Rigveda — Mandala 10

7 trita āptyaḥ agniḥ| triṣṭup|
agrḙ bṛ̱hannu̱ṣasā̭mū̱rdhvo a̭sthānnirjaga̱nvāntama̭so̱ jyoti̱ṣāgā̭t |
a̱gnirbhā̱nunā̱ ruśa̭tā̱ svaṅga̱ ā jā̱to viśvā̱ sadmā̭nyaprāḥ ||1||
sa jā̱to garbho̭ asi̱ roda̭syo̱ragne̱ cāru̱rvibhṛ̭ta̱ oṣa̭dhīṣu |
ci̱traḥ śiśu̱: pari̱ tamā̭ṃsya̱ktūnpra mā̱tṛbhyo̱ adhi̱ kani̭kradadgāḥ ||2||
viṣṇṷri̱tthā pa̭ra̱mama̭sya vi̱dvāñjā̱to bṛ̱hanna̱bhi pā̭ti tṛ̱tīya̭m |
ā̱sā yada̭sya̱ payo̱ akra̭ta̱ svaṃ sacḙtaso a̱bhya̭rca̱ntyatra̭ ||3||
ata̭ u tvā pitu̱bhṛto̱ jani̭trīrannā̱vṛdha̱ṃ prati̭ cara̱ntyannai̭: |
tā ī̱ṃ pratyḙṣi̱ puna̭ra̱nyarṷ̄pā̱ asi̱ tvaṃ vi̱kṣu mānṷṣīṣu̱ hotā̭ ||4||
hotā̭raṃ ci̱trara̭thamadhva̱rasya̭ ya̱jñasya̭yajñasya ke̱tuṃ ruśa̭ntam |
 pratya̭rdhiṃ de̱vasya̭devasya ma̱hnā śri̱yā tva1gnimati̭thi̱ṃ janā̭nām ||5||
sa tu vastrā̱ṇyadha̱ peśa̭nāni̱ vasā̭no a̱gnirnābhā̭ pṛthi̱vyāḥ |
a̱ru̱ṣo jā̱taḥ pa̱da iḻā̭yāḥ pu̱rohi̭to rājanyakṣī̱ha de̱vān ||6||
ā hi dyāvā̭pṛthi̱vī a̭gna u̱bhe sadā̭ pu̱tro na mā̱tarā̭ ta̱tantha̭ |
pra yā̱hyaccho̭śa̱to ya̭vi̱ṣṭhā'thā va̭ha sahasye̱ha de̱vān ||7||
7 trita āptyaḥ| agniḥ| triṣṭup|
pi̱prī̱hi de̱vā~ ṷśa̱to ya̭viṣṭha vi̱dvā~ ṛ̱tū~ṝ̭tupate yaje̱ha |
 ye daivyā̭ ṛ̱tvija̱stebhi̭ragne̱ tvaṃ hotṝ̭ṇāma̱syāya̭jiṣṭhaḥ ||1||
veṣi̭ ho̱tramu̱ta po̱traṃ janā̭nāṃ mandhā̱tāsi̭ draviṇo̱dā ṛ̱tāvā̭ |
svāhā̭ va̱yaṃ kṛ̱ṇavā̭mā ha̱vīṃṣi̭ de̱vo de̱vānya̭jatva̱gnirarha̭n ||2||
ā de̱vānā̱mapi̱ panthā̭maganma̱ yaccha̱knavā̭ma̱ tadanu̱ pravo̭ḻhum |
a̱gnirvi̱dvāntsa ya̭jā̱tsedu̱ hotā̱ so a̭dhva̱rāntsa ṛ̱tūnka̭lpayāti ||3||
yadvo̭ va̱yaṃ pra̭mi̱nāma̭ vra̱tāni̭ vi̱duṣā̭ṃ devā̱ avi̭duṣṭarāsaḥ |
a̱gniṣṭadviśva̱mā pṛ̭ṇāti vi̱dvānyebhi̭rde̱vā~ ṛ̱tubhi̭: ka̱lpayā̭ti ||4||
yatpā̭ka̱trā mana̭sā dī̱nada̭kṣā̱ na ya̱jñasya̭ manva̱te martyā̭saḥ |
a̱gniṣṭaddhotā̭ kratu̱vidvi̭jā̱nanyaji̭ṣṭho de̱vā~ ṛ̭tu̱śo ya̭jāti ||5||
viśvḙṣā̱ṃ hya̭dhva̱rāṇā̱manī̭kaṃ ci̱traṃ ke̱tuṃ jani̭tā tvā ja̱jāna̭ |
 sa ā ya̭jasva nṛ̱vatī̱ranu̱ kṣā: spā̱rhā iṣa̭: kṣu̱matī̭rvi̱śvaja̭nyāḥ ||6||
yaṃ tvā̱ dyāvā̭pṛthi̱vī yaṃ tvāpa̱stvaṣṭā̱ yaṃ tvā̭ su̱jani̭mā ja̱jāna̭ |
panthā̱manṷ pravi̱dvānpi̭tṛ̱yāṇa̭ṃ dyu̱mada̭gne samidhā̱no vi bhā̭hi ||7||
7 trita āptyaḥ| agniḥ| triṣṭup|
i̱no rā̭jannara̱tiḥ sami̭ddho̱ raudro̱ dakṣā̭ya suṣu̱mā~ a̭darśi |
 ci̱kidvi bhā̭ti bhā̱sā bṛ̭ha̱tā'si̭knīmeti̱ ruśa̭tīma̱pāja̭n ||1||
kṛ̱ṣṇāṃ yadenī̭ma̱bhi varpa̭sā̱ bhūjja̱naya̱nyoṣā̭ṃ bṛha̱taḥ pi̱turjām |
ū̱rdhvaṃ bhā̱nuṃ sūrya̭sya stabhā̱yandi̱vo vasṷbhirara̱tirvi bhā̭ti ||2||
bha̱dro bha̱drayā̱ saca̭māna̱ āgā̱tsvasā̭raṃ jā̱ro a̱bhyḙti pa̱ścāt |
 su̱pra̱ke̱tairdyubhi̭ra̱gnirvi̱tiṣṭha̱nruśa̭dbhi̱rvarṇai̭ra̱bhi rā̱mama̭sthāt ||3||
a̱sya yāmā̭so bṛha̱to na va̱gnūnindhā̭nā a̱gneḥ sakhyṷ: śi̱vasya̭ |
 īḍya̭sya̱ vṛṣṇo̭ bṛha̱taḥ svāso̱ bhāmā̭so̱ yāma̭nna̱ktava̭ścikitre ||4||
sva̱nā na yasya̱ bhāmā̭sa̱: pava̭nte̱ roca̭mānasya bṛha̱taḥ su̱diva̭: |
 jyeṣṭhḙbhi̱ryasteji̭ṣṭhaiḥ krīḻu̱madbhi̱rvarṣi̭ṣṭhebhirbhā̱nubhi̱rnakṣa̭ti̱ dyām ||5||
a̱sya śuṣmā̭so dadṛśā̱napa̭ve̱rjeha̭mānasya svanayanni̱yudbhi̭: |
pra̱tnebhi̱ryo ruśa̭dbhirde̱vata̭mo̱ vi rebha̭dbhirara̱tirbhāti̱ vibhvā̭ ||6||
sa ā va̭kṣi̱ mahi̭ na̱ ā ca̭ satsi di̱vaspṛ̭thi̱vyora̭ra̱tiryṷva̱tyoḥ |
a̱gniḥ su̱tuka̭: su̱tukḙbhi̱raśvai̱ rabha̭svadbhī̱ rabha̭svā̱~ eha ga̭myāḥ ||7||
7 trita āptyaḥ| agniḥ| triṣṭup|
pra tḙ yakṣi̱ pra ta̭ iyarmi̱ manma̱ bhuvo̱ yathā̱ vandyo̭ no̱ havḙṣu |
dhanva̭nniva pra̱pā a̭si̱ tvama̭gna iya̱kṣavḙ pū̱ravḙ pratna rājan ||1||
yaṃ tvā̱ janā̭so a̱bhi sa̱ṃcara̭nti̱ gāva̭ u̱ṣṇami̭va vra̱jaṃ ya̭viṣṭha |
dū̱to de̱vānā̭masi̱ martyā̭nāma̱ntarma̱hā~śca̭rasi roca̱nena̭ ||2||
śiśu̱ṃ na tvā̱ jenya̭ṃ va̱rdhaya̭ntī mā̱tā bi̭bharti sacana̱syamā̭nā |
dhano̱radhi̭ pra̱vatā̭ yāsi̱ harya̱ñjigī̭ṣase pa̱śuri̱vāva̭sṛṣṭaḥ ||3||
mū̱rā a̭mūra̱ na va̱yaṃ ci̭kitvo mahi̱tvama̭gne̱ tvama̱ṅga vi̭tse |
śayḙ va̱vriścara̭ti ji̱hvayā̱danrḙri̱hyatḙ yuva̱tiṃ vi̱śpati̱: san ||4||
kūci̭jjāyate̱ sana̭yāsu̱ navyo̱ vanḙ tasthau pali̱to dhū̱makḙtuḥ |
 a̱snā̱tāpo̭ vṛṣa̱bho na pra vḙti̱ sacḙtaso̱ yaṃ pra̱ṇaya̭nta̱ martā̭: ||5||
ta̱nū̱tyajḙva̱ taska̭rā vana̱rgū ra̭śa̱nābhi̭rda̱śabhi̭ra̱bhya̭dhītām |
i̱yaṃ tḙ agne̱ navya̭sī manī̱ṣā yu̱kṣvā ratha̱ṃ na śu̱caya̭dbhi̱raṅgai̭: ||6||
brahma̭ ca te jātavedo̱ nama̭śce̱yaṃ ca̱ gīḥ sada̱midvardha̭nī bhūt |
rakṣā̭ ṇo agne̱ tana̭yāni to̱kā rakṣo̱ta na̭sta̱nvo̱3 apra̭yucchan ||7||
7 trita āptyaḥ| agniḥ| triṣṭup|
eka̭: samu̱dro dha̱ruṇo̭ rayī̱ṇāma̱smaddhṛ̱do bhūri̭janmā̱ vi ca̭ṣṭe |
siṣa̱ktyūdha̭rni̱ṇyoru̱pastha̱ utsa̭sya̱ madhye̱ nihi̭taṃ pa̱daṃ veḥ ||1||
sa̱mā̱naṃ nī̱ḻaṃ vṛṣa̭ṇo̱ vasā̭nā̱: saṃ ja̭gmire mahi̱ṣā arva̭tībhiḥ |
ṛ̱tasya̭ pa̱daṃ ka̱vayo̱ ni pā̭nti̱ guhā̱ nāmā̭ni dadhire̱ parā̭ṇi ||2||
ṛ̱tā̱yinī̭ mā̱yinī̱ saṃ da̭dhāte mi̱tvā śiśṷṃ jajñaturva̱rdhaya̭ntī |
viśva̭sya̱ nābhi̱ṃ cara̭to dhru̱vasya̭ ka̱veści̱ttantu̱ṃ mana̭sā vi̱yanta̭: ||3||
ṛ̱tasya̱ hi va̭rta̱naya̱: sujā̭ta̱miṣo̱ vājā̭ya pra̱diva̱: saca̭nte |
a̱dhī̱vā̱saṃ roda̭sī vāvasā̱ne ghṛ̱tairannai̭rvāvṛdhāte̱ madhṷ̄nām ||4||
sa̱pta svasṝ̱rarṷṣīrvāvaśā̱no vi̱dvānmadhva̱ ujja̭bhārā dṛ̱śe kam |
a̱ntaryḙme a̱ntari̭kṣe purā̱jā i̱cchanva̱vrima̭vidatpūṣa̱ṇasya̭ ||5||
sa̱pta ma̱ryādā̭: ka̱vaya̭statakṣu̱stāsā̱mekā̱mida̱bhya̭ṃhu̱ro gā̭t |
ā̱yorha̭ ska̱mbha ṷpa̱masya̭ nī̱ḻe pa̱thāṃ vi̭sa̱rge dha̱ruṇḙṣu tasthau ||6||
asa̭cca̱ sacca̭ para̱me vyo̭ma̱ndakṣa̭sya̱ janma̱nnadi̭teru̱pasthḙ |
a̱gnirha̭ naḥ prathama̱jā ṛ̱tasya̱ pūrva̱ āyṷni vṛṣa̱bhaśca̭ dhe̱nuḥ ||7||
7 trita āptyaḥ| agniḥ| triṣṭup|
a̱yaṃ sa yasya̱ śarma̱nnavo̭bhira̱gneredha̭te jari̱tābhiṣṭaṷ |
jyeṣṭhḙbhi̱ryo bhā̱nubhi̭ṝṣū̱ṇāṃ pa̱ryeti̱ pari̭vīto vi̱bhāvā̭ ||1
yo bhā̱nubhi̭rvi̱bhāvā̭ vi̱bhātya̱gnirde̱vebhi̭ṝ̱tāvāja̭sraḥ |
ā yo vi̱vāya̭ sa̱khyā sakhi̱bhyo'pa̭rihvṛto̱ atyo̱ na sapti̭: ||2||
īśe̱ yo viśva̭syā de̱vavī̭te̱rīśḙ vi̱śvāyṷru̱ṣaso̱ vyṷṣṭau | ā yasmi̭nma̱nā ha̱vīṃṣya̱gnāvari̭ṣṭarathaḥ ska̱bhnāti̭ śū̱ṣaiḥ ||3||
śū̱ṣebhi̭rvṛ̱dho jṷṣā̱ṇo a̱rkairde̱vā~ acchā̭ raghu̱patvā̭ jigāti |
ma̱ndro hotā̱ sa ju̱hvā̱3 yaji̭ṣṭha̱: sammi̭ślo a̱gnirā ji̭gharti de̱vān ||4||
tamu̱srāmindra̱ṃ na reja̭mānama̱gniṃ gī̱rbhirnamo̭bhi̱rā kṛ̭ṇudhvam |
ā yaṃ viprā̭so ma̱tibhi̭rgṛ̱ṇanti̭ jā̱tavḙdasaṃ ju̱hva̭ṃ sa̱hānā̭m ||5||
saṃ yasmi̱nviśvā̱ vasṷ̄ni ja̱gmurvāje̱ nāśvā̱: saptī̭vanta̱ evai̭: |
a̱sme ū̱tīrindra̭vātatamā arvācī̱nā a̭gna̱ ā kṛ̭ṇuṣva ||6||
adhā̱ hya̭gne ma̱hnā ni̱ṣadyā̭ sa̱dyo ja̭jñā̱no havyo̭ ba̱bhūtha̭ |
taṃ tḙ de̱vāso̱ anu̱ keta̭māya̱nnadhā̭vardhanta pratha̱māsa̱ ūmā̭: ||7||
7 trita āptyaḥ| agniḥ| triṣṭup|
sva̱sti no̭ di̱vo a̭gne pṛthi̱vyā vi̱śvāyṷrdhehi ya̱jathā̭ya deva |
sacḙmahi̱ tava̭ dasma prake̱tairṷru̱ṣyā ṇa̭ u̱rubhi̭rdeva̱ śaṃsai̭: ||1||
i̱mā a̭gne ma̱taya̱stubhya̭ṃ jā̱tā gobhi̱raśvai̭ra̱bhi gṛ̭ṇanti̱ rādha̭: |
ya̱dā te̱ marto̱ anu̱ bhoga̱māna̱ḍvaso̱ dadhā̭no ma̱tibhi̭: sujāta ||2||
a̱gniṃ ma̭nye pi̱tara̭ma̱gnimā̱pima̱gniṃ bhrāta̭ra̱ṃ sada̱mitsakhā̭yam |
a̱gneranī̭kaṃ bṛha̱taḥ sa̭paryaṃ di̱vi śu̱kraṃ ya̭ja̱taṃ sūrya̭sya ||3||
si̱dhrā a̭gne̱ dhiyo̭ a̱sme sanṷtrī̱ryaṃ trāya̭se̱ dama̱ ā nitya̭hotā |
ṛ̱tāvā̱ sa ro̱hida̭śvaḥ puru̱kṣurdyubhi̭rasmā̱ aha̭bhirvā̱mama̭stu ||4||
dyubhi̭rhi̱taṃ mi̱trami̭va pra̱yoga̭ṃ pra̱tnamṛ̱tvija̭madhva̱rasya̭ jā̱ram |
bā̱hubhyā̭ma̱gnimā̱yavo̭'jananta vi̱kṣu hotā̭ra̱ṃ nya̭sādayanta ||5||
sva̱yaṃ ya̭jasva di̱vi dḙva de̱vānkiṃ te̱ pāka̭: kṛṇava̱dapra̭cetāḥ |
yathāya̭ja ṛ̱tubhi̭rdeva de̱vāne̱vā ya̭jasva ta̱nva̭ṃ sujāta ||6||
bhavā̭ no agne'vi̱tota go̱pā bhavā̭ vaya̱skṛdu̱ta no̭ vayo̱dhāḥ |
rāsvā̭ ca naḥ sumaho ha̱vyadā̭ti̱ṃ trāsvo̱ta na̭sta̱nvo̱3 apra̭yucchan ||7||
9 triśirāstvāṣṭraḥ| agniḥ,7-9 indraḥ| triṣṭup|
pra ke̱tunā̭ bṛha̱tā yā̭tya̱gnirā roda̭sī vṛṣa̱bho ro̭ravīti |
di̱vaści̱dantā̭~ upa̱mā~ udā̭naḻa̱pāmu̱pasthḙ mahi̱ṣo va̭vardha ||1||
mu̱moda̱ garbho̭ vṛṣa̱bhaḥ ka̱kudmā̭nasre̱mā va̱tsaḥ śimī̭vā~ arāvīt |
sa de̱vatā̱tyudya̭tāni kṛ̱ṇvantsveṣu̱ kṣayḙṣu pratha̱mo ji̭gāti ||2||
ā yo mū̱rdhāna̭ṃ pi̱trorara̭bdha̱ nya̭dhva̱re da̭dhire̱ sūro̱ arṇa̭: |
asya̱ patma̱nnarṷṣī̱raśva̭budhnā ṛ̱tasya̱ yonaṷ ta̱nvo̭ juṣanta ||3||
u̱ṣaṷṣo̱ hi va̭so̱ agra̱meṣi̱ tvaṃ ya̱mayo̭rabhavo vi̱bhāvā̭ |
ṛ̱tāya̭ sa̱pta da̭dhiṣe pa̱dāni̭ ja̱naya̭nmi̱traṃ ta̱nve̱3 svāyai̭ ||4||
bhuva̱ścakṣṷrma̱ha ṛ̱tasya̭ go̱pā bhuvo̱ varṷṇo̱ yadṛ̱tāya̱ veṣi̭ |
bhuvo̭ a̱pāṃ napā̭jjātavedo̱ bhuvo̭ dū̱to yasya̭ ha̱vyaṃ jujo̭ṣaḥ ||5||
bhuvo̭ ya̱jñasya̱ raja̭saśca ne̱tā yatrā̭ ni̱yudbhi̱: saca̭se śi̱vābhi̭: |
di̱vi mū̱rdhāna̭ṃ dadhiṣe sva̱rṣāṃ ji̱hvāma̭gne cakṛṣe havya̱vāha̭m ||6||
a̱sya tri̱taḥ kratṷnā va̱vre a̱ntari̱cchandhī̱tiṃ pi̱turevai̱: para̭sya |
sa̱ca̱syamā̭naḥ pi̱troru̱pasthḙ jā̱mi brṷvā̱ṇa āyṷdhāni veti ||7||
sa pitryā̱ṇyāyṷdhāni vi̱dvānindrḙṣita ā̱ptyo a̱bhya̭yudhyat |
tri̱śī̱rṣāṇa̭ṃ sa̱ptara̭śmiṃ jagha̱nvāntvā̱ṣṭrasya̭ ci̱nniḥ sa̭sṛje tri̱to gāḥ ||8||
bhūrīdindra̭ u̱dina̭kṣanta̱mojo'vā̭bhina̱tsatpa̭ti̱rmanya̭mānam |
tvā̱ṣṭrasya̭ cidvi̱śvarṷ̄pasya̱ gonā̭mācakrā̱ṇastrīṇi̭ śī̱rṣā parā̭ vark ||9||
9 triśirāstvāṣṭraḥ,sindhudvīpa āmbarīṣo vā| āpaḥ| gāyatrī,5 vardhamānā gāyatrī, 7 pratiṣṭhā gāyatrī, 8 -9 anuṣṭup|
āpo̱ hi ṣṭhā ma̭yo̱bhuva̱stā na̭ ū̱rje da̭dhātana | ma̱he raṇā̭ya̱ cakṣa̭se ||1||
yo va̭: śi̱vata̭mo̱ rasa̱stasya̭ bhājayate̱ha na̭: | u̱śa̱tīri̭va mā̱tara̭: ||2||
tasmā̱ ara̭ṃ gamāma vo̱ yasya̱ kṣayā̭ya̱ jinva̭tha | āpo̭ ja̱naya̭thā ca naḥ ||3||
śaṃ no̭ de̱vīra̱bhiṣṭa̭ya̱ āpo̭ bhavantu pī̱tayḙ | śaṃ yora̱bhi sra̭vantu naḥ ||4||
īśā̭nā̱ vāryā̭ṇā̱ṃ kṣaya̭ntīścarṣaṇī̱nām | a̱po yā̭cāmi bheṣa̱jam ||5||
a̱psu me̱ somo̭ abravīda̱ntarviśvā̭ni bheṣa̱jā | a̱gniṃ ca̭ vi̱śvaśa̭mbhuvam ||6||
āpa̭: pṛṇī̱ta bhḙṣa̱jaṃ varṷ̄thaṃ ta̱nve̱3 mama̭ | jyokca̱ sūrya̭ṃ dṛ̱śe ||7||
i̱damā̭pa̱: pra va̭hata̱ yatkiṃ ca̭ duri̱taṃ mayi̭ | yadvā̱hama̭bhidu̱droha̱ yadvā̭ śe̱pa u̱tānṛ̭tam ||8||
āpo̭ a̱dyānva̭cāriṣa̱ṃ rasḙna̱ sama̭gasmahi | paya̭svānagna̱ ā ga̭hi̱ taṃ mā̱ saṃ sṛ̭ja̱ varca̭sā ||9||
14 navamīvarjyānāmayujāṃ ṣaṣṭhyāśca vaivasvatī yamī ṛṣikā| yamaḥ| ṣaṣṭhīvarjyānāṃ yujāṃ navamyāśca vaivasvato yamaḥ ṛṣiḥ| yamī| triṣṭup, 13virāṭsthānā|
o ci̱tsakhā̭yaṃ sa̱khyā va̭vṛtyāṃ ti̱raḥ pu̱rū ci̭darṇa̱vaṃ ja̭ga̱nvān |
pi̱turnapā̭ta̱mā da̭dhīta ve̱dhā adhi̱ kṣami̭ prata̱raṃ dīdhyā̭naḥ ||1||
na te̱ sakhā̭ sa̱khyaṃ va̭ṣṭye̱tatsala̭kṣmā̱ yadviṣṷrūpā̱ bhavā̭ti |
ma̱haspu̱trāso̱ asṷrasya vī̱rā di̱vo dha̱rtāra̭ urvi̱yā pari̭ khyan ||2||
u̱śanti̭ ghā̱ te a̱mṛtā̭sa e̱tadeka̭sya cittya̱jasa̱ṃ martya̭sya |
 ni te̱ mano̱ mana̭si dhāyya̱sme janyu̱: pati̭sta̱nva1mā vi̭viśyāḥ ||3||
na yatpu̱rā ca̭kṛ̱mā kaddha̭ nū̱namṛ̱tā vada̭nto̱ anṛ̭taṃ rapema |
 ga̱ndha̱rvo a̱psvapyā̭ ca̱ yoṣā̱ sā no̱ nābhi̭: para̱maṃ jā̱mi tannaṷ ||4||
garbhe̱ nu naṷ jani̱tā dampa̭tī karde̱vastvaṣṭā̭ savi̱tā vi̱śvarṷ̄paḥ |
 naki̭rasya̱ pra mi̭nanti vra̱tāni̱ veda̭ nāva̱sya pṛ̭thi̱vī u̱ta dyauḥ ||5||
ko a̱sya vḙda pratha̱masyāhna̱: ka ī̭ṃ dadarśa̱ ka i̱ha pra vo̭cat |
bṛ̱hanmi̱trasya̱ varṷṇasya̱ dhāma̱ kadṷ brava āhano̱ vīcyā̱ nṝn ||6||
ya̱masya̭ mā ya̱myaṃ1 kāma̱ āga̭ntsamā̱ne yonaṷ saha̱śeyyā̭ya |
jā̱yeva̱ patyḙ ta̱nva̭ṃ riricyā̱ṃ vi ci̭dvṛheva̱ rathyḙva ca̱krā ||7||
na ti̭ṣṭhanti̱ na ni mi̭ṣantye̱te de̱vānā̱ṃ spaśa̭ i̱ha ye cara̭nti |
a̱nyena̱ madā̭hano yāhi̱ tūya̱ṃ tena̱ vi vṛ̭ha̱ rathyḙva ca̱krā ||8||
rātrī̭bhirasmā̱ aha̭bhirdaśasye̱tsūrya̭sya̱ cakṣu̱rmuhu̱runmi̭mīyāt |
di̱vā pṛ̭thi̱vyā mi̭thu̱nā saba̭ndhū ya̱mīrya̱masya̭ bibhṛyā̱dajā̭mi ||9||
ā ghā̱ tā ga̭cchā̱nutta̭rā yu̱gāni̱ yatra̭ jā̱maya̭: kṛ̱ṇava̱nnajā̭mi |
upa̭ barbṛhi vṛṣa̱bhāya̭ bā̱huma̱nyami̭cchasva subhage̱ pati̱ṃ mat ||10||
kiṃ bhrātā̭sa̱dyada̭nā̱thaṃ bhavā̭ti̱ kimu̱ svasā̱ yanniṝ̭tirni̱gacchā̭t |
kāma̭mūtā ba̱hve̱3tadra̭pāmi ta̱nvā̭ me ta̱nvaṃ1 saṃ pi̭pṛgdhi ||11||
na vā ṷ te ta̱nvā̭ ta̱nvaṃ1 saṃ pa̭pṛcyāṃ pā̱pamā̭hu̱ryaḥ svasā̭raṃ ni̱gacchā̭t |
a̱nyena̱ matpra̱muda̭: kalpayasva̱ na te̱ bhrātā̭ subhage vaṣṭye̱tat ||12||
ba̱to ba̭tāsi yama̱ naiva te̱ mano̱ hṛda̭yaṃ cāvidāma |
a̱nyā kila̱ tvāṃ ka̱kṣyḙva yu̱ktaṃ pari̭ ṣvajāte̱ libṷjeva vṛ̱kṣam ||13||
a̱nyamū̱ ṣu tvaṃ ya̭mya̱nya u̱ tvāṃ pari̭ ṣvajāte̱ libṷjeva vṛ̱kṣam |
tasya̭ vā̱ tvaṃ mana̭ i̱cchā sa vā̱ tavā'dhā̭ kṛṇuṣva sa̱ṃvida̱ṃ subha̭drām ||14||
9 āṅgirhavirdhānaḥ| agniḥ| jagatī, 7-9  triṣṭup|
vṛṣā̱ vṛṣṇḙ duduhe̱ doha̭sā di̱vaḥ payā̭ṃsi ya̱hvo adi̭te̱radā̭bhyaḥ |
viśva̱ṃ sa vḙda̱ varṷṇo̱ yathā̭ dhi̱yā sa ya̱jñiyo̭ yajatu ya̱jñiyā̭~ ṛ̱tūn ||1||
rapa̭dgandha̱rvīrapyā̭ ca̱ yoṣa̭ṇā na̱dasya̭ nā̱de pari̭ pātu me̱ mana̭: |
i̱ṣṭasya̱ madhye̱ adi̭ti̱rni dhā̭tu no̱ bhrātā̭ no jye̱ṣṭhaḥ pra̭tha̱mo vi vo̭cati ||2||
so ci̱nnu bha̱drā kṣu̱matī̱ yaśa̭svatyu̱ṣā ṷvāsa̱ mana̭ve̱ sva̭rvatī |
yadī̭mu̱śanta̭muśa̱tāmanu̱ kratṷma̱gniṃ hotā̭raṃ vi̱dathā̭ya̱ jīja̭nan ||3||
adha̱ tyaṃ dra̱psaṃ vi̱bhva̭ṃ vicakṣa̱ṇaṃ virābha̭radiṣi̱taḥ śye̱no a̭dhva̱re |
yadī̱ viśo̭ vṛ̱ṇatḙ da̱smamāryā̭ a̱gniṃ hotā̭ra̱madha̱ dhīra̭jāyata ||4||
sadā̭si ra̱ṇvo yava̭seva̱ puṣya̭te̱ hotrā̭bhiragne̱ manṷṣaḥ svadhva̱raḥ |
vipra̭sya vā̱ yaccha̭śamā̱na u̱kthyaṃ1 vāja̭ṃ sasa̱vā~ ṷpa̱yāsi̱ bhūri̭bhiḥ ||5||
udī̭raya pi̱tarā̭ jā̱ra ā bhaga̱miya̭kṣati harya̱to hṛ̱tta i̭ṣyati |
viva̭kti̱ vahni̭: svapa̱syatḙ ma̱khasta̭vi̱ṣyate̱ asṷro̱ vepa̭te ma̱tī ||6||
yastḙ agne suma̱tiṃ marto̱ akṣa̱tsaha̭saḥ sūno̱ ati̱ sa pra śṛ̭ṇve |
iṣa̱ṃ dadhā̭no̱ vaha̭māno̱ aśvai̱rā sa dyu̱mā~ ama̭vānbhūṣati̱ dyūn ||7||
yada̭gna e̱ṣā sami̭ti̱rbhavā̭ti de̱vī de̱veṣṷ yaja̱tā ya̭jatra |
ratnā̭ ca̱ yadvi̱bhajā̭si svadhāvo bhā̱gaṃ no̱ atra̱ vasṷmantaṃ vītāt ||8||
śru̱dhī no̭ agne̱ sada̭ne sa̱dhasthḙ yu̱kṣvā ratha̭ma̱mṛta̭sya dravi̱tnum |
ā no̭ vaha̱ roda̭sī de̱vapṷtre̱ māki̭rde̱vānā̱mapa̭ bhūri̱ha syā̭: ||9||
9 āṅgirhavirdhānaḥ| agniḥ|  triṣṭup|
dyāvā̭ ha̱ kṣāmā̭ pratha̱me ṛ̱tenā̭'bhiśrā̱ve bha̭vataḥ satya̱vācā̭ |
de̱vo yanmartā̭nya̱jathā̭ya kṛ̱ṇvantsīda̱ddhotā̭ pra̱tyaṅsvamasu̱ṃ yan ||1||
de̱vo de̱vānpa̭ri̱bhūṝ̱tena̱ vahā̭ no ha̱vyaṃ pra̭tha̱maści̭ki̱tvān |
 dhū̱makḙtuḥ sa̱midhā̱ bhāṛ̭jīko ma̱ndro hotā̱ nityo̭ vā̱cā yajī̭yān ||2||
svāvṛ̭gde̱vasyā̱mṛta̱ṃ yadī̱ gorato̭ jā̱tāso̭ dhārayanta u̱rvī |
viśvḙ de̱vā anu̱ tatte̱ yajṷrgurdu̱he yadenī̭ di̱vyaṃ ghṛ̱taṃ vāḥ ||3||
arcā̭mi vā̱ṃ vardhā̱yāpo̭ ghṛtasnū̱ dyāvā̭bhūmī śṛṇu̱taṃ ro̭dasī me |
ahā̱ yaddyāvo'sṷnīti̱maya̱nmadhvā̭ no̱ atra̭ pi̱tarā̭ śiśītām ||4||
kiṃ svi̭nno̱ rājā̭ jagṛhe̱ kada̱syā'ti̭ vra̱taṃ ca̭kṛmā̱ ko vi vḙda |
mi̱traści̱ddhi ṣmā̭ juhurā̱ṇo de̱vāñchloko̱ na yā̱tāmapi̱ vājo̱ asti̭ ||5||
du̱rmantvatrā̱mṛta̭sya̱ nāma̱ sala̭kṣmā̱ yadviṣṷrūpā̱ bhavā̭ti |
 ya̱masya̱ yo ma̱nava̭te su̱mantvagne̱ tamṛ̭ṣva pā̱hyapra̭yucchan ||6||
yasmi̭nde̱vā vi̱dathḙ mā̱daya̭nte vi̱vasva̭ta̱: sada̭ne dhā̱raya̭nte |
sūrye̱ jyoti̱rada̭dhurmā̱sya1ktūnpari̭ dyota̱niṃ ca̭rato̱ aja̭srā ||7||
yasmi̭nde̱vā manma̭ni sa̱ṃcara̭ntyapī̱cye̱3 na va̱yama̭sya vidma |
 mi̱tro no̱ atrādi̭ti̱ranā̭gāntsavi̱tā de̱vo varṷṇāya vocat ||8||
śru̱dhī no̭ agne̱ sada̭ne sa̱dhasthḙ yu̱kṣvā ratha̭ma̱mṛta̭sya dravi̱tnum |
ā no̭ vaha̱ roda̭sī de̱vapṷtre̱ māki̭rde̱vānā̱mapa̭ bhūri̱ha syā̭: ||9||
5 āṅgirhavirdhānaḥ| vivasvānādityo vā| havirdhāne| triṣṭup, 5 jagatī|
yu̱je vā̱ṃ brahma̭ pū̱rvyaṃ namo̭bhi̱rvi śloka̭ etu pa̱thyḙva sū̱reḥ |
śṛ̱ṇvantu̱ viśvḙ a̱mṛta̭sya pu̱trā ā ye dhāmā̭ni di̱vyāni̭ ta̱sthuḥ ||1||
ya̱me i̭va̱ yata̭māne̱ yadaita̱ṃ pra vā̭ṃ bhara̱nmānṷṣā deva̱yanta̭: |
ā sī̭data̱ṃ svamṷ lo̱kaṃ vidā̭ne svāsa̱sthe bha̭vata̱minda̭ve naḥ ||2||
pañca̭ pa̱dāni̭ ru̱po anva̭roha̱ṃ catṷṣpadī̱manvḙmi vra̱tena̭ |
a̱kṣarḙṇa̱ prati̭ mima e̱tāmṛ̱tasya̱ nābhā̱vadhi̱ saṃ pṷnāmi ||3||
de̱vebhya̱: kama̭vṛṇīta mṛ̱tyuṃ pra̱jāyai̱ kama̱mṛta̱ṃ nāvṛ̭ṇīta |
bṛha̱spati̭ṃ ya̱jñama̭kṛṇvata̱ ṛṣi̭ṃ pri̱yāṃ ya̱masta̱nvaṃ1 prāri̭recīt ||4||
sa̱pta kṣa̭ranti̱ śiśa̭ve ma̱rutva̭te pi̱tre pu̱trāso̱ apya̭vīvatannṛ̱tam |
 u̱bhe ida̭syo̱bhaya̭sya rājata u̱bhe ya̭tete u̱bhaya̭sya puṣyataḥ ||5||
16 vaivasvato yamaḥ| yamaḥ,6 aṅgiraḥpitratharvabhṛgusomāḥ,7-9 liṅgoktadevatāḥ pitaro vā,10-12 śvānau| triṣṭup,13,14,16, anuṣṭup,15bṛhatī|
pa̱re̱yi̱vāṃsa̭ṃ pra̱vato̭ ma̱hīranṷ ba̱hubhya̱: panthā̭manupaspaśā̱nam |
vai̱va̱sva̱taṃ sa̱ṃgama̭na̱ṃ janā̭nāṃ ya̱maṃ rājā̭naṃ ha̱viṣā̭ duvasya ||1||
ya̱mo no̭ gā̱tuṃ pra̭tha̱mo vi̭veda̱ naiṣā gavyṷ̄ti̱rapa̭bharta̱vā ṷ |
yatrā̭ na̱: pūrvḙ pi̱tara̭: pare̱yure̱nā ja̭jñā̱nāḥ pa̱thyā̱3 anu̱ svāḥ ||2||
māta̭lī ka̱vyairya̱mo aṅgi̭robhi̱rbṛha̱spati̱ṝkva̭bhirvāvṛdhā̱naḥ |
yā~śca̭ de̱vā vā̭vṛ̱dhurye ca̭ de̱vāntsvāhā̱nye sva̱dhayā̱nye ma̭danti ||3||
i̱maṃ ya̭ma prasta̱ramā hi sīdā'ṅgi̭robhiḥ pi̱tṛbhi̭: saṃvidā̱naḥ |
ā tvā̱ mantrā̭: kaviśa̱stā va̭hantve̱nā rā̭janha̱viṣā̭ mādayasva ||4||
aṅgi̭robhi̱rā ga̭hi ya̱jñiyḙbhi̱ryama̭ vairū̱pairi̱ha mā̭dayasva |
viva̭svantaṃ huve̱ yaḥ pi̱tā te̱'sminya̱jñe ba̱rhiṣyā ni̱ṣadya̭ ||5||
aṅgi̭raso naḥ pi̱taro̱ nava̭gvā̱ atha̭rvāṇo̱ bhṛga̭vaḥ so̱myāsa̭: |
teṣā̭ṃ va̱yaṃ sṷma̱tau ya̱jñiyā̭nā̱mapi̭ bha̱dre saṷmana̱se syā̭ma ||6||
prehi̱ prehi̭ pa̱thibhi̭: pū̱rvyebhi̱ryatrā̭ na̱: pūrvḙ pi̱tara̭: pare̱yuḥ |
u̱bhā rājā̭nā sva̱dhayā̱ mada̭ntā ya̱maṃ pa̭śyāsi̱ varṷṇaṃ ca de̱vam ||7||
saṃ ga̭cchasva pi̱tṛbhi̱: saṃ ya̱menḙṣṭāpū̱rtena̭ para̱me vyo̭man |
hi̱tvāyā̭va̱dyaṃ puna̱rasta̱mehi̱ saṃ ga̭cchasva ta̱nvā̭ su̱varcā̭: ||8||
apḙta̱ vī̭ta̱ vi ca̭ sarpa̱tāto̱'smā e̱taṃ pi̱taro̭ lo̱kama̭kran |
aho̭bhira̱dbhira̱ktubhi̱rvya̭ktaṃ ya̱mo da̭dātyava̱sāna̭masmai ||9||
ati̭ drava sārame̱yau śvānaṷ catura̱kṣau śa̱balaṷ sā̱dhunā̭ pa̱thā |
athā̭ pi̱tṝntsṷvi̱datrā̱~ upḙhi ya̱mena̱ ye sa̭dha̱māda̱ṃ mada̭nti ||10||
yau te̱ śvānaṷ yama rakṣi̱tāraṷ catura̱kṣau pa̭thi̱rakṣī̭ nṛ̱cakṣa̭sau |
tābhyā̭mena̱ṃ pari̭ dehi rājantsva̱sti cā̭smā anamī̱vaṃ ca̭ dhehi ||11||
u̱rū̱ṇa̱sāva̭su̱tṛpā̭ udumba̱lau ya̱masya̭ dū̱tau ca̭rato̱ janā̱~ anṷ |
tāva̱smabhya̭ṃ dṛ̱śaye̱ sūryā̭ya̱ puna̭rdātā̱masṷma̱dyeha bha̱dram ||12||
ya̱māya̱ soma̭ṃ sunuta ya̱māya̭ juhutā ha̱viḥ | ya̱maṃ ha̭ ya̱jño ga̭cchatya̱gnidṷ̄to̱ ara̭ṃkṛtaḥ ||13||
ya̱māya̭ ghṛ̱tava̭ddha̱virju̱hota̱ pra ca̭ tiṣṭhata | sa no̭ de̱veṣvā ya̭maddī̱rghamāyu̱: pra jī̱vasḙ ||14||
ya̱māya̱ madhṷmattama̱ṃ rājñḙ ha̱vyaṃ jṷhotana | i̱daṃ nama̱ ṛṣi̭bhyaḥ pūrva̱jebhya̱: pūrvḙbhyaḥ pathi̱kṛdbhya̭: ||15||
trika̭drukebhiḥ patati̱ ṣaḻu̱rvīreka̱midbṛ̱hat | tri̱ṣṭubgā̭ya̱trī chandā̭ṃsi̱ sarvā̱ tā ya̱ma āhi̭tā ||16||
14 śaṅkho yāmāyanaḥ|pitaraḥ| triṣṭup ,11 jagatī|
udī̭ratā̱mava̭ra̱ utparā̭sa̱ unma̭dhya̱māḥ pi̱tara̭: so̱myāsa̭: |
asu̱ṃ ya ī̱yura̭vṛ̱kā ṛ̭ta̱jñāste no̭'vantu pi̱taro̱ havḙṣu ||1||
i̱daṃ pi̱tṛbhyo̱ namo̭ astva̱dya ye pūrvā̭so̱ ya upa̭rāsa ī̱yuḥ |
ye pārthi̭ve̱ raja̱syā niṣa̭ttā̱ ye vā̭ nū̱naṃ sṷvṛ̱janā̭su vi̱kṣu ||2||
āhaṃ pi̱tṝntsṷvi̱datrā̭~ avitsi̱ napā̭taṃ ca vi̱krama̭ṇaṃ ca̱ viṣṇo̭: |
ba̱rhi̱ṣado̱ ye sva̱dhayā̭ su̱tasya̱ bhaja̭nta pi̱tvasta i̱hāga̭miṣṭhāḥ ||3||
barhi̭ṣadaḥ pitara ū̱tya1rvāgi̱mā vo̭ ha̱vyā ca̭kṛmā ju̱ṣadhva̭m |
ta ā ga̱tāva̭sā̱ śaṃta̭me̱nā'thā̭ na̱: śaṃ yora̭ra̱po da̭dhāta ||4||
upa̭hūtāḥ pi̱tara̭: so̱myāso̭ barhi̱ṣyḙṣu ni̱dhiṣṷ pri̱yeṣṷ |
ta ā ga̭mantu̱ ta i̱ha śrṷva̱ntvadhi̭ bruvantu̱ tḙ'vantva̱smān ||5||
ācyā̱ jānṷ dakṣiṇa̱to ni̱ṣadye̱maṃ ya̱jñama̱bhi gṛ̭ṇīta̱ viśvḙ |
mā hi̭ṃsiṣṭa pitara̱: kena̭ cinno̱ yadva̱ āga̭: puru̱ṣatā̱ karā̭ma ||6||
āsī̭nāso aru̱ṇīnā̭mu̱pasthḙ ra̱yiṃ dha̭tta dā̱śuṣe̱ martyā̭ya |
 pu̱trebhya̭: pitara̱stasya̱ vasva̱: pra ya̭cchata̱ ta i̱horja̭ṃ dadhāta ||7||
ye na̱: pūrvḙ pi̱tara̭: so̱myāso̭'nūhi̱re so̭mapī̱thaṃ vasi̭ṣṭhāḥ |
tebhi̭rya̱maḥ sa̭ṃrarā̱ṇo ha̱vīṃṣyu̱śannu̱śadbhi̭: pratikā̱mama̭ttu ||8||
ye tā̭tṛ̱ṣurdḙva̱trā jeha̭mānā hotrā̱vida̱: stoma̭taṣṭāso a̱rkaiḥ |
āgnḙ yāhi suvi̱datrḙbhira̱rvāṅsa̱tyaiḥ ka̱vyaiḥ pi̱tṛbhi̭rgharma̱sadbhi̭: ||9||
ye sa̱tyāso̭ havi̱rado̭ havi̱ṣpā indrḙṇa de̱vaiḥ sa̱ratha̱ṃ dadhā̭nāḥ |
āgnḙ yāhi sa̱hasra̭ṃ devava̱ndaiḥ parai̱: pūrvai̭: pi̱tṛbhi̭rgharma̱sadbhi̭: ||10||
agni̭ṣvāttāḥ pitara̱ eha ga̭cchata̱ sada̭:sadaḥ sadata supraṇītayaḥ |
a̱ttā ha̱vīṃṣi̱ praya̭tāni ba̱rhiṣyathā̭ ra̱yiṃ sarva̭vīraṃ dadhātana ||11||
tvama̭gna īḻi̱to jā̭tave̱do'vā̭ḍḍha̱vyāni̭ sura̱bhīṇi̭ kṛ̱tvī |
prādā̭: pi̱tṛbhya̭: sva̱dhayā̱ te a̭kṣanna̱ddhi tvaṃ dḙva̱ praya̭tā ha̱vīṃṣi̭ ||12||
ye ce̱ha pi̱taro̱ ye ca̱ neha yā~śca̭ vi̱dma yā~ ṷ ca̱ na pra̭vi̱dma |
tvaṃ vḙttha̱ yati̱ te jā̭tavedaḥ sva̱dhābhi̭rya̱jñaṃ sukṛ̭taṃ juṣasva ||13||
ye a̭gnida̱gdhā ye ana̭gnidagdhā̱ madhyḙ di̱vaḥ sva̱dhayā̭ mā̱daya̭nte |
tebhi̭: sva̱rāḻasṷnītime̱tāṃ ya̭thāva̱śaṃ ta̱nva̭ṃ kalpayasva ||14||
14 damano yāmāyanaḥ| agniḥ| triṣṭup,11-14 anuṣṭup|
maina̭magne̱ vi da̭ho̱ mābhi śo̭co̱ māsya̱ tvaca̭ṃ cikṣipo̱ mā śarī̭ram |
ya̱dā śṛ̱taṃ kṛ̱ṇavo̭ jātave̱do'thḙmena̱ṃ pra hi̭ṇutātpi̱tṛbhya̭: ||1||
śṛ̱taṃ ya̱dā kara̭si jātave̱do'thḙmena̱ṃ pari̭ dattātpi̱tṛbhya̭: |
ya̱dā gacchā̱tyasṷnītime̱tāmathā̭ de̱vānā̭ṃ vaśa̱nīrbha̭vāti ||2||
sūrya̱ṃ cakṣṷrgacchatu̱ vāta̭mā̱tmā dyāṃ ca̭ gaccha pṛthi̱vīṃ ca̱ dharma̭ṇā |
 a̱po vā̭ gaccha̱ yadi̱ tatra̭ te hi̱tamoṣa̭dhīṣu̱ prati̭ tiṣṭhā̱ śarī̭raiḥ ||3||
a̱jo bhā̱gastapa̭sā̱ taṃ ta̭pasva̱ taṃ tḙ śo̱cista̭patu̱ taṃ tḙ a̱rciḥ |
yāstḙ śi̱vāsta̱nvo̭ jātaveda̱stābhi̭rvahainaṃ su̱kṛtā̭mu lo̱kam ||4||
ava̭ sṛja̱ puna̭ragne pi̱tṛbhyo̱ yasta̱ āhṷta̱ścara̭ti sva̱dhābhi̭: |
āyu̱rvasā̭na̱ upa̭ vetu̱ śeṣa̱: saṃ ga̭cchatāṃ ta̱nvā̭ jātavedaḥ ||5||
yattḙ kṛ̱ṣṇaḥ śa̭ku̱na ā̭tu̱toda̭ pipī̱laḥ sa̱rpa u̱ta vā̱ śvāpa̭daḥ |
a̱gniṣṭadvi̱śvāda̭ga̱daṃ kṛ̭ṇotu̱ soma̭śca̱ yo brā̭hma̱ṇā~ ā̭vi̱veśa̭ ||6||
a̱gnervarma̱ pari̱ gobhi̭rvyayasva̱ saṃ prorṇṷṣva̱ pīva̭sā̱ meda̭sā ca |
 nettvā̭ dhṛ̱ṣṇurhara̭sā̱ jarhṛ̭ṣāṇo da̱dhṛgvi̭dha̱kṣyanpa̭rya̱ṅkhayā̭te ||7||
i̱mama̭gne cama̱saṃ mā vi ji̭hvaraḥ pri̱yo de̱vānā̭mu̱ta so̱myānā̭m |
e̱ṣa yaśca̭ma̱so dḙva̱pāna̱stasmi̭nde̱vā a̱mṛtā̭ mādayante ||8||
kra̱vyāda̭ma̱gniṃ pra hi̭ṇomi dū̱raṃ ya̱marā̭jño gacchatu ripravā̱haḥ |
i̱haivāyamita̭ro jā̱tavḙdā de̱vebhyo̭ ha̱vyaṃ va̭hatu prajā̱nan ||9||
yo a̱gniḥ kra̱vyātpra̭vi̱veśa̭ vo gṛ̱hami̱maṃ paśya̱nnita̭raṃ jā̱tavḙdasam |
taṃ ha̭rāmi pitṛya̱jñāya̭ de̱vaṃ sa gha̱rmami̭nvātpara̱me sa̱dhasthḙ ||10||
yo a̱gniḥ kra̭vya̱vāha̭naḥ pi̱tṝnyakṣa̭dṛtā̱vṛdha̭: | predṷ ha̱vyāni̭ vocati de̱vebhya̭śca pi̱tṛbhya̱ ā ||11||
u̱śanta̭stvā̱ ni dhī̭mahyu̱śanta̱: sami̭dhīmahi | u̱śannṷśa̱ta ā va̭ha pi̱tṝnha̱viṣe̱ atta̭ve ||12||
yaṃ tvama̭gne sa̱mada̭ha̱stamu̱ nirvā̭payā̱ puna̭: | ki̱yāmbvatra̭ rohatu pākadū̱rvā vya̭lkaśā ||13||
śīti̭ke̱ śīti̭kāvati̱ hlādi̭ke̱ hlādi̭kāvati | ma̱ṇḍū̱kyā̱3 su saṃ ga̭ma i̱maṃ sva1gniṃ ha̭rṣaya ||14||
14 devaśravā yāmāyanaḥ| 1-2 saraṇyūḥ,3-6 pūṣā, 7-9 sarasvatī,10-14 āpaḥ, 11-13 somo vā| triṣṭup ,13-14 anuṣṭup, 13 purastādbṛhatī vā|
tvaṣṭā̭ duhi̱tre va̭ha̱tuṃ kṛ̭ṇo̱tītī̱daṃ viśva̱ṃ bhuva̭na̱ṃ samḙti |
ya̱masya̭ mā̱tā pa̭ryu̱hyamā̭nā ma̱ho jā̱yā viva̭svato nanāśa ||1||
apā̭gūhanna̱mṛtā̱ṃ martyḙbhyaḥ kṛ̱tvī sava̭rṇāmadadu̱rviva̭svate |
u̱tāśvinā̭vabhara̱dyattadāsī̱daja̭hādu̱ dvā mi̭thu̱nā sa̭ra̱ṇyūḥ ||2||
pū̱ṣā tve̱taścyā̭vayatu̱ pra vi̱dvānana̭ṣṭapaśu̱rbhuva̭nasya go̱pāḥ |
sa tvai̱tebhya̱: pari̭ dadatpi̱tṛbhyo̱'gnirde̱vebhya̭: suvida̱triyḙbhyaḥ ||3||
āyṷrvi̱śvāyu̱: pari̭ pāsati tvā pū̱ṣā tvā̭ pātu̱ prapa̭the pu̱rastā̭t |
yatrāsa̭te su̱kṛto̱ yatra̱ te ya̱yustatra̭ tvā de̱vaḥ sa̭vi̱tā da̭dhātu ||4||
pū̱ṣemā āśā̱ anṷ veda̱ sarvā̱: so a̱smā~ abha̭yatamena neṣat |
sva̱sti̱dā āghṛ̭ṇi̱: sarva̭vī̱ro'pra̭yucchanpu̱ra ḙtu prajā̱nan ||5||
prapa̭the pa̱thāma̭janiṣṭa pū̱ṣā prapa̭the di̱vaḥ prapa̭the pṛthi̱vyāḥ |
u̱bhe a̱bhi pri̱yata̭me sa̱dhasthe̱ ā ca̱ parā̭ ca carati prajā̱nan ||6||
sara̭svatīṃ deva̱yanto̭ havante̱ sara̭svatīmadhva̱re tā̱yamā̭ne |
sara̭svatīṃ su̱kṛto̭ ahvayanta̱ sara̭svatī dā̱śuṣe̱ vārya̭ṃ dāt ||7||
sara̭svati̱ yā sa̱ratha̭ṃ ya̱yātha̭ sva̱dhābhi̭rdevi pi̱tṛbhi̱rmada̭ntī |
ā̱sadyā̱sminba̱rhiṣi̭ mādayasvā'namī̱vā iṣa̱ ā dhḙhya̱sme ||8||
sara̭svatī̱ṃ yāṃ pi̱taro̱ hava̭nte dakṣi̱ṇā ya̱jñama̭bhi̱nakṣa̭māṇāḥ |
sa̱ha̱srā̱rghami̱ḻo atra̭ bhā̱gaṃ rā̱yaspoṣa̱ṃ yaja̭māneṣu dhehi ||9||
āpo̭ a̱smānmā̱tara̭: śundhayantu ghṛ̱tena̭ no ghṛta̱pva̭: punantu |
viśva̱ṃ hi ri̱praṃ pra̱vaha̭nti de̱vīrudidā̭bhya̱: śuci̱rā pū̱ta ḙmi ||10||
dra̱psaśca̭skanda pratha̱mā~ anu̱ dyūni̱maṃ ca̱ yoni̱manu̱ yaśca̱ pūrva̭: |
sa̱mā̱naṃ yoni̱manṷ sa̱ṃcara̭ntaṃ dra̱psaṃ jṷho̱myanṷ sa̱pta hotrā̭: ||11||
yastḙ dra̱psaḥ skanda̭ti̱ yastḙ a̱ṃśurbā̱hucyṷto dhi̱ṣaṇā̭yā u̱pasthā̭t |
a̱dhva̱ryorvā̱ pari̭ vā̱ yaḥ pa̱vitrā̱ttaṃ tḙ juhomi̱ mana̭sā̱ vaṣa̭ṭkṛtam ||12||
yastḙ dra̱psaḥ ska̱nno yastḙ a̱ṃśura̱vaśca̱ yaḥ pa̱raḥ sru̱cā | a̱yaṃ de̱vo bṛha̱spati̱: saṃ taṃ si̭ñcatu̱ rādha̭se ||13||
paya̭svatī̱roṣa̭dhaya̱: paya̭svanmāma̱kaṃ vaca̭: | a̱pāṃ paya̭sva̱ditpaya̱stena̭ mā sa̱ha śṷndhata ||14
14 saṃkusuko yāmāyanaḥ| 1-4 mṛtyuḥ,5 dhātā, 6 tvaṣṭā,7-14 pitṛmedhaḥ,14 prajāpatirvā| triṣṭup , 11 prastārapaṃktiḥ, 13 jagatī 14 anuṣṭup|
para̭ṃ mṛtyo̱ anu̱ parḙhi̱ panthā̱ṃ yaste̱ sva ita̭ro deva̱yānā̭t |
cakṣṷṣmate śṛṇva̱te tḙ bravīmi̱ mā na̭: pra̱jāṃ rī̭riṣo̱ mota vī̱rān ||1||
mṛ̱tyoḥ pa̱daṃ yo̱paya̭nto̱ yadaita̱ drāghī̭ya̱ āyṷ: prata̱raṃ dadhā̭nāḥ |
ā̱pyāya̭mānāḥ pra̱jayā̱ dhanḙna śu̱ddhāḥ pū̱tā bha̭vata yajñiyāsaḥ ||2||
i̱me jī̱vā vi mṛ̱tairāva̭vṛtra̱nnabhṷ̄dbha̱drā de̱vahṷ̄tirno a̱dya |
prāñco̭ agāma nṛ̱taye̱ hasā̭ya̱ drāghī̭ya̱ āyṷ: prata̱raṃ dadhā̭nāḥ ||3||
i̱maṃ jī̱vebhya̭: pari̱dhiṃ da̭dhāmi̱ maiṣā̱ṃ nu gā̱dapa̭ro̱ artha̭me̱tam |
śa̱taṃ jī̭vantu śa̱rada̭: purū̱cīra̱ntarmṛ̱tyuṃ da̭dhatā̱ṃ parva̭tena ||4||
yathāhā̭nyanupū̱rvaṃ bhava̭nti̱ yatha̭ ṛ̱tava̭ ṛ̱tubhi̱ryanti̭ sā̱dhu |
yathā̱ na pūrva̱mapa̭ro̱ jahā̭tye̱vā dhā̭ta̱rāyṷ̄ṃṣi kalpayaiṣām ||5||
ā ro̭ha̱tāyṷrja̱rasa̭ṃ vṛṇā̱nā a̭nupū̱rvaṃ yata̭mānā̱ yati̱ ṣṭha |
i̱ha tvaṣṭā̭ su̱jani̭mā sa̱joṣā̭ dī̱rghamāyṷ: karati jī̱vasḙ vaḥ ||6||
i̱mā nārī̭ravidha̱vāḥ su̱patnī̱rāñja̭nena sa̱rpiṣā̱ saṃ vi̭śantu |
a̱na̱śravo̭'namī̱vāḥ su̱ratnā̱ ā ro̭hantu̱ jana̭yo̱ yoni̱magrḙ ||7||
udī̭rṣva nārya̱bhi jī̭valo̱kaṃ ga̱tāsṷme̱tamupa̭ śeṣa̱ ehi̭ |
ha̱sta̱grā̱bhasya̭ didhi̱ṣostave̱daṃ patyṷrjani̱tvama̱bhi saṃ ba̭bhūtha ||8||
dhanu̱rhastā̭dā̱dadā̭no mṛ̱tasyā̱'sme kṣa̱trāya̱ varca̭se̱ balā̭ya |
atrai̱va tvami̱ha va̱yaṃ su̱vīrā̱ viśvā̱: spṛdho̭ a̱bhimā̭tīrjayema ||9||
upa̭ sarpa mā̱tara̱ṃ bhūmi̭me̱tāmṷru̱vyaca̭saṃ pṛthi̱vīṃ su̱śevā̭m |
ūrṇa̭mradā yuva̱tirdakṣi̭ṇāvata e̱ṣā tvā̭ pātu̱ niṝ̭teru̱pasthā̭t ||10||
ucchva̭ñcasva pṛthivi̱ mā ni bā̭dhathāḥ sūpāya̱nāsmai̭ bhava sūpavañca̱nā |
mā̱tā pu̱traṃ yathā̭ si̱cā'bhyḙnaṃ bhūma ūrṇuhi ||11||
u̱cchvañca̭mānā pṛthi̱vī su ti̭ṣṭhatu sa̱hasra̱ṃ mita̱ upa̱ hi śraya̭ntām |
te gṛ̱hāso̭ ghṛta̱ścuto̭ bhavantu vi̱śvāhā̭smai śara̱ṇāḥ sa̱ntvatra̭ ||12||
uttḙ stabhnāmi pṛthi̱vīṃ tvatparī̱maṃ lo̱gaṃ ni̱dadha̱nmo a̱haṃ ri̭ṣam |
e̱tāṃ sthūṇā̭ṃ pi̱taro̭ dhārayantu̱ te'trā̭ ya̱maḥ sāda̭nā te minotu ||13||
pra̱tī̱cīne̱ māmaha̱nīṣvā̭: pa̱rṇami̱vā da̭dhuḥ | pra̱tīcī̭ṃ jagrabhā̱ vāca̱maśva̭ṃ raśa̱nayā̭ yathā ||14||
8 mathito yāmāyanaḥ bhṛgurvāruṇirvā, bhārgavaścyavano vā| āpaḥ gāvo vā, 1 uttarārdharcasya agnīṣomau| anuṣṭup, 6 gāyatrī |
ni va̭rtadhva̱ṃ mānṷ gātā̱'smāntsi̭ṣakta revatīḥ | agnī̭ṣomā punarvasū a̱sme dhā̭rayataṃ ra̱yim ||1||
puna̭renā̱ ni va̭rtaya̱ puna̭renā̱ nyā kṷru | indra̭ eṇā̱ ni ya̭cchatva̱gnirḙnā u̱pāja̭tu ||2||
puna̭re̱tā ni va̭rtantāma̱sminpṷṣyantu̱ gopa̭tau | i̱haivāgne̱ ni dhā̭raye̱ha ti̭ṣṭhatu̱ yā ra̱yiḥ ||3||
yanni̱yāna̱ṃ nyaya̭naṃ sa̱ṃjñāna̱ṃ yatpa̱rāya̭ṇam | ā̱varta̭naṃ ni̱varta̭na̱ṃ yo go̱pā api̱ taṃ hṷve ||4||
ya u̱dāna̱ḍvyaya̭na̱ṃ ya u̱dāna̭ṭ pa̱rāya̭ṇam | ā̱varta̭naṃ ni̱varta̭na̱mapi̭ go̱pā ni va̭rtatām ||5||
ā ni̭varta̱ ni va̭rtaya̱ puna̭rna indra̱ gā dḙhi | jī̱vābhi̭rbhunajāmahai ||6||
pari̭ vo vi̱śvato̭ dadha ū̱rjā ghṛ̱tena̱ paya̭sā | ye de̱vāḥ ke ca̭ ya̱jñiyā̱ste ra̱yyā saṃ sṛ̭jantu naḥ ||7||
ā ni̭vartana vartaya̱ ni ni̭vartana vartaya | bhūmyā̱ścata̭sraḥ pra̱diśa̱stābhya̭ enā̱ ni va̭rtaya ||8||
10 aindro vimadaḥ prājāpatyo vā, vāsukro vasukṛdvā| agniḥ| gāyatrī, 1 ekapadā virāṭ (eṣa mantra: śāntyarthaḥ) 2anuṣṭup,9 virāṭ 10 triṣṭup|
bha̱draṃ no̱ api̭ vātaya̱ mana̭: ||1||
a̱gnimī̭ḻe bhu̱jāṃ yavi̭ṣṭhaṃ śā̱sā mi̱traṃ du̱rdharī̭tum | yasya̱ dharma̱ntsva1renī̭: sapa̱ryanti̭ mā̱turūdha̭: ||2||
yamā̱sā kṛ̱panī̭ḻaṃ bhā̱sākḙtuṃ va̱rdhaya̭nti | bhrāja̭te̱ śreṇi̭dan ||3||
a̱ryo vi̱śāṃ gā̱turḙti̱ pra yadāna̭ḍdi̱vo antā̭n | ka̱vira̱bhraṃ dīdyā̭naḥ ||4||
ju̱ṣaddha̱vyā mānṷṣasyo̱rdhvasta̭sthā̱vṛbhvā̭ ya̱jñe | mi̱nvantsadma̭ pu̱ra ḙti ||5||
sa hi kṣemo̭ ha̱virya̱jñaḥ śru̱ṣṭīda̭sya gā̱turḙti | a̱gniṃ de̱vā vāśī̭mantam ||6||
ya̱jñā̱sāha̱ṃ duva̭ iṣe̱'gniṃ pūrva̭sya̱ śeva̭sya | adrḙ: sū̱numā̱yumā̭huḥ ||7||
naro̱ ye ke cā̱smadā viśvette vā̱ma ā syṷ: | a̱gniṃ ha̱viṣā̱ vardha̭ntaḥ ||8||
kṛ̱ṣṇaḥ śve̱to̭'ru̱ṣo yāmo̭ asya bra̱dhna ṛ̱jra u̱ta śoṇo̱ yaśa̭svān | hira̭ṇyarūpa̱ṃ jani̭tā jajāna ||9||
e̱vā tḙ agne vima̱do ma̭nī̱ṣāmūrjo̭ napāda̱mṛtḙbhiḥ sa̱joṣā̭: |
 gira̱ ā va̭kṣatsuma̱tīri̭yā̱na iṣa̱mūrja̭ṃ sukṣi̱tiṃ viśva̱mābhā̭: ||10||
8 aindro vimadaḥ, prājāpatyo vā, vāsukro vasukṛdvā| agniḥ| āstārapaṃktiḥ|
āgniṃ na svavṛ̭ktibhi̱rhotā̭raṃ tvā vṛṇīmahe |
ya̱jñāya̭ stī̱rṇaba̭rhiṣe̱ vi vo̱ madḙ śī̱raṃ pā̭va̱kaśo̭ciṣa̱ṃ viva̭kṣase ||1||
tvāmu̱ te svā̱bhuva̭: śu̱mbhantyaśva̭rādhasaḥ |
veti̱ tvāmṷpa̱seca̭nī̱ vi vo̱ mada̱ ṛjī̭tiragna̱ āhṷti̱rviva̭kṣase ||2||
tve dha̱rmāṇa̭ āsate ju̱hūbhi̭: siñca̱tīri̭va |
kṛ̱ṣṇā rū̱pāṇyarjṷnā̱ vi vo̱ made̱ viśvā̱ adhi̱ śriyo̭ dhiṣe̱ viva̭kṣase ||3||
yama̭gne̱ manya̭se ra̱yiṃ saha̭sāvannamartya |
tamā no̱ vāja̭sātaye̱ vi vo̱ madḙ ya̱jñeṣṷ ci̱tramā bha̭rā̱ viva̭kṣase ||4||
a̱gnirjā̱to atha̭rvaṇā vi̱dadviśvā̭ni̱ kāvyā̭ |
bhuva̭ddū̱to vi̱vasva̭to̱ vi vo̱ madḙ pri̱yo ya̱masya̱ kāmyo̱ viva̭kṣase ||5||
tvāṃ ya̱jñeṣvī̭ḻa̱te'gnḙ praya̱tya̭dhva̱re |
tvaṃ vasṷ̄ni̱ kāmyā̱ vi vo̱ made̱ viśvā̭ dadhāsi dā̱śuṣe̱ viva̭kṣase ||6||
tvāṃ ya̱jñeṣvṛ̱tvija̱ṃ cārṷmagne̱ ni ṣḙdire |
ghṛ̱tapra̭tīka̱ṃ manṷṣo̱ vi vo̱ madḙ śu̱kraṃ ceti̭ṣṭhama̱kṣabhi̱rviva̭kṣase ||7||
agnḙ śu̱kreṇa̭ śo̱ciṣo̱ru pra̭thayase bṛ̱hat |
a̱bhi̱kranda̭nvṛṣāyase̱ vi vo̱ made̱ garbha̭ṃ dadhāsi jā̱miṣu̱ viva̭kṣase ||8||
15 aindro vimadaḥ prājāpatyo vā, vāsukro vasukṛdvā| indraḥ| purastādbṛhatī 5,7,9 anuṣṭup, 15 triṣṭup |
kuha̭ śru̱ta indra̱: kasmi̭nna̱dya janḙ mi̱tro na śrṷ̄yate | ṛṣī̭ṇāṃ vā̱ yaḥ kṣaye̱ guhā̭ vā̱ carkṛ̭ṣe gi̱rā ||1||
i̱ha śru̱ta indro̭ a̱sme a̱dya stavḙ va̱jryṛcī̭ṣamaḥ | mi̱tro na yo jane̱ṣvā yaśa̭śca̱kre asā̱myā ||2||
ma̱ho yaspati̱: śava̭so̱ asā̱myā ma̱ho nṛ̱mṇasya̭ tūtu̱jiḥ | bha̱rtā vajra̭sya dhṛ̱ṣṇoḥ pi̱tā pu̱trami̭va pri̱yam ||3||
yu̱jā̱no aśvā̱ vāta̭sya̱ dhunī̭ de̱vo de̱vasya̭ vajrivaḥ | syantā̭ pa̱thā vi̱rukma̭tā sṛjā̱naḥ sto̱ṣyadhva̭naḥ ||4||
tvaṃ tyā ci̱dvāta̱syāśvāgā̭ ṛ̱jrā tmanā̱ vaha̭dhyai | yayo̭rde̱vo na martyo̭ ya̱ntā naki̭rvi̱dāyya̭: ||5||
adha̱ gmanto̱śanā̭ pṛcchate vā̱ṃ kada̭rthā na̱ ā gṛ̱ham | ā ja̭gmathuḥ parā̱kāddi̱vaśca̱ gmaśca̱ martya̭m ||6||
ā na̭ indra pṛkṣase̱'smāka̱ṃ brahmodya̭tam | tattvā̭ yācāma̱he'va̱: śuṣṇa̱ṃ yaddhannamā̭nuṣam ||7||
a̱ka̱rmā dasyṷra̱bhi no̭ ama̱ntura̱nyavra̭to̱ amā̭nuṣaḥ | tvaṃ tasyā̭mitraha̱nvadha̭rdā̱sasya̭ dambhaya ||8||
tvaṃ na̭ indra śūra̱ śūrai̭ru̱ta tvotā̭so ba̱rhaṇā̭ | pu̱ru̱trā te̱ vi pū̱rtayo̱ nava̭nta kṣo̱ṇayo̭ yathā ||9||
tvaṃ tānvṛ̭tra̱hatyḙ codayo̱ nṝnkā̭rpā̱ṇe śṷ̄ra vajrivaḥ | guhā̱ yadī̭ kavī̱nāṃ vi̱śāṃ nakṣa̭traśavasām ||10||
ma̱kṣū tā ta̭ indra dā̱nāpna̭sa ākṣā̱ṇe śṷ̄ra vajrivaḥ | yaddha̱ śuṣṇa̭sya da̱mbhayo̭ jā̱taṃ viśva̭ṃ sa̱yāva̭bhiḥ ||11||
māku̱dhrya̭gindra śūra̱ vasvī̭ra̱sme bhṷ̄vanna̱bhiṣṭa̭yaḥ | va̱yaṃva̭yaṃ ta āsāṃ su̱mne syā̭ma vajrivaḥ ||12||
a̱sme tā ta̭ indra santu sa̱tyā'hi̭ṃsantīrupa̱spṛśa̭: | vi̱dyāma̱ yāsā̱ṃ bhujo̭ dhenū̱nāṃ na va̭jrivaḥ ||13||
a̱ha̱stā yada̱padī̱ vardha̭ta̱ kṣāḥ śacī̭bhirve̱dyānā̭m | śuṣṇa̱ṃ pari̭ pradakṣi̱ṇidvi̱śvāya̭ve̱ ni śi̭śnathaḥ ||14||
pibā̭pi̱bedi̭ndra śūra̱ soma̱ṃ mā ri̭ṣaṇyo vasavāna̱ vasu̱: san |
u̱ta trā̭yasva gṛṇa̱to ma̱ghono̭ ma̱haśca̭ rā̱yo re̱vata̭skṛdhī naḥ ||15||
7 aindro vimadaḥ prājāpatyo vā, vāsukro vasukṛdvā|indraḥ| jagatīḥ 1,7 triṣṭup ,5 abhisāriṇī|
yajā̭maha̱ indra̱ṃ vajra̭dakṣiṇa̱ṃ harī̭ṇāṃ ra̱thyaṃ1 vivra̭tānām |
pra śmaśru̱ dodhṷvadū̱rdhvathā̭ bhū̱dvi senā̭bhi̱rdaya̭māno̱ vi rādha̭sā ||1||
harī̱ nva̭sya̱ yā vanḙ vi̱de vasvindro̭ ma̱ghairma̱ghavā̭ vṛtra̱hā bhṷvat |
ṛ̱bhurvāja̭ ṛbhu̱kṣāḥ pa̭tyate̱ śavo'va̭ kṣṇaumi̱ dāsa̭sya̱ nāma̭ cit ||2||
ya̱dā vajra̱ṃ hira̭ṇya̱midathā̱ ratha̱ṃ harī̱ yama̭sya̱ vaha̭to̱ vi sū̱ribhi̭: |
ā ti̭ṣṭhati ma̱ghavā̱ sana̭śruta̱ indro̱ vāja̭sya dī̱rghaśra̭vasa̱spati̭: ||3||
so ci̱nnu vṛ̱ṣṭiryū̱thyā̱3 svā sacā̱~ indra̱: śmaśrṷ̄ṇi̱ hari̭tā̱bhi prṷṣṇute |
ava̭ veti su̱kṣaya̭ṃ su̱te madhūdiddhṷ̄noti̱ vāto̱ yathā̱ vana̭m ||4||
yo vā̱cā vivā̭co mṛ̱dhravā̭caḥ pu̱rū sa̱hasrāśi̭vā ja̱ghāna̭ |
tatta̱dida̭sya̱ pauṃsya̭ṃ gṛṇīmasi pi̱teva̱ yastavi̭ṣīṃ vāvṛ̱dhe śava̭: ||5||
stoma̭ṃ ta indra vima̱dā a̭jījana̱nnapṷ̄rvyaṃ puru̱tama̭ṃ su̱dāna̭ve |
vi̱dmā hya̭sya̱ bhoja̭nami̱nasya̱ yadā pa̱śuṃ na go̱pāḥ ka̭rāmahe ||6||
māki̭rna e̱nā sa̱khyā vi yaṷṣu̱stava̭ cendra vima̱dasya̭ ca̱ ṛṣḙ: |
 vi̱dmā hi te̱ prama̭tiṃ deva jāmi̱vada̱sme tḙ santu sa̱khyā śi̱vāni̭ ||7||
6 aindro vimadaḥ, prājāpatyo vā, vāsukro vasukṛdvā| indraḥ| 4-6 aśvinau| āstārapaṃktiḥ, 4-6 anuṣṭup|
indra̱ soma̭mi̱maṃ pi̭ba̱ madhṷmantaṃ ca̱mū su̱tam | a̱sme ra̱yiṃ ni dhā̭raya̱ vi vo̱ madḙ saha̱sriṇa̭ṃ purūvaso̱ viva̭kṣase ||1||
tvāṃ ya̱jñebhi̭ru̱kthairupa̭ ha̱vyebhi̭rīmahe | śacī̭pate śacīnā̱ṃ vi vo̱ made̱ śreṣṭha̭ṃ no dhehi̱ vārya̱ṃ viva̭kṣase ||2||
yaspati̱rvāryā̭ṇā̱masi̭ ra̱dhrasya̭ codi̱tā | indra̭ stotṝ̱ṇāma̭vi̱tā vi vo̱ madḙ dvi̱ṣo na̭: pā̱hyaṃha̭so̱ viva̭kṣase ||3||
yu̱vaṃ śa̭krā māyā̱vinā̭ samī̱cī nira̭manthatam | vi̱ma̱dena̱ yadī̭ḻi̱tā nāsa̭tyā ni̱rama̭nthatam ||4||
viśvḙ de̱vā a̭kṛpanta samī̱cyorni̱ṣpata̭ntyoḥ | nāsa̭tyāvabruvande̱vāḥ puna̱rā va̭hatā̱diti̭ ||5||
madhṷmanme pa̱rāya̭ṇa̱ṃ madhṷma̱tpuna̱rāya̭nam | tā no̭ devā de̱vata̭yā yu̱vaṃ madhṷmataskṛtam ||6||
11 aindro vimadaḥ prājāpatyo vā, vāsukro vasukṛdvā| somaḥ| āstārapaṃktiḥ|
bha̱draṃ no̱ api̭ vātaya̱ mano̱ dakṣa̭mu̱ta kratṷm |
adhā̭ te sa̱khye andha̭so̱ vi vo̱ made̱ raṇa̱ngāvo̱ na yava̭se̱ viva̭kṣase ||1||
hṛ̱di̱spṛśa̭sta āsate̱ viśvḙṣu soma̱ dhāma̭su |
adhā̱ kāmā̭ i̱me mama̱ vi vo̱ made̱ vi ti̭ṣṭhante vasū̱yavo̱ viva̭kṣase ||2||
u̱ta vra̱tāni̭ soma te̱ prāhaṃ mi̭nāmi pā̱kyā̭ |
 adhā̭ pi̱teva̭ sū̱nave̱ vi vo̱ madḙ mṛ̱ḻā no̭ a̱bhi ci̭dva̱dhādviva̭kṣase ||3||
samu̱ pra ya̭nti dhī̱taya̱: sargā̭so'va̱tā~ i̭va |
kratṷṃ naḥ soma jī̱vase̱ vi vo̱ madḙ dhā̱rayā̭ cama̱sā~ i̭va̱ viva̭kṣase ||4||
tava̱ tye so̭ma̱ śakti̭bhi̱rnikā̭māso̱ vyṛ̭ṇvire |
gṛtsa̭sya̱ dhīrā̭sta̱vaso̱ vi vo̱ madḙ vra̱jaṃ goma̭ntama̱śvina̱ṃ viva̭kṣase ||5||
pa̱śuṃ na̭: soma rakṣasi puru̱trā viṣṭhi̭ta̱ṃ jaga̭t |
sa̱mākṛ̭ṇoṣi jī̱vase̱ vi vo̱ made̱ viśvā̭ sa̱mpaśya̱nbhuva̭nā̱ viva̭kṣase ||6||
tvaṃ na̭: soma vi̱śvato̭ go̱pā adā̭bhyo bhava | sedha̭ rāja̱nnapa̱ sridho̱ vi vo̱ made̱ mā no̭ du̱:śaṃsa̭ īśatā̱ viva̭kṣase ||7||
tvaṃ na̭: soma su̱kratṷrvayo̱dheyā̭ya jāgṛhi | kṣe̱tra̱vitta̭ro̱ manṷṣo̱ vi vo̱ madḙ dru̱ho na̭: pā̱hyaṃha̭so̱ viva̭kṣase ||8||
tvaṃ no̭ vṛtrahanta̱mendra̭syendo śi̱vaḥ sakhā̭ | yatsī̱ṃ hava̭nte sami̱the vi vo̱ made̱ yudhya̭mānāsto̱kasā̭tau̱ viva̭kṣase ||9||
a̱yaṃ gha̱ sa tu̱ro mada̱ indra̭sya vardhata pri̱yaḥ | a̱yaṃ ka̱kṣīva̭to ma̱ho vi vo̱ madḙ ma̱tiṃ vipra̭sya vardhaya̱dviva̭kṣase ||10||
a̱yaṃ viprā̭ya dā̱śuṣe̱ vājā̭~ iyarti̱ goma̭taḥ | a̱yaṃ sa̱ptabhya̱ ā vara̱ṃ vi vo̱ made̱ prāndhaṃ śro̱ṇaṃ ca̭ tāriṣa̱dviva̭kṣase ||11
9 aindro vimadaḥ, prājāpatyo vā, vāsukro vasukṛdvā|pūṣā| anuṣṭup ,1,4 uṣṇik|
pra hyacchā̭ manī̱ṣā spā̱rhā yanti̭ ni̱yuta̭: | pra da̱srā ni̱yudra̭thaḥ pū̱ṣā a̭viṣṭu̱ māhi̭naḥ ||1||
yasya̱ tyanma̭hi̱tvaṃ vā̱tāpya̭ma̱yaṃ jana̭: | vipra̱ ā va̭ṃsaddhī̱tibhi̱ścikḙta suṣṭutī̱nām ||2||
sa vḙda suṣṭutī̱nāmindu̱rna pū̱ṣā vṛṣā̭ | a̱bhi psura̭: pruṣāyati vra̱jaṃ na̱ ā prṷṣāyati ||3||
ma̱ṃsī̱mahi̭ tvā va̱yama̱smāka̭ṃ deva pūṣan | ma̱tī̱nāṃ ca̱ sādha̭na̱ṃ viprā̭ṇāṃ cādha̱vam ||4||
pratya̭rdhirya̱jñānā̭maśvaha̱yo rathā̭nām | ṛṣi̱: sa yo manṷrhito̱ vipra̭sya yāvayatsa̱khaḥ ||5||
ā̱dhīṣa̭māṇāyā̱: pati̭: śu̱cāyā̭śca śu̱casya̭ ca | vā̱so̱vā̱yo'vī̭nā̱mā vāsā̭ṃsi̱ marmṛ̭jat ||6||
i̱no vājā̭nā̱ṃ pati̭ri̱naḥ pṷṣṭī̱nāṃ sakhā̭ | pra śmaśrṷ harya̱to dṷ̄dho̱dvi vṛthā̱ yo adā̭bhyaḥ ||7||
ā te̱ ratha̭sya pūṣanna̱jā dhura̭ṃ vavṛtyuḥ | viśva̭syā̱rthina̱: sakhā̭ sano̱jā ana̭pacyutaḥ ||8||
a̱smāka̭mū̱rjā ratha̭ṃ pū̱ṣā a̭viṣṭu̱ māhi̭naḥ | bhuva̱dvājā̭nāṃ vṛ̱dha i̱maṃ na̭: śṛṇava̱ddhava̭m ||9||
24 aindro vasukra:| indraḥ|triṣṭup|
asa̱tsu mḙ jarita̱: sābhi̭ve̱go yatsṷnva̱te yaja̭mānāya̱ śikṣa̭m |
anā̭śīrdāma̱hama̭smi praha̱ntā sa̭tya̱dhvṛta̭ṃ vṛjinā̱yanta̭mā̱bhum ||1||
yadīda̱haṃ yu̱dhayḙ sa̱ṃnayā̱nyadḙvayūnta̱nvā̱3 śūśṷjānān |
a̱mā te̱ tumra̭ṃ vṛṣa̱bhaṃ pa̭cāni tī̱vraṃ su̱taṃ pa̭ñcada̱śaṃ ni ṣi̭ñcam ||2||
nāhaṃ taṃ vḙda̱ ya iti̱ bravī̱tyadḙvayūntsa̱mara̭ṇe jagha̱nvān |
ya̱dāvākhya̭tsa̱mara̭ṇa̱mṛghā̭va̱dādiddha̭ me vṛṣa̱bhā pra brṷvanti ||3||
yadajñā̭teṣu vṛ̱jane̱ṣvāsa̱ṃ viśvḙ sa̱to ma̱ghavā̭no ma āsan |
ji̱nāmi̱ vetkṣema̱ ā santa̭mā̱bhuṃ pra taṃ kṣi̭ṇā̱ṃ parva̭te pāda̱gṛhya̭ ||4||
na vā u̱ māṃ vṛ̱janḙ vārayante̱ na parva̭tāso̱ yada̱haṃ ma̭na̱sye |
mama̭ sva̱nātkṛ̭dhu̱karṇo̭ bhayāta e̱vedanu̱ dyūnki̱raṇa̱: samḙjāt ||5||
darśa̱nnvatra̭ śṛta̱pā~ a̭ni̱ndrānbā̭hu̱kṣada̱: śara̭ve̱ patya̭mānān |
ghṛṣṷṃ vā̱ ye ni̭ni̱duḥ sakhā̭ya̱madhyū̱ nvḙṣu pa̱vayo̭ vavṛtyuḥ ||6||
abhū̱rvaukṣī̱rvyu1 āyṷrāna̱ḍdarṣa̱nnu pūrvo̱ apa̭ro̱ nu da̭rṣat |
dve pa̱vaste̱ pari̱ taṃ na bhṷ̄to̱ yo a̱sya pā̱re raja̭so vi̱veṣa̭ ||7||
gāvo̱ yava̱ṃ prayṷtā a̱ryo a̭kṣa̱ntā a̭paśyaṃ sa̱hago̭pā̱ścara̭ntīḥ |
havā̱ ida̱ryo a̱bhita̱: samā̭ya̱nkiya̭dāsu̱ svapa̭tiśchandayāte ||8||
saṃ yadvaya̭ṃ yava̱sādo̱ janā̭nāma̱haṃ ya̱vāda̭ u̱rvajrḙ a̱ntaḥ |
atrā̭ yu̱kto̭'vasā̱tāra̭micchā̱datho̱ ayṷktaṃ yunajadvava̱nvān ||9||
atredṷ me maṃsase sa̱tyamu̱ktaṃ dvi̱pācca̱ yaccatṷṣpātsaṃsṛ̱jāni̭ |
strī̱bhiryo atra̱ vṛṣa̭ṇaṃ pṛta̱nyādayṷddho asya̱ vi bha̭jāni̱ veda̭: ||10||
yasyā̭na̱kṣā dṷhi̱tā jātvāsa̱ kastāṃ vi̱dvā~ a̱bhi ma̭nyāte a̱ndhām |
ka̱ta̱ro me̱niṃ prati̱ taṃ mṷcāte̱ ya ī̱ṃ vahā̭te̱ ya ī̭ṃ vā vare̱yāt ||11||
kiya̭tī̱ yoṣā̭ marya̱to va̭dhū̱yoḥ pari̭prītā̱ panya̭sā̱ vāryḙṇa |
bha̱drā va̱dhūrbha̭vati̱ yatsu̱peśā̭: sva̱yaṃ sā mi̱traṃ va̭nute̱ janḙ cit ||12||
pa̱tto ja̭gāra pra̱tyañca̭matti śī̱rṣṇā śira̱: prati̭ dadhau̱ varṷ̄tham |
āsī̭na ū̱rdhvāmu̱pasi̭ kṣiṇāti̱ nya̭ṅṅuttā̱nāmanvḙti̱ bhūmi̭m ||13||
bṛ̱hanna̭cchā̱yo a̭palā̱śo arvā̭ ta̱sthau mā̱tā viṣi̭to atti̱ garbha̭: |
a̱nyasyā̭ va̱tsaṃ ri̭ha̱tī mi̭māya̱ kayā̭ bhu̱vā ni da̭dhe dhe̱nurūdha̭: ||14||
sa̱pta vī̱rāso̭ adha̱rādudā̭yanna̱ṣṭotta̱rāttā̱tsama̭jagmira̱nte |
nava̭ pa̱ścātā̭tsthivi̱manta̭ āya̱ndaśa̱ prāksānu̱ vi ti̭ra̱ntyaśna̭: ||15||
da̱śā̱nāmeka̭ṃ kapi̱laṃ sa̭mā̱naṃ taṃ hi̭nvanti̱ krata̭ve̱ pāryā̭ya |
garbha̭ṃ mā̱tā sudhi̭taṃ va̱kṣaṇā̱svavḙnantaṃ tu̱ṣaya̭ntī bibharti ||16||
pīvā̭naṃ me̱ṣama̭pacanta vī̱rā nyṷptā a̱kṣā anṷ dī̱va ā̭san |
dvā dhanṷṃ bṛha̱tīma̱psva1ntaḥ pa̱vitra̭vantā carataḥ pu̱nantā̭ ||17||
vi kro̭śa̱nāso̱ viṣva̭ñca āya̱npacā̭ti̱ nemo̭ na̱hi pakṣa̭da̱rdhaḥ |
a̱yaṃ mḙ de̱vaḥ sa̭vi̱tā tadā̭ha̱ drva̭nna̱ idva̭navatsa̱rpira̭nnaḥ ||18||
apa̭śya̱ṃ grāma̱ṃ vaha̭mānamā̱rāda̭ca̱krayā̭ sva̱dhayā̱ varta̭mānam |
siṣa̭ktya̱ryaḥ pra yu̱gā janā̭nāṃ sa̱dyaḥ śi̱śnā pra̭minā̱no navī̭yān ||19||
e̱tau me̱ gāvaṷ prama̱rasya̭ yu̱ktau mo ṣu pra sḙdhī̱rmuhu̱rinma̭mandhi |
āpa̭ścidasya̱ vi na̭śa̱ntyartha̱ṃ sūra̭śca ma̱rka upa̭ro babhū̱vān ||20||
a̱yaṃ yo vajra̭: puru̱dhā vivṛ̭tto̱'vaḥ sūrya̭sya bṛha̱taḥ purī̭ṣāt |
śrava̱ ide̱nā pa̱ro a̱nyada̭sti̱ tada̭vya̱thī ja̭ri̱māṇa̭staranti ||21||
vṛ̱kṣevṛ̭kṣe̱ niya̭tā mīmaya̱dgaustato̱ vaya̱: pra pa̭tānpūru̱ṣāda̭: |
athe̱daṃ viśva̱ṃ bhuva̭naṃ bhayāta̱ indrā̭ya su̱nvadṛṣa̭ye ca̱ śikṣa̭t ||22||
de̱vānā̱ṃ mānḙ pratha̱mā a̭tiṣṭhankṛ̱ntatrā̭deṣā̱mupa̭rā̱ udā̭yan |
traya̭stapanti pṛthi̱vīma̭nū̱pā dvā bṛbṷ̄kaṃ vahata̱: purī̭ṣam ||23||
sā tḙ jī̱vātṷru̱ta tasya̭ viddhi̱ mā smai̭tā̱dṛgapa̭ gūhaḥ sama̱rye |
ā̱viḥ sva̭: kṛṇu̱te gūha̭te bu̱saṃ sa pā̱dura̭sya ni̱rṇijo̱ na mṷcyate ||24||
(12) 1 indrasnuṣā vasukrapatnī ṛṣikā, 2,6,8,10,12 indra ṛṣiḥ, 3,4,5,7,9,11 aindro vasukra: ṛṣiḥ| 2,6,8,10,12 aindro vasukro devatā, 1,3,4,5,7,9,11 indro devatā| triṣṭup|
viśvo̱ hya1nyo a̱rirā̭ja̱gāma̱ mamedaha̱ śvaśṷro̱ nā ja̭gāma |
ja̱kṣī̱yāddhā̱nā u̱ta soma̭ṃ papīyā̱tsvā̭śita̱: puna̱rasta̭ṃ jagāyāt ||1||
sa rorṷvadvṛṣa̱bhasti̱gmaśṛ̭ṅgo̱ varṣma̭ntasthau̱ vari̭ma̱nnā pṛ̭thi̱vyāḥ |
viśvḙṣvenaṃ vṛ̱janḙṣu pāmi̱ yo mḙ ku̱kṣī su̱taso̭maḥ pṛ̱ṇāti̭ ||2||
adri̭ṇā te ma̱ndina̭ indra̱ tūyā̭ntsu̱nvanti̱ somā̱npiba̭si̱ tvamḙṣām |
paca̭nti te vṛṣa̱bhā~ atsi̱ teṣā̭ṃ pṛ̱kṣeṇa̱ yanma̭ghavanhū̱yamā̭naḥ ||3||
i̱daṃ su mḙ jarita̱rā ci̭kiddhi pratī̱paṃ śāpa̭ṃ na̱dyo̭ vahanti |
lo̱pā̱śaḥ si̱ṃhaṃ pra̱tyañca̭matsāḥ kro̱ṣṭā va̭rā̱haṃ nira̭takta̱ kakṣā̭t ||4||
ka̱thā ta̭ e̱tada̱hamā ci̭keta̱ṃ gṛtsa̭sya̱ pāka̭sta̱vaso̭ manī̱ṣām |
tvaṃ no̭ vi̱dvā~ ṛ̭tu̱thā vi vo̭co̱ yamardha̭ṃ te maghavankṣe̱myā dhūḥ ||5||
e̱vā hi māṃ ta̱vasa̭ṃ va̱rdhaya̭nti di̱vaści̭nme bṛha̱ta utta̭rā̱ dhūḥ |
pu̱rū sa̱hasrā̱ ni śi̭śāmi sā̱kama̭śa̱truṃ hi mā̱ jani̭tā ja̱jāna̭ ||6||
e̱vā hi māṃ ta̱vasa̭ṃ ja̱jñuru̱graṃ karma̭nkarma̱nvṛṣa̭ṇamindra de̱vāḥ |
vadhī̭ṃ vṛ̱traṃ vajrḙṇa mandasā̱no'pa̭ vra̱jaṃ ma̭hi̱nā dā̱śuṣḙ vam ||7||
de̱vāsa̭ āyanpara̱śū~ra̭bibhra̱nvanā̭ vṛ̱ścanto̭ a̱bhi vi̱ḍbhirā̭yan |
ni su̱drvaṃ1 dadha̭to va̱kṣaṇā̭su̱ yatrā̱ kṛpī̭ṭa̱manu̱ tadda̭hanti ||8||
śa̱śaḥ kṣu̱raṃ pra̱tyañca̭ṃ jagā̱rā'dri̭ṃ lo̱gena̱ vya̭bhedamā̱rāt |
bṛ̱hanta̭ṃ cidṛha̱te ra̭ndhayāni̱ vaya̭dva̱tso vṛ̭ṣa̱bhaṃ śūśṷvānaḥ ||9||
su̱pa̱rṇa i̱tthā na̱khamā si̭ṣā̱yāva̭ruddhaḥ pari̱pada̱ṃ na si̱ṃhaḥ |
ni̱ru̱ddhaści̭nmahi̱ṣasta̱rṣyāvā̭ngo̱dhā tasmā̭ a̱yatha̭ṃ karṣade̱tat ||10||
tebhyo̭ go̱dhā a̱yatha̭ṃ karṣade̱tadye bra̱hmaṇa̭: prati̱pīya̱ntyannai̭: |
si̱ma u̱kṣṇo̭'vasṛ̱ṣṭā~ a̭danti sva̱yaṃ balā̭ni ta̱nva̭: śṛṇā̱nāḥ ||11||
e̱te śamī̭bhiḥ su̱śamī̭ abhūva̱nye hi̭nvi̱re ta̱nva1: soma̭ u̱kthaiḥ |
nṛ̱vadvada̱nnupa̭ no māhi̱ vājā̭ndi̱vi śravo̭ dadhiṣe̱ nāma̭ vī̱raḥ ||12||
8 aindro vasukra:| indraḥ|triṣṭup|
vane̱ na vā̱ yo nya̭dhāyi cā̱kañchuci̭rvā̱ṃ stomo̭ bhuraṇāvajīgaḥ |
yasyedindra̭: puru̱dinḙṣu̱ hotā̭ nṛ̱ṇāṃ naryo̱ nṛta̭maḥ kṣa̱pāvā̭n ||1||
pra tḙ a̱syā u̱ṣasa̱: prāpa̭rasyā nṛ̱tau syā̭ma̱ nṛta̭masya nṛ̱ṇām |
anṷ tri̱śoka̭: śa̱tamāva̭ha̱nnṝnkutsḙna̱ ratho̱ yo asa̭tsasa̱vān ||2||
kaste̱ mada̭ indra̱ rantyo̭ bhū̱dduro̱ giro̭ a̱bhyu1gro vi dhā̭va |
kadvāho̭ a̱rvāgupa̭ mā manī̱ṣā ā tvā̭ śakyāmupa̱maṃ rādho̱ annai̭: ||3||
kadṷ dyu̱mnami̭ndra̱ tvāva̭to̱ nṝnkayā̭ dhi̱yā ka̭rasa̱ya kanna̱ āga̭n |
mi̱tro na sa̱tya ṷrugāya bhṛ̱tyā annḙ samasya̱ yadasa̭nmanī̱ṣāḥ ||4||
prera̭ya̱ sūro̱ artha̱ṃ na pā̱raṃ ye a̭sya̱ kāma̭ṃ jani̱dhā i̭va̱ gman |
gira̭śca̱ ye tḙ tuvijāta pū̱rvīrnara̭ indra prati̱śikṣa̱ntyannai̭: ||5||
mātre̱ nu te̱ sumi̭te indra pū̱rvī dyaurma̱jmanā̭ pṛthi̱vī kāvyḙna |
varā̭ya te ghṛ̱tava̭ntaḥ su̱tāsa̱: svādma̭nbhavantu pī̱taye̱ madhṷ̄ni ||6||
ā madhvo̭ asmā asica̱nnama̭tra̱mindrā̭ya pū̱rṇaṃ sa hi sa̱tyarā̭dhāḥ |
sa vā̭vṛdhe̱ vari̭ma̱nnā pṛ̭thi̱vyā a̱bhi kratvā̱ narya̱: pauṃsyai̭śca ||7||
vyā̭na̱ḻindra̱: pṛta̭nā̱: svojā̱ āsmai̭ yatante sa̱khyāya̭ pū̱rvīḥ |
ā smā̱ ratha̱ṃ na pṛta̭nāsu tiṣṭha̱ yaṃ bha̱drayā̭ suma̱tyā co̱dayā̭se ||8||
15 kavaṣa ailūṣaḥ|āpaḥ, apāṃ na pāt vā| triṣṭup|
pra dḙva̱trā brahma̭ṇe gā̱turḙtva̱po acchā̱ mana̭so̱ na prayṷkti |
ma̱hīṃ mi̱trasya̱ varṷṇasya dhā̱siṃ pṛ̭thu̱jraya̭se rīradhā suvṛ̱ktim ||1||
adhva̭ryavo ha̱viṣma̭nto̱ hi bhū̱tā'cchā̱pa i̭tośa̱tīrṷśantaḥ |
ava̱ yāścaṣṭḙ aru̱ṇaḥ sṷpa̱rṇastamāsya̭dhvamū̱rmima̱dyā sṷhastāḥ ||2||
adhva̭ryavo̱'pa i̭tā samu̱drama̱pāṃ napā̭taṃ ha̱viṣā̭ yajadhvam |
sa vo̭ dadadū̱rmima̱dyā supṷ̄ta̱ṃ tasmai̱ soma̱ṃ madhṷmantaṃ sunota ||3||
yo a̭ni̱dhmo dīda̭yada̱psva1ntaryaṃ viprā̭sa̱ īḻa̭te adhva̱reṣṷ |
apā̭ṃ napā̱nmadhṷmatīra̱po dā̱ yābhi̱rindro̭ vāvṛ̱dhe vī̱ryā̭ya ||4||
yābhi̱: somo̱ moda̭te̱ harṣa̭te ca kalyā̱ṇībhi̭ryuva̱tibhi̱rna marya̭: |
tā a̭dhvaryo a̱po acchā̱ parḙhi̱ yadā̭si̱ñcā oṣa̭dhībhiḥ punītāt ||5||
e̱vedyūnḙ yuva̱tayo̭ namanta̱ yadī̭mu̱śannṷśa̱tīretyaccha̭ |
saṃ jā̭nate̱ mana̭sā̱ saṃ ci̭kitre'dhva̱ryavo̭ dhi̱ṣaṇāpa̭śca de̱vīḥ ||6||
yo vo̭ vṛ̱tābhyo̱ akṛ̭ṇodu lo̱kaṃ yo vo̭ ma̱hyā a̱bhiśa̭ste̱ramṷñcat |
tasmā̱ indrā̭ya̱ madhṷmantamū̱rmiṃ dḙva̱māda̭na̱ṃ pra hi̭ṇotanāpaḥ ||7||
prāsmai̭ hinota̱ madhṷmantamū̱rmiṃ garbho̱ yo va̭: sindhavo̱ madhva̱ utsa̭: |
ghṛ̱tapṛ̭ṣṭha̱mīḍya̭madhva̱reṣvā''po̭ revatīḥ śṛṇu̱tā hava̭ṃ me ||8||
taṃ si̭ndhavo matsa̱rami̭ndra̱pāna̭mū̱rmiṃ pra hḙta̱ ya u̱bhe iya̭rti |
ma̱da̱cyuta̭mauśā̱naṃ na̭bho̱jāṃ pari̭ tri̱tantṷṃ vi̱cara̭nta̱mutsa̭m ||9||
ā̱varvṛ̭tatī̱radha̱ nu dvi̱dhārā̭ goṣu̱yudho̱ na ni̭ya̱vaṃ cara̭ntīḥ |
ṛṣe̱ jani̭trī̱rbhuva̭nasya̱ patnī̭ra̱po va̭ndasva sa̱vṛdha̱: sayo̭nīḥ ||10||
hi̱notā̭ no adhva̱raṃ dḙvaya̱jyā hi̱nota̱ brahma̭ sa̱naye̱ dhanā̭nām |
ṛ̱tasya̱ yoge̱ vi ṣya̭dhva̱mūdha̭: śruṣṭī̱varī̭rbhūtanā̱smabhya̭māpaḥ ||11||
āpo̭ revatī̱: kṣaya̭thā̱ hi vasva̱: kratṷṃ ca bha̱draṃ bi̭bhṛ̱thāmṛta̭ṃ ca |
rā̱yaśca̱ stha sva̭pa̱tyasya̱ patnī̱: sara̭svatī̱ tadgṛ̭ṇa̱te vayo̭ dhāt ||12||
prati̱ yadāpo̱ adṛ̭śramāya̱tīrghṛ̱taṃ payā̭ṃsi̱ bibhra̭tī̱rmadhṷ̄ni |
a̱dhva̱ryubhi̱rmana̭sā saṃvidā̱nā indrā̭ya̱ soma̱ṃ suṣṷta̱ṃ bhara̭ntīḥ ||13||
emā a̭gmanre̱vatī̭rjī̱vadha̭nyā̱ adhva̭ryavaḥ sā̱daya̭tā sakhāyaḥ |
ni ba̱rhiṣi̭ dhattana somyāso̱'pāṃ naptrā̭ saṃvidā̱nāsa̭ enāḥ ||14||
āgma̱nnāpa̭ uśa̱tīrba̱rhiredaṃ nya̭dhva̱re a̭sadandeva̱yantī̭: |
adhva̭ryavaḥ sunu̱tendrā̭ya̱ soma̱mabhṷ̄du vaḥ su̱śakā̭ devaya̱jyā ||15||
11 kavaṣa ailūṣaḥ|viśve devāḥ| triṣṭup|
ā no̭ de̱vānā̱mupa̭ vetu̱ śaṃso̱ viśvḙbhistu̱rairava̭se̱ yaja̭traḥ |
tebhi̭rva̱yaṃ sṷṣa̱khāyo̭ bhavema̱ tara̭nto̱ viśvā̭ duri̱tā syā̭ma ||1||
pari̭ ci̱nmarto̱ dravi̭ṇaṃ mamanyādṛ̱tasya̭ pa̱thā nama̱sā vi̭vāset |
u̱ta svena̱ kratṷnā̱ saṃ va̭deta̱ śreyā̭ṃsa̱ṃ dakṣa̱ṃ mana̭sā jagṛbhyāt ||2||
adhā̭yi dhī̱tirasa̭sṛgra̱maṃśā̭stī̱rthe na da̱smamupa̭ ya̱ntyūmā̭: |
a̱bhyā̭naśma suvi̱tasya̭ śū̱ṣaṃ navḙdaso a̱mṛtā̭nāmabhūma ||3||
nitya̭ścākanyā̱tsvapa̭ti̱rdamṷ̄nā̱ yasmā̭ u de̱vaḥ sa̭vi̱tā ja̱jāna̭ |
bhago̭ vā̱ gobhi̭rarya̱mema̭najyā̱tso a̭smai̱ cārṷśchadayadu̱ta syā̭t ||4||
i̱yaṃ sā bhṷ̄yā u̱ṣasā̭miva̱ kṣā yaddha̭ kṣu̱manta̱: śava̭sā sa̱māya̭n |
a̱sya stu̱tiṃ ja̭ri̱turbhikṣa̭māṇā̱ ā na̭: śa̱gmāsa̱ upa̭ yantu̱ vājā̭: ||5||
a̱syede̱ṣā sṷma̱tiḥ pa̭prathā̱nā'bha̭vatpū̱rvyā bhūma̭nā̱ gauḥ |
a̱sya sanī̭ḻā̱ asṷrasya̱ yonaṷ samā̱na ā bhara̭ṇe̱ bibhra̭māṇāḥ ||6||
kiṃ svi̱dvana̱ṃ ka u̱ sa vṛ̱kṣa ā̭sa̱ yato̱ dyāvā̭pṛthi̱vī ni̭ṣṭata̱kṣuḥ |
sa̱ṃta̱sthā̱ne a̱jarḙ i̱taṷ̄tī̱ ahā̭ni pū̱rvīru̱ṣaso̭ jaranta ||7||
naitāva̭de̱nā pa̱ro a̱nyada̭styu̱kṣā sa dyāvā̭pṛthi̱vī bi̭bharti |
tvaca̭ṃ pa̱vitra̭ṃ kṛṇuta sva̱dhāvā̱nyadī̱ṃ sūrya̱ṃ na ha̱rito̱ vaha̭nti ||8||
ste̱go na kṣāmatyḙti pṛ̱thvīṃ miha̱ṃ na vāto̱ vi ha̭ vāti̱ bhūma̭ |
mi̱tro yatra̱ varṷṇo a̱jyamā̭no̱'gnirvane̱ na vyasṛ̭ṣṭa̱ śoka̭m ||9||
sta̱rīryatsūta̭ sa̱dyo a̱jyamā̭nā̱ vyathi̭ravya̱thīḥ kṛ̭ṇuta̱ svago̭pā |
pu̱tro yatpūrva̭: pi̱trorjani̭ṣṭa śa̱myāṃ gaurja̭gāra̱ yaddha̭ pṛ̱cchān ||10||
u̱ta kaṇva̭ṃ nṛ̱ṣada̭: pu̱tramā̭huru̱ta śyā̱vo dhana̱māda̭tta vā̱jī |
 pra kṛ̱ṣṇāya̱ ruśa̭dapinva̱todha̭ṝ̱tamatra̱ naki̭rasmā apīpet ||11||
9 kavaṣa ailūṣaḥ| indraḥ| jagatī, 6-9 triṣṭup |
pra su gmantā̭ dhiyasā̱nasya̭ sa̱kṣaṇi̭ va̱rebhi̭rva̱rā~ a̱bhi ṣu pra̱sīda̭taḥ |
a̱smāka̱mindra̭ u̱bhaya̭ṃ jujoṣati̱ yatso̱myasyāndha̭so̱ bubo̭dhati ||1||
vī̭ndra yāsi di̱vyāni̭ roca̱nā vi pārthi̭vāni̱ raja̭sā puruṣṭuta |
ye tvā̱ vaha̭nti̱ muhṷradhva̱rā~ upa̱ te su va̭nvantu vagva̱nā~ a̭rā̱dhasa̭: ||2||
tadinmḙ chantsa̱dvapṷṣo̱ vapṷṣṭaraṃ pu̱tro yajjāna̭ṃ pi̱trora̱dhīya̭ti |
jā̱yā pati̭ṃ vahati va̱gnunā̭ su̱matpu̱ṃsa idbha̱dro va̭ha̱tuḥ pari̭ṣkṛtaḥ ||3||
taditsa̱dhastha̭ma̱bhi cārṷ dīdhaya̱ gāvo̱ yacchāsa̭nvaha̱tuṃ na dhe̱nava̭: |
mā̱tā yanmantṷryū̱thasya̭ pū̱rvyā'bhi vā̱ṇasya̭ sa̱ptadhā̭tu̱rijjana̭: ||4||
pra vo'cchā̭ ririce deva̱yuṣpa̱dameko̭ ru̱drebhi̭ryāti tu̱rvaṇi̭: |
ja̱rā vā̱ yeṣva̱mṛtḙṣu dā̱vane̱ pari̭ va̱ ūmḙbhyaḥ siñcatā̱ madhṷ ||5||
ni̱dhī̱yamā̭na̱mapa̭gūḻhama̱psu pra mḙ de̱vānā̭ṃ vrata̱pā ṷvāca |
indro̭ vi̱dvā~ anu̱ hi tvā̭ ca̱cakṣa̱ tenā̱hama̭gne̱ anṷśiṣṭa̱ āgā̭m ||6||
akṣḙtravitkṣetra̱vida̱ṃ hyaprā̱ṭ sa praiti̭ kṣetra̱vidānṷśiṣṭaḥ |
e̱tadvai bha̱drama̭nu̱śāsa̭nasyo̱ta sru̱tiṃ vi̭ndatyañja̱sīnā̭m ||7||
a̱dyedu̱ prāṇī̱dama̭manni̱māhā'pī̭vṛto adhayanmā̱turūdha̭: |
emḙnamāpa jari̱mā yuvā̭na̱mahḙḻa̱nvasṷ: su̱manā̭ babhūva ||8||
e̱tāni̭ bha̱drā ka̭laśa kriyāma̱ kurṷśravaṇa̱ dada̭to ma̱ghāni̭ |
dā̱na idvo̭ maghavāna̱: so a̭stva̱yaṃ ca̱ somo̭ hṛ̱di yaṃ bibha̭rmi ||9||
9kavaṣa ailūṣaḥ| 1 viśvedevāḥ, 2-3 indraḥ, 4-5 kuruśravaṇastrāsadasyavaḥ, 6-9 upamaśravā maitrātithiḥ| 1 triṣṭup , pragāthaḥ = ( 2 bṛhatī, 3 satobṛhatī ),4-9 gāyatrī |
pra mā̭ yuyujre pra̱yujo̱ janā̭nā̱ṃ vahā̭mi sma pū̱ṣaṇa̱manta̭reṇa |
viśvḙ de̱vāso̱ adha̱ māma̭rakṣandu̱:śāsu̱rāgā̱diti̱ ghoṣa̭ āsīt ||1||
saṃ mā̭ tapantya̱bhita̭: sa̱patnī̭riva̱ parśa̭vaḥ | ni bā̭dhate̱ ama̭tirna̱gnatā̱ jasu̱rverna vḙvīyate ma̱tiḥ ||2||
mūṣo̱ na śi̱śnā vya̭danti mā̱dhya̭ sto̱tāra̭ṃ te śatakrato | sa̱kṛtsu no̭ maghavannindra mṛḻa̱yā'dhā̭ pi̱teva̭ no bhava ||3||
ku̱ru̱śrava̭ṇamāvṛṇi̱ rājā̭na̱ṃ trāsa̭dasyavam | maṃhi̭ṣṭhaṃ vā̱ghatā̱mṛṣi̭: ||4||
yasya̭ mā ha̱rito̱ rathḙ ti̱sro vaha̭nti sādhu̱yā | stavai̭ sa̱hasra̭dakṣiṇe ||5||
yasya̱ prasvā̭daso̱ gira̭ upa̱maśra̭vasaḥ pi̱tuḥ | kṣetra̱ṃ na ra̱ṇvamū̱cuṣḙ ||6||
adhi̭ putropamaśravo̱ napā̭nmitrātitherihi | pi̱tuṣṭḙ asmi vandi̱tā ||7||
yadīśī̭yā̱mṛtā̭nāmu̱ta vā̱ martyā̭nām | jīve̱dinma̱ghavā̱ mama̭ ||8||
na de̱vānā̱mati̭ vra̱taṃ śa̱tātmā̭ ca̱na jī̭vati | tathā̭ yu̱jā vi vā̭vṛte ||9||
14 kavaṣa ailūṣaḥ, akṣo maujavān vā| 1,7,9,12 akṣāḥ, 13 ṛṣiḥ, 2-6,8, 10,11,14 akṣa-kitava-nindā| triṣṭup , 7 jagatī |
prā̱ve̱pā mā̭ bṛha̱to mā̭dayanti pravāte̱jā iri̭ṇe̱ varvṛ̭tānāḥ |
soma̭syeva maujava̱tasya̭ bha̱kṣo vi̱bhīda̭ko̱ jāgṛ̭vi̱rmahya̭macchān ||1||
na mā̭ mimetha̱ na ji̭hīḻa e̱ṣā śi̱vā sakhi̭bhya u̱ta mahya̭māsīt |
a̱kṣasyā̱hamḙkapa̱rasya̭ he̱toranṷvratā̱mapa̭ jā̱yāma̭rodham ||2||
dveṣṭi̭ śva̱śrūrapa̭ jā̱yā rṷṇaddhi̱ na nā̭thi̱to vi̭ndate marḍi̱tāra̭m |
aśva̭syeva̱ jara̭to̱ vasnya̭sya̱ nāhaṃ vi̭ndāmi kita̱vasya̱ bhoga̭m ||3||
a̱nye jā̱yāṃ pari̭ mṛśantyasya̱ yasyāgṛ̭dha̱dveda̭ne vā̱jya1kṣaḥ |
pi̱tā mā̱tā bhrāta̭ra enamāhu̱rna jā̭nīmo̱ naya̭tā ba̱ddhame̱tam ||4||
yadā̱dīdhye̱ na da̭viṣāṇyebhiḥ parā̱yadbhyo'va̭ hīye̱ sakhi̭bhyaḥ |
nyṷptāśca ba̱bhravo̱ vāca̱makra̭ta̱~ emīdḙṣāṃ niṣkṛ̱taṃ jā̱riṇī̭va ||5||
sa̱bhāmḙti kita̱vaḥ pṛ̱cchamā̭no je̱ṣyāmīti̭ ta̱nvā̱3 śūśṷjānaḥ |
a̱kṣāso̭ asya̱ vi ti̭ranti̱ kāma̭ṃ prati̱dīvne̱ dadha̭ta̱ ā kṛ̱tāni̭ ||6||
a̱kṣāsa̱ ida̭ṅku̱śino̭ nito̱dino̭ ni̱kṛtvā̭na̱stapa̭nāstāpayi̱ṣṇava̭: |
ku̱mā̱radḙṣṇā̱ jaya̭taḥ puna̱rhaṇo̱ madhvā̱ sampṛ̭ktāḥ kita̱vasya̭ ba̱rhaṇā̭ ||7||
tri̱pa̱ñcā̱śaḥ krī̭ḻati̱ vrāta̭ eṣāṃ de̱va i̭va savi̱tā sa̱tyadha̭rmā |
u̱grasya̭ cinma̱nyave̱ nā na̭mante̱ rājā̭ cidebhyo̱ nama̱ itkṛ̭ṇoti ||8||
nī̱cā va̭rtanta u̱pari̭ sphurantyaha̱stāso̱ hasta̭vantaṃ sahante |
di̱vyā aṅgā̭rā̱ iri̭ṇe̱ nyṷptāḥ śī̱tāḥ santo̱ hṛda̭ya̱ṃ nirda̭hanti ||9||
jā̱yā ta̭pyate kita̱vasya̭ hī̱nā mā̱tā pu̱trasya̱ cara̭ta̱: kva̭ svit |
ṛ̱ṇā̱vā bibhya̱ddhana̭mi̱cchamā̭no̱'nyeṣā̱masta̱mupa̱ nakta̭meti ||10||
striya̭ṃ dṛ̱ṣṭvāya̭ kita̱vaṃ ta̭tāpā̱'nyeṣā̭ṃ jā̱yāṃ sukṛ̭taṃ ca̱ yoni̭m |
pū̱rvā̱hṇe aśvā̭nyuyu̱je hi ba̱bhrūntso a̱gnerantḙ vṛṣa̱laḥ pa̭pāda ||11||
yo va̭: senā̱nīrma̭ha̱to ga̱ṇasya̱ rājā̱ vrāta̭sya pratha̱mo ba̱bhūva̭ |
tasmai̭ kṛṇomi̱ na dhanā̭ ruṇadhmi̱ daśā̱haṃ prācī̱stadṛ̱taṃ va̭dāmi ||12||
a̱kṣairmā dī̭vyaḥ kṛ̱ṣimitkṛ̭ṣasva vi̱tte ra̭masva ba̱hu manya̭mānaḥ |
tatra̱ gāva̭: kitava̱ tatra̭ jā̱yā tanme̱ vi ca̭ṣṭe savi̱tāyama̱ryaḥ ||13||
mi̱traṃ kṛ̭ṇudhva̱ṃ khalṷ mṛ̱ḻatā̭ no̱ mā no̭ gho̱reṇa̭ caratā̱bhi dhṛ̱ṣṇu |
ni vo̱ nu ma̱nyurvi̭śatā̱marā̭tira̱nyo ba̭bhrū̱ṇāṃ prasi̭tau̱ nva̭stu ||14||
14 luśo dhānākaḥ| viśvedevāḥ | jagatī,13-14 triṣṭup|
abṷdhramu̱ tya indra̭vanto a̱gnayo̱ jyoti̱rbhara̭nta u̱ṣaso̱ vyṷṣṭiṣu |
ma̱hī dyāvā̭pṛthi̱vī cḙtatā̱mapo̱'dyā de̱vānā̱mava̱ ā vṛ̭ṇīmahe ||1||
di̱vaspṛ̭thi̱vyorava̱ ā vṛ̭ṇīmahe mā̱tṝntsindhū̱nparva̭tāñcharya̱ṇāva̭taḥ |
a̱nā̱gā̱stvaṃ sūrya̭mu̱ṣāsa̭mīmahe bha̱draṃ soma̭: suvā̱no a̱dyā kṛ̭ṇotu naḥ ||2||
dyāvā̭ no a̱dya pṛ̭thi̱vī anā̭gaso ma̱hī trā̭yetāṃ suvi̱tāya̭ mā̱tarā̭ |
u̱ṣā u̱cchantyapa̭ bādhatāma̱ghaṃ sva̱stya1gniṃ sa̭midhā̱namī̭mahe ||3||
i̱yaṃ na̭ u̱srā pra̭tha̱mā sṷde̱vya̭ṃ re̱vatsa̱nibhyo̭ re̱vatī̱ vyṷcchatu |
ā̱re ma̱nyuṃ dṷrvi̱datra̭sya dhīmahi sva̱stya1gniṃ sa̭midhā̱namī̭mahe ||4||
pra yāḥ sisra̭te̱ sūrya̭sya ra̱śmibhi̱rjyoti̱rbhara̭ntīru̱ṣaso̱ vyṷṣṭiṣu |
bha̱drā no̭ a̱dya śrava̭se̱ vyṷcchata sva̱stya1gniṃ sa̭midhā̱namī̭mahe ||5||
a̱na̱mī̱vā u̱ṣasa̱ ā ca̭rantu na̱ uda̱gnayo̭ jihatā̱ṃ jyoti̭ṣā bṛ̱hat |
āyṷkṣātāma̱śvinā̱ tūtṷji̱ṃ ratha̭ṃ sva̱stya1gniṃ sa̭midhā̱namī̭mahe ||6||
śreṣṭha̭ṃ no a̱dya sa̭vita̱rvarḙṇyaṃ bhā̱gamā sṷva̱ sa hi ra̭tna̱dhā asi̭ |
rā̱yo jani̭trīṃ dhi̱ṣaṇā̱mupa̭ bruve sva̱stya1gniṃ sa̭midhā̱namī̭mahe ||7||
pipa̭rtu mā̱ tadṛ̱tasya̭ pra̱vāca̭naṃ de̱vānā̱ṃ yanma̭nu̱ṣyā̱3 ama̭nmahi |
viśvā̱ idu̱srāḥ spaḻudḙti̱ sūrya̭: sva̱stya1gniṃ sa̭midhā̱namī̭mahe ||8||
a̱dve̱ṣo a̱dya ba̱rhiṣa̱: starī̭maṇi̱ grāvṇā̱ṃ yoge̱ manma̭na̱: sādha̭ īmahe |
ā̱di̱tyānā̱ṃ śarma̭ṇi̱ sthā bhṷraṇyasi sva̱stya1gniṃ sa̭midhā̱namī̭mahe ||9||
ā no̭ ba̱rhiḥ sa̭dha̱mādḙ bṛ̱haddi̱vi de̱vā~ ī̭ḻe sā̱dayā̭ sa̱pta hotṝ̭n |
indra̭ṃ mi̱traṃ varṷṇaṃ sā̱taye̱ bhaga̭ṃ sva̱stya1gniṃ sa̭midhā̱namī̭mahe ||10||
ta ā̭dityā̱ ā ga̭tā sa̱rvatā̭taye vṛ̱dhe no̭ ya̱jñama̭vatā sajoṣasaḥ |
bṛha̱spati̭ṃ pū̱ṣaṇa̭ma̱śvinā̱ bhaga̭ṃ sva̱stya1gniṃ sa̭midhā̱namī̭mahe ||11||
tanno̭ devā yacchata supravāca̱naṃ cha̱rdirā̭dityāḥ su̱bhara̭ṃ nṛ̱pāyya̭m |
paśvḙ to̱kāya̱ tana̭yāya jī̱vasḙ sva̱stya1gniṃ sa̭midhā̱namī̭mahe ||12||
viśvḙ a̱dya ma̱ruto̱ viśva̭ ū̱tī viśvḙ bhavantva̱gnaya̱: sami̭ddhāḥ |
viśvḙ no de̱vā ava̱sā ga̭mantu̱ viśva̭mastu̱ dravi̭ṇa̱ṃ vājo̭ a̱sme ||13||
yaṃ dḙvā̱so'va̭tha̱ vāja̭sātau̱ yaṃ trāya̭dhve̱ yaṃ pi̭pṛ̱thātyaṃha̭: |
yo vo̭ gopī̱the na bha̱yasya̱ veda̱ te syā̭ma de̱vavī̭taye turāsaḥ ||14||
14 luśo dhānākaḥ| viśvedevāḥ | jagatī,13-14 triṣṭup|
u̱ṣāsā̱naktā̭ bṛha̱tī su̱peśa̭sā̱ dyāvā̱kṣāmā̱ varṷṇo mi̱tro a̭rya̱mā |
indra̭ṃ huve ma̱ruta̱: parva̭tā~ a̱pa ā̭di̱tyāndyāvā̭pṛthi̱vī a̱paḥ sva̭: ||1||
dyauśca̭ naḥ pṛthi̱vī ca̱ pracḙtasa ṛ̱tāva̭rī rakṣatā̱maṃha̭so ri̱ṣaḥ |
mā dṷrvi̱datrā̱ niṝ̭tirna īśata̱ tadde̱vānā̱mavo̭ a̱dyā vṛ̭ṇīmahe ||2||
viśva̭smānno̱ adi̭tiḥ pā̱tvaṃha̭so mā̱tā mi̱trasya̱ varṷṇasya re̱vata̭: |
sva̭rva̱jjyoti̭ravṛ̱kaṃ na̭śīmahi̱ tadde̱vānā̱mavo̭ a̱dyā vṛ̭ṇīmahe ||3||
grāvā̱ vada̱nnapa̱ rakṣā̭ṃsi sedhatu du̱ṣṣvapnya̱ṃ niṝ̭ti̱ṃ viśva̭ma̱triṇa̭m |
ā̱di̱tyaṃ śarma̭ ma̱rutā̭maśīmahi̱ tadde̱vānā̱mavo̭ a̱dyā vṛ̭ṇīmahe ||4||
endro̭ ba̱rhiḥ sīda̭tu̱ pinva̭tā̱miḻā̱ bṛha̱spati̱: sāma̭bhiṝ̱kvo a̭rcatu |
su̱pra̱ke̱taṃ jī̱vase̱ manma̭ dhīmahi̱ tadde̱vānā̱mavo̭ a̱dyā vṛ̭ṇīmahe ||5||
di̱vi̱spṛśa̭ṃ ya̱jñama̱smāka̭maśvinā jī̱rādhva̭raṃ kṛṇutaṃ su̱mnami̱ṣṭayḙ |
prā̱cīna̭raśmi̱māhṷtaṃ ghṛ̱tena̱ tadde̱vānā̱mavo̭ a̱dyā vṛ̭ṇīmahe ||6||
upa̭ hvaye su̱hava̱ṃ mārṷtaṃ ga̱ṇaṃ pā̭va̱kamṛ̱ṣvaṃ sa̱khyāya̭ śa̱mbhuva̭m |
rā̱yaspoṣa̭ṃ sauśrava̱sāya̭ dhīmahi̱ tadde̱vānā̱mavo̭ a̱dyā vṛ̭ṇīmahe ||7||
a̱pāṃ perṷṃ jī̱vadha̭nyaṃ bharāmahe devā̱vya̭ṃ su̱hava̭madhvara̱śriya̭m |
su̱ra̱śmiṃ soma̭mindri̱yaṃ ya̭mīmahi̱ tadde̱vānā̱mavo̭ a̱dyā vṛ̭ṇīmahe ||8||
sa̱nema̱ tatsṷsa̱nitā̭ sa̱nitva̭bhirva̱yaṃ jī̱vā jī̱vapṷtrā̱ anā̭gasaḥ |
bra̱hma̱dviṣo̱ viṣva̱geno̭ bharerata̱ tadde̱vānā̱mavo̭ a̱dyā vṛ̭ṇīmahe ||9||
ye sthā mano̭rya̱jñiyā̱ste śṛ̭ṇotana̱ yadvo̭ devā̱ īma̭he̱ tadda̭dātana |
jaitra̱ṃ kratṷṃ rayi̱madvī̱rava̱dyaśa̱stadde̱vānā̱mavo̭ a̱dyā vṛ̭ṇīmahe ||10||
ma̱hada̱dya ma̭ha̱tāmā vṛ̭ṇīma̱he'vo̭ de̱vānā̭ṃ bṛha̱tāma̭na̱rvaṇā̭m |
yathā̱ vasṷ vī̱rajā̭ta̱ṃ naśā̭mahai̱ tadde̱vānā̱mavo̭ a̱dyā vṛ̭ṇīmahe ||11||
ma̱ho a̱gneḥ sa̭midhā̱nasya̱ śarma̱ṇyanā̭gā mi̱tre varṷṇe sva̱stayḙ |
śreṣṭhḙ syāma savi̱tuḥ savī̭mani̱ tadde̱vānā̱mavo̭ a̱dyā vṛ̭ṇīmahe ||12||
ye sa̭vi̱tuḥ sa̱tyasa̭vasya̱ viśvḙ mi̱trasya̭ vra̱te varṷṇasya de̱vāḥ |
te saubha̭gaṃ vī̱rava̱dgoma̱dapno̱ dadhā̭tana̱ dravi̭ṇaṃ ci̱trama̱sme ||13||
sa̱vi̱tā pa̱ścātā̭tsavi̱tā pu̱rastā̭tsavi̱totta̱rāttā̭tsavi̱tādha̱rāttā̭t |
sa̱vi̱tā na̭: suvatu sa̱rvatā̭tiṃ savi̱tā no̭ rāsatāṃ dī̱rghamāyṷ: ||14||
12 sauryo'bhitapāḥ| sūryaḥ| jagatī, 10 triṣṭup|
namo̭ mi̱trasya̱ varṷṇasya̱ cakṣa̭se ma̱ho de̱vāya̱ tadṛ̱taṃ sa̭paryata |
dū̱re̱dṛśḙ de̱vajā̭tāya ke̱tavḙ di̱vaspu̱trāya̱ sūryā̭ya śaṃsata ||1||
sā mā̭ sa̱tyokti̱: pari̭ pātu vi̱śvato̱ dyāvā̭ ca̱ yatra̭ ta̱tana̱nnahā̭ni ca |
viśva̭ma̱nyanni vi̭śate̱ yadeja̭ti vi̱śvāhāpo̭ vi̱śvāhodḙti̱ sūrya̭: ||2||
na te̱ adḙvaḥ pra̱divo̱ ni vā̭sate̱ yadḙta̱śebhi̭: pata̱rai ra̭tha̱ryasi̭ |
prā̱cīna̭ma̱nyadanṷ vartate̱ raja̱ uda̱nyena̱ jyoti̭ṣā yāsi sūrya ||3||
yena̭ sūrya̱ jyoti̭ṣā̱ bādha̭se̱ tamo̱ jaga̭cca̱ viśva̭mudi̱yarṣi̭ bhā̱nunā̭ |
tenā̱smadviśvā̱mani̭rā̱manā̭huti̱mapāmī̭vā̱mapa̭ du̱ṣṣvapnya̭ṃ suva ||4||
viśva̭sya̱ hi preṣi̭to̱ rakṣa̭si vra̱tamahḙḻayannu̱ccara̭si sva̱dhā anṷ |
yada̱dya tvā̭ sūryopa̱bravā̭mahai̱ taṃ no̭ de̱vā anṷ maṃsīrata̱ kratṷm ||5||
taṃ no̱ dyāvā̭pṛthi̱vī tanna̱ āpa̱ indra̭: śṛṇvantu ma̱ruto̱ hava̱ṃ vaca̭: |
mā śūnḙ bhūma̱ sūrya̭sya sa̱ṃdṛśi̭ bha̱draṃ jīva̭nto jara̱ṇāma̭śīmahi ||6||
vi̱śvāhā̭ tvā su̱mana̭saḥ su̱cakṣa̭saḥ pra̱jāva̭nto anamī̱vā anā̭gasaḥ |
u̱dyanta̭ṃ tvā mitramaho di̱vedi̭ve̱ jyogjī̱vāḥ prati̭ paśyema sūrya ||7||
mahi̱ jyoti̱rbibhra̭taṃ tvā vicakṣaṇa̱ bhāsva̭nta̱ṃ cakṣṷṣecakṣuṣe̱ maya̭: |
ā̱roha̭ntaṃ bṛha̱taḥ pāja̭sa̱spari̭ va̱yaṃ jī̱vāḥ prati̭ paśyema sūrya ||8||
yasya̭ te̱ viśvā̱ bhuva̭nāni ke̱tunā̱ pra cera̭te̱ ni ca̭ vi̱śantḙ a̱ktubhi̭: |
a̱nā̱gā̱stvena̭ harikeśa sū̱ryā'hnā̭hnā no̱ vasya̭sāvasya̱sodi̭hi ||9||
śaṃ no̭ bhava̱ cakṣa̭sā̱ śaṃ no̱ ahnā̱ śaṃ bhā̱nunā̱ śaṃ hi̱mā śaṃ ghṛ̱ṇena̭ |
yathā̱ śamadhva̱ñchamasa̭dduro̱ṇe tatsṷ̄rya̱ dravi̭ṇaṃ dhehi ci̱tram ||10||
a̱smāka̭ṃ devā u̱bhayā̭ya̱ janma̭ne̱ śarma̭ yacchata dvi̱pade̱ catṷṣpade |
a̱datpiba̭dū̱rjaya̭māna̱māśi̭ta̱ṃ tada̱sme śaṃ yora̭ra̱po da̭dhātana ||11||
yadvo̭ devāścakṛ̱ma ji̱hvayā̭ gu̱ru mana̭so vā̱ prayṷtī deva̱heḻa̭nam |
arā̭vā̱ yo no̭ a̱bhi dṷcchunā̱yate̱ tasmi̱ntadeno̭ vasavo̱ ni dhḙtana ||12||
5 muṣkavānindraḥ| indraḥ| jagatī|
a̱sminna̭ indra pṛtsu̱tau yaśa̭svati̱ śimī̭vati̱ kranda̭si̱ prāva̭ sā̱tayḙ |
yatra̱ goṣā̭tā dhṛṣi̱teṣṷ khā̱diṣu̱ viṣva̱kpata̭nti di̱dyavo̭ nṛ̱ṣāhyḙ ||1||
sa na̭: kṣu̱manta̱ṃ sada̭ne̱ vyṷ̄rṇuhi̱ goa̭rṇasaṃ ra̱yimi̭ndra śra̱vāyya̭m |
syāma̭ te̱ jaya̭taḥ śakra me̱dino̱ yathā̭ va̱yamu̱śmasi̱ tadva̭so kṛdhi ||2||
yo no̱ dāsa̱ āryo̭ vā puruṣṭu̱tā'dḙva indra yu̱dhaye̱ cikḙtati |
a̱smābhi̭ṣṭe su̱ṣahā̭: santu̱ śatra̭va̱stvayā̭ va̱yaṃ tānva̭nuyāma saṃga̱me ||3||
yo da̱bhrebhi̱rhavyo̱ yaśca̱ bhūri̭bhi̱ryo a̱bhīkḙ varivo̱vinnṛ̱ṣāhyḙ |
taṃ vi̭khā̱de sasni̭ma̱dya śru̱taṃ nara̭ma̱rvāñca̱mindra̱mava̭se karāmahe ||4||
sva̱vṛja̱ṃ hi tvāma̱hami̭ndra śu̱śravā̭nānu̱daṃ vṛ̭ṣabha radhra̱coda̭nam |
 pra mṷñcasva̱ pari̱ kutsā̭di̱hā ga̭hi̱ kimu̱ tvāvā̭nmu̱ṣkayo̭rba̱ddha ā̭sate ||5||
14 kākṣīvatī ghoṣā| aśvinau| jagatī, 14 triṣṭup|
yo vā̱ṃ pari̭jmā su̱vṛda̭śvinā̱ ratho̭ do̱ṣāmu̱ṣāso̱ havyo̭ ha̱viṣma̭tā |
śa̱śva̱tta̱māsa̱stamṷ vāmi̱daṃ va̱yaṃ pi̱turna nāma̭ su̱hava̭ṃ havāmahe ||1||
co̱daya̭taṃ sū̱nṛtā̱: pinva̭ta̱ṃ dhiya̱ utpura̭ṃdhīrīrayata̱ṃ tadṷśmasi |
ya̱śasa̭ṃ bhā̱gaṃ kṛ̭ṇutaṃ no aśvinā̱ soma̱ṃ na cārṷṃ ma̱ghava̭tsu naskṛtam ||2||
a̱mā̱jura̭ścidbhavatho yu̱vaṃ bhago̭'nā̱śości̭davi̱tārā̭pa̱masya̭ cit |
a̱ndhasya̭ cinnāsatyā kṛ̱śasya̭ cidyu̱vāmidā̭hurbhi̱ṣajā̭ ru̱tasya̭ cit ||3||
yu̱vaṃ cyavā̭naṃ sa̱naya̱ṃ yathā̱ ratha̱ṃ puna̱ryuvā̭naṃ ca̱rathā̭ya takṣathuḥ |
niṣṭau̱gryamṷ̄hathura̱dbhyaspari̱ viśvettā vā̱ṃ sava̭neṣu pra̱vācyā̭ ||4||
pu̱rā̱ṇā vā̭ṃ vī̱ryā̱3 pra bra̭vā̱ jane'tho̭ hāsathurbhi̱ṣajā̭ mayo̱bhuvā̭ |
tā vā̱ṃ nu navyā̱vava̭se karāmahe̱'yaṃ nā̭satyā̱ śrada̱riryathā̱ dadha̭t ||5||
i̱yaṃ vā̭mahve śṛṇu̱taṃ mḙ aśvinā pu̱trāyḙva pi̱tarā̱ mahya̭ṃ śikṣatam |
anā̭pi̱rajñā̭ asajā̱tyāma̭tiḥ pu̱rā tasyā̭ a̱bhiśa̭ste̱rava̭ spṛtam ||6||
yu̱vaṃ rathḙna vima̱dāya̭ śu̱ndhyuva̱ṃ nyṷ̄hathuḥ purumi̱trasya̱ yoṣa̭ṇām |
yu̱vaṃ hava̭ṃ vadhrima̱tyā a̭gacchataṃ yu̱vaṃ suṣṷtiṃ cakrathu̱: pura̭ṃdhaye ||7||
yu̱vaṃ vipra̭sya jara̱ṇāmṷpe̱yuṣa̱: puna̭: ka̱lera̭kṛṇuta̱ṃ yuva̱dvaya̭: |
yu̱vaṃ vanda̭namṛśya̱dādudṷ̄pathuryu̱vaṃ sa̱dyo vi̱śpalā̱meta̭ve kṛthaḥ ||8||
yu̱vaṃ ha̭ re̱bhaṃ vṛ̭ṣaṇā̱ guhā̭ hi̱tamudai̭rayataṃ mamṛ̱vāṃsa̭maśvinā |
yu̱vamṛ̱bīsa̭mu̱ta ta̱ptamatra̭ya̱ oma̭nvantaṃ cakrathuḥ sa̱ptava̭dhraye ||9||
yu̱vaṃ śve̱taṃ pe̱davḙ'śvi̱nāśva̭ṃ na̱vabhi̱rvājai̭rnava̱tī ca̭ vā̱jina̭m |
ca̱rkṛtya̭ṃ dadathurdrāva̱yatsa̭kha̱ṃ bhaga̱ṃ na nṛbhyo̱ havya̭ṃ mayo̱bhuva̭m ||10||
na taṃ rā̭jānāvadite̱ kuta̭śca̱na nāṃho̭ aśnoti duri̱taṃ naki̭rbha̱yam |
yama̭śvinā suhavā rudravartanī purora̱thaṃ kṛ̭ṇu̱thaḥ patnyā̭ sa̱ha ||11||
ā tena̭ yāta̱ṃ mana̭so̱ javī̭yasā̱ ratha̱ṃ yaṃ vā̭mṛ̱bhava̭śca̱krura̭śvinā |
yasya̱ yogḙ duhi̱tā jāya̭te di̱va u̱bhe aha̭nī su̱dinḙ vi̱vasva̭taḥ ||12||
tā va̱rtiryā̭taṃ ja̱yuṣā̱ vi parva̭ta̱mapi̭nvataṃ śa̱yavḙ dhe̱numa̭śvinā |
vṛka̭sya ci̱dvarti̭kāma̱ntarā̱syā̭dyu̱vaṃ śacī̭bhirgrasi̱tāma̭muñcatam ||13||
e̱taṃ vā̱ṃ stoma̭maśvināvaka̱rmāta̭kṣāma̱ bhṛga̭vo̱ na ratha̭m |
nya̭mṛkṣāma̱ yoṣa̭ṇā̱ṃ na marye̱ nitya̱ṃ na sū̱nuṃ tana̭ya̱ṃ dadhā̭nāḥ ||14||
14 kākṣīvatī ghoṣā| aśvinau| jagatī|
ratha̱ṃ yānta̱ṃ kuha̱ ko ha̭ vāṃ narā̱ prati̭ dyu̱manta̭ṃ suvi̱tāya̭ bhūṣati |
prā̱ta̱ryāvā̭ṇaṃ vi̱bhva̭ṃ vi̱śevi̭śe̱ vasto̭rvasto̱rvaha̭mānaṃ dhi̱yā śami̭ ||1||
kuha̭ sviddo̱ṣā kuha̱ vasto̭ra̱śvinā̱ kuhā̭bhipi̱tvaṃ ka̭rata̱: kuho̭ṣatuḥ |
ko vā̭ṃ śayu̱trā vi̱dhavḙva de̱vara̱ṃ marya̱ṃ na yoṣā̭ kṛṇute sa̱dhastha̱ ā ||2||
prā̱tarja̭rethe jara̱ṇeva̱ kāpa̭yā̱ vasto̭rvastoryaja̱tā ga̭cchatho gṛ̱ham |
kasya̭ dhva̱srā bha̭vatha̱: kasya̭ vā narā rājapu̱treva̱ sava̱nāva̭ gacchathaḥ ||3||
yu̱vāṃ mṛ̱geva̭ vāra̱ṇā mṛ̭ga̱ṇyavo̭ do̱ṣā vasto̭rha̱viṣā̱ ni hva̭yāmahe |
 yu̱vaṃ hotrā̭mṛtu̱thā juhva̭te na̱reṣa̱ṃ janā̭ya vahathaḥ śubhaspatī ||4||
yu̱vāṃ ha̱ ghoṣā̱ parya̭śvinā ya̱tī rājña̭ ūce duhi̱tā pṛ̱cche vā̭ṃ narā |
bhū̱taṃ me̱ ahna̭ u̱ta bhṷ̄tama̱ktave'śvā̭vate ra̱thinḙ śakta̱marva̭te ||5||
yu̱vaṃ ka̱vī ṣṭha̱: parya̭śvinā̱ ratha̱ṃ viśo̱ na kutso̭ jari̱turna̭śāyathaḥ |
yu̱vorha̱ makṣā̱ parya̭śvinā̱ madhvā̱sā bha̭rata niṣkṛ̱taṃ na yoṣa̭ṇā ||6||
yu̱vaṃ ha̭ bhu̱jyuṃ yu̱vama̭śvinā̱ vaśa̭ṃ yu̱vaṃ śi̱ñjāra̭mu̱śanā̱mupā̭rathuḥ |
yu̱vo rarā̭vā̱ pari̭ sa̱khyamā̭sate yu̱vora̱hamava̭sā su̱mnamā ca̭ke ||7||
yu̱vaṃ ha̭ kṛ̱śaṃ yu̱vama̭śvinā śa̱yuṃ yu̱vaṃ vi̱dhanta̭ṃ vi̱dhavā̭muruṣyathaḥ |
yu̱vaṃ sa̱nibhya̭: sta̱naya̭ntamaśvi̱nā'pa̭ vra̱jamṷ̄rṇuthaḥ sa̱ptāsya̭m ||8||
jani̭ṣṭa̱ yoṣā̭ pa̱taya̭tkanīna̱ko vi cārṷhanvī̱rudho̭ da̱ṃsanā̱ anṷ |
āsmai̭ rīyante niva̱neva̱ sindha̭vo̱'smā ahnḙ bhavati̱ tatpa̭titva̱nam ||9||
jī̱vaṃ rṷdanti̱ vi ma̭yante adhva̱re dī̱rghāmanu̱ prasi̭tiṃ dīdhiyu̱rnara̭: |
vā̱maṃ pi̱tṛbhyo̱ ya i̱daṃ sa̭meri̱re maya̱: pati̭bhyo̱ jana̭yaḥ pari̱ṣvajḙ ||10||
na tasya̭ vidma̱ tadu̱ ṣu pra vo̭cata̱ yuvā̭ ha̱ yadyṷva̱tyāḥ kṣeti̱ yoni̭ṣu |
pri̱yosri̭yasya vṛṣa̱bhasya̭ re̱tino̭ gṛ̱haṃ ga̭memāśvinā̱ tadṷśmasi ||11||
ā vā̭magantsuma̱tirvā̭jinīvasū̱ nya̭śvinā hṛ̱tsu kāmā̭ ayaṃsata |
abhṷ̄taṃ go̱pā mi̭thu̱nā śṷbhaspatī pri̱yā a̭rya̱mṇo duryā̭~ aśīmahi ||12||
tā ma̭ndasā̱nā manṷṣo duro̱ṇa ā dha̱ttaṃ ra̱yiṃ sa̱havī̭raṃ vaca̱syavḙ |
kṛ̱taṃ tī̱rthaṃ sṷprapā̱ṇaṃ śṷbhaspatī sthā̱ṇuṃ pa̭the̱ṣṭhāmapa̭ durma̱tiṃ ha̭tam ||13||
kva̭ svida̱dya ka̭ta̱māsva̱śvinā̭ vi̱kṣu da̱srā mā̭dayete śu̱bhaspatī̭ |
ka ī̱ṃ ni yḙme kata̱masya̭ jagmatu̱rvipra̭sya vā̱ yaja̭mānasya vā gṛ̱ham ||14||
3 suhastyo ghauṣeyaḥ| aśvinau| jagatī|
sa̱mā̱namu̱ tyaṃ pṷruhū̱tamu̱kthyaṃ1 ratha̭ṃ trica̱kraṃ sava̭nā̱ gani̭gmatam |
pari̭jmānaṃ vida̱thya̭ṃ suvṛ̱ktibhi̭rva̱yaṃ vyṷṣṭā u̱ṣaso̭ havāmahe ||1||
prā̱ta̱ryuja̭ṃ nāsa̱tyādhi̭ tiṣṭhathaḥ prāta̱ryāvā̭ṇaṃ madhu̱vāha̭na̱ṃ ratha̭m |
viśo̱ yena̱ gaccha̭tho̱ yajva̭rīrnarā kī̱reści̭dya̱jñaṃ hotṛ̭mantamaśvinā ||2||
a̱dhva̱ryuṃ vā̱ madhṷpāṇiṃ su̱hastya̭ma̱gnidha̭ṃ vā dhṛ̱tada̭kṣa̱ṃ damṷ̄nasam |
vipra̭sya vā̱ yatsava̭nāni̱ gaccha̱tho'ta̱ ā yā̭taṃ madhu̱peya̭maśvinā ||3||
11 kṛṣṇa āṅgirasaḥ| indraḥ| triṣṭup|
astḙva̱ su pra̭ta̱raṃ lāya̱masya̱nbhūṣa̭nniva̱ pra bha̭rā̱ stoma̭masmai |
vā̱cā vi̭prāstarata̱ vāca̭ma̱ryo ni rā̭maya jarita̱: soma̱ indra̭m ||1||
dohḙna̱ gāmupa̭ śikṣā̱ sakhā̭ya̱ṃ pra bo̭dhaya jaritarjā̱ramindra̭m |
kośa̱ṃ na pū̱rṇaṃ vasṷnā̱ nyṛ̭ṣṭa̱mā cyā̭vaya magha̱deyā̭ya̱ śūra̭m ||2||
kima̱ṅga tvā̭ maghavanbho̱jamā̭huḥ śiśī̱hi mā̭ śiśa̱yaṃ tvā̭ śṛṇomi |
apna̭svatī̱ mama̱ dhīra̭stu śakra vasu̱vida̱ṃ bhaga̭mi̱ndrā bha̭rā naḥ ||3||
tvāṃ janā̭ mamasa̱tyeṣvi̭ndra saṃtasthā̱nā vi hva̭yante samī̱ke |
atrā̱ yuja̭ṃ kṛṇute̱ yo ha̱viṣmā̱nnāsṷnvatā sa̱khyaṃ va̭ṣṭi̱ śūra̭: ||4||
dhana̱ṃ na sya̱ndraṃ ba̭hu̱laṃ yo a̭smai tī̱vrāntsomā̭~ āsu̱noti̱ praya̭svān |
tasmai̱ śatrṷ̄ntsu̱tukā̭nprā̱tarahno̱ ni svaṣṭrā̭nyu̱vati̱ hanti̭ vṛ̱tram ||5||
yasmi̭nva̱yaṃ da̭dhi̱mā śaṃsa̱mindre̱ yaḥ śi̱śrāya̭ ma̱ghavā̱ kāma̭ma̱sme |
ā̱rācci̱tsanbha̭yatāmasya̱ śatru̱rnya̭smai dyu̱mnā janyā̭ namantām ||6||
ā̱rācchatru̱mapa̭ bādhasva dū̱ramu̱gro yaḥ śamba̭: puruhūta̱ tena̭ |
a̱sme dhḙhi̱ yava̭ma̱dgoma̭dindra kṛ̱dhī dhiya̭ṃ jari̱tre vāja̭ratnām ||7||
pra yama̱ntarvṛ̭ṣasa̱vāso̱ agma̭ntī̱vrāḥ somā̭ bahu̱lāntā̭sa̱ indra̭m |
nāha̭ dā̱māna̭ṃ ma̱ghavā̱ ni ya̭ṃsa̱nni sṷnva̱te va̭hati̱ bhūri̭ vā̱mam ||8||
u̱ta pra̱hāma̭ti̱dīvyā̭ jayāti kṛ̱taṃ yacchva̱ghnī vi̭ci̱noti̭ kā̱le |
yo de̱vakā̭mo̱ na dhanā̭ ruṇaddhi̱ samittaṃ rā̱yā sṛ̭jati sva̱dhāvā̭n ||9||
gobhi̭ṣṭare̱māma̭tiṃ du̱revā̱ṃ yavḙna̱ kṣudha̭ṃ puruhūta̱ viśvā̭m |
va̱yaṃ rāja̭bhiḥ pratha̱mā dhanā̭nya̱smākḙna vṛ̱janḙnā jayema ||10||
bṛha̱spati̭rna̱: pari̭ pātu pa̱ścādu̱totta̭rasmā̱dadha̭rādaghā̱yoḥ |
indra̭: pu̱rastā̭du̱ta ma̭dhya̱to na̱: sakhā̱ sakhi̭bhyo̱ vari̭vaḥ kṛṇotu ||11||
11 kṛṣṇa āṅgirasaḥ| indraḥ| jagatī,10-11 triṣṭup|
acchā̭ ma̱ indra̭ṃ ma̱taya̭: sva̱rvida̭: sa̱dhrīcī̱rviśvā̭ uśa̱tīra̭nūṣata |
pari̭ ṣvajante̱ jana̭yo̱ yathā̱ pati̱ṃ marya̱ṃ na śu̱ndhyuṃ ma̱ghavā̭namū̱tayḙ ||1||
na ghā̭ tva̱drigapa̭ veti me̱ mana̱stve itkāma̭ṃ puruhūta śiśraya |
rājḙva dasma̱ ni ṣa̱do'dhi̭ ba̱rhiṣya̱smintsu somḙ'va̱pāna̭mastu te ||2||
vi̱ṣū̱vṛdindro̱ ama̭teru̱ta kṣu̱dhaḥ sa idrā̱yo ma̱ghavā̱ vasva̭ īśate |
tasyedi̱me pra̭va̱ṇe sa̱pta sindha̭vo̱ vayo̭ vardhanti vṛṣa̱bhasya̭ śu̱ṣmiṇa̭: ||3||
vayo̱ na vṛ̱kṣaṃ sṷpalā̱śamāsa̭da̱ntsomā̭sa̱ indra̭ṃ ma̱ndina̭ścamū̱ṣada̭: |
praiṣā̱manī̭ka̱ṃ śava̭sā̱ davi̭dyutadvi̱datsva1rmana̭ve̱ jyoti̱rārya̭m ||4||
kṛ̱taṃ na śva̱ghnī vi ci̭noti̱ deva̭ne sa̱ṃvarga̱ṃ yanma̱ghavā̱ sūrya̱ṃ jaya̭t |
 na tattḙ a̱nyo anṷ vī̱rya̭ṃ śaka̱nna pṷrā̱ṇo ma̭ghava̱nnota nūta̭naḥ ||5||
viśa̭ṃviśaṃ ma̱ghavā̱ parya̭śāyata̱ janā̭nā̱ṃ dhenā̭ ava̱cāka̭śa̱dvṛṣā̭ |
yasyāha̭ śa̱kraḥ sava̭neṣu̱ raṇya̭ti̱ sa tī̱vraiḥ somai̭: sahate pṛtanya̱taḥ ||6||
āpo̱ na sindhṷma̱bhi yatsa̱makṣa̭ra̱ntsomā̭sa̱ indra̭ṃ ku̱lyā i̭va hra̱dam |
vardha̭nti̱ viprā̱ maho̭ asya̱ sāda̭ne̱ yava̱ṃ na vṛ̱ṣṭirdi̱vyena̱ dānṷnā ||7||
vṛṣā̱ na kru̱ddhaḥ pa̭taya̱draja̱:svā yo a̱ryapa̭tnī̱rakṛ̭ṇodi̱mā a̱paḥ |
sa sṷnva̱te ma̱ghavā̭ jī̱radā̭na̱ve'vi̭nda̱jjyoti̱rmana̭ve ha̱viṣma̭te ||8||
ujjā̭yatāṃ para̱śurjyoti̭ṣā sa̱ha bhū̱yā ṛ̱tasya̭ su̱dughā̭ purāṇa̱vat |
vi ro̭catāmaru̱ṣo bhā̱nunā̱ śuci̱: sva1rṇa śu̱kraṃ śṷśucīta̱ satpa̭tiḥ ||9||
gobhi̭ṣṭare̱māma̭tiṃ du̱revā̱ṃ yavḙna̱ kṣudha̭ṃ puruhūta̱ viśvā̭m |
va̱yaṃ rāja̭bhiḥ pratha̱mā dhanā̭nya̱smākḙna vṛ̱janḙnā jayema ||10||
bṛha̱spati̭rna̱: pari̭ pātu pa̱ścādu̱totta̭rasmā̱dadha̭rādaghā̱yoḥ |
indra̭: pu̱rastā̭du̱ta ma̭dhya̱to na̱: sakhā̱ sakhi̭bhyo̱ vari̭vaḥ kṛṇotu ||11||
11 kṛṣṇa āṅgirasaḥ| indraḥ| jagatī,1-3,10-11 triṣṭup|
ā yā̱tvindra̱: svapa̭ti̱rmadā̭ya̱ yo dharma̭ṇā tūtujā̱nastuvi̭ṣmān |
pra̱tva̱kṣā̱ṇo ati̱ viśvā̱ sahā̭ṃsyapā̱reṇa̭ maha̱tā vṛṣṇyḙna ||1||
su̱ṣṭhāmā̱ ratha̭: su̱yamā̱ harī̭ te mi̱myakṣa̱ vajro̭ nṛpate̱ gabha̭stau |
śībha̭ṃ rājantsu̱pathā yā̭hya̱rvāṅvardhā̭ma te pa̱puṣo̱ vṛṣṇyā̭ni ||2||
endra̱vāho̭ nṛ̱pati̱ṃ vajra̭bāhumu̱gramu̱grāsa̭stavi̱ṣāsa̭ enam |
pratva̭kṣasaṃ vṛṣa̱bhaṃ sa̱tyaśṷṣma̱mema̭sma̱trā sa̭dha̱mādo̭ vahantu ||3||
e̱vā pati̭ṃ droṇa̱sāca̱ṃ sacḙtasamū̱rjaḥ ska̱mbhaṃ dha̱ruṇa̱ ā vṛ̭ṣāyase |
oja̭: kṛṣva̱ saṃ gṛ̭bhāya̱ tve apyaso̱ yathā̭ keni̱pānā̭mi̱no vṛ̱dhe ||4||
gama̭nna̱sme vasū̱nyā hi śaṃsi̭ṣaṃ svā̱śiṣa̱ṃ bhara̱mā yā̭hi so̱mina̭: |
tvamī̭śiṣe̱ sāsminnā sa̭tsi ba̱rhiṣya̭nādhṛ̱ṣyā tava̱ pātrā̭ṇi̱ dharma̭ṇā ||5||
pṛtha̱kprāya̭npratha̱mā de̱vahṷ̄ta̱yo'kṛ̭ṇvata śrava̱syā̭ni du̱ṣṭarā̭ |
na ye śe̱kurya̱jñiyā̱ṃ nāva̭mā̱ruha̭mī̱rmaiva te nya̭viśanta̱ kepa̭yaḥ ||6||
e̱vaivāpā̱gapa̭re santu dū̱ḍhyo'śvā̱ yeṣā̭ṃ du̱ryuja̭ āyuyu̱jre |
i̱tthā ye prāgupa̭re̱ santi̭ dā̱vanḙ pu̱rūṇi̱ yatra̭ va̱yunā̭ni̱ bhoja̭nā ||7||
gi̱rī~rajrā̱nreja̭mānā~ adhāraya̱ddyauḥ kra̭ndada̱ntari̭kṣāṇi kopayat |
sa̱mī̱cī̱ne dhi̱ṣaṇe̱ vi ṣka̭bhāyati̱ vṛṣṇa̭: pī̱tvā mada̭ u̱kthāni̭ śaṃsati ||8||
i̱maṃ bi̭bharmi̱ sukṛ̭taṃ te aṅku̱śaṃ yenā̭ru̱jāsi̭ maghavañchaphā̱ruja̭: |
a̱smintsu te̱ sava̭ne astvo̱kya̭ṃ su̱ta i̱ṣṭau ma̭ghavanbo̱dhyābha̭gaḥ ||9||
gobhi̭ṣṭare̱māma̭tiṃ du̱revā̱ṃ yavḙna̱ kṣudha̭ṃ puruhūta̱ viśvā̭m |
va̱yaṃ rāja̭bhiḥ pratha̱mā dhanā̭nya̱smākḙna vṛ̱janḙnā jayema ||10||
bṛha̱spati̭rna̱: pari̭ pātu pa̱ścādu̱totta̭rasmā̱dadha̭rādaghā̱yoḥ |
indra̭: pu̱rastā̭du̱ta ma̭dhya̱to na̱: sakhā̱ sakhi̭bhyo̱ vari̭vaḥ kṛṇotu ||11||
12 vatsaprirbhālandanaḥ| agniḥ| triṣṭup|
di̱vaspari̭ pratha̱maṃ ja̭jñe a̱gnira̱smaddvi̱tīya̱ṃ pari̭ jā̱tavḙdāḥ |
tṛ̱tīya̭ma̱psu nṛ̱maṇā̱ aja̭sra̱mindhā̭na enaṃ jarate svā̱dhīḥ ||1||
vi̱dmā tḙ agne tre̱dhā tra̱yāṇi̭ vi̱dmā te̱ dhāma̱ vibhṛ̭tā puru̱trā |
vi̱dmā te̱ nāma̭ para̱maṃ guhā̱ yadvi̱dmā tamutsa̱ṃ yata̭ āja̱gantha̭ ||2||
sa̱mu̱dre tvā̭ nṛ̱maṇā̭ a̱psva1ntarnṛ̱cakṣā̭ īdhe di̱vo a̭gna̱ ūdha̭n |
tṛ̱tīyḙ tvā̱ raja̭si tasthi̱vāṃsa̭ma̱pāmu̱pasthḙ mahi̱ṣā a̭vardhan ||3||
akra̭ndada̱gniḥ sta̱naya̭nniva̱ dyauḥ kṣāmā̱ reri̭hadvī̱rudha̭: sama̱ñjan |
sa̱dyo ja̭jñā̱no vi hīmi̱ddho akhya̱dā roda̭sī bhā̱nunā̭ bhātya̱ntaḥ ||4||
śrī̱ṇāmṷdā̱ro dha̱ruṇo̭ rayī̱ṇāṃ ma̭nī̱ṣāṇā̱ṃ prārpa̭ṇa̱: soma̭gopāḥ |
vasṷ: sū̱nuḥ saha̭so a̱psu rājā̱ vi bhā̱tyagra̭ u̱ṣasā̭midhā̱naḥ ||5||
viśva̭sya ke̱turbhuva̭nasya̱ garbha̱ ā roda̭sī apṛṇā̱jjāya̭mānaḥ |
vī̱ḻuṃ ci̱dadri̭mabhinatparā̱yañjanā̱ yada̱gnimaya̭janta̱ pañca̭ ||6||
u̱śikpā̭va̱ko a̭ra̱tiḥ sṷme̱dhā martḙṣva̱gnira̱mṛto̱ ni dhā̭yi |
iya̭rti dhū̱mama̭ru̱ṣaṃ bhari̭bhra̱ducchu̱kreṇa̭ śo̱ciṣā̱ dyāmina̭kṣan ||7||
dṛ̱śā̱no ru̱kma ṷrvi̱yā vya̭dyauddu̱rmarṣa̱māyṷ: śri̱ye rṷcā̱naḥ |
a̱gnira̱mṛto̭ abhava̱dvayo̭bhi̱ryadḙna̱ṃ dyaurja̱naya̭tsu̱retā̭: ||8||
yastḙ a̱dya kṛ̱ṇava̭dbhadraśoce'pū̱paṃ dḙva ghṛ̱tava̭ntamagne |
pra taṃ na̭ya prata̱raṃ vasyo̱ acchā̱'bhi su̱mnaṃ de̱vabha̭ktaṃ yaviṣṭha ||9||
ā taṃ bha̭ja sauśrava̱seṣva̭gna u̱kthaṷktha̱ ā bha̭ja śa̱syamā̭ne |
pri̱yaḥ sūryḙ pri̱yo a̱gnā bha̭vā̱tyujjā̱tena̭ bhi̱nada̱dujjani̭tvaiḥ ||10||
tvāma̭gne̱ yaja̭mānā̱ anu̱ dyūnviśvā̱ vasṷ dadhire̱ vāryā̭ṇi |
tvayā̭ sa̱ha dravi̭ṇami̱cchamā̭nā vra̱jaṃ goma̭ntamu̱śijo̱ vi va̭vruḥ ||11||
astā̭vya̱gnirna̱rāṃ su̱śevo̭ vaiśvāna̱ra ṛṣi̭bhi̱: soma̭gopāḥ |
a̱dve̱ṣe dyāvā̭pṛthi̱vī hṷvema̱ devā̭ dha̱tta ra̱yima̱sme su̱vīra̭m ||12||
10 vatsaprirbhālandanaḥ| agniḥ| triṣṭup|
pra hotā̭ jā̱to ma̱hānna̭bho̱vinnṛ̱ṣadvā̭ sīdada̱pāmu̱pasthḙ |
dadhi̱ryo dhāyi̱ sa te̱ vayā̭ṃsi ya̱ntā vasṷ̄ni vidha̱te ta̭nū̱pāḥ ||1||
i̱maṃ vi̱dhanto̭ a̱pāṃ sa̱dhasthḙ pa̱śuṃ na na̱ṣṭaṃ pa̱dairanṷ gman |
guhā̱ cata̭ntamu̱śijo̱ namo̭bhiri̱cchanto̱ dhīrā̱ bhṛga̭vo'vindan ||2||
i̱maṃ tri̱to bhūrya̭vindadi̱cchanvai̭bhūva̱so mū̱rdhanyaghnyā̭yāḥ |
sa śevṛ̭dho jā̱ta ā ha̱rmyeṣu̱ nābhi̱ryuvā̭ bhavati roca̱nasya̭ ||3||
ma̱ndraṃ hotā̭ramu̱śijo̱ namo̭bhi̱: prāñca̭ṃ ya̱jñaṃ ne̱tāra̭madhva̱rāṇā̭m |
vi̱śāma̭kṛṇvannara̱tiṃ pā̭va̱kaṃ ha̭vya̱vāha̱ṃ dadha̭to̱ mānṷṣeṣu ||4||
pra bhū̱rjaya̭ntaṃ ma̱hāṃ vi̭po̱dhāṃ mū̱rā amṷ̄raṃ pu̱rāṃ da̱rmāṇa̭m |
naya̭nto̱ garbha̭ṃ va̱nāṃ dhiya̭ṃ dhu̱rhiri̭śmaśru̱ṃ nārvā̭ṇa̱ṃ dhana̭rcam ||5||
ni pa̱styā̭su tri̱taḥ sta̭bhū̱yanpari̭vīto̱ yonaṷ sīdada̱ntaḥ |
ata̭: sa̱ṃgṛbhyā̭ vi̱śāṃ damṷ̄nā̱ vidha̭rmaṇāya̱ntrairī̭yate̱ nṝn ||6||
a̱syājarā̭so da̱māma̱ritrā̭ a̱rcaddhṷ̄māso a̱gnaya̭: pāva̱kāḥ |
śvi̱tī̱caya̭: śvā̱trāso̭ bhura̱ṇyavo̭ vana̱rṣado̭ vā̱yavo̱ na somā̭: ||7||
pra ji̱hvayā̭ bharate̱ vepo̭ a̱gniḥ pra va̱yunā̭ni̱ ceta̭sā pṛthi̱vyāḥ |
tamā̱yava̭: śu̱caya̭ntaṃ pāva̱kaṃ ma̱ndraṃ hotā̭raṃ dadhire̱ yaji̭ṣṭham ||8||
dyāvā̱ yama̱gniṃ pṛ̭thi̱vī jani̭ṣṭā̱māpa̱stvaṣṭā̱ bhṛga̭vo̱ yaṃ saho̭bhiḥ |
ī̱ḻenya̭ṃ pratha̱maṃ mā̭ta̱riśvā̭ de̱vāsta̭takṣu̱rmana̭ve̱ yaja̭tram ||9||
yaṃ tvā̭ de̱vā da̭dhi̱re ha̭vya̱vāha̭ṃ puru̱spṛho̱ mānṷṣāso̱ yaja̭tram |
sa yāma̭nnagne stuva̱te vayo̭ dhā̱: pra dḙva̱yanya̱śasa̱: saṃ hi pū̱rvīḥ ||10||
8 saptagurāṃgirasaḥ| vaikuṇṭha indraḥ| triṣṭup|
ja̱gṛ̱bhmā te̱ dakṣi̭ṇamindra̱ hasta̭ṃ vasū̱yavo̭ vasupate̱ vasṷ̄nām |
vi̱dmā hi tvā̱ gopa̭tiṃ śūra̱ gonā̭ma̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||1||
svā̱yu̱dhaṃ svava̭saṃ sunī̱thaṃ catṷ:samudraṃ dha̱ruṇa̭ṃ rayī̱ṇām |
ca̱rkṛtya̱ṃ śaṃsya̱ṃ bhūri̭vārama̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||2||
su̱brahmā̭ṇaṃ de̱vava̭ntaṃ bṛ̱hanta̭mu̱ruṃ ga̭bhī̱raṃ pṛ̱thubṷdhnamindra |
śru̱taṛ̭ṣimu̱grama̭bhimāti̱ṣāha̭ma̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||3||
sa̱nadvā̭ja̱ṃ vipra̭vīra̱ṃ tarṷtraṃ dhana̱spṛta̭ṃ śūśu̱vāṃsa̭ṃ su̱dakṣa̭m |
da̱syu̱hana̭ṃ pū̱rbhida̭mindra sa̱tyama̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||4||
aśvā̭vantaṃ ra̱thina̭ṃ vī̱rava̭ntaṃ saha̱sriṇa̭ṃ śa̱tina̱ṃ vāja̭mindra |
bha̱dravrā̭ta̱ṃ vipra̭vīraṃ sva̱rṣāma̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||5||
pra sa̱ptagṷmṛ̱tadhī̭tiṃ sume̱dhāṃ bṛha̱spati̭ṃ ma̱tiracchā̭ jigāti |
ya ā̭ṅgira̱so nama̭sopa̱sadyo̱'smabhya̭ṃ ci̱traṃ vṛṣa̭ṇaṃ ra̱yiṃ dā̭: ||6||
vanī̭vāno̱ mama̭ dū̱tāsa̱ indra̱ṃ stomā̭ścaranti suma̱tīri̭yā̱nāḥ |
hṛ̱di̱spṛśo̱ mana̭sā va̱cyamā̭nā a̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||7||
yattvā̱ yāmi̭ da̱ddhi tanna̭ indra bṛ̱hanta̱ṃ kṣaya̱masa̭ma̱ṃ janā̭nām |
a̱bhi taddyāvā̭pṛthi̱vī gṛ̭ṇītāma̱smabhya̭ṃ ci̱traṃ vṛṣa̭ṇaṃ ra̱yiṃ dā̭: ||8||
vaikuṇṭha indraḥ| indraḥ| jagatīḥ, 7, 10-11 triṣṭup|
a̱haṃ bhṷva̱ṃ vasṷnaḥ pū̱rvyaspati̭ra̱haṃ dhanā̭ni̱ saṃ ja̭yāmi̱ śaśva̭taḥ |
māṃ ha̭vante pi̱tara̱ṃ na ja̱ntavo̱'haṃ dā̱śuṣe̱ vi bha̭jāmi̱ bhoja̭nam ||1||
a̱hamindro̱ rodho̱ vakṣo̱ atha̭rvaṇastri̱tāya̱ gā a̭janaya̱mahe̱radhi̭ |
a̱haṃ dasyṷbhya̱: pari̭ nṛ̱mṇamā da̭de go̱trā śikṣa̭ndadhī̱ce mā̭ta̱riśva̭ne ||2||
mahya̱ṃ tvaṣṭā̱ vajra̭matakṣadāya̱saṃ mayi̭ de̱vāso̭'vṛja̱nnapi̱ kratṷm |
mamānī̭ka̱ṃ sūrya̭syeva du̱ṣṭara̱ṃ māmārya̭nti kṛ̱tena̱ kartvḙna ca ||3||
a̱hame̱taṃ ga̱vyaya̱maśvya̭ṃ pa̱śuṃ pṷrī̱ṣiṇa̱ṃ sāya̭kenā hira̱ṇyaya̭m |
pu̱rū sa̱hasrā̱ ni śi̭śāmi dā̱śuṣe̱ yanmā̱ somā̭sa u̱kthino̱ ama̭ndiṣuḥ ||4||
a̱hamindro̱ na parā̭ jigya̱ iddhana̱ṃ na mṛ̱tyave'va̭ tasthe̱ kadā̭ ca̱na |
 soma̱minmā̭ su̱nvanto̭ yācatā̱ vasu̱ na mḙ pūravaḥ sa̱khye ri̭ṣāthana ||5||
a̱hame̱tāñchāśva̭sato̱ dvādvendra̱ṃ ye vajra̭ṃ yu̱dhaye'kṛ̭ṇvata |
ā̱hvaya̭mānā̱~ ava̱ hanma̭nāhanaṃ dṛ̱ḻhā vada̱nnana̭masyurnama̱svina̭: ||6||
a̱bhī̱3dameka̱meko̭ asmi ni̱ṣṣāḻa̱bhī dvā kimu̱ traya̭: karanti |
khale̱ na pa̱rṣānprati̭ hanmi̱ bhūri̱ kiṃ mā̭ nindanti̱ śatra̭vo'ni̱ndrāḥ ||7||
a̱haṃ gu̱ṅgubhyo̭ atithi̱gvamiṣka̭ra̱miṣa̱ṃ na vṛ̭tra̱tura̭ṃ vi̱kṣu dhā̭rayam |
yatpa̭rṇaya̱ghna u̱ta vā̭ karañja̱he prāhaṃ ma̱he vṛ̭tra̱hatye̱ aśṷśravi ||8||
pra me̱ namī̭ sā̱pya i̱ṣe bhu̱je bhū̱dgavā̱meṣḙ sa̱khyā kṛ̭ṇuta dvi̱tā |
di̱dyuṃ yada̭sya sami̱theṣṷ ma̱ṃhaya̱mādidḙna̱ṃ śaṃsya̭mu̱kthya̭ṃ karam ||9||
pra nema̭smindadṛśe̱ somo̭ a̱ntargo̱pā nema̭mā̱vira̱sthā kṛ̭ṇoti |
sa ti̱gmaśṛ̭ṅgaṃ vṛṣa̱bhaṃ yuyṷtsandru̱hasta̭sthau bahu̱le ba̱ddho a̱ntaḥ ||10||
ā̱di̱tyānā̱ṃ vasṷ̄nāṃ ru̱driyā̭ṇāṃ de̱vo de̱vānā̱ṃ na mi̭nāmi̱ dhāma̭ |
te mā̭ bha̱drāya̱ śava̭se tatakṣu̱rapa̭rājita̱mastṛ̭ta̱maṣā̭ḻham ||11||
11 vaikuṇṭha indraḥ| indraḥ| jagatīḥ, 2-11 triṣṭup|
a̱haṃ dā̭ṃ gṛṇa̱te pūrvya̱ṃ vasva̱haṃ brahma̭ kṛṇava̱ṃ mahya̱ṃ vardha̭nam |
a̱haṃ bhṷva̱ṃ yaja̭mānasya codi̱tāya̭jvanaḥ sākṣi̱ viśva̭smi̱nbharḙ ||1||
māṃ dhu̱rindra̱ṃ nāma̭ de̱vatā̭ di̱vaśca̱ gmaścā̱pāṃ ca̭ ja̱ntava̭: |
a̱haṃ harī̱ vṛṣa̭ṇā̱ vivra̭tā ra̱ghū a̱haṃ vajra̱ṃ śava̭se dhṛ̱ṣṇvā da̭de ||2||
a̱hamatka̭ṃ ka̱vayḙ śiśnatha̱ṃ hathai̭ra̱haṃ kutsa̭māvamā̱bhirū̱tibhi̭: |
a̱haṃ śuṣṇa̭sya̱ śnathi̭tā̱ vadha̭ryama̱ṃ na yo ra̱ra ārya̱ṃ nāma̱ dasya̭ve ||3||
a̱haṃ pi̱teva̭ veta̱sū~ra̱bhiṣṭa̭ye̱ tugra̱ṃ kutsā̭ya̱ smadi̭bhaṃ ca randhayam |
a̱haṃ bhṷva̱ṃ yaja̭mānasya rā̱jani̱ pra yadbhare̱ tuja̭ye̱ na pri̱yādhṛṣḙ ||4||
a̱haṃ ra̭ndhaya̱ṃ mṛga̭yaṃ śru̱tarva̭ṇe̱ yanmāji̭hīta va̱yunā̭ ca̱nānu̱ṣak |
a̱haṃ ve̱śaṃ na̱mramā̱yavḙ'karama̱haṃ savyā̭ya̱ paḍgṛ̭bhimarandhayam ||5||
a̱haṃ sa yo nava̭vāstvaṃ bṛ̱hadra̭tha̱ṃ saṃ vṛ̱treva̱ dāsa̭ṃ vṛtra̱hārṷjam |
yadva̱rdhaya̭ntaṃ pra̱thaya̭ntamānu̱ṣagdū̱re pā̱re raja̭so roca̱nāka̭ram ||6||
a̱haṃ sūrya̭sya̱ pari̭ yāmyā̱śubhi̱: praita̱śebhi̱rvaha̭māna̱ oja̭sā |
yanmā̭ sā̱vo manṷṣa̱ āha̭ ni̱rṇija̱ ṛdha̭kkṛṣe̱ dāsa̱ṃ kṛtvya̱ṃ hathai̭: ||7||
a̱haṃ sa̭pta̱hā nahṷṣo̱ nahṷṣṭara̱: prāśrā̭vaya̱ṃ śava̭sā tu̱rvaśa̱ṃ yadṷm |
a̱haṃ nya1nyaṃ saha̭sā̱ saha̭skara̱ṃ nava̱ vrādha̭to nava̱tiṃ ca̭ vakṣayam ||8||
a̱haṃ sa̱pta sra̱vato̭ dhāraya̱ṃ vṛṣā̭ dravi̱tnva̭: pṛthi̱vyāṃ sī̱rā adhi̭ |
a̱hamarṇā̭ṃsi̱ vi ti̭rāmi su̱kratṷryu̱dhā vi̭da̱ṃ mana̭ve gā̱tumi̱ṣṭayḙ ||9||
a̱haṃ tadā̭su dhāraya̱ṃ yadā̭su̱ na de̱vaśca̱na tvaṣṭādhā̭raya̱druśa̭t |
spā̱rhaṃ gavā̱mūdha̭ssu va̱kṣaṇā̱svā madho̱rmadhu̱ śvātrya̱ṃ soma̭mā̱śira̭m ||10||
e̱vā de̱vā~ indro̭ vivye̱ nṝnpra cyau̱tnena̭ ma̱ghavā̭ sa̱tyarā̭dhāḥ |
viśvettā tḙ harivaḥ śacīvo̱'bhi tu̱rāsa̭: svayaśo gṛṇanti ||11||
7 vaikuṇṭha indraḥ| indraḥ| jagatīḥ, 3,4 abhisāriṇī, 5 triṣṭup|
pra vo̭ ma̱he manda̭mānā̱yāndha̱so'rcā̭ vi̱śvāna̭rāya viśvā̱bhuvḙ |
indra̭sya̱ yasya̱ suma̭kha̱ṃ saho̱ mahi̱ śravo̭ nṛ̱mṇaṃ ca̱ roda̭sī sapa̱ryata̭: ||1||
so ci̱nnu sakhyā̱ narya̭ i̱naḥ stu̱taśca̱rkṛtya̱ indro̱ māva̭te̱ narḙ |
viśvā̭su dhū̱rṣu vā̭ja̱kṛtyḙṣu satpate vṛ̱tre vā̱psva1bhi śṷ̄ra mandase ||2||
ke te nara̭ indra̱ ye ta̭ i̱ṣe ye tḙ su̱mnaṃ sa̭dha̱nya1miya̭kṣān |
 ke te̱ vājā̭yāsu̱ryā̭ya hinvire̱ ke a̱psu svāsū̱rvarā̭su̱ pauṃsyḙ ||3||
bhuva̱stvami̭ndra̱ brahma̭ṇā ma̱hānbhuvo̱ viśvḙṣu̱ sava̭neṣu ya̱jñiya̭: |
bhuvo̱ nṝ~ścyau̱tno viśva̭smi̱nbhare̱ jyeṣṭha̭śca̱ mantro̭ viśvacarṣaṇe ||4||
avā̱ nu ka̱ṃ jyāyā̭nya̱jñava̭naso ma̱hīṃ ta̱ omā̭trāṃ kṛ̱ṣṭayo̭ viduḥ |
aso̱ nu ka̭ma̱jaro̱ vardhā̭śca̱ viśvede̱tā sava̭nā tūtu̱mā kṛ̭ṣe ||5||
e̱tā viśvā̱ sava̭nā tūtu̱mā kṛ̭ṣe sva̱yaṃ sṷ̄no sahaso̱ yāni̭ dadhi̱ṣe |
varā̭ya te̱ pātra̱ṃ dharma̭ṇe̱ tanā̭ ya̱jño mantro̱ brahmodya̭ta̱ṃ vaca̭: ||6||
ye tḙ vipra brahma̱kṛta̭: su̱te sacā̱ vasṷ̄nāṃ ca̱ vasṷnaśca dā̱vanḙ |
pra te su̱mnasya̱ mana̭sā pa̱thā bhṷva̱nmadḙ su̱tasya̭ so̱myasyāndha̭saḥ ||7||
(9) 1,3,5,7,9devāḥ, 2,4,6,8, saucīko'gniḥ| 2,,4,6,8 devāḥ 1,3,5,7,9, agniḥ|triṣṭup|
ma̱hattadulba̱ṃ sthavi̭ra̱ṃ tadā̭sī̱dyenāvi̭ṣṭitaḥ pravi̱veśi̭thā̱paḥ |
viśvā̭ apaśyadbahu̱dhā tḙ agne̱ jāta̭vedasta̱nvo̭ de̱va eka̭: ||1||
ko mā̭ dadarśa kata̱maḥ sa de̱vo yo mḙ ta̱nvo̭ bahu̱dhā pa̱ryapa̭śyat |
kvāha̭ mitrāvaruṇā kṣiyantya̱gnerviśvā̭: sa̱midho̭ deva̱yānī̭: ||2||
aicchā̭ma tvā bahu̱dhā jā̭taveda̱: pravi̭ṣṭamagne a̱psvoṣa̭dhīṣu |
taṃ tvā̭ ya̱mo a̭cikeccitrabhāno daśāntaru̱ṣyāda̭ti̱roca̭mānam ||3||
ho̱trāda̱haṃ va̭ruṇa̱ bibhya̭dāya̱ṃ nede̱va mā̭ yu̱naja̱nnatra̭ de̱vāḥ |
tasya̭ me ta̱nvo̭ bahu̱dhā nivi̭ṣṭā e̱tamartha̱ṃ na ci̭ketā̱hama̱gniḥ ||4||
ehi̱ manṷrdeva̱yurya̱jñakā̭mo'ra̱ṃkṛtyā̱ tama̭si kṣeṣyagne |
su̱gānpa̱thaḥ kṛ̭ṇuhi deva̱yānā̱nvaha̭ ha̱vyāni̭ sumana̱syamā̭naḥ ||5||
a̱gneḥ pūrve̱ bhrāta̭ro̱ artha̭me̱taṃ ra̱thīvādhvā̭na̱manvāva̭rīvuḥ |
tasmā̭dbhi̱yā va̭ruṇa dū̱ramā̭yaṃ gau̱ro na kṣe̱pnora̭vije̱ jyāyā̭: ||6||
ku̱rmasta̱ āyṷra̱jara̱ṃ yada̭gne̱ yathā̭ yu̱kto jā̭tavedo̱ na riṣyā̭: |
athā̭ vahāsi sumana̱syamā̭no bhā̱gaṃ de̱vebhyo̭ ha̱viṣa̭: sujāta ||7||
pra̱yā̱jānmḙ anuyā̱jā~śca̱ keva̭lā̱nūrja̭svantaṃ ha̱viṣo̭ datta bhā̱gam |
ghṛ̱taṃ cā̱pāṃ purṷṣa̱ṃ cauṣa̭dhīnāma̱gneśca̭ dī̱rghamāyṷrastu devāḥ ||8||
tava̭ prayā̱jā a̭nuyā̱jāśca̱ keva̭la̱ ūrja̭svanto ha̱viṣa̭: santu bhā̱gāḥ |
 tavā̭gne ya̱jño̱3'yama̭stu̱ sarva̱stubhya̭ṃ namantāṃ pra̱diśa̱ścata̭sraḥ ||9||
6 saucīko'gniḥ| viśvedevāḥ| triṣṭup|
viśvḙ devāḥ śā̱stana̭ mā̱ yathe̱ha hotā̭ vṛ̱to ma̱navai̱ yanni̱ṣadya̭ |
pra mḙ brūta bhāga̱dheya̱ṃ yathā̭ vo̱ yena̭ pa̱thā ha̱vyamā vo̱ vahā̭ni ||1||
a̱haṃ hotā̱ nya̭sīda̱ṃ yajī̭yā̱nviśvḙ de̱vā ma̱ruto̭ mā junanti |
aha̭raharaśvi̱nādhva̭ryavaṃ vāṃ bra̱hmā sa̱midbha̭vati̱ sāhṷtirvām ||2||
a̱yaṃ yo hotā̱ kiru̱ sa ya̱masya̱ kamapyṷ̄he̱ yatsa̭ma̱ñjanti̭ de̱vāḥ |
aha̭raharjāyate mā̱simā̱syathā̭ de̱vā da̭dhire havya̱vāha̭m ||3||
māṃ de̱vā da̭dhire havya̱vāha̱mapa̭mluktaṃ ba̱hu kṛ̱cchrā cara̭ntam |
a̱gnirvi̱dvānya̱jñaṃ na̭: kalpayāti̱ pañca̭yāmaṃ tri̱vṛta̭ṃ sa̱ptata̭ntum ||4||
ā vo̭ yakṣyamṛta̱tvaṃ su̱vīra̱ṃ yathā̭ vo devā̱ vari̭va̱: karā̭ṇi |
ā bā̱hvorvajra̱mindra̭sya dheyā̱mathe̱mā viśvā̱: pṛta̭nā jayāti ||5||
trīṇi̭ śa̱tā trī sa̱hasrā̭ṇya̱gniṃ tri̱ṃśacca̭ de̱vā nava̭ cāsaparyan |
aukṣa̭nghṛ̱tairastṛ̭ṇanba̱rhira̭smā̱ ādiddhotā̭ra̱ṃ nya̭sādayanta ||6||
11 devāḥ,4-5 saucīko'gniḥ| agniḥ,4-5 devāḥ| 1-5 ,8triṣṭup , 6-7,9-11 jagatī|
yamaicchā̭ma̱ mana̭sā̱ so̱3'yamāgā̭dya̱jñasya̭ vi̱dvānparṷṣaściki̱tvān |
sa no̭ yakṣadde̱vatā̭tā̱ yajī̭yā̱nni hi ṣatsa̱danta̭ra̱: pūrvo̭ a̱smat ||1||
arā̭dhi̱ hotā̭ ni̱ṣadā̱ yajī̭yāna̱bhi prayā̭ṃsi̱ sudhi̭tāni̱ hi khyat |
yajā̭mahai ya̱jñiyā̱nhanta̭ de̱vā~ īḻā̭mahā̱ īḍyā̱~ ājyḙna ||2||
sā̱dhvīma̭karde̱vavī̭tiṃ no a̱dya ya̱jñasya̭ ji̱hvāma̭vidāma̱ guhyā̭m |
sa āyu̱rāgā̭tsura̱bhirvasā̭no bha̱drāma̭karde̱vahṷ̄tiṃ no a̱dya ||3||
tada̱dya vā̱caḥ pra̭tha̱maṃ ma̭sīya̱ yenāsṷrā~ a̱bhi de̱vā asā̭ma |
ūrjā̭da u̱ta ya̭jñiyāsa̱: pañca̭ janā̱ mama̭ ho̱traṃ jṷṣadhvam ||4||
pañca̱ janā̱ mama̭ ho̱traṃ jṷṣantā̱ṃ gojā̭tā u̱ta ye ya̱jñiyā̭saḥ |
pṛ̱thi̱vī na̱: pārthi̭vātpā̱tvaṃha̭so̱'ntari̭kṣaṃ di̱vyātpā̭tva̱smān ||5||
tantṷṃ ta̱nvanraja̭so bhā̱numanvi̭hi̱ jyoti̭ṣmataḥ pa̱tho ra̭kṣa dhi̱yā kṛ̱tān |
a̱nu̱lba̱ṇaṃ va̭yata̱ jogṷvā̱mapo̱ manṷrbhava ja̱nayā̱ daivya̱ṃ jana̭m ||6||
a̱kṣā̱naho̭ nahyatano̱ta so̭myā̱ iṣkṛ̭ṇudhvaṃ raśa̱nā ota pi̭ṃśata |
a̱ṣṭāva̭ndhuraṃ vahatā̱bhito̱ ratha̱ṃ yena̭ de̱vāso̱ ana̭yanna̱bhi pri̱yam ||7||
aśma̭nvatī rīyate̱ saṃ ra̭bhadhva̱mutti̭ṣṭhata̱ pra ta̭ratā sakhāyaḥ |
atrā̭ jahāma̱ ye asa̱nnaśḙvāḥ śi̱vānva̱yamutta̭remā̱bhi vājā̭n ||8||
tvaṣṭā̭ mā̱yā vḙda̱pasā̭ma̱pasta̭mo̱ bibhra̱tpātrā̭ deva̱pānā̭ni̱ śaṃta̭mā |
śiśī̭te nū̱naṃ pa̭ra̱śuṃ svā̭ya̱saṃ yena̭ vṛ̱ścādeta̭śo̱ brahma̭ṇa̱spati̭: ||9||
sa̱to nū̱naṃ ka̭vaya̱: saṃ śi̭śīta̱ vāśī̭bhi̱ryābhi̭ra̱mṛtā̭ya̱ takṣa̭tha |
vi̱dvāṃsa̭: pa̱dā guhyā̭ni kartana̱ yena̭ de̱vāso̭ amṛta̱tvamā̭na̱śuḥ ||10
garbhe̱ yoṣā̱mada̭dhurva̱tsamā̱sanya̭pī̱cyḙna̱ mana̭so̱ta ji̱hvayā̭ |
sa vi̱śvāhā̭ su̱manā̭ yo̱gyā a̱bhi si̭ṣā̱sani̭rvanate kā̱ra ijjiti̭m ||11
6 bṛhaduktho vāmadevyaḥ| indraḥ| triṣṭup|
tāṃ su tḙ kī̱rtiṃ ma̭ghavanmahi̱tvā yattvā̭ bhī̱te roda̭sī̱ ahva̭yetām |
prāvo̭ de̱vā~ āti̭ro̱ dāsa̱moja̭: pra̱jāyai̭ tvasyai̱ yadaśi̭kṣa indra ||1||
yadaca̭rasta̱nvā̭ vāvṛdhā̱no balā̭nīndra prabruvā̱ṇo janḙṣu |
mā̱yetsā te̱ yāni̭ yu̱ddhānyā̱hurnādya śatrṷṃ na̱nu pu̱rā vi̭vitse ||2||
ka u̱ nu tḙ mahi̱mana̭: samasyā̱'smatpūrva̱ ṛṣa̱yo'nta̭māpuḥ |
yanmā̱tara̭ṃ ca pi̱tara̭ṃ ca sā̱kamaja̭nayathāsta̱nva1: svāyā̭: ||3||
ca̱tvāri̭ te asu̱ryā̭ṇi̱ nāmā'dā̭bhyāni mahi̱ṣasya̭ santi |
tvama̱ṅga tāni̱ viśvā̭ni vitse̱ yebhi̱: karmā̭ṇi maghavañca̱kartha̭ ||4||
tvaṃ viśvā̭ dadhiṣe̱ keva̭lāni̱ yānyā̱viryā ca̱ guhā̱ vasṷ̄ni |
kāma̱minmḙ maghava̱nmā vi tā̭rī̱stvamā̭jñā̱tā tvami̭ndrāsi dā̱tā ||5||
yo ada̭dhā̱jjyoti̭ṣi̱ jyoti̭ra̱ntaryo asṛ̭ja̱nmadhṷnā̱ saṃ madhṷ̄ni |
adha̭ pri̱yaṃ śū̱ṣamindrā̭ya̱ manma̭ brahma̱kṛto̭ bṛ̱hadṷkthādavāci ||6||
8 bṛhaduktho vāmadevyaḥ| indraḥ| triṣṭup|
dū̱re tannāma̱ guhya̭ṃ parā̱cairyattvā̭ bhī̱te ahva̭yetāṃ vayo̱dhai |
uda̭stabhnāḥ pṛthi̱vīṃ dyāma̱bhīke̱ bhrātṷ: pu̱trānma̭ghavantitviṣā̱ṇaḥ ||1||
ma̱hattannāma̱ guhya̭ṃ puru̱spṛgyena̭ bhū̱taṃ ja̱nayo̱ yena̱ bhavya̭m |
pra̱tnaṃ jā̱taṃ jyoti̱ryada̭sya pri̱yaṃ pri̱yāḥ sama̭viśanta̱ pañca̭ ||2||
ā roda̭sī apṛṇā̱dota madhya̱ṃ pañca̭ de̱vā~ ṛ̭tu̱śaḥ sa̱ptasa̭pta |
catṷstriṃśatā puru̱dhā vi ca̭ṣṭe̱ sarṷ̄peṇa̱ jyoti̭ṣā̱ vivra̭tena ||3||
yadṷṣa̱ auccha̭: pratha̱mā vi̱bhānā̱maja̭nayo̱ yena̭ pu̱ṣṭasya̭ pu̱ṣṭam |
yattḙ jāmi̱tvamava̭ra̱ṃ para̭syā ma̱hanma̭ha̱tyā a̭sura̱tvameka̭m ||4||
vi̱dhuṃ da̭drā̱ṇaṃ sama̭ne bahū̱nāṃ yuvā̭na̱ṃ santa̭ṃ pali̱to ja̭gāra |
de̱vasya̭ paśya̱ kāvya̭ṃ mahi̱tvā'dyā ma̱māra̱ sa hyaḥ samā̭na ||5||
śākma̭nā śā̱ko a̭ru̱ṇaḥ sṷpa̱rṇa ā yo ma̱haḥ śūra̭: sa̱nādanī̭ḻaḥ |
yacci̱keta̭ sa̱tyamittanna mogha̱ṃ vasṷ spā̱rhamu̱ta jeto̱ta dātā̭ ||6||
aibhi̭rdade̱ vṛṣṇyā̱ pauṃsyā̭ni̱ yebhi̱raukṣa̭dvṛtra̱hatyā̭ya va̱jrī |
 ye karma̭ṇaḥ kri̱yamā̭ṇasya ma̱hna ṛ̭teka̱rmamu̱dajā̭yanta de̱vāḥ ||7||
yu̱jā karmā̭ṇi ja̱naya̭nvi̱śvaujā̭ aśasti̱hā vi̱śvama̭nāsturā̱ṣāṭ |
pī̱tvī soma̭sya di̱va ā vṛ̭dhā̱naḥ śūro̱ niryu̱dhādha̭ma̱ddasyṷ̄n ||8||
7 bṛhaduktho vāmadevyaḥ| viśvedevāḥ| triṣṭup| 4-6 jagatī|
i̱daṃ ta̱ eka̭ṃ pa̱ra ṷ̄ ta̱ eka̭ṃ tṛ̱tīyḙna̱ jyoti̭ṣā̱ saṃ vi̭śasva |
sa̱ṃveśa̭ne ta̱nva1ścārṷredhi pri̱yo de̱vānā̭ṃ para̱me ja̱nitrḙ ||1||
ta̱nūṣṭḙ vājinta̱nvaṃ1 naya̭ntī vā̱mama̱smabhya̱ṃ dhātu̱ śarma̱ tubhya̭m |
ahrṷto ma̱ho dha̱ruṇā̭ya de̱vāndi̱vī̭va̱ jyoti̱: svamā mi̭mīyāḥ ||2||
vā̱jya̭si̱ vāji̭nenā suve̱nīḥ sṷvi̱taḥ stoma̭ṃ suvi̱to diva̭ṃ gāḥ |
su̱vi̱to dharma̭ pratha̱mānṷ sa̱tyā sṷvi̱to de̱vāntsṷvi̱to'nu̱ patma̭ ||3||
ma̱hi̱mna ḙṣāṃ pi̱tara̭śca̱neśi̭re de̱vā de̱veṣva̭dadhu̱rapi̱ kratṷm |
sama̭vivyacuru̱ta yānyatvi̭ṣu̱raiṣā̭ṃ ta̱nūṣu̱ ni vi̭viśu̱: puna̭: ||4||
saho̭bhi̱rviśva̱ṃ pari̭ cakramū̱ raja̱: pūrvā̱ dhāmā̱nyami̭tā̱ mimā̭nāḥ |
ta̱nūṣu̱ viśvā̱ bhuva̭nā̱ ni yḙmire̱ prāsā̭rayanta puru̱dha pra̱jā anṷ ||5||
dvidhā̭ sū̱navo'sṷraṃ sva̱rvida̱māsthā̭payanta tṛ̱tīyḙna̱ karma̭ṇā |
svāṃ pra̱jāṃ pi̱tara̱: pitrya̱ṃ saha̱ āva̭reṣvadadhu̱stantu̱māta̭tam ||6||
nā̱vā na kṣoda̭: pra̱diśa̭: pṛthi̱vyāḥ sva̱stibhi̱rati̭ du̱rgāṇi̱ viśvā̭ |
svāṃ pra̱jāṃ bṛ̱hadṷktho mahi̱tvā''va̭reṣvadadhā̱dā parḙṣu ||7||
6 bandhu: śrutabandhurviprabandhurgaupāyanāḥ|viśvedevāḥ| gāyatrī|
mā pra gā̭ma pa̱tho va̱yaṃ mā ya̱jñādi̭ndra so̱mina̭: | mānta sthṷrno̱ arā̭tayaḥ ||1||
yo ya̱jñasya̭ pra̱sādha̭na̱stantṷrde̱veṣvāta̭taḥ | tamāhṷtaṃ naśīmahi ||2||
mano̱ nvā hṷvāmahe nārāśa̱ṃsena̱ somḙna | pi̱tṝ̱ṇāṃ ca̱ manma̭bhiḥ ||3||
ā ta̭ etu̱ mana̱: puna̱: kratve̱ dakṣā̭ya jī̱vasḙ | jyokca̱ sūrya̭ṃ dṛ̱śe ||4||
puna̭rnaḥ pitaro̱ mano̱ dadā̭tu̱ daivyo̱ jana̭: | jī̱vaṃ vrāta̭ṃ sacemahi ||5||
va̱yaṃ so̭ma vra̱te tava̱ mana̭sta̱nūṣu̱ bibhra̭taḥ | pra̱jāva̭ntaḥ sacemahi ||6||
12 bandhu: śrutabandhurviprabandhurgaupāyanāḥ|mana āvartanam| anuṣṭup|
yattḙ ya̱maṃ vai̭vasva̱taṃ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||1||
yatte̱ diva̱ṃ yatpṛ̭thi̱vīṃ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||2||
yatte̱ bhūmi̱ṃ catṷrbhṛṣṭi̱ṃ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||3||
yatte̱ cata̭sraḥ pra̱diśo̱ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||4||
yattḙ samu̱drama̭rṇa̱vaṃ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||5||
yatte̱ marī̭cīḥ pra̱vato̱ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||6||
yattḙ a̱po yadoṣa̭dhī̱rmano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||7||
yatte̱ sūrya̱ṃ yadu̱ṣasa̱ṃ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||8||
yatte̱ parva̭tānbṛha̱to mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||9||
yatte̱ viśva̭mi̱daṃ jaga̱nmano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||10||
yatte̱ parā̭: parā̱vato̱ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||11||
yattḙ bhū̱taṃ ca̱ bhavya̭ṃ ca̱ mano̭ ja̱gāma̭ dūra̱kam | tatta̱ ā va̭rtayāmasī̱ha kṣayā̭ya jī̱vasḙ ||12||
10 bandhu śrutabandhurviprabandhurgaupāyanāḥ|1-3 nirṛtiḥ,4 nirṛtiḥ somaśca, 5-6asunītiḥ, 7 pṛthivī-dvayantarikṣa-soma-pūṣa-pathyā-svastayaḥ,8-10 dyāvāpṛthivī, 10 (pūrvārdhasya) indra- dyāvāpṛthivyaḥ| triṣṭup , 8 paṃktiḥ,9 mahāpaṃktiḥ, 10 paṃktyuttarā|
pra tā̱ryāyṷ: prata̱raṃ navī̭ya̱: sthātā̭reva̱ kratṷmatā̱ ratha̭sya |
adha̱ cyavā̭na̱ utta̭vī̱tyartha̭ṃ parāta̱raṃ su niṝ̭tirjihītām ||1||
sāma̱nnu rā̱ye ni̭dhi̱mannvanna̱ṃ karā̭mahe̱ su pṷru̱dha śravā̭ṃsi |
tā no̱ viśvā̭ni jari̱tā ma̭mattu parāta̱raṃ su niṝ̭tirjihītām ||2||
a̱bhī ṣva1ryaḥ pauṃsyai̭rbhavema̱ dyaurna bhūmi̭ṃ gi̱rayo̱ nājrā̭n |
tā no̱ viśvā̭ni jari̱tā ci̭keta parāta̱raṃ su niṝ̭tirjihītām ||3||
mo ṣu ṇa̭: soma mṛ̱tyave̱ parā̭ dā̱: paśyḙma̱ nu sūrya̭mu̱ccara̭ntam |
dyubhi̭rhi̱to ja̭ri̱mā sū no̭ astu parāta̱raṃ su niṝ̭tirjihītām ||4||
asṷnīte̱ mano̭ a̱smāsṷ dhāraya jī̱vāta̭ve̱ su pra ti̭rā na̱ āyṷ: |
rā̱ra̱ndhi na̱: sūrya̭sya sa̱ṃdṛśi̭ ghṛ̱tena̱ tvaṃ ta̱nva̭ṃ vardhayasva ||5||
asṷnīte̱ puna̭ra̱smāsu̱ cakṣu̱: puna̭: prā̱ṇami̱ha no̭ dhehi̱ bhoga̭m |
jyokpa̭śyema̱ sūrya̭mu̱ccara̭nta̱manṷmate mṛ̱ḻayā̭ naḥ sva̱sti ||6||
puna̭rno̱ asṷṃ pṛthi̱vī da̭dātu̱ puna̱rdyaurde̱vī puna̭ra̱ntari̭kṣam |
puna̭rna̱: soma̭sta̱nva̭ṃ dadātu̱ puna̭: pū̱ṣā pa̱thyā̱ṃ3 yā sva̱stiḥ ||7||
śaṃ roda̭sī su̱bandha̭ve ya̱hvī ṛ̱tasya̭ mā̱tarā̭ |
bhara̭tā̱mapa̱ yadrapo̱ dyauḥ pṛ̭thivi kṣa̱mā rapo̱ mo ṣu te̱ kiṃ ca̱nāma̭mat ||8||
ava̭ dva̱ke ava̭ tri̱kā di̱vaśca̭ranti bheṣa̱jā |
kṣa̱mā ca̭ri̱ṣṇvḙka̱kaṃ bhara̭tā̱mapa̱ yadrapo̱ dyauḥ pṛ̭thivi kṣa̱mā rapo̱ mo ṣu te̱ kiṃ ca̱nāma̭mat ||9||
sami̭ndreraya̱ gāma̭na̱ḍvāha̱ṃ ya āva̭haduśī̱narā̭ṇyā̱ ana̭: |
 bhara̭tā̱mapa̱ yadrapo̱ dyauḥ pṛ̭thivi kṣa̱mā rapo̱ mo ṣu te̱ kiṃ ca̱nāma̭mat ||10||
12 bandhu: śrutabandhurviprabandhurgaupāyanāḥ,6 agastyasvasā eṣāṃ mātā ṛṣikā| 1-4,6 asamātiḥ, 5 indraḥ,7-11 jīvaḥ,12 hastaḥ|anuṣṭup,1-5 gāyatrī, 8-9 paṃktiḥ|
ā jana̭ṃ tve̱ṣasa̭ṃdṛśa̱ṃ māhī̭nānā̱mupa̭stutam | aga̭nma̱ bibhra̭to̱ nama̭: ||1||
asa̭mātiṃ ni̱tośa̭naṃ tve̱ṣaṃ ni̭ya̱yina̱ṃ ratha̭m | bha̱jera̭thasya̱ satpa̭tim ||2||
yo janā̭nmahi̱ṣā~ i̭vā'tita̱sthau pavī̭ravān | u̱tāpa̭vīravānyu̱dhā ||3||
yasyḙkṣvā̱kurupa̭ vra̱te re̱vānma̭rā̱yyedha̭te | di̱vī̭va̱ pañca̭ kṛ̱ṣṭaya̭: ||4||
indra̭ kṣa̱trāsa̭mātiṣu̱ ratha̭proṣṭheṣu dhāraya | di̱vī̭va̱ sūrya̭ṃ dṛ̱śe ||5||
a̱gastya̭sya̱ nadbhya̱: saptī̭ yunakṣi̱ rohi̭tā | pa̱ṇīnnya̭kramīra̱bhi viśvā̭nrājannarā̱dhasa̭: ||6||
a̱yaṃ mā̱tāyaṃ pi̱tā'yaṃ jī̱vātu̱rāga̭mat | i̱daṃ tava̭ pra̱sarpa̭ṇa̱ṃ suba̭ndha̱vehi̱ niri̭hi ||7||
yathā̭ yu̱gaṃ va̭ra̱trayā̱ nahya̭nti dha̱ruṇā̭ya̱ kam | e̱vā dā̭dhāra te̱ mano̭ jī̱vāta̭ve̱ na mṛ̱tyave'tho̭ ari̱ṣṭatā̭taye ||8||
yathe̱yaṃ pṛ̭thi̱vī ma̱hī dā̱dhāre̱mānvana̱spatī̭n | e̱vā dā̭dhāra te̱ mano̭ jī̱vāta̭ve̱ na mṛ̱tyave'tho̭ ari̱ṣṭatā̭taye ||9||
ya̱māda̱haṃ vai̭vasva̱tātsu̱bandho̱rmana̱ ābha̭ram | jī̱vāta̭ve̱ na mṛ̱tyave'tho̭ ari̱ṣṭatā̭taye ||10||
nya1gvāto'va̭ vāti̱ nya̭ktapati̱ sūrya̭: | nī̱cīna̭ma̱ghnyā dṷhe̱ nya̭gbhavatu te̱ rapa̭: ||11||
a̱yaṃ me̱ hasto̱ bhaga̭vāna̱yaṃ me̱ bhaga̭vattaraḥ | a̱yaṃ mḙ vi̱śvabhḙṣajo̱'yaṃ śi̱vābhi̭marśanaḥ ||12||
27 nābhānediṣṭho  mānavaḥ| viśve devāḥ| triṣṭup|
i̱dami̱tthā raudra̭ṃ gū̱rtava̭cā̱ brahma̱ kratvā̱ śacyā̭ma̱ntarā̱jau |
krā̱ṇā yada̭sya pi̱tarā̭ maṃhane̱ṣṭhāḥ parṣa̭tpa̱kthe aha̱nnā sa̱pta hotṝ̭n ||1||
sa iddā̱nāya̱ dabhyā̭ya va̱nvañcyavā̭na̱: sūdai̭ramimīta̱ vedi̭m |
tūrva̭yāṇo gū̱rtava̭castama̱: kṣodo̱ na reta̭ i̱taṷ̄ti siñcat ||2||
mano̱ na yeṣu̱ hava̭neṣu ti̱gmaṃ vipa̱: śacyā̭ vanu̱tho drava̭ntā |
ā yaḥ śaryā̭bhistuvinṛ̱mṇo a̱syā'śrī̭ṇītā̱diśa̱ṃ gabha̭stau ||3||
kṛ̱ṣṇā yadgoṣva̭ru̱ṇīṣu̱ sīda̭ddi̱vo napā̭tāśvinā huve vām |
vī̱taṃ mḙ ya̱jñamā ga̭taṃ me̱ anna̭ṃ vava̱nvāṃsā̱ neṣa̱masmṛ̭tadhrū ||4||
prathi̭ṣṭa̱ yasya̭ vī̱raka̭rmami̱ṣṇadanṷṣṭhita̱ṃ nu naryo̱ apaṷhat |
puna̱stadā vṛ̭hati̱ yatka̱nāyā̭ duhi̱turā anṷbhṛtamana̱rvā ||5||
ma̱dhyā yatkartva̱mabha̭vada̱bhīke̱ kāma̭ṃ kṛṇvā̱ne pi̱tari̭ yuva̱tyām |
ma̱nā̱nagreto̭ jahaturvi̱yantā̱ sānau̱ niṣi̭ktaṃ sukṛ̱tasya̱ yonaṷ ||6||
pi̱tā yatsvāṃ dṷhi̱tara̭madhi̱ṣkankṣma̱yā reta̭: saṃjagmā̱no ni ṣi̭ñcat |
svā̱dhyo̭'janaya̱nbrahma̭ de̱vā vāsto̱ṣpati̭ṃ vrata̱pāṃ nira̭takṣan ||7||
sa ī̱ṃ vṛṣā̱ na phena̭masyadā̱jau smadā parai̱dapa̭ da̱bhracḙtāḥ |
sara̭tpa̱dā na dakṣi̭ṇā parā̱vṛṅna tā nu mḙ pṛśa̱nyo̭ jagṛbhre ||8||
ma̱kṣū na vahni̭: pra̱jāyā̭ upa̱bdira̱gniṃ na na̱gna upa̭ sīda̱dūdha̭: |
sani̭te̱dhmaṃ sani̭to̱ta vāja̱ṃ sa dha̱rtā ja̭jñe̱ saha̭sā yavī̱yut ||9||
ma̱kṣū ka̱nāyā̭: sa̱khyaṃ nava̭gvā ṛ̱taṃ vada̭nta ṛ̱tayṷktimagman |
dvi̱barha̭so̱ ya upa̭ go̱pamāgṷradakṣi̱ṇāso̱ acyṷtā dudukṣan ||10||
ma̱kṣū ka̱nāyā̭: sa̱khyaṃ navī̭yo̱ rādho̱ na reta̭ ṛ̱tamittṷraṇyan |
śuci̱ yatte̱ rekṇa̱ āya̭janta saba̱rdughā̭yā̱: paya̭ u̱sriyā̭yāḥ ||11||
pa̱śvā yatpa̱ścā viyṷtā bu̱dhanteti̭ bravīti va̱ktarī̱ rarā̭ṇaḥ |
vaso̭rvasu̱tvā kā̱ravo̭'ne̱hā viśva̭ṃ viveṣṭi̱ dravi̭ṇa̱mupa̱ kṣu ||12||
tadinnva̭sya pari̱ṣadvā̭no agmanpu̱rū sada̭nto nārṣa̱daṃ bi̭bhitsan |
vi śuṣṇa̭sya̱ saṃgra̭thitamana̱rvā vi̱datpṷruprajā̱tasya̱ guhā̱ yat ||13||
bhargo̭ ha̱ nāmo̱ta yasya̭ de̱vāḥ sva1rṇa ye tri̭ṣadha̱sthe ni̭ṣe̱duḥ |
a̱gnirha̱ nāmo̱ta jā̱tavḙdāḥ śru̱dhī no̭ hotaṝ̱tasya̱ hotā̱dhruk ||14||
u̱ta tyā me̱ raudrā̭varci̱mantā̱ nāsa̭tyāvindra gū̱rtaye̱ yaja̭dhyai |
ma̱nu̱ṣvadvṛ̱ktaba̭rhiṣe̱ rarā̭ṇā ma̱ndū hi̱tapra̭yasā vi̱kṣu yajyṷ̄ ||15||
a̱yaṃ stu̱to rājā̭ vandi ve̱dhā a̱paśca̱ vipra̭starati̱ svasḙtuḥ |
sa ka̱kṣīva̭ntaṃ rejaya̱tso a̱gniṃ ne̱miṃ na ca̱kramarva̭to raghu̱dru ||16||
sa dvi̱bandhṷrvaitara̱ṇo yaṣṭā̭ saba̱rdhuṃ dhe̱numa̱sva̭ṃ du̱hadhyai̭ |
saṃ yanmi̱trāvarṷṇā vṛ̱ñja u̱kthairjyeṣṭhḙbhirarya̱maṇa̱ṃ varṷ̄thaiḥ ||17||
tadba̭ndhuḥ sū̱rirdi̱vi tḙ dhiya̱ṃdhā nābhā̱nedi̭ṣṭho rapati̱ pra vena̭n |
sā no̱ nābhi̭: para̱māsya vā̭ ghā̱'haṃ tatpa̱ścā ka̭ti̱thaści̭dāsa ||18||
i̱yaṃ me̱ nābhi̭ri̱ha mḙ sa̱dhastha̭mi̱me mḙ de̱vā a̱yama̭smi̱ sarva̭: |
dvi̱jā aha̭ prathama̱jā ṛ̱tasye̱daṃ dhe̱nura̭duha̱jjāya̭mānā ||19||
adhā̭su ma̱ndro a̭ra̱tirvi̱bhāvā'va̭ syati dvivarta̱nirva̭ne̱ṣāṭ |
ū̱rdhvā yacchreṇi̱rna śiśu̱rdanma̱kṣū sthi̱raṃ śḙvṛ̱dhaṃ sṷ̄ta mā̱tā ||20||
adhā̱ gāva̱ upa̭mātiṃ ka̱nāyā̱ anṷ śvā̱ntasya̱ kasya̭ ci̱tparḙyuḥ |
śru̱dhi tvaṃ sṷdraviṇo na̱stvaṃ yā̭ḻāśva̱ghnasya̭ vāvṛdhe sū̱nṛtā̭bhiḥ ||21||
adha̱ tvami̭ndra vi̱ddhya1smānma̱ho rā̱ye nṛ̭pate̱ vajra̭bāhuḥ |
 rakṣā̭ ca no ma̱ghona̭: pā̱hi sū̱rīna̭ne̱hasa̭ste harivo a̱bhiṣṭaṷ ||22||
adha̱ yadrā̭jānā̱ gavi̭ṣṭau̱ sara̭tsara̱ṇyuḥ kā̱ravḙ jara̱ṇyuḥ |
vipra̱: preṣṭha̱: sa hyḙṣāṃ ba̱bhūva̱ parā̭ ca̱ vakṣa̭du̱ta pa̭rṣadenān ||23||
adhā̱ nva̭sya̱ jenya̭sya pu̱ṣṭau vṛthā̱ rebha̭nta īmahe̱ tadū̱ nu |
sa̱ra̱ṇyura̭sya sū̱nuraśvo̱ vipra̭ścāsi̱ śrava̭saśca sā̱tau ||24||
yu̱voryadi̭ sa̱khyāyā̱sme śardhā̭ya̱ stoma̭ṃ juju̱ṣe nama̭svān |
vi̱śvatra̱ yasmi̱nnā gira̭: samī̱cīḥ pū̱rvīva̭ gā̱turdāśa̭tsū̱nṛtā̭yai ||25||
sa gṛ̭ṇā̱no a̱dbhirde̱vavā̱niti̭ su̱bandhu̱rnama̭sā sū̱ktaiḥ |
vardha̭du̱kthairvaco̭bhi̱rā hi nū̱naṃ vyadhvai̭ti̱ paya̭sa u̱sriyā̭yāḥ ||26||
ta ū̱ ṣu ṇo̭ ma̱ho ya̭jatrā bhū̱ta dḙvāsa ū̱tayḙ sa̱joṣā̭: |
ye vājā̱~ ana̭yatā vi̱yanto̱ ye sthā ni̭ce̱tāro̱ amṷ̄rāḥ ||27||
11 nābhānediṣṭho  mānavaḥ| viśve devāḥ, 1-6 aṃgiraso vā, 8-11 sāvarṇedānam| jagatī, 5,8,9 anuṣṭup pragātha: =(6 bṛhatī, 7 satobṛhatī ) 10 gāyatrī, 11 triṣṭup|
ye ya̱jñena̱ dakṣi̭ṇayā̱ sama̭ktā̱ indra̭sya sa̱khyama̭mṛta̱tvamā̭na̱śa |
tebhyo̭ bha̱drama̭ṅgiraso vo astu̱ prati̭ gṛbhṇīta māna̱vaṃ sṷmedhasaḥ ||1||
ya u̱dāja̭npi̱taro̭ go̱maya̱ṃ vasvṛ̱tenābhi̭ndanparivatsa̱re va̱lam |
dī̱rghā̱yu̱tvama̭ṅgiraso vo astu̱ prati̭ gṛbhṇīta māna̱vaṃ sṷmedhasaḥ ||2||
ya ṛ̱tena̱ sūrya̱māro̭hayandi̱vyapra̭thayanpṛthi̱vīṃ mā̱tara̱ṃ vi |
su̱pra̱jā̱stvama̭ṅgiraso vo astu̱ prati̭ gṛbhṇīta māna̱vaṃ sṷmedhasaḥ ||3||
a̱yaṃ nābhā̭ vadati va̱lgu vo̭ gṛ̱he deva̭putrā ṛṣaya̱stacchṛ̭ṇotana |
su̱bra̱hma̱ṇyama̭ṅgiraso vo astu̱ prati̭ gṛbhṇīta māna̱vaṃ sṷmedhasaḥ ||4||
virṷ̄pāsa̱ idṛṣa̭ya̱sta idga̭mbhī̱ravḙpasaḥ | te aṅgi̭rasaḥ sū̱nava̱ste a̱gneḥ pari̭ jajñire ||5||
ye a̱gneḥ pari̭ jajñi̱re virṷ̄pāso di̱vaspari̭ | nava̭gvo̱ nu daśa̭gvo̱ aṅgi̭rastamo̱ sacā̭ de̱veṣṷ maṃhate ||6||
indrḙṇa yu̱jā niḥ sṛ̭janta vā̱ghato̭ vra̱jaṃ goma̭ntama̱śvina̭m | sa̱hasra̭ṃ me̱ dada̭to aṣṭaka̱rṇya1: śravo̭ de̱veṣva̭krata ||7||
pra nū̱naṃ jā̭yatāma̱yaṃ manu̱stokmḙva rohatu | yaḥ sa̱hasra̭ṃ śa̱tāśva̭ṃ sa̱dyo dā̱nāya̱ maṃha̭te ||8||
na tama̭śnoti̱ kaśca̱na di̱va i̭va̱ sānvā̱rabha̭m | sā̱va̱rṇyasya̱ dakṣi̭ṇā̱ vi sindhṷriva paprathe ||9||
u̱ta dā̱sā pa̭ri̱viṣe̱ smaddi̭ṣṭī̱ gopa̭rīṇasā | yadṷstu̱rvaśca̭ māmahe ||10||
sa̱ha̱sra̱dā grā̭ma̱ṇīrmā ri̭ṣa̱nmanu̱: sūryḙṇāsya̱ yata̭mānaitu̱ dakṣi̭ṇā |
sāva̭rṇerde̱vāḥ pra ti̭ra̱ntvāyu̱ryasmi̱nnaśrā̭ntā̱ asa̭nāma̱ vāja̭m ||11||
17 gayaḥ plātaḥ| viśve devāḥ, 15-16 pathyā svastiḥ| jagatī, 15 triṣṭubvā; 16-17 triṣṭup|
pa̱rā̱vato̱ ye didhi̭ṣanta̱ āpya̱ṃ manṷprītāso̱ jani̭mā vi̱vasva̭taḥ |
 ya̱yāte̱rye na̭hu̱ṣya̭sya ba̱rhiṣi̭ de̱vā āsa̭te̱ te adhi̭ bruvantu naḥ ||1||
viśvā̱ hi vo̭ nama̱syā̭ni̱ vandyā̱ nāmā̭ni devā u̱ta ya̱jñiyā̭ni vaḥ |
ye stha jā̱tā adi̭tera̱dbhyaspari̱ ye pṛ̭thi̱vyāste ma̭ i̱ha śrṷtā̱ hava̭m ||2||
yebhyo̭ mā̱tā madhṷma̱tpinva̭te̱ paya̭: pī̱yūṣa̱ṃ dyauradi̭ti̱radri̭barhāḥ |
u̱kthaśṷṣmānvṛṣabha̱rāntsvapna̭sa̱stā~ ā̭di̱tyā~ anṷ madā sva̱stayḙ ||3||
nṛ̱cakṣa̭so̱ ani̭miṣanto a̱rhaṇā̭ bṛ̱hadde̱vāso̭ amṛta̱tvamā̭naśuḥ |
jyo̱tīra̭thā̱ ahi̭māyā̱ anā̭gaso di̱vo va̱rṣmāṇa̭ṃ vasate sva̱stayḙ ||4||
sa̱mrājo̱ ye su̱vṛdho̭ ya̱jñamā̭ya̱yurapa̭rihvṛtā dadhi̱re di̱vi kṣaya̭m |
tā~ ā vi̭vāsa̱ nama̭sā suvṛ̱ktibhi̭rma̱ho ā̭di̱tyā~ adi̭tiṃ sva̱stayḙ ||5||
ko va̱: stoma̭ṃ rādhati̱ yaṃ jujo̭ṣatha̱ viśvḙ devāso manuṣo̱ yati̱ ṣṭhana̭ |
ko vo̭'dhva̱raṃ tṷvijātā̱ ara̭ṃ kara̱dyo na̱: parṣa̱datyaṃha̭: sva̱stayḙ ||6||
yebhyo̱ hotrā̭ṃ pratha̱māmā̭ye̱je manu̱: sami̭ddhāgni̱rmana̭sā sa̱pta hotṛ̭bhiḥ |
ta ā̭dityā̱ abha̭ya̱ṃ śarma̭ yacchata su̱gā na̭: karta su̱pathā̭ sva̱stayḙ ||7||
ya īśi̭re̱ bhuva̭nasya̱ pracḙtaso̱ viśva̭sya sthā̱turjaga̭taśca̱ manta̭vaḥ |
te na̭: kṛ̱tādakṛ̭tā̱dena̭sa̱sparya̱dyā dḙvāsaḥ pipṛtā sva̱stayḙ ||8||
bhare̱ṣvindra̭ṃ su̱hava̭ṃ havāmaheṃ'ho̱muca̭ṃ su̱kṛta̱ṃ daivya̱ṃ jana̭m |
a̱gniṃ mi̱traṃ varṷṇaṃ sā̱taye̱ bhaga̱ṃ dyāvā̭pṛthi̱vī ma̱ruta̭: sva̱stayḙ ||9||
su̱trāmā̭ṇaṃ pṛthi̱vīṃ dyāma̭ne̱hasa̭ṃ su̱śarmā̭ṇa̱madi̭tiṃ su̱praṇī̭tim |
daivī̱ṃ nāva̭ṃ svari̱trāmanā̭gasa̱masra̭vantī̱mā rṷhemā sva̱stayḙ ||10||
viśvḙ yajatrā̱ adhi̭ vocato̱taye̱ trāya̭dhvaṃ no du̱revā̭yā abhi̱hruta̭: |
sa̱tyayā̭ vo de̱vahṷ̄tyā huvema śṛṇva̱to dḙvā̱ ava̭se sva̱stayḙ ||11||
apāmī̭vā̱mapa̱ viśvā̱manā̭huti̱mapārā̭tiṃ durvi̱datrā̭maghāya̱taḥ |
ā̱re dḙvā̱ dveṣo̭ a̱smadyṷyotano̱ru ṇa̱: śarma̭ yacchatā sva̱stayḙ ||12||
ari̭ṣṭa̱: sa marto̱ viśva̭ edhate̱ pra pra̱jābhi̭rjāyate̱ dharma̭ṇa̱spari̭ |
yamā̭dityāso̱ naya̭thā sunī̱tibhi̱rati̱ viśvā̭ni duri̱tā sva̱stayḙ ||13||
yaṃ dḙvā̱so'va̭tha̱ vāja̭sātau̱ yaṃ śūra̭sātā maruto hi̱te dhanḙ |
prā̱ta̱ryāvā̭ṇa̱ṃ ratha̭mindra sāna̱simari̭ṣyanta̱mā rṷhemā sva̱stayḙ ||14||
sva̱sti na̭: pa̱thyā̭su̱ dhanva̭su sva̱stya1psu vṛ̱jane̱ sva̭rvati |
sva̱sti na̭: putrakṛ̱theṣu̱ yoni̭ṣu sva̱sti rā̱ye ma̭ruto dadhātana ||15||
sva̱stiriddhi prapa̭the̱ śreṣṭhā̱ rekṇa̭svatya̱bhi yā vā̱mameti̭ |
sā no̭ a̱mā so ara̭ṇe̱ ni pā̭tu svāve̱śā bha̭vatu de̱vago̭pā ||16||
e̱vā pla̱teḥ sū̱nura̭vīvṛdhadvo̱ viśva̭ ādityā adite manī̱ṣī |
ī̱śā̱nāso̱ naro̱ ama̭rtye̱nā'stā̭vi̱ jano̭ di̱vyo gayḙna ||17||
17 gayaḥ plātaḥ| viśve devāḥ|jagatī, 12,16,17 triṣṭup|
ka̱thā de̱vānā̭ṃ kata̱masya̱ yāma̭ni su̱mantu̱ nāma̭ śṛṇva̱tāṃ ma̭nāmahe |
ko mṛ̭ḻāti kata̱mo no̱ maya̭skaratkata̱ma ū̱tī a̱bhyā va̭vartati ||1||
kra̱tū̱yanti̱ krata̭vo hṛ̱tsu dhī̱tayo̱ vena̭nti ve̱nāḥ pa̱taya̱ntyā diśa̭: |
na ma̭rḍi̱tā vi̭dyate a̱nya ḙbhyo de̱veṣṷ me̱ adhi̱ kāmā̭ ayaṃsata ||2||
narā̭ vā̱ śaṃsa̭ṃ pū̱ṣaṇa̱mago̭hyama̱gniṃ de̱veddha̭ma̱bhya̭rcase gi̱rā |
sūryā̱māsā̭ ca̱ndrama̭sā ya̱maṃ di̱vi tri̱taṃ vāta̭mu̱ṣasa̭ma̱ktuma̱śvinā̭ ||3||
ka̱thā ka̱vistṷvī̱ravā̱nkayā̭ gi̱rā bṛha̱spati̭rvāvṛdhate suvṛ̱ktibhi̭: |
a̱ja eka̭pātsu̱havḙbhi̱ṝkva̭bhi̱rahi̭: śṛṇotu bu̱dhnyo̱3 havī̭mani ||4||
dakṣa̭sya vādite̱ janma̭ni vra̱te rājā̭nā mi̱trāvaru̱ṇā vi̭vāsasi |
atṷ̄rtapanthāḥ puru̱ratho̭ arya̱mā sa̱ptaho̭tā̱ viṣṷrūpeṣu̱ janma̭su ||5||
te no̱ arva̭nto havana̱śruto̱ hava̱ṃ viśvḙ śṛṇvantu vā̱jino̭ mi̱tadra̭vaḥ |
sa̱ha̱sra̱sā me̱dhasā̭tāviva̱ tmanā̭ ma̱ho ye dhana̭ṃ sami̱theṣṷ jabhri̱re ||6||
pra vo̭ vā̱yuṃ ra̭tha̱yuja̱ṃ pura̭ṃdhi̱ṃ stomai̭: kṛṇudhvaṃ sa̱khyāya̭ pū̱ṣaṇa̭m |
te hi de̱vasya̭ savi̱tuḥ savī̭mani̱ kratu̱ṃ saca̭nte sa̱cita̱: sacḙtasaḥ ||7||
triḥ sa̱pta sa̱srā na̱dyo̭ ma̱hīra̱po vana̱spatī̱nparva̭tā~ a̱gnimū̱tayḙ |
kṛ̱śānu̱mastṝ̭nti̱ṣya̭ṃ sa̱dhastha̱ ā ru̱draṃ ru̱dreṣṷ ru̱driya̭ṃ havāmahe ||8||
sara̭svatī sa̱rayu̱: sindhṷrū̱rmibhi̭rma̱ho ma̱hīrava̱sā ya̭ntu̱ vakṣa̭ṇīḥ |
de̱vīrāpo̭ mā̱tara̭: sūdayi̱tnvo̭ ghṛ̱tava̱tpayo̱ madhṷmanno arcata ||9||
u̱ta mā̱tā bṛ̭haddi̱vā śṛ̭ṇotu na̱stvaṣṭā̭ de̱vebhi̱rjani̭bhiḥ pi̱tā vaca̭: |
ṛ̱bhu̱kṣā vājo̱ ratha̱spati̱rbhago̭ ra̱ṇvaḥ śaṃsa̭: śaśamā̱nasya̭ pātu naḥ ||10||
ra̱ṇvaḥ saṃdṛ̭ṣṭau pitu̱mā~ i̭va̱ kṣayo̭ bha̱drā ru̱drāṇā̭ṃ ma̱rutā̱mupa̭stutiḥ |
gobhi̭: ṣyāma ya̱śaso̱ jane̱ṣvā sadā̭ devāsa̱ iḻa̭yā sacemahi ||11||
yāṃ me̱ dhiya̱ṃ marṷta̱ indra̱ devā̱ ada̭dāta varuṇa mitra yū̱yam |
tāṃ pī̭payata̱ paya̭seva dhe̱nuṃ ku̱vidgiro̱ adhi̱ rathe̱ vahā̭tha ||12||
ku̱vida̱ṅga prati̱ yathā̭ cida̱sya na̭: sajā̱tya̭sya maruto̱ bubo̭dhatha |
nābhā̱ yatra̭ pratha̱maṃ sa̱ṃnasā̭mahe̱ tatra̭ jāmi̱tvamadi̭tirdadhātu naḥ ||13||
te hi dyāvā̭pṛthi̱vī mā̱tarā̭ ma̱hī de̱vī de̱vāñjanma̭nā ya̱jñiyḙ i̱taḥ |
u̱bhe bi̭bhṛta u̱bhaya̱ṃ bharī̭mabhiḥ pu̱rū retā̭ṃsi pi̱tṛbhi̭śca siñcataḥ ||14||
vi ṣā hotrā̱ viśva̭maśnoti̱ vārya̱ṃ bṛha̱spati̭ra̱rama̭ti̱: panī̭yasī |
grāvā̱ yatra̭ madhu̱ṣudu̱cyatḙ bṛ̱hadavī̭vaśanta ma̱tibhi̭rmanī̱ṣiṇa̭: ||15||
e̱vā ka̱vistṷvī̱ravā̭~ ṛta̱jñā dra̭viṇa̱syurdravi̭ṇasaścakā̱naḥ |
u̱kthebhi̱ratra̭ ma̱tibhi̭śca̱ vipro'pī̭paya̱dgayo̭ di̱vyāni̱ janma̭ ||16||
e̱vā pla̱teḥ sū̱nura̭vīvṛdhadvo̱ viśva̭ ādityā adite manī̱ṣī |
ī̱śā̱nāso̱ naro̱ ama̭rtye̱nāstā̭vi̱ jano̭ di̱vyo gayḙna ||17||
15  vasukarṇo vāsukra:| viśvedevāḥ| jagatī, 15 triṣṭup|
a̱gnirindro̱ varṷṇo mi̱tro a̭rya̱mā vā̱yuḥ pū̱ṣā sara̭svatī sa̱joṣa̭saḥ |
ā̱di̱tyā viṣṇṷrma̱ruta̱: sva̭rbṛ̱hatsomo̭ ru̱dro adi̭ti̱rbrahma̭ṇa̱spati̭: ||1||
i̱ndrā̱gnī vṛ̭tra̱hatyḙṣu̱ satpa̭tī mi̱tho hi̭nvā̱nā ta̱nvā̱3 samo̭kasā |
a̱ntari̭kṣa̱ṃ mahyā pa̭pru̱roja̭sā̱ somo̭ ghṛta̱śrīrma̭hi̱māna̭mī̱raya̭n ||2||
teṣā̱ṃ hi ma̱hnā ma̭ha̱tāma̭na̱rvaṇā̱ṃ stomā̱~ iya̭rmyṛta̱jñā ṛ̭tā̱vṛdhā̭m |
ye a̭psa̱vama̭rṇa̱vaṃ ci̱trarā̭dhasa̱ste no̭ rāsantāṃ ma̱hayḙ sumi̱tryāḥ ||3||
sva̭rṇarama̱ntari̭kṣāṇi roca̱nā dyāvā̱bhūmī̭ pṛthi̱vīṃ ska̭mbhu̱roja̭sā |
pṛ̱kṣā i̭va ma̱haya̭ntaḥ surā̱tayo̭ de̱vāḥ sta̭vante̱ manṷṣāya sū̱raya̭: ||4||
mi̱trāya̭ śikṣa̱ varṷṇāya dā̱śuṣe̱ yā sa̱mrājā̱ mana̭sā̱ na pra̱yuccha̭taḥ |
yayo̱rdhāma̱ dharma̭ṇā̱ roca̭te bṛ̱hadyayo̭ru̱bhe roda̭sī̱ nādha̭sī̱ vṛtaṷ ||5||
yā gaurva̭rta̱niṃ pa̱ryeti̭ niṣkṛ̱taṃ payo̱ duhā̭nā vrata̱nīra̭vā̱rata̭: |
sā pra̭bruvā̱ṇā varṷṇāya dā̱śuṣḙ de̱vebhyo̭ dāśaddha̱viṣā̭ vi̱vasva̭te ||6||
di̱vakṣa̭so agniji̱hvā ṛ̭tā̱vṛdha̭ ṛ̱tasya̱ yoni̭ṃ vimṛ̱śanta̭ āsate |
dyāṃ ska̭bhi̱tvya1pa ā ca̭kru̱roja̭sā ya̱jñaṃ ja̭ni̱tvī ta̱nvī̱3 ni mā̭mṛjuḥ ||7||
pa̱ri̱kṣitā̭ pi̱tarā̭ pūrva̱jāva̭rī ṛ̱tasya̱ yonā̭ kṣayata̱: samo̭kasā |
dyāvā̭pṛthi̱vī varṷṇāya̱ savra̭te ghṛ̱tava̱tpayo̭ mahi̱ṣāya̭ pinvataḥ ||8||
pa̱rjanyā̱vātā̭ vṛṣa̱bhā pṷrī̱ṣiṇḙndravā̱yū varṷṇo mi̱tro a̭rya̱mā |
de̱vā~ ā̭di̱tyā~ adi̭tiṃ havāmahe̱ ye pārthi̭vāso di̱vyāso̭ a̱psu ye ||9||
tvaṣṭā̭raṃ vā̱yumṛ̭bhavo̱ ya oha̭te̱ daivyā̱ hotā̭rā u̱ṣasa̭ṃ sva̱stayḙ |
bṛha̱spati̭ṃ vṛtrakhā̱daṃ sṷme̱dhasa̭mindri̱yaṃ soma̭ṃ dhana̱sā ṷ īmahe ||10||
brahma̱ gāmaśva̭ṃ ja̱naya̭nta̱ oṣa̭dhī̱rvana̱spatī̭npṛthi̱vīṃ parva̭tā~ a̱paḥ |
sūrya̭ṃ di̱vi ro̱haya̭ntaḥ su̱dāna̭va̱ āryā̭ vra̱tā vi̭sṛ̱janto̱ adhi̱ kṣami̭ ||11||
bhu̱jyumaṃha̭saḥ pipṛtho̱ nira̭śvinā̱ śyāva̭ṃ pu̱traṃ va̭dhrima̱tyā a̭jinvatam |
ka̱ma̱dyuva̭ṃ vima̱dāyo̭hathuryu̱vaṃ vi̭ṣṇā̱pvaṃ1 viśva̭kā̱yāva̭ sṛjathaḥ ||12||
pāvī̭ravī tanya̱tureka̭pāda̱jo di̱vo dha̱rtā sindhu̱rāpa̭: samu̱driya̭: |
viśvḙ de̱vāsa̭: śṛṇava̱nvacā̭ṃsi me̱ sara̭svatī sa̱ha dhī̱bhiḥ pura̭ṃdhyā ||13||
viśvḙ de̱vāḥ sa̱ha dhī̱bhiḥ pura̭ṃdhyā̱ mano̱ryaja̭trā a̱mṛtā̭ ṛta̱jñāḥ |
rā̱ti̱ṣāco̭ abhi̱ṣāca̭: sva̱rvida̱: sva1rgiro̱ brahma̭ sū̱ktaṃ jṷṣerata ||14||
de̱vānvasi̭ṣṭho a̱mṛtā̭nvavande̱ ye viśvā̱ bhuva̭nā̱bhi pra̭ta̱sthuḥ |
te no̭ rāsantāmurugā̱yama̱dya yū̱yaṃ pā̭ta sva̱stibhi̱: sadā̭ naḥ ||15||
15  vasukarṇo vāsukra:| viśvedevāḥ| jagatī, 15 triṣṭup|
de̱vānhṷve bṛ̱hacchra̭vasaḥ sva̱stayḙ jyoti̱ṣkṛto̭ adhva̱rasya̱ pracḙtasaḥ |
ye vā̭vṛ̱dhuḥ pra̭ta̱raṃ vi̱śvavḙdasa̱ indra̭jyeṣṭhāso a̱mṛtā̭ ṛtā̱vṛdha̭: ||1||
indra̭prasūtā̱ varṷṇapraśiṣṭā̱ ye sūrya̭sya̱ jyoti̭ṣo bhā̱gamā̭na̱śuḥ |
ma̱rudga̭ṇe vṛ̱jane̱ manma̭ dhīmahi̱ māgho̭ne ya̱jñaṃ ja̭nayanta sū̱raya̭: ||2||
indro̱ vasṷbhi̱: pari̭ pātu no̱ gaya̭mādi̱tyairno̱ adi̭ti̱: śarma̭ yacchatu |
ru̱dro ru̱drebhi̭rde̱vo mṛ̭ḻayāti na̱stvaṣṭā̭ no̱ gnābhi̭: suvi̱tāya̭ jinvatu ||3||
adi̭ti̱rdyāvā̭pṛthi̱vī ṛ̱taṃ ma̱hadindrā̱viṣṇṷ̄ ma̱ruta̱: sva̭rbṛ̱hat |
de̱vā~ ā̭di̱tyā~ ava̭se havāmahe̱ vasṷ̄nru̱drāntsa̭vi̱tāra̭ṃ su̱daṃsa̭sam ||4||
sara̭svāndhī̱bhirvarṷṇo dhṛ̱tavra̭taḥ pū̱ṣā viṣṇṷrmahi̱mā vā̱yura̱śvinā̭ |
bra̱hma̱kṛto̭ a̱mṛtā̭ vi̱śvavḙdasa̱: śarma̭ no yaṃsantri̱varṷ̄tha̱maṃha̭saḥ ||5||
vṛṣā̭ ya̱jño vṛṣa̭ṇaḥ santu ya̱jñiyā̱ vṛṣa̭ṇo de̱vā vṛṣa̭ṇo havi̱ṣkṛta̭: |
vṛṣa̭ṇā̱ dyāvā̭pṛthi̱vī ṛ̱tāva̭rī̱ vṛṣā̭ pa̱rjanyo̱ vṛṣa̭ṇo vṛṣa̱stubha̭: ||6||
a̱gnīṣomā̱ vṛṣa̭ṇā̱ vāja̭sātaye purupraśa̱stā vṛṣa̭ṇā̱ upa̭ bruve |
yāvī̭ji̱re vṛṣa̭ṇo devaya̱jyayā̱ tā na̱: śarma̭ tri̱varṷ̄tha̱ṃ vi ya̭ṃsataḥ ||7||
dhṛ̱tavra̭tāḥ kṣa̱triyā̭ yajñani̱ṣkṛto̭ bṛhaddi̱vā a̭dhva̱rāṇā̭mabhi̱śriya̭: |
a̱gniho̭tāra ṛta̱sāpo̭ a̱druho̱'po a̭sṛja̱nnanṷ vṛtra̱tūryḙ ||8||
dyāvā̭pṛthi̱vī ja̭nayanna̱bhi vra̱tā''pa̱ oṣa̭dhīrva̱ninā̭ni ya̱jñiyā̭ |
a̱ntari̭kṣa̱ṃ sva1rā pa̭prurū̱taye̱ vaśa̭ṃ de̱vāsa̭sta̱nvī̱3 ni mā̭mṛjuḥ ||9||
dha̱rtāro̭ di̱va ṛ̱bhava̭: su̱hastā̭ vātāparja̱nyā ma̭hi̱ṣasya̭ tanya̱toḥ |
āpa̱ oṣa̭dhī̱: pra ti̭rantu no̱ giro̱ bhago̭ rā̱tirvā̱jino̭ yantu me̱ hava̭m ||10||
sa̱mu̱draḥ sindhū̱ rajo̭ a̱ntari̭kṣama̱ja eka̭pāttanayi̱tnura̭rṇa̱vaḥ |
ahi̭rbu̱dhnya̭: śṛṇava̱dvacā̭ṃsi me̱ viśvḙ de̱vāsa̭ u̱ta sū̱rayo̱ mama̭ ||11||
syāma̭ vo̱ mana̭vo de̱vavī̭taye̱ prāñca̭ṃ no ya̱jñaṃ pra ṇa̭yata sādhu̱yā |
ādi̭tyā̱ rudrā̱ vasa̭va̱: sudā̭nava i̱mā brahma̭ śa̱syamā̭nāni jinvata ||12||
daivyā̱ hotā̭rā pratha̱mā pu̱rohi̭ta ṛ̱tasya̱ panthā̱manvḙmi sādhu̱yā |
kṣetra̭sya̱ pati̱ṃ prati̭veśamīmahe̱ viśvā̭nde̱vā~ a̱mṛtā̱~ apra̭yucchataḥ ||13||
vasi̭ṣṭhāsaḥ pitṛ̱vadvāca̭makrata de̱vā~ īḻā̭nā ṛṣi̱vatsva̱stayḙ |
prī̱tā i̭va jñā̱taya̱: kāma̱metyā̱'sme dḙvā̱so'va̭ dhūnutā̱ vasṷ ||14||
de̱vānvasi̭ṣṭho a̱mṛtā̭nvavande̱ ye viśvā̱ bhuva̭nā̱bhi pra̭ta̱sthuḥ |
te no̭ rāsantāmurugā̱yama̱dya yū̱yaṃ pā̭ta sva̱stibhi̱: sadā̭ naḥ ||15||
12 ayāsya āṃgirasaḥ| bṛhaspati:| triṣṭup|
i̱māṃ dhiya̭ṃ sa̱ptaśī̭rṣṇīṃ pi̱tā na̭ ṛ̱tapra̭jātāṃ bṛha̱tīma̭vindat |
tu̱rīya̭ṃ svijjanayadvi̱śvaja̭nyo̱'yāsya̭ u̱kthamindrā̭ya̱ śaṃsa̭n ||1||
ṛ̱taṃ śaṃsa̭nta ṛ̱ju dīdhyā̭nā di̱vaspu̱trāso̱ asṷrasya vī̱rāḥ |
vipra̭ṃ pa̱damaṅgi̭raso̱ dadhā̭nā ya̱jñasya̱ dhāma̭ pratha̱maṃ ma̭nanta ||2||
ha̱ṃsairi̭va̱ sakhi̭bhi̱rvāva̭dadbhiraśma̱nmayā̭ni̱ naha̭nā̱ vyasya̭n |
bṛha̱spati̭rabhi̱kani̭krada̱dgā u̱ta prāstau̱ducca̭ vi̱dvā~ a̭gāyat ||3||
a̱vo dvābhyā̭ṃ pa̱ra eka̭yā̱ gā guhā̱ tiṣṭha̭ntī̱ranṛ̭tasya̱ setaṷ |
bṛha̱spati̱stama̭si̱ jyoti̭ri̱cchannudu̱srā āka̱rvi hi ti̱sra āva̭: ||4||
vi̱bhidyā̱ pura̭ṃ śa̱yathe̱mapā̭cī̱ṃ nistrīṇi̭ sā̱kamṷda̱dhera̭kṛntat |
bṛha̱spati̭ru̱ṣasa̱ṃ sūrya̱ṃ gāma̱rkaṃ vi̭veda sta̱naya̭nniva̱ dyauḥ ||5||
indro̭ va̱laṃ ra̭kṣi̱tāra̱ṃ dughā̭nāṃ ka̱reṇḙva̱ vi ca̭kartā̱ ravḙṇa |
svedā̭ñjibhirā̱śira̭mi̱cchamā̱no'ro̭dayatpa̱ṇimā gā a̭muṣṇāt ||6||
sa ī̭ṃ sa̱tyebhi̱: sakhi̭bhiḥ śu̱cadbhi̱rgodhā̭yasa̱ṃ vi dha̭na̱saira̭dardaḥ |
brahma̭ṇa̱spati̱rvṛṣa̭bhirva̱rāhai̭rgha̱rmasvḙdebhi̱rdravi̭ṇa̱ṃ vyā̭naṭ ||7||
te sa̱tyena̱ mana̭sā̱ gopa̭ti̱ṃ gā i̭yā̱nāsa̭ iṣaṇayanta dhī̱bhiḥ |
bṛha̱spati̭rmi̱thoa̭vadyapebhi̱rudu̱sriyā̭ asṛjata sva̱yugbhi̭: ||8||
taṃ va̱rdhaya̭nto ma̱tibhi̭: śi̱vābhi̭: si̱ṃhami̭va̱ nāna̭dataṃ sa̱dhasthḙ |
bṛha̱spati̱ṃ vṛṣa̭ṇa̱ṃ śūra̭sātau̱ bharḙbhare̱ anṷ madema ji̱ṣṇum ||9||
ya̱dā vāja̱masa̭nadvi̱śvarṷ̄pa̱mā dyāmarṷkṣa̱dutta̭rāṇi̱ sadma̭ |
bṛha̱spati̱ṃ vṛṣa̭ṇaṃ va̱rdhaya̭nto̱ nānā̱ santo̱ bibhra̭to̱ jyoti̭rā̱sā ||10||
sa̱tyāmā̱śiṣa̭ṃ kṛṇutā vayo̱dhai kī̱riṃ ci̱ddhyava̭tha̱ svebhi̱revai̭: |
pa̱ścā mṛdho̱ apa̭ bhavantu̱ viśvā̱stadro̭dasī śṛṇutaṃ viśvami̱nve ||11||
indro̭ ma̱hnā ma̭ha̱to a̭rṇa̱vasya̱ vi mū̱rdhāna̭mabhinadarbu̱dasya̭ |
aha̱nnahi̱mari̭ṇātsa̱pta sindhṷ̄nde̱vairdyā̭vāpṛthivī̱ prāva̭taṃ naḥ ||12||
12 ayāsya āṃgirasaḥ| bṛhaspati:| triṣṭup|
u̱da̱pruto̱ na vayo̱ rakṣa̭māṇā̱ vāva̭dato a̱bhriya̭syeva̱ ghoṣā̭: |
gi̱ri̱bhrajo̱ normayo̱ mada̭nto̱ bṛha̱spati̭ma̱bhya1rkā a̭nāvan ||1||
saṃ gobhi̭rāṅgira̱so nakṣa̭māṇo̱ bhaga̭ i̱veda̭rya̱maṇa̭ṃ nināya |
janḙ mi̱tro na dampa̭tī anakti̱ bṛha̭spate vā̱jayā̱śū~ri̭vā̱jau ||2||
sā̱dhva̱ryā a̭ti̱thinī̭riṣi̱rā: spā̱rhāḥ su̱varṇā̭ anava̱dyarṷ̄pāḥ |
bṛha̱spati̱: parva̭tebhyo vi̱tūryā̱ nirgā ṷ̄pe̱ yava̭miva sthi̱vibhya̭: ||3||
ā̱pru̱ṣā̱yanmadhṷna ṛ̱tasya̱ yoni̭mavakṣi̱panna̱rka u̱lkāmi̭va̱ dyoḥ |
bṛha̱spati̭ru̱ddhara̱nnaśma̭no̱ gā bhūmyā̭ u̱dneva̱ vi tvaca̭ṃ bibheda ||4||
apa̱ jyoti̭ṣā̱ tamo̭ a̱ntari̭kṣādu̱dnaḥ śīpā̭lamiva̱ vāta̭ ājat |
bṛha̱spati̭ranu̱mṛśyā̭ va̱lasyā̱'bhrami̭va̱ vāta̱ ā ca̭kra̱ ā gāḥ ||5||
ya̱dā va̱lasya̱ pīya̭to̱ jasu̱ṃ bhedbṛha̱spati̭ragni̱tapo̭bhira̱rkaiḥ |
da̱dbhirna ji̱hvā pari̭viṣṭa̱māda̭dā̱virni̱dhī~ra̭kṛṇodu̱sriyā̭ṇām ||6||
bṛha̱spati̱rama̭ta̱ hi tyadā̭sā̱ṃ nāma̭ sva̱rīṇā̱ṃ sada̭ne̱ guhā̱ yat |
ā̱ṇḍeva̭ bhi̱ttvā śa̭ku̱nasya̱ garbha̱mudu̱sriyā̱: parva̭tasya̱ tmanā̭jat ||7||
aśnāpi̭naddha̱ṃ madhu̱ parya̭paśya̱nmatsya̱ṃ na dī̱na u̱dani̭ kṣi̱yanta̭m |
niṣṭajja̭bhāra cama̱saṃ na vṛ̱kṣādbṛha̱spati̭rvira̱veṇā̭ vi̱kṛtya̭ ||8||
soṣāma̭vinda̱tsa sva1: so a̱gniṃ so a̱rkeṇa̱ vi ba̭bādhe̱ tamā̭ṃsi |
bṛha̱spati̱rgova̭puṣo va̱lasya̱ nirma̱jjāna̱ṃ na parva̭ṇo jabhāra ||9||
hi̱meva̭ pa̱rṇā mṷṣi̱tā vanā̭ni̱ bṛha̱spati̭nākṛpayadva̱lo gāḥ |
a̱nā̱nu̱kṛ̱tyama̭pu̱naśca̭kāra̱ yātsūryā̱māsā̭ mi̱tha u̱ccarā̭taḥ ||10||
a̱bhi śyā̱vaṃ na kṛśa̭nebhi̱raśva̱ṃ nakṣa̭trebhiḥ pi̱taro̱ dyāma̭piṃśan |
rātryā̱ṃ tamo̱ ada̭dhu̱rjyoti̱raha̱nbṛha̱spati̭rbhi̱nadadri̭ṃ vi̱dadgāḥ ||11||
i̱dama̭karma̱ namo̭ abhri̱yāya̱ yaḥ pū̱rvīranvā̱nona̭vīti |
bṛha̱spati̱: sa hi gobhi̱: so aśvai̱: sa vī̱rebhi̱: sa nṛbhi̭rno̱ vayo̭ dhāt ||12||
12 sumitro vādhryaśvaḥ| agniḥ| triṣṭup, 1-2 jagatī|
bha̱drā a̱gnerva̭dhrya̱śvasya̭ sa̱ṃdṛśo̭ vā̱mī praṇī̭tiḥ su̱raṇā̱ upḙtayaḥ |
yadī̭ṃ sumi̱trā viśo̱ agra̭ i̱ndhatḙ ghṛ̱tenāhṷto jarate̱ davi̭dyutat ||1||
ghṛ̱tama̱gnerva̭dhrya̱śvasya̱ vardha̭naṃ ghṛ̱tamanna̭ṃ ghṛ̱tamva̭sya̱ meda̭nam |
ghṛ̱tenāhṷta urvi̱yā vi pa̭prathe̱ sūrya̭ iva rocate sa̱rpirā̭sutiḥ ||2||
yatte̱ manu̱ryadanī̭kaṃ sumi̱traḥ sa̭mī̱dhe a̭gne̱ tadi̱daṃ navī̭yaḥ |
sa re̱vaccho̭ca̱ sa giro̭ juṣasva̱ sa vāja̭ṃ darṣi̱ sa i̱ha śravo̭ dhāḥ ||3||
yaṃ tvā̱ pūrva̭mīḻi̱to va̭dhrya̱śvaḥ sa̭mī̱dhe a̭gne̱ sa i̱daṃ jṷṣasva |
sa na̭: sti̱pā u̱ta bha̭vā tanū̱pā dā̱traṃ ra̭kṣasva̱ yadi̱daṃ tḙ a̱sme ||4||
bhavā̭ dyu̱mnī vā̭dhryaśvo̱ta go̱pā mā tvā̭ tārīda̱bhimā̭ti̱rjanā̭nām |
śūra̭ iva dhṛ̱ṣṇuścyava̭naḥ sumi̱traḥ pra nu vo̭ca̱ṃ vādhrya̭śvasya̱ nāma̭ ||5||
sama̱jryā̭ parva̱tyā̱3 vasṷ̄ni̱ dāsā̭ vṛ̱trāṇyāryā̭ jigetha |
śūra̭ iva dhṛ̱ṣṇuścyava̭no̱ janā̭nā̱ṃ tvama̭gne pṛtanā̱yū~ra̱bhi ṣyā̭: ||6||
dī̱rghata̭nturbṛ̱hadṷkṣā̱yama̱gniḥ sa̱hasra̭starīḥ śa̱tanī̭tha̱ ṛbhvā̭ |
dyu̱māndyu̱matsu̱ nṛbhi̭rmṛ̱jyamā̭naḥ sumi̱treṣṷ dīdayo deva̱yatsṷ ||7||
tve dhe̱nuḥ su̱dughā̭ jātavedo'sa̱ścatḙva sama̱nā sa̭ba̱rdhuk |
tvaṃ nṛbhi̱rdakṣi̭ṇāvadbhiragne sumi̱trebhi̭ridhyase deva̱yadbhi̭: ||8||
de̱vāści̭tte a̱mṛtā̭ jātavedo mahi̱māna̭ṃ vādhryaśva̱ pra vo̭can |
yatsa̱mpṛccha̱ṃ mānṷṣī̱rviśa̱ āya̱ntvaṃ nṛbhi̭rajaya̱stvāvṛ̭dhebhiḥ ||9||
pi̱teva̭ pu̱trama̭bibharu̱pasthe̱ tvāma̭gne vadhrya̱śvaḥ sa̭pa̱ryan |
ju̱ṣā̱ṇo a̭sya sa̱midha̭ṃ yaviṣṭho̱ta pūrvā̭~ avano̱rvrādha̭taścit ||10||
śaśva̭da̱gnirva̭dhrya̱śvasya̱ śatrū̱nnṛbhi̭rjigāya su̱taso̭mavadbhiḥ |
sama̭naṃ cidadahaścitrabhā̱no'va̱ vrādha̭ntamabhinadvṛ̱dhaści̭t ||11||
a̱yama̱gnirva̭dhrya̱śvasya̭ vṛtra̱hā sa̭na̱kātpreddho̱ nama̭sopavā̱kya̭: |
sa no̱ ajā̭mī~ru̱ta vā̱ vijā̭mīna̱bhi ti̭ṣṭha̱ śardha̭to vādhryaśva ||12||
11sumitro vādhryaśvaḥ| āprīsūktaṃ = (1 idhmaḥ samiddho'gnirvā, 2 narāśaṃsaḥ, 3 iḻa:, 4 barhiḥ, 5 devīrdvāraḥ, 6 uṣāsānaktā, 7 daivyau hotārau pracetasau, 8 trisro devyaḥ sarasvatīḻābhāratyaḥ, 9 tvaṣṭā, 10 vanaspatiḥ, 11 svāhākṛtayaḥ) | triṣṭup|
i̱māṃ mḙ agne sa̱midha̭ṃ juṣasve̱ḻaspa̱de prati̭ haryā ghṛ̱tācī̭m |
varṣma̭npṛthi̱vyāḥ sṷdina̱tve ahnā̭mū̱rdhvo bha̭va sukrato devaya̱jyā ||1||
ā de̱vānā̭magra̱yāve̱ha yā̭tu̱ narā̱śaṃso̭ vi̱śvarṷ̄pebhi̱raśvai̭: |
ṛ̱tasya̭ pa̱thā nama̭sā mi̱yedho̭ de̱vebhyo̭ de̱vata̭maḥ suṣūdat ||2||
śa̱śva̱tta̱mamī̭ḻate dū̱tyā̭ya ha̱viṣma̭nto manu̱ṣyā̭so a̱gnim |
vahi̭ṣṭhai̱raśvai̭: su̱vṛtā̱ rathe̱nā ''de̱vānva̭kṣi̱ ni ṣa̭de̱ha hotā̭ ||3||
vi pra̭thatāṃ de̱vajṷṣṭaṃ tira̱ścā dī̱rghaṃ drā̱ghmā sṷra̱bhi bhṷ̄tva̱sme |
ahḙḻatā̱ mana̭sā deva barhi̱rindra̭jyeṣṭhā~ uśa̱to ya̭kṣi de̱vān ||4||
di̱vo vā̱ sānṷ spṛ̱śatā̱ varī̭yaḥ pṛthi̱vyā vā̱ mātra̭yā̱ vi śra̭yadhvam |
u̱śa̱tīrdvā̭ro mahi̱nā ma̱hadbhi̭rde̱vaṃ ratha̭ṃ ratha̱yurdhā̭rayadhvam ||5||
de̱vī di̱vo dṷhi̱tarā̭ suśi̱lpe u̱ṣāsā̱naktā̭ sadatā̱ṃ ni yonaṷ |
ā vā̭ṃ de̱vāsa̭ uśatī u̱śanta̭ u̱rau sī̭dantu subhage u̱pasthḙ ||6||
ū̱rdhvo grāvā̭ bṛ̱hada̱gniḥ sami̭ddhaḥ pri̱yā dhāmā̱nyadi̭teru̱pasthḙ |
pu̱rohi̭tāvṛtvijā ya̱jñe a̱sminvi̱duṣṭa̭rā̱ dravi̭ṇa̱mā ya̭jethām ||7||
tisro̭ devīrba̱rhiri̱daṃ varī̭ya̱ ā sī̭data cakṛ̱mā va̭: syo̱nam |
ma̱nu̱ṣvadya̱jñaṃ sudhi̭tā ha̱vīṃṣīḻā̭ de̱vī ghṛ̱tapa̭dī juṣanta ||8||
deva̭ tvaṣṭa̱ryaddha̭ cāru̱tvamāna̱ḍyadaṅgi̭rasā̱mabha̭vaḥ sacā̱bhūḥ |
sa de̱vānā̱ṃ pātha̱ upa̱ pra vi̱dvā~ u̱śanya̭kṣi draviṇodaḥ su̱ratna̭: ||9||
vana̭spate raśa̱nayā̭ ni̱yūyā̭ de̱vānā̱ṃ pātha̱ upa̭ vakṣi vi̱dvān |
svadā̭ti de̱vaḥ kṛ̱ṇava̭ddha̱vīṃṣyava̭tā̱ṃ dyāvā̭pṛthi̱vī hava̭ṃ me ||10||
āgnḙ vaha̱ varṷṇami̱ṣṭayḙ na̱ indra̭ṃ di̱vo ma̱ruto̭ a̱ntari̭kṣāt |
sīda̭ntu ba̱rhirviśva̱ ā yaja̭trā̱: svāhā̭ de̱vā a̱mṛtā̭ mādayantām ||11||
11 bṛhaspatirāṃgirasaḥ| jñānam| triṣṭup ,9 jagatī|
bṛha̭spate pratha̱maṃ vā̱co agra̱ṃ yatpraira̭ta nāma̱dheya̱ṃ dadhā̭nāḥ |
yadḙṣā̱ṃ śreṣṭha̱ṃ yada̭ri̱pramāsī̭tpre̱ṇā tadḙṣā̱ṃ nihi̭ta̱ṃ guhā̱viḥ ||1||
saktṷmiva̱ tita̭unā pu̱nanto̱ yatra̱ dhīrā̱ mana̭sā̱ vāca̱makra̭ta |
atrā̱ sakhā̭yaḥ sa̱khyāni̭ jānate bha̱draiṣā̭ṃ la̱kṣmīrnihi̱tādhi̭ vā̱ci ||2||
ya̱jñena̭ vā̱caḥ pa̭da̱vīya̭māya̱ntāmanva̭vinda̱nnṛṣi̭ṣu̱ pravi̭ṣṭām |
 tāmā̱bhṛtyā̱ vya̭dadhuḥ puru̱trā tāṃ sa̱pta re̱bhā a̱bhi saṃ na̭vante ||3||
u̱ta tva̱: paśya̱nna da̭darśa̱ vāca̭mu̱ta tva̭: śṛ̱ṇvanna śṛ̭ṇotyenām |
u̱to tva̭smai ta̱nvaṃ1 vi sa̭sre jā̱yeva̱ patya̭ uśa̱tī su̱vāsā̭: ||4||
u̱ta tva̭ṃ sa̱khye sthi̱rapī̭tamāhu̱rnaina̭ṃ hinva̱ntyapi̱ vāji̭neṣu |
adhḙnvā carati mā̱yayai̱ṣa vāca̭ṃ śuśru̱vā~ a̭pha̱lāma̭pu̱ṣpām ||5||
yasti̱tyāja̭ saci̱vida̱ṃ sakhā̭ya̱ṃ na tasya̭ vā̱cyapi̭ bhā̱go a̭sti |
yadī̭ṃ śṛ̱ṇotyala̭kaṃ śṛṇoti na̱hi pra̱veda̭ sukṛ̱tasya̱ panthā̭m ||6||
a̱kṣa̱ṇvanta̱: karṇa̭vanta̱: sakhā̭yo manoja̱veṣvasa̭mā babhūvuḥ |
ā̱da̱ghnāsa̭ upaka̱kṣāsa̭ u tve hra̱dā i̭va̱ snātvā̭ u tve dadṛśre ||7||
hṛ̱dā ta̱ṣṭeṣu̱ mana̭so ja̱veṣu̱ yadbrā̭hma̱ṇāḥ sa̱ṃyaja̭nte̱ sakhā̭yaḥ |
atrāha̭ tva̱ṃ vi ja̭hurve̱dyābhi̱roha̭brahmāṇo̱ vi ca̭rantyu tve ||8||
i̱me ye nārvāṅna pa̱raścara̭nti̱ na brā̭hma̱ṇāso̱ na su̱teka̭rāsaḥ |
ta e̱te vāca̭mabhi̱padya̭ pā̱payā̭ si̱rīstantra̭ṃ tanvate̱ apra̭jajñayaḥ ||9||
sarvḙ nandanti ya̱śasāga̭tena sabhāsā̱hena̱ sakhyā̱ sakhā̭yaḥ |
 ki̱lbi̱ṣa̱spṛtpi̭tu̱ṣaṇi̱rhyḙṣā̱mara̭ṃ hi̱to bhava̭ti̱ vāji̭nāya ||10||
ṛ̱cāṃ tva̱: poṣa̭māste pupu̱ṣvāngā̭ya̱traṃ tvo̭ gāyati̱ śakva̭rīṣu |
bra̱hmā tvo̱ vada̭ti jātavi̱dyāṃ ya̱jñasya̱ mātrā̱ṃ vi mi̭mīta u tvaḥ ||11||
9 laukyo bṛhaspatiḥ, bṛhaspatirāṃgiraso vā, dākṣāyaṇī aditirvā| devāḥ| anuṣṭup|
de̱vānā̱ṃ nu va̱yaṃ jānā̱ pra vo̭cāma vipa̱nyayā̭ | u̱ktheṣṷ śa̱syamā̭neṣu̱ yaḥ paśyā̱dutta̭re yu̱ge ||1||
brahma̭ṇa̱spati̭re̱tā saṃ ka̱rmāra̭ ivādhamat | de̱vānā̭ṃ pū̱rvye yu̱ge'sa̭ta̱: sada̭jāyata ||2||
de̱vānā̭ṃ yu̱ge pra̭tha̱me'sa̭ta̱: sada̭jāyata | tadāśā̱ anva̭jāyanta̱ tadṷttā̱napa̭da̱spari̭ ||3||
bhūrja̭jña uttā̱napa̭do bhu̱va āśā̭ ajāyanta | adi̭te̱rdakṣo̭ ajāyata̱ dakṣā̱dvadi̭ti̱: pari̭ ||4||
adi̭ti̱rhyaja̭niṣṭa̱ dakṣa̱ yā dṷhi̱tā tava̭ | tāṃ de̱vā anva̭jāyanta bha̱drā a̱mṛta̭bandhavaḥ ||5||
yaddḙvā a̱daḥ sa̭li̱le susa̭ṃrabdhā̱ ati̭ṣṭhata | atrā̭ vo̱ nṛtya̭tāmiva tī̱vro re̱ṇurapā̭yata ||6||
yaddḙvā̱ yata̭yo yathā̱ bhuva̭nā̱nyapi̭nvata | atrā̭ samu̱dra ā gū̱ḻhamā sūrya̭majabhartana ||7||
a̱ṣṭau pu̱trāso̱ adi̭te̱rye jā̱tāsta̱nva1spari̭ | de̱vā~ upa̱ praitsa̱ptabhi̱: parā̭ mārtā̱ṇḍamā̭syat ||8||
sa̱ptabhi̭: pu̱trairadi̭ti̱rupa̱ praitpū̱rvyaṃ yu̱gam | pra̱jāyai̭ mṛ̱tyavḙ tva̱tpuna̭rmārtā̱ṇḍamābha̭rat ||9||
11  gaurivītiḥśāktyaḥ| indraḥ| triṣṭup|
jani̭ṣṭhā u̱graḥ saha̭se tu̱rāya̭ ma̱ndra oji̭ṣṭho bahu̱lābhi̭mānaḥ |
ava̭rdha̱nnindra̭ṃ ma̱ruta̭ści̱datra̭ mā̱tā yadvī̱raṃ da̱dhana̱ddhani̭ṣṭhā ||1||
dru̱ho niṣa̭ttā pṛśa̱nī ci̱devai̭: pu̱rū śaṃsḙna vāvṛdhu̱ṣṭa indra̭m |
a̱bhīvṛ̭teva̱ tā ma̭hāpa̱dena̭ dhvā̱ntātpra̭pi̱tvāduda̭ranta̱ garbhā̭: ||2||
ṛ̱ṣvā te̱ pādā̱ pra yajjigā̱syava̭rdha̱nvājā̭ u̱ta ye ci̱datra̭ |
tvami̭ndra sālāvṛ̱kāntsa̱hasra̭mā̱sanda̭dhiṣe a̱śvinā va̭vṛtyāḥ ||3||
sa̱ma̱nā tūrṇi̱rupa̭ yāsi ya̱jñamā nāsa̭tyā sa̱khyāya̭ vakṣi |
va̱sāvyā̭mindra dhārayaḥ sa̱hasrā̱'śvinā̭ śūra dadaturma̱ghāni̭ ||4||
manda̭māna ṛ̱tādadhi̭ pra̱jāyai̱ sakhi̭bhi̱rindra̭ iṣi̱rebhi̱rartha̭m |
ābhi̱rhi mā̱yā upa̱ dasyu̱māgā̱nmiha̱: pra ta̱mrā a̭vapa̱ttamā̭ṃsi ||5||
sanā̭mānā ciddhvasayo̱ nya̭smā̱ avā̭ha̱nnindra̭ u̱ṣaso̱ yathāna̭: |
ṛ̱ṣvaira̭gaccha̱: sakhi̭bhi̱rnikā̭maiḥ sā̱kaṃ pra̭ti̱ṣṭhā hṛdyā̭ jaghantha ||6||
tvaṃ ja̭ghantha̱ namṷciṃ makha̱syuṃ dāsa̭ṃ kṛṇvā̱na ṛṣa̭ye̱ vimā̭yam |
tvaṃ ca̭kartha̱ mana̭ve syo̱nānpa̱tho dḙva̱trāñja̭seva̱ yānā̭n ||7||
tvame̱tāni̭ papriṣe̱ vi nāmeśā̭na indra dadhiṣe̱ gabha̭stau |
anṷ tvā de̱vāḥ śava̭sā madantyu̱pari̭budhnānva̱nina̭ścakartha ||8||
ca̱kraṃ yada̭syā̱psvā niṣa̭ttamu̱to tada̭smai̱ madhvicca̭cchadyāt |
pṛ̱thi̱vyāmati̭ṣita̱ṃ yadūdha̱: payo̱ goṣvada̭dhā̱ oṣa̭dhīṣu ||9||
aśvā̭diyā̱yeti̱ yadvada̱ntyoja̭so jā̱tamu̱ta ma̭nya enam |
ma̱nyori̭yāya ha̱rmyeṣṷ tasthau̱ yata̭: praja̱jña indro̭ asya veda ||10||
vaya̭: supa̱rṇā upa̭ sedu̱rindra̭ṃ pri̱yamḙdhā̱ ṛṣa̭yo̱ nādha̭mānāḥ |
apa̭ dhvā̱ntamṷ̄rṇu̱hi pū̱rdhi cakṣṷrmumu̱gdhya1smānni̱dhayḙva ba̱ddhān ||11||
6  gaurivītiḥśāktyaḥ| indraḥ| triṣṭup|
vasṷ̄nāṃ vā carkṛṣa̱ iya̭kṣandhi̱yā vā̭ ya̱jñairvā̱ roda̭syoḥ |
arva̭nto vā̱ ye ra̭yi̱manta̭: sā̱tau va̱naṃa vā̱ ye su̱śruṇa̭ṃ su̱śruto̱ dhuḥ ||1||
hava̭ eṣā̱masṷro nakṣata̱ dyāṃ śra̭vasya̱tā mana̭sā niṃsata̱ kṣām |
cakṣā̭ṇā̱ yatra̭ suvi̱tāya̭ de̱vā dyaurna vārḙbhiḥ kṛ̱ṇava̭nta̱ svaiḥ ||2||
i̱yamḙṣāma̱mṛtā̭nā̱ṃ gīḥ sa̱rvatā̭tā̱ ye kṛ̱paṇa̭nta̱ ratna̭m |
dhiya̭ṃ ca ya̱jñaṃ ca̱ sādha̭nta̱ste no̭ dhāntu vasa̱vya1masā̭mi ||3||
ā tatta̭ indrā̱yava̭: panantā̱'bhi ya ū̱rvaṃ goma̭nta̱ṃ titṛ̭tsān |
sa̱kṛ̱tsvaṃ1 ye pṷrupu̱trāṃ ma̱hīṃ sa̱hasra̭dhārāṃ bṛha̱tīṃ dudṷkṣan ||4||
śacī̭va̱ indra̱mava̭se kṛṇudhva̱manā̭nataṃ da̱maya̭ntaṃ pṛta̱nyūn |
ṛ̱bhu̱kṣaṇa̭ṃ ma̱ghavā̭naṃ suvṛ̱ktiṃ bhartā̱ yo vajra̱ṃ narya̭ṃ puru̱kṣuḥ ||5||
yadvā̱vāna̭ puru̱tama̭ṃ purā̱ṣāḻā vṛ̭tra̱hendro̱ nāmā̭nyaprāḥ |
acḙti prā̱saha̱spati̱stuvi̭ṣmā̱nyadī̭mu̱śmasi̱ karta̭ve̱ kara̱ttat ||6||
9 sindhukṣit praiyamedhaḥ| nadyaḥ| jagatī|
pra su va̭ āpo mahi̱māna̭mutta̱maṃ kā̱rurvo̭cāti̱ sada̭ne vi̱vasva̭taḥ |
pra sa̱ptasa̭pta tre̱dhā hi ca̭kra̱muḥ pra sṛtva̭rīṇā̱mati̱ sindhu̱roja̭sā ||1||
pra tḙ'rada̱dvarṷṇo̱ yāta̭ve pa̱thaḥ sindho̱ yadvājā̭~ a̱bhyadra̭va̱stvam |
bhūmyā̱ adhi̭ pra̱vatā̭ yāsi̱ sānṷnā̱ yadḙṣā̱magra̱ṃ jaga̭tāmira̱jyasi̭ ||2||
di̱vi sva̱no ya̭tate̱ bhūmyo̱parya̭na̱ntaṃ śuṣma̱mudi̭yarti bhā̱nunā̭ |
a̱bhrādi̭va̱ pra sta̭nayanti vṛ̱ṣṭaya̱: sindhu̱ryadeti̭ vṛṣa̱bho na rorṷvat ||3||
a̱bhi tvā̭ sindho̱ śiśu̱minna mā̱taro̭ vā̱śrā a̭rṣanti̱ paya̭seva dhe̱nava̭: |
rājḙva̱ yudhvā̭ nayasi̱ tvamitsicau̱ yadā̭sā̱magra̭ṃ pra̱vatā̱mina̭kṣasi ||4||
i̱maṃ mḙ gaṅge yamune sarasvati̱ śutṷdri̱ stoma̭ṃ sacatā̱ paru̱ṣṇyā |
a̱si̱knyā ma̭rudvṛdhe vi̱tasta̱yā''rjī̭kīye śṛṇu̱hyā su̱ṣoma̭yā ||5||
tṛ̱ṣṭāma̭yā pratha̱maṃ yāta̭ve sa̱jūḥ su̱sartvā̭ ra̱sayā̭ śve̱tyā tyā |
tvaṃ si̭ndho̱ kubha̭yā goma̱tīṃ krumṷṃ meha̱tnvā sa̱ratha̱ṃ yābhi̱rīya̭se ||6||
ṛjī̱tyenī̱ ruśa̭tī mahi̱tvā pari̱ jrayā̭ṃsi bharate̱ rajā̭ṃsi |
ada̭bdhā̱ sindhṷra̱pasā̭ma̱pasta̱mā'śvā̱ na ci̱trā vapṷṣīva darśa̱tā ||7||
svaśvā̱ sindhṷ: su̱rathā̭ su̱vāsā̭ hira̱ṇyayī̱ sukṛ̭tā vā̱jinī̭vatī |
ūrṇā̭vatī yuva̱tiḥ sī̱lamā̭vatyu̱tādhi̭ vaste su̱bhagā̭ madhu̱vṛdha̭m ||8||
su̱khaṃ ratha̭ṃ yuyuje̱ sindhṷra̱śvina̱ṃ tena̱ vāja̭ṃ saniṣada̱sminnā̱jau |
ma̱hānhya̭sya mahi̱mā pa̭na̱syate'da̭bdhasya̱ svaya̭śaso vira̱pśina̭: ||9||
8 sarpa airāvato jaratkarṇaḥ| grāvāṇaḥ| jagatī|
ā va̭ ṛñjasa ū̱rjāṃ vyṷṣṭi̱ṣvindra̭ṃ ma̱ruto̱ roda̭sī anaktana |
u̱bhe yathā̭ no̱ aha̭nī sacā̱bhuvā̱ sada̭:sado variva̱syāta̭ u̱dbhidā̭ ||1||
tadu̱ śreṣṭha̱ṃ sava̭naṃ sunota̱nā'tyo̱ na hasta̭yato̱ adri̭: so̱tari̭ |
vi̱daddhya1ryo a̱bhibhṷ̄ti̱ pauṃsya̭ṃ ma̱ho rā̱ye ci̭ttarute̱ yadarva̭taḥ ||2||
tadiddhya̭sya̱ sava̭naṃ vi̱vera̱po yathā̭ pu̱rā mana̭ve gā̱tumaśrḙt |
goa̭rṇasi tvā̱ṣṭre aśva̭nirṇiji̱ prema̭dhva̱reṣva̭dhva̱rā~ a̭śiśrayuḥ ||3||
apa̭ hata ra̱kṣaso̭ bhaṅgu̱rāva̭ta skabhā̱yata̱ niṝ̭ti̱ṃ sedha̱tāma̭tim |
ā no̭ ra̱yiṃ sarva̭vīraṃ sunotana devā̱vya̭ṃ bharata̱ śloka̭madrayaḥ ||4||
di̱vaści̱dā vo'ma̭vattarebhyo vi̱bhvanā̭ cidā̱śva̭pastarebhyaḥ |
vā̱yości̱dā soma̭rabhastarebhyo̱'gneści̭darca pitu̱kṛtta̭rebhyaḥ ||5||
bhu̱rantṷ no ya̱śasa̱: sotvandha̭so̱ grāvā̭ṇo vā̱cā di̱vitā̭ di̱vitma̭tā |
naro̱ yatra̭ duha̱te kāmya̱ṃ madhvā̭gho̱ṣaya̭nto a̱bhito̭ mitha̱stura̭: ||6||
su̱nvanti̱ soma̭ṃ rathi̱rāso̱ adra̭yo̱ nira̭sya̱ rasa̭ṃ ga̱viṣo̭ duhanti̱ te |
du̱hantyūdha̭rupa̱seca̭nāya̱ kaṃ naro̭ ha̱vyā na ma̭rjayanta ā̱sabhi̭: ||7||
e̱te na̭ra̱: svapa̭so abhūtana̱ ya indrā̭ya sunu̱tha soma̭madrayaḥ |
vā̱maṃvā̭maṃ vo di̱vyāya̱ dhāmne̱ vasṷvasu va̱: pārthi̭vāya sunva̱te ||8||
8 syūmaraśmirbhārgavaḥ| marutaḥ| triṣṭup , 5 jagatī|
a̱bhra̱pruṣo̱ na vā̱cā prṷṣā̱ vasṷ ha̱viṣma̭nto̱ na ya̱jñā vi̭jā̱nuṣa̭: |
su̱mārṷta̱ṃ na bra̱hmāṇa̭ma̱rhasḙ ga̱ṇama̭stoṣyeṣā̱ṃ na śo̱bhasḙ ||1||
śri̱ye maryā̭so a̱ñjī~ra̭kṛṇvata su̱mārṷta̱ṃ na pū̱rvīrati̱ kṣapa̭: |
di̱vaspu̱trāsa̱ etā̱ na yḙtira ādi̱tyāsa̱ste a̱krā na vā̭vṛdhuḥ ||2||
pra ye di̱vaḥ pṛ̭thi̱vyā na ba̱rhaṇā̱ tmanā̭ riri̱cre a̱bhrānna sūrya̭: |
pāja̭svanto̱ na vī̱rāḥ pa̭na̱syavo̭ ri̱śāda̭so̱ na maryā̭ a̱bhidya̭vaḥ ||3||
yu̱ṣmāka̭ṃ bu̱dhne a̱pāṃ na yāma̭ni vithu̱ryati̱ na ma̱hī śra̭tha̱ryati̭ |
vi̱śvapsṷrya̱jño a̱rvāga̱yaṃ su va̱: praya̭svanto̱ na sa̱trāca̱ ā ga̭ta ||4||
yū̱yaṃ dhū̱rṣu pra̱yujo̱ na ra̱śmibhi̱rjyoti̭ṣmanto̱ na bhā̱sā vyṷṣṭiṣu |
śye̱nāso̱ na svaya̭śaso ri̱śāda̭saḥ pra̱vāso̱ na prasi̭tāsaḥ pari̱pruṣa̭: ||5||
pra yadvaha̭dhve marutaḥ parā̱kādyū̱yaṃ ma̱haḥ sa̱ṃvara̭ṇasya̱ vasva̭: |
vi̱dā̱nāso̭ vasavo̱ rādhya̭syā̱''rācci̱ddveṣa̭: sanu̱taryṷyota ||6||
ya u̱dṛci̭ ya̱jñe a̭dhvare̱ṣṭhā ma̱rudbhyo̱ na mānṷṣo̱ dadā̭śat |
re̱vatsa vayo̭ dadhate su̱vīra̱ṃ sa de̱vānā̱mapi̭ gopī̱the a̭stu ||7||
te hi ya̱jñeṣṷ ya̱jñiyā̭sa̱ ūmā̭ ādi̱tyena̱ nāmnā̱ śambha̭viṣṭhāḥ |
te no̭'vantu ratha̱tūrma̭nī̱ṣāṃ ma̱haśca̱ yāma̭nnadhva̱re ca̭kā̱nāḥ ||8||
8  syūmaraśmirbhārgavaḥ| marutaḥ| triṣṭup , 2,5-7 jagatī|
viprā̭so̱ na manma̭bhiḥ svā̱dhyo̭ devā̱vyo̱3 na ya̱jñaiḥ svapna̭saḥ |
rājā̭no̱ na ci̱trāḥ sṷsa̱ṃdṛśa̭: kṣitī̱nāṃ na maryā̭ are̱pasa̭: ||1||
a̱gnirna ye bhrāja̭sā ru̱kmava̭kṣaso̱ vātā̭so̱ na sva̱yuja̭: sa̱dyaṷ̄tayaḥ |
pra̱jñā̱tāro̱ na jyeṣṭhā̭: sunī̱taya̭: su̱śarmā̭ṇo̱ na somā̭ ṛ̱taṃ ya̱te ||2||
vātā̭so̱ na ye dhuna̭yo jiga̱tnavo̭'gnī̱nāṃ na ji̱hvā vi̭ro̱kiṇa̭: |
varma̭ṇvanto̱ na yo̱dhāḥ śimī̭vantaḥ pitṝ̱ṇāṃ na śaṃsā̭: surā̱taya̭: ||3||
rathā̭nā̱ṃ na ye̱1rāḥ sanā̭bhayo jigī̱vāṃso̱ na śūrā̭ a̱bhidya̭vaḥ |
va̱re̱yavo̱ na maryā̭ ghṛta̱pruṣo̭'bhisva̱rtāro̭ a̱rkaṃ na su̱ṣṭubha̭: ||4||
aśvā̭so̱ na ye jyeṣṭhā̭sa ā̱śavo̭ didhi̱ṣavo̱ na ra̱thya̭: su̱dāna̭vaḥ |
āpo̱ na ni̱mnairu̱dabhi̭rjiga̱tnavo̭ vi̱śvarṷ̄pā̱ aṅgi̭raso̱ na sāma̭bhiḥ ||5||
grāvā̭ṇo̱ na sū̱raya̱: sindhṷmātara ādardi̱rāso̱ adra̭yo̱ na vi̱śvahā̭ |
śi̱śūlā̱ na krī̱ḻaya̭: sumā̱taro̭ mahāgrā̱mo na yāma̭nnu̱ta tvi̱ṣā ||6||
u̱ṣasā̱ṃ na ke̱tavo̭'dhvara̱śriya̭: śubha̱ṃyavo̱ nāñjibhi̱rvya̭śvitan |
 sindha̭vo̱ na ya̱yiyo̱ bhrāja̭dṛṣṭayaḥ parā̱vato̱ na yoja̭nāni mamire ||7||
su̱bhā̱gānno̭ devāḥ kṛṇutā su̱ratnā̭na̱smāntsto̱tṝnma̭ruto vāvṛdhā̱nāḥ |
adhi̭ sto̱trasya̭ sa̱khyasya̭ gāta sa̱nāddhi vo̭ ratna̱dheyā̭ni̱ santi̭ ||8||
7 saucīko'gnirvaiśvānaro vā, saptirvājaṃbharo vā| agniḥ| triṣṭup|
apa̭śyamasya maha̱to ma̭hi̱tvamama̭rtyasya̱ martyā̭su vi̱kṣu |
nānā̱ hanū̱ vibhṛ̭te̱ saṃ bha̭rete̱ asi̭nvatī̱ bapsa̭tī̱ bhūrya̭ttaḥ ||1||
guhā̱ śiro̱ nihi̭ta̱mṛdha̭ga̱kṣī asi̭nvannatti ji̱hvayā̱ vanā̭ni |
atrā̭ṇyasmai pa̱ḍbhiḥ saṃ bha̭rantyuttā̱naha̭stā̱ nama̱sādhi̭ vi̱kṣu ||2||
pra mā̱tuḥ pra̭ta̱raṃ guhya̭mi̱cchankṷmā̱ro na vī̱rudha̭: sarpadu̱rvīḥ |
sa̱saṃ na pa̱kvama̭vidacchu̱canta̭ṃ riri̱hvāṃsa̭ṃ ri̱pa u̱pasthḙ a̱ntaḥ ||3||
tadvā̭mṛ̱taṃ ro̭dasī̱ pra bra̭vīmi̱ jāya̭māno mā̱tarā̱ garbho̭ atti |
nāhaṃ de̱vasya̱ martya̭ściketā̱'gnira̱ṅga vicḙtā̱: sa pracḙtāḥ ||4||
yo a̭smā̱ anna̭ṃ tṛ̱ṣvā̱3dadhā̱tyājyai̭rghṛ̱tairju̱hoti̱ puṣya̭ti |
tasmai̭ sa̱hasra̭ma̱kṣabhi̱rvi ca̱kṣe'gnḙ vi̱śvata̭: pra̱tyaṅṅa̭si̱ tvam ||5||
kiṃ de̱veṣu̱ tyaja̱ ena̭ścaka̱rthā'gnḙ pṛ̱cchāmi̱ nu tvāmavi̭dvān |
akrī̭ḻa̱nkrīḻa̱nhari̱ratta̭ve̱'danvi pa̭rva̱śaśca̭karta̱ gāmi̭vā̱siḥ ||6||
viṣṷ̄co̱ aśvā̭nyuyuje vane̱jā ṛjī̭tibhī raśa̱nābhi̭rgṛbhī̱tān |
ca̱kṣa̱de mi̱tro vasṷbhi̱: sujā̭ta̱: samā̭nṛdhe̱ parva̭bhirvāvṛdhā̱naḥ ||7||
7 saucīko'gnirvaiśvānaro vā, saptirvājaṃbharo vā| agniḥ| triṣṭup|
a̱gniḥ sapti̭ṃ vājambha̱raṃ da̭dātya̱gnirvī̱raṃ śrutya̭ṃ karmani̱ṣṭhām |
a̱gnī roda̭sī̱ vi ca̭ratsama̱ñjanna̱gnirnārī̭ṃ vī̱rakṷkṣi̱ṃ pura̭ṃdhim ||1||
a̱gnerapna̭saḥ sa̱mida̭stu bha̱drā'gnirma̱hī roda̭sī̱ ā vi̭veśa |
a̱gnireka̭ṃ codayatsa̱matsva̱gnirvṛ̱trāṇi̭ dayate pu̱rūṇi̭ ||2||
a̱gnirha̱ tyaṃ jara̭ta̱: karṇa̭māvā̱'gnira̱dbhyo nira̭daha̱jjarṷ̄tham |
a̱gniratri̭ṃ gha̱rma ṷruṣyada̱ntara̱gnirnṛ̱medha̭ṃ pra̱jayā̭sṛja̱tsam ||3||
a̱gnirdā̱ddravi̭ṇaṃ vī̱rapḙśā a̱gniṝṣi̱ṃ yaḥ sa̱hasrā̭ sa̱noti̭ |
a̱gnirdi̱vi ha̱vyamā ta̭tānā̱'gnerdhāmā̭ni̱ vibhṛ̭tā puru̱trā ||4||
a̱gnimu̱kthaiṝṣa̭yo̱ vi hva̭yante̱'gniṃ naro̱ yāma̭ni bādhi̱tāsa̭: |
a̱gniṃ vayo̭ a̱ntari̭kṣe̱ pata̭nto̱'gniḥ sa̱hasrā̱ pari̭ yāti̱ gonā̭m ||5||
a̱gniṃ viśa̭ īḻate̱ mānṷṣī̱ryā a̱gniṃ manṷṣo̱ nahṷṣo̱ vi jā̱tāḥ |
a̱gnirgāndha̭rvīṃ pa̱thyā̭mṛ̱tasyā̱'gnergavyṷ̄tirghṛ̱ta ā niṣa̭ttā ||6||
a̱gnaye̱ brahma̭ ṛ̱bhava̭statakṣura̱gniṃ ma̱hāma̭vocāmā suvṛ̱ktim |
agne̱ prāva̭ jari̱tāra̭ṃ yavi̱ṣṭhā'gne̱ mahi̱ dravi̭ṇa̱mā ya̭jasva ||7||
7  viśvakarmā bhauvanaḥ| viśvakarmā | triṣṭup , 2 virāḍrūpā|
ya i̱mā viśvā̱ bhuva̭nāni̱ juhva̱dṛṣi̱rhotā̱ nyasī̭datpi̱tā na̭: |
sa ā̱śiṣā̱ dravi̭ṇami̱cchamā̭naḥ prathama̱cchadava̭rā̱~ ā vi̭veśa ||1||
kiṃ svi̭dāsīdadhi̱ṣṭhāna̭mā̱rambha̭ṇaṃ kata̱matsvi̭tka̱thāsī̭t |
yato̱ bhūmi̭ṃ ja̱naya̭nvi̱śvaka̭rmā̱ vi dyāmaurṇo̭nmahi̱nā vi̱śvaca̭kṣāḥ ||2||
vi̱śvata̭ścakṣuru̱ta vi̱śvato̭mukho vi̱śvato̭bāhuru̱ta vi̱śvata̭spāt |
saṃ bā̱hubhyā̱ṃ dhama̭ti̱ saṃ pata̭trai̱rdyāvā̱bhūmī̭ ja̱naya̭nde̱va eka̭: ||3||
kiṃ svi̱dvana̱ṃ ka u̱ sa vṛ̱kṣa ā̭sa̱ yato̱ dyāvā̭pṛthi̱vī ni̭ṣṭata̱kṣuḥ |
manī̭ṣiṇo̱ mana̭sā pṛ̱cchatedu̱ tadyada̱dhyati̭ṣṭha̱dbhuva̭nāni dhā̱raya̭n ||4||
yā te̱ dhāmā̭ni para̱māṇi̱ yāva̱mā yā ma̭dhya̱mā vi̭śvakarmannu̱temā |
śikṣā̱ sakhi̭bhyo ha̱viṣi̭ svadhāvaḥ sva̱yaṃ ya̭jasva ta̱nva̭ṃ vṛdhā̱naḥ ||5||
viśva̭karmanha̱viṣā̭ vāvṛdhā̱naḥ sva̱yaṃ ya̭jasva pṛthi̱vīmu̱ta dyām |
muhya̭ntva̱nye a̱bhito̱ janā̭sa i̱hāsmāka̭ṃ ma̱ghavā̭ sū̱rira̭stu ||6||
vā̱caspati̭ṃ vi̱śvaka̭rmāṇamū̱tayḙ mano̱juva̱ṃ vājḙ a̱dyā hṷvema |
sa no̱ viśvā̭ni̱ hava̭nāni joṣadvi̱śvaśa̭mbhū̱rava̭se sā̱dhuka̭rmā ||7||
7  viśvakarmā bhauvanaḥ| viśvakarmā| triṣṭup |
cakṣṷṣaḥ pi̱tā mana̭sā̱ hi dhīro̭ ghṛ̱tamḙne ajana̱nnanna̭māne |
ya̱dedantā̱ ada̭dṛhanta̱ pūrva̱ ādiddyāvā̭pṛthi̱vī a̭prathetām ||1||
vi̱śvaka̭rmā̱ vima̭nā̱ ādvihā̭yā dhā̱tā vi̭dhā̱tā pa̭ra̱mota sa̱ṃdṛk |
teṣā̭mi̱ṣṭāni̱ sami̱ṣā ma̭danti̱ yatrā̭ saptaṛ̱ṣīnpa̱ra eka̭mā̱huḥ ||2||
yo na̭: pi̱tā ja̭ni̱tā yo vi̭dhā̱tā dhāmā̭ni̱ veda̱ bhuva̭nāni̱ viśvā̭ |
yo de̱vānā̭ṃ nāma̱dhā eka̭ e̱va taṃ sa̭mpra̱śnaṃ bhuva̭nā yantya̱nyā ||3||
ta āya̭janta̱ dravi̭ṇa̱ṃ sama̭smā̱ ṛṣa̭ya̱: pūrvḙ jari̱tāro̱ na bhū̱nā |
a̱sūrte̱ sūrte̱ raja̭si niṣa̱tte ye bhū̱tāni̭ sa̱makṛ̭ṇvanni̱māni̭ ||4||
pa̱ro di̱vā pa̱ra e̱nā pṛ̭thi̱vyā pa̱ro de̱vebhi̱rasṷrai̱ryadasti̭ |
kaṃ svi̱dgarbha̭ṃ pratha̱maṃ da̭dhra̱ āpo̱ yatra̭ de̱vāḥ sa̱mapa̭śyanta̱ viśvḙ ||5||
tamidgarbha̭ṃ pratha̱maṃ da̭dhra̱ āpo̱ yatra̭ de̱vāḥ sa̱maga̭cchanta̱ viśvḙ |
a̱jasya̱ nābhā̱vadhyeka̱marpi̭ta̱ṃ yasmi̱nviśvā̭ni̱ bhuva̭nāni ta̱sthuḥ ||6||
na taṃ vi̭dātha̱ ya i̱mā ja̱jānā̱'nyadyu̱ṣmāka̱manta̭raṃ babhūva |
nī̱hā̱reṇa̱ prāvṛ̭tā̱ jalpyā̭ cā'su̱tṛpa̭ uktha̱śāsa̭ścaranti ||7||
7  manyustāpasaḥ| manyuḥ| triṣṭup , 1 jagatī|
yastḙ ma̱nyo'vi̭dhadvajra sāyaka̱ saha̱ oja̭: puṣyati̱ viśva̭mānu̱ṣak |
sā̱hyāma̱ dāsa̱mārya̱ṃ tvayā̭ yu̱jā saha̭skṛtena̱ saha̭sā̱ saha̭svatā ||1
ma̱nyurindro̭ ma̱nyure̱vāsa̭ de̱vo ma̱nyurhotā̱ varṷṇo jā̱tavḙdāḥ |
ma̱nyuṃ viśa̭ īḻate̱ mānṷṣī̱ryāḥ pā̱hi no̭ manyo̱ tapa̭sā sa̱joṣā̭: ||2||
a̱bhī̭hi manyo ta̱vasa̱stavī̭yā̱ntapa̭sā yu̱jā vi ja̭hi̱ śatrṷ̄n |
a̱mi̱tra̱hā vṛ̭tra̱hā da̭syu̱hā ca̱ viśvā̱ vasū̱nyā bha̭rā̱ tvaṃ na̭: ||3||
tvaṃ hi ma̭nyo a̱bhibhṷ̄tyojāḥ svaya̱mbhūrbhāmo̭ abhimātiṣā̱haḥ |
vi̱śvaca̭rṣaṇi̱: sahṷri̱: sahā̭vāna̱smāsvoja̱: pṛta̭nāsu dhehi ||4||
a̱bhā̱gaḥ sannapa̱ parḙto asmi̱ tava̱ kratvā̭ tavi̱ṣasya̭ pracetaḥ |
taṃ tvā̭ manyo akra̱turji̭hīḻā̱haṃ svā ta̱nūrba̭la̱deyā̭ya̱ mehi̭ ||5||
a̱yaṃ tḙ a̱smyupa̱ mehya̱rvāṅpra̭tīcī̱naḥ sa̭hure viśvadhāyaḥ |
manyo̭ vajrinna̱bhi māmā va̭vṛtsva̱ hanā̭va̱ dasyṷ̄~ru̱ta bo̭dhyā̱peḥ ||6||
a̱bhi prehi̭ dakṣiṇa̱to bha̭vā̱ me'dhā̭ vṛ̱trāṇi̭ jaṅghanāva̱ bhūri̭ |
ju̱homi̭ te dha̱ruṇa̱ṃ madhvo̱ agra̭mu̱bhā ṷpā̱ṃśu pra̭tha̱mā pi̭bāva ||7||
7  manyustāpasaḥ| manyuḥ| jagatī,1-3 triṣṭup|
tvayā̭ manyo sa̱ratha̭māru̱janto̱ harṣa̭māṇāso dhṛṣi̱tā ma̭rutvaḥ |
ti̱gmeṣa̭va̱ āyṷdhā sa̱ṃśiśā̭nā a̱bhi pra ya̭ntu̱ naro̭ a̱gnirṷ̄pāḥ ||1||
a̱gniri̭va manyo tviṣi̱taḥ sa̭hasva senā̱nīrna̭: sahure hū̱ta ḙdhi |
ha̱tvāya̱ śatrū̱nvi bha̭jasva̱ veda̱ ojo̱ mimā̭no̱ vi mṛdho̭ nudasva ||2||
saha̭sva manyo a̱bhimā̭tima̱sme ru̱janmṛ̱ṇanpra̭mṛ̱ṇanprehi̱ śatrṷ̄n |
u̱graṃ te̱ pājo̭ na̱nvā rṷrudhre va̱śī vaśa̭ṃ nayasa ekaja̱ tvam ||3||
eko̭ bahū̱nāma̭si manyavīḻi̱to viśa̭ṃviśaṃ yu̱dhaye̱ saṃ śi̭śādhi |
akṛ̭ttaru̱ktvayā̭ yu̱jā va̱yaṃ dyu̱manta̱ṃ ghoṣa̭ṃ vija̱yāya̭ kṛṇmahe ||4||
vi̱je̱ṣa̱kṛdindra̭ ivānavabra̱vo̱3'smāka̭ṃ manyo adhi̱pā bha̭ve̱ha |
pri̱yaṃ te̱ nāma̭ sahure gṛṇīmasi vi̱dmā tamutsa̱ṃ yata̭ āba̱bhūtha̭ ||5||
ābhṷ̄tyā saha̱jā va̭jra sāyaka̱ saho̭ bibharṣyabhibhūta̱ utta̭ram |
kratvā̭ no manyo sa̱ha me̱dyḙdhi mahādha̱nasya̭ puruhūta sa̱ṃsṛji̭ ||6||
saṃsṛ̭ṣṭa̱ṃ dhana̭mu̱bhaya̭ṃ sa̱mākṛ̭tama̱smabhya̭ṃ dattā̱ṃ varṷṇaśca ma̱nyuḥ |
bhiya̱ṃ dadhā̭nā̱ hṛda̭yeṣu̱ śatra̭va̱: parā̭jitāso̱ apa̱ ni la̭yantām ||7||
47 sāvitrī sūryā ṛṣikā| 1-5 somaḥ, 6-16 sūryāvivāhaḥ, 17 devāḥ, 18 somārkau, 19 candramāḥ, 20-28 nṛṇāṃ vivāhamantrā āśī:prāyāḥ, 29-30 vadhūvāsaḥ saṃsparśanindā, 31 dampatyoryakṣmanāśanaṃ, 32-47 sūryā sāvitrī| anuṣṭup , 14,19-21,23-24,26,36-37,44 triṣṭup, 18,27,43 jagatī, 34 urobṛhatī|
sa̱tyenotta̭bhitā̱ bhūmi̱: sūrye̱ṇotta̭bhitā̱ dyauḥ | ṛ̱tenā̭di̱tyāsti̭ṣṭhanti di̱vi somo̱ adhi̭ śri̱taḥ ||1||
somḙnādi̱tyā ba̱lina̱: somḙna pṛthi̱vī ma̱hī | atho̱ nakṣa̭trāṇāme̱ṣāmu̱pasthe̱ soma̱ āhi̭taḥ ||2||
soma̭ṃ manyate papi̱vānyatsa̭mpi̱ṃṣantyoṣa̭dhim | soma̱ṃ yaṃ bra̱hmāṇo̭ vi̱durna tasyā̭śnāti̱ kaśca̱na ||3||
ā̱cchadvi̭dhānairgupi̱to bārha̭taiḥ soma rakṣi̱taḥ | grāvṇā̱micchṛ̱ṇvanti̭ṣṭhasi̱ na tḙ aśnāti̱ pārthi̭vaḥ ||4||
yattvā̭ deva pra̱piba̭nti̱ tata̱ ā pyā̭yase̱ puna̭: | vā̱yuḥ soma̭sya rakṣi̱tā samā̭nā̱ṃ māsa̱ ākṛ̭tiḥ ||5||
raibhyā̭sīdanu̱deyī̭ nārāśa̱ṃsī nyoca̭nī | sū̱ryāyā̭ bha̱dramidvāso̱ gātha̭yaiti̱ pari̭ṣkṛtam ||6||
citti̭rā upa̱barha̭ṇa̱ṃ cakṣṷrā a̱bhyañja̭nam | dyaurbhūmi̱: kośa̭ āsī̱dyadayā̭tsū̱ryā pati̭m ||7||
stomā̭ āsanprati̱dhaya̭: ku̱rīra̱ṃ chanda̭ opa̱śaḥ | sū̱ryāyā̭ a̱śvinā̭ va̱rā'gnirā̭sītpuroga̱vaḥ ||8||
somo̭ vadhū̱yura̭bhavada̱śvinā̭stāmu̱bhā va̱rā | sū̱ryāṃ yatpatye̱ śaṃsa̭ntī̱ṃ mana̭sā savi̱tāda̭dāt ||9||
mano̭ asyā̱ ana̭ āsī̱ddyaurā̭sīdu̱ta ccha̱diḥ | śu̱krāva̭na̱ḍvāhā̭vāstā̱ṃ yadayā̭tsū̱ryā gṛ̱ham ||10||
ṛ̱ksā̱mābhyā̭ma̱bhihi̭tau̱ gāvaṷ te sāma̱nāvi̭taḥ | śrotra̭ṃ te ca̱kre ā̭stāṃ di̱vi panthā̭ścarācā̱raḥ ||11||
śucī̭ te ca̱kre yā̱tyā vyā̱no akṣa̱ āha̭taḥ | ano̭ mana̱smaya̭ṃ sū̱ryā''ro̭hatpraya̱tī pati̭m ||12||
sū̱ryāyā̭ vaha̱tuḥ prāgā̭tsavi̱tā yama̱vāsṛ̭jat | a̱ghāsṷ hanyante̱ gāvo'rjṷnyo̱: paryṷhyate ||13||
yada̭śvinā pṛ̱cchamā̭nā̱vayā̭taṃ trica̱kreṇa̭ vaha̱tuṃ sū̱ryāyā̭: |
 viśvḙ de̱vā anu̱ tadvā̭majānanpu̱traḥ pi̱tarā̭vavṛṇīta pū̱ṣā ||14||
yadayā̭taṃ śubhaspatī vare̱yaṃ sū̱ryāmupa̭ | kvaika̭ṃ ca̱kraṃ vā̭māsī̱tkva̭ de̱ṣṭrāya̭ tasthathuḥ ||15||
dve tḙ ca̱kre sṷ̄rye bra̱hmāṇa̭ ṛtu̱thā vi̭duḥ | athaika̭ṃ ca̱kraṃ yadguhā̱ tada̭ddhā̱taya̱ idvi̭duḥ ||16||
sū̱ryāyai̭ de̱vebhyo̭ mi̱trāya̱ varṷṇāya ca | ye bhū̱tasya̱ pracḙtasa i̱daṃ tebhyo̭'kara̱ṃ nama̭: ||17||
pū̱rvā̱pa̱raṃ ca̭rato mā̱yayai̱tau śiśū̱ krīḻa̭ntau̱ pari̭ yāto adhva̱ram |
viśvā̭nya̱nyo bhuva̭nābhi̱caṣṭa̭ ṛ̱tū~ra̱nyo vi̱dadha̭jjāyate̱ puna̭: ||18||
navo̭navo bhavati̱ jāya̭mā̱no'hnā̭ṃ ke̱turu̱ṣasā̭me̱tyagra̭m |
bhā̱gaṃ de̱vebhyo̱ vi da̭dhātyā̱yanpra ca̱ndramā̭stirate dī̱rghamāyṷ: ||19||
su̱ki̱ṃśu̱kaṃ śa̭lma̱liṃ vi̱śvarṷ̄pa̱ṃ hira̭ṇyavarṇaṃ su̱vṛta̭ṃ suca̱kram |
ā ro̭ha sūrye a̱mṛta̭sya lo̱kaṃ syo̱naṃ patyḙ vaha̱tuṃ kṛ̭ṇuṣva ||20||
udī̱rṣvāta̱: pati̭vatī̱ hye̱3ṣā vi̱śvāva̭su̱ṃ nama̭sā gī̱rbhirī̭ḻe |
a̱nyāmi̭ccha pitṛ̱ṣada̱ṃ vya̭ktā̱ṃ sa tḙ bhā̱go ja̱nuṣā̱ tasya̭ viddhi ||21||
udī̱rṣvāto̭ viśvāvaso̱ nama̭seḻā mahe tvā | a̱nyāmi̭ccha prapha̱rvyaṃ1 saṃ jā̱yāṃ patyā̭ sṛja ||22||
a̱nṛ̱kṣa̱rā ṛ̱java̭: santu̱ panthā̱ yebhi̱: sakhā̭yo̱ yanti̭ no vare̱yam |
sama̭rya̱mā saṃ bhago̭ no ninīyā̱tsaṃ jā̭spa̱tyaṃ su̱yama̭mastu devāḥ ||23||
pra tvā̭ muñcāmi̱ varṷṇasya̱ pāśā̱dyena̱ tvāba̭dhnātsavi̱tā su̱śeva̭: |
 ṛ̱tasya̱ yonaṷ sukṛ̱tasya̭ lo̱ke'ri̭ṣṭāṃ tvā sa̱ha patyā̭ dadhāmi ||24||
preto mu̱ñcāmi̱ nāmuta̭: suba̱ddhāma̱muta̭skaram | yathe̱yami̭ndra mīḍhvaḥ supu̱trā su̱bhagāsa̭ti ||25||
pū̱ṣā tve̱to na̭yatu hasta̱gṛhyā̱'śvinā̭ tvā̱ pra va̭hatā̱ṃ rathḙna |
gṛ̱hānga̭ccha gṛ̱hapa̭tnī̱ yathāso̭ va̱śinī̱ tvaṃ vi̱datha̱mā va̭dāsi ||26||
i̱ha pri̱yaṃ pra̱jayā̭ te̱ samṛ̭dhyatāma̱smingṛ̱he gārha̭patyāya jāgṛhi |
e̱nā patyā̭ ta̱nvaṃ1 saṃ sṛ̭ja̱svādhā̱ jivrī̭ vi̱datha̱mā va̭dāthaḥ ||27||
nī̱la̱lo̱hi̱taṃ bha̭vati kṛ̱tyāsa̱ktirvya̭jyate | edha̭nte asyā jñā̱taya̱: pati̭rba̱ndheṣṷ badhyate ||28||
parā̭ dehi śāmu̱lya̭ṃ bra̱hmabhyo̱ vi bha̭jā̱ vasṷ | kṛ̱tyaiṣā pa̱dvatī̭ bhū̱tvyā jā̱yā vi̭śate̱ pati̭m ||29||
a̱śrī̱rā ta̱nūrbha̭vati̱ ruśa̭tī pā̱payā̭mu̱yā | pati̱ryadva̱dhvo̱3 vāsa̭sā̱ svamaṅga̭mabhi̱dhitsa̭te ||30||
ye va̱dhva̭śca̱ndraṃ va̭ha̱tuṃ yakṣmā̱ yanti̱ janā̱danṷ | puna̱stānya̱jñiyā̭ de̱vā naya̭ntu̱ yata̱ āga̭tāḥ ||3||1
mā vi̭danparipa̱nthino̱ ya ā̱sīda̭nti̱ dampa̭tī | su̱gebhi̭rdu̱rgamatī̭tā̱mapa̭ drā̱ntvarā̭tayaḥ ||32||
su̱ma̱ṅga̱līri̱yaṃ va̱dhūri̱māṃ sa̱meta̱ paśya̭ta | saubhā̭gyamasyai da̱ttvāyā'thāsta̱ṃ vi parḙtana ||33||
tṛ̱ṣṭame̱tatkaṭṷkame̱tada̭pā̱ṣṭhava̭dvi̱ṣava̱nnaitadatta̭ve | sū̱ryāṃ yo bra̱hmā vi̱dyātsa idvādhṷ̄yamarhati ||34||
ā̱śasa̭naṃ vi̱śasa̭na̱matho̭ adhivi̱karta̭nam | sū̱ryāyā̭: paśya rū̱pāṇi̱ tāni̭ bra̱hmā tu śṷndhati ||35||
gṛ̱bhṇāmi̭ te saubhaga̱tvāya̱ hasta̱ṃ mayā̱ patyā̭ ja̱rada̭ṣṭi̱ryathāsa̭: |
 bhago̭ arya̱mā sa̭vi̱tā pura̭ṃdhi̱rmahya̭ṃ tvādu̱rgārha̭patyāya de̱vāḥ ||36||
tāṃ pṷ̄ṣañchi̱vata̭mā̱mera̭yasva̱ yasyā̱ṃ bīja̭ṃ manu̱ṣyā̱3 vapa̭nti |
yā na̭ ū̱rū ṷśa̱tī vi̱śrayā̭te̱ yasyā̭mu̱śanta̭: pra̱harā̭ma̱ śepa̭m ||37||
tubhya̱magre̱ parya̭vahantsū̱ryāṃ va̭ha̱tunā̭ sa̱ha | puna̱: pati̭bhyo jā̱yāṃ dā a̭gne pra̱jayā̭ sa̱ha ||38||
puna̱: patnī̭ma̱gnira̭dā̱dāyṷṣā sa̱ha varca̭sā | dī̱rghāyṷrasyā̱ yaḥ pati̱rjīvā̭ti śa̱rada̭: śa̱tam ||39||
soma̭: pratha̱mo vi̭vide gandha̱rvo vi̭vida̱ utta̭raḥ | tṛ̱tīyo̭ a̱gniṣṭe̱ pati̭stu̱rīya̭ste manuṣya̱jāḥ ||40||
somo̭ dadadgandha̱rvāya̭ gandha̱rvo da̭dada̱gnayḙ | ra̱yiṃ ca̭ pu̱trā~ścā̭dāda̱gnirmahya̱matho̭ i̱mām ||41||
i̱haiva sta̱ṃ mā vi yaṷṣṭa̱ṃ viśva̱māyu̱rvya̭śnutam | krīḻa̭ntau pu̱trairnaptṛ̭bhi̱rmoda̭mānau̱ sve gṛ̱he ||42||
ā na̭: pra̱jāṃ ja̭nayatu pra̱jāpa̭tirājara̱sāya̱ sama̭naktvarya̱mā |
adṷrmaṅgalīḥ patilo̱kamā vi̭śa̱ śaṃ no̭ bhava dvi̱pade̱ śaṃ catṷṣpade ||43||
agho̭racakṣu̱rapa̭tighnyedhi śi̱vā pa̱śubhya̭: su̱manā̭: su̱varcā̭: |
vī̱ra̱sūrde̱vakā̭mā syo̱nā śaṃ no̭ bhava dvi̱pade̱ śaṃ catṷṣpade ||44||
i̱māṃ tvami̭ndra mīḍhvaḥ supu̱trāṃ su̱bhagā̭ṃ kṛṇu | daśā̭syāṃ pu̱trānā dhḙhi̱ pati̭mekāda̱śaṃ kṛ̭dhi ||45||
sa̱mrājñī̱ śvaśṷre bhava sa̱mrājñī̭ śva̱śrvāṃ bha̭va | nanā̭ndari sa̱mrājñī̭ bhava sa̱mrājñī̱ adhi̭ de̱vṛṣṷ ||46||
sama̭ñjantu̱ viśvḙ de̱vāḥ samāpo̱ hṛda̭yāni nau | saṃ mā̭ta̱riśvā̱ saṃ dhā̱tā samu̱ deṣṭrī̭ dadhātu nau ||47||
(23) indraḥ, 7,13,23 aindro vṛṣākapiḥ, 2-6,9-10,15-18 indrāṇī| indraḥ| paṃktiḥ|
vi hi soto̱rasṛ̭kṣata̱ nendra̭ṃ de̱vama̭maṃsata |
yatrāma̭dadvṛ̱ṣāka̭pira̱ryaḥ pu̱ṣṭeṣu̱ matsa̭khā̱ viśva̭smā̱dindra̱ utta̭raḥ ||1||
parā̱ hī̭ndra̱ dhāva̭si vṛ̱ṣāka̭pe̱rati̱ vyathi̭: |
no aha̱ pra vi̭ndasya̱nyatra̱ soma̭pītaye̱ viśva̭smā̱dindra̱ utta̭raḥ ||2||
kima̱yaṃ tvāṃ vṛ̱ṣāka̭piśca̱kāra̱ hari̭to mṛ̱gaḥ |
yasmā̭ ira̱syasīdu̱ nva1ryo vā̭ puṣṭi̱madvasu̱ viśva̭smā̱dindra̱ utta̭raḥ ||3||
yami̱maṃ tvaṃ vṛ̱ṣāka̭piṃ pri̱yami̭ndrābhi̱rakṣa̭si |
śvā nva̭sya jambhiṣa̱dapi̱ karṇḙ varāha̱yurviśva̭smā̱dindra̱ utta̭raḥ ||4||
pri̱yā ta̱ṣṭāni̭ me ka̱pirvya̭ktā̱ vya̭dūduṣat |
śiro̱ nva̭sya rāviṣa̱ṃ na su̱gaṃ du̱ṣkṛtḙ bhuva̱ṃ viśva̭smā̱dindra̱ utta̭raḥ ||5||
na matstrī sṷbha̱satta̭rā̱ na su̱yāśṷtarā bhuvat |
na matprati̭cyavīyasī̱ na sakthyudya̭mīyasī̱ viśva̭smā̱dindra̱ utta̭raḥ ||6||
u̱ve a̭mba sulābhike̱ yathḙvā̱ṅga bha̭vi̱ṣyati̭ |
bha̱sanmḙ amba̱ sakthi̭ me̱ śiro̭ me̱ vī̭va hṛṣyati̱ viśva̭smā̱dindra̱ utta̭raḥ ||7||
kiṃ sṷbāho svaṅgure̱ pṛthṷṣṭo̱ pṛthṷjāghane |
kiṃ śṷ̄rapatni na̱stvama̱bhya̭mīṣi vṛ̱ṣāka̭pi̱ṃ viśva̭smā̱dindra̱ utta̭raḥ ||8||
a̱vīrā̭miva̱ māma̱yaṃ śa̱rārṷra̱bhi ma̭nyate |
u̱tāhama̭smi vī̱riṇīndra̭patnī ma̱rutsa̭khā̱ viśva̭smā̱dindra̱ utta̭raḥ ||9||
sa̱ṃho̱traṃ sma̭ pu̱rā nārī̱ sama̭na̱ṃ vāva̭ gacchati |
ve̱dhā ṛ̱tasya̭ vī̱riṇīndra̭patnī mahīyate̱ viśva̭smā̱dindra̱ utta̭raḥ ||10||
i̱ndrā̱ṇīmā̱su nāri̭ṣu su̱bhagā̭ma̱hama̭śravam |
na̱hya̭syā apa̱raṃ ca̱na ja̱rasā̱ mara̭te̱ pati̱rviśva̭smā̱dindra̱ utta̭raḥ ||11||
nāhami̭ndrāṇi rāraṇa̱ sakhyṷrvṛ̱ṣāka̭peṝ̱te |
yasye̱damapya̭ṃ ha̱viḥ pri̱yaṃ de̱veṣu̱ gaccha̭ti̱ viśva̭smā̱dindra̱ utta̭raḥ ||12||
vṛṣā̭kapāyi̱ reva̭ti̱ supṷtra̱ ādu̱ susnṷṣe |
ghasa̭tta̱ indra̭ u̱kṣaṇa̭: pri̱yaṃ kā̭citka̱raṃ ha̱virviśva̭smā̱dindra̱ utta̭raḥ ||13||
u̱kṣṇo hi me̱ pañca̭daśa sā̱kaṃ paca̭nti viṃśa̱tim |
u̱tāhama̭dmi̱ pīva̱ idu̱bhā ku̱kṣī pṛ̭ṇanti me̱ viśva̭smā̱dindra̱ utta̭raḥ ||14||
vṛ̱ṣa̱bho na ti̱gmaśṛ̭ṅgo̱'ntaryū̱theṣu̱ rorṷvat |
ma̱nthasta̭ indra̱ śaṃ hṛ̱de yaṃ tḙ su̱noti̭ bhāva̱yurviśva̭smā̱dindra̱ utta̭raḥ ||15||
na seśe̱ yasya̱ ramba̭te'nta̱rā sa̱kthyā̱3 kapṛ̭t |
sedī̭śe̱ yasya̭ roma̱śaṃ ni̭ṣe̱duṣo̭ vi̱jṛmbha̭te̱ viśva̭smā̱dindra̱ utta̭raḥ ||16||
na seśe̱ yasya̭ roma̱śaṃ ni̭ṣe̱duṣo̭ vi̱jṛmbha̭te |
sedī̭śe̱ yasya̱ ramba̭te'nta̱rā sa̱kthyā̱3 kapṛ̱dviśva̭smā̱dindra̱ utta̭raḥ ||17||
a̱yami̭ndra vṛ̱ṣāka̭pi̱: para̭svantaṃ ha̱taṃ vi̭dat |
a̱siṃ sū̱nāṃ nava̭ṃ ca̱rumādedha̱syāna̱ āci̭ta̱ṃ viśva̭smā̱dindra̱ utta̭raḥ ||18||
a̱yamḙmi vi̱cāka̭śadvici̱nvandāsa̱mārya̭m |
pibā̭mi pāka̱sutva̭no̱'bhi dhīra̭macākaśa̱ṃ viśva̭smā̱dindra̱ utta̭raḥ ||19||
dhanva̭ ca̱ yatkṛ̱ntatra̭ṃ ca̱ kati̭ svi̱ttā vi yoja̭nā |
nedī̭yaso vṛṣāka̱pe'sta̱mehi̭ gṛ̱hā~ upa̱ viśva̭smā̱dindra̱ utta̭raḥ ||20||
puna̱rehi̭ vṛṣākape suvi̱tā ka̭lpayāvahai |
ya e̱ṣa sva̭pna̱naṃśa̱no'sta̱meṣi̭ pa̱thā puna̱rviśva̭smā̱dindra̱ utta̭raḥ ||21||
yaduda̭ñco vṛṣākape gṛ̱hami̱ndrāja̭gantana |
kva1 sya pṷlva̱gho mṛ̱gaḥ kama̭gañjana̱yopa̭no̱ viśva̭smā̱dindra̱ utta̭raḥ ||22||
parśṷrha̱ nāma̭ māna̱vī sā̱kaṃ sa̭sūva viṃśa̱tim |
bha̱draṃ bha̭la̱ tyasyā̭ abhū̱dyasyā̭ u̱dara̱māma̭ya̱dviśva̭smā̱dindra̱ utta̭raḥ ||23||
25 pāyurbhāradvājaḥ|rakṣohāgniḥ|triṣṭup , 22-25 anuṣṭup|
ra̱kṣo̱haṇa̭ṃ vā̱jina̱mā ji̭gharmi mi̱traṃ prathi̭ṣṭha̱mupa̭ yāmi̱ śarma̭ |
śiśā̭no a̱gniḥ kratṷbhi̱: sami̭ddha̱: sa no̱ divā̱ sa ri̱ṣaḥ pā̭tu̱ nakta̭m ||1||
ayo̭daṃṣṭro a̱rciṣā̭ yātu̱dhānā̱nupa̭ spṛśa jātaveda̱: sami̭ddhaḥ |
ā ji̱hvayā̱ mūra̭devānrabhasva kra̱vyādo̭ vṛ̱ktvyapi̭ dhatsvā̱san ||2||
u̱bhobha̭yāvi̱nnupa̭ dhehi̱ daṃṣṭrā̭ hi̱ṃsraḥ śiśā̱no'va̭ra̱ṃ para̭ṃ ca |
u̱tāntari̭kṣe̱ pari̭ yāhi rāja̱ñjambhai̱: saṃ dhḙhya̱bhi yā̭tu̱dhānā̭n ||3||
ya̱jñairiṣṷ̄: sa̱ṃnama̭māno agne vā̱cā śa̱lyā~ a̱śani̭bhirdihā̱naḥ |
tābhi̭rvidhya̱ hṛda̭ye yātu̱dhānā̭npratī̱co bā̱hūnprati̭ bhaṅdhyeṣām ||4||
agne̱ tvaca̭ṃ yātu̱dhāna̭sya bhindhi hi̱ṃsrāśani̱rhara̭sā hantvenam |
 pra parvā̭ṇi jātavedaḥ śṛṇīhi kra̱vyātkra̭vi̱ṣṇurvi ci̭notu vṛ̱kṇam ||5||
yatre̱dānī̱ṃ paśya̭si jātaveda̱stiṣṭha̭ntamagna u̱ta vā̱ cara̭ntam |
yadvā̱ntari̭kṣe pa̱thibhi̱: pata̭nta̱ṃ tamastā̭ vidhya̱ śarvā̱ śiśā̭naḥ ||6||
u̱tāla̭bdhaṃ spṛṇuhi jātaveda ālebhā̱nādṛ̱ṣṭibhi̭ryātu̱dhānā̭t |
agne̱ pūrvo̱ ni ja̭hi̱ śośṷcāna ā̱māda̱: kṣviṅkā̱stama̭da̱ntvenī̭: ||7||
i̱ha pra brṷ̄hi yata̱maḥ so a̭gne̱ yo yā̭tu̱dhāno̱ ya i̱daṃ kṛ̱ṇoti̭ |
tamā ra̭bhasva sa̱midhā̭ yaviṣṭha nṛ̱cakṣa̭sa̱ścakṣṷṣe randhayainam ||8||
tī̱kṣṇenā̭gne̱ cakṣṷṣā rakṣa ya̱jñaṃ prāñca̱ṃ vasṷbhya̱: pra ṇa̭ya pracetaḥ |
hi̱ṃsraṃ rakṣā̭ṃsya̱bhi śośṷcāna̱ṃ mā tvā̭ dabhanyātu̱dhānā̭ nṛcakṣaḥ ||9||
nṛ̱cakṣā̱ rakṣa̱: pari̭ paśya vi̱kṣu tasya̱ trīṇi̱ prati̭ śṛṇī̱hyagrā̭ |
tasyā̭gne pṛ̱ṣṭīrhara̭sā śṛṇīhi tre̱dhā mūla̭ṃ yātu̱dhāna̭sya vṛśca ||10||
triryā̭tu̱dhāna̱: prasi̭tiṃ ta etvṛ̱taṃ yo a̭gne̱ anṛ̭tena̱ hanti̭ |
 tama̱rciṣā̭ sphū̱rjaya̭ñjātavedaḥ sama̱kṣamḙnaṃ gṛṇa̱te ni vṛ̭ṅdhi ||11||
tada̭gne̱ cakṣu̱: prati̭ dhehi re̱bhe śa̭phā̱ruja̱ṃ yena̱ paśya̭si yātu̱dhāna̭m |
a̱tha̱rva̱vajjyoti̭ṣā̱ daivyḙna sa̱tyaṃ dhūrva̭ntama̱cita̱ṃ nyo̭ṣa ||12||
yada̭gne a̱dya mi̭thu̱nā śapā̭to̱ yadvā̱castṛ̱ṣṭaṃ ja̱naya̭nta re̱bhāḥ |
ma̱nyormana̭saḥ śara̱vyā̱3 jāya̭te̱ yā tayā̭ vidhya̱ hṛda̭ye yātu̱dhānā̭n ||13||
parā̭ śṛṇīhi̱ tapa̭sā yātu̱dhānā̱nparā̭gne̱ rakṣo̱ hara̭sā śṛṇīhi |
parā̱rciṣā̱ mūra̭devāñchṛṇīhi̱ parā̭su̱tṛpo̭ a̱bhi śośṷcānaḥ ||14||
parā̱dya de̱vā vṛ̭ji̱naṃ śṛ̭ṇantu pra̱tyagḙnaṃ śa̱pathā̭ yantu tṛ̱ṣṭāḥ |
vā̱cāstḙna̱ṃ śara̭va ṛcchantu̱ marma̱nviśva̭syaitu̱ prasi̭tiṃ yātu̱dhāna̭: ||15||
yaḥ paurṷṣeyeṇa kra̱viṣā̭ sama̱ṅkte yo aśvyḙna pa̱śunā̭ yātu̱dhāna̭: |
yo a̱ghnyāyā̱ bhara̭ti kṣī̱rama̭gne̱ teṣā̭ṃ śī̱rṣāṇi̱ hara̱sāpi̭ vṛśca ||16||
sa̱ṃva̱tsa̱rīṇa̱ṃ paya̭ u̱sriyā̭yā̱stasya̱ māśī̭dyātu̱dhāno̭ nṛcakṣaḥ |
pī̱yūṣa̭magne yata̱mastitṛ̭psā̱ttaṃ pra̱tyañca̭ma̱rciṣā̭ vidhya̱ marma̭n ||17||
vi̱ṣaṃ gavā̭ṃ yātu̱dhānā̭: piba̱ntvā vṛ̭ścyantā̱madi̭taye du̱revā̭: |
parai̭nānde̱vaḥ sa̭vi̱tā da̭dātu̱ parā̭ bhā̱gamoṣa̭dhīnāṃ jayantām ||18||
sa̱nāda̭gne mṛṇasi yātu̱dhānā̱nna tvā̱ rakṣā̭ṃsi̱ pṛta̭nāsu jigyuḥ |
anṷ daha sa̱hamṷ̄rānkra̱vyādo̱ mā tḙ he̱tyā mṷkṣata̱ daivyā̭yāḥ ||19||
tvaṃ no̭ agne adha̱rāduda̭ktā̱ttvaṃ pa̱ścādu̱ta ra̭kṣā pu̱rastā̭t |
prati̱ te tḙ a̱jarā̭sa̱stapi̭ṣṭhā a̱ghaśa̭ṃsa̱ṃ śośṷcato dahantu ||20||
pa̱ścātpu̱rastā̭dadha̱rāduda̭ktātka̱viḥ kāvyḙna̱ pari̭ pāhi rājan |
sakhe̱ sakhā̭yama̱jaro̭ jari̱mṇe'gne̱ martā̱~ ama̭rtya̱stvaṃ na̭: ||21||
pari̭ tvāgne̱ pura̭ṃ va̱yaṃ vipra̭ṃ sahasya dhīmahi | dhṛ̱ṣadva̭rṇaṃ di̱vedi̭ve ha̱ntāra̭ṃ bhaṅgu̱rāva̭tām ||22||
vi̱ṣeṇa̭ bhaṅgu̱rāva̭ta̱: prati̭ ṣma ra̱kṣaso̭ daha | agnḙ ti̱gmena̭ śo̱ciṣā̱ tapṷragrābhiṝ̱ṣṭibhi̭: ||23||
pratya̭gne mithu̱nā da̭ha yātu̱dhānā̭ kimī̱dinā̭ | saṃ tvā̭ śiśāmi jāgṛ̱hyada̭bdhaṃ vipra̱ manma̭bhiḥ ||24||
pratya̭gne̱ hara̭sā̱ hara̭: śṛṇī̱hi vi̱śvata̱: prati̭ | yā̱tu̱dhāna̭sya ra̱kṣaso̱ bala̱ṃ vi rṷja vī̱rya̭m ||25||
19 āṃgiraso mūrdhanvān , vāmadevyo vā| sūrya-vaiśvānaro'gniḥ| triṣṭup|
ha̱viṣpānta̭ma̱jara̭ṃ sva̱rvidi̭ divi̱spṛśyāhṷta̱ṃ juṣṭa̭ma̱gnau |
tasya̱ bharma̭ṇe̱ bhuva̭nāya de̱vā dharma̭ṇe̱ kaṃ sva̱dhayā̭ paprathanta ||1||
gī̱rṇaṃ bhuva̭na̱ṃ tama̱sāpa̭gūḻhamā̱viḥ sva̭rabhavajjā̱te a̱gnau |
tasya̭ de̱vāḥ pṛ̭thi̱vī dyauru̱tāpo'ra̭ṇaya̱nnoṣa̭dhīḥ sa̱khye a̭sya ||2||
de̱vebhi̱rnvi̭ṣi̱to ya̱jñiyḙbhira̱gniṃ sto̭ṣāṇya̱jara̭ṃ bṛ̱hanta̭m |
yo bhā̱nunā̭ pṛthi̱vīṃ dyāmu̱temāmā̭ta̱tāna̱ roda̭sī a̱ntari̭kṣam ||3||
yo hotāsī̭tpratha̱mo de̱vajṷṣṭo̱ yaṃ sa̱māñja̱nnājyḙnā vṛṇā̱nāḥ |
sa pa̭ta̱trī̭tva̱raṃ sthā jaga̱dyacchvā̱trama̱gnira̭kṛṇojjā̱tavḙdāḥ ||4||
yajjā̭tavedo̱ bhuva̭nasya mū̱rdhannati̭ṣṭho agne sa̱ha ro̭ca̱nena̭ |
taṃ tvā̭hema ma̱tibhi̭rgī̱rbhiru̱kthaiḥ sa ya̱jñiyo̭ abhavo rodasi̱prāḥ ||5||
mū̱rdhā bhu̱vo bha̭vati̱ nakta̭ma̱gnistata̱: sūryo̭ jāyate prā̱taru̱dyan |
mā̱yāmū̱ tu ya̱jñiyā̭nāme̱tāmapo̱ yattūrṇi̱ścara̭ti prajā̱nan ||6||
dṛ̱śenyo̱ yo ma̭hi̱nā sami̱ddho'ro̭cata di̱viyo̭nirvi̱bhāvā̭ |
tasmi̭nna̱gnau sṷ̄ktavā̱kena̭ de̱vā ha̱virviśva̱ ājṷhavustanū̱pāḥ ||7||
sū̱kta̱vā̱kaṃ pra̭tha̱mamādida̱gnimādiddha̱vira̭janayanta de̱vāḥ |
 sa ḙṣāṃ ya̱jño a̭bhavattanū̱pāstaṃ dyaurvḙda̱ taṃ pṛ̭thi̱vī tamāpa̭: ||8||
yaṃ de̱vāso'ja̭nayantā̱gniṃ yasmi̱nnājṷhavu̱rbhuva̭nāni̱ viśvā̭ |
so a̱rciṣā̭ pṛthi̱vīṃ dyāmu̱temāmṛ̭jū̱yamā̭no atapanmahi̱tvā ||9||
stomḙna̱ hi di̱vi de̱vāso̭ a̱gnimajī̭jana̱ñchakti̭bhī rodasi̱prām |
tamṷ̄ akṛṇvantre̱dhā bhu̱ve kaṃ sa oṣa̭dhīḥ pacati vi̱śvarṷ̄pāḥ ||10||
ya̱dedḙna̱mada̭dhurya̱jñiyā̭so di̱vi de̱vāḥ sūrya̭mādite̱yam |
ya̱dā ca̭ri̱ṣṇū mi̭thu̱nāvabhṷ̄tā̱māditprāpa̭śya̱nbhuva̭nāni̱ viśvā̭ ||11||
viśva̭smā a̱gniṃ bhuva̭nāya de̱vā vai̭śvāna̱raṃ ke̱tumahnā̭makṛṇvan |
ā yasta̱tāno̱ṣaso̭ vibhā̱tīrapo̭ ūrṇoti̱ tamo̭ a̱rciṣā̱ yan ||12||
vai̱śvā̱na̱raṃ ka̱vayo̭ ya̱jñiyā̭so̱'gniṃ de̱vā a̭janayannaju̱ryam |
nakṣa̭traṃ pra̱tnamami̭naccari̱ṣṇu ya̱kṣasyādhya̭kṣaṃ tavi̱ṣaṃ bṛ̱hanta̭m ||13||
vai̱śvā̱na̱raṃ vi̱śvahā̭ dīdi̱vāṃsa̱ṃ mantrai̭ra̱gniṃ ka̱vimacchā̭ vadāmaḥ |
yo ma̭hi̱mnā pa̭riba̱bhūvo̱rvī u̱tāvastā̭du̱ta de̱vaḥ pa̱rastā̭t ||14||
dve sru̱tī a̭śṛṇavaṃ pitṝ̱ṇāma̱haṃ de̱vānā̭mu̱ta martyā̭nām |
tābhyā̭mi̱daṃ viśva̱meja̱tsamḙti̱ yada̭nta̱rā pi̱tara̭ṃ mā̱tara̭ṃ ca ||15||
dve sa̭mī̱cī bi̭bhṛta̱ścara̭ntaṃ śīrṣa̱to jā̱taṃ mana̭sā̱ vimṛ̭ṣṭam |
sa pra̱tyaṅviśvā̱ bhuva̭nāni tasthā̱vapra̭yucchanta̱raṇi̱rbhrāja̭mānaḥ ||16||
yatrā̱ vadḙte̱ ava̭ra̱: para̭śca yajña̱nyo̭: kata̱ro nau̱ vi vḙda |
ā śḙku̱ritsa̭dha̱māda̱ṃ sakhā̭yo̱ nakṣa̭nta ya̱jñaṃ ka i̱daṃ vi vo̭cat ||17||
katya̱gnaya̱: kati̱ sūryā̭sa̱: katyu̱ṣāsa̱: katyṷ svi̱dāpa̭: |
nopa̱spija̭ṃ vaḥ pitaro vadāmi pṛ̱cchāmi̭ vaḥ kavayo vi̱dmane̱ kam ||18||
yā̱va̱nmā̱tramu̱ṣaso̱ na pratī̭kaṃ supa̱rṇyo̱3 vasa̭te mātariśvaḥ |
tāva̭ddadhā̱tyupa̭ ya̱jñamā̱yanbrā̭hma̱ṇo hotu̱rava̭ro ni̱ṣīda̭n ||19||
18  reṇurvaiśvāmitraḥ| indraḥ, 5 indrāsomau| triṣṭup|
indra̭ṃ stavā̱ nṛta̭ma̱ṃ yasya̭ ma̱hnā vi̭babā̱dhe ro̭ca̱nā vi jmo antā̭n |
ā yaḥ pa̱prau ca̭rṣaṇī̱dhṛdvaro̭bhi̱: pra sindhṷbhyo riricā̱no ma̭hi̱tvā ||1||
sa sūrya̱: paryu̱rū varā̱ṃsyendro̭ vavṛtyā̱drathyḙva ca̱krā |
ati̭ṣṭhantamapa̱syaṃ1 na sarga̭ṃ kṛ̱ṣṇā tamā̭ṃsi̱ tviṣyā̭ jaghāna ||2||
sa̱mā̱nama̭smā̱ ana̭pāvṛdarca kṣma̱yā di̱vo asa̭ma̱ṃ brahma̱ navya̭m |
vi yaḥ pṛ̱ṣṭheva̱ jani̭mānya̱rya indra̭ści̱kāya̱ na sakhā̭yamī̱ṣe ||3||
indrā̭ya̱ giro̱ ani̭śitasargā a̱paḥ prera̭ya̱ṃ saga̭rasya bu̱dhnāt |
yo akṣḙṇeva ca̱kriyā̱ śacī̭bhi̱rviṣva̭kta̱stambha̭ pṛthi̱vīmu̱ta dyām ||4||
āpā̭ntamanyustṛ̱pala̭prabharmā̱ dhuni̱: śimī̭vā̱ñcharṷmā~ ṛjī̱ṣī |
somo̱ viśvā̭nyata̱sā vanā̭ni̱ nārvāgindra̭ṃ prati̱mānā̭ni debhuḥ ||5||
na yasya̱ dyāvā̭pṛthi̱vī na dhanva̱ nāntari̭kṣa̱ṃ nādra̭ya̱: somo̭ akṣāḥ |
yada̭sya ma̱nyura̭dhinī̱yamā̭naḥ śṛ̱ṇāti̭ vī̱ḻu ru̱jati̭ sthi̱rāṇi̭ ||6||
ja̱ghāna̭ vṛ̱traṃ svadhi̭ti̱rvanḙva ru̱roja̱ puro̱ ara̭da̱nna sindhṷ̄n |
bi̱bheda̭ gi̱riṃ nava̱minna ku̱mbhamā gā indro̭ akṛṇuta sva̱yugbhi̭: ||7||
tvaṃ ha̱ tyadṛ̭ṇa̱yā i̭ndra̱ dhīro̱'sirna parva̭ vṛji̱nā śṛ̭ṇāsi |
pra ye mi̱trasya̱ varṷṇasya̱ dhāma̱ yuja̱ṃ na janā̭ mi̱nanti̭ mi̱tram ||8||
pra ye mi̱traṃ prārya̱maṇa̭ṃ du̱revā̱: pra sa̱ṃgira̱: pra varṷṇaṃ mi̱nanti̭ |
 nya1mitrḙṣu va̱dhami̭ndra̱ tumra̱ṃ vṛṣa̱nvṛṣā̭ṇamaru̱ṣaṃ śi̭śīhi ||9||
indro̭ di̱va indra̭ īśe pṛthi̱vyā indro̭ a̱pāmindra̱ itparva̭tānām |
indro̭ vṛ̱dhāmindra̱ inmedhi̭rāṇā̱mindra̱: kṣeme̱ yoge̱ havya̱ indra̭: ||10||
prāktubhya̱ indra̱: pra vṛ̱dho aha̭bhya̱: prāntari̭kṣā̱tpra sa̭mu̱drasya̭ dhā̱seḥ |
 pra vāta̭sya̱ pratha̭sa̱: pra jmo antā̱tpra sindhṷbhyo ririce̱ pra kṣi̱tibhya̭: ||11||
pra śośṷcatyā u̱ṣaso̱ na ke̱tura̭si̱nvā tḙ vartatāmindra he̱tiḥ |
aśmḙva vidhya di̱va ā sṛ̭jā̱nastapi̭ṣṭhena̱ heṣa̭sā̱ drogha̭mitrān ||12||
anvaha̱ māsā̱ anvidvanā̱nyanvoṣa̭dhī̱ranu̱ parva̭tāsaḥ |
anvindra̱ṃ roda̭sī vāvaśā̱ne anvāpo̭ ajihata̱ jāya̭mānam ||13||
karhi̭ svi̱tsā ta̭ indra ce̱tyāsa̭da̱ghasya̱ yadbhi̱nado̱ rakṣa̱ eṣa̭t |
mi̱tra̱kruvo̱ yacchasa̭ne̱ na gāva̭: pṛthi̱vyā ā̱pṛga̭mu̱yā śaya̭nte ||14||
śa̱trū̱yanto̭ a̱bhi ye na̭stata̱sre mahi̱ vrādha̭nta oga̱ṇāsa̭ indra |
a̱ndhenā̱mitrā̱stama̭sā sacantāṃ sujyo̱tiṣo̭ a̱ktava̱stā~ a̱bhi ṣyṷ: ||15||
pu̱rūṇi̱ hi tvā̱ sava̭nā̱ janā̭nā̱ṃ brahmā̭ṇi̱ manda̭ngṛṇa̱tāmṛṣī̭ṇām |
i̱māmā̱ghoṣa̱nnava̭sā̱ sahṷ̄tiṃ ti̱ro viśvā̱~ arca̭to yāhya̱rvāṅ ||16||
e̱vā tḙ va̱yami̭ndra bhuñjatī̱nāṃ vi̱dyāma̭ sumatī̱nāṃ navā̭nām |
vi̱dyāma̱ vasto̱rava̭sā gṛ̱ṇanto̭ vi̱śvāmi̭trā u̱ta ta̭ indra nū̱nam ||17||
śu̱naṃ hṷvema ma̱ghavā̭na̱mindra̭ma̱sminbhare̱ nṛta̭ma̱ṃ vāja̭sātau |
 śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||18||
16  nārāyaṇaḥ| puruṣaḥ| anuṣṭup , 16 triṣṭup|
sa̱hasra̭śīrṣā̱ purṷṣaḥ sahasrā̱kṣaḥ sa̱hasra̭pāt | sa bhūmi̭ṃ vi̱śvato̭ vṛ̱tvā'tya̭tiṣṭhaddaśāṅgu̱lam ||1||
purṷṣa e̱vedaṃ sarva̱ṃ yadbhū̱taṃ yacca̱ bhavya̭m | u̱tāmṛ̭ta̱tvasyeśā̭no̱ yadannḙnāti̱roha̭ti ||2||
e̱tāvā̭nasya mahi̱mā'to̱ jyāyā̭~śca̱ pūrṷṣaḥ | pādo̭'sya̱ viśvā̭ bhū̱tāni̭ tri̱pāda̭syā̱mṛta̭ṃ di̱vi ||3||
tri̱pādū̱rdhva udai̱tpurṷṣa̱: pādo̭'sye̱hābha̭va̱tpuna̭: | tato̱ viṣva̱ṅvya̭krāmatsāśanānaśa̱ne a̱bhi ||4||
tasmā̭dvi̱rāḻa̭jāyata vi̱rājo̱ adhi̱ pūrṷṣaḥ | sa jā̱to atya̭ricyata pa̱ścādbhūmi̱matho̭ pu̱raḥ ||5||
yatpurṷṣeṇa ha̱viṣā̭ de̱vā ya̱jñamata̭nvata | va̱sa̱nto a̭syāsī̱dājya̭ṃ grī̱ṣma i̱dhmaḥ śa̱raddha̱viḥ ||6||
taṃ ya̱jñaṃ ba̱rhiṣi̱ praukṣa̱npurṷṣaṃ jā̱tama̭gra̱taḥ | tena̭ de̱vā a̭yajanta sā̱dhyā ṛṣa̭yaśca̱ ye ||7||
tasmā̭dya̱jñātsa̭rva̱huta̱: sambhṛ̭taṃ pṛṣadā̱jyam | pa̱śūntā~śca̭kre vāya̱vyā̭nāra̱ṇyāngrā̱myāśca̱ ye ||8||
tasmā̭dya̱jñātsa̭rva̱huta̱ ṛca̱: sāmā̭ni jajñire | chandā̭ṃsi jajñire̱ tasmā̱dyaju̱stasmā̭dajāyata ||9||
tasmā̱daśvā̭ ajāyanta̱ ye ke co̭bha̱yāda̭taḥ | gāvo̭ ha jajñire̱ tasmā̱ttasmā̭jjā̱tā a̭jā̱vaya̭: ||10||
yatpurṷṣa̱ṃ vyada̭dhuḥ kati̱dhā vya̭kalpayan | mukha̱ṃ kima̭sya̱ kau bā̱hū kā ū̱rū pādā̭ ucyete ||11||
brā̱hma̱ṇo̭'sya̱ mukha̭māsīdbā̱hū rā̭ja̱nya̭: kṛ̱taḥ | ū̱rū tada̭sya̱ yadvaiśya̭: pa̱dbhyāṃ śū̱dro a̭jāyata ||12||
ca̱ndramā̱ mana̭so jā̱taścakṣo̱: sūryo̭ ajāyata | mukhā̱dindra̭ścā̱gniśca̭ prā̱ṇādvā̱yura̭jāyata ||13||
nābhyā̭ āsīda̱ntari̭kṣaṃ śī̱rṣṇo dyauḥ sama̭vartata | pa̱dbhyāṃ bhūmi̱rdiśa̱: śrotrā̱ttathā̭ lo̱kā~ a̭kalpayan ||14||
sa̱ptāsyā̭sanpari̱dhaya̱striḥ sa̱pta sa̱midha̭: kṛ̱tāḥ | de̱vā yadya̱jñaṃ ta̭nvā̱nā aba̭dhna̱npurṷṣaṃ pa̱śum ||15||
ya̱jñena̭ ya̱jñama̭yajanta de̱vāstāni̱ dharmā̭ṇi pratha̱mānyā̭san |
te ha̱ nāka̭ṃ mahi̱māna̭: sacanta̱ yatra̱ pūrvḙ sā̱dhyāḥ santi̭ de̱vāḥ ||16||
15 aruṇo vaitahavyaḥ| agniḥ| jagatī, 15 triṣṭup|
saṃ jā̭gṛ̱vadbhi̱rjara̭māṇa idhyate̱ dame̱ damṷ̄nā i̱ṣaya̭nni̱ḻaspa̱de |
 viśva̭sya̱ hotā̭ ha̱viṣo̱ varḙṇyo vi̱bhurvi̱bhāvā̭ su̱ṣakhā̭ sakhīya̱te ||1||
sa da̭rśata̱śrīrati̭thirgṛ̱hegṛ̭he̱ vanḙvane śiśriye takva̱vīri̭va |
jana̭ṃjana̱ṃ janyo̱ nāti̭ manyate̱ viśa̱ ā kṣḙti vi̱śyo̱3 viśa̭ṃviśam ||2||
su̱dakṣo̱ dakṣai̱: kratṷnāsi su̱kratu̱ragnḙ ka̱viḥ kāvyḙnāsi viśva̱vit |
vasu̱rvasṷ̄nāṃ kṣayasi̱ tvameka̱ iddyāvā̭ ca̱ yāni̭ pṛthi̱vī ca̱ puṣya̭taḥ ||3||
pra̱jā̱nanna̭gne̱ tava̱ yoni̭mṛ̱tviya̱miḻā̭yāspa̱de ghṛ̱tava̭nta̱māsa̭daḥ |
ā tḙ cikitra u̱ṣasā̭mi̱veta̭yo're̱pasa̱: sūrya̭syeva ra̱śmaya̭: ||4||
tava̱ śriyo̭ va̱rṣya̭syeva vi̱dyuta̭ści̱trāści̭kitra u̱ṣasā̱ṃ na ke̱tava̭: |
yadoṣa̭dhīra̱bhisṛ̭ṣṭo̱ vanā̭ni ca̱ pari̭ sva̱yaṃ ci̭nu̱ṣe anna̭mā̱syḙ ||5||
tamoṣa̭dhīrdadhire̱ garbha̭mṛ̱tviya̱ṃ tamāpo̭ a̱gniṃ ja̭nayanta mā̱tara̭: |
tamitsa̭mā̱naṃ va̱nina̭śca vī̱rudho̱'ntarva̭tīśca̱ suva̭te ca vi̱śvahā̭ ||6||
vāto̭padhūta iṣi̱to vaśā̱~ anṷ tṛ̱ṣu yadannā̱ vevi̭ṣadvi̱tiṣṭha̭se |
ā tḙ yatante ra̱thyo̱3 yathā̱ pṛtha̱kchardhā̭ṃsyagne a̱jarā̭ṇi̱ dhakṣa̭taḥ ||7||
me̱dhā̱kā̱raṃ vi̱datha̭sya pra̱sādha̭nama̱gniṃ hotā̭raṃ pari̱bhūta̭maṃ ma̱tim |
tamidarbhḙ ha̱viṣyā sa̭mā̱namittaminma̱he vṛ̭ṇate̱ nānyaṃ tvat ||8||
tvāmidatra̭ vṛṇate tvā̱yavo̱ hotā̭ramagne vi̱dathḙṣu ve̱dhasa̭: |
yaddḙva̱yanto̱ dadha̭ti̱ prayā̭ṃsi te ha̱viṣma̭nto̱ mana̭vo vṛ̱ktaba̭rhiṣaḥ ||9||
tavā̭gne ho̱traṃ tava̭ po̱tramṛ̱tviya̱ṃ tava̭ ne̱ṣṭraṃ tvama̱gnidṛ̭tāya̱taḥ |
tava̭ praśā̱straṃ tvama̭dhvarīyasi bra̱hmā cāsi̭ gṛ̱hapa̭tiśca no̱ damḙ ||10||
yastubhya̭magne a̱mṛtā̭ya̱ martya̭: sa̱midhā̱ dāśa̭du̱ta vā̭ ha̱viṣkṛ̭ti |
tasya̱ hotā̭ bhavasi̱ yāsi̭ dū̱tya1mupa̭ brūṣe̱ yaja̭syadhvarī̱yasi̭ ||11||
i̱mā a̭smai ma̱tayo̱ vāco̭ a̱smadā~ ṛco̱ gira̭: suṣṭu̱taya̱: sama̭gmata |
va̱sū̱yavo̱ vasa̭ve jā̱tavḙdase vṛ̱ddhāsṷ ci̱dvardha̭no̱ yāsṷ cā̱kana̭t ||12||
i̱māṃ pra̱tnāya̭ suṣṭu̱tiṃ navī̭yasīṃ vo̱ceya̭masmā uśa̱te śṛ̱ṇotṷ naḥ |
 bhū̱yā anta̭rā hṛ̱dya̭sya ni̱spṛśḙ jā̱yeva̱ patya̭ uśa̱tī su̱vāsā̭: ||13||
yasmi̱nnaśvā̭sa ṛṣa̱bhāsa̭ u̱kṣaṇo̭ va̱śā me̱ṣā a̭vasṛ̱ṣṭāsa̱ āhṷtāḥ |
kī̱lā̱la̱pe soma̭pṛṣṭhāya ve̱dhasḙ hṛ̱dā ma̱tiṃ ja̭naye̱ cārṷma̱gnayḙ ||14||
ahā̭vyagne ha̱virā̱syḙ te sru̱cī̭va ghṛ̱taṃ ca̱mvī̭va̱ soma̭: |
vā̱ja̱sani̭ṃ ra̱yima̱sme su̱vīra̭ṃ praśa̱staṃ dhḙhi ya̱śasa̭ṃ bṛ̱hanta̭m ||15||
15 śāryāto mānavaḥ| viśvedevāḥ| jagatī|
ya̱jñasya̭ vo ra̱thya̭ṃ vi̱śpati̭ṃ vi̱śāṃ hotā̭rama̱ktorati̭thiṃ vi̱bhāva̭sum |
śoca̱ñchuṣkā̭su̱ hari̭ṇīṣu̱ jarbhṷra̱dvṛṣā̭ ke̱turya̭ja̱to dyāma̭śāyata ||1||
i̱mama̭ñja̱spāmu̱bhayḙ akṛṇvata dha̱rmāṇa̭ma̱gniṃ vi̱datha̭sya̱ sādha̭nam |
a̱ktuṃ na ya̱hvamu̱ṣasa̭: pu̱rohi̭ta̱ṃ tanū̱napā̭tamaru̱ṣasya̭ niṃsate ||2||
baḻa̭sya nī̱thā vi pa̱ṇeśca̭ manmahe va̱yā a̭sya̱ prahṷtā āsu̱ratta̭ve |
ya̱dā gho̱rāso̭ amṛta̱tvamāśa̱tādijjana̭sya̱ daivya̭sya carkiran ||3||
ṛ̱tasya̱ hi prasi̭ti̱rdyauru̱ru vyaco̱ namo̭ ma̱hya1rama̭ti̱: panī̭yasī |
indro̭ mi̱tro varṷṇa̱: saṃ ci̭kitri̱re'tho̱ bhaga̭: savi̱tā pū̱tada̭kṣasaḥ ||4||
pra ru̱dreṇa̭ ya̱yinā̭ yanti̱ sindha̭vasti̱ro ma̱hīma̱rama̭tiṃ dadhanvire |
yebhi̱: pari̭jmā pari̱yannu̱ru jrayo̱ vi rorṷvajja̱ṭhare̱ viśva̭mu̱kṣatḙ ||5||
krā̱ṇā ru̱drā ma̱ruto̭ vi̱śvakṛ̭ṣṭayo di̱vaḥ śye̱nāso̱ asṷrasya nī̱ḻaya̭: |
tebhi̭ścaṣṭe̱ varṷṇo mi̱tro a̭rya̱mendro̭ de̱vebhi̭rarva̱śebhi̱rarva̭śaḥ ||6||
indre̱ bhuja̭ṃ śaśamā̱nāsa̭ āśata̱ sūro̱ dṛśī̭ke̱ vṛṣa̭ṇaśca̱ pauṃsyḙ |
pra ye nva̭syā̱rhaṇā̭ tatakṣi̱re yuja̱ṃ vajra̭ṃ nṛ̱ṣada̭neṣu kā̱rava̭: ||7||
sūra̭ści̱dā ha̱rito̭ asya rīrama̱dindrā̱dā kaści̭dbhayata̱ja tavī̭yasaḥ |
bhī̱masya̱ vṛṣṇo̭ ja̱ṭharā̭dabhi̱śvaso̭ di̱vedi̭ve̱ sahṷriḥ sta̱nnabā̭dhitaḥ ||8||
stoma̭ṃ vo a̱dya ru̱drāya̱ śikva̭se kṣa̱yadvī̭rāya̱ nama̭sā didiṣṭana |
yebhi̭: śi̱vaḥ svavā̭~ eva̱yāva̭bhirdi̱vaḥ siṣa̭kti̱ svaya̭śā̱ nikā̭mabhiḥ ||9||
te hi pra̱jāyā̱ abha̭ranta̱ vi śravo̱ bṛha̱spati̭rvṛṣa̱bhaḥ soma̭jāmayaḥ |
ya̱jñairatha̭rvā pratha̱mo vi dhā̭rayadde̱vā dakṣai̱rbhṛga̭va̱: saṃ ci̭kitrire ||10||
te hi dyāvā̭pṛthi̱vī bhūri̭retasā̱ narā̱śaṃsa̱ścatṷraṅgo ya̱mo'di̭tiḥ |
de̱vastvaṣṭā̭ draviṇo̱dā ṛ̭bhu̱kṣaṇa̱: pra ro̭da̱sī ma̱ruto̱ viṣṇṷrarhire ||11||
u̱ta sya na̭ u̱śijā̭murvi̱yā ka̱virahi̭: śṛṇotu bu̱dhnyo̱3 havī̭mani |
sūryā̱māsā̭ vi̱cara̭ntā divi̱kṣitā̭ dhi̱yā śa̭mīnahuṣī a̱sya bo̭dhatam ||12||
pra na̭: pū̱ṣā ca̱ratha̭ṃ vi̱śvadḙvyo̱'pāṃ napā̭davatu vā̱yuri̱ṣṭayḙ |
ā̱tmāna̱ṃ vasyo̭ a̱bhi vāta̭marcata̱ tada̭śvinā suhavā̱ yāma̭ni śrutam ||13||
vi̱śāmā̱sāmabha̭yānāmadhi̱kṣita̭ṃ gī̱rbhiru̱ svaya̭śasaṃ gṛṇīmasi |
gnābhi̱rviśvā̭bhi̱radi̭timana̱rvaṇa̭ma̱ktoryuvā̭naṃ nṛ̱maṇā̱ adhā̱ pati̭m ||14||
rebha̱datra̭ ja̱nuṣā̱ pūrvo̱ aṅgi̭rā̱ grāvā̭ṇa ū̱rdhvā a̱bhi ca̭kṣuradhva̱ram |
yebhi̱rvihā̭yā̱ abha̭vadvicakṣa̱ṇaḥ pātha̭: su̱meka̱ṃ svadhi̭ti̱rvana̭nvati ||15||
15 tānvaḥ pārthyaḥ| viśvedevāḥ| prastārapaṃktiḥ 2,3,13 anuṣṭup , 9 akṣaraiḥ paṃktiḥ, 11 nyaṅkusāriṇī, 15 purastādbṛhatī |
mahi̭ dyāvāpṛthivī bhūtamu̱rvī nārī̭ ya̱hvī na roda̭sī̱ sada̭ṃ naḥ | tebhi̭rnaḥ pāta̱ṃ sahya̭sa e̱bhirna̭: pātaṃ śū̱ṣaṇi̭ ||1||
ya̱jñeya̭jñe̱ sa martyo̭ de̱vāntsa̭paryati | yaḥ su̱mnairdī̭rgha̱śrutta̭ma ā̱vivā̭satyenān ||2||
viśvḙṣāmirajyavo de̱vānā̱ṃ vārma̱haḥ | viśve̱ hi vi̱śvama̭haso̱ viśvḙ ya̱jñeṣṷ ya̱jñiyā̭: ||3||
te ghā̱ rājā̭no a̱mṛta̭sya ma̱ndrā a̭rya̱mā mi̱tro varṷṇa̱: pari̭jmā | kadru̱dro nṛ̱ṇāṃ stu̱to ma̱ruta̭: pū̱ṣaṇo̱ bhaga̭: ||4||
u̱ta no̱ nakta̭ma̱pāṃ vṛ̭ṣaṇvasū̱ sūryā̱māsā̱ sada̭nāya sadha̱nyā̭ | sacā̱ yatsādyḙṣā̱mahi̭rbu̱dhneṣṷ bu̱dhnya̭: ||5||
u̱ta no̭ de̱vāva̱śvinā̭ śu̱bhaspatī̱ dhāma̭bhirmi̱trāvarṷṇā uruṣyatām | ma̱haḥ sa rā̱ya eṣa̱te'ti̱ dhanvḙva duri̱tā ||6||
u̱ta no̭ ru̱drā ci̭nmṛḻatāma̱śvinā̱ viśvḙ de̱vāso̱ ratha̱spati̱rbhaga̭: | ṛ̱bhurvāja̭ ṛbhukṣaṇa̱: pari̭jmā viśvavedasaḥ ||7||
ṛ̱bhuṝ̭bhu̱kṣā ṛ̱bhurvi̭dha̱to mada̱ ā te̱ harī̭ jūjuvā̱nasya̭ vā̱jinā̭ | du̱ṣṭara̱ṃ yasya̱ sāma̭ ci̱dṛdha̭gya̱jño na mānṷṣaḥ ||8||
kṛ̱dhī no̱ ahra̭yo deva savita̱: sa ca̭ stuṣe ma̱ghonā̭m |
sa̱ho na̱ indro̱ vahni̭bhi̱rnyḙṣāṃ carṣaṇī̱nāṃ ca̱kraṃ ra̱śmiṃ na yo̭yuve ||9||
aiṣṷ dyāvāpṛthivī dhātaṃ ma̱hada̱sme vī̱reṣṷ vi̱śvaca̭rṣaṇi̱ śrava̭: | pṛ̱kṣaṃ vāja̭sya sā̱tayḙ pṛ̱kṣaṃ rā̱yota tu̱rvaṇḙ ||10||
e̱taṃ śaṃsa̭mindrāsma̱yuṣṭvaṃ kūci̱tsanta̭ṃ sahasāvanna̱bhiṣṭa̭ye | sadā̭ pāhya̱bhiṣṭa̭ye me̱datā̭ṃ ve̱datā̭ vaso ||11||
e̱taṃ me̱ stoma̭ṃ ta̱nā na sūryḙ dyu̱tadyā̭mānaṃ vāvṛdhanta nṛ̱ṇām | sa̱ṃvana̭na̱ṃ nāśvya̱ṃ taṣṭe̱vāna̭pacyutam ||12||
vā̱varta̱ yeṣā̭ṃ rā̱yā yu̱ktaiṣā̭ṃ hira̱ṇyayī̭ | ne̱madhi̭tā̱ na pauṃsyā̱ vṛthḙva vi̱ṣṭāntā̭ ||13||
pra taddu̱:śīme̱ pṛtha̭vāne ve̱ne pra rā̱me vo̭ca̱masṷre ma̱ghava̭tsu | ye yu̱ktvāya̱ pañca̭ śa̱tāsma̱yu pa̱thā vi̱śrāvyḙṣām ||14||
adhīnnvatra̭ sapta̱tiṃ ca̭ sa̱pta ca̭ | sa̱dyo di̭diṣṭa̱ tānva̭: sa̱dyo di̭diṣṭa pā̱rthyaḥ sa̱dyo di̭diṣṭa māya̱vaḥ ||15||
14 arbudaḥ kādraveyaḥ sarpaḥ| grāvāṇaḥ| jagatī, 5, 7, 14 triṣṭup|
praite va̭dantu̱ pra va̱yaṃ va̭dāma̱ grāva̭bhyo̱ vāca̭ṃ vadatā̱ vada̭dbhyaḥ |
yada̭drayaḥ parvatāḥ sā̱kamā̱śava̱: śloka̱ṃ ghoṣa̱ṃ bhara̱thendrā̭ya so̱mina̭: ||1||
e̱te va̭danti śa̱tava̭tsa̱hasra̭vada̱bhi kra̭ndanti̱ hari̭tebhirā̱sabhi̭: |
vi̱ṣṭvī grāvā̭ṇaḥ su̱kṛta̭: sukṛ̱tyayā̱ hotṷści̱tpūrvḙ havi̱radya̭māśata ||2||
e̱te va̭da̱ntyavi̭danna̱nā madhu̱ nyṷ̄ṅkhayante̱ adhi̭ pa̱kva āmi̭ṣi |
vṛ̱kṣasya̱ śākhā̭maru̱ṇasya̱ bapsa̭ta̱ste sūbha̭rvā vṛṣa̱bhāḥ prema̭rāviṣuḥ ||3||
bṛ̱hadva̭danti madi̱reṇa̭ ma̱ndinendra̱ṃ krośa̭nto'vidanna̱nā madhṷ |
sa̱ṃrabhyā̱ dhīrā̱: svasṛ̭bhiranartiṣurāgho̱ṣaya̭ntaḥ pṛthi̱vīmṷpa̱bdibhi̭: ||4||
su̱pa̱rṇā vāca̭makra̱topa̱ dyavyā̭kha̱re kṛṣṇā̭ iṣi̱rā a̭nartiṣuḥ |
nya1ṅni ya̱ntyupa̭rasya niṣkṛ̱taṃ pu̱rū reto̭ dadhire sūrya̱śvita̭: ||5||
u̱grā i̭va pra̱vaha̭ntaḥ sa̱māya̭muḥ sā̱kaṃ yu̱ktā vṛṣa̭ṇo̱ bibhra̭to̱ dhura̭: |
 yacchva̱santo̭ jagrasā̱nā arā̭viṣuḥ śṛ̱ṇva ḙṣāṃ pro̱thatho̱ arva̭tāmiva ||6||
daśā̭vanibhyo̱ daśa̭kakṣyebhyo̱ daśa̭yoktrebhyo̱ daśa̭yojanebhyaḥ |
daśā̭bhīśubhyo arcatā̱jarḙbhyo̱ daśa̱ dhuro̱ daśa̭ yu̱ktā vaha̭dbhyaḥ ||7||
te adra̭yo̱ daśa̭yantrāsa ā̱śava̱steṣā̭mā̱dhāna̱ṃ paryḙti harya̱tam |
ta ṷ̄ su̱tasya̭ so̱myasyāndha̭so̱ṃ'śoḥ pī̱yūṣa̭ṃ pratha̱masya̭ bhejire ||8||
te so̱mādo̱ harī̱ indra̭sya niṃsate̱ṃ'śuṃ du̱hanto̱ adhyā̭sate̱ gavi̭ |
 tebhi̭rdu̱gdhaṃ pa̭pi̱vāntso̱myaṃ madhvindro̭ vardhate̱ pratha̭te vṛṣā̱yatḙ ||9||
vṛṣā̭ vo a̱ṃśurna kilā̭ riṣātha̱neḻā̭vanta̱: sada̱mitstha̱nāśi̭tāḥ |
rai̱va̱tyeva̱ maha̭sā̱ cāra̭vaḥ sthana̱ yasya̭ grāvāṇo̱ ajṷṣadhvamadhva̱ram ||10||
tṛ̱di̱lā atṛ̭dilāso̱ adra̭yo'śrama̱ṇā aśṛ̭thitā̱ amṛ̭tyavaḥ |
 a̱nā̱tu̱rā a̱jarā̱: sthāma̭viṣṇavaḥ supī̱vaso̱ atṛ̭ṣitā̱ atṛ̭ṣṇajaḥ ||11||
dhru̱vā e̱va va̭: pi̱taro̭ yu̱geyṷge̱ kṣema̭kāmāsa̱: sada̭so̱ na yṷñjate |
a̱ju̱ryāso̭ hari̱ṣāco̭ ha̱ridra̭va̱ ā dyāṃ ravḙṇa pṛthi̱vīma̭śuśravuḥ ||12||
tadidva̭da̱ntyadra̭yo vi̱moca̭ne̱ yāma̭nnañja̱spā i̭va̱ ghedṷpa̱bdibhi̭: |
vapa̭nto̱ bīja̭miva dhānyā̱kṛta̭: pṛ̱ñcanti̱ soma̱ṃ na mi̭nanti̱ bapsa̭taḥ ||13||
su̱te a̭dhva̱re adhi̱ vāca̭makra̱tā ''krī̱ḻayo̱ na mā̱tara̭ṃ tu̱danta̭: |
vi ṣū mṷñcā suṣu̱vuṣo̭ manī̱ṣāṃ vi va̭rtantā̱madra̭ya̱ścāya̭mānāḥ ||14||
18 ailaḥ purūravāḥ| urvaśī devatā| 2,4-5,7, 11, 13, 15-16,18, urvaśī ṛṣikā| purūravā devatā| triṣṭup|
ha̱ye jāye̱ mana̭sā̱ tiṣṭha̭ ghore̱ vacā̭ṃsi mi̱śrā kṛ̭ṇavāvahai̱ nu |
na nau̱ mantrā̱ anṷditāsa e̱te maya̭skara̱npara̭tare ca̱nāha̭n ||1||
kime̱tā vā̱cā kṛ̭ṇavā̱ tavā̱haṃ prākra̭miṣamu̱ṣasā̭magri̱yeva̭ |
purṷ̄rava̱: puna̱rasta̱ṃ parḙhi durāpa̱nā vāta̭ ivā̱hama̭smi ||2||
iṣu̱rna śri̱ya i̭ṣu̱dhera̭sa̱nā go̱ṣāḥ śa̭ta̱sā na raṃhi̭: |
a̱vīre̱ kratau̱ vi da̭vidyuta̱nnorā̱ na mā̱yuṃ ci̭tayanta̱ dhuna̭yaḥ ||3||
sā vasu̱ dadha̭tī̱ śvaśṷrāya̱ vaya̱ uṣo̱ yadi̱ vaṣṭyanti̭gṛhāt |
asta̭ṃ nanakṣe̱ yasmi̭ñcā̱kandivā̱ nakta̭ṃ śnathi̱tā vai̭ta̱sena̭ ||4||
triḥ sma̱ māhna̭: śnathayo vaita̱seno̱ta sma̱ me'vya̭tyai pṛṇāsi |
purṷ̄ra̱vo'nṷ te̱ keta̭māya̱ṃ rājā̭ me vīra ta̱nva1stadā̭sīḥ ||5||
yā sṷjū̱rṇiḥ śreṇi̭: su̱mnaā̭pirhra̱deca̭kṣu̱rna gra̱nthinī̭ cara̱ṇyuḥ |
tā a̱ñjayo̭'ru̱ṇayo̱ na sa̭sruḥ śri̱ye gāvo̱ na dhe̱navo̭'navanta ||6||
sama̭smi̱ñjāya̭māna āsata̱ gnā u̱tema̭vardhanna̱dya1: svagṷ̄rtāḥ |
ma̱he yattvā̭ purūravo̱ raṇā̱yā'va̭rdhayandasyu̱hatyā̭ya de̱vāḥ ||7||
sacā̱ yadā̭su̱ jaha̭tī̱ṣvatka̱mamā̭nuṣīṣu̱ mānṷṣo ni̱ṣevḙ | apa̭ sma̱ matta̱rasa̭ntī̱ na bhu̱jyustā a̭trasanratha̱spṛśo̱ nāśvā̭: ||8||
yadā̭su̱ marto̭ a̱mṛtā̭su ni̱spṛksaṃ kṣo̱ṇībhi̱: kratṷbhi̱rna pṛ̱ṅkte |
tā ā̱tayo̱ na ta̱nva̭: śumbhata̱ svā aśvā̭so̱ na krī̱ḻayo̱ danda̭śānāḥ ||9||
vi̱dyunna yā pata̭ntī̱ davi̭dyo̱dbhara̭ntī me̱ apyā̱ kāmyā̭ni |
jani̭ṣṭo a̱po narya̱: sujā̭ta̱: prorvaśī̭ tirata dī̱rghamāyṷ: ||10||
ja̱jñi̱ṣa i̱tthā go̱pīthyā̭ya̱ hi da̱dhātha̱ tatpṷrūravo ma̱ oja̭: |
aśā̭saṃ tvā vi̱duṣī̱ sasmi̱nnaha̱nna ma̱ āśṛ̭ṇo̱: kima̱bhugva̭dāsi ||11||
ka̱dā sū̱nuḥ pi̱tara̭ṃ jā̱ta i̭cchācca̱krannāśrṷ vartayadvijā̱nan |
ko dampa̭tī̱ sama̭nasā̱ vi yṷ̄yo̱dadha̱ yada̱gniḥ śvaśṷreṣu̱ dīda̭yat ||12||
prati̭ bravāṇi va̱rtaya̭te̱ aśrṷ ca̱kranna kra̭ndadā̱dhyḙ śi̱vāyai̭ |
pra tattḙ hinavā̱ yattḙ a̱sme pare̱hyasta̭ṃ na̱hi mṷ̄ra̱ māpa̭: ||13||
su̱de̱vo a̱dya pra̱pate̱danā̭vṛtparā̱vata̭ṃ para̱māṃ ganta̱vā ṷ |
adhā̱ śayī̭ta̱ niṝ̭teru̱pasthe'dhai̭na̱ṃ vṛkā̭ rabha̱sāso̭ a̱dyuḥ ||14||
purṷ̄ravo̱ mā mṛ̭thā̱ mā pra pa̭pto̱ mā tvā̱ vṛkā̭so̱ aśi̭vāsa u kṣan |
na vai straiṇā̭ni sa̱khyāni̭ santi sālāvṛ̱kāṇā̱ṃ hṛda̭yānye̱tā ||15||
yadvirū̱pāca̭ra̱ṃ martye̱ṣvava̭sa̱ṃ rātrī̭: śa̱rada̱ścata̭sraḥ |
ghṛ̱tasya̭ sto̱kaṃ sa̱kṛdahna̭ āśnā̱ṃ tāde̱vedaṃ tā̭tṛpā̱ṇā ca̭rāmi ||16||
a̱nta̱ri̱kṣa̱prāṃ raja̭so vi̱mānī̱mupa̭ śikṣāmyu̱rvaśī̱ṃ vasi̭ṣṭhaḥ |
upa̭ tvā rā̱tiḥ sṷkṛ̱tasya̱ tiṣṭhā̱nni va̭rtasva̱ hṛda̭yaṃ tapyate me ||17||
iti̭ tvā de̱vā i̱ma ā̭huraiḻa̱ yathḙme̱tadbhava̭si mṛ̱tyuba̭ndhuḥ |
pra̱jā tḙ de̱vānha̱viṣā̭ yajāti sva̱rga u̱ tvamapi̭ mādayāse ||18||
13 barurāṃgirasaḥ, sarvaharirvā aindraḥ| hariḥ| jagatī, 12-13 triṣṭup|
pra tḙ ma̱he vi̱dathḙ śaṃsiṣa̱ṃ harī̱ pra tḙ vanve va̱nuṣo̭ harya̱taṃ mada̭m |
ghṛ̱taṃ na yo hari̭bhi̱ścāru̱ seca̭ta̱ ā tvā̭ viśantu̱ hari̭varpasa̱ṃ gira̭: ||1||
hari̱ṃ hi yoni̭ma̱bhi ye sa̱masva̭ranhi̱nvanto̱ harī̭ di̱vyaṃ yathā̱ sada̭: |
ā yaṃ pṛ̱ṇanti̱ hari̭bhi̱rna dhe̱nava̱ indrā̭ya śū̱ṣaṃ hari̭vantamarcata ||2||
so a̭sya̱ vajro̱ hari̭to̱ ya ā̭ya̱so hari̱rnikā̭mo̱ hari̱rā gabha̭styoḥ |
dyu̱mnī sṷśi̱pro hari̭manyusāyaka̱ indre̱ ni rū̱pā hari̭tā mimikṣire ||3||
di̱vi na ke̱turadhi̭ dhāyi harya̱to vi̱vyaca̱dvajro̱ hari̭to̱ na raṃhyā̭ |
tu̱dadahi̱ṃ hari̭śipro̱ ya ā̭ya̱saḥ sa̱hasra̭śokā abhavaddharimbha̱raḥ ||4||
tvaṃtva̭maharyathā̱ upa̭stuta̱: pūrvḙbhirindra harikeśa̱ yajva̭bhiḥ |
tvaṃ ha̭ryasi̱ tava̱ viśva̭mu̱kthya1masā̭mi̱ rādho̭ harijāta harya̱tam ||5||
tā va̱jriṇa̭ṃ ma̱ndina̱ṃ stomya̱ṃ mada̱ indra̱ṃ rathḙ vahato harya̱tā harī̭ |
pu̱rūṇya̭smai̱ sava̭nāni̱ harya̭ta̱ indrā̭ya̱ somā̱ hara̭yo dadhanvire ||6||
ara̱ṃ kāmā̭ya̱ hara̭yo dadhanvire sthi̱rāya̭ hinva̱nhara̭yo̱ harī̭ tu̱rā |
arva̭dbhi̱ryo hari̭bhi̱rjoṣa̱mīya̭te̱ so a̭sya̱ kāma̱ṃ hari̭vantamānaśe ||7||
hari̭śmaśāru̱rhari̭keśa āya̱sastṷra̱speye̱ yo ha̭ri̱pā ava̭rdhata |
arva̭dbhi̱ryo hari̭bhirvā̱jinī̭vasu̱rati̱ viśvā̭ duri̱tā pāri̭ṣa̱ddharī̭ ||8||
sruvḙva̱ yasya̱ hari̭ṇī vipe̱tatu̱: śipre̱ vājā̭ya̱ hari̭ṇī̱ davi̭dhvataḥ |
pra yatkṛ̱te ca̭ma̱se marmṛ̭ja̱ddharī̭ pī̱tvā mada̭sya harya̱tasyāndha̭saḥ ||9||
u̱ta sma̱ sadma̭ harya̱tasya̭ pa̱styo̱3ratyo̱ na vāja̱ṃ hari̭vā~ acikradat |
ma̱hī ci̱ddhi dhi̱ṣaṇāha̭rya̱doja̭sā bṛ̱hadvayo̭ dadhiṣe harya̱taści̱dā ||10||
ā roda̭sī̱ harya̭māṇo mahi̱tvā navya̭ṃnavyaṃ haryasi̱ manma̱ nu pri̱yam |
 pra pa̱stya̭masura harya̱taṃ gorā̱viṣkṛ̭dhi̱ hara̭ye̱ sūryā̭ya ||11||
ā tvā̭ ha̱ryanta̭ṃ pra̱yujo̱ janā̭nā̱ṃ rathḙ vahantu̱ hari̭śipramindra |
 pibā̱ yathā̱ prati̭bhṛtasya̱ madhvo̱ harya̭nya̱jñaṃ sa̭dha̱māde̱ daśo̭ṇim ||12||
apā̱: pūrvḙṣāṃ harivaḥ su̱tānā̱matho̭ i̱daṃ sava̭na̱ṃ keva̭laṃ te |
ma̱ma̱ddhi soma̱ṃ madhṷmantamindra sa̱trā vṛ̭ṣañja̱ṭhara̱ ā vṛ̭ṣasva ||13||
23 ātharvaṇo bhiṣag| oṣadhayaḥ| anuṣṭup|
yā oṣa̭dhī̱: pūrvā̭ jā̱tā de̱vebhya̭striyu̱gaṃ pu̱rā | manai̱ nu ba̱bhrūṇā̭ma̱haṃ śa̱taṃ dhāmā̭ni sa̱pta ca̭ ||1||
śa̱taṃ vo̭ amba̱ dhāmā̭ni sa̱hasra̭mu̱ta vo̱ ruha̭: | adhā̭ śatakratvo yū̱yami̱maṃ mḙ aga̱daṃ kṛ̭ta ||2||
oṣa̭dhī̱: prati̭ modadhva̱ṃ puṣpa̭vatīḥ pra̱sūva̭rīḥ | aśvā̭ iva sa̱jitva̭rīrvī̱rudha̭: pārayi̱ṣṇva̭: ||3||
oṣa̭dhī̱riti̭ mātara̱stadvo̭ devī̱rupa̭ bruve | sa̱neya̱maśva̱ṃ gāṃ vāsa̭ ā̱tmāna̱ṃ tava̭ pūruṣa ||4||
a̱śva̱tthe vo̭ ni̱ṣada̭naṃ pa̱rṇe vo̭ vasa̱tiṣkṛ̱tā | go̱bhāja̱ itkilā̭satha̱ yatsa̱nava̭tha̱ pūrṷṣam ||5||
yatrauṣa̭dhīḥ sa̱magma̭ta̱ rājā̭na̱: sami̭tāviva | vipra̱: sa ṷcyate bhi̱ṣagra̭kṣo̱hāmī̭va̱cāta̭naḥ ||6||
a̱śvā̱va̱tīṃ so̭māva̱tīmū̱rjaya̭ntī̱mudo̭jasam | āvi̭tsi̱ sarvā̱ oṣa̭dhīra̱smā a̭ri̱ṣṭatā̭taye ||7||
ucchuṣmā̱ oṣa̭dhīnā̱ṃ gāvo̭ go̱ṣṭhādi̭verate | dhana̭ṃ sani̱ṣyantī̭nāmā̱tmāna̱ṃ tava̭ pūruṣa ||8||
iṣkṛ̭ti̱rnāma̭ vo mā̱tā'tho̭ yū̱yaṃ stha̱ niṣkṛ̭tīḥ | sī̱rāḥ pa̭ta̱triṇī̭: sthana̱ yadā̱maya̭ti̱ niṣkṛ̭tha ||9||
ati̱ viśvā̭: pari̱ṣṭhā ste̱na i̭va vra̱jama̭kramuḥ | oṣa̭dhī̱: prācṷcyavu̱ryatkiṃ ca̭ ta̱nvo̱3 rapa̭: ||10||
yadi̱mā vā̱jaya̭nna̱hamoṣa̭dhī̱rhasta̭ āda̱dhe | ā̱tmā yakṣma̭sya naśyati pu̱rā jī̭va̱gṛbho̭ yathā ||11||
yasyaṷṣadhīḥ pra̱sarpa̱thāṅga̭maṅga̱ṃ parṷṣparuḥ | tato̱ yakṣma̱ṃ vi bā̭dhadhva u̱gro ma̭dhyama̱śīri̭va ||12||
sā̱kaṃ ya̭kṣma̱ pra pa̭ta̱ cāṣḙṇa kikidī̱vinā̭ | sā̱kaṃ vāta̭sya̱ dhrājyā̭ sā̱kaṃ na̭śya ni̱hāka̭yā ||13||
a̱nyā vo̭ a̱nyāma̭vatva̱nyānyasyā̱ upā̭vata | tāḥ sarvā̭: saṃvidā̱nā i̱daṃ me̱ prāva̭tā̱ vaca̭: ||14||
yāḥ pha̱linī̱ryā a̭pha̱lā a̭pu̱ṣpā yāśca̭ pu̱ṣpiṇī̭: | bṛha̱spati̭prasūtā̱stā no̭ muñca̱ntvaṃha̭saḥ ||15||
mu̱ñcantṷ mā śapa̱thyā̱3datho̭ varu̱ṇyā̭du̱ta | atho̭ ya̱masya̱ paḍbī̭śā̱tsarva̭smāddevakilbi̱ṣāt ||16||
a̱va̱pata̭ntīravadandi̱va oṣa̭dhaya̱spari̭ | yaṃ jī̱vama̱śnavā̭mahai̱ na sa ri̭ṣyāti̱ pūrṷṣaḥ ||17||
yā oṣa̭dhī̱: soma̭rājñīrba̱hvīḥ śa̱tavi̭cakṣaṇāḥ | tāsā̱ṃ tvama̭syutta̱māra̱ṃ kāmā̭ya̱ śaṃ hṛ̱de ||18||
yā oṣa̭dhī̱: soma̭rājñī̱rviṣṭhi̭tāḥ pṛthi̱vīmanṷ | bṛha̱spati̭prasūtā a̱syai saṃ da̭tta vī̱rya̭m ||19||
mā vo̭ riṣatkhani̱tā yasmai̭ cā̱haṃ khanā̭mi vaḥ | dvi̱paccatṷṣpada̱smāka̱ṃ sarva̭mastvanātu̱ram ||20||
yāśce̱damṷpaśṛ̱ṇvanti̱ yāśca̭ dū̱raṃ parā̭gatāḥ | sarvā̭: sa̱ṃgatya̭ vīrudho̱'syai saṃ da̭tta vī̱rya̭m ||21||
oṣa̭dhaya̱: saṃ va̭dante̱ somḙna sa̱ha rājñā̭ | yasmai̭ kṛ̱ṇoti̭ brāhma̱ṇastaṃ rā̭janpārayāmasi ||22||
tvamṷtta̱māsyo̭ṣadhe̱ tava̭ vṛ̱kṣā upa̭stayaḥ | upa̭stirastu̱ so̱3'smāka̱ṃ yo a̱smā~ a̭bhi̱dāsa̭ti ||23||
12 ārṣṭiṣeṇo devāpiḥ (vṛṣṭikāmaḥ) | devāḥ| triṣṭup|
bṛha̭spate̱ prati̭ me de̱vatā̭mihi mi̱tro vā̱ yadvarṷṇo̱ vāsi̭ pū̱ṣā |
ā̱di̱tyairvā̱ yadvasṷbhirma̱rutvā̱ntsa pa̱rjanya̱ṃ śaṃta̭nave vṛṣāya ||1||
ā de̱vo dū̱to a̭ji̱raści̭ki̱tvāntvaddḙvāpe a̱bhi māma̭gacchat |
pra̱tī̱cī̱naḥ prati̱ māmā va̭vṛtsva̱ dadhā̭mi te dyu̱matī̱ṃ vāca̭mā̱san ||2||
a̱sme dhḙhi dyu̱matī̱ṃ vāca̭mā̱sanbṛha̭spate anamī̱vāmi̭ṣi̱rām |
yayā̭ vṛ̱ṣṭiṃ śaṃta̭nave̱ vanā̭va di̱vo dra̱pso madhṷmā̱~ ā vi̭veśa ||3||
ā no̭ dra̱psā madhṷmanto viśa̱ntvindra̭ de̱hyadhi̭rathaṃ sa̱hasra̭m |
ni ṣī̭da ho̱tramṛ̭tu̱thā ya̭jasva de̱vāndḙvāpe ha̱viṣā̭ saparya ||4||
ā̱rṣṭi̱ṣe̱ṇo ho̱tramṛṣi̭rni̱ṣīda̭nde̱vāpi̭rdevasuma̱tiṃ ci̭ki̱tvān |
sa utta̭rasmā̱dadha̭raṃ samu̱drama̱po di̱vyā a̭sṛjadva̱rṣyā̭ a̱bhi ||5||
a̱smintsa̭mu̱dre adhyutta̭rasmi̱nnāpo̭ de̱vebhi̱rnivṛ̭tā atiṣṭhan |
tā a̭dravannārṣṭiṣe̱ṇena̭ sṛ̱ṣṭā de̱vāpi̭nā̱ preṣi̭tā mṛ̱kṣiṇī̭ṣu ||6||
yadde̱vāpi̱: śaṃta̭nave pu̱rohi̭to ho̱trāya̭ vṛ̱taḥ kṛ̱paya̱nnadī̭dhet |
de̱va̱śruta̭ṃ vṛṣṭi̱vani̱ṃ rarā̭ṇo̱ bṛha̱spati̱rvāca̭masmā ayacchat ||7||
yaṃ tvā̭ de̱vāpi̭: śuśucā̱no a̭gna ārṣṭiṣe̱ṇo ma̭nu̱ṣya̭: samī̱dhe |
viśvḙbhirde̱vaira̭numa̱dyamā̭na̱: pra pa̱rjanya̭mīrayā vṛṣṭi̱manta̭m ||8||
tvāṃ pūrva̱ ṛṣa̭yo gī̱rbhirā̭ya̱ntvāma̭dhva̱reṣṷ puruhūta̱ viśvḙ |
sa̱hasrā̱ṇyadhi̭rathānya̱sme ā no̭ ya̱jñaṃ ro̭hida̱śvopa̭ yāhi ||9||
e̱tānya̭gne nava̱tirnava̱ tve āhṷtā̱nyadhi̭rathā sa̱hasrā̭ |
tebhi̭rvardhasva ta̱nva̭: śūra pū̱rvīrdi̱vo no̭ vṛ̱ṣṭimi̭ṣi̱to ri̭rīhi ||10||
e̱tānya̭gne nava̱tiṃ sa̱hasrā̱ saṃ pra ya̭ccha̱ vṛṣṇa̱ indrā̭ya bhā̱gam |
vi̱dvānpa̱tha ṛ̭tu̱śo dḙva̱yānā̱napyaṷlā̱naṃ di̱vi de̱veṣṷ dhehi ||11||
agne̱ bādha̭sva̱ vi mṛdho̱ vi du̱rgahā'pāmī̭vā̱mapa̱ rakṣā̭ṃsi sedha |
a̱smātsa̭mu̱drādbṛ̭ha̱to di̱vo no̱'pāṃ bhū̱māna̱mupa̭ naḥ sṛje̱ha ||12||
12 vamro vaikhānasaḥ| indraḥ| triṣṭup|
kaṃ na̭ści̱trami̭ṣaṇyasi ciki̱tvānpṛ̭thu̱gmāna̭ṃ vā̱śraṃ vā̭vṛ̱dhadhyai̭ |
kattasya̱ dātu̱ śava̭so̱ vyṷṣṭau̱ takṣa̱dvajra̭ṃ vṛtra̱tura̱mapi̭nvat ||1||
sa hi dyu̱tā vi̱dyutā̱ veti̱ sāma̭ pṛ̱thuṃ yoni̭masura̱tvā sa̭sāda |
sa sanī̭ḻebhiḥ prasahā̱no a̭sya̱ bhrātu̱rna ṛ̱te sa̱ptatha̭sya mā̱yāḥ ||2||
sa vāja̱ṃ yātāpa̭duṣpadā̱ yantsva̭rṣātā̱ pari̭ ṣadatsani̱ṣyan |
a̱na̱rvā yaccha̱tadṷrasya̱ vedo̱ ghnañchi̱śnadḙvā~ a̱bhi varpa̭sā̱ bhūt ||3||
sa ya̱hvyo̱3'vanī̱rgoṣvarvā ''jṷhoti pradha̱nyā̭su̱ sasri̭: |
a̱pādo̱ yatra̱ yujyā̭so'ra̱thā dro̱ṇya̭śvāsa̱ īra̭te ghṛ̱taṃ vāḥ ||4||
sa ru̱drebhi̱raśa̭stavāra̱ ṛbhvā̭ hi̱tvī gaya̭mā̱rea̭vadya̱ āgā̭t |
va̱mrasya̭ manye mithu̱nā viva̭vrī̱ anna̭ma̱bhītyā̭rodayanmuṣā̱yan ||5||
sa iddāsa̭ṃ tuvī̱rava̱ṃ pati̱rdanṣa̭ḻa̱kṣaṃ tri̭śī̱rṣāṇa̭ṃ damanyat |
a̱sya tri̱to nvoja̭sā vṛdhā̱no vi̱pā va̭rā̱hamayo̭agrayā han ||6||
sa druhva̭ṇe̱ manṷṣa ūrdhvasā̱na ā sā̭viṣadarśasā̱nāya̱ śarṷm |
sa nṛta̭mo̱ nahṷṣo̱'smatsujā̭ta̱: puro̭'bhina̱darha̭ndasyu̱hatyḙ ||7||
so a̱bhriyo̱ na yava̭sa uda̱nyankṣayā̭ya gā̱tuṃ vi̱danno̭ a̱sme |
upa̱ yatsīda̱dindu̱ṃ śarī̭raiḥ śye̱no'yo̭pāṣṭirhanti̱ dasyṷ̄n ||8||
sa vrādha̭taḥ śavasā̱nebhi̭rasya̱ kutsā̭ya̱ śuṣṇa̭ṃ kṛ̱paṇe̱ parā̭dāt |
a̱yaṃ ka̱vima̭nayaccha̱syamā̭na̱matka̱ṃ yo a̭sya̱ sani̭to̱ta nṛ̱ṇām ||9||
a̱yaṃ da̭śa̱syannaryḙbhirasya da̱smo de̱vebhi̱rvarṷṇo̱ na mā̱yī |
a̱yaṃ ka̱nīna̭ ṛtu̱pā a̭ve̱dyami̭mītā̱raru̱ṃ yaścatṷṣpāt ||10||
a̱sya stomḙbhirauśi̱ja ṛ̱jiśvā̭ vra̱jaṃ da̭rayadvṛṣa̱bheṇa̱ pipro̭: |
sutvā̱ yadya̭ja̱to dī̱daya̱dgīḥ pura̭ iyā̱no a̱bhi varpa̭sā̱ bhūt ||11||
e̱vā ma̱ho a̭sura va̱kṣathā̭ya vamra̱kaḥ pa̱ḍbhirupa̭ sarpa̱dindra̭m |
sa i̭yā̱naḥ ka̭rati sva̱stima̭smā̱ iṣa̱mūrja̭ṃ sukṣi̱tiṃ viśva̱mābhā̭: ||12||
12 duvasyurvāndanaḥ| viśvedevāḥ| jagatī, 12 triṣṭup|
indra̱ dṛhya̭ maghava̱ntvāva̱didbhu̱ja i̱ha stu̱taḥ sṷta̱pā bo̭dhi no vṛ̱dhe |
de̱vebhi̭rnaḥ savi̱tā prāva̭tu śru̱tamā sa̱rvatā̭ti̱madi̭tiṃ vṛṇīmahe ||1||
bharā̭ya̱ su bha̭rata bhā̱gamṛ̱tviya̱ṃ pra vā̱yavḙ śuci̱pe kra̱ndadi̭ṣṭaye |
gau̱rasya̱ yaḥ paya̭saḥ pī̱timā̭na̱śa ā sa̱rvatā̭ti̱madi̭tiṃ vṛṇīmahe ||2||
ā no̭ de̱vaḥ sa̭vi̱tā sā̭viṣa̱dvaya̭ ṛjūya̱te yaja̭mānāya sunva̱te |
yathā̭ de̱vānpra̭ti̱bhūṣḙma pāka̱vadā sa̱rvatā̭ti̱madi̭tiṃ vṛṇīmahe ||3||
indro̭ a̱sme su̱manā̭ astu vi̱śvahā̱ rājā̱ soma̭: suvi̱tasyādhyḙtu naḥ |
yathā̭yathā mi̱tradhi̭tāni saṃda̱dhurā sa̱rvatā̭ti̱madi̭tiṃ vṛṇīmahe ||4||
indra̭ u̱kthena̱ śava̭sā̱ parṷrdadhe̱ bṛha̭spate pratarī̱tāsyāyṷṣaḥ |
ya̱jño manu̱: prama̭tirnaḥ pi̱tā hi ka̱mā sa̱rvatā̭ti̱madi̭tiṃ vṛṇīmahe ||5||
indra̭sya̱ nu sukṛ̭ta̱ṃ daivya̱ṃ saho̱'gnirgṛ̱he ja̭ri̱tā medhi̭raḥ ka̱viḥ |
ya̱jñaśca̭ bhūdvi̱dathe̱ cāru̱ranta̭ma̱ ā sa̱rvatā̭ti̱madi̭tiṃ vṛṇīmahe ||6||
na vo̱ guhā̭ cakṛma̱ bhūri̭ duṣkṛ̱taṃ nāviṣṭya̭ṃ vasavo deva̱heḻa̭nam |
māki̭rno devā̱ anṛ̭tasya̱ varpa̭sa̱ ā sa̱rvatā̭ti̱madi̭tiṃ vṛṇīmahe ||7||
apāmī̭vāṃ savi̱tā sā̭viṣa̱nnya1gvarī̭ya̱ idapa̭ sedha̱ntvadra̭yaḥ |
 grāvā̱ yatra̭ madhu̱ṣudu̱cyatḙ bṛ̱hadā sa̱rvatā̭ti̱madi̭tiṃ vṛṇīmahe ||8||
ū̱rdhvo grāvā̭ vasavo'stu so̱tari̱ viśvā̱ dveṣā̭ṃsi sanu̱taryṷyota |
sa no̭ de̱vaḥ sa̭vi̱tā pā̱yurīḍya̱ ā sa̱rvatā̭ti̱madi̭tiṃ vṛṇīmahe ||9||
ūrja̭ṃ gāvo̱ yava̭se̱ pīvo̭ attana ṛ̱tasya̱ yāḥ sada̭ne̱ kośḙ a̱ṅgdhve |
ta̱nūre̱va ta̱nvo̭ astu bheṣa̱jamā sa̱rvatā̭ti̱madi̭tiṃ vṛṇīmahe ||10||
kra̱tu̱prāvā̭ jari̱tā śaśva̭tā̱mava̱ indra̱ idbha̱drā prama̭tiḥ su̱tāva̭tām |
pū̱rṇamūdha̭rdi̱vyaṃ yasya̭ si̱ktaya̱ ā sa̱rvatā̭ti̱madi̭tiṃ vṛṇīmahe ||11||
ci̱trastḙ bhā̱nuḥ kra̭tu̱prā a̭bhi̱ṣṭiḥ santi̱ spṛdho̭ jaraṇi̱prā adhṛ̭ṣṭāḥ |
raji̭ṣṭhayā̱ rajyā̭ pa̱śva ā gostūtṷ̄rṣati̱ paryagra̭ṃ duva̱syuḥ ||12||
12 budhaḥ saumyaḥ| viśve devā, ṛtvijo vā | triṣṭup 4, 6 gāyatrī, 5 bṛhatī, 9,12 jagatī|
udbṷdhyadhva̱ṃ sama̭nasaḥ sakhāya̱: sama̱gnimi̭ndhvaṃ ba̱hava̱: sanī̭ḻāḥ |
da̱dhi̱krāma̱gnimu̱ṣasa̭ṃ ca de̱vīmindrā̭va̱to'va̭se̱ ni hva̭ye vaḥ ||1||
ma̱ndrā kṛ̭ṇudhva̱ṃ dhiya̱ ā ta̭nudhva̱ṃ nāva̭maritra̱para̭ṇīṃ kṛṇudhvam |
iṣkṛ̭ṇudhva̱māyu̱dhāra̭ṃ kṛṇudhva̱ṃ prāñca̭ṃ ya̱jñaṃ pra ṇa̭yatā sakhāyaḥ ||2||
yu̱nakta̱ sīrā̱ vi yu̱gā ta̭nudhvaṃ kṛ̱te yonaṷ vapate̱ha bīja̭m |
 gi̱rā ca̭ śru̱ṣṭiḥ sabha̭rā̱ asa̭nno̱ nedī̭ya̱ itsṛ̱ṇya̭: pa̱kvameyā̭t ||3||
sīrā̭ yuñjanti ka̱vayo̭ yu̱gā vi ta̭nvate̱ pṛtha̭k | dhīrā̭ de̱veṣṷ sumna̱yā ||4||
nirā̭hā̱vānkṛ̭ṇotana̱ saṃ va̭ra̱trā da̭dhātana | si̱ñcāma̭hā ava̱tamu̱driṇa̭ṃ va̱yaṃ su̱ṣeka̱manṷpakṣitam ||5||
iṣkṛ̭tāhāvamava̱taṃ sṷvara̱traṃ sṷṣeca̱nam | u̱driṇa̭ṃ siñce̱ akṣi̭tam ||6||
prī̱ṇī̱tāśvā̭nhi̱taṃ ja̭yātha svasti̱vāha̱ṃ ratha̱mitkṛ̭ṇudhvam |
droṇā̭hāvamava̱tamaśma̭cakra̱maṃsa̭trakośaṃ siñcatā nṛ̱pāṇa̭m ||7||
vra̱jaṃ kṛ̭ṇudhva̱ṃ sa hi vo̭ nṛ̱pāṇo̱ varma̭ sīvyadhvaṃ bahu̱lā pṛ̱thūni̭ |
pura̭: kṛṇudhva̱māya̭sī̱radhṛ̭ṣṭā̱ mā va̭: susroccama̱so dṛṃha̭tā̱ tam ||8||
ā vo̱ dhiya̭ṃ ya̱jñiyā̭ṃ varta ū̱taye̱ devā̭ de̱vīṃ ya̭ja̱tāṃ ya̱jñiyā̭mi̱ha |
sā no̭ duhīya̱dyava̭seva ga̱tvī sa̱hasra̭dhārā̱ paya̭sā ma̱hī gauḥ ||9||
ā tū ṣi̭ñca̱ hari̭mī̱ṃ droru̱pasthe̱ vāśī̭bhistakṣatāśma̱nmayī̭bhiḥ |
pari̭ ṣvajadhva̱ṃ daśa̭ ka̱kṣyā̭bhiru̱bhe dhurau̱ prati̱ vahni̭ṃ yunakta ||10||
u̱bhe dhurau̱ vahni̭rā̱pibda̭māno̱'ntaryonḙva carati dvi̱jāni̭: |
vana̱spati̱ṃ vana̱ āsthā̭payadhva̱ṃ ni ṣū da̭dhidhva̱makha̭nanta̱ utsa̭m ||11||
kapṛ̭nnaraḥ kapṛ̱thamudda̭dhātana co̱daya̭ta khu̱data̱ vāja̭sātaye |
ni̱ṣṭi̱grya̭: pu̱tramā cyā̭vayo̱taya̱ indra̭ṃ sa̱bādha̭ i̱ha soma̭pītaye ||12||
12  mudgalo bhārmyaśvaḥ| drughaṇaḥ, indro vā| triṣṭup, 1,3, 12 bṛhatī|
pra te̱ ratha̭ṃ mithū̱kṛta̱mindro̭'vatu dhṛṣṇu̱yā |
a̱sminnā̱jau pṷruhūta śra̱vāyyḙ dhanabha̱kṣeṣṷ no'va ||1||
utsma̱ vāto̭ vahati̱ vāso̭'syā̱ adhi̭ratha̱ṃ yadaja̭yatsa̱hasra̭m |
 ra̱thīra̭bhūnmudga̱lānī̱ gavi̭ṣṭau̱ bharḙ kṛ̱taṃ vya̭cedindrase̱nā ||2||
a̱ntarya̭ccha̱ jighā̭ṃsato̱ vajra̭mindrābhi̱dāsa̭taḥ |
dāsa̭sya vā maghava̱nnārya̭sya vā sanu̱tarya̭vayā va̱dham ||3||
u̱dno hra̱dama̭piba̱jjarhṛ̭ṣāṇa̱: kūṭa̭ṃ sma tṛ̱ṃhada̱bhimā̭timeti |
pra mu̱ṣkabhā̭ra̱: śrava̭ i̱cchamā̭no'ji̱raṃ bā̱hū a̭bhara̱tsiṣā̭san ||4||
nya̭krandayannupa̱yanta̭ ena̱mamḙhayanvṛṣa̱bhaṃ madhya̭ ā̱jeḥ |
tena̱ sūbha̭rvaṃ śa̱tava̭tsa̱hasra̱ṃ gavā̱ṃ mudga̭laḥ pra̱dhanḙ jigāya ||5||
ka̱karda̭ve vṛṣa̱bho yu̱kta ā̭sī̱davā̭vacī̱tsāra̭thirasya ke̱śī |
dudhḙryu̱ktasya̱ drava̭taḥ sa̱hāna̭sa ṛ̱cchanti̭ ṣmā ni̱ṣpado̭ mudga̱lānī̭m ||6||
u̱ta pra̱dhimuda̭hannasya vi̱dvānupā̭yuna̱gvaṃsa̭ga̱matra̱ śikṣa̭n |
indra̱ udā̭va̱tpati̱maghnyā̭nā̱mara̭ṃhata̱ padyā̭bhiḥ ka̱kudmā̭n ||7||
śu̱nama̭ṣṭrā̱vya̭caratkapa̱rdī va̭ra̱trāyā̱ṃ dārvā̱nahya̭mānaḥ |
nṛ̱mṇāni̭ kṛ̱ṇvanba̱have̱ janā̭ya̱ gāḥ pa̭spaśā̱nastavi̭ṣīradhatta ||8||
i̱maṃ taṃ pa̭śya vṛṣa̱bhasya̱ yuñja̱ṃ kāṣṭhā̭yā̱ madhyḙ drugha̱ṇaṃ śayā̭nam |
yena̭ ji̱gāya̭ śa̱tava̭tsa̱hasra̱ṃ gavā̱ṃ mudga̭laḥ pṛta̱nājyḙṣu ||9||
ā̱re a̱ghā ko nvi1tthā da̭darśa̱ yaṃ yu̱ñjanti̱ tamvā sthā̭payanti |
 nāsmai̱ tṛṇa̱ṃ noda̱kamā bha̭ra̱ntyutta̭ro dhu̱ro va̭hati pra̱dedi̭śat ||10||
pa̱ri̱vṛ̱kteva̭ pati̱vidya̭māna̱ṭ pīpyā̭nā̱ kūca̭kreṇeva si̱ñcan |
e̱ṣai̱ṣyā̭ cidra̱thyā̭ jayema suma̱ṅgala̱ṃ sina̭vadastu sā̱tam ||11||
tvaṃ viśva̭sya̱ jaga̭ta̱ścakṣṷrindrāsi̱ cakṣṷṣaḥ | vṛṣā̱ yadā̱jiṃ vṛṣa̭ṇā̱ siṣā̭sasi co̱daya̱nvadhri̭ṇā yu̱jā ||12||
13 aindro'pratirathaḥ| indraḥ, 4 bṛhaspati:, 12 apvā devī, 13 maruto vā| triṣṭup , 13 anuṣṭup|
ā̱śuḥ śiśā̭no vṛṣa̱bho na bhī̱mo gha̭nāgha̱naḥ kṣobha̭ṇaścarṣaṇī̱nām |
sa̱ṃkranda̭no'nimi̱ṣa ḙkavī̱raḥ śa̱taṃ senā̭ ajayatsā̱kamindra̭: ||1||
sa̱ṃkranda̭nenānimi̱ṣeṇa̭ ji̱ṣṇunā̭ yutkā̱reṇa̭ duścyava̱nena̭ dhṛ̱ṣṇunā̭ |
tadindrḙṇa jayata̱ tatsa̭hadhva̱ṃ yudho̭ nara̱ iṣṷhastena̱ vṛṣṇā̭ ||2||
sa iṣṷhastai̱: sa ni̭ṣa̱ṅgibhi̭rva̱śī saṃsra̭ṣṭā̱ sa yudha̱ indro̭ ga̱ṇena̭ |
sa̱ṃsṛ̱ṣṭa̱jitso̭ma̱pā bā̭huśa̱rdhyu1gradha̭nvā̱ prati̭hitābhi̱rastā̭ ||3||
bṛha̭spate̱ pari̭ dīyā̱ rathḙna rakṣo̱hāmitrā̭~ apa̱bādha̭mānaḥ |
pra̱bha̱ñjantsenā̭: pramṛ̱ṇo yu̱dhā jaya̭nna̱smāka̭medhyavi̱tā rathā̭nām ||4||
ba̱la̱vi̱jñā̱yaḥ sthavi̭ra̱: pravī̭ra̱: saha̭svānvā̱jī saha̭māna u̱graḥ |
a̱bhivī̭ro a̱bhisa̭tvā saho̱jā jaitra̭mindra̱ ratha̱mā ti̭ṣṭha go̱vit ||5||
go̱tra̱bhida̭ṃ go̱vida̱ṃ vajra̭bāhu̱ṃ jaya̭nta̱majma̭ pramṛ̱ṇanta̱moja̭sā |
i̱maṃ sa̭jātā̱ anṷ vīrayadhva̱mindra̭ṃ sakhāyo̱ anu̱ saṃ ra̭bhadhvam ||6||
a̱bhi go̱trāṇi̱ saha̭sā̱ gāha̭māno'da̱yo vī̱raḥ śa̱tama̭nyu̱rindra̭: |
du̱ścya̱va̱naḥ pṛ̭tanā̱ṣāḻa̭yu̱dhyo̱3'smāka̱ṃ senā̭ avatu̱ pra yu̱tsu ||7||
indra̭ āsāṃ ne̱tā bṛha̱spati̱rdakṣi̭ṇā ya̱jñaḥ pu̱ra ḙtu̱ soma̭: |
de̱va̱se̱nānā̭mabhibhañjatī̱nāṃ jaya̭ntīnāṃ ma̱ruto̭ ya̱ntvagra̭m ||8||
indra̭sya̱ vṛṣṇo̱ varṷṇasya̱ rājña̭ ādi̱tyānā̭ṃ ma̱rutā̱ṃ śardha̭ u̱gram |
ma̱hāma̭nasāṃ bhuvanacya̱vānā̱ṃ ghoṣo̭ de̱vānā̱ṃ jaya̭tā̱muda̭sthāt ||9||
uddha̭rṣaya maghava̱nnāyṷdhā̱nyutsatva̭nāṃ māma̱kānā̱ṃ manā̭ṃsi |
udvṛ̭trahanvā̱jinā̱ṃ vāji̭nā̱nyudrathā̭nā̱ṃ jaya̭tāṃ yantu̱ ghoṣā̭: ||10||
a̱smāka̱mindra̱: samṛ̭teṣu dhva̱jeṣva̱smāka̱ṃ yā iṣa̭va̱stā ja̭yantu |
a̱smāka̭ṃ vī̱rā utta̭re bhavantva̱smā~ ṷ devā avatā̱ havḙṣu ||11||
a̱mīṣā̭ṃ ci̱ttaṃ pra̭tilo̱bhaya̭ntī gṛhā̱ṇāṅgā̭nyapve̱ parḙhi |
a̱bhi prehi̱ nirda̭ha hṛ̱tsu śokai̭ra̱ndhenā̱mitrā̱stama̭sā sacantām ||12||
pretā̱ jaya̭tā nara̱ indro̭ va̱: śarma̭ yacchatu | u̱grā va̭: santu bā̱havo̭'nādhṛ̱ṣyā yathāsa̭tha ||13||
11 aṣṭako vaiśvāmitraḥ| indraḥ| triṣṭup|
asā̭vi̱ soma̭: puruhūta̱ tubhya̱ṃ hari̭bhyāṃ ya̱jñamupa̭ yāhi̱ tūya̭m |
tubhya̱ṃ giro̱ vipra̭vīrā iyā̱nā da̭dhanvi̱ra i̭ndra̱ pibā̭ su̱tasya̭ ||1||
a̱psu dhū̱tasya̭ hariva̱: pibe̱ha nṛbhi̭: su̱tasya̭ ja̱ṭhara̭ṃ pṛṇasva |
mi̱mi̱kṣuryamadra̭ya indra̱ tubhya̱ṃ tebhi̭rvardhasva̱ mada̭mukthavāhaḥ ||2||
progrāṃ pī̱tiṃ vṛṣṇa̭ iyarmi sa̱tyāṃ pra̱yai su̱tasya̭ haryaśva̱ tubhya̭m |
indra̱ dhenā̭bhiri̱ha mā̭dayasva dhī̱bhirviśvā̭bhi̱: śacyā̭ gṛṇā̱naḥ ||3||
ū̱tī śa̭cīva̱stava̭ vī̱ryḙṇa̱ vayo̱ dadhā̭nā u̱śija̭ ṛta̱jñāḥ |
pra̱jāva̭dindra̱ manṷṣo duro̱ṇe ta̱sthurgṛ̱ṇanta̭: sadha̱mādyā̭saḥ ||4||
praṇī̭tibhiṣṭe haryaśva su̱ṣṭoḥ sṷṣu̱mnasya̭ puru̱ruco̱ janā̭saḥ |
maṃhi̭ṣṭhāmū̱tiṃ vi̱tire̱ dadhā̭nā sto̱tāra̭ indra̱ tava̭ sū̱nṛtā̭bhiḥ ||5||
upa̱ brahmā̭ṇi harivo̱ hari̭bhyā̱ṃ soma̭sya yāhi pī̱tayḙ su̱tasya̭ |
indra̭ tvā ya̱jñaḥ kṣama̭māṇamānaḍdā̱śvā~ a̭syadhva̱rasya̭ prake̱taḥ ||6||
sa̱hasra̭vājamabhimāti̱ṣāha̭ṃ su̱tera̭ṇaṃ ma̱ghavā̭naṃ suvṛ̱ktim |
upa̭ bhūṣanti̱ giro̱ apra̭tīta̱mindra̭ṃ nama̱syā ja̭ri̱tuḥ pa̭nanta ||7||
sa̱ptāpo̭ de̱vīḥ su̱raṇā̱ amṛ̭ktā̱ yābhi̱: sindhu̱mata̭ra indra pū̱rbhit |
na̱va̱tiṃ sro̱tyā nava̭ ca̱ srava̭ntīrde̱vebhyo̭ gā̱tuṃ manṷṣe ca vindaḥ ||8||
a̱po ma̱hīra̱bhiśa̭steramu̱ñco'jā̭garā̱svadhi̭ de̱va eka̭: |
indra̱ yāstvaṃ vṛ̭tra̱tūryḙ ca̱kartha̱ tābhi̭rvi̱śvāyṷsta̱nva̭ṃ pupuṣyāḥ ||9||
vī̱reṇya̱: kratu̱rindra̭: suśa̱stiru̱tāpi̱ dhenā̭ puruhū̱tamī̭ṭṭe |
ārda̭yadvṛ̱tramakṛ̭ṇodu lo̱kaṃ sa̭sā̱he śa̱kraḥ pṛta̭nā abhi̱ṣṭiḥ ||10||
śu̱naṃ hṷvema ma̱ghavā̭na̱mindra̭ma̱sminbhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||11||
11 kautso durmitraḥ sumitro vā| indraḥ| uṣṇik, 1 gāyatrī vā 2,7 pipīlikamadhyā, 11 triṣṭup |
ka̱dā va̭so sto̱traṃ harya̭ta̱ āva̭ śma̱śā rṷdha̱dvāḥ | dī̱rghaṃ su̱taṃ vā̱tāpyā̭ya ||1||
harī̱ yasya̭ su̱yujā̱ vivra̭tā̱ verarva̱ntānu̱ śepā̭ | u̱bhā ra̱jī na ke̱śinā̱ pati̱rdan ||2||
apa̱ yorindra̱: pāpa̭ja̱ ā marto̱ na śa̭śramā̱ṇo bi̭bhī̱vān | śu̱bhe yadyṷyu̱je tavi̭ṣīvān ||3||
sacā̱yorindra̱ścarkṛ̭ṣa̱ ā~ ṷpāna̱saḥ sa̭pa̱ryan | na̱dayo̱rvivra̭tayo̱: śūra̱ indra̭: ||4||
adhi̱ yasta̱sthau keśa̭vantā̱ vyaca̭svantā̱ na pu̱ṣṭyai | va̱noti̱ śiprā̭bhyāṃ śi̱priṇī̭vān ||5||
prāstaṷdṛ̱ṣvaujā̭ ṛ̱ṣvebhi̭sta̱takṣa̱ śūra̱: śava̭sā | ṛ̱bhurna kratṷbhirmāta̱riśvā̭ ||6||
vajra̱ṃ yaśca̱kre su̱hanā̭ya̱ dasya̭ve hirīma̱śo hirī̭mān | arṷtahanu̱radbhṷta̱ṃ na raja̭: ||7||
ava̭ no vṛji̱nā śi̭śīhyṛ̱cā va̭nemā̱nṛca̭: | nābra̭hmā ya̱jña ṛdha̱gjoṣa̭ti̱ tve ||8||
ū̱rdhvā yattḙ tre̱tinī̱ bhūdya̱jñasya̭ dhū̱rṣu sadma̭n | sa̱jūrnāva̱ṃ svaya̭śasa̱ṃ sacā̱yoḥ ||9||
śri̱ye te̱ pṛśni̭rupa̱seca̭nī bhūcchri̱ye darvi̭rare̱pāḥ | yayā̱ sve pātrḙ si̱ñcasa̱ ut ||10||
śa̱taṃ vā̱ yada̭surya̱ prati̭ tvā sumi̱tra i̱tthāstaṷddurmi̱tra i̱tthāstaṷt |
āvo̱ yadda̭syu̱hatyḙ kutsapu̱traṃ prāvo̱ yadda̭syu̱hatyḙ kutsava̱tsam ||11||
11 bhūtāṃśaḥ kāśyapaḥ| aśvinau| triṣṭup|
u̱bhā ṷ nū̱naṃ tadida̭rthayethe̱ vi ta̭nvāthe̱ dhiyo̱ vastrā̱pasḙva |
sa̱dhrī̱cī̱nā yāta̭ve̱ prema̭jīgaḥ su̱dinḙva̱ pṛkṣa̱ ā ta̭ṃsayethe ||1||
u̱ṣṭārḙva̱ pharva̭reṣu śrayethe prāyo̱geva̱ śvātryā̱ śāsu̱retha̭: |
dū̱teva̱ hi ṣṭho ya̱śasā̱ janḙṣu̱ māpa̭ sthātaṃ mahi̱ṣevā̭va̱pānā̭t ||2||
sā̱ka̱ṃyujā̭ śaku̱nasyḙva pa̱kṣā pa̱śveva̭ ci̱trā yaju̱rā ga̭miṣṭam |
a̱gniri̭va deva̱yordī̭di̱vāṃsā̱ pari̭jmāneva yajathaḥ puru̱trā ||3||
ā̱pī vo̭ a̱sme pi̱tarḙva pu̱trogreva̭ ru̱cā nṛ̱patī̭va tu̱ryai |
iryḙva pu̱ṣṭyai ki̱raṇḙva bhu̱jyai śrṷṣṭī̱vānḙva̱ hava̱mā ga̭miṣṭam ||4||
vaṃsa̭geva pūṣa̱ryā̭ śi̱mbātā̭ mi̱treva̭ ṛ̱tā śa̱tarā̱ śāta̭pantā |
vājḙvo̱ccā vaya̭sā gharmye̱ṣṭhā meṣḙve̱ṣā sa̭pa̱ryā̱3 purī̭ṣā ||5||
sṛ̱ṇyḙva ja̱rbharī̭ tu̱rpharī̭tū naito̱śeva̭ tu̱rpharī̭ parpha̱rīkā̭ |
u̱da̱nya̱jeva̱ jema̭nā made̱rū tā mḙ ja̱rāyva̱jara̭ṃ ma̱rāyṷ ||6||
pa̱jreva̱ carca̭ra̱ṃ jāra̭ṃ ma̱rāyu̱ kṣadme̱vārthḙṣu tartarītha ugrā |
ṛ̱bhū nāpa̭tkharama̱jrā kha̱rajrṷrvā̱yurna pa̭rpharatkṣayadrayī̱ṇām ||7||
gha̱rmeva̱ madhṷ ja̱ṭharḙ sa̱nerū̱ bhagḙvitā tu̱rpharī̱ phāri̱vāra̭m |
pa̱ta̱reva̭ caca̱rā ca̱ndrani̭rṇi̱ṅmana̭ṛṅgā mana̱nyā̱3 na jagmī̭ ||8||
bṛ̱hantḙva ga̱mbharḙṣu prati̱ṣṭhāṃ pādḙva gā̱dhaṃ tara̭te vidāthaḥ |
karṇḙva̱ śāsu̱ranu̱ hi smarā̱thoṃ'śḙva no bhajataṃ ci̱tramapna̭: ||9||
ā̱ra̱ṅga̱reva̱ madhvera̭yethe sāra̱gheva̱ gavi̭ nī̱cīna̭bāre |
kī̱nārḙva̱ sveda̭māsiṣvidā̱nā kṣāmḙvo̱rjā sṷ̄yava̱sātsa̭cethe ||10||
ṛ̱dhyāma̱ stoma̭ṃ sanu̱yāma̱ vāja̱mā no̱ mantra̭ṃ sa̱rathe̱hopa̭ yātam |
yaśo̱ na pa̱kvaṃ madhu̱ goṣva̱ntarā bhū̱tāṃśo̭ a̱śvino̱: kāma̭maprāḥ ||11||
11 divya āṃgirasaḥ, dakṣiṇā vā prājāpatyā| dakṣinā, dakṣiṇādātāro vā| triṣṭup , 4 jagatī|
ā̱vira̭bhū̱nmahi̱ māgho̭nameṣā̱ṃ viśva̭ṃ jī̱vaṃ tama̭so̱ nira̭moci |
mahi̱ jyoti̭: pi̱tṛbhi̭rda̱ttamāgā̭du̱ruḥ panthā̱ dakṣi̭ṇāyā adarśi ||1||
u̱ccā di̱vi dakṣi̭ṇāvanto asthu̱rye a̭śva̱dāḥ sa̱ha te sūryḙṇa |
hi̱ra̱ṇya̱dā a̭mṛta̱tvaṃ bha̭jante vāso̱dāḥ so̭ma̱ pra ti̭ranta̱ āyṷ: ||2||
daivī̭ pū̱rtirdakṣi̭ṇā devaya̱jyā na ka̭vā̱ribhyo̭ na̱hi te pṛ̱ṇanti̭ |
athā̱ nara̱: praya̭tadakṣiṇāso'vadyabhi̱yā ba̱hava̭: pṛṇanti ||3||
śa̱tadhā̭raṃ vā̱yuma̱rkaṃ sva̱rvida̭ṃ nṛ̱cakṣa̭sa̱ste a̱bhi ca̭kṣate ha̱viḥ |
ye pṛ̱ṇanti̱ pra ca̱ yaccha̭nti saṃga̱me te dakṣi̭ṇāṃ duhate sa̱ptamā̭taram ||4||
dakṣi̭ṇāvānpratha̱mo hū̱ta ḙti̱ dakṣi̭ṇāvāngrāma̱ṇīragra̭meti |
tame̱va ma̭nye nṛ̱pati̱ṃ janā̭nā̱ṃ yaḥ pra̭tha̱mo dakṣi̭ṇāmāvi̱vāya̭ ||5||
tame̱va ṛṣi̱ṃ tamṷ bra̱hmāṇa̭māhuryajña̱nya̭ṃ sāma̱gāmṷktha̱śāsa̭m |
sa śu̱krasya̭ ta̱nvo̭ veda ti̱sro yaḥ pra̭tha̱mo dakṣi̭ṇayā ra̱rādha̭ ||6||
dakṣi̱ṇāśva̱ṃ dakṣi̭ṇā̱ gāṃ da̭dāti̱ dakṣi̭ṇā ca̱ndramu̱ta yaddhira̭ṇyam |
dakṣi̱ṇānna̭ṃ vanute̱ yo na̭ ā̱tmā dakṣi̭ṇā̱ṃ varma̭ kṛṇute vijā̱nan ||7||
na bho̱jā ma̭mru̱rna nya̱rthamī̭yu̱rna ri̭ṣyanti̱ na vya̭thante ha bho̱jāḥ |
i̱daṃ yadviśva̱ṃ bhuva̭na̱ṃ sva̭ścai̱tatsarva̱ṃ dakṣi̭ṇaibhyo dadāti ||8||
bho̱jā ji̭gyuḥ sura̱bhiṃ yoni̱magrḙ bho̱jā ji̭gyurva̱dhvaṃ1 yā su̱vāsā̭: |
bho̱jā ji̭gyuranta̱:peya̱ṃ surā̭yā bho̱jā ji̭gyu̱rye ahṷ̄tāḥ pra̱yanti̭ ||9||
bho̱jāyāśva̱ṃ saṃ mṛ̭jantyā̱śuṃ bho̱jāyā̭ste ka̱nyā̱3 śumbha̭mānā |
bho̱jasye̱daṃ pṷṣka̱riṇī̭va̱ veśma̱ pari̭ṣkṛtaṃ devamā̱neva̭ ci̱tram ||10||
bho̱jamaśvā̭: suṣṭhu̱vāho̭ vahanti su̱vṛdratho̭ vartate̱ dakṣi̭ṇāyāḥ |
bho̱jaṃ dḙvāso'vatā̱ bharḙṣu bho̱jaḥ śatrṷ̄ntsamanī̱keṣu̱ jetā̭ ||11||
11 paṇayo'surāḥ| saramā devatā| 2,4,6,8,10-11 saramā devaśunī ṛṣikā| paṇayo devatā| triṣṭup|
kimi̱cchantī̭ sa̱ramā̱ predamā̭naḍdū̱re hyadhvā̱ jagṷriḥ parā̱caiḥ |
kāsmehi̭ti̱: kā pari̭takmyāsītka̱thaṃ ra̱sāyā̭ atara̱: payā̭ṃsi ||1||
indra̭sya dū̱tīri̭ṣi̱tā ca̭rāmi ma̱ha i̱cchantī̭ paṇayo ni̱dhīnva̭: |
a̱ti̱ṣkado̭ bhi̱yasā̱ tanna̭ āva̱ttathā̭ ra̱sāyā̭ atara̱ṃ payā̭ṃsi ||2||
kī̱dṛṅṅindra̭: sarame̱ kā dṛ̭śī̱kā yasye̱daṃ dū̱tīrasa̭raḥ parā̱kāt |
ā ca̱ gacchā̭nmi̱tramḙnā dadhā̱mā'thā̱ gavā̱ṃ gopa̭tirno bhavāti ||3||
nāhaṃ taṃ vḙda̱ dabhya̱ṃ dabha̱tsa yasye̱daṃ dū̱tīrasa̭raṃ parā̱kāt |
na taṃ gṷ̄hanti sra̱vato̭ gabhī̱rā ha̱tā indrḙṇa paṇayaḥ śayadhve ||4||
i̱mā gāva̭: sarame̱ yā aiccha̱: pari̭ di̱vo antā̭ntsubhage̱ pata̭ntī |
kasta̭ enā̱ ava̭ sṛjā̱dayṷdhvyu̱tāsmāka̱māyṷdhā santi ti̱gmā ||5||
a̱se̱nyā va̭: paṇayo̱ vacā̭ṃsyaniṣa̱vyāsta̱nva̭: santu pā̱pīḥ |
adhṛ̭ṣṭo va̱ eta̱vā a̭stu̱ panthā̱ bṛha̱spati̭rva ubha̱yā na mṛ̭ḻāt ||6||
a̱yaṃ ni̱dhiḥ sa̭rame̱ adri̭budhno̱ gobhi̱raśvḙbhi̱rvasṷbhi̱rnyṛ̭ṣṭaḥ |
rakṣa̭nti̱ taṃ pa̱ṇayo̱ ye sṷgo̱pā rekṷ pa̱damala̭ka̱mā ja̭gantha ||7||
eha ga̭ma̱nnṛṣa̭ya̱: soma̭śitā a̱yāsyo̱ aṅgi̭raso̱ nava̭gvāḥ |
ta e̱tamū̱rvaṃ vi bha̭janta̱ gonā̱mathai̱tadvaca̭: pa̱ṇayo̱ vama̱nnit ||8||
e̱vā ca̱ tvaṃ sa̭rama āja̱gantha̱ prabā̭dhitā̱ saha̭sā̱ daivyḙna |
svasā̭raṃ tvā kṛṇavai̱ mā puna̭rgā̱ apa̭ te̱ gavā̭ṃ subhage bhajāma ||9||
nāhaṃ vḙda bhrātṛ̱tvaṃ no sva̭sṛ̱tvamindro̭ vidu̱raṅgi̭rasaśca gho̱rāḥ |
gokā̭mā me acchadaya̱nyadāya̱mapāta̭ ita paṇayo̱ varī̭yaḥ ||10||
dū̱rami̭ta paṇayo̱ varī̭ya̱ udgāvo̭ yantu mina̱tīṝ̱tena̭ |
bṛha̱spati̱ryā avi̭nda̱nnigṷ̄ḻhā̱: somo̱ grāvā̭ṇa̱ ṛṣa̭yaśca̱ viprā̭: ||11||
7 juhūrbrahmajāyā, brāhmaḥ ūrdhvanābhā vā|viśvedevāḥ| triṣṭup , 6-7 anuṣṭup|
tḙ'vadanpratha̱mā bra̭hmakilbi̱ṣe'kṷ̄pāraḥ sali̱lo mā̭ta̱riśvā̭ |
vī̱ḻuha̭rā̱stapa̭ u̱gro ma̭yo̱bhūrāpo̭ de̱vīḥ pra̭thama̱jā ṛ̱tena̭ ||1||
somo̱ rājā̭ pratha̱mo bra̭hmajā̱yāṃ puna̱: prāya̭ccha̱dahṛ̭ṇīyamānaḥ |
a̱nva̱rti̱tā varṷṇo mi̱tra ā̭sīda̱gnirhotā̭ hasta̱gṛhyā ni̭nāya ||2||
hastḙnai̱va grā̱hya̭ ā̱dhira̭syā brahmajā̱yeyamiti̱ cedavo̭can |
na dū̱tāya̭ pra̱hyḙ tastha e̱ṣā tathā̭ rā̱ṣṭraṃ gṷpi̱taṃ kṣa̱triya̭sya ||3||
de̱vā e̱tasyā̭mavadanta̱ pūrvḙ saptaṛ̱ṣaya̱stapa̭se̱ ye ni̭ṣe̱duḥ |
bhī̱mā jā̱yā brā̭hma̱ṇasyopa̭nītā du̱rdhāṃ da̭dhāti para̱me vyo̭man ||4||
bra̱hma̱cā̱rī ca̭rati̱ vevi̭ṣa̱dviṣa̱: sa de̱vānā̭ṃ bhava̱tyeka̱maṅga̭m |
tena̭ jā̱yāmanva̭vinda̱dbṛha̱spati̱: somḙna nī̱tāṃ ju̱hvaṃ1 na dḙvāḥ ||5||
puna̱rvai de̱vā a̭dadu̱: puna̭rmanu̱ṣyā̭ u̱ta | rājā̭naḥ sa̱tyaṃ kṛ̭ṇvā̱nā bra̭hmajā̱yāṃ puna̭rdaduḥ ||6||
pu̱na̱rdāya̭ brahmajā̱yāṃ kṛ̱tvī de̱vairni̭kilbi̱ṣam | ūrja̭ṃ pṛthi̱vyā bha̱ktvāyo̭rugā̱yamupā̭sate ||7||
11 jamadagnirbhārgavaḥ, jāmadagnyo rāmo vā| āprīsūktaṃ = (1 idhmaḥ samiddho'gnirvā, 2 tanūnapāt , 3 iḻa:, 4 barhiḥ, 5 devīrdvāraḥ, 6 uṣāsānaktā, 7 daivyau hotārau pracetasau, 8 trisro devyaḥ sarasvatīḻābhāratyaḥ, 9 tvaṣṭā, 10 vanaspatiḥ, 11 svāhākṛtayaḥ) | triṣṭup|
sami̭ddho a̱dya manṷṣo duro̱ṇe de̱vo de̱vānya̭jasi jātavedaḥ |
ā ca̱ vaha̭ mitramahaściki̱tvāntvaṃ dū̱taḥ ka̱vira̭si̱ pracḙtāḥ ||1||
tanṷ̄napātpa̱tha ṛ̱tasya̱ yānā̱nmadhvā̭ sama̱ñjantsva̭dayā sujihva |
manmā̭ni dhī̱bhiru̱ta ya̱jñamṛ̱ndhandḙva̱trā ca̭ kṛṇuhyadhva̱raṃ na̭: ||2||
ā̱juhvā̭na̱ īḍyo̱ vandya̱ścā ''yā̭hyagne̱ vasṷbhiḥ sa̱joṣā̭: |
tvaṃ de̱vānā̭masi yahva̱ hotā̱ sa ḙnānyakṣīṣi̱to yajī̭yān ||3||
prā̱cīna̭ṃ ba̱rhiḥ pra̱diśā̭ pṛthi̱vyā vasto̭ra̱syā vṛ̭jyata̱ra agre̱ ahnā̭m |
vyṷ prathate vita̱raṃ varī̭yo de̱vebhyo̱ adi̭taye syo̱nam ||4||
vyaca̭svatīrurvi̱yā vi śra̭yantā̱ṃ pati̭bhyo̱ na jana̭ya̱: śumbha̭mānāḥ |
devī̭rdvāro bṛhatīrviśvaminvā de̱vebhyo̭ bhavata suprāya̱ṇāḥ ||5||
ā su̱ṣvaya̭ntī yaja̱te upā̭ke u̱ṣāsā̱naktā̭ sadatā̱ṃ ni yonaṷ |
di̱vye yoṣa̭ṇe bṛha̱tī sṷru̱kme adhi̱ śriya̭ṃ śukra̱piśa̱ṃ dadhā̭ne ||6||
daivyā̱ hotā̭rā pratha̱mā su̱vācā̱ mimā̭nā ya̱jñaṃ manṷṣo̱ yaja̭dhyai |
pra̱co̱daya̭ntā vi̱dathḙṣu kā̱rū prā̱cīna̱ṃ jyoti̭: pra̱diśā̭ di̱śantā̭ ||7||
ā no̭ ya̱jñaṃ bhāra̭tī̱ tūya̭me̱tviḻā̭ manu̱ṣvadi̱ha ce̱taya̭ntī |
ti̱sro de̱vīrba̱rhiredaṃ syo̱naṃ sara̭svatī̱ svapa̭saḥ sadantu ||8||
ya i̱me dyāvā̭pṛthi̱vī jani̭trī rū̱pairapi̭ṃśa̱dbhuva̭nāni̱ viśvā̭ |
tama̱dya ho̭tariṣi̱to yajī̭yānde̱vaṃ tvaṣṭā̭rami̱ha ya̭kṣi vi̱dvān ||9||
u̱pāva̭sṛja̱ tmanyā̭ sama̱ñjande̱vānā̱ṃ pātha̭ ṛtu̱thā ha̱vīṃṣi̭ |
vana̱spati̭: śami̱tā de̱vo a̱gniḥ svada̭ntu ha̱vyaṃ madhṷnā ghṛ̱tena̭ ||10||
sa̱dyo jā̱to vya̭mimīta ya̱jñama̱gnirde̱vānā̭mabhavatpuro̱gāḥ |
a̱sya hotṷ: pra̱diśyṛ̱tasya̭ vā̱ci svāhā̭kṛtaṃ ha̱vira̭dantu de̱vāḥ ||11||
10 vairūpo'ṣṭādaṃṣṭraḥ| indraḥ| triṣṭup|
manī̭ṣiṇa̱: pra bha̭radhvaṃ manī̱ṣāṃ yathā̭yathā ma̱taya̱: santi̭ nṛ̱ṇām |
indra̭ṃ sa̱tyairera̭yāmā kṛ̱tebhi̱: sa hi vī̱ro gi̭rvaṇa̱syurvidā̭naḥ ||1||
ṛ̱tasya̱ hi sada̭so dhī̱tiradyau̱tsaṃ gā̭rṣṭe̱yo vṛ̭ṣa̱bho gobhi̭rānaṭ |
uda̭tiṣṭhattavi̱ṣeṇā̱ ravḙṇa ma̱hānti̭ ci̱tsaṃ vi̭vyācā̱ rajā̭ṃsi ||2||
indra̱: kila̱ śrutyā̭ a̱sya vḙda̱ sa hi ji̱ṣṇuḥ pa̭thi̱kṛtsūryā̭ya |
ānmenā̭ṃ kṛ̱ṇvannacyṷto̱ bhuva̱dgoḥ pati̭rdi̱vaḥ sa̭na̱jā apra̭tītaḥ ||3||
indro̭ ma̱hnā ma̭ha̱to a̭rṇa̱vasya̭ vra̱tāmi̭nā̱daṅgi̭robhirgṛṇā̱naḥ |
pu̱rūṇi̭ ci̱nni ta̭tānā̱ rajā̭ṃsi dā̱dhāra̱ yo dha̱ruṇa̭ṃ sa̱tyatā̭tā ||4||
indro̭ di̱vaḥ pra̭ti̱māna̭ṃ pṛthi̱vyā viśvā̭ veda̱ sava̭nā̱ hanti̱ śuṣṇa̭m |
ma̱hīṃ ci̱ddyāmāta̭no̱tsūryḙṇa cā̱skambha̭ ci̱tkambha̭nena̱ skabhī̭yān ||5||
vajrḙṇa̱ hi vṛ̭tra̱hā vṛ̱tramasta̱radḙvasya̱ śūśṷvānasya mā̱yāḥ |
vi dhṛ̭ṣṇo̱ atra̭ dhṛṣa̱tā ja̭gha̱nthā'thā̭bhavo maghavanbā̱hvo̭jāḥ ||6||
saca̭nta̱ yadu̱ṣasa̱: sūryḙṇa ci̱trāma̭sya ke̱tavo̱ rāma̭vindan |
ā yannakṣa̭tra̱ṃ dadṛ̭śe di̱vo na puna̭rya̱to naki̭ra̱ddhā nu vḙda ||7||
dū̱raṃ kila̭ pratha̱mā ja̭gmurāsā̱mindra̭sya̱ yāḥ pra̭sa̱ve sa̱srurāpa̭: |
kva̭ svi̱dagra̱ṃ kva̭ bu̱dhna ā̭sā̱māpo̱ madhya̱ṃ kva̭ vo nū̱namanta̭: ||8||
sṛ̱jaḥ sindhū̱~rahi̭nā jagrasā̱nā~ ādide̱tāḥ pra vi̭vijre ja̱vena̭ |
mumṷkṣamāṇā u̱ta yā mṷmu̱cre'dhede̱tā na ra̭mante̱ niti̭ktāḥ ||9||
sa̱dhrīcī̱: sindhṷmuśa̱tīri̭vāyantsa̱nājjā̱ra ā̭ri̱taḥ pū̱rbhidā̭sām |
asta̱mā te̱ pārthi̭vā̱ vasṷ̄nya̱sme ja̭gmuḥ sū̱nṛtā̭ indra pū̱rvīḥ ||10||
10 vairūpo nabhaḥ prabhedanaḥ| indraḥ| triṣṭup|
indra̱ piba̭ pratikā̱maṃ su̱tasya̭ prātaḥsā̱vastava̱ hi pū̱rvapī̭tiḥ |
harṣa̭sva̱ hanta̭ve śūra̱ śatrṷ̄nu̱kthebhi̭ṣṭe vī̱ryā̱3 pra bra̭vāma ||1
yaste̱ ratho̱ mana̭so̱ javī̭yā̱nendra̱ tena̭ soma̱peyā̭ya yāhi |
tūya̱mā te̱ hara̭ya̱: pra dra̭vantu̱ yebhi̱ryāsi̱ vṛṣa̭bhi̱rmanda̭mānaḥ ||2||
hari̭tvatā̱ varca̭sā̱ sūrya̭sya̱ śreṣṭhai̭ rū̱paista̱nva̭ṃ sparśayasva |
a̱smābhi̭rindra̱ sakhi̭bhirhuvā̱naḥ sa̭dhrīcī̱no mā̭dayasvā ni̱ṣadya̭ ||3||
yasya̱ tyattḙ mahi̱māna̱ṃ madḙṣvi̱me ma̱hī roda̭sī̱ nāvi̭viktām |
tadoka̱ ā hari̭bhirindra yu̱ktaiḥ pri̱yebhi̭ryāhi pri̱yamanna̱maccha̭ ||4||
yasya̱ śaśva̭tpapi̱vā~ i̭ndra̱ śatrṷ̄nanānukṛ̱tyā raṇyā̭ ca̱kartha̭ |
sa te̱ pura̭ṃdhi̱ṃ tavi̭ṣīmiyarti̱ sa te̱ madā̭ya su̱ta i̭ndra̱ soma̭: ||5||
i̱daṃ te̱ pātra̱ṃ sana̭vittamindra̱ pibā̱ soma̭me̱nā śa̭takrato |
pū̱rṇa ā̭hā̱vo ma̭di̱rasya̱ madhvo̱ yaṃ viśva̱ ida̭bhi̱harya̭nti de̱vāḥ ||6||
vi hi tvāmi̭ndra puru̱dhā janā̭so hi̱tapra̭yaso vṛṣabha̱ hvaya̭nte |
a̱smāka̭ṃ te̱ madhṷmattamānī̱mā bhṷva̱ntsava̭nā̱ teṣṷ harya ||7||
pra ta̭ indra pū̱rvyāṇi̱ pra nū̱naṃ vī̱ryā̭ vocaṃ pratha̱mā kṛ̱tāni̭ |
sa̱tī̱nama̭nyuraśrathāyo̱ adri̭ṃ suveda̱nāma̭kṛṇo̱rbrahma̭ṇe̱ gām ||8||
ni ṣu sī̭da gaṇapate ga̱ṇeṣu̱ tvāmā̭hu̱rvipra̭tamaṃ kavī̱nām |
na ṛ̱te tvatkri̭yate̱ kiṃ ca̱nāre ma̱hāma̱rkaṃ ma̭ghavañci̱trama̭rca ||9||
a̱bhi̱khyā no̭ maghava̱nnādha̭mānā̱ntsakhḙ bo̱dhi va̭supate̱ sakhī̭nām |
raṇa̭ṃ kṛdhi raṇakṛtsatyaśu̱ṣmā'bha̭kte ci̱dā bha̭jā rā̱ye a̱smān ||10||
10 vairūpaḥ śataprabhedanaḥ| indraḥ| jagatī, 10 triṣṭup|
tama̭sya̱ dyāvā̭pṛthi̱vī sacḙtasā̱ viśvḙbhirde̱vairanu̱ śuṣma̭māvatām |
yadaitkṛ̭ṇvā̱no ma̭hi̱māna̭mindri̱yaṃ pī̱tvī soma̭sya̱ kratṷmā~ avardhata ||1||
tama̭sya̱ viṣṇṷrmahi̱māna̱moja̭sā̱ṃ'śuṃ da̭dha̱nvānmadhṷno̱ vi ra̭pśate |
de̱vebhi̱rindro̭ ma̱ghavā̭ sa̱yāva̭bhirvṛ̱traṃ ja̭gha̱nvā~ a̭bhava̱dvarḙṇyaḥ ||2||
vṛ̱treṇa̱ yadahi̭nā̱ bibhra̱dāyṷdhā sa̱masthi̭thā yu̱dhaye̱ śaṃsa̭mā̱vidḙ |
viśvḙ te̱ atra̭ ma̱ruta̭: sa̱ha tmanā'va̭rdhannugra mahi̱māna̭mindri̱yam ||3||
ja̱jñā̱na e̱va vya̭bādhata̱ spṛdha̱: prāpa̭śyadvī̱ro a̱bhi pauṃsya̱ṃ raṇa̭m |
avṛ̭śca̱dadri̱mava̭ sa̱syada̭: sṛja̱dasta̭bhnā̱nnāka̭ṃ svapa̱syayā̭ pṛ̱thum ||4||
ādindra̭: sa̱trā tavi̭ṣīrapatyata̱ varī̭yo̱ dyāvā̭pṛthi̱vī a̭bādhata |
avā̭bharaddhṛṣi̱to vajra̭māya̱saṃ śeva̭ṃ mi̱trāya̱ varṷṇāya dā̱śuṣḙ ||5||
indra̱syātra̱ tavi̭ṣībhyo vira̱pśina̭ ṛghāya̱to a̭raṃhayanta ma̱nyavḙ |
vṛ̱traṃ yadu̱gro vyavṛ̭śca̱doja̭sā̱'po bibhra̭ta̱ṃ tama̭sā̱ parī̭vṛtam ||6||
yā vī̱ryā̭ṇi pratha̱māni̱ kartvā̭ mahi̱tvebhi̱ryata̭mānau samī̱yatṷ: |
dhvā̱ntaṃ tamo'va̭ dadhvase ha̱ta indro̭ ma̱hnā pū̱rvahṷ̄tāvapatyata ||7||
viśvḙ de̱vāso̱ adha̱ vṛṣṇyā̭ni̱ te'va̭rdhaya̱ntsoma̭vatyā vaca̱syayā̭ |
ra̱ddhaṃ vṛ̱tramahi̱mindra̭sya̱ hanma̭nā̱'gnirna jambhai̭stṛ̱ṣvanna̭māvayat ||8||
bhūri̱ dakṣḙbhirvaca̱nebhi̱ṝkva̭bhiḥ sa̱khyebhi̭: sa̱khyāni̱ pra vo̭cata |
 indro̱ dhuni̭ṃ ca̱ cumṷriṃ ca da̱mbhaya̭ñchraddhāmana̱syā śṛ̭ṇute da̱bhīta̭ye ||9||
tvaṃ pu̱rūṇyā bha̭rā̱ svaśvyā̱ yebhi̱rmaṃsai̭ ni̱vaca̭nāni̱ śaṃsa̭n |
su̱gebhi̱rviśvā̭ duri̱tā ta̭rema vi̱do ṣu ṇa̭ urvi̱yā gā̱dhama̱dya ||10||
10 vairūpaḥ sadhriḥ, tāpaso dharmo vā| viśve devāḥ|triṣṭup, 4 jagatī|
gha̱rmā sama̭ntā tri̱vṛta̱ṃ vyā̭patu̱stayo̱rjuṣṭi̭ṃ māta̱riśvā̭ jagāma |
di̱vaspayo̱ didhi̭ṣāṇā aveṣanvi̱durde̱vāḥ sa̱hasā̭mānama̱rkam ||1||
ti̱sro de̱ṣṭrāya̱ niṝ̭tī̱rupā̭sate dīrgha̱śruto̱ vi hi jā̱nanti̱ vahna̭yaḥ |
tāsā̱ṃ ni ci̭kyuḥ ka̱vayo̭ ni̱dāna̱ṃ parḙṣu̱ yā guhyḙṣu vra̱teṣṷ ||2||
catṷṣkapardā yuva̱tiḥ su̱peśā̭ ghṛ̱tapra̭tīkā va̱yunā̭ni vaste |
tasyā̭ṃ supa̱rṇā vṛṣa̭ṇā̱ ni ṣḙdatu̱ryatra̭ de̱vā da̭dhi̱re bhā̭ga̱dheya̭m ||3||
eka̭: supa̱rṇaḥ sa sa̭mu̱dramā vi̭veśa̱ sa i̱daṃ viśva̱ṃ bhuva̭na̱ṃ vi ca̭ṣṭe |
taṃ pākḙna̱ mana̭sāpaśya̱manti̭ta̱staṃ mā̱tā rḙḻhi̱ sa ṷ reḻhi mā̱tara̭m ||4||
su̱pa̱rṇaṃ viprā̭: ka̱vayo̱ vaco̭bhi̱reka̱ṃ santa̭ṃ bahu̱dhā ka̭lpayanti |
chandā̭ṃsi ca̱ dadha̭to adhva̱reṣu̱ grahā̱ntsoma̭sya mimate̱ dvāda̭śa ||5||
ṣa̱ṭtri̱ṃśā~śca̭ ca̱tura̭: ka̱lpaya̭nta̱śchandā̭ṃsi ca̱ dadha̭ta ādvāda̱śam |
ya̱jñaṃ vi̱māya̭ ka̱vayo̭ manī̱ṣa ṛ̭ksā̱mābhyā̱ṃ pra ratha̭ṃ vartayanti ||6||
catṷrdaśā̱nye ma̭hi̱māno̭ asya̱ taṃ dhīrā̭ vā̱cā pra ṇa̭yanti sa̱pta |
āpnā̭naṃ tī̱rthaṃ ka i̱ha pra vo̭ca̱dyena̭ pa̱thā pra̱piba̭nte su̱tasya̭ ||7||
sa̱ha̱sra̱dhā pa̭ñcada̱śānyu̱kthā yāva̱ddyāvā̭pṛthi̱vī tāva̱dittat |
sa̱ha̱sra̱dhā ma̭hi̱māna̭: sa̱hasra̱ṃ yāva̱dbrahma̱ viṣṭhi̭ta̱ṃ tāva̭tī̱ vāk ||8||
kaśchanda̭sā̱ṃ yoga̱mā vḙda̱ dhīra̱: ko dhiṣṇyā̱ṃ prati̱ vāca̭ṃ papāda |
kamṛ̱tvijā̭maṣṭa̱maṃ śūra̭māhu̱rharī̱ indra̭sya̱ ni ci̭kāya̱ kaḥ svi̭t ||9||
bhūmyā̱ anta̱ṃ paryekḙ caranti̱ ratha̭sya dhū̱rṣu yu̱ktāso̭ asthuḥ |
śrama̭sya dā̱yaṃ vi bha̭jantyebhyo ya̱dā ya̱mo bhava̭ti ha̱rmye hi̱taḥ ||10||
9 vārṣṭihavya upastutaḥ| agniḥ|jagatī, 8 triṣṭup, 9 śakkarī|
ci̱tra icchiśo̱starṷṇasya va̱kṣatho̱ na yo mā̱tarā̭va̱pyeti̱ dhāta̭ve |
a̱nū̱dhā yadi̱ jīja̭na̱dadhā̭ ca̱ nu va̱vakṣa̭ sa̱dyo mahi̭ dū̱tyaṃ1 cara̭n ||1||
a̱gnirha̱ nāma̭ dhāyi̱ danna̱pasta̭ma̱: saṃ yo vanā̭ yu̱vate̱ bhasma̭nā da̱tā |
a̱bhi̱pra̱murā̭ ju̱hvā̭ svadhva̱ra i̱no na protha̭māno̱ yava̭se̱ vṛṣā̭ ||2||
taṃ vo̱ viṃ na dru̱ṣada̭ṃ de̱vamandha̭sa̱ indu̱ṃ protha̭ntaṃ pra̱vapa̭ntamarṇa̱vam |
ā̱sā vahni̱ṃ na śo̱ciṣā̭ vira̱pśina̱ṃ mahi̭vrata̱ṃ na sa̱raja̭nta̱madhva̭naḥ ||3||
vi yasya̭ te jrayasā̱nasyā̭jara̱ dhakṣo̱rna vātā̱: pari̱ santyacyṷtāḥ |
ā ra̱ṇvāso̱ yuyṷdhayo̱ na sa̭tva̱naṃ tri̱taṃ na̭śanta̱ pra śi̱ṣanta̭ i̱ṣṭayḙ ||4||
sa ida̱gniḥ kaṇva̭tama̱: kaṇva̭sakhā̱'ryaḥ para̱syānta̭rasya̱ tarṷṣaḥ |
a̱gniḥ pā̭tu gṛṇa̱to a̱gniḥ sū̱rīna̱gnirda̭dātu̱ teṣā̱mavo̭ naḥ ||5||
vā̱jinta̭māya̱ sahya̭se supitrya tṛ̱ṣu cyavā̭no̱ anṷ jā̱tavḙdase |
a̱nu̱dre ci̱dyo dhṛ̭ṣa̱tā vara̭ṃ sa̱te ma̱hinta̭māya̱ dhanva̱neda̭viṣya̱te ||6||
e̱vāgnirmartai̭: sa̱ha sū̱ribhi̱rvasṷ: ṣṭave̱ saha̭saḥ sū̱naro̱ nṛbhi̭: |
mi̱trāso̱ na ye sudhi̭tā ṛtā̱yavo̱ dyāvo̱ na dyu̱mnaira̱bhi santi̱ mānṷṣān ||7||
ūrjo̭ napātsahasāva̱nniti̭ tvopastu̱tasya̭ vandate̱ vṛṣā̱ vāk |
tvāṃ sto̭ṣāma̱ tvayā̭ su̱vīrā̱ drāghī̭ya̱ āyṷ: prata̱raṃ dadhā̭nāḥ ||8||
iti̭ tvāgne vṛṣṭi̱havya̭sya pu̱trā ṷpastu̱tāsa̱ ṛṣa̭yo'vocan |
tā~śca̭ pā̱hi gṛ̭ṇa̱taśca̭ sū̱rīnvaṣa̱ḍvaṣa̱ḻityū̱rdhvāso̭ anakṣa̱nnamo̱ nama̱ ityū̱rdhvāso̭ anakṣan ||9||
9 sthauro'gniyutaḥ sthauro'gniyūpo vā|indraḥ triṣṭup|
pibā̱ soma̭ṃ maha̱ta i̭ndri̱yāya̱ pibā̭ vṛ̱trāya̱ hanta̭ve śaviṣṭha |
piba̭ rā̱ye śava̭se hū̱yamā̭na̱: piba̱ madhva̭stṛ̱padi̱ndrā vṛ̭ṣasva ||1||
a̱sya pi̭ba kṣu̱mata̱: prasthi̭ta̱syendra̱ soma̭sya̱ vara̱mā su̱tasya̭ |
sva̱sti̱dā mana̭sā mādayasvā'rvācī̱no re̱vate̱ saubha̭gāya ||2||
ma̱mattṷ tvā di̱vyaḥ soma̭ indra ma̱mattu̱ yaḥ sū̱yate̱ pārthi̭veṣu |
ma̱mattu̱ yena̱ vari̭vaśca̱kartha̭ ma̱mattu̱ yena̭ niri̱ṇāsi̱ śatrṷ̄n ||3||
ā dvi̱barhā̭ ami̱no yā̱tvindro̱ vṛṣā̱ hari̭bhyā̱ṃ pari̭ṣikta̱mandha̭: |
gavyā su̱tasya̱ prabhṛ̭tasya̱ madhva̭: sa̱trā khedā̭maruśa̱hā vṛ̭ṣasva ||4||
ni ti̱gmāni̭ bhrā̱śaya̱nbhrāśyā̱nyava̭ sthi̱rā ta̭nuhi yātu̱jūnā̭m |
u̱grāya̭ te̱ saho̱ bala̭ṃ dadāmi pra̱tītyā̱ śatrṷ̄nviga̱deṣṷ vṛśca ||5||
vya1rya i̭ndra tanuhi̱ śravā̱ṃsyoja̭: sthi̱reva̱ dhanva̭no̱'bhimā̭tīḥ |
a̱sma̱drya̭gvāvṛdhā̱naḥ saho̭bhi̱rani̭bhṛṣṭasta̱nva̭ṃ vāvṛdhasva ||6||
i̱daṃ ha̱virma̭ghava̱ntubhya̭ṃ rā̱taṃ prati̭ samrā̱ḻahṛ̭ṇāno gṛbhāya |
tubhya̭ṃ su̱to ma̭ghava̱ntubhya̭ṃ pa̱kvo̱3'ddhī̭ndra̱ piba̭ ca̱ prasthi̭tasya ||7||
a̱ddhīdi̭ndra̱ prasthi̭te̱mā ha̱vīṃṣi̱ cano̭ dadhiṣva paca̱tota soma̭m |
praya̭svanta̱: prati̭ haryāmasi tvā sa̱tyāḥ sa̭ntu̱ yaja̭mānasya̱ kāmā̭: ||8||
prendrā̱gnibhyā̭ṃ suvaca̱syāmi̭yarmi̱ sindhā̭viva̱ prera̭ya̱ṃ nāva̭ma̱rkaiḥ |
ayā̭ iva̱ pari̭ caranti de̱vā ye a̱smabhya̭ṃ dhana̱dā u̱dbhida̭śca ||9||
9 bhikṣurāṃgirasaḥ| dhanānnadānaṃ| triṣṭup , 1-2 jagatī|
na vā ṷ de̱vāḥ kṣudha̱midva̱dhaṃ da̭duru̱tāśi̭ta̱mupa̭ gacchanti mṛ̱tyava̭: |
u̱to ra̱yiḥ pṛ̭ṇa̱to nopa̭ dasyatyu̱tāpṛ̭ṇanmarḍi̱tāra̱ṃ na vi̭ndate ||1||
ya ā̱dhrāya̭ cakamā̱nāya̭ pi̱tvo'nna̭vā̱ntsanra̭phi̱tāyo̭paja̱gmuṣḙ |
sthi̱raṃ mana̭: kṛṇu̱te seva̭te pu̱roto ci̱tsa ma̭rḍi̱tāra̱ṃ na vi̭ndate ||2||
sa idbho̱jo yo gṛ̱have̱ dadā̱tyanna̭kāmāya̱ cara̭te kṛ̱śāya̭ |
ara̭masmai bhavati̱ yāma̭hūtā u̱tāpa̱rīṣṷ kṛṇute̱ sakhā̭yam ||3||
na sa sakhā̱ yo na dadā̭ti̱ sakhyḙ sacā̱bhuve̱ saca̭mānāya pi̱tvaḥ |
apā̭smā̱tpreyā̱nna tadoko̭ asti pṛ̱ṇanta̭ma̱nyamara̭ṇaṃ cidicchet ||4||
pṛ̱ṇī̱yādinnādha̭mānāya̱ tavyā̱ndrāghī̭yāṃsa̱manṷ paśyeta̱ panthā̭m |
o hi varta̭nte̱ rathyḙva ca̱krā'nyama̭nya̱mupa̭ tiṣṭhanta̱ rāya̭: ||5||
mogha̱manna̭ṃ vindate̱ apra̭cetāḥ sa̱tyaṃ bra̭vīmi va̱dha itsa tasya̭ |
nārya̱maṇa̱ṃ puṣya̭ti̱ no sakhā̭ya̱ṃ keva̭lāgho bhavati kevalā̱dī ||6||
kṛ̱ṣannitphāla̱ āśi̭taṃ kṛṇoti̱ yannadhvā̭na̱mapa̭ vṛṅkte ca̱ritrai̭: |
vada̭nbra̱hmāva̭dato̱ vanī̭yānpṛ̱ṇannā̱pirapṛ̭ṇantama̱bhi ṣyā̭t ||7||
eka̭pā̱dbhūyo̭ dvi̱pado̱ vi ca̭krame dvi̱pāttri̱pāda̭ma̱bhyḙti pa̱ścāt |
catṷṣpādeti dvi̱padā̭mabhisva̱re sa̱mpaśya̭npa̱ṅktīrṷpa̱tiṣṭha̭mānaḥ ||8||
sa̱mau ci̱ddhastau̱ na sa̱maṃ vi̭viṣṭaḥ sammā̱tarā̭ ci̱nna sa̱maṃ dṷhāte |
ya̱mayo̭ści̱nna sa̱mā vī̱ryā̭ṇi jñā̱tī ci̱tsantau̱ na sa̱maṃ pṛ̭ṇītaḥ ||9||
9 urukṣaya āmahīyavaḥ| rakṣohā'gniḥ| gāyatrī|
agne̱ haṃsi̱ nya1triṇa̱ṃ dīdya̱nmartye̱ṣvā | sve kṣayḙ śucivrata ||1||
utti̭ṣṭhasi̱ svā̭huto ghṛ̱tāni̱ prati̭ modase | yattvā̱ sruca̭: sa̱masthi̭ran ||2||
sa āhṷto̱ vi ro̭cate̱'gnirī̱ḻenyo̭ gi̱rā | sru̱cā pratī̭kamajyate ||3||
ghṛ̱tenā̱gniḥ sama̭jyate̱ madhṷpratīka̱ āhṷtaḥ | roca̭māno vi̱bhāva̭suḥ ||4||
jara̭māṇa̱: sami̭dhyase de̱vebhyo̭ havyavāhana | taṃ tvā̭ havanta̱ martyā̭: ||5||
taṃ ma̭rtā̱ ama̭rtyaṃ ghṛ̱tenā̱gniṃ sa̭paryata | adā̭bhyaṃ gṛ̱hapa̭tim ||6||
adā̭bhyena śo̱ciṣā'gne̱ rakṣa̱stvaṃ da̭ha | go̱pā ṛ̱tasya̭ dīdihi ||7||
sa tvama̭gne̱ pratī̭kena̱ pratyo̭ṣa yātudhā̱nya̭: | u̱ru̱kṣayḙṣu̱ dīdya̭t ||8||
taṃ tvā̭ gī̱rbhirṷru̱kṣayā̭ havya̱vāha̱ṃ samī̭dhire | yaji̭ṣṭha̱ṃ mānṷṣe̱ janḙ ||9||
13 aindro laba:|ātmā (indraḥ) | gāyatrī|
iti̱ vā iti̭ me̱ mano̱ gāmaśva̭ṃ sanuyā̱miti̭ | ku̱vitsoma̱syāpā̱miti̭ ||1||
pra vātā̭ iva̱ dodha̭ta̱ unmā̭ pī̱tā a̭yaṃsata | ku̱vitsoma̱syāpā̱miti̭ ||2||
unmā̭ pī̱tā a̭yaṃsata̱ ratha̱maśvā̭ ivā̱śava̭: | ku̱vitsoma̱syāpā̱miti̭ ||3||
upa̭ mā ma̱tira̭sthita vā̱śrā pu̱trami̭va pri̱yam | ku̱vitsoma̱syāpā̱miti̭ ||4||
a̱haṃ taṣṭḙva va̱ndhura̱ṃ parya̭cāmi hṛ̱dā ma̱tim | ku̱vitsoma̱syāpā̱miti̭ ||5||
na̱hi mḙ akṣi̱pacca̱nā'cchā̭ntsu̱: pañca̭ kṛ̱ṣṭaya̭: | ku̱vitsoma̱syāpā̱miti̭ ||6||
na̱hi me̱ roda̭sī u̱bhe a̱nyaṃ pa̱kṣaṃ ca̱na prati̭ | ku̱vitsoma̱syāpā̱miti̭ ||7||
a̱bhi dyāṃ ma̭hi̱nā bhṷvama̱bhī̱3māṃ pṛ̭thi̱vīṃ ma̱hīm | ku̱vitsoma̱syāpā̱miti̭ ||8||
hantā̱haṃ pṛ̭thi̱vīmi̱māṃ ni da̭dhānī̱ha ve̱ha vā̭ | ku̱vitsoma̱syāpā̱miti̭ ||9||
o̱ṣamitpṛ̭thi̱vīma̱haṃ ja̱ṅghanā̭nī̱ha ve̱ha vā̭ | ku̱vitsoma̱syāpā̱miti̭ ||10||
di̱vi mḙ a̱nyaḥ pa̱kṣo̱3'dho a̱nyama̭cīkṛṣam | ku̱vitsoma̱syāpā̱miti̭ ||11||
a̱hama̭smi mahāma̱ho̭'bhina̱bhyamudī̭ṣitaḥ | ku̱vitsoma̱syāpā̱miti̭ ||12||
gṛ̱ho yā̱myara̭ṃkṛto de̱vebhyo̭ havya̱vāha̭naḥ | ku̱vitsoma̱syāpā̱miti̭ ||13||
9 ātharvaṇo bṛhahivaḥ| indraḥ| triṣṭup|
tadidā̭sa̱ bhuva̭neṣu̱ jyeṣṭha̱ṃ yato̭ ja̱jña u̱grastve̱ṣanṛ̭mṇaḥ |
sa̱dyo ja̭jñā̱no ni ri̭ṇāti̱ śatrū̱nanu̱ yaṃ viśve̱ mada̱ntyūmā̭: ||1||
vā̱vṛ̱dhā̱naḥ śava̭sā̱ bhūryo̭jā̱: śatrṷrdā̱sāya̭ bhi̱yasa̭ṃ dadhāti |
avya̭nacca vya̱nacca̱ sasni̱ saṃ tḙ navanta̱ prabhṛ̭tā̱ madḙṣu ||2||
tve kratu̱mapi̭ vṛñjanti̱ viśve̱ dviryade̱te trirbhava̱ntyūmā̭: |
svā̱doḥ svādī̭yaḥ svā̱dunā̭ sṛjā̱ sama̱daḥ su madhu̱ madhṷnā̱bhi yo̭dhīḥ ||3||
iti̭ ci̱ddhi tvā̱ dhanā̱ jaya̭nta̱ṃ madḙmade anu̱mada̭nti̱ viprā̭: |
ojī̭yo dhṛṣṇo sthi̱ramā ta̭nuṣva̱ mā tvā̭ dabhanyātu̱dhānā̭ du̱revā̭: ||4||
tvayā̭ va̱yaṃ śā̭śadmahe̱ raṇḙṣu pra̱paśya̭nto yu̱dhenyā̭ni̱ bhūri̭ |
co̱dayā̭mi ta̱ āyṷdhā̱ vaco̭bhi̱: saṃ tḙ śiśāmi̱ brahma̭ṇā̱ vayā̭ṃsi ||5||
stu̱ṣeyya̭ṃ puru̱varpa̭sa̱mṛbhva̭mi̱nata̭mamā̱ptyamā̱ptyānā̭m |
ā da̭rṣate̱ śava̭sā sa̱pta dānū̱npra sā̭kṣate prati̱mānā̭ni̱ bhūri̭ ||6||
ni tadda̭dhi̱ṣe'va̭ra̱ṃ para̭ṃ ca̱ yasmi̱nnāvi̱thāva̭sā duro̱ṇe |
ā mā̱tarā̭ sthāpayase jiga̱tnū ata̭ inoṣi̱ karva̭rā pu̱rūṇi̭ ||7||
i̱mā brahma̭ bṛ̱haddi̭vo viva̱ktīndrā̭ya śū̱ṣama̭gri̱yaḥ sva̱rṣāḥ |
ma̱ho go̱trasya̭ kṣayati sva̱rājo̱ dura̭śca̱ viśvā̭ avṛṇo̱dapa̱ svāḥ ||8||
e̱vā ma̱hānbṛ̱haddi̭vo̱ atha̱rvā'vo̭ca̱tsvāṃ ta̱nva1mindra̭me̱va |
svasā̭ro māta̱ribhva̭rīrari̱prā hi̱nvanti̭ ca̱ śava̭sā va̱rdhaya̭nti ca ||9||
10 hiraṇyagarbhaḥ prājāpatya:| kaḥ(prajāpatiḥ)| triṣṭup|
hi̱ra̱ṇya̱ga̱rbhaḥ sama̭varta̱tāgrḙ bhū̱tasya̭ jā̱taḥ pati̱reka̭ āsīt |
sa dā̭dhāra pṛthi̱vīṃ dyāmu̱temāṃ kasmai̭ de̱vāya̭ ha̱viṣā̭ vidhema ||1||
ya ā̭tma̱dā ba̭la̱dā yasya̱ viśva̭ u̱pāsa̭te pra̱śiṣa̱ṃ yasya̭ de̱vāḥ |
yasya̭ chā̱yāmṛta̱ṃ yasya̭ mṛ̱tyuḥ kasmai̭ de̱vāya̭ ha̱viṣā̭ vidhema ||2||
yaḥ prā̭ṇa̱to ni̭miṣa̱to ma̭hi̱tvaika̱ idrājā̱ jaga̭to ba̱bhūva̭ |
ya īśḙ a̱sya dvi̱pada̱ścatṷṣpada̱: kasmai̭ de̱vāya̭ ha̱viṣā̭ vidhema ||3||
yasye̱me hi̱mava̭nto mahi̱tvā yasya̭ samu̱draṃ ra̱sayā̭ sa̱hāhuḥ |
yasye̱māḥ pra̱diśo̱ yasya̭ bā̱hū kasmai̭ de̱vāya̭ ha̱viṣā̭ vidhema ||4||
yena̱ dyauru̱grā pṛ̭thi̱vī ca̭ dṛ̱ḻhā yena̱ sva̭ stabhi̱taṃ yena̱ nāka̭: |
yo a̱ntari̭kṣe̱ raja̭so vi̱māna̱: kasmai̭ de̱vāya̭ ha̱viṣā̭ vidhema ||5||
yaṃ kranda̭sī̱ ava̭sā tastabhā̱ne a̱bhyaikṣḙtā̱ṃ mana̭sā̱ reja̭māne |
yatrādhi̱ sūra̱ udi̭to vi̱bhāti̱ kasmai̭ de̱vāya̭ ha̱viṣā̭ vidhema ||6||
āpo̭ ha̱ yadbṛ̭ha̱tīrviśva̱māya̱ngarbha̱ṃ dadhā̭nā ja̱naya̭ntīra̱gnim |
tato̭ de̱vānā̱ṃ sama̭varta̱tāsu̱reka̱: kasmai̭ de̱vāya̭ ha̱viṣā̭ vidhema ||7||
yaści̱dāpo̭ mahi̱nā pa̱ryapa̭śya̱ddakṣa̱ṃ dadhā̭nā ja̱naya̭ntīrya̱jñam |
yo de̱veṣvadhi̭ de̱va eka̱ āsī̱tkasmai̭ de̱vāya̭ ha̱viṣā̭ vidhema ||8||
mā no̭ hiṃsījjani̱tā yaḥ pṛ̭thi̱vyā yo vā̱ diva̭ṃ sa̱tyadha̭rmā ja̱jāna̭ |
yaścā̱paśca̱ndrā bṛ̭ha̱tīrja̱jāna̱ kasmai̭ de̱vāya̭ ha̱viṣā̭ vidhema ||9||
prajā̭pate̱ na tvade̱tānya̱nyo viśvā̭ jā̱tāni̱ pari̱ tā ba̭bhūva |
yatkā̭māste juhu̱mastanno̭ astu va̱yaṃ syā̭ma̱ pata̭yo rayī̱ṇām ||10
8 citramahā vāsiṣṭhaḥ | agniḥ| jagatīḥ 1,5 triṣṭup|
vasu̱ṃ na ci̱trama̭hasaṃ gṛṇīṣe vā̱maṃ śeva̱mati̭thimadviṣe̱ṇyam |
sa rā̭sate śu̱rudho̭ vi̱śvadhā̭yaso̱'gnirhotā̭ gṛ̱hapa̭tiḥ su̱vīrya̭m ||1
ju̱ṣā̱ṇo a̭gne̱ prati̭ harya me̱ vaco̱ viśvā̭ni vi̱dvānva̱yunā̭ni sukrato |
ghṛta̭nirṇi̱gbrahma̭ṇe gā̱tumera̭ya̱ tava̭ de̱vā a̭janaya̱nnanṷ vra̱tam ||2||
sa̱pta dhāmā̭ni pari̱yannama̭rtyo̱ dāśa̭ddā̱śuṣḙ su̱kṛtḙ māmahasva |
su̱vīrḙṇa ra̱yiṇā̭gne svā̱bhuvā̱ yasta̱ āna̭ṭ sa̱midhā̱ taṃ jṷṣasva ||3||
ya̱jñasya̭ ke̱tuṃ pra̭tha̱maṃ pu̱rohi̭taṃ ha̱viṣma̭nta īḻate sa̱pta vā̱jina̭m |
śṛ̱ṇvanta̭ma̱gniṃ ghṛ̱tapṛ̭ṣṭhamu̱kṣaṇa̭ṃ pṛ̱ṇanta̭ṃ de̱vaṃ pṛ̭ṇa̱te su̱vīrya̭m ||4||
tvaṃ dū̱taḥ pra̭tha̱mo varḙṇya̱: sa hū̱yamā̭no a̱mṛtā̭ya matsva |
tvāṃ ma̭rjayanma̱ruto̭ dā̱śuṣo̭ gṛ̱he tvāṃ stomḙbhi̱rbhṛga̭vo̱ vi rṷrucuḥ ||5||
iṣa̭ṃ du̱hantsu̱dughā̭ṃ vi̱śvadhā̭yasaṃ yajña̱priye̱ yaja̭mānāya sukrato |
agnḙ ghṛ̱tasnu̱striṝ̱tāni̱ dīdya̭dva̱rtirya̱jñaṃ pa̭ri̱yantsṷkratūyase ||6||
tvāmida̱syā u̱ṣaso̱ vyṷṣṭiṣu dū̱taṃ kṛ̭ṇvā̱nā a̭yajanta̱ mānṷṣāḥ |
tvāṃ de̱vā ma̭ha̱yāyyā̭ya vāvṛdhu̱rājya̭magne nimṛ̱janto̭ adhva̱re ||7||
ni tvā̱ vasi̭ṣṭhā ahvanta vā̱jina̭ṃ gṛ̱ṇanto̭ agne vi̱dathḙṣu ve̱dhasa̭: |
rā̱yaspoṣa̱ṃ yaja̭māneṣu dhāraya yū̱yaṃ pā̭ta sva̱stibhi̱: sadā̭ naḥ ||8||
8 veno bhārgavaḥ| venaḥ| triṣṭup|
a̱yaṃ ve̱naśco̭daya̱tpṛśni̭garbhā̱ jyoti̭rjarāyū̱ raja̭so vi̱mānḙ |
i̱mama̱pāṃ sa̭ṃga̱me sūrya̭sya̱ śiśu̱ṃ na viprā̭ ma̱tibhī̭ rihanti ||1
sa̱mu̱drādū̱rmimudi̭yarti ve̱no na̭bho̱jāḥ pṛ̱ṣṭhaṃ ha̭rya̱tasya̭ darśi |
ṛ̱tasya̱ sānā̱vadhi̭ vi̱ṣṭapi̱ bhrāṭ sa̭mā̱naṃ yoni̭ma̱bhya̭nūṣata̱ vrāḥ ||2||
sa̱mā̱naṃ pū̱rvīra̱bhi vā̭vaśā̱nāstiṣṭha̭nva̱tsasya̭ mā̱tara̱: sanī̭ḻāḥ |
ṛ̱tasya̱ sānā̱vadhi̭ cakramā̱ṇā ri̱hanti̱ madhvo̭ a̱mṛta̭sya̱ vāṇī̭: ||3||
jā̱nanto̭ rū̱pama̭kṛpanta̱ viprā̭ mṛ̱gasya̱ ghoṣa̭ṃ mahi̱ṣasya̱ hi gman |
ṛ̱tena̱ yanto̱ adhi̱ sindhṷmasthurvi̱dadga̭ndha̱rvo a̱mṛtā̭ni̱ nāma̭ ||4||
a̱psa̱rā jā̱ramṷpasiṣmiyā̱ṇā yoṣā̭ bibharti para̱me vyo̭man |
cara̭tpri̱yasya̱ yoni̭ṣu pri̱yaḥ santsīda̭tpa̱kṣe hi̭ra̱ṇyaye̱ sa ve̱naḥ ||5||
nākḙ supa̱rṇamupa̱ yatpata̭ntaṃ hṛ̱dā vena̭nto a̱bhyaca̭kṣata tvā |
hira̭ṇyapakṣa̱ṃ varṷṇasya dū̱taṃ ya̱masya̱ yonaṷ śaku̱naṃ bhṷra̱ṇyum ||6||
ū̱rdhvo ga̭ndha̱rvo adhi̱ nākḙ asthātpra̱tyaṅci̱trā bibhra̭da̱syāyṷdhāni |
vasā̭no̱ atka̭ṃ sura̱bhiṃ dṛ̱śe kaṃ sva1rṇa nāma̭ janata pri̱yāṇi̭ ||7||
dra̱psaḥ sa̭mu̱drama̱bhi yajjigā̭ti̱ paśya̱ngṛdhra̭sya̱ cakṣa̭sā̱ vidha̭rman |
bhā̱nuḥ śu̱kreṇa̭ śo̱ciṣā̭ cakā̱nastṛ̱tīyḙ cakre̱ raja̭si pri̱yāṇi̭ ||8||
9 agni:, 1,5-9 agni-varuṇa-somāḥ| 1agniḥ,2-4 agnerātmāḥ, 5,7-8 varuṇa:, 6 somaḥ, 9 indraḥ| triṣṭup 7 jagatī|
i̱maṃ no̭ agna̱ upa̭ ya̱jñamehi̱ pañca̭yāmaṃ tri̱vṛta̭ṃ sa̱ptata̭ntum |
aso̭ havya̱vāḻu̱ta na̭: puro̱gā jyoge̱va dī̱rghaṃ tama̱ āśa̭yiṣṭhāḥ ||1||
adḙvādde̱vaḥ pra̱catā̱ guhā̱ yanpra̱paśya̭māno amṛta̱tvamḙmi |
śi̱vaṃ yatsanta̱maśi̭vo̱ jahā̭mi̱ svātsa̱khyādara̭ṇī̱ṃ nābhi̭memi ||2||
paśya̭nna̱nyasyā̱ ati̭thiṃ va̱yāyā̭ ṛ̱tasya̱ dhāma̱ vi mi̭me pu̱rūṇi̭ |
śaṃsā̭mi pi̱tre asṷrāya̱ śeva̭mayajñi̱yādya̱jñiya̭ṃ bhā̱gamḙmi ||3||
ba̱hvīḥ samā̭ akarama̱ntara̭smi̱nnindra̭ṃ vṛṇā̱naḥ pi̱tara̭ṃ jahāmi |
a̱gniḥ somo̱ varṷṇa̱ste cya̭vante pa̱ryāva̭rdrā̱ṣṭraṃ tada̭vāmyā̱yan ||4||
nirmā̭yā u̱ tye asṷrā abhūva̱ntvaṃ ca̭ mā varuṇa kā̱mayā̭se |
 ṛ̱tena̭ rāja̱nnanṛ̭taṃ vivi̱ñcanmama̭ rā̱ṣṭrasyādhi̭patya̱mehi̭ ||5||
i̱daṃ sva̭ri̱damidā̭sa vā̱mama̱yaṃ pra̭kā̱śa u̱rva1ntari̭kṣam |
hanā̭va vṛ̱traṃ ni̱rehi̭ soma ha̱viṣṭvā̱ santa̭ṃ ha̱viṣā̭ yajāma ||6||
ka̱viḥ ka̭vi̱tvā di̱vi rū̱pamāsa̭ja̱dapra̭bhūtī̱ varṷṇo̱ nira̱paḥ sṛ̭jat |
kṣema̭ṃ kṛṇvā̱nā jana̭yo̱ na sindha̭va̱stā a̭sya̱ varṇa̱ṃ śuca̭yo bharibhrati ||7||
tā a̭sya̱ jyeṣṭha̭mindri̱yaṃ sa̭cante̱ tā ī̱mā kṣḙti sva̱dhayā̱ mada̭ntīḥ |
tā ī̱ṃ viśo̱ na rājā̭naṃ vṛṇā̱nā bī̭bha̱tsuvo̱ apa̭ vṛ̱trāda̭tiṣṭhan ||8||
bī̱bha̱tsūnā̭ṃ sa̱yuja̭ṃ ha̱ṃsamā̭hura̱pāṃ di̱vyānā̭ṃ sa̱khye cara̭ntam |
a̱nu̱ṣṭubha̱manṷ carcū̱ryamā̭ṇa̱mindra̱ṃ ni ci̭kyuḥ ka̱vayo̭ manī̱ṣā ||9||
8 vāgāmbhṛṇī| ātmā| triṣṭup , 2  jagatī|
a̱haṃ ru̱drebhi̱rvasṷbhiścarāmya̱hamā̭di̱tyairu̱ta vi̱śvadḙvaiḥ |
a̱haṃ mi̱trāvarṷṇo̱bhā bi̭bharmya̱hami̭ndrā̱gnī a̱hama̱śvino̱bhā ||1||
a̱haṃ soma̭māha̱nasa̭ṃ bibharmya̱haṃ tvaṣṭā̭ramu̱ta pū̱ṣaṇa̱ṃ bhaga̭m |
a̱haṃ da̭dhāmi̱ dravi̭ṇaṃ ha̱viṣma̭te suprā̱vye̱3 yaja̭mānāya sunva̱te ||2||
a̱haṃ rāṣṭrī̭ sa̱ṃgama̭nī̱ vasṷ̄nāṃ ciki̱tuṣī̭ pratha̱mā ya̱jñiyā̭nām |
tāṃ mā̭ de̱vā vya̭dadhuḥ puru̱trā bhūri̭sthātrā̱ṃ bhūryā̭ve̱śaya̭ntīm ||3||
mayā̱ so anna̭matti̱ yo vi̱paśya̭ti̱ yaḥ prāṇi̭ti̱ ya ī̭ṃ śṛ̱ṇotyu̱ktam |
a̱ma̱ntavo̱ māṃ ta upa̭ kṣiyanti śru̱dhi śrṷta śraddhi̱vaṃ tḙ vadāmi ||4||
a̱hame̱va sva̱yami̱daṃ va̭dāmi̱ juṣṭa̭ṃ de̱vebhi̭ru̱ta mānṷṣebhiḥ |
yaṃ kā̱maye̱ taṃta̭mu̱graṃ kṛ̭ṇomi̱ taṃ bra̱hmāṇa̱ṃ tamṛṣi̱ṃ taṃ sṷme̱dhām ||5||
a̱haṃ ru̱drāya̱ dhanu̱rā ta̭nomi brahma̱dviṣe̱ śara̭ve̱ hanta̱vā ṷ |
a̱haṃ janā̭ya sa̱mada̭ṃ kṛṇomya̱haṃ dyāvā̭pṛthi̱vī ā vi̭veśa ||6||
a̱haṃ sṷve pi̱tara̭masya mū̱rdhanmama̱ yoni̭ra̱psva1ntaḥ sa̭mu̱dre |
tato̱ vi ti̭ṣṭhe̱ bhuva̱nānu̱ viśvo̱tāmūṃ dyāṃ va̱rṣmaṇopa̭ spṛśāmi ||7||
a̱hame̱va vāta̭ iva̱ pra vā̭myā̱rabha̭māṇā̱ bhuva̭nāni̱ viśvā̭ |
pa̱ro di̱vā pa̱ra e̱nā pṛ̭thi̱vyaitāva̭tī mahi̱nā saṃ ba̭bhūva ||8||
8 śailūṣiḥ kulmalabarhiṣo, vāmadevyo'homugvā| viśvedevāḥ| upariṣṭādbṛhatī,8 triṣṭup|
na tamaṃho̱ na dṷri̱taṃ devā̭so aṣṭa̱ martya̭m | sa̱joṣa̭so̱ yama̭rya̱mā mi̱tro naya̭nti̱ varṷṇo̱ ati̱ dviṣa̭: ||1||
taddhi va̱yaṃ vṛ̭ṇī̱mahe̱ varṷṇa̱ mitrārya̭man | yenā̱ niraṃha̭so yū̱yaṃ pā̱tha ne̱thā ca̱ martya̱mati̱ dviṣa̭: ||2||
te nū̱naṃ no̱'yamū̱taye̱ varṷṇo mi̱tro a̭rya̱mā | nayi̭ṣṭhā u no ne̱ṣaṇi̱ parṣi̭ṣṭhā u naḥ pa̱rṣaṇyati̱ dviṣa̭: ||3||
yū̱yaṃ viśva̱ṃ pari̭ pātha̱ varṷṇo mi̱tro a̭rya̱mā | yu̱ṣmāka̱ṃ śarma̭ṇi pri̱ye syāma̭ supraṇīta̱yo'ti̱ dviṣa̭: ||4||
ā̱di̱tyāso̱ ati̱ sridho̱ varṷṇo mi̱tro a̭rya̱mā | u̱graṃ ma̱rudbhī̭ ru̱draṃ hṷve̱mendra̭ma̱gniṃ sva̱staye'ti̱ dviṣa̭: ||5||
netā̭ra ū̱ ṣu ṇa̭sti̱ro varṷṇo mi̱tro a̭rya̱mā | ati̱ viśvā̭ni duri̱tā rājā̭naścarṣaṇī̱nāmati̱ dviṣa̭: ||6||
śu̱nama̱smabhya̭mū̱taye̱ varṷṇo mi̱tro a̭rya̱mā | śarma̭ yacchantu sa̱pratha̭ ādi̱tyāso̱ yadīma̭he̱ ati̱ dviṣa̭: ||7||
yathā̭ ha̱ tyadva̭savo gau̱rya̭ṃ citpa̱di ṣi̱tāmamṷñcatā yajatrāḥ |
e̱vo ṣva1smanmṷñcatā̱ vyaṃha̱: pra tā̭ryagne prata̱raṃ na̱ āyṷ: ||8||
8 kuśikaḥ saubharaḥ, rātrirvā bhāradvājī| rātriḥ| gāyatrī|
rātrī̱ vya̭khyadāya̱tī pṷru̱trā de̱vya1kṣabhi̭: | viśvā̱ adhi̱ śriyo̭'dhita ||1||
orva̭prā̱ ama̭rtyā ni̱vato̭ de̱vyu1dvata̭: | jyoti̭ṣā bādhate̱ tama̭: ||2||
niru̱ svasā̭ramaskṛto̱ṣasa̭ṃ de̱vyā̭ya̱tī | apedṷ hāsate̱ tama̭: ||3||
sā no̭ a̱dya yasyā̭ va̱yaṃ ni te̱ yāma̱nnavi̭kṣmahi | vṛ̱kṣe na va̭sa̱tiṃ vaya̭: ||4||
ni grāmā̭so avikṣata̱ ni pa̱dvanto̱ ni pa̱kṣiṇa̭: | ni śye̱nāsa̭ścida̱rthina̭: ||5||
yā̱vayā̭ vṛ̱kyaṃ1 vṛka̭ṃ ya̱vaya̭ ste̱namṷ̄rmye | athā̭ naḥ su̱tarā̭ bhava ||6||
upa̭ mā̱ pepi̭śa̱ttama̭: kṛ̱ṣṇaṃ vya̭ktamasthita | uṣa̭ ṛ̱ṇeva̭ yātaya ||7||
upa̭ te̱ gā i̱vāka̭raṃ vṛṇī̱ṣva dṷhitardivaḥ | rātri̱ stoma̱ṃ na ji̱gyuṣḙ ||8||
9 vihavya āṃgirasaḥ| viśvedevāḥ| triṣṭup , 9 jagatī|
mamā̭gne̱ varco̭ viha̱veṣva̭stu va̱yaṃ tvendhā̭nāsta̱nva̭ṃ puṣema |
mahya̭ṃ namantāṃ pra̱diśa̱ścata̭sra̱stvayādhya̭kṣeṇa̱ pṛta̭nā jayema ||1||
mama̭ de̱vā vi̭ha̱ve sa̭ntu̱ sarva̱ indra̭vanto ma̱ruto̱ viṣṇṷra̱gniḥ |
mamā̱ntari̭kṣamu̱rulo̭kamastu̱ mahya̱ṃ vāta̭: pavatā̱ṃ kāmḙ a̱smin ||2||
mayi̭ de̱vā dravi̭ṇa̱mā ya̭jantā̱ṃ mayyā̱śīra̭stu̱ mayi̭ de̱vahṷ̄tiḥ |
daivyā̱ hotā̭ro vanuṣanta̱ pūrve'ri̭ṣṭāḥ syāma ta̱nvā̭ su̱vīrā̭: ||3||
mahya̭ṃ yajantu̱ mama̱ yāni̭ ha̱vyā''kṷ̄tiḥ sa̱tyā mana̭so me astu |
eno̱ mā ni gā̭ṃ kata̱macca̱nāhaṃ viśvḙ devāso̱ adhi̭ vocatā naḥ ||4||
devī̭: ṣaḻurvīru̱ru na̭: kṛṇota̱ viśvḙ devāsa i̱ha vī̭rayadhvam |
mā hā̭smahi pra̱jayā̱ mā ta̱nūbhi̱rmā ra̭dhāma dviṣa̱te so̭ma rājan ||5||
agnḙ ma̱nyuṃ pra̭tinu̱danparḙṣā̱mada̭bdho go̱pāḥ pari̭ pāhi na̱stvam |
pra̱tyañco̭ yantu ni̱guta̱: puna̱ste̱3'maiṣā̭ṃ ci̱ttaṃ pra̱budhā̱ṃ vi nḙśat ||6||
dhā̱tā dhā̭tṝ̱ṇāṃ bhuva̭nasya̱ yaspati̭rde̱vaṃ trā̱tāra̭mabhimātiṣā̱ham |
i̱maṃ ya̱jñama̱śvino̱bhā bṛha̱spati̭rde̱vāḥ pā̭ntu̱ yaja̭mānaṃ nya̱rthāt ||7||
u̱ru̱vyacā̭ no mahi̱ṣaḥ śarma̭ yaṃsada̱sminhavḙ puruhū̱taḥ pṷru̱kṣuḥ |
sa na̭: pra̱jāyai̭ haryaśva mṛḻa̱yendra̱ mā no̭ rīriṣo̱ mā parā̭ dāḥ ||8||
ye na̭: sa̱patnā̱ apa̱ te bha̭vantvindrā̱gnibhyā̱mava̭ bādhāmahe̱ tān |
vasa̭vo ru̱drā ā̭di̱tyā ṷpari̱spṛśa̭ṃ mo̱graṃ cettā̭ramadhirā̱jama̭kran ||9||
7 prajāpatiḥ parameṣṭhī| bhāvavṛttam| triṣṭup|
nāsa̭dāsī̱nno sadā̭sītta̱dānī̱ṃ nāsī̱drajo̱ no vyo̭mā pa̱ro yat |
kimāva̭rīva̱: kuha̱ kasya̱ śarma̱nnambha̱: kimā̭sī̱dgaha̭naṃ gabhī̱ram ||1||
na mṛ̱tyurā̭sīda̱mṛta̱ṃ na tarhi̱ na rātryā̱ ahna̭ āsītprake̱taḥ |
ānī̭davā̱taṃ sva̱dhayā̱ tadeka̱ṃ tasmā̭ddhā̱nyanna pa̱raḥ kiṃ ca̱nāsa̭ ||2||
tama̭ āsī̱ttama̭sā gū̱ḻhamagrḙ'prake̱taṃ sa̭li̱laṃ sarva̭mā i̱dam |
tu̱cchyenā̱bhvapi̭hita̱ṃ yadāsī̱ttapa̭sa̱stanma̭hi̱nājā̭ya̱taika̭m ||3||
kāma̱stadagre̱ sama̭varta̱tādhi̱ mana̭so̱ reta̭: pratha̱maṃ yadāsī̭t |
sa̱to bandhu̱masa̭ti̱ nira̭vindanhṛ̱di pra̱tīṣyā̭ ka̱vayo̭ manī̱ṣā ||4||
ti̱ra̱ścīno̱ vita̭to ra̱śmirḙṣāma̱dhaḥ svi̭dā̱sī3du̱pari̭ svidāsī3t |
re̱to̱dhā ā̭sanmahi̱māna̭ āsantsva̱dhā a̱vastā̱tpraya̭tiḥ pa̱rastā̭t ||5||
ko a̱ddhā vḙda̱ ka i̱ha pra vo̭ca̱tkuta̱ ājā̭tā̱ kuta̭ i̱yaṃ visṛ̭ṣṭiḥ |
a̱rvāgde̱vā a̱sya vi̱sarja̭ne̱nā'thā̱ ko vḙda̱ yata̭ āba̱bhūva̭ ||6||
i̱yaṃ visṛ̭ṣṭi̱ryata̭ āba̱bhūva̱ yadi̭ vā da̱dhe yadi̭ vā̱ na |
yo a̱syādhya̭kṣaḥ para̱me vyo̭ma̱ntso a̱ṅga vḙda̱ yadi̭ vā̱ na veda̭ ||7||
7 yajñaḥ prājāpatyaḥ| bhāvavṛttam| triṣṭup , 1 jagatī|
yo ya̱jño vi̱śvata̱stantṷbhista̱ta eka̭śataṃ devaka̱rmebhi̱rāya̭taḥ |
i̱me va̭yanti pi̱taro̱ ya ā̭ya̱yuḥ pra va̱yāpa̭ va̱yetyā̭sate ta̱te ||1||
pumā̭~ enaṃ tanuta̱ utkṛ̭ṇatti̱ pumā̱nvi ta̭tne̱ adhi̱ nākḙ a̱smin |
i̱me ma̱yūkhā̱ upa̭ sedurū̱ sada̱: sāmā̭ni cakru̱stasa̭rā̱ṇyota̭ve ||2||
kāsī̭tpra̱mā pra̭ti̱mā kiṃ ni̱dāna̱mājya̱ṃ kimā̭sītpari̱dhiḥ ka ā̭sīt |
chanda̱: kimā̭sī̱tpraṷga̱ṃ kimu̱kthaṃ yadde̱vā de̱vamaya̭janta̱ viśvḙ ||3||
a̱gnergā̭ya̱trya̭bhavatsa̱yugvo̱ṣṇiha̭yā savi̱tā saṃ ba̭bhūva |
a̱nu̱ṣṭubhā̱ soma̭ u̱kthairmaha̭svā̱nbṛha̱spatḙrbṛha̱tī vāca̭māvat ||4||
vi̱rāṇmi̱trāvarṷṇayorabhi̱śrīrindra̭sya tri̱ṣṭubi̱ha bhā̱go ahna̭: |
viśvā̭nde̱vāñjaga̱tyā vi̭veśa̱ tena̭ cākḷpra̱ ṛṣa̭yo manu̱ṣyā̭: ||5||
cā̱kḷ̱pre tena̱ ṛṣa̭yo manu̱ṣyā̭ ya̱jñe jā̱te pi̱taro̭ naḥ purā̱ṇe |
paśya̭nmanye̱ mana̭sā̱ cakṣa̭sā̱ tānya i̱maṃ ya̱jñamaya̭janta̱ pūrvḙ ||6||
sa̱hasto̭māḥ sa̱hacha̭ndasa ā̱vṛta̭: sa̱hapra̭mā̱ ṛṣa̭yaḥ sa̱pta daivyā̭: |
pūrvḙṣā̱ṃ panthā̭manu̱dṛśya̱ dhīrā̭ a̱nvālḙbhire ra̱thyo̱3 na ra̱śmīn ||7||
7 sukīrtiḥ kākṣīvat| indraḥ,4-5 aśvinau| triṣṭup , 4 anuṣṭup|
apa̱ prāca̭ indra̱ viśvā̭~ a̱mitrā̱napāpā̭co abhibhūte nudasva |
apodī̭co̱ apa̭ śūrādha̱rāca̭ u̱rau yathā̱ tava̱ śarma̱nmadḙma ||1||
ku̱vida̱ṅga yava̭manto̱ yava̭ṃ ci̱dyathā̱ dāntya̭nupū̱rvaṃ vi̱yūya̭ |
i̱hehai̭ṣāṃ kṛṇuhi̱ bhoja̭nāni̱ ye ba̱rhiṣo̱ namo̭vṛkti̱ṃ na ja̱gmuḥ ||2||
na̱hi sthūryṛ̭tu̱thā yā̱tamasti̱ nota śravo̭ vivide saṃga̱meṣṷ |
ga̱vyanta̱ indra̭ṃ sa̱khyāya̱ viprā̭ aśvā̱yanto̱ vṛṣa̭ṇaṃ vā̱jaya̭ntaḥ ||3||
yu̱vaṃ su̱rāma̭maśvinā̱ namṷcāvāsu̱re sacā̭ | vi̱pi̱pā̱nā śṷbhaspatī̱ indra̱ṃ karma̭svāvatam ||4||
pu̱trami̭va pi̱tarā̭va̱śvino̱bhendrā̱vathu̱: kāvyai̭rda̱ṃsanā̭bhiḥ |
yatsu̱rāma̱ṃ vyapi̭ba̱: śacī̭bhi̱: sara̭svatī tvā maghavannabhiṣṇak ||5||
indra̭: su̱trāmā̱ svavā̱~ avo̭bhiḥ sumṛḻī̱ko bha̭vatu vi̱śvavḙdāḥ |
bādha̭tā̱ṃ dveṣo̱ abha̭yaṃ kṛṇotu su̱vīrya̭sya̱ pata̭yaḥ syāma ||6||
tasya̭ va̱yaṃ sṷma̱tau ya̱jñiya̱syā'pi̭ bha̱dre saṷmana̱se syā̭ma |
sa su̱trāmā̱ svavā̱~ indro̭ a̱sme ā̱rācci̱ddveṣa̭: sanu̱taryṷyotu ||7||
7 śakapūto nārmedhaḥ| mitrāvaruṇau, 1 dyubhūmyaśvinaḥ| virāḍrūpā, 1 nyaṅkusāriṇī, 2,6 prastārapaṃktiḥ, 7 mahāsatobṛhatī|
ī̱jā̱namiddyaurgū̱rtāva̭surījā̱naṃ bhūmi̭ra̱bhi pra̭bhū̱ṣaṇi̭ |
ī̱jā̱naṃ de̱vāva̱śvinā̭va̱bhi su̱mnaira̭vardhatām ||1||
tā vā̭ṃ mitrāvaruṇā dhāra̱yatkṣi̭tī suṣu̱mneṣi̭ta̱tvatā̭ yajāmasi |
yu̱voḥ krā̱ṇāya̭ sa̱khyaira̱bhi ṣyā̭ma ra̱kṣasa̭: ||2||
adhā̭ ci̱nnu yaddidhi̭ṣāmahe vāma̱bhi pri̱yaṃ rekṇa̱: patya̭mānāḥ |
da̱dvā~ vā̱ yatpuṣya̭ti̱ rekṇa̱: samvā̭ra̱nnaki̭rasya ma̱ghāni̭ ||3||
a̱sāva̱nyo a̭sura sūyata̱ dyaustvaṃ viśvḙṣāṃ varuṇāsi̱ rājā̭ |
mū̱rdhā ratha̭sya cāka̱nnaitāva̱taina̭sāntaka̱dhruk ||4||
a̱smintsve̱3tacchaka̭pūta̱ eno̭ hi̱te mi̱tre niga̭tānhanti vī̱rān |
a̱vorvā̱ yaddhātta̱nūṣvava̭: pri̱yāsṷ ya̱jñiyā̱svarvā̭ ||5||
yu̱vorhi mā̱tādi̭tirvicetasā̱ dyaurna bhūmi̱: paya̭sā pupū̱tani̭ |
ava̭ pri̱yā di̭diṣṭana̱ sūro̭ ninikta ra̱śmibhi̭: ||6||
yu̱vaṃ hya̭pna̱rājā̱vasī̭data̱ṃ tiṣṭha̱dratha̱ṃ na dhū̱rṣada̭ṃ vana̱rṣada̭m |
tā na̭: kaṇūka̱yantī̭rnṛ̱medha̭statre̱ aṃha̭saḥ su̱medha̭statre̱ aṃha̭saḥ ||7||
7 sudāḥ paijavanaḥ| indraḥ|śakkarī, 4-6 mahāpaṃktiḥ, 7 triṣṭup|
pro ṣva̭smai purora̱thamindrā̭ya śū̱ṣama̭rcata |
a̱bhīkḙ cidu loka̱kṛtsa̱ṃge sa̱matsṷ vṛtra̱hā'smāka̭ṃ bodhi codi̱tā nabha̭ntāmanya̱keṣā̭ṃ jyā̱kā adhi̱ dhanva̭su ||1||
tvaṃ sindhū̱~ravā̭sṛjo'dha̱rāco̱ aha̱nnahi̭m |
a̱śa̱truri̭ndra jajñiṣe̱ viśva̭ṃ puṣyasi̱ vārya̱ṃ taṃ tvā̱ pari̭ ṣvajāmahe̱ nabha̭ntāmanya̱keṣā̭ṃ jyā̱kā adhi̱ dhanva̭su ||2||
vi ṣu viśvā̱ arā̭tayo̱'ryo na̭śanta no̱ dhiya̭: |
astā̭si̱ śatra̭ve va̱dhaṃ yo na̭ indra̱ jighā̭ṃsati̱ yā tḙ rā̱tirda̱dirvasu̱ nabha̭ntāmanya̱keṣā̭ṃ jyā̱kā adhi̱ dhanva̭su ||3||
yo na̭ indrā̱bhito̱ jano̭ vṛkā̱yurā̱didḙśati |
a̱dha̱spa̱daṃ tamī̭ṃ kṛdhi vibā̱dho a̭si sāsa̱hirnabha̭ntāmanya̱keṣā̭ṃ jyā̱kā adhi̱ dhanva̭su ||4||
yo na̭ indrābhi̱dāsa̭ti̱ sanā̭bhi̱ryaśca̱ niṣṭya̭: |
ava̱ tasya̱ bala̭ṃ tira ma̱hīva̱ dyauradha̱ tmanā̱ nabha̭ntāmanya̱keṣā̭ṃ jyā̱kā adhi̱ dhanva̭su ||5||
va̱yami̭ndra tvā̱yava̭: sakhi̱tvamā ra̭bhāmahe |
ṛ̱tasya̭ naḥ pa̱thā na̱yā'ti̱ viśvā̭ni duri̱tā nabha̭ntāmanya̱keṣā̭ṃ jyā̱kā adhi̱ dhanva̭su ||6||
a̱smabhya̱ṃ su tvami̭ndra̱ tāṃ śi̭kṣa̱ yā doha̭te̱ prati̱ vara̭ṃ jari̱tre |
acchi̭drodhnī pī̱paya̱dyathā̭ naḥ sa̱hasra̭dhārā̱ paya̭sā ma̱hī gauḥ ||7||
7,1-6 (pūrvārdhasya) māndhātā yauvanāśvaḥ,6 (uttarārdhasya) 7 godhā ṛṣikā| indraḥ| mahāpaṃktiḥ, 7 paṃktiḥ|
u̱bhe yadi̭ndra̱ roda̭sī āpa̱prātho̱ṣā i̭va |
ma̱hānta̭ṃ tvā ma̱hīnā̭ṃ sa̱mrāja̭ṃ carṣaṇī̱nāṃ de̱vī jani̭tryajījanadbha̱drā jani̭tryajījanat ||1||
ava̭ sma durhaṇāya̱to marta̭sya tanuhi sthi̱ram |
a̱dha̱spa̱daṃ tamī̭ṃ kṛdhi̱ yo a̱smā~ ā̱didḙśati de̱vī jani̭tryajījanadbha̱drā jani̭tryajījanat ||2||
ava̱ tyā bṛ̭ha̱tīriṣo̭ vi̱śvaśca̭ndrā amitrahan |
śacī̭bhiḥ śakra dhūnu̱hīndra̱ viśvā̭bhirū̱tibhi̭rde̱vī jani̭tryajījanadbha̱drā jani̭tryajījanat ||4||
ava̱ yattvaṃ śa̭takrata̱vindra̱ viśvā̭ni dhūnu̱ṣe |
ra̱yiṃ na sṷnva̱te sacā̭ saha̱sriṇī̭bhirū̱tibhi̭rde̱vī jani̭tryajījanadbha̱drā jani̭tryajījanat ||4||
ava̱ svedā̭ ivā̱bhito̱ viṣva̭kpatantu di̱dyava̭: |
 dūrvā̭yā iva̱ tanta̭vo̱ vya1smadḙtu durma̱tirde̱vī jani̭tryajījanadbha̱drā jani̭tryajījanat ||5||
dī̱rghaṃ hya̭ṅku̱śaṃ ya̭thā̱ śakti̱ṃ bibha̭rṣi mantumaḥ |
pūrvḙṇa maghavanpa̱dā'jo va̱yāṃ yathā̭ yamo de̱vī jani̭tryajījanadbha̱drā jani̭tryajījanat ||6||
naki̭rdevā minīmasi̱ naki̱rā yo̭payāmasi mantra̱śrutya̭ṃ carāmasi |
pa̱kṣebhi̭rapika̱kṣebhi̱ratrā̱bhi saṃ ra̭bhāmahe ||7||
7 kumāro yāmāyanaḥ| yamaḥ| anuṣṭup|
yasmi̭nvṛ̱kṣe sṷpalā̱śe de̱vaiḥ sa̱mpiba̭te ya̱maḥ | atrā̭ no vi̱śpati̭: pi̱tā pṷrā̱ṇā~ anṷ venati ||1||
pu̱rā̱ṇā~ a̭nu̱vena̭nta̱ṃ cara̭ntaṃ pā̱payā̭mu̱yā | a̱sū̱yanna̱bhya̭cākaśa̱ṃ tasmā̭ aspṛhaya̱ṃ puna̭: ||2||
yaṃ kṷmāra̱ nava̱ṃ ratha̭maca̱kraṃ mana̱sākṛ̭ṇoḥ | ekḙṣaṃ vi̱śvata̱: prāñca̱mapa̭śya̱nnadhi̭ tiṣṭhasi ||3||
yaṃ kṷmāra̱ prāva̭rtayo̱ ratha̱ṃ viprḙbhya̱spari̭ | taṃ sāmānu̱ prāva̭rtata̱ sami̱to nā̱vyāhi̭tam ||4||
kaḥ kṷmā̱rama̭janaya̱dratha̱ṃ ko nira̭vartayat | kaḥ svi̱ttada̱dya no̭ brūyādanu̱deyī̱ yathābha̭vat ||5||
yathābha̭vadanu̱deyī̱ tato̱ agra̭majāyata | pu̱rastā̭dbu̱dhna āta̭taḥ pa̱ścānni̱raya̭ṇaṃ kṛ̱tam ||6||
i̱daṃ ya̱masya̱ sāda̭naṃ devamā̱naṃ yadu̱cyatḙ | i̱yama̭sya dhamyate nā̱ḻīra̱yaṃ gī̱rbhiḥ pari̭ṣkṛtaḥ ||7||
1 jūtiḥ, 2 vātajūtiḥ, 3 viprajūtiḥ, 4 vṛṣāṇakaḥ, 5 karikrataḥ, 6 etaśaḥ 7 ṛṣyaśrṛṃgaḥ (ete vātaraśanā munayaḥ)| keśinaḥ = agni-sūrya-vāyavaḥ| anuṣṭup|
ke̱śya1gniṃ ke̱śī vi̱ṣaṃ ke̱śī bi̭bharti̱ roda̭sī | ke̱śī viśva̱ṃ sva̭rdṛ̱śe ke̱śīdaṃ jyoti̭rucyate ||1||
muna̭yo̱ vāta̭raśanāḥ pi̱śaṅgā̭ vasate̱ malā̭ | vāta̱syānu̱ dhrāji̭ṃ yanti̱ yadde̱vāso̱ avi̭kṣata ||2||
unma̭ditā̱ maunḙyena̱ vātā̱~ ā ta̭sthimā va̱yam | śarī̱reda̱smāka̭ṃ yū̱yaṃ martā̭so a̱bhi pa̭śyatha ||3||
a̱ntari̭kṣeṇa patati̱ viśvā̭ rū̱pāva̱cāka̭śat | muni̭rde̱vasya̭devasya̱ saukṛ̭tyāya̱ sakhā̭ hi̱taḥ ||4||
vāta̱syāśvo̭ vā̱yoḥ sakhātho̭ de̱veṣi̭to̱ muni̭: | u̱bhau sa̭mu̱drāvā kṣḙti̱ yaśca̱ pūrva̭ u̱tāpa̭raḥ ||5||
a̱psa̱rasā̭ṃ gandha̱rvāṇā̭ṃ mṛ̱gāṇā̱ṃ cara̭ṇe̱ cara̭n | ke̱śī keta̭sya vi̱dvāntsakhā̭ svā̱durma̱dinta̭maḥ ||6||
vā̱yura̭smā̱ upā̭manthatpi̱naṣṭi̭ smā kunanna̱mā | ke̱śī vi̱ṣasya̱ pātrḙṇa̱ yadru̱dreṇāpi̭batsa̱ha ||7||
7,1 bharadvāja:, 2 kaśyapaḥ, 3 gautamaḥ, 4 atriḥ, 5 viśvāmitraḥ, 6 jamadagniḥ, 7 vasiṣṭhaḥ| viśvedevāḥ| anuṣṭup|
u̱ta dḙvā̱ ava̭hita̱ṃ devā̱ unna̭yathā̱ puna̭: | u̱tāga̭śca̱kruṣa̭ṃ devā̱ devā̭ jī̱vaya̭thā̱ puna̭: ||1||
dvāvi̱mau vātaṷ vāta̱ ā sindho̱rā pa̭rā̱vata̭: | dakṣa̭ṃ te a̱nya ā vā̭tu̱ parā̱nyo vā̭tu̱ yadrapa̭: ||2||
ā vā̭ta vāhi bheṣa̱jaṃ vi vā̭ta vāhi̱ yadrapa̭: | tvaṃ hi vi̱śvabhḙṣajo de̱vānā̭ṃ dū̱ta īya̭se ||3||
ā tvā̭gama̱ṃ śaṃtā̭tibhi̱ratho̭ ari̱ṣṭatā̭tibhiḥ | dakṣa̭ṃ te bha̱dramābhā̭rṣa̱ṃ parā̱ yakṣma̭ṃ suvāmi te ||4||
trāya̭ntāmi̱ha de̱vāstrāya̭tāṃ ma̱rutā̭ṃ ga̱ṇaḥ | trāya̭ntā̱ṃ viśvā̭ bhū̱tāni̱ yathā̱yama̭ra̱pā asa̭t ||5||
āpa̱ idvā ṷ bheṣa̱jīrāpo̭ amīva̱cāta̭nīḥ | āpa̱: sarva̭sya bheṣa̱jīstāstḙ kṛṇvantu bheṣa̱jam ||6||
hastā̭bhyā̱ṃ daśa̭śākhābhyāṃ ji̱hvā vā̱caḥ pṷroga̱vī | a̱nā̱ma̱yi̱tnubhyā̭ṃ tvā̱ tābhyā̱ṃ tvopa̭ spṛśāmasi ||7||
6 aṃga auravaḥ|indraḥ| jagatī|
tava̱ tya i̭ndra sa̱khyeṣu̱ vahna̭ya ṛ̱taṃ ma̭nvā̱nā vya̭dardirurva̱lam |
yatrā̭ daśa̱syannu̱ṣaso̭ ri̱ṇanna̱paḥ kutsā̭ya̱ manma̭nna̱hya̭śca da̱ṃsaya̭: ||1||
avā̭sṛjaḥ pra̱sva̭: śva̱ñcayo̭ gi̱rīnudā̭ja u̱srā api̭bo̱ madhṷ pri̱yam |
ava̭rdhayo va̱nino̭ asya̱ daṃsa̭sā śu̱śoca̱ sūrya̭ ṛ̱tajā̭tayā gi̱rā ||2||
vi sūryo̱ madhyḙ amuca̱dratha̭ṃ di̱vo vi̱daddā̱sāya̭ prati̱māna̱mārya̭: |
dṛ̱ḻhāni̱ pipro̱rasṷrasya mā̱yina̱ indro̱ vyā̭syaccakṛ̱vā~ ṛ̱jiśva̭nā ||3||
anā̭dhṛṣṭāni dhṛṣi̱to vyā̭syanni̱dhī~radḙvā~ amṛṇada̱yāsya̭: |
mā̱seva̱ sūryo̱ vasu̱ purya̱mā da̭de gṛṇā̱naḥ śatrṷ̄~raśṛṇādvi̱rukma̭tā ||4||
ayṷddhaseno vi̱bhvā̭ vibhinda̱tā dāśa̭dvṛtra̱hā tujyā̭ni tejate |
indra̭sya̱ vajrā̭dabibhedabhi̱śnatha̱: prākrā̭macchu̱ndhyūraja̭hādu̱ṣā ana̭: ||5||
e̱tā tyā te̱ śrutyā̭ni̱ keva̭lā̱ yadeka̱ eka̱makṛ̭ṇoraya̱jñam |
mā̱sāṃ vi̱dhāna̭madadhā̱ adhi̱ dyavi̱ tvayā̱ vibhi̭nnaṃ bharati pra̱dhiṃ pi̱tā ||6||
6 devagandharvo  viśvāvasuḥ| savitā, 4-6 ātmā| triṣṭup|
sūrya̭raśmi̱rhari̭keśaḥ pu̱rastā̭tsavi̱tā jyoti̱ruda̭yā̱~ aja̭sram |
tasya̭ pū̱ṣā pra̭sa̱ve yā̭ti vi̱dvāntsa̱mpaśya̱nviśvā̱ bhuva̭nāni go̱pāḥ ||1||
nṛ̱cakṣā̭ e̱ṣa di̱vo madhya̭ āsta āpapri̱vānroda̭sī a̱ntari̭kṣam |
sa vi̱śvācī̭ra̱bhi ca̭ṣṭe ghṛ̱tācī̭ranta̱rā pūrva̱mapa̭raṃ ca ke̱tum ||2||
rā̱yo bu̱dhnaḥ sa̱ṃgama̭no̱ vasṷ̄nā̱ṃ viśvā̭ rū̱pābhi ca̭ṣṭe̱ śacī̭bhiḥ |
de̱va i̭va savi̱tā sa̱tyadha̱rmendro̱ na ta̭sthau sama̱re dhanā̭nām ||3||
vi̱śvāva̭suṃ soma gandha̱rvamāpo̭ dadṛ̱śuṣī̱stadṛ̱tenā̱ vyā̭yan |
tada̱nvavai̱dindro̭ rārahā̱ṇa ā̭sā̱ṃ pari̱ sūrya̭sya pari̱dhī~ra̭paśyat ||4||
vi̱śvāva̭sura̱bhi tanno̭ gṛṇātu di̱vyo ga̭ndha̱rvo raja̭so vi̱māna̭: |
yadvā̭ ghā sa̱tyamu̱ta yanna vi̱dma dhiyo̭ hinvā̱no dhiya̱ inno̭ avyāḥ ||5||
sasni̭mavinda̱ccara̭ṇe na̱dīnā̱mapā̭vṛṇo̱dduro̱ aśma̭vrajānām |
prāsā̭ṃ gandha̱rvo a̱mṛtā̭ni voca̱dindro̱ dakṣa̱ṃ pari̭ jānāda̱hīnā̭m ||6||
6 agniḥ pāvakaḥ| agniḥ| satobṛhatī, 1-2 viṣṭārapaṃktiḥ, 6 upariṣṭājjyotiḥ|
agne̱ tava̱ śravo̱ vayo̱ mahi̭ bhrājante a̱rcayo̭ vibhāvaso |
bṛha̭dbhāno̱ śava̭sā̱ vāja̭mu̱kthyaṃ1 dadhā̭si dā̱śuṣḙ kave ||1||
pā̱va̱kava̭rcāḥ śu̱krava̭rcā̱ anṷ̄navarcā̱ udi̭yarṣi bhā̱nunā̭ |
pu̱tro mā̱tarā̭ vi̱cara̱nnupā̭vasi pṛ̱ṇakṣi̱ roda̭sī u̱bhe ||2||
ūrjo̭ napājjātavedaḥ suśa̱stibhi̱rmanda̭sva dhī̱tibhi̭rhi̱taḥ |
tve iṣa̱: saṃ da̭dhu̱rbhūri̭varpasaści̱trota̭yo vā̱majā̭tāḥ ||3||
i̱ra̱jyanna̭gne prathayasva ja̱ntubhi̭ra̱sme rāyo̭ amartya |
sa da̭rśa̱tasya̱ vapṷṣo̱ vi rā̭jasi pṛ̱ṇakṣi̭ sāna̱siṃ kratṷm ||4||
i̱ṣka̱rtāra̭madhva̱rasya̱ pracḙtasa̱ṃ kṣaya̭nta̱ṃ rādha̭so ma̱haḥ |
rā̱tiṃ vā̱masya̭ su̱bhagā̭ṃ ma̱hīmiṣa̱ṃ dadhā̭si sāna̱siṃ ra̱yim ||5||
ṛ̱tāvā̭naṃ mahi̱ṣaṃ vi̱śvada̭rśatama̱gniṃ su̱mnāya̭ dadhire pu̱ro janā̭: |
śrutka̭rṇaṃ sa̱pratha̭stamaṃ tvā gi̱rā daivya̱ṃ mānṷṣā yu̱gā ||6||
6 agnistāpasaḥ| viśvedevāḥ| anuṣṭup|
agne̱ acchā̭ vade̱ha na̭: pra̱tyaṅna̭: su̱manā̭ bhava | pra no̭ yaccha viśaspate dhana̱dā a̭si na̱stvam ||1||
pra no̭ yacchatvarya̱mā pra bhaga̱: pra bṛha̱spati̭: | pra de̱vāḥ prota sū̱nṛtā̭ rā̱yo de̱vī da̭dātu naḥ ||2||
soma̱ṃ rājā̭na̱mava̭se̱'gniṃ gī̱rbhirha̭vāmahe | ā̱di̱tyānviṣṇu̱ṃ sūrya̭ṃ bra̱hmāṇa̭ṃ ca̱ bṛha̱spati̭m ||3||
i̱ndra̱vā̱yū bṛha̱spati̭ṃ su̱have̱ha ha̭vāmahe | yathā̭ na̱: sarva̱ ijjana̱: saṃga̭tyāṃ su̱manā̱ asa̭t ||4||
a̱rya̱maṇa̱ṃ bṛha̱spati̱mindra̱ṃ dānā̭ya codaya | vāta̱ṃ viṣṇu̱ṃ sara̭svatīṃ savi̱tāra̭ṃ ca vā̱jina̭m ||5||
tvaṃ no̭ agne a̱gnibhi̱rbrahma̭ ya̱jñaṃ ca̭ vardhaya | tvaṃ no̭ de̱vatā̭taye rā̱yo dānā̭ya codaya ||6||
8 śārgāṃ: 1-2 jaritā, 3-4 droṇaḥ, 5-6 sārisṛkva:, 7-8 stambamitraḥ| agniḥ| triṣṭup , 1-2 jagatī, 7-8 anuṣṭup|
a̱yama̭gne jari̱tā tve a̭bhū̱dapi̱ saha̭saḥ sūno na̱hya1nyadastyāpya̭m |
bha̱draṃ hi śarma̭ tri̱varṷ̄tha̱masti̭ ta ā̱re hiṃsā̭nā̱mapa̭ di̱dyumā kṛ̭dhi ||1||
pra̱vattḙ agne̱ jani̭mā pitūya̱taḥ sā̱cīva̱ viśvā̱ bhuva̭nā̱ nyṛ̭ñjase |
pra sapta̭ya̱: pra sa̭niṣanta no̱ dhiya̭: pu̱raśca̭ranti paśu̱pā i̭va̱ tmanā̭ ||2||
u̱ta vā u̱ pari̭ vṛṇakṣi̱ bapsa̭dba̱hora̭gna̱ ula̭pasya svadhāvaḥ |
u̱ta khi̱lyā u̱rvarā̭ṇāṃ bhavanti̱ mā tḙ he̱tiṃ tavi̭ṣīṃ cukrudhāma ||3||
yadu̱dvato̭ ni̱vato̱ yāsi̱ bapsa̱tpṛtha̭geṣi praga̱rdhinī̭va̱ senā̭ |
ya̱dā te̱ vāto̭ anu̱vāti̭ śo̱cirvaptḙva̱ śmaśrṷ vapasi̱ pra bhūma̭ ||4||
pratya̭sya̱ śreṇa̭yo dadṛśra̱ eka̭ṃ ni̱yāna̭ṃ ba̱havo̱ rathā̭saḥ |
bā̱hū yada̭gne anu̱marmṛ̭jāno̱ nya̭ṅṅuttā̱nāma̱nveṣi̱ bhūmi̭m ||5||
utte̱ śuṣmā̭ jihatā̱muttḙ a̱rciruttḙ agne śaśamā̱nasya̱ vājā̭: |
ucchva̭ñcasva̱ ni na̭ma̱ vardha̭māna̱ ā tvā̱dya viśve̱ vasa̭vaḥ sadantu ||6||
a̱pāmi̱daṃ nyaya̭naṃ samu̱drasya̭ ni̱veśa̭nam | a̱nyaṃ kṛ̭ṇuṣve̱taḥ panthā̱ṃ tena̭ yāhi̱ vaśā̱~ anṷ ||7||
āya̭ne te pa̱rāya̭ṇe̱ dūrvā̭ rohantu pu̱ṣpiṇī̭: | hra̱dāśca̭ pu̱ṇḍarī̭kāṇi samu̱drasya̭ gṛ̱hā i̱me ||8||
6 atriḥ sāṃkhyaḥ| aśvinau| anuṣṭup|
tyaṃ ci̱datri̭mṛta̱jura̱martha̱maśva̱ṃ na yāta̭ve | ka̱kṣīva̭nta̱ṃ yadī̱ punā̱ ratha̱ṃ na kṛ̭ṇu̱tho nava̭m ||1||
tyaṃ ci̱daśva̱ṃ na vā̱jina̭mare̱ṇavo̱ yamatna̭ta | dṛ̱ḻhaṃ gra̱nthiṃ na vi ṣya̭ta̱matri̱ṃ yavi̭ṣṭha̱mā raja̭: ||2||
narā̱ daṃsi̭ṣṭhā̱vatra̭ye̱ śubhrā̱ siṣā̭sata̱ṃ dhiya̭: | athā̱ hi vā̭ṃ di̱vo na̭rā̱ puna̱ stomo̱ na vi̱śasḙ ||3||
ci̱te tadvā̭ṃ surādhasā rā̱tiḥ sṷma̱tira̭śvinā | ā yanna̱: sada̭ne pṛ̱thau sama̭ne̱ parṣa̭tho narā ||4||
yu̱vaṃ bhu̱jyuṃ sa̭mu̱dra ā raja̭saḥ pā̱ra ī̭ṅkhi̱tam | yā̱tamacchā̭ pata̱tribhi̱rnāsa̭tyā sā̱tayḙ kṛtam ||5||
ā vā̭ṃ su̱mnaiḥ śa̱ṃyū i̭va̱ maṃhi̭ṣṭhā̱ viśva̭vedasā | sama̱sme bhṷ̄ṣataṃ na̱rotsa̱ṃ na pi̱pyuṣī̱riṣa̭: ||6||
6 tārkṣryaḥ suparṇaḥ, yāmāyana ūrdhvakṛśano vā| indraḥ| gāyatrī, 2 bṛhatī, 5 satobṛhatī, 6 viṣṭārapaṃktiḥ|
a̱yaṃ hi te̱ ama̭rtya̱ indu̱ratyo̱ na patya̭te | dakṣo̭ vi̱śvāyṷrve̱dhasḙ ||1||
a̱yama̱smāsu̱ kāvya̭ ṛ̱bhurvajro̱ dāsva̭te | a̱yaṃ bi̭bhartyū̱rdhvakṛ̭śana̱ṃ mada̭mṛ̱bhurna kṛtvya̱ṃ mada̭m ||2||
ghṛṣṷ: śye̱nāya̱ kṛtva̭na ā̱su svāsu̱ vaṃsa̭gaḥ | ava̭ dīdhedahī̱śuva̭: ||3||
yaṃ sṷpa̱rṇaḥ pa̭rā̱vata̭: śye̱nasya̭ pu̱tra ābha̭rat | śa̱taca̭kra̱ṃ yo̱3'hyo̭ varta̱niḥ ||4||
yaṃ tḙ śye̱naścārṷmavṛ̱kaṃ pa̱dābha̭radaru̱ṇaṃ mā̱namandha̭saḥ |
e̱nā vayo̱ vi tā̱ryāyṷrjī̱vasa̭ e̱nā jā̭gāra ba̱ndhutā̭ ||5||
e̱vā tadindra̱ indṷnā de̱veṣṷ ciddhārayāte̱ mahi̱ tyaja̭: |
kratvā̱ vayo̱ vi tā̱ryāyṷ: sukrato̱ kratvā̱yama̱smadā su̱taḥ ||6||
6 indrāṇī|sapatnībādhanam (upaniṣat) | anuṣṭup , 6 paṃktiḥ|
i̱māṃ kha̭nā̱myoṣa̭dhiṃ vī̱rudha̱ṃ bala̭vattamām | yayā̭ sa̱patnī̱ṃ bādha̭te̱ yayā̭ saṃvi̱ndate̱ pati̭m ||1||
uttā̭naparṇe̱ subha̭ge̱ deva̭jūte̱ saha̭svati | sa̱patnī̭ṃ me̱ parā̭ dhama̱ pati̭ṃ me̱ keva̭laṃ kuru ||2||
utta̭rā̱hamṷttara̱ utta̱redutta̭rābhyaḥ | athā̭ sa̱patnī̱ yā mamā'dha̭rā̱ sādha̭rābhyaḥ ||3||
na̱hya̭syā̱ nāma̭ gṛ̱bhṇāmi̱ no a̱sminra̭mate̱ janḙ | parā̭me̱va pa̭rā̱vata̭ṃ sa̱patnī̭ṃ gamayāmasi ||4||
a̱hama̭smi̱ saha̭mā̱nā'tha̱ tvama̭si sāsa̱hiḥ | u̱bhe saha̭svatī bhū̱tvī sa̱patnī̭ṃ me sahāvahai ||5||
upa̭ te'dhā̱ṃ saha̭mānāma̱bhi tvā̭dhā̱ṃ sahī̭yasā |
māmanu̱ pra te̱ mano̭ va̱tsaṃ gauri̭va dhāvatu pa̱thā vāri̭va dhāvatu ||6||
6 airammado devamuni:| araṇyānī|anuṣṭup|
ara̭ṇyā̱nyara̭ṇyānya̱sau yā preva̱ naśya̭si | ka̱thā grāma̱ṃ na pṛ̭cchasi̱ na tvā̱ bhīri̭va vindatī3 ||1||
vṛ̱ṣā̱ra̱vāya̱ vada̭te̱ yadu̱pāva̭ti cicci̱kaḥ | ā̱ghā̱ṭibhi̭riva dhā̱vaya̭nnaraṇyā̱nirma̭hīyate ||2||
u̱ta gāva̭ ivādantyu̱ta veśmḙva dṛśyate | u̱to a̭raṇyā̱niḥ sā̱yaṃ śa̭ka̱ṭīri̭va sarjati ||3||
gāma̱ṅgaiṣa ā hva̭yati̱ dārva̱ṅgaiṣo apā̭vadhīt | vasa̭nnaraṇyā̱nyāṃ sā̱yamakrṷkṣa̱diti̭ manyate ||4||
na vā a̭raṇyā̱nirha̭ntya̱nyaścennābhi̱gaccha̭ti | svā̱doḥ phala̭sya ja̱gdhvāya̭ yathā̱kāma̱ṃ ni pa̭dyate ||5||
āñja̭nagandhiṃ sura̱bhiṃ ba̭hva̱nnāmakṛ̭ṣīvalām | prāhaṃ mṛ̱gāṇā̭ṃ mā̱tara̭maraṇyā̱nima̭śaṃsiṣam ||6||
5 suvedāḥ śairīṣiḥ| indraḥ| jagatī, 5 triṣṭup|
śrattḙ dadhāmi pratha̱māya̭ ma̱nyave'ha̱nyadvṛ̱traṃ narya̭ṃ vi̱vera̱paḥ |
u̱bhe yattvā̱ bhava̭to̱ roda̭sī̱ anu̱ reja̭te̱ śuṣmā̭tpṛthi̱vī ci̭dadrivaḥ ||1||
tvaṃ mā̱yābhi̭ranavadya mā̱yina̭ṃ śravasya̱tā mana̭sā vṛ̱trama̭rdayaḥ |
tvāminnaro̭ vṛṇate̱ gavi̭ṣṭiṣu̱ tvāṃ viśvā̭su̱ havyā̱sviṣṭi̭ṣu ||2||
aiṣṷ cākandhi puruhūta sū̱riṣṷ vṛ̱dhāso̱ ye ma̭ghavannāna̱śurma̱gham |
arca̭nti to̱ke tana̭ye̱ pari̭ṣṭiṣu me̱dhasā̭tā vā̱jina̱mahra̭ye̱ dhanḙ ||3||
sa innu rā̱yaḥ subhṛ̭tasya cākana̱nmada̱ṃ yo a̭sya̱ raṃhya̱ṃ cikḙtati |
tvāvṛ̭dho maghavandā̱śva̭dhvaro ma̱kṣū sa vāja̭ṃ bharate̱ dhanā̱ nṛbhi̭: ||4||
tvaṃ śardhā̭ya mahi̱nā gṛ̭ṇā̱na u̱ru kṛ̭dhi maghavañcha̱gdhi rā̱yaḥ |
tvaṃ no̭ mi̱tro varṷṇo̱ na mā̱yī pi̱tvo na da̭sma dayase vibha̱ktā ||5||
5 pṛthurvainyaḥ| indraḥ| triṣṭup|
su̱ṣvā̱ṇāsa̭ indra stu̱masi̭ tvā sasa̱vāṃsa̭śca tuvinṛmṇa̱ vāja̭m |
ā no̭ bhara suvi̱taṃ yasya̭ cā̱kantmanā̱ tanā̭ sanuyāma̱ tvotā̭: ||1||
ṛ̱ṣvastvami̭ndra śūra jā̱to dāsī̱rviśa̱: sūryḙṇa sahyāḥ |
guhā̭ hi̱taṃ guhya̭ṃ gū̱ḻhama̱psu bi̭bhṛ̱masi̭ pra̱srava̭ṇe̱ na soma̭m ||2||
a̱ryo vā̱ giro̭ a̱bhya̭rca vi̱dvānṛṣī̭ṇā̱ṃ vipra̭: suma̱tiṃ ca̭kā̱naḥ |
te syā̭ma̱ ye ra̱ṇaya̭nta̱ somai̭re̱nota tubhya̭ṃ rathoḻha bha̱kṣaiḥ ||3||
i̱mā brahmḙndra̱ tubhya̭ṃ śaṃsi̱ dā nṛbhyo̭ nṛ̱ṇāṃ śṷ̄ra̱ śava̭: |
tebhi̭rbhava̱ sakra̭tu̱ryeṣṷ cā̱kannu̱ta trā̭yasva gṛṇa̱ta u̱ta stīn ||4||
śru̱dhī hava̭mindra śūra̱ pṛthyā̭ u̱ta sta̭vase ve̱nyasyā̱rkaiḥ |
ā yaste̱ yoni̭ṃ ghṛ̱tava̭nta̱masvā̭rū̱rmirna nimnairdra̭vayanta̱ vakvā̭: ||5||
5 arcan hairaṇyastūpaḥ| savitā| triṣṭup|
sa̱vi̱tā ya̱ntraiḥ pṛ̭thi̱vīma̭ramṇādaskambha̱ne sa̭vi̱tā dyāma̭dṛṃhat |
aśva̭mivādhukṣa̱ddhuni̭ma̱ntari̭kṣama̱tūrtḙ ba̱ddhaṃ sa̭vi̱tā sa̭mu̱dram ||1||
yatrā̭ samu̱draḥ ska̭bhi̱to vyauna̱dapā̭ṃ napātsavi̱tā tasya̭ veda |
ato̱ bhūrata̭ ā̱ utthi̭ta̱ṃ rajo'to̱ dyāvā̭pṛthi̱vī a̭prathetām ||2||
pa̱ścedama̱nyada̭bhava̱dyaja̭tra̱mama̭rtyasya̱ bhuva̭nasya bhū̱nā |
su̱pa̱rṇo a̱ṅga sa̭vi̱turga̱rutmā̱npūrvo̭ jā̱taḥ sa ṷ a̱syānu̱ dharma̭ ||3||
gāva̭ iva̱ grāma̱ṃ yūyṷdhiri̱vāśvā̭nvā̱śreva̭ va̱tsaṃ su̱manā̱ duhā̭nā |
pati̭riva jā̱yāma̱bhi no̱ nyḙtu dha̱rtā di̱vaḥ sa̭vi̱tā vi̱śvavā̭raḥ ||4||
hira̭ṇyastūpaḥ savita̱ryathā̭ tvā''ṅgira̱so ju̱hve vājḙ a̱smin |
e̱vā tvārca̱nnava̭se̱ vanda̭māna̱: soma̭syevā̱ṃśuṃ prati̭ jāgarā̱ham ||5||
5 mṛḻīko vāsiṣṭhaḥ| agniḥ| bṛhatī, 4-5 upariṣṭājjyotiḥ, 4 jagatī vā|
sami̭ddhaści̱tsami̭dhyase de̱vebhyo̭ havyavāhana | ā̱di̱tyai ru̱drairvasṷbhirna̱ ā ga̭hi mṛḻī̱kāya̭ na̱ ā ga̭hi ||1||
i̱maṃ ya̱jñami̱daṃ vaco̭ jujuṣā̱ṇa u̱pāga̭hi | martā̭sastvā samidhāna havāmahe mṛḻī̱kāya̭ havāmahe ||2||
tvāmṷ jā̱tavḙdasaṃ vi̱śvavā̭raṃ gṛṇe dhi̱yā | agnḙ de̱vā~ ā va̭ha naḥ pri̱yavra̭tānmṛḻī̱kāya̭ pri̱yavra̭tān ||3||
a̱gnirde̱vo de̱vānā̭mabhavatpu̱rohi̭to̱'gniṃ ma̭nu̱ṣyā̱3 ṛṣa̭ya̱: samī̭dhire |
a̱gniṃ ma̱ho dhana̭sātāva̱haṃ hṷve mṛḻī̱kaṃ dhana̭sātaye ||4||
a̱gniratri̭ṃ bha̱radvā̭ja̱ṃ gavi̭ṣṭhira̱ṃ prāva̭nna̱: kaṇva̭ṃ tra̱sada̭syumāha̱ve |
a̱gniṃ vasi̭ṣṭho havate pu̱rohi̭to mṛḻī̱kāya̭ pu̱rohi̭taḥ ||5||
śraddhā sūkta
5 śraddhā kāmāyanī|śradhā | anuṣṭup|
śra̱ddhayā̱gniḥ sami̭dhyate śra̱ddhayā̭ hūyate ha̱viḥ | śra̱ddhāṃ bhaga̭sya mū̱rdhani̱ vaca̱sā vḙdayāmasi ||1
pri̱yaṃ śra̭ddhe̱ dada̭taḥ pri̱yaṃ śra̭ddhe̱ didā̭sataḥ | pri̱yaṃ bho̱jeṣu̱ yajva̭svi̱daṃ ma̭ udi̱taṃ kṛ̭dhi ||2
yathā̭ de̱vā asṷreṣu śra̱ddhāmu̱greṣṷ cakri̱re | e̱vaṃ bho̱jeṣu̱ yajva̭sva̱smāka̭mudi̱taṃ kṛ̭dhi ||3
śra̱ddhāṃ de̱vā yaja̭mānā vā̱yugo̭pā̱ upā̭sate | śra̱ddhāṃ hṛ̭da̱yya1yākṷ̄tyā śra̱ddhayā̭ vindate̱ vasṷ ||4
śra̱ddhāṃ prā̱tarha̭vāmahe śra̱ddhāṃ ma̱dhyaṃdi̭na̱ṃ pari̭ | śra̱ddhāṃ sūrya̭sya ni̱mruci̱ śraddhe̱ śraddhā̭paye̱ha na̭: ||5
5 śāso bhāradvājaḥ| indraḥ| anuṣṭup|
śā̱sa i̱tthā ma̱hā~ a̭syamitrakhā̱do adbhṷtaḥ | na yasya̭ ha̱nyate̱ sakhā̱ na jīya̭te̱ kadā̭ ca̱na ||1
sva̱sti̱dā vi̱śaspati̭rvṛtra̱hā vi̭mṛ̱dho va̱śī | vṛṣendra̭: pu̱ra ḙtu naḥ soma̱pā a̭bhayaṃka̱raḥ ||2
vi rakṣo̱ vi mṛdho̭ jahi̱ vi vṛ̱trasya̱ hanṷ̄ ruja | vi ma̱nyumi̭ndra vṛtrahanna̱mitra̭syābhi̱dāsa̭taḥ ||3
vi na̭ indra̱ mṛdho̭ jahi nī̱cā ya̭ccha pṛtanya̱taḥ | yo a̱smā~ a̭bhi̱dāsa̱tyadha̭raṃ gamayā̱ tama̭: ||4
apḙndra dviṣa̱to mano'pa̱ jijyā̭sato va̱dham | vi ma̱nyoḥ śarma̭ yaccha̱ varī̭yo yavayā va̱dham ||5
5 devajāmaya indramātaraḥ| indraḥ| gāyatrī|
ī̱ṅkhaya̭ntīrapa̱syuva̱ indra̭ṃ jā̱tamupā̭sate | bhe̱jā̱nāsa̭: su̱vīrya̭m ||1||
tvami̭ndra̱ balā̱dadhi̱ saha̭so jā̱ta oja̭saḥ | tvaṃ vṛ̭ṣa̱nvṛṣeda̭si ||2||
tvami̭ndrāsi vṛtra̱hā vya1ntari̭kṣamatiraḥ | uddyāma̭stabhnā̱ oja̭sā ||3||
tvami̭ndra sa̱joṣa̭sama̱rkaṃ bi̭bharṣi bā̱hvoḥ | vajra̱ṃ śiśā̭na̱ oja̭sā ||4||
tvami̭ndrābhi̱bhūra̭si̱ viśvā̭ jā̱tānyoja̭sā | sa viśvā̱ bhuva̱ ābha̭vaḥ ||5||
5 yamī vaivasvatī| bhāvavṛttam| anuṣṭup|
soma̱ ekḙbhyaḥ pavate ghṛ̱tameka̱ upā̭sate | yebhyo̱ madhṷ pra̱dhāva̭ti̱ tā~ści̭de̱vāpi̭ gacchatāt ||1||
tapa̭sā̱ ye a̭nādhṛ̱ṣyāstapa̭sā̱ ye sva̭rya̱yuḥ | tapo̱ ye ca̭kri̱re maha̱stā~ści̭de̱vāpi̭ gacchatāt ||2||
ye yudhya̭nte pra̱dhanḙṣu̱ śūrā̭so̱ ye ta̭nū̱tyaja̭: | ye vā̭ sa̱hasra̭dakṣiṇā̱stā~ści̭de̱vāpi̭ gacchatāt ||3||
ye ci̱tpūrva̭ ṛta̱sāpa̭ ṛ̱tāvā̭na ṛtā̱vṛdha̭: | pi̱tṝntapa̭svato yama̱ tā~ści̭de̱vāpi̭ gacchatāt ||4||
sa̱hasra̭ṇīthāḥ ka̱vayo̱ ye go̭pā̱yanti̱ sūrya̭m | ṛṣī̱ntapa̭svato yama tapo̱jā~ api̭ gacchatāt ||5||
5 śirimbiṭho bhāradvājaḥ| alakṣmīghnam , 2-3 brahmaṇaspatiḥ, 5 viśvedevāḥ| anuṣṭup|
arā̭yi̱ kāṇe̱ vika̭ṭe gi̱riṃ ga̭ccha sadānve | śi̱rimbi̭ṭhasya̱ satva̭bhi̱stebhi̭ṣṭvā cātayāmasi ||1||
ca̱tto i̱taśca̱ttāmuta̱: sarvā̭ bhrū̱ṇānyā̱ruṣī̭ | a̱rā̱yya̭ṃ brahmaṇaspate̱ tīkṣṇa̭śṛṇgodṛ̱ṣanni̭hi ||2||
a̱do yaddāru̱ plava̭te̱ sindho̭: pā̱re a̭pūru̱ṣam | tadā ra̭bhasva durhaṇo̱ tena̭ gaccha parasta̱ram ||3||
yaddha̱ prācī̱raja̭ga̱ntoro̭ maṇḍūradhāṇikīḥ | ha̱tā indra̭sya̱ śatra̭va̱: sarvḙ budbu̱dayā̭śavaḥ ||4||
parī̱me gāma̭neṣata̱ parya̱gnima̭hṛṣata | de̱veṣva̭krata̱ śrava̱: ka i̱mā~ ā da̭dharṣati ||5||
5 keturāgneyaḥ| agniḥ| gāyatrī|
a̱gniṃ hi̭nvantu no̱ dhiya̱: sapti̭mā̱śumi̭vā̱jiṣṷ | tena̭ jeṣma̱ dhana̭ṃdhanam ||1||
yayā̱ gā ā̱karā̭mahe̱ sena̭yāgne̱ tavo̱tyā | tāṃ no̭ hinva ma̱ghatta̭ye ||2||
āgnḙ sthū̱raṃ ra̱yiṃ bha̭ra pṛ̱thuṃ goma̭ntama̱śvina̭m | a̱ṅdhi khaṃ va̱rtayā̭ pa̱ṇim ||3||
agne̱ nakṣa̭trama̱jara̱mā sūrya̭ṃ rohayo di̱vi | dadha̱jjyoti̱rjanḙbhyaḥ ||4||
agnḙ ke̱turvi̱śāma̭si̱ preṣṭha̱: śreṣṭha̭ upastha̱sat | bodhā̭ sto̱tre vayo̱ dadha̭t ||5||
5 bhuvana āptyaḥ, sādhano vā bhauvanaḥ|viśvedevāḥ| dvipadā triṣṭup|
i̱mā nu ka̱ṃ bhuva̭nā sīṣadhā̱mendra̭śca̱ viśvḙ ca de̱vāḥ ||1
ya̱jñaṃ ca̭ nasta̱nva̭ṃ ca pra̱jāṃ cā̭''di̱tyairindra̭: sa̱ha cī̭kḷpāti ||1|| 2
ā̱di̱tyairindra̱: saga̭ṇo ma̱rudbhi̭ra̱smāka̭ṃ bhūtvavi̱tā ta̱nūnā̭m ||3
ha̱tvāya̭ de̱vā asṷrā̱nyadāya̭nde̱vā dḙva̱tvama̭bhi̱rakṣa̭māṇāḥ ||2|| 4
pra̱tyañca̭ma̱rkama̭naya̱ñchacī̭bhi̱rāditsva̱dhāmi̭ṣi̱rāṃ parya̭paśyan ||3|| 5
5 cakṣuḥ sauryaḥ| sūryaḥ| gāyatrī, 2 svarāṭ|
sūryo̭ no di̱vaspā̭tu̱ vāto̭ a̱ntari̭kṣāt | a̱gnirna̱: pārthi̭vebhyaḥ ||1||
joṣā̭ savita̱ryasya̭ te̱ hara̭: śa̱taṃ sa̱vā~ arha̭ti | pā̱hi no̭ di̱dyuta̱: pata̭ntyāḥ ||2||
cakṣṷrno de̱vaḥ sa̭vi̱tā cakṣṷrna u̱ta parva̭taḥ | cakṣṷrdhā̱tā da̭dhātu naḥ ||3||
cakṣṷrno dhehi̱ cakṣṷṣe̱ cakṣṷrvi̱khyai ta̱nūbhya̭: | saṃ ce̱daṃ vi ca̭ paśyema ||4||
su̱sa̱ṃdṛśa̭ṃ tvā va̱yaṃ prati̭ paśyema sūrya | vi pa̭śyema nṛ̱cakṣa̭saḥ ||5||
6 paulomī śacī| śacī (ātmānaṃ tuṣṭāva)| anuṣṭup|
uda̱sau sūryo̭ agā̱duda̱yaṃ mā̭ma̱ko bhaga̭: | a̱haṃ tadvi̭dva̱lā pati̭ma̱bhya̭sākṣi viṣāsa̱hiḥ ||1||
a̱haṃ ke̱tura̱haṃ mū̱rdhā'hamu̱grā vi̱vāca̭nī | mamedanu̱ kratu̱ṃ pati̭: sehā̱nāyā̭ u̱pāca̭ret ||2||
mama̭ pu̱trāḥ śa̭tru̱haṇo'tho̭ me duhi̱tā vi̱rāṭ | u̱tāhama̭smi saṃja̱yā patyaṷ me̱ śloka̭ utta̱maḥ ||3||
yenendro̭ ha̱viṣā̭ kṛ̱tvyabha̭vaddyu̱mnyṷtta̱maḥ | i̱daṃ tada̭kri devā asapa̱tnā kilā̭bhuvam ||4||
a̱sa̱pa̱tnā sa̭patna̱ghnī jaya̭ntyabhi̱bhūva̭rī | āvṛ̭kṣama̱nyāsā̱ṃ varco̱ rādho̱ asthḙyasāmiva ||5||
sama̭jaiṣami̱mā a̱haṃ sa̱patnī̭rabhi̱bhūva̭rī | yathā̱hama̱sya vī̱rasya̭ vi̱rājā̭ni̱ jana̭sya ca ||6||
5 pūraṇo vaiśvāmitraḥ| indraḥ| triṣṭup|
tī̱vrasyā̱bhiva̭yaso a̱sya pā̭hi sarvara̱thā vi harī̭ i̱ha mṷñca |
 indra̱ mā tvā̱ yaja̭mānāso a̱nye ni rī̭rama̱ntubhya̭mi̱me su̱tāsa̭: ||1||
tubhya̭ṃ su̱tāstubhya̭mu̱ sotvā̭sa̱stvāṃ gira̱: śvātryā̱ ā hva̭yanti |
 indre̱dama̱dya sava̭naṃ juṣā̱ṇo viśva̭sya vi̱dvā~ i̱ha pā̭hi̱ soma̭m ||2||
ya ṷśa̱tā mana̭sā̱ soma̭masmai sarvahṛ̱dā de̱vakā̭maḥ su̱noti̭ |
na gā indra̱stasya̱ parā̭ dadāti praśa̱stamiccārṷmasmai kṛṇoti ||3||
anṷspaṣṭo bhavatye̱ṣo a̭sya̱ yo a̭smai re̱vānna su̱noti̱ soma̭m |
nira̭ra̱tnau ma̱ghavā̱ taṃ da̭dhāti brahma̱dviṣo̭ ha̱ntyanā̭nudiṣṭaḥ ||4||
a̱śvā̱yanto̭ ga̱vyanto̭ vā̱jaya̭nto̱ havā̭mahe̱ tvopa̭ganta̱vā ṷ |
ā̱bhūṣa̭ntaste suma̱tau navā̭yāṃ va̱yami̭ndra tvā śu̱naṃ hṷvema ||5||
5 prājāpatyo yakṣmanāśanaḥ|indrāgnī, rājayakṣmaghnaṃ vā| triṣṭup , 5 anuṣṭup|
mu̱ñcāmi̭ tvā ha̱viṣā̱ jīva̭nāya̱ kama̭jñātaya̱kṣmādu̱ta rā̭jaya̱kṣmāt |
grāhi̭rja̱grāha̱ yadi̭ vai̱tadḙna̱ṃ tasyā̭ indrāgnī̱ pra mṷmuktamenam ||1||
yadi̭ kṣi̱tāyu̱ryadi̭ vā̱ parḙto̱ yadi̭ mṛ̱tyora̭nti̱kaṃ nī̭ta e̱va |
tamā ha̭rāmi̱ niṝ̭teru̱pasthā̱daspā̭rṣamenaṃ śa̱taśā̭radāya ||2||
sa̱ha̱srā̱kṣeṇa̭ śa̱taśā̭radena śa̱tāyṷṣā ha̱viṣāhā̭rṣamenam |
śa̱taṃ yathe̱maṃ śa̱rado̱ nayā̱tīndro̱ viśva̭sya duri̱tasya̭ pā̱ram ||3||
śa̱taṃ jī̭va śa̱rado̱ vardha̭mānaḥ śa̱taṃ hḙma̱ntāñcha̱tamṷ vasa̱ntān |
śa̱tami̭ndrā̱gnī sa̭vi̱tā bṛha̱spati̭: śa̱tāyṷṣā ha̱viṣe̱maṃ puna̭rduḥ ||4||
āhā̭rṣa̱ṃ tvāvi̭daṃ tvā̱ puna̱rāgā̭: punarnava | sarvā̭ṅga̱ sarva̭ṃ te̱ cakṣu̱: sarva̱māyṷśca te'vidam ||5||
6 brāhmo rakṣohā| rakṣohā| anuṣṭup|
brahma̭ṇā̱gniḥ sa̭ṃvidā̱no ra̭kṣo̱hā bā̭dhatāmi̱taḥ | amī̭vā̱ yaste̱ garbha̭ṃ du̱rṇāmā̱ yoni̭mā̱śayḙ ||1||
yaste̱ garbha̱mamī̭vā du̱rṇāmā̱ yoni̭mā̱śayḙ | a̱gniṣṭaṃ brahma̭ṇā sa̱ha niṣkra̱vyāda̭manīnaśat ||2||
yaste̱ hanti̭ pa̱taya̭ntaṃ niṣa̱tsnuṃ yaḥ sa̭rīsṛ̱pam | jā̱taṃ yaste̱ jighā̭ṃsati̱ tami̱to nā̭śayāmasi ||3||
yasta̭ ū̱rū vi̱hara̭tyanta̱rā dampa̭tī̱ śayḙ | yoni̱ṃ yo a̱ntarā̱reḻhi̱ tami̱to nā̭śayāmasi ||4||
yastvā̱ bhrātā̱ pati̭rbhū̱tvā jā̱ro bhū̱tvā ni̱padya̭te | pra̱jāṃ yaste̱ jighā̭ṃsati̱ tami̱to nā̭śayāmasi ||5||
yastvā̱ svapnḙna̱ tama̭sā mohayi̱tvā ni̱padya̭te | pra̱jāṃ yaste̱ jighā̭ṃsati̱ tami̱to nā̭śayāmasi ||6||
6 vivṛhā kāśyapaḥ| yakṣmanāśanam| anuṣṭup|
a̱kṣībhyā̭ṃ te̱ nāsi̭kābhyā̱ṃ karṇā̭bhyā̱ṃ chubṷkā̱dadhi̭ | yakṣma̭ṃ śīrṣa̱ṇya̭ṃ ma̱stiṣkā̭jji̱hvāyā̱ vi vṛ̭hāmi te ||1||
grī̱vābhya̭sta u̱ṣṇihā̭bhya̱: kīka̭sābhyo anū̱kyā̭t | yakṣma̭ṃ doṣa̱ṇya1maṃsā̭bhyāṃ bā̱hubhyā̱ṃ vi vṛ̭hāmi te ||2||
ā̱ntrebhya̭ste̱ gudā̭bhyo vani̱ṣṭhorhṛda̭yā̱dadhi̭ | yakṣma̱ṃ mata̭snābhyāṃ ya̱knaḥ plā̱śibhyo̱ vi vṛ̭hāmi te ||3||
ū̱rubhyā̭ṃ te aṣṭhī̱vadbhyā̱ṃ pārṣṇi̭bhyā̱ṃ prapa̭dābhyām | yakṣma̱ṃ śroṇi̭bhyā̱ṃ bhāsa̭dā̱dbhaṃsa̭so̱ vi vṛ̭hāmi te ||4||
meha̭nādvana̱ṃkara̭ṇā̱lloma̭bhyaste na̱khebhya̭: | yakṣma̱ṃ sarva̭smādā̱tmana̱stami̱daṃ vi vṛ̭hāmi te ||5||
aṅgā̭daṅgā̱llomno̭lomno jā̱taṃ parva̭ṇiparvaṇi | yakṣma̱ṃ sarva̭smādā̱tmana̱stami̱daṃ vi vṛ̭hāmi te ||6||
5 pracetā āṃgirasaḥ| du:svapnanāśanam| anuṣṭup , 3 triṣṭup, 5 paṃktiḥ|
apḙhi manasaspa̱te'pa̭ krāma pa̱raśca̭ra | pa̱ro niṝ̭tyā̱ ā ca̭kṣva bahu̱dhā jīva̭to̱ mana̭: ||1||
bha̱draṃ vai vara̭ṃ vṛṇate bha̱draṃ yṷñjanti̱ dakṣi̭ṇam | bha̱draṃ vai̭vasva̱te cakṣṷrbahu̱trā jīva̭to̱ mana̭: ||2||
yadā̱śasā̭ ni̱:śasā̭bhi̱śaso̭pāri̱ma jāgra̭to̱ yatsva̱panta̭: |
a̱gnirviśvā̱nyapa̭ duṣkṛ̱tānyajṷṣṭānyā̱re a̱smadda̭dhātu ||3||
yadi̭ndra brahmaṇaspate'bhidro̱haṃ carā̭masi | pracḙtā na āṅgira̱so dvi̭ṣa̱tāṃ pā̱tvaṃha̭saḥ ||4||
ajai̭ṣmā̱dyāsa̭nāma̱ cābhū̱mānā̭gaso va̱yam |
jā̱gra̱tsva̱pnaḥ sa̭ṃka̱lpaḥ pā̱po yaṃ dvi̱ṣmastaṃ sa ṛ̭cchatu̱ yo no̱ dveṣṭi̱ tamṛ̭cchatu ||5||
5 naiṛrtaḥ kapotaḥ|viśvedevāḥ| triṣṭup|
devā̭: ka̱pota̭ iṣi̱to yadi̱cchandū̱to niṝ̭tyā i̱damā̭ja̱gāma̭ |
tasmā̭ arcāma kṛ̱ṇavā̭ma̱ niṣkṛ̭ti̱ṃ śaṃ no̭ astu dvi̱pade̱ śaṃ catṷṣpade ||1||
śi̱vaḥ ka̱pota̭ iṣi̱to no̭ astvanā̱gā dḙvāḥ śaku̱no gṛ̱heṣṷ |
a̱gnirhi vipro̭ ju̱ṣatā̭ṃ ha̱virna̱: pari̭ he̱tiḥ pa̱kṣiṇī̭ no vṛṇaktu ||2||
he̱tiḥ pa̱kṣiṇī̱ na da̭bhātya̱smānā̱ṣṭryāṃ pa̱daṃ kṛ̭ṇute agni̱dhānḙ |
śaṃ no̱ gobhya̭śca̱ purṷṣebhyaścāstu̱ mā no̭ hiṃsīdi̱ha dḙvāḥ ka̱pota̭: ||3||
yadulṷ̄ko̱ vada̭ti mo̱ghame̱tadyatka̱pota̭: pa̱dama̱gnau kṛ̱ṇoti̭ |
yasya̭ dū̱taḥ prahi̭ta e̱ṣa e̱tattasmai̭ ya̱māya̱ namo̭ astu mṛ̱tyavḙ ||4||
ṛ̱cā ka̱pota̭ṃ nudata pra̱ṇoda̱miṣa̱ṃ mada̭nta̱: pari̱ gāṃ na̭yadhvam |
sa̱ṃyo̱paya̭nto duri̱tāni̱ viśvā̭ hi̱tvā na̱ ūrja̱ṃ pra pa̭tā̱tpati̭ṣṭhaḥ ||5||
5 ṛṣabho vairājaḥ, ṛṣabhaḥ śākvaro vā| sapatnghnam| anuṣṭup , 5 mahāpaṃktiḥ|
ṛ̱ṣa̱bhaṃ mā̭ samā̱nānā̭ṃ sa̱patnā̭nāṃ viṣāsa̱him | ha̱ntāra̱ṃ śatrṷ̄ṇāṃ kṛdhi vi̱rāja̱ṃ gopa̭ti̱ṃ gavā̭m ||1||
a̱hama̭smi sapatna̱hendra̭ i̱vāri̭ṣṭo̱ akṣa̭taḥ | a̱dhaḥ sa̱patnā̭ me pa̱dori̱me sarvḙ a̱bhiṣṭhi̭tāḥ ||2||
atrai̱va vo'pi̭ nahyāmyu̱bhe ārtnī̭ iva̱ jyayā̭ | vāca̭spate̱ ni ṣḙdhe̱mānyathā̱ madadha̭ra̱ṃ vadā̭n ||3||
a̱bhi̱bhūra̱hamāga̭maṃ vi̱śvaka̭rmeṇa̱ dhāmnā̭ | ā va̭ści̱ttamā vo̭ vra̱tamā vo̱'haṃ sami̭tiṃ dade ||4||
yo̱ga̱kṣe̱maṃ va̭ ā̱dāyā̱'haṃ bhṷ̄yāsamutta̱ma ā vo̭ mū̱rdhāna̭makramīm |
a̱dha̱spa̱dānma̱ udva̭data ma̱ṇḍūkā̭ ivoda̱kānma̱ṇḍūkā̭ uda̱kādi̭va ||5||
4 viśvāmitra-jamadagnī| indraḥ, 3 soma-varuṇa-bṛhaspati-anumati-maghavat-dhātṛ-vidhātāraḥ| jagatī |
tubhye̱dami̭ndra̱ pari̭ ṣicyate̱ madhu̱ tvaṃ su̱tasya̭ ka̱laśa̭sya rājasi |
tvaṃ ra̱yiṃ pṷru̱vīrā̭mu naskṛdhi̱ tvaṃ tapa̭: pari̱tapyā̭jaya̱: sva̭: ||1||
sva̱rjita̱ṃ mahi̭ mandā̱namandha̭so̱ havā̭mahe̱ pari̭ śa̱kraṃ su̱tā~ upa̭ |
i̱maṃ no̭ ya̱jñami̱ha bo̱dhyā ga̭hi̱ spṛdho̱ jaya̭ntaṃ ma̱ghavā̭namīmahe ||2||
soma̭sya̱ rājño̱ varṷṇasya̱ dharma̭ṇi̱ bṛha̱spate̱ranṷmatyā u̱ śarma̭ṇi |
tavā̱hama̱dya ma̭ghava̱nnupa̭stutau̱ dhāta̱rvidhā̭taḥ ka̱laśā̭~ abhakṣayam ||3||
prasṷ̄to bha̱kṣama̭karaṃ ca̱rāvapi̱ stoma̭ṃ ce̱maṃ pra̭tha̱maḥ sū̱rirunmṛ̭je |
su̱te sā̱tena̱ yadyāga̭maṃ vā̱ṃ prati̭ viśvāmitrajamadagnī̱ damḙ ||4||
4 anilo vātāyanaḥ| vāyuḥ| triṣṭup|
vāta̭sya̱ nu ma̭hi̱māna̱ṃ ratha̭sya ru̱jannḙti sta̱naya̭nnasya̱ ghoṣa̭: |
di̱vi̱spṛgyā̭tyaru̱ṇāni̭ kṛ̱ṇvannu̱to ḙti pṛthi̱vyā re̱ṇumasya̭n ||1||
saṃ prera̭te̱ anu̱ vāta̭sya vi̱ṣṭhā aina̭ṃ gacchanti̱ sama̭na̱ṃ na yoṣā̭: |
tābhi̭: sa̱yuksa̱ratha̭ṃ de̱va ī̭yate̱'sya viśva̭sya̱ bhuva̭nasya̱ rājā̭ ||2||
a̱ntari̭kṣe pa̱thibhi̱rīya̭māno̱ na ni vi̭śate kata̱macca̱nāha̭: |
a̱pāṃ sakhā̭ prathama̱jā ṛ̱tāvā̱ kva̭ svijjā̱taḥ kuta̱ ā ba̭bhūva ||3||
ā̱tmā de̱vānā̱ṃ bhuva̭nasya̱ garbho̭ yathāva̱śaṃ ca̭rati de̱va e̱ṣaḥ |
ghoṣā̱ ida̭sya śṛṇvire̱ na rū̱paṃ tasmai̱ vātā̭ya ha̱viṣā̭ vidhema ||4||
4 śabaraḥ kākṣīvataḥ|gāvaḥ| triṣṭup|
ma̱yo̱bhūrvāto̭ a̱bhi vā̭tū̱srā ūrja̭svatī̱roṣa̭dhī̱rā ri̭śantām |
pīva̭svatīrjī̱vadha̭nyāḥ pibantvava̱sāya̭ pa̱dvatḙ rudra mṛḻa ||1||
yāḥ sarṷ̄pā̱ virṷ̄pā̱ eka̭rūpā̱ yāsā̭ma̱gniriṣṭyā̱ nāmā̭ni̱ veda̭ |
yā aṅgi̭rasa̱stapa̭se̱ha ca̱krustābhya̭: parjanya̱ mahi̱ śarma̭ yaccha ||2||
yā de̱veṣṷ ta̱nva1maira̭yanta̱ yāsā̱ṃ somo̱ viśvā̭ rū̱pāṇi̱ veda̭ |
tā a̱smabhya̱ṃ paya̭sā̱ pinva̭mānāḥ pra̱jāva̭tīrindra go̱ṣṭhe ri̭rīhi ||3||
pra̱jāpa̭ti̱rmahya̭me̱tā rarā̭ṇo̱ viśvai̭rde̱vaiḥ pi̱tṛbhi̭: saṃvidā̱naḥ |
śi̱vāḥ sa̱tīrupa̭ no go̱ṣṭhamāka̱stāsā̭ṃ va̱yaṃ pra̱jayā̱ saṃ sa̭dema ||4||
4 vibhrāṭ sauryaḥ| sūryaḥ| jagatī, 4 āstārapaṃktiḥ|
vi̱bhrāḍbṛ̱hatpi̭batu so̱myaṃ madhvāyu̱rdadha̭dya̱jñapa̭tā̱vavi̭hrutam |
vāta̭jūto̱ yo a̭bhi̱rakṣa̭ti̱ tmanā̭ pra̱jāḥ pṷpoṣa puru̱dhā vi rā̭jati ||1||
vi̱bhrāḍbṛ̱hatsubhṛ̭taṃ vāja̱sāta̭ma̱ṃ dharma̭ndi̱vo dha̱ruṇḙ sa̱tyamarpi̭tam |
a̱mi̱tra̱hā vṛ̭tra̱hā da̭syu̱hanta̭ma̱ṃ jyoti̭rjajñe asura̱hā sa̭patna̱hā ||2||
i̱daṃ śreṣṭha̱ṃ jyoti̭ṣā̱ṃ jyoti̭rutta̱maṃ vi̭śva̱jiddha̭na̱jidṷcyate bṛ̱hat |
vi̱śva̱bhrāḍbhrā̱jo mahi̱ sūryo̭ dṛ̱śa u̱ru pa̭prathe̱ saha̱ ojo̱ acyṷtam ||3||
vi̱bhrāja̱ñjyoti̭ṣā̱ sva1raga̭ccho roca̱naṃ di̱vaḥ |
yene̱mā viśvā̱ bhuva̭nā̱nyābhṛ̭tā vi̱śvaka̭rmaṇā vi̱śvadḙvyāvatā ||4||
4 iṭo bhārgavaḥ| indraḥ| gāyatrī|
tvaṃ tyami̱ṭato̱ ratha̱mindra̱ prāva̭: su̱tāva̭taḥ | aśṛ̭ṇoḥ so̱mino̱ hava̭m ||1||
tvaṃ ma̱khasya̱ dodha̭ta̱: śiro'va̭ tva̱co bha̭raḥ | aga̭cchaḥ so̱mino̭ gṛ̱ham ||2||
tvaṃ tyami̭ndra̱ martya̭māstrabu̱dhnāya̭ ve̱nyam | muhṷ: śrathnā mana̱syavḙ ||3||
tvaṃ tyami̭ndra̱ sūrya̭ṃ pa̱ścā santa̭ṃ pu̱raskṛ̭dhi | de̱vānā̭ṃ citti̱ro vaśa̭m ||4||
4 saṃvarta āṃgirasaḥ| uṣāḥ| dvipadā virāṭ|
ā yā̭hi̱ vana̭sā sa̱ha gāva̭: sacanta varta̱niṃ yadūdha̭bhiḥ|1
ā yā̭hi̱ vasvyā̭ dhi̱yā maṃhi̭ṣṭho jāra̱yanma̭khaḥ su̱dānṷbhiḥ ||1||2
pi̱tu̱bhṛto̱ na tantu̱mitsu̱dāna̭va̱: prati̭ dadhmo̱ yajā̭masi|3
u̱ṣā apa̱ svasu̱stama̱: saṃ va̭rtayati varta̱niṃ sṷjā̱tatā̭ ||2||4
6 dhruva āṃgirasaḥ| rājā| anuṣṭup|
ā tvā̭hārṣama̱ntarḙdhi dhru̱vasti̱ṣṭhāvi̭cācaliḥ | viśa̭stvā̱ sarvā̭ vāñchantu̱ mā tvadrā̱ṣṭramadhi̭ bhraśat ||1||
i̱haivaidhi̱ māpa̭ cyoṣṭhā̱: parva̭ta i̱vāvi̭cācaliḥ | indra̭ ive̱ha dhru̱vasti̭ṣṭhe̱ha rā̱ṣṭramṷ dhāraya ||2||
i̱mamindro̭ adīdharaddhru̱vaṃ dhru̱veṇa̭ ha̱viṣā̭ | tasmai̱ somo̱ adhi̭ brava̱ttasmā̭ u̱ brahma̭ṇa̱spati̭: ||3||
dhru̱vā dyaurdhru̱vā pṛ̭thi̱vī dhru̱vāsa̱: parva̭tā i̱me | dhru̱vaṃ viśva̭mi̱daṃ jaga̭ddhru̱vo rājā̭ vi̱śāma̱yam ||4||
dhru̱vaṃ te̱ rājā̱ varṷṇo dhru̱vaṃ de̱vo bṛha̱spati̭: | dhru̱vaṃ ta̱ indra̭ścā̱gniśca̭ rā̱ṣṭraṃ dhā̭rayatāṃ dhru̱vam ||5||
dhru̱vaṃ dhru̱veṇa̭ ha̱viṣā̱'bhi soma̭ṃ mṛśāmasi | atho̭ ta̱ indra̱: keva̭lī̱rviśo̭ bali̱hṛta̭skarat ||6||
5 abhīvarta āṃgirasaḥ| rājā| anuṣṭup|
a̱bhī̱va̱rtena̭ ha̱viṣā̱ yenendro̭ abhivāvṛ̱te | tenā̱smānbra̭hmaṇaspate̱'bhi rā̱ṣṭrāya̭ vartaya ||1||
a̱bhi̱vṛtya̭ sa̱patnā̭na̱bhi yā no̱ arā̭tayaḥ | a̱bhi pṛ̭ta̱nyanta̭ṃ tiṣṭhā̱'bhi yo na̭ ira̱syati̭ ||2||
a̱bhi tvā̭ de̱vaḥ sa̭vi̱tā'bhi somo̭ avīvṛtat | a̱bhi tvā̱ viśvā̭ bhū̱tānya̭bhīva̱rto yathāsa̭si ||3||
yenendro̭ ha̱viṣā̭ kṛ̱tvyabha̭vaddyu̱mnyṷtta̱maḥ | i̱daṃ tada̭kri devā asapa̱tnaḥ kilā̭bhuvam ||4||
a̱sa̱pa̱tnaḥ sa̭patna̱hā'bhirā̭ṣṭro viṣāsa̱hiḥ | yathā̱hamḙṣāṃ bhū̱tānā̭ṃ vi̱rājā̭ni̱ jana̭sya ca ||5||
4 ūrdhvagrāvā sarpa ārbudiḥ| grāvāṇaḥ| gāyatrī|
pra vo̭ grāvāṇaḥ savi̱tā de̱vaḥ sṷvatu̱ dharma̭ṇā | dhū̱rṣu yṷjyadhvaṃ sunu̱ta ||1||
grāvā̭ṇo̱ apa̭ du̱cchunā̱mapa̭ sedhata durma̱tim | u̱srāḥ ka̭rtana bheṣa̱jam ||2||
grāvā̭ṇa̱ upa̭re̱ṣvā ma̭hī̱yantḙ sa̱joṣa̭saḥ | vṛṣṇe̱ dadha̭to̱ vṛṣṇya̭m ||3||
grāvā̭ṇaḥ savi̱tā nu vo̭ de̱vaḥ sṷvatu̱ dharma̭ṇā | yaja̭mānāya sunva̱te ||4||
4 sūnurārbhavaḥ| 1 ṛbhavaḥ, 2-4 agniḥ| anuṣṭup , 2 gāyatrī|
pra sū̱nava̭ ṛbhū̱ṇāṃ bṛ̱hanna̭vanta vṛ̱janā̭ | kṣāmā̱ ye vi̱śvadhā̭ya̱so'śna̭ndhe̱nuṃ na mā̱tara̭m ||1||
pra de̱vaṃ de̱vyā dhi̱yā bhara̭tā jā̱tavḙdasam | ha̱vyā no̭ vakṣadānu̱ṣak ||2||
a̱yamu̱ ṣya pra dḙva̱yurhotā̭ ya̱jñāya̭ nīyate | ratho̱ na yora̱bhīvṛ̭to̱ ghṛṇī̭vāñcetati̱ tmanā̭ ||3||
a̱yama̱gnirṷruṣyatya̱mṛtā̭diva̱ janma̭naḥ | saha̭saści̱tsahī̭yānde̱vo jī̱vāta̭ve kṛ̱taḥ ||4||
3 pataṃgaḥ prājāpatyaḥ| māyābhedaḥ| triṣṭup| 1 jagatī|
pa̱ta̱ṃgama̱ktamasṷrasya mā̱yayā̭ hṛ̱dā pa̭śyanti̱ mana̭sā vipa̱ścita̭: |
sa̱mu̱dre a̱ntaḥ ka̱vayo̱ vi ca̭kṣate̱ marī̭cīnāṃ pa̱dami̭cchanti ve̱dhasa̭: ||1||
pa̱ta̱ṃgo vāca̱ṃ mana̭sā bibharti̱ tāṃ ga̭ndha̱rvo̭'vada̱dgarbhḙ a̱ntaḥ |
 tāṃ dyota̭mānāṃ sva̱rya̭ṃ manī̱ṣāmṛ̱tasya̭ pa̱de ka̱vayo̱ ni pā̭nti ||2||
apa̭śyaṃ go̱pāmani̭padyamāna̱mā ca̱ parā̭ ca pa̱thibhi̱ścara̭ntam |
sa sa̱dhrīcī̱: sa viṣṷ̄cī̱rvasā̭na̱ ā va̭rīvarti̱ bhuva̭neṣva̱ntaḥ ||3||
3 ariṣṭanemistārkṣyaḥ| tārkṣyaḥ| triṣṭup|
tyamū̱ ṣu vā̱jina̭ṃ de̱vajṷ̄taṃ sa̱hāvā̭naṃ taru̱tāra̱ṃ rathā̭nām |
ari̭ṣṭanemiṃ pṛta̱nāja̭mā̱śuṃ sva̱staye̱ tārkṣya̭mi̱hā hṷvema ||1||
indra̭syeva rā̱timā̱johṷvānāḥ sva̱staye̱ nāva̭mi̱vā rṷhema |
urvī̱ na pṛthvī̱ bahṷle̱ gabhī̭re̱ mā vā̱metau̱ mā parḙtau riṣāma ||2||
sa̱dyaści̱dyaḥ śava̭sā̱ pañca̭ kṛ̱ṣṭīḥ sūrya̭ iva̱ jyoti̭ṣā̱pasta̱tāna̭ |
sa̱ha̱sra̱sāḥ śa̭ta̱sā a̭sya̱ raṃhi̱rna smā̭ varante yuva̱tiṃ na śaryā̭m ||3||
3 krameṇa- śivirauśīnaraḥ, kāśirājaḥ pratardanaḥ, rauhidaśvo vasumanāḥ| indraḥ| triṣṭup,1 anuṣṭup|
utti̭ṣṭha̱tāva̭ paśya̱tendra̭sya bhā̱gamṛ̱tviya̭m |
yadi̭ śrā̱to ju̱hota̭na̱ yadyaśrā̭to mama̱ttana̭ ||1||
śrā̱taṃ ha̱viro ṣvi̭ndra̱ pra yā̭hi ja̱gāma̱ sūro̱ adhva̭no̱ vima̭dhyam |
pari̭ tvāsate ni̱dhibhi̱: sakhā̭yaḥ kula̱pā na vrā̱japa̭ti̱ṃ cara̭ntam ||2||
śrā̱taṃ ma̭nya̱ ūdha̭ni śrā̱tama̱gnau suśrā̭taṃ manye̱ tadṛ̱taṃ navī̭yaḥ |
mādhya̭ṃdinasya̱ sava̭nasya da̱dhnaḥ pibḙndra vajrinpurukṛjjuṣā̱ṇaḥ ||3||
3 jaya aindraḥ| indraḥ| triṣṭup|
pra sa̭sāhiṣe puruhūta̱ śatrū̱ñjyeṣṭha̭ste̱ śuṣma̭ i̱ha rā̱tira̭stu |
indrā bha̭ra̱ dakṣi̭ṇenā̱ vasṷ̄ni̱ pati̱: sindhṷ̄nāmasi re̱vatī̭nām ||1||
mṛ̱go na bhī̱maḥ kṷca̱ro gi̭ri̱ṣṭhāḥ pa̭rā̱vata̱ ā ja̭ganthā̱ para̭syāḥ |
sṛ̱kaṃ sa̱ṃśāya̭ pa̱vimi̭ndra ti̱gmaṃ vi śatrṷ̄ntāḻhi̱ vi mṛdho̭ nudasva ||2||
indra̭ kṣa̱trama̱bhi vā̱mamojo'jā̭yathā vṛṣabha carṣaṇī̱nām |
apā̭nudo̱ jana̭mamitra̱yanta̭mu̱ruṃ de̱vebhyo̭ akṛṇoru lo̱kam ||3||
3 krameṇa- pratho vāsiṣṭhaḥ, sapratho bhāradvājaḥ, dharmaḥ sauryaḥ| viśvedevāḥ| triṣṭup|
pratha̭śca̱ yasya̭ sa̱pratha̭śca̱ nāmā''nṷṣṭubhasya ha̱viṣo̭ ha̱viryat |
dhā̱turdyutā̭nātsavi̱tuśca̱ viṣṇo̭ rathaṃta̱ramā ja̭bhārā̱ vasi̭ṣṭhaḥ ||1||
avi̭nda̱nte ati̭hita̱ṃ yadāsī̭dya̱jñasya̱ dhāma̭ para̱maṃ guhā̱ yat |
dhā̱turdyutā̭nātsavi̱tuśca̱ viṣṇo̭rbha̱radvā̭jo bṛ̱hadā ca̭kre a̱gneḥ ||2||
tḙ'vinda̱nmana̭sā̱ dīdhyā̭nā̱ yajṷ: ṣka̱nnaṃ pra̭tha̱maṃ dḙva̱yāna̭m |
dhā̱turdyutā̭nātsavi̱tuśca̱ viṣṇo̱rā sūryā̭dabharangha̱rmame̱te ||3||
3 tapurmūrdhā bārhaspatyaḥ| bṛhaspatiḥ| triṣṭup|
bṛha̱spati̭rnayatu du̱rgahā̭ ti̱raḥ puna̭rneṣada̱ghaśa̭ṃsāya̱ manma̭ |
kṣi̱padaśa̭sti̱mapa̭ durma̱tiṃ ha̱nnathā̭ kara̱dyaja̭mānāya̱ śaṃ yoḥ ||1||
narā̱śaṃso̭ no'vatu prayā̱je śaṃ no̭ astvanuyā̱jo havḙṣu |
kṣi̱padaśa̭sti̱mapa̭ durma̱tiṃ ha̱nnathā̭ kara̱dyaja̭mānāya̱ śaṃ yoḥ ||2||
tapṷrmūrdhā tapatu ra̱kṣaso̱ ye bra̭hma̱dviṣa̱: śara̭ve̱ hanta̱vā ṷ |
kṣi̱padaśa̭sti̱mapa̭ durma̱tiṃ ha̱nnathā̭ kara̱dyaja̭mānāya̱ śaṃ yoḥ ||3||
3 prajāvān prājāpatyaḥ| 1 yajamānaḥ, 2 yajamānapatnī, 3 hotrāśivaḥ| triṣṭup|
apa̭śyaṃ tvā̱ mana̭sā̱ ceki̭tāna̱ṃ tapa̭so jā̱taṃ tapa̭so̱ vibhṷ̄tam |
i̱ha pra̱jāmi̱ha ra̱yiṃ rarā̭ṇa̱: pra jā̭yasva pra̱jayā̭ putrakāma ||1||
apa̭śyaṃ tvā̱ mana̭sā̱ dīdhyā̭nā̱ṃ svāyā̭ṃ ta̱nū ṛtvye̱ nādha̭mānām |
upa̱ māmu̱ccā yṷva̱tirba̭bhūyā̱: pra jā̭yasva pra̱jayā̭ putrakāme ||2||
a̱haṃ garbha̭madadhā̱moṣa̭dhīṣva̱haṃ viśvḙṣu̱ bhuva̭neṣva̱ntaḥ |
a̱haṃ pra̱jā a̭janayaṃ pṛthi̱vyāma̱haṃ jani̭bhyo apa̱rīṣṷ pu̱trān ||3||
3 tvaṣṭā garbhakartā, viṣṇurvāprājāpatyaḥ| 1 viṣṇu-tvaṣṭṭa-prajāpati-dhātāraḥ, 2 sinīvālī- sarasvatyaśvinaḥ, 3 aśvinau| anuṣṭup|
viṣṇu̱ryoni̭ṃ kalpayatu̱ tvaṣṭā̭ rū̱pāṇi̭ piṃśatu | ā si̭ñcatu pra̱jāpa̭tirdhā̱tā garbha̭ṃ dadhātu te ||1||
garbha̭ṃ dhehi sinīvāli̱ garbha̭ṃ dhehi sarasvati | garbha̭ṃ te a̱śvinaṷ de̱vāvā dha̭ttā̱ṃ puṣka̭rasrajā ||2||
hi̱ra̱ṇyayī̭ a̱raṇī̱ yaṃ ni̱rmantha̭to a̱śvinā̭ | taṃ ta̱ta garbha̭ṃ havāmahe daśa̱me mā̱si sūta̭ve ||3||
3 satyadhṛtirvāruṇiḥ| ādityaḥ (svastyayanam)| gāyatrī|
mahi̭ trī̱ṇāmavo̭'stu dyu̱kṣaṃ mi̱trasyā̭rya̱mṇaḥ | du̱rā̱dharṣa̱ṃ varṷṇasya ||1||
na̱hi teṣā̭ma̱mā ca̱na nādhva̭su vāra̱ṇeṣṷ | īśḙ ri̱pura̱ghaśa̭ṃsaḥ ||2||
yasmai̭ pu̱trāso̱ adi̭te̱: pra jī̱vase̱ martyā̭ya | jyoti̱ryaccha̱ntyaja̭sram ||3||
3 vātāyana ulaḥ| vāyuḥ| gāyatrī|
vāta̱ ā vā̭tu bheṣa̱jaṃ śa̱mbhu ma̭yo̱bhu no̭ hṛ̱de | pra ṇa̱ āyṷ̄ṃṣi tāriṣat ||1||
u̱ta vā̭ta pi̱tāsi̭ na u̱ta bhrāto̱ta na̱: sakhā̭ | sa no̭ jī̱vāta̭ve kṛdhi ||2||
yada̱do vā̭ta te gṛ̱he̱3'mṛta̭sya ni̱dhirhi̱taḥ | tato̭ no dehi jī̱vasḙ ||3||
5 āgneyo vatsaḥ| agniḥ| gāyatrī|
prāgnaye̱ vāca̭mīraya vṛṣa̱bhāya̭ kṣitī̱nām | sa na̭: parṣa̱dati̱ dviṣa̭: ||1||
yaḥ para̭syāḥ parā̱vata̭sti̱ro dhanvā̭ti̱roca̭te | sa na̭: parṣa̱dati̱ dviṣa̭: ||2||
yo rakṣā̭ṃsi ni̱jūrva̭ti̱ vṛṣā̭ śu̱kreṇa̭ śo̱ciṣā̭ | sa na̭: parṣa̱dati̱ dviṣa̭: ||3||
yo viśvā̱bhi vi̱paśya̭ti̱ bhuva̭nā̱ saṃ ca̱ paśya̭ti | sa na̭: parṣa̱dati̱ dviṣa̭: ||4||
yo a̱sya pā̱re raja̭saḥ śu̱kro a̱gnirajā̭yata | sa na̭: parṣa̱dati̱ dviṣa̭: ||5||
3 āgneyaḥ śyenaḥ| jātavedā agniḥ| gāyatrī|
pra nū̱naṃ jā̱tavḙdasa̱maśva̭ṃ hinota vā̱jina̭m | i̱daṃ no̭ ba̱rhirā̱sadḙ ||1||
a̱sya pra jā̱tavḙdaso̱ vipra̭vīrasya mī̱ḻhuṣa̭: | ma̱hīmi̭yarmi suṣṭu̱tim ||2||
yā ruco̭ jā̱tavḙdaso deva̱trā ha̭vya̱vāha̭nīḥ | tābhi̭rno ya̱jñami̭nvatu ||3||
3 sārparājñī| ātmā,sūryo vā| gāyatrī|
āyaṃ gauḥ pṛśni̭rakramī̱dasa̭danmā̱tara̭ṃ pu̱raḥ | pi̱tara̭ṃ ca pra̱yantsva̭: ||1||
a̱ntaśca̭rati roca̱nā'sya prā̱ṇāda̭pāna̱tī | vya̭khyanmahi̱ṣo diva̭m ||2||
tri̱ṃśaddhāma̱ vi rā̭jati̱ vākpa̭ta̱ṃgāya̭ dhīyate | prati̱ vasto̱raha̱ dyubhi̭: ||3||
3 mādhucchandaso'ghamarṣaṇaḥ| bhāvavṛttam| anuṣṭup|
ṛ̱taṃ ca̭ sa̱tyaṃ cā̱bhī̭ddhā̱ttapa̱so'dhya̭jāyata | tato̱ rātrya̭jāyata̱ tata̭: samu̱dro a̭rṇa̱vaḥ ||1||
sa̱mu̱drāda̭rṇa̱vādadhi̭ saṃvatsa̱ro a̭jāyata | a̱ho̱rā̱trāṇi̭ vi̱dadha̱dviśva̭sya miṣa̱to va̱śī ||2||
sū̱ryā̱ca̱ndra̱masaṷ dhā̱tā ya̭thāpū̱rvama̭kalpayat | diva̭ṃ ca pṛthi̱vīṃ cā̱'ntari̭kṣa̱matho̱ sva̭: ||3||
4 saṃvanana āṅgirasaḥ| 1 agniḥ,2-4 saṃjñānam| anuṣṭup , 3 triṣṭup|
saṃsa̱midyṷvase vṛṣa̱nnagne̱ viśvā̭nya̱rya ā | i̱ḻaspa̱de sami̭dhyase̱ sa no̱ vasū̱nyā bha̭ra ||1||
saṃ ga̭cchadhva̱ṃ saṃ va̭dadhva̱ṃ saṃ vo̱ manā̭ṃsi jānatām |  de̱vā bhā̱gaṃ yathā̱ pūrvḙ saṃjānā̱nā u̱pāsa̭te ||2||
sa̱mā̱no mantra̱: sami̭tiḥ samā̱nī sa̭mā̱naṃ mana̭: sa̱ha ci̱ttamḙṣām |
sa̱mā̱naṃ mantra̭ma̱bhi ma̭ntraye vaḥ samā̱nena̭ vo ha̱viṣā̭ juhomi ||3||
sa̱mā̱nī va̱ ākṷ̄tiḥ samā̱nā hṛda̭yāni vaḥ | sa̱mā̱nama̭stu vo̱ mano̱ yathā̭ va̱: susa̱hāsa̭ti ||4||