Rigveda — Mandala 2

16 gṛtsamada(āṅgirasaḥ śaunahotraḥ paścād) bhārgavaḥ śaunakaḥ| agniḥ|jagatī|
        tvama̭gne̱ dyubhi̱stvamā̭śuśu̱kṣaṇi̱stvama̱dbhyastvamaśma̭na̱spari̭ |
        tvaṃ vanḙbhya̱stvamoṣa̭dhībhya̱stvaṃ nṛ̱ṇāṃ nṛ̭pate jāyase̱ śuci̭: ||1||
        tavā̭gne ho̱traṃ tava̭ po̱tramṛ̱tviya̱ṃ tava̭ ne̱ṣṭraṃ tvama̱gnidṛ̭tāya̱taḥ |
        tava̭ praśā̱straṃ tvama̭dhvarīyasi bra̱hmā cāsi̭ gṛ̱hapa̭tiśca no̱ damḙ ||2||
        tvama̭gna̱ indro̭ vṛṣa̱bhaḥ sa̱tāma̭si̱ tvaṃ viṣṇṷrurugā̱yo na̭ma̱sya̭: |
        tvaṃ bra̱hmā ra̭yi̱vid bra̭hmaṇaspate̱ tvaṃ vi̭dhartaḥ  sacase̱ pura̭ṃdhyā ||3||
        tvama̭gne̱ rājā̱ varṷṇo dhṛ̱tavra̭ta̱stvaṃ mi̱tro bha̭vasi da̱sma īḍya̭: |
        tvama̭rya̱mā satpa̭ti̱ryasya̭ sa̱ṃbhuja̱ṃ tvamaṃśo̭ vi̱dathḙ deva bhāja̱yuḥ ||4||
        tvama̭gne̱ tvaṣṭā̭ vidha̱te su̱vīrya̱ṃ tava̱ gnāvo̭ mitramahaḥ sajā̱tya̭m |
        tvamā̭śu̱hemā̭ rariṣe̱ svaśvya̱ṃ tvaṃ na̱rāṃ śardho̭ asi purū̱vasṷ: ||5||
        tvama̭gne ru̱dro asṷro ma̱ho di̱vastvaṃ śardho̱ mārṷtaṃ pṛ̱kṣa ī̭śiṣe |
        tvaṃ vātai̭raru̱ṇairyā̭si śaṃga̱yastvaṃ pū̱ṣā vi̭dha̱taḥ pā̭si̱ nu tmanā̭ ||6||
        tvama̭gne draviṇo̱dā a̭ra̱ṃkṛte̱ tvaṃ de̱vaḥ sa̭vi̱tā ra̭tna̱dhā a̭si |
        tvaṃ bhago̭ nṛpate̱ vasva̭ īśiṣe̱ tvaṃ pā̱yurdame̱ yaste'vi̭dhat ||7||
        tvāma̭gne̱ dama̱ ā vi̱śpati̱ṃ viśa̱stvāṃ rājā̭naṃ suvi̱datra̭mṛñjate |
        tvaṃ viśvā̭ni svanīka patyase̱ tvaṃ sa̱hasrā̭ṇi śa̱tā daśa̱ prati̭ ||8||
        tvāma̭gne pi̱tara̭mi̱ṣṭibhi̱rnara̱stvāṃ bhrā̱trāya̱ śamyā̭ tanū̱ruca̭m |
        tvaṃ pu̱tro bha̭vasi̱ yaste'vi̭dha̱ttvaṃ sakhā̭ su̱śeva̭: pāsyā̱dhṛṣa̭: ||9||
        tvama̭gna ṛ̱bhurā̱ke na̭ma̱sya1stvaṃ vāja̭sya kṣu̱mato̭ rā̱ya ī̭śiṣe |
        tvaṃ vi bhā̱syanṷ dakṣi dā̱vane̱ tvaṃ vi̱śikṣṷrasi ya̱jñamā̱tani̭: ||10||
        tvama̭gne̱ adi̭tirdeva dā̱śuṣe̱ tvaṃ hotrā̱ bhāra̭tī vardhase gi̱rā |
        tvamiḻā̭ śa̱tahi̭māsi̱ dakṣa̭se̱ tvaṃ vṛ̭tra̱hā va̭supate̱ sara̭svatī ||11||
        tvama̭gne̱ subhṛ̭ta utta̱maṃ vaya̱stava̭ spā̱rhe varṇa̱ ā sa̱ṃdṛśi̱ śriya̭: |
        tvaṃ vāja̭: pra̱tara̭ṇo bṛ̱hanna̭si̱ tvaṃ ra̱yirba̭hu̱lo vi̱śvata̭spṛ̱thuḥ ||12||
        tvāma̭gna ādi̱tyāsa̭ ā̱syaṃ1 tvāṃ ji̱hvāṃ śuca̭yaścakrire kave |
        tvāṃ rā̭ti̱ṣāco̭ adhva̱reṣṷ saścire̱ tve de̱vā ha̱vira̭da̱ntyāhṷtam ||13||
        tve a̭gne̱ viśvḙ a̱mṛtā̭so a̱druha̭ ā̱sā de̱vā ha̱vira̭da̱ntyāhṷtam |
        tvayā̱ martā̭saḥ svadanta āsu̱tiṃ tvaṃ garbho̭ vī̱rudhā̭ṃ jajñiṣe̱ śuci̭: ||14||
        tvaṃ tān tsaṃ ca̱ prati̭ cāsi ma̱jmanā 'gnḙ sujāta̱ pra ca̭ deva ricyase |
        pṛ̱kṣo yadatra̭ mahi̱nā vi te̱ bhuva̱danu̱ dyāvā̭pṛthi̱vī roda̭sī u̱bhe ||15||
        ye sto̱tṛbhyo̱ goa̭grā̱maśva̭peśasa̱magnḙ rā̱timṷpasṛ̱janti̭ sū̱raya̭: |
        a̱smāñca̱ tāṃśca̱ pra hi neṣi̱ vasya̱ ā bṛ̱had va̭dema vi̱dathḙ su̱vīrā̭: ||16||
13 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| agniḥ|jagatī|
ya̱jñena̭ vardhata jā̱tavḙdasama̱gniṃ ya̭jadhvaṃ ha̱viṣā̱ tanā̭ gi̱rā |
sa̱mi̱dhā̱naṃ sṷpra̱yasa̱ṃ sva̭rṇaraṃ dyu̱kṣaṃ hotā̭raṃ vṛ̱janḙṣu dhū̱rṣada̭m ||1||
a̱bhi tvā̱ naktī̭ru̱ṣaso̭ vavāśi̱re 'gnḙ va̱tsaṃ na svasa̭reṣu dhe̱nava̭: |
di̱va i̱veda̭ra̱tirmānṷṣā yu̱gā kṣapo̭ bhāsi puruvāra sa̱ṃyata̭: ||2||
taṃ de̱vā bu̱dhne raja̭saḥ su̱daṃsa̭saṃ di̱vaspṛ̭thi̱vyora̭ra̱tiṃ nyḙrire |
ratha̭miva̱ vedya̭ṃ śu̱kraśo̭ciṣama̱gniṃ mi̱traṃ na kṣi̱tiṣṷ pra̱śaṃsya̭m ||3||
tamu̱kṣamā̭ṇa̱ṃ raja̭si̱ sva ā damḙ ca̱ndrami̭va su̱ruca̭ṃ hvā̱ra ā da̭dhuḥ |
pṛśnyā̭: pata̱raṃ ci̱taya̭ntama̱kṣabhi̭: pā̱tho na pā̱yuṃ jana̭sī u̱bhe anṷ ||4||
sa hotā̱ viśva̱ṃ pari̭ bhūtvadhva̱raṃ tamṷ ha̱vyairmanṷṣa ṛñjate gi̱rā |
hi̱ri̱śi̱pro vṛ̭dhasā̱nāsu̱ jarbhṷra̱d dyaurna stṛbhi̭ścitaya̱d roda̭sī̱ anṷ ||5||
sa no̭ re̱vat sa̭midhā̱naḥ sva̱stayḙ saṃdada̱svān ra̱yima̱smāsṷ dīdihi |
ā na̭: kṛṇuṣva suvi̱tāya̱ roda̭sī̱ agnḙ ha̱vyā manṷṣo deva vī̱tayḙ ||6||
dā no̭ agne bṛha̱to dāḥ sa̭ha̱sriṇo̭ du̱ro na vāja̱ṃ śrutyā̱ apā̭ vṛdhi |
prācī̱ dyāvā̭pṛthi̱vī brahma̭ṇā kṛdhi̱ sva1rṇa śu̱kramu̱ṣaso̱ vi di̭dyutaḥ ||7||
sa i̭dhā̱na u̱ṣaso̱ rāmyā̱ anu̱ sva1rṇa dī̭dedaru̱ṣeṇa̭ bhā̱nunā̭ |
hotrā̭bhira̱gnirmanṷṣaḥ svadhva̱ro rājā̭ vi̱śāmati̭thi̱ścārṷrā̱yavḙ ||8||
e̱vā no̭ agne a̱mṛtḙṣu pūrvya̱ dhīṣpī̭pāya bṛ̱had di̭veṣu̱ mānṷṣā |
duhā̭nā dhe̱nurvṛ̱janḙṣu kā̱rave̱ tmanā̭ śa̱tina̭ṃ puru̱rūpa̭mi̱ṣaṇi̭ ||9||
va̱yama̭gne̱ arva̭tā vā su̱vīrya̱ṃ brahma̭ṇā vā citayemā̱ janā̱~ ati̭ |
a̱smāka̭ṃ dyu̱mnamadhi̱ pañca̭ kṛ̱ṣṭiṣū̱ccā sva1rṇa śṷśucīta du̱ṣṭara̭m ||10||
sa no̭ bodhi sahasya pra̱śaṃsyo̱ yasmi̭n tsujā̱tā i̱ṣaya̭nta sū̱raya̭: |
yama̭gne ya̱jñamṷpa̱yanti̭ vā̱jino̱ nityḙ to̱ke dī̭di̱vāṃsa̱ṃ sve damḙ ||11||
u̱bhayā̭so jātavedaḥ syāma te sto̱tāro̭ agne sū̱raya̭śca̱ śarma̭ṇi |
vasvo̭ rā̱yaḥ pṷruśca̱ndrasya̱ bhūya̭saḥ pra̱jāva̭taḥ svapa̱tyasya̭ śagdhi naḥ ||12||
ye sto̱tṛbhyo̱ goa̭grā̱maśva̭peśasa̱magnḙ rā̱timṷpasṛ̱janti̭ sū̱raya̭: |
a̱smāñca̱ tāṃśca̱ pra hi neṣi̱ vasya̱ ā bṛ̱had va̭dema vi̱dathḙ su̱vīrā̭: ||13||
11 gṛtsamada(āṅgirasaḥ śaunahotraḥ paścād) bhārgavaḥ śaunakaḥ| āprīsūktaṃ- (1 idhmaḥ samiddho'gnirvā, 2 narāśaṃsaḥ, 3 iḻaḥ, 4 barhiḥ,  5 devīrdvāraḥ, 6 uṣāsānaktā, 7 daivyo hotārau pracetasau, 8 tisro devyaḥsarasvatīḻābhāratyaḥ, 9 tvaṣṭā, 10 vanaspatiḥ, 11 svāhākṛtaya,) | triṣṭup, jagatī|
sami̭ddho a̱gnirnihi̭taḥ pṛthi̱vyāṃ pra̱tyaṅ viśvā̭ni̱ bhuva̭nānyasthāt |
hotā̭ pāva̱kaḥ pra̱diva̭: sume̱dhā de̱vo de̱vān ya̭jatva̱gnirarha̭n ||1||
narā̱śaṃsa̱: prati̱ dhāmā̭nya̱ñjan ti̱sro diva̱: prati̭ ma̱hnā sva̱rciḥ |
ghṛ̱ta̱pruṣā̱ mana̭sā ha̱vyamu̱ndan mū̱rdhanya̱jñasya̱ sama̭naktu de̱vān ||2||
ī̱ḻi̱to a̭gne̱ mana̭sā no̱ arha̭n de̱vān ya̭kṣi̱ mānṷṣā̱tpūrvo̭ a̱dya |
sa ā va̭ha ma̱rutā̱ṃ śardho̱ acyṷta̱mindra̭ṃ naro barhi̱ṣada̭ṃ yajadhvam ||3||
deva̭ barhi̱rvardha̭mānaṃ su̱vīra̭ṃ stī̱rṇaṃ rā̱ye su̱bhara̱ṃ vedya̱syām |
ghṛ̱tenā̱ktaṃ va̭savaḥ sīdate̱daṃ viśvḙ devā ādityā ya̱jñiyā̭saḥ ||4||
vi śra̭yantāmurvi̱yā hū̱yamā̭nā̱ dvāro̭ de̱vīḥ sṷprāya̱ṇā namo̭bhiḥ |
vyaca̭svatī̱rvi pra̭thantāmaju̱ryā varṇa̭ṃ punā̱nā ya̱śasa̭ṃ su̱vīra̭m ||5||
sā̱dhvapā̭ṃsi sa̱natā̭ na ukṣi̱te u̱ṣāsā̱naktā̭ va̱yyḙva raṇvi̱te |
tantṷṃ ta̱taṃ sa̱ṃvaya̭ntī samī̱cī ya̱jñasya̱ peśa̭: su̱dughe̱ paya̭svatī ||6||
daivyā̱ hotā̭rā pratha̱mā vi̱duṣṭa̭ra ṛ̱ju ya̭kṣata̱: samṛ̱cā va̱puṣṭa̭rā |
de̱vān yaja̭ntāvṛtu̱thā sama̭ñjato̱ nābhā̭ pṛthi̱vyā adhi̱ sānṷṣu tri̱ṣu ||7||
sara̭svatī sā̱dhaya̭ntī̱ dhiya̭ṃ na̱ iḻā̭ de̱vī bhāra̭tī vi̱śvatṷ̄rtiḥ |
ti̱sro de̱vīḥ sva̱dhayā̭ ba̱rhiredamacchi̭draṃ pāntu śara̱ṇaṃ ni̱ṣadya̭ ||8||
pi̱śaṅga̭rūpaḥ su̱bharo̭ vayo̱dhāḥ śru̱ṣṭī vī̱ro jā̭yate de̱vakā̭maḥ |
pra̱jāṃ tvaṣṭā̱ vi ṣya̭tu̱ nābhi̭ma̱sme athā̭ de̱vānā̱mapyḙtu̱ pātha̭: ||9||
vana̱spati̭ravasṛ̱jannupa̭ sthāda̱gnirha̱viḥ sṷ̄dayāti̱ pra dhī̱bhiḥ |
tridhā̱ sama̭ktaṃ nayatu prajā̱nan de̱vebhyo̱ daivya̭: śami̱topa̭ ha̱vyam ||10||
ghṛ̱taṃ mi̭mikṣe ghṛ̱tama̭sya̱ yoni̭rghṛ̱te śri̱to ghṛ̱tamva̭sya̱ dhāma̭ |
a̱nu̱ṣva̱dhamā va̭ha mā̱daya̭sva̱ svāhā̭kṛtaṃ vṛṣabha vakṣi ha̱vyam ||11||
9 somāhutirbhārgavaḥ| agniḥ| triṣṭup|
hu̱ve va̭: su̱dyotmā̭naṃ suvṛ̱ktiṃ vi̱śāma̱gnimati̭thiṃ supra̱yasa̭m |
mi̱tra i̭va̱ yo di̭dhi̱ṣāyyo̱ bhūd de̱va ādḙve̱ janḙ jā̱tavḙdāḥ ||1||
i̱maṃ vi̱dhanto̭ a̱pāṃ sa̱dhasthḙ dvi̱tāda̭dhu̱rbhṛga̭vo vi̱kṣvā̱3yoḥ |
e̱ṣa viśvā̭nya̱bhya̭stu̱ bhūmā̭ de̱vānā̭ma̱gnira̭ra̱tirjī̱rāśva̭: ||2||
a̱gniṃ de̱vāso̱ mānṷṣīṣu vi̱kṣu pri̱yaṃ dhṷ: kṣe̱ṣyanto̱ na mi̱tram |
sa dī̭dayaduśa̱tīrūrmyā̱ ā da̱kṣāyyo̱ yo dāsva̭te̱ dama̱ ā ||3||
a̱sya ra̱ṇvā svasyḙva pu̱ṣṭiḥ saṃdṛ̭ṣṭirasya hiyā̱nasya̱ dakṣo̭: |
vi yo bhari̭bhra̱doṣa̭dhīṣu ji̱hvāmatyo̱ na rathyo̭ dodhavīti̱ vārā̭n ||4||
ā yanme̱ abhva̭ṃ va̱nada̱: pana̭nto̱śigbhyo̱ nāmi̭mīta̱ varṇa̭m |
sa ci̱treṇa̭ cikite̱ raṃsṷ bhā̱sā jṷju̱rvā~ yo muhu̱rā yuvā̱ bhūt ||5||
ā yo vanā̭ tātṛṣā̱ṇo na bhāti̱ vārṇa pa̱thā rathyḙva svānīt |
kṛ̱ṣṇādhvā̱ tapṷ̄ ra̱ṇvaści̭keta̱ dyauri̭va̱ smaya̭māno̱ nabho̭bhiḥ ||6||
sa yo vyasthā̭da̱bhi dakṣa̭du̱rvīṃ pa̱śurnaiti̭ sva̱yurago̭pāḥ |
a̱gniḥ śo̱ciṣmā̭~ ata̱sānyu̱ṣṇan kṛ̱ṣṇavya̭thirasvadaya̱nna bhūma̭ ||7||
nū te̱ pūrva̱syāva̭so̱ adhī̭tau tṛ̱tīyḙ vi̱dathe̱ manma̭ śaṃsi |
a̱sme a̭gne sa̱ṃyadvī̭raṃ bṛ̱hanta̭ṃ kṣu̱manta̱ṃ vāja̭ṃ svapa̱tyaṃ ra̱yiṃ dā̭: ||8||
tvayā̱ yathā̭ gṛtsama̱dāso̭ agne̱ guhā̭ va̱nvanta̱ upa̭rā~ a̱bhi ṣyuḥ |
su̱vīrā̭so abhimāti̱ṣāha̱: smat sū̱ribhyo̭ gṛṇa̱te tad vayo̭ dhāḥ ||9||
8 somāhutirbhārgavaḥ| agniḥ| anuṣṭup|
hotā̭janiṣṭa̱ ceta̭naḥ pi̱tā pi̱tṛbhya̭ ū̱tayḙ |
pra̱yakṣa̱ñjenya̱ṃ vasṷ śa̱kema̭ vā̱jino̱ yama̭m ||1||
ā yasmi̭n tsa̱pta ra̱śmaya̭sta̱tā ya̱jñasya̭ ne̱tari̭ |
ma̱nu̱ṣvad daivya̭maṣṭa̱maṃ potā̱ viśva̱ṃ tadi̭nvati ||2||
da̱dha̱nve vā̱ yadī̱manu̱ voca̱d brahmā̭ṇi̱ veru̱ tat |
pari̱ viśvā̭ni̱ kāvyā̭ ne̱miśca̱krami̭vābhavat ||3||
sā̱kaṃ hi śuci̭nā̱ śuci̭: praśā̱stā kratu̱nāja̭ni |
vi̱dvā~ a̭sya vra̱tā dhru̱vā va̱yā i̱vānṷ rohate ||4||
tā a̭sya̱ varṇa̭mā̱yuvo̱ neṣṭṷ: sacanta dhe̱nava̭: |
ku̱vit ti̱sṛbhya̱ ā vara̱ṃ svasā̭ro̱ yā i̱daṃ ya̱yuḥ ||5||
yadī̭ mā̱turupa̱ svasā̭ ghṛ̱taṃ bhara̱ntyasthi̭ta |
tāsā̭madhva̱ryurāga̭tau̱ yavo̭ vṛ̱ṣṭīva̭ modate ||6||
svaḥ svāya̱ dhāya̭se kṛṇu̱tāmṛ̱tvigṛ̱tvija̭m |
stoma̭ṃ ya̱jñaṃ cādara̭ṃ va̱nemā̭ rari̱mā va̱yam ||7||
yathā̭ vi̱dvā~ ara̱ṃ kara̱d viśvḙbhyo yaja̱tebhya̭: |
a̱yama̭gne̱ tve api̱ yaṃ ya̱jñaṃ ca̭kṛ̱mā va̱yam ||8||
8 somāhutirbhārgavaḥ| agniḥ| gāyatrī|
i̱māṃ mḙ agne sa̱midha̭mi̱māmṷpa̱sada̭ṃ vaneḥ | i̱mā u̱ ṣu śrṷdhī̱ gira̭: ||1||
a̱yā tḙ agne vidhe̱morjo̭ napā̱daśva̭miṣṭe | e̱nā sū̱ktena̭ sujāta ||2||
taṃ tvā̭ gī̱rbhirgirva̭ṇasaṃ draviṇa̱syuṃ dra̭viṇodaḥ | sa̱pa̱ryema̭ sapa̱ryava̭: ||3||
sa bo̭dhi sū̱rirma̱ghavā̱ vasṷpate̱ vasṷdāvan | yu̱yo̱dhya1smad dveṣā̭ṃsi ||4||
sa no̭ vṛ̱ṣṭiṃ di̱vaspari̱ sa no̱ vāja̭mana̱rvāṇa̭m | sa na̭: saha̱sriṇī̱riṣa̭: ||5||
īḻā̭nāyāva̱syave̱ yavi̭ṣṭha dūta no gi̱rā | yaji̭ṣṭha hota̱rā ga̭hi ||6||
a̱ntarhya̭gna̱ īya̭se vi̱dvān janmo̱bhayā̭ kave | dū̱to janyḙva̱ mitrya̭: ||7||
sa vi̱dvā~ ā ca̭ piprayo̱ yakṣi̭ cikitva ānu̱ṣak | ā cā̱smin tsa̭tsi ba̱rhiṣi̭ ||8||
6 somāhutirbhārgavaḥ| agniḥ| gāyatrī|
śreṣṭha̭ṃ yaviṣṭha bhāra̱tā'gnḙ dyu̱manta̱mā bha̭ra | vaso̭ puru̱spṛha̭ṃ ra̱yim ||1||
mā no̱ arā̭tirīśata de̱vasya̱ martya̭sya ca | parṣi̱ tasyā̭ u̱ta dvi̱ṣaḥ ||2||
viśvā̭ u̱ta tvayā̭ va̱yaṃ dhārā̭ uda̱nyā̭ iva | ati̭ gāhemahi̱ dviṣa̭: ||3||
śuci̭: pāvaka̱ vandyo 'gnḙ bṛ̱had vi ro̭case | tvaṃ ghṛ̱tebhi̱rāhṷtaḥ ||4||
tvaṃ no̭ asi bhāra̱tā'gnḙ va̱śābhi̭ru̱kṣabhi̭: | a̱ṣṭāpa̭dībhi̱rāhṷtaḥ ||5||
drva̭nnaḥ sa̱rpirā̭sutiḥ pra̱tno hotā̱ varḙṇyaḥ | saha̭saspu̱tro adbhṷtaḥ ||6||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| agniḥ|gāyatrī, 6 anuṣṭup|
vā̱ja̱yanni̭va̱ nū rathā̱n yogā̭~ a̱gnerupa̭ stuhi | ya̱śasta̭masya mī̱ḻahuṣa̭: ||1||
yaḥ sṷnī̱tho da̭dā̱śuṣḙ 'ju̱ryo ja̱raya̭nna̱rim | cārṷpratīka̱ āhṷtaḥ ||2||
ya ṷ śri̱yā dame̱ṣvā do̱ṣoṣasi̭ praśa̱syatḙ | yasya̭ vra̱taṃ na mīya̭te ||3||
ā yaḥ sva1rṇa bhā̱nunā̭ ci̱tro vi̱bhātya̱rciṣā̭ | a̱ñjā̱no a̱jarai̭ra̱bhi ||4||
atri̱manṷ sva̱rājya̭ma̱gnimu̱kthāni̭ vāvṛdhuḥ | viśvā̱ adhi̱ śriyo̭ dadhe ||5||
a̱gnerindra̭sya̱ soma̭sya de̱vānā̭mū̱tibhi̭rva̱yam | ari̭ṣyantaḥ sacemahya̱bhi ṣyā̭ma pṛtanya̱taḥ ||6||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| agniḥ| triṣṭup|
ni hotā̭ hotṛ̱ṣada̭ne̱ vidā̭nastve̱ṣo dī̭di̱vā~ a̭sadat su̱dakṣa̭: |
ada̭bdhavratapramati̱rvasi̭ṣṭhaḥ sahasrambha̱raḥ śuci̭jihvo a̱gniḥ ||1||
tvaṃ dū̱tastvamṷ naḥ para̱spāstvaṃ vasya̱ ā vṛ̭ṣabha praṇe̱tā |
agnḙ to̱kasya̭ na̱stanḙ ta̱nūnā̱mapra̭yuccha̱n dīdya̭d bodhi go̱pāḥ ||2||
vi̱dhema̭ te para̱me janma̭nnagne vi̱dhema̱ stomai̱rava̭re sa̱dhasthḙ |
yasmā̱d yonḙru̱dāri̭thā̱ yaje̱ taṃ pra tve ha̱vīṃṣi̭ juhure̱ sami̭ddhe ||3||
agne̱ yaja̭sva ha̱viṣā̱ yajī̭yāñchru̱ṣṭī de̱ṣṇama̱bhi gṛ̭ṇīhi̱ rādha̭: |
tvaṃ hyasi̭ rayi̱patī̭ rayī̱ṇāṃ tvaṃ śu̱krasya̱ vaca̭so ma̱notā̭ ||4||
u̱bhaya̭ṃ te̱ na kṣī̭yate vasa̱vya̭ṃ di̱vedi̭ve̱ jāya̭mānasya dasma |
kṛ̱dhi kṣu̱manta̭ṃ jari̱tāra̭magne kṛ̱dhi pati̭ṃ svapa̱tyasya̭ rā̱yaḥ ||5||
sainānī̭kena suvi̱datro̭ a̱sme yaṣṭā̭ de̱vā~ āya̭jiṣṭhaḥ sva̱sti |
ada̭bdho go̱pā u̱ta na̭: para̱spā agnḙ dyu̱madu̱ta re̱vad di̭dīhi ||6||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| agniḥ| triṣṭup|
jo̱hūtro̭ a̱gniḥ pra̭tha̱maḥ pi̱teve̱ḻaspa̱de manṷṣā̱ yat sami̭ddhaḥ |
śriya̱ṃ vasā̭no a̱mṛto̱ vicḙtā marmṛ̱jenya̭: śrava̱sya1: sa vā̱jī ||1||
śrū̱yā a̱gniści̱trabhā̭nu̱rhava̭ṃ me̱ viśvā̭bhirgī̱rbhira̱mṛto̱ vicḙtāḥ |
śyā̱vā ratha̭ṃ vahato̱ rohi̭tā vo̱tāru̱ṣāha̭ cakre̱ vibhṛ̭traḥ ||2||
u̱ttā̱nāyā̭majanaya̱n tsūṣṷ̄ta̱ṃ bhuva̭da̱gniḥ pṷru̱peśā̭su̱ garbha̭: |
śiri̭ṇāyāṃ cida̱ktunā̱ maho̭bhi̱rapa̭rīvṛto vasati̱ pracḙtāḥ ||3||
jigha̭rmya̱gniṃ ha̱viṣā̭ ghṛ̱tena̭ pratikṣi̱yanta̱ṃ bhuva̭nāni̱ viśvā̭ |
pṛ̱thuṃ ti̭ra̱ścā vaya̭sā bṛ̱hanta̱ṃ vyaci̭ṣṭha̱mannai̭ rabha̱saṃ dṛśā̭nam ||4||
ā vi̱śvata̭: pra̱tyañca̭ṃ jigharmyara̱kṣasā̱ mana̭sā̱ tajjṷṣeta |
marya̭śrīḥ spṛha̱yadva̭rṇo a̱gnirnābhi̱mṛśḙ ta̱nvā̱3 jarbhṷrāṇaḥ ||5||
jñe̱yā bhā̱gaṃ sa̭hasā̱no varḙṇa̱ tvādṷ̄tāso manu̱vadva̭dema |
anṷ̄nama̱gniṃ ju̱hvā̭ vaca̱syā ma̭dhu̱pṛca̭ṃ dhana̱sā jo̭havīmi ||6||
21 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| virāṭ sthānā, 21 triṣṭup|
śru̱dhī hava̭mindra̱ mā ri̭ṣaṇya̱: syāma̭ te dā̱vane̱ vasṷ̄nām |
i̱mā hi tvāmūrjo̭ va̱rdhaya̭nti vasū̱yava̱: sindha̭vo̱ na kṣara̭ntaḥ ||1||
sṛ̱jo ma̱hīri̭ndra̱ yā api̭nva̱: pari̭ṣṭhitā̱ ahi̭nā śūra pū̱rvīḥ |
ama̭rtyaṃ cid dā̱saṃ manya̭māna̱mavā̭bhinadu̱kthairvā̭vṛdhā̱naḥ ||2||
u̱ktheṣvinnu śṷ̄ra̱ yeṣṷ cā̱kan tstomḙṣvindra ru̱driyḙṣu ca |
tubhyede̱tā yāsṷ mandasā̱naḥ pra vā̱yavḙ sisrate̱ na śu̱bhrāḥ ||3||
śu̱bhraṃ nu te̱ śuṣma̭ṃ va̱rdhaya̭ntaḥ śu̱bhraṃ vajra̭ṃ bā̱hvordadhā̭nāḥ |
śu̱bhrastvami̭ndra vāvṛdhā̱no a̱sme dāsī̱rviśa̱: sūryḙṇa sahyāḥ ||4||
guhā̭ hi̱taṃ guhya̭ṃ gū̱ḻahama̱psvapī̭vṛtaṃ mā̱yina̭ṃ kṣi̱yanta̭m |
u̱to a̱po dyāṃ ta̭sta̱bhvāṃsa̱maha̱nnahi̭ṃ śūra vī̱ryḙṇa ||5||
stavā̱ nu ta̭ indra pū̱rvyā ma̱hānyu̱ta sta̭vāma̱ nūta̭nā kṛ̱tāni̭ |
stavā̱ vajra̭ṃ bā̱hvoru̱śanta̱ṃ stavā̱ harī̱ sūrya̭sya ke̱tū ||6||
harī̱ nu ta̭ indra vā̱jaya̭ntā ghṛta̱ścuta̭ṃ svā̱rama̭svārṣṭām |
vi sa̭ma̱nā bhūmi̭raprathi̱ṣṭā'ra̭ṃsta̱ parva̭taścit sari̱ṣyan ||7||
ni parva̭taḥ sā̱dyapra̭yuccha̱n tsaṃ mā̱tṛbhi̭rvāvaśā̱no a̭krān |
dū̱re pā̱re vāṇī̭ṃ va̱rdhaya̭nta̱ indrḙṣitāṃ dha̱mani̭ṃ papratha̱n ni ||8||
indro̭ ma̱hāṃ sindhṷmā̱śayā̭naṃ māyā̱vina̭ṃ vṛ̱trama̭sphura̱nniḥ |
arḙjetā̱ṃ roda̭sī bhiyā̱ne kani̭kradato̱ vṛṣṇo̭ asya̱ vajrā̭t ||9||
aro̭ravī̱d vṛṣṇo̭ asya̱ vajro 'mā̭nuṣa̱ṃ yanmānṷṣo ni̱jūrvā̭t |
ni mā̱yino̭ dāna̱vasya̭ mā̱yā apā̭dayat papi̱vān tsu̱tasya̭ ||10||
pibā̭pi̱bedi̭ndra śūra̱ soma̱ṃ manda̭ntu tvā ma̱ndina̭: su̱tāsa̭: |
pṛ̱ṇanta̭ste ku̱kṣī va̭rdhayantvi̱tthā su̱taḥ pau̱ra indra̭māva ||11||
tve i̱ndrāpya̭bhūma̱ viprā̱ dhiya̭ṃ vanema ṛta̱yā sapa̭ntaḥ |
a̱va̱syavo̭ dhīmahi̱ praśa̭stiṃ sa̱dyastḙ rā̱yo dā̱vanḙ syāma ||12||
syāma̱ te ta̭ indra̱ ye ta̭ ū̱tī a̭va̱syava̱ ūrja̭ṃ va̱rdhaya̭ntaḥ |
śu̱ṣminta̭ma̱ṃ yaṃ cā̱kanā̭ma devā̱'sme ra̱yiṃ rā̭si vī̱rava̭ntam ||13||
rāsi̱ kṣaya̱ṃ rāsi̭ mi̱trama̱sme rāsi̱ śardha̭ indra̱ mārṷtaṃ naḥ |
sa̱joṣa̭so̱ ye ca̭ mandasā̱nāḥ pra vā̱yava̭: pā̱ntyagra̭ṇītim ||14||
vyantvinnu yeṣṷ mandasā̱nastṛ̱pat soma̭ṃ pāhi dra̱hyadi̭ndra |
a̱smān tsu pṛ̱tsvā ta̭ru̱trā'va̭rdhayo̱ dyāṃ bṛ̱hadbhi̭ra̱rkaiḥ ||15||
bṛ̱hanta̱ innu ye tḙ tarutro̱kthebhi̭rvā su̱mnamā̱vivā̭sān |
stṛ̱ṇā̱nāso̭ ba̱rhiḥ pa̱styā̭va̱ttvotā̱ idi̭ndra̱ vāja̭magman ||16||
u̱greṣvinnu śṷ̄ra mandasā̱nastrika̭drukeṣu pāhi̱ soma̭mindra |
pra̱dodhṷva̱cchmaśrṷṣu prīṇā̱no yā̱hi hari̭bhyāṃ su̱tasya̭ pī̱tim ||17||
dhi̱ṣvā śava̭: śūra̱ yena̭ vṛ̱trama̱vābhi̭na̱d dānṷmaurṇavā̱bham |
apā̭vṛṇo̱rjyoti̱rāryā̭ya̱ ni sa̭vya̱taḥ sā̭di̱ dasyṷrindra ||18||
sanḙma̱ ye ta̭ ū̱tibhi̱stara̭nto̱ viśvā̱: spṛdha̱ āryḙṇa̱ dasyṷ̄n |
a̱smabhya̱ṃ tat tvā̱ṣṭraṃ vi̱śvarṷ̄pa̱mara̭ndhayaḥ sā̱khyasya̭ tri̱tāya̭ ||19||
a̱sya sṷvā̱nasya̭ ma̱ndina̭stri̱tasya̱ nyarbṷdaṃ vāvṛdhā̱no a̭staḥ |
ava̭rtaya̱t sūryo̱ na ca̱kraṃ bhi̱nad va̱lamindro̱ aṅgi̭rasvān ||20||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||
15 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
yo jā̱ta e̱va pra̭tha̱mo mana̭svān de̱vo de̱vān kratṷnā pa̱ryabhṷ̄ṣat |
yasya̱ śuṣmā̱d roda̭sī̱ abhya̭setāṃ nṛ̱mṇasya̭ ma̱hnā sa ja̭nāsa̱ indra̭: ||1||
yaḥ pṛ̭thi̱vīṃ vyatha̭mānā̱madṛ̭ṃha̱d yaḥ parva̭tā̱n prakṷpitā̱~ ara̭mṇāt |
yo a̱ntari̭kṣaṃ vima̱me varī̭yo̱ yo dyāmasta̭bhnā̱t sa ja̭nāsa̱ indra̭: ||2||
yo ha̱tvāhi̱mari̭ṇāt sa̱pta sindhū̱n yo gā u̱dāja̭dapa̱dhā va̱lasya̭ |
yo aśma̭nora̱ntara̱gniṃ ja̱jāna̭ sa̱ṃvṛk sa̱matsu̱ sa ja̭nāsa̱ indra̭: ||3||
yene̱mā viśvā̱ cyava̭nā kṛ̱tāni̱ yo dāsa̱ṃ varṇa̱madha̭ra̱ṃ guhāka̭: |
śva̱ghnīva̱ yo ji̭gī̱vā~ la̱kṣamāda̭da̱ryaḥ pu̱ṣṭāni̱ sa ja̭nāsa̱ indra̭: ||4||
yaṃ smā̭ pṛ̱cchanti̱ kuha̱ seti̭ gho̱ramu̱temā̭hu̱rnaiṣo a̱stītyḙnam |
so a̱ryaḥ pu̱ṣṭīrvija̭ i̱vā mi̭nāti̱ śrada̭smai dhatta̱ sa ja̭nāsa̱ indra̭: ||5||
yo ra̱dhrasya̭ codi̱tā yaḥ kṛ̱śasya̱ yo bra̱hmaṇo̱ nādha̭mānasya kī̱reḥ |
yu̱ktagrā̭vṇo̱ yo'vi̱tā sṷśi̱praḥ su̱taso̭masya̱ sa ja̭nāsa̱ indra̭: ||6||
yasyāśvā̭saḥ pra̱diśi̱ yasya̱ gāvo̱ yasya̱ grāmā̱ yasya̱ viśve̱ rathā̭saḥ |
yaḥ sūrya̱ṃ ya u̱ṣasa̭ṃ ja̱jāna̱ yo a̱pāṃ ne̱tā sa ja̭nāsa̱ indra̭: ||7||
yaṃ kranda̭sī saṃya̱tī vi̱hvayḙte̱ pare'va̭ra u̱bhayā̭ a̱mitrā̭: |
sa̱mā̱naṃ ci̱d ratha̭mātasthi̱vāṃsā̱ nānā̭ havete̱ sa ja̭nāsa̱ indra̭: ||8||
yasmā̱nna ṛ̱te vi̱jaya̭nte̱ janā̭so̱ yaṃ yudhya̭mānā̱ ava̭se̱ hava̭nte |
yo viśva̭sya prati̱māna̭ṃ ba̱bhūva̱ yo a̭cyuta̱cyut sa ja̭nāsa̱ indra̭: ||9||
yaḥ śaśva̭to̱ mahyeno̱ dadhā̭nā̱nama̭nyamānā̱ñcharvā̭ ja̱ghāna̭ |
yaḥ śardha̭te̱ nānu̱dadā̭ti śṛ̱dhyāṃ yo dasyo̭rha̱ntā sa ja̭nāsa̱ indra̭: ||10||
yaḥ śamba̭ra̱ṃ parva̭teṣu kṣi̱yanta̭ṃ catvāri̱ṃśyāṃ śa̱radya̱nvavi̭ndat |
o̱jā̱yamā̭na̱ṃ yo ahi̭ṃ ja̱ghāna̱ dānu̱ṃ śayā̭na̱ṃ sa ja̭nāsa̱ indra̭: ||11||
yaḥ sa̱ptara̭śmirvṛṣa̱bhastuvi̭ṣmāna̱vāsṛ̭ja̱t sarta̭ve sa̱pta sindhṷ̄n |
yo raṷhi̱ṇamasphṷra̱d vajra̭bāhu̱rdyāmā̱roha̭nta̱ṃ sa ja̭nāsa̱ indra̭: ||12||
dyāvā̭ cidasmai pṛthi̱vī na̭mete̱ śuṣmā̭ccidasya̱ parva̭tā bhayante |
yaḥ so̭ma̱pā ni̭ci̱to vajra̭bāhu̱ryo vajra̭hasta̱: sa ja̭nāsa̱ indra̭: ||13||
yaḥ su̱nvanta̱mava̭ti̱ yaḥ paca̭nta̱ṃ yaḥ śaṃsa̭nta̱ṃ yaḥ śa̭śamā̱namū̱tī |
yasya̱ brahma̱ vardha̭na̱ṃ yasya̱ somo̱ yasye̱daṃ rādha̱: sa ja̭nāsa̱ indra̭: ||14||
yaḥ sṷnva̱te paca̭te du̱dhra ā ci̱d vāja̱ṃ darda̭rṣi̱ sa kilā̭si sa̱tyaḥ |
va̱yaṃ ta̭ indra vi̱śvaha̭ pri̱yāsa̭: su̱vīrā̭so vi̱datha̱mā va̭dema ||15||
13 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| jagatī, 13 triṣṭup|
ṛ̱turjani̭trī̱ tasyā̭ a̱paspari̭ ma̱kṣū jā̱ta āvi̭śa̱d yāsu̱ vardha̭te |
tadā̭ha̱nā a̭bhavat pi̱pyuṣī̱ payo̱ṃ 'śoḥ pī̱yūṣa̭ṃ pratha̱maṃ tadu̱kthya̭m ||1
sa̱dhrīmā ya̭nti̱ pari̱ bibhra̭tī̱: payo̭ vi̱śvapsnyā̭ya̱ pra bha̭ranta̱ bhoja̭nam |
sa̱mā̱no adhvā̭ pra̱vatā̭manu̱ṣyade̱ yastākṛ̭ṇoḥ pratha̱maṃ sāsyu̱kthya̭: ||2
anveko̭ vadati̱ yad dadā̭ti̱ tad rū̱pā mi̱nantada̭pā̱ eka̭ īyate |
viśvā̱ eka̭sya vi̱nuda̭stitikṣate̱ yastākṛ̭ṇoḥ pratha̱maṃ sāsyu̱kthya̭: ||3
pra̱jābhya̭: pu̱ṣṭiṃ vi̱bhaja̭nta āsate ra̱yimi̭va pṛ̱ṣṭhaṃ pra̱bhava̭ntamāya̱te |
asi̭nva̱n daṃṣṭrai̭: pi̱tura̭tti̱ bhoja̭na̱ṃ yastākṛ̭ṇoḥ pratha̱maṃ sāsyu̱kthya̭: ||4
adhā̭kṛṇoḥ pṛthi̱vīṃ sa̱ṃdṛśḙ di̱ve yo dhaṷtī̱nāma̭hiha̱nnāri̭ṇak pa̱thaḥ |
taṃ tvā̱ stomḙbhiru̱dabhi̱rna vā̱jina̭ṃ de̱vaṃ de̱vā a̭jana̱n tsāsyu̱kthya̭: ||5
yo bhoja̭naṃ ca̱ daya̭se ca̱ vardha̭namā̱rdrādā śuṣka̱ṃ madhṷmad du̱dohi̭tha |
sa śḙva̱dhiṃ ni da̭dhiṣe vi̱vasva̭ti̱ viśva̱syaika̭ īśiṣe̱ sāsyu̱kthya̭: ||6
yaḥ pu̱ṣpiṇī̭śca pra̱sva̭śca̱ dharma̱ṇā 'dhi̱ dāne̱ vya1vanī̱radhā̭rayaḥ |
yaścāsa̭mā̱ aja̭no di̱dyuto̭ di̱va u̱rurū̱rvā~ a̱bhita̱: sāsyu̱kthya̭: ||7
yo nā̭rma̱raṃ sa̱hava̭su̱ṃ niha̭ntave pṛ̱kṣāya̭ ca dā̱savḙśāya̱ cāva̭haḥ |
ū̱rjaya̭ntyā̱ apa̭riviṣṭamā̱sya̭mu̱taivādya pṷrukṛ̱t sāsyu̱kthya̭: ||8
śa̱taṃ vā̱ yasya̱ daśa̭ sā̱kamādya̱ eka̭sya śru̱ṣṭau yaddha̭ co̱damāvi̭tha |
a̱ra̱jjau dasyū̱n tsamṷnabda̱bhīta̭ye suprā̱vyo̭ abhava̱: sāsyu̱kthya̭: ||9
viśvedanṷ rodha̱nā a̭sya̱ pauṃsya̭ṃ da̱dura̭smai dadhi̱re kṛ̱tnave̱ dhana̭m |
ṣaḻa̭stabhnā vi̱ṣṭira̱: pañca̭ sa̱ṃdṛśa̱: pari̭ pa̱ro a̭bhava̱: sāsyu̱kthya̭: ||10
su̱pra̱vā̱ca̱naṃ tava̭ vīra vī̱ryaṃ1 yadekḙna̱ kratṷnā vi̱ndase̱ vasṷ |
jā̱tūṣṭhi̭rasya̱ pra vaya̱: saha̭svato̱ yā ca̱kartha̱ sendra̱ viśvā̭syu̱kthya̭: ||11
ara̭maya̱: sara̭pasa̱starā̭ya̱ kaṃ tu̱rvīta̭ye ca va̱yyā̭ya ca sru̱tim |
nī̱cā santa̱muda̭nayaḥ parā̱vṛja̱ṃ prāndhaṃ śro̱ṇaṃ śra̱vaya̱n tsāsyu̱kthya̭: ||12
a̱smabhya̱ṃ tad va̭so dā̱nāya̱ rādha̱: sama̭rthayasva ba̱hu tḙ vasa̱vya̭m |
indra̱ yacci̱traṃ śra̭va̱syā anu̱ dyūn bṛ̱hadva̭dema vi̱dathḙ su̱vīrā̭: ||13
12 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
adhva̭ryavo̱ bhara̱tendrā̭ya̱ soma̱māma̭trebhiḥ siñcatā̱ madya̱mandha̭: |
kā̱mī hi vī̱raḥ sada̭masya pī̱tiṃ ju̱hota̱ vṛṣṇe̱ tadide̱ṣa va̭ṣṭi ||1
adhva̭ryavo̱ yo a̱po va̭vri̱vāṃsa̭ṃ vṛ̱traṃ ja̱ghānā̱śanyḙva vṛ̱kṣam |
tasmā̭ e̱taṃ bha̭rata tadva̱śāya̭~ e̱ṣa indro̭ arhati pī̱tima̭sya ||2
adhva̭ryavo̱ yo dṛbhī̭kaṃ ja̱ghāna̱ yo gā u̱dāja̱dapa̱ hi va̱laṃ vaḥ |
tasmā̭ e̱tama̱ntari̭kṣe̱ na vāta̱mindra̱ṃ somai̱rorṇṷta̱ jūrna vastrai̭: ||3
adhva̭ryavo̱ ya ura̭ṇaṃ ja̱ghāna̱ nava̭ ca̱khvāṃsa̭ṃ nava̱tiṃ ca̭ bā̱hūn |
yo arbṷda̱mava̭ nī̱cā ba̭bā̱dhe tamindra̱ṃ soma̭sya bhṛ̱the hi̭nota ||4
adhva̭ryavo̱ yaḥ svaśna̭ṃ ja̱ghāna̱ yaḥ śuṣṇa̭ma̱śuṣa̱ṃ yo vya̭ṃsam |
yaḥ pipru̱ṃ namṷci̱ṃ yo rṷdhi̱krāṃ tasmā̱ indrā̱yāndha̭so juhota ||5
adhva̭ryavo̱ yaḥ śa̱taṃ śamba̭rasya̱ puro̭ bi̱bhedāśma̭neva pū̱rvīḥ |
yo va̱rcina̭: śa̱tamindra̭: sa̱hasra̭ma̱pāva̭pa̱d bhara̭tā̱ soma̭masmai ||6
adhva̭ryavo̱ yaḥ śa̱tamā sa̱hasra̱ṃ bhūmyā̭ u̱pasthe'va̭pajjagha̱nvān |
kutsa̭syā̱yora̭tithi̱gvasya̭ vī̱rān nyāvṛ̭ṇa̱g bhara̭tā̱ soma̭masmai ||7
adhva̭ryavo̱ yanna̭raḥ kā̱mayā̭dhve śru̱ṣṭī vaha̭nto naśathā̱ tadindrḙ |
gabha̭stipūtaṃ bharata śru̱tāyendrā̭ya̱ soma̭ṃ yajyavo juhota ||8
adhva̭ryava̱: karta̭nā śru̱ṣṭima̭smai̱ vane̱ nipṷ̄ta̱ṃ vana̱ unna̭yadhvam |
ju̱ṣā̱ṇo hastya̭ma̱bhi vā̭vaśe va̱ indrā̭ya̱ soma̭ṃ madi̱raṃ jṷhota ||9
adhva̭ryava̱: paya̱sodha̱ryathā̱ goḥ somḙbhirīṃ pṛṇatā bho̱jamindra̭m |
vedā̱hama̭sya̱ nibhṛ̭taṃ ma e̱tad ditsa̭nta̱ṃ bhūyo̭ yaja̱taści̭keta ||10
adhva̭ryavo̱ yo di̱vyasya̱ vasvo̱ yaḥ pārthi̭vasya̱ kṣamya̭sya̱ rājā̭ |
tamūrda̭ra̱ṃ na pṛ̭ṇatā̱ yave̱nendra̱ṃ somḙbhi̱stadapo̭ vo astu ||11
a̱smabhya̱ṃ tad va̭so dā̱nāya̱ rādha̱: sama̭rthayasva ba̱hu tḙ vasa̱vya̭m |
indra̱ yacci̱traṃ śra̭va̱syā anu̱ dyūnbṛ̱hadva̭dema vi̱dathḙ su̱vīrā̭: ||12
10 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
pra ghā̱ nva̭sya maha̱to ma̱hāni̭ sa̱tyā sa̱tyasya̱ kara̭ṇāni vocam |
trika̭drukeṣvapibat su̱tasyā̱sya made̱ ahi̱mindro̭ jaghāna ||1||
a̱va̱ṃśe dyāma̭stabhāyad bṛ̱hanta̱mā roda̭sī apṛṇada̱ntari̭kṣam |
sa dhā̭rayat pṛthi̱vīṃ pa̱pratha̭cca̱ soma̭sya̱ tā mada̱ indra̭ścakāra ||2||
sadmḙva̱ prāco̱ vi mi̭māya̱ mānai̱rvajrḙṇa̱ khānya̭tṛṇanna̱dīnā̭m |
vṛthā̭sṛjat pa̱thibhi̭rdīrghayā̱thaiḥ soma̭sya̱ tā mada̱ indra̭ścakāra ||3||
sa pra̭vo̱ḻahṛn pa̭ri̱gatyā̭ da̱bhīte̱rviśva̭madhā̱gāyṷdhami̱ddhe a̱gnau |
saṃ gobhi̱raśvai̭rasṛja̱d rathḙbhi̱: soma̭sya̱ tā mada̱ indra̭ścakāra ||4||
sa ī̭ṃ ma̱hīṃ dhuni̱meto̭raramṇā̱t so a̭snā̱tṝna̭pārayat sva̱sti |
ta u̱tsnāya̭ ra̱yima̱bhi pra ta̭sthu̱: soma̭sya̱ tā mada̱ indra̭ścakāra ||5||
soda̭ñca̱ṃ sindhṷmariṇānmahi̱tvā vajre̱ṇāna̭ u̱ṣasa̱: saṃ pi̭peṣa |
a̱ja̱vaso̭ ja̱vinī̭bhirvivṛ̱ścan tsoma̭sya̱ tā mada̱ indra̭ścakāra ||6||
sa vi̱dvā~ a̭pago̱haṃ ka̱nīnā̭mā̱virbhava̱nnuda̭tiṣṭhat parā̱vṛk |
prati̭ śro̱ṇaḥ sthā̱dvya1naga̭caṣṭa̱ soma̭sya̱ tā mada̱ indra̭ścakāra ||7||
bhi̱nad va̱lamaṅgi̭robhirgṛṇā̱no vi parva̭tasya dṛṃhi̱tānyai̭rat |
ri̱ṇagrodhā̭ṃsi kṛ̱trimā̭ṇyeṣā̱ṃ soma̭sya̱ tā mada̱ indra̭ścakāra ||8||
svapnḙnā̱bhyupyā̱ cumṷri̱ṃ dhuni̭ṃ ca ja̱ghantha̱ dasyu̱ṃ pra da̱bhīti̭māvaḥ |
ra̱mbhī ci̱datra̭ vivide̱ hira̭ṇya̱ṃ soma̭sya̱ tā mada̱ indra̭ścakāra ||9||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||10||
9 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| jagatī,  9 triṣṭup|
pra va̭: sa̱tāṃ jyeṣṭha̭tamāya suṣṭu̱tima̱gnāvi̭va samidhā̱ne ha̱virbha̭re |
indra̭maju̱ryaṃ ja̱raya̭ntamukṣi̱taṃ sa̱nād yuvā̭na̱mava̭se havāmahe ||1||
yasmā̱dindrā̭d bṛha̱taḥ kiṃ ca̱nemṛ̱te viśvā̭nyasmi̱n tsaṃbhṛ̱tādhi̭ vī̱ryā̭ |
ja̱ṭhare̱ soma̭ṃ ta̱nvī̱3 saho̱ maho̱ haste̱ vajra̱ṃ bhara̭ti śī̱rṣaṇi̱ kratṷm ||2||
na kṣo̱ṇībhyā̭ṃ pari̱bhvḙ ta indri̱yaṃ na sa̭mu̱draiḥ parva̭tairindra te̱ ratha̭: |
na te̱ vajra̱manva̭śnoti̱ kaśca̱na yadā̱śubhi̱: pata̭si̱ yoja̭nā pu̱ru ||3||
viśve̱ hya̭smai yaja̱tāya̭ dhṛ̱ṣṇave̱ kratu̱ṃ bhara̭nti vṛṣa̱bhāya̱ saśca̭te |
vṛṣā̭ yajasva ha̱viṣā̭ vi̱duṣṭa̭ra̱: pibḙndra̱ soma̭ṃ vṛṣa̱bheṇa̭ bhā̱nunā̭ ||4||
vṛṣṇa̱: kośa̭: pavate̱ madhva̭ ū̱rmirvṛ̭ṣa̱bhānnā̭ya vṛṣa̱bhāya̱ pāta̭ve |
vṛṣa̭ṇādhva̱ryū vṛ̭ṣa̱bhāso̱ adra̭yo̱ vṛṣa̭ṇa̱ṃ soma̭ṃ vṛṣa̱bhāya̭ suṣvati ||5||
vṛṣā̭ te̱ vajra̭ u̱ta te̱ vṛṣā̱ ratho̱ vṛṣa̭ṇā̱ harī̭ vṛṣa̱bhāṇyāyṷdhā |
vṛṣṇo̱ mada̭sya vṛṣabha̱ tvamī̭śiṣa̱ indra̱ soma̭sya vṛṣa̱bhasya̭ tṛpṇuhi ||6||
pra te̱ nāva̱ṃ na sama̭ne vaca̱syuva̱ṃ brahma̭ṇā yāmi̱ sava̭neṣu̱ dādhṛ̭ṣiḥ |
ku̱vinno̭ a̱sya vaca̭so ni̱bodhi̭ṣa̱dindra̱mutsa̱ṃ na vasṷnaḥ sicāmahe ||7||
pu̱rā sa̭mbā̱dhāda̱bhyā va̭vṛtsva no dhe̱nurna va̱tsaṃ yava̭sasya pi̱pyuṣī̭ |
sa̱kṛtsu tḙ suma̱tibhi̭: śatakrato̱ saṃ patnī̭bhi̱rna vṛṣa̭ṇo nasīmahi ||8||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||9||
9 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| jagatī,  8-9 triṣṭup|
tada̭smai̱ navya̭maṅgira̱svada̭rcata̱ śuṣmā̱ yada̭sya pra̱tnatho̱dīra̭te |
viśvā̱ yad go̱trā saha̭sā̱ parī̭vṛtā̱ made̱ soma̭sya dṛṃhi̱tānyaira̭yat ||1||
sa bhṷ̄tu̱ yo ha̭ pratha̱māya̱ dhāya̭sa̱ ojo̱ mimā̭no mahi̱māna̱māti̭rat |
śūro̱ yo yu̱tsu ta̱nva̭ṃ pari̱vyata̭ śī̱rṣaṇi̱ dyāṃ ma̭hi̱nā pratya̭muñcata ||2||
adhā̭kṛṇoḥ pratha̱maṃ vī̱rya̭ṃ ma̱had yada̱syāgre̱ brahma̭ṇā̱ śuṣma̱maira̭yaḥ |
ra̱the̱ṣṭhena̱ harya̭śvena̱ vicyṷtā̱: pra jī̱raya̭: sisrate sa̱dhrya1kpṛtha̭k ||3||
adhā̱ yo viśvā̱ bhuva̭nā̱bhi ma̱jmanḙśāna̱kṛt prava̭yā a̱bhyava̭rdhata |
ād roda̭sī̱ jyoti̭ṣā̱ vahni̱rāta̭no̱t sīvya̱n tamā̭ṃsi̱ dudhi̭tā̱ sama̭vyayat ||4||
sa prā̱cīnā̱n parva̭tān dṛṃha̱doja̭sā 'dharā̱cīna̭makṛṇoda̱pāmapa̭: |
adhā̭rayat pṛthi̱vīṃ vi̱śvadhā̭yasa̱masta̭bhnānmā̱yayā̱ dyāma̭va̱srasa̭: ||5||
sāsmā̱ ara̭ṃ bā̱hubhyā̱ṃ yaṃ pi̱tākṛ̭ṇo̱dviśva̭smā̱dā ja̱nuṣo̱ veda̭sa̱spari̭ |
yenā̭ pṛthi̱vyāṃ ni krivi̭ṃ śa̱yadhyai̱ vajrḙṇa ha̱tvyavṛ̭ṇak tuvi̱ṣvaṇi̭: ||6||
a̱mā̱jūri̭va pi̱troḥ sacā̭ sa̱tī sa̭mā̱nādā sada̭sa̱stvāmi̭ye̱ bhaga̭m |
kṛ̱dhi pra̭ke̱tamupa̭ mā̱syā bha̭ra da̱ddhi bhā̱gaṃ ta̱nvo̱3 yena̭ mā̱maha̭: ||7||
bho̱jaṃ tvāmi̭ndra va̱yaṃ hṷvema da̱diṣṭvami̱ndrāpā̭ṃsi̱ vājā̭n |
a̱vi̱ḍḍhī̭ndra ci̱trayā̭ na ū̱tī kṛ̱dhi vṛ̭ṣannindra̱ vasya̭so naḥ ||8||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||9||
9 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
prā̱tā ratho̱ navo̭ yoji̱ sasni̱ścatṷryugastrika̱śaḥ sa̱ptara̭śmiḥ |
daśā̭ritro manu̱ṣya̭: sva̱rṣāḥ sa i̱ṣṭibhi̭rma̱tibhī̱ raṃhyo̭ bhūt ||1||
sāsmā̱ ara̭ṃ pratha̱maṃ sa dvi̱tīya̭mu̱to tṛ̱tīya̱ṃ manṷṣa̱: sa hotā̭ |
a̱nyasyā̱ garbha̭ma̱nya ṷ̄ jananta̱ so a̱nyebhi̭: sacate̱ jenyo̱ vṛṣā̭ ||2||
harī̱ nu ka̱ṃ ratha̱ indra̭sya yojamā̱yai sū̱ktena̱ vaca̭sā̱ navḙna |
mo ṣu tvāmatra̭ ba̱havo̱ hi viprā̱ ni rī̭rama̱n yaja̭mānāso a̱nye ||3||
ā dvābhyā̱ṃ hari̭bhyāmindra yā̱hyā ca̱turbhi̱rā ṣa̱ḍbhirhū̱yamā̭naḥ |
āṣṭā̱bhirda̱śabhi̭: soma̱peya̭ma̱yaṃ su̱taḥ sṷmakha̱ mā mṛdha̭skaḥ ||4||
ā vi̭ṃśa̱tyā tri̱ṃśatā̭ yāhya̱rvāṅā ca̭tvāri̱ṃśatā̱ hari̭bhiryujā̱naḥ |
ā pa̭ñcā̱śatā̭ su̱rathḙbhiri̱ndrā '' ṣa̱ṣṭyā sa̭pta̱tyā so̭ma̱peya̭m ||5||
āśī̱tyā na̭va̱tyā yā̭hya̱rvāṅā śa̱tena̱ hari̭bhiru̱hyamā̭naḥ |
a̱yaṃ hi tḙ śu̱naho̭treṣu̱ soma̱ indra̭ tvā̱yā pari̭ṣikto̱ madā̭ya ||6||
mama̱ brahmḙndra yā̱hyacchā̱ viśvā̱ harī̭ dhu̱ri dhi̭ṣvā̱ ratha̭sya |
pu̱ru̱trā hi vi̱havyo̭ ba̱bhūthā̱smiñchṷ̄ra̱ sava̭ne mādayasva ||7||
na ma̱ indrḙṇa sa̱khyaṃ vi yo̭ṣada̱smabhya̭masya̱ dakṣi̭ṇā duhīta |
upa̱ jyeṣṭhe̱ varṷ̄the̱ gabha̭stau prā̱yeprā̭ye jigī̱vāṃsa̭: syāma ||8||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||9||
9 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup|
apā̭yya̱syāndha̭so̱ madā̭ya̱ manī̭ṣiṇaḥ suvā̱nasya̱ praya̭saḥ |
yasmi̱nnindra̭: pra̱divi̭ vāvṛdhā̱na oko̭ da̱dhe bra̭hma̱ṇyanta̭śca̱ nara̭: ||1||
a̱sya ma̭ndā̱no madhvo̱ vajra̭ha̱sto 'hi̱mindro̭ arṇo̱vṛta̱ṃ vi vṛ̭ścat |
pra yad vayo̱ na svasa̭rā̱ṇyacchā̱ prayā̭ṃsi ca na̱dīnā̱ṃ cakra̭manta ||2||
sa māhi̭na̱ indro̱ arṇo̭ a̱pāṃ praira̭yadahi̱hācchā̭ samu̱dram |
aja̭naya̱t sūrya̭ṃ vi̱dadgā a̱ktunāhnā̭ṃ va̱yunā̭ni sādhat ||3||
so a̭pra̱tīni̱ mana̭ve pu̱rūṇīndro̭ dāśad dā̱śuṣe̱ hanti̭ vṛ̱tram |
sa̱dyo yo nṛbhyo̭ ata̱sāyyo̱ bhūtpa̭spṛdhā̱nebhya̱: sūrya̭sya sā̱tau ||4||
sa sṷnva̱ta indra̱: sūrya̱mā '' de̱vo ri̭ṇa̱ṅmartyā̭ya sta̱vān |
ā yad ra̱yiṃ gu̱hada̭vadyamasmai̱ bhara̱daṃśa̱ṃ naita̭śo daśa̱syan ||5||
sa ra̭ndhayatsa̱diva̱: sāra̭thaye̱ śuṣṇa̭ma̱śuṣa̱ṃ kuya̭va̱ṃ kutsā̭ya |
divo̭dāsāya nava̱tiṃ ca̱ navendra̱: puro̱ vyai̭ra̱cchamba̭rasya ||6||
e̱vā ta̭ indro̱catha̭mahema śrava̱syā na tmanā̭ vā̱jaya̭ntaḥ |
a̱śyāma̱ tat sāpta̭māśuṣā̱ṇā na̱namo̱ vadha̱radḙvasya pī̱yoḥ ||7||
e̱vā tḙ gṛtsama̱dāḥ śṷ̄ra̱ manmā̭va̱syavo̱ na va̱yunā̭ni takṣuḥ |
bra̱hma̱ṇyanta̭ indra te̱ navī̭ya̱ iṣa̱mūrja̭ṃ sukṣi̱tiṃ su̱mnama̭śyuḥ ||8||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||9||
9 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| triṣṭup, 3 virāḍ rūpā|
va̱yaṃ te̱ vaya̭ indra vi̱ddhi ṣu ṇa̱: pra bha̭rāmahe vāja̱yurna ratha̭m |
vi̱pa̱nyavo̱ dīdhya̭to manī̱ṣā su̱mnamiya̭kṣanta̱stvāva̭to̱ nṝn ||1||
tvaṃ na̭ indra̱ tvābhi̭rū̱tī tvā̭ya̱to a̭bhiṣṭi̱pāsi̱ janā̭n |
tvami̱no dā̱śuṣo̭ varū̱tetthādhī̭ra̱bhi yo nakṣa̭ti tvā ||2||
sa no̱ yuvendro̭ jo̱hūtra̱: sakhā̭ śi̱vo na̱rāma̭stu pā̱tā |
yaḥ śaṃsa̭nta̱ṃ yaḥ śa̭śamā̱namū̱tī paca̭ntaṃ ca stu̱vanta̭ṃ ca pra̱ṇeṣa̭t ||3||
tamṷ stuṣa̱ indra̱ṃ taṃ gṛ̭ṇīṣe̱ yasmi̭npu̱rā vā̭vṛ̱dhuḥ śā̭śa̱duśca̭ |
sa vasva̱: kāma̭ṃ pīparadiyā̱no bra̭hmaṇya̱to nūta̭nasyā̱yoḥ ||4||
so aṅgi̭rasāmu̱cathā̭ juju̱ṣvān brahmā̭ tūto̱dindro̭ gā̱tumi̱ṣṇan |
mu̱ṣṇannu̱ṣasa̱: sūryḙṇa sta̱vānaśna̭sya cicchiśnathat pū̱rvyāṇi̭ ||5||
sa ha̭ śru̱ta indro̱ nāma̭ de̱va ū̱rdhvo bhṷva̱nmanṷṣe da̱smata̭maḥ |
ava̭ pri̱yama̭rśasā̱nasya̭ sā̱hvāñchiro̭ bharad dā̱sasya̭ sva̱dhāvā̭n ||6||
sa vṛ̭tra̱hendra̭: kṛ̱ṣṇayo̭nīḥ puraṃda̱ro dāsī̭rairaya̱dvi |
aja̭naya̱nmana̭ve̱ kṣāma̱paśca̭ sa̱trā śaṃsa̱ṃ yaja̭mānasya tūtot ||7||
tasmai̭ tava̱sya1manṷ dāyi sa̱trendrā̭ya de̱vebhi̱rarṇa̭sātau |
prati̱ yada̭sya̱ vajra̭ṃ bā̱hvordhurha̱tvī dasyū̱n pura̱ āya̭sī̱rni tā̭rīt ||8||
nū̱naṃ sā te̱ prati̱ vara̭ṃ jari̱tre dṷhī̱yadi̭ndra̱ dakṣi̭ṇā ma̱ghonī̭ |
śikṣā̭ sto̱tṛbhyo̱ māti̭ dha̱gbhago̭ no bṛ̱had va̭dema vi̱dathḙ su̱vīrā̭: ||9||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ| jagatī, 6 triṣṭup|
vi̱śva̱jitḙ dhana̱jitḙ sva̱rjitḙ satrā̱jitḙ nṛ̱jita̭ urvarā̱jitḙ |
a̱śva̱jitḙ go̱jitḙ a̱bjitḙ bha̱rendrā̭ya̱ soma̭ṃ yaja̱tāya̭ harya̱tam ||1||
a̱bhi̱bhuvḙ'bhibha̱ṅgāya̭ vanva̱te 'ṣā̭ḻahāya̱ saha̭mānāya ve̱dhasḙ |
tu̱vi̱graye̱ vahna̭ye du̱ṣṭarī̭tave satrā̱sāhe̱ nama̱ indrā̭ya vocata ||2||
sa̱trā̱sā̱ho ja̭nabha̱kṣo ja̭naṃsa̱haścyava̭no yu̱dhmo anu̱ joṣa̭mukṣi̱taḥ |
vṛ̱ta̱ṃca̱yaḥ sahṷrirvi̱kṣvā̭ri̱ta indra̭sya voca̱ṃ pra kṛ̱tāni̭ vī̱ryā̭ ||3||
a̱nā̱nu̱do vṛ̭ṣa̱bho dodha̭to va̱dho ga̭mbhī̱ra ṛ̱ṣvo asa̭maṣṭakāvyaḥ |
ra̱dhra̱co̱daḥ śnatha̭no vīḻi̱taspṛ̱thurindra̭: suya̱jña u̱ṣasa̱: sva̭rjanat ||4||
ya̱jñena̭ gā̱tuma̱pturo̭ vividrire̱ dhiyo̭ hinvā̱nā u̱śijo̭ manī̱ṣiṇa̭: |
a̱bhi̱svarā̭ ni̱ṣadā̱ gā a̭va̱syava̱ indrḙ hinvā̱nā dravi̭ṇānyāśata ||5||
indra̱ śreṣṭhā̭ni̱ dravi̭ṇāni dhehi̱ citti̱ṃ dakṣa̭sya subhaga̱tvama̱sme |
poṣa̭ṃ rayī̱ṇāmari̭ṣṭiṃ ta̱nūnā̭ṃ svā̱dmāna̭ṃ vā̱caḥ sṷdina̱tvamahnā̭m ||6||
4 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| indraḥ|1 aṣṭiḥ, 2-3 atiśakvarī, 4 aṣṭiḥ atiśakvarī vā|
trika̭drukeṣu mahi̱ṣo yavā̭śiraṃ tuvi̱śuṣma̭stṛ̱pat soma̭mapiba̱d viṣṇṷnā su̱taṃ yathāva̭śat |
sa ī̭ṃ mamāda̱ mahi̱ karma̱ karta̭ve ma̱hāmu̱ruṃ saina̭ṃ saścad de̱vo de̱vaṃ sa̱tyamindra̭ṃ sa̱tya indṷ: ||1||
adha̱ tviṣī̭mā~ a̱bhyoja̭sā̱ krivi̭ṃ yu̱dhābha̭va̱dā roda̭sī apṛṇadasya ma̱jmanā̱ pra vā̭vṛdhe |
adha̭ttā̱nyaṃ ja̱ṭhare̱ prema̭ricyata̱ saina̭ṃ saścad de̱vo de̱vaṃ sa̱tyamindra̭ṃ sa̱tya indṷ: ||2||
sā̱kaṃ jā̱taḥ kratṷnā sā̱kamoja̭sā vavakṣitha sā̱kaṃ vṛ̱ddho vī̱ryai̭: sāsa̱hirmṛdho̱ vica̭rṣaṇiḥ |
dātā̱ rādha̭: stuva̱te kāmya̱ṃ vasu̱ saina̭ṃ saścad de̱vo de̱vaṃ sa̱tyamindra̭ṃ sa̱tya indṷ: ||3||
tava̱ tyannarya̭ṃ nṛ̱to'pa̭ indra pratha̱maṃ pū̱rvyaṃ di̱vi pra̱vācya̭ṃ kṛ̱tam |
yad de̱vasya̱ śava̭sā̱ prāri̭ṇā̱ asṷṃ ri̱ṇanna̱paḥ |
bhuva̱d viśva̭ma̱bhyādḙva̱moja̭sā vi̱dādūrja̭ṃ śa̱takra̭turvi̱dādiṣa̭m ||4||
19 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| bṛhaspatiḥ, 1, 5, 9, 11, 17, 19, brahmaṇaspatiḥ| jagatī,  15, 19 triṣṭup|
ga̱ṇānā̭ṃ tvā ga̱ṇapa̭tiṃ havāmahe ka̱viṃ ka̭vī̱nāmṷpa̱maśra̭vastamam |
jye̱ṣṭha̱rāja̱ṃ brahma̭ṇāṃ brahmaṇaspata̱ ā na̭: śṛ̱ṇvannū̱tibhi̭: sīda̱ sāda̭nam ||1||
de̱vāści̭t te asurya̱ pracḙtaso̱ bṛha̭spate ya̱jñiya̭ṃ bhā̱gamā̭naśuḥ |
u̱srā i̭va̱ sūryo̱ jyoti̭ṣā ma̱ho viśvḙṣā̱mijja̭ni̱tā brahma̭ṇāmasi ||2||
ā vi̱bādhyā̭ pari̱rāpa̱stamā̭ṃsi ca̱ jyoti̭ṣmanta̱ṃ ratha̭mṛ̱tasya̭ tiṣṭhasi |
bṛha̭spate bhī̱mama̭mitra̱dambha̭naṃ rakṣo̱haṇa̭ṃ gotra̱bhida̭ṃ sva̱rvida̭m ||3||
su̱nī̱tibhi̭rnayasi̱ trāya̭se̱ jana̱ṃ yastubhya̱ṃ dāśā̱nna tamaṃho̭ aśnavat |
bra̱hma̱dviṣa̱stapa̭no manyu̱mīra̭si̱ bṛha̭spate̱ mahi̱ tat tḙ mahitva̱nam ||4||
na tamaṃho̱ na dṷri̱taṃ kuta̭śca̱na nārā̭tayastitiru̱rna dva̭yā̱vina̭: |
viśvā̱ ida̭smād dhva̱raso̱ vi bā̭dhase̱ yaṃ sṷgo̱pā rakṣa̭si brahmaṇaspate ||5||
tvaṃ no̭ go̱pāḥ pa̭thi̱kṛd vi̭cakṣa̱ṇastava̭ vra̱tāya̭ ma̱tibhi̭rjarāmahe |
bṛha̭spate̱ yo no̭ a̱bhi hvaro̭ da̱dhe svā taṃ ma̭rmartu du̱cchunā̱ hara̭svatī ||6||
u̱ta vā̱ yo no̭ ma̱rcayā̱danā̭gaso 'rātī̱vā marta̭: sānu̱ko vṛka̭: |
bṛha̭spate̱ apa̱ taṃ va̭rtayā pa̱thaḥ su̱gaṃ no̭ a̱syai de̱vavī̭taye kṛdhi ||7||
trā̱tāra̭ṃ tvā ta̱nūnā̭ṃ havāma̱he 'va̭spartaradhiva̱ktāra̭masma̱yum |
bṛha̭spate deva̱nido̱ ni ba̭rhaya̱ mā du̱revā̱ utta̭raṃ su̱mnamunna̭śan ||8||
tvayā̭ va̱yaṃ su̱vṛdhā̭ brahmaṇaspate spā̱rhā vasṷ manu̱ṣyā da̭dīmahi |
yā no̭ dū̱re ta̱ḻito̱ yā arā̭tayo̱ 'bhi santi̭ ja̱mbhayā̱ tā a̭na̱pnasa̭: ||9||
tvayā̭ va̱yamṷtta̱maṃ dhī̭mahe̱ vayo̱ bṛha̭spate̱ papri̭ṇā̱ sasni̭nā yu̱jā |
mā no̭ du̱:śaṃso̭ abhidi̱psurī̭śata̱ pra su̱śaṃsā̭ ma̱tibhi̭stāriṣīmahi ||10||
a̱nā̱nu̱do vṛ̭ṣa̱bho jagmi̭rāha̱vaṃ niṣṭa̭ptā̱ śatru̱ṃ pṛta̭nāsu sāsa̱hiḥ |
asi̭ sa̱tya ṛ̭ṇa̱yā bra̭hmaṇaspata u̱grasya̭ cid dami̱tā vī̭ḻuha̱rṣiṇa̭: ||11||
adḙvena̱ mana̭sā̱ yo ri̭ṣa̱ṇyati̭ śā̱sāmu̱gro manya̭māno̱ jighā̭ṃsati |
bṛha̭spate̱ mā praṇa̱k tasya̭ no va̱dho ni ka̭rma ma̱nyuṃ du̱reva̭sya̱ śardha̭taḥ ||12||
bharḙṣu̱ havyo̱ nama̭sopa̱sadyo̱ gantā̱ vājḙṣu̱ sani̭tā̱ dhana̭ṃdhanam |
viśvā̱ ida̱ryo a̭bhidi̱psvo̱3 mṛdho̱ bṛha̱spati̱rvi va̭varhā̱ rathā̭~ iva ||13||
teji̭ṣṭhayā tapa̱nī ra̱kṣasa̭stapa̱ ye tvā̭ ni̱de da̭dhi̱re dṛ̱ṣṭavī̭ryam |
ā̱vistat kṛ̭ṣva̱ yadasa̭t ta u̱kthyaṃ1bṛha̭spate̱ vi pa̭ri̱rāpo̭ ardaya ||14||
bṛha̭spate̱ ati̱ yada̱ryo arhā̭d dyu̱madvi̱bhāti̱ kratṷma̱jjanḙṣu |
yad dī̱daya̱cchava̭sa ṛtaprajāta̱ tada̱smāsu̱ dravi̭ṇaṃ dhehi ci̱tram ||15||
mā na̭: ste̱nebhyo̱ ye a̱bhi dru̱haspa̱de ni̭rā̱miṇo̭ ri̱pavo'nnḙṣu jāgṛ̱dhuḥ |
ā de̱vānā̱moha̭te̱ vi vrayo̭ hṛ̱di bṛha̭spate̱ na pa̱raḥ sāmno̭ viduḥ ||16||
viśvḙbhyo̱ hi tvā̱ bhuva̭nebhya̱spari̱ tvaṣṭāja̭na̱t sāmna̭:sāmnaḥ ka̱viḥ |
sa ṛ̭ṇa̱cidṛ̭ṇa̱yā brahma̭ṇa̱spati̭rdru̱ho ha̱ntā ma̱ha ṛ̱tasya̭ dha̱rtari̭ ||17||
tava̭ śri̱ye vya̭jihīta̱ parva̭to̱ gavā̭ṃ go̱tramu̱dasṛ̭jo̱ yada̭ṅgiraḥ |
indrḙṇa yu̱jā tama̭sā̱ parī̭vṛta̱ṃ bṛha̭spate̱ nira̱pāmaṷbjo arṇa̱vam ||18||
brahma̭ṇaspate̱ tvama̱sya ya̱ntā sū̱ktasya̭ bodhi̱ tana̭yaṃ ca jinva |
viśva̱ṃ tadbha̱draṃ yadava̭nti de̱vā bṛ̱had va̭dema vi̱dathḙ su̱vīrā̭: ||19||
16 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| brahmaṇaspatiḥ, 1, 10 bṛhaspatiḥ, 12 indrābrahmaṇaspatī| jagatī,  12-16 triṣṭup|
      semāma̭viḍḍhi̱ prabhṛ̭ti̱ṃ ya īśi̭ṣe̱ 'yā vi̭dhema̱ nava̭yā ma̱hā gi̱rā |
      yathā̭ no mī̱ḍhvān tstava̭te̱ sakhā̱ tava̱ bṛha̭spate̱ sīṣa̭dha̱: sota no̭ ma̱tim ||1||
      yo nantvā̱nyana̭ma̱nnyoja̭so̱tāda̭rdarma̱nyunā̱ śamba̭rāṇi̱ vi |
      prācyā̭vaya̱dacyṷtā̱ brahma̭ṇa̱spati̱rā cāvi̭śa̱d vasṷmanta̱ṃ vi parva̭tam ||2||
      tad de̱vānā̭ṃ de̱vata̭māya̱ kartva̱maśra̭thnan dṛ̱ḻahāvra̭danta vīḻi̱tā |
      udgā ā̭ja̱dabhi̭na̱d brahma̭ṇā va̱lamagṷ̄ha̱ttamo̱ vya̭cakṣaya̱t sva̭: ||3||
      aśmā̭syamava̱taṃ brahma̭ṇa̱spati̱rmadhṷdhārama̱bhi yamoja̱sātṛ̭ṇat |
      tame̱va viśvḙ papire sva̱rdṛśo̭ ba̱hu sā̱kaṃ si̭sicu̱rutsa̭mu̱driṇa̭m ||4||
      sanā̱ tā kā ci̱d bhuva̭nā̱ bhavī̭tvā mā̱dbhiḥ śa̱radbhi̱rduro̭ varanta vaḥ |
      aya̭tantā carato a̱nyada̭nya̱did yā ca̱kāra̭ va̱yunā̱ brahma̭ṇa̱spati̭: ||5||
      a̱bhi̱nakṣa̭nto a̱bhi ye tamā̭na̱śurni̱dhiṃ pa̭ṇī̱nāṃ pa̭ra̱maṃ guhā̭ hi̱tam |
      te vi̱dvāṃsa̭: prati̱cakṣyānṛ̭tā̱ puna̱ryata̭ u̱ āya̱n tadudī̭yurā̱viśa̭m ||6||
      ṛ̱tāvā̭naḥ prati̱cakṣyānṛ̭tā̱ puna̱rāta̱ ā ta̭sthuḥ ka̱vayo̭ ma̱haspa̱thaḥ |
      te bā̱hubhyā̭ṃ dhami̱tama̱gnimaśma̭ni̱ naki̱: ṣo a̱styara̭ṇo ja̱hurhi tam ||7||
      ṛ̱tajyḙna kṣi̱preṇa̱ brahma̭ṇa̱spati̱ryatra̱ vaṣṭi̱ pra tada̭śnoti̱ dhanva̭nā |
      tasya̭ sā̱dhvīriṣa̭vo̱ yābhi̱rasya̭ti nṛ̱cakṣa̭so dṛ̱śaye̱ karṇa̭yonayaḥ ||8||
      sa sa̭ṃna̱yaḥ sa vi̭na̱yaḥ pu̱rohi̭ta̱: sa suṣṭṷta̱: sa yu̱dhi brahma̭ṇa̱spati̭: |
      cā̱kṣmo yad vāja̱ṃ bhara̭te ma̱tī dhanā ''dit sūrya̭stapati tapya̱turvṛthā̭ ||9||
      vi̱bhu pra̱bhu pra̭tha̱maṃ me̱hanā̭vato̱ bṛha̱spatḙ: suvi̱datrā̭ṇi̱ rādhyā̭ |
      i̱mā sā̱tāni̭ ve̱nyasya̭ vā̱jino̱ yena̱ janā̭ u̱bhayḙ bhuñja̱te viśa̭: ||10||
      yo'va̭re vṛ̱janḙ vi̱śvathā̭ vi̱bhurma̱hāmṷ ra̱ṇvaḥ śava̭sā va̱vakṣi̭tha |
      sa de̱vo de̱vān prati̭ paprathe pṛ̱thu viśvedu̱ tā pa̭ri̱bhūrbrahma̭ṇa̱spati̭: ||11||
      viśva̭ṃ sa̱tyaṃ ma̭ghavānā yu̱voridāpa̭śca̱na pra mi̭nanti vra̱taṃ vā̭m |
      acchḙndrābrahmaṇaspatī ha̱virno 'nna̱ṃ yujḙva vā̱jinā̭ jigātam ||12||
      u̱tāśi̭ṣṭhā̱ anṷ śṛṇvanti̱ vahna̭yaḥ sa̱bheyo̱ vipro̭ bharate ma̱tī dhanā̭ |
      vī̱ḻu̱dveṣā̱ anu̱ vaśa̭ ṛ̱ṇamā̭da̱diḥ sa ha̭ vā̱jī sa̭mi̱the brahma̭ṇa̱spati̭: ||13||
      brahma̭ṇa̱spatḙrabhavad yathāva̱śaṃ sa̱tyo ma̱nyurmahi̱ karmā̭ kariṣya̱taḥ |
      yo gā u̱dāja̱t sa di̱ve vi cā̭bhajan ma̱hīva̭ rī̱tiḥ śava̭sāsara̱t pṛtha̭k ||14||
      brahma̭ṇaspate su̱yama̭sya vi̱śvahā̭ rā̱yaḥ syā̭ma ra̱thyo̱3 vaya̭svataḥ |
      vī̱reṣṷ vī̱rā~ upa̭ pṛṅdhi na̱stvaṃ yadīśā̭no̱ brahma̭ṇā̱ veṣi̭ me̱ hava̭m ||15||
      brahma̭ṇaspate̱ tvama̱sya ya̱ntā sū̱ktasya̭ bodhi̱ tana̭yaṃ ca jinva |
      viśva̱ṃ tad bha̱draṃ yadava̭nti de̱vā bṛ̱had va̭dema vi̱dathḙ su̱vīrā̭: ||16||
5 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| brahmaṇaspatiḥ| jagatī|
indhā̭no a̱gniṃ va̭navad vanuṣya̱taḥ kṛ̱tabra̭hmā śūśuvad rā̱taha̭vya̱ it |
jā̱tena̭ jā̱tamati̱ sa pra sa̭rsṛte̱ yaṃya̱ṃ yuja̭ṃ kṛṇu̱te brahma̭ṇa̱spati̭: ||1||
vī̱rebhi̭rvī̱rān va̭navad vanuṣya̱to gobhī̭ ra̱yiṃ pa̭pratha̱d bodha̭ti̱ tmanā̭ |
to̱kaṃ ca̱ tasya̱ tana̭yaṃ ca vardhate̱ yaṃya̱ṃ yuja̭ṃ kṛṇu̱te brahma̭ṇa̱spati̭: ||2||
sindhu̱rna kṣoda̱: śimī̭vā~ ṛghāya̱to vṛṣḙva̱ vadhrī̭~ra̱bhi va̱ṣṭyoja̭sā |
a̱gneri̭va̱ prasi̭ti̱rnāha̱ varta̭ve̱ yaṃya̱ṃ yuja̭ṃ kṛṇu̱te brahma̭ṇa̱spati̭: ||3||
tasmā̭ arṣanti di̱vyā a̭sa̱ścata̱: sa satva̭bhiḥ pratha̱mo goṣṷ gacchati |
ani̭bhṛṣṭataviṣirha̱ntyoja̭sā̱ yaṃya̱ṃ yuja̭ṃ kṛṇu̱te brahma̭ṇa̱spati̭: ||4||
tasmā̱ id viśvḙ dhunayanta̱ sindha̱vo 'cchi̭drā̱ śarma̭ dadhire pu̱rūṇi̭ |
de̱vānā̭ṃ su̱mne su̱bhaga̱: sa ḙdhate̱ yaṃya̱ṃ yuja̭ṃ kṛṇu̱te brahma̭ṇa̱spati̭: ||5||
4 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| brahmaṇaspatiḥ| jagatī|
ṛ̱juricchaṃso̭ vanavad vanuṣya̱to dḙva̱yannidadḙvayantama̱bhya̭sat |
su̱prā̱vīrid va̭navat pṛ̱tsu du̱ṣṭara̱ṃ yajvedaya̭jyo̱rvi bha̭jāti̱ bhoja̭nam ||1||
yaja̭sva vīra̱ pra vi̭hi manāya̱to bha̱draṃ mana̭: kṛṇuṣva vṛtra̱tūryḙ |
ha̱viṣkṛ̭ṇuṣva su̱bhago̱ yathāsa̭si̱ brahma̭ṇa̱spate̱rava̱ ā vṛ̭ṇīmahe ||2||
sa ijjanḙna̱ sa vi̱śā sa janma̭nā̱ sa pu̱trairvāja̭ṃ bharate̱ dhanā̱ nṛbhi̭: |
de̱vānā̱ṃ yaḥ pi̱tara̭mā̱vivā̭sati śra̱ddhāma̭nā ha̱viṣā̱ brahma̭ṇa̱spati̭m ||3||
yo a̭smai ha̱vyairghṛ̱tava̭dbhi̱ravi̭dha̱t pra taṃ prā̱cā na̭yati̱ brahma̭ṇa̱spati̭: |
u̱ru̱ṣyatī̱maṃha̭so̱ rakṣa̭tī ri̱ṣo̱ṃ3 'hości̭dasmā uru̱cakri̱radbhṷtaḥ ||4||
17 kūrmo gārtsamado, gṛtsamado vā| ādityāḥ | triṣṭup|
i̱mā gira̭ ādi̱tyebhyo̭ ghṛ̱tasnṷ̄: sa̱nād rāja̭bhyo ju̱hvā̭ juhomi |
śṛ̱ṇotṷ mi̱tro a̭rya̱mā bhago̭ nastuvijā̱to varṷṇo̱ dakṣo̱ aṃśa̭: ||1||
i̱maṃ stoma̱ṃ sakra̭tavo me a̱dya mi̱tro a̭rya̱mā varṷṇo juṣanta |
ā̱di̱tyāsa̱: śuca̭yo̱ dhāra̭pūtā̱ avṛ̭jinā anava̱dyā ari̭ṣṭāḥ ||2||
ta ā̭di̱tyāsa̭ u̱ravo̭ gabhī̱rā ada̭bdhāso̱ dipsa̭nto bhūrya̱kṣāḥ |
a̱ntaḥ pa̭śyanti vṛji̱nota sā̱dhu sarva̱ṃ rāja̭bhyaḥ para̱mā ci̱danti̭ ||3||
dhā̱raya̭nta ādi̱tyāso̱ jaga̱t sthā de̱vā viśva̭sya̱ bhuva̭nasya go̱pāḥ |
dī̱rghādhi̭yo̱ rakṣa̭māṇā asu̱rya̭mṛ̱tāvā̭na̱ścaya̭mānā ṛ̱ṇāni̭ ||4||
vi̱dyāmā̭dityā̱ ava̭so vo a̱sya yada̭ryaman bha̱ya ā ci̭nmayo̱bhu |
yu̱ṣmāka̭ṃ mitrāvaruṇā̱ praṇī̭tau̱ pari̱ śvabhrḙva duri̱tāni̭ vṛjyām ||5||
su̱go hi vo̭ aryamanmitra̱ panthā̭ anṛkṣa̱ro va̭ruṇa sā̱dhurasti̭ |
tenā̭dityā̱ adhi̭ vocatā no̱ yaccha̭tā no duṣpari̱hantu̱ śarma̭ ||6||
pipa̭rtu no̱ adi̭tī̱ rāja̭pu̱trā 'ti̱ dveṣā̭ṃsyarya̱mā su̱gebhi̭: |
bṛ̱hanmi̱trasya̱ varṷṇasya̱ śarmopa̭ syāma puru̱vīrā̱ ari̭ṣṭāḥ ||7||
ti̱sro bhūmī̭rdhāraya̱n trī~ru̱ta dyūn trīṇi̭ vra̱tā vi̱dathḙ a̱ntarḙṣām |
ṛ̱tenā̭dityā̱ mahi̭ vo mahi̱tvaṃ tada̭ryaman varuṇa mitra̱ cārṷ ||8||
trī ro̭ca̱nā di̱vyā dhā̭rayanta hira̱ṇyayā̱: śuca̭yo̱ dhāra̭pūtāḥ |
asva̭pnajo animi̱ṣā ada̭bdhā uru̱śaṃsā̭ ṛ̱jave̱ martyā̭ya ||9||
tvaṃ viśvḙṣāṃ varuṇāsi̱ rājā̱ ye ca̭ de̱vā a̭sura̱ ye ca̱ martā̭: |
śa̱taṃ no̭ rāsva śa̱rado̭ vi̱cakṣe̱ 'śyāmāyṷ̄ṃṣi̱ sudhi̭tāni̱ pūrvā̭ ||10||
na da̭kṣi̱ṇā vi ci̭kite̱ na sa̱vyā na prā̱cīna̭mādityā̱ nota pa̱ścā |
pā̱kyā̭ cid vasavo dhī̱ryā̭ cid yu̱ṣmānī̭to̱ abha̭ya̱ṃ jyoti̭raśyām ||11||
yo rāja̭bhya ṛta̱nibhyo̭ da̱dāśa̱ yaṃ va̱rdhaya̭nti pu̱ṣṭaya̭śca̱ nityā̭: |
sa re̱vān yā̭ti pratha̱mo rathḙna vasu̱dāvā̭ vi̱dathḙṣu praśa̱staḥ ||12||
śuci̭ra̱paḥ sū̱yava̭sā̱ ada̭bdha̱ upa̭ kṣeti vṛ̱ddhava̭yāḥ su̱vīra̭: |
naki̱ṣṭaṃ ghna̱ntyanti̭to̱ na dū̱rād ya ā̭di̱tyānā̱ṃ bhava̭ti̱ praṇī̭tau ||13||
adi̭te̱ mitra̱ varṷṇo̱ta mṛ̭ḻa̱ yadvo̭ va̱yaṃ ca̭kṛ̱mā kacci̱dāga̭: |
u̱rva̭śyā̱mabha̭ya̱ṃ jyoti̭rindra̱ mā no̭ dī̱rghā a̱bhi na̭śa̱ntami̭srāḥ ||14||
u̱bhe a̭smai pīpayataḥ samī̱cī di̱vo vṛ̱ṣṭiṃ su̱bhago̱ nāma̱ puṣya̭n |
u̱bhā kṣayā̭vā̱jaya̭n yāti pṛ̱tsūbhāvardhaṷ bhavataḥ sā̱dhū a̭smai ||15||
yā vo̭ mā̱yā a̭bhi̱druhḙ yajatrā̱: pāśā̭ ādityā ri̱pave̱ vicṛ̭ttāḥ |
a̱śvīva̱ tā~ ati̭ yeṣa̱ṃ rathe̱nāri̭ṣṭā u̱rāvā śarma̭ntsyāma ||16||
māhaṃ ma̱ghono̭ varuṇa pri̱yasya̭ bhūri̱dāvna̱ ā vi̭da̱ṃ śūna̭mā̱peḥ |
mā rā̱yo rā̭jant tsu̱yamā̱dava̭ sthāṃ bṛ̱had va̭dema vi̱dathḙ su̱vīrā̭: ||17||
11 kūrmo gārtsamado, gṛtsamado vā| varuṇaḥ (10 duḥsvapnanāśinīḥ)| triṣṭup|
i̱daṃ ka̱verā̭di̱tyasya̭ sva̱rājo̱ viśvā̭ni̱ sāntya̱bhya̭stu ma̱hnā |
ati̱ yo ma̱ndro ya̱jathā̭ya de̱vaḥ sṷkī̱rtiṃ bhi̭kṣe̱ varṷṇasya̱ bhūrḙ: ||1||
tava̭ vra̱te su̱bhagā̭saḥ syāma svā̱dhyo̭ varuṇa tuṣṭu̱vāṃsa̭: |
u̱pāya̭na u̱ṣasā̱ṃ goma̭tīnāma̱gnayo̱ na jara̭māṇā̱ anu̱ dyūn ||2||
tava̭ syāma puru̱vīra̭sya̱ śarma̭nnuru̱śaṃsa̭sya varuṇa praṇetaḥ |
yū̱yaṃ na̭: putrā aditeradabdhā a̱bhi kṣa̭madhva̱ṃ yujyā̭ya devāḥ ||3||
pra sī̭mādi̱tyo a̭sṛjadvidha̱rtā~ ṛ̱taṃ sindha̭vo̱ varṷṇasya yanti |
na śrā̭myanti̱ na vi mṷcantye̱te vayo̱ na pa̭ptū raghu̱yā pari̭jman ||4||
vi macchra̭thāya raśa̱nāmi̱vāga̭ ṛ̱dhyāma̭ te varuṇa̱ khāmṛ̱tasya̭ |
mā tantṷśchedi̱ vaya̭to̱ dhiya̭ṃ me̱ mā mātrā̭ śārya̱pasa̭: pu̱ra ṛ̱toḥ ||5||
apo̱ su mya̭kṣa varuṇa bhi̱yasa̱ṃ matsamrā̱ḻṛtā̱vo'nṷ mā gṛbhāya |
dāmḙva va̱tsād vi mṷmu̱gdhyaṃho̭ na̱hi tvadā̱re ni̱miṣa̭śca̱neśḙ ||6||
mā no̭ va̱dhairva̭ruṇa̱ ye ta̭ i̱ṣṭāvena̭: kṛ̱ṇvanta̭masura bhrī̱ṇanti̭ |
mā jyoti̭ṣaḥ pravasa̱thāni̭ ganma̱ vi ṣū mṛdha̭: śiśratho jī̱vasḙ naḥ ||7||
nama̭: pu̱rā tḙ varuṇo̱ta nū̱namu̱tāpa̱raṃ tṷvijāta bravāma |
tve hi ka̱ṃ parva̭te̱ na śri̱tānyapra̭cyutāni dūḻabha vra̱tāni̭ ||8||
para̭ ṛ̱ṇā sā̭vī̱radha̱ matkṛ̭tāni̱ māhaṃ rā̭janna̱nyakṛ̭tena bhojam |
avyṷṣṭā̱ innu bhūya̭sīru̱ṣāsa̱ ā no̭ jī̱vān va̭ruṇa̱ tāsṷ śādhi ||9||
yo mḙ rāja̱n yujyo̭ vā̱ sakhā̭ vā̱ svapnḙ bha̱yaṃ bhī̱rave̱ mahya̱māha̭ |
ste̱no vā̱ yo dipsa̭ti no̱ vṛko̭ vā̱ tvaṃ tasmā̭d varuṇa pāhya̱smān ||10||
māhaṃ ma̱ghono̭ varuṇa pri̱yasya̭ bhūri̱dāvna̱ ā vi̭da̱ṃ śūna̭mā̱peḥ |
mā rā̱yo rā̭jan tsu̱yamā̱dava̭ sthāṃ bṛ̱had va̭dema vi̱dathḙ su̱vīrā̭: ||11||
7 kūrmo gārtsamado, gṛtsamado vā| viśvedevāḥ| triṣṭup|
dhṛta̭vratā̱ ādi̭tyā̱ iṣi̭rā ā̱re mat ka̭rta raha̱sūri̱vāga̭: |
śṛ̱ṇva̱to vo̱ varṷṇa̱ mitra̱ devā̭ bha̱drasya̭ vi̱dvā~ ava̭se huve vaḥ ||1||
yū̱yaṃ dḙvā̱: prama̭tiryū̱yamojo̭ yū̱yaṃ dveṣā̭ṃsi sanu̱taryṷyota |
a̱bhi̱kṣa̱ttāro̭ a̱bhi ca̱ kṣama̭dhvama̱dyā ca̭ no mṛ̱ḻaya̭tāpa̱raṃ ca̭ ||2||
kimū̱ nu va̭: kṛṇavā̱māpa̭reṇa̱ kiṃ sanḙna vasava̱ āpyḙna |
yū̱yaṃ no̭ mitrāvaruṇādite ca sva̱stimi̭ndrāmaruto dadhāta ||3||
ha̱ye dḙvā yū̱yamidā̱paya̭: stha̱ te mṛ̭ḻata̱ nādha̭mānāya̱ mahya̭m |
mā vo̱ ratho̭ madhyama̱vāḻṛ̱te bhū̱nmā yu̱ṣmāva̭tsvā̱piṣṷ śramiṣma ||4||
pra va̱ eko̭ mimaya̱ bhūryāgo̱ yanmā̭ pi̱teva̭ kita̱vaṃ śa̭śā̱sa |
ā̱re pāśā̭ ā̱re a̱ghāni̭ devā̱ mā mādhi̭ pu̱tre vimi̭va grabhīṣṭa ||5||
a̱rvāñco̭ a̱dyā bha̭vatā yajatrā̱ ā vo̱ hārdi̱ bhaya̭māno vyayeyam |
trādhva̭ṃ no devā ni̱juro̱ vṛka̭sya̱ trādhva̭ṃ ka̱rtāda̭va̱pado̭ yajatrāḥ ||6||
māhaṃ ma̱ghono̭ varuṇa pri̱yasya̭ bhūri̱dāvna̱ ā vi̭da̱ṃ śūna̭mā̱peḥ |
mā rā̱yo rā̭jan tsu̱yamā̱dava̭ sthāṃ bṛ̱had va̭dema vi̱dathḙ su̱vīrā̭: ||7||
11 gṛtsamada (āṅgirasaḥ śaunahotraḥ paścād) bhārgavaḥ śaunakaḥ|indraḥ, 6 indrasomau, 8(pūrvā'rdharca sya)| sarasvatī, 9 bṛhaspatiḥ, 11 marutaḥ| triṣṭup, 11 jagatī|
        ṛ̱taṃ de̱vāya̭ kṛṇva̱te sa̭vi̱tra indrā̭yāhi̱ghne na ra̭manta̱ āpa̭: |
        aha̭raharyātya̱ktura̱pāṃ kiyā̱tyā pra̭tha̱maḥ sarga̭ āsām ||1||
        yo vṛ̱trāya̱ sina̱matrābha̭riṣya̱t pra taṃ jani̭trī vi̱duṣa̭ uvāca |
        pa̱tho rada̭ntī̱ranu̱ joṣa̭masmai di̱vedi̭ve̱ dhuna̭yo ya̱ntyartha̭m ||2||
        ū̱rdhvo hyasthā̱dadhya̱ntari̱kṣe 'dhā̭ vṛ̱trāya̱ pra va̱dhaṃ ja̭bhāra |
        miha̱ṃ vasā̭na̱ upa̱ hīmadṷdrot ti̱gmāyṷdho ajaya̱cchatru̱mindra̭: ||3||
        bṛha̭spate̱ tapu̱ṣāśnḙva vidhya̱ vṛka̭dvaraso̱ asṷrasya vī̱rān |
        yathā̭ ja̱ghantha̭ dhṛṣa̱tā pu̱rā ci̭de̱vā ja̭hi̱ śatrṷma̱smāka̭mindra ||4||
        ava̭ kṣipa di̱vo aśmā̭namu̱ccā yena̱ śatrṷṃ mandasā̱no ni̱jūrvā̭: |
        to̱kasya̭ sā̱tau tana̭yasya̱ bhūrḙra̱smā~ a̱rdhaṃ kṛ̭ṇutādindra̱ gonā̭m ||5||
        pra hi kratṷṃ vṛ̱hatho̱ yaṃ va̭nu̱tho ra̱dhrasya̭ stho̱ yaja̭mānasya co̱dau |
        indrā̭somā yu̱vama̱smā~ a̭viṣṭama̱smin bha̱yasthḙ kṛṇutamu lo̱kam ||6||
        na mā̭ tama̱nna śra̭ma̱nnota ta̭ndra̱nna vo̭cāma̱ mā sṷno̱teti̱ soma̭m |
        yo mḙ pṛ̱ṇād yo dada̱dyo ni̱bodhā̱d yo mā̭ su̱nvanta̱mupa̱ gobhi̱rāya̭t ||7||
        sara̭svati̱ tvama̱smā~ a̭viḍḍhi ma̱rutva̭tī dhṛṣa̱tī jḙṣi̱ śatrṷ̄n |
        tyaṃ ci̱cchardha̭ntaṃ taviṣī̱yamā̭ṇa̱mindro̭ hanti vṛṣa̱bhaṃ śaṇḍi̭kānām ||8||
        yo na̱: sanṷtya u̱ta vā̭ jigha̱tnura̭bhi̱khyāya̱ taṃ ti̭gi̱tena̭ vidhya |
        bṛha̭spata̱ āyṷdhairjeṣi̱ śatrṷ̄n dru̱he rīṣa̭nta̱ṃ pari̭ dhehi rājan ||9||
        a̱smākḙbhi̱: satva̭bhiḥ śūra̱ śūrai̭rvī̱ryā̭ kṛdhi̱ yāni̭ te̱ kartvā̭ni |
        jyoga̭bhūva̱nnanṷdhūpitāso ha̱tvī teṣā̱mā bha̭rā no̱ vasṷ̄ni ||10||
        taṃ va̱: śardha̱ṃ mārṷtaṃ sumna̱yurgi̱ropa̭ bruve̱ nama̭sā̱ daivya̱ṃ jana̭m |
        yathā̭ ra̱yiṃ sarva̭vīra̱ṃ naśā̭mahā apatya̱sāca̱ṃ śrutya̭ṃ di̱vedi̭ve ||11||
7 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| viśve devāḥ| jagatī, 7 triṣṭup|
a̱smāka̭ṃ mitrāvaruṇāvata̱ṃ ratha̭mādi̱tyai ru̱drairvasṷbhiḥ sacā̱bhuvā̭ |
pra yad vayo̱ na papta̱nvasma̭na̱spari̭ śrava̱syavo̱ hṛṣī̭vanto vana̱rṣada̭: ||1||
adha̭ smā na̱ uda̭vatā sajoṣaso̱ ratha̭ṃ devāso a̱bhi vi̱kṣu vā̭ja̱yum |
yadā̱śava̱: padyā̭bhi̱stitra̭to̱ raja̭: pṛthi̱vyāḥ sānau̱ jaṅgha̭nanta pā̱ṇibhi̭: ||2||
u̱ta sya na̱ indro̭ vi̱śvaca̭rṣaṇirdi̱vaḥ śardhḙna̱ mārṷtena su̱kratṷ: |
anu̱ nu sthā̭tyavṛ̱kābhi̭rū̱tibhī̱ ratha̭ṃ ma̱he sa̱naye̱ vāja̭sātaye ||3||
u̱ta sya de̱vo bhuva̭nasya sa̱kṣaṇi̱stvaṣṭā̱ gnābhi̭: sa̱joṣā̭ jūjuva̱d ratha̭m |
iḻā̱ bhago̭ bṛhaddi̱vota roda̭sī pū̱ṣā pura̭ṃdhira̱śvinā̱vadhā̱ patī̭ ||4||
u̱ta tye de̱vī su̱bhagḙ mithū̱dṛśo̱ṣāsā̱naktā̱ jaga̭tāmapī̱juvā̭ |
stu̱ṣe yad vāṃ pṛthivi̱ navya̭sā̱ vaca̭: sthā̱tuśca̱ vaya̱striva̭yā upa̱stirḙ ||5||
u̱ta va̱: śaṃsa̭mu̱śijā̭miva śma̱syahi̭rbu̱dhnyo̱3'ja eka̭pādu̱ta |
tri̱ta ṛ̭bhu̱kṣāḥ sa̭vi̱tā cano̭ dadhe̱'pāṃ napā̭dāśu̱hemā̭ dhi̱yā śami̭ ||6||
e̱tā vo̭ va̱śmyudya̭tā yajatrā̱ ata̭kṣannā̱yavo̱ navya̭se̱ sam |
śra̱va̱syavo̱ vāja̭ṃ cakā̱nāḥ sapti̱rna rathyo̱ aha̭ dhī̱tima̭śyāḥ ||7||
8 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| 1 dyāvāpṛthivī, 2-3 indrastvaṣṭā vā, 4-5 rākā, 6-7 sinīvālī, 8 liṅgoktāḥ| jagatī, 6-8  anuṣṭup|
a̱sya mḙ dyāvāpṛthivī ṛtāya̱to bhū̱tama̭vi̱trī vaca̭sa̱: siṣā̭sataḥ |
yayo̱rāyṷ: prata̱raṃ te i̱daṃ pu̱ra upa̭stute vasū̱yurvā̭ṃ ma̱ho da̭dhe ||1||
mā no̱ guhyā̱ ripa̭ ā̱yoraha̭n dabha̱n mā na̭ ā̱bhyo rī̭radho du̱cchunā̭bhyaḥ |
mā no̱ vi yaṷ: sa̱khyā vi̱ddhi tasya̭ naḥ sumnāya̱tā mana̭sā̱ tat tvḙmahe ||2||
ahḙḻatā̱ mana̭sā śru̱ṣṭimā va̭ha̱ duhā̭nāṃ dhe̱nuṃ pi̱pyuṣī̭masa̱ścata̭m |
padyā̭bhirā̱śuṃ vaca̭sā ca vā̱jina̱ṃ tvāṃ hi̭nomi puruhūta vi̱śvahā̭ ||3||
rā̱kāma̱haṃ su̱havā̭ṃ suṣṭu̱tī hṷve śṛ̱ṇotṷ naḥ su̱bhagā̱ bodha̭tu̱ tmanā̭ |
sīvya̱tvapa̭: sū̱cyācchi̭dyamānayā̱ dadā̭tu vī̱raṃ śa̱tadā̭yamu̱kthya̭m ||4||
yāstḙ rāke suma̱taya̭: su̱peśa̭so̱ yābhi̱rdadā̭si dā̱śuṣe̱ vasṷ̄ni |
tābhi̭rno a̱dya su̱manā̭ u̱pāga̭hi sahasrapo̱ṣaṃ sṷbhage̱ rarā̭ṇā ||5||
sinī̭vāli̱ pṛthṷṣṭuke̱ yā de̱vānā̱masi̱ svasā̭ |
ju̱ṣasva̭ ha̱vyamāhṷtaṃ pra̱jāṃ dḙvi didiḍḍhi naḥ ||6||
yā sṷbā̱huḥ sva̭ṅgu̱riḥ su̱ṣūmā̭ bahu̱sūva̭rī |
tasyai̭ vi̱śpatnyai̭ ha̱viḥ si̭nīvā̱lyai jṷhotana ||7||
yā gu̱ṅgūryā si̭nīvā̱lī yā rā̱kā yā sara̭svatī |
i̱ndrā̱ṇīma̭hva ū̱tayḙ varuṇā̱nīṃ sva̱stayḙ ||8||
15 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| rudraḥ| triṣṭup|
ā tḙ pitarmarutāṃ su̱mnamḙtu̱ mā na̱: sūrya̭sya sa̱ṃdṛśo̭ yuyothāḥ |
a̱bhi no̭ vī̱ro arva̭ti kṣameta̱ pra jā̭yemahi rudra pra̱jābhi̭: ||1||
tvāda̭ttebhī rudra̱ śaṃta̭mebhiḥ śa̱taṃ himā̭ aśīya bheṣa̱jebhi̭: |
vya1smaddveṣo̭ vita̱raṃ vyaṃho̱ vyamī̭vāścātayasvā̱ viṣṷ̄cīḥ ||2||
śreṣṭho̭ jā̱tasya̭ rudra śri̱yāsi̭ ta̱vasta̭masta̱vasā̭ṃ vajrabāho |
parṣi̭ ṇaḥ pā̱ramaṃha̭saḥ sva̱sti viśvā̭ a̱bhī̭tī̱ rapa̭so yuyodhi ||3||
mā tvā̭ rudra cukrudhāmā̱ namo̭bhi̱rmā duṣṭṷtī vṛṣabha̱ mā sahṷ̄tī |
unno̭ vī̱rā~ a̭rpaya bheṣa̱jebhi̭rbhi̱ṣakta̭maṃ tvā bhi̱ṣajā̭ṃ śṛṇomi ||4||
havī̭mabhi̱rhava̭te̱ yo ha̱virbhi̱rava̱ stomḙbhī ru̱draṃ di̭ṣīya |
ṛ̱dū̱dara̭: su̱havo̱ mā no̭ a̱syai ba̱bhruḥ su̱śipro̭ rīradhanma̱nāyai̭ ||5||
unmā̭ mamanda vṛṣa̱bho ma̱rutvā̱n tvakṣī̭yasā̱ vaya̭sā̱ nādha̭mānam |
ghṛṇī̭va cchā̱yāma̭ra̱pā a̭śī̱yā'' vi̭vāseyaṃ ru̱drasya̭ su̱mnam ||6||
kva1 sya tḙ rudra mṛḻa̱yāku̱rhasto̱ yo asti̭ bheṣa̱jo jalā̭ṣaḥ |
a̱pa̱bha̱rtā rapa̭so̱ daivya̭syā̱bhī nu mā̭ vṛṣabha cakṣamīthāḥ ||7||
pra ba̱bhravḙ vṛṣa̱bhāya̭ śvitī̱ce ma̱ho ma̱hīṃ sṷṣṭu̱timī̭rayāmi |
na̱ma̱syā ka̭lmalī̱kina̱ṃ namo̭bhirgṛṇī̱masi̭ tve̱ṣaṃ ru̱drasya̱ nāma̭ ||8||
sthi̱rebhi̱raṅgai̭: puru̱rūpa̭ u̱gro ba̱bhruḥ śu̱krebhi̭: pipiśe̱ hira̭ṇyaiḥ |
īśā̭nāda̱sya bhuva̭nasya̱ bhūre̱rna vā ṷ yoṣad ru̱drāda̭su̱rya̭m ||9||
arha̭n bibharṣi̱ sāya̭kāni̱ dhanvārha̭n ni̱ṣkaṃ ya̭ja̱taṃ vi̱śvarṷ̄pam |
arha̭nni̱daṃ da̭yase̱ viśva̱mabhva̱ṃ na vā ojī̭yo rudra̱ tvada̭sti ||10||
stu̱hi śru̱taṃ ga̭rta̱sada̱ṃ yuvā̭naṃ mṛ̱gaṃ na bhī̱mamṷpaha̱tnumu̱gram |
mṛ̱ḻā ja̭ri̱tre rṷdra̱ stavā̭no̱ 'nyaṃ tḙ a̱smanni va̭pantu̱ senā̭: ||11||
ku̱mā̱raści̭t pi̱tara̱ṃ vanda̭māna̱ṃ prati̭ nānāma rudropa̱yanta̭m |
bhūrḙrdā̱tāra̱ṃ satpa̭tiṃ gṛṇīṣe stu̱tastvaṃ bhḙṣa̱jā rā̭sya̱sme ||12||
yā vo̭ bheṣa̱jā ma̭ruta̱: śucī̭ni̱ yā śaṃta̭mā vṛṣaṇo̱ yā ma̭yo̱bhu |
yāni̱ manu̱ravṛ̭ṇītā pi̱tā na̱stā śaṃ ca̱ yośca̭ ru̱drasya̭ vaśmi ||13||
pari̭ ṇo he̱tī ru̱drasya̭ vṛjyā̱: pari̭ tve̱ṣasya̭ durma̱tirma̱hī gā̭t |
ava̭ sthi̱rā ma̱ghava̭dbhyastanuṣva̱ mīḍhva̭sto̱kāya̱ tana̭yāya mṛḻa ||14||
e̱vā ba̭bhro vṛṣabha cekitāna̱ yathā̭ deva̱ na hṛ̭ṇī̱ṣe na haṃsi̭ |
ha̱va̱na̱śrunno̭ rudre̱ha bo̭dhi bṛ̱had va̭dema vi̱dathḙ su̱vīrā̭: ||15||
15 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| marut| jagatī, 15 triṣṭup|
        dhā̱rā̱va̱rā ma̱ruto̭ dhṛ̱ṣṇvo̭jaso mṛ̱gā na bhī̱māstavi̭ṣībhira̱rcina̭: |
        a̱gnayo̱ na śṷśucā̱nā ṛ̭jī̱ṣiṇo̱ bhṛmi̱ṃ dhama̭nto̱ apa̱ gā a̭vṛṇvata ||1||
        dyāvo̱ na stṛbhi̭ścitayanta khā̱dino̱ vya1bhriyā̱ na dyṷtayanta vṛ̱ṣṭaya̭: |
        ru̱dro yad vo̭ maruto rukmavakṣaso̱ vṛṣāja̭ni̱ pṛśnyā̭: śu̱kra ūdha̭ni ||2||
        u̱kṣante̱ aśvā̱~ atyā̭~ ivā̱jiṣṷ na̱dasya̱ karṇai̭sturayanta ā̱śubhi̭: |
        hira̭ṇyaśiprā maruto̱ davi̭dhvataḥ pṛ̱kṣaṃ yā̭tha̱ pṛṣa̭tībhiḥ samanyavaḥ ||3||
        pṛ̱kṣe tā viśvā̱ bhuva̭nā vavakṣire mi̱trāya̭ vā̱ sada̱mā jī̱radā̭navaḥ |
        pṛṣa̭daśvāso anava̱bhrarā̭dhasa ṛji̱pyāso̱ na va̱yunḙṣu dhū̱rṣada̭: ||4||
        indha̭nvabhirdhe̱nubhī̭ ra̱pśadṷ̄dhabhiradhva̱smabhi̭: pa̱thibhi̭rbhrājadṛṣṭayaḥ |
        ā ha̱ṃsāso̱ na svasa̭rāṇi gantana̱ madho̱rmadā̭ya marutaḥ samanyavaḥ ||5||
        ā no̱ brahmā̭ṇi marutaḥ samanyavo na̱rāṃ na śaṃsa̱: sava̭nāni gantana |
        aśvā̭miva pipyata dhe̱numūdha̭ni̱ kartā̱ dhiya̭ṃ jari̱tre vāja̭peśasam ||6||
        taṃ no̭ dāta maruto vā̱jina̱ṃ ratha̭ āpā̱naṃ brahma̭ ci̱taya̭d di̱vedi̭ve |
        iṣa̭ṃ sto̱tṛbhyo̭ vṛ̱janḙṣu kā̱ravḙ sa̱niṃ me̱dhāmari̭ṣṭaṃ du̱ṣṭara̱ṃ saha̭: ||7||
        yad yu̱ñjatḙ ma̱ruto̭ ru̱kmava̭kṣa̱so 'śvā̱n rathḙṣu̱ bhaga̱ ā su̱dāna̭vaḥ |
        dhe̱nurna śiśve̱ svasa̭reṣu pinvate̱ janā̭ya rā̱taha̭viṣe ma̱hīmiṣa̭m ||8||
        yo no̭ maruto vṛ̱katā̭ti̱ martyo̭ ri̱purda̱dhe va̭savo̱ rakṣa̭tā ri̱ṣaḥ |
        va̱rtaya̭ta̱ tapṷṣā ca̱kriyā̱bhi tamava̭ rudrā a̱śaso̭ hantanā̱ vadha̭: ||9||
        ci̱traṃ tad vo̭ maruto̱ yāma̭ cekite̱ pṛśnyā̱ yadūdha̱rapyā̱payo̭ du̱huḥ |
        yad vā̭ ni̱de nava̭mānasya rudriyāstri̱taṃ jarā̭ya jura̱tāma̭dābhyāḥ ||10||
        tān vo̭ ma̱ho ma̱ruta̭ eva̱yāvno̱ viṣṇo̭re̱ṣasya̭ prabhṛ̱the ha̭vāmahe |
        hira̭ṇyavarṇān kaku̱hān ya̱tasrṷco brahma̱ṇyanta̱: śaṃsya̱ṃ rādha̭ īmahe ||11||
        te daśa̭gvāḥ pratha̱mā ya̱jñamṷ̄hire̱ te no̭ hinvantū̱ṣaso̱ vyṷṣṭiṣu |
        u̱ṣā na rā̱mīra̭ru̱ṇairapo̭rṇute ma̱ho jyoti̭ṣā śuca̱tā goa̭rṇasā ||12||
        te kṣo̱ṇībhi̭raru̱ṇebhi̱rnāñjibhī̭ ru̱drā ṛ̱tasya̱ sada̭neṣu vāvṛdhuḥ |
        ni̱megha̭mānā̱ atyḙna̱ pāja̭sā suśca̱ndraṃ varṇa̭ṃ dadhire su̱peśa̭sam ||13||
        tā~ i̭yā̱no mahi̱ varṷ̄thamū̱taya̱ upa̱ ghede̱nā nama̭sā gṛṇīmasi |
        tri̱to na yān pañca̱ hotṝ̭na̱bhiṣṭa̭ya āva̱varta̱dava̭rāñca̱kriyāva̭se ||14||
        yayā̭ ra̱dhraṃ pā̱raya̱thātyaṃho̱ yayā̭ ni̱do mu̱ñcatha̭ vandi̱tāra̭m |
        a̱rvācī̱ sā ma̭ruto̱ yā va̭ ū̱tiro ṣu vā̱śreva̭ suma̱tirji̭gātu ||15||
15 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| apāṃnapāt| triṣṭup|
upḙmasṛkṣi vāja̱yurva̭ca̱syāṃ cano̭ dadhīta nā̱dyo giro̭ me |
a̱pāṃ napā̭dāśu̱hemā̭ ku̱vit sa su̱peśa̭saskarati̱ joṣi̭ṣa̱ddhi ||1||
i̱maṃ sva̭smai hṛ̱da ā suta̭ṣṭa̱ṃ mantra̭ṃ vocema ku̱vida̭sya̱ veda̭t |
a̱pāṃ napā̭dasu̱rya̭sya ma̱hnā viśvā̭nya̱ryo bhuva̭nā jajāna ||2||
sama̱nyā yantyupa̭ yantya̱nyāḥ sa̭mā̱namū̱rvaṃ na̱dya̭: pṛṇanti |
tamū̱ śuci̱ṃ śuca̭yo dīdi̱vāṃsa̭ma̱pāṃ napā̭ta̱ṃ pari̭ tasthu̱rāpa̭: ||3||
tamasmḙrā yuva̱tayo̱ yuvā̭naṃ marmṛ̱jyamā̭nā̱: pari̭ ya̱ntyāpa̭: |
sa śu̱krebhi̱: śikva̭bhī re̱vada̱sme dī̱dāyā̭ni̱dhmo ghṛ̱tani̭rṇiga̱psu ||4||
a̱smai ti̱sro a̭vya̱thyāya̱ nārī̭rde̱vāya̭ de̱vīrdi̭dhiṣa̱ntyanna̭m |
kṛtā̭ i̱vopa̱ hi pra̭sa̱rsre a̱psu sa pī̱yūṣa̭ṃ dhayati pūrva̱sūnā̭m ||5||
aśva̱syātra̱ jani̭mā̱sya ca̱ sva̭rdru̱ho ri̱ṣaḥ sa̱mpṛca̭: pāhi sū̱rīn |
ā̱māsṷ pū̱rṣu pa̱ro a̭pramṛ̱ṣyaṃ nārā̭tayo̱ vi na̭śa̱nnānṛ̭tāni ||6||
sva ā damḙ su̱dughā̱ yasya̭ dhe̱nuḥ sva̱dhāṃ pī̭pāya su̱bhvanna̭matti |
so a̱pāṃ napā̭dū̱rjaya̭nna̱psva1ntarva̭su̱deyā̭ya vidha̱te vi bhā̭ti 7||
yo a̱psvā śuci̭nā̱ daivyḙna ṛ̱tāvāja̭sra urvi̱yā vi̱bhāti̭ |
va̱yā ida̱nyā bhuva̭nānyasya̱ pra jā̭yante vī̱rudha̭śca pra̱jābhi̭: ||8||
a̱pāṃ napā̱dā hyasthā̭du̱pastha̭ṃ ji̱hmānā̭mū̱rdhvo vi̱dyuta̱ṃ vasā̭naḥ |
tasya̱ jyeṣṭha̭ṃ mahi̱māna̱ṃ vaha̭ntī̱rhira̭ṇyavarṇā̱: pari̭ yanti ya̱hvīḥ ||9||
hira̭ṇyarūpa̱: sa hira̭ṇyasaṃdṛga̱pāṃ napā̱t sedu̱ hira̭ṇyavarṇaḥ |
hi̱ra̱ṇyayā̱t pari̱ yonḙrni̱ṣadyā̭ hiraṇya̱dā da̭da̱tyanna̭masmai ||10||
tada̱syānī̭kamu̱ta cāru̱ nāmā̭pī̱cya̭ṃ vardhate̱ naptṷra̱pām |
yami̱ndhatḙ yuva̱taya̱: sami̱tthā hira̭ṇyavarṇaṃ ghṛ̱tamanna̭masya ||11||
a̱smai ba̭hū̱nāma̭va̱māya̱ sakhyḙ ya̱jñairvi̭dhema̱ nama̭sā ha̱virbhi̭: |
saṃ sānu̱ mārjmi̱ didhi̭ṣāmi̱ bilmai̱rdadhā̱myannai̱: pari̭ vanda ṛ̱gbhiḥ ||12||
sa ī̱ṃ vṛṣā̭janaya̱t tāsu̱ garbha̱ṃ sa ī̱ṃ śiśṷrdhayati̱ taṃ ri̭hanti |
so a̱pāṃ napā̱dana̭bhimlātavarṇo̱ 'nyasyḙve̱ha ta̱nvā̭ viveṣa ||13||
a̱smin pa̱de pa̭ra̱me ta̭sthi̱vāṃsa̭madhva̱smabhi̭rvi̱śvahā̭ dīdi̱vāṃsa̭m |
āpo̱ naptrḙ ghṛ̱tamanna̱ṃ vaha̭ntīḥ sva̱yamatkai̱: pari̭ dīyanti ya̱hvīḥ ||14||
ayā̭ṃsamagne sukṣi̱tiṃ janā̱yāyā̭ṃsamu ma̱ghava̭dbhyaḥ suvṛ̱ktim |
viśva̱ṃ tad bha̱draṃ yadava̭nti de̱vā bṛ̱had va̭dema vi̱dathḙ su̱vīrā̭: ||15||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| ṛtudevatāḥ- 1 indro madhuśca, 2maruto mādhavaśca, 3 tvaṣṭā śukraśca, 4 agniḥ śaciśca, 5 indro nabhaśca, 6 mitrāvaruṇau nabhasyaśca| jagatī|
tubhya̭ṃ hinvā̱no va̭siṣṭa̱ gā a̱po 'dhṷkṣan tsī̱mavi̭bhi̱radri̭bhi̱rnara̭: |
pibḙndra̱ svāhā̱ prahṷta̱ṃ vaṣa̭ṭkṛtaṃ ho̱trādā soma̭ṃ pratha̱mo ya īśi̭ṣe ||1||
ya̱jñaiḥ sammi̭ślā̱: pṛṣa̭tībhiṝ̱ṣṭibhi̱ryāma̭ñchu̱bhrāso̭ a̱ñjiṣṷ pri̱yā u̱ta |
ā̱sadyā̭ ba̱rhirbha̭ratasya sūnavaḥ po̱trādā soma̭ṃ pibatā divo naraḥ ||2||
a̱meva̭ naḥ suhavā̱ ā hi ganta̭na̱ ni ba̱rhiṣi̭ sadatanā̱ raṇi̭ṣṭana |
athā̭ mandasva jujuṣā̱ṇo andha̭sa̱stvaṣṭa̭rde̱vebhi̱rjani̭bhiḥ su̱madga̭ṇaḥ ||3||
ā va̭kṣi de̱vā~ i̱ha vi̭pra̱ yakṣi̭ co̱śan ho̭ta̱rni ṣa̭dā̱ yoni̭ṣu tri̱ṣu |
prati̭ vīhi̱ prasthi̭taṃ so̱myaṃ madhu̱ pibāgnī̭dhrā̱t tava̭ bhā̱gasya̭ tṛpṇuhi ||4||
e̱ṣa sya tḙ ta̱nvo̭ nṛmṇa̱vardha̭na̱: saha̱ oja̭: pra̱divi̭ bā̱hvorhi̱taḥ |
tubhya̭ṃ su̱to ma̭ghava̱n tubhya̱mābhṛ̭ta̱stvama̭sya̱ brāhma̭ṇā̱dā tṛ̱pat pi̭ba ||5||
ju̱ṣethā̭ṃ ya̱jñaṃ bodha̭ta̱ṃ hava̭sya me sa̱tto hotā̭ ni̱vida̭: pū̱rvyā anṷ |
acchā̱ rājā̭nā̱ nama̭ etyā̱vṛta̭ṃ praśā̱strādā pi̭bataṃ so̱myaṃ madhṷ ||6||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| ṛtudevatāḥ- 1-4 draviṇodā ṛtavaśca, 5 aśvinau ṛtavaśca, 6 agniḥ ṛtuśca| jagatī|
        manda̭sva ho̱trādanu̱ joṣa̱mandha̱so 'dhva̭ryava̱: sa pū̱rṇāṃ va̭ṣṭyā̱sica̭m |
        tasmā̭ e̱taṃ bha̭rata tadva̱śo da̱dirho̱trāt soma̭ṃ draviṇoda̱: piba̭ ṛ̱tubhi̭: ||1||
        yamu̱ pūrva̱mahṷve̱ tami̱daṃ hṷve̱ sedu̱ havyo̭ da̱diryo nāma̱ patya̭te |
        a̱dhva̱ryubhi̱: prasthi̭taṃ so̱myaṃ madhṷ po̱trāt soma̭ṃ draviṇoda̱: piba̭ ṛ̱tubhi̭: ||2||
        medya̭ntu te̱ vahna̭yo̱ yebhi̱rīya̱se 'ri̭ṣaṇyan vīḻayasvā vanaspate |
        ā̱yūyā̭ dhṛṣṇo abhi̱gūryā̱ tvaṃ ne̱ṣṭrāt soma̭ṃ draviṇoda̱: piba̭ ṛ̱tubhi̭: ||3||
        apā̭ddho̱trādu̱ta po̱trāda̭matto̱ta ne̱ṣṭrāda̭juṣata̱ prayo̭ hi̱tam |
        tu̱rīya̱ṃ pātra̱mamṛ̭kta̱mama̭rtyaṃ draviṇo̱dāḥ pi̭batu drāviṇoda̱saḥ ||4||
        a̱rvāñca̭ma̱dya ya̱yya̭ṃ nṛ̱vāha̭ṇa̱ṃ ratha̭ṃ yuñjāthāmi̱ha vā̭ṃ vi̱moca̭nam |
        pṛ̱ṅktaṃ ha̱vīṃṣi̱ madhu̱nā hi ka̭ṃ ga̱tamathā̱ soma̭ṃ pibataṃ vājinīvasū ||5||
        joṣya̭gne sa̱midha̱ṃ joṣyāhṷti̱ṃ joṣi̱ brahma̱ janya̱ṃ joṣi̭ suṣṭu̱tim |
        viśvḙbhi̱rviśvā̭~ ṛ̱tunā̭ vaso ma̱ha u̱śan de̱vā~ ṷśa̱taḥ pā̭yayā ha̱viḥ ||6||
11 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| savitā|triṣṭup|
udu̱ ṣya de̱vaḥ sa̭vi̱tā sa̱vāya̭ śaśvatta̱maṃ tada̭pā̱ vahni̭rasthāt |
nū̱naṃ de̱vebhyo̱ vi hi dhāti̱ ratna̱mathābha̭jad vī̱tiho̭traṃ sva̱stau ||1||
viśva̭sya̱ hi śru̱ṣṭayḙ de̱va ū̱rdhvaḥ pra bā̱havā̭ pṛ̱thupā̭ṇi̱: sisa̭rti |
āpa̭ścidasya vra̱ta ā nimṛ̭grā a̱yaṃ ci̱d vāto̭ ramate̱ pari̭jman ||2||
ā̱śubhi̭ści̱dyān vi mṷcāti nū̱namarī̭rama̱data̭mānaṃ ci̱deto̭: |
a̱hyarṣṷ̄ṇāṃ ci̱nnya̭yā~ avi̱ṣyāmanṷ vra̱taṃ sa̭vi̱turmokyāgā̭t ||3||
puna̱: sama̭vya̱d vita̭ta̱ṃ vaya̭ntī ma̱dhyā karto̱rnya̭dhā̱cchakma̱ dhīra̭: |
ut saṃhāyā̭sthā̱d vyṛ1tū~ra̭dardhara̱rama̭tiḥ savi̱tā de̱va āgā̭t ||4||
nānaukā̭ṃsi̱ duryo̱ viśva̱māyu̱rvi ti̭ṣṭhate prabha̱vaḥ śoko̭ a̱gneḥ |
jyeṣṭha̭ṃ mā̱tā sū̱navḙ bhā̱gamādhā̱danva̭sya̱ keta̭miṣi̱taṃ sa̭vi̱trā ||5||
sa̱māva̭varti̱ viṣṭhi̭to jigī̱ṣurviśvḙṣā̱ṃ kāma̱ścara̭tāma̱mābhṷ̄t |
śaśvā̱~ apo̱ vikṛ̭taṃ hi̱tvyāgā̱danṷ vra̱taṃ sa̭vi̱turdaivya̭sya ||6||
tvayā̭ hi̱tamapya̭ma̱psu bhā̱gaṃ dhanvānvā mṛ̭ga̱yaso̱ vi ta̭sthuḥ |
vanā̭ni̱ vibhyo̱ naki̭rasya̱ tāni̭ vra̱tā de̱vasya̭ savi̱turmi̭nanti ||7||
yā̱drā̱dhyaṃ1 varṷṇo̱ yoni̱mapya̱mani̭śitaṃ ni̱miṣi̱ jarbhṷrāṇaḥ |
viśvo̭ mārtā̱ṇḍo vra̱jamā pa̱śurgā̭tstha̱ stha̱śo janmā̭ni savi̱tā vyāka̭: ||8||
na yasyendro̱ varṷṇo̱ na mi̱tro vra̱tama̭rya̱mā na mi̱nanti̭ ru̱draḥ |
nārā̭taya̱stami̱daṃ sva̱sti hu̱ve de̱vaṃ sa̭vi̱tāra̱ṃ namo̭bhiḥ ||9||
bhaga̱ṃ dhiya̭ṃ vā̱jaya̭nta̱: pura̭ṃdhi̱ṃ narā̱śaṃso̱ gnāspati̭rno avyāḥ |
ā̱ye vā̱masya̭ saṃga̱the ra̭yī̱ṇāṃ pri̱yā de̱vasya̭ savi̱tuḥ syā̭ma ||10||
a̱smabhya̱ṃ tad di̱vo a̱dbhyaḥ pṛ̭thi̱vyāstvayā̭ da̱ttaṃ kāmya̱ṃ rādha̱ ā gā̭t |
śaṃ yat sto̱tṛbhya̭ ā̱paye̱ bhavā̭tyuru̱śaṃsā̭ya savitarjari̱tre ||11||
8 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| aśvinau| triṣṭup|
grāvā̭ṇeva̱ tadidartha̭ṃ jarethe̱ gṛdhrḙva vṛ̱kṣaṃ ni̭dhi̱manta̱maccha̭ |
bra̱hmāṇḙva vi̱datha̭ uktha̱śāsā̭ dū̱teva̱ havyā̱ janyā̭ puru̱trā ||1||
prā̱ta̱ryāvā̭ṇā ra̱thyḙva vī̱rā 'jeva̭ ya̱mā vara̱mā sa̭cethe |
menḙ iva ta̱nvā̱3 śumbha̭māne̱ dampa̭tīva kratu̱vidā̱ janḙṣu ||2||
śṛṅgḙva naḥ pratha̱mā ga̭ntama̱rvāk cha̱phāvi̭va̱ jarbhṷrāṇā̱ taro̭bhiḥ |
ca̱kra̱vā̱keva̱ prati̱ vasto̭rusrā̱ 'rvāñcā̭ yātaṃ ra̱thyḙva śakrā ||3||
nā̱veva̭ naḥ pārayataṃ yu̱geva̱ nabhyḙva na upa̱dhīva̭ pra̱dhīva̭ |
śvānḙva no̱ ari̭ṣaṇyā ta̱nūnā̱ṃ khṛga̭leva vi̱srasa̭: pātama̱smān ||4||
vātḙvāju̱ryā na̱dyḙva rī̱tira̱kṣī i̭va̱ cakṣu̱ṣā yā̭tama̱rvāk |
hastā̭viva ta̱nve̱3 śambha̭viṣṭhā̱ pādḙva no nayata̱ṃ vasyo̱ accha̭ ||5||
oṣṭhā̭viva̱ madhvā̱sne vada̭ntā̱ stanā̭viva pipyataṃ jī̱vasḙ naḥ |
nāsḙva nasta̱nvo̭ rakṣi̱tārā̱ karṇā̭viva su̱śrutā̭ bhūtama̱sme ||6||
hastḙva śa̱ktima̱bhi sa̭ṃda̱dī na̱: kṣāmḙva na̱: sama̭jata̱ṃ rajā̭ṃsi |
i̱mā giro̭ aśvinā yuṣma̱yantī̱: kṣṇotrḙṇeva̱ svadhi̭ti̱ṃ saṃ śi̭śītam ||7||
e̱tāni̭ vāmaśvinā̱ vardha̭nāni̱ brahma̱ stoma̭ṃ gṛtsama̱dāso̭ akran |
tāni̭ narā jujuṣā̱ṇopa̭ yātaṃ bṛ̱had va̭dema vi̱dathḙ su̱vīrā̭: ||8||
6 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| somāpūṣaṇau, 6(antyārdharcasya) aditiḥ| triṣṭup|
somā̭pūṣaṇā̱ jana̭nā rayī̱ṇāṃ jana̭nā di̱vo jana̭nā pṛthi̱vyāḥ |
jā̱tau viśva̭sya̱ bhuva̭nasya go̱pau de̱vā a̭kṛṇvanna̱mṛta̭sya̱ nābhi̭m ||1||
i̱mau de̱vau jāya̭mānau juṣante̱mau tamā̭ṃsi gūhatā̱majṷṣṭā |
ā̱bhyāmindra̭: pa̱kvamā̱māsva̱ntaḥ so̭māpū̱ṣabhyā̭ṃ janadu̱sriyā̭su ||2||
somā̭pūṣaṇā̱ raja̭so vi̱māna̭ṃ sa̱ptaca̭kra̱ṃ ratha̱mavi̭śvaminvam |
vi̱ṣū̱vṛta̱ṃ mana̭sā yu̱jyamā̭na̱ṃ taṃ ji̭nvatho vṛṣaṇā̱ pañca̭raśmim ||3||
di̱vya1nyaḥ sada̭naṃ ca̱kra u̱ccā pṛ̭thi̱vyāma̱nyo adhya̱ntari̭kṣe |
tāva̱smabhya̭ṃ puru̱vāra̭ṃ puru̱kṣuṃ rā̱yaspoṣa̱ṃ vi ṣya̭tā̱ṃ nābhi̭ma̱sme ||4||
viśvā̭nya̱nyo bhuva̭nā ja̱jāna̱ viśva̭ma̱nyo a̭bhi̱cakṣā̭ṇa eti |
somā̭pūṣaṇā̱vava̭ta̱ṃ dhiya̭ṃ me yu̱vābhyā̱ṃ viśvā̱: pṛta̭nā jayema ||5||
dhiya̭ṃ pū̱ṣā ji̭nvatu viśvami̱nvo ra̱yiṃ somo̭ rayi̱pati̭rdadhātu |
ava̭tu de̱vyadi̭tirana̱rvā bṛ̱had va̭dema vi̱dathḙ su̱vīrā̭: ||6||
21 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| 1-2 vāyuḥ, 3 iṃdravāyū, 4-6 mitrāvaruṇau, 7-9 aśvinau, 10-12 indraḥ, 13-15 viśvedevāḥ,  16-18 sarasvatī, 19-21 dyāvāpṛthivyau havirdhāne vāḥ (19 tṛtīyapādasya agnirvā)|gāyatrī, 16-17 anuṣṭup, 18 bṛhatī|
vāyo̱ ye tḙ saha̱sriṇo̱ rathā̭sa̱stebhi̱rā ga̭hi | ni̱yutvā̱ntsoma̭pītaye ||1||
ni̱yutvā̭n vāya̱vā ga̭hya̱yaṃ śu̱kro a̭yāmi te | gantā̭si sunva̱to gṛ̱ham ||2||
śu̱krasyā̱dya gavā̭śira̱ indra̭vāyū ni̱yutva̭taḥ | ā yā̭ta̱ṃ piba̭taṃ narā ||3||
a̱yaṃ vā̭ṃ mitrāvaruṇā su̱taḥ soma̭ ṛtāvṛdhā |mamedi̱ha śrṷta̱ṃ hava̭m ||4||
rājā̭nā̱vana̭bhidruhā dhru̱ve sada̭syutta̱me | sa̱hasra̭sthūṇa āsāte ||5||
tā sa̱mrājā̭ ghṛ̱tāsṷtī ādi̱tyā dānṷna̱spatī̭ |sacḙte̱ ana̭vahvaram ||6||
goma̭dū̱ ṣu nā̭sa̱tyāśvā̭vadyātamaśvinā | va̱rtī rṷdrā nṛ̱pāyya̭m ||7||
na yat paro̱ nānta̭ra āda̱dharṣa̭d vṛṣaṇvasū | du̱:śaṃso̱ martyo̭ ri̱puḥ ||8||
tā na̱ ā vo̭ḻahamaśvinā ra̱yiṃ pi̱śaṅga̭saṃdṛśam | dhiṣṇyā̭ varivo̱vida̭m ||9||
indro̭ a̱ṅga ma̱had bha̱yama̱bhī ṣadapa̭ cucyavat | sa hi sthi̱ro vica̭rṣaṇiḥ ||10||
indra̭śca mṛ̱ḻayā̭ti no̱ na na̭: pa̱ścāda̱ghaṃ na̭śat | bha̱draṃ bha̭vāti naḥ pu̱raḥ ||11||
indra̱ āśā̭bhya̱spari̱ sarvā̭bhyo̱ abha̭yaṃ karat | jetā̱ śatrū̱n vica̭rṣaṇiḥ ||12||
viśvḙ devāsa̱ ā ga̭ta śṛṇu̱tā ma̭ i̱maṃ hava̭m | edaṃ ba̱rhirni ṣī̭data ||13||
tī̱vro vo̱ madhṷmā~ a̱yaṃ śu̱naho̭treṣu matsa̱raḥ | e̱taṃ pi̭bata̱ kāmya̭m ||14||
indra̭jyeṣṭhā̱ marṷdgaṇā̱ devā̭sa̱: pūṣa̭rātayaḥ | viśve̱ mama̭ śrutā̱ hava̭m ||15||
ambi̭tame̱ nadī̭tame̱ devi̭tame̱ sara̭svati |
a̱pra̱śa̱stā i̭va smasi̱ praśa̭stimamba naskṛdhi ||16||
tve viśvā̭ sarasvati śri̱tāyṷ̄ṃṣi de̱vyām |
śu̱naho̭treṣu matsva pra̱jāṃ dḙvi didiḍḍhi naḥ||17||
i̱mā brahma̭ sarasvati ju̱ṣasva̭ vājinīvati |
yā te̱ manma̭ gṛtsama̱dā ṛ̭tāvari pri̱yā de̱veṣu̱ juhva̭ti ||18||
pretā̭ṃ ya̱jñasya̭ śa̱mbhuvā̭ yu̱vāmidā vṛ̭ṇīmahe | a̱gniṃ ca̭ havya̱vāha̭nam ||19||
dyāvā̭ naḥ pṛthi̱vī i̱maṃ si̱dhrama̱dya di̭vi̱spṛśa̭m | ya̱jñaṃ de̱veṣṷ yacchatām ||20||
ā vā̭mu̱pastha̭madruhā de̱vāḥ sī̭dantu ya̱jñiyā̭: | i̱hādya soma̭pītaye ||21||
3 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| śakuntaḥ (kapiñjalarūpīndraḥ)| triṣṭup|
kani̭kradajja̱nuṣa̭ṃ prabruvā̱ṇa iya̭rti̱ vāca̭mari̱teva̱ nāva̭m |
su̱ma̱ṅgala̭śca śakune̱ bhavā̭si̱ mā tvā̱ kā ci̭dabhi̱bhā viśvyā̭ vidat ||1||
mā tvā̭ śye̱na ud va̭dhī̱nmā sṷpa̱rṇo mā tvā̭ vida̱diṣṷmān vī̱ro astā̭ |
pitryā̱manṷ pra̱diśa̱ṃ kani̭kradat suma̱ṅgalo̭ bhadravā̱dī va̭de̱ha ||2||
ava̭ kranda dakṣiṇa̱to gṛ̱hāṇā̭ṃ suma̱ṅgalo̭ bhadravā̱dī śa̭kunte |
mā na̭: ste̱na ī̭śata̱ māghaśa̭ṃso bṛ̱had va̭dema vi̱dathḙ su̱vīrā̭: ||3||
3 gṛtsamada (āṅgirasaḥ śaunahotraḥ paścād) bhārgavaḥ śaunakaḥ| śakuntaḥ(-kapiñjalarūpīndraḥ)| jagatī, 2 atiśakvarī aṣṭirvā|
pra̱da̱kṣi̱ṇida̱bhi gṛ̭ṇanti kā̱ravo̱ vayo̱ vada̭nta ṛtu̱thā śa̱kunta̭yaḥ |
u̱bhe vācaṷ vadati sāma̱gā i̭va gāya̱traṃ ca̱ traiṣṭṷbha̱ṃ cānṷ rājati ||1||
u̱dgā̱teva̭ śakune̱ sāma̭ gāyasi brahmapu̱tra i̭va̱ sava̭neṣu śaṃsasi |
vṛṣḙva vā̱jī śiśṷmatīra̱pītyā̭ sa̱rvato̭ naḥ śakune bha̱dramā va̭da
vi̱śvato̭ naḥ śakune̱ puṇya̱mā va̭da ||2||
ā̱vada̱ṃstvaṃ śa̭kune bha̱dramā va̭da tū̱ṣṇīmāsī̭naḥ suma̱tiṃ ci̭kiddhi naḥ |
yadu̱tpata̱n vada̭si karka̱rirya̭thā bṛ̱had va̭dema vi̱dathḙ su̱vīrā̭: ||3||
       ||iti dvitīyaṃ maṇḍalaṃ samāptam||