Rigveda — Mandala 5

12 budhagaviṣṭhirāvātreyau| agniḥ| triṣṭup|abo̭dhya̱gniḥ sa̱midhā̱ janā̭nā̱ṃ prati̭ dhe̱numi̭vāya̱tīmu̱ṣāsa̭m | ya̱hvā i̭va̱ pra va̱yāmu̱jjihā̭nā̱: pra bhā̱nava̭: sisrate̱ nāka̱maccha̭ ||1||abo̭dhi̱ hotā̭ ya̱jathā̭ya de̱vānū̱rdhvo a̱gniḥ su̱manā̭: prā̱tara̭sthāt | sami̭ddhasya̱ ruśa̭dadarśi̱ pājo̭ ma̱hān de̱vastama̭so̱ nira̭moci ||2||yadī̭ṃ ga̱ṇasya̭ raśa̱nāmajī̭ga̱: śuci̭raṅkte̱ śuci̭bhi̱rgobhi̭ra̱gniḥ | ād dakṣi̭ṇā yujyate vāja̱yantyṷttā̱nāmū̱rdhvo a̭dhayajju̱hūbhi̭: ||3||a̱gnimacchā̭ devaya̱tāṃ manā̭ṃsi̱ cakṣṷ̄ṃṣīva̱ sūrye̱ saṃ ca̭ranti | yadī̱ṃ suvā̭te u̱ṣasā̱ virṷ̄pe śve̱to vā̱jī jā̭yate̱ agre̱ ahnā̭m ||4||jani̭ṣṭa̱ hi jenyo̱ agre̱ ahnā̭ṃ hi̱to hi̱teṣva̭ru̱ṣo vanḙṣu | damḙdame sa̱pta ratnā̱ dadhā̭no̱'gnirhotā̱ ni ṣa̭sādā̱ yajī̭yān ||5||a̱gnirhotā̱ nya̭sīda̱d yajī̭yānu̱pasthḙ mā̱tuḥ sṷra̱bhā ṷ lo̱ke | yuvā̭ ka̱viḥ pṷruni̱ṣṭha ṛ̱tāvā̭ dha̱rtā kṛ̭ṣṭī̱nāmu̱ta madhya̭ i̱ddhaḥ ||6||pra ṇu tyaṃ vipra̭madhva̱reṣṷ sā̱dhuma̱gniṃ hotā̭ramīḻate̱ namo̭bhiḥ | ā yasta̱tāna̱ roda̭sī ṛ̱tena̱ nitya̭ṃ mṛjanti vā̱jina̭ṃ ghṛ̱tena̭ ||7||mā̱rjā̱lyo̭ mṛjyate̱ sve damṷ̄nāḥ kavipraśa̱sto ati̭thiḥ śi̱vo na̭: | sa̱hasra̭śṛṅgo vṛṣa̱bhastado̭jā̱ viśvā̭~ agne̱ saha̭sā̱ prāsya̱nyān ||8||pra sa̱dyo a̭gne̱ atyḙṣya̱nyānā̱viryasmai̱ cārṷtamo ba̱bhūtha̭ | ī̱ḻenyo̭ vapu̱ṣyo̭ vi̱bhāvā̭ pri̱yo vi̱śāmati̭thi̱rmānṷṣīṇām ||9||tubhya̭ṃ bharanti kṣi̱tayo̭ yaviṣṭha ba̱lima̭gne̱ anti̭ta̱ ota dū̱rāt | ā bhandi̭ṣṭhasya suma̱tiṃ ci̭kiddhi bṛ̱hat tḙ agne̱ mahi̱ śarma̭ bha̱dram ||10||ādya ratha̭ṃ bhānumo bhānu̱manta̱magne̱ tiṣṭha̭ yaja̱tebhi̱: sama̭ntam | vi̱dvān pa̭thī̱nāmu̱rva1ntari̭kṣa̱meha de̱vān ha̭vi̱radyā̭ya vakṣi ||11||avo̭cāma ka̱vaye̱ medhyā̭ya̱ vaco̭ va̱ndārṷ vṛṣa̱bhāya̱ vṛṣṇḙ | gavi̭ṣṭhiro̱ nama̭sā̱ stoma̭ma̱gnau di̱vī̭va ru̱kmamṷru̱vyañca̭maśret ||12||
12 kumāra ātreyaḥ, vṛśo vā jānaḥ, ubhau vā, 2, 9 vṛśo jānaḥ| agniḥ| triṣṭup, 12 śakvarī|
ku̱mā̱raṃ mā̱tā yṷva̱tiḥ samṷbdha̱ṃ guhā̭ bibharti̱ na da̭dāti pi̱tre |
anī̭kamasya̱ na mi̱najjanā̭saḥ pu̱raḥ pa̭śyanti̱ nihi̭tamara̱tau ||1||
kame̱taṃ tvaṃ yṷvate kumā̱raṃ peṣī̭ bibharṣi̱ mahi̭ṣī jajāna |
pū̱rvīrhi garbha̭: śa̱rado̭ va̱vardhā'pa̭śyaṃ jā̱taṃ yadasṷ̄ta mā̱tā ||2||
hira̭ṇyadanta̱ṃ śuci̭varṇamā̱rāt kṣetrā̭dapaśya̱māyṷdhā̱ mimā̭nam |
da̱dā̱no a̭smā a̱mṛta̭ṃ vi̱pṛkva̱t kiṃ māma̭ni̱ndrāḥ kṛ̭ṇavannanu̱kthāḥ ||3||
kṣetrā̭dapaśyaṃ sanu̱taścara̭ntaṃ su̱mad yū̱thaṃ na pu̱ru śobha̭mānam |
na tā a̭gṛbhra̱nnaja̭niṣṭa̱ hi ṣaḥ pali̭knī̱rid yṷva̱tayo̭ bhavanti ||4||
ke mḙ marya̱kaṃ vi ya̭vanta̱ gobhi̱rna yeṣā̭ṃ go̱pā ara̭ṇaści̱dāsa̭ |
ya ī̭ṃ jagṛ̱bhurava̱ te sṛ̭ja̱ntvājā̭ti pa̱śva upa̭ naściki̱tvān ||5||
va̱sāṃ rājā̭naṃ vasa̱tiṃ janā̭nā̱marā̭tayo̱ ni da̭dhu̱rmartyḙṣu |
brahmā̱ṇyatre̱rava̱ taṃ sṛ̭jantu nindi̱tāro̱ nindyā̭so bhavantu ||6||
śuna̭ści̱cchepa̱ṃ nidi̭taṃ sa̱hasrā̱d yūpā̭damuñco̱ aśa̭miṣṭa̱ hi ṣaḥ |
e̱vāsmada̭gne̱ vi mṷmugdhi̱ pāśā̱n hota̭ścikitva i̱ha tū ni̱ṣadya̭ ||7||
hṛ̱ṇī̱yamā̭no̱ apa̱ hi madaiye̱: pra mḙ de̱vānā̭ṃ vrata̱pā ṷvāca |
indro̭ vi̱dvā~ anu̱ hi tvā̭ ca̱cakṣa̱ tenā̱hama̭gne̱ anṷśiṣṭa̱ āgā̭m ||8||
vi jyoti̭ṣā bṛha̱tā bhā̭tya̱gnirā̱virviśvā̭ni kṛṇute mahi̱tvā |
prādḙvīrmā̱yāḥ sa̭hate du̱revā̱: śiśī̭te̱ śṛṅge̱ rakṣa̭se vi̱nikṣḙ ||9||
u̱ta svā̱nāso̭ di̱vi ṣa̭ntva̱gnesti̱gmāyṷdhā̱ rakṣa̭se̱ hanta̱vā ṷ |
madḙ cidasya̱ pra rṷjanti̱ bhāmā̱ na va̭rante pari̱bādho̱ adḙvīḥ ||10||
e̱taṃ te̱ stoma̭ṃ tuvijāta̱ vipro̱ ratha̱ṃ na dhīra̱: svapā̭ atakṣam |
yadīda̭gne̱ prati̱ tvaṃ dḙva̱ haryā̱: sva̭rvatīra̱pa ḙnā jayema ||11||
tu̱vi̱grīvo̭ vṛṣa̱bho vā̭vṛdhā̱no̭'śa̱trva1ryaḥ sama̭jāti̱ veda̭: |
itī̱mama̱gnima̱mṛtā̭ avocan ba̱rhiṣma̭te̱ mana̭ve̱ śarma̭ yaṃsaddha̱viṣma̭te̱ mana̭ve̱ śarma̭ yaṃsat ||12||
12 vasuśruta ātreyaḥ| agniḥ, 3 marudrudraviṣṇavaḥ| triṣṭup, 1 virāṭ|
tvama̭gne̱ varṷṇo̱ jāya̭se̱ yattvaṃ mi̱tro bha̭vasi̱ yatsami̭ddhaḥ |
tve viśvḙ sahasasputra de̱vāstvamindro̭ dā̱śuṣe̱ martyā̭ya ||1||
tvama̭rya̱mā bha̭vasi̱ yat ka̱nīnā̱ṃ nāma̭ svadhāva̱n guhya̭ṃ bibharṣi |
a̱ñjanti̭ mi̱traṃ sudhi̭ta̱ṃ na gobhi̱ryad dampa̭tī̱ sama̭nasā kṛ̱ṇoṣi̭ ||2||
tava̭ śri̱ye ma̱ruto̭ marjayanta̱ rudra̱ yat te̱ jani̭ma̱ cārṷ ci̱tram |
pa̱daṃ yad viṣṇo̭rupa̱maṃ ni̱dhāyi̱ tena̭ pāsi̱ guhya̱ṃ nāma̱ gonā̭m ||3||
tava̭ śri̱yā su̱dṛśo̭ deva de̱vāḥ pu̱rū dadhā̭nā a̱mṛta̭ṃ sapanta |
hotā̭rama̱gniṃ manṷṣo̱ ni ṣḙdurdaśa̱syanta̭ u̱śija̱: śaṃsa̭mā̱yoḥ ||4||
na tvaddhotā̱ pūrvo̭ agne̱ yajī̭yā̱n na kāvyai̭: pa̱ro a̭sti svadhāvaḥ |
vi̱śaśca̱ yasyā̱ ati̭thi̱rbhavā̭si̱ sa ya̱jñena̭ vanavad deva̱ martā̭n ||5||
va̱yama̭gne vanuyāma̱ tvotā̭ vasū̱yavo̭ ha̱viṣā̱ budhya̭mānāḥ |
va̱yaṃ sa̭ma̱rye vi̱dathe̱ṣvahnā̭ṃ va̱yaṃ rā̱yā sa̭hasasputra̱ martā̭n ||6||
yo na̱ āgo̭ a̱bhyeno̱ bharā̱tyadhīda̱ghama̱ghaśa̭ṃse dadhāta |
ja̱hī ci̭kitvo a̱bhiśa̭stime̱tāmagne̱ yo no̭ ma̱rcaya̭ti dva̱yena̭ ||7||
tvāma̱syā vyuṣi̭ deva̱ pūrvḙ dū̱taṃ kṛ̭ṇvā̱nā a̭yajanta ha̱vyaiḥ |
sa̱ṃsthe yada̭gna̱ īya̭se rayī̱ṇāṃ de̱vo martai̱rvasṷbhiri̱dhyamā̭naḥ ||8||
ava̭ spṛdhi pi̱tara̱ṃ yodhi̭ vi̱dvān pu̱tro yastḙ sahasaḥ sūna ū̱he |
ka̱dā ci̭kitvo a̱bhi ca̭kṣase̱ no'gnḙ ka̱dā~ ṛ̭ta̱cid yā̭tayāse ||9||
bhūri̱ nāma̱ vanda̭māno dadhāti pi̱tā va̭so̱ yadi̱ tajjo̱ṣayā̭se |
ku̱vid de̱vasya̱ saha̭sā cakā̱naḥ su̱mnama̱gnirva̭nate vāvṛdhā̱naḥ ||10||
tvama̱ṅga ja̭ri̱tāra̭ṃ yaviṣṭha̱ viśvā̭nyagne duri̱tāti̭ parṣi |
ste̱nā a̭dṛśran ri̱pavo̱ janā̱so'jñā̭taketā vṛji̱nā a̭bhūvan ||11||
i̱me yāmā̭sastva̱driga̭bhūva̱n vasa̭ve vā̱ tadidāgo̭ avāci |
nāhā̱yama̱gnira̱bhiśa̭staye no̱ na rīṣa̭te vāvṛdhā̱naḥ parā̭ dāt ||12||
11 vasuśruta ātreyaḥ| agniḥ| triṣṭup|
tvāma̭gne̱ vasṷpati̱ṃ vasṷ̄nāma̱bhi pra ma̭nde adhva̱reṣṷ rājan |
tvayā̱ vāja̭ṃ vāja̱yanto̭ jayemā̱'bhi ṣyā̭ma pṛtsu̱tīrmartyā̭nām ||1||
ha̱vya̱vāḻa̱gnira̱jara̭: pi̱tā no̭ vi̱bhurvi̱bhāvā̭ su̱dṛśī̭ko a̱sme |
su̱gā̱rha̱pa̱tyāḥ samiṣo̭ didīhyasma̱drya1k saṃ mi̭mīhi̱ śravā̭ṃsi ||2||
vi̱śāṃ ka̱viṃ vi̱śpati̱ṃ mānṷṣīṇā̱ṃ śuci̭ṃ pāva̱kaṃ ghṛ̱tapṛ̭ṣṭhama̱gnim |
ni hotā̭raṃ viśva̱vida̭ṃ dadhidhve̱ sa de̱veṣṷ vanate̱ vāryā̭ṇi ||3||
ju̱ṣasvā̭gna̱ iḻa̭yā sa̱joṣā̱ yata̭māno ra̱śmibhi̱: sūrya̭sya |
ju̱ṣasva̭ naḥ sa̱midha̭ṃ jātaveda̱ ā ca̭ de̱vān ha̭vi̱radyā̭ya vakṣi ||4||
juṣṭo̱ damṷ̄nā̱ ati̭thirduro̱ṇa i̱maṃ no̭ ya̱jñamupa̭ yāhi vi̱dvān |
viśvā̭ agne abhi̱yujo̭ vi̱hatyā̭ śatrūya̱tāmā bha̭rā̱ bhoja̭nāni ||5||
va̱dhena̱ dasyu̱ṃ pra hi cā̱taya̭sva̱ vaya̭: kṛṇvā̱nasta̱nve̱3 svāyai̭ |
pipa̭rṣi̱ yat sa̭hasasputra de̱vān tso a̭gne pāhi nṛtama̱ vājḙ a̱smān ||6||
va̱yaṃ tḙ agna u̱kthairvi̭dhema va̱yaṃ ha̱vyaiḥ pā̭vaka bhadraśoce |
a̱sme ra̱yiṃ vi̱śvavā̭ra̱ṃ sami̭nvā̱sme viśvā̭ni̱ dravi̭ṇāni dhehi ||7||
a̱smāka̭magne adhva̱raṃ jṷṣasva̱ saha̭saḥ sūno triṣadhastha ha̱vyam |
va̱yaṃ de̱veṣṷ su̱kṛta̭: syāma̱ śarma̭ṇā nastri̱varṷ̄thena pāhi ||8||
viśvā̭ni no du̱rgahā̭ jātaveda̱: sindhu̱ṃ na nā̱vā dṷri̱tāti̭ parṣi |
agnḙ atri̱vannama̭sā gṛṇā̱no̱3'smāka̭ṃ bodhyavi̱tā ta̱nūnā̭m ||9||
yastvā̭ hṛ̱dā kī̱riṇā̱ manya̭mā̱no'ma̭rtya̱ṃ martyo̱ joha̭vīmi |
jāta̭vedo̱ yaśo̭ a̱smāsṷ dhehi pra̱jābhi̭ragne amṛta̱tvama̭śyām ||10||
yasmai̱ tvaṃ su̱kṛtḙ jātaveda u lo̱kama̭gne kṛ̱ṇava̭: syo̱nam |
a̱śvina̱ṃ sa pu̱triṇa̭ṃ vī̱rava̭nta̱ṃ goma̭ntaṃ ra̱yiṃ na̭śate sva̱sti ||11||
11 vasuśruta ātreyaḥ| āprīsūktaṃ- (1 idhmaḥ samiddho'gnirvā, 2 narāśaṃsaḥ, 3 iḻaḥ, 4 barhiḥ, 5 devīrdvāraḥ, 6 uṣāsāktā, 7daivyo hotārau pracetasau, 8 tisro devyaḥ sarasvatīḻābhāratyaḥ, 9tvaṣṭā, 10 vanaspatiḥ, 11 svāhākṛtayaḥ )|gāyatrī|
susa̭middhāya śo̱ciṣḙ ghṛ̱taṃ tī̱vraṃ jṷhotana | a̱gnayḙ jā̱tavḙdase ||1||
narā̱śaṃsa̭: suṣūdatī̱maṃ ya̱jñamadā̭bhyaḥ | ka̱virhi madhṷhastyaḥ ||2||
ī̱ḻi̱to a̭gna̱ ā va̱hendra̭ṃ ci̱trami̱ha pri̱yam | su̱khai rathḙbhirū̱tayḙ ||3||
ūrṇa̭mradā̱ vi pra̭thasvā̱bhya1rkā a̭nūṣata | bhavā̭ naḥ śubhra sā̱tayḙ ||4||
devī̭rdvāro̱ vi śra̭yadhvaṃ suprāya̱ṇā na̭ ū̱tayḙ | prapra̭ ya̱jñaṃ pṛ̭ṇītana ||5||
su̱pratī̭ke vayo̱vṛdhā̭ ya̱hvī ṛ̱tasya̭ mā̱tarā̭ | do̱ṣāmu̱ṣāsa̭mīmahe ||6||
vāta̭sya̱ patma̭nnīḻi̱tā daivyā̱ hotā̭rā̱ manṷṣaḥ | i̱maṃ no̭ ya̱jñamā ga̭tam ||7||
iḻā̱ sara̭svatī ma̱hī ti̱sro de̱vīrma̭yo̱bhuva̭: | ba̱rhiḥ sī̭dantva̱sridha̭: ||8||
śi̱vastva̭ṣṭari̱hā ga̭hi vi̱bhuḥ poṣa̭ u̱ta tmanā̭ | ya̱jñeya̭jñe na̱ uda̭va ||9||
yatra̱ vettha̭ vanaspate de̱vānā̱ṃ guhyā̱ nāmā̭ni | tatra̭ ha̱vyāni̭ gāmaya ||10||
svāhā̱gnaye̱ varṷṇāya̱ svāhendrā̭ya ma̱rudbhya̭: | svāhā̭ de̱vebhyo̭ ha̱viḥ ||11||
10 vasuśruta ātreyaḥ| agniḥ| paṃktiḥ|
a̱gniṃ taṃ ma̭nye̱ yo vasu̱rasta̱ṃ yaṃ yanti̭ dhe̱nava̭: |
asta̱marva̭nta ā̱śavo'sta̱ṃ nityā̭so vā̱jina̱ iṣa̭ṃ sto̱tṛbhya̱ ā bha̭ra ||1||
so a̱gniryo vasṷrgṛ̱ṇe saṃ yamā̱yanti̭ dhe̱nava̭: |
samarva̭nto raghu̱druva̱: saṃ sṷjā̱tāsa̭: sū̱raya̱ iṣa̭ṃ sto̱tṛbhya̱ ā bha̭ra ||2||
a̱gnirhi vā̱jina̭ṃ vi̱śe dadā̭ti vi̱śvaca̭rṣaṇiḥ |
a̱gnī rā̱ye svā̱bhuva̱ṃ sa prī̱to yā̭ti̱ vārya̱miṣa̭ṃ sto̱tṛbhya̱ ā bha̭ra ||3||
ā tḙ agna idhīmahi dyu̱manta̭ṃ devā̱jara̭m |
yaddha̱ syā te̱ panī̭yasī sa̱mid dī̱daya̭ti̱ dyavīṣa̭ṃ sto̱tṛbhya̱ ā bha̭ra ||4||
ā tḙ agna ṛ̱cā ha̱viḥ śukra̭sya śociṣaspate |
suśca̭ndra̱ dasma̱ viśpa̭te̱ havya̭vā̱ṭ tubhya̭ṃ hūyata̱ iṣa̭ṃ sto̱tṛbhya̱ ā bha̭ra ||5||
pro tye a̱gnayo̱'gniṣu̱ viśva̭ṃ puṣyanti̱ vārya̭m |
te hi̭nvire̱ ta i̭nvire̱ ta i̭ṣaṇyantyānu̱ṣagiṣa̭ṃ sto̱tṛbhya̱ ā bha̭ra ||6||
tava̱ tye a̭gne a̱rcayo̱ mahi̭ vrādhanta vā̱jina̭: |
ye patva̭bhiḥ śa̱phānā̭ṃ vra̱jā bhu̱ranta̱ gonā̱miṣa̭ṃ sto̱tṛbhya̱ ā bha̭ra ||7||
navā̭ no agna̱ ā bha̭ra sto̱tṛbhya̭: sukṣi̱tīriṣa̭: |
te syā̭ma̱ ya ā̭nṛ̱custvādṷ̄tāso̱ damḙdama̱ iṣa̭ṃ sto̱tṛbhya̱ ā bha̭ra ||8||
u̱bhe sṷścandra sa̱rpiṣo̱ darvī̭ śrīṇīṣa ā̱sani̭ |
u̱to na̱ ut pṷpūryā u̱ktheṣṷ śavasaspata̱ iṣa̭ṃ sto̱tṛbhya̱ ā bha̭ra ||9||
e̱vā~ a̱gnima̭juryamurgī̱rbhirya̱jñebhi̭rānu̱ṣak |
dadha̭da̱sme su̱vīrya̭mu̱ta tyadā̱śvaśvya̱miṣa̭ṃ sto̱tṛbhya̱ ā bha̭ra ||10||
10 iṣa ātreyaḥ| agniḥ| anuṣṭup, 10 paṃktiḥ|
sakhā̭ya̱: saṃ va̭: sa̱myañca̱miṣa̱ṃ stoma̭ṃ cā̱gnayḙ |
varṣi̭ṣṭhāya kṣitī̱nāmū̱rjo naptre̱ saha̭svate ||1||
kutrā̭ ci̱d yasya̱ samṛ̭tau ra̱ṇvā naro̭ nṛ̱ṣada̭ne |
arha̭ntaści̱d yami̭ndha̱te sa̭ṃja̱naya̭nti ja̱ntava̭: ||2||
saṃ yadi̱ṣo vanā̭mahe̱ saṃ ha̱vyā mānṷṣāṇām |
u̱ta dyu̱mnasya̱ śava̭sa ṛ̱tasya̭ ra̱śmimā da̭de ||3||
saḥ smā̭ kṛṇoti ke̱tumā nakta̭ṃ cid dū̱ra ā sa̱te |
pā̱va̱ko yad vana̱spatī̱n pra smā̭ mi̱nātya̱jara̭: ||4||
ava̭ sma̱ yasya̱ veṣa̭ṇe̱ sveda̭ṃ pa̱thiṣu̱ juhva̭ti |
a̱bhīmaha̱ svajḙnya̱ṃ bhūmā̭ pṛ̱ṣṭheva̭ ruruhuḥ ||5||
yaṃ martya̭: puru̱spṛha̭ṃ vi̱dad viśva̭sya̱ dhāya̭se |
pra svāda̭naṃ pitū̱nāmasta̭tātiṃ cidā̱yavḙ ||6||
sa hi ṣmā̱ dhanvākṣi̭ta̱ṃ dātā̱ na dātyā pa̱śuḥ |
hiri̭śmaśru̱: śuci̭dannṛ̱bhurani̭bhṛṣṭataviṣiḥ ||7||
śuci̭: ṣma̱ yasmā̭ atri̱vat pra svadhi̭tīva̱ rīya̭te |
su̱ṣūra̭sūta mā̱tā krā̱ṇā yadā̭na̱śe bhaga̭m ||8||
ā yastḙ sarpirāsu̱te'gne̱ śamasti̱ dhāya̭se |
aiṣṷ dyu̱mnamu̱ta śrava̱ ā ci̱ttaṃ martyḙṣu dhāḥ ||9||
iti̭ cinma̱nyuma̱dhrija̱stvādā̭ta̱mā pa̱śuṃ da̭de |
āda̭gne̱ apṛ̭ṇa̱to'tri̭: sāsahyā̱d dasyṷ̄ni̱ṣaḥ sā̭sahyā̱nnṝn ||10||
7 iṣa ātreyaḥ| agniḥ| jagatī|
tvāma̭gna ṛtā̱yava̱: samī̭dhire pra̱tnaṃ pra̱tnāsa̭ ū̱tayḙ sahaskṛta |
pu̱ru̱śca̱ndraṃ ya̭ja̱taṃ vi̱śvadhā̭yasa̱ṃ damṷ̄nasaṃ gṛ̱hapa̭ti̱ṃ varḙṇyam ||1||
tvāma̭gne̱ ati̭thiṃ pū̱rvyaṃ viśa̭: śo̱ciṣkḙśaṃ gṛ̱hapa̭ti̱ṃ ni ṣḙdire |
bṛ̱hatkḙtuṃ puru̱rūpa̭ṃ dhana̱spṛta̭ṃ su̱śarmā̭ṇa̱ṃ svava̭saṃ jara̱dviṣa̭m ||2||
tvāma̭gne̱ mānṷṣīrīḻate̱ viśo̭ hotrā̱vida̱ṃ vivi̭ciṃ ratna̱dhāta̭mam |
guhā̱ santa̭ṃ subhaga vi̱śvada̭rśataṃ tuviṣva̱ṇasa̭ṃ su̱yaja̭ṃ ghṛta̱śriya̭m ||3||
tvāma̭gne dharṇa̱siṃ vi̱śvadhā̭ va̱yaṃ gī̱rbhirgṛ̱ṇanto̱ nama̱sopa̭ sedima |
sa no̭ juṣasva samidhā̱no a̭ṅgiro de̱vo marta̭sya ya̱śasā̭ sudī̱tibhi̭: ||4||
tvama̭gne puru̱rūpo̭ vi̱śevi̭śe̱ vayo̭ dadhāsi pra̱tnathā̭ puruṣṭuta |
pu̱rūṇyannā̱ saha̭sā̱ vi rā̭jasi̱ tviṣi̱: sā tḙ titviṣā̱ṇasya̱ nādhṛṣḙ ||5||
tvāma̭gne samidhā̱naṃ ya̭viṣṭhya de̱vā dū̱taṃ ca̭krire havya̱vāha̭nam |
u̱ru̱jraya̭saṃ ghṛ̱tayo̭ni̱māhṷtaṃ tve̱ṣaṃ cakṣṷrdadhire coda̱yanma̭ti ||6||
tvāma̭gne pra̱diva̱ āhṷtaṃ ghṛ̱taiḥ sṷmnā̱yava̭: suṣa̱midhā̱ samī̭dhire |
sa vā̭vṛdhā̱na oṣa̭dhībhirukṣi̱to̱3'bhi jrayā̭ṃsi̱ pārthi̭vā̱ vi ti̭ṣṭhase ||7||
7 gaya ātreyaḥ| agniḥ| anuṣṭup, 5-7 paṃktiḥ|
tvāma̭gne ha̱viṣma̭nto de̱vaṃ martā̭sa īḻate |
manyḙ tvā jā̱tavḙdasa̱ṃ sa ha̱vyā va̭kṣyānu̱ṣak ||1||
a̱gnirhotā̱ dāsva̭ta̱: kṣaya̭sya vṛ̱ktaba̭rhiṣaḥ |
saṃ ya̱jñāsa̱ścara̭nti̱ yaṃ saṃ vājā̭saḥ śrava̱syava̭: ||2||
u̱ta sma̱ yaṃ śiśṷṃ yathā̱ nava̱ṃ jani̭ṣṭā̱raṇī̭ |
dha̱rtāra̱ṃ mānṷṣīṇāṃ vi̱śāma̱gniṃ sva̭dhva̱ram ||3||
u̱ta sma̭ durgṛbhīyase pu̱tro na hvā̱ryāṇā̭m |
pu̱rū yo dagdhāsi̱ vanā 'gnḙ pa̱śurna yava̭se ||4||
adha̭ sma̱ yasyā̱rcaya̭: sa̱myak saṃyanti̭ dhū̱mina̭: |
yadī̱maha̭ tri̱to di̱vyupa̱ dhmātḙva̱ dhama̭ti̱ śiśī̭te dhmā̱tarī̭ yathā ||5||
tavā̱hama̭gna ū̱tibhi̭rmi̱trasya̭ ca̱ praśa̭stibhiḥ |
dve̱ṣo̱yuto̱ na dṷri̱tā tu̱ryāma̱ martyā̭nām ||6||
taṃ no̭ agne a̱bhī naro̭ ra̱yiṃ sa̭hasva̱ ā bha̭ra |
sa kṣḙpaya̱t sa po̭ṣaya̱d bhuva̱d vāja̭sya sā̱taya̭ u̱taidhi̭ pṛ̱tsu no̭ vṛ̱dhe ||7||
7 gaya ātreyaḥ| agniḥ| anuṣṭup, 4-7 paṃktiḥ|
agna̱ oji̭ṣṭha̱mā bha̭ra dyu̱mnama̱smabhya̭madhrigo |
pra no̭ rā̱yā parī̭ṇasā̱ ratsi̱ vājā̭ya̱ panthā̭m ||1||
tvaṃ no̭ agne adbhuta̱ kratvā̱ dakṣa̭sya ma̱ṃhanā̭ |
tve a̭su̱rya1mārṷhat krā̱ṇā mi̱tro na ya̱jñiya̭: ||2||
tvaṃ no̭ agna eṣā̱ṃ gaya̭ṃ pu̱ṣṭiṃ ca̭ vardhaya |
ye stomḙbhi̱: pra sū̱rayo̱ naro̭ ma̱ghānyā̭na̱śuḥ ||3||
ye a̭gne candra te̱ gira̭: śu̱mbhantyaśva̭rādhasaḥ |
śuṣmḙbhiḥ śu̱ṣmiṇo̱ naro̭ di̱vaści̱d yeṣā̭ṃ bṛ̱hat sṷkī̱rtirbodha̭ti̱ tmanā̭ ||4||
tava̱ tye a̭gne a̱rcayo̱ bhrāja̭nto yanti dhṛṣṇu̱yā |
pari̭jmāno̱ na vi̱dyuta̭: svā̱no ratho̱ na vā̭ja̱yuḥ ||5||
nū no̭ agna ū̱tayḙ sa̱bādha̭saśca rā̱tayḙ |
a̱smākā̭saśca sū̱rayo̱ viśvā̱ āśā̭starī̱ṣaṇi̭ ||6||
tvaṃ no̭ agne aṅgiraḥ stu̱taḥ stavā̭na̱ ā bha̭ra |
hota̭rvibhvā̱saha̭ṃ ra̱yiṃ: sto̱tṛbhya̱: stava̭se ca na u̱taidhi̭ pṛ̱tsu no̭ vṛ̱dhe ||7||
6 sutaṃbhara ātreyaḥ| agniḥ | jagatī|
jana̭sya go̱pā a̭janiṣṭa̱ jāgṛ̭vira̱gniḥ su̱dakṣa̭: suvi̱tāya̱ navya̭se |
ghṛ̱tapra̭tīko bṛha̱tā di̭vi̱spṛśā̭ dyu̱mad vi bhā̭ti bhara̱tebhya̱: śuci̭: ||1||
ya̱jñasya̭ ke̱tuṃ pra̭tha̱maṃ pu̱rohi̭tama̱gniṃ nara̭striṣadha̱sthe samī̭dhire |
indrḙṇa de̱vaiḥ sa̱ratha̱ṃ sa ba̱rhiṣi̱ sīda̱nni hotā̭ ya̱jathā̭ya su̱kratṷ: ||2||
asa̭mmṛṣṭo jāyase mā̱troḥ śuci̭rma̱ndraḥ ka̱viruda̭tiṣṭho vi̱vasva̭taḥ |
ghṛ̱tena̭ tvāvardhayannagna āhuta dhū̱mastḙ ke̱tura̭bhavad di̱vi śri̱taḥ ||3||
a̱gnirno̭ ya̱jñamupa̭ vetu sādhu̱yā 'gniṃ naro̱ vi bha̭rante gṛ̱hegṛ̭he |
a̱gnirdū̱to a̭bhavaddhavya̱vāha̭no̱'gniṃ vṛ̭ṇā̱nā vṛ̭ṇate ka̱vikra̭tum ||4||
tubhye̱dama̭gne̱ madhṷmattama̱ṃ vaca̱stubhya̭ṃ manī̱ṣā i̱yama̭stu̱ śaṃ hṛ̱de |
tvāṃ gira̱: sindhṷmivā̱vanī̭rma̱hīrā pṛ̭ṇanti̱ śava̭sā va̱rdhaya̭nti ca ||5||
tvāma̭gne̱ aṅgi̭raso̱ guhā̭ hi̱tamanva̭vindañchiśriyā̱ṇaṃ vanḙvane |
sa jā̭yase ma̱thyamā̭na̱: saho̭ ma̱hat tvāmā̭hu̱: saha̭saspu̱trama̭ṅgiraḥ ||6||
6 sutaṃbhara ātreyaḥ| agniḥ | triṣṭup|
prāgnayḙ bṛha̱te ya̱jñiyā̭ya ṛ̱tasya̱ vṛṣṇe̱ asṷrāya̱ manma̭ |
ghṛ̱taṃ na ya̱jña ā̱sye̱3 supṷ̄ta̱ṃ gira̭ṃ bhare vṛṣa̱bhāya̭ pratī̱cīm ||1||
ṛ̱taṃ ci̭kitva ṛ̱tamicci̭kiddhyṛ̱tasya̱ dhārā̱ anṷ tṛndhi pū̱rvīḥ |
nāhaṃ yā̱tuṃ saha̭sā̱ na dva̱yena̭ ṛ̱taṃ sa̭pāmyaru̱ṣasya̱ vṛṣṇa̭: ||2||
kayā̭ no agna ṛ̱taya̭nnṛ̱tena̱ bhuvo̱ navḙdā u̱catha̭sya̱ navya̭: |
vedā̭ me de̱va ṛ̭tu̱pā ṛ̭tū̱nāṃ nāhaṃ pati̭ṃ sani̱tura̱sya rā̱yaḥ ||3||
ke tḙ agne ri̱pave̱ bandha̭nāsa̱: ke pā̱yava̭: saniṣanta dyu̱manta̭: |
ke dhā̱sima̭gne̱ anṛ̭tasya pānti̱ ka āsa̭to̱ vaca̭saḥ santi go̱pāḥ ||4||
sakhā̭yaste̱ viṣṷṇā agna e̱te śi̱vāsa̱: santo̱ aśi̭vā abhūvan |
adhṷ̄rṣata sva̱yame̱te vaco̭bhirṛjūya̱te vṛ̭ji̱nāni̭ bru̱vanta̭: ||5||
yastḙ agne̱ nama̭sā ya̱jñamīṭṭa̭ ṛ̱taṃ sa pā̭tyaru̱ṣasya̱ vṛṣṇa̭: |
tasya̱ kṣaya̭: pṛ̱thurā sā̱dhurḙtu pra̱sarsrā̭ṇasya̱ nahṷṣasya̱ śeṣa̭: ||6||
6 sutaṃbhara ātreyaḥ| agniḥ | gāyatrī|
arca̭ntastvā havāma̱he'rca̭nta̱: sami̭dhīmahi | agne̱ arca̭nta ū̱tayḙ ||1||
a̱gneḥ stoma̭ṃ manāmahe si̱dhrama̱dya di̭vi̱spṛśa̭: | de̱vasya̭ draviṇa̱syava̭: ||2||
a̱gnirjṷṣata no̱ giro̱ hotā̱ yo mānṷṣe̱ṣvā | sa ya̭kṣa̱d daivya̱ṃ jana̭m ||3||
tvama̭gne sa̱prathā̭ asi̱ juṣṭo̱ hotā̱ varḙṇyaḥ | tvayā̭ ya̱jñaṃ vi ta̭nvate ||4||
tvāma̭gne vāja̱sāta̭ma̱ṃ viprā̭ vardhanti̱ suṣṭṷtam | sa no̭ rāsva su̱vīrya̭m ||5||
agnḙ ne̱mira̱rā~ i̭va de̱vā~stvaṃ pa̭ri̱bhūra̭si | ā rādha̭ści̱tramṛ̭ñjase ||6||
6 sutaṃbhara ātreyaḥ| agniḥ | gāyatrī|
a̱gniṃ stomḙna bodhaya samidhā̱no ama̭rtyam | ha̱vyā de̱veṣṷ no dadhat ||1||
tama̭dhva̱reṣvī̭ḻate de̱vaṃ martā̱ ama̭rtyam | yaji̭ṣṭha̱ṃ mānṷṣe̱ janḙ ||2||
taṃ hi śaśva̭nta̱ īḻa̭te sru̱cā de̱vaṃ ghṛ̭ta̱ścutā̭ | a̱gniṃ ha̱vyāya̱ voḻaha̭ve ||3||
a̱gnirjā̱to a̭rocata̱ ghnan dasyū̱ñjyoti̭ṣā̱ tama̭: | avi̭nda̱d gā a̱paḥ sva̭: ||4||
a̱gnimī̱ḻenya̭ṃ ka̱viṃ ghṛ̱tapṛ̭ṣṭhaṃ saparyata | vetṷ me śṛ̱ṇava̱ddhava̭m ||5||
a̱gniṃ ghṛ̱tena̭ vāvṛdhu̱: stomḙbhirvi̱śvaca̭rṣaṇim | svā̱dhībhi̭rvaca̱syubhi̭: ||6||
5 dharuṇa aṅgirasaḥ| agniḥ | triṣṭup|
pra ve̱dhasḙ ka̱vaye̱ vedyā̭ya̱ gira̭ṃ bhare ya̱śasḙ pū̱rvyāya̭ |
ghṛ̱tapra̭satto̱ asṷraḥ su̱śevo̭ rā̱yo dha̱rtā dha̱ruṇo̱ vasvo̭ a̱gniḥ ||1||
ṛ̱tena̭ ṛ̱taṃ dha̱ruṇa̭ṃ dhārayanta ya̱jñasya̭ śā̱ke pa̭ra̱me vyo̭man |
di̱vo dharma̭n dha̱ruṇḙ se̱duṣo̱ nṝñjā̱tairajā̭tā~ a̱bhi ye na̭na̱kṣuḥ ||2||
a̱ṃho̱yuva̭sta̱nva̭stanvate̱ vi vayo̭ ma̱had du̱ṣṭara̭ṃ pū̱rvyāya̭ |
sa sa̱ṃvato̱ nava̭jātastuturyāt si̱ṃhaṃ na kru̱ddhama̱bhita̱: pari̭ ṣṭhuḥ ||3||
mā̱teva̱ yad bhara̭se paprathā̱no jana̭ṃjana̱ṃ dhāya̭se̱ cakṣa̭se ca |
vayo̭vayo jarase̱ yaddadhā̭na̱: pari̱ tmanā̱ viṣṷrūpo jigāsi ||4||
vājo̱ nu te̱ śava̭saspā̱tvanta̭mu̱ruṃ dogha̭ṃ dha̱ruṇa̭ṃ deva rā̱yaḥ |
pa̱daṃ na tā̱yurguhā̱ dadhā̭no ma̱ho rā̱ye ci̱taya̱nnatri̭maspaḥ ||5||
5 pūrurātreyaḥ| agniḥ| anuṣṭup, 5 paṃktiḥ|
bṛ̱had vayo̱ hi bhā̱nave'rcā̭ de̱vāyā̱gnayḙ |
yaṃ mi̱traṃ na praśa̭stibhi̱rmartā̭so dadhi̱re pu̱raḥ ||1||
sa hi dyubhi̱rjanā̭nā̱ṃ hotā̱ dakṣa̭sya bā̱hvoḥ |
vi ha̱vyama̱gnirā̭nu̱ṣagbhago̱ na vāra̭mṛṇvati ||2||
a̱sya stomḙ ma̱ghona̭: sa̱khye vṛ̱ddhaśo̭ciṣaḥ |
viśvā̱ yasmi̭n tuvi̱ṣvaṇi̱ sama̱rye śuṣma̭māda̱dhuḥ ||3||
adhā̱ hya̭gna eṣāṃ su̱vīrya̭sya ma̱ṃhanā̭ |
tamid ya̱hvaṃ na roda̭sī̱ pari̱ śravo̭ babhūvatuḥ ||4||
nū na̱ ehi̱ vārya̱magnḙ gṛṇā̱na ā bha̭ra |
ye va̱yaṃ ye ca̭ sū̱raya̭: sva̱sti dhāma̭he̱ saco̱taidhi̭ pṛ̱tsu no̭ vṛ̱dhe ||5||
5 pūrurātreyaḥ| agniḥ| anuṣṭup, 5 paṃktiḥ|
ā ya̱jñairdḙva̱ martya̭ i̱tthā tavyā̭ṃsamū̱tayḙ |
a̱gniṃ kṛ̱te sva̭dhva̱re pū̱rurī̭ḻī̱tāva̭se ||1||
asya̱ hi svaya̭śastara ā̱sā vi̭dharma̱n manya̭se |
taṃ nāka̭ṃ ci̱traśo̭ciṣaṃ ma̱ndraṃ pa̱ro ma̭nī̱ṣayā̭ ||2||
a̱sya vāsā ṷ a̱rciṣā̱ ya āyṷkta tu̱jā gi̱rā |
di̱vo na yasya̱ reta̭sā bṛ̱hacchoca̭ntya̱rcaya̭: ||3||
a̱sya kratvā̱ vicḙtaso da̱smasya̱ vasu̱ ratha̱ ā |
adhā̱ viśvā̭su̱ havyo̱'gnirvi̱kṣu pra śa̭syate ||4||
nū na̱ iddhi vārya̭mā̱sā sa̭canta sū̱raya̭: |
ūrjo̭ napāda̱bhiṣṭa̭ye pā̱hi śa̱gdhi sva̱staya̭ u̱taidhi̭ pṛ̱tsu no̭ vṛ̱dhe ||5||
5 dvito mṛktavāhā ātreyaḥ| agniḥ| anuṣṭup, 5 paṃktiḥ|
prā̱tara̱gniḥ pṷrupri̱yo vi̱śaḥ sta̭ve̱tāti̭thiḥ |
viśvā̭ni̱ yo ama̭rtyo ha̱vyā martḙṣu̱ raṇya̭ti ||1||
dvi̱tāya̭ mṛ̱ktavā̭hase̱ svasya̱ dakṣa̭sya ma̱ṃhanā̭ |
indu̱ṃ  sa dha̭tta ānu̱ṣak sto̱tā ci̭tte amartya ||2||
taṃ vo̭ dī̱rghāyṷśociṣaṃ gi̱rā hṷve ma̱ghonā̭m |
ari̭ṣṭo̱ yeṣā̱ṃ ratho̱ vya̭śvadāva̱nnīya̭te ||3||
ci̱trā vā̱ yeṣu̱ dīdhi̭tirā̱sannu̱kthā pānti̱ ye |
stī̱rṇaṃ ba̱rhiḥ sva̭rṇare̱ śravā̭ṃsi dadhire̱ pari̭ ||4||
ye mḙ pañcā̱śata̭ṃ da̱duraśvā̭nāṃ sa̱dhastṷti |
dyu̱mada̭gne̱ mahi̱ śravo̭ bṛ̱hat kṛ̭dhi ma̱ghonā̭ṃ nṛ̱vada̭mṛta nṛ̱ṇām ||5||
5 vavrirātreyaḥ| agniḥ| gāyatrī, 3-4 anuṣṭup, 5 virāḍ rūpā|
a̱bhya̭va̱sthāḥ pra jā̭yante̱ pra va̱vrerva̱vriści̭keta | u̱pasthḙ mā̱turvi ca̭ṣṭe ||1||
ju̱hu̱re vi ci̱taya̱nto'ni̭miṣaṃ nṛ̱mṇaṃ pā̭nti | ā dṛ̱ḻahāṃ pura̭ṃ viviśuḥ ||2||
ā śvai̭tre̱yasya̭ ja̱ntavo̭ dyu̱mad va̭rdhanta kṛ̱ṣṭaya̭: |
ni̱ṣkagrī̭vo bṛ̱hadṷktha e̱nā madhvā̱ na vā̭ja̱yuḥ ||3||
pri̱yaṃ du̱gdhaṃ na kāmya̱majā̭mi jā̱myoḥ sacā̭ |
gha̱rmo na vāja̭jaṭha̱ro'da̭bdha̱: śaśva̭to̱ dabha̭: ||4||
krīḻa̭n no raśma̱ ā bhṷva̱: saṃ bhasma̭nā vā̱yunā̱ vevi̭dānaḥ |
tā a̭sya san dhṛ̱ṣajo̱ na ti̱gmāḥ susa̭ṃśitā va̱kṣyo̭ vakṣaṇe̱sthāḥ ||5||
4 prayasvanta ātreyāḥ| agniḥ| anuṣṭup, 4 paṃktiḥ|
yama̭gne vājasātama̱ tvaṃ ci̱n manya̭se ra̱yim |
taṃ no̭ gī̱rbhiḥ śra̱vāyya̭ṃ deva̱trā pa̭nayā̱ yuja̭m ||1||
ye a̭gne̱ neraya̭nti te vṛ̱ddhā u̱grasya̱ śava̭saḥ |
apa̱ dveṣo̱ apa̱ hvaro̱'nyavra̭tasya saścire ||2||
hotā̭raṃ tvā vṛṇīma̱he'gne̱ dakṣa̭sya̱ sādha̭nam |
ya̱jñeṣṷ pū̱rvyaṃ gi̱rā praya̭svanto havāmahe ||3||
i̱tthā yathā̭ ta ū̱taye̱ saha̭sāvandi̱vedi̭ve |
rā̱ya ṛ̱tāya̭ sukrato̱ gobhi̭: ṣyāma sadha̱mādo̭ vī̱raiḥ syā̭ma sadha̱māda̭: ||4||
4 sasa ātreyaḥ| agniḥ| anuṣṭup, 4 paṃktiḥ|
ma̱nu̱ṣvat tvā̱ ni dhī̭mahi manu̱ṣvat sami̭dhīmahi | agnḙ manu̱ṣvada̭ṅgiro de̱vān dḙvaya̱te ya̭ja ||1||
tvaṃ hi mānṷṣe̱ jane'gne̱ suprī̭ta i̱dhyasḙ | sruca̭stvā yantyānu̱ṣak sujā̭ta̱ sarpi̭rāsute ||2||
tvāṃ viśvḙ sa̱joṣa̭so de̱vāso̭ dū̱tama̭krata | sa̱pa̱ryanta̭stvā kave ya̱jñeṣṷ de̱vamī̭ḻate ||3||
de̱vaṃ vo̭ devaya̱jyayā̱ 'gnimī̭ḻīta̱ martya̭: |
sami̭ddhaḥ śukra dīdihyṛ̱tasya̱ yoni̱māsa̭daḥ sa̱sasya̱ yoni̱māsa̭daḥ ||4||
4 viśvasāmā ātreyaḥ| agniḥ| anuṣṭup, 4 paṃktiḥ|
pra vi̭śvasāmannatri̱vadarcā̭ pāva̱kaśo̭ciṣe | yo a̭dhva̱reṣvīḍyo̱ hotā̭ ma̱ndrata̭mo vi̱śi ||1||
nya1gniṃ jā̱tavḙdasa̱ṃ dadhā̭tā de̱vamṛ̱tvija̭m | pra ya̱jña ḙtvānu̱ṣaga̱dyā de̱vavya̭castamaḥ ||2||
ci̱ki̱tvinma̭nasaṃ tvā de̱vaṃ martā̭sa ū̱tayḙ | varḙṇyasya̱ te'va̭sa iyā̱nāso̭ amanmahi ||3||
agnḙ ciki̱ddhya1sya na̭ i̱daṃ vaca̭: sahasya |
taṃ tvā̭ suśipra dampate̱ stomai̭rvardha̱ntyatra̭yo gī̱rbhiḥ śṷmbha̱ntyatra̭yaḥ ||4||
4 dyumno viśvacarṣaṇirātreyaḥ | agniḥ| anuṣṭup, 4 paṃktiḥ|
agne̱ saha̭nta̱mā bha̭ra dyu̱mnasya̭ prā̱sahā̭ ra̱yim | viśvā̱ yaśca̭rṣa̱ṇīra̱bhyā̱3sā vājḙṣu sā̱saha̭t ||1||
tama̭gne pṛtanā̱ṣaha̭ṃ ra̱yiṃ sa̭hasva̱ ā bha̭ra | tvaṃ hi sa̱tyo adbhṷto dā̱tā vāja̭sya̱ goma̭taḥ ||2||
viśve̱ hi tvā̭ sa̱joṣa̭so̱ janā̭so vṛ̱ktaba̭rhiṣaḥ | hotā̭ra̱ṃ sadma̭su pri̱yaṃ vyanti̱ vāryā̭ pu̱ru ||3||
sa hi ṣmā̭ vi̱śvaca̭rṣaṇira̱bhimā̭ti̱ saho̭ da̱dhe |
agna̭ e̱ṣu kṣaye̱ṣvā re̱vanna̭: śukra dīdihi dyu̱mat pā̭vaka dīdihi ||4||
4 gaupāyanā laupāyanā vā bandhuḥ subandhuḥ śrutabandhurviprabandhuśca| agniḥ | dvipadā virāṭ|
agne̱ tvaṃ no̱ anta̭ma u̱ta trā̱tā śi̱vo bha̭vā varū̱thya̭: ||1
vasṷra̱gnirvasṷśravā̱ acchā̭ nakṣi dyu̱matta̭maṃ ra̱yiṃ dā̭: ||1||2
sa no̭ bodhi śru̱dhī hava̭muru̱ṣyā ṇo̭ aghāya̱taḥ sa̭masmāt ||3
taṃ tvā̭ śociṣṭha dīdivaḥ su̱mnāya̭ nū̱namī̭mahe̱ sakhi̭bhyaḥ ||2||4
9 vasūyava ātreyāḥ| agniḥ | anuṣṭup|
acchā̭ vo a̱gnimava̭se de̱vaṃ gā̭si̱ sa no̱ vasṷ: |
rāsa̭t pu̱tra ṛ̭ṣū̱ṇāmṛ̱tāvā̭ parṣati dvi̱ṣaḥ ||1||
sa hi sa̱tyo yaṃ pūrvḙ cid de̱vāsa̭ści̱d yamī̭dhi̱re |
hotā̭raṃ ma̱ndraji̭hva̱mit sṷdī̱tibhi̭rvi̱bhāva̭sum ||2||
sa no̭ dhī̱tī vari̭ṣṭhayā̱ śreṣṭha̭yā ca suma̱tyā |
agnḙ rā̱yo di̭dīhi naḥ suvṛ̱ktibhi̭rvareṇya ||3||
a̱gnirde̱veṣṷ rājatya̱gnirmartḙṣvāvi̱śan |
a̱gnirno̭ havya̱vāha̭no̱'gniṃ dhī̱bhiḥ sa̭paryata ||4||
a̱gnistu̱viśra̭vastamaṃ tu̱vibra̭hmāṇamutta̱mam |
a̱tūrta̭ṃ śrāva̱yatpa̭tiṃ pu̱traṃ da̭dāti dā̱śuṣḙ ||5||
a̱gnirda̭dāti̱ satpa̭tiṃ sā̱sāha̱ yo yu̱dhā nṛbhi̭: |
a̱gniratya̭ṃ raghu̱ṣyada̱ṃ jetā̭ra̱mapa̭rājitam ||6||
yad vāhi̭ṣṭha̱ṃ tada̱gnayḙ bṛ̱hada̭rca vibhāvaso |
mahi̭ṣīva̱ tvad ra̱yistvad vājā̱ udī̭rate ||7||
tava̭ dyu̱manto̭ a̱rcayo̱ grāvḙvocyate bṛ̱hat |
u̱to tḙ tanya̱turya̭thā svā̱no a̭rta̱ tmanā̭ di̱vaḥ ||8||
e̱vā~ a̱gniṃ va̭sū̱yava̭: sahasā̱naṃ va̭vandima |
sa no̱ viśvā̱ ati̱ dviṣa̱: parṣa̭nnā̱veva̭ su̱kratṷ: ||9||
9 vasūyava ātreyāḥ| agniḥ, 9viśve devāḥ | gāyatrī|
agnḙ pāvaka ro̱ciṣā̭ ma̱ndrayā̭ deva ji̱hvayā̭ | ā de̱vān va̭kṣi̱ yakṣi̭ ca ||1||
taṃ tvā̭ ghṛtasnavīmahe̱ citra̭bhāno sva̱rdṛśa̭m | de̱vā~ ā vī̱tayḙ vaha ||2||
vī̱tiho̭traṃ tvā kave dyu̱manta̱ṃ sami̭dhīmahi | agnḙ bṛ̱hanta̭madhva̱re ||3||
agne̱ viśvḙbhi̱rā ga̭hi de̱vebhi̭rha̱vyadā̭taye | hotā̭raṃ tvā vṛṇīmahe ||4||
yaja̭mānāya sunva̱ta āgnḙ su̱vīrya̭ṃ vaha | de̱vairā sa̭tsi ba̱rhiṣi̭ ||5||
sa̱mi̱dhā̱naḥ sa̭hasraji̱dagne̱ dharmā̭ṇi puṣyasi | de̱vānā̭ṃ dū̱ta u̱kthya̭: ||6||
nya1gniṃ jā̱tavḙdasaṃ hotra̱vāha̱ṃ yavi̭ṣṭhyam | dadhā̭tā de̱vamṛ̱tvija̭m ||7||
pra ya̱jña ḙtvānu̱ṣaga̱dyā de̱vavya̭castamaḥ | stṛ̱ṇī̱ta ba̱rhirā̱sadḙ ||8||
edaṃ ma̱ruto̭ a̱śvinā̭ mi̱traḥ sī̭dantu̱ varṷṇaḥ | de̱vāsa̱: sarva̭yā vi̱śā ||9||
6 traivṛṣṇastryaruṇaḥ, paurukutsasrasadasyuḥ bhārato'śvamedhaśca rājānaḥ, (atrirbhauma iti kecit)| agniḥ 6 indrāgnī|triṣṭup, 4-6 anuṣṭup|
ana̭svantā̱ satpa̭tirmāmahe me̱ gāvā̱ ceti̭ṣṭho̱ asṷro ma̱ghona̭: |
trai̱vṛ̱ṣṇo a̭gne da̱śabhi̭: sa̱hasrai̱rvaiśvā̭nara̱ trya̭ruṇaściketa ||1||
yo mḙ śa̱tā ca̭ viṃśa̱tiṃ ca̱ gonā̱ṃ harī̭ ca yu̱ktā su̱dhurā̱ dadā̭ti |
vaiśvā̭nara̱ suṣṭṷto vāvṛdhā̱no'gne̱ yaccha̱ trya̭ruṇāya̱ śarma̭ ||2||
e̱vā tḙ agne suma̱tiṃ ca̭kā̱no navi̭ṣṭhāya nava̱maṃ tra̱sada̭syuḥ |
yo me̱ gira̭stuvijā̱tasya̭ pū̱rvīryu̱ktenā̱bhi trya̭ruṇo gṛ̱ṇāti̭ ||3||
yo ma̱ iti̭ pra̱voca̱tyaśva̭medhāya sū̱rayḙ |
dada̭dṛ̱cā sa̱niṃ ya̱te dada̭nme̱dhāmṛ̭tāya̱te ||4||
yasya̭ mā paru̱ṣāḥ śa̱tamṷddha̱rṣaya̭ntyu̱kṣaṇa̭: |
aśva̭medhasya̱ dānā̱: somā̭ iva̱ tryā̭śiraḥ ||5||
indrā̭gnī śata̱dāvnyaśva̭medhe su̱vīrya̭m |
kṣa̱traṃ dhā̭rayataṃ bṛ̱had di̱vi sūrya̭mivā̱jara̭m ||6||
6 viśvavārātreyī| agniḥ| 1, 3 triṣṭup, 2 jagatī, 4 anuṣṭup, 5-6 gāyatrī|
sami̭ddho a̱gnirdi̱vi śo̱cira̭śret pra̱tyaṅṅu̱ṣasa̭murvi̱yā vi bhā̭ti |
eti̱ prācī̭ vi̱śvavā̭rā̱ namo̭bhirde̱vā~ īḻā̭nā ha̱viṣā̭ ghṛ̱tācī̭ ||1||
sa̱mi̱dhyamā̭no a̱mṛta̭sya rājasi ha̱viṣkṛ̱ṇvanta̭ṃ sacase sva̱stayḙ |
viśva̱ṃ sa dha̭tte̱ dravi̭ṇa̱ṃ yaminva̭syāti̱thyama̭gne̱ ni ca̭ dhatta̱ it pu̱raḥ ||2||
agne̱ śardha̭ maha̱te saubha̭gāya̱ tava̭ dyu̱mnānyṷtta̱māni̭ santu |
saṃ jā̭spa̱tyaṃ su̱yama̱mā kṛ̭ṇuṣva śatrūya̱tāma̱bhi ti̭ṣṭhā̱ mahā̭ṃsi ||3||
sami̭ddhasya̱ prama̭ha̱so'gne̱ vande̱ tava̱ śriya̭m |
vṛ̱ṣa̱bho dyu̱mnavā̭~ asi̱ sama̭dhva̱reṣvi̭dhyase ||4||
sami̭ddho agna āhuta de̱vān ya̭kṣi svadhvara | tvaṃ hi ha̭vya̱vāḻasi̭ ||5||
ā jṷhotā duva̱syatā̱'gniṃ pra̭ya̱tya̭dhva̱re | vṛ̱ṇī̱dhvaṃ ha̭vya̱vāha̭nam ||6||
15 gaurivītiḥ śāktyaḥ| indraḥ, 9(prathamapādasya) uśanā vā| triṣṭup|
trya̭rya̱mā manṷṣo de̱vatā̭tā̱ trī ro̭ca̱nā di̱vyā dhā̭rayanta |
arca̭nti tvā ma̱ruta̭: pū̱tada̭kṣā̱stvamḙṣā̱mṛṣi̭rindrāsi̱ dhīra̭: ||1||
anu̱ yadī̭ṃ ma̱ruto̭ mandasā̱namārca̱nnindra̭ṃ papi̱vāṃsa̭ṃ su̱tasya̭ |
āda̭tta̱ vajra̭ma̱bhi yadahi̱ṃ hanna̱po ya̱hvīra̭sṛja̱t sarta̱vā ṷ ||2||
u̱ta bra̭hmāṇo maruto me a̱syendra̱: soma̭sya̱ suṣṷtasya peyāḥ |
taddhi ha̱vyaṃ manṷṣe̱ gā avi̭nda̱daha̱nnahi̭ṃ papi̱vā~ indro̭ asya ||3||
ād roda̭sī vita̱raṃ vi ṣka̭bhāyat saṃvivyā̱naści̭d bhi̱yasḙ mṛ̱gaṃ ka̭: |
jiga̭rti̱mindro̭ apa̱jargṷrāṇa̱: prati̭ śva̱santa̱mava̭ dāna̱vaṃ ha̭n ||4||
adha̱ kratvā̭ maghava̱n tubhya̭ṃ de̱vā anu̱ viśvḙ adaduḥ soma̱peya̭m |
yat sūrya̭sya ha̱rita̱: pata̭ntīḥ pu̱raḥ sa̱tīrupa̭rā̱ eta̭śe̱ kaḥ ||5||
nava̱ yada̭sya nava̱tiṃ ca̭ bho̱gān tsā̱kaṃ vajrḙṇa ma̱ghavā̭ vivṛ̱ścat |
arca̱ntīndra̭ṃ ma̱ruta̭: sa̱dhasthe̱ traiṣṭṷbhena̱ vaca̭sā bādhata̱ dyām ||6||
sakhā̱ sakhyḙ apaca̱t tūya̭ma̱gnira̱sya kratvā̭ mahi̱ṣā trī śa̱tāni̭ |
trī sā̱kamindro̱ manṷṣa̱: sarā̭ṃsi su̱taṃ pi̭bad vṛtra̱hatyā̭ya̱ soma̭m ||7||
trī yaccha̱tā ma̭hi̱ṣāṇā̱magho̱ māstrī sarā̭ṃsi ma̱ghavā̭ so̱myāpā̭: |
kā̱raṃ na viśvḙ ahvanta de̱vā bhara̱mindrā̭ya̱ yadahi̭ṃ ja̱ghāna̭ ||8||
u̱śanā̱ yat sa̭ha̱syai̱3rayā̭taṃ gṛ̱hami̭ndra jūjuvā̱nebhi̱raśvai̭: |
va̱nvā̱no atra̭ sa̱ratha̭ṃ yayātha̱ kutsḙna de̱vairava̭norha̱ śuṣṇa̭m ||9||
prānyacca̱krama̭vṛha̱: sūrya̭sya̱ kutsā̭yā̱nyad vari̭vo̱ yāta̭ve'kaḥ |
a̱nāso̱ dasyṷ̄~ramṛṇo va̱dhena̱ ni dṷryo̱ṇa ā̭vṛṇaṅ mṛ̱dhravā̭caḥ ||10||||
stomā̭sastvā̱ gauri̭vīteravardha̱nnara̭ndhayo vaidathi̱nāya̱ piprṷm |
ā tvāmṛ̱jiśvā̭ sa̱khyāya̭ cakre̱ paca̭n pa̱ktīrapi̭ba̱: soma̭masya ||11||||
nava̭gvāsaḥ su̱taso̭māsa̱ indra̱ṃ daśa̭gvāso a̱bhya̭rcantya̱rkaiḥ |
gavya̭ṃ cidū̱rvama̭pi̱dhāna̭vanta̱ṃ taṃ ci̱nnara̭: śaśamā̱nā apa̭ vran ||12||
ka̱tho nu te̱ pari̭ carāṇi vi̱dvān vī̱ryā̭ maghava̱n yā ca̱kartha̭ |
yā co̱ nu navyā̭ kṛ̱ṇava̭: śaviṣṭha̱ predu̱ tā tḙ vi̱dathḙṣu bravāma ||13||
e̱tā viśvā̭ cakṛ̱vā~ i̭ndra̱ bhūryapa̭rīto ja̱nuṣā̭ vī̱ryḙṇa |
yā ci̱nnu va̭jrin kṛ̱ṇavo̭ dadhṛ̱ṣvān na tḙ va̱rtā tavi̭ṣyā asti̱ tasyā̭: ||14||
indra̱ brahma̭ kri̱yamā̭ṇā juṣasva̱ yā tḙ śaviṣṭha̱ navyā̱ aka̭rma |
vastrḙva bha̱drā sukṛ̭tā vasū̱yū ratha̱ṃ na dhīra̱: svapā̭ atakṣam ||15||
15 babhrurātreyaḥ| indraḥ, 12-15 ṛṇaṃcayendrau| triṣṭup|
kva1 sya vī̱raḥ ko a̭paśya̱dindra̭ṃ su̱khara̭tha̱mīya̭māna̱ṃ hari̭bhyām |
yo rā̱yā va̱jrī su̱taso̭mami̱cchan tadoko̱ gantā̭ puruhū̱ta ū̱tī ||1||
avā̭cacakṣaṃ pa̱dama̭sya sa̱svaru̱graṃ ni̭dhā̱turanvā̭yami̱cchan |
apṛ̭cchama̱nyā~ u̱ta te ma̭ āhu̱rindra̱ṃ naro̭ bubudhā̱nā a̭śema ||2||
pra nu va̱yaṃ su̱te yā tḙ kṛ̱tānīndra̱ bravā̭ma̱ yāni̭ no̱ jujo̭ṣaḥ |
veda̱davi̭dvāñchṛ̱ṇava̭cca vi̱dvān vaha̭te̱'yaṃ ma̱ghavā̱ sarva̭senaḥ ||3||
sthi̱raṃ mana̭ścakṛṣe jā̱ta i̭ndra̱ veṣīdeko̭ yu̱dhaye̱ bhūya̭saścit |
aśmā̭naṃ ci̱cchava̭sā didyuto̱ vi vi̱do gavā̭mū̱rvamu̱sriyā̭ṇām ||4||
pa̱ro yat tvaṃ pa̭ra̱ma ā̱jani̭ṣṭhāḥ parā̱vati̱ śrutya̱ṃ nāma̱ bibhra̭t |
ata̭ści̱dindrā̭dabhayanta de̱vā viśvā̭ a̱po a̭jayad dā̱sapa̭tnīḥ ||5||
tubhyede̱te ma̱ruta̭: su̱śevā̱ arca̭ntya̱rkaṃ su̱nvantyandha̭: |
ahi̭mohā̱nama̱pa ā̱śayā̭na̱ṃ pra mā̱yābhi̭rmā̱yina̭ṃ sakṣa̱dindra̭: ||6||
vi ṣū mṛdho̭ ja̱nuṣā̱ dāna̱minva̱nnaha̱n gavā̭ maghavan tsaṃcakā̱naḥ |
atrā̭ dā̱sasya̱ namṷce̱: śiro̱ yadava̭rtayo̱ mana̭ve gā̱tumi̱cchan ||7||
yuja̱ṃ hi māmakṛ̭thā̱ ādidi̭ndra̱ śiro̭ dā̱sasya̱ namṷcermathā̱yan |
aśmā̭naṃ cit sva̱ryaṃ1 varta̭māna̱ṃ pra ca̱kriyḙva̱ roda̭sī ma̱rudbhya̭: ||8||
striyo̱ hi dā̱sa āyṷdhāni ca̱kre kiṃ mā̭ karannaba̱lā a̭sya̱ senā̭: |
a̱ntarhyakhya̭du̱bhe a̭sya̱ dhene̱ athopa̱ praidyu̱ yu̱dhaye̱ dasyu̱mindra̭: ||9||
samatra̱ gāvo̱'bhito̭'navante̱heha̭ va̱tsairviyṷtā̱ yadāsa̭n |
saṃ tā indro̭ asṛjadasya śā̱kairyadī̱ṃ somā̭sa̱: suṣṷtā̱ ama̭ndan ||10||||
yadī̱ṃ somā̭ ba̱bhrudhṷ̄tā̱ ama̭nda̱nnaro̭ravīd vṛṣa̱bhaḥ sāda̭neṣu |
pu̱ra̱ṃda̱raḥ pa̭pi̱vā~ indro̭ asya̱ puna̱rgavā̭madadādu̱sriyā̭ṇām ||11||||
bha̱drami̱daṃ ru̱śamā̭ agne akra̱n gavā̭ṃ ca̱tvāri̱ dada̭taḥ sa̱hasrā̭ |
ṛ̱ṇa̱ṃca̱yasya̱ praya̭tā ma̱ghāni̱ pratya̭grabhīṣma̱ nṛta̭masya nṛ̱ṇām ||12||
su̱peśa̭sa̱ṃ māva̭ sṛja̱ntyasta̱ṃ gavā̭ṃ sa̱hasrai̭ ru̱śamā̭so agne |
tī̱vrā indra̭mamamanduḥ su̱tāso̱'ktorvyṷṣṭau̱ pari̭takmyāyāḥ ||13||
auccha̱t sā rātrī̱ pari̭takmyā̱ yā~ ṛ̭ṇaṃca̱ye rāja̭ni ru̱śamā̭nām |
atyo̱ na vā̱jī ra̱ghura̱jyamā̭no ba̱bhruśca̱tvārya̭sanat sa̱hasrā̭ ||14||
catṷ:sahasra̱ṃ gavya̭sya pa̱śvaḥ pratya̭grabhīṣma ru̱śamḙṣvagne |
gha̱rmaści̭t ta̱ptaḥ pra̱vṛje̱ ya āsī̭daya̱smaya̱stamvādā̭ma̱ viprā̭: ||15||
13 avasyurātreyaḥ| indraḥ, 8 tṛtīyapādasya kutso vā, caturthapādasya uśanā vā, 9 indrākutsau| triṣṭup|
indro̱ rathā̭ya pra̱vata̭ṃ kṛṇoti̱ yama̱dhyasthā̭nma̱ghavā̭ vāja̱yanta̭m |
yū̱theva̭ pa̱śvo vyṷnoti go̱pā ari̭ṣṭo yāti pratha̱maḥ siṣā̭san ||1||
ā pra dra̭va harivo̱ mā vi vḙna̱: piśa̭ṅgarāte a̱bhi na̭: sacasva |
na̱hi tvadi̭ndra̱ vasyo̭ a̱nyadastya̭me̱nā~ści̱jjani̭vataścakartha ||2||
udyat saha̱: saha̭sa̱ āja̭niṣṭa̱ dedi̭ṣṭa̱ indra̭ indri̱yāṇi̱ viśvā̭ |
prāco̭dayat su̱dughā̭ va̱vre a̱ntarvi jyoti̭ṣā saṃvavṛ̱tvat tamo̭'vaḥ ||3||
ana̭vaste̱ ratha̱maśvā̭ya takṣa̱n tvaṣṭā̱ vajra̭ṃ puruhūta dyu̱manta̭m |
bra̱hmāṇa̱ indra̭ṃ ma̱haya̭nto a̱rkairava̭rdhaya̱nnaha̭ye̱ hanta̱vā ṷ ||4||
vṛṣṇe̱ yat te̱ vṛṣa̭ṇo a̱rkamarcā̱nindra̱ grāvā̭ṇo̱ adi̭tiḥ sa̱joṣā̭: |
a̱na̱śvāso̱ ye pa̱vayo̭'ra̱thā indrḙṣitā a̱bhyava̭rtanta̱ dasyṷ̄n ||5||
pra te̱ pūrvā̭ṇi̱ kara̭ṇāni voca̱ṃ pra nūta̭nā maghava̱n yā ca̱kartha̭ |
śaktī̭vo̱ yad vi̱bharā̱ roda̭sī u̱bhe jaya̭nna̱po mana̭ve̱ dānṷcitrāḥ ||6||
tadinnu te̱ kara̭ṇaṃ dasma vi̱prā'hi̱ṃ yad ghnannojo̱ atrāmi̭mīthāḥ |
śuṣṇa̭sya ci̱t pari̭ mā̱yā a̭gṛbhṇāḥ prapi̱tvaṃ yannapa̱ dasyṷ̄~rasedhaḥ ||7||
tvama̱po yada̭ve tu̱rvaśā̱yā'ra̭mayaḥ su̱dughā̭: pā̱ra i̭ndra |
u̱grama̭yāta̱mava̭ho ha̱ kutsa̱ṃ saṃ ha̱ yad vā̭mu̱śanāra̭nta de̱vāḥ ||8||
indrā̭kutsā̱ vaha̭mānā̱ rathe̱nā'' vā̱matyā̱ api̱ karṇḙ vahantu |
niḥ ṣī̭ma̱dbhyo dhama̭tho̱ niḥ ṣa̱dhasthā̭n ma̱ghono̭ hṛ̱do va̭ratha̱stamā̭ṃsi ||9||
vāta̭sya yu̱ktān tsu̱yuja̭ści̱daśvā̭n ka̱viści̭de̱ṣo a̭jagannava̱syuḥ |
viśvḙ te̱ atra̭ ma̱ruta̱: sakhā̭ya̱ indra̱ brahmā̭ṇi̱ tavi̭ṣīmavardhan ||10||||
sūra̭ści̱d ratha̱ṃ pari̭takmyāyā̱ṃ pūrva̭ṃ kara̱dupa̭raṃ jūju̱vāṃsa̭m |
bhara̭cca̱krameta̭śa̱: saṃ ri̭ṇāti pu̱ro dadha̭t saniṣyati̱ kratṷṃ naḥ ||11||||
āyaṃ ja̭nā abhi̱cakṣḙ jagā̱mendra̱: sakhā̭yaṃ su̱taso̭mami̱cchan |
vada̱n grāvāva̱ vedi̭ṃ bhriyāte̱ yasya̭ jī̱rama̭dhva̱ryava̱ścara̭nti ||12||
ye cā̱kana̭nta cā̱kana̭nta̱ nū te martā̭ amṛta̱ mo te aṃha̱ āra̭n |
vā̱va̱ndhi yajyṷ̄~ru̱ta teṣṷ dhe̱hyojo̱ janḙṣu̱ yeṣṷ te̱ syāma̭ ||13||
12 gāturātreyaḥ| indraḥ| triṣṭup|
ada̭rda̱rutsa̱masṛ̭jo̱ vi khāni̱ tvama̭rṇa̱vān ba̭dbadhā̱nā~ a̭ramṇāḥ |
ma̱hānta̭mindra̱ parva̭ta̱ṃ vi yad vaḥ sṛ̱jo vi dhārā̱ ava̭ dāna̱vaṃ ha̭n ||1||
tvamutsā̭~ ṛ̱tubhi̭rbadbadhā̱nā~ ara̭ṃha̱ ūdha̱: parva̭tasya vajrin |
ahi̭ṃ cidugra̱ prayṷta̱ṃ śayā̭naṃ jagha̱nvā~ i̭ndra̱ tavi̭ṣīmadhatthāḥ ||2||
tyasya̭ cinmaha̱to nirmṛ̱gasya̱ vadha̭rjaghāna̱ tavi̭ṣībhi̱rindra̭: |
ya eka̱ ida̭pra̱tirmanya̭māna̱ āda̭smāda̱nyo a̭janiṣṭa̱ tavyā̭n ||3||
tyaṃ ci̭deṣāṃ sva̱dhayā̱ mada̭ntaṃ mi̱ho napā̭taṃ su̱vṛdha̭ṃ tamo̱gām |
vṛṣa̭prabharmā dāna̱vasya̱ bhāma̱ṃ vajrḙṇa va̱jrī ni ja̭ghāna̱ śuṣṇa̭m ||4||
tyaṃ ci̭dasya̱ kratṷbhi̱rniṣa̭ttamama̱rmaṇo̭ vi̱dadida̭sya̱ marma̭ |
yadī̭ṃ sukṣatra̱ prabhṛ̭tā̱ mada̭sya̱ yuyṷtsanta̱ṃ tama̭si ha̱rmye dhāḥ ||5||
tyaṃ ci̭di̱tthā ka̭tpa̱yaṃ śayā̭namasū̱rye tama̭si vāvṛdhā̱nam |
taṃ ci̭nmandā̱no vṛ̭ṣa̱bhaḥ su̱tasyo̱ccairindro̭ apa̱gūryā̭ jaghāna ||6||
ud yadindro̭ maha̱te dā̭na̱vāya̱ vadha̱ryami̭ṣṭa̱ saho̱ apra̭tītam |
yadī̱ṃ vajra̭sya̱ prabhṛ̭tau da̱dābha̱ viśva̭sya ja̱ntora̭dha̱maṃ ca̭kāra ||7||
tyaṃ ci̱darṇa̭ṃ madhu̱paṃ śayā̭namasi̱nvaṃ va̱vraṃ mahyāda̭du̱graḥ |
a̱pāda̭ma̱traṃ ma̭ha̱tā va̱dhena̱ ni dṷryo̱ṇa ā̭vṛṇaṅ mṛ̱dhravā̭cam ||8||
ko a̭sya̱ śuṣma̱ṃ tavi̭ṣīṃ varāta̱ eko̱ dhanā̭ bharate̱ apra̭tītaḥ |
i̱me ci̭dasya̱ jraya̭so̱ nu de̱vī indra̱syauja̭so bhi̱yasā̭ jihāte ||9||
nya̭smai de̱vī svadhi̭tirjihīta̱ indrā̭ya gā̱turṷśa̱tīva̭ yeme |
saṃ yadojo̭ yu̱vate̱ viśva̭mābhi̱ranṷ sva̱dhāvnḙ kṣi̱tayo̭ namanta ||10||
eka̱ṃ nu tvā̱ satpa̭ti̱ṃ pāñca̭janyaṃ jā̱taṃ śṛ̭ṇomi ya̱śasa̱ṃ janḙṣu |
taṃ mḙ jagṛbhra ā̱śaso̱ navi̭ṣṭhaṃ do̱ṣā vasto̱rhava̭mānāsa̱ indra̭m ||11||
e̱vā hi tvāmṛ̭tu̱thā yā̱taya̭ntaṃ ma̱ghā viprḙbhyo̱ dada̭taṃ śṛ̱ṇomi̭ |
kiṃ tḙ bra̱hmāṇo̭ gṛhate̱ sakhā̭yo̱ ye tvā̱yā ni̭da̱dhuḥ kāma̭mindra ||12||
10 prājāpatyaḥ saṃvaraṇaḥ| indraḥ| triṣṭup|
mahi̭ ma̱he ta̱vasḙ dīdhye̱ nṝnindrā̭ye̱tthā ta̱vase̱ ata̭vyān |
yo a̭smai suma̱tiṃ vāja̭sātau stu̱to janḙ sama̱rya̭ści̱keta̭ ||1||
sa tvaṃ na̭ indra dhiyasā̱no a̱rkairharī̭ṇāṃ vṛṣa̱n yoktra̭maśreḥ |
yā i̱tthā ma̭ghava̱nnanu̱ joṣa̱ṃ vakṣo̭ a̱bhi prāryaḥ sa̭kṣi̱ janā̭n ||2||
na te ta̭ indrā̱bhya1smadṛ̱ṣvā'yṷktāso abra̱hmatā̱ yadasa̭n |
tiṣṭhā̱ ratha̱madhi̱ taṃ va̭jraha̱stā'' ra̱śmiṃ dḙva yamase̱ svaśva̭: ||3||
pu̱rū yat ta̭ indra̱ santyu̱kthā gavḙ ca̱kartho̱rvarā̭su̱ yudhya̭n |
ta̱ta̱kṣe sūryā̭ya ci̱doka̭si̱ sve vṛṣā̭ sa̱matsṷ dā̱sasya̱ nāma̭ cit ||4||
va̱yaṃ te ta̭ indra̱ ye ca̱ nara̱: śardho̭ jajñā̱nā yā̱tāśca̱ rathā̭: |
āsmāñja̭gamyādahiśuṣma̱ satvā̱ bhago̱ na havya̭: prabhṛ̱theṣu̱ cārṷ: ||5||
pa̱pṛ̱kṣeṇya̭mindra̱ tve hyojo̭ nṛ̱mṇāni̭ ca nṛ̱tamā̭no̱ ama̭rtaḥ |
sa na̱ enī̭ṃ vasavāno ra̱yiṃ dā̱: prāryaḥ stṷṣe tuvima̱ghasya̱ dāna̭m ||6||
e̱vā na̭ indro̱tibhi̭rava pā̱hi gṛ̭ṇa̱taḥ śṷ̄ra kā̱rūn |
u̱ta tvaca̱ṃ dada̭to̱ vāja̭sātau piprī̱hi madhva̱: suṣṷtasya̱ cāro̭: ||7||
u̱ta tye mā̭ pauruku̱tsyasya̭ sū̱restra̱sada̭syorhira̱ṇino̱ rarā̭ṇāḥ |
vaha̭ntu mā̱ daśa̱ śyetā̭so asya gairikṣi̱tasya̱ kratṷbhi̱rnu sa̭śce ||8||
u̱ta tye mā̭ māru̱tāśva̭sya̱ śoṇā̱: kratvā̭maghāso vi̱datha̭sya rā̱tau |
sa̱hasrā̭ me̱ cyava̭tāno̱ dadā̭na ānū̱kama̱ryo vapṷṣe̱ nārca̭t ||9||
u̱ta tye mā̭ dhva̱nya̭sya̱ juṣṭā̭ lakṣma̱ṇya̭sya su̱ruco̱ yatā̭nāḥ |
ma̱hnā rā̱yaḥ sa̱ṃvara̭ṇasya̱ ṛṣḙrvra̱jaṃ na gāva̱: praya̭tā̱ api̭ gman ||10||
9 prājāpatyaḥ saṃvaraṇaḥ| indraḥ| jagatī, 9 triṣṭup|
ajā̭taśatruma̱jarā̱ sva̭rva̱tyanṷ sva̱dhāmi̭tā da̱smamī̭yate |
su̱nota̭na̱ paca̭ta̱ brahma̭vāhase puruṣṭu̱tāya̭ prata̱raṃ da̭dhātana ||1||
ā yaḥ somḙna ja̱ṭhara̱mapi̭pra̱tā'ma̭ndata ma̱ghavā̱ madhvo̱ andha̭saḥ |
yadī̭ṃ mṛ̱gāya̱ hanta̭ve ma̱hāva̭dhaḥ sa̱hasra̭bhṛṣṭimu̱śanā̭ va̱dhaṃ yama̭t ||2||
yo a̭smai ghra̱ṃsa u̱ta vā̱ ya ūdha̭ni̱ soma̭ṃ su̱noti̱ bhava̭ti dyu̱mā~ aha̭ |
apā̭pa śa̱krasta̭ta̱nuṣṭi̭mūhati ta̱nūśṷbhraṃ ma̱ghavā̱ yaḥ ka̭vāsa̱khaḥ ||3||
yasyāva̭dhīt pi̱tara̱ṃ yasya̭ mā̱tara̱ṃ yasya̭ śa̱kro bhrāta̭ra̱ṃ nāta̭ īṣate |
vetīdva̭sya̱ praya̭tā yataṃka̱ro na kilbi̭ṣādīṣate̱ vasva̭ āka̱raḥ ||4||
na pa̱ñcabhi̭rda̱śabhi̭rvaṣṭyā̱rabha̱ṃ nāsṷnvatā sacate̱ puṣya̭tā ca̱na |
ji̱nāti̱ veda̭mu̱yā hanti̭ vā̱ dhuni̱rā dḙva̱yuṃ bha̭jati̱ goma̭ti vra̱je ||5||
vi̱tvakṣa̭ṇa̱: samṛ̭tau cakramāsa̱jo'sṷnvato̱ viṣṷṇaḥ sunva̱to vṛ̱dhaḥ |
indro̱ viśva̭sya dami̱tā vi̱bhīṣa̭ṇo yathāva̱śaṃ na̭yati̱ dāsa̱mārya̭: ||6||
samī̭ṃ pa̱ṇera̭jati̱ bhoja̭naṃ mu̱ṣe vi dā̱śuṣḙ bhajati sū̱nara̱ṃ vasṷ |
du̱rge ca̱na dhri̭yate̱ viśva̱ ā pu̱ru jano̱ yo a̭sya̱ tavi̭ṣī̱macṷkrudhat ||7||
saṃ yajjanaṷ su̱dhanaṷ vi̱śvaśa̭rdhasā̱vave̱dindro̭ ma̱ghavā̱ goṣṷ śu̱bhriṣṷ |
yuja̱ṃ hya1nyamakṛ̭ta pravepa̱nyudī̱ṃ gavya̭ṃ sṛjate̱ satva̭bhi̱rdhuni̭: ||8||
sa̱ha̱sra̱sāmāgni̭veśiṃ gṛṇīṣe̱ śatri̭magna upa̱māṃ ke̱tuma̱ryaḥ |
tasmā̱ āpa̭: sa̱ṃyata̭: pīpayanta̱ tasmi̭n kṣa̱tramama̭vat tve̱ṣama̭stu ||9||
8 prabhūvasurāṅgirasaḥ| indraḥ | anuṣṭup, 8 paṅktiḥ|
yaste̱ sādhi̱ṣṭho'va̭sa̱ indra̱ kratu̱ṣṭamā bha̭ra |
a̱smabhya̭ṃ carṣaṇī̱saha̱ṃ sasni̱ṃ vājḙṣu du̱ṣṭara̭m ||1||
yadi̭ndra te̱ cata̭sro̱ yacchṷ̄ra̱ santi̭ ti̱sraḥ |
yad vā̱ pañca̭ kṣitī̱nāmava̱stat su na̱ ā bha̭ra ||2||
ā te'vo̱ varḙṇya̱ṃ vṛṣa̭ntamasya hūmahe |
vṛṣa̭jūti̱rhi ja̭jñi̱ṣa ā̱bhūbhi̭rindra tu̱rvaṇi̭: ||3||
vṛṣā̱ hyasi̱ rādha̭se jajñi̱ṣe vṛṣṇi̭ te̱ śava̭: |
svakṣa̭traṃ te dhṛ̱ṣanmana̭: satrā̱hami̭ndra̱ pauṃsya̭m ||4||
tvaṃ tami̭ndra̱ martya̭mamitra̱yanta̭madrivaḥ |
sa̱rva̱ra̱thā śa̭takrato̱ ni yā̭hi śavasaspate ||5||
tvāmid vṛ̭trahantama̱ janā̭so vṛ̱ktaba̭rhiṣaḥ |
u̱graṃ pū̱rvīṣṷ pū̱rvyaṃ hava̭nte̱ vāja̭sātaye ||6||
a̱smāka̭mindra du̱ṣṭara̭ṃ puro̱yāvā̭namā̱jiṣṷ |
 sa̱yāvā̭na̱ṃ dhanḙdhane vāja̱yanta̭mavā̱ ratha̭m ||7||
a̱smāka̭mi̱ndrehi̭ no̱ ratha̭mavā̱ pura̭ṃdhyā |
va̱yaṃ śa̭viṣṭha̱ vārya̭ṃ di̱vi śravo̭ dadhīmahi di̱vi stoma̭ṃ manāmahe ||8||
6 prabhūvasurāṅgirasaḥ| indraḥ | triṣṭup, 3jagatī|
sa ā ga̭ma̱dindro̱ yo vasṷ̄nā̱ṃ cikḙta̱d dātu̱ṃ dāma̭no rayī̱ṇām |
dha̱nva̱ca̱ro na vaṃsa̭gastṛṣā̱ṇaśca̭kamā̱naḥ pi̭batu du̱gdhama̱ṃśum ||1||
ā te̱ hanṷ̄ harivaḥ śūra̱ śipre̱ ruha̱t somo̱ na parva̭tasya pṛ̱ṣṭhe |
anṷ tvā rāja̱nnarva̭to̱ na hi̱nvan gī̱rbhirma̭dema puruhūta̱ viśvḙ ||2||
ca̱kraṃ na vṛ̱ttaṃ pṷruhūta vepate̱ mano̭ bhi̱yā me̱ ama̭te̱rida̭drivaḥ |
rathā̱dadhi̭ tvā jari̱tā sa̭dāvṛdha ku̱vinnu sto̭ṣanmaghavan purū̱vasṷ: ||3||
e̱ṣa grāvḙva jari̱tā ta̭ i̱ndreya̭rti̱ vāca̭ṃ bṛ̱hadā̭śuṣā̱ṇaḥ |
pra sa̱vyena̭ maghava̱n yaṃsi̭ rā̱yaḥ pra da̭kṣi̱ṇiddha̭rivo̱ mā vi vḙnaḥ ||4||
vṛṣā̭ tvā̱ vṛṣa̭ṇaṃ vardhatu̱ dyaurvṛṣā̱ vṛṣa̭bhyāṃ vahase̱ hari̭bhyām |
sa no̱ vṛṣā̱ vṛṣa̭rathaḥ suśipra̱ vṛṣa̭krato̱ vṛṣā̭ vajri̱n bharḙ dhāḥ ||5||
yo rohi̭tau vā̱jinaṷ vā̱jinī̭vān tri̱bhiḥ śa̱taiḥ saca̭mānā̱vadi̭ṣṭa |
yūne̱ sama̭smai kṣi̱tayo̭ namantāṃ śru̱tara̭thāya maruto duvo̱yā ||6||
5 bhaumo'triḥ| indraḥ| triṣṭup|
saṃ bhā̱nunā̭ yatate̱ sūrya̭syā̱''juhvā̭no ghṛ̱tapṛ̭ṣṭha̱: svañcā̭: |
tasmā̱ amṛ̭dhrā u̱ṣaso̱ vyṷcchā̱n ya indrā̭ya su̱navā̱metyāha̭ || 1||
sami̭ddhāgnirvanavat stī̱rṇaba̭rhiryu̱ktagrā̭vā su̱taso̭mo jarāte |
grāvā̭ṇo̱ yasyḙṣi̱raṃ vada̱ntyaya̭dadhva̱ryurha̱viṣāva̱ sindhṷm ||2||
va̱dhūri̱yaṃ pati̭mi̱cchantyḙti̱ ya ī̱ṃ vahā̭te̱ mahi̭ṣīmiṣi̱rām |
āsya̭ śravasyā̱d ratha̱ ā ca̭ ghoṣāt pu̱rū sa̱hasrā̱ pari̭ vartayāte ||3||
na sa rājā̭ vyathate̱ yasmi̱nnindra̭stī̱vraṃ soma̱ṃ piba̭ti̱ gosa̭khāyam |
ā sa̭tva̱nairaja̭ti̱ hanti̭ vṛ̱traṃ kṣeti̭ kṣi̱tīḥ su̱bhago̱ nāma̱ puṣya̭n ||4||
puṣyā̱t kṣemḙ a̱bhi yogḙ bhavātyu̱bhe vṛtaṷ saṃya̱tī saṃ ja̭yāti |
pri̱yaḥ sūryḙ pri̱yo a̱gnā bha̭vāti̱ ya indrā̭ya su̱taso̭mo̱ dadā̭śat ||5||
5 bhaumo'triḥ| indraḥ| anuṣṭup|
u̱roṣṭa̭ indra̱ rādha̭so vi̱bhvī rā̱tiḥ śa̭takrato |
adhā̭ no viśvacarṣaṇe dyu̱mnā sṷkṣatra maṃhaya ||1||
yadī̭mindra śra̱vāyya̱miṣa̭ṃ śaviṣṭha dadhi̱ṣe |
pa̱pra̱the dī̭rgha̱śrutta̭ma̱ṃ hira̭ṇyavarṇa du̱ṣṭara̭m ||2||
śuṣmā̭so̱ ye tḙ adrivo me̱hanā̭ keta̱sāpa̭: |
u̱bhā de̱vāva̱bhiṣṭa̭ye di̱vaśca̱ gmaśca̭ rājathaḥ ||3||
u̱to no̭ a̱sya kasya̭ ci̱d dakṣa̭sya̱ tava̭ vṛtrahan |
a̱smabhya̭ṃ nṛ̱mṇamā bha̭rā̱'smabhya̭ṃ nṛmaṇasyase ||4||
nū ta̭ ā̱bhira̱bhiṣṭi̭bhi̱stava̱ śarma̭ñchatakrato |
indra̱ syāma̭ sugo̱pāḥ śūra̱ syāma̭ sugo̱pāḥ ||5||
5 bhaumo'triḥ| indraḥ| anuṣṭup, 5paṅktiḥ|
yadi̭ndra citra me̱hanāsti̱ tvādā̭tamadrivaḥ |
rādha̱stanno̭ vidadvasa ubhayāha̱styā bha̭ra ||1||
yanmanya̭se̱ varḙṇya̱mindra̭ dyu̱kṣaṃ tadā bha̭ra |
vi̱dyāma̱ tasya̭ te va̱yamakṷ̄pārasya dā̱vanḙ ||2||
yat tḙ di̱tsu pra̱rādhya̱ṃ mano̱ asti̭ śru̱taṃ bṛ̱hat |
tena̭ dṛ̱ḻahā ci̭dadriva̱ ā vāja̭ṃ darṣi sā̱tayḙ ||3||
maṃhi̭ṣṭhaṃ vo ma̱ghonā̱ṃ rājā̭naṃ carṣaṇī̱nām |
indra̱mupa̱ praśa̭staye pū̱rvībhi̭rjujuṣe̱ gira̭: ||4||
asmā̱ it kāvya̱ṃ vaca̭ u̱kthamindrā̭ya̱ śaṃsya̭m |
tasmā̭ u̱ brahma̭vāhase̱ giro̭ vardha̱ntyatra̭yo̱ gira̭: śumbha̱ntyatra̭yaḥ ||5||
9 bhaumo'triḥ| indraḥ, 5 sūryaḥ, 6-9 atriḥ| 1-3 uṣṇik, 5-9 anuṣṭup, 4, 6-8 triṣṭup|
ā yā̱hyadri̭bhiḥ su̱taṃ soma̭ṃ somapate piba | vṛṣa̭nnindra̱ vṛṣa̭bhirvṛtrahantama ||1||
vṛṣā̱ grāvā̱ vṛṣā̱ mado̱ vṛṣā̱ somo̭ a̱yaṃ su̱taḥ | vṛṣa̭nnindra̱ vṛṣa̭bhirvṛtrahantama ||2||
vṛṣā̭ tvā̱ vṛṣa̭ṇaṃ huve̱ vajri̭ñci̱trābhi̭rū̱tibhi̭: | vṛṣa̭nnindra̱ vṛṣa̭bhirvṛtrahantama ||3||
ṛ̱jī̱ṣī va̱jrī vṛ̭ṣa̱bhastṷrā̱ṣāṭ chu̱ṣmī rājā̭ vṛtra̱hā so̭ma̱pāvā̭ |
yu̱ktvā hari̭bhyā̱mupa̭ yāsada̱rvāṅ mādhya̭ṃdine̱ sava̭ne matsa̱dindra̭: ||4||
yat tvā̭ sūrya̱ sva̭rbhānu̱stama̱sāvi̭dhyadāsu̱raḥ |
akṣḙtravi̱d yathā̭ mu̱gdho bhuva̭nānyadīdhayuḥ ||5||
sva̭rbhāno̱radha̱ yadi̭ndra mā̱yā a̱vo di̱vo varta̭mānā a̱vāha̭n |
gū̱ḻahaṃ sūrya̱ṃ tama̱sāpa̭vratena tu̱rīyḙṇa̱ brahma̭ṇāvinda̱datri̭: ||6||
mā māmi̱maṃ tava̱ santa̭matra ira̱syā dru̱gdho bhi̱yasā̱ ni gā̭rīt |
tvaṃ mi̱tro a̭si sa̱tyarā̭dhā̱stau me̱hāva̭ta̱ṃ varṷṇaśca̱ rājā̭ ||7||
grāvṇo̭ bra̱hmā yṷyujā̱naḥ sa̭pa̱ryan kī̱riṇā̭ de̱vān nama̭sopa̱śikṣa̭n |
atri̱: sūrya̭sya di̱vi cakṣu̱rādhā̱t sva̭rbhāno̱rapa̭ mā̱yā a̭ghukṣat ||8||
yaṃ vai sūrya̱ṃ sva̭rbhānu̱stama̱sāvi̭dhyadāsu̱raḥ |
atra̭ya̱stamanva̭vindan na̱hya1nye aśa̭knuvan ||9||
20 bhaumo'triḥ| viśve devāḥ | triṣṭup, 16-17 atijagatī, 20 ekapadā virāṭ|
ko nu vā̭ṃ mitrāvaruṇāvṛtā̱yan di̱vo vā̭ ma̱haḥ pārthi̭vasya vā̱ de |
ṛ̱tasya̭ vā̱ sada̭si̱ trāsī̭thāṃ no yajñāya̱te vā̭ paśu̱ṣo na vājā̭n ||1||
te no̭ mi̱tro varṷṇo arya̱māyurindra̭ ṛbhu̱kṣā ma̱ruto̭ juṣanta |
namo̭bhirvā̱ ye dadha̭te suvṛ̱ktiṃ stoma̭ṃ ru̱drāya̭ mī̱ḻahuṣḙ sa̱joṣā̭: ||2||
ā vā̱ṃ yeṣṭhā̭śvinā hu̱vadhyai̱ vāta̭sya̱ patma̱n rathya̭sya pu̱ṣṭau |
u̱ta vā̭ di̱vo asṷrāya̱ manma̱ prāndhā̭ṃsīva̱ yajya̭ve bharadhvam ||3||
pra sa̱kṣaṇo̭ di̱vyaḥ kaṇva̭hotā tri̱to di̱vaḥ sa̱joṣā̱ vāto̭ a̱gniḥ |
pū̱ṣā bhaga̭: prabhṛ̱the vi̱śvabho̭jā ā̱jiṃ na ja̭gmurā̱śva̭śvatamāḥ ||4||
pra vo̭ ra̱yiṃ yu̱ktāśva̭ṃ bharadhvaṃ rā̱ya eṣe'va̭se dadhīta̱ dhīḥ |
su̱śeva̱ evai̭rauśi̱jasya̱ hotā̱ ye va̱ evā̭ marutastu̱rāṇā̭m ||5||
pra vo̭ vā̱yuṃ ra̭tha̱yuja̭ṃ kṛṇudhva̱ṃ pra de̱vaṃ vipra̭ṃ pani̱tāra̭ma̱rkaiḥ |
i̱ṣu̱dhyava̭ ṛta̱sāpa̱: pura̭ṃdhī̱rvasvī̭rno̱ atra̱ patnī̱rā dhi̱ye dhṷ: ||6||
upa̭ va̱ eṣe̱ vandyḙbhiḥ śū̱ṣaiḥ pra ya̱hvī di̱vaści̱taya̭dbhira̱rkaiḥ |
u̱ṣāsā̱naktā̭ vi̱duṣī̭va̱ viśva̱mā hā̭ vahato̱ martyā̭ya ya̱jñam ||7||
a̱bhi vo̭ arce po̱ṣyāva̭to̱ nṝn vāsto̱ṣpati̱ṃ tvaṣṭā̭ra̱ṃ rarā̭ṇaḥ |
dhanyā̭ sa̱joṣā̭ dhi̱ṣaṇā̱ namo̭bhi̱rvana̱spatī̱~roṣa̭dhī rā̱ya eṣḙ ||8||
tu̱je na̱stane̱ parva̭tāḥ santu̱ svaita̭vo̱ ye vasa̭vo̱ na vī̱rāḥ |
pa̱ni̱ta ā̱ptyo ya̭ja̱taḥ sadā̭ no̱ vardhā̭nna̱: śaṃsa̱ṃ naryo̭ a̱bhiṣṭaṷ ||9||
vṛṣṇo̭ astoṣi bhū̱myasya̱ garbha̭ṃ tri̱to napā̭tama̱pāṃ sṷvṛ̱kti |
gṛ̱ṇī̱te a̱gnire̱tarī̱ na śū̱ṣaiḥ śo̱ciṣkḙśo̱ ni ri̭ṇāti̱ vanā̭ ||10||||
ka̱thā ma̱he ru̱driyā̭ya bravāma̱ kadrā̱ye ci̭ki̱tuṣe̱ bhagā̭ya |
āpa̱ oṣa̭dhīru̱ta no̭'vantu̱ dyaurvanā̭ gi̱rayo̭ vṛ̱kṣakḙśāḥ ||11||||
śṛ̱ṇotṷ na ū̱rjāṃ pati̱rgira̱: sa nabha̱starī̭yā~ iṣi̱raḥ pari̭jmā |
śṛ̱ṇvantvāpa̱: puro̱ na śu̱bhrāḥ pari̱ sruco̭ babṛhā̱ṇasyādrḙ: ||12||
vi̱dā ci̱nnu ma̭hānto̱ ye va̱ evā̱ bravā̭ma dasmā̱ vārya̱ṃ dadhā̭nāḥ |
vaya̭śca̱na su̱bhva1 āva̭ yanti kṣu̱bhā marta̱manṷyataṃ vadha̱snaiḥ ||13||
ā daivyā̭ni̱ pārthi̭vāni̱ janmā̱paścācchā̱ suma̭khāya vocam |
vardha̭ntā̱ṃ dyāvo̱ gira̭śca̱ndrāgrā̭ u̱dā va̭rdhantāma̱bhiṣā̭tā̱ arṇā̭: ||14||
pa̱depa̭de me jari̱mā ni dhā̭yi̱ varṷ̄trī vā śa̱krā yā pā̱yubhi̭śca |
siṣa̭ktu mā̱tā ma̱hī ra̱sā na̱: smat sū̱ribhi̭rṛju̱hasta̭ ṛju̱vani̭: ||15||
ka̱thā dā̭śema̱ nama̭sā su̱dānṷ̄neva̱yā ma̱ruto̱ accho̭ktau̱ praśra̭vaso ma̱ruto̱ accho̭ktau |
mā no'hi̭rbu̱dhnyo̭ ri̱ṣe dhā̭da̱smāka̭ṃ bhūdupamāti̱vani̭: ||16||
iti̭ ci̱nnu pra̱jāyai̭ paśu̱matyai̱ devā̭so̱ vana̭te̱ martyo̭ va̱ ā dḙvāso vanate̱ martyo̭ vaḥ |
atrā̭ śi̱vāṃ ta̱nvo̭ dhā̱sima̱syā ja̱rāṃ ci̭nme̱ nirṛ̭tirjagrasīta ||17||
tāṃ vo̭ devāḥ suma̱timū̱rjaya̭ntī̱miṣa̭maśyāma vasava̱: śasā̱ goḥ |
sā na̭: su̱dānṷrmṛ̱ḻaya̭ntī de̱vī prati̱ drava̭ntī suvi̱tāya̭ gamyāḥ ||18||
a̱bhi na̱ iḻā̭ yū̱thasya̭ mā̱tā smanna̱dībhi̭ru̱rvaśī̭ vā gṛṇātu |
u̱rvaśī̭ vā bṛhaddi̱vā gṛ̭ṇā̱nā'bhyṷ̄rṇvā̱nā pra̭bhṛ̱thasyā̱yoḥ ||19||
siṣa̭ktu na ūrja̱vya̭sya pu̱ṣṭeḥ ||20||||
18 bhaumo'triḥ| viśve devāḥ, 11 rudraḥ| triṣṭup, 17 ekapadā virāṭ|
pra śaṃta̭mā̱ varṷṇa̱ṃ dīdhi̭tī̱ gīrmi̱traṃ bhaga̱madi̭tiṃ nū̱nama̭śyāḥ |
pṛṣa̭dyoni̱: pañca̭hotā śṛṇo̱tvatṷ̄rtapanthā̱ asṷro mayo̱bhuḥ ||1||
prati̭ me̱ stoma̱madi̭tirjagṛbhyāt sū̱nuṃ na mā̱tā hṛdya̭ṃ su̱śeva̭m |
brahma̭ pri̱yaṃ de̱vahi̭ta̱ṃ yadastya̱haṃ mi̱tre varṷṇe̱ yanma̭yo̱bhu ||2||
udī̭raya ka̱vita̭maṃ kavī̱nāmu̱nattai̭nama̱bhi madhvā̭ ghṛ̱tena̭ |
sa no̱ vasṷ̄ni̱ praya̭tā hi̱tāni̭ ca̱ndrāṇi̭ de̱vaḥ sa̭vi̱tā sṷvāti ||3||
sami̭ndra ṇo̱ mana̭sā neṣi̱ gobhi̱: saṃ sū̱ribhi̭rhariva̱: saṃ sva̱sti |
saṃ brahma̭ṇā de̱vahi̭ta̱ṃ yadasti̱ saṃ de̱vānā̭ṃ suma̱tyā ya̱jñiyā̭nām ||4||
de̱vo bhaga̭: savi̱tā rā̱yo aṃśa̱ indro̭ vṛ̱trasya̭ sa̱ṃjito̱ dhanā̭nām |
ṛ̱bhu̱kṣā vāja̭ u̱ta vā̱ pura̭ṃdhi̱rava̭ntu no a̱mṛtā̭sastu̱rāsa̭: ||5||
ma̱rutva̭to̱ apra̭tītasya ji̱ṣṇorajṷ̄ryata̱: pra bra̭vāmā kṛ̱tāni̭ |
na te̱ pūrvḙ maghava̱n nāpa̭rāso̱ na vī̱ryaṃ1 nūta̭na̱: kaśca̱nāpa̭ ||6||
upa̭ stuhi pratha̱maṃ ra̭tna̱dheya̱ṃ bṛha̱spati̭ṃ sani̱tāra̱ṃ dhanā̭nām |
yaḥ śaṃsa̭te stuva̱te śambha̭viṣṭhaḥ purū̱vasṷrā̱gama̱jjohṷvānam ||7||
tavo̱tibhi̱: saca̭mānā̱ ari̭ṣṭā̱ bṛha̭spate ma̱ghavā̭naḥ su̱vīrā̭: |
ye a̭śva̱dā u̱ta vā̱ santi̭ go̱dā ye va̭stra̱dāḥ su̱bhagā̱steṣu̱ rāya̭: ||8||
vi̱sa̱rmāṇa̭ṃ kṛṇuhi vi̱ttamḙṣā̱ṃ ye bhu̱ñjate̱ apṛ̭ṇanto na u̱kthaiḥ |
apa̭vratān prasa̱ve vā̭vṛdhā̱nān bra̭hma̱dviṣa̱: sūryā̭d yāvayasva ||9||
ya oha̭te ra̱kṣaso̭ de̱vavī̭tāvaca̱krebhi̱staṃ ma̭ruto̱ ni yā̭ta |
yo va̱: śamī̭ṃ śaśamā̱nasya̱ nindā̭ttu̱cchyān kāmā̭n karate siṣvidā̱naḥ ||10||||
tamṷ ṣṭuhi̱ yaḥ svi̱ṣuḥ su̱dhanvā̱ yo viśva̭sya̱ kṣaya̭ti bheṣa̱jasya̭ |
yakṣvā̭ ma̱he saṷmana̱sāya̭ ru̱draṃ namo̭bhirde̱vamasṷraṃ duvasya ||11||||
damṷ̄naso a̱paso̱ ye su̱hastā̱ vṛṣṇa̱: patnī̭rna̱dyo̭ vibhvata̱ṣṭāḥ |
sara̭svatī bṛhaddi̱vota rā̱kā da̭śa̱syantī̭rvarivasyantu śu̱bhrāḥ ||12||
pra sū ma̱he sṷśara̱ṇāya̭ me̱dhāṃ gira̭ṃ bhare̱ navya̭sī̱ṃ jāya̭mānām |
ya ā̭ha̱nā dṷhi̱turva̱kṣaṇā̭su rū̱pā mi̭nā̱no akṛ̭ṇodi̱daṃ na̭: ||13||
pra sṷṣṭu̱tiḥ sta̱naya̭ntaṃ ru̱vanta̭mi̱ḻaspati̭ṃ jaritarnū̱nama̭śyāḥ |
yo a̭bdi̱mā~ ṷdani̱mā~ iya̭rti̱ pra vi̱dyutā̱ roda̭sī u̱kṣamā̭ṇaḥ ||14||
e̱ṣa stomo̱ mārṷta̱ṃ śardho̱ acchā̭ ru̱drasya̭ sū̱nū~ryṷva̱nyū~ruda̭śyāḥ |
kāmo̭ rā̱ye ha̭vate mā sva̱styupa̭ stuhi̱ pṛṣa̭daśvā~ a̱yāsa̭: ||15||
praiṣa stoma̭: pṛthi̱vīma̱ntari̭kṣa̱ṃ vana̱spatī̱~roṣa̭dhī rā̱ye a̭śyāḥ |
de̱vodḙvaḥ su̱havo̭ bhūtu̱ mahya̱ṃ mā no̭ mā̱tā pṛ̭thi̱vī dṷrma̱tau dhā̭t ||16||
u̱rau dḙvā anibā̱dhe syā̭ma ||17||
sama̱śvino̱rava̭sā̱ nūta̭nena mayo̱bhuvā̭ su̱praṇī̭tī gamema |
ā no̭ ra̱yiṃ va̭hata̱mota vī̱rānā viśvā̭nyamṛtā̱ saubha̭gāni ||18||
17 bhaumo'triḥ| viśve devāḥ | triṣṭup, 16 ekapadā virāṭ |
ā dhe̱nava̱: paya̭sā̱ tūrṇya̭rthā̱ ama̭rdhantī̱rupa̭ no yantu̱ madhvā̭ |
ma̱ho rā̱ye bṛ̭ha̱tīḥ sa̱pta vipro̭ mayo̱bhuvo̭ jari̱tā jo̭havīti ||1||
ā sṷṣṭu̱tī nama̭sā varta̱yadhyai̱ dyāvā̱ vājā̭ya pṛthi̱vī amṛ̭dhre |
pi̱tā mā̱tā madhṷvacāḥ su̱hastā̱ bharḙbhare no ya̱śasā̭vaviṣṭām ||2||
adhva̭ryavaścakṛ̱vāṃso̱ madhṷ̄ni̱ pra vā̱yavḙ bharata̱ cārṷ śu̱kram |
hotḙva naḥ pratha̱maḥ pā̭hya̱sya deva̱ madhvo̭ rari̱mā te̱ madā̭ya ||3||
daśa̱ kṣipo̭ yuñjate bā̱hū adri̱ṃ soma̭sya̱ yā śa̭mi̱tārā̭ su̱hastā̭ |
madhvo̱ rasa̭ṃ su̱gabha̭stirgiri̱ṣṭhāṃ cani̭ścadad duduhe śu̱krama̱ṃśuḥ ||4||
asā̭vi te jujuṣā̱ṇāya̱ soma̱: kratve̱ dakṣā̭ya bṛha̱te madā̭ya |
harī̱ rathḙ su̱dhurā̱ yogḙ a̱rvāgindra̭ pri̱yā kṛ̭ṇuhi hū̱yamā̭naḥ ||5||
ā no̭ ma̱hīma̱rama̭tiṃ sa̱joṣā̱ gnāṃ de̱vīṃ nama̭sā rā̱taha̭vyām |
madho̱rmadā̭ya bṛha̱tīmṛ̭ta̱jñāmāgnḙ vaha pa̱thibhi̭rdeva̱yānai̭: ||6||
a̱ñjanti̱ yaṃ pra̱thaya̭nto̱ na viprā̭ va̱pāva̭nta̱ṃ nāgninā̱ tapa̭ntaḥ |
pi̱turna pu̱tra u̱pasi̱ preṣṭha̱ ā gha̱rmo a̱gnimṛ̱taya̭nnasādi ||7||
acchā̭ ma̱hī bṛ̭ha̱tī śaṃta̭mā̱ gīrdū̱to na ga̭ntva̱śvinā̭ hu̱vadhyai̭ |
ma̱yo̱bhuvā̭ sa̱rathā yā̭tama̱rvāgga̱ntaṃ ni̱dhiṃ dhura̭mā̱ṇirna nābhi̭m ||8||
pra tavya̭so̱ nama̭uktiṃ tu̱rasyā̱'haṃ pū̱ṣṇa u̱ta vā̱yora̭dikṣi |
yā rādha̭sā codi̱tārā̭ matī̱nāṃ yā vāja̭sya draviṇo̱dā u̱ta tman ||9||
ā nāma̭bhirma̱ruto̭ vakṣi̱ viśvā̱nā rū̱pebhi̭rjātavedo huvā̱naḥ |
ya̱jñaṃ giro̭ jari̱tuḥ sṷṣṭu̱tiṃ ca̱ viśvḙ ganta maruto̱ viśva̭ ū̱tī ||10||||
ā no̭ di̱vo bṛ̭ha̱taḥ parva̭tā̱dā sara̭svatī yaja̱tā ga̭ntu ya̱jñam |
hava̭ṃ de̱vī jṷjuṣā̱ṇā ghṛ̱tācī̭ śa̱gmāṃ no̱ vāca̭muśa̱tī śṛ̭ṇotu ||11||||
ā ve̱dhasa̱ṃ nīla̭pṛṣṭhaṃ bṛ̱hanta̱ṃ bṛha̱spati̱ṃ sada̭ne sādayadhvam |
sā̱dadyo̭ni̱ṃ dama̱ ā dī̭di̱vāṃsa̱ṃ hira̭ṇyavarṇamaru̱ṣaṃ sa̭pema ||12||
ā dha̭rṇa̱sirbṛ̱haddi̭vo̱ rarā̭ṇo̱ viśvḙbhirga̱ntvoma̭bhirhuvā̱naḥ |
gnā vasā̭na̱ oṣa̭dhī̱ramṛ̭dhrastri̱dhātṷśṛṅgo vṛṣa̱bho va̭yo̱dhāḥ ||13||
mā̱tuṣpa̱de pa̭ra̱me śu̱kra ā̱yorvi̭pa̱nyavo̭ rāspi̱rāso̭ agman |
su̱śevya̱ṃ nama̭sā rā̱taha̭vyā̱: śiśṷṃ mṛjantyā̱yavo̱ na vā̱se ||14||
bṛ̱had vayo̭ bṛha̱te tubhya̭magne dhiyā̱juro̭ mithu̱nāsa̭: sacanta |
de̱vodḙvaḥ su̱havo̭ bhūtu̱ mahya̱ṃ mā no̭ mā̱tā pṛ̭thi̱vī dṷrma̱tau dhā̭t ||15||
u̱rau dḙvā anibā̱dhe syā̭ma ||16||
sama̱śvino̱rava̭sā̱ nūta̭nena mayo̱bhuvā̭ su̱praṇī̭tī gamema |
ā no̭ ra̱yiṃ va̭hata̱mota vī̱rānā viśvā̭nyamṛtā̱ saubha̭gāni ||17||
15 kāśyapo'vatsāraḥ (10 kṣatra-manasa-evāvada-yajata-sadhri- avatsārāḥ, 11 viśvavāra- yajata- māyī- avatsārāḥ, 12 avatsareṇa saha sadāpṛṇa- yajata- bāhuvṛkta- śrutavit-taryāḥ, 13 sutaṃbharaśca)| viśve devāḥ| jagatī, 14-15 triṣṭup|
taṃ pra̱tnathā̭ pū̱rvathā̭ vi̱śvathe̱mathā̭ jye̱ṣṭhatā̭tiṃ barhi̱ṣada̭ṃ sva̱rvida̭m |
pra̱tī̱cī̱naṃ vṛ̱jana̭ṃ dohase gi̱rā ''śuṃ jaya̭nta̱manu̱ yāsu̱ vardha̭se ||1||
śri̱ye su̱dṛśī̱rupa̭rasya̱ yāḥ sva̭rvi̱roca̭mānaḥ ka̱kubhā̭maco̱datḙ |
su̱go̱pā a̭si̱ na dabhā̭ya sukrato pa̱ro mā̱yābhi̭rṛ̱ta ā̭sa̱ nāma̭ te ||2||
atya̭ṃ ha̱viḥ sa̭cate̱ sacca̱ dhātu̱ cā'ri̭ṣṭagātu̱: sa hotā̭ saho̱bhari̭: |
pra̱sarsrā̭ṇo̱ anṷ ba̱rhirvṛṣā̱ śiśu̱rmadhye̱ yuvā̱jaro̭ vi̱sruhā̭ hi̱taḥ ||3||
pra va̭ e̱te su̱yujo̱ yāma̭nni̱ṣṭaye̱ nīcī̭ra̱muṣmai̭ ya̱mya̭ ṛtā̱vṛdha̭: |
su̱yantṷbhiḥ sarvaśā̱saira̱bhīśṷbhi̱: krivi̱rnāmā̭ni prava̱ṇe mṷṣāyati ||4||
sa̱ṃjarbhṷrāṇa̱starṷbhiḥ sute̱gṛbha̭ṃ vayā̱kina̭ṃ ci̱ttaga̭rbhāsu su̱svarṷ: |
dhā̱ra̱vā̱keṣvṛ̭jugātha śobhase̱ vardha̭sva̱ patnī̭ra̱bhi jī̱vo a̭dhva̱re ||5||
yā̱dṛge̱va dadṛ̭śe tā̱dṛgṷcyate̱ saṃ chā̱yayā̭ dadhire si̱dhrayā̱psvā |
ma̱hīma̱smabhya̭muru̱ṣāmu̱ru jrayo̭ bṛ̱hat su̱vīra̱mana̭pacyuta̱ṃ saha̭: ||6||
vetyagru̱rjani̭vā̱n vā ati̱ spṛdha̭: samarya̱tā mana̭sā̱ sūrya̭: ka̱viḥ |
ghra̱ṃsaṃ rakṣa̭nta̱ṃ pari̭ vi̱śvato̱ gaya̭ma̱smāka̱ṃ śarma̭ vanava̱t svāva̭suḥ ||7||
jyāyā̭ṃsama̱sya ya̱tuna̭sya ke̱tuna̭ ṛṣisva̱raṃ ca̭rati̱ yāsu̱ nāma̭ te |
yā̱dṛśmi̱n dhāyi̱ tama̭pa̱syayā̭ vida̱d ya ṷ sva̱yaṃ vaha̭te̱ so ara̭ṃ karat ||8||
sa̱mu̱dramā̭sā̱mava̭ tasthe agri̱mā na ri̭ṣyati̱ sava̭na̱ṃ yasmi̱nnāya̭tā |
atrā̱ na hārdi̭ krava̱ṇasya̭ rejate̱ yatrā̭ ma̱tirvi̱dyatḙ pūta̱bandha̭nī ||9||
sa hi kṣa̱trasya̭ mana̱sasya̱ citti̭bhirevāva̱dasya̭ yaja̱tasya̱ sadhrḙ: |
a̱va̱tsā̱rasya̭ spṛṇavāma̱ raṇva̭bhi̱: śavi̭ṣṭha̱ṃ vāja̭ṃ vi̱duṣā̭ ci̱dardhya̭m ||10||||
śye̱na ā̭sā̱madi̭tiḥ ka̱kṣyo̱3 mado̭ vi̱śvavā̭rasya yaja̱tasya̭ mā̱yina̭: |
sama̱nyama̭nyamarthaya̱ntyeta̭ve vi̱durvi̱ṣāṇa̭ṃ pari̱pāna̱manti̱ te ||11||||
sa̱dā̱pṛ̱ṇo ya̭ja̱to vi dviṣo̭ vadhīd bāhuvṛ̱ktaḥ śrṷta̱vit taryo̭ va̱: sacā̭ |
u̱bhā sa varā̱ pratyḙti̱ bhāti̭ ca̱ yadī̭ṃ ga̱ṇaṃ bhaja̭te supra̱yāva̭bhiḥ ||12||
su̱ta̱mbha̱ro yaja̭mānasya̱ satpa̭ti̱rviśvā̭sā̱mūdha̱: sa dhi̱yāmu̱dañca̭naḥ |
bhara̭d dhe̱nū rasa̭vacchiśriye̱ payo̭'nubruvā̱ṇo adhyḙti̱ na sva̱pan ||13||
yo jā̱gāra̱ tamṛca̭: kāmayante̱ yo jā̱gāra̱ tamu̱ sāmā̭ni yanti |
yo jā̱gāra̱ tama̱yaṃ soma̭ āha̱ tavā̱hama̭smi sa̱khye nyo̭kāḥ ||14||
a̱gnirjā̭gāra̱ tamṛca̭: kāmayante̱'gnirjā̭gāra̱ tamu̱ sāmā̭ni yanti |
a̱gnirjā̭gāra̱ tama̱yaṃ soma̭ āha̱ tavā̱hama̭smi sa̱khye nyo̭kāḥ ||15||
11 sadāpṛṇā ātreyaḥ| viśve devāḥ| triṣṭup 9 purastājjyotiḥ|
vi̱dā di̱vo vi̱ṣyannadri̭mu̱kthairā̭ya̱tyā u̱ṣaso̭ a̱rcino̭ guḥ |
apā̭vṛta vra̱jinī̱rut sva̭rgā̱d vi duro̱ mānṷṣīrde̱va ā̭vaḥ ||1||
vi sūryo̭ a̱mati̱ṃ na śriya̭ṃ sā̱dorvād gavā̭ṃ mā̱tā jā̭na̱tī gā̭t |
dhanva̭rṇaso na̱dya1: khādo̭arṇā̱: sthūṇḙva̱ sumi̭tā dṛṃhata̱ dyauḥ ||2||
a̱smā u̱kthāya̱ parva̭tasya̱ garbho̭ ma̱hīnā̭ṃ ja̱nuṣḙ pū̱rvyāya̭ |
vi parva̭to̱ jihī̭ta̱ sādha̭ta̱ dyaurā̱vivā̭santo dasayanta̱ bhūma̭ ||3||
sū̱ktebhi̭rvo̱ vaco̭bhirde̱vajṷṣṭai̱rindrā̱ nva1gnī ava̭se hu̱vadhyai̭ |
u̱kthebhi̱rhi ṣmā̭ ka̱vaya̭: suya̱jñā ā̱vivā̭santo ma̱ruto̱ yaja̭nti ||4||
eto̱ nva1dya su̱dhyo̱3 bhavā̭ma̱ pra du̱cchunā̭ minavāmā̱ varī̭yaḥ |
ā̱re dveṣā̭ṃsi sanu̱tarda̭dhā̱mā'yā̭ma̱ prāñco̱ yaja̭māna̱maccha̭ ||5||
etā̱ dhiya̭ṃ kṛ̱ṇavā̭mā sakhā̱yo'pa̱ yā mā̱tā~ ṛ̭ṇu̱ta vra̱jaṃ goḥ |
yayā̱ manṷrviśiśi̱praṃ ji̱gāya̱ yayā̭ va̱ṇigva̱ṅkurāpā̱ purī̭ṣam ||6||
anṷ̄no̱datra̱ hasta̭yato̱ adri̱rārca̱n yena̱ daśa̭ mā̱so nava̭gvāḥ |
ṛ̱taṃ ya̱tī sa̱ramā̱ gā a̭vinda̱d viśvā̭ni sa̱tyāṅgi̭rāścakāra ||7||
viśvḙ a̱syā vyuṣi̱ māhi̭nāyā̱: saṃ yad gobhi̱raṅgi̭raso̱ nava̭nta |
utsa̭ āsāṃ para̱me sa̱dhastha̭ ṛ̱tasya̭ pa̱thā sa̱ramā̭ vida̱d gāḥ ||8||
ā sūryo̭ yātu sa̱ptāśva̱: kṣetra̱ṃ yada̭syorvi̱yā dī̭rghayā̱the |
ra̱ghuḥ śye̱naḥ pa̭taya̱dandho̱ acchā̱ yuvā̭ ka̱virdī̭daya̱d goṣu̱ gaccha̭n ||9||
ā sūryo̭ aruhacchu̱kramarṇo'yṷkta̱ yaddha̱rito̭ vī̱tapṛ̭ṣṭhāḥ |
u̱dnā na nāva̭manayanta̱ dhīrā̭ āśṛṇva̱tīrāpo̭ a̱rvāga̭tiṣṭhan ||10||
dhiya̭ṃ vo a̱psu da̭dhiṣe sva̱rṣāṃ yayāta̭ra̱n daśa̭ mā̱so nava̭gvāḥ |
a̱yā dhi̱yā syā̭ma de̱vago̭pā a̱yā dhi̱yā tṷturyā̱mātyaṃha̭: ||11||
8 pratikṣatra ātreyaḥ| viśve devāḥ, 7-8 devapatnyaḥ| jagatī, 2, 8 triṣṭup|
hayo̱ na vi̱dvā~ a̭yuji sva̱yaṃ dhu̱ri tāṃ va̭hāmi pra̱tara̭ṇīmava̱syuva̭m |
nāsyā̭ vaśmi vi̱muca̱ṃ nāvṛta̱̱ puna̭rvi̱dvān pa̱thaḥ pṷrae̱ta ṛ̱ju nḙṣati ||1||
agna̱ indra̱ varṷṇa̱ mitra̱ devā̱: śardha̱: pra ya̭nta̱ mārṷto̱ta vi̭ṣṇo |
u̱bhā nāsa̭tyā ru̱dro adha̱ gnāḥ pū̱ṣā bhaga̱: sara̭svatī juṣanta ||2||
i̱ndrā̱gnī mi̱trāvaru̱ṇādi̭ti̱ṃ sva̭: pṛthi̱vīṃ dyāṃ ma̱ruta̱: parva̭tā~ a̱paḥ |
hu̱ve viṣṇṷṃ pū̱ṣaṇa̱ṃ brahma̭ṇa̱spati̱ṃ bhaga̱ṃ nu śaṃsa̭ṃ savi̱tāra̭mū̱tayḙ ||3||
u̱ta no̱ viṣṇṷru̱ta vāto̭ a̱sridho̭ draviṇo̱dā u̱ta somo̱ maya̭skarat |
u̱ta ṛ̱bhava̭ u̱ta rā̱ye no̭ a̱śvino̱ta tvaṣṭo̱ta vibhvānṷ maṃsate ||4||
u̱ta tyanno̱ mārṷta̱ṃ śardha̱ ā ga̭mad divikṣa̱yaṃ ya̭ja̱taṃ ba̱rhirā̱sadḙ |
bṛha̱spati̱: śarma̭ pū̱ṣota no̭ yamad varū̱thyaṃ1 varṷṇo mi̱tro a̭rya̱mā ||5||
u̱ta tye na̱: parva̭tāsaḥ suśa̱staya̭: sudī̱tayo̭ na̱dya1strāma̭ṇe bhuvan |
bhago̭ vibha̱ktā śava̱sāva̱sā ga̭maduru̱vyacā̱ adi̭tiḥ śrotu me̱ hava̭m ||6||
de̱vānā̱ṃ patnī̭ruśa̱tīra̭vantu na̱: prāva̭ntu nastu̱jaye̱ vāja̭sātaye |
yāḥ pārthi̭vāso̱ yā a̱pāmapi̭ vra̱te tā no̭ devīḥ suhavā̱: śarma̭ yacchata ||7||
u̱ta gnā vya̭ntu de̱vapa̭tnīrindrā̱ṇya1gnāyya̱śvinī̱ rāṭ |
ā roda̭sī varuṇā̱nī śṛ̭ṇotu̱ vyantṷ de̱vīrya ṛ̱turjanī̭nām ||8||
7 pratiratha ātreyaḥ| viśve devāḥ| triṣṭup|
pra̱yu̱ñja̱tī di̱va ḙti bruvā̱ṇā ma̱hī mā̱tā dṷhi̱turbo̱dhaya̭ntī |
ā̱vivā̭santī yuva̱tirma̭nī̱ṣā pi̱tṛbhya̱ ā sada̭ne̱ johṷvānā ||1||
a̱ji̱rāsa̱stada̭pa̱ īya̭mānā ātasthi̱vāṃso̭ a̱mṛta̭sya̱ nābhi̭m |
a̱na̱ntāsa̭ u̱ravo̭ vi̱śvata̭: sī̱ṃ pari̱ dyāvā̭pṛthi̱vī ya̭nti̱ panthā̭: ||2||
u̱kṣā sa̭mu̱dro a̭ru̱ṣaḥ sṷpa̱rṇaḥ pūrva̭sya̱ yoni̭ṃ pi̱turā vi̭veśa |
madhyḙ di̱vo nihi̭ta̱: pṛśni̱raśmā̱ vi ca̭krame̱ raja̭saspā̱tyantaṷ ||3||
ca̱tvāra̭ īṃ bibhrati kṣema̱yanto̱ daśa̱ garbha̭ṃ ca̱rasḙ dhāpayante |
tri̱dhāta̭vaḥ para̱mā a̭sya̱ gāvo̭ di̱vaśca̭ranti̱ pari̭ sa̱dyo antā̭n ||4||
i̱daṃ vapṷrni̱vaca̭naṃ janāsa̱ścara̭nti̱ yanna̱dya̭sta̱sthurāpa̭: |
dve yadī̭ṃ bibhṛ̱to mā̱tura̱nye i̱heha̭ jā̱te ya̱myā̱3 saba̭ndhū ||5||
vi ta̭nvate̱ dhiyo̭ asmā̱ apā̭ṃsi̱ vastrā̭ pu̱trāya̭ mā̱taro̭ vayanti |
u̱pa̱pra̱kṣe vṛṣa̭ṇo̱ moda̭mānā di̱vaspa̱thā va̱dhvo̭ ya̱ntyaccha̭ ||6||
tada̭stu mitrāvaruṇā̱ tada̭gne̱ śaṃ yora̱smabhya̭mi̱dama̭stu śa̱stam |
a̱śī̱mahi̭ gā̱dhamu̱ta pra̭ti̱ṣṭhāṃ namo̭ di̱ve bṛ̭ha̱te sāda̭nāya ||7||
5 pratibhānurātreyaḥ| viśve devāḥ| jagatī|
kadṷ pri̱yāya̱ dhāmnḙ manāmahe̱ svakṣa̭trāya̱ svaya̭śase ma̱he va̱yam |
ā̱me̱nyasya̱ raja̭so̱ yada̱bhra ā~ a̱po vṛ̭ṇā̱nā vi̭ta̱noti̭ mā̱yinī̭ ||1||
tā a̭tnata va̱yuna̭ṃ vī̱rava̭kṣaṇaṃ samā̱nyā vṛ̱tayā̱ viśva̱mā raja̭: |
apo̱ apā̭cī̱rapa̭rā̱ apḙjate̱ pra pūrvā̭bhistirate deva̱yurjana̭: ||2||
ā grāva̭bhiraha̱nyḙbhira̱ktubhi̱rvari̭ṣṭha̱ṃ vajra̱mā ji̭gharti mā̱yini̭ |
śa̱taṃ vā̱ yasya̭ pra̱cara̱n tsve damḙ saṃva̱rtaya̭nto̱ vi ca̭ vartaya̱nnahā̭ ||3||
tāma̭sya rī̱tiṃ pa̭ra̱śori̭va̱ pratyanī̭kamakhyaṃ bhu̱je a̭sya̱ varpa̭saḥ |
sacā̱ yadi̭ pitu̱manta̭miva̱ kṣaya̱ṃ ratna̱ṃ dadhā̭ti̱ bhara̭hūtaye vi̱śe ||4||
sa ji̱hvayā̱ catṷranīka ṛñjate̱ cāru̱ vasā̭no̱ varṷṇo̱ yata̭nna̱rim |
na tasya̭ vidma puruṣa̱tvatā̭ va̱yaṃ yato̱ bhaga̭: savi̱tā dāti̱ vārya̭m ||5||
5 pratiprabha ātreyaḥ, (5 tṛṇapāṇiḥ)| viśve devāḥ| triṣṭup|
de̱vaṃ vo̭ a̱dya sa̭vi̱tāra̱meṣe̱ bhaga̭ṃ ca̱ ratna̭ṃ vi̱bhaja̭ntamā̱yoḥ |
ā vā̭ṃ narā purubhujā vavṛtyāṃ di̱vedi̭ve cidaśvinā sakhī̱yan ||1||
prati̭ pra̱yāṇa̱masṷrasya vi̱dvān tsū̱ktairde̱vaṃ sa̭vi̱tāra̭ṃ duvasya |
upa̭ bruvīta̱ nama̭sā vijā̱nañjyeṣṭha̭ṃ ca̱ ratna̭ṃ vi̱bhaja̭ntamā̱yoḥ ||2||
a̱da̱tra̱yā da̭yate̱ vāryā̭ṇi pū̱ṣā bhago̱ adi̭ti̱rvasta̭ u̱sraḥ |
indro̱ viṣṇu̱rvarṷṇo mi̱tro a̱gnirahā̭ni bha̱drā ja̭nayanta da̱smāḥ ||3||
tanno̭ ana̱rvā sa̭vi̱tā varṷ̄tha̱ṃ tat sindha̭va i̱ṣaya̭nto̱ anṷ gman |
upa̱ yad vocḙ adhva̱rasya̱ hotā̭ rā̱yaḥ syā̭ma̱ pata̭yo̱ vāja̭ratnāḥ ||4||
pra ye vasṷbhya̱ īva̱dā namo̱ durye mi̱tre varṷṇe sū̱ktavā̭caḥ |
avai̱tvabhva̭ṃ kṛṇu̱tā varī̭yo di̱vaspṛ̭thi̱vyorava̭sā madema ||5||
5 svastyātreyaḥ| viśve devāḥ| anuṣṭup, 5 paṅktiḥ|
viśvo̭ de̱vasya̭ ne̱turmarto̭ vurīta sa̱khyam |
viśvo̭ rā̱ya i̭ṣudhyati dyu̱mnaṃ vṛ̭ṇīta pu̱ṣyasḙ ||1||
te tḙ deva neta̱rye ce̱mā~ a̭nu̱śasḙ |
te rā̱yā te hyā̱3pṛce̱ sacḙmahi saca̱thyai̭: ||2||
ato̭ na̱ ā nṝnati̭thī̱nata̱: patnī̭rdaśasyata |
ā̱re viśva̭ṃ pathe̱ṣṭhāṃ dvi̱ṣo yṷyotu̱ yūyṷviḥ ||3||
yatra̱ vahni̭ra̱bhihi̭to du̱drava̱d droṇya̭: pa̱śuḥ |
nṛ̱maṇā̭ vī̱rapa̱styo'rṇā̱ dhīrḙva̱ sani̭tā ||4||
e̱ṣa tḙ deva netā̱ ratha̱spati̱: śaṃ ra̱yiḥ |
śaṃ rā̱ye śaṃ sva̱staya̭ iṣa̱:stuto̭ manāmahe deva̱stuto̭ manāmahe ||5||
15 svastyātreyaḥ| viśve devāḥ, 4, 6-7 indravāyū, 5 vāyuḥ|1-4 gāyatrī, 5-10 uṣṇik, 11-13 jagatī triṣṭubvā, 14-15 anuṣṭup|
agnḙ su̱tasya̭ pī̱taye̱ viśvai̱rūmḙbhi̱rā ga̭hi | de̱vebhi̭rha̱vyadā̭taye ||1||
ṛta̭dhītaya̱ ā ga̭ta̱ satya̭dharmāṇo adhva̱ram | a̱gneḥ pi̭bata ji̱hvayā̭ ||2||
viprḙbhirvipra santya prāta̱ryāva̭bhi̱rā ga̭hi | de̱vebhi̱: soma̭pītaye ||3||
a̱yaṃ soma̭śca̱mū su̱to'ma̭tre̱ pari̭ ṣicyate | pri̱ya indrā̭ya vā̱yavḙ ||4||
vāya̱vā yā̭hi vī̱tayḙ juṣā̱ṇo ha̱vyadā̭taye | pibā̭ su̱tasyāndha̭so a̱bhi praya̭: ||5||
indra̭śca vāyaveṣāṃ su̱tānā̭ṃ pī̱tima̭rhathaḥ | tāñjṷṣethāmare̱pasā̭va̱bhi praya̭: ||6||
su̱tā indrā̭ya vā̱yave̱ somā̭so̱ dadhyā̭śiraḥ | ni̱mnaṃ na ya̭nti̱ sindha̭vo̱'bhi praya̭: ||7||
sa̱jūrviśvḙbhirde̱vebhi̭ra̱śvibhyā̭mu̱ṣasā̭ sa̱jūḥ | ā yā̭hyagne atri̱vat su̱te ra̭ṇa ||8||
sa̱jūrmi̱trāvarṷṇābhyāṃ sa̱jūḥ somḙna̱ viṣṇṷnā | ā yā̭hyagne atri̱vat su̱te ra̭ṇa ||9||
sa̱jūrā̭di̱tyairvasṷbhiḥ sa̱jūrindrḙṇa vā̱yunā̭ | ā yā̭hyagne atri̱vat su̱te ra̭ṇa ||10||||
sva̱sti no̭ mimītāma̱śvinā̱ bhaga̭: sva̱sti de̱vyadi̭tirana̱rvaṇa̭: |
sva̱sti pū̱ṣā asṷro dadhātu naḥ sva̱sti dyāvā̭pṛthi̱vī sṷce̱tunā̭ ||11||||
sva̱stayḙ vā̱yumupa̭ bravāmahai̱ soma̭ṃ sva̱sti bhuva̭nasya̱ yaspati̭: |
bṛha̱spati̱ṃ sarva̭gaṇaṃ sva̱stayḙ sva̱staya̭ ādi̱tyāso̭ bhavantu naḥ ||12||
viśvḙ de̱vā no̭ a̱dyā sva̱stayḙ vaiśvāna̱ro vasṷra̱gniḥ sva̱stayḙ |
de̱vā a̭vantvṛ̱bhava̭: sva̱stayḙ sva̱sti no̭ ru̱draḥ pā̱tvaṃha̭saḥ ||13||
sva̱sti mi̭trāvaruṇā sva̱sti pa̭thye revati |
sva̱sti na̱ indra̭ścā̱gniśca̭ sva̱sti no̭ adite kṛdhi ||14||
sva̱sti panthā̱manṷ carema sūryācandra̱masā̭viva |
puna̱rdada̱tāghna̭tā jāna̱tā saṃ ga̭memahi ||15||
17 śyāvāśva ātreyaḥ| marutaḥ| anuṣṭup, 6, 16-17 paṅktiḥ|
pra śyā̭vāśva dhṛṣṇu̱yārcā̭ ma̱rudbhi̱ṝkva̭bhiḥ |
ye a̭dro̱ghama̭nuṣva̱dhaṃ śravo̱ mada̭nti ya̱jñiyā̭: ||1||
te hi sthi̱rasya̱ śava̭sa̱: sakhā̭ya̱: santi̭ dhṛṣṇu̱yā |
te yāma̱nnā dhṛ̭ṣa̱dvina̱stmanā̭ pānti̱ śaśva̭taḥ ||2||
te sya̱ndrāso̱ nokṣaṇo'ti̭ ṣkandanti̱ śarva̭rīḥ |
ma̱rutā̱madhā̱ maho̭ di̱vi kṣa̱mā ca̭ manmahe ||3||
ma̱rutsṷ vo dadhīmahi̱ stoma̭ṃ ya̱jñaṃ ca̭ dhṛṣṇu̱yā |
viśve̱ ye mānṷṣā yu̱gā pānti̱ martya̭ṃ ri̱ṣaḥ ||4||
arha̭nto̱ ye su̱dāna̭vo̱ naro̱ asā̭miśavasaḥ |
pra ya̱jñaṃ ya̱jñiyḙbhyo di̱vo a̭rcā ma̱rudbhya̭: ||5||
ā ru̱kmairā yu̱dhā nara̭ ṛ̱ṣvā ṛ̱ṣṭīra̭sṛkṣata |
anvḙnā̱~ aha̭ vi̱dyuto̭ ma̱ruto̱ jajjha̭tīriva bhā̱nura̭rta̱ tmanā̭ di̱vaḥ ||6||
ye vā̭vṛ̱dhanta̱ pārthi̭vā̱ ya u̱rāva̱ntari̭kṣa̱ ā |
vṛ̱janḙ vā na̱dīnā̭ṃ sa̱dhasthḙ vā ma̱ho di̱vaḥ ||7||
śardho̱ mārṷta̱muccha̭ṃsa sa̱tyaśa̭vasa̱mṛbhva̭sam |
u̱ta sma̱ te śu̱bhe nara̱: pra sya̱ndrā yṷjata̱ tmanā̭ ||8||
u̱ta sma̱ te parṷṣṇyā̱mūrṇā̭ vasata śu̱ndhyava̭: |
u̱ta pa̱vyā rathā̭nā̱madri̭ṃ bhinda̱ntyoja̭sā ||9||
āpa̭thayo̱ vipa̭tha̱yo'nta̭spathā̱ anṷpathāḥ |
e̱tebhi̱rmahya̱ṃ nāma̭bhirya̱jñaṃ vi̭ṣṭā̱ra o̭hate ||10||
adhā̱ naro̱ nyo̭ha̱te'dhā̭ ni̱yuta̭ ohate |
adhā̱ pārā̭vatā̱ iti̭ ci̱trā rū̱pāṇi̱ darśyā̭ ||11||
cha̱nda̱:stubha̭: kubha̱nyava̱ utsa̱mā kī̱riṇo̭ nṛtuḥ |
te me̱ ke ci̱nna tā̱yava̱ ūmā̭ āsan dṛ̱śi tvi̱ṣe ||12||
ya ṛ̱ṣvā ṛ̱ṣṭivi̭dyutaḥ ka̱vaya̱: santi̭ ve̱dhasa̭: |
tamṛ̭ṣe̱ mārṷtaṃ ga̱ṇaṃ na̭ma̱syā ra̱mayā̭ gi̱rā ||13||
accha̭ ṛṣe̱ mārṷtaṃ ga̱ṇaṃ dā̱nā mi̱traṃ na yo̱ṣaṇā̭ |
di̱vo vā̭ dhṛṣṇava̱ oja̭sā stu̱tā dhī̱bhiri̭ṣaṇyata ||14||
nū ma̭nvā̱na ḙṣāṃ de̱vā~ acchā̱ na va̱kṣaṇā̭ |
dā̱nā sa̭ceta sū̱ribhi̱ryāma̭śrutebhira̱ñjibhi̭: ||15||
pra ye mḙ bandhve̱ṣe gāṃ voca̭nta sū̱raya̱: pṛśni̭ṃ vocanta mā̱tara̭m |
adhā̭ pi̱tara̭mi̱ṣmiṇa̭ṃ ru̱draṃ vo̭canta̱ śikva̭saḥ ||16||
sa̱pta mḙ sa̱pta śā̱kina̱ eka̭mekā śa̱tā da̭duḥ |
ya̱munā̭yā̱madhi̭ śru̱tamud rādho̱ gavya̭ṃ mṛje̱ ni rādho̱ aśvya̭ṃ mṛje ||17||
16 śyāvāśva ātreyaḥ| marutaḥ| 1, 5, 10-11, 15 kakup, 2 bṛhatī, 3 anuṣṭup, 4 pura uṣṇik, 6-7, 9, 13-14, 16 satobṛhatī, 8, 12 gāyatrī|
ko vḙda̱ jāna̭meṣā̱ṃ ko vā̭ pu̱rā su̱mneṣvā̭sa ma̱rutā̭m |
yad yṷyu̱jre ki̭lā̱sya̭: ||1||
aitān rathḙṣu ta̱sthuṣa̱: kaḥ śṷśrāva ka̱thā ya̭yuḥ |
kasmai̭ sasruḥ su̱dāse̱ anvā̱paya̱ iḻā̭bhirvṛ̱ṣṭaya̭: sa̱ha ||2||
te ma̭ āhu̱rya ā̭ya̱yurupa̱ dyubhi̱rvibhi̱rmadḙ |
naro̱ maryā̭ are̱pasa̭ i̱mān paśya̱nniti̭ ṣṭuhi ||3||
ye a̱ñjiṣu̱ ye vāśī̭ṣu̱ svabhā̭navaḥ sra̱kṣu ru̱kmeṣṷ khā̱diṣṷ |
śrā̱yā rathḙṣu̱ dhanva̭su ||4||
yu̱ṣmāka̭ṃ smā̱ rathā̱~ anṷ mu̱de da̭dhe maruto jīradānavaḥ |
vṛ̱ṣṭī dyāvo̭ ya̱tīri̭va ||5||
ā yaṃ nara̭: su̱dāna̭vo dadā̱śuṣḙ di̱vaḥ kośa̱macṷcyavuḥ |
vi pa̱rjanya̭ṃ sṛjanti̱ roda̭sī̱ anu̱ dhanva̭nā yanti vṛ̱ṣṭaya̭: ||6||
ta̱tṛ̱dā̱nāḥ sindha̭va̱: kṣoda̭sā̱ raja̱: pra sa̭srurdhe̱navo̭ yathā |
sya̱nnā aśvā̭ i̱vādhva̭no vi̱moca̭ne̱ vi yad varta̭nta e̱nya̭: ||7||
ā yā̭ta maruto di̱va āntari̭kṣāda̱mādu̱ta |
māva̭ sthāta parā̱vata̭: ||8||
mā vo̭ ra̱sāni̭tabhā̱ kubhā̱ krumu̱rmā va̱: sindhu̱rni rī̭ramat |
mā va̱: pari̭ ṣṭhāt sa̱rayṷ: purī̱ṣiṇya̱sme it su̱mnama̭stu vaḥ ||9||
taṃ va̱: śardha̱ṃ rathā̭nāṃ tve̱ṣaṃ ga̱ṇaṃ mārṷta̱ṃ navya̭sīnām |
anu̱ pra ya̭nti vṛ̱ṣṭaya̭: ||10||||
śardha̭ṃśardhaṃ va eṣā̱ṃ vrāta̭ṃvrātaṃ ga̱ṇaṃga̭ṇaṃ suśa̱stibhi̭: |
anṷ krāmema dhī̱tibhi̭: ||11||||
kasmā̭ a̱dya sujā̭tāya rā̱taha̭vyāya̱ pra ya̭yuḥ | e̱nā yāmḙna ma̱ruta̭: ||12||
yena̭ to̱kāya̱ tana̭yāya dhā̱nyaṃ1 bīja̱ṃ vaha̭dhve̱ akṣi̭tam |
a̱smabhya̱ṃ tad dha̭ttana̱ yad va̱ īma̭he̱ rādho̭ vi̱śvāyu̱ saubha̭gam ||13||
atī̭yāma ni̱dasti̱raḥ sva̱stibhi̭rhi̱tvāva̱dyamarā̭tīḥ |
vṛ̱ṣṭvī śaṃ yorāpa̭ u̱sri bhḙṣa̱jaṃ syāma̭ marutaḥ sa̱ha ||14||
su̱de̱vaḥ sa̭mahāsati su̱vīro̭ naro maruta̱: sa martya̭: | yaṃ trāya̭dhve̱ syāma̱ te ||15||
stu̱hi bho̱jān tstṷva̱to a̭sya̱ yāma̭ni̱ raṇa̱n gāvo̱ na yava̭se |
ya̱taḥ pūrvā̭~ iva̱ sakhī̱~ranṷ hvaya gi̱rā gṛ̭ṇīhi kā̱mina̭: ||16||
15 śyāvāśva ātreyaḥ| marutaḥ| jagatī, 14 triṣṭup |
pra śardhā̭ya̱ mārṷtāya̱ svabhā̭nava i̱māṃ vāca̭manajā parvata̱cyutḙ |
gha̱rma̱stubhḙ di̱va ā pṛ̭ṣṭha̱yajva̭ne dyu̱mnaśra̭vase̱ mahi̭ nṛ̱mṇama̭rcata ||1||
pra vo̭ marutastavi̱ṣā ṷda̱nyavo̭ vayo̱vṛdho̭ aśva̱yuja̱: pari̭jrayaḥ |
saṃ vi̱dyutā̱ dadha̭ti̱ vāśa̭ti tri̱taḥ svara̱ntyāpo̱'vanā̱ pari̭jrayaḥ ||2||
vi̱dyunma̭haso̱ naro̱ aśma̭didyavo̱ vāta̭tviṣo ma̱ruta̭: parvata̱cyuta̭: |
a̱bda̱yā ci̱nmuhu̱rā hrā̭dunī̱vṛta̭: sta̱naya̭damā rabha̱sā udo̭jasaḥ ||3||
vya1ktūn rṷdrā̱ vyahā̭ni śikvaso̱ vya1ntari̭kṣa̱ṃ vi rajā̭ṃsi dhūtayaḥ |
vi yadajrā̱~ aja̭tha̱ nāva̭ īṃ yathā̱ vi du̱rgāṇi̭ maruto̱ nāha̭ riṣyatha ||4||
tad vī̱rya̭ṃ vo maruto mahitva̱naṃ dī̱rghaṃ ta̭tāna̱ sūryo̱ na yoja̭nam |
etā̱ na yāme̱ agṛ̭bhītaśoci̱ṣo'na̭śvadā̱ṃ yannyayā̭tanā gi̱rim ||5||
abhrā̭ji̱ śardho̭ maruto̱ yada̭rṇa̱saṃ moṣa̭thā vṛ̱kṣaṃ ka̭pa̱neva̭ vedhasaḥ |
adha̭ smā no a̱rama̭tiṃ sajoṣasa̱ścakṣṷriva̱ yanta̱manṷ neṣathā su̱gam ||6||
na sa jī̭yate maruto̱ na ha̭nyate̱ na srḙdhati̱ na vya̭thate̱ na ri̭ṣyati |
nāsya̱ rāya̱ upa̭ dasyanti̱ notaya̱ ṛṣi̭ṃ vā̱ yaṃ rājā̭naṃ vā̱ suṣṷ̄datha ||7||
ni̱yutva̭nto grāma̱jito̱ yathā̱ naro̭'rya̱maṇo̱ na ma̱ruta̭: kaba̱ndhina̭: |
pinva̱ntyutsa̱ṃ yadi̱nāso̱ asva̭ra̱n vyṷndanti pṛthi̱vīṃ madhvo̱ andha̭sā ||8||
pra̱vatva̭tī̱yaṃ pṛ̭thi̱vī ma̱rudbhya̭: pra̱vatva̭tī̱ dyaurbha̭vati pra̱yadbhya̭: |
pra̱vatva̭tīḥ pa̱thyā̭ a̱ntari̭kṣyāḥ pra̱vatva̭nta̱: parva̭tā jī̱radā̭navaḥ ||9||
yanma̭rutaḥ sabharasaḥ svarṇara̱: sūrya̱ udi̭te̱ mada̭thā divo naraḥ |
na vo'śvā̭: śrathaya̱ntāha̱ sisra̭taḥ sa̱dyo a̱syādhva̭naḥ pā̱rama̭śnutha ||10||
aṃsḙṣu va ṛ̱ṣṭaya̭: pa̱tsu khā̱dayo̱ vakṣa̭ḥsu ru̱kmā ma̭ruto̱ rathe̱ śubha̭: |
a̱gnibhrā̭jaso vi̱dyuto̱ gabha̭styo̱: śiprā̭: śī̱rṣasu̱ vita̭tā hira̱ṇyayī̭: ||11||
taṃ nāka̭ma̱ryo agṛ̭bhītaśociṣa̱ṃ ruśa̱t pippa̭laṃ maruto̱ vi dhṷ̄nutha |
sama̭cyanta vṛ̱janāti̭tviṣanta̱ yatsvara̭nti̱ ghoṣa̱ṃ vita̭tamṛtā̱yava̭: ||12||
yu̱ṣmāda̭ttasya maruto vicetaso rā̱yaḥ syā̭ma ra̱thyo̱3 vaya̭svataḥ |
na yo yuccha̭ti ti̱ṣyo̱3 yathā̭ di̱vo̱3'sme rā̭ranta marutaḥ saha̱sriṇa̭m ||13||
yū̱yaṃ ra̱yiṃ ma̭rutaḥ spā̱rhavī̭raṃ yū̱yamṛṣi̭mavatha̱ sāma̭vipram |
yū̱yamarva̭ntaṃ bhara̱tāya̱ vāja̭ṃ yū̱yaṃ dha̭ttha̱ rājā̭naṃ śruṣṭi̱manta̭m ||14||
tad vo̭ yāmi̱ dravi̭ṇaṃ sadyaūtayo̱ yenā̱ sva1rṇa ta̱tanā̭ma̱ nṝ~ra̱bhi |
i̱daṃ su mḙ maruto haryatā̱ vaco̱ yasya̱ tarḙma̱ tara̭sā śa̱taṃ himā̭: ||15||
10 śyāvāśva ātreyaḥ| marutaḥ| jagatī, 10 triṣṭup |
praya̭jyavo ma̱ruto̱ bhrāja̭dṛṣṭayo bṛ̱had vayo̭ dadhire ru̱kmava̭kṣasaḥ |
īya̭nte̱ aśvai̭: su̱yamḙbhirā̱śubhi̱: śubha̭ṃ yā̱tāmanu̱ rathā̭ avṛtsata ||1||
sva̱yaṃ da̭dhidhve̱ tavi̭ṣī̱ṃ yathā̭ vi̱da bṛ̱hanma̭hānta urvi̱yā vi rā̭jatha |
u̱tāntari̭kṣaṃ mamire̱ vyoja̭sā̱ śubha̭ṃ yā̱tāmanu̱ rathā̭ avṛtsata ||2||
sā̱kaṃ jā̱tāḥ su̱bhva̭: sā̱kamṷkṣi̱tāḥ śri̱ye ci̱dā pra̭ta̱raṃ vā̭vṛdhu̱rnara̭: |
vi̱ro̱kiṇa̱: sūrya̭syeva ra̱śmaya̱: śubha̭ṃ yā̱tāmanu̱ rathā̭ avṛtsata ||3||
ā̱bhū̱ṣeṇya̭ṃ vo maruto mahitva̱naṃ di̭dṛ̱kṣeṇya̱ṃ sūrya̭syeva̱ cakṣa̭ṇam |
u̱to a̱smā~ a̭mṛta̱tve da̭dhātana̱ śubha̭ṃ yā̱tāmanu̱ rathā̭ avṛtsata ||4||
udī̭rayathā marutaḥ samudra̱to yū̱yaṃ vṛ̱ṣṭiṃ va̭rṣayathā purīṣiṇaḥ |
na vo̭ dasrā̱ upa̭ dasyanti dhe̱nava̱: śubha̭ṃ yā̱tāmanu̱ rathā̭ avṛtsata ||5||
yadaśvā̭n dhū̱rṣu pṛṣa̭tī̱rayṷgdhvaṃ hira̱ṇyayā̱n pratyatkā̱~ amṷgdhvam |
viśvā̱ it spṛdho̭ maruto̱ vya̭syatha̱ śubha̭ṃ yā̱tāmanu̱ rathā̭ avṛtsata ||6||
na parva̭tā̱ na na̱dyo̭ varanta vo̱ yatrāci̭dhvaṃ maruto̱ gaccha̱thedu̱ tat |
u̱ta dyāvā̭pṛthi̱vī yā̭thanā̱ pari̱ śubha̭ṃ yā̱tāmanu̱ rathā̭ avṛtsata ||7||
yat pū̱rvyaṃ ma̭ruto̱ yacca̱ nūta̭na̱ṃ yadu̱dyatḙ vasavo̱ yacca̭ śa̱syatḙ |
viśva̭sya̱ tasya̭ bhavathā̱ navḙdasa̱: śubha̭ṃ yā̱tāmanu̱ rathā̭ avṛtsata ||8||
mṛ̱ḻata̭ no maruto̱ mā va̭dhiṣṭanā̱'smabhya̱ṃ śarma̭ bahu̱laṃ vi ya̭ntana |
adhi̭ sto̱trasya̭ sa̱khyasya̭ gātana̱ śubha̭ṃ yā̱tāmanu̱ rathā̭ avṛtsata ||9||
yū̱yama̱smān na̭yata̱ vasyo̱ acchā̱ nira̭ṃha̱tibhyo̭ maruto gṛṇā̱nāḥ |
ju̱ṣadhva̭ṃ no ha̱vyadā̭tiṃ yajatrā va̱yaṃ syā̭ma̱ pata̭yo rayī̱ṇām ||10||||
9 śyāvāśva ātreyaḥ| marutaḥ| bṛhatī, 3, 7 satobṛhatī |
agne̱ śardha̭nta̱mā ga̱ṇaṃ pi̱ṣṭaṃ ru̱kmebhi̭ra̱ñjibhi̭: |
viśo̭ a̱dya ma̱rutā̱mava̭ hvaye di̱vaści̭d roca̱nādadhi̭ ||1||
yathā̭ ci̱nmanya̭se hṛ̱dā tadinmḙ jagmurā̱śasa̭: |
ye te̱ nedi̭ṣṭha̱ṃ hava̭nānyā̱gama̱n tān va̭rdha bhī̱masa̭ṃdṛśaḥ ||2||
mī̱ḻahuṣma̭tīva pṛthi̱vī parā̭hatā̱ mada̭ntyetya̱smadā |
ṛkṣo̱ na vo̭ maruta̱: śimī̭vā̱~ amo̭ du̱dhro gauri̭va bhīma̱yuḥ ||3||
ni ye ri̱ṇantyoja̭sā̱ vṛthā̱ gāvo̱ na du̱rdhura̭: |
aśmā̭naṃ cit svaryaṃ1 parva̭taṃ gi̱riṃ pra cyā̭vayanti̱ yāma̭bhiḥ ||4||
ut ti̭ṣṭha nū̱namḙṣā̱ṃ stomai̱: samṷkṣitānām |
ma̱rutā̭ṃ puru̱tama̱mapṷ̄rvya̱ṃ gavā̱ṃ sarga̭miva hvaye ||5||
yu̱ṅgdhvaṃ hyarṷṣī̱ rathḙ yu̱ṅgdhvaṃ rathḙṣu ro̱hita̭: |
yu̱ṅgdhvaṃ harī̭ aji̱rā dhu̱ri voḻaha̭ve̱ vahi̭ṣṭhā dhu̱ri voḻaha̭ve ||6||
u̱ta sya vā̱jya̭ru̱ṣastṷvi̱ṣvaṇi̭ri̱ha sma̭ dhāyi darśa̱taḥ |
mā vo̱ yāmḙṣu marutaści̱raṃ ka̭ra̱t pra taṃ rathḙṣu codata ||7||
ratha̱ṃ nu mārṷtaṃ va̱yaṃ śra̭va̱syumā hṷvāmahe |
ā yasmi̭n ta̱sthau su̱raṇā̭ni̱ bibhra̭tī̱ sacā̭ ma̱rutsṷ roda̱sī ||8||
taṃ va̱: śardha̭ṃ rathe̱śubha̭ṃ tve̱ṣaṃ pa̭na̱syumā hṷve |
yasmi̱n tsujā̭tā su̱bhagā̭ mahī̱yate̱ sacā̭ ma̱rutsṷ mīḻahu̱ṣī ||9||
8 śyāvāśva ātreyaḥ| marutaḥ| jagatī, 7-8 triṣṭup|
ā rṷdrāsa̱ indra̭vantaḥ sa̱joṣa̭so̱ hira̭ṇyarathāḥ suvi̱tāya̭ gantana |
i̱yaṃ vo̭ a̱smat prati̭ haryate ma̱tistṛ̱ṣṇaje̱ na di̱va utsā̭ uda̱nyavḙ ||1||
vāśī̭manta ṛṣṭi̱manto̭ manī̱ṣiṇa̭: su̱dhanvā̭na̱ iṣṷmanto niṣa̱ṅgiṇa̭: |
svaśvā̭: stha su̱rathā̭: pṛśnimātaraḥ svāyu̱dhā ma̭ruto yāthanā̱ śubha̭m ||2||
dhū̱nu̱tha dyāṃ parva̭tān dā̱śuṣe̱ vasu̱ ni vo̱ vanā̭ jihate̱ yāma̭no bhi̱yā |
ko̱paya̭tha pṛthi̱vīṃ pṛ̭śnimātaraḥ śu̱bhe yadṷgrā̱: pṛṣa̭tī̱rayṷgdhvam ||3||
vāta̭tviṣo ma̱ruto̭ va̱rṣani̭rṇijo ya̱mā i̭va̱ susa̭dṛśaḥ su̱peśa̭saḥ |
pi̱śaṅgā̭śvā aru̱ṇāśvā̭ are̱pasa̱: pratva̭kṣaso mahi̱nā dyauri̭vo̱rava̭: ||4||
pu̱ru̱dra̱psā a̭ñji̱manta̭: su̱dāna̭vastve̱ṣasa̭ṃdṛśo anava̱bhrarā̭dhasaḥ |
su̱jā̱tāso̭ ja̱nuṣā̭ ru̱kmava̭kṣaso di̱vo a̱rkā a̱mṛta̱ṃ nāma̭ bhejire ||5||
ṛ̱ṣṭayo̭ vo maruto̱ aṃsa̭yo̱radhi̱ saha̱ ojo̭ bā̱hvorvo̱ bala̭ṃ hi̱tam |
nṛ̱mṇā śī̱rṣasvāyṷdhā̱ rathḙṣu vo̱ viśvā̭ va̱: śrīradhi̭ ta̱nūṣṷ pipiśe ||6||
goma̱daśvā̭va̱d ratha̭vat su̱vīra̭ṃ ca̱ndrava̱d rādho̭ maruto dadā naḥ |
praśa̭stiṃ naḥ kṛṇuta rudriyāso bhakṣī̱ya vo'va̭so̱ daivya̭sya ||7||
ha̱ye naro̱ marṷto mṛ̱ḻatā̭ na̱stuvī̭maghāso̱ amṛ̭tā̱ ṛta̭jñāḥ |
satya̭śruta̱: kava̭yo̱ yuvā̭no̱ bṛha̭dgirayo bṛ̱hadu̱kṣamā̭ṇāḥ ||8||
8 śyāvāśva ātreyaḥ| marutaḥ| triṣṭup |
tamṷ nū̱naṃ tavi̭ṣīmantameṣāṃ stu̱ṣe ga̱ṇaṃ mārṷta̱ṃ navya̭sīnām |
ya ā̱śva̭śvā̱ ama̭va̱d vaha̭nta u̱teśi̭re a̱mṛta̭sya sva̱rāja̭: ||1||
tve̱ṣaṃ ga̱ṇaṃ ta̱vasa̱ṃ khādi̭hasta̱ṃ dhuni̭vrataṃ mā̱yina̱ṃ dāti̭vāram |
ma̱yo̱bhuvo̱ ye ami̭tā mahi̱tvā vanda̭sva vipra tuvi̱rādha̭so̱ nṝn ||2||
ā vo̭ yantūdavā̱hāso̭ a̱dya vṛ̱ṣṭiṃ ye viśvḙ ma̱ruto̭ ju̱nanti̭ |
a̱yaṃ yo a̱gnirma̭ruta̱: sami̭ddha e̱taṃ jṷṣadhvaṃ kavayo yuvānaḥ ||3||
yū̱yaṃ rājā̭na̱mirya̱ṃ janā̭ya vibhvata̱ṣṭaṃ ja̭nayathā yajatrāḥ |
yu̱ṣmadḙti muṣṭi̱hā bā̱hujṷ̄to yu̱ṣmat sada̭śvo marutaḥ su̱vīra̭: ||4||
a̱rā i̱vedaca̭ramā̱ ahḙva̱ prapra̭ jāyante̱ aka̭vā̱ maho̭bhiḥ |
pṛśnḙ: pu̱trā ṷpa̱māso̱ rabhi̭ṣṭhā̱: svayā̭ ma̱tyā ma̱ruta̱: saṃ mi̭mikṣuḥ ||5||
yat prāyā̭siṣṭa̱ pṛṣa̭tībhi̱raśvai̭rvīḻupa̱vibhi̭rmaruto̱ rathḙbhiḥ |
kṣoda̭nta̱ āpo̭ riṇa̱te vanā̱nyavo̱sriyo̭ vṛṣa̱bhaḥ kra̭ndatu̱ dyauḥ ||6||
prathi̭ṣṭa̱ yāma̭n pṛthi̱vī ci̭deṣā̱ṃ bhartḙva̱ garbha̱ṃ svamicchavo̭ dhuḥ |
vātā̱n hyaśvā̭n dhu̱ryā̭yuyu̱jre va̱rṣaṃ sveda̭ṃ cakrire ru̱driyā̭saḥ ||7||
ha̱ye naro̱ marṷto mṛ̱ḻatā̭ na̱stuvī̭maghāso̱ amṛ̭tā̱ ṛta̭jñāḥ |
satya̭śruta̱: kava̭yo̱ yuvā̭no̱ bṛha̭dgirayo bṛ̱hadu̱kṣamā̭ṇāḥ ||8||
8 śyāvāśva ātreyaḥ| marutaḥ| jagatī, 8 triṣṭup |
pra va̱: spaḻa̭kran tsuvi̱tāya̭ dā̱vane'rcā̭ di̱ve pra pṛ̭thi̱vyā ṛ̱taṃ bha̭re |
u̱kṣante̱ aśvā̱n tarṷṣanta̱ ā rajo'nu̱ svaṃ bhā̱nuṃ śra̭thayante arṇa̱vaiḥ ||1||
amā̭deṣāṃ bhi̱yasā̱ bhūmi̭rejati̱ naurna pū̱rṇā kṣa̭rati̱ vyathi̭rya̱tī |
dū̱re̱dṛśo̱ ye ci̱taya̭nta̱ ema̭bhira̱ntarma̱he vi̱dathḙ yetire̱ nara̭: ||2||
gavā̭miva śri̱yase̱ śṛṅga̭mutta̱maṃ sūryo̱ na cakṣū̱ raja̭so vi̱sarja̭ne |
atyā̭ iva su̱bhva1ścāra̭vaḥ sthana̱ maryā̭ iva śri̱yasḙ cetathā naraḥ ||3||
ko vo̭ ma̱hānti̭ maha̱tāmuda̭śnava̱t kaskāvyā̭ maruta̱: ko ha̱ pauṃsyā̭ |
yū̱yaṃ ha̱ bhūmi̭ṃ ki̱raṇa̱ṃ na rḙjatha̱ pra yad bhara̭dhve suvi̱tāya̭ dā̱vanḙ ||4||
aśvā̭ i̱veda̭ru̱ṣāsa̱: saba̭ndhava̱: śūrā̭ iva pra̱yudha̱: prota yṷyudhuḥ |
maryā̭ iva su̱vṛdho̭ vāvṛdhu̱rnara̱: sūrya̭sya̱ cakṣu̱: pra mi̭nanti vṛ̱ṣṭibhi̭: ||5||
te a̭jye̱ṣṭhā aka̭niṣṭhāsa u̱dbhido'ma̭dhyamāso̱ maha̭sā̱ vi vā̭vṛdhuḥ |
su̱jā̱tāso̭ ja̱nuṣā̱ pṛśni̭mātaro di̱vo maryā̱ ā no̱ acchā̭ jigātana ||6||
vayo̱ na ye śreṇī̭: pa̱pturoja̱sā 'ntā̭n di̱vo bṛ̭ha̱taḥ sānṷna̱spari̭ |
aśvā̭sa eṣāmu̱bhaye̱ yathā̭ vi̱duḥ pra parva̭tasya nabha̱nū~ra̭cucyavuḥ ||7||
mimā̭tu̱ dyauradi̭tirvī̱tayḙ na̱: saṃ dānṷcitrā u̱ṣaso̭ yatantām |
ācṷcyavurdi̱vyaṃ kośa̭me̱ta ṛṣḙ ru̱drasya̭ ma̱ruto̭ gṛṇā̱nāḥ ||8||
8 śyāvāśva ātreyaḥ| maruto'gnāmarutau vā| triṣṭup, 7- 8 jagatī |
īḻḙ a̱gniṃ svava̭sa̱ṃ namo̭bhiri̱ha pra̭sa̱tto vi ca̭yat kṛ̱taṃ na̭: |
rathai̭riva̱ pra bha̭re vāja̱yadbhi̭: pradakṣi̱ṇinma̱rutā̱ṃ stoma̭mṛdhyām ||1||
ā ye ta̱sthuḥ pṛṣa̭tīṣu śru̱tāsṷ su̱kheṣṷ ru̱drā ma̱ruto̱ rathḙṣu |
vanā̭ cidugrā jihate̱ ni vo̭ bhi̱yā pṛ̭thi̱vī ci̭d rejate̱ parva̭taścit ||2||
parva̭taści̱nmahi̭ vṛ̱ddho bi̭bhāya di̱vaści̱t sānṷ rejata sva̱ne va̭: |
yat krīḻa̭tha maruta ṛṣṭi̱manta̱ āpa̭ iva sa̱dhrya̭ñco dhavadhve ||3||
va̱rā i̱ved rai̭va̱tāso̱ hira̭ṇyaira̱bhi sva̱dhābhi̭sta̱nva̭: pipiśre |
śri̱ye śreyā̭ṃsasta̱vaso̱ rathḙṣu sa̱trā mahā̭ṃsi cakrire ta̱nūṣṷ ||4||
a̱jye̱ṣṭhāso̱ aka̭niṣṭhāsa e̱te saṃ bhrāta̭ro vāvṛdhu̱: saubha̭gāya |
yuvā̭ pi̱tā svapā̭ ru̱dra ḙṣāṃ su̱dughā̱ pṛśni̭: su̱dinā̭ ma̱rudbhya̭: ||5||
yadṷtta̱me ma̭ruto madhya̱me vā̱ yad vā̭va̱me sṷbhagāso di̱vi ṣṭha |
ato̭ no rudrā u̱ta vā̱ nva1syā'gnḙ vi̱ttāddha̱viṣo̱ yad yajā̭ma ||6||
a̱gniśca̱ yanma̭ruto viśvavedaso di̱vo vaha̭dhva̱ utta̭rā̱dadhi̱ ṣṇubhi̭: |
te ma̭ndasā̱nā dhuna̭yo riśādaso vā̱maṃ dha̭tta̱ yaja̭mānāya sunva̱te ||7||
agnḙ ma̱rudbhi̭: śu̱bhaya̭dbhi̱rṛkva̭bhi̱: soma̭ṃ piba mandasā̱no ga̭ṇa̱śribhi̭: |
pā̱va̱kebhi̭rviśvami̱nvebhi̭rā̱yubhi̱rvaiśvā̭nara pra̱divā̭ ke̱tunā̭ sa̱jūḥ ||8||
19 śyāvāśva ātreyaḥ| 1-4, 11-16 marutaḥ, 5-8 tarantamahiṣī śaśīyasī, 9 vaidadaśviḥ purumīḻahaḥ, 10 vaidadaśvistarantaḥ, 17-19 dārbhyo rathavītiḥ| gāyatrī, 3 nicṛt, 5 anuṣṭup, 9 satobṛhatī |
ke ṣṭhā̭ nara̱: śreṣṭha̭tamā̱ ya eka̭eka āya̱ya | pa̱ra̱masyā̭: parā̱vata̭: ||1||
kva1 vo'śvā̱: kvā̱3bhīśa̭vaḥ ka̱thaṃ śḙka ka̱thā ya̭ya | pṛ̱ṣṭhe sado̭ na̱soryama̭: ||2||
ja̱ghane̱ coda̭ eṣā̱ṃ vi sa̱kthāni̱ naro̭ yamuḥ | pu̱tra̱kṛ̱the na jana̭yaḥ ||3||
parā̭ vīrāsa etana̱ maryā̭so̱ bhadra̭jānayaḥ | a̱gni̱tapo̱ yathāsa̭tha ||4||
sana̱t sāśvya̭ṃ pa̱śumu̱ta gavya̭ṃ śa̱tāva̭yam | śyā̱vāśva̭stutāya̱ yā dorvī̱rāyo̭pa̱barbṛ̭hat ||5||
u̱ta tvā̱ strī śaśī̭yasī pu̱ṃso bha̭vati̱ vasya̭sī | adḙvatrādarā̱dhasa̭: ||6||
vi yā jā̱nāti̱ jasṷri̱ṃ vi tṛṣya̭nta̱ṃ vi kā̱mina̭m | de̱va̱trā kṛ̭ṇu̱te mana̭: ||7||
u̱ta ghā̱ nemo̱ astṷta̱: pumā̱~ iti̭ bruve pa̱ṇiḥ | sa vaira̭deya̱ it sa̱maḥ ||8||
u̱ta mḙ'rapad yuva̱tirma̭ma̱nduṣī̱ prati̭ śyā̱vāya̭ varta̱nim |
vi rohi̭tā purumī̱ḻahāya̭ yematu̱rviprā̭ya dī̱rghaya̭śase ||9||
yo mḙ dhenū̱nāṃ śa̱taṃ vaida̭daśvi̱ryathā̱ dada̭t | ta̱ra̱nta i̭va ma̱ṃhanā̭ ||10||||
ya ī̱ṃ vaha̭nta ā̱śubhi̱: piba̭nto madi̱raṃ madhṷ | atra̱ śravā̭ṃsi dadhire ||11||||
yeṣā̭ṃ śri̱yādhi̱ roda̭sī vi̱bhrāja̭nte̱ rathe̱ṣvā | di̱vi ru̱kma i̭vo̱pari̭ ||12||
yuvā̱ sa mārṷto ga̱ṇastve̱ṣara̭tho̱ anḙdyaḥ | śu̱bha̱ṃyāvāpra̭tiṣkutaḥ ||13||
ko vḙda nū̱namḙṣā̱ṃ yatrā̱ mada̭nti̱ dhūta̭yaḥ | ṛ̱tajā̭tā are̱pasa̭: ||14||
yū̱yaṃ marta̭ṃ vipanyavaḥ praṇe̱tāra̭ i̱tthā dhi̱yā | śrotā̭ro̱ yāma̭hūtiṣu ||15||
te no̱ vasṷ̄ni̱ kāmyā̭ puruśca̱ndrā ri̭śādasaḥ | ā ya̭jñiyāso vavṛttana ||16||
e̱taṃ me̱ stoma̭mūrmye dā̱rbhyāya̱ parā̭ vaha | giro̭ devi ra̱thīri̭va ||17||
u̱ta mḙ vocatā̱diti̭ su̱taso̭me̱ ratha̭vītau | na kāmo̱ apa̭ veti me ||18||
e̱ṣa kṣḙti̱ ratha̭vītirma̱ghavā̱ goma̭tī̱ranṷ | parva̭te̱ṣvapa̭śritaḥ ||19||
9 śrutavidātreyaḥ| mitrāvaruṇau| triṣṭup|
ṛ̱tena̭ ṛ̱tamapi̭hitaṃ dhru̱vaṃ vā̱ṃ sūrya̭sya̱ yatra̭ vimu̱cantyaśvā̭n |
daśa̭ śa̱tā sa̱ha ta̭sthu̱stadeka̭ṃ de̱vānā̱ṃ śreṣṭha̱ṃ vapṷṣāmapaśyam ||1||
tat su vā̭ṃ mitrāvaruṇā mahi̱tvamī̱rmā ta̱sthuṣī̱raha̭bhirduduhre |
viśvā̭: pinvatha̱: svasa̭rasya̱ dhenā̱ anṷ vā̱meka̭: pa̱virā va̭varta ||2||
adhā̭rayataṃ pṛthi̱vīmu̱ta dyāṃ mitra̭rājānā varuṇā̱ maho̭bhiḥ |
va̱rdhaya̭ta̱moṣa̭dhī̱: pinva̭ta̱ṃ gā ava̭ vṛ̱ṣṭiṃ sṛ̭jataṃ jīradānū ||3||
ā vā̱maśvā̭saḥ su̱yujo̭ vahantu ya̱tara̭śmaya̱ upa̭ yantva̱rvāk |
ghṛ̱tasya̭ ni̱rṇiganṷ vartate vā̱mupa̱ sindha̭vaḥ pra̱divi̭ kṣaranti ||4||
anṷ śru̱tāma̱mati̱ṃ vardha̭du̱rvīṃ ba̱rhiri̭va̱ yajṷṣā̱ rakṣa̭māṇā |
nama̭svantā dhṛtada̱kṣādhi̱ garte̱ mitrāsā̭the varu̱ṇeḻā̭sva̱ntaḥ ||5||
akra̭vihastā su̱kṛtḙ para̱spā yaṃ trāsā̭the varu̱ṇeḻā̭sva̱ntaḥ |
rājā̭nā kṣa̱tramahṛ̭ṇīyamānā sa̱hasra̭sthūṇaṃ bibhṛthaḥ sa̱ha dvau ||6||
hira̭ṇyanirṇi̱gayo̭ asya̱ sthūṇā̱ vi bhrā̭jate di̱vya1śvāja̭nīva |
bha̱dre kṣetre̱ nimi̭tā̱ tilvi̭le vā sa̱nema̱ madhvo̱ adhi̭gartyasya ||7||
hira̭ṇyarūpamu̱ṣaso̱ vyṷṣṭā̱vaya̭:sthūṇa̱mudi̭tā̱ sūrya̭sya |
ā ro̭hatho varuṇa mitra̱ garta̱mata̭ścakṣāthe̱ adi̭ti̱ṃ diti̭ṃ ca ||8||
yad baṃhi̭ṣṭha̱ṃ nāti̱vidhḙ sudānū̱ acchi̭dra̱ṃ śarma̭ bhuvanasya gopā |
tena̭ no mitrāvaruṇāvaviṣṭa̱ṃ siṣā̭santo jigī̱vāṃsa̭: syāma ||9||
7 arcanānā ātreyaḥ| mitrāvaruṇau| jagatī|
ṛta̭sya gopā̱vadhi̭ tiṣṭhatho̱ ratha̱ṃ satya̭dharmāṇā para̱me vyo̭mani |
yamatra̭ mitrāvaru̱ṇāva̭tho yu̱vaṃ tasmai̭ vṛ̱ṣṭirmadhṷmat pinvate di̱vaḥ ||1||
sa̱mrājā̭va̱sya bhuva̭nasya rājatho̱ mitrā̭varuṇā vi̱dathḙ sva̱rdṛśā̭ |
vṛ̱ṣṭiṃ vā̱ṃ rādho̭ amṛta̱tvamī̭mahe̱ dyāvā̭pṛthi̱vī vi ca̭ranti ta̱nyava̭: ||2||
sa̱mrājā̭ u̱grā vṛ̭ṣa̱bhā di̱vaspatī̭ pṛthi̱vyā mi̱trāvarṷṇā̱ vica̭rṣaṇī |
ci̱trebhi̭ra̱bhrairupa̭ tiṣṭhatho̱ rava̱ṃ dyāṃ va̭rṣayatho̱ asṷrasya mā̱yayā̭ ||3||
mā̱yā vā̭ṃ mitrāvaruṇā di̱vi śri̱tā sūryo̱ jyoti̭ścarati ci̱tramāyṷdham |
tama̱bhreṇa̭ vṛ̱ṣṭyā gṷ̄hatho di̱vi parja̭nya dra̱psā madhṷmanta īrate ||4||
ratha̭ṃ yuñjate ma̱ruta̭: śu̱bhe su̱khaṃ śūro̱ na mi̭trāvaruṇā̱ gavi̭ṣṭiṣu |
rajā̭ṃsi ci̱trā vi ca̭ranti ta̱nyavo̭ di̱vaḥ sa̭mrājā̱ paya̭sā na ukṣatam ||5||
vāca̱ṃ su mi̭trāvaruṇā̱virā̭vatīṃ pa̱rjanya̭ści̱trāṃ va̭dati̱ tviṣī̭matīm |
a̱bhrā va̭sata ma̱ruta̱: su mā̱yayā̱ dyāṃ va̭rṣayatamaru̱ṇāma̭re̱pasa̭m ||6||
dharma̭ṇā mitrāvaruṇā vipaścitā vra̱tā ra̭kṣethe̱ asṷrasya mā̱yayā̭ |
ṛ̱tena̱ viśva̱ṃ bhuva̭na̱ṃ vi rā̭jatha̱: sūrya̱mā dha̭ttho di̱vi citrya̱ṃ ratha̭m ||7||
7 arcanānā ātreyaḥ| mitrāvaruṇau| anuṣṭup, 7 paṅktiḥ|
varṷṇaṃ vo ri̱śāda̭samṛ̱cā mi̱traṃ ha̭vāmahe | pari̭ vra̱jeva̭ bā̱hvorja̭ga̱nvāṃsā̱ sva̭rṇaram ||1||
tā bā̱havā̭ suce̱tunā̱ pra ya̭ntamasmā̱ arca̭te | śeva̱ṃ hi jā̱rya̭ṃ vā̱ṃ viśvā̭su̱ kṣāsu̱ jogṷve ||2||
yannū̱nama̱śyāṃ gati̭ṃ mi̱trasya̭ yāyāṃ pa̱thā | asya̭ pri̱yasya̱ śarma̱ṇyahi̭ṃsānasya saścire ||3||
yu̱vābhyā̭ṃ mitrāvaruṇopa̱maṃ dhḙyāmṛ̱cā | yaddha̱ kṣayḙ ma̱ghonā̭ṃ stotṝ̱ṇāṃ ca̭ spū̱rdhasḙ ||4||
ā no̭ mitra sudī̱tibhi̱rvarṷṇaśca sa̱dhastha̱ ā | sve kṣayḙ ma̱ghonā̱ṃ sakhī̭nāṃ ca vṛ̱dhasḙ ||5||
yu̱vaṃ no̱ yeṣṷ varuṇa kṣa̱traṃ bṛ̱hacca̭ bibhṛ̱thaḥ | u̱ru ṇo̱ vāja̭sātaye kṛ̱taṃ rā̱ye sva̱stayḙ ||6||
u̱cchantyā̭ṃ me yaja̱tā de̱vakṣa̭tre̱ ruśa̭dgavi |
su̱taṃ soma̱ṃ na ha̱stibhi̱rā pa̱ḍbhirdhā̭vataṃ narā̱ bibhra̭tāvarca̱nāna̭sam ||7||
6 rātahavya ātreyaḥ| mitrāvaruṇau| anuṣṭup, 6 paṅktiḥ|
yaści̱keta̱ sa su̱kratṷrdeva̱trā sa bra̭vītu naḥ | varṷṇo̱ yasya̭ darśa̱to mi̱tro vā̱ vana̭te̱ gira̭: ||1||
tā hi śreṣṭha̭varcasā̱ rājā̭nā dīrgha̱śrutta̭mā | tā satpa̭tī ṛtā̱vṛdha̭ ṛ̱tāvā̭nā̱ janḙjane ||2||
tā vā̭miyā̱no'va̭se̱ pūrvā̱ upa̭ bruve̱ sacā̭ | svaśvā̭sa̱: su ce̱tunā̱ vājā̭~ a̱bhi pra dā̱vanḙ ||3||
mi̱tro a̱ṃhości̱dādu̱ru kṣayā̭ya gā̱tuṃ va̭nate | mi̱trasya̱ hi pra̱tūrva̭taḥ suma̱tirasti̭ vidha̱taḥ ||4||
va̱yaṃ mi̱trasyāva̭si̱ syāma̭ sa̱pratha̭stame | a̱ne̱hasa̱stvota̭yaḥ sa̱trā varṷṇaśeṣasaḥ ||5||
yu̱vaṃ mi̭tre̱maṃ jana̱ṃ yata̭tha̱: saṃ ca̭ nayathaḥ |
mā ma̱ghona̱: pari̭ khyata̱ṃ mo a̱smāka̱mṛṣī̭ṇāṃ gopī̱the na̭ uruṣyatam ||6||
6 rātahavya ātreyaḥ| mitrāvaruṇau| anuṣṭup|
ā ci̭kitāna su̱kratṷ̄ de̱vau ma̭rta ri̱śāda̭sā | varṷṇāya ṛ̱tapḙśase dadhī̱ta praya̭se ma̱he ||1||
tā hi kṣa̱tramavi̭hrutaṃ sa̱myaga̭su̱rya1māśā̭te | adha̭ vra̱teva̱ mānṷṣa̱ṃ sva1rṇa dhā̭yi darśa̱tam ||2||
tā vā̱meṣe̱ rathā̭nāmu̱rvīṃ gavyṷ̄timeṣām | rā̱taha̭vyasya suṣṭu̱tiṃ da̱dhṛk stomai̭rmanāmahe ||3||
adhā̱ hi kāvyā̭ yu̱vaṃ dakṣa̭sya pū̱rbhira̭dbhutā | ni ke̱tunā̱ janā̭nāṃ ci̱kethḙ pūtadakṣasā ||4||
tadṛ̱taṃ pṛ̭thivi bṛ̱hacchra̭vae̱ṣa ṛṣī̭ṇām | jra̱ya̱sā̱nāvara̭ṃ pṛ̱thvati̭ kṣaranti̱ yāma̭bhiḥ ||5||
ā yad vā̭mīyacakṣasā̱ mitra̭ va̱yaṃ ca̭ sū̱raya̭: | vyaci̭ṣṭhe bahu̱pāyye̱ yatḙmahi sva̱rājyḙ ||6||
5 yajata ātreyaḥ| mitrāvaruṇau| anuṣṭup|
baḻi̱tthā dḙva niṣkṛ̱tamādi̭tyā yaja̱taṃ bṛ̱hat | varṷṇa̱ mitrārya̭ma̱n varṣi̭ṣṭhaṃ kṣa̱tramā̭śāthe ||1||
ā yad yoni̭ṃ hira̱ṇyaya̱ṃ varṷṇa̱ mitra̱ sada̭thaḥ | dha̱rtārā̭ carṣaṇī̱nāṃ ya̱ntaṃ su̱mnaṃ ri̭śādasā ||2||
viśve̱ hi vi̱śvavḙdaso̱ varṷṇo mi̱tro a̭rya̱mā | vra̱tā pa̱deva̭ saścire̱ pānti̱ martya̭ṃ ri̱ṣaḥ ||3||
te hi sa̱tyā ṛ̭ta̱spṛśa̭ ṛ̱tāvā̭no̱ janḙjane | su̱nī̱thāsa̭: su̱dāna̭vo̱ṃ'hości̭duru̱cakra̭yaḥ ||4||
ko nu vā̭ṃ mi̱trāstṷto̱ varṷṇo vā ta̱nūnā̭m | tat su vā̱meṣa̭te ma̱tiratri̭bhya̱ eṣa̭te ma̱tiḥ ||5||
5 yajata ātreyaḥ| mitrāvaruṇau| gāyatrī|
pra vo̭ mi̱trāya̭ gāyata̱ varṷṇāya vi̱pā gi̱rā | mahi̭kṣatrāvṛ̱taṃ bṛ̱hat ||1||
sa̱mrājā̱ yā ghṛ̱tayo̭nī mi̱traśco̱bhā varṷṇaśca | de̱vā de̱veṣṷ praśa̱stā ||2||
tā na̭: śakta̱ṃ pārthi̭vasya ma̱ho rā̱yo di̱vyasya̭ | mahi̭ vāṃ kṣa̱traṃ de̱veṣṷ ||3||
ṛ̱tamṛ̱tena̱ sapa̭nteṣi̱raṃ dakṣa̭māśāte | a̱druhā̭ de̱vau va̭rdhete ||4||
vṛ̱ṣṭidyā̭vā rī̱tyā̭pe̱ṣaspatī̱ dānṷmatyāḥ | bṛ̱hanta̱ṃ garta̭māśāte ||5||
4 urucakrirātreyaḥ| mitrāvaruṇau| triṣṭup|
trī ro̭ca̱nā va̭ruṇa̱ trī~ru̱ta dyūn trīṇi̭ mitra dhārayatho̱ rajā̭ṃsi |
vā̱vṛ̱dhā̱nāva̱mati̭ṃ kṣa̱triya̱syā'nṷ vra̱taṃ rakṣa̭māṇāvaju̱ryam ||1||
irā̭vatīrvaruṇa dhe̱navo̭ vā̱ṃ madhṷmad vā̱ṃ sindha̭vo mitra duhre |
traya̭stasthurvṛṣa̱bhāsa̭stisṛ̱ṇāṃ dhi̱ṣaṇā̭nāṃ reto̱dhā vi dyu̱manta̭: ||2||
prā̱tarde̱vīmadi̭tiṃ johavīmi ma̱dhyaṃdi̭na̱ udi̭tā̱ sūrya̭sya |
rā̱ye mi̭trāvaruṇā sa̱rvatā̱teḻḙ to̱kāya̱ tana̭yāya̱ śaṃ yoḥ ||3||
yā dha̱rtārā̱ raja̭so roca̱nasyo̱tādi̱tyā di̱vyā pārthi̭vasya |
na vā̭ṃ de̱vā a̱mṛtā̱ ā mi̭nanti vra̱tāni̭ mitrāvaruṇā dhru̱vāṇi̭ ||4||
4 urucakrirātreyaḥ| mitrāvaruṇau| gāyatrī|
pu̱rū̱ruṇā̭ ci̱ddhyastyavo̭ nū̱naṃ vā̭ṃ varuṇa | mitra̱ vaṃsi̭ vāṃ suma̱tim ||1||
tā vā̭ṃ sa̱myaga̭druhvā̱ṇeṣa̭maśyāma̱ dhāya̭se | va̱yaṃ te rṷdrā syāma ||2||
pā̱taṃ no̭ rudrā pā̱yubhi̭ru̱ta trā̭yethāṃ sutrā̱trā | tu̱ryāma̱ dasyṷ̄n ta̱nūbhi̭: ||3||
mā kasyā̭dbhutakratū ya̱kṣaṃ bhṷjemā ta̱nūbhi̭: | mā śeṣa̭sā̱ mā tana̭sā ||4||
3 bāhuvṛkta ātreyaḥ| mitrāvaruṇau| gāyatrī|
ā no̭ gantaṃ riśādasā̱ varṷṇa̱ mitra̭ ba̱rhaṇā̭ | upe̱maṃ cārṷmadhva̱ram ||1||
viśva̭sya̱ hi pra̭cetasā̱ varṷṇa̱ mitra̱ rāja̭thaḥ | ī̱śā̱nā pi̭pyata̱ṃ dhiya̭: ||2||
upa̭ naḥ su̱tamā ga̭ta̱ṃ varṷṇa̱ mitra̭ dā̱śuṣa̭: | a̱sya soma̭sya pī̱tayḙ ||3||
3 bāhuvṛkta ātreyaḥ| mitrāvaruṇau| uṣṇik|
ā mi̱tre varṷṇe va̱yaṃ gī̱rbhirjṷhumo atri̱vat | ni ba̱rhiṣi̭ sadata̱ṃ soma̭pītaye ||1||
vra̱tena̭ stho dhru̱vakṣḙmā̱ dharma̭ṇā yāta̱yajja̭nā | ni ba̱rhiṣi̭ sadata̱ṃ soma̭pītaye ||2||
mi̱traśca̭ no̱ varṷṇaśca ju̱ṣetā̭ṃ ya̱jñami̱ṣṭayḙ | ni ba̱rhiṣi̭ sadatā̱ṃ soma̭pītaye ||3||
10 paura ātreyaḥ| aśvinau| anuṣṭup|
yada̱dya sthaḥ pa̭rā̱vati̱ yada̭rvā̱vatya̭śvinā | yad vā̭ pu̱rū pṷrubhujā̱ yada̱ntari̭kṣa̱ ā ga̭tam ||1||
i̱ha tyā pṷru̱bhūta̭mā pu̱rū daṃsā̭ṃsi̱ bibhra̭tā | va̱ra̱syā yā̱myadhri̭gū hu̱ve tu̱viṣṭa̭mā bhu̱je ||2||
ī̱rmānyad vapṷṣe̱ vapṷśca̱kraṃ ratha̭sya yemathuḥ | parya̱nyā nāhṷṣā yu̱gā ma̱hnā rajā̭ṃsi dīyathaḥ ||3||
tadū̱ ṣu vā̭me̱nā kṛ̱taṃ viśvā̱ yad vā̱manu̱ ṣṭavḙ | nānā̭ jā̱tāva̭re̱pasā̱ sama̱sme bandhu̱meya̭thuḥ ||4||
ā yad vā̭ṃ sū̱ryā ratha̱ṃ tiṣṭha̭d raghu̱ṣyada̱ṃ sadā̭ | pari̭ vāmaru̱ṣā vayo̭ ghṛ̱ṇā va̭ranta ā̱tapa̭: ||5||
yu̱voratri̭ściketati̱ narā̭ su̱mnena̱ ceta̭sā | gha̱rmaṃ yad vā̭mare̱pasa̱ṃ nāsa̭tyā̱snā bhṷra̱ṇyati̭ ||6||
u̱gro vā̭ṃ kaku̱ho ya̱yiḥ śṛ̱ṇve yāmḙṣu saṃta̱niḥ | yad vā̱ṃ daṃso̭bhiraśvi̱nā'tri̭rnarāva̱varta̭ti ||7||
madhva̭ ū̱ ṣu ma̭dhūyuvā̱ rudrā̱ siṣa̭kti pi̱pyuṣī̭ | yat sa̭mu̱drāti̱ parṣa̭thaḥ pa̱kvāḥ pṛkṣo̭ bharanta vām ||8||
sa̱tyamid vā ṷ aśvinā yu̱vāmā̭hurmayo̱bhuvā̭ | tā yāma̭n yāma̱hūta̭mā̱ yāma̱nnā mṛ̭ḻa̱yatta̭mā ||9||
i̱mā brahmā̭ṇi̱ vardha̭nā̱ 'śvibhyā̭ṃ santu̱ śaṃta̭mā | yā takṣā̭ma̱ rathā̭~ i̱vā'vo̭cāma bṛ̱hannama̭: ||10||
10 paura ātreyaḥ| aśvinau| anuṣṭup, 8 nicṛt|
kūṣṭho̭ devāvaśvinā̱ 'dyā di̱vo ma̭nāvasū | tacchra̭vatho vṛṣaṇvasū̱ atri̭rvā̱mā vi̭vāsati ||1||
kuha̱ tyā kuha̱ nu śru̱tā di̱vi de̱vā nāsa̭tyā | kasmi̱nnā ya̭tatho̱ jane̱ ko vā̭ṃ na̱dīnā̱ṃ sacā̭ ||2||
kaṃ yā̭tha̱: kaṃ ha̭ gacchatha̱: kamacchā̭ yuñjāthe̱ ratha̭m | kasya̱ brahmā̭ṇi raṇyatho va̱yaṃ vā̭muśmasī̱ṣṭayḙ ||3||
pau̱raṃ ci̱ddhyṷda̱pruta̱ṃ paura̭ pau̱rāya̱ jinva̭thaḥ | yadī̭ṃ gṛbhī̱tatā̭taye si̱ṃhami̭va dru̱haspa̱de ||4||
pra cyavā̭nājjuju̱ruṣo̭ va̱vrimatka̱ṃ na mṷñcathaḥ | yuvā̱ yadī̭ kṛ̱thaḥ puna̱rā kāma̭mṛṇve va̱dhva̭: ||5||
asti̱ hi vā̭mi̱ha sto̱tā smasi̭ vāṃ sa̱ṃdṛśi̭ śri̱ye | nū śru̱taṃ ma̱ ā ga̭ta̱mavo̭bhirvājinīvasū ||6||
ko vā̭ma̱dya pṷrū̱ṇāmā va̭vne̱ martyā̭nām | ko vipro̭ vipravāhasā̱ ko ya̱jñairvā̭jinīvasū ||7||
ā vā̱ṃ ratho̱ rathā̭nā̱ṃ yeṣṭho̭ yātvaśvinā | pu̱rū ci̭dasma̱yusti̱ra ā̭ṅgū̱ṣo martye̱ṣvā ||8||
śamū̱ ṣu vā̭ṃ madhūyuvā̱smāka̭mastu carkṛ̱tiḥ | a̱rvā̱cī̱nā vi̭cetasā̱ vibhi̭: śye̱neva̭ dīyatam ||9||
aśvi̭nā̱ yaddha̱ karhi̭ cicchuśrū̱yāta̭mi̱maṃ hava̭m | vasvī̭rū̱ ṣu vā̱ṃ bhuja̭: pṛ̱ñcanti̱ su vā̱ṃ pṛca̭: ||10||
9 avasyurātreyaḥ| aśvinau| paṅktiḥ|
prati̭ pri̱yata̭ma̱ṃ ratha̱ṃ vṛṣa̭ṇaṃ vasu̱vāha̭nam |
sto̱tā vā̭maśvinā̱vṛṣi̱: stomḙna̱ prati̭ bhūṣati̱ mādhvī̱ mama̭ śruta̱ṃ hava̭m ||1||
a̱tyāyā̭tamaśvinā ti̱ro viśvā̭ a̱haṃ sanā̭ |
dasrā̱ hira̭ṇyavartanī̱ suṣṷmnā̱ sindhṷvāhasā̱ mādhvī̱ mama̭ śruta̱ṃ hava̭m ||2||
ā no̱ ratnā̭ni̱ bibhra̭tā̱vaśvi̭nā̱ gaccha̭taṃ yu̱vam |
rudrā̱ hira̭ṇyavartanī juṣā̱ṇā vā̭jinīvasū̱ mādhvī̱ mama̭ śruta̱ṃ hava̭m ||3||
su̱ṣṭubho̭ vāṃ vṛṣaṇvasū̱ rathe̱ vāṇī̱cyāhi̭tā |
u̱ta vā̭ṃ kaku̱ho mṛ̱gaḥ pṛkṣa̭: kṛṇoti vāpu̱ṣo mādhvī̱ mama̭ śruta̱ṃ hava̭m ||4||
bo̱dhinma̭nasā ra̱thyḙṣi̱rā ha̭vana̱śrutā̭ |
vibhi̱ścyavā̭namaśvinā̱ ni yā̭tho̱ adva̭yāvina̱ṃ mādhvī̱ mama̭ śruta̱ṃ hava̭m ||5||
ā vā̭ṃ narā mano̱yujo'śvā̭saḥ pruṣi̱tapsa̭vaḥ |
vayo̭ vahantu pī̱tayḙ sa̱ha su̱mnebhi̭raśvinā̱ mādhvī̱ mama̭ śruta̱ṃ hava̭m ||6||
aśvi̭nā̱veha ga̭cchata̱ṃ nāsa̭tyā̱ mā vi vḙnatam |
ti̱raści̭darya̱yā pari̭ va̱rtiryā̭tamadābhyā̱ mādhvī̱ mama̭ śruta̱ṃ hava̭m ||7||
a̱smin ya̱jñe a̭dābhyā jari̱tāra̭ṃ śubhaspatī |
a̱va̱syuma̭śvinā yu̱vaṃ gṛ̱ṇanta̱mupa̭ bhūṣatho̱ mādhvī̱ mama̭ śruta̱ṃ hava̭m ||8||
abhṷ̄du̱ṣā ruśa̭t paśu̱rāgnira̭dhāyyṛ̱tviya̭: |
ayo̭ji vāṃ vṛṣaṇvasū̱ ratho̭ dasrā̱vama̭rtyo̱ mādhvī̱ mama̭ śruta̱ṃ hava̭m ||9||
5 bhaumo'triḥ| aśvinau| triṣṭup|
ā bhā̭tya̱gniru̱ṣasā̱manī̭ka̱mud viprā̭ṇāṃ deva̱yā vāco̭ asthuḥ |
a̱rvāñcā̭ nū̱naṃ ra̭thye̱ha yā̭taṃ pīpi̱vāṃsa̭maśvinā gha̱rmamaccha̭ ||1||
na sa̭ṃskṛ̱taṃ pra mi̭mīto̱ gami̱ṣṭhā 'nti̭ nū̱nama̱śvinopa̭stute̱ha |
divā̭bhipi̱tve'va̱sāga̭miṣṭhā̱ pratyava̭rtiṃ dā̱śuṣe̱ śambha̭viṣṭhā ||2||
u̱tā yā̭taṃ saṃga̱ve prā̱tarahno̭ ma̱dhyaṃdi̭na̱ udi̭tā̱ sūrya̭sya |
divā̱ nakta̱mava̭sā̱ śaṃta̭mena̱ nedānī̭ṃ pī̱tira̱śvinā ta̭tāna ||3||
i̱daṃ hi vā̭ṃ pra̱divi̱ sthāna̱moka̭ i̱me gṛ̱hā a̭śvine̱daṃ dṷro̱ṇam |
ā no̭ di̱vo bṛ̭ha̱taḥ parva̭tā̱dā 'dbhyo yā̭ta̱miṣa̱mūrja̱ṃ vaha̭ntā ||4||
sama̱śvino̱rava̭sā̱ nūta̭nena mayo̱bhuvā̭ su̱praṇī̭tī gamema |
ā no̭ ra̱yiṃ va̭hata̱mota vī̱rānā viśvā̭nyamṛtā̱ saubha̭gāni ||5||
5 bhaumo'triḥ| aśvinau| triṣṭup|
prā̱ta̱ryāvā̭ṇā pratha̱mā ya̭jadhvaṃ pu̱rā gṛdhrā̱dara̭ruṣaḥ pibātaḥ |
prā̱tarhi ya̱jñama̱śvinā̭ da̱dhāte̱ pra śa̭ṃsanti ka̱vaya̭: pūrva̱bhāja̭: ||1||
prā̱tarya̭jadhvama̱śvinā̭ hinota̱ na sā̱yama̭sti deva̱yā ajṷṣṭam |
u̱tānyo a̱smad ya̭jate̱ vi cāva̱: pūrva̭:pūrvo̱ yaja̭māno̱ vanī̭yān ||2||
hira̭ṇyatva̱ṅmadhṷvarṇo ghṛ̱tasnu̱: pṛkṣo̱ vaha̱nnā ratho̭ vartate vām |
mano̭javā aśvinā̱ vāta̭raṃhā̱ yenā̭tiyā̱tho dṷri̱tāni̱ viśvā̭ ||3||
yo bhūyi̭ṣṭha̱ṃ nāsa̭tyābhyāṃ vi̱veṣa̱ cani̭ṣṭhaṃ pi̱tvo rara̭te vibhā̱ge |
sa to̱kama̭sya pīpara̱cchamī̭bhi̱ranṷ̄rdhvabhāsa̱: sada̱mit tṷturyāt ||4||
sama̱śvino̱rava̭sā̱ nūta̭nena mayo̱bhuvā̭ su̱praṇī̭tī gamema |
ā no̭ ra̱yiṃ va̭hata̱mota vī̱rānā viśvā̭nyamṛtā̱ saubha̭gāni ||5||
9 saptavadhrirātreyaḥ| aśvinau(5-9 garbhasrāviṇyupaniṣad)| anuṣṭup, 1-3 uṣṇik, 4 triṣṭup|
aśvi̭nā̱veha ga̭cchata̱ṃ nāsa̭tyā̱ mā vi vḙnatam | ha̱ṃsāvi̭va patata̱mā su̱tā~ upa̭ ||1||
aśvi̭nā hari̱ṇāvi̭va gau̱rāvi̱vānu̱ yava̭sam | ha̱ṃsāvi̭va patata̱mā su̱tā~ upa̭ ||2||
aśvi̭nā vājinīvasū ju̱ṣethā̭ṃ ya̱jñami̱ṣṭayḙ | ha̱ṃsāvi̭va patata̱mā su̱tā~ upa̭ ||3||
atri̱ryad vā̭mava̱roha̭nnṛ̱bīsa̱majo̭havī̱nnādha̭māneva̱ yoṣā̭ |
śye̱nasya̭ ci̱jjava̭sā̱ nūta̭ne̱nā ''ga̭cchatamaśvinā̱ śaṃta̭mena ||4||
vi ji̭hīṣva vanaspate̱ yoni̱: sūṣya̭ntyā iva | śru̱taṃ mḙ aśvinā̱ hava̭ṃ sa̱ptava̭dhriṃ ca muñcatam ||5||
bhī̱tāya̱ nādha̭mānāya̱ ṛṣa̭ye sa̱ptava̭dhraye | mā̱yābhi̭raśvinā yu̱vaṃ vṛ̱kṣaṃ saṃ ca̱ vi cā̭cathaḥ ||6||
yathā̱ vāta̭: puṣka̱riṇī̭ṃ sami̱ṅgaya̭ti sa̱rvata̭: | e̱vā te̱ garbha̭ ejatu ni̱raitu̱ daśa̭māsyaḥ ||7||
yathā̱ vāto̱ yathā̱ vana̱ṃ yathā̭ samu̱dra eja̭ti | e̱vā tvaṃ da̭śamāsya sa̱hāvḙhi ja̱rāyṷṇā ||8||
daśa̱ māsā̭ñchaśayā̱naḥ kṷmā̱ro adhi̭ mā̱tari̭ | ni̱raitṷ jī̱vo akṣa̭to jī̱vo jīva̭ntyā̱ adhi̭ ||9||
10 satyaśravā ātreyaḥ| uṣā| paṅktiḥ|
ma̱he no̭ a̱dya bo̭dha̱yoṣo̭ rā̱ye di̱vitma̭tī |
yathā̭ cinno̱ abo̭dhayaḥ sa̱tyaśra̭vasi vā̱yye sujā̭te̱ aśva̭sūnṛte ||1||
yā sṷnī̱the śaṷcadra̱the vyauccho̭ duhitardivaḥ |
sā vyṷccha̱ sahī̭yasi sa̱tyaśra̭vasi vā̱yye sujā̭te̱ aśva̭sūnṛte ||2||
sā no̭ a̱dyābha̱radva̭su̱rvyṷcchā duhitardivaḥ |
yo vyauccha̱: sahī̭yasi sa̱tyaśra̭vasi vā̱yye sujā̭te̱ aśva̭sūnṛte ||3||
a̱bhi ye tvā̭ vibhāvari̱ stomai̭rgṛ̱ṇanti̱ vahna̭yaḥ |
ma̱ghairma̭ghoni su̱śriyo̱ dāma̭nvantaḥ surā̱taya̱: sujā̭ta̱̭ aśva̭sūnṛte ||4||
yacci̱ddhi tḙ ga̱ṇā i̱me cha̱daya̭nti ma̱ghatta̭ye |
pari̭ ci̱d vaṣṭa̭yo dadhu̱rdada̭to̱ rādho̱ ahra̭ya̱ṃ sujā̭te̱ aśva̭sūnṛte ||5||
aiṣṷ dhā vī̱rava̱d yaśa̱ uṣo̭ maghoni sū̱riṣṷ |
ye no̱ rādhā̱ṃsyahra̭yā ma̱ghavā̭no̱ arā̭sata̱ sujā̭te̱ aśva̭sūnṛte ||6||
tebhyo̭ dyu̱mnaṃ bṛ̱had yaśa̱ uṣo̭ magho̱nyā va̭ha |
ye no̱ rādhā̱ṃsyaśvyā̭ ga̱vyā bhaja̭nta sū̱raya̱: sujā̭te̱ aśva̭sūnṛte ||7||
u̱ta no̱ goma̭tī̱riṣa̱ ā va̭hā duhitardivaḥ |
sā̱kaṃ sūrya̭sya ra̱śmibhi̭: śu̱kraiḥ śoca̭dbhira̱rcibhi̱: sujā̭te̱ aśva̭sūnṛte ||8||
vyṷcchā duhitardivo̱ mā ci̱raṃ ta̭nuthā̱ apa̭: |
net tvā̭ ste̱naṃ yathā̭ ri̱puṃ tapā̭ti̱ sūro̭ a̱rciṣā̱ sujā̭te̱ aśva̭sūnṛte ||9||
e̱tāva̱d vedṷṣa̱stvaṃ bhūyo̭ vā̱ dātṷmarhasi |
yā sto̱tṛbhyo̭ vibhāvaryu̱cchantī̱ na pra̱mīya̭se̱ sujā̭te̱ aśva̭sūnṛte ||10||
6 satyaśravā ātreyaḥ| uṣā| triṣṭup|
dyu̱tadyā̭mānaṃ bṛha̱tīmṛ̱tena̭ ṛ̱tāva̭rīmaru̱ṇapsṷṃ vibhā̱tīm |
de̱vīmu̱ṣasa̱ṃ sva̭rā̱vaha̭ntī̱ṃ prati̱ viprā̭so ma̱tibhi̭rjarante ||1||
e̱ṣā jana̭ṃ darśa̱tā bo̱dhaya̭ntī su̱gān pa̱thaḥ kṛ̭ṇva̱tī yā̱tyagrḙ |
bṛ̱ha̱dra̱thā bṛ̭ha̱tī vi̭śvami̱nvoṣā jyoti̭ryaccha̱tyagre̱ ahnā̭m ||2||
e̱ṣā gobhi̭raru̱ṇebhi̭ryujā̱nā 'srḙdhantī ra̱yimaprā̭yu cakre |
pa̱tho rada̭ntī suvi̱tāya̭ de̱vī pṷruṣṭu̱tā vi̱śvavā̭rā̱ vi bhā̭ti ||3||
e̱ṣā vyḙnī bhavati dvi̱barhā̭ āviṣkṛṇvā̱nā ta̱nva̭ṃ pu̱rastā̭t |
ṛ̱tasya̱ panthā̱manvḙti sā̱dhu pra̭jāna̱tīva̱ na diśo̭ mināti ||4||
e̱ṣā śu̱bhrā na ta̱nvo̭ vidā̱nordhveva̭ snā̱tī dṛ̱śayḙ no asthāt |
apa̱ dveṣo̱ bādha̭mānā̱ tamā̭ṃsyu̱ṣā di̱vo dṷhi̱tā jyoti̱ṣāgā̭t ||5||
e̱ṣā pra̭tī̱cī dṷhi̱tā di̱vo nṝn yoṣḙva bha̱drā ni ri̭ṇīte̱ apsa̭: |
vyū̱rṇva̱tī dā̱śuṣe̱ vāryā̭ṇi̱ puna̱rjyoti̭ryuva̱tiḥ pū̱rvathā̭kaḥ ||6||
5 śyāvāśva ātreyaḥ| savitā| jagatī|
yu̱ñjate̱ mana̭ u̱ta yṷñjate̱ dhiyo̱ viprā̱ vipra̭sya bṛha̱to vi̭pa̱ścita̭: |
vi hotrā̭ dadhe vayunā̱videka̱ inma̱hī de̱vasya̭ savi̱tuḥ pari̭ṣṭutiḥ ||1||
viśvā̭ rū̱pāṇi̱ prati̭ muñcate ka̱viḥ prāsā̭vīd bha̱draṃ dvi̱pade̱ catṷṣpade |
vi nāka̭makhyat savi̱tā vare̱ṇyo'nṷ pra̱yāṇa̭mu̱ṣaso̱ vi rā̭jati ||2||
yasya̭ pra̱yāṇa̱manva̱nya id ya̱yurde̱vā de̱vasya̭ mahi̱māna̱moja̭sā |
yaḥ pārthi̭vāni vima̱me sa eta̭śo̱ rajā̭ṃsi de̱vaḥ sa̭vi̱tā ma̭hitva̱nā ||3||
u̱ta yā̭si savita̱strīṇi̭ roca̱nota sūrya̭sya ra̱śmibhi̱: samṷcyasi |
u̱ta rātrī̭mubha̱yata̱: parī̭yasa u̱ta mi̱tro bha̭vasi deva̱ dharma̭bhiḥ ||4||
u̱teśi̭ṣe prasa̱vasya̱ tvameka̱ idu̱ta pū̱ṣā bha̭vasi deva̱ yāma̭bhiḥ |
u̱tedaṃ viśva̱ṃ bhuva̭na̱ṃ vi rā̭jasi śyā̱vāśva̭ste savita̱ stoma̭mānaśe ||5||
9 śyāvāśva ātreyaḥ| savitā| gāyatrī, 1 anuṣṭup|
tat sa̭vi̱turvṛ̭ṇīmahe va̱yaṃ de̱vasya̱ bhoja̭nam | śreṣṭha̭ṃ sarva̱dhāta̭ma̱ṃ tura̱ṃ bhaga̭sya dhīmahi ||1||
asya̱ hi svaya̭śastaraṃ savi̱tuḥ kacca̱na pri̱yam | na mi̱nanti̭ sva̱rājya̭m ||2||
sa hi ratnā̭ni dā̱śuṣḙ su̱vāti̭ savi̱tā bhaga̭: | taṃ bhā̱gaṃ ci̱tramī̭mahe ||3||
a̱dyā no̭ deva savitaḥ pra̱jāva̭t sāvī̱: saubha̭gam | parā̭ du̱ṣṣvapnya̭ṃ suva ||4||
viśvā̭ni deva savitarduri̱tāni̱ parā̭ suva | yad bha̱draṃ tanna̱ ā sṷva ||5||
anā̭gaso̱ adi̭taye de̱vasya̭ savi̱tuḥ sa̱ve | viśvā̭ vā̱māni̭ dhīmahi ||6||
ā vi̱śvadḙva̱ṃ satpa̭tiṃ sū̱ktaira̱dyā vṛ̭ṇīmahe | sa̱tyasa̭vaṃ savi̱tāra̭m ||7||
ya i̱me u̱bhe aha̭nī pu̱ra etyapra̭yucchan | svā̱dhīrde̱vaḥ sa̭vi̱tā ||8||
ya i̱mā viśvā̭ jā̱tānyā̭śrā̱vaya̭ti̱ ślokḙna | pra ca̭ su̱vāti̭ savi̱tā ||9||
10 bhaumo'triḥ| parjanyaḥ| triṣṭup, 2-4 jagatī, 9 anuṣṭup|
acchā̭ vada ta̱vasa̭ṃ gī̱rbhirā̱bhiḥ stu̱hi pa̱rjanya̱ṃ nama̱sā vi̭vāsa |
kani̭kradad vṛṣa̱bho jī̱radā̭nū̱ reto̭ dadhā̱tyoṣa̭dhīṣu̱ garbha̭m ||1||
vi vṛ̱kṣān ha̭ntyu̱ta ha̭nti ra̱kṣaso̱ viśva̭ṃ bibhāya̱ bhuva̭naṃ ma̱hāva̭dhāt |
u̱tānā̭gā īṣate̱ vṛṣṇyā̭vato̱ yat pa̱rjanya̭: sta̱naya̱nhanti̭ du̱ṣkṛta̭: ||2||
ra̱thīva̱ kaśa̱yāśvā̭~ abhikṣi̱pannā̱virdū̱tān kṛ̭ṇute va̱rṣyā̱~3 aha̭ |
dū̱rāt si̱ṃhasya̭ sta̱nathā̱ udī̭rate̱ yat pa̱rjanya̭: kṛṇu̱te va̱rṣyaṃ1 nabha̭: ||3||
pra vātā̱ vānti̭ pa̱taya̭nti vi̱dyuta̱ udoṣa̭dhī̱rjiha̭te̱ pinva̭te̱ sva̭: |
irā̱ viśva̭smai̱ bhuva̭nāya jāyate̱ yat pa̱rjanya̭: pṛthi̱vīṃ reta̱sāva̭ti ||4||
yasya̭ vra̱te pṛ̭thi̱vī nanna̭mīti̱ yasya̭ vra̱te śa̱phava̱jjarbhṷrīti |
yasya̭ vra̱ta oṣa̭dhīrvi̱śvarṷ̄pā̱: sa na̭: parjanya̱ mahi̱ śarma̭ yaccha ||5||
di̱vo no̭ vṛ̱ṣṭiṃ ma̭ruto rarīdhva̱ṃ pra pi̭nvata̱ vṛṣṇo̱ aśva̭sya̱ dhārā̭: |
a̱rvāṅe̱tena̭ stanayi̱tnunehya̱po ni̭ṣi̱ñcannasṷraḥ pi̱tā na̭: ||6||
a̱bhi kra̭nda sta̱naya̱ garbha̱mā dhā̭ uda̱nvatā̱ pari̭ dīyā̱ rathḙna |
dṛti̱ṃ su ka̭rṣa̱ viṣi̭ta̱ṃ nya̭ñcaṃ sa̱mā bha̭vantū̱dvato̭ nipā̱dāḥ ||7||
ma̱hānta̱ṃ kośa̱muda̭cā̱ ni ṣi̭ñca̱ syanda̭ntāṃ ku̱lyā viṣi̭tāḥ pu̱rastā̭t |
ghṛ̱tena̱ dyāvā̭pṛthi̱vī vyṷndhi suprapā̱ṇaṃ bha̭vatva̱ghnyābhya̭: ||8||
yat pa̭rjanya̱ kani̭kradat sta̱naya̱nhaṃsi̭ du̱ṣkṛta̭: |
pratī̱daṃ viśva̭ṃ modate̱ yat kiṃ ca̭ pṛthi̱vyāmadhi̭ ||9||
ava̭rṣīrva̱rṣamudu̱ ṣū gṛ̭bhā̱yā'ka̱rdhanvā̱nyatyḙta̱vā ṷ |
ajī̭jana̱ oṣa̭dhī̱rbhoja̭nāya̱ kamu̱ta pra̱jābhyo̭'vido manī̱ṣām ||10||
3 bhaumo'triḥ| pṛthivī| anuṣṭup|
baḻi̱tthā parva̭tānāṃ khi̱draṃ bi̭bharṣi pṛthivi | pra yā bhūmi̭ṃ pravatvati ma̱hnā ji̱noṣi̭ mahini ||1||
stomā̭sastvā vicāriṇi̱ prati̭ ṣṭobhantya̱ktubhi̭: | pra yā vāja̱ṃ na heṣa̭ntaṃ pe̱rumasya̭syarjuni ||2||
dṛ̱ḻahā ci̱d yā vana̱spatī̭n kṣma̱yā dardha̱rṣyoja̭sā | yat tḙ a̱bhrasya̭ vi̱dyuto̭ di̱vo varṣa̭nti vṛ̱ṣṭaya̭: ||3||
8 bhaumo'triḥ| varuṇa| triṣṭup|
pra sa̱mrājḙ bṛ̱hada̭rcā gabhī̱raṃ brahma̭ pri̱yaṃ varṷṇāya śru̱tāya̭ |
vi yo ja̱ghāna̭ śami̱teva̱ carmo̭pa̱stirḙ pṛthi̱vīṃ sūryā̭ya ||1||
vanḙṣu̱ vya1ntari̭kṣaṃ tatāna̱ vāja̱marva̭tsu̱ paya̭ u̱sriyā̭su |
hṛ̱tsu kratu̱ṃ varṷṇo a̱psva1gniṃ di̱vi sūrya̭madadhā̱t soma̱madraṷ ||2||
nī̱cīna̭bāra̱ṃ varṷṇa̱: kava̭ndha̱ṃ pra sa̭sarja̱ roda̭sī a̱ntari̭kṣam |
tena̱ viśva̭sya̱ bhuva̭nasya̱ rājā̱ yava̱ṃ na vṛ̱ṣṭirvyṷnatti̱ bhūma̭ ||3||
u̱natti̱ bhūmi̭ṃ pṛthi̱vīmu̱ta dyāṃ ya̱dā du̱gdhaṃ varṷṇo̱ vaṣṭyādit |
sama̱bhreṇa̭ vasata̱ parva̭tāsastaviṣī̱yanta̭: śrathayanta vī̱rāḥ ||4||
i̱māmū̱ ṣvā̭su̱rasya̭ śru̱tasya̭ ma̱hīṃ mā̱yāṃ varṷṇasya̱ pra vo̭cam |
mānḙneva tasthi̱vā~ a̱ntari̭kṣe̱ vi yo ma̱me pṛ̭thi̱vīṃ sūryḙṇa ||5||
i̱māmū̱ nu ka̱vita̭masya mā̱yāṃ ma̱hīṃ de̱vasya̱ naki̱rā da̭dharṣa |
eka̱ṃ yadu̱dnā na pṛ̱ṇantyenī̭rāsi̱ñcantī̭ra̱vana̭yaḥ samu̱dram ||6||
a̱rya̱mya̭ṃ varuṇa mi̱trya̭ṃ vā̱ sakhā̭yaṃ vā̱ sada̱mid bhrāta̭raṃ vā |
ve̱śaṃ vā̱ nitya̭ṃ varu̱ṇāra̭ṇaṃ vā̱ yat sī̱māga̭ścakṛ̱mā śi̱śratha̱stat ||7||
ki̱ta̱vāso̱ yad ri̭ri̱purna dī̱vi yad vā̭ ghā sa̱tyamu̱ta yanna vi̱dma |
sarvā̱ tā vi ṣya̭ śithi̱reva̭ de̱vā'dhā̭ te syāma varuṇa pri̱yāsa̭: ||8||
bhaumo'triḥ|indrāgnī| anuṣṭup, 6 virāṭ pūrvā|
indrā̭gnī̱ yamava̭tha u̱bhā vājḙṣu̱ martya̭m | dṛ̱ḻahā ci̱t sa pra bhḙdati dyu̱mnā vāṇī̭riva tri̱taḥ ||1||
yā pṛta̭nāsu du̱ṣṭarā̱ yā vājḙṣu śra̱vāyyā̭ | yā pañca̭ carṣa̱ṇīra̱bhī̭ndrā̱gnī tā ha̭vāmahe ||2||
tayo̱ridama̭va̱cchava̭sti̱gmā di̱dyunma̱ghono̭: | prati̱ druṇā̱ gabha̭styo̱rgavā̭ṃ vṛtra̱ghna eṣa̭te ||3||
tā vā̱meṣe̱ rathā̭nāmindrā̱gnī ha̭vāmahe | patī̭ tu̱rasya̱ rādha̭so vi̱dvāṃsā̱ girva̭ṇastamā ||4||
tā vṛ̱dhantā̱vanu̱ dyūn martā̭ya de̱vāva̱dabhā̭ | arha̭ntā cit pu̱ro da̱dheṃ'śḙva de̱vāvarva̭te ||5||
e̱vendrā̱gnibhyā̱mahā̭vi ha̱vyaṃ śū̱ṣya̭ṃ ghṛ̱taṃ na pū̱tamadri̭bhiḥ |
tā sū̱riṣu̱ śravo̭ bṛ̱hadra̱yiṃ gṛ̱ṇatsṷ didhṛta̱miṣa̭ṃ gṛ̱ṇatsṷ didhṛtam ||6||
9 evayāmarudātreyaḥ| marutaḥ| atijagatī|
pra vo̭ ma̱he ma̱tayo̭ yantu̱ viṣṇa̭ve ma̱rutva̭te giri̱jā ḙva̱yāma̭rut |
pra śardhā̭ya̱ praya̭jyave sukhā̱dayḙ ta̱vasḙ bha̱ndadi̭ṣṭaye̱ dhuni̭vratāya̱ śava̭se ||1||
pra ye jā̱tā ma̭hi̱nā ye ca̱ nu sva̱yaṃ pra vi̱dmanā̭ bru̱vata̭ eva̱yāma̭rut |
kratvā̱ tad vo̭ maruto̱ nādhṛṣe̱ śavo̭ dā̱nā ma̱hnā tadḙṣā̱madhṛ̭ṣṭāso̱ nādra̭yaḥ ||2||
pra ye di̱vo bṛ̭ha̱taḥ śṛ̭ṇvi̱re gi̱rā su̱śukvā̭naḥ su̱bhva̭ eva̱yāma̭rut |
na yeṣā̱mirī̭ sa̱dhastha̱ īṣṭa̱ ā~ a̱gnayo̱ na svavi̭dyuta̱: pra sya̱ndrāso̱ dhunī̭nām ||3||
sa ca̭krame maha̱to nirṷrukra̱maḥ sa̭mā̱nasmā̱t sada̭sa eva̱yāma̭rut |
ya̱dāyṷkta̱ tmanā̱ svādadhi̱ ṣṇubhi̱rviṣpa̭rdhaso̱ vima̭haso̱ jigā̭ti̱ śevṛ̭dho̱ nṛbhi̭: ||4||
sva̱no na vo'ma̭vān rejaya̱d vṛṣā̭ tve̱ṣo ya̱yista̭vi̱ṣa ḙva̱yāma̭rut |
yenā̱ saha̭nta ṛ̱ñjata̱ svaro̭ciṣa̱: sthāra̭śmāno hira̱ṇyayā̭: svāyu̱dhāsa̭ i̱ṣmiṇa̭: ||5||
a̱pā̱ro vo̭ mahi̱mā vṛ̭ddhaśavasastve̱ṣaṃ śavo̭'vatveva̱yāma̭rut |
sthātā̭ro̱ hi prasi̭tau sa̱ṃdṛśi̱ sthana̱ te na̭ uruṣyatā ni̱daḥ śṷśu̱kvāṃso̱ nāgnaya̭: ||6||
te ru̱drāsa̱: suma̭khā a̱gnayo̭ yathā tuvidyu̱mnā a̭vantveva̱yāma̭rut |
dī̱rghaṃ pṛ̱thu pa̭prathe̱ sadma̱ pārthi̭va̱ṃ yeṣā̱majme̱ṣvā ma̱haḥ śardhā̱ṃsyadbhṷtainasām ||7||
a̱dve̱ṣo no̭ maruto gā̱tumeta̭na̱ śrotā̱ hava̭ṃ jari̱turḙva̱yāma̭rut |
viṣṇo̭rma̱haḥ sa̭manyavo yuyotana̱ smad ra̱thyo̱3 na da̱ṃsanā 'pa̱ dveṣā̭ṃsi sanu̱taḥ ||8||
gantā̭ no ya̱jñaṃ ya̭jñiyāḥ su̱śami̱ śrotā̱ hava̭mara̱kṣa ḙva̱yāma̭rut |
jyeṣṭhā̭so̱ na parva̭tāso̱ vyo̭mani yū̱yaṃ tasya̭ pracetasa̱: syāta̭ du̱rdharta̭vo ni̱daḥ ||9||