Rigveda — Mandala 3

23 gāthino viśvāmitraḥ| agniḥ| triṣṭup|
soma̭sya mā ta̱vasa̱ṃ vakṣya̭gne̱ vahni̭ṃ cakartha vi̱dathe̱ yaja̭dhyai |
de̱vā~ acchā̱ dīdya̭d yu̱ñje adri̭ṃ śamā̱ye a̭gne ta̱nva̭ṃ juṣasva ||1||
prāñca̭ṃ ya̱jñaṃ ca̭kṛma̱ vardha̭tā̱ṃ gīḥ sa̱midbhi̭ra̱gniṃ nama̭sā duvasyan |
di̱vaḥ śa̭śāsurvi̱dathā̭ kavī̱nāṃ gṛtsā̭ya cit ta̱vasḙ gā̱tumī̭ṣuḥ ||2||
mayo̭ dadhe̱ medhi̭raḥ pū̱tada̭kṣo di̱vaḥ su̱bandhṷrja̱nuṣā̭ pṛthi̱vyāḥ |
avi̭ndannu darśa̱tama̱psva1ntarde̱vāso̭ a̱gnima̱pasi̱ svasṝ̭ṇām ||3||
ava̭rdhayan tsu̱bhaga̭ṃ sa̱pta ya̱hvīḥ śve̱taṃ ja̭jñā̱nama̭ru̱ṣaṃ ma̭hi̱tvā |
śiśu̱ṃ na jā̱tama̱bhyā̭ru̱raśvā̭ de̱vāso̭ a̱gniṃ jani̭man vapuṣyan ||4||
śu̱krebhi̱raṅgai̱ raja̭ ātata̱nvān kratṷṃ punā̱naḥ ka̱vibhi̭: pa̱vitrai̭: |
śo̱cirvasā̭na̱: paryāyṷra̱pāṃ śriyo̭ mimīte bṛha̱tīranṷ̄nāḥ ||5||
va̱vrājā̭ sī̱mana̭datī̱rada̭bdhā di̱vo ya̱hvīrava̭sānā̱ ana̭gnāḥ |
sanā̱ atra̭ yuva̱taya̱: sayo̭nī̱reka̱ṃ garbha̭ṃ dadhire sa̱pta vāṇī̭: ||6||
stī̱rṇā a̭sya sa̱ṃhato̭ vi̱śvarṷ̄pā ghṛ̱tasya̱ yonaṷ sra̱vathe̱ madhṷ̄nām |
asthu̱ratra̭ dhe̱nava̱: pinva̭mānā ma̱hī da̱smasya̭ mā̱tarā̭ samī̱cī ||7||
ba̱bhrā̱ṇaḥ sṷ̄no sahaso̱ vya̭dyau̱d dadhā̭naḥ śu̱krā ra̭bha̱sā vapṷ̄ṃṣi |
ścota̭nti̱ dhārā̱ madhṷno ghṛ̱tasya̱ vṛṣā̱ yatra̭ vāvṛ̱dhe kāvyḙna ||8||
pi̱tuści̱dūdha̭rja̱nuṣā̭ viveda̱ vya̭sya̱ dhārā̭ asṛja̱dvi dhenā̭: |
guhā̱ cara̭nta̱ṃ sakhi̭bhiḥ śi̱vebhi̭rdi̱vo ya̱hvībhi̱rna guhā̭ babhūva ||9||
pi̱tuśca̱ garbha̭ṃ jani̱tuśca̭ babhre pū̱rvīreko̭ adhaya̱tpī pīpyā̭nāḥ |
vṛṣṇḙ sa̱patnī̱ śuca̭ye̱ saba̭ndhū u̱bhe a̭smai manu̱ṣye̱3 ni pā̭hi ||10||||
u̱rau ma̱hā~ a̭nibā̱dhe va̭va̱rdhā''po̭ a̱gniṃ ya̱śasa̱: saṃ hi pū̱rvīḥ |
ṛ̱tasya̱ yonā̭vaśaya̱d damṷ̄nā jāmī̱nāma̱gnira̱pasi̱ svasṝ̭ṇām ||11||||
a̱kro na ba̱bhriḥ sa̭mi̱the ma̱hīnā̭ṃ didṛ̱kṣeya̭: sū̱nave̱ bhāṛ̭jīkaḥ |
udu̱sriyā̱ jani̭tā̱ yo ja̱jānā̱'pāṃ garbho̱ nṛta̭mo ya̱hvo a̱gniḥ ||12||
a̱pāṃ garbha̭ṃ darśa̱tamoṣa̭dhīnā̱ṃ vanā̭ jajāna su̱bhagā̱ virṷ̄pam |
de̱vāsa̭ści̱nmana̭sā̱ saṃ hi ja̱gmuḥ pani̭ṣṭhaṃ jā̱taṃ ta̱vasa̭ṃ duvasyan ||13||
bṛ̱hanta̱ id bhā̱navo̱ bhāṛ̭jīkama̱gniṃ sa̭canta vi̱dyuto̱ na śu̱krāḥ |
guhḙva vṛ̱ddhaṃ sada̭si̱ sve a̱ntara̭pā̱ra ū̱rve a̱mṛta̱ṃ duhā̭nāḥ ||14||
īḻḙ ca tvā̱ yaja̭māno ha̱virbhi̱rīḻḙ sakhi̱tvaṃ sṷma̱tiṃ nikā̭maḥ |
de̱vairavo̭ mimīhi̱ saṃ ja̭ri̱tre rakṣā̭ ca no̱ damyḙbhi̱ranī̭kaiḥ ||15||
u̱pa̱kṣe̱tāra̱stava̭ supraṇī̱te'gne̱ viśvā̭ni̱ dhanyā̱ dadhā̭nāḥ |
su̱reta̭sā̱ śrava̭sā̱ tuñja̭mānā a̱bhi ṣyā̭ma pṛtanā̱yū~radḙvān ||16||
ā de̱vānā̭mabhavaḥ ke̱tura̭gne ma̱ndro viśvā̭ni̱ kāvyā̭ni vi̱dvān |
prati̱ martā̭~ avāsayo̱ damṷ̄nā̱ anṷ de̱vān ra̭thi̱ro yā̭si̱ sādha̭n ||17||
ni dṷro̱ṇe a̱mṛto̱ martyā̭nā̱ṃ rājā̭ sasāda vi̱dathā̭ni̱ sādha̭n |
ghṛ̱tapra̭tīka urvi̱yā vya̭dyauda̱gnirviśvā̭ni̱ kāvyā̭ni vi̱dvān ||18||
ā no̭ gahi sa̱khyebhi̭: śi̱vebhi̭rma̱hān ma̱hībhi̭rū̱tibhi̭: sara̱ṇyan |
a̱sme ra̱yiṃ ba̭hu̱laṃ saṃta̭rutraṃ su̱vāca̭ṃ bhā̱gaṃ ya̱śasa̭ṃ kṛdhī naḥ ||19||
e̱tā tḙ agne̱ jani̭mā̱ sanā̭ni̱ pra pū̱rvyāya̱ nūta̭nāni vocam |
ma̱hānti̱ vṛṣṇe̱ sava̭nā kṛ̱temā janma̭ñjanma̱n nihi̭to jā̱tavḙdāḥ ||20||||
janma̭ñjanma̱n nihi̭to jā̱tavḙdā vi̱śvāmi̭trebhiridhyate̱ aja̭sraḥ |
tasya̭ va̱yaṃ sṷma̱tau ya̱jñiya̱syā'pi̭ bha̱dre saṷmana̱se syā̭ma ||21||||
i̱maṃ ya̱jñaṃ sa̭hasāva̱n tvaṃ no̭ deva̱trā dhḙhi sukrato̱ rarā̭ṇaḥ |
pra ya̭ṃsi hotarbṛha̱tīriṣo̱ no'gne̱ mahi̱ dravi̭ṇa̱mā ya̭jasva ||22||||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvā 'gne̱ sā tḙ suma̱tirbhṷ̄tva̱sme ||23||
15 gāthino viśvāmitraḥ| vaiśvānaro'gniḥ| jagatī|
vai̱śvā̱na̱rāya̭ dhi̱ṣaṇā̭mṛtā̱vṛdhḙ ghṛ̱taṃ na pū̱tama̱gnayḙ janāmasi |
dvi̱tā hotā̭ra̱ṃ manṷṣaśca vā̱ghato̭ dhi̱yā ratha̱ṃ na kuli̭śa̱: samṛ̭ṇvati ||1||
sa ro̭cayajja̱nuṣā̱ roda̭sī u̱bhe sa mā̱trora̭bhavatpu̱tra īḍya̭: |
ha̱vya̱vāḻa̱gnira̱jara̱ścano̭hito dū̱ḻabho̭ vi̱śāmati̭thirvi̱bhāva̭suḥ ||2||
kratvā̱ dakṣa̭sya̱ tarṷṣo̱ vidha̭rmaṇi de̱vāso̭ a̱gniṃ ja̭nayanta̱ citti̭bhiḥ |
ru̱ru̱cā̱naṃ bhā̱nunā̱ jyoti̭ṣā ma̱hāmatya̱ṃ na vāja̭ṃ sani̱ṣyannupa̭ bruve ||3||
ā ma̱ndrasya̭ sani̱ṣyanto̱ varḙṇyaṃ vṛṇī̱mahe̱ ahra̭ya̱ṃ vāja̭mṛ̱gmiya̭m |
rā̱tiṃ bhṛgṷ̄ṇāmu̱śija̭ṃ ka̱vikra̭tuma̱gniṃ rāja̭ntaṃ di̱vyena̭ śo̱ciṣā̭ ||4||
a̱gniṃ su̱mnāya̭ dadhire pu̱ro janā̱ vāja̭śravasami̱ha vṛ̱ktaba̭rhiṣaḥ |
ya̱tasrṷcaḥ su̱ruca̭ṃ vi̱śvadḙvyaṃ ru̱draṃ ya̱jñānā̱ṃ sādha̭diṣṭima̱pasā̭m ||5||
pāva̭kaśoce̱ tava̱ hi kṣaya̱ṃ pari̱ hota̭rya̱jñeṣṷ vṛ̱ktaba̭rhiṣo̱ nara̭: |
agne̱ duva̭ i̱cchamā̭nāsa̱ āpya̱mupā̭sate̱ dravi̭ṇaṃ dhehi̱ tebhya̭: ||6||
ā roda̭sī apṛṇa̱dā sva̭rma̱hajjā̱taṃ yadḙnama̱paso̱ adhā̭rayan |
so a̭dhva̱rāya̱ pari̭ ṇīyate ka̱viratyo̱ na vāja̭sātaye̱ cano̭hitaḥ ||7||
na̱ma̱syata̭ ha̱vyadā̭tiṃ svadhva̱raṃ dṷva̱syata̱ damya̭ṃ jā̱tavḙdasam |
ra̱thīrṛ̱tasya̭ bṛha̱to vica̭rṣaṇira̱gnirde̱vānā̭mabhavat pu̱rohi̭taḥ ||8||
ti̱sro ya̱hvasya̭ sa̱midha̱: pari̭jmano̱'gnera̭punannu̱śijo̱ amṛ̭tyavaḥ |
tāsā̱mekā̱mada̭dhu̱rmartye̱ bhuja̭mu lo̱kamu̱ dve upa̭ jā̱mimī̭yatuḥ ||9||
vi̱śāṃ ka̱viṃ vi̱śpati̱ṃ mānṷṣī̱riṣa̱: saṃ sī̭makṛṇva̱n tsvadhi̭ti̱ṃ na teja̭se |
sa u̱dvato̭ ni̱vato̭ yāti̱ vevi̭ṣa̱t sa garbha̭me̱ṣu bhuva̭neṣu dīdharat ||10||||
sa ji̭nvate ja̱ṭharḙṣu prajajñi̱vān vṛṣā̭ ci̱treṣu̱ nāna̭da̱nna si̱ṃhaḥ |
vai̱śvā̱na̱raḥ pṛ̭thu̱pājā̱ ama̭rtyo̱ vasu̱ ratnā̱ daya̭māno̱ vi dā̱śuṣḙ ||11||||
vai̱śvā̱na̱raḥ pra̱tnathā̱ nāka̱mārṷhad di̱vaspṛ̱ṣṭhaṃ bhanda̭mānaḥ su̱manma̭bhiḥ |
sa pṷ̄rva̱vajja̱naya̭ñja̱ntave̱ dhana̭ṃ samā̱namajma̱ṃ paryḙti̱ jāgṛ̭viḥ ||12||
ṛ̱tāvā̭naṃ ya̱jñiya̱ṃ vipra̭mu̱kthya1mā yaṃ da̱dhe mā̭ta̱riśvā̭ di̱vi kṣaya̭m |
taṃ ci̱trayā̭ma̱ṃ hari̭keśamīmahe sudī̱tima̱gniṃ sṷvi̱tāya̱ navya̭se ||13||
śuci̱ṃ na yāma̭nniṣi̱raṃ sva̱rdṛśa̭ṃ ke̱tuṃ di̱vo ro̭cana̱sthāmṷṣa̱rbudha̭m |
a̱gniṃ mū̱rdhāna̭ṃ di̱vo apra̭tiṣkuta̱ṃ tamī̭mahe̱ nama̭sā vā̱jina̭ṃ bṛ̱hat ||14||
ma̱ndraṃ hotā̭ra̱ṃ śuci̱madva̭yāvina̱ṃ damṷ̄nasamu̱kthya̭ṃ vi̱śvaca̭rṣaṇim |
ratha̱ṃ na ci̱traṃ vapṷṣāya darśa̱taṃ manṷrhita̱ṃ sada̱mid rā̱ya ī̭mahe ||15||
11 gāthino viśvāmitraḥ| vaiśvānaro'gniḥ| jagatī|
vai̱śvā̱na̱rāya̭ pṛthu̱pāja̭se̱ vipo̱ ratnā̭ vidhanta dha̱ruṇḙṣa̱ca gāta̭ve |
a̱gnirhi de̱vā~ a̱mṛto̭ duva̱syatyathā̱ dharmā̭ṇi sa̱natā̱ na dṷ̄duṣat ||1||
a̱ntardū̱to roda̭sī da̱sma ī̭yate̱ hotā̱ niṣa̭tto̱ manṷṣaḥ pu̱rohi̭taḥ |
kṣaya̭ṃ bṛ̱hanta̱ṃ pari̭ bhūṣati̱ dyubhi̭rde̱vebhi̭ra̱gniri̭ṣi̱to dhi̱yāva̭suḥ ||2||
ke̱tuṃ ya̱jñānā̭ṃ vi̱datha̭sya̱ sādha̭na̱ṃ viprā̭so a̱gniṃ ma̭hayanta̱ citti̭bhiḥ |
apā̭ṃsi̱ yasmi̱nnadhi̭ saṃda̱dhurgira̱stasmi̭ntsu̱mnāni̱ yaja̭māna̱ ā ca̭ke ||3||
pi̱tā ya̱jñānā̱masṷro vipa̱ścitā̭ṃ vi̱māna̭ma̱gnirva̱yuna̭ṃ ca vā̱ghatā̭m |
ā vi̭veśa̱ roda̭sī̱ bhūri̭varpasā purupri̱yo bha̭ndate̱ dhāma̭bhiḥ ka̱viḥ ||4||
ca̱ndrama̱gniṃ ca̱ndrara̭tha̱ṃ hari̭vrataṃ vaiśvāna̱rama̭psu̱ṣada̭ṃ sva̱rvida̭m |
vi̱gā̱haṃ tūrṇi̱ṃ tavi̭ṣībhi̱rāvṛ̭ta̱ṃ bhūrṇi̭ṃ de̱vāsa̭ i̱ha su̱śriya̭ṃ dadhuḥ ||5||
a̱gnirde̱vebhi̱rmanṷṣaśca ja̱ntubhi̭stanvā̱no ya̱jñaṃ pṷru̱peśa̭saṃ dhi̱yā |
ra̱thīra̱ntarī̭yate̱ sādha̭diṣṭibhirjī̱ro damṷ̄nā abhiśasti̱cāta̭naḥ ||6||
agne̱ jara̭sva svapa̱tya āyṷnyū̱rjā pi̭nvasva̱ samiṣo̭ didīhi naḥ |
vayā̭ṃsi jinva bṛha̱taśca̭ jāgṛva u̱śigde̱vānā̱masi̭ su̱kratṷrvi̱pām ||7||
vi̱śpati̭ṃ ya̱hvamati̭thi̱ṃ nara̱: sadā̭ ya̱ntāra̭ṃ dhī̱nāmu̱śija̭ṃ ca vā̱ghatā̭m |
a̱dhva̱rāṇā̱ṃ ceta̭naṃ jā̱tavḙdasa̱ṃ pra śa̭ṃsanti̱ nama̭sā jū̱tibhi̭rvṛ̱dhe ||8||
vi̱bhāvā̭ de̱vaḥ su̱raṇa̱: pari̭ kṣi̱tīra̱gnirba̭bhūva̱ śava̭sā su̱madra̭thaḥ |
tasya̭ vra̱tāni̭ bhūripo̱ṣiṇo̭ va̱yamupa̭ bhūṣema̱ dama̱ ā sṷvṛ̱ktibhi̭: ||9||
vaiśvā̭nara̱ tava̱ dhāmā̱nyā ca̭ke̱ yebhi̭: sva̱rvidabha̭vo vicakṣaṇa |
jā̱ta āpṛ̭ṇo̱ bhuva̭nāni̱ roda̭sī̱ agne̱ tā viśvā̭ pari̱bhūra̭si̱ tmanā̭ ||10||||
vai̱śvā̱na̱rasya̭ da̱ṃsanā̭bhyo bṛ̱hadari̭ṇā̱deka̭: svapa̱syayā̭ ka̱viḥ |
u̱bhā pi̱tarā̭ ma̱haya̭nnajāyatā̱gnirdyāvā̭pṛthi̱vī bhūri̭retasā ||11||||
11 gāthino viśvāmitraḥ| āprīsūktaṃ (1 idhmaḥ samiddho'gnirvā, 2 tanūnapāt, 3 iḻaḥ, 4 barhiḥ, 5 devīrdvāraḥ, 6 uṣāsanaktā, 7 daivyo hotārau pracetasau, 8 tisro devyaḥsarasvatīḻābhāratyaḥ,  9 tvaṣṭā, 10 vanaspatiḥ, 11 svāhākṛtayaḥ)| triṣṭup |
sa̱mitsa̭mit su̱manā̭ bodhya̱sme śu̱cāśṷcā suma̱tiṃ rā̭si̱ vasva̭: |
ā dḙva de̱vān ya̱jathā̭ya vakṣi̱ sakhā̱ sakhī̭n tsu̱manā̭ yakṣyagne ||1||
yaṃ de̱vāsa̱striraha̭nnā̱yaja̭nte di̱vedi̭ve̱ varṷṇo mi̱tro a̱gniḥ |
semaṃ ya̱jñaṃ madhṷmantaṃ kṛdhī na̱stanṷ̄napād ghṛ̱tayo̭niṃ vi̱dhanta̭m ||2||
pra dīdhi̭tirvi̱śvavā̭rā jigāti̱ hotā̭rami̱ḻaḥ pra̭tha̱maṃ yaja̭dhyai |
acchā̱ namo̭bhirvṛṣa̱bhaṃ va̱ndadhyai̱ sa de̱vān ya̭kṣadiṣi̱to yajī̭yān ||3||
ū̱rdhvo vā̭ṃ gā̱tura̭dhva̱re a̭kāryū̱rdhvā śo̱cīṃṣi̱ prasthi̭tā̱ rajā̭ṃsi |
di̱vo vā̱ nābhā̱ nya̭sādi̱ hotā̭ stṛṇī̱mahi̭ de̱vavya̭cā̱ vi ba̱rhiḥ ||4||
sa̱pta ho̱trāṇi̱ mana̭sā vṛṇā̱nā inva̭nto̱ viśva̱ṃ prati̭ yannṛ̱tena̭ |
nṛ̱peśa̭so vi̱dathḙṣu̱ pra jā̱tā a̱bhī̱3maṃ ya̱jñaṃ vi ca̭ranta pū̱rvīḥ ||5||
ā bhanda̭māne u̱ṣasā̱ upā̭ke u̱ta sma̭yete ta̱nvā̱3 virṷ̄pe |
yathā̭ no mi̱tro varṷṇo̱ jujo̭ṣa̱dindro̭ ma̱rutvā̭~ u̱ta vā̱ maho̭bhiḥ ||6||
daivyā̱ hotā̭rā pratha̱mā nyṛ̭ñje sa̱pta pṛ̱kṣāsa̭: sva̱dhayā̭ madanti |
ṛ̱taṃ śaṃsa̭nta ṛ̱tamit ta ā̭hu̱ranṷ vra̱taṃ vra̭ta̱pā dīdhyā̭nāḥ ||7||
ā bhāra̭tī̱ bhāra̭tībhiḥ sa̱joṣā̱ iḻā̭ de̱vairma̭nu̱ṣyḙbhira̱gniḥ |
sara̭svatī sārasva̱tebhi̭ra̱rvāk tisro de̱vīrba̱rhiredaṃ sa̭dantu ||8||
tanna̭stu̱rīpa̱madha̭ poṣayi̱tnu deva̭ tvaṣṭa̱rvi ra̭rā̱ṇaḥ sya̭sva |
yato̭ vī̱raḥ ka̭rma̱ṇya̭: su̱dakṣo̭ yu̱ktagrā̭vā̱ jāya̭te de̱vakā̭maḥ ||9||
vana̭spa̱te'va̭ sṛ̱jopa̭ de̱vāna̱gnirha̱viḥ śa̭mi̱tā sṷ̄dayāti |
sedu̱ hotā̭ sa̱tyata̭ro yajāti̱ yathā̭ de̱vānā̱ṃ jani̭māni̱ veda̭ ||10||
ā yā̭hyagne samidhā̱no a̱rvāṅindrḙṇa de̱vaiḥ sa̱ratha̭ṃ tu̱rebhi̭: |
ba̱rhirna̭ āstā̱madi̭tiḥ supu̱trā svāhā̭ de̱vā a̱mṛtā̭ mādayantām ||11||
11 gāthino viśvāmitraḥ| agniḥ| triṣṭup|
pratya̱gniru̱ṣasa̱śceki̭tā̱no'bo̭dhi̱ vipra̭: pada̱vīḥ ka̭vī̱nām |
pṛ̱thu̱pājā̭ deva̱yadbhi̱: sami̱ddho'pa̱ dvārā̱ tama̭so̱ vahni̭rāvaḥ ||1||
predva̱gnirvā̭vṛdhe̱ stomḙbhirgī̱rbhiḥ sto̭tṝ̱ṇāṃ na̭ma̱sya̭ u̱kthaiḥ |
pū̱rvīrṛ̱tasya̭ sa̱ṃdṛśa̭ścakā̱naḥ saṃ dū̱to a̭dyaudu̱ṣaso̭ viro̱ke ||2||
adhā̭yya̱gnirmānṷṣīṣu vi̱kṣva1pāṃ garbho̭ mi̱tra ṛ̱tena̱ sādha̭n |
ā ha̭rya̱to ya̭ja̱taḥ sānva̭sthā̱dabhṷ̄du̱ vipro̱ havyo̭ matī̱nām ||3||
mi̱tro a̱gnirbha̭vati̱ yat sami̭ddho mi̱tro hotā̱ varṷṇo jā̱tavḙdāḥ |
mi̱tro a̭dhva̱ryuri̭ṣi̱ro damṷ̄nā mi̱traḥ sindhṷ̄nāmu̱ta parva̭tānām ||4||
pāti̭ pri̱yaṃ ri̱po agra̭ṃ pa̱daṃ veḥ pāti̭ ya̱hvaścara̭ṇa̱ṃ sūrya̭sya |
pāti̱ nābhā̭ sa̱ptaśī̭rṣāṇama̱gniḥ pāti̭ de̱vānā̭mupa̱māda̭mṛ̱ṣvaḥ ||5||
ṛ̱bhuśca̭kra̱ īḍya̱ṃ cāru̱ nāma̱ viśvā̭ni de̱vo va̱yunā̭ni vi̱dvān |
sa̱sasya̱ carma̭ ghṛ̱tava̭t pa̱daṃ vestadida̱gnī ra̭kṣa̱tyapra̭yucchan ||6||
ā yoni̭ma̱gnirghṛ̱tava̭ntamasthāt pṛ̱thupra̭gāṇamu̱śanta̭muśā̱naḥ |
dīdyā̭na̱: śuci̭rṛ̱ṣvaḥ pā̭va̱kaḥ puna̭:punarmā̱tarā̱ navya̭sī kaḥ ||7||
sa̱dyo jā̱ta oṣa̭dhībhirvavakṣe̱ yadī̱ vardha̭nti pra̱svo̭ ghṛ̱tena̭ |
āpa̭ iva pra̱vatā̱ śumbha̭mānā uru̱ṣyada̱gniḥ pi̱troru̱pasthḙ ||8||
udṷ ṣṭu̱taḥ sa̱midhā̭ ya̱hvo a̭dyau̱d varṣma̭n di̱vo adhi̱ nābhā̭ pṛthi̱vyāḥ |
mi̱tro a̱gnirīḍyo̭ māta̱riśvā '' dū̱to va̭kṣad ya̱jathā̭ya de̱vān ||9||
uda̭stambhītsa̱midhā̱ nāka̭mṛ̱ṣvo̱3'gnirbhava̭nnutta̱mo ro̭ca̱nānā̭m |
yadī̱ bhṛgṷbhya̱: pari̭ māta̱riśvā̱ guhā̱ santa̭ṃ havya̱vāha̭ṃ samī̱dhe ||10||||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvā 'gne̱ sā tḙ suma̱tirbhṷ̄tva̱sme ||11||||
11 gāthino viśvāmitraḥ| agniḥ| triṣṭup|
pra kā̭ravo mana̱nā va̱cyamā̭nā deva̱drīcī̭ṃ nayata deva̱yanta̭: |
da̱kṣi̱ṇā̱vāḍ vā̱jinī̱ prācyḙti ha̱virbhara̭ntya̱gnayḙ ghṛ̱tācī̭ ||1||
ā roda̭sī apṛṇā̱ jāya̭māna u̱ta pra ri̭kthā̱ adha̱ nu pra̭yajyo |
di̱vaści̭dagne mahi̱nā pṛ̭thi̱vyā va̱cyantā̭ṃ te̱ vahna̭yaḥ sa̱ptaji̭hvāḥ ||2||
dyauśca̭ tvā pṛthi̱vī ya̱jñiyā̭so̱ ni hotā̭raṃ sādayante̱ damā̭ya |
yadī̱ viśo̱ mānṷṣīrdeva̱yantī̱: praya̭svatī̱rīḻa̭te śu̱krama̱rciḥ ||3||
ma̱hān tsa̱dhasthḙ dhru̱va ā niṣa̭tto̱'ntardyāvā̱ māhi̭ne̱ harya̭māṇaḥ |
āskrḙ sa̱patnī̭ a̱jare̱ amṛ̭kte saba̱rdughḙ urugā̱yasya̭ dhe̱nū ||4||
vra̱tā tḙ agne maha̱to ma̱hāni̱ tava̱ kratvā̱ roda̭sī̱ ā ta̭tantha |
tvaṃ dū̱to a̭bhavo̱ jāya̭māna̱stvaṃ ne̱tā vṛ̭ṣabha carṣaṇī̱nām ||5||
ṛ̱tasya̭ vā ke̱śinā̭ yo̱gyābhi̭rghṛta̱snuvā̱ rohi̭tā dhu̱ri dhi̭ṣva |
athā va̭ha de̱vān dḙva̱ viśvā̭n tsvadhva̱rā kṛ̭ṇuhi jātavedaḥ ||6||
di̱vaści̱dā tḙ rucayanta ro̱kā u̱ṣo vi̭bhā̱tīranṷ bhāsi pū̱rvīḥ |
a̱po yada̭gna u̱śadha̱gvanḙṣu̱ hotṷrma̱ndrasya̭ pa̱naya̭nta de̱vāḥ ||7||
u̱rau vā̱ ye a̱ntari̭kṣe̱ mada̭nti di̱vo vā̱ ye ro̭ca̱ne santi̭ de̱vāḥ |
ūmā̭ vā̱ ye su̱havā̭so̱ yaja̭trā āyemi̱re ra̱thyo̭ agne̱ aśvā̭: ||8||
aibhi̭ragne sa̱ratha̭ṃ yāhya̱rvāṅ nā̭nāra̱thaṃ vā̭ vi̱bhavo̱ hyaśvā̭: |
patnī̭vatastri̱ṃśata̱ṃ trī~śca̭ de̱vāna̭nuṣva̱dhamā va̭ha mā̱daya̭sva ||9||
sa hotā̱ yasya̱ roda̭sī cidu̱rvī ya̱jñaṃya̭jñama̱bhi vṛ̱dhe gṛ̭ṇī̱taḥ |
prācī̭ adhva̱reva̭ tasthatuḥ su̱mekḙ ṛ̱tāva̭rī ṛ̱tajā̭tasya sa̱tye ||10||||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvā 'gne̱ sā tḙ suma̱tirbhṷ̄tva̱sme ||11||||
11 gāthino viśvāmitraḥ| agniḥ| triṣṭup|
pra ya ā̱ruḥ śi̭tipṛ̱ṣṭhasya̭ dhā̱serā mā̱tarā̭ viviśuḥ sa̱pta vāṇī̭: |
pa̱ri̱kṣitā̭ pi̱tarā̱ saṃ ca̭rete̱ pra sa̭rsrāte dī̱rghamāyṷ: pra̱yakṣḙ ||1||
di̱vakṣa̭so dhe̱navo̱ vṛṣṇo̱ aśvā̭ de̱vīrā ta̭sthau̱ madhṷma̱d vaha̭ntīḥ |
ṛ̱tasya̭ tvā̱ sada̭si kṣema̱yanta̱ṃ paryekā̭ carati varta̱niṃ gauḥ ||2||
ā sī̭marohat su̱yamā̱ bhava̭ntī̱: pati̭ściki̱tvān ra̭yi̱vid ra̭yī̱ṇām |
pra nīla̭pṛṣṭho ata̱sasya̭ dhā̱sestā a̭vāsayat puru̱dhapra̭tīkaḥ ||3||
mahi̭ tvā̱ṣṭramū̱rjaya̭ntīraju̱ryaṃ sta̭bhū̱yamā̭naṃ va̱hato̭ vahanti |
vyaṅgḙbhirdidyutā̱naḥ sa̱dhastha̱ ekā̭miva̱ roda̭sī̱ ā vi̭veśa ||4||
jā̱nanti̱ vṛṣṇo̭ aru̱ṣasya̱ śeva̭mu̱ta bra̱dhnasya̱ śāsa̭ne raṇanti |
di̱vo̱ruca̭: su̱ruco̱ roca̭mānā̱ iḻā̱ yeṣā̱ṃ gaṇyā̱ māhi̭nā̱ gīḥ ||5||
u̱to pi̱tṛbhyā̭ṃ pra̱vidānu̱ ghoṣa̭ṃ ma̱ho ma̱hadbhyā̭manayanta śū̱ṣam |
u̱kṣā ha̱ yatra̱ pari̱ dhāna̭ma̱ktoranu̱ svaṃ dhāma̭ jari̱turva̱vakṣa̭ ||6||
a̱dhva̱ryubhi̭: pa̱ñcabhi̭: sa̱pta viprā̭: pri̱yaṃ ra̭kṣante̱ nihi̭taṃ pa̱daṃ veḥ |
prāñco̭ madantyu̱kṣaṇo̭ aju̱ryā de̱vā de̱vānā̱manu̱ hi vra̱tā guḥ ||7||
daivyā̱ hotā̭rā pratha̱mā nyṛ̭ñje sa̱pta pṛ̱kṣāsa̭: sva̱dhayā̭ madanti |
ṛ̱taṃ śaṃsa̭nta ṛ̱tamit ta ā̭hu̱ranṷ vra̱taṃ vra̭ta̱pā dīdhyā̭nāḥ ||8||
vṛ̱ṣā̱yantḙ ma̱he atyā̭ya pū̱rvīrvṛṣṇḙ ci̱trāya̭ ra̱śmaya̭: suyā̱māḥ |
deva̭ hotarma̱ndrata̭raściki̱tvān ma̱ho de̱vān roda̭sī̱ eha va̭kṣi ||9||
pṛ̱kṣapra̭yajo draviṇaḥ su̱vāca̭: suke̱tava̭ u̱ṣaso̭ re̱vadṷ̄ṣuḥ |
u̱to ci̭dagne mahi̱nā pṛ̭thi̱vyāḥ kṛ̱taṃ ci̱dena̱: saṃ ma̱he da̭śasya ||10||||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvāgne̱ sā tḙ suma̱tirbhṷ̄tva̱sme ||11||||
11 gāthino viśvāmitraḥ| yūpaḥ, 6-10 yūpāḥ, 8 viśve devā vā, 11 vraścanaḥ | triṣṭup, 3, 7 anuṣṭup|
a̱ñjanti̱ tvāma̭dhva̱re dḙva̱yanto̱ vana̭spate̱ madhṷnā̱ daivyḙna |
yadū̱rdhvastiṣṭhā̱ dravi̭ṇe̱ha dha̭ttā̱d yad vā̱ kṣayo̭ mā̱tura̱syā u̱pasthḙ ||1||
sami̭ddhasya̱ śraya̭māṇaḥ pu̱rastā̱d brahma̭ vanvā̱no a̱jara̭ṃ su̱vīra̭m |
ā̱re a̱smadama̭ti̱ṃ bādha̭māna̱ ucchra̭yasva maha̱te saubha̭gāya ||2||
ucchra̭yasva vanaspate̱ varṣma̭npṛ pṛthi̱vyā adhi̭ |
sumi̭tī mī̱yamā̭no̱ varco̭ dhā ya̱jñavā̭hase ||3||
yuvā̭ su̱vāsā̱: pari̭vīta̱ āgā̱t sa u̱ śreyā̭n bhavati̱ jāya̭mānaḥ |
taṃ dhīrā̭saḥ ka̱vaya̱ unna̭yanti svā̱dhyo̱3 mana̭sā deva̱yanta̭: ||4||
jā̱to jā̭yate sudina̱tve ahnā̭ṃ sama̱rya ā vi̱dathe̱ vardha̭mānaḥ |
pu̱nanti̱ dhīrā̭ a̱paso̭ manī̱ṣā dḙva̱yā vipra̱ udi̭yarti̱ vāca̭m ||5||
yān vo̱ naro̭ deva̱yanto̭ nimi̱myurvana̭spate̱ svadhi̭tirvā ta̱takṣa̭ |
te de̱vāsa̱: svara̭vastasthi̱vāṃsa̭: pra̱jāva̭da̱sme di̭dhiṣantu̱ ratna̭m ||6||
ye vṛ̱kṇāso̱ adhi̱ kṣami̱ nimi̭tāso ya̱tasrṷcaḥ |
te no̭ vyantu̱ vārya̭ṃ deva̱trā kṣḙtra̱sādha̭saḥ ||7||
ā̱di̱tyā ru̱drā vasa̭vaḥ sunī̱thā dyāvā̱kṣāmā̭ pṛthi̱vī a̱ntari̭kṣam |
sa̱joṣa̭so ya̱jñama̭vantu de̱vā ū̱rdhvaṃ kṛ̭ṇvantvadhva̱rasya̭ ke̱tum ||8||
ha̱ṃsā i̭va śreṇi̱śo yatā̭nāḥ śu̱krā vasā̭nā̱: svara̭vo na̱ āgṷ: |
u̱nnī̱yamā̭nāḥ ka̱vibhi̭: pu̱rastā̭d de̱vā de̱vānā̱mapi̭ yanti̱ pātha̭: ||9||
śṛṅgā̭ṇī̱vecchṛ̱ṅgiṇā̱ṃ saṃ da̭dṛśre ca̱ṣāla̭vanta̱: svara̭vaḥ pṛthi̱vyām |
vā̱ghadbhi̭rvā viha̱ve śroṣa̭māṇā a̱smā~ a̭vantu pṛta̱nājyḙṣu ||10||||
vana̭spate śa̱tava̭lśo̱ vi ro̭ha sa̱hasra̭valśā̱ vi va̱yaṃ rṷhema |
yaṃ tvāma̱yaṃ svadhi̭ti̱steja̭mānaḥ praṇi̱nāya̭ maha̱te saubha̭gāya ||11||||
9 gāthino viśvāmitraḥ| agniḥ| bṛhatī, 9 triṣṭup|
sakhā̭yastvā vavṛmahe de̱vaṃ martā̭sa ū̱tayḙ |
a̱pāṃ napā̭taṃ su̱bhaga̭ṃ su̱dīdi̭tiṃ su̱pratṷ̄rtimane̱hasa̭m ||1||
kāya̭māno va̱nā tvaṃ yanmā̱tṝraja̭ganna̱paḥ |
na tat tḙ agne pra̱mṛṣḙ ni̱varta̭na̱ṃ yad dū̱re sanni̱hābha̭vaḥ ||2||
ati̭ tṛ̱ṣṭaṃ va̭vakṣi̱thāthai̱va su̱manā̭ asi |
praprā̱nye yanti̱ parya̱nya ā̭sate̱ yeṣā̭ṃ sa̱khye asi̭ śri̱taḥ ||3||
ī̱yi̱vāṃsa̱mati̱ sridha̱: śaśva̭tī̱rati̭ sa̱ścata̭: |
anvī̭mavindan nici̱rāso̭ a̱druho̱'psu si̱ṃhami̭va śri̱tam ||4||
sa̱sṛ̱vāṃsa̭miva̱ tmanā̱ 'gnimi̱tthā ti̱rohi̭tam |
aina̭ṃ nayanmāta̱riśvā̭ parā̱vato̭ de̱vebhyo̭ mathi̱taṃ pari̭ ||5||
taṃ tvā̱ martā̭ agṛbhṇata de̱vebhyo̭ havyavāhana |
viśvā̱n yad ya̱jñā~ a̭bhi̱pāsi̭ mānuṣa̱ tava̱ kratvā̭ yaviṣṭhya ||6||
tad bha̱draṃ tava̭ da̱ṃsanā̱ pākā̭ya cicchadayati |
tvāṃ yada̭gne pa̱śava̭: sa̱māsa̭te̱ sami̭ddhamapiśarva̱re ||7||
ā jṷhotā svadhva̱raṃ śī̱raṃ pā̭va̱kaśo̭ciṣam |
ā̱śuṃ dū̱tama̭ji̱raṃ pra̱tnamīḍya̭ṃ śru̱ṣṭī de̱vaṃ sa̭paryata ||8||
trīṇi̭ śa̱tā trī sa̱hasrā̭ṇya̱gniṃ tri̱ṃśacca̭ de̱vā nava̭ cāsaparyan |
aukṣa̭n ghṛ̱tairastṛ̭ṇan ba̱rhira̭smā̱ ādiddhotā̭ra̱ṃ nya̭sādayanta ||9||
9 gāthino viśvāmitraḥ| agniḥ| uṣṇik|
tvāma̭gne manī̱ṣiṇa̭: sa̱mrāja̭ṃ carṣaṇī̱nām | de̱vaṃ martā̭sa indhate̱ sama̭dhva̱re ||1||
tvāṃ ya̱jñeṣvṛ̱tvija̱magne̱ hotā̭ramīḻate | go̱pā ṛ̱tasya̭ dīdihi̱ sve damḙ ||2||
sa ghā̱ yaste̱ dadā̭śati sa̱midhā̭ jā̱tavḙdase | so a̭gne dhatte su̱vīrya̱ṃ sa pṷṣyati ||3||
sa ke̱tura̭dhva̱rāṇā̭ma̱gnirde̱vebhi̱rā ga̭mat | a̱ñjā̱naḥ sa̱pta hotṛ̭bhirha̱viṣma̭te ||4||
pra hotrḙ pū̱rvyaṃ vaco̱'gnayḙ bharatā bṛ̱hat | vi̱pāṃ jyotī̭ṃṣi̱ bibhra̭te̱ na ve̱dhasḙ ||5||
a̱gniṃ va̭rdhantu no̱ giro̱ yato̱ jāya̭ta u̱kthya̭: | ma̱he vājā̭ya̱ dravi̭ṇāya darśa̱taḥ ||6||
agne̱ yaji̭ṣṭho adhva̱re de̱vān dḙvaya̱te ya̭ja | hotā̭ ma̱ndro vi rā̭ja̱syati̱ sridha̭: ||7||
sa na̭: pāvaka dīdihi dyu̱mada̱sme su̱vīrya̭m | bhavā̭ sto̱tṛbhyo̱ anta̭maḥ sva̱stayḙ ||8||
taṃ tvā̱ viprā̭ vipa̱nyavo̭ jāgṛ̱vāṃsa̱: sami̭ndhate | ha̱vya̱vāha̱mama̭rtyaṃ saho̱vṛdha̭m ||9||
9 gāthino viśvāmitraḥ| agniḥ| gāyatrī|
a̱gnirhotā̭ pu̱rohi̭to'dhva̱rasya̱ vica̭rṣaṇiḥ | sa vḙda ya̱jñamā̭nu̱ṣak ||1||
sa ha̭vya̱vāḻama̭rtya u̱śigdū̱taścano̭hitaḥ | a̱gnirdhi̱yā samṛ̭ṇvati ||2||
a̱gnirdhi̱yā sa cḙtati ke̱turya̱jñasya̭ pū̱rvyaḥ | artha̱ṃ hya̭sya ta̱raṇi̭ ||3||
a̱gniṃ sū̱nuṃ sana̭śruta̱ṃ saha̭so jā̱tavḙdasam | vahni̭ṃ de̱vā a̭kṛṇvata ||4||
adā̭bhyaḥ purae̱tā vi̱śāma̱gnirmānṷṣīṇām | tūrṇī̱ ratha̱: sadā̱ nava̭: ||5||
sā̱hvān viśvā̭ abhi̱yuja̱: kratṷrde̱vānā̱mamṛ̭ktaḥ | a̱gnistu̱viśra̭vastamaḥ ||6||
a̱bhi prayā̭ṃsi̱ vāha̭sā dā̱śvā~ a̭śnoti̱ martya̭: | kṣaya̭ṃ pāva̱kaśo̭ciṣaḥ ||7||
pari̱ viśvā̭ni̱ sudhi̭tā̱ 'gnera̭śyāma̱ manma̭bhiḥ | viprā̭so jā̱tavḙdasaḥ ||8||
agne̱ viśvā̭ni̱ vāryā̱ vājḙṣu saniṣāmahe | tve de̱vāsa̱ eri̭re ||9||
9 gāthino viśvāmitraḥ| indrāgnī| gāyatrī|
indrā̭gnī̱ ā ga̭taṃ su̱taṃ gī̱rbhirnabho̱ varḙṇyam | a̱sya pā̭taṃ dhi̱yeṣi̱tā ||1||
indrā̭gnī jari̱tuḥ sacā̭ ya̱jño ji̭gāti̱ ceta̭naḥ | a̱yā pā̭tami̱maṃ su̱tam ||2||
indra̭ma̱gniṃ ka̭vi̱cchadā̭ ya̱jñasya̭ jū̱tyā vṛ̭ṇe | tā soma̭sye̱ha tṛ̭mpatām ||3||
to̱śā vṛ̭tra̱haṇā̭ huve sa̱jitvā̱nāpa̭rājitā | i̱ndrā̱gnī vā̭ja̱sāta̭mā ||4||
pra vā̭marcantyu̱kthino̭ nīthā̱vido̭ jari̱tāra̭: | indrā̭gnī̱ iṣa̱ ā vṛ̭ṇe ||5||
indrā̭gnī nava̱tiṃ puro̭ dā̱sapa̭tnīradhūnutam | sā̱kamekḙna̱ karma̭ṇā ||6||
indrā̭gnī̱ apa̭sa̱sparyupa̱ pra ya̭nti dhī̱taya̭: | ṛ̱tasya̭ pa̱thyā̱3 anṷ ||7||
indrā̭gnī tavi̱ṣāṇi̭ vāṃ sa̱dhasthā̭ni̱ prayā̭ṃsi ca | yu̱vora̱ptūrya̭ṃ hi̱tam ||8||
indrā̭gnī roca̱nā di̱vaḥ pari̱ vājḙṣu bhūṣathaḥ | tadvā̭ṃ ceti̱ pra vī̱rya̭m ||9||
7 ṛṣabho vaiśvāmitraḥ| agniḥ| anuṣṭup|
pra vo̭ de̱vāyā̱gnaye̱ barhi̭ṣṭhamarcāsmai |
gama̭d de̱vebhi̱rā sa no̱ yaji̭ṣṭho ba̱rhirā sa̭dat ||1||
ṛ̱tāvā̱ yasya̱ roda̭sī̱ dakṣa̱ṃ saca̭nta ū̱taya̭: |
ha̱viṣma̭nta̱stamī̭ḻate̱ taṃ sa̭ni̱ṣyanto'va̭se ||2||
sa ya̱ntā vipra̭ eṣā̱ṃ sa ya̱jñānā̱mathā̱ hi ṣaḥ |
a̱gniṃ taṃ vo̭ duvasyata̱ dātā̱ yo vani̭tā ma̱gham ||3||
sa na̱: śarmā̭ṇi vī̱taye̱'gnirya̭cchatu̱ śaṃta̭mā |
yato̭ naḥ pru̱ṣṇava̱d vasṷ di̱vi kṣi̱tibhyo̭ a̱psvā ||4||
dī̱di̱vāṃsa̱mapṷ̄rvya̱ṃ vasvī̭bhirasya dhī̱tibhi̭: |
ṛkvā̭ṇo a̱gnimi̭ndhate̱ hotā̭raṃ vi̱śpati̭ṃ vi̱śām ||5||
u̱ta no̱ brahma̭nnaviṣa u̱ktheṣṷ deva̱hūta̭maḥ |
śaṃ na̭: śocā ma̱rudvṛ̱dho'gnḙ sahasra̱sāta̭maḥ ||6||||
nū no̭ rāsva sa̱hasra̭vat to̱kava̭tpuṣṭi̱mad vasṷ |
dyu̱mada̭gne su̱vīrya̱ṃ varṣi̭ṣṭha̱manṷpakṣitam ||7||||
7 ṛṣabho vaiśvāmitraḥ| agniḥ| triṣṭup|
ā hotā̭ ma̱ndro vi̱dathā̭nyasthāt sa̱tyo yajvā̭ ka̱vita̭ma̱: sa ve̱dhāḥ |
vi̱dyudra̭tha̱: saha̭saspu̱tro a̱gniḥ śo̱ciṣkḙśaḥ pṛthi̱vyāṃ pājo̭ aśret ||1||
ayā̭mi te̱ nama̭uktiṃ juṣasva̱ ṛtā̭va̱stubhya̱ṃ ceta̭te sahasvaḥ |
vi̱dvā~ ā va̭kṣi vi̱duṣo̱ ni ṣa̭tsi̱ madhya̱ ā ba̱rhirū̱tayḙ yajatra ||2||||
drava̭tāṃ ta u̱ṣasā̭ vā̱jaya̭ntī̱ agne̱ vāta̭sya pa̱thyā̭bhi̱raccha̭ |
yat sī̭ma̱ñjanti̭ pū̱rvyaṃ ha̱virbhi̱rā va̱ndhurḙva tasthaturduro̱ṇe ||3||||
mi̱traśca̱ tubhya̱ṃ varṷṇaḥ saha̱svo'gne̱ viśvḙ ma̱ruta̭: su̱mnama̭rcan |
yaccho̱ciṣā̭ sahasasputra̱ tiṣṭhā̭ a̱bhi kṣi̱tīḥ pra̱thaya̱n tsūryo̱ nṝn ||4||||
va̱yaṃ tḙ a̱dya ra̭ri̱mā hi kāma̭muttā̱naha̭stā̱ nama̭sopa̱sadya̭ |
yaji̭ṣṭhena̱ mana̭sā yakṣi de̱vānasrḙdhatā̱ manma̭nā̱ vipro̭ agne ||5||||
tvaddhi pṷtra sahaso̱ vi pū̱rvīrde̱vasya̱ yantyū̱tayo̱ vi vājā̭: |
tvaṃ dḙhi saha̱sriṇa̭ṃ ra̱yiṃ no̭'dro̱gheṇa̱ vaca̭sā sa̱tyama̭gne ||6||||
tubhya̭ṃ dakṣa kavikrato̱ yānī̱mā deva̱ martā̭so adhva̱re aka̭rma |
tvaṃ viśva̭sya su̱ratha̭sya bodhi̱ sarva̱ṃ tada̭gne amṛta svade̱ha ||7||||
7 kātya utkīlaḥ| agniḥ| triṣṭup|
vi pāja̭sā pṛ̱thunā̱ śośṷcāno̱ bādha̭sva dvi̱ṣo ra̱kṣaso̱ amī̭vāḥ |
su̱śarma̭ṇo bṛha̱taḥ śarma̭ṇi syāma̱gnera̱haṃ su̱hava̭sya̱ praṇī̭tau ||1||
tvaṃ no̭ a̱syā u̱ṣaso̱ vyṷṣṭau̱ tvaṃ sūra̱ udi̭te bodhi go̱pāḥ |
janmḙva̱ nitya̱ṃ tana̭yaṃ juṣasva̱ stoma̭ṃ me agne ta̱nvā̭ sujāta ||2||
tvaṃ nṛ̱cakṣā̭ vṛṣa̱bhānṷ pū̱rvīḥ kṛ̱ṣṇāsva̭gne aru̱ṣo vi bhā̭hi |
vaso̱ neṣi̭ ca̱ parṣi̱ cātyaṃha̭: kṛ̱dhī no̭ rā̱ya u̱śijo̭ yaviṣṭha ||3||
aṣā̭ḻaho agne vṛṣa̱bho di̭dīhi̱ puro̱ viśvā̱: saubha̭gā saṃjigī̱vān |
ya̱jñasya̭ ne̱tā pra̭tha̱masya̭ pā̱yorjāta̭vedo bṛha̱taḥ sṷpraṇīte ||4||
acchi̭drā̱ śarma̭ jaritaḥ pu̱rūṇi̭ de̱vā~ acchā̱ dīdyā̭naḥ sume̱dhāḥ |
ratho̱ na sasni̭ra̱bhi va̭kṣi̱ vāja̱magne̱ tvaṃ roda̭sī naḥ su̱mekḙ ||5||
pra pī̭paya vṛṣabha̱ jinva̱ vājā̱nagne̱ tvaṃ roda̭sī naḥ su̱doghḙ |
de̱vebhi̭rdeva su̱rucā̭ rucā̱no mā no̱ marta̭sya durma̱tiḥ pari̭ ṣṭhāt ||6||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvā 'gne̱ sā tḙ suma̱tirbhṷ̄tva̱sme ||7||
6 kātya utkīlaḥ| agniḥ| pragāthaḥ(1, 3, 5 bṛhatī, 2, 4, 6 sato bṛhatī)|
a̱yama̱gniḥ su̱vīrya̱syeśḙ ma̱haḥ saubha̭gasya |
rā̱ya ī̭śe svapa̱tyasya̱ goma̭ta̱ īśḙ vṛtra̱hathā̭nām ||1||
i̱maṃ na̭ro marutaḥ saścatā̱ vṛdha̱ṃ yasmi̱n rāya̱: śevṛ̭dhāsaḥ |
a̱bhi ye santi̱ pṛta̭nāsu dū̱ḍhyo̭ vi̱śvāhā̱ śatrṷmāda̱bhuḥ ||2||
sa tvaṃ no̭ rā̱yaḥ śi̭śīhi̱ mīḍhvo̭ agne su̱vīrya̭sya |
tuvi̭dyumna̱ varṣi̭ṣṭhasya pra̱jāva̭to'namī̱vasya̭ śu̱ṣmiṇa̭: ||3||
cakri̱ryo viśvā̱ bhuva̭nā̱bhi sā̭sa̱hiścakri̭rde̱veṣvā duva̭: |
ā de̱veṣu̱ yata̭ta̱ ā su̱vīrya̱ ā śaṃsa̭ u̱ta nṛ̱ṇām ||4||
mā no̭ a̱gne'ma̭taye̱ māvīra̭tāyai rīradhaḥ |
māgotā̭yai sahasasputra̱ mā ni̱de'pa̱ dveṣā̱ṃsyā kṛ̭dhi ||5||
śa̱gdhi vāja̭sya subhaga pra̱jāva̱to'gnḙ bṛha̱to a̭dhva̱re |
saṃ rā̱yā bhūya̭sā sṛja mayo̱bhunā̱ tuvi̭dyumna̱ yaśa̭svatā ||6||
5 kato vaiśvāmitraḥ| agniḥ| triṣṭup|
sa̱mi̱dhyamā̭naḥ pratha̱mānu̱ dharmā̱ sama̱ktubhi̭rajyate vi̱śvavā̭raḥ |
śo̱ciṣkḙśo ghṛ̱tani̭rṇik pāva̱kaḥ sṷya̱jño a̱gnirya̱jathā̭ya de̱vān ||1||
yathāya̭jo ho̱trama̭gne pṛthi̱vyā yathā̭ di̱vo jā̭tavedaściki̱tvān |
e̱vānena̭ ha̱viṣā̭ yakṣi de̱vān ma̭nu̱ṣvad ya̱jñaṃ pra ti̭re̱mama̱dya ||2||
trīṇyāyṷ̄ṃṣi̱ tava̭ jātavedasti̱sra ā̱jānī̭ru̱ṣasa̭ste agne |
tābhi̭rde̱vānā̱mavo̭ yakṣi vi̱dvānathā̭ bhava̱ yaja̭mānāya̱ śaṃ yoḥ ||3||
a̱gniṃ sṷdī̱tiṃ su̱dṛśa̭ṃ gṛ̱ṇanto̭ nama̱syāma̱stveḍya̭ṃ jātavedaḥ |
tvāṃ dū̱tama̭ra̱tiṃ ha̭vya̱vāha̭ṃ de̱vā a̭kṛṇvanna̱mṛta̭sya̱ nābhi̭m ||4||
yastvaddhotā̱ pūrvo̭ agne̱ yajī̭yān dvi̱tā ca̱ sattā̭ sva̱dhayā̭ ca śa̱mbhuḥ |
tasyānu̱ dharma̱ pra ya̭jā ciki̱tvo'tha̭ no dhā adhva̱raṃ de̱vavī̭tau ||5||
5 kato vaiśvāmitraḥ| agniḥ| triṣṭup|
bhavā̭ no agne su̱manā̱ upḙtau̱ sakhḙva̱ sakhyḙ pi̱tarḙva sā̱dhuḥ |
pu̱ru̱druho̱ hi kṣi̱tayo̱ janā̭nā̱ṃ prati̭ pratī̱cīrda̭hatā̱darā̭tīḥ ||1||
tapo̱ ṣva̭gne̱ anta̭rā~ a̱mitrā̱n tapā̱ śaṃsa̱mara̭ruṣa̱: para̭sya |
tapo̭ vaso cikitā̱no a̱cittā̱n vi tḙ tiṣṭhantāma̱jarā̭ a̱yāsa̭: ||2||
i̱dhmenā̭gna i̱cchamā̭no ghṛ̱tena̭ ju̱homi̭ ha̱vyaṃ tara̭se̱ balā̭ya |
yāva̱dīśe̱ brahma̭ṇā̱ vanda̭māna i̱māṃ dhiya̭ṃ śata̱seyā̭ya de̱vīm ||3||
uccho̱ciṣā̭ sahasasputra stu̱to bṛ̱had vaya̭: śaśamā̱neṣṷ dhehi |
re̱vada̭gne vi̱śvāmi̭treṣu̱ śaṃ yorma̭rmṛ̱jmā tḙ ta̱nvaṃ1 bhūri̱ kṛtva̭: ||4||
kṛ̱dhi ratna̭ṃ susanita̱rdhanā̭nā̱ṃ sa gheda̭gne bhavasi̱ yat sami̭ddhaḥ |
sto̱turdṷro̱ṇe su̱bhaga̭sya re̱vat sṛ̱prā ka̱rasnā̭ dadhiṣe̱ vapṷ̄ṃṣi ||5||
5 gāthī kauśikaḥ| agniḥ| triṣṭup|
a̱gniṃ hotā̭ra̱ṃ pra vṛ̭ṇe mi̱yedhe̱ gṛtsa̭ṃ ka̱viṃ vi̭śva̱vida̱mamṷ̄ram |
sa no̭ yakṣad de̱vatā̭tā̱ yajī̭yān rā̱ye vājā̭ya vanate ma̱ghāni̭ ||1||
pra tḙ agne ha̱viṣma̭tīmiya̱rmyacchā̭ sudyu̱mnāṃ rā̱tinī̭ṃ ghṛ̱tācī̭m |
pra̱da̱kṣi̱ṇid de̱vatā̭timurā̱ṇaḥ saṃ rā̱tibhi̱rvasṷbhirya̱jñama̭śret ||2||
sa tejī̭yasā̱ mana̭sā̱ tvota̭ u̱ta śi̭kṣa svapa̱tyasya̭ śi̱kṣoḥ |
agnḙ rā̱yo nṛta̭masya̱ prabhṷ̄tau bhū̱yāma̭ te suṣṭu̱taya̭śca̱ vasva̭: ||3||
bhūrī̭ṇi̱ hi tve da̭dhi̱re anī̱kā 'gnḙ de̱vasya̱ yajya̭vo̱ janā̭saḥ |
sa ā va̭ha de̱vatā̭tiṃ yaviṣṭha̱ śardho̱ yada̱dya di̱vyaṃ yajā̭si ||4||
yat tvā̱ hotā̭rama̱naja̭n mi̱yedhḙ niṣā̱daya̭nto ya̱jathā̭ya de̱vāḥ |
sa tvaṃ no̭ agne'vi̱teha bo̱dhyadhi̱ śravā̭ṃsi dhehi nasta̱nūṣṷ ||5||
5 gāthī kauśikaḥ| agniḥ, 1, 5 viśve devāḥ| triṣṭup|
a̱gnimu̱ṣasa̭ma̱śvinā̭ dadhi̱krāṃ vyṷṣṭiṣu havate̱ vahni̭ru̱kthaiḥ |
su̱jyoti̭ṣo naḥ śṛṇvantu de̱vāḥ sa̱joṣa̭so adhva̱raṃ vā̭vaśā̱nāḥ ||1||
agne̱ trī te̱ vāji̭nā̱ trī ṣa̱dhasthā̭ ti̱srastḙ ji̱hvā ṛ̭tajāta pū̱rvīḥ |
ti̱sra ṷ te ta̱nvo̭ de̱vavā̭tā̱stābhi̭rnaḥ pāhi̱ giro̱ apra̭yucchan ||2||
agne̱ bhūrī̭ṇi̱ tava̭ jātavedo̱ deva̭ svadhāvo̱'mṛta̭sya̱ nāma̭ |
yāśca̭ mā̱yā mā̱yinā̭ṃ viśvaminva̱ tve pū̱rvīḥ sa̭ṃda̱dhuḥ pṛ̭ṣṭabandho ||3||
a̱gnirne̱tā bhaga̭ iva kṣitī̱nāṃ daivī̭nāṃ de̱va ṛ̭tu̱pā ṛ̱tāvā̭ |
sa vṛ̭tra̱hā sa̱nayo̭ vi̱śvavḙdā̱: parṣa̱d viśvāti̭ duri̱tā gṛ̱ṇanta̭m ||4||
da̱dhi̱krāma̱gnimu̱ṣasa̭ṃ ca de̱vīṃ bṛha̱spati̭ṃ savi̱tāra̭ṃ ca de̱vam |
a̱śvinā̭ mi̱trāvarṷṇā̱ bhaga̭ṃ ca̱ vasṷ̄n ru̱drā~ ā̭di̱tyā~ i̱ha hṷve ||5||
5 gāthī kauśikaḥ| agniḥ,| 1triṣṭup, 2-3 anuṣṭup, 4 virāḍ rūpā, 5 satobṛhatī|
i̱maṃ no̭ ya̱jñama̱mṛtḙṣu dhehī̱mā ha̱vyā jā̭tavedo juṣasva |
sto̱kānā̭magne̱ meda̭so ghṛ̱tasya̱ hota̱: prāśā̭na pratha̱mo ni̱ṣadya̭ ||1||
ghṛ̱tava̭ntaḥ pāvaka te sto̱kāḥ śco̭tanti̱ meda̭saḥ |
svadha̭rman de̱vavī̭taye̱ śreṣṭha̭ṃ no dhehi̱ vārya̭m ||2||
tubhya̭ṃ sto̱kā ghṛ̭ta̱ścuto'gne̱ viprā̭ya santya |
ṛṣi̱: śreṣṭha̱: sami̭dhyase ya̱jñasya̭ prāvi̱tā bha̭va ||3||
tubhya̭ṃ ścotantyadhrigo śacīvaḥ sto̱kāso̭ agne̱ meda̭so ghṛ̱tasya̭ |
ka̱vi̱śa̱sto bṛ̭ha̱tā bhā̱nunāgā̭ ha̱vyā jṷṣasva medhira ||4||
oji̭ṣṭhaṃ te madhya̱to meda̱ udbhṛ̭ta̱ṃ pra tḙ va̱yaṃ da̭dāmahe |
ścota̭nti te vaso sto̱kā adhi̭ tva̱ci prati̱ tān dḙva̱śo vi̭hi ||5||
5 gāthī kauśikaḥ| agniḥ, 4 purīṣyā agnayaḥ | triṣṭup, 4 anuṣṭup|
a̱yaṃ so a̱gniryasmi̱n tsoma̱mindra̭: su̱taṃ da̱dhe ja̱ṭharḙ vāvaśā̱naḥ |
sa̱ha̱sriṇa̱ṃ vāja̱matya̱ṃ na sapti̭ṃ sasa̱vān tsan tstṷ̄yase jātavedaḥ ||1||
agne̱ yat tḙ di̱vi varca̭: pṛthi̱vyāṃ yadoṣa̭dhīṣva̱psvā ya̭jatra |
yenā̱ntari̭kṣamu̱rvā̭ta̱tantha̭ tve̱ṣaḥ sa bhā̱nura̭rṇa̱vo nṛ̱cakṣā̭: ||2||
agnḙ di̱vo arṇa̱macchā̭ jigā̱syacchā̭ de̱vā~ ṷ̄ciṣe̱ dhiṣṇyā̱ ye |
yā ro̭ca̱ne pa̱rastā̱t sūrya̭sya̱ yāścā̱vastā̭dupa̱tiṣṭha̭nta̱ āpa̭: ||3||
pu̱rī̱ṣyā̭so a̱gnaya̭: prāva̱ṇebhi̭: sa̱joṣa̭saḥ |
ju̱ṣantā̭ṃ ya̱jñama̱druho̭'namī̱vā iṣo̭ ma̱hīḥ ||4||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvā 'gne̱ sā tḙ suma̱tirbhṷ̄tva̱sme ||5||
5 devaśravā devavātaśca bhāratau| agniḥ|triṣṭup, 3 satobṛhatī|
nirma̭thita̱: sudhi̭ta̱ ā sa̱dhasthe̱ yuvā̭ ka̱vira̭dhva̱rasya̭ praṇe̱tā |
jūrya̭tsva̱gnira̱jaro̱ vane̱ṣvatrā̭ dadhe a̱mṛta̭ṃ jā̱tavḙdāḥ ||1||
ama̭nthiṣṭā̱ṃ bhāra̭tā re̱vada̱gniṃ de̱vaśra̭vā de̱vavā̭taḥ su̱dakṣa̭m |
agne̱ vi pa̭śya bṛha̱tābhi rā̱yeṣāṃ no̭ ne̱tā bha̭vatā̱danu̱ dyūn ||2||
daśa̱ kṣipa̭: pū̱rvyaṃ sī̭majījana̱n tsujā̭taṃ mā̱tṛṣṷ pri̱yam |
a̱gniṃ stṷhi daivavā̱taṃ dḙvaśravo̱ yo janā̭nā̱masa̭d va̱śī ||3||
ni tvā̭ dadhe̱ vara̱ ā pṛ̭thi̱vyā iḻā̭yāspa̱de sṷdina̱tve ahnā̭m |
dṛ̱ṣadva̭tyā̱ṃ mānṷṣa āpa̱yāyā̱ṃ sara̭svatyāṃ re̱vada̭gne didīhi ||4||
iḻā̭magne puru̱daṃsa̭ṃ sa̱niṃ goḥ śa̭śvatta̱maṃ hava̭mānāya sādha |
syānna̭: sū̱nustana̭yo vi̱jāvāgne̱ sā tḙ suma̱tirbhṷ̄tva̱sme ||5||
5 gāthino viśvāmitraḥ| agniḥ| gāyatrī, 1 anuṣṭup |
agne̱ saha̭sva̱ pṛta̭nā a̱bhimā̭tī̱rapā̭sya | du̱ṣṭara̱stara̱nnarā̭tī̱rvarco̭ dhā ya̱jñavā̭hase ||1||
agna̭ i̱ḻā sami̭dhyase vī̱tiho̭tro̱ ama̭rtyaḥ | ju̱ṣasva̱ sū no̭ adhva̱ram ||2||
agnḙ dyu̱mnena̭ jāgṛve̱ saha̭saḥ sūnavāhuta | edaṃ ba̱rhiḥ sa̭do̱ mama̭ ||3||
agne̱ viśvḙbhira̱gnibhi̭rde̱vebhi̭rmahayā̱ gira̭: | ya̱jñeṣu̱ ya ṷ cā̱yava̭: ||4||
agne̱ dā dā̱śuṣḙ ra̱yiṃ vī̱rava̭nta̱ṃ parī̭ṇasam | śi̱śī̱hi na̭: sūnu̱mata̭: ||5||
5 gāthino viśvāmitraḥ| agniḥ, 4 agnīndrau| virāṭ|
agnḙ di̱vaḥ sū̱nura̭si̱ pracḙtā̱stanā̭ pṛthi̱vyā u̱ta vi̱śvavḙdāḥ |
ṛdha̭gde̱vā~ i̱ha ya̭jā cikitvaḥ ||1||
a̱gniḥ sa̭noti vī̱ryā̭ṇi vi̱dvān tsa̱noti̱ vāja̭ma̱mṛtā̭ya̱ bhūṣa̭n |
sa no̭ de̱vā~ eha va̭hā purukṣo ||2||
a̱gnirdyāvā̭pṛthi̱vī vi̱śvaja̭nye̱ ā bhā̭ti de̱vī a̱mṛte̱ amṷ̄raḥ |
kṣaya̱n vājai̭: puruśca̱ndro namo̭bhiḥ ||3||
agna̱ indra̭śca dā̱śuṣo̭ duro̱ṇe su̱tāva̭to ya̱jñami̱hopa̭ yātam |
ama̭rdhantā soma̱peyā̭ya devā ||4||
agnḙ a̱pāṃ sami̭dhyase duro̱ṇe nitya̭: sūno sahaso jātavedaḥ |
sa̱dhasthā̭ni ma̱haya̭māna ū̱tī ||5||
9 gāthino viśvāmitraḥ, 7 ātmā| 1-3 vaiśvānaro'gniḥ, 4-6 marutaḥ, 7-8 ātmā (agnirvā), 9 viśvāmitropadhyāyaḥ|1-6 jagatī, 7-9 triṣṭup|
vai̱śvā̱na̱raṃ mana̭sā̱gniṃ ni̱cāyyā̭ ha̱viṣma̭nto anuṣa̱tyaṃ sva̱rvida̭m |
su̱dānṷṃ de̱vaṃ ra̭thi̱raṃ va̭sū̱yavo̭ gī̱rbhī ra̱ṇvaṃ kṷśi̱kāso̭ havāmahe ||1||
taṃ śu̱bhrama̱gnimava̭se havāmahe vaiśvāna̱raṃ mā̭ta̱riśvā̭namu̱kthya̭m |
bṛha̱spati̱ṃ manṷṣo de̱vatā̭taye̱ vipra̱ṃ śrotā̭ra̱mati̭thiṃ raghu̱ṣyada̭m ||2||
aśvo̱ na kranda̱ñjani̭bhi̱: sami̭dhyate vaiśvāna̱raḥ kṷśi̱kebhi̭ryu̱geyṷge |
sa no̭ a̱gniḥ su̱vīrya̱ṃ svaśvya̱ṃ dadhā̭tu̱ ratna̭ma̱mṛtḙṣu̱ jāgṛ̭viḥ ||3||
pra ya̭ntu̱ vājā̱stavi̭ṣībhira̱gnaya̭: śu̱bhe sammi̭ślā̱: pṛṣa̭tīrayukṣata |
bṛ̱ha̱dukṣo̭ ma̱ruto̭ vi̱śvavḙdasa̱: pra vḙpayanti̱ parva̭tā̱~ adā̭bhyāḥ ||4||
a̱gni̱śriyo̭ ma̱ruto̭ vi̱śvakṛ̭ṣṭaya̱ ā tve̱ṣamu̱gramava̭ īmahe va̱yam |
te svā̱nino̭ ru̱driyā̭ va̱rṣani̭rṇijaḥ si̱ṃhā na he̱ṣakra̭tavaḥ su̱dāna̭vaḥ ||5||
vrāta̭ṃvrātaṃ ga̱ṇaṃga̭ṇaṃ suśa̱stibhi̭ra̱gnerbhāma̭ṃ ma̱rutā̱moja̭ īmahe |
pṛṣa̭daśvāso anava̱bhrarā̭dhaso̱ gantā̭ro ya̱jñaṃ vi̱dathḙṣu̱ dhīrā̭: ||6||
a̱gnira̭smi̱ janma̭nā jā̱tavḙdā ghṛ̱taṃ me̱ cakṣṷra̱mṛta̭ṃ ma ā̱san |
a̱rkastri̱dhātū̱ raja̭so vi̱māno'ja̭sro gha̱rmo ha̱vira̭smi̱ nāma̭ ||7||
tri̱bhiḥ pa̱vitrai̱rapṷpo̱ddhya1rkaṃ hṛ̱dā ma̱tiṃ jyoti̱ranṷ prajā̱nan |
varṣi̭ṣṭha̱ṃ ratna̭makṛta sva̱dhābhi̱rādid dyāvā̭pṛthi̱vī parya̭paśyat ||8||
śa̱tadhā̭ra̱mutsa̱makṣī̭yamāṇaṃ vipa̱ścita̭ṃ pi̱tara̱ṃ vaktvā̭nām |
me̱ḻiṃ mada̭ntaṃ pi̱troru̱pasthe̱ taṃ ro̭dasī pipṛtaṃ satya̱vāca̭m ||9||
15 gāthino viśvāmitraḥ| agniḥ, 1 ṛtavo vā| gāyatrī|
pra vo̱ vājā̭ a̱bhidya̭vo ha̱viṣma̭nto ghṛ̱tācyā̭ | de̱vāñji̭gāti sumna̱yuḥ ||1||
īḻḙ a̱gniṃ vi̭pa̱ścita̭ṃ gi̱rā ya̱jñasya̱ sādha̭nam | śru̱ṣṭī̱vāna̭ṃ dhi̱tāvā̭nam ||2||
agnḙ śa̱kema̭ te va̱yaṃ yama̭ṃ de̱vasya̭ vā̱jina̭: | ati̱ dveṣā̭ṃsi tarema ||3||
sa̱mi̱dhyamā̭no adhva̱re̱3'gniḥ pā̭va̱ka īḍya̭: | śo̱ciṣkḙśa̱stamī̭mahe ||4||
pṛ̱thu̱pājā̱ ama̭rtyo ghṛ̱tani̭rṇi̱k svā̭hutaḥ | a̱gnirya̱jñasya̭ havya̱vāṭ ||5||
taṃ sa̱bādho̭ ya̱tasrṷca i̱tthā dhi̱yā ya̱jñava̭ntaḥ | ā ca̭krura̱gnimū̱tayḙ ||6||
hotā̭ de̱vo ama̭rtyaḥ pu̱rastā̭deti mā̱yayā̭ | vi̱dathā̭ni praco̱daya̭n ||7||
vā̱jī vājḙṣu dhīyate'dhva̱reṣu̱ pra ṇī̭yate | vipro̭ ya̱jñasya̱ sādha̭naḥ ||8||
dhi̱yā ca̭kre̱ varḙṇyo bhū̱tānā̱ṃ garbha̱mā da̭dhe | dakṣa̭sya pi̱tara̱ṃ tanā̭ ||9||
ni tvā̭ dadhe̱ varḙṇya̱ṃ dakṣa̭sye̱ḻā sa̭haskṛta | agnḙ sudī̱timu̱śija̭m ||10||||
a̱gniṃ ya̱ntura̭ma̱ptura̭mṛ̱tasya̱ yogḙ va̱nuṣa̭: | viprā̱ vājai̱: sami̭ndhate ||11||||
ū̱rjo napā̭tamadhva̱re dī̭di̱vāṃsa̱mupa̱ dyavi̭ | a̱gnimī̭ḻe ka̱vikra̭tum ||12||
ī̱ḻenyo̭ nama̱sya̭sti̱rastamā̭ṃsi darśa̱taḥ | sama̱gniri̭dhyate̱ vṛṣā̭ ||13||
vṛṣo̭ a̱gniḥ sami̭dhya̱te'śvo̱ na dḙva̱vāha̭naḥ | taṃ ha̱viṣma̭nta īḻate ||14||
vṛṣa̭ṇaṃ tvā va̱yaṃ vṛ̭ṣa̱n vṛṣa̭ṇa̱: sami̭dhīmahi | agne̱ dīdya̭taṃ bṛ̱hat ||15||
6 gāthino viśvāmitraḥ| agniḥ|1-2, 6 gāyatrī, 3 uṣṇik, 4 triṣṭup, 5 jagatī|
agnḙ ju̱ṣasva̭ no ha̱viḥ pṷro̱ḻāśa̭ṃ jātavedaḥ | prā̱ta̱:sā̱ve dhi̭yāvaso ||1||
pu̱ro̱ḻā a̭gne paca̱tastubhya̭ṃ vā ghā̱ pari̭ṣkṛtaḥ | taṃ jṷṣasva yaviṣṭhya ||2||
agnḙ vī̱hi pṷro̱ḻāśa̱māhṷtaṃ ti̱roa̭hnyam | saha̭saḥ sū̱nura̭syadhva̱re hi̱taḥ ||3||
mādhya̭ṃdine̱ sava̭ne jātavedaḥ puro̱ḻāśa̭mi̱ha ka̭ve juṣasva |
agnḙ ya̱hvasya̱ tava̭ bhāga̱dheya̱ṃ na pra mi̭nanti vi̱dathḙṣu̱ dhīrā̭: ||4||
agnḙ tṛ̱tīye̱ sava̭ne̱ hi kāni̭ṣaḥ puro̱ḻāśa̭ṃ sahasaḥ sūna̱vāhṷtam |
athā̭ de̱veṣva̭dhva̱raṃ vi̭pa̱nyayā̱ dhā ratna̭vantama̱mṛtḙṣu̱ jāgṛ̭vim ||5||
agnḙ vṛdhā̱na āhṷtiṃ puro̱ḻāśa̭ṃ jātavedaḥ | ju̱ṣasva̭ ti̱roa̭hnyam ||6||
16 gāthino viśvāmitraḥ| agniḥ, 5 ṛtvijo vā| triṣṭup,  1, 4, 10, 12 anuṣṭup, 6, 11, 14, 15 jagatī|
astī̱dama̭dhi̱mantha̭na̱masti̭ pra̱jana̭naṃ kṛ̱tam |
e̱tāṃ vi̱śpatnī̱mā bha̭rā̱gniṃ ma̭nthāma pū̱rvathā̭ ||1||
a̱raṇyo̱rnihi̭to jā̱tavḙdā̱ garbha̭ iva̱ sudhi̭to ga̱rbhiṇī̭ṣu |
di̱vedi̭va̱ īḍyo̭ jāgṛ̱vadbhi̭rha̱viṣma̭dbhirmanu̱ṣyḙbhira̱gniḥ ||2||
u̱ttā̱nāyā̱mava̭ bharā ciki̱tvān tsa̱dyaḥ pravī̭tā̱ vṛṣa̭ṇaṃ jajāna |
a̱ru̱ṣastṷ̄po̱ ruśa̭dasya̱ pāja̱ iḻā̭yāspu̱tro va̱yunḙ'janiṣṭa ||3||
iḻā̭yāstvā pa̱de va̱yaṃ nābhā̭ pṛthi̱vyā adhi̭ |
jāta̭vedo̱ ni dhī̭ma̱hyagnḙ ha̱vyāya̱ voḻaha̭ve ||4||
mantha̭tā naraḥ ka̱vimadva̭yanta̱ṃ pracḙtasama̱mṛta̭ṃ su̱pratī̭kam |
ya̱jñasya̭ ke̱tuṃ pra̭tha̱maṃ pu̱rastā̭da̱gniṃ na̭ro janayatā su̱śeva̭m ||5||
yadī̱ mantha̭nti bā̱hubhi̱rvi ro̭ca̱te'śvo̱ na vā̱jya̭ru̱ṣo vane̱ṣvā |
ci̱tro na yāma̭nna̱śvino̱rani̭vṛta̱: pari̭ vṛṇa̱ktyaśma̭na̱stṛṇā̱ daha̭n ||6||
jā̱to a̱gnī ro̭cate̱ ceki̭tāno vā̱jī vipra̭: kaviśa̱staḥ su̱dānṷ: |
yaṃ de̱vāsa̱ īḍya̭ṃ viśva̱vida̭ṃ havya̱vāha̱mada̭dhuradhva̱reṣṷ ||7||
sīda̭ hota̱: sva ṷ lo̱ke ci̭ki̱tvān tsā̱dayā̭ ya̱jñaṃ sṷkṛ̱tasya̱ yonaṷ |
de̱vā̱vīrde̱vān ha̱viṣā̭ yajā̱syagnḙ bṛ̱had yaja̭māne̱ vayo̭ dhāḥ ||8||
kṛ̱ṇota̭ dhū̱maṃ vṛṣa̭ṇaṃ sakhā̱yo'srḙdhanta itana̱ vāja̱maccha̭ |
a̱yama̱gniḥ pṛ̭tanā̱ṣāṭ su̱vīro̱ yena̭ de̱vāso̱ asa̭hanta̱ dasyṷ̄n ||9||
a̱yaṃ te̱ yoni̭ṝ̱tviyo̱ yato̭ jā̱to aro̭cathāḥ |
taṃ jā̱nanna̭gna̱ ā sī̱dāthā̭ no vardhayā̱ gira̭: ||10||||
tanū̱napā̭ducyate̱ garbha̭ āsu̱ro narā̱śaṃso̭ bhavati̱ yad vi̱jāya̭te |
mā̱ta̱riśvā̱ yadami̭mīta mā̱tari̱ vāta̭sya̱ sargo̭ abhava̱t sarī̭maṇi ||11||||
su̱ni̱rmathā̱ nirma̭thitaḥ suni̱dhā nihi̭taḥ ka̱viḥ |
agnḙ svadhva̱rā kṛ̭ṇu de̱vān dḙvaya̱te ya̭ja ||12||
ajī̭jananna̱mṛta̱ṃ martyā̭so'sre̱māṇa̭ṃ ta̱raṇi̭ṃ vī̱ḻuja̭mbham |
daśa̱ svasā̭ro a̱gruva̭: samī̱cīḥ pumā̭ṃsaṃ jā̱tama̱bhi saṃ ra̭bhante ||13||
pra sa̱ptaho̭tā sana̱kāda̭rocata mā̱turu̱pasthe̱ yadaśo̭ca̱dūdha̭ni |
na ni mi̭ṣati su̱raṇo̭ di̱vedi̭ve̱ yadasṷrasya ja̱ṭharā̱dajā̭yata ||14||
a̱mi̱trā̱yudho̭ ma̱rutā̭miva pra̱yāḥ pra̭thama̱jā brahma̭ṇo̱ viśva̱mid vi̭duḥ |
dyu̱mnava̱d brahma̭ kuśi̱kāsa̱ eri̭ra̱ eka̭eko̱ damḙ a̱gniṃ samī̭dhire ||15||
yada̱dya tvā̭ praya̱ti ya̱jñe a̱smin hota̭ściki̱tvo'vṛ̭ṇīmahī̱ha |
dhru̱vama̭yā dhru̱vamu̱tāśa̭miṣṭhāḥ prajā̱nan vi̱dvā~ upa̭ yāhi̱ soma̭m ||16||
22 gāthino viśvāmitraḥ| indraḥ| triṣṭup|
i̱cchanti̭ tvā so̱myāsa̱: sakhā̭yaḥ su̱nvanti̱ soma̱ṃ dadha̭ti̱ prayā̭ṃsi |
titi̭kṣante a̱bhiśa̭sti̱ṃ janā̭nā̱mindra̱ tvadā kaśca̱na hi pra̭ke̱taḥ ||1||
na tḙ dū̱re pa̭ra̱mā ci̱d rajā̱ṃsyā tu pra yā̭hi harivo̱ hari̭bhyām |
sthi̱rāya̱ vṛṣṇe̱ sava̭nā kṛ̱temā yu̱ktā grāvā̭ṇaḥ samidhā̱ne a̱gnau ||2||
indra̭: su̱śipro̭ ma̱ghavā̱ tarṷtro ma̱hāvrā̭tastuvikū̱rmiṝghā̭vān |
yadu̱gro dhā bā̭dhi̱to martyḙṣu̱ kva1 tyā tḙ vṛṣabha vī̱ryā̭ṇi ||3||
tvaṃ hi ṣmā̭ cyā̱vaya̱nnacyṷtā̱nyeko̭ vṛ̱trā cara̭si̱ jighna̭mānaḥ |
tava̱ dyāvā̭pṛthi̱vī parva̭tā̱so'nṷ vra̱tāya̱ nimi̭teva tasthuḥ ||4||
u̱tābha̭ye puruhūta̱ śravo̭bhi̱reko̭ dṛ̱ḻahama̭vado vṛtra̱hā san |
i̱me ci̭dindra̱ roda̭sī apā̱re yat sa̭ṃgṛ̱bhṇā ma̭ghavan kā̱śirit tḙ ||5||
pra sū ta̭ indra pra̱vatā̱ hari̭bhyā̱ṃ pra te̱ vajra̭: pramṛ̱ṇannḙtu̱ śatrṷ̄n |
ja̱hi pra̭tī̱co a̭nū̱caḥ parā̭co̱ viśva̭ṃ sa̱tyaṃ kṛ̭ṇuhi vi̱ṣṭama̭stu ||6||
yasmai̱ dhāyu̱rada̭dhā̱ martyā̱yābha̭ktaṃ cid bhajate ge̱hyaṃ1 saḥ |
bha̱drā ta̭ indra suma̱tirghṛ̱tācī̭ sa̱hasra̭dānā puruhūta rā̱tiḥ ||7||
sa̱hadā̭nuṃ puruhūta kṣi̱yanta̭maha̱stami̭ndra̱ saṃ pi̭ṇa̱kkuṇā̭rum |
a̱bhi vṛ̱traṃ vardha̭māna̱ṃ piyā̭ruma̱pāda̭mindra ta̱vasā̭ jaghantha ||8||
ni sā̭ma̱nāmi̭ṣi̱rāmi̭ndra̱ bhūmi̭ṃ ma̱hīma̭pā̱rāṃ sada̭ne sasattha |
asta̭bhnā̱d dyāṃ vṛ̭ṣa̱bho a̱ntari̭kṣa̱marṣa̱ntvāpa̱stvaye̱ha prasṷ̄tāḥ ||9||
a̱lā̱tṛ̱ṇo va̱la i̭ndra vra̱jo goḥ pu̱rā hanto̱rbhaya̭māno̱ vyā̭ra |
su̱gān pa̱tho a̭kṛṇonni̱raje̱ gāḥ prāva̱n vāṇī̭: puruhū̱taṃ dhama̭ntīḥ ||10||||
eko̱ dve vasṷmatī samī̱cī indra̱ ā pa̭prau pṛthi̱vīmu̱ta dyām |
u̱tāntari̭kṣāda̱bhi na̭: samī̱ka i̱ṣo ra̱thīḥ sa̱yuja̭: śūra̱ vājā̭n ||11||||
diśa̱: sūryo̱ na mi̭nāti̱ pradi̭ṣṭā di̱vedi̭ve̱ harya̭śvaprasūtāḥ |
saṃ yadāna̱ḻadhva̭na̱ ādidaśvai̭rvi̱moca̭naṃ kṛṇute̱ tattva̭sya ||12||
didṛ̭kṣanta u̱ṣaso̱ yāma̭nna̱ktorvi̱vasva̭tyā̱ mahi̭ ci̱tramanī̭kam |
viśvḙ jānanti mahi̱nā yadāgā̱dindra̭sya̱ karma̱ sukṛ̭tā pu̱rūṇi̭ ||13||
mahi̱ jyoti̱rnihi̭taṃ va̱kṣaṇā̭svā̱mā pa̱kvaṃ ca̭rati̱ bibhra̭tī̱ gauḥ |
viśva̱ṃ svādma̱ sambhṛ̭tamu̱sriyā̭yā̱ṃ yat sī̱mindro̱ ada̭dhā̱d bhoja̭nāya ||14||
indra̱ dṛhya̭ yāmako̱śā a̭bhūvan ya̱jñāya̭ śikṣa gṛṇa̱te sakhi̭bhyaḥ |
 du̱rmā̱yavo̭ du̱revā̱ martyā̭so niṣa̱ṅgiṇo̭ ri̱pavo̱ hantvā̭saḥ ||15||
saṃ ghoṣa̭: śṛṇve'va̱maira̱mitrai̭rja̱hī nyḙṣva̱śani̱ṃ tapi̭ṣṭhām |
vṛ̱ścema̱dhastā̱d vi rṷjā̱ saha̭sva ja̱hi rakṣo̭ maghavan ra̱ndhaya̭sva ||16||
ud vṛ̭ha̱ rakṣa̭: sa̱hamṷ̄lamindra vṛ̱ścā madhya̱ṃ pratyagra̭ṃ śṛṇīhi |
ā kīva̭taḥ sala̱lūka̭ṃ cakartha brahma̱dviṣe̱ tapṷṣiṃ he̱tima̭sya ||17||
sva̱stayḙ vā̱jibhi̭śca praṇeta̱: saṃ yanma̱hīriṣa̭ ā̱satsi̭ pū̱rvīḥ |
rā̱yo va̱ntāro̭ bṛha̱taḥ syā̭mā̱sme a̭stu̱ bhaga̭ indra pra̱jāvā̭n ||18||
ā no̭ bhara̱ bhaga̭mindra dyu̱manta̱ṃ ni tḙ de̱ṣṇasya̭ dhīmahi prare̱ke |
ū̱rva i̭va paprathe̱ kāmo̭ a̱sme tamā pṛ̭ṇa vasupate̱ vasṷ̄nām ||19||
i̱maṃ kāma̭ṃ mandayā̱ gobhi̱raśvai̭śca̱ndrava̭tā̱ rādha̭sā pa̱pratha̭śca |
sva̱ryavo̭ ma̱tibhi̱stubhya̱ṃ viprā̱ indrā̭ya̱ vāha̭: kuśi̱kāso̭ akran ||20||||
ā no̭ go̱trā da̭rdṛhi gopate̱ gāḥ sama̱smabhya̭ṃ sa̱nayo̭ yantu̱ vājā̭: |
di̱vakṣā̭ asi vṛṣabha sa̱tyaśṷṣmo̱'smabhya̱ṃ su ma̭ghavan bodhi go̱dāḥ ||21||||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||22||||
22 kuśika aiṣīrathiḥ, gāthino viśvāmitro vā| indraḥ| triṣṭup|
śāsa̱d vahni̭rduhi̱turna̱ptya̭ṃ gād vi̱dvā~ ṛ̱tasya̱ dīdhi̭tiṃ sapa̱ryan |
pi̱tā yatra̭ duhi̱tuḥ seka̭mṛ̱ñjan tsaṃ śa̱gmyḙna̱ mana̭sā dadha̱nve ||1||
na jā̱maye̱ tānvo̭ ri̱kthamā̭raik ca̱kāra̱ garbha̭ṃ sani̱turni̱dhāna̭m |
yadī̭ mā̱taro̭ ja̱naya̭nta̱ vahni̭ma̱nyaḥ ka̱rtā su̱kṛto̭ra̱nya ṛ̱ndhan ||2||
a̱gnirja̭jñe ju̱hvā̱3 reja̭māno ma̱haspu̱trā~ a̭ru̱ṣasya̭ pra̱yakṣḙ |
ma̱hān garbho̱ mahyā jā̱tamḙṣāṃ ma̱hī pra̱vṛddharya̭śvasya ya̱jñaiḥ ||3||
a̱bhi jaitrī̭rasacanta spṛdhā̱naṃ mahi̱ jyoti̱stama̭so̱ nira̭jānan |
taṃ jā̭na̱tīḥ pratyudā̭yannu̱ṣāsa̱: pati̱rgavā̭mabhava̱deka̱ indra̭: ||4||
vī̱ḻau sa̱tīra̱bhi dhīrā̭ atṛndan prā̱cāhi̭nva̱n mana̭sā sa̱pta viprā̭: |
viśvā̭mavindan pa̱thyā̭mṛ̱tasya̭ prajā̱nannittā nama̱sā vi̭veśa ||5||
vi̱dad yadī̭ sa̱ramā̭ ru̱gṇamadre̱rmahi̱ pātha̭: pū̱rvyaṃ sa̱dhrya̭kkaḥ |
agra̭ṃ nayat su̱padyakṣa̭rāṇā̱macchā̱ rava̭ṃ pratha̱mā jā̭na̱tī gā̭t ||6||
aga̭cchadu̱ vipra̭tamaḥ sakhī̱yannasṷ̄dayat su̱kṛte̱ garbha̱madri̭: |
sa̱sāna̱ maryo̱ yuva̭bhirmakha̱syannathā̭bhava̱daṅgi̭rāḥ sa̱dyo arca̭n ||7||
sa̱taḥsa̭taḥ prati̱māna̭ṃ puro̱bhūrviśvā̭ veda̱ jani̭mā̱ hanti̱ śuṣṇa̭m |
pra ṇo̭ di̱vaḥ pa̭da̱vīrga̱vyurarca̱n tsakhā̱ sakhī̭~ramuñca̱nnira̭va̱dyāt ||8||
ni ga̭vya̱tā mana̭sā sedura̱rkaiḥ kṛ̭ṇvā̱nāso̭ amṛta̱tvāya̭ gā̱tum |
i̱daṃ ci̱nnu sada̭na̱ṃ bhūryḙṣā̱ṃ yena̱ māsā̱~ asi̭ṣāsannṛ̱tena̭ ||9||
sa̱mpaśya̭mānā amadanna̱bhi svaṃ paya̭: pra̱tnasya̱ reta̭so̱ dughā̭nāḥ |
vi roda̭sī atapa̱d ghoṣa̭ eṣāṃ jā̱te ni̱ḥṣṭhāmada̭dhu̱rgoṣṷ vī̱rān ||10||||
sa jā̱tebhi̭rvṛtra̱hā sedṷ ha̱vyairudu̱sriyā̭ asṛja̱dindro̭ a̱rkaiḥ |
u̱rū̱cya̭smai ghṛ̱tava̱d bhara̭ntī̱ madhu̱ svādma̭ duduhe̱ jenyā̱ gauḥ ||11||||
pi̱tre ci̭ccakru̱: sada̭na̱ṃ sama̭smai̱ mahi̱ tviṣī̭mat su̱kṛto̱ vi hi khyan |
vi̱ṣka̱bhnanta̱: skambha̭nenā̱ jani̭trī̱ āsī̭nā ū̱rdhvaṃ ra̭bha̱saṃ vi mi̭nvan ||12||
ma̱hī yadi̭ dhi̱ṣaṇā̭ śi̱śnathe̱ dhāt sa̭dyo̱vṛdha̭ṃ vi̱bhvaṃ1 roda̭syoḥ |
giro̱ yasmi̭nnanava̱dyāḥ sa̭mī̱cīrviśvā̱ indrā̭ya̱ tavi̭ṣī̱ranṷttāḥ ||13||
mahyā tḙ sa̱khyaṃ va̭śmi śa̱ktīrā vṛ̭tra̱ghne ni̱yuto̭ yanti pū̱rvīḥ |
mahi̭ sto̱tramava̱ āga̭nma sū̱rera̱smāka̱ṃ su ma̭ghavan bodhi go̱pāḥ ||14||
mahi̱ kṣetra̭ṃ pu̱ru śca̱ndraṃ vi̭vi̱dvānādit sakhi̭bhyaśca̱ratha̱ṃ samai̭rat |
indro̱ nṛbhi̭rajana̱d dīdyā̭naḥ sā̱kaṃ sūrya̭mu̱ṣasa̭ṃ gā̱tuma̱gnim ||15||
a̱paści̭de̱ṣa vi̱bhvo̱3 damṷ̄nā̱: pra sa̱dhrīcī̭rasṛjad vi̱śvaśca̭ndrāḥ |
madhva̭: punā̱nāḥ ka̱vibhi̭: pa̱vitrai̱rdyubhi̭rhinvantya̱ktubhi̱rdhanṷtrīḥ ||16||
anṷ kṛ̱ṣṇe vasṷdhitī jihāte u̱bhe sūrya̭sya ma̱ṃhanā̱ yaja̭tre |
pari̱ yat tḙ mahi̱māna̭ṃ vṛ̱jadhyai̱ sakhā̭ya indra̱ kāmyā̭ ṛji̱pyāḥ ||17||
pati̭rbhava vṛtrahan tsū̱nṛtā̭nāṃ gi̱rāṃ vi̱śvāyṷrvṛṣa̱bho va̭yo̱dhāḥ |
ā no̭ gahi sa̱khyebhi̭: śi̱vebhi̭rma̱hān ma̱hībhi̭rū̱tibhi̭: sara̱ṇyan ||18||
tama̭ṅgira̱svannama̭sā sapa̱ryan navya̭ṃ kṛṇomi̱ sanya̭se purā̱jām |
druho̱ vi yā̭hi bahu̱lā adḙvī̱: sva̭śca no maghavan tsā̱tayḙ dhāḥ ||19||
miha̭: pāva̱kāḥ prata̭tā abhūvan tsva̱sti na̭: pipṛhi pā̱ramā̭sām |
indra̱ tvaṃ ra̭thi̱raḥ pā̭hi no ri̱ṣo ma̱kṣūma̭kṣū kṛṇuhi go̱jito̭ naḥ ||20||||
adḙdiṣṭa vṛtra̱hā gopa̭ti̱rgā a̱ntaḥ kṛ̱ṣṇā~ a̭ru̱ṣairdhāma̭bhirgāt |
pra sū̱nṛtā̭ di̱śamā̭na ṛ̱tena̱ dura̭śca̱ viśvā̭ avṛṇo̱dapa̱ svāḥ ||21||||
śu̱naṃ hṷvema ma̱ghavā̭na̱mindra̭ma̱sminbha bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||22||||
17 gāthino viśvāmitraḥ| indraḥ| triṣṭup |
indra̱ soma̭ṃ somapate̱ pibe̱maṃ mādhya̭ṃdina̱ṃ sava̭na̱ṃ cāru̱ yat te̱ |
 pra̱pruthyā̱ śiprḙ maghavannṛjīṣin vi̱mucyā̱ harī̭ i̱ha mā̭dayasva ||1||
gavā̭śiraṃ ma̱nthina̭mindra śu̱kraṃ pibā̱ soma̭ṃ rari̱mā te̱ madā̭ya |
bra̱hma̱kṛtā̱ mārṷtenā ga̱ṇena̭ sa̱joṣā̭ ru̱draistṛ̱padā vṛ̭ṣasva ||2||
ye te̱ śuṣma̱ṃ ye tavi̭ṣī̱mava̭rdha̱nnarca̭nta indra ma̱ruta̭sta̱ oja̭: |
mādhya̭ṃdine̱ sava̭ne vajrahasta̱ pibā̭ ru̱drebhi̱: saga̭ṇaḥ suśipra ||3||
ta innva̭sya̱ madhṷmad vivipra̱ indra̭sya̱ śardho̭ ma̱ruto̱ ya āsa̭n |
yebhi̭rvṛ̱trasyḙṣi̱to vi̱vedā̭ma̱rmaṇo̱ manya̭mānasya̱ marma̭ 4||
ma̱nu̱ṣvadi̭ndra̱ sava̭naṃ juṣā̱ṇaḥ pibā̱ soma̱ṃ śaśva̭te vī̱ryā̭ya |
sa ā va̭vṛtsva haryaśva ya̱jñaiḥ sa̭ra̱ṇyubhi̭ra̱po arṇā̭ sisarṣi 5||
tvama̱po yaddha̭ vṛ̱traṃ ja̭gha̱nvā~ atyā̭~ iva̱ prāsṛ̭ja̱: sarta̱vājau |
śayā̭namindra̱ cara̭tā va̱dhena̭ vavri̱vāṃsa̱ṃ pari̭ de̱vīradḙvam ||6||
yajā̭ma̱ innama̭sā vṛ̱ddhamindra̭ṃ bṛ̱hanta̭mṛ̱ṣvama̱jara̱ṃ yuvā̭nam |
yasya̭ pri̱ye ma̱matṷrya̱jñiya̭sya̱ na roda̭sī mahi̱māna̭ṃ ma̱mātḙ ||7||
indra̭sya̱ karma̱ sukṛ̭tā pu̱rūṇi̭ vra̱tāni̭ de̱vā na mi̭nanti̱ viśvḙ |
dā̱dhāra̱ yaḥ pṛ̭thi̱vīṃ dyāmu̱temāṃ ja̱jāna̱ sūrya̭mu̱ṣasa̭ṃ su̱daṃsā̭: ||8||
adro̭gha sa̱tyaṃ tava̱ tanma̭hi̱tvaṃ sa̱dyo yajjā̱to api̭bo ha̱ soma̭m |
na dyāva̭ indra ta̱vasa̭sta̱ ojo̱ nāhā̱ na māsā̭: śa̱rado̭ varanta ||9||
tvaṃ sa̱dyo a̭pibo jā̱ta i̭ndra̱ madā̭ya̱ soma̭ṃ para̱me vyo̭man |
yaddha̱ dyāvā̭pṛthi̱vī āvi̭veśī̱rathā̭bhavaḥ pū̱rvyaḥ kā̱rudhā̭yāḥ ||10||||
aha̱nnahi̭ṃ pari̱śayā̭na̱marṇa̭ ojā̱yamā̭naṃ tuvijāta̱ tavyā̭n |
na tḙ mahi̱tvamanṷ bhū̱dadha̱ dyauryada̱nyayā̭ sphi̱gyā̱3 kṣāmava̭sthāḥ ||11||||
ya̱jño hi ta̭ indra̱ vardha̭no̱ bhūdu̱ta pri̱yaḥ su̱taso̭mo mi̱yedha̭: |
ya̱jñena̭ ya̱jñama̭va ya̱jñiya̱: san ya̱jñaste̱ vajra̭mahi̱hatya̭ āvat ||12||
ya̱jñenendra̱mava̱sā ca̭kre a̱rvāgaina̭ṃ su̱mnāya̱ navya̭se vavṛtyām |
yaḥ stomḙbhirvāvṛ̱dhe pū̱rvyebhi̱ryo ma̭dhya̱mebhi̭ru̱ta nūta̭nebhiḥ ||13||
vi̱veṣa̱ yanmā̭ dhi̱ṣaṇā̭ ja̱jāna̱ stavai̭ pu̱rā pāryā̱dindra̱mahna̭: |
aṃha̭so̱ yatra̭ pī̱para̱d yathā̭ no nā̱veva̱ yānta̭mu̱bhayḙ havante ||14||
āpṷ̄rṇo asya ka̱laśa̱: svāhā̱ sektḙva̱ kośa̭ṃ sisice̱ piba̭dhyai |
samṷ pri̱yā āva̭vṛtra̱n madā̭ya pradakṣi̱ṇida̱bhi somā̭sa̱ indra̭m ||15||
na tvā̭ gabhī̱raḥ pṷruhūta̱ sindhu̱rnādra̭ya̱: pari̱ ṣanto̭ varanta |
i̱tthā sakhi̭bhya iṣi̱to yadi̱ndrā ''dṛ̱ḻahaṃ ci̱darṷjo̱ gavya̭mū̱rvam ||16||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||17||
13 gāthino viśvāmitraḥ, 4, 6, 8, 10 nadyaḥ ṛṣikāḥ| nadyaḥ, 4, 8, 10 viśvāmitraḥ, 6, 7 indraḥ| triṣṭup, 13 anuṣṭup |
pra parva̭tānāmuśa̱tī u̱pasthā̱daśvḙ iva̱ viṣi̭te̱ hāsa̭māne |
gāvḙva śu̱bhre mā̱tarā̭ rihā̱ṇe vipā̭ṭ chutu̱drī paya̭sā javete ||1||
indrḙṣite prasa̱vaṃ bhikṣa̭māṇe̱ acchā̭ samu̱draṃ ra̱thyḙva yāthaḥ |
sa̱mā̱rā̱ṇe ū̱rmibhi̱: pinva̭māne a̱nyā vā̭ma̱nyāmapyḙti śubhre ||2||
acchā̱ sindhṷṃ mā̱tṛta̭māmayāsa̱ṃ vipā̭śamu̱rvīṃ su̱bhagā̭maganma |
va̱tsami̭va mā̱tarā̭ saṃrihā̱ṇe sa̭mā̱naṃ yoni̱manṷ sa̱ṃcara̭ntī ||3||
e̱nā va̱yaṃ paya̭sā̱ pinva̭mānā̱ anu̱ yoni̭ṃ de̱vakṛ̭ta̱ṃ cara̭ntīḥ |
na varta̭ve prasa̱vaḥ sarga̭taktaḥ ki̱ṃyurvipro̭ na̱dyo̭ johavīti ||4||
rama̭dhvaṃ me̱ vaca̭se so̱myāya̱ ṛtā̭varī̱rupa̭ muhū̱rtamevai̭: |
pra sindhu̱macchā̭ bṛha̱tī ma̭nī̱ṣā 'va̱syura̭hve kuśi̱kasya̭ sū̱nuḥ ||5||
indro̭ a̱smā~ a̭rada̱d vajra̭bāhu̱rapā̭han vṛ̱traṃ pa̭ri̱dhiṃ na̱dīnā̭m |
de̱vo̭'nayat savi̱tā sṷpā̱ṇistasya̭ va̱yaṃ pra̭sa̱ve yā̭ma u̱rvīḥ ||6||
pra̱vācya̭ṃ śaśva̱dhā vī̱ryaṃ1 tadindra̭sya̱ karma̱ yadahi̭ṃ vivṛ̱ścat |
vi vajrḙṇa pari̱ṣado̭ jaghā̱nā''ya̱nnāpo'ya̭nami̱cchamā̭nāḥ ||7||
e̱tad vaco̭ jarita̱rmāpi̭ mṛṣṭhā̱ ā yat te̱ ghoṣā̱nutta̭rā yu̱gāni̭ |
u̱ktheṣṷ kāro̱ prati̭ no juṣasva̱ mā no̱ ni ka̭: puruṣa̱trā nama̭ste ||8||
o ṣu sva̭sāraḥ kā̱ravḙ śṛṇota ya̱yau vo̭ dū̱rādana̭sā̱ rathḙna |
ni ṣū na̭madhva̱ṃ bhava̭tā supā̱rā a̭dhoa̱kṣāḥ si̭ndhavaḥ sro̱tyābhi̭: ||9||
ā tḙ kāro śṛṇavāmā̱ vacā̭ṃsi ya̱yātha̭ dū̱rādana̭sā̱ rathḙna |
ni tḙ naṃsai pīpyā̱neva̱ yoṣā̱ maryā̭yeva ka̱nyā̭ śaśva̱cai tḙ ||10||||
yada̱ṅga tvā̭ bhara̱tāḥ sa̱ṃtarḙyurga̱vyan grāma̭ iṣi̱ta indra̭jūtaḥ |
arṣā̱daha̭ prasa̱vaḥ sarga̭takta̱ ā vo̭ vṛṇe suma̱tiṃ ya̱jñiyā̭nām ||11||||
atā̭riṣurbhara̱tā ga̱vyava̱: samabha̭kta̱ vipra̭: suma̱tiṃ na̱dīnā̭m |
pra pi̭nvadhvami̱ṣaya̭ntīḥ su̱rādhā̱ ā va̱kṣaṇā̭: pṛ̱ṇadhva̭ṃ yā̱ta śībha̭m ||12||
ud va̭ ū̱rmiḥ śamyā̭ ha̱ntvāpo̱ yoktrā̭ṇi muñcata |
mādṷṣkṛtau̱ vyḙnasā̱ 'ghnyau śūna̱māra̭tām ||13||
11 gāthino viśvāmitraḥ| indraḥ| triṣṭup|
indra̭: pū̱rbhidāti̭ra̱ddāsa̭ma̱rkairvi̱dadva̭su̱rdaya̭māno̱ vi śatrṷ̄n |
brahma̭jūtasta̱nvā̭ vāvṛdhā̱no bhūri̭dātra̱ āpṛ̭ṇa̱droda̭sī u̱bhe ||1||
ma̱khasya̭ te tavi̱ṣasya̱ pra jū̱timiya̭rmi̱ vāca̭ma̱mṛtā̭ya̱ bhūṣa̭n |
indra̭ kṣitī̱nāma̭si̱ mānṷṣīṇāṃ vi̱śāṃ daivī̭nāmu̱ta pṷ̄rva̱yāvā̭ ||2||
indro̭ vṛ̱trama̭vṛṇo̱cchardha̭nīti̱: pra mā̱yinā̭maminā̱d varpa̭ṇītiḥ |
aha̱n vya̭ṃsamu̱śadha̱gvanḙṣvā̱virdhenā̭ akṛṇod rā̱myāṇā̭m ||3||
indra̭: sva̱rṣā ja̱naya̱nnahā̭ni ji̱gāyo̱śigbhi̱: pṛta̭nā abhi̱ṣṭiḥ |
prāro̭caya̱nmana̭ve ke̱tumahnā̱mavi̭nda̱jjyoti̭rbṛha̱te raṇā̭ya ||4||
indra̱stujo̭ ba̱rhaṇā̱ ā vi̭veśa nṛ̱vad dadhā̭no̱ naryā̭ pu̱rūṇi̭ |
acḙtaya̱d dhiya̭ i̱mā ja̭ri̱tre premaṃ varṇa̭matiracchu̱kramā̭sām ||5||
ma̱ho ma̱hāni̭ panayantya̱syendra̭sya̱ karma̱ sukṛ̭tā pu̱rūṇi̭ |
vṛ̱janḙna vṛji̱nān tsaṃ pi̭peṣa mā̱yābhi̱rdasyṷ̄~ra̱bhibhṷ̄tyojāḥ ||6||
yu̱dhendro̭ ma̱hnā vari̭vaścakāra de̱vebhya̱: satpa̭tiścarṣaṇi̱prāḥ |
vi̱vasva̭ta̱: sada̭ne asya̱ tāni̱ viprā̭ u̱kthebhi̭: ka̱vayo̭ gṛṇanti ||7||
sa̱trā̱sāha̱ṃ varḙṇyaṃ saho̱dāṃ sa̭sa̱vāṃsa̱ṃ sva̭ra̱paśca̭ de̱vīḥ |
sa̱sāna̱ yaḥ pṛ̭thi̱vīṃ dyāmu̱temāmindra̭ṃ mada̱ntyanu̱ dhīra̭ṇāsaḥ ||8||
sa̱sānātyā̭~ u̱ta sūrya̭ṃ sasā̱nendra̭: sasāna puru̱bhoja̭sa̱ṃ gām |
hi̱ra̱ṇyaya̭mu̱ta bhoga̭ṃ sasāna ha̱tvī dasyū̱nprārya̱ṃ varṇa̭māvat ||9||
indra̱ oṣa̭dhīrasano̱dahā̭ni̱ vana̱spatī̭~rasanoda̱ntari̭kṣam |
bi̱bheda̭ va̱laṃ nṷnu̱de vivā̱co'thā̭bhavad dami̱tābhikra̭tūnām ||10||||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||11||||
11 gāthino viśvāmitraḥ| indraḥ| triṣṭup|
tiṣṭhā̱ harī̱ ratha̱ ā yu̱jyamā̭nā yā̱hi vā̱yurna ni̱yuto̭ no̱ accha̭ |
pibā̱syandho̭ a̱bhisṛ̭ṣṭo a̱sme indra̱ svāhā̭ rari̱mā te̱ madā̭ya ||1||
upā̭ji̱rā pṷruhū̱tāya̱ saptī̱ harī̱ ratha̭sya dhū̱rṣvā yṷnajmi |
dra̱vad yathā̱ sambhṛ̭taṃ vi̱śvata̭ści̱dupe̱maṃ ya̱jñamā va̭hāta̱ indra̭m ||2||
upo̭ nayasva̱ vṛṣa̭ṇā tapu̱ṣpotema̭va̱ tvaṃ vṛ̭ṣabha svadhāvaḥ |
grasḙtā̱maśvā̱ vi mṷce̱ha śoṇā̭ di̱vedi̭ve sa̱dṛśī̭raddhi dhā̱nāḥ ||3||
brahma̭ṇā te brahma̱yujā̭ yunajmi̱ harī̱ sakhā̭yā sadha̱māda̭ ā̱śū |
sthi̱raṃ ratha̭ṃ su̱khami̭ndrādhi̱tiṣṭha̭n prajā̱nan vi̱dvā~ upa̭ yāhi̱ soma̭m ||4||
mā te̱ harī̱ vṛṣa̭ṇā vī̱tapṛ̭ṣṭhā̱ ni rī̭rama̱nyaja̭mānāso a̱nye |
a̱tyāyā̭hi̱ śaśva̭to va̱yaṃ te'ra̭ṃ su̱tebhi̭: kṛṇavāma̱ somai̭: ||5||
tavā̱yaṃ soma̱stvamehya̱rvāṅ śa̭śvatta̱maṃ su̱manā̭ a̱sya pā̭hi |
a̱smin ya̱jñe ba̱rhiṣyā ni̱ṣadyā̭ dadhi̱ṣvemaṃ ja̱ṭhara̱ indṷmindra ||6||
stī̱rṇaṃ tḙ ba̱rhiḥ su̱ta i̭ndra̱ soma̭: kṛ̱tā dhā̱nā atta̭ve te̱ hari̭bhyām |
tado̭kase puru̱śākā̭ya̱ vṛṣṇḙ ma̱rutva̭te̱ tubhya̭ṃ rā̱tā ha̱vīṃṣi̭ ||7||
i̱maṃ nara̱: parva̭tā̱stubhya̱māpa̱: sami̭ndra̱ gobhi̱rmadhṷmantamakran |
tasyā̱gatyā̭ su̱manā̭ ṛṣva pāhi prajā̱nan vi̱dvānpa̱thyā̱3 anu̱ svāḥ ||8||
yā~ ābha̭jo ma̱ruta̭ indra̱ some̱ ye tvāmava̭rdha̱nnabha̭van ga̱ṇastḙ |
tebhi̭re̱taṃ sa̱joṣā̭ vāvaśā̱no̱3'gneḥ pi̭ba ji̱hvayā̱ soma̭mindra ||9||
indra̱ piba̭ sva̱dhayā̭ cit su̱tasyā̱'gnervā̭ pāhi ji̱hvayā̭ yajatra |
a̱dhva̱ryorvā̱ praya̭taṃ śakra̱ hastā̱ddhotṷrvā ya̱jñaṃ ha̱viṣo̭ juṣasva ||10||||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||11||||
11 gāthino viśvāmitraḥ, 10 ghora āṅgirasaḥ| indraḥ| triṣṭup|
i̱māmū̱ ṣu prabhṛ̭tiṃ sā̱tayḙ dhā̱: śaśva̭cchaśvadū̱tibhi̱ryāda̭mānaḥ |
su̱tesṷte vāvṛdhe̱ vardha̭nebhi̱ryaḥ karma̭bhirma̱hadbhi̱: suśrṷto̱ bhūt ||1||
indrā̭ya̱ somā̭: pra̱divo̱ vidā̭nā ṛ̱bhuryebhi̱rvṛṣa̭parvā̱ vihā̭yāḥ |
pra̱ya̱myamā̭nā̱n prati̱ ṣū gṛ̭bhā̱yendra̱ piba̱ vṛṣa̭dhūtasya̱ vṛṣṇa̭: ||2||
pibā̱ vardha̭sva̱ tava̭ ghā su̱tāsa̱ indra̱ somā̭saḥ pratha̱mā u̱teme |
yathāpi̭baḥ pū̱rvyā~ i̭ndra̱ somā̭~ e̱vā pā̭hi̱ panyo̭ a̱dyā navī̭yān ||3||
ma̱hā~ ama̭tro vṛ̱janḙ vira̱pśyu1 graṃ śava̭: patyate dhṛ̱ṣṇvoja̭: |
nāha̭ vivyāca pṛthi̱vī ca̱naina̱ṃ yat somā̭so̱ harya̭śva̱mama̭ndan ||4||
ma̱hā~ u̱gro vā̭vṛdhe vī̱ryā̭ya sa̱māca̭kre vṛṣa̱bhaḥ kāvyḙna |
indro̱ bhago̭ vāja̱dā a̭sya̱ gāva̱: pra jā̭yante̱ dakṣi̭ṇā asya pū̱rvīḥ ||5||
pra yat sindha̭vaḥ prasa̱vaṃ yathāya̱nnāpa̭: samu̱draṃ ra̱thyḙva jagmuḥ |
ata̭ści̱dindra̱: sada̭so̱ varī̭yā̱n yadī̱ṃ soma̭: pṛ̱ṇati̭ du̱gdho a̱ṃśuḥ ||6||
sa̱mu̱dreṇa̱ sindha̭vo̱ yāda̭mānā̱ indrā̭ya̱ soma̱ṃ suṣṷta̱ṃ bhara̭ntaḥ |
a̱ṃśuṃ dṷhanti ha̱stino̭ bha̱ritrai̱rmadhva̭: punanti̱ dhāra̭yā pa̱vitrai̭: ||7||
hra̱dā i̭va ku̱kṣaya̭: soma̱dhānā̱: samī̭ vivyāca̱ sava̭nā pu̱rūṇi̭ |
annā̱ yadindra̭: pratha̱mā vyāśa̭ vṛ̱traṃ ja̭gha̱nvā~ a̭vṛṇīta̱ soma̭m ||8||
ā tū bha̭ra̱ māki̭re̱tat pari̭ ṣṭhād vi̱dmā hi tvā̱ vasṷpati̱ṃ vasṷ̄nām |
indra̱ yat te̱ māhi̭na̱ṃ datra̱mastya̱smabhya̱ṃ taddha̭ryaśva̱ pra ya̭ndhi ||9||
a̱sme pra ya̭ndhi maghavannṛjīṣi̱nnindra̭ rā̱yo vi̱śvavā̭rasya̱ bhūrḙ: |
a̱sme śa̱taṃ śa̱rado̭ jī̱vasḙ dhā a̱sme vī̱rāñchaśva̭ta indra śiprin ||10||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||11||
11 gāthino viśvāmitraḥ| indraḥ|gāyatrī, 11 triṣṭup |
vārtra̭hatyāya̱ śava̭se pṛtanā̱ṣāhyā̭ya ca | indra̱ tvā va̭rtayāmasi ||1||
a̱rvā̱cīna̱ṃ su te̱ mana̭ u̱ta cakṣṷ: śatakrato | indra̭ kṛ̱ṇvantṷ vā̱ghata̭: ||2||
nāmā̭ni te śatakrato̱ viśvā̭bhirgī̱rbhirī̭mahe | indrā̭bhimāti̱ṣāhyḙ ||3||
pu̱ru̱ṣṭu̱tasya̱ dhāma̭bhiḥ śa̱tena̭ mahayāmasi | indra̭sya carṣaṇī̱dhṛta̭: ||4||
indra̭ṃ vṛ̱trāya̱ hanta̭ve puruhū̱tamupa̭ bruve | bharḙṣu̱ vāja̭sātaye ||5||
vājḙṣu sāsa̱hirbha̭va̱ tvāmī̭mahe śatakrato | indra̭ vṛ̱trāya̱ hanta̭ve ||6||
dyu̱mneṣṷ pṛta̱nājyḙ pṛtsu̱tūrṣu̱ śrava̭ssu ca | indra̱ sākṣvā̱bhimā̭tiṣu ||7||
śu̱ṣminta̭maṃ na ū̱tayḙ dyu̱mnina̭ṃ pāhi̱ jāgṛ̭vim | indra̱ soma̭ṃ śatakrato ||8||
i̱ndri̱yāṇi̭ śatakrato̱ yā te̱ janḙṣu pa̱ñcasṷ | indra̱ tāni̭ ta̱ ā vṛ̭ṇe ||9||
aga̭nnindra̱ śravo̭ bṛ̱had dyu̱mnaṃ da̭dhiṣva du̱ṣṭara̭m | ut te̱ śuṣma̭ṃ tirāmasi ||10||||
a̱rvā̱vato̭ na̱ ā ga̱hyatho̭ śakra parā̱vata̭: |
u̱ lo̱ko yastḙ adriva̱ indre̱ha tata̱ ā ga̭hi ||11||||
10 prajāpatirvaiśvāmitraḥ, prajāpatirvācyo vā, tāvubhāvapi vā gāthino viśvāmitro vā| indraḥ| triṣṭup|
a̱bhi taṣṭḙva dīdhayā manī̱ṣāmatyo̱ na vā̱jī su̱dhuro̱ jihā̭naḥ |
a̱bhi pri̱yāṇi̱ marmṛ̭śa̱t parā̭ṇi ka̱vī~ri̭cchāmi sa̱ṃdṛśḙ sume̱dhāḥ ||1||
i̱nota pṛ̭ccha̱ jani̭mā kavī̱nāṃ ma̭no̱dhṛta̭: su̱kṛta̭stakṣata̱ dyām |
i̱mā ṷ te pra̱ṇyo̱3 vardha̭mānā̱ mano̭vātā̱ adha̱ nu dharma̭ṇi gman ||2||
ni ṣī̱midatra̱ guhyā̱ dadhā̭nā u̱ta kṣa̱trāya̱ roda̭sī̱ sama̭ñjan |
saṃ mātrā̭bhirmami̱re ye̱muru̱rvī a̱ntarma̱hī samṛ̭te̱ dhāya̭se dhuḥ ||3||
ā̱tiṣṭha̭nta̱ṃ pari̱ viśvḙ abhūṣa̱ñchriyo̱ vasā̭naścarati̱ svaro̭ciḥ |
ma̱hat tad vṛṣṇo̱ asṷrasya̱ nāmā'' vi̱śvarṷ̄po a̱mṛtā̭ni tasthau ||4||
asṷ̄ta̱ pūrvo̭ vṛṣa̱bho jyāyā̭ni̱mā a̭sya śu̱rudha̭: santi pū̱rvīḥ |
divo̭ napātā vi̱datha̭sya dhī̱bhiḥ kṣa̱traṃ rā̭jānā pra̱divo̭ dadhāthe ||5||
trīṇi̭ rājānā vi̱dathḙ pu̱rūṇi̱ pari̱ viśvā̭ni bhūṣatha̱: sadā̭ṃsi |
apa̭śya̱matra̱ mana̭sā jaga̱nvān vra̱te ga̭ndha̱rvā~ api̭ vā̱yukḙśān ||6||
tadinnva̭sya vṛṣa̱bhasya̭ dhe̱norā nāma̭bhirmamire̱ sakmya̱ṃ goḥ |
a̱nyada̭nyadasu̱ryaṃ1 vasā̭nā̱ ni mā̱yino̭ mamire rū̱pama̭smin ||7||
tadinnva̭sya savi̱turnaki̭rme hira̱ṇyayī̭ma̱mati̱ṃ yāmaśi̭śret |
ā sṷṣṭu̱tī roda̭sī viśvami̱nve apī̭va̱ yoṣā̱ jani̭māni vavre ||8||
yu̱vaṃ pra̱tnasya̭ sādhatho ma̱ho yad daivī̭ sva̱stiḥ pari̭ ṇaḥ syātam |
go̱pāji̭hvasya ta̱sthuṣo̱ virṷ̄pā̱ viśvḙ paśyanti mā̱yina̭: kṛ̱tāni̭ ||9||
śu̱naṃ hṷvema ma̱ghavā̭na̱mindra̭ma̱sminbhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||10||||
10 gāthino viśvāmitraḥ| indraḥ| triṣṭup|
indra̭ṃ ma̱tirhṛ̱da ā va̱cyamā̱nā 'cchā̱ pati̱ṃ stoma̭taṣṭā jigāti |
yā jāgṛ̭virvi̱dathḙ śa̱syamā̱nendra̱ yatte̱ jāya̭te vi̱ddhi tasya̭ ||1||
di̱vaści̱dā pū̱rvyā jāya̭mānā̱ vi jāgṛ̭virvi̱dathḙ śa̱syamā̭nā |
bha̱drā vastrā̱ṇyarjṷnā̱ vasā̭nā̱ seyama̱sme sa̭na̱jā pitryā̱ dhīḥ ||2||
ya̱mā ci̱datra̭ yama̱sūra̭sūta ji̱hvāyā̱ agra̱ṃ pata̱dā hyasthā̭t |
vapṷ̄ṃṣi jā̱tā mi̭thu̱nā sa̭cete tamo̱hanā̱ tapṷṣo bu̱dhna etā̭ ||3||
naki̭reṣāṃ nindi̱tā martyḙṣu̱ ye a̱smāka̭ṃ pi̱taro̱ goṣṷ yo̱dhāḥ |
indra̭ eṣāṃ dṛṃhi̱tā māhi̭nāvā̱nud go̱trāṇi̭ sasṛje da̱ṃsanā̭vān ||4||
sakhā̭ ha̱ yatra̱ sakhi̭bhi̱rnava̭gvairabhi̱jñvā satva̭bhi̱rgā a̭nu̱gman |
sa̱tyaṃ tadindro̭ da̱śabhi̱rdaśa̭gvai̱: sūrya̭ṃ viveda̱ tama̭si kṣi̱yanta̭m ||5||
indro̱ madhu̱ sambhṛ̭tamu̱sriyā̭yāṃ pa̱dvad vi̭veda śa̱phava̱nname̱ goḥ |
guhā̭ hi̱taṃ guhya̭ṃ gū̱ḻahama̱psu hastḙ dadhe̱ dakṣi̭ṇe̱ dakṣi̭ṇāvān ||6||
jyoti̭rvṛṇīta̱ tama̭so vijā̱nannā̱re syā̭ma duri̱tāda̱bhīkḙ |
i̱mā gira̭: somapāḥ somavṛddha ju̱ṣasvḙndra puru̱tama̭sya kā̱roḥ ||7||
jyoti̭rya̱jñāya̱ roda̭sī̱ anṷ ṣyādā̱re syā̭ma duri̱tasya̱ bhūrḙ: |
bhūri̭ ci̱ddhi tṷja̱to martya̭sya supā̱rāso̭ vasavo ba̱rhaṇā̭vat ||8||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||9||
9 gāthino viśvāmitraḥ| indraḥ| gāyatrī|
indra̭ tvā vṛṣa̱bhaṃ va̱yaṃ su̱te somḙ havāmahe | sa pā̭hi̱ madhvo̱ andha̭saḥ ||1||
indra̭ kratu̱vida̭ṃ su̱taṃ soma̭ṃ harya puruṣṭuta | pibā vṛ̭ṣasva̱ tātṛ̭pim ||2||
indra̱ pra ṇo̭ dhi̱tāvā̭naṃ ya̱jñaṃ viśvḙbhirde̱vebhi̭: | ti̱ra sta̭vāna viśpate ||3||
indra̱ somā̭: su̱tā i̱me tava̱ pra ya̭nti satpate | kṣaya̭ṃ ca̱ndrāsa̱ inda̭vaḥ ||4||
da̱dhi̱ṣvā ja̱ṭharḙ su̱taṃ soma̭mindra̱ varḙṇyam | tava̭ dyu̱kṣāsa̱ inda̭vaḥ ||5||
girva̭ṇaḥ pā̱hi na̭: su̱taṃ madho̱rdhārā̭bhirajyase | indra̱ tvādā̭ta̱midyaśa̭: ||6||
a̱bhi dyu̱mnāni̭ va̱nina̱ indra̭ṃ sacante̱ akṣi̭tā | pī̱tvī soma̭sya vāvṛdhe ||7||
a̱rvā̱vato̭ na̱ ā ga̭hi parā̱vata̭śca vṛtrahan | i̱mā jṷṣasva no̱ gira̭: ||8||
yada̭nta̱rā pa̭rā̱vata̭marvā̱vata̭ṃ ca hū̱yasḙ | indre̱ha tata̱ ā ga̭hi ||9||
9 gāthino viśvāmitraḥ| indraḥ| gāyatrī|
ā tū na̭ indra ma̱drya̭gghuvā̱naḥ soma̭pītaye | hari̭bhyāṃ yāhyadrivaḥ ||1||
sa̱tto hotā̭ na ṛ̱tviya̭stisti̱re ba̱rhirā̭nu̱ṣak | ayṷjranprā̱taradra̭yaḥ ||2||
i̱mā brahma̭ brahmavāhaḥ kri̱yanta̱ ā ba̱rhiḥ sī̭da | vī̱hi śṷ̄ra puro̱ḻāśa̭m ||3||
rā̱ra̱ndhi sava̭neṣu ṇa e̱ṣu stomḙṣu vṛtrahan | u̱ktheṣvi̭ndra girvaṇaḥ ||4||
ma̱taya̭: soma̱pāmu̱ruṃ ri̱hanti̱ śava̭sa̱spati̭m | indra̭ṃ va̱tsaṃ na mā̱tara̭: ||5||
sa ma̭ndasvā̱ hyandha̭so̱ rādha̭se ta̱nvā̭ ma̱he | na sto̱tāra̭ṃ ni̱de ka̭raḥ ||6||
va̱yami̭ndra tvā̱yavo̭ ha̱viṣma̭nto jarāmahe | u̱ta tvama̭sma̱yurva̭so ||7||
māre a̱smad vi mṷmuco̱ hari̭priyā̱rvāṅ yā̭hi | indra̭ svadhāvo̱ matsve̱ha ||8||
a̱rvāñca̭ṃ tvā su̱khe rathe̱ vaha̭tāmindra ke̱śinā̭ | ghṛ̱tasnṷ̄ ba̱rhirā̱sadḙ ||9||
9 gāthino viśvāmitraḥ| indraḥ| gāyatrī|
upa̭ naḥ su̱tamā ga̭hi̱ soma̭mindra̱ gavā̭śiram | hari̭bhyā̱ṃ yastḙ asma̱yuḥ || 1||
tami̭ndra̱ mada̱mā ga̭hi barhi̱:ṣṭhāṃ grāva̭bhiḥ su̱tam | ku̱vinnva̭sya tṛ̱pṇava̭: ||2||
indra̭mi̱tthā giro̱ mamācchā̭guriṣi̱tā i̱taḥ | ā̱vṛte̱ soma̭pītaye ||3||
indra̱ṃ soma̭sya pī̱taye̱ stomai̭ri̱ha ha̭vāmahe | u̱kthebhi̭: ku̱vidā̱gama̭t ||4||
indra̱ somā̭: su̱tā i̱me tān da̭dhiṣva śatakrato | ja̱ṭharḙ vājinīvaso ||5||
vi̱dmā hi tvā̭ dhanaṃja̱yaṃ vājḙṣu dadhṛ̱ṣaṃ ka̭ve | adhā̭ te su̱mnamī̭mahe ||6||
i̱mami̭ndra̱ gavā̭śira̱ṃ yavā̭śiraṃ ca naḥ piba | ā̱gatyā̱ vṛṣa̭bhiḥ su̱tam ||7||
tubhyedi̭ndra̱ sva o̱kye̱3 soma̭ṃ codāmi pī̱tayḙ | e̱ṣa rā̭rantu te hṛ̱di ||8||
tvāṃ su̱tasya̭ pī̱tayḙ pra̱tnami̭ndra havāmahe | ku̱śi̱kāso̭ ava̱syava̭: ||9||
8 gāthino viśvāmitraḥ| indraḥ| triṣṭup|
ā yā̭hya̱rvāṅupa̭ vandhure̱ṣṭhāstavedanṷ pra̱diva̭: soma̱peya̭m |
pri̱yā sakhā̭yā̱ vi mu̱copa̭ ba̱rhistvāmi̱me ha̭vya̱vāho̭ havante ||1||
ā yā̭hi pū̱rvīrati̭ carṣa̱ṇīrā~ a̱rya ā̱śiṣa̱ upa̭ no̱ hari̭bhyām |
i̱mā hi tvā̭ ma̱taya̱: stoma̭taṣṭā̱ indra̱ hava̭nte sa̱khyaṃ jṷṣā̱ṇāḥ ||2||
ā no̭ ya̱jñaṃ na̭mo̱vṛdha̭ṃ sa̱joṣā̱ indra̭ deva̱ hari̭bhiryāhi̱ tūya̭m |
a̱haṃ hi tvā̭ ma̱tibhi̱rjoha̭vīmi ghṛ̱tapra̭yāḥ sadha̱māde̱ madhṷ̄nām ||3||
ā ca̱ tvāme̱tā vṛṣa̭ṇā̱ vahā̭to̱ harī̱ sakhā̭yā su̱dhurā̱ svaṅgā̭ |
dhā̱nāva̱dindra̱: sava̭naṃ juṣā̱ṇaḥ sakhā̱ sakhyṷ: śṛṇava̱d vanda̭nāni ||4||
ku̱vinmā̭ go̱pāṃ kara̭se̱ jana̭sya ku̱vid rājā̭naṃ maghavannṛjīṣin |
ku̱vinma̱ ṛṣi̭ṃ papi̱vāṃsa̭ṃ su̱tasya̭ ku̱vinme̱ vasvo̭ a̱mṛta̭sya̱ śikṣā̭: ||5||
ā tvā̭ bṛ̱hanto̱ hara̭yo yujā̱nā a̱rvāgi̭ndra sadha̱mādo̭ vahantu |
pra ye dvi̱tā di̱va ṛ̱ñjantyātā̱: susa̭mmṛṣṭāso vṛṣa̱bhasya̭ mū̱rāḥ ||6||
indra̱ piba̱ vṛṣa̭dhūtasya̱ vṛṣṇa̱ ā yaṃ tḙ śye̱na ṷśa̱te ja̱bhāra̭ |
yasya̱ madḙ cyā̱vaya̭si̱ pra kṛ̱ṣṭīryasya̱ made̱ apa̭ go̱trā va̱vartha̭ ||7||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||8||
5 gāthino viśvāmitraḥ| indraḥ| bṛhatī|
a̱yaṃ tḙ astu harya̱taḥ soma̱ ā hari̭bhiḥ su̱taḥ |
ju̱ṣā̱ṇa i̭ndra̱ hari̭bhirna̱ ā ga̱hyā ti̭ṣṭha̱ hari̭ta̱ṃ ratha̭m ||1||
ha̱ryannu̱ṣasa̭marcaya̱: sūrya̭ṃ ha̱ryanna̭rocayaḥ |
vi̱dvā~ści̭ki̱tvān ha̭ryaśva vardhasa̱ indra̱ viśvā̭ a̱bhi śriya̭: ||2||
dyāmindro̱ hari̭dhāyasaṃ pṛthi̱vīṃ hari̭varpasam |
adhā̭rayaddha̱rito̱rbhūri̱ bhoja̭na̱ṃ yayo̭ra̱ntarhari̱ścara̭t ||3||
ja̱jñā̱no hari̭to̱ vṛṣā̱ viśva̱mā bhā̭ti roca̱nam |
harya̭śvo̱ hari̭taṃ dhatta̱ āyṷdha̱mā vajra̭ṃ bā̱hvorhari̭m ||4||
indro̭ ha̱ryanta̱marjṷna̱ṃ vajra̭ṃ śu̱kraira̱bhīvṛ̭tam |
apā̭vṛṇo̱ddhari̭bhi̱radri̭bhiḥ su̱tamud gā hari̭bhirājata ||5||
5 gāthino viśvāmitraḥ| indraḥ| bṛhatī|
ā ma̱ndrairi̭ndra̱ hari̭bhiryā̱hi ma̱yūra̭romabhiḥ |
mā tvā̱ ke ci̱nni ya̭ma̱nviṃ na pā̱śino'ti̱ dhanvḙva̱ tā~ i̭hi ||1||
vṛ̱tra̱khā̱do va̭laṃru̱jaḥ pu̱rāṃ da̱rmo a̱pāma̱jaḥ |
 sthātā̱ ratha̭sya̱ haryo̭rabhisva̱ra indro̭ dṛ̱ḻahā ci̭dāru̱jaḥ ||2||
ga̱mbhī̱rā~ ṷda̱dhī~ri̭va̱ kratṷṃ puṣyasi̱ gā i̭va |
pra sṷgo̱pā yava̭saṃ dhe̱navo̭ yathā hra̱daṃ ku̱lyā i̭vāśata ||3||
ā na̱stuja̭ṃ ra̱yiṃ bha̱rāṃśa̱ṃ na pra̭tijāna̱te |
vṛ̱kṣaṃ pa̱kvaṃ phala̭ma̱ṅkīva̭ dhūnu̱hīndra̭ sa̱mpāra̭ṇa̱ṃ vasṷ ||4||
sva̱yuri̭ndra sva̱rāḻa̭si̱ smaddi̭ṣṭi̱: svaya̭śastaraḥ |
sa vā̭vṛdhā̱na oja̭sā puruṣṭuta̱ bhavā̭ naḥ su̱śrava̭stamaḥ ||5||
5 gāthino viśvāmitraḥ| indraḥ| triṣṭup|
yu̱dhmasya̭ te vṛṣa̱bhasya̭ sva̱rāja̭ u̱grasya̱ yūna̱: sthavi̭rasya̱ ghṛṣvḙ: |
ajṷ̄ryato va̱jriṇo̭ vī̱ryā̱3ṇīndra̭ śru̱tasya̭ maha̱to ma̱hāni̭ ||1||
ma̱hā~ a̭si mahiṣa̱ vṛṣṇyḙbhirdhana̱spṛdṷgra̱ saha̭māno a̱nyān |
eko̱ viśva̭sya̱ bhuva̭nasya̱ rājā̱ sa yo̱dhayā̭ ca kṣa̱yayā̭ ca̱ janā̭n ||2||
pra mātrā̭bhī ririce̱ roca̭māna̱: pra de̱vebhi̭rvi̱śvato̱ apra̭tītaḥ |
pra ma̱jmanā̭ di̱va indra̭: pṛthi̱vyāḥ prororma̱ho a̱ntari̭kṣādṛjī̱ṣī ||3||
u̱ruṃ ga̭bhī̱raṃ ja̱nuṣā̱bhyu1graṃ vi̱śvavya̭casamava̱taṃ ma̭tī̱nām |
indra̱ṃ somā̭saḥ pra̱divi̭ su̱tāsa̭: samu̱draṃ na sra̱vata̱ ā vi̭śanti ||4||
yaṃ soma̭mindra pṛthi̱vīdyāvā̱ garbha̱ṃ na mā̱tā bi̭bhṛ̱tastvā̱yā |
taṃ tḙ hinvanti̱ tamṷ te mṛjantyadhva̱ryavo̭ vṛṣabha̱ pāta̱vā ṷ ||5||
5 gāthino viśvāmitraḥ| indraḥ| triṣṭup|
ma̱rutvā̭~ indra vṛṣa̱bho raṇā̭ya̱ pibā̱ soma̭manuṣva̱dhaṃ madā̭ya |
ā si̭ñcasva ja̱ṭhare̱ madhva̭ ū̱rmiṃ tvaṃ rājā̭si pra̱diva̭: su̱tānā̭m ||1||
sa̱joṣā̭ indra̱ saga̭ṇo ma̱rudbhi̱: soma̭ṃ piba vṛtra̱hā śṷ̄ra vi̱dvān |
ja̱hi śatrū̱~rapa̱ mṛdho̭ nuda̱svāthābha̭yaṃ kṛṇuhi vi̱śvato̭ naḥ ||2||
u̱ta ṛ̱tubhi̭rṛtupāḥ pāhi̱ soma̱mindra̭ de̱vebhi̱: sakhi̭bhiḥ su̱taṃ na̭: |
yā~ ābha̭jo ma̱ruto̱ ye tvānvaha̭n vṛ̱tramada̭dhu̱stubhya̱moja̭: ||3||
ye tvā̭hi̱hatyḙ maghava̱nnava̭rdha̱n ye śā̭mba̱re ha̭rivo̱ ye gavi̭ṣṭau |
ye tvā̭ nū̱nama̭nu̱mada̭nti̱ viprā̱: pibḙndra̱ soma̱ṃ saga̭ṇo ma̱rudbhi̭: ||4||
ma̱rutva̭ntaṃ vṛṣa̱bhaṃ vā̭vṛdhā̱namaka̭vāriṃ di̱vyaṃ śā̱samindra̭m |
vi̱śvā̱sāha̱mava̭se̱ nūta̭nāyo̱graṃ sa̭ho̱dāmi̱ha taṃ hṷvema ||5||
5 gāthino viśvāmitraḥ| indraḥ| triṣṭup|
sa̱dyo ha̭ jā̱to vṛ̭ṣa̱bhaḥ ka̱nīna̱: prabha̭rtumāva̱dandha̭saḥ su̱tasya̭ |
sā̱dhoḥ pi̭ba pratikā̱maṃ yathā̭ te̱ rasā̭śiraḥ pratha̱maṃ so̱myasya̭ ||1||
yajjāya̭thā̱stadaha̭rasya̱ kāme̱ṃ'śoḥ pī̱yūṣa̭mapibo giri̱ṣṭhām |
taṃ tḙ mā̱tā pari̱ yoṣā̱ jani̭trī ma̱haḥ pi̱turdama̱ āsi̭ñca̱dagrḙ ||2||
u̱pa̱sthāya̭ mā̱tara̱manna̭maiṭṭa ti̱gmama̭paśyada̱bhi soma̱mūdha̭: |
pra̱yā̱vaya̭nnacara̱d gṛtso̭ a̱nyān ma̱hāni̭ cakre puru̱dhapra̭tīkaḥ ||3||
u̱grastṷrā̱ṣāḻa̱bhibhṷ̄tyojā yathāva̱śaṃ ta̱nva̭ṃ cakra e̱ṣaḥ |
tvaṣṭā̭ra̱mindro̭ ja̱nuṣā̭bhi̱bhūyā̱''muṣyā̱ soma̭mapibacca̱mūṣṷ ||4||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||5||
5 gāthino viśvāmitraḥ| indraḥ| triṣṭup|
śaṃsā̭ ma̱hāmindra̱ṃ yasmi̱n viśvā̱ ā kṛ̱ṣṭaya̭: soma̱pāḥ kāma̱mavya̭n |
yaṃ su̱kratṷṃ dhi̱ṣaṇḙ vibhvata̱ṣṭaṃ gha̱naṃ vṛ̱trāṇā̭ṃ ja̱naya̭nta de̱vāḥ ||1||
yaṃ nu naki̱: pṛta̭nāsu sva̱rāja̭ṃ dvi̱tā tara̭ti̱ nṛta̭maṃ hari̱ṣṭhām |
i̱nata̭ma̱: satva̭bhi̱ryo ha̭ śū̱ṣaiḥ pṛ̭thu̱jrayā̭ aminā̱dāyu̱rdasyo̭: ||2||
sa̱hāvā̭ pṛ̱tsu ta̱raṇi̱rnārvā̭ vyāna̱śī roda̭sī me̱hanā̭vān |
bhago̱ na kā̱re havyo̭ matī̱nāṃ pi̱teva̱ cārṷ: su̱havo̭ vayo̱dhāḥ ||3||
dha̱rtā di̱vo raja̭saspṛ̱ṣṭa ū̱rdhvo ratho̱ na vā̱yurvasṷbhirni̱yutvā̭n |
kṣa̱pāṃ va̱stā ja̭ni̱tā sūrya̭sya̱ vibha̭ktā bhā̱gaṃ dhi̱ṣaṇḙva̱ vāja̭m ||4||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||5||
5 gāthino viśvāmitraḥ| indraḥ| triṣṭup|
indra̱: svāhā̭ pibatu̱ yasya̱ soma̭ ā̱gatyā̱ tumro̭ vṛṣa̱bho ma̱rutvā̭n |
oru̱vyacā̭: pṛṇatāme̱bhirannai̱rāsya̭ ha̱vista̱nva1: kāma̭mṛdhyāḥ ||1||
ā tḙ sapa̱ryū ja̱vasḙ yunajmi̱ yayo̱ranṷ pra̱diva̭: śru̱ṣṭimāva̭: |
i̱ha tvā̭ dheyu̱rhara̭yaḥ suśipra̱ pibā̱ tva1sya suṣṷtasya̱ cāro̭: ||2||
gobhi̭rmimi̱kṣuṃ da̭dhire supā̱ramindra̱ṃ jyaiṣṭhyā̭ya̱ dhāya̭se gṛṇā̱nāḥ |
ma̱ndā̱naḥ soma̭ṃ papi̱vā~ ṛ̭jīṣi̱n tsama̱smabhya̭ṃ puru̱dhā gā i̭ṣaṇya ||3||
i̱maṃ kāma̭ṃ mandayā̱ gobhi̱raśvai̭śca̱ndrava̭tā̱ rādha̭sā pa̱pratha̭śca |
sva̱ryavo̭ ma̱tibhi̱stubhya̱ṃ viprā̱ indrā̭ya̱ vāha̭: kuśi̱kāso̭ akran ||4||
śu̱naṃ hṷvema ma̱ghavā̭na̱mindra̭ma̱smin bhare̱ nṛta̭ma̱ṃ vāja̭sātau |
śṛ̱ṇvanta̭mu̱gramū̱tayḙ sa̱matsu̱ ghnanta̭ṃ vṛ̱trāṇi̭ sa̱ṃjita̱ṃ dhanā̭nām ||5||
12 gāthino viśvāmitraḥ|indraḥ| triṣṭup, 1-3jagatī, 10-12 gāyatrī|
ca̱rṣa̱ṇī̱dhṛta̭ṃ ma̱ghavā̭namu̱kthya1mindra̱ṃ giro̭ bṛha̱tīra̱bhya̭nūṣata |
vā̱vṛ̱dhā̱naṃ pṷruhū̱taṃ sṷvṛ̱ktibhi̱rama̭rtya̱ṃ jara̭māṇaṃ di̱vedi̭ve ||1||
śa̱takra̭tumarṇa̱vaṃ śā̱kina̱ṃ nara̱ṃ giro̭ ma̱ indra̱mupa̭ yanti vi̱śvata̭: |
vā̱ja̱sani̭ṃ pū̱rbhida̱ṃ tūrṇi̭ma̱ptura̭ṃ dhāma̱sāca̭mabhi̱ṣāca̭ṃ sva̱rvida̭m ||2||
ā̱ka̱re vaso̭rjari̱tā pa̭nasyate'ne̱hasa̱: stubha̱ indro̭ duvasyati |
vi̱vasva̭ta̱: sada̭na̱ ā hi pi̭pri̱ye sa̭trā̱sāha̭mabhimāti̱hana̭ṃ stuhi ||3||
nṛ̱ṇāmṷ tvā̱ nṛta̭maṃ gī̱rbhiru̱kthaira̱bhi pra vī̱rama̭rcatā sa̱bādha̭: |
saṃ saha̭se purumā̱yo ji̭hīte̱ namo̭ asya pra̱diva̱ eka̭ īśe ||4||
pū̱rvīra̭sya ni̱ṣṣidho̱ martyḙṣu pu̱rū vasṷ̄ni pṛthi̱vī bi̭bharti |
indrā̭ya̱ dyāva̱ oṣa̭dhīru̱tāpo̭ ra̱yiṃ ra̭kṣanti jī̱rayo̱ vanā̭ni ||5||
tubhya̱ṃ brahmā̭ṇi̱ gira̭ indra̱ tubhya̭ṃ sa̱trā da̭dhire harivo ju̱ṣasva̭ |
bo̱dhyā̱3pirava̭so̱ nūta̭nasya̱ sakhḙ vaso jari̱tṛbhyo̱ vayo̭ dhāḥ ||6||
indra̭ marutva i̱ha pā̭hi̱ soma̱ṃ yathā̭ śāryā̱te api̭baḥ su̱tasya̭ |
tava̱ praṇī̭tī̱ tava̭ śūra̱ śarma̱nnā vi̭vāsanti ka̱vaya̭: suya̱jñāḥ ||7||
sa vā̭vaśā̱na i̱ha pā̭hi̱ soma̭ṃ ma̱rudbhi̭rindra̱ sakhi̭bhiḥ su̱taṃ na̭: |
jā̱taṃ yattvā̱ pari̭ de̱vā abhṷ̄ṣan ma̱he bharā̭ya puruhūta̱ viśvḙ ||8||
a̱ptūryḙ maruta ā̱pire̱ṣo'ma̭nda̱nnindra̱manu̱ dāti̭vārāḥ |
tebhi̭: sā̱kaṃ pi̭batu vṛtrakhā̱daḥ su̱taṃ soma̭ṃ dā̱śuṣa̱: sve sa̱dhasthḙ ||9||
i̱daṃ hyanvoja̭sā su̱taṃ rā̭dhānāṃ pate | pibā̱ tva1sya gi̭rvaṇaḥ ||10||||
yaste̱ anṷ sva̱dhāmasa̭tsu̱te ni ya̭ccha ta̱nva̭m | sa tvā̭ mamattu so̱myam ||11||||
pra tḙ aśnotu ku̱kṣyoḥ prendra̱ brahma̭ṇā̱ śira̭: | pra bā̱hū śṷ̄ra̱ rādha̭se ||12||
8 gāthino viśvāmitraḥ|indraḥ| triṣṭup, 1-4gāyatrī,  6 jagatī|
dhā̱nāva̭ntaṃ kara̱mbhiṇa̭mapū̱pava̭ntamu̱kthina̭m | indra̭ prā̱tarjṷṣasva naḥ ||1||
pu̱ro̱ḻāśa̭ṃ paca̱tya̭ṃ ju̱ṣasve̱ndrā gṷrasva ca | tubhya̭ṃ ha̱vyāni̭ sisrate ||2||
pu̱ro̱ḻāśa̭ṃ ca no̱ ghaso̭ jo̱ṣayā̭se̱ gira̭śca naḥ | va̱dhū̱yuri̭va̱ yoṣa̭ṇām ||3||
pu̱ro̱ḻāśa̭ṃ sanaśruta prātaḥsā̱ve jṷṣasva naḥ | indra̱ kratu̱rhi tḙ bṛ̱han ||4||
mādhya̭ṃdinasya̱ sava̭nasya dhā̱nāḥ pṷro̱ḻāśa̭mindra kṛṣve̱ha cārṷm |
pra yat sto̱tā ja̭ri̱tā tūrṇya̭rtho vṛṣā̱yamā̭ṇa̱ upa̭ gī̱rbhirīṭṭḙ ||5||
tṛ̱tīyḙ dhā̱nāḥ sava̭ne puruṣṭuta puro̱ḻāśa̱māhṷtaṃ māmahasva naḥ |
ṛ̱bhu̱manta̱ṃ vāja̭vantaṃ tvā kave̱ praya̭svanta̱ upa̭ śikṣema dhī̱tibhi̭: ||6||
pū̱ṣa̱ṇvatḙ te cakṛmā kara̱mbhaṃ hari̭vate̱ harya̭śvāya dhā̱nāḥ |
a̱pū̱pama̭ddhi̱ saga̭ṇo ma̱rudbhi̱: soma̭ṃ piba vṛtra̱hā śṷ̄ra vi̱dvān ||7||
prati̭ dhā̱nā bha̭rata̱ tūya̭masmai puro̱ḻāśa̭ṃ vī̱rata̭māya nṛ̱ṇām |
di̱vedi̭ve sa̱dṛśī̭rindra̱ tubhya̱ṃ vardha̭ntu tvā soma̱peyā̭ya dhṛṣṇo ||8||
24 gāthino viśvamitraḥ| indraḥ, 1 indraparvatau, 15, 16 vāk,(sasarparī),17-20 rathāṅgāni, 21-24 abhiśāpaḥ| triṣṭup, 10, 16 jagatī, 13 gāyatrī, 12, 20, 22 anuṣṭup, 18 bṛhatī|
indrā̭parvatā bṛha̱tā rathḙna vā̱mīriṣa̱ ā va̭hataṃ su̱vīrā̭: |
vī̱taṃ ha̱vyānya̭dhva̱reṣṷ devā̱ vardhḙthāṃ gī̱rbhiriḻa̭yā̱ mada̭ntā ||1||
tiṣṭhā̱ su ka̭ṃ maghava̱n mā parā̭ gā̱: soma̭sya̱ nu tvā̱ suṣṷtasya yakṣi |
pi̱turna pu̱traḥ sica̱mā ra̭bhe ta̱ indra̱ svādi̭ṣṭhayā gi̱rā śa̭cīvaḥ ||2||
śaṃsā̭vādhvaryo̱ prati̭ me gṛṇī̱hīndrā̭ya̱ vāha̭: kṛṇavāva̱ juṣṭa̭m |
edaṃ ba̱rhiryaja̭mānasya sī̱dāthā̭ ca bhūdu̱kthamindrā̭ya śa̱stam ||3||
jā̱yedasta̭ṃ maghava̱n tsedu̱ yoni̱stadit tvā̱ yu̱ktā hara̭yo vahantu |
ya̱dā ka̱dā ca̭ su̱navā̭ma̱ soma̭ma̱gniṣṭvā̭ dū̱to dha̭nvā̱tyaccha̭ ||4||
parā̭ yāhi maghava̱nnā ca̭ yā̱hīndra̭ bhrātarubha̱yatrā̭ te̱ artha̭m |
yatrā̱ ratha̭sya bṛha̱to ni̱dhāna̭ṃ vi̱moca̭naṃ vā̱jino̱ rāsa̭bhasya || 5
apā̱: soma̱masta̭mindra̱ pra yā̭hi kalyā̱ṇīrjā̱yā su̱raṇa̭ṃ gṛ̱he tḙ |
yatrā̱ ratha̭sya bṛha̱to ni̱dhāna̭ṃ vi̱moca̭naṃ vā̱jino̱ dakṣi̭ṇāvat ||6||
i̱me bho̱jā aṅgi̭raso̱ virṷ̄pā di̱vaspu̱trāso̱ asṷrasya vī̱rāḥ |
vi̱śvāmi̭trāya̱ dada̭to ma̱ghāni̭ sahasrasā̱ve pra ti̭ranta̱ āyṷ: ||7||
rū̱paṃrṷ̄paṃ ma̱ghavā̭ bobhavīti mā̱yāḥ kṛ̭ṇvā̱nasta̱nvaṃ1 pari̱ svām |
triryad di̱vaḥ pari̭ muhū̱rtamāgā̱t svairmantrai̱ranṛ̭tupā ṛ̱tāvā̭ ||8||
ma̱hā~ ṛṣi̭rdeva̱jā de̱vajū̱to'sta̭bhnā̱t sindhṷmarṇa̱vaṃ nṛ̱cakṣā̭: |
vi̱śvāmi̭tro̱ yadava̭hat su̱dāsa̱mapri̭yāyata kuśi̱kebhi̱rindra̭: ||9||
ha̱ṃsā i̭va kṛṇutha̱ śloka̱madri̭bhi̱rmada̭nto gī̱rbhira̭dhva̱re su̱te sacā̭ |
de̱vebhi̭rviprā ṛṣayo nṛcakṣaso̱ vi pi̭badhvaṃ kuśikāḥ so̱myaṃ madhṷ ||10||||
upa̱ preta̭ kuśikāśce̱taya̭dhva̱maśva̭ṃ rā̱ye pra mṷñcatā su̱dāsa̭: |
rājā̭ vṛ̱traṃ ja̭ṅghana̱t prāgapā̱guda̱gathā̭ yajāte̱ vara̱ ā pṛ̭thi̱vyāḥ ||11||||
ya i̱me roda̭sī u̱bhe a̱hamindra̱matṷṣṭavam |
vi̱śvāmi̭trasya rakṣati̱ brahme̱daṃ bhāra̭ta̱ṃ jana̭m ||12||
vi̱śvāmi̭trā arāsata̱ brahmendrā̭ya va̱jriṇḙ | kara̱dinna̭: su̱rādha̭saḥ ||13||
kiṃ tḙ kṛṇvanti̱ kīka̭ṭeṣu̱ gāvo̱ nāśira̭ṃ du̱hre na ta̭panti gha̱rmam |
ā no̭ bhara̱ prama̭gandasya̱ vedo̭ naicāśā̱khaṃ ma̭ghavan randhayā naḥ ||14||
sa̱sa̱rpa̱rīrama̭ti̱ṃ bādha̭mānā bṛ̱hanmi̭māya ja̱mada̭gnidattā |
ā sūrya̭sya duhi̱tā ta̭tāna̱ śravo̭ de̱veṣva̱mṛta̭maju̱ryam ||15||
sa̱sa̱rpa̱rīra̭bhara̱t tūya̭me̱bhyo'dhi̱ śrava̱: pāñca̭janyāsu kṛ̱ṣṭiṣṷ |
sā pa̱kṣyā̱3 navya̱māyu̱rdadhā̭nā̱ yāṃ mḙ palastijamada̱gnayo̭ da̱duḥ ||16||
sthi̱rau gāvaṷ bhavatāṃ vī̱ḻurakṣo̱ meṣā vi va̭rhi̱ mā yu̱gaṃ vi śā̭ri |
indra̭: pāta̱lyḙ dadatā̱ṃ śarī̭to̱rari̭ṣṭaneme a̱bhi na̭: sacasva ||17||
bala̭ṃ dhehi ta̱nūṣṷ no̱ bala̭mindrāna̱ḻutsṷ naḥ |
bala̭ṃ to̱kāya̱ tana̭yāya jī̱vase̱ tvaṃ hi ba̭la̱dā asi̭ ||18||
a̱bhi vya̭yasva khadi̱rasya̱ sāra̱mojo̭ dhehi spanda̱ne śi̱ṃśapā̭yām |
akṣa̭ vīḻo vīḻita vī̱ḻaya̭sva̱ mā yāmā̭da̱smādava̭ jīhipo naḥ ||19||
a̱yama̱smān vana̱spati̱rmā ca̱ hā mā ca̭ rīriṣat |
sva̱styā gṛ̱hebhya̱ āva̱sā ā vi̱moca̭nāt ||20||||
indro̱tibhi̭rbahu̱lābhi̭rno a̱dya yā̭cchre̱ṣṭhābhi̭rmaghavañchūra jinva |
yo no̱ dveṣṭyadha̭ra̱: saspa̭dīṣṭa̱ yamṷ dvi̱ṣmastamṷ prā̱ṇo ja̭hātu ||21||||
pa̱ra̱śuṃ ci̱d vi ta̭pati śimba̱laṃ ci̱d vi vṛ̭ścati |
u̱khā ci̭dindra̱ yeṣa̭ntī̱ praya̭stā̱ phena̭masyati ||22||||
na sāya̭kasya cikite janāso lo̱dhaṃ na̭yanti̱ paśu̱ manya̭mānāḥ |
nāvā̭jinaṃ vā̱jinā̭ hāsayanti̱ na ga̭rda̱bhaṃ pu̱ro aśvā̭nnayanti ||23||
i̱ma i̭ndra bhara̱tasya̭ pu̱trā a̭papi̱tvaṃ ci̭kitu̱rna pra̭pi̱tvam |
hi̱nvantyaśva̱mara̭ṇa̱ṃ na nitya̱ṃ jyā̭vāja̱ṃ pari̭ ṇayantyā̱jau ||24||
22 prajāpatirvaiśvāmitraḥ, prajāpatirvācyo vā| viśve devāḥ| triṣṭup|
i̱maṃ ma̱he vi̭da̱thyā̭ya śū̱ṣaṃ śaśva̱t kṛtva̱ īḍyā̭ya̱ pra ja̭bhruḥ |
śṛ̱ṇotṷ no̱ damyḙbhi̱ranī̭kaiḥ śṛ̱ṇotva̱gnirdi̱vyairaja̭sraḥ ||1||
mahi̭ ma̱he di̱ve a̭rcā pṛthi̱vyai kāmo̭ ma i̱cchañca̭rati prajā̱nan |
yayo̭rha̱ stomḙ vi̱dathḙṣu de̱vāḥ sa̭pa̱ryavo̭ mā̱daya̭nte̱ sacā̱yoḥ ||2||
yu̱vorṛ̱taṃ ro̭dasī sa̱tyama̭stu ma̱he ṣu ṇa̭: suvi̱tāya̱ pra bhṷ̄tam |
i̱daṃ di̱ve namo̭ agne pṛthi̱vyai sa̭pa̱ryāmi̱ praya̭sā̱ yāmi̱ ratna̭m ||3||
u̱to hi vā̭ṃ pū̱rvyā ā̭vivi̱dra ṛtā̭varī rodasī satya̱vāca̭: |
nara̭ścid vāṃ sami̱the śūra̭sātau vavandi̱re pṛ̭thivi̱ vevi̭dānāḥ ||4||
ko a̱ddhā vḙda̱ ka i̱ha pra vo̭cadde̱vā~ acchā̭ pa̱thyā̱3 kā samḙti |
dadṛ̭śra eṣāmava̱mā sadā̭ṃsi̱ parḙṣu̱ yā guhyḙṣu vra̱teṣṷ ||5||
ka̱virnṛ̱cakṣā̭ a̱bhi ṣī̭macaṣṭa ṛ̱tasya̱ yonā̱ vighṛ̭te̱ mada̭ntī |
nānā̭ cakrāte̱ sada̭na̱ṃ yathā̱ veḥ sa̭mā̱nena̱ kratṷnā saṃvidā̱ne ||6||
sa̱mā̱nyā viyṷte dū̱rea̭nte dhru̱ve pa̱de ta̭sthaturjāga̱rūkḙ |
u̱ta svasā̭rā yuva̱tī bhava̭ntī̱ ādṷ bruvāte mithu̱nāni̱ nāma̭ ||7||
viśvede̱te jani̭mā̱ saṃ vi̭vikto ma̱ho de̱vān bibhra̭tī̱ na vya̭thete |
eja̭d dhru̱vaṃ pa̭tyate̱ viśva̱meka̱ṃ cara̭t pata̱tri viṣṷṇa̱ṃ vi jā̱tam ||8||
sanā̭ purā̱ṇamadhyḙmyā̱rānma̱haḥ pi̱turja̭ni̱turjā̱mi tanna̭: |
de̱vāso̱ yatra̭ pani̱tāra̱ evai̭ru̱rau pa̱thi vyṷte ta̱sthura̱ntaḥ ||9||
i̱maṃ stoma̭ṃ rodasī̱ pra bra̭vīmyṛdū̱darā̭: śṛṇavannagniji̱hvāḥ |
mi̱traḥ sa̱mrājo̱ varṷṇo̱ yuvā̭na ādi̱tyāsa̭: ka̱vaya̭: paprathā̱nāḥ ||10||||
hira̭ṇyapāṇiḥ savi̱tā sṷji̱hvastrirā di̱vo vi̱dathe̱ patya̭mānaḥ |
de̱veṣṷ ca savita̱: śloka̱maśre̱rāda̱smabhya̱mā sṷva sa̱rvatā̭tim ||11||||
su̱kṛt su̱pā̱ṇiḥ svavā̭~ ṛ̱tāvā̭ de̱vastvaṣṭāva̭se̱ tāni̭ no dhāt |
pū̱ṣa̱ṇvanta̭ ṛbhavo mādayadhvamū̱rdhvagrā̭vāṇo adhva̱rama̭taṣṭa ||12||
vi̱dyudra̭thā ma̱ruta̭ ṛṣṭi̱manto̭ di̱vo maryā̭ ṛ̱tajā̭tā a̱yāsa̭: |
sara̭svatī śṛṇavan ya̱jñiyā̭so̱ dhātā̭ ra̱yiṃ sa̱havī̭raṃ turāsaḥ ||13||
viṣṇu̱ṃ stomā̭saḥ puruda̱smama̱rkā bhaga̭syeva kā̱riṇo̱ yāma̭ni gman |
u̱ru̱kra̱maḥ ka̭ku̱ho yasya̭ pū̱rvīrna ma̭rdhanti yuva̱tayo̱ jani̭trīḥ ||14||
indro̱ viśvai̭rvī̱ryai̱3: patya̭māna u̱bhe ā pa̭prau̱ roda̭sī mahi̱tvā |
pu̱ra̱ṃda̱ro vṛ̭tra̱hā dhṛ̱ṣṇuṣḙṇaḥ sa̱ṃgṛbhyā̭ na̱ ā bha̭rā̱ bhūri̭ pa̱śvaḥ ||15||
nāsa̭tyā me pi̱tarā̭ bandhu̱pṛcchā̭ sajā̱tya̭ma̱śvino̱ścāru̱ nāma̭ |
yu̱vaṃ hi stho ra̭yi̱dau no̭ rayī̱ṇāṃ dā̱traṃ ra̭kṣethe̱ aka̭vai̱rada̭bdhā ||16||
ma̱hat tad va̭: kavaya̱ścāru̱ nāma̱ yaddha̭ devā̱ bhava̭tha̱ viśva̱ indrḙ |
sakha̭ ṛ̱bhubhi̭: puruhūta pri̱yebhi̭ri̱māṃ dhiya̭ṃ sā̱tayḙ takṣatā naḥ ||17||
a̱rya̱mā ṇo̱ adi̭tirya̱jñiyā̱so'da̭bdhāni̱ varṷṇasya vra̱tāni̭ |
yu̱yota̭ no anapa̱tyāni̱ ganto̭: pra̱jāvā̭n naḥ paśu̱mā~ a̭stu gā̱tuḥ ||18||
de̱vānā̭ṃ dū̱taḥ pṷru̱dha prasū̱to'nā̭gān no vocatu sa̱rvatā̭tā |
śṛ̱ṇotṷ naḥ pṛthi̱vī dyauru̱tāpa̱: sūryo̱ nakṣa̭trairu̱rva1ntari̭kṣam ||19||
śṛ̱ṇvantṷ no̱ vṛṣa̭ṇa̱: parva̭tāso dhru̱vakṣḙmāsa̱ iḻa̭yā̱ mada̭ntaḥ |
ā̱di̱tyairno̱ adi̭tiḥ śṛṇotu̱ yaccha̭ntu no ma̱ruta̱: śarma̭ bha̱dram ||20||||
sadā̭ su̱gaḥ pi̭tu̱mā~ a̭stu̱ panthā̱ madhvā̭ devā̱ oṣa̭dhī̱: saṃ pi̭pṛkta |
bhago̭ me agne sa̱khye na mṛ̭dhyā̱ ud rā̱yo a̭śyā̱ṃ sada̭naṃ puru̱kṣoḥ ||21||||
svada̭sva ha̱vyā samiṣo̭ didīhyasma̱drya1k saṃ mi̭mīhi̱ śravā̭ṃsi |
viśvā̭~ agne pṛ̱tsu tāñjḙṣi̱ śatrū̱nahā̱ viśvā̭ su̱manā̭ dīdihī naḥ ||22||||
22 prajāpatirvaiśvāmitraḥ, prajāpatirvācyo vā| viśve devāḥ| triṣṭup|
u̱ṣasa̱: pūrvā̱ adha̱ yad vyūṣurma̱had vi ja̭jñe a̱kṣara̭ṃ pa̱de goḥ |
vra̱tā de̱vānā̱mupa̱ nu pra̱bhūṣa̭n ma̱had de̱vānā̭masura̱tvameka̭m ||1||
mo ṣū ṇo̱ atra̭ juhuranta de̱vā mā pūrvḙ agne pi̱tara̭: pada̱jñāḥ |
pu̱rā̱ṇyoḥ sadma̭noḥ ke̱tura̱ntarma̱had de̱vānā̭masura̱tvameka̭m ||2||
vi mḙ puru̱trā pa̭tayanti̱ kāmā̱: śamyacchā̭ dīdye pū̱rvyāṇi̭ |
sami̭ddhe a̱gnāvṛ̱tamid va̭dema ma̱had de̱vānā̭masura̱tvameka̭m ||3||
sa̱mā̱no rājā̱ vibhṛ̭taḥ puru̱trā śayḙ śa̱yāsu̱ prayṷto̱ vanānṷ |
a̱nyā va̱tsaṃ bhara̭ti̱ kṣeti̭ mā̱tā ma̱had de̱vānā̭masura̱tvameka̭m ||4||
ā̱kṣit pūrvā̱svapa̭rā anū̱rut sa̱dyo jā̱tāsu̱ tarṷṇīṣva̱ntaḥ |
a̱ntarva̭tīḥ suvate̱ apra̭vītā ma̱had de̱vānā̭masura̱tvameka̭m ||5||
śa̱yuḥ pa̱rastā̱dadha̱ nu dvi̭mā̱tā 'ba̭ndha̱naśca̭rati va̱tsa eka̭: |
mi̱trasya̱ tā varṷṇasya vra̱tāni̭ ma̱had de̱vānā̭masura̱tvameka̭m ||6||
dvi̱mā̱tā hotā̭ vi̱dathḙṣu sa̱mrāḻanvagra̱ṃ cara̭ti̱ kṣeti̭ bu̱dhnaḥ |
pra raṇyā̭ni raṇya̱vāco̭ bharante ma̱had de̱vānā̭masura̱tvameka̭m ||7||
śūra̭syeva̱ yudhya̭to anta̱masya̭ pratī̱cīna̭ṃ dadṛśe̱ viśva̭mā̱yat |
a̱ntarma̱tiśca̭rati ni̱ṣṣidha̱ṃ gorma̱had de̱vānā̭masura̱tvameka̭m ||8||
ni vḙveti pali̱to dū̱ta ā̭sva̱ntarma̱hāṃśca̭rati roca̱nena̭ |
vapṷ̄ṃṣi̱ bibhra̭da̱bhi no̱ vi ca̭ṣṭe ma̱had de̱vānā̭masura̱tvameka̭m ||9||
viṣṇṷrgo̱pāḥ pa̭ra̱maṃ pā̭ti̱ pātha̭: pri̱yā dhāmā̭nya̱mṛtā̱ dadhā̭naḥ |
a̱gniṣṭā viśvā̱ bhuva̭nāni veda ma̱had de̱vānā̭masura̱tvameka̭m ||10||||
nānā̭ cakrāte ya̱myā̱3vapṷ̄ṃṣi̱ tayo̭ra̱nyad roca̭te kṛ̱ṣṇama̱nyat |
śyāvī̭ ca̱ yadarṷṣī ca̱ svasā̭rau ma̱had de̱vānā̭masura̱tvameka̭m ||11||||
mā̱tā ca̱ yatra̭ duhi̱tā ca̭ dhe̱nū sa̭ba̱rdughḙ dhā̱payḙte samī̱cī |
ṛ̱tasya̱ te sada̭sīḻe a̱ntarma̱had de̱vānā̭masura̱tvameka̭m ||12||
a̱nyasyā̭ va̱tsaṃ ri̭ha̱tī mi̭māya̱ kayā̭ bhu̱vā ni da̭dhe dhe̱nurūdha̭: |
ṛ̱tasya̱ sā paya̭sāpinva̱teḻā̭ ma̱hadde̱vānā̭masura̱tvameka̭m ||13||
padyā̭ vaste puru̱rūpā̱ vapṷ̄ṃṣyū̱rdhvā ta̭sthau̱ tryavi̱ṃ reri̭hāṇā |
ṛ̱tasya̱ sadma̱ vi ca̭rāmi vi̱dvān ma̱had de̱vānā̭masura̱tvameka̭m ||14||
pa̱de i̭va̱ nihi̭te da̱sme a̱ntastayo̭ra̱nyad guhya̭mā̱vira̱nyat |
sa̱dhrī̱cī̱nā pa̱thyā̱3 sā viṣṷ̄cī ma̱had de̱vānā̭masura̱tvameka̭m ||15||
ā dhe̱navo̭ dhunayantā̱maśi̭śvīḥ saba̱rdughā̭: śaśa̱yā apra̭dugdhāḥ |
navyā̭navyā yuva̱tayo̱ bhava̭ntīrma̱had de̱vānā̭masura̱tvameka̭m ||16||
yada̱nyāsṷ vṛṣa̱bho rora̭vīti̱ so a̱nyasmi̭n yū̱the ni da̭dhāti̱ reta̭: |
sa hi kṣapā̭vā̱n tsa bhaga̱: sa rājā̭ ma̱had de̱vānā̭masura̱tvameka̭m ||17||
vī̱rasya̱ nu svaśvya̭ṃ janāsa̱: pra nu vo̭cāma vi̱dura̭sya de̱vāḥ |
ṣo̱ḻahā yu̱ktāḥ pañca̭pa̱ñcā va̭hanti ma̱had de̱vānā̭masura̱tvameka̭m ||18||
de̱vastvaṣṭā̭ savi̱tā vi̱śvarṷ̄paḥ pu̱poṣa̭ pra̱jāḥ pṷru̱dhā ja̭jāna |
i̱mā ca̱ viśvā̱ bhuva̭nānyasya ma̱had de̱vānā̭masura̱tvameka̭m ||19||
ma̱hī samai̭racca̱mvā̭ samī̱cī u̱bhe te a̭sya̱ vasṷnā̱ nyṛ̭ṣṭe |
śṛ̱ṇve vī̱ro vi̱ndamā̭no̱ vasṷ̄ni ma̱had de̱vānā̭masura̱tvameka̭m ||20||||
i̱māṃ ca̭ naḥ pṛthi̱vīṃ vi̱śvadhā̭yā̱ upa̭ kṣeti hi̱tami̭tro̱ na rājā̭ |
pu̱ra̱:sada̭: śarma̱sado̱ na vī̱rā ma̱had de̱vānā̭masura̱tvameka̭m ||21||||
ni̱ṣṣidhva̭rīsta̱ oṣa̭dhīru̱tāpo̭ ra̱yiṃ ta̭ indra pṛthi̱vī bi̭bharti |
sakhā̭yaste vāma̱bhāja̭: syāma ma̱had de̱vānā̭masura̱tvameka̭m ||22||||
8 prajāpatirvaiśvāmitraḥ, prajāpatirvācyo vā| viśve devāḥ| triṣṭup|
na tā mi̭nanti mā̱yino̱ na dhīrā̭ vra̱tā de̱vānā̭ṃ pratha̱mā dhru̱vāṇi̭ |
na roda̭sī a̱druhā̭ ve̱dyābhi̱rna parva̭tā ni̱namḙ tasthi̱vāṃsa̭: ||1||
ṣaḍ bhā̱rā~ eko̱ aca̭ran bibhartyṛ̱taṃ varṣi̭ṣṭha̱mupa̱ gāva̱ āgṷ: |
ti̱sro ma̱hīrupa̭rāstasthu̱ratyā̱ guhā̱ dve nihi̭te̱ darśyekā̭ ||2||
tri̱pā̱ja̱syo vṛ̭ṣa̱bho vi̱śvarṷ̄pa u̱ta tryu̱dhā pṷru̱dha pra̱jāvā̭n |
trya̱nī̱kaḥ pa̭tyate̱ māhi̭nāvā̱n tsa rḙto̱dhā vṛ̭ṣa̱bhaḥ śaśva̭tīnām ||3||
a̱bhīka̭ āsāṃ pada̱vīra̭bodhyādi̱tyānā̭mahve̱ cāru̱ nāma̭ |
āpa̭ścidasmā aramanta de̱vīḥ pṛtha̱g vraja̭ntī̱: pari̭ ṣīmavṛñjan ||4||
trī ṣa̱dhasthā̭ sindhava̱striḥ ka̭vī̱nāmu̱ta tri̭mā̱tā vi̱dathḙṣu sa̱mrāṭ |
ṛ̱tāva̭rī̱ryoṣa̭ṇāsti̱sro apyā̱strirā di̱vo vi̱dathe̱ patya̭mānāḥ ||5||
trirā di̱vaḥ sa̭vita̱rvāryā̭ṇi di̱vedi̭va̱ ā sṷva̱ trirno̱ ahna̭: |
tri̱dhātṷ rā̱ya ā sṷvā̱ vasṷ̄ni̱ bhaga̭ trātardhiṣaṇe sā̱tayḙ dhāḥ ||6||
trirā di̱vaḥ sa̭vi̱tā so̭ṣavīti̱ rājā̭nā mi̱trāvarṷṇā supā̱ṇī |
āpa̭ścidasya̱ roda̭sī cidu̱rvī ratna̭ṃ bhikṣanta savi̱tuḥ sa̱vāya̭ ||7||
trirṷtta̱mā dū̱ṇaśā̭ roca̱nāni̱ trayo̭ rāja̱ntyasṷrasya vī̱rāḥ |
ṛ̱tāvā̭na iṣi̱rā dū̱ḻabhā̭sa̱strirā di̱vo vi̱dathḙ santu de̱vāḥ ||8||
6  gāthino viśvāmitraḥ| viśve devāḥ| triṣṭup|
pra mḙ vivi̱kvā~ a̭vidanmanī̱ṣāṃ dhe̱nuṃ cara̭ntī̱ṃ prayṷtā̱mago̭pām |
sa̱dyaści̱d yā dṷdu̱he bhūri̭ dhā̱serindra̱stada̱gniḥ pa̭ni̱tāro̭ asyāḥ ||1||
indra̱: su pū̱ṣā vṛṣa̭ṇā su̱hastā̭ di̱vo na prī̱tāḥ śa̭śa̱yaṃ dṷduhre |
viśve̱ yada̭syāṃ ra̱ṇaya̭nta de̱vāḥ pra vo'tra̭ vasavaḥ su̱mnama̭śyām ||2||
yā jā̱mayo̱ vṛṣṇa̭ i̱cchanti̭ śa̱ktiṃ na̭ma̱syantī̭rjānate̱ garbha̭masmin |
acchā̭ pu̱traṃ dhe̱navo̭ vāvaśā̱nā ma̱haśca̭ranti̱ bibhra̭ta̱ṃ vapṷ̄ṃṣi ||3||
acchā̭ vivakmi̱ roda̭sī su̱meke̱ grāvṇo̭ yujā̱no a̭dhva̱re ma̭nī̱ṣā |
i̱mā ṷ te̱ mana̭ve̱ bhūri̭vārā ū̱rdhvā bha̭vanti darśa̱tā yaja̭trāḥ ||4||
yā tḙ ji̱hvā madhṷmatī sume̱dhā agnḙ de̱veṣū̱cyata̭ urū̱cī |
taye̱ha viśvā̱~ ava̭se̱ yaja̭trā̱nā sā̭daya pā̱yayā̭ cā̱ madhṷ̄ni ||5||
yā tḙ agne̱ parva̭tasyeva̱ dhārāsa̭ścantī pī̱paya̭d deva ci̱trā |
tāma̱smabhya̱ṃ prama̭tiṃ jātavedo̱ vaso̱ rāsva̭ suma̱tiṃ vi̱śvaja̭nyām ||6||
9 gāthino viśvāmitraḥ| aśvinau| triṣṭup|
dhe̱nuḥ pra̱tnasya̱ kāmya̱ṃ duhā̭nā̱ 'ntaḥ pu̱traśca̭rati̱ dakṣi̭ṇāyāḥ |
ā dyo̭ta̱niṃ va̭hati śu̱bhrayā̭mo̱ṣasa̱: stomo̭ a̱śvinā̭vajīgaḥ ||1||
su̱yug va̭hanti̱ prati̭ vāmṛ̱teno̱rdhvā bha̭vanti pi̱tarḙva̱ medhā̭: |
jarḙthāma̱smad vi pa̱ṇerma̭nī̱ṣāṃ yu̱vorava̭ścakṛ̱mā yā̭tama̱rvāk ||2||
su̱yugbhi̱raśvai̭: su̱vṛtā̱ rathḙna̱ dasrā̭vi̱maṃ śṛ̭ṇuta̱ṃ śloka̱madrḙ: |
kima̱ṅga vā̱ṃ pratyava̭rti̱ṃ gami̭ṣṭhā̱ ''hurviprā̭so aśvinā purā̱jāḥ ||3||
ā ma̭nyethā̱mā ga̭ta̱ṃ kacci̱devai̱rviśve̱ janā̭so a̱śvinā̭ havante |
i̱mā hi vā̱ṃ goṛ̭jīkā̱ madhṷ̄ni̱ pra mi̱trāso̱ na da̱duru̱sro agrḙ ||4||
ti̱raḥ pu̱rū ci̭daśvinā̱ rajā̭ṃsyāṅgū̱ṣo vā̭ṃ maghavānā̱ janḙṣu |
eha yā̭taṃ pa̱thibhi̭rdeva̱yānai̱rdasrā̭vi̱me vā̭ṃ ni̱dhayo̱ madhṷ̄nām ||5||
pu̱rā̱ṇamoka̭: sa̱khyaṃ śi̱vaṃ vā̭ṃ yu̱vorna̭rā̱ dravi̭ṇaṃ ja̱hnāvyā̭m |
puna̭: kṛṇvā̱nāḥ sa̱khyā śi̱vāni̱ madhvā̭ madema sa̱ha nū sa̭mā̱nāḥ ||6||
aśvi̭nā vā̱yunā̭ yu̱vaṃ sṷdakṣā ni̱yudbhi̭śca sa̱joṣa̭sā yuvānā |
nāsa̭tyā ti̱roa̭hnyaṃ juṣā̱ṇā soma̭ṃ pibatama̱sridhā̭ sudānū ||7||
aśvi̭nā̱ pari̭ vā̱miṣa̭: purū̱cīrī̱yurgī̱rbhiryata̭mānā̱ amṛ̭dhrāḥ |
ratho̭ ha vāmṛta̱jā adri̭jūta̱: pari̱ dyāvā̭pṛthi̱vī yā̭ti sa̱dyaḥ ||8||
aśvi̭nā madhu̱ṣutta̭mo yu̱vāku̱: soma̱staṃ pā̭ta̱mā ga̭taṃ duro̱ṇe |
ratho̭ ha vā̱ṃ bhūri̱ varpa̱: kari̭krat su̱tāva̭to niṣkṛ̱tamāga̭miṣṭhaḥ ||9||
9 gāthino viśvāmitraḥ| mitraḥ| triṣṭup, 6-9 gāyatrī|
mi̱tro janā̭n yātayati bruvā̱ṇo mi̱tro dā̭dhāra pṛthi̱vīmu̱ta dyām |
mi̱traḥ kṛ̱ṣṭīrani̭miṣā̱bhi ca̭ṣṭe mi̱trāya̭ ha̱vyaṃ ghṛ̱tava̭jjuhota ||1||
pra sa mi̭tra̱ marto̭ astu̱ praya̭svā̱n yasta̭ āditya̱ śikṣa̭ti vra̱tena̭ |
na ha̭nyate̱ na jī̭yate̱ tvoto̱ naina̱maṃho̭ aśno̱tyanti̭to̱ na dū̱rāt ||2||
a̱na̱mī̱vāsa̱ iḻa̭yā̱ mada̭nto mi̱tajña̭vo̱ vari̭ma̱nnā pṛ̭thi̱vyāḥ |
ā̱di̱tyasya̭ vra̱tamṷpakṣi̱yanto̭ va̱yaṃ mi̱trasya̭ suma̱tau syā̭ma ||3||
a̱yaṃ mi̱tro na̭ma̱sya̭: su̱śevo̱ rājā̭ sukṣa̱tro a̭janiṣṭa ve̱dhāḥ |
tasya̭ va̱yaṃ sṷma̱tau ya̱jñiya̱syā'pi̭ bha̱dre saṷmana̱se syā̭ma ||4||
ma̱hā~ ā̭di̱tyo nama̭sopa̱sadyo̭ yāta̱yajja̭no gṛṇa̱te su̱śeva̭: |
tasmā̭ e̱tatpanya̭tamāya̱ juṣṭa̭ma̱gnau mi̱trāya̭ ha̱virā jṷhota ||5||
mi̱trasya̭ carṣaṇī̱dhṛto'vo̭ de̱vasya̭ sāna̱si | dyu̱mnaṃ ci̱traśra̭vastamam ||6||
a̱bhi yo ma̭hi̱nā diva̭ṃ mi̱tro ba̱bhūva̭ sa̱prathā̭: | a̱bhi śravo̭bhiḥ pṛthi̱vīm ||7||
mi̱trāya̱ pañca̭ yemire̱ janā̭ a̱bhiṣṭi̭śavase | sa de̱vān viśvā̭n bibharti ||8||
mi̱tro de̱veṣvā̱yuṣu̱ janā̭ya vṛ̱ktaba̭rhiṣe | iṣa̭ i̱ṣṭavra̭tā akaḥ ||9||
7 gāthino viśvāmitraḥ| ṛbhavaḥ, 5-7 indra ṛbhavaśca | jagatī|
i̱heha̭ vo̱ mana̭sā ba̱ndhutā̭ nara u̱śijo̭ jagmura̱bhi tāni̱ veda̭sā |
yābhi̭rmā̱yābhi̱: prati̭jūtivarpasa̱: saudha̭nvanā ya̱jñiya̭ṃ bhā̱gamā̭na̱śa ||1||
yābhi̱: śacī̭bhiścama̱sā~ api̭ṃśata̱ yayā̭ dhi̱yā gāmari̭ṇīta̱ carma̭ṇaḥ |
yena̱ harī̱ mana̭sā ni̱rata̭kṣata̱ tena̭ deva̱tvamṛ̭bhava̱: samā̭naśa ||2||
indra̭sya sa̱khyamṛ̱bhava̱: samā̭naśu̱rmano̱rnapā̭to a̱paso̭ dadhanvire |
sau̱dha̱nva̱nāso̭ amṛta̱tvameri̭re vi̱ṣṭvī śamī̭bhiḥ su̱kṛta̭: sukṛ̱tyayā̭ ||3||
indrḙṇa yātha sa̱ratha̭ṃ su̱te sacā̱~ atho̱ vaśā̭nāṃ bhavathā sa̱ha śri̱yā |
na va̭: prati̱mai sṷkṛ̱tāni̭ vāghata̱: saudha̭nvanā ṛbhavo vī̱ryā̭ṇi ca ||4||
indra̭ ṛ̱bhubhi̱rvāja̭vadbhi̱: samṷkṣitaṃ su̱taṃ soma̱mā vṛ̭ṣasvā̱ gabha̭styoḥ |
dhi̱yeṣi̱to ma̭ghavan dā̱śuṣo̭ gṛ̱he saṷdhanva̱nebhi̭: sa̱ha ma̭tsvā̱ nṛbhi̭: ||5||
indra̭ ṛbhu̱mān vāja̭vān matsve̱ha no̱'smin tsava̭ne̱ śacyā̭ puruṣṭuta |
i̱māni̱ tubhya̱ṃ svasa̭rāṇi yemire vra̱tā de̱vānā̱ṃ manṷṣaśca̱ dharma̭bhiḥ ||6||
indra̭ ṛ̱bhubhi̭rvā̱jibhi̭rvā̱jaya̭nni̱ha stoma̭ṃ jari̱turupa̭ yāhi ya̱jñiya̭m |
śa̱taṃ ketḙbhiriṣi̱rebhi̭rā̱yavḙ sa̱hasra̭ṇītho adhva̱rasya̱ homa̭ni ||7||
7 gāthino viśvāmitraḥ| uṣā| triṣṭup|
uṣo̱ vājḙna vājini̱ pracḙtā̱: stoma̭ṃ juṣasva gṛṇa̱to ma̭ghoni |
pu̱rā̱ṇī dḙvi yuva̱tiḥ pura̭ṃdhi̱ranṷ vra̱taṃ ca̭rasi viśvavāre ||1||
uṣo̭ de̱vyama̭rtyā̱ vi bhā̭hi ca̱ndrara̭thā sū̱nṛtā̭ ī̱raya̭ntī |
ā tvā̭ vahantu su̱yamā̭so̱ aśvā̱ hira̭ṇyavarṇāṃ pṛthu̱pāja̭so̱ ye ||2||
uṣa̭: pratī̱cī bhuva̭nāni̱ viśvo̱rdhvā ti̭ṣṭhasya̱mṛta̭sya ke̱tuḥ |
sa̱mā̱namartha̭ṃ caraṇī̱yamā̭nā ca̱krami̭va navya̱syā va̭vṛtsva ||3||
ava̱ syūmḙva cinva̱tī ma̱ghonyu̱ṣā yā̭ti̱ svasa̭rasya̱ patnī̭ |
sva1rjana̭ntī su̱bhagā̭ su̱daṃsā̱ āntā̭d di̱vaḥ pa̭pratha̱ ā pṛ̭thi̱vyāḥ ||4||
acchā̭ vo de̱vīmu̱ṣasa̭ṃ vibhā̱tīṃ pra vo̭ bharadhva̱ṃ nama̭sā suvṛ̱ktim |
ū̱rdhvaṃ ma̭dhu̱dhā di̱vi pājo̭ aśre̱t pra ro̭ca̱nā rṷruce ra̱ṇvasa̭ṃdṛk ||5||
ṛ̱tāva̭rī di̱vo a̱rkaira̭bo̱dhyā re̱vatī̱ roda̭sī ci̱trama̭sthāt |
ā̱ya̱tīma̭gna u̱ṣasa̭ṃ vibhā̱tīṃ vā̱mamḙṣi̱ dravi̭ṇa̱ṃ bhikṣa̭māṇaḥ ||6||
ṛ̱tasya̭ bu̱dhna u̱ṣasā̭miṣa̱ṇyan vṛṣā̭ ma̱hī roda̭sī̱ ā vi̭veśa |
ma̱hī mi̱trasya̱ varṷṇasya mā̱yā ca̱ndreva̭ bhā̱nuṃ vi da̭dhe puru̱trā ||7||
18 gāthino viśvāmitraḥ 16-18 jamadagnirvā|1-3 indrāvaruṇau, 4-6 bṛhaspatiḥ, 7-9 pūṣā, 10-12 savitā, 13-15 somaḥ, 16-18 mitrāvaruṇau| gāyatrī, 1-3 triṣṭup|
i̱mā ṷ vāṃ bhṛ̱mayo̱ manya̭mānā yu̱vāva̭te̱ na tujyā̭ abhūvan |
kva1 tyadi̭ndrāvaruṇā̱ yaśo̭ vā̱ṃ yena̭ smā̱ sina̱ṃ bhara̭tha̱: sakhi̭bhyaḥ ||1||
a̱yamṷ vāṃ puru̱tamo̭ rayī̱yañcha̭śvatta̱mamava̭se johavīti |
sa̱joṣā̭vindrāvaruṇā ma̱rudbhi̭rdi̱vā pṛ̭thi̱vyā śṛ̭ṇuta̱ṃ hava̭ṃ me ||2||
a̱sme tadi̭ndrāvaruṇā̱ vasṷ ṣyāda̱sme ra̱yirma̭ruta̱: sarva̭vīraḥ |
a̱smān varṷ̄trīḥ śara̱ṇaira̭vantva̱smān hotrā̱ bhāra̭tī̱ dakṣi̭ṇābhiḥ ||3||
bṛha̭spate ju̱ṣasva̭ no ha̱vyāni̭ viśvadevya | rāsva̱ ratnā̭ni dā̱śuṣḙ ||4||
śuci̭ma̱rkairbṛha̱spati̭madhva̱reṣṷ namasyata | anā̱myoja̱ ā ca̭ke ||5||
vṛ̱ṣa̱bhaṃ ca̭rṣaṇī̱nāṃ vi̱śvarṷ̄pa̱madā̭bhyam | bṛha̱spati̱ṃ varḙṇyam ||6||
i̱yaṃ tḙ pūṣannāghṛṇe suṣṭu̱tirdḙva̱ navya̭sī | a̱smābhi̱stubhya̭ṃ śasyate ||7||
tāṃ jṷṣasva̱ gira̱ṃ mama̭ vāja̱yantī̭mavā̱ dhiya̭m | va̱dhū̱yuri̭va̱ yoṣa̭ṇām ||8||
yo viśvā̱bhi vi̱paśya̭ti̱ bhuva̭nā̱ saṃ ca̱ paśya̭ti | sa na̭: pū̱ṣāvi̱tā bhṷvat ||9||
tat sa̭vi̱turvarḙṇya̱ṃ bhargo̭ de̱vasya̭ dhīmahi | dhiyo̱ yo na̭: praco̱dayā̭t ||10||||
de̱vasya̭ savi̱turva̱yaṃ vā̭ja̱yanta̱: pura̭ṃdhyā | bhaga̭sya rā̱timī̭mahe ||11||||
de̱vaṃ nara̭: savi̱tāra̱ṃ viprā̭ ya̱jñaiḥ sṷvṛ̱ktibhi̭: | na̱ma̱syanti̭ dhi̱yeṣi̱tāḥ ||12||
somo̭ jigāti gātu̱vid de̱vānā̭meti niṣkṛ̱tam | ṛ̱tasya̱ yoni̭mā̱sada̭m ||13||
somo̭ a̱smabhya̭ṃ dvi̱pade̱ catṷṣpade ca pa̱śavḙ | a̱na̱mī̱vā iṣa̭skarat ||14||
a̱smāka̱māyṷrva̱rdhaya̭nna̱bhimā̭tī̱: saha̭mānaḥ | soma̭: sa̱dhastha̱māsa̭dat ||15||
ā no̭ mitrāvaruṇā ghṛ̱tairgavyṷ̄timukṣatam | madhvā̱ rajā̭ṃsi sukratū ||16||
u̱ru̱śaṃsā̭ namo̱vṛdhā̭ ma̱hnā dakṣa̭sya rājathaḥ | drāghi̭ṣṭhābhiḥ śucivratā ||17||
gṛ̱ṇā̱nā ja̱mada̭gninā̱ yonā̭vṛ̱tasya̭ sīdatam | pā̱taṃ soma̭mṛtāvṛdhā ||18||