||
mahātapā uvāca |
pūrvaṃ prajāpatirdevaḥ sisṛkṣurvividhāḥ prajāḥ |
cintayāmāsa dharmātmā yadā tā nādhyagacchata || 21.2 ||
tadā'sya kopāt saṃjajñe sa ca rudraḥ pratāpavān |
rodanāt tasya rudratvaṃ saṃjātaṃ parameṣṭhinaḥ || 21.3 ||
tasya brahmā śubhāṃ kanyāṃ bhāryārthaṃ mūrttisaṃbhavām |
gaurī nāmnā svayaṃ devī bhāratī tāṃ dadau pitā || 21.4 ||
rudrāyāmitadehāya svayaṃ brahmā prajāpatiḥ |
sa tāṃ labdhvā varārohāṃ mudā paramayā yutaḥ || 21.5 ||
sargakāleṣu taṃ brahmā tapasā pratyuvāca ha |
rudra prajāḥ sṛjasveti paunaḥpunyena coditaḥ |
asamartho'hamiti jale nimajjata mahābalaḥ || 21.6 ||
taporthitvaṃ tapohīnaḥ straṣṭuṃ śaknoti na prajāḥ |
evaṃ cintya jale magnastato rudraḥ pratāpavān || 21.7 ||
tasmin nimagne deveśe tāṃ brahmā kanyakāṃ punaḥ |
antaḥśarīragāṃ kṛtvā gaurīṃ paramaśobhanām || 21.8 ||
punaḥ sisṛkṣurbhagavānasṛjat sapta mānasān |
dakṣaṃ ca teṣāmārabhya prajāḥ samyag vyavarddhitāḥ || 21.9 ||
tatra dākṣāyaṇīputrāḥ sarve devāḥ savāsavāḥ |
vasavo'ṣṭau ca rudrāśca ādityā marutastathā || 21.10 ||
sā'pi dakṣāya suśroṇī gaurī dattātha brahmaṇā |
duhitṛtve purā yā hi rudreṇoḍhā mahātmanā || 21.11 ||
sā ca dākṣāyaṇī devī punarbhūtā nṛpottama |
tato dakṣaḥ prahṛṣṭātmā dauhitrān svān sa vṛddhikṛt |
dṛṣṭvā yajñamathārebhe prīṇanāya prajāpatiḥ || 21.12 ||
tatra brahmasutāḥ sarve marīcyādaya eva ca |
cakrurārttvijyakaṃ karmma sve sve mārge vyavasthitāḥ || 21.13 ||
brahmā svayaṃ marīcyastu babhūvā'nye tathāpare |
atristu yajñakarmastha āgnīdhrastvaṅgirā bhavat || 21.14 ||
hotā pulastyastvabhavadudgātā pulaho'bhavat |
kratau kratustu prastotā tadā yajñe mahātapāḥ || 21.15 ||
pratihartā pracetāstu tasmin kratuvare babhau |
subrahmaṇyo vasiṣṭhastu sanakādyāḥ sabhāsadaḥ |
tatra yājyaḥ svayaṃ brahmā sa ca ijyastu pūjyate || 21.16 ||
pūjyā dakṣasya dauhitrā rudrādityāṅgirādayaḥ |
pratyakṣapitaraste hi taiḥ prītaiḥ prīyate jagat || 21.17 ||
tatra bhāgārthino devā ādityā vasavastathā |
viśvedevāḥ sapitaro gandharvādyā marudgaṇāḥ || 21.18 ||
jagṛhuryajñabhāgān svān yāvat te haviṣorpitān |
tāvatkālaṃ jalāt sadya uttasthau brahmaṇaḥ punaḥ || 21.19 ||
rudraḥ kopodbhavo yastu pūrvaṃ magno mahājale |
sa sahastrārkasaṃkāśo niścakrāma jalāt tataḥ || 21.20 ||
sarvajñānamayo devaḥ sarvadevamayo'malaḥ |
pratyakṣadarśī sarvasya jagatastapasā babhau || 21.21 ||
tasmiṃstu kāle pañcānāṃ jātaḥ sargo narottama |
divyānāṃ pṛthivīsthānāṃ caturṇāmarajātinām || 21.22 ||
raudrasargasya saṃbhūtistadā sadyo'pi jāyate |
idānīṃ rudrasargaṃ tvaṃ śrṛṇu pārthivasattama || 21.23 ||
daśavarṣasahastrāṇi tapaścīrtvā mahajjale |
pratibuddho yadā rudrastadā corvoṃ sakānanām |
dṛṣṭvā sasyavatīṃ ramyāṃ manuṣyapaśusaṃkulām || 21.24 ||
śuśrāva ca tadā śabdānṛtvijāṃ dakṣasadmani |
āśrame yajñināṃ coccairyogasthairiti kīrttitam || 21.25 ||
tataḥ śrutvā mahātejāḥ sarvajñaḥ parameśvaraḥ |
cukopa subhṛśaṃ devo vākyaṃ cedamuvāca ha || 21.26 ||
ahaṃ pūrvaṃ tu kavinā sṛṣṭaḥ sarvātmanā vibhuḥ |
prajāḥ sṛjasveti tadā vākyametat tathoktavān || 21.27 ||
idānīṃ kena tatkarma kṛtaṃ sṛṣṭyādivarṇanam |
evamuktvā bhṛśaṃ kopānnanāda parameśvaraḥ || 21.28 ||
tasya nānadato jvālāḥ śrotrebhyo niryayustadā |
tatra bhūtāni vetālā ucchruṣmāḥ pretapūtanāḥ || 21.29 ||
kūṣmāṇḍā yātudhānāśca sarve prajvalitānanāḥ |
uttasthuḥ koṭiśastatra nānāpraharaṇāvṛtāḥ || 21.30 ||
te dṛṣṭvā bhūtasaṃghātā vividhāyudhapāṇayaḥ |
sasarja vedavidyāṅgaṃ rathaṃ paramaśobhanam || 21.31 ||
tasminnṛgādayastvaśvāstritattvaṃ ca triveṇukam |
tripūjakaṃ triṣavaṇaṃ dharmākṣaṃ mārutadhvanim || 21.32 ||
ahorātre patāke dve dharmādharme tu daṇḍake |
śakaṭaṃ sarvavidyāśca svayaṃ brahmādisārathiḥ || 21.33 ||
gāyatrī ca dhanustasya oṅkāro guṇa eva ca |
svarāḥ sapta śarāstasya devadevasya suvrata || 21.34 ||
evaṃ kṛtvā sa sāmagrīṃ devadevaḥ pratāpavān |
jagāma dakṣayajñāya kopād rudraḥ pratāpavān || 21.35 ||
gacchatastasya devasya ambarāṅgirasaṃ nayat |
ṛtvijāṃ mantranicayo naṣṭo rudrāgame tadā || 21.36 ||
viparītamidaṃ dṛṣṭvā tadā sarve ca ṛtvijaḥ |
ūcuḥ saṃnahyatāṃ devā mahad vo bhayamāgatam || 21.37 ||
kaścidāyāti balavānasuro brahmanirmitaḥ |
yajñabhāgārthametasmin kratau paramadurlabham || 21.38 ||
evamuktāstato devā ūcurmātāmahaṃ tadā |
dakṣa tāta kimatrāsmatkāryaṃ brūhi vivakṣitam || 21.39 ||
dakṣa uvāca |
gṛhyantāṃ drutamastrāṇi saṃgrāmo'tra vidhīyatām |
evamukte tadā devairvividhāyudhadhāribhiḥ |
rudrasyānucaraiḥ sārdhaṃ mahadyuddhaṃ pravartitam || 21.40 ||
tatra vetālabhūtāni kūṣmāṇḍā grahapūtanāḥ |
yuyudhurlokapālaiśca nānāśastradharāṇi ca || 21.41 ||
devā raudrāṇi bhūtāni nirasanto yamālayam |
cikṣipuḥ sāyakān ghorānasīṃśca saparaśvadhān || 21.42 ||
bhūtānyapi mṛdhe dhorāṇyulmukairasthibhiḥ śaraiḥ |
jagmurdevān mṛdhe roṣād rudrasya purato balāt || 21.43 ||
tatastasmin mahāraudre saṃgrāme bhīmarūpiṇi |
rudro bhagasya netre tu bibhedaikeṣuṇā mṛdhe || 21.44 ||
rudrasya śarapātena naṣṭanetraṃ bhagaṃ tadā |
dṛṣṭvā'sya krodhāt tejasvī pūṣā rudramayodhayat || 21.45 ||
sṛjantamiṣujālāni pūṣaṇaṃ tu mahāmṛdhe |
dṛṣṭvā rudro'sya dantāṃstu cakarṣaṃ paravīrahā || 21.46 ||
tasya dantāṃstadā dṛṣṭvā pūṣṇo rudreṇa pātitān |
dudruvuḥ vasavo dikṣu rudrāstvekādaśa drutam || 21.47 ||
tān bhagnān sahasā dikṣu dṛṣṭvā viṣṇuḥ pratāpavān |
ādityāvarajo vākyamuvāca svabalaṃ tadā || 21.48 ||
kva yāta pauruṣaṃ tyaktvā darpaṃ māhātmyameva ca |
vyavasāyaṃ kulaṃ bhūtiṃ kathaṃ na smaryate drutam || 21.49 ||
parameṣṭhiguṇairyukto laghuvadbhītitaḥ purā |
namaskaṃ kurute moghaṃ pṛthivyāṃ padmajaḥ svayam || 21.50 ||
evamuktvā garutmantamāruroha haristadā |
śaṅkhacakragadāpāṇiḥ pītavāsā janārdanaḥ || 21.51 ||
tato hariharaṃ yuddhamabhavallomaharṣaṇam |
rudraḥ pāśupatāstreṇa vivyādha harimojasā |
harirnārāyaṇāstreṇa rudraṃ vivyādha kopavān || 21.52 ||
nārāyaṇaṃ pāśupatamubhe'stre vyomni roṣite |
yuyudhāte bhṛśaṃ divyaṃ parasparajighāṃsayā |
divyaṃ varṣasahastraṃ tu tayoryuddhamabhūt tadā || 21.53 ||
tatraikaṃ mukuṭodbaddhaṃ mūrddhanyaṃ jaṭajālakam |
ekaṃ pradhmāpayacchaṅkhamanyaḍumarukaṃ śubham || 21.54 ||
ekaṃ khaṅgakaraṃ tatra tathā'nyaṃ daṇḍadhāriṇam |
ekaṃ kaustubhadīptāṅgamanyaṃ bhūtivibhūṣitam || 21.55 ||
ekaṃ gadāṃ bhrāmayati dvitīyaṃ daṇḍameva ca |
ekaṃ śobhati kaṇṭhasthairmaṇibhistvasthibhiḥ param |
ekaṃ pītāmbaraṃ tatra dvitīyaṃ sarpamekhalam || 21.56 ||
evaṃ tau sparddhināvastrau raudranārāyaṇātmakau |
anyo'nyātiśayopetau tadālokya pitāmahaḥ || 21.57 ||
uvāca śāmyatāmastrau svasvabhāvena suvratau |
evaṃ te brahmaṇā coktau śāntabhāvaṃ prajagmatuḥ || 21.58 ||
tathā viṣṇuharau brahmā vākyametaduvāca ha |
ubhau hariharau devau loke khyātiṃ gamiṣyathaḥ || 21.59 ||
ayaṃ ca yajño vidhvastaḥ saṃpūrṇatvaṃ gamiṣyati |
dakṣasya khyātimā~llokaḥ saṃtatyā'yaṃ bhaviṣyati || 21.60 ||
evamuktvā hariharau tadā lokapitāmahaḥ |
brahmā lokānuvācedaṃ rudrabhāgo'sya dīyatām || 21.61 ||
rudrabhāgo jyeṣṭhabhāga itīyaṃ vaidikī śrutiḥ |
stutiṃ ca devāḥ kuruta rudrasya parameṣṭhi naḥ || 21.62 ||
bhaganetraharaṃ devaṃ pūṣṇo dantavināśanam |
stutiṃ kurutamā śīghraṃ gītairetaistu nāmabhiḥ |
yenāyaṃ vaḥ prasannātmā varadatvaṃ bhajeta ha || 21.63 ||
evamuktāstu te devāḥ stotraṃ śaṃbhormahātmanaḥ |
cakruḥ paramayā bhaktyā namaskṛtya svayaṃbhuve || 21.64 ||
devā ūcuḥ |
namo viṣamanetrāya namaste tryambakāya ca |
namaḥ sahastranetrāya namaste śūlapāṇaye || 21.65 ||
namaḥ khaṭvāṅgahastāya namo daṇḍabhṛte kare |
tvaṃ deva hutabhugjvālākoṭibhānusamaprabhaḥ || 21.66 ||
adarśane'nayad deva mūḍhavijñānato'dhunā |
kṛtamasmābhireveśa tadatra kṣamyatāṃ prabho || 21.67 ||
namastrinetrārttiharāya śaṃbho
triśūlapāṇe vikṛtāsyarūpa |
samastadeveśvara śuddhabhāva
prasīda rudrācyuta sarvabhāva || 21.68 ||
pūṣṇo'sya dantāntaka bhīmarūpa
pralambabhogīndralulantakaṇṭha |
viśāladehācyuta nīlakaṇṭha
prasīda viśveśvara viśvamūrtte || 21.69 ||
bhagākṣisaṃsphoṭanadakṣakarmā
gṛhāṇa bhāgaṃ makhataḥ pradhānam |
prasīda deveśvara nīlakaṇṭha
prapāhi naḥ sarvaguṇopapanna || 21.70 ||
sitāṅgarāgāpratipannamūrtte
kapāladhāriṃstripuraghna deva |
prapāhi naḥ sarvabhayeṣu caiva
umāpate puṣkaranālajanma || 21.71 ||
paśyāma te dehagatān sureśa
sargādayo vedavarānananta |
sāṅgān savidyān sapadakramāṃśca
sarvān nilīnāṃstvayi devadeva || 21.72 ||
bhava śarva mahādeva pinākin rudra te hara |
natāḥ sma sarve viśveśa trāhi naḥ parameśvara || 21.73 ||
itthaṃ stutastadā devairdevadevo maheśvaraḥ |
tutoṣa sarvadevānāṃ vākyaṃ cedamuvāca ha || 21.74 ||
rudra uvāca |
bhagasya netraṃ bhavatu pūṣṇo dantāstathā makhaḥ |
dakṣasyācchidratāṃ yātu yajñaścāpyaditeḥ sutāḥ |
paśubhāvaṃ tathā cāpi apaneṣyāmi vo surāḥ || 21.75 ||
maddarśanena yo jātaḥ paśubhāvo divaukasām |
sa mayā'pahṛtaḥ sadyaḥ patitvaṃ vo bhaviṣyati || 21.76 ||
ahaṃ ca sarvavidyānāṃ patirādyaḥ sanātanaḥ |
ahaṃ vai patibhāvena paśumadhye vyavasthitaḥ || 21.77 ||
ataḥ paśupatirnāma mama loke bhaviṣyati |
ye māṃ yajanti teṣāṃ syād dīkṣā pāśupatī bhavet || 21.78 ||
evamukte'tha rudreṇa brahmā lokapitāmahaḥ |
uvāca rudraṃ sasnehaṃ smitapūrvamidaṃ vacaḥ || 21.79 ||
dhruvaṃ pāśupatirdeva tvaṃ loke khyātimesyati |
ayaṃ ca devastvannāmnā loke khyātiṃ gamiṣyati |
ārādhyaśca samastānāṃ devādīnāṃ gamiṣyasi || 21.80 ||
evamuktvā tadā brahmā dakṣaṃ provāca buddhimān |
gaurīṃ prayaccha rudrāya pūrvamevopapāditām || 21.81 ||
evamuktvā tadā dakṣastāṃ kanyāṃ brahmasannidhau |
dadau rudrāya mahate gaurīṃ paramaśobhanām || 21.82 ||
sa tāṃ jagrāha vidhivad rudraḥ paramaśobhanām |
dakṣasya ca priyaṃ kurvan bahumānapuraḥsaram || 21.83 ||
gṛhītāyāṃ tu kanyāyāṃ dākṣāyaṇyāṃ pitāmahaḥ |
dadau rudrasya nilayaṃ kailāsaṃ surasannidhau || 21.84 ||
rudro'pi prayayau bhūtaiḥ samaṃ kailāsaparvatam |
devāścāpi yathāsthānaṃ svaṃ svaṃ jagmurmudānvitāḥ |
brahmā'pi dakṣasahitaḥ prājāpatyaṃ puraṃ yayau || 21.85 ||
|| iti śrīvarāhapurāṇe bhagavacchāstre ekaviṃśo'dhyāyaḥ || 21 ||
mahātapā uvāca |
tasmin nivasatastasya rudrasya parameṣṭhinaḥ |
cukopa gaurī devasya piturvairamanusmaran || 22.1 ||
cintayāmāsa dakṣasya anenāpakṛtaṃ purā |
yajño vidhvaṃsito yasmāt tasmāccānyāṃ tanūmaham || 22.2 ||
ārādhya tapasā tasya gṛhe bhūtvā vrajāmyaham |
kathaṃ gacchāmi pitaraṃ dakṣaṃ kṣapitabāndhavam || 22.3 ||
bhavapatnī ca duhitā evaṃ saṃcintya sundarī |
jagāma tapase śailaṃ himavantaṃ mahāgirim || 22.4 ||
tatra kālena mahatā kṣapayantī kalevaram |
svaśarīrāgninā dagdhā tataḥ śailasutā'bhavat || 22.5 ||
umā nāmeti mahatī kṛṣṇā cetyabhidhānataḥ |
labdhvā tu śobhanāṃ mūrtiṃ himavantagṛhe śubhā || 22.6 ||
punastapaścakārograṃ devaṃ smṛtvā trilocanam |
asāveva  patirmahyamityuktvā tapasi sthitā || 22.7 ||
kurvantyā tat tapaścograṃ himavante mahāgirau |
kālena mahatā devastapasārādhitastayā || 22.8 ||
ājagāmāśramaṃ tasyā vipro bhūtvā maheśvaraḥ |
vṛddhaḥ śithilasarvāṅgaḥ skhalaṃścaiva pade pade || 22.9 ||
kṛcchrāt tasyāḥ samīpaṃ tu āgatya dvijasattamaḥ |
bubhukṣito'smi me dehi bhadre bhojyaṃ dvijasya tu || 22.10 ||
evamuktā tadā kanyā umā śailasutā śubhā |
uvāca brāhmaṇaṃ bhojyaṃ dadmi vipra phalādikam |
kuru snānaṃ drutaṃ vipra bhuñjasvānnaṃ yadṛcchayā || 22.11 ||
evamuktastadā viprastasya pārśve mahānadīm |
gaṅgāṃ jagāma snānārthī snānaṃ karttumavātarat || 22.12 ||
snānaṃ tu kurvatā tena rudreṇa dvijarūpiṇā |
bhūtvā māyāmayaṃ bhīmaṃ makaraṃ bhayadarśanam |
grāhitastu tadā viprastena duṣṭena madgunā || 22.13 ||
dṛṣṭvā dhṛtamathātmānaṃ makareṇa balīyasā |
vṛddhamātmānamanyaṃ tāṃ darśayan vākyamabravīt || 22.14 ||
abrahmaṇyaṃ gataṃ kanye dhāvasvānaya māṃ ruṣaḥ |
yāvannāyāti vikṛtiṃ tāvanmāṃ trātumarhasi || 22.15 ||
evamuktā tadā kanyā cintayāmāsa pārvatī |
pitṛbhāvena śailendraṃ bhartṛbhāvena śaṃkaram |
spṛśāmi tapasā pūtā kathaṃ vipraṃ spṛśāmyaham || 22.16 ||
yadyenaṃ nāpakarṣāmi makareṇa jale dhṛtam |
tadānīṃ brahmavadhyā me bhavatīti na saṃśayaḥ || 22.17 ||
anyavyatikrame dharmamapanetuṃ ca śakyate |
brahmavadhyā punarnaivamevamuktavā gatā tvaram || 22.18 ||
sā gatvā tvaritaṃ bhīrurgṛhītvā pāṇinā dvijam |
cakarṣāntarjalāt tāvat svayaṃ bhūtapatirharaḥ || 22.19 ||
yamārādhya tapaścarttumārabdhaṃ śailaputrāyā |
sa eva bhagavān rudrastasyāḥ pāṇau vilambata || 22.20 ||
taṃ dṛṣṭvā lajjitā devī pūrvatyāgamanusmaran |
na kiṃciduttaraṃ subhrūrvadati sma sulajjitā || 22.21 ||
tūṣṇīṃbhūtāṃ tu tāṃ dṛṣṭvā gaurīṃ rudro hasanniva |
pāṇau gṛhītvā māṃ bhadre kathaṃ tyaktumihārhasi || 22.22 ||
matpāṇigrahaṇaṃ bhadre vṛthā yadi kariṣyasi |
tadānīṃ brahmaṇaḥ putryāmāhārārthaṃ bravīmyaham || 22.23 ||
na bhavet parihāso'yamuktā devī parāparā |
lajjamānā tadā vākyaṃ vadati smitapūrvakam || 22.24 ||
devadeva trilokeśa tvadartho'yaṃ samudyamaḥ |
prāgjanmārādhito bharttā bhavān devo maheśvaraḥ || 22.25 ||
idānīṃ me bhavān devaḥ patirnānyo bhaviṣyati |
kintu svāmī pitā mahyaṃ śailendro me vrajāmi tam |
anujñāpya vidhānena tataḥ pāṇiṃ gṛhīṣyasi || 22.26 ||
evamuktvā tadā devī pitaraṃ prati bhāminī |
kṛtāñjalipuṭā bhūtvā himavantamuvāca ha || 22.27 ||
ato'nyajanmabharttā me rudro dakṣamakhāntakaḥ |
idānīṃ tapasā saiva dhyāto'bhūd gatibhāvanaḥ || 22.28 ||
sa ca viśvapatirbhūtvā brāhmaṇo me tapovanam |
āgatya bhojanārthāya yācayāmāsa śaṃkaraḥ |
mayā snātuṃ vrajasveti codito jāhnavīṃ gataḥ || 22.29 ||
tatrāsau vṛddhakāyena dvijarūpeṇa śaṃkaraḥ |
makareṇa dhṛtastūrṇaṃ abrahahmaṇyamuvāca ha || 22.30 ||
brahmahatyābhayāt tāta mayā pāṇau dhṛtastataḥ |
dhṛtamātraḥ svakaṃ dehaṃ darśayāmāsa śaṃkaraḥ || 22.31 ||
tato māmabravīd devaḥ pāṇigrahaṇamāgatām |
bhavatī devi mā kiṃcid vicāraya tapodhane || 22.32 ||
evamuktā tvahaṃ tena śaṃkareṇa mahātmanā |
tadanujñāpya deveśaṃ bhavantaṃ praṣṭumāgatā |
idānīṃ yat kṣamaṃ kāryaṃ tacchīghraṃ saṃvidhīyatām || 22.33 ||
evaṃ śrutvā tadā vākyaṃ śailarājo mudā yutaḥ |
uvāca duhitāṃ dhanyāṃ tasmin kāle varānanām || 22.34 ||
putri dhanyo'smyahaṃ loke yasya rudraḥ svayaṃ haraḥ |
jāmātā bhavitā devi tvayā'patyavatāmaham |
sthāpito mūrdhni devānāmapi putri tvayā hyaham || 22.35 ||
sthīyatāṃ kṣaṇamekaṃ tu yāvadāgamanaṃ mama |
evamuktvā gato rājā śailānāṃ brahmaṇo'ntikam || 22.36 ||
tatra dṛṣṭvā mahātmānaṃ sarvadevapitāmaham |
uvāca praṇato bhūtvā brahmāṇaṃ śailarāṭ tataḥ || 22.37 ||
devomā duhitā mahyaṃ tāṃ rudrāya dadāmyaham |
tvayā deva anujñātastatkaromi praśādhi mām || 22.38 ||
tato brahmā prītamanā yāhi rudrāya tāṃ śubhām |
prayacchovāca devānāṃ tadā lokapitāmahaḥ || 22.39 ||
evamuktaḥ śailarājaḥ svaveśmāgamya satvaram |
devānṛṣīn siddhasaṃghān cāmantrayata satvaram || 22.40 ||
tumburuṃ nāradaṃ caiva hāhāhūhūṃ tathaiva ca |
sa gatvā kinnarāṃścaiva asurān rākṣasānapi || 22.41 ||
parvatāḥ saritaḥ śailā vṛkṣā oṣadhayastathā |
āgatā mūrttimanto vai parvatāḥ saṅgamopalāḥ |
himavadduhiturdraṣṭuṃ vivāhaṃ śaṃkareṇa ha || 22.42 ||
tatra vediḥ kṣitiścāsīt kalaśāḥ sapta sāgarāḥ |
sūryo dīpastathā somaḥ sarito vavahurjalam || 22.43 ||
evaṃ vivāhasāmagrīṃ kṛtvā śailavarādhipaḥ |
preṣayāmāsa rudrāya samīpaṃ mandaraṃ girim || 22.44 ||
sa tadā mandaroktastu śaṃkaro drutamāyayau |
vidhinā somayā pāṇiṃ jagrāha parameśvaraḥ || 22.45 ||
tatrotsave parvatanāradau dvau
jaguśca siddhā nanṛturvanaspatīḥ |
puṣpāṇyanekāni vicikṣipuḥ śubhāḥ
nanarturuccaiḥ surayoṣito bhṛśam || 22.46 ||
tasmin vivāhe salilapravāhe
caturmukho lokaparaḥ svasaṃsthaḥ |
uvāca kanyāṃ bhava putri loke
nārī prabharttā tava cānyapuṃsām |
ityevamuktvā sa umāṃ sarudrāṃ
pitāmahaḥ svaṃ puramājagāma || 22.47 ||
jāmātaraṃ parvatarāṭ supūjya
visarjayāmāsa vibhuṃ sa somam |
devāṃśca daityān vividhānṛṣīṃśca
saṃpūjya sarvān vividhaistu vastubhiḥ |
vibhūṣaṇairvastravarānnadānai -
rvisarjayāmāsa tadādrimukhyān ||22.48 ||
sa vītaśoko virajo viśuddhaḥ
śubhānanāṃ devavarāya dattvā |
umāṃ mahātmā himavānadrirājaḥ
paitāmahe loka ivādhvare bhāt || 22.49 ||
itīriteyaṃ tava rājasattama
prasūtireṣā na viduryāṃ surāsurāḥ |
svayaṃbhudakṣādirājaḥ trijanmabhi-
rgaurīvivāho'pi mayā sukīrtitaḥ || 22.50 ||
śrīvarāha uvāca |
evaṃ sā gaurināmnā tu kāraṇānmūrttimāgatā |
saṃbabhūva yathā proktaṃ prajāpālāya pṛcchate |
ṛṣiṇā mahatā pūrvaṃ tapasā bhāvitātmanā || 22.51 ||
gauryā utpattireṣā vai kathitā paramarṣiṇā |
vivāhaśca yathā vṛttastatsarvaṃ kathitaṃ tava || 22.52 ||
etatsarvaṃ tu gauryā vai saṃpannaṃ tu tṛtīyayā |
tasyāṃ tithau tṛtīyāyāṃ lavaṇaṃ varjayennaraḥ |
yaścopoṣyati nārī vā sā saubhāgyaṃ tu vindati || 22.53 ||
durbhagā yā tu nārī syāt puruṣaścātidurbhagaḥ |
etacchrutvā tṛtīyāyāṃ lavaṇaṃ tu vivarjayet || 22.54 ||
sarvakāmānavāpnoti saubhāgyaṃ dravyasampadam |
ārogyaṃ ca sadā loke kāntiṃ puṣṭiṃ ca vindati || 22.55 ||
|| iti śrīvarāhapurāṇe bhagavacchāstre dvāviṃśo'dhyāyaḥ || 22 ||
prajāpāla uvāca |
kathaṃ gaṇapaterjanma mūrtimantaṃ ca sattama |
etanme saṃśayaṃ chindhi dhṛtikaṣṭaṃ vyavasthitam || 23.1 ||
mahātapā uvāca |
pūrvaṃ devagaṇāḥ sarve ṛṣayaśca tapodhanāḥ |
kāryārambhaṃ tathā cakruḥ sidhyante ca na saṃśayaḥ || 23.2 ||
sanmārgavartiṣu yathā siddhyante vighnataḥ kriyāḥ |
asatkāriṣu sarveṣu tadvadevamavighnataḥ || 23.3 ||
tato devāḥ sapitaraścintayāmāsurojasā |
asatkāryeṣu vighnārthaṃ sarva evābhyamantrayan || 23.4 ||
tatasteṣāṃ tadā mantraṃ kurvatastridivaukasām |
babhūva buddhirgamane rudraṃ prati mahāmatim || 23.5 ||
te tatra rudramāgamya kailāsanilayaṃ gurum |
ūcuḥ savinayaṃ sarve praṇipātapuraḥsaram || 23.6 ||
devā ūcuḥ |
devadeva mahādeva śūlapāṇe trilocana |
vighnārthamaviśiṣṭānāmutpādayitumarhasi || 23.7 ||
evamuktarastadā devairbhavaḥ paramayā mudā |
umāṃ nirīkṣayāmāsa cakṣuṣā'nimiṣeṇa ha || 23.8 ||
devānāṃ sannidhau tasya paśyatomāṃ mahātmanaḥ |
cintā'bhūd vyomni mūrtibhyo dṛśyate kena hetunā || 23.9 ||
pṛthivyā vidyate mūrttirapāṃ mūrttistathaiva ca |
tejasaḥ śvasanasyāpi mūrttireṣā tu dṛśyate |
ākāśaṃ ca kathaṃ neti matvā devo jahāsa ca || 23.10 ||
jñānaśaktimumāṃ dṛṣṭvā yad dṛṣṭaṃ vyomni śaṃbhunā |
yaccoktaṃ brahmaṇā pūrvaṃ śarīraṃ tu śarīriṇām || 23.11 ||
yaccāpi hasitaṃ tena devena parameṣṭhinā |
etatkāryacatuṣkeṇa pṛthivyādicaturṣvapi || 23.12 ||
mūrttimānatitejasvī hasataḥ parameṣṭhinaḥ |
pradīptāsyo mahādīptaḥ kumāro bhāsayan diśaḥ |
parameṣṭhiguṇairyuktaḥ sākṣād rudra ivāparaḥ || 23.13 ||
utpannamātro devānāṃ yoṣitaḥ sapramohayan |
kāntyā dīptyā tathā mūrtyā rūpeṇa ca mahātmavān || 23.14 ||
taṃ dṛṣṭvā paramaṃ rūpaṃ kumārasya mahātmanaḥ |
umā'nimeṣanetrābhyāṃ tamapaśyata bhāminī || 23.15 ||
taṃ dṛṣṭvā kupito devaḥ strībhāvaṃ cañcalaṃ tathā |
matvā kumārarūpaṃ tu śobhanaṃ mohanaṃ dṛśām |
tataḥ śaśāpa taṃ devaḥ strīśaṅkāṃ parameśvaraḥ || 23.16 ||
kumāra gajavaktrastvaṃ pralambajaṭharastathā |
bhaviṣyasi tathā sarpairupavītagatirdhruvam |
evaṃ śaśāpa taṃ devastīvrakopasamanvitaḥ || 23.17 ||
arddhakoṭyā ca romāṇāmātmano'ṅge trilocanaḥ |
kūpakāsvedasalilapūrṇaśūladharastathā |
dhunvan śarīramutthāya tato devo ruṣānvitaḥ || 23.18 ||
yathā yathā'sau sa śarīramādyaṃ
dhunoti devastriśikhāstrapāṇiḥ |
tathā tathā cāṅgaruhāścakāsu-
rjalaṃ kṣitau saṃnyapataṃstathānyāḥ || 23.19 ||
vināyakānekavidhā gajāsyā -
stamālanīlāñjanasaṃnikāśāḥ |
uttasthuruccairvividhāstrahastā -
statastu devā manasākulena || 23.20 ||
kimetadityadbhutakarmakārī
hyekaḥ karotyapratimaṃ mahacca |
kāryaṃ surāṇāṃ kṛtametadiṣṭaṃ
bhavedathaitaṃ paritaṃ kutastat || 23.21 ||
divaukasāṃ cintayatāṃ tathā tu
vināyakaiḥ kṣmā kṣubhitā babhūva |
caturmukhaścāpratimo vimāna -
māruhya khe vākyamidaṃ jagāda || 23.22 ||
dhanyāḥ stha devāḥ suranāyakena
trilocanenādbhutarūpiṇā ca |
anugṛhītāḥ parameśvareṇa
suradviṣāṃ vighnakṛtāṃ natau ca || 23.23 ||
ityevamuktvā prapitāmahastā -
nuvāca devastriśikhāstrapāṇim |
yaste vibho vaktrasamudbhavaḥ prabhu-
rvināyakānāṃ bhavatu tvime'nugāḥ || 23.24 ||
bhavāṃstathā'syātmavareṇa cāmbare
tvayā caturṣvastu śarīracārī |
ākāśametad bahudhā vyavasthitaṃ
tvayā vareṇyaḥ kṛta eva nānyaḥ || 23.25 ||
prabhurbhava tvaṃ pratimāstrapāṇinā
imāni cāstrāṇi varāṃśca dehi |
ityevamuktvā'dhigate pitāmahe
trilocanaścātmabhavaṃ jagāda || 23.26 ||
vināyako vighnakaro gajāsyo
gaṇeśanāmā ca bhavasya putraḥ |
ete ca sarve tava yāntu bhṛtyā
vināyakāḥ krūradṛśaḥ pracaṇḍāḥ |
ucchuṣmadānādivivṛddhadehāḥ
kāryeṣu siddhiṃ pratipādayantaḥ || 23.27 ||
bhavāṃśca deveṣu tathā makheṣu
kāryeṣu cānyeṣu mahānubhāvāt |
agreṣu pūjāṃ labhate'nyathā ca
vināśayiṣyasyatha kāryasiddhim || 23.28 ||
ityevamuktvā parameśvareṇa
suraiḥ samaṃ kāñcanakumbhasaṃsthaiḥ |
jalaistathāsāvabhiṣiktagātro
rarāja rājendra vināyakānām || 23.29 ||
dṛṣṭavā'bhiṣicyamānaṃ tu devāstaṃ gaṇanāyakam |
tuṣṭuvuḥ prayatāḥ sarve triśūlāstrasya sannidhau || 23.30 ||
devā ūcuḥ |
namaste gajavaktrāya namaste gaṇanāyaka |
vināyaka namaste'stu namaste caṇḍavikrama || 23.31 ||
namo'stu te vighnakartre namaste sarpamekhala |
namaste rudravaktrottha pralambajaṭharāśrita || 23.32 ||
sarvadevanamaskārādavighnaṃ kuru sarvadā |
evaṃ stutastadā devairmahātmā gaṇanāyakaḥ |
abhiṣiktaśca rudrasya somasyāpatyatāṃ gataḥ || 23.33 ||
etaccaturthyāṃ saṃpannaṃ gaṇādhyakṣasya pārthiva |
yatastato'yaṃ mahatī tithīnāṃ paramā tithiḥ || 23.34 ||
etasyāṃ yastilān bhuktvā bhaktyā gaṇapatiṃ nṛpa |
ārādhayati tasyāśu tuṣyate nātra saṃśayaḥ || 23.35 ||
yaścaitat paṭhate stotraṃ yaścaitacchṛṇuyāt sadā |
na tasya vighnā jāyante na pāpaṃ sarvathā nṛpa || 23.36 ||
|| iti śrīvarāhapurāṇe bhagavacchāstre trayoviṃśo'dhyāyaḥ || 23 ||
dharaṇyuvāca |
kathaṃ te gātrasaṃsparśānmūrttimanto mahābalāḥ |
nāgā babhūvurdeveśa kāraṇaṃ te mahīdhara || 24.1 ||
śrīvarāha uvāca |
śrutvā gaṇapaterjanma prajāpālo narādhipaḥ |
uvāca ślakṣṇayā vācā taṃ muniṃ saṃśitavratam || 24.2 ||
prajāpāla uvāca |
bhagavaṃstārkṣaviṣayāḥ kathaṃ mūrttimupāgatāḥ |
nāgā babhūvuḥ kuṭilā etadākhyātumarhasi || 24.3 ||
mahātapā uvāca |
sṛjatā brahmaṇā sṛṣṭiṃ marīciḥ sūtikāraṇam |
prathamaṃ manasā dhyātastasya putrastu kaśyapaḥ || 24.4 ||
tasya dākṣāyaṇī bhāryā kadrūrnāma śucismitā |
mārīco janayāmāsa tasyāṃ putrān mahābalān || 24.5 ||
anantaṃ vāsukiṃ caiva kambalaṃ ca mahābalam |
karkoṭakaṃ ca rājendra padmaṃ cānyaṃ sarīsṛpam || 24.6 ||
mahāpadmaṃ tathā śaṅkhaṃ kulikaṃ cāparājitam |
ete kaśyapadāyādāḥ pradhānāḥ parikīrttitāḥ || 24.7 ||
eteṣāṃ tu prasūtyā tu idamāpūritaṃ jagat |
kuṭilā hīnakarmāṇastīkṣṇāsyotthaviṣolbaṇāḥ |
dṛṣṭvā saṃdaśya manujān kuryurbhasma kṣaṇād dhruvam || 24.8 ||
śabdagāmī yathā sparśaṃ manuṣyāṇāṃ narādhipa |
ahanyahani jāyeta kṣayaḥ paramadāruṇaḥ || 24.9 ||
ātmanastu kṣayaṃ dṛṣṭvā prajāḥ sarvāḥ samantataḥ |
jagmuḥ śaraṇyaṃ śaraṇaṃ paraṃ tu parameśvaram || 24.10 ||
imamevārthamuddiśya prajāḥ sarvā mahīpate |
ūcuḥ kamalajaṃ viṣṇuṃ purāṇaṃ brahmasaṃjñitam || 24.11 ||
devā ūcuḥ |
devadeveśa lokānāṃ prasūti parameśvara |
trāhi nastīkṣṇadaṃṣṭrāṇāṃ bhujaṃgānāṃ mahātmanām || 24.12 ||
ahanyahani ye deva paśyeyururagā dṛśā |
manuṣyapaśurūpaṃ vā tatsarvaṃ bhasmasād bhavet || 24.13 ||
tvayā sṛṣṭiḥ kṛtā deva nīyate sā bhujaṃgāmaiḥ |
etajjñātvā tu durvṛttaṃ tatkuruṣva mahāmate || 24.14 ||
brahmovāca |
ahaṃ rakṣāṃ vidhāsyāmi bhavatīnāṃ na saṃśayaḥ |
vrajadhvaṃ svāni dhiṣṇyāni prajā mābhūt sasādhvasā || 24.15 ||
evamuktvā prajāstena brahmaṇā'vyaktamūrttinā |
ājagmuḥ paramaprītyā natvā caiva svayaṃbhuve || 24.16 ||
āgatāsu prajāsvādyastānāhūya bhujaṃgamān |
śaśāpa paramakruddho vāsukipramukhāṃstadā || 24.17 ||
brahmovāca |
yato matprabhavān nityaṃ kṣayaṃ nayata mānuṣān |
bhavāntare athānyasmin mātuḥ śāpāt sudāruṇāt |
bhavitā'tikṣayaṃ ghoraṃ nūnaṃ svāyaṃbhuve'ntare || 24.18 ||
evamuktāstu vepanto brahmāṇaṃ bhujagottamāḥ |
nipatya pādayostasya idamūcurvacastadā || 24.19 ||
nāgā ūcuḥ |
bhagavan kuṭilā jātirasmākaṃ bhavatā kṛtā |
viṣolbaṇatvaṃ krūratvaṃ dṛkśastratvaṃ ca nastvayā |
saṃpāditaṃ tvayā deva idānīṃ śamayācyuta || 24.20 ||
brahmovāca |
yadi nāma mayā sṛṣṭā bhavantaḥ kuṭilāśayāḥ |
tataḥ kiṃ manujān nityaṃ bhakṣayadhvaṃ gatavyathāḥ || 24.21 ||
nāgā ūcuḥ |
maryādāṃ kuru deveśa sthānaṃ caiva pṛthak pṛthak |
manuṣyāṇāṃ tathā'smākaṃ samayaṃ ca pṛthak pṛthak |
nāgānāṃ vacanaṃ śrutvā devo vacanamabravīt || 24.22 ||
ahaṃ karomi vo nāgāḥ samayaṃ manujaiḥ saha |
tadekamanasaḥ sarve śrṛṇudhvaṃ mama śāsanam || 24.23 ||
pātālaṃ vitalaṃ caiva harmyākhyaṃ ca tṛtīyakam |
dattaṃ caiva sadā ramyaṃ gṛhaṃ tatra gamiṣyatha || 24.24 ||
tatra bhogān bahuvidhān bhuñjānā mama śāsanāt |
tiṣṭhadhvaṃ saptamaṃ yāvad rātryantaṃ tu punaḥ punaḥ || 24.25 ||
tato vaivasvatasyādau kāśyapeyā bhaviṣyatha |
dāyādāḥ sarvadevānāṃ suparṇasya ca dhīmataḥ || 24.26 ||
tadā prasūtirvaḥ sarvā bhokṣyate citrabhānunā |
bhavatāṃ naiva doṣo'yaṃ bhaviṣyati na saṃśayaḥ || 24.27 ||
ye vai krūrā bhogino durvinītā -
steṣāmanto bhavitā nānyathaitat |
kālaprāptaṃ bhakṣayadhvaṃ daśadhvaṃ
tathā'pakāre ca kṛte manuṣyam || 24.28 ||
mantrauṣadhairgāruḍamaṇḍalaiśca
baddhairdṛṣṭairmānavā ye caranti |
teṣāṃ bhītairvarttitavyaṃ na cānya-
ccintyaṃ kāryaṃ cānyathā vo vināśaḥ || 24.29 ||
itīrite brahmaṇā te bhujaṅgā
jagmuḥ sthānaṃ kṣmātalākhyaṃ hi sarve |
tasthurbhogān bhuñjamānāḥ samagrān
rasātale līlayā saṃsthitāste || 24.30 ||
evaṃ śāpaṃ tu te labdhvā prasādaṃ ca caturmukhāt |
tasthuḥ pātālanilaye muditenāntarātmanā || 24.31 ||
etat sarvaṃ ca pañcamyāṃ teṣāṃ jātaṃ mahātmanām |
atastviyaṃ tithirdhanyā sarvapāpaharā śubhā || 24.32 ||
etasyāṃ saṃyato yastu amlaṃ tu parivarjayet |
kṣīreṇa snāpayennāgāṃstasya yāsyanti mitratām || 24.33 ||
|| iti śrīvarāhapurāṇe bhagavacchāstre caturviśo'dhyāyaḥ || 24 ||
prajāpāla uvāca |
ahaṃkārāt kathaṃ jajñe kārttikeyo dvijottama |
etanme saṃśayaṃ chindhi pṛcchato vai mahāmune || 25.1 ||
mahātapā uvāca |
sarveṣāmeva tattvānāṃ yaḥ paraḥ puruṣaḥ smṛtaḥ |
tasmādavyaktamutpannaṃ tattvādi trividhaṃ tu tat || 25.2 ||
puruṣāvyaktayormadhye mahattvaṃ samapadyata |
sa cāhaṃkāra ityukto yo mahān samudāhṛtaḥ || 25.3 ||
puruṣo viṣṇurityuktaḥ śivo vā nāmataḥ smṛtaḥ |
avyaktaṃ tu umā devī śrīrvā padmanibhekṣaṇā || 25.4 ||
tatsaṃyogādahaṃkāraḥ sa ca senāpatirguhaḥ |
tasyotpattiṃ pravakṣyāmi śrṛṇu rājan mahāmate || 25.5 ||
ādyo nārāyaṇo devastasmād brahmā tato'bhavat |
ataḥ svayaṃbhuvaścānye marīcyādyārkasaṃbhavāḥ || 25.6 ||
teṣvārabhya surā daityā gandharvā mānuṣāḥ khagāḥ |
paśavaḥ sarvabhūtāni sṛṣṭireṣā prakīrtitā || 25.7 ||
sṛṣṭyāṃ vistāritāyāṃ tu devadaityā mahābalāḥ |
sāpatnyaṃ bhāvamāsthāya yuyudhurvijigīṣavaḥ || 25.8 ||
daityānāṃ balinaḥ santi nāyakā yuddhadurmadāḥ |
hiraṇyakaśipuḥ pūrvaṃ hiraṇyākṣo mahābalaḥ |
vipracittirvicittiśca bhīmākṣaḥ krauñca eva ca || 25.9 ||
ete'tibalinaḥ śūrā devasainyaṃ mahāmṛdhe |
anārataṃ sitairbāṇairjayante'nudinaṃ mṛdhe || 25.10 ||
teṣāṃ parājayaṃ dṛṣṭvā devānāṃ tu bṛhaspatiḥ |
uvāca hīnaṃ vaḥ sainyaṃ nāyakena vinā surāḥ || 25.11 ||
ekenendreṇa divyaṃ tu sainyaṃ pātuṃ na śakyate |
ataḥ senāpatiṃ kiñcidanveṣayata māciram || 25.12 ||
evamuktāstato devā jagmurlokapitāmaham |
senāpatiṃ ca no dehi vākyamūcuḥ sasaṃbhramam || 25.13 ||
tato dadhyau caturvaktraḥ kimeṣāṃ kriyate mayā |
brahmā'tha cintayāmāsa rudraṃ prati manogatam || 25.14 ||
tato devāḥ sagandharvā ṛṣayaḥ siddhacāraṇāḥ |
brahmāṇaṃ purataḥ kṛtvā jagmuḥ kailāsaparvatam || 25.15 ||
tatra dṛṣṭvā mahādevaṃ śivaṃ paśupatiṃ vibhum |
tuṣṭavurvividhaistotraiḥ śakrādyāstridivaukasaḥ || 25.16 ||
devā ūcuḥ |
namāma sarve śaraṇārthino vayaṃ
maheśvaraṃ tryambakabhūtabhāvanam |
umāpate viśvapate marutpate
jagatpate śaṃkara pāhi naḥ svayam || 25.17 ||
jaṭākalāpāgraśaśāṅkadīdhiti-
prakāśitāśeṣajagattrayāmala |
triśūlapāṇe puruṣottamācyuta
prapāhi daityācca jagattrayodare || 25.18 ||
tvamādidevaḥ puruṣottamo hari-
rbhavo maheśastripurāntako vibhuḥ |
bhagākṣihā daityaripuḥ purātano
vṛṣadhvajaḥ pāhi surottamottama || 25.19 ||
girīśajānātha giripriyāpriya
prabho samastāmaralokapūjita |
gaṇeśa bhūteśa śivākṣayāvyaya
prapāhi no daityavarāntakācyuta || 25.20 ||
pṛthvyāditattveṣu bhavān pratiṣṭhito
dhvanisvarūpo gagane viśeṣataḥ |
vāyau dvidhā tejasi ca tridhā jale
catuḥ kṣitau pañcaguṇaḥ prapāhi naḥ || 25.21 ||
agnisvarūpo'si tarau tathopale
sattvasvarūpo'si tathā jaleṣvapi |
tejaḥsvarūpo bhagavān maheśvaraḥ
prapāhi no daityagaṇārditān hara || 25.22 ||
nāsīdyadā'kāṇḍamidaṃ trilocana
prabhākarendradraviṇādhipāḥ kutaḥ |
tadā bhavāneva viruddhalocana
pramāṇabādhādivivarjitaḥ sthitaḥ || 25.23 ||
kapālamālin śaśikhaṇḍaśekhara
śmaśānavāsin sitabhasmaguṇṭhita |
phaṇīndrasaṃvītatano'ntakāpaha
prapāhi no dakṣadhiyā sureśvara || 25.24 ||
bhavān pumān śaktiriyaṃ gireḥ sutā
sarvāṅgarūpā bhagavaṃstathā tvayi |
triśūlarūpeṇa jagattrayaṃ kare
sthitaṃ trinetreṣu makhāgnayastrayaḥ || 25.25 ||
jaṭāsvarūpeṇa samastasāgarāḥ
kulācalāḥ sindhuvahāśca sarvaśaḥ |
śaśī paraṃ jñānamidaṃ tava sthitaṃ
na deva paśyanti kudṛṣṭayo janāḥ || 25.26 ||
nārāyaṇastvaṃ jagatāṃ samudbhava-
stathā bhavaḥ saiva caturmukho bhavān |
sattvādibhedena tathāgnibhedato
yugādibhedena ca saṃsthitastridhā || 25.27 ||
bhavantamete suranāyakāḥ prabho
bhavārthino'nyasya vadanti toṣayan |
yatastato no bhava bhūtibhūṣaṇa
prapāhi viśveśvara rudra te namaḥ || 25.28 ||
mahātapā uvāca |
evaṃ stutastadā devo rudraḥ paśupatiḥ suraiḥ |
uvāca devānavyagraḥ kiṃ kāryaṃ brūta mā ciram || 25.29 ||
devā ūcuḥ |
senāpatiṃ no deveśa dehi daityavadhāya vai |
devānāṃ brahmamukhyānāmetadeva hitaṃ bhavet || 25.30 ||
rudra uvāca |
dadāmi senānāthaṃ vo devā bhavata vijvarāḥ |
bhaviṣyamasti paurāṇaṃ yogādīnāmacintayan || 25.31 ||
evamuktvā haro devān visṛjya svāṅgasaṃsthitām |
śaktiṃ saṃkṣobhayāmāsa putrahetoḥ paraṃtapa || 25.32 ||
tasya kṣobhayataḥ śaktiṃ jvalanārkasamaprabhaḥ |
kumāraḥ sahajāṃ śaktiṃ bibhrajjñānaikaśālinīm || 25.33 ||
utpattistasya rājendra bahurūpā vyavasthitā |
manvantareṣvanekeṣu devasenāpatiḥ kila || 25.34 ||
yo'sau śarīrago devaḥ ahaṃkāreti kīrttitaḥ |
prayojanavaśād devaḥ saiva senāpatirvibho || 25.35 ||
tasmin jāte svayaṃ brahmā sarvadaivaiḥ samanvitaḥ |
pūjayāmāsa deveśaṃ śivaṃ paśupatiṃ tadā || 25.36 ||
sarvaiśca devai ṛṣibhiśca siddhaiḥ
senāpatirvaradānena tena |
āpyāyitaḥ so'pi surānuvāca
sakhāyārthaṃ kraḍane kāryameva || 25.37 ||
śrutvā vacastasy mahānubhāvo
mahādevo vākyamidaṃ jagāda |
dadāmi te krīḍanakaṃ tu kukkuṭaṃ
tathānugau śākhaviśākhasaṃjñau |
kumāra bhūtagrahanāyako bhavān
bhavasva deveśvara senayāpatiḥ || 25.38 ||
evamuktvā tato devaḥ sarve devāśca pārthiva |
tuṣṭuvurvāgbhiriṣṭābhiḥ skandaṃ senāpatiṃ tadā || 25.39 ||
devā ūcuḥ |
bhavasva devasenānīrmaheśvarasuta prabho |
ṣaṇmukha skanda viśveśa kukkuṭadhvaja pāvake || 25.40 ||
kampitāre kumāreśa skanda bālagrahānuga |
jitāre krauñcavidhvaṃsa kṛttikāsuta mātṛja || 25.41 ||
bhūtagrahapatiśreṣṭha pāvaki priyadarśana |
mahābhūtapateḥ putra trilocana namo'stu te || 25.42 ||
evaṃ stutastadā devairvavardha bhavanandanaḥ |
dvādaśādityasaṃkāśo babhūvādbhutadarśanaḥ |
trailokyamapi tattejastāpayāmāsa pārthiva || 25.43 ||
prajāpāla uvāca |
kathaṃ taṃ kṛtrikāputramuktavantaḥ suraṃ gurum |
kathaṃ ca pāvakirasau kathaṃ vā mātṛnandanaḥ || 25.44 ||
mahātapā uvāca |
ādimanvantare deva utpattiryā mayoditā |
parokṣadarśibhirdevairevameva stutaḥ prabhuḥ || 25.45 ||
kṛttikā pāvakastvanyamātaro girijā tathā |
dvijīyajanmani guhasyaite utpattihetavaḥ || 25.46 ||
evametat tavākhyātaṃ pṛcchataḥ pārthivottama |
ātmavidyā'mṛtaṃ guhyamahaṃkārasya saṃbhavaḥ || 25.47 ||
svayaṃ skando mahādevaḥ sarvapāpapraṇāśanaḥ |
tasya ṣaṣṭhīṃ tithiṃ prādādabhiṣeke pitāmahaḥ || 25.48 ||
etāṃ phalāśano yastu kṣayenniyatamānasaḥ |
aputro'pi labhet putrānadhano'pi dhanaṃ labhet |
yaṃ yamiccheta manasā taṃ taṃ labhati mānavaḥ || 25.49 ||
yaścaitat paṭhati stotraṃ kārtikeyasya mānavaḥ |
tasya gehe kumārāṇāṃ kṣemārogyaṃ bhaviṣyati || 25.50 ||
|| iti śrīvarāhapurāṇe bhagavacchāstre pañcaviṃśo'dhyāyaḥ || 25 ||
prajāpāla uvāca |
śarīrasya kathaṃ mūrtigrahaṇaṃ jyotiṣo dvija |
etanme saṃśayaṃ chindhi praṇatasya dvijottama || 26.1 ||
mahātapā uvāca |
yo'sāvātmā jñānaśaktireka eva sanātanaḥ |
sa dvitīyaṃ yadā caicchat tadā svātmasthito jvalat || 26.2 ||
yaḥ sūrya iti bhāsvāṃstu anyonyena mahātmanaḥ |
lolībhūtāni tejāṃsi bhāsayanti jagattrayam || 26.3 ||
tasmin sarve surāḥ siddhā gaṇāḥ sarve maharṣibhiḥ |
samaṃ sūtā iti vibho tasmāt sūryo bhavan stutaḥ || 26.4 ||
lolībhūtasya tasyāśu tejaso'bhūccharīrakam |
pṛthaktvena raviḥ so'tha kīrttyate vedavādibhiḥ || 26.5 ||
bhāsayan sarvalokāṃstu yato'sāvutthito divi |
ato'sau bhāskaraḥ proktaḥ prakarṣācca prabhākaraḥ || 26.6 ||
divā divasa ityuktastatkāritvād divākaraḥ |
sarvasya jagatastvādirādityastena ucyate || 26.7 ||
etasya dvādaśādityāḥ saṃbhūtāstejasā pṛthak |
pradhāna eva sarveṣāṃ sarvadā sa vibudhyate || 26.8 ||
taṃ dṛṣṭvā jagato vyāptiṃ kurvāṇaṃ parameśvaram |
tasyaivāntaḥ sthitā devā viniṣkramya stutiṃ jaguḥ || 26.9 ||
devā ūcuḥ |
bhavān prasūtirjagataḥ purāṇaḥ
kṣayāmalaiva pradahan jaganti |
samutthito nātha śamaṃ prayāhi
mā devalokān pluṣa karmasākṣin || 26.10 ||
tvayā tataṃ sarvata eva tejaḥ
pratāpinā sūrya yajuḥpravṛtte |
tigmaṃ rathāṅgaṃ tava devakalpaṃ
kālākhyamadhvāntakaraṃ vadanti || 26.11 ||
prabhākarasaktvaṃ ravirādideva
ātmā samastasya carācarasya |
pitāmahasaktvaṃ varuṇo yamaśca
bhūtaṃ bhaviṣyacca vadanti siddhāḥ || 26.12 ||
dhvāntaṃ praṇu tvaṃ suralokapūjya
prayāhi śāntiṃ pitaro vadanti |
vedāntavedyo'si makheṣu deva
tvaṃ hūyase viṣṇurasi prasahya |
iti stutastaiḥ suranātha bhaktyā
prapāhi śaṃbho na iti prasahya || 26.13 ||
evamuktastadā devaiḥ saumyāṃ mūrttimathākarot |
prakāśatvaṃ jagāmāśu devatānāṃ mahāprabhaḥ || 26.14 ||
etatsarvaṃ surāṇāṃ tu dahanaṃ śāmitaṃ purā |
saptamyāṃ khalu sūryeṇa mūrttitvaṃ kṛtavān bhuvi || 26.15 ||
etāṃ yaḥ puruṣo bhaktyā upāste sūryamarcayet |
bhāskareṇa ca tasyāsau phalamiṣṭaṃ prayacchati || 26.16 ||
etat te kathitaṃ rājan sūryākhyānaṃ purātanam |
ādimanvantare vṛttaṃ mātaraḥ śrṛṇu sāṃpratam || 26.17 ||
|| iti śrīvarāhapurāṇe bhagavacchāstre ṣaḍviṃśo'dhyāyaḥ || 26 ||
mahātapā uvāca |
pūrvamāsīnmahādaityo balavānandhako bhuvi |
sa devān vaśamāninye brahmaṇo varadarpitaḥ || 27.1 ||
tenātmavān surāḥ sarve tyājitā meruparvatam |
brahmāṇaṃ śaraṇaṃ jagmurandhakasya bhayārditāḥ || 27.2 ||
tānāgatāṃstadā brahmā uvāca surasattamān |
kimāgamanakṛtyaṃ vo devā brūta kimāsyate || 27.3 ||
devā ūcuḥ |
andhakenārditāḥ sarve vayaṃ devā jagatpate |
trāhi sarvāṃścaturvaktra pitāmaha namo'stu te || 27.4 ||
brahmovāca |
andhakānnaiva śakto'haṃ trātuṃ vai surasattamāḥ |
bhavaṃ śarvaṃ mahādevaṃ vrajāma śaraṇārthinaḥ || 27.5 ||
kintu pūrvaṃ mayā datto varastasya surottamāḥ |
avadhyastvaṃ hi bhavitā na śarīraṃ spṛśenmahīm || 27.6 ||
tasyaivaṃ balinastveko hantā rudraḥ paraṃtapaḥ |
tatra gacchāmahe sarve kailāsanilayaṃ prabhum || 27.7 ||
evamuktvā yayau brahmā sadevo bhavasannidhau |
tasya saṃdarśanād rudraḥ pratyutthānādikāḥ kriyāḥ |
kṛtvābhyuvāca deveśo brahmāṇaṃ bhuvaneśvaram || 27.8 ||
śaṃbhuruvāca |
kiṃ kāryaṃ devatāḥ sarvā āgatā mama sannidhau |
yenāhaṃ tatkaromyāśu ājñā kāryā hi satvaram || 27.9 ||
devā ūcuḥ |
rakṣasva deva balinastvandhakād duṣṭacetasaḥ || 27.10 ||
yāvadevaṃ surā sarve śaṃsanti parameṣṭhinaḥ |
tāvat sainyena mahatā tatraivāndhaka āyayau || 27.11 ||
balena caturaṅgeṇa hantukāmo bhavaṃ mṛdhe |
tasya bhāryāṃ girisutāṃ hartumicchan sasādhanaḥ || 27.12 ||
taṃ dṛṣṭvā sahasā'yāntaṃ devaśakraprahāriṇam |
sannahya sahasā devā rudrasyānucarā bhavan || 27.13 ||
rudro'pi vāsukiṃ dhyātvā takṣakaṃ ca dhanaṃjayam |
valayaṃ kaṭiṃsūtraṃ ca cakāra parameśvaraḥ || 27.14 ||
nīlanāmā ca daityendro hastī bhūtvā bhavāntikam |
āgatastvaritaḥ śakrahastīvoddhatarūpavān || 27.15 ||
sa jñāto nandinā daityo vīrabhadrāya darśitaḥ |
vīrabhadro'pi siṃhena rūpeṇāhatya ca drutam || 27.16 ||
tasya kṛttiṃ vidāryāśu kariṇastvañjanaprabhām |
rudrāyārpitavān so'pi tamevāmbaramākarot |
tataḥ prabhṛti rudro'pi gajacarmapaṭo'bhavat || 27.17 ||
gajacarmmapaṭo bhūtvā bhujaṃgābharaṇojjvalaḥ |
ādāya triśikhaṃ bhīmaṃ sagaṇo'ndhakamanvayāt || 27.18 ||
tataḥ pravṛtte yuddhe ca devadānavayormahat |
indrādyā lokapālāstu skandaḥ senāpatistathā |
sarve devagaṇāścānye yuyudhuḥ samare tadā || 27.19 ||
taṃ dṛṣṭvā nāradā yuddhaṃ yayau nārāyaṇaṃ prati |
śaśaṃsa ca mahad yuddhaṃ kailāse dānavaiḥ saha || 27.20 ||
tacchrutvā cakramādāya garuḍastho janārdanaḥ |
tameva deśamāgatya yuyudhe dānavaiḥ saha || 27.21 ||
āgatya ca tato devā hariṇāpyāyitā raṇe |
viṣaṇṇavadanāḥ sarve palāyanaparā bhavan || 27.22 ||
tatra bhagneṣu deveṣu svayaṃ rudro'ndhakaṃ yayau |
tatra tena mahadyuddhamabhavallomaharṣaṇam || 27.23 ||
tatra devo'pyasau daityaṃ triśūlenāhanad bhṛśam |
tasyāhatasya yad raktamapatad bhūtale kila |
tatrāndhakā asaṃkhyātā babhūvurapare bhṛśam || 27.24 ||
tad dṛṣṭvā mahadāścaryaṃ rudro śūle'ndhakaṃ mṛdhe |
gṛhītvā triśikhāgreṇa nanartta parameśvaraḥ || 27.25 ||
itare'pyandhakāḥ sarve cakreṇa parameṣṭhinā |
nārāyaṇena nihatāstatra ye'nye samutthitāḥ | 27.26 ||
asṛgdhārātuṣāraistu śūlaprotasya cāsakṛt |
anārataṃ samuttasthustato rudro ruṣānvitaḥ || 27.27 ||
tasya krodhena mahatā mukhājjvālā viniryayau |
tadrūpadhāriṇī devī yāṃ tāṃ yogeśvarīṃ viduḥ || 27.28 ||
svarūpadhāriṇī cānyā viṣṇunāpi vinirmitā |
brahmaṇā kārtikeyena indreṇa ca yamena ca |
varāheṇa ca devena viṣṇunā parameṣṭhinā || 27.29 ||
pātāloddharaṇaṃ rūpaṃ tasyā devyā vinirmame |
māheśvarī ca rājendra ityetā aṣṭamārataḥ || 27.30 ||
kāraṇaṃ tāni yatproktaṃ kṣetrajñenāvadhāraṇam |
śarīrād devatānāṃ tu tadidaṃ kīrtitaṃ mayā || 27.31 ||
kāmaḥ krodhastathā lobho mado moho'tha pañcamaḥ |
mātsaryaṃ ṣaṣṭhamityāhuḥ paiśunyaṃ saptamaṃ tathā |
asūyā cā'ṣṭamī jñeyā ityetā aṣṭamātaraḥ || 27.32 ||
kāmaṃ yogeśvarīṃ viddhi krodho māheśvarīṃ tathā |
lobhastu vaiṣṇavī proktā brahmāṇī mada eva ca || 27.33 ||
mohaḥ svayaṃbhūḥ kaumārī mātsaryaṃ cendrajaṃ viduḥ |
yamadaṇḍadharā devī paiśunyaṃ svayameva ca |
asūyā ca varāhākhyā ityetāḥ parikīrtitāḥ || 27.34 ||
kāmādigaṇa eṣo'yaṃ śarīre parikīrtitaḥ |
jagrāha mūrttiṃ tu yathā tathā te kīrtitaṃ mayā || 27.35 ||
etābhirdevatābhiśca tasya rakte'tiśoṣite |
kṣayaṃ gatā''surī māyā sa ca siddho'ndhako'bhavat |
etat te sarvamākhyātamātmavidyā'mṛtaṃ mayā || 27.36 ||
ya etacchṛṇuyānnityaṃ mātṝṇāmudbhavaṃ śubham |
tasya tāḥ sarvato rakṣāṃ kurvantyanudinaṃ nṛpa || 27.37 ||
yaścaitat paṭhate janma mātṝṇāṃ puruṣottama |
sa dhanyaḥ sarvadā loke śivalokaṃ ca gacchati || 27.38 ||
tāsāṃ ca brahmaṇā dattā aṣṭamī tithiruttamā |
etāḥ saṃpūjayed bhaktyā bilvāhāro naraḥ sadā |
tasya tāḥ parituṣṭāstu kṣemārogyaṃ dadanti ca || 27.39 ||
|| iti śrīvarāhapurāṇe bhagavacchāstre saptaviṃśo'dhyāyaḥ || 27 ||
prajāpāla uvāca |
kathaṃ māyā samutpannā durgā kātyāyanī śubhā |
ādikṣetre sthitā sūkṣmā pṛthagmūrttā vyajāyata || 28.1 ||
mahātapā uvāca |
āsīd rājā purā rājan sindhudvīpaḥ pratāpavān |
varuṇāṃśo mahārāja so'raṇye tapasi sthitaḥ || 28.2 ||
putro me śakranāśāya bhavediti nāradhipaḥ |
evaṃ kṛtamatiḥ so'tha mahatā tapasā svakam |
kalevaraṃ sthito bhūtvā śoṣayāmāsa suvrata || 28.3 ||
prajāpāla uvāca |
kathaṃ tasya dvijaśreṣṭha śakreṇāpakṛtaṃ bhavet |
yenāsau tadvināśāya putramicchan vrate sthitaḥ || 28.4 ||
mahātapā uvāca |
so'nyajanmani putro'bhūt tvaṣṭurbalabhṛtāṃ varaḥ |
avadhyaḥ sarvaśastreṣu apāṃ phenena nāśitaḥ || 28.5 ||
jalaphenena nihatastasmi~llayamavāpnuyāt |
punarbrahmānvayājjātaḥ sindhudvīpeti saṃjñitaḥ |
sa tepe paramaṃ tīvraṃ śakravairamanusmaran || 28.6 ||
tataḥ kālena mahatā nadī vetravatī śubhā |
mānuṣaṃ rūpamāsthāya sālaṃkāraṃ manoramam |
ājagāma yato rājā tepe paramakaṃ tapaḥ || 28.7 ||
tāṃ dṛṣṭvā rūpasaṃpannāṃ sa rājā kruddhamānasaḥ |
uvāca kā'si suśroṇi satyaṃ kathaya bhāmini || 28.8 ||
nadyuvāca |
ahaṃ jalapateḥ patnī varuṇasya mahātmanaḥ |
nāmnā vetravatī puṇyā tvāmicchantīhamāgatā || 28.9 ||
sābhilāṣāṃ parastrīṃ ca bhajamānāṃ visarjjayet |
sa pāpaḥ puruṣo jñeyo brahmahatyāṃ ca vindati |
evaṃ jñātvā mahārāja bhajamānāṃ bhajasva mām || 28.10 ||
evamuktastayā rājā sābhilāṣopabhuktavān |
tasya sadyo'bhavat putro dvādaśārkasamaprabhaḥ || 28.11 ||
vetravatyudare jāto nāmnā vaitrāsuro'bhavat |
balavānatitejasvī prāgjyotiṣapatirbhavat || 28.12 ||
sa kālena yuvā jāto balavān dṛḍhavikramaḥ |
mahāyogena saṃyukto jigāyemāṃ vasuṃdharām || 28.13 ||
saptadvīpavatīṃ paścānmeruparvatamāruhat |
tatrendraṃ prathamaṃ jigye paścādagniṃ yamaṃ tataḥ |
nirṛtiṃ varuṇaṃ vāyuṃ dhanadaśceśvaraṃ tataḥ || 28.14 ||
indro bhagno gataḥ sogniṃ agnirbhagno yamaṃ yayau |
yamo nirṛtimāgacchannirṛtirvaruṇaṃ yayau || 28.15 ||
indrādibhirupetastu varuṇo vāyumanvagāt |
vāyurdhanapatiṃ tvāgāt sarvairindrādibhiḥ saha || 28.16 ||
dhanado'pi svakaṃ mitramīśaṃ devasamanvitaḥ |
iyāya gadayā so'pi dānavo baladarpitaḥ |
gadāmādāya dudrāva śivalokaṃ prati prabho || 28.17 ||
śivo'pyavadhyaṃ taṃ matvā devān guhya yayau purīm |
brahmaṇaḥ surasiddhādyairvanditāṃ puṇyakāribhiḥ || 28.18 ||
tatra brahmā jagatstraṣṭā viṣṇupādodbhave jale |
niyāmitākāśagato japatyantarjale śubhe |
kṣetrajñamāyāṃ gāyatrīṃ tato devā vicukruśuḥ || 28.19 ||
trāhi prajāpate sarvān devānṛṣivarānapi |
asurādbhayamāpannān trāhi trāhītyacodayan || 28.20 ||
evamuktastadā brahmā dṛṣṭvā devāṃstadāgatān |
cintayāmāsa devasya māyeyaṃ vitataṃ jagat |
nāsurā na surāścātra māyeyaṃ kīdṛśī matā || 28.21 ||
evaṃ cintayatastasya prādurāsīdayonijā |
śuklāmbaradharā kanyā strakkirīṭojjvalānanā |
aṣṭabhirbāhubhiryuktā divyapraharaṇodyatā || 28.22 ||
cakraṃ śaṅkhaṃ gadāṃ pāśaṃ khaṅgaṃ ghaṇṭāṃ tathā dhanuḥ |
dhārayantī tathā cānyān baddhatūṇā jalād bahiḥ || 28.23 ||
niścakrāma mahādevī siṃhavāhanavegitā |
yuyudhe cāsurān sarvānekaiva bahudhā sthitā || 28.24 ||
divyaṃ varṣasahastraṃ tu divyairastrairmahābalam |
yuddhvā kālātyaye devyā hato vaitrāsuro raṇe |
tataḥ kilakilāśabdo devasainye'bhavanmahān || 28.25 ||
hate vaitrāsure bhīme tadā sarve divaukasaḥ |
praṇemurjaya yuddheti svayamīśaḥ stutiṃ jagau || 28.26 ||
maheśvara uvāca |
jayasva devi gāyatre mahāmāye mahāprabhe |
mahādevi mahābhāge mahāsattve mahotsave || 28.27 ||
divyagandhānuliptāṅgi divyastragdāmabhūṣite |
vedamātarnamastubhyaṃ tryakṣarasthe maheśvari || 28.28 ||
trilokasthe tritattvasthe trivahnisthe triśūlini |
trinetre bhīmavaktre ca bhīmanetre bhayānake |
kamalāsanaje devi sarasvati namo'stu te || 28.29 ||
namaḥ paṅkajapatrākṣi mahāmāye'mṛtastrave |
sarvage sarvabhūteśi svāhākāre svadhe'mbike || 28.30 ||
saṃpūrṇe pūrṇacandrābhe bhāsvarāṅge bhavodbhave |
mahāvidye mahāvedye mahādaityavināśini |
mahābuddhyudbhave devi vītaśoke kirātini || 28.31 ||
tvaṃ nītistvaṃ mahābhāge tvaṃ gīstvaṃ gaustvamakṣaram |
tvaṃ dhīstvaṃ śrīstvamoṅkārastattve cāpi paristhitā |
sarvasattvāhite devi namaste parameśvari || 28.32 ||
ityevaṃ saṃstutā devī bhavena parameṣṭhinā |
devairapi jayetyuccairityuktā parameśvarī || 28.33 ||
yāvadāste caturvaktrastāvadantarjalād bahiḥ |
niścakrāma tato devīṃ kṛtakṛtyāṃ dadarśa saḥ || 28.34 ||
tāṃ dṛṣṭvā devakāryaṃ ca siddhaṃ matvā pitāmahaḥ |
bhaviṣyaṃ kāryamuddiśya tato vacanamabravīt || 28.35 ||
brahmovāca |
iyaṃ devī varārohā yātu śailaṃ himodbhavam |
tatra yūyaṃ surāḥ sarve gatvā nandata māciram || 28.36 ||
navamyāṃ ca sadā pūjyā iyaṃ devī samādhinā |
varadā sarvalokānāṃ bhaviṣyati na saṃśayaḥ || 28.37 ||
navamyāṃ yaśca piṣṭāśī bhaviṣyati hi mānavaḥ |
nārī vā tasya saṃpannaṃ bhaviṣyati manogatam || 28.38 ||
yaśca sāyaṃ tathā prātaridaṃ stotraṃ paṭhiṣyati |
tvayeritaṃ mahādeva tasya devyā samaṃ bhavān || 28.39 ||
varado deva sarvāsu āpatsvapyuddharasva tam |
evamuktvā bhavaṃ brahmā punardevīṃ sa cābravīt || 28.40 ||
tvayā devi mahatkāryaṃ kartavyaṃ cānyadasti naḥ |
bhaviṣyaṃ mahiṣākhyasya asurasya vināśanam || 28.41 ||
evamuktvā tato brahmā sarve devāśca pārthiva |
yathāgataṃ tato jagmurddevīṃ sthāpya hime girau |
saṃsthāpya nanditā yasmāt tasmānnandā'bhavat tu sā || 28.42 ||
yaścedaṃ śrṛṇuyājjanma devyā yaśca svayaṃ paṭhet |
sarvapāpavinirmuktaḥ paraṃ nirvāṇamṛcchati || 28.43 ||
|| iti śrīvarāhapurāṇe bhagavacchāstre aṣṭāviṃśo'dhyāyaḥ || 28 ||
mahātapā uvāca |
śrṛṇu rājannavahitaḥ prajāpāla kathāmimām |
yadā diśaḥ samutpannāḥ śrotrebhyaḥ pṛthivīpate || 29.1 ||
brahmaṇaḥ sṛjataḥ sṛṣṭimādisarge samutthite |
cintābhūnmahatī ko me prajāḥ sṛṣṭā dhariṣyati || 29.2 ||
evaṃ cintayatastasya avakāśaṃ prajāsviha |
prādurbabhūvuḥ śrotrebhyaḥ daśa kanyā mahāprabhāḥ || 29.3 ||
pūrvā ca dakṣiṇā caiva pratīcī cottarā tathā |
ūrdhvā'dharā ca ṣaṇmukhyāḥ kanyā hyāsaṃstadā nṛpa || 29.4 ||
anyāścatastrasteṣāṃ tu kanyāḥ paramaśobhanāḥ |
rūpasvinyo mahābhāgā gāmbhīryeṇa samanvitāḥ || 29.5 ||
tā ūcuḥ praṇayād devaṃ prajāpatimakalmaṣam |
avakāśaṃ tu no dehi devadeva prajāpate || 29.6 ||
yatra tiṣṭhāmahe sarvā bhartṛbhiḥ sahitāḥ sukham |
patayaśca mahābhāgā dehi no'vyaktasaṃbhava || 29.7 ||
brahmovāca |
brahmāṇḍametat suśroṇyaḥ śatakoṭipravistaram |
tasyānte svecchayā bhadrā uṣyatāṃ mā vilambata || 29.8 ||
bhartṝṃśca vaḥ prayacchāmi sṛṣṭvā rūpasvino'naghāḥ |
yatheṣṭaṃ gamyatāṃ deśo yasyā yo rocate'dhunā || 29.9 ||
evamuktāśca tāḥ sarvā yatheṣṭaṃ prayayustadā |
brahmāpi sasṛje tūrṇaṃ lokapālān mahābalān || 29.10 ||
sṛṣṭvā tu lokapālāṃstu tāḥ kanyāḥ punarāhvayat |
vivāhaṃ kārayāmāsa brahmā lokapitāmahaḥ || 29.11 ||
ekāmindrāya sa prādādagnaye'nyāṃ yamāya ca |
nirṛtāya ca devāya varuṇāya mahātmane || 29.12 ||
vāyave dhanadeśāya īśānāya ca suvrata |
ūrddhvāṃ svayamadhiṣṭhāya śeṣāyādho vyavasthitām || 29.13 ||
evaṃ dattvā punarbrahmā tithiṃ prādād diśāṃ punaḥ |
daśamīṃ bhartṛnāmnastu dadhyannaṃ bhojanaṃ prabhuḥ || 29.14 ||
tataḥ prabhṛti tā devyaḥ sendrādyāḥ parikīrtitāḥ |
daśamī ca tithistāsāmatīva dayitābhavat || 29.15 ||
tasyāṃ dadhyāśano yastu suvratī bhavate naraḥ |
tasya pāpakṣayaṃ tāstu kurvantyaharaharnṛpa || 29.16 ||
yaścaitacchṛṇuyājjanma diśāṃ niyatamānasaḥ |
sa pratiṣṭhāmavāpnoti brahmaloke na saṃśayaḥ || 29.17 ||
|| iti śrīvarāhapurāṇe bhagavacchāstre ekonatriṃśo'dhyāyaḥ || 29 ||
mahātapā uvāca |
śrṛṇu cānyāṃ vasupaterutpattiṃ pāpanāśinīm |
yathā vāyuḥ śarīrastho dhanadaḥ saṃbabhūva ha || 30.1 ||
ādyaṃ śarīraṃ yat tasmin vāyurantaḥ sthito'bhavat |
prayojanānmūrttimattvamādiṣṭaṃ kṣetradevatā || 30.2 ||
tatra mūrttasya vāyostu utpattiḥ kīrttyaye mayā |
tāṃ śrṛṇuṣva mahābhāga kathyamānāṃ mayānagha || 30.3 ||
brahmaṇaḥ sṛṣṭikāmasya mukhād vāyurviniryayau |
pracaṇḍaśarkarāvarṣī taṃ brahmā pratyaṣedhayat |
mūrtto bhavasva śāntaśca tatrokto mūrttimān bhavat || 30.4 ||
sarveṣāṃ caiva devānāṃ yad vittaṃ phalameva ca |
tatsarvaṃ pāhi yenoktaṃ tasmād dhanapatirbhavat || 30.5 ||
tasya brahmā dadau tuṣṭastithimekādaśīṃ prabhuḥ |
tasyāmanagnipakvāśī yo bhavenniyataḥ śuciḥ || 30.6 ||
tasyāśu dhanado devastuṣṭaḥ sarvaṃ prayacchati |
eṣā dhanapatermūrtiḥ sarvakilbiṣanāśinī || 30.7 ||
ya etāṃ śrṛṇuyād bhaktyā puruṣaḥ paṭhate'pi vā |
sarvakāmamavāpnoti svargalokaṃ ca gacchati || 30.8 ||
|| iti śrīvarāhapurāṇe bhagavacchāstre triṃśo'dhyāyaḥ || 30 ||