Rigveda — Mandala 6

13 bārhaspatyo bharadvāja: | agni : | triṣṭup  |
tvaṃ hya̭gne pratha̱mo ma̱notā̱ 'syā dhi̱yo abha̭vo dasma̱ hotā̭ |
 tvaṃ sī̭ṃ vṛṣannakṛṇordu̱ṣṭarī̭tu̱ saho̱ viśva̭smai̱ saha̭se̱ saha̭dhyai ||1||
adhā̱ hotā̱ nya̭sīdo̱ yajī̭yāni̱ḻaspa̱da i̱ṣaya̱nnīḍya̱: san |
taṃ tvā̱ nara̭: pratha̱maṃ dḙva̱yanto̭ ma̱ho rā̱ye ci̱taya̭nto̱ anṷ gman ||2||
vṛ̱teva̱ yanta̭ṃ ba̱hubhi̭rvasa̱vyai̱3stve ra̱yiṃ jā̭gṛ̱vāṃso̱ anṷ gman |
ruśa̭ntama̱gniṃ da̭rśa̱ta bṛ̱hanta̭ṃ va̱pāva̭ntaṃ vi̱śvahā̭ dīdi̱vāṃsa̭m ||3||
pa̱daṃ de̱vasya̱ nama̭sā̱ vyanta̭: śrava̱syava̱: śrava̭ āpa̱nnamṛ̭ktam |
 nāmā̭ni cid dadhire ya̱jñiyā̭ni bha̱drāyā̭ṃ te raṇayanta̱ saṃdṛ̭ṣṭau ||4||
tvāṃ va̭rdhanti kṣi̱taya̭: pṛthi̱vyāṃ tvāṃ rāya̭ u̱bhayā̭so̱ janā̭nām |
tvaṃ trā̱tā ta̭raṇe̱ cetyo̭ bhūḥ pi̱tā mā̱tā sada̱minmānṷṣāṇām ||5||
sa̱pa̱ryeṇya̱: sa pri̱yo vi̱kṣva1gnirhotā̭ ma̱ndro ni ṣa̭sādā̱ yajī̭yān |
taṃ tvā̭ va̱yaṃ dama̱ ā dī̭di̱vāṃsa̱mupa̭ jñu̱bādho̱ nama̭sā sadema ||6||
taṃ tvā̭ va̱yaṃ su̱dhyo̱3 navya̭magne sumnā̱yava̭ īmahe deva̱yanta̭: |
 tvaṃ viśo̭ anayo̱ dīdyā̭no di̱vo a̭gne bṛha̱tā ro̭ca̱nena̭ ||7||
vi̱śāṃ ka̱viṃ vi̱śpati̱ṃ śaśva̭tīnāṃ ni̱tośa̭naṃ vṛṣa̱bhaṃ ca̭rṣaṇī̱nām |
 pretī̭ṣaṇimi̱ṣaya̭ntaṃ pāva̱kaṃ rāja̭ntama̱gniṃ ya̭ja̱taṃ ra̭yī̱ṇām ||8||
so a̭gna īje śaśa̱me ca̱ marto̱ yasta̱ āna̭ṭ sa̱midhā̭ ha̱vyadā̭tim |
ya āhṷti̱ṃ pari̱ vedā̱ namo̭bhi̱rviśvet sa vā̱mā da̭dhate̱ tvāta̭: ||9||
a̱smā ṷ te̱ mahi̭ ma̱he vi̭dhema̱ namo̭bhiragne sa̱midho̱ta ha̱vyaiḥ |
 vedī̭ sūno sahaso gī̱rbhiru̱kthairā tḙ bha̱drāyā̭ṃ suma̱tau ya̭tema ||10||
ā yasta̱tantha̱ roda̭sī̱ vi bhā̱sā śravo̭bhiśca śrava̱sya1starṷtraḥ |
bṛ̱hadbhi̱rvājai̱: sthavi̭rebhira̱sme re̱vadbhi̭ragne vita̱raṃ vi bhā̭hi ||11||
nṛ̱vad va̭so̱ sada̱middhḙhya̱sme bhūri̭ to̱kāya̱ tana̭yāya pa̱śvaḥ |
pū̱rvīriṣo̭ bṛha̱tīrā̱rea̭ghā a̱sme bha̱drā saṷśrava̱sāni̭ santu ||12||
pu̱rūṇya̭gne puru̱dhā tvā̱yā vasṷ̄ni rājan va̱sutā̭ te aśyām |
pu̱rūṇi̱ hi tve pṷruvāra̱ santyagne̱ vasṷ vidha̱te rāja̭ni̱ tve ||13||
11 bārhaspatyo bharadvāja: | agni : |anuṣṭup | 11 śakvarī |
tvaṃ hi kṣaita̭va̱d yaśo 'gnḙ mi̱tro na patya̭se | tvaṃ vi̭carṣaṇe̱ śravo̱ vaso̭ pu̱ṣṭiṃ na pṷṣyasi ||1||
tvāṃ hi ṣmā̭ carṣa̱ṇayo̭ ya̱jñebhi̭rgī̱rbhirīḻa̭te | tvāṃ vā̱jī yā̭tyavṛ̱ko ra̭ja̱stūrvi̱śvaca̭rṣaṇiḥ ||2||
sa̱joṣa̭stvā di̱vo naro̭ ya̱jñasya̭ ke̱tumi̭ndhate | yaddha̱ sya mānṷṣo̱ jana̭: sumnā̱yurju̱hve a̭dhva̱re ||3||
ṛdha̱d yastḙ su̱dāna̭ve dhi̱yā marta̭: śa̱śama̭te | ū̱tī ṣa bṛ̭ha̱to di̱vo dvi̱ṣo aṃho̱ na ta̭rati ||4||
sa̱midhā̱ yasta̱ āhṷti̱ṃ niśi̭ti̱ṃ martyo̱ naśa̭t | va̱yāva̭nta̱ṃ sa pṷṣyati̱ kṣaya̭magne śa̱tāyṷṣam ||5||
tve̱ṣastḙ dhū̱ma ṛ̭ṇvati di̱vi ṣañchu̱kra āta̭taḥ | sūro̱ na hi dyu̱tā tvaṃ kṛ̱pā pā̭vaka̱ roca̭se ||6||
adhā̱ hi vi̱kṣvīḍyo 'si̭ pri̱yo no̱ ati̭thiḥ | ra̱ṇvaḥ pu̱rī̭va̱ jūrya̭: sū̱nurna tra̭ya̱yāyya̭: ||7||
kratvā̱ hi droṇḙ a̱jyase 'gnḙ vā̱jī na kṛtvya̭: | pari̭jmeva sva̱dhā gayo 'tyo̱ na hvā̱ryaḥ śiśṷ: ||8||
tvaṃ tyā ci̱dacyu̱tā 'gnḙ pa̱śurna yava̭se | dhāmā̭ ha̱ yat tḙ ajara̱ vanā̭ vṛ̱ścanti̱ śikva̭saḥ ||9||
veṣi̱ hya̭dhvarīya̱tāmagne̱ hotā̱ damḙ vi̱śāṃ | sa̱mṛdho̭ viśpate kṛṇu ju̱ṣasva̭ ha̱vyama̭ṅgiraḥ ||10||
acchā̭ no mitramaho deva de̱vānagne̱ voca̭: suma̱tiṃ roda̭syoḥ | vī̱hi sva̱stiṃ sṷkṣi̱tiṃ di̱vo nṝn dvi̱ṣo aṃhā̭ṃsi duri̱tā ta̭rema̱ tā ta̭rema̱ tavāva̭sā tarema ||11||
8 bārhaspatyo bharadvāja: | agni : |triṣṭup |
agne̱ sa kṣḙṣadṛta̱pā ṛ̭te̱jā u̱ru jyoti̭rnaśate deva̱yuṣṭḙ |
yaṃ tvaṃ mi̱treṇa̱ varṷṇaḥ sa̱joṣā̱ deva̱ pāsi̱ tyaja̭sā̱ marta̱maṃha̭: ||1||
ī̱je ya̱jñebhi̭: śaśa̱me śamī̭bhiṝ̱dhadvā̭rāyā̱gnayḙ dadāśa |
e̱vā ca̱na taṃ ya̱śasā̱majṷṣṭi̱rnāṃho̱ marta̭ṃ naśate̱ na pradṛ̭ptiḥ ||2||
sūro̱ na yasya̭ dṛśa̱tira̭re̱pā bhī̱mā yadeti̭ śuca̱tasta̱ ā dhīḥ |
heṣa̭svataḥ śu̱rudho̱ nāyama̱ktoḥ kutrā̭ cid ra̱ṇvo va̭sa̱tirva̭ne̱jāḥ ||3||
ti̱gmaṃ ci̱dema̱ mahi̱ varpo̭ asya̱ bhasa̱daśvo̱ na ya̭masā̱na ā̱sā |
 vi̱jeha̭mānaḥ para̱śurna ji̱hvāṃ dra̱virna drā̭vayati̱ dāru̱ dhakṣa̭t ||4||
sa idastḙva̱ prati̭ dhādasi̱ṣyañchiśī̭ta̱ tejo'ya̭so̱ na dhārā̭m |
ci̱tradhra̭jatirara̱tiryo a̱ktorverna dru̱ṣadvā̭ raghu̱patma̭jaṃhāḥ ||5||
sa ī̭ṃ re̱bho na prati̭ vasta u̱srāḥ śo̱ciṣā̭ rārapīti mi̱trama̭hāḥ |
 nakta̱ṃ ya ī̭maru̱ṣo yo divā̱ nṝnama̭rtyo aru̱ṣo yo divā̱ nṝn ||6||
di̱vo na yasya̭ vidha̱to navī̭no̱d vṛṣā̭ ru̱kṣa oṣa̭dhīṣu nūnot |
ghṛṇā̱ na yo dhraja̭sā̱ patma̭nā̱ yannā roda̭sī̱ vasṷnā̱ daṃ su̱patnī̭ ||7||
dhāyo̭bhirvā̱ yo yujyḙbhira̱rkairvi̱dyunna da̭vidyo̱t svebhi̱: śuṣmai̭: |
śardho̭ vā̱ yo ma̱rutā̭ṃ ta̱takṣa̭ ṛ̱bhurna tve̱ṣo ra̭bhasā̱no a̭dyaut ||8||
8 bārhaspatyo bharadvāja: | agni : |triṣṭup |
yathā̭ hota̱rmanṷṣo de̱vatā̭tā ya̱jñebhi̭: sūno sahaso̱ yajā̭si |
 e̱vā no̭ a̱dya sa̭ma̱nā sa̭mā̱nānu̱śanna̭gna uśa̱to ya̭kṣi de̱vān ||1||
sa no̭ vi̱bhāvā̭ ca̱kṣaṇi̱rna vasto̭ra̱gnirva̱ndāru̱ vedya̱ścano̭ dhāt |
vi̱śvāyu̱ryo a̱mṛto̱ martyḙṣūṣa̱rbhud bhūdati̭thirjā̱tavḙdāḥ ||2||
dyāvo̱ na yasya̭ pa̱naya̱ntyabhva̱ṃ bhāsā̭ṃsi vaste̱ sūryo̱ na śu̱kraḥ |
vi ya i̱notya̱jara̭: pāva̱ko 'śna̭sya cicchiśnathat pū̱rvyāṇi̭ ||3||
va̱dmā hi sṷ̄no̱ asya̭dma̱sadvā̭ ca̱kre a̱gnirja̱nuṣājmānna̭m |
sa tvaṃ na̭ ūrjasana̱ ūrja̭ṃ dhā̱ rājḙva jeravṛ̱ke kṣḙṣya̱ntaḥ ||4||
niti̭kti̱ yo vā̭ra̱ṇamanna̱matti̭ vā̱yurna rāṣṭryatyḙtya̱ktūn |
tu̱ryāma̱ yasta̭ ā̱diśā̱marā̭tī̱ratyo̱ na hruta̱: pata̭taḥ pari̱hrut ||5||
ā sūryo̱ na bhā̭nu̱madbhi̭ra̱rkairagnḙ ta̱tantha̱ roda̭sī̱ vi bhā̱sā |
 ci̱tro na̭ya̱t pari̱ tamā̭ṃsya̱ktaḥ śo̱ciṣā̱ patma̭nnauśi̱jo na dīya̭n ||6||
tvāṃ hi ma̱ndrata̭mamarkaśo̱kairva̭vṛ̱mahe̱ mahi̭ na̱: śroṣya̭gne |
indra̱ṃ na tvā̱ śava̭sā de̱vatā̭ vā̱yuṃ pṛ̭ṇanti̱ rādha̭sā̱ nṛta̭māḥ ||7||
nū no̭ agne'vṛ̱kebhi̭: sva̱sti veṣi̭ rā̱yaḥ pa̱thibhi̱: parṣyaṃha̭: |
tā sū̱ribhyo̭ gṛṇa̱te rā̭si su̱mnaṃ madḙma śa̱tahi̭māḥ su̱vīrā̭: ||8||
7 bārhaspatyo bharadvāja: | agni : |triṣṭup |
hu̱ve va̭: sū̱nuṃ saha̭so̱ yuvā̭na̱madro̭ghavācaṃ ma̱tibhi̱ryavi̭ṣṭham |
ya inva̭ti̱ dravi̭ṇāni̱ pracḙtā vi̱śvavā̭rāṇi puru̱vāro̭ a̱dhruk ||1||
tve vasṷ̄ni purvaṇīka hotardo̱ṣā vasto̱reri̭re ya̱jñiyā̭saḥ |
kṣāmḙva̱ viśvā̱ bhuva̭nāni̱ yasmi̱n tsaṃ saubha̭gāni dadhi̱re pā̭va̱ke ||2||
tvaṃ vi̱kṣu pra̱diva̭: sīda ā̱su kratvā̭ ra̱thīra̭bhavo̱ vāryā̭ṇām |
ata̭ inoṣi vidha̱te ci̭kitvo̱ vyā̭nu̱ṣagjā̭tavedo̱ vasṷ̄ni ||3||
yo na̱: sanṷtyo abhi̱dāsa̭dagne̱ yo anta̭ro mitramaho vanu̱ṣyāt |
tama̱jarḙbhi̱rvṛṣa̭bhi̱stava̱ svaistapā̭ tapiṣṭha̱ tapa̭sā̱ tapa̭svān ||4||
yastḙ ya̱jñena̭ sa̱midhā̱ ya u̱kthaira̱rkebhi̭: sūno sahaso̱ dadā̭śat |
sa martyḙṣvamṛta̱ pracḙtā rā̱yā dyu̱mnena̱ śrava̭sā̱ vi bhā̭ti ||5||
sa tat kṛ̭dhīṣi̱tastūya̭magne̱ spṛdho̭ bādhasva̱ saha̭sā̱ saha̭svān |
yaccha̱syase̱ dyubhi̭ra̱kto vaco̭bhi̱stajjṷṣasva jari̱turghoṣi̱ manma̭ ||6||
a̱śyāma̱ taṃ kāma̭magne̱ tavo̱tī a̱śyāma̭ ra̱yiṃ ra̭yivaḥ su̱vīra̭m |
a̱śyāma̱ vāja̭ma̱bhi vā̱jaya̭nto̱ 'śyāma̭ dyu̱mnama̭jarā̱jara̭ṃ te ||7||
7 bārhaspatyo bharadvāja: | agni : |triṣṭup |
pra navya̭sā̱ saha̭saḥ sū̱numacchā̭ ya̱jñena̭ gā̱tumava̭ i̱cchamā̭naḥ |
vṛ̱ścadva̭naṃ kṛ̱ṣṇayā̭ma̱ṃ ruśa̭ntaṃ vī̱tī hotā̭raṃ di̱vyaṃ ji̭gāti ||1||
sa śvi̭tā̱nasta̭nya̱tū ro̭cana̱sthā a̱jarḙbhi̱rnāna̭dadbhi̱ryavi̭ṣṭhaḥ |
yaḥ pā̭va̱kaḥ pṷru̱tama̭: pu̱rūṇi̭ pṛ̱thūnya̱gnira̭nu̱yāti̱ bharva̭n ||2||
vi te̱ viṣva̱gvāta̭jūtāso agne̱ bhāmā̭saḥ śuce̱ śuca̭yaścaranti |
tu̱vi̱mra̱kṣāso̭ di̱vyā nava̭gvā̱ vanā̭ vananti dhṛṣa̱tā ru̱janta̭: ||3||
ye tḙ śu̱krāsa̱: śuca̭yaḥ śuciṣma̱: kṣāṃ vapa̭nti̱ viṣi̭tāso̱ aśvā̭: |
adha̭ bhra̱masta̭ urvi̱yā vi bhā̭ti yā̱taya̭māno̱ adhi̱ sānu̱ pṛśnḙ: ||4||
adha̭ ji̱hvā pā̭patīti̱ pra vṛṣṇo̭ goṣu̱yudho̱ nāśani̭: sṛjā̱nā |
śūra̭syeva̱ prasi̭tiḥ kṣā̱tira̱gnerdu̱rvartṷrbhī̱mo da̭yate̱ vanā̭ni ||5||
ā bhā̱nunā̱ pārthi̭vāni̱ jrayā̭ṃsi ma̱hasto̱dasya̭ dhṛṣa̱tā ta̭tantha |
sa bā̭dha̱svāpa̭ bha̱yā saho̭bhi̱: spṛdho̭ vanu̱ṣyan va̱nuṣo̱ ni jṷ̄rva ||6||
sa ci̭tra ci̱traṃ ci̱taya̭ntama̱sme citra̭kṣatra ci̱trata̭maṃ vayo̱dhām |
ca̱ndraṃ ra̱yiṃ pṷru̱vīra̭ṃ bṛ̱hanta̱ṃ candra̭ ca̱ndrābhi̭rgṛṇa̱te yṷvasva ||7||
7 bārhaspatyo bharadvāja: | vaiśvānarosgni : |triṣṭup , 6 – 7 jagatī |
mū̱rdhāna̭ṃ di̱vo a̭ra̱tiṃ pṛ̭thi̱vyā vai̭śvāna̱ramṛ̱ta ā jā̱tama̱gnim |
ka̱viṃ sa̱mrāja̱mati̭thi̱ṃ janā̭nāmā̱sannā pātra̭ṃ janayanta de̱vāḥ ||1||
nābhi̭ṃ ya̱jñānā̱ṃ sada̭naṃ rayī̱ṇāṃ ma̱hāmā̭hā̱vama̱bhi saṃ na̭vanta |
vai̱śvā̱na̱raṃ ra̱thya̭madhva̱rāṇā̭ṃ ya̱jñasya̭ ke̱tuṃ ja̭nayanta de̱vāḥ ||2||
tvad vipro̭ jāyate vā̱jya̭gne̱ tvad vī̱rāso̭ abhimāti̱ṣāha̭: |
vaiśvā̭nara̱ tvama̱smāsṷ dhehi̱ vasṷ̄ni rājan tspṛha̱yāyyā̭ṇi ||3||
tvāṃ viśvḙ amṛta̱ jāya̭māna̱ṃ śiśu̱ṃ na de̱vā a̱bhi saṃ na̭vante |
tava̱ kratṷbhiramṛta̱tvamā̭ya̱n vaiśvā̭nara̱ yat pi̱troradī̭deḥ ||4||
vaiśvā̭nara̱ tava̱ tāni̭ vra̱tāni̭ ma̱hānya̭gne̱ naki̱rā da̭dharṣa |
yajjāya̭mānaḥ pi̱troru̱pasthe 'vi̭ndaḥ ke̱tuṃ va̱yune̱ṣvahnā̭m ||5||
vai̱śvā̱na̱rasya̱ vimi̭tāni̱ cakṣa̭sā̱ sānṷ̄ni di̱vo a̱mṛta̭sya ke̱tunā̭ |
tasyedu̱ viśvā̱ bhuva̱nādhi̭ mū̱rdhani̭ va̱yā i̭va ruruhuḥ sa̱pta vi̱sruha̭: ||6||
vi yo rajā̱ṃsyami̭mīta su̱kratṷrvaiśvāna̱ro vi di̱vo ro̭ca̱nā ka̱viḥ |
pari̱ yo viśvā̱ bhuva̭nāni papra̱the 'da̭bdho go̱pā a̱mṛta̭sya rakṣi̱tā ||7||
7 bārhaspatyo bharadvāja: | vaiśvānarosgni : | jagatī, 7 triṣṭup |
pṛ̱kṣasya̱ vṛṣṇo̭ aru̱ṣasya̱ nū saha̱: pra nu vo̭caṃ vi̱dathā̭ jā̱tavḙdasaḥ |
vai̱śvā̱na̱rāya̭ ma̱tirnavya̭sī̱ śuci̱: soma̭ iva pavate̱ cārṷra̱gnayḙ ||1||
sa jāya̭mānaḥ para̱me vyo̭mani vra̱tānya̱gnirvra̭ta̱pā a̭rakṣata |
vya1ntari̭kṣamamimīta su̱kratṷrvaiśvāna̱ro ma̭hi̱nā nāka̭maspṛśat ||2||
vya̭stabhnā̱d roda̭sī mi̱tro adbhṷto 'nta̱rvāva̭dakṛṇo̱jjyoti̭ṣā̱ tama̭: |
vi carma̭ṇīva dhi̱ṣaṇḙ avartayad vaiśvāna̱ro viśva̭madhatta̱ vṛṣṇya̭m ||3||
a̱pāmu̱pasthḙ mahi̱ṣā a̭gṛbhṇata̱ viśo̱ rājā̭na̱mupa̭ tasthuṝ̱gmiya̭m |
ā dū̱to a̱gnima̭bharad vi̱vasva̭to vaiśvāna̱raṃ mā̭ta̱riśvā̭ parā̱vata̭: ||4||
yu̱geyṷge vida̱thya̭ṃ gṛ̱ṇadbhyo 'gnḙ ra̱yiṃ ya̱śasa̭ṃ dhehi̱ navya̭sīm |
pa̱vyeva̭ rājanna̱ghaśa̭ṃsamajara nī̱cā ni vṛ̭śca va̱nina̱ṃ na teja̭sā ||5||
a̱smāka̭magne ma̱ghava̭tsu dhāra̱yā'nā̭mi kṣa̱trama̱jara̭ṃ su̱vīrya̭m |
va̱yaṃ ja̭yema śa̱tina̭ṃ saha̱sriṇa̱ṃ vaiśvā̭nara̱ vāja̭magne̱ tavo̱tibhi̭: ||6||
ada̭bdhebhi̱stava̭ go̱pābhi̭riṣṭe̱ 'smāka̭ṃ pāhi triṣadhastha sū̱rīn |
rakṣā̭ ca no da̱duṣā̱ṃ śardho̭ agne̱ vaiśvā̭nara̱ pra ca̭ tārī̱: stavā̭naḥ ||7||
7 bārhaspatyo bharadvāja: | vaiśvānarosgni : |triṣṭup , [ 7 prastārapaṃktirvā ] |
aha̭śca kṛ̱ṣṇamaha̱rarjṷnaṃ ca̱ vi va̭rtete̱ raja̭sī ve̱dyābhi̭: |
vai̱śvā̱na̱ro jāya̭māno̱ na rājā 'vā̭tira̱jjyoti̭ṣā̱gnistamā̭ṃsi ||1||
nāhaṃ tantu̱ṃ na vi jā̭nā̱myotu̱ṃ na yaṃ vaya̭nti sama̱re'ta̭mānāḥ |
kasya̭ svit pu̱tra i̱ha vaktvā̭ni pa̱ro va̭dā̱tyava̭reṇa pi̱trā ||2||
sa it tantu̱ṃ sa vi jā̭nā̱tyotu̱ṃ sa vaktvā̭nyṛtu̱thā va̭dāti |
 ya ī̱ṃ cikḙtada̱mṛta̭sya go̱pā a̱vaścara̭n pa̱ro a̱nyena̱ paśya̭n ||3||
a̱yaṃ hotā̭ pratha̱maḥ paśya̭te̱mami̱daṃ jyoti̭ra̱mṛta̱ṃ martyḙṣu |
a̱yaṃ sa ja̭jñe dhru̱va ā niṣa̱tto 'ma̭rtyasta̱nvā̱3 vardha̭mānaḥ ||4||
dhru̱vaṃ jyoti̱rnihi̭taṃ dṛ̱śaye̱ kaṃ mano̱ javi̭ṣṭhaṃ pa̱taya̭tsva̱ntaḥ |
viśvḙ de̱vāḥ sama̭nasa̱: sakḙtā̱ eka̱ṃ kratṷma̱bhi vi ya̭nti sā̱dhu ||5||
vi me̱ karṇā̭ patayato̱ vi cakṣu̱rvī̱3daṃ jyoti̱rhṛda̭ya̱ āhi̭ta̱ṃ yat |
vi me̱ mana̭ścarati dū̱raā̭dhī̱: kiṃ svi̭d va̱kṣyāmi̱ kimu̱ nū ma̭niṣye ||6||
viśvḙ de̱vā a̭namasyanbhiyā̱nāstvāma̭gne̱ tama̭si tasthi̱vāṃsa̭m |
vai̱śvā̱na̱ro̭'vatū̱taye̱ no 'ma̭rtyo'vatū̱tayḙ naḥ ||7||
7 bārhaspatyo bharadvāja: | agni : | triṣṭup ; 7 dvipadā virāṭ |
pu̱ro vo̭ ma̱ndraṃ di̱vyaṃ sṷvṛ̱ktiṃ pra̭ya̱ti ya̱jñe a̱gnima̭dhva̱re da̭dhidhvam |
pu̱ra u̱kthebhi̱: sa hi no̭ vi̱bhāvā̭ svadhva̱rā ka̭rati jā̱tavḙdāḥ ||1||
tamṷ dyumaḥ purvaṇīka hota̱ragnḙ a̱gnibhi̱rmanṷṣa idhā̱naḥ |
stoma̱ṃ yama̭smai ma̱matḙva śū̱ṣaṃ ghṛ̱taṃ na śuci̭ ma̱taya̭: pavante ||2||
pī̱pāya̱ sa śrava̭sā̱ martyḙṣu̱ yo a̱gnayḙ da̱dāśa̱ vipra̭ u̱kthaiḥ |
ci̱trābhi̱stamū̱tibhi̭ści̱traśo̭cirvra̱jasya̭ sā̱tā goma̭to dadhāti ||3||
ā yaḥ pa̱prau jāya̭māna u̱rvī dṷ̄re̱dṛśā̭ bhā̱sā kṛ̱ṣṇādhvā̭ |
adha̭ ba̱hu ci̱t tama̱ ūrmyā̭yāsti̱raḥ śo̱ciṣā̭ dadṛśe pāva̱kaḥ ||4||
nū na̭ści̱traṃ pṷru̱vājā̭bhirū̱tī agnḙ ra̱yiṃ ma̱ghava̭dbhyaśca dhehi |
ye rādha̭sā̱ śrava̭sā̱ cātya̱nyān tsu̱vīryḙbhiścā̱bhi santi̱ janā̭n ||5||
i̱maṃ ya̱jñaṃ cano̭ dhā agna u̱śan yaṃ ta̭ āsā̱no jṷhu̱te ha̱viṣmā̭n |
bha̱radvā̭jeṣu dadhiṣe suvṛ̱ktimavī̱rvāja̭sya̱ gadhya̭sya sā̱tau ||6||
vi dveṣā̭ṃsīnu̱hi va̱rdhayeḻā̱ṃ madḙma śa̱tahi̭māḥ su̱vīrā̭: ||7||
6 bārhaspatyo bharadvāja: | agni : | triṣṭup |
yaja̭sva hotariṣi̱to yajī̭yā̱nagne̱ bādho̭ ma̱rutā̱ṃ na prayṷkti |
ā no̭ mi̱trāvarṷṇā̱ nāsa̭tyā̱ dyāvā̭ ho̱trāya̭ pṛthi̱vī va̭vṛtyāḥ ||1||
tvaṃ hotā̭ ma̱ndrata̭mo no a̱dhruga̱ntarde̱vo vi̱dathā̱ martyḙṣu |
pā̱va̱kayā̭ ju̱hvā̱3 vahni̭rā̱sā 'gne̱ yaja̭sva ta̱nvaṃ1 tava̱ svām ||2||
dhanyā̭ ci̱ddhi tve dhi̱ṣaṇā̱ vaṣṭi̱ pra de̱vāñjanma̭ gṛṇa̱te yaja̭dhyai |
vepi̭ṣṭho̱ aṅgi̭rasā̱ṃ yaddha̱ vipro̱ madhṷ ccha̱ndo bhana̭ti re̱bha i̱ṣṭau ||3||
adi̭dyuta̱t svapā̭ko vi̱bhāvā 'gne̱ yaja̭sva̱ roda̭sī urū̱cī |
ā̱yuṃ na yaṃ nama̭sā rā̱taha̭vyā a̱ñjanti̭ supra̱yasa̱ṃ pañca̱ janā̭: ||4||
vṛ̱ñje ha̱ yannama̭sā ba̱rhira̱gnāvayā̭mi̱ srugghṛ̱tava̭tī suvṛ̱ktiḥ |
amya̭kṣi̱ sadma̱ sada̭ne pṛthi̱vyā aśrā̭yi ya̱jñaḥ sūrye̱ na cakṣṷ: ||5||
da̱śa̱syā na̭: purvaṇīka hotarde̱vebhi̭ragne a̱gnibhi̭ridhā̱naḥ |
rā̱yaḥ sṷ̄no sahaso vāvasā̱nā ati̭ srasema vṛ̱jana̱ṃ nāṃha̭: ||6||
6 bārhaspatyo bharadvāja: | agni : |triṣṭup
 [ 6 purastājjyotirvā ]|
madhye̱ hotā̭ duro̱ṇe ba̱rhiṣo̱ rāḻa̱gnisto̱dasya̱ roda̭sī̱ yaja̭dhyai |
a̱yaṃ sa sū̱nuḥ saha̭sa ṛ̱tāvā̭ dū̱rāt sūryo̱ na śo̱ciṣā̭ tatāna ||1||
ā yasmi̱n tve svapā̭ke yajatra̱ yakṣa̭d rājan tsa̱rvatā̭teva̱ nu dyauḥ |
tri̱ṣa̱dhastha̭stata̱ruṣo̱ na jaṃho̭ ha̱vyā ma̱ghāni̱ mānṷṣā̱ yaja̭dhyai ||2||
teji̭ṣṭhā̱ yasyā̭ra̱tirva̭ne̱rāṭ to̱do adhva̱n na vṛ̭dhasā̱no a̭dyaut |
a̱dro̱gho na dra̭vi̱tā cḙtati̱ tmannama̭rtyo'va̱rtra oṣa̭dhīṣu ||3||
sāsmākḙbhire̱tarī̱ na śū̱ṣaira̱gniḥ ṣṭa̭ve̱ dama̱ ā jā̱tavḙdāḥ |
drva̭nno va̱nvan kratvā̱ nārvo̱sraḥ pi̱teva̭ jāra̱yāyi̭ ya̱jñaiḥ ||4||
adha̭ smāsya panayanti̱ bhāso̱ vṛthā̱ yat takṣa̭danu̱yāti̭ pṛ̱thvīm |
sa̱dyo yaḥ spa̱ndro viṣi̭to̱ dhavī̭yānṛ̱ṇo na tā̱yurati̱ dhanvā̭ rāṭ ||5||
sa tvaṃ no̭ arva̱n nidā̭yā̱ viśvḙbhiragne a̱gnibhi̭ridhā̱naḥ |
veṣi̭ rā̱yo vi yā̭si du̱cchunā̱ madḙma śa̱tahi̭māḥ su̱vīrā̭: ||6||
6 bārhaspatyo bharadvāja: | agni : |triṣṭup |
tvad viśvā̭ subhaga̱ saubha̭gā̱nyagne̱ vi ya̭nti va̱nino̱ na va̱yāḥ |
śru̱ṣṭī ra̱yirvājo̭ vṛtra̱tūryḙ di̱vo vṛ̱ṣṭirīḍyo̭ rī̱tira̱pām ||1||
tvaṃ bhago̭ na̱ ā hi ratna̭mi̱ṣe pari̭jmeva kṣayasi da̱smava̭rcāḥ |
agnḙ mi̱tro na bṛ̭ha̱ta ṛ̱tasyā'si̭ kṣa̱ttā vā̱masya̭ deva̱ bhūrḙ: ||2||
sa satpa̭ti̱: śava̭sā hanti vṛ̱tramagne̱ vipro̱ vi pa̱ṇerbha̭rti̱ vāja̭m |
yaṃ tvaṃ pra̭ceta ṛtajāta rā̱yā sa̱joṣā̱ naptrā̱pāṃ hi̱noṣi̭ ||3||
yastḙ sūno sahaso gī̱rbhiru̱kthairya̱jñairmarto̱ niśi̭tiṃ ve̱dyāna̭ṭ |
viśva̱ṃ sa dḙva̱ prati̱ vāra̭magne dha̱tte dhā̱nyaṃ1 patya̭te vasa̱vyai̭: ||4||
tā nṛbhya̱ ā saṷśrava̱sā su̱vīrā 'gnḙ sūno sahasaḥ pu̱ṣyasḙ dhāḥ |
kṛ̱ṇoṣi̱ yacchava̭sā̱ bhūri̭ pa̱śvo vayo̱ vṛkā̭yā̱raye̱ jasṷraye ||5||
va̱dmā sṷ̄no sahaso no̱ vihā̭yā̱ agnḙ to̱kaṃ tana̭yaṃ vā̱ji no̭ dāḥ |
viśvā̭bhirgī̱rbhira̱bhi pū̱rtima̭śyā̱ṃ madḙma śa̱tahi̭māḥ su̱vīrā̭: ||6||
6 bārhaspatyo bharadvāja: | agni : |anuṣṭup , 6 śakvarī |
a̱gnā yo martyo̱ duvo̱ dhiya̭ṃ ju̱joṣa̭ dhī̱tibhi̭: | bhasa̱nnu ṣa pra pū̱rvya iṣa̭ṃ vurī̱tāva̭se ||1||
a̱gniriddhi pracḙtā a̱gnirve̱dhasta̭ma̱ ṛṣi̭: | a̱gniṃ hotā̭ramīḻate ya̱jñeṣu̱ manṷṣo̱ viśa̭: ||2||
nānā̱ hya1gne'va̭se̱ spardha̭nte̱ rāyo̭ a̱ryaḥ | tūrva̭nto̱ dasyṷmā̱yavo̭ vra̱taiḥ sīkṣa̭nto avra̱tam ||3||
a̱gnira̱psāmṛ̭tī̱ṣaha̭ṃ vī̱raṃ da̭dāti̱ satpa̭tim | yasya̱ trasa̭nti̱ śava̭saḥ sa̱ṃcakṣi̱ śatra̭vo bhi̱yā ||4||
a̱gnirhi vi̱dmanā̭ ni̱do de̱vo marta̭muru̱ṣyati̭ | sa̱hāvā̱ yasyāvṛ̭to ra̱yirvāje̱ṣvavṛ̭taḥ ||5||
acchā̭ no mitramaho deva de̱vānagne̱ voca̭: suma̱tiṃ roda̭syoḥ |
vī̱hi sva̱stiṃ sṷkṣi̱tiṃ di̱vo nṝn dvi̱ṣo aṃhā̭ṃsi duri̱tā ta̭rema̱ tā ta̭rema̱ tavāva̭sā tarema ||6||
19 bārhaspatyo bharadvājo, vītahavya āṅgiraso vā |
agni : |jagatī; 3; 15 śakvarī;
6 atiśakvarī; 10 – 14, 16,19 triṣṭup , 17 anuṣṭup ; 18 bṛhatī |
i̱mamū̱ ṣu vo̱ ati̭thimuṣa̱rbudha̱ṃ viśvā̭sāṃ vi̱śāṃ pati̭mṛñjase gi̱rā |
vetīd di̱vo ja̱nuṣā̱ kacci̱dā śuci̱rjyok ci̭datti̱ garbho̱ yadacyṷtam ||1||
mi̱traṃ na yaṃ sudhi̭ta̱ṃ bhṛga̭vo da̱dhurvana̱spatā̱vīḍya̭mū̱rdhvaśo̭ciṣam |
sa tvaṃ suprī̭to vī̱taha̭vye adbhuta̱ praśa̭stibhirmahayase di̱vedi̭ve ||2||
sa tvaṃ dakṣa̭syāvṛ̱ko vṛ̱dho bhṷ̄ra̱ryaḥ para̱syānta̭rasya̱ tarṷṣaḥ |
rā̱yaḥ sṷ̄no sahaso̱ martye̱ṣvā cha̱rdirya̭ccha vī̱taha̭vyāya sa̱pratho̭ bha̱radvā̭jāya sa̱pratha̭: ||3||
dyu̱tā̱naṃ vo̱ ati̭thi̱ṃ sva̭rṇarama̱gniṃ hotā̭ra̱ṃ manṷṣaḥ svadhva̱ram |
vipra̱ṃ na dyu̱kṣava̭casaṃ suvṛ̱ktibhi̭rhavya̱vāha̭mara̱tiṃ de̱vamṛ̭ñjase ||4||
pā̱va̱kayā̱ yaści̱taya̭ntyā kṛ̱pā kṣāma̭n ruru̱ca u̱ṣaso̱ na bhā̱nunā̭ |
tūrva̱n na yāma̱nneta̭śasya̱ nū raṇa̱ ā yo ghṛ̱ṇe na ta̭tṛṣā̱ṇo a̱jara̭: ||5||
a̱gnima̭gniṃ vaḥ sa̱midhā̭ duvasyata pri̱yaṃpri̭yaṃ vo̱ ati̭thiṃ gṛṇī̱ṣaṇi̭ |
upa̭ vo gī̱rbhira̱mṛta̭ṃ vivāsata de̱vo de̱veṣu̱ vana̭te̱ hi vārya̭ṃ de̱vo de̱veṣu̱ vana̭te̱ hi no̱ duva̭: ||6||
sami̭ddhama̱gniṃ sa̱midhā̭ gi̱rā gṛ̭ṇe̱ śuci̭ṃ pāva̱kaṃ pu̱ro a̭dhva̱re dhru̱vam |
vipra̱ṃ hotā̭raṃ puru̱vāra̭ma̱druha̭ṃ ka̱viṃ su̱mnairī̭mahe jā̱tavḙdasam ||7||
tvāṃ dū̱tama̭gne a̱mṛta̭ṃ yu̱geyṷge havya̱vāha̭ṃ dadhire pā̱yumīḍya̭m |
de̱vāsa̭śca̱ martā̭saśca̱ jāgṛ̭viṃ vi̱bhuṃ vi̱śpati̱ṃ nama̭sā̱ ni ṣḙdire ||8||
vi̱bhūṣa̭nnagna u̱bhayā̱~ anṷ vra̱tā dū̱to de̱vānā̱ṃ raja̭sī̱ samī̭yase |
yat tḙ dhī̱tiṃ sṷma̱timā̭vṛṇī̱mahe 'dha̭ smā nastri̱varṷ̄thaḥ śi̱vo bha̭va ||9||
taṃ su̱pratī̭kaṃ su̱dṛśa̱ṃ svañca̱mavi̭dvāṃso vi̱duṣṭa̭raṃ sapema |
sa ya̭kṣa̱d viśvā̭ va̱yunā̭ni vi̱dvān pra ha̱vyama̱gnira̱mṛtḙṣu vocat ||10||
tama̭gne pāsyu̱ta taṃ pi̭parṣi̱ yasta̱ āna̭ṭ ka̱vayḙ śūra dhī̱tim |
ya̱jñasya̭ vā̱ niśi̭ti̱ṃ vodi̭tiṃ vā̱ tamit pṛ̭ṇakṣi̱ śava̭so̱ta rā̱yā ||11||
tvama̭gne vanuṣya̱to ni pā̭hi̱ tvamṷ naḥ sahasāvannava̱dyāt |
saṃ tvā̭ dhvasma̱nvada̱bhyḙtu̱ pātha̱: saṃ ra̱yiḥ spṛ̭ha̱yāyya̭: saha̱srī ||12||
a̱gnirhotā̭ gṛ̱hapa̭ti̱: sa rājā̱ viśvā̭ veda̱ jani̭mā jā̱tavḙdāḥ |
 de̱vānā̭mu̱ta yo martyā̭nā̱ṃ yaji̭ṣṭha̱: sa pra ya̭jatāmṛ̱tāvā̭ ||13||
agne̱ yada̱dya vi̱śo a̭dhvarasya hota̱: pāva̭kaśoce̱ veṣṭvaṃ hi yajvā̭ |
ṛ̱tā ya̭jāsi mahi̱nā vi yad bhūrha̱vyā va̭ha yaviṣṭha̱ yā tḙ a̱dya ||14||
a̱bhi prayā̭ṃsi̱ sudhi̭tāni̱ hi khyo ni tvā̭ dadhīta̱ roda̭sī̱ yaja̭dhyai |
avā̭ no maghava̱n vāja̭sātā̱vagne̱ viśvā̭ni duri̱tā ta̭rema̱ tā ta̭rema̱ tavāva̭sā tarema ||15||
agne̱ viśvḙbhiḥ svanīka de̱vairūrṇā̭vantaṃ pratha̱maḥ sī̭da̱ yoni̭m |
ku̱lā̱yina̭ṃ ghṛ̱tava̭ntaṃ savi̱tre ya̱jñaṃ na̭ya̱ yaja̭mānāya sā̱dhu ||16||
i̱mamu̱ tyama̭tharva̱vada̱gniṃ ma̭nthanti ve̱dhasa̭: | yama̭ṅkū̱yanta̱māna̭ya̱nnamṷ̄raṃ śyā̱vyā̭bhyaḥ ||17||
jani̭ṣvā de̱vavī̭taye sa̱rvatā̭tā sva̱stayḙ | ā de̱vān va̭kṣya̱mṛtā̭~ ṛtā̱vṛdho̭ ya̱jñaṃ de̱veṣṷ pispṛśaḥ ||18||
va̱yamṷ tvā gṛhapate janānā̱magne̱ aka̭rma sa̱midhā̭ bṛ̱hanta̭m |
a̱sthū̱ri no̱ gārha̭patyāni santu ti̱gmena̭ na̱steja̭sā̱ saṃ śi̭śādhi ||19||
48 bārhaspatyo bharadvāja: | agni :|gāyatrī; 1, 6 vardhamānā;27, 47 – 48 anuṣṭup ; 46 triṣṭup |
tvama̭gne ya̱jñānā̱ṃ hotā̱ viśvḙṣāṃ hi̱taḥ | de̱vebhi̱rmānṷṣe̱ janḙ ||1||
sa no̭ ma̱ndrābhi̭radhva̱re ji̱hvābhi̭ryajā ma̱haḥ | ā de̱vān va̭kṣi̱ yakṣi̭ ca ||2||
vetthā̱ hi vḙdho̱ adhva̭naḥ pa̱thaśca̭ de̱vāñja̭sā | agnḙ ya̱jñeṣṷ sukrato ||3||
tvāmī̭ḻe̱ adha̭ dvi̱tā bha̭ra̱to vā̱jibhi̭: śu̱nam | ī̱je ya̱jñeṣṷ ya̱jñiya̭m ||4||
tvami̱mā vāryā̭ pu̱ru divo̭dāsāya sunva̱te | bha̱radvā̭jāya dā̱śuṣḙ ||5||
tvaṃ dū̱to ama̭rtya̱ ā va̭hā̱ daivya̱ṃ jana̭m | śṛ̱ṇvan vipra̭sya suṣṭu̱tim ||6||
tvāma̭gne svā̱dhyo̱3 martā̭so de̱vavī̭taye | ya̱jñeṣṷ de̱vamī̭ḻate ||7||
tava̱ pra ya̭kṣi sa̱ṃdṛśa̭mu̱ta kratṷṃ su̱dāna̭vaḥ | viśvḙ juṣanta kā̱mina̭: ||8||
tvaṃ hotā̱ manṷrhito̱ vahni̭rā̱sā vi̱duṣṭa̭raḥ | agne̱ yakṣi̭ di̱vo viśa̭: ||9||
agna̱ ā yā̭hi vī̱tayḙ gṛṇā̱no ha̱vyadā̭taye | ni hotā̭ satsi ba̱rhiṣi̭ ||10||
taṃ tvā̭ sa̱midbhi̭raṅgiro ghṛ̱tena̭ vardhayāmasi | bṛ̱haccho̭cā yaviṣṭhya ||11||
sa na̭: pṛ̱thu śra̱vāyya̱macchā̭ deva vivāsasi | bṛ̱hada̭gne su̱vīrya̭m ||12||
tvāma̭gne̱ puṣka̭rā̱dadhyatha̭rvā̱ nira̭manthata | mū̱rdhno viśva̭sya vā̱ghata̭: ||13||
tamṷ tvā da̱dhyaṅṅṛṣi̭: pu̱tra ī̭dhe̱ atha̭rvaṇaḥ | vṛ̱tra̱haṇa̭ṃ puraṃda̱ram ||14||
tamṷ tvā pā̱thyo vṛṣā̱ samī̭dhe dasyu̱hanta̭mam | dha̱na̱ṃja̱yaṃ raṇḙraṇe ||15||
ehyū̱ ṣu bravā̭ṇi̱ te 'gna̭ i̱ttheta̭rā̱ gira̭: | e̱bhirva̭rdhāsa̱ indṷbhiḥ ||16||
yatra̱ kva̭ ca te̱ mano̱ dakṣa̭ṃ dadhasa̱ utta̭ram | tatrā̱ sada̭: kṛṇavase ||17||
na̱hi tḙ pū̱rtama̭kṣi̱pad bhuva̭nnemānāṃ vaso | athā̱ duvo̭ vanavase ||18||
āgnira̭gāmi̱ bhāra̭to vṛtra̱hā pṷru̱ceta̭naḥ | divo̭dāsasya̱ satpa̭tiḥ ||19||
sa hi viśvāti̱ pārthi̭vā ra̱yiṃ dāśa̭nmahitva̱nā | va̱nvannavā̭to̱ astṛ̭taḥ ||20||
sa pra̭tna̱vannavī̭ya̱sā 'gnḙ dyu̱mnena̭ sa̱ṃyatā̭ | bṛ̱hat ta̭tantha bhā̱nunā̭ ||21||
pra va̭: sakhāyo a̱gnaye̱ stoma̭ṃ ya̱jñaṃ ca̭ dhṛṣṇu̱yā | arca̱ gāya̭ ca ve̱dhasḙ ||22||
sa hi yo mānṷṣā yu̱gā sīda̱ddhotā̭ ka̱vikra̭tuḥ | dū̱taśca̭ havya̱vāha̭naḥ ||23||
tā rājā̭nā̱ śuci̭vratā ''di̱tyān mārṷtaṃ ga̱ṇam | vaso̱ yakṣī̱ha roda̭sī ||24||
vasvī̭ te agne̱ saṃdṛ̭ṣṭiriṣaya̱te martyā̭ya | ūrjo̭ napāda̱mṛta̭sya ||25||
kratvā̱ dā a̭stu̱ śreṣṭho̱ 'dya tvā̭ va̱nvan tsu̱rekṇā̭: | marta̭ ānāśa suvṛ̱ktim ||26||
te tḙ agne̱ tvotā̭ i̱ṣaya̭nto̱ viśva̱māyṷ: | tara̭nto a̱ryo arā̭tīrva̱nvanto̭ a̱ryo arā̭tīḥ ||27||
a̱gnisti̱gmena̭ śo̱ciṣā̱ yāsa̱d viśva̱ṃ nya1triṇa̭m | a̱gnirno̭ vanate ra̱yim ||28||
su̱vīra̭ṃ ra̱yimā bha̭ra̱ jāta̭vedo̱ vica̭rṣaṇe | ja̱hi rakṣā̭ṃsi sukrato ||29||
tvaṃ na̭: pā̱hyaṃha̭so̱ jāta̭vedo aghāya̱taḥ | rakṣā̭ ṇo brahmaṇaskave ||30||
yo no̭ agne du̱reva̱ ā marto̭ va̱dhāya̱ dāśa̭ti | tasmā̭nnaḥ pā̱hyaṃha̭saḥ ||31||
tvaṃ taṃ dḙva ji̱hvayā̱ pari̭ bādhasva du̱ṣkṛta̭m | marto̱ yo no̱ jighā̭ṃsati ||32||
bha̱radvā̭jāya sa̱pratha̱: śarma̭ yaccha sahantya | agne̱ varḙṇya̱ṃ vasṷ ||33||
a̱gnirvṛ̱trāṇi̭ jaṅghanad draviṇa̱syurvi̭pa̱nyayā̭ | sami̭ddhaḥ śu̱kra āhṷtaḥ ||34||
garbhḙ mā̱tuḥ pi̱tuṣpi̱tā vi̭didyutā̱no a̱kṣarḙ | sīda̭nnṛ̱tasya̱ yoni̱mā ||35||
brahma̭ pra̱jāva̱dā bha̭ra̱ jāta̭vedo̱ vica̭rṣaṇe | agne̱ yad dī̱daya̭d di̱vi ||36||
upa̭ tvā ra̱ṇvasa̭ṃdṛśa̱ṃ praya̭svantaḥ sahaskṛta | agnḙ sasṛ̱jmahe̱ gira̭: ||37||
upa̭ cchā̱yāmi̭va̱ ghṛṇe̱raga̭nma̱ śarma̭ te va̱yam | agne̱ hira̭ṇyasaṃdṛśaḥ ||38||
ya u̱gra i̭va śarya̱hā ti̱gmaśṛ̭ṅgo̱ na vaṃsa̭gaḥ | agne̱ puro̭ ru̱roji̭tha ||39||
ā yaṃ haste̱ na khā̱dina̱ṃ śiśṷṃ jā̱taṃ na bibhra̭ti | vi̱śāma̱gniṃ sva̭dhva̱raṃ ||40||
pra de̱vaṃ de̱vavī̭taye̱ bhara̭tā vasu̱vitta̭mam | ā sve yonau̱ ni ṣī̭datu ||41||
ā jā̱taṃ jā̱tavḙdasi pri̱yaṃ śi̭śī̱tāti̭thim | syo̱na ā gṛ̱hapa̭tim ||42||
agnḙ yu̱kṣvā hi ye tavā'śvā̭so deva sā̱dhava̭: | ara̱ṃ vaha̭nti ma̱nyavḙ ||43||
acchā̭ no yā̱hyā va̭hā̱'bhi prayā̭ṃsi vī̱tayḙ | ā de̱vān tso̱ma̭pītaye ||44||
uda̭gne bhārata dyu̱madaja̭sreṇa̱ davi̭dyutat | śocā̱ vi bhā̭hyajara ||45||
vī̱tī yo de̱vaṃ marto̭ duva̱syeda̱gnimī̭ḻītādhva̱re ha̱viṣmā̭n |
hotā̭raṃ satya̱yaja̱ṃ roda̭syoruttā̱naha̭sto̱ nama̱sā vi̭vāset ||46||
ā tḙ agna ṛ̱cā ha̱virhṛ̱dā ta̱ṣṭaṃ bha̭rāmasi | te tḙ bhavantū̱kṣaṇa̭ ṛṣa̱bhāso̭ va̱śā u̱ta ||47||
a̱gniṃ de̱vāso̭ agri̱yami̱ndhatḙ vṛtra̱hanta̭mam | yenā̱ vasū̱nyābhṛ̭tā tṛ̱ḻhā rakṣā̭ṃsi vā̱jinā̭ ||48||
15 bārhaspatyo bharadvāja: | indra: |triṣṭup , 15 dvipadā virāṭ |
pibā̱ soma̭ma̱bhi yamṷgra̱ tarda̭ ū̱rvaṃ gavya̱ṃ mahi̭ gṛṇā̱na i̭ndra |
vi yo dhṛ̭ṣṇo̱ vadhi̭ṣo vajrahasta̱ viśvā̭ vṛ̱trama̭mi̱triyā̱ śavo̭bhiḥ ||1||
sa ī̭ṃ pāhi̱ ya ṛ̭jī̱ṣī tarṷtro̱ yaḥ śipra̭vān vṛṣa̱bho yo ma̭tī̱nām |
yo go̭tra̱bhid va̭jra̱bhṛd yo ha̭ri̱ṣṭhāḥ sa i̭ndra ci̱trā~ a̱bhi tṛ̭ndhi̱ vājā̭n ||2||
e̱vā pā̭hi pra̱tnathā̱ manda̭tu tvā śru̱dhi brahma̭ vāvṛ̱dhasvo̱ta gī̱rbhiḥ |
ā̱viḥ sūrya̭ṃ kṛṇu̱hi pī̭pi̱hīṣo̭ ja̱hi śatrṷ̄~ra̱bhi gā i̭ndra tṛndhi ||3||
te tvā̱ madā̭ bṛ̱hadi̭ndra svadhāva i̱me pī̱tā ṷkṣayanta dyu̱manta̭m |
ma̱hāmanṷ̄naṃ ta̱vasa̱ṃ vibhṷ̄tiṃ matsa̱rāso̭ jarhṛṣanta pra̱sāha̭m ||4||
yebhi̱: sūrya̭mu̱ṣasa̭ṃ mandasā̱no 'vā̭sa̱yo'pa̭ dṛ̱ḻhāni̱ dardra̭t |
ma̱hāmadri̱ṃ pari̱ gā i̭ndra̱ santa̭ṃ nu̱tthā acyṷta̱ṃ sada̭sa̱spari̱ svāt ||5||
tava̱ kratvā̱ tava̱ tad da̱ṃsanā̭bhirā̱māsṷ pa̱kvaṃ śacyā̱ ni dī̭dhaḥ |
aurṇo̱rdura̭ u̱sriyā̭bhyo̱ vi dṛ̱ḻhodū̱rvād gā a̭sṛjo̱ aṅgi̭rasvān ||6||
pa̱prātha̱ kṣāṃ mahi̱ daṃso̱ vyu1rvīmupa̱ dyāmṛ̱ṣvo bṛ̱hadi̭ndra stabhāyaḥ |
adhā̭rayo̱ roda̭sī de̱vapṷtre pra̱tne mā̱tarā̭ ya̱hvī ṛ̱tasya̭ ||7||
adha̭ tvā̱ viśvḙ pu̱ra i̭ndra de̱vā eka̭ṃ ta̱vasa̭ṃ dadhire̱ bharā̭ya |
adḙvo̱ yada̱bhyauhi̭ṣṭa de̱vān tsva̭rṣātā vṛṇata̱ indra̱matra̭ ||8||
adha̱ dyauści̭t te̱ apa̱ sā nu vajrā̭d dvi̱tāna̭mad bhi̱yasā̱ svasya̭ ma̱nyoḥ |
ahi̱ṃ yadindro̭ a̱bhyoha̭sāna̱ṃ ni ci̭d vi̱śvāyṷ: śa̱yathḙ ja̱ghāna̭ ||9||
adha̱ tvaṣṭā̭ te ma̱ha ṷgra̱ vajra̭ṃ sa̱hasra̭bhṛṣṭiṃ vavṛtaccha̱tāśri̭m |
nikā̭mama̱rama̭ṇasa̱ṃ yena̱ nava̭nta̱mahi̱ṃ saṃ pi̭ṇagṛjīṣin ||10||
vardhā̱n yaṃ viśvḙ ma̱ruta̭: sa̱joṣā̱: paca̭ccha̱taṃ ma̭hi̱ṣā~ i̭ndra̱ tubhya̭m |
pū̱ṣā viṣṇu̱strīṇi̱ sarā̭ṃsi dhāvan vṛtra̱haṇa̭ṃ madi̱rama̱ṃśuma̭smai ||11||
ā kṣodo̱ mahi̭ vṛ̱taṃ na̱dīnā̱ṃ pari̭ṣṭhitamasṛja ū̱rmima̱pām |
tāsā̱manṷ pra̱vata̭ indra̱ panthā̱ṃ prārda̭yo̱ nīcī̭ra̱pasa̭: samu̱dram ||12||
e̱vā tā viśvā̭ cakṛ̱vāṃsa̱mindra̭ṃ ma̱hāmu̱grama̭ju̱ryaṃ sa̭ho̱dām |
su̱vīra̭ṃ tvā svāyu̱dhaṃ su̱vajra̱mā brahma̱ navya̱mava̭se vavṛtyāt ||13||
sa no̱ vājā̭ya̱ śrava̭sa i̱ṣe ca̭ rā̱ye dhḙhi dyu̱mata̭ indra̱ viprā̭n |
bha̱radvā̭je nṛ̱vata̭ indra sū̱rīn di̱vi ca̭ smaidhi̱ pāryḙ na indra ||14||
a̱yā vāja̭ṃ de̱vahi̭taṃ sanema̱ madḙma śa̱tahi̭māḥ su̱vīrā̭: ||15||
15 bārhaspatyo bharadvāja: | indra: |triṣṭup |
tamṷ ṣṭuhi̱ yo a̱bhibhṷ̄tyojā va̱nvannavā̭taḥ puruhū̱ta indra̭: |
aṣā̭ḻhamu̱graṃ saha̭mānamā̱bhirgī̱rbhirva̭rdha vṛṣa̱bhaṃ ca̭rṣaṇī̱nām ||1||
sa yu̱dhmaḥ satvā̭ khaja̱kṛt sa̱madvā̭ tuvimra̱kṣo na̭danu̱mā~ ṛ̭jī̱ṣī |
bṛ̱hadrḙṇu̱ścyava̭no̱ mānṷṣīṇā̱meka̭: kṛṣṭī̱nāma̭bhavat sa̱hāvā̭ ||2||
tvaṃ ha̱ nu tyada̭damāyo̱ dasyū̱~reka̭: kṛ̱ṣṭīra̭vano̱rāryā̭ya |
asti̭ svi̱nnu vī̱ryaṃ1 tat ta̭ indra̱ na svi̭dasti̱ tadṛ̭tu̱thā vi vo̭caḥ ||3||
sadiddhi tḙ tuvijā̱tasya̱ manye̱ saha̭: sahiṣṭha tura̱tastu̱rasya̭ |
u̱gramu̱grasya̭ ta̱vasa̱stavī̱yo 'ra̭dhrasya radhra̱turo̭ babhūva ||4||
tanna̭: pra̱tnaṃ sa̱khyama̭stu yu̱ṣme i̱tthā vada̭dbhirva̱lamaṅgi̭robhiḥ |
hanna̭cyutacyud dasme̱ṣaya̭ntamṛ̱ṇoḥ puro̱ vi duro̭ asya̱ viśvā̭: ||5||
sa hi dhī̱bhirhavyo̱ astyu̱gra ī̭śāna̱kṛnma̭ha̱ti vṛ̭tra̱tūryḙ |
sa to̱kasā̭tā̱ tana̭ye̱ sa va̱jrī vi̭tanta̱sāyyo̭ abhavat sa̱matsṷ ||6||
sa ma̱jmanā̱ jani̭ma̱ mānṷṣāṇā̱mama̭rtyena̱ nāmnāti̱ pra sa̭rsre |
sa dyu̱mnena̱ sa śava̭so̱ta rā̱yā sa vī̱ryḙṇa̱ nṛta̭ma̱: samo̭kāḥ ||7||
sa yo na mu̱he na mithū̱ jano̱ bhūt sumantṷnāmā̱ cumṷri̱ṃ dhuni̭ṃ ca |
vṛ̱ṇak pipru̱ṃ śamba̭ra̱ṃ śuṣṇa̱mindra̭: pu̱rāṃ cyau̱tnāya̭ śa̱yathā̭ya̱ nū ci̭t ||8||
u̱dāva̭tā̱ tvakṣa̭sā̱ panya̭sā ca vṛtra̱hatyā̭ya̱ ratha̭mindra tiṣṭha |
dhi̱ṣva vajra̱ṃ hasta̱ ā da̭kṣiṇa̱trā 'bhi pra ma̭nda purudatra mā̱yāḥ ||9||
a̱gnirna śuṣka̱ṃ vana̭mindra he̱tī rakṣo̱ ni dha̭kṣya̱śani̱rna bhī̱mā |
 ga̱mbhī̱raya̭ ṛ̱ṣvayā̱ yo ru̱rojādhvā̭nayad duri̱tā da̱mbhaya̭cca ||10||
ā sa̱hasra̭ṃ pa̱thibhi̭rindra rā̱yā tuvi̭dyumna tuvi̱vājḙbhira̱rvāk |
yā̱hi sṷ̄no sahaso̱ yasya̱ nū ci̱dadḙva̱ īśḙ puruhūta̱ yoto̭: ||11||
pra tṷvidyu̱mnasya̱ sthavi̭rasya̱ ghṛṣvḙrdi̱vo ra̭rapśe mahi̱mā pṛ̭thi̱vyāḥ |
nāsya̱ śatru̱rna pra̭ti̱māna̭masti̱ na pra̭ti̱ṣṭhiḥ pṷrumā̱yasya̱ sahyo̭: ||12||
pra tat te a̱dyā kara̭ṇaṃ kṛ̱taṃ bhū̱t kutsa̱ṃ yadā̱yuma̭tithi̱gvama̭smai |
pu̱rū sa̱hasrā̱ ni śi̭śā a̱bhi kṣāmut tūrva̭yāṇaṃ dhṛṣa̱tā ni̭netha ||13||
anu̱ tvāhi̭ghne̱ adha̭ deva de̱vā mada̱n viśvḙ ka̱vita̭maṃ kavī̱nām |
karo̱ yatra̱ vari̭vo bādhi̱tāya̭ di̱ve janā̭ya ta̱nvḙ gṛṇā̱naḥ ||14||
anu̱ dyāvā̭pṛthi̱vī tat ta̱ ojo 'ma̭rtyā jihata indra de̱vāḥ |
kṛ̱ṣvā kṛ̭tno̱ akṛ̭ta̱ṃ yat te̱ astyu̱kthaṃ navī̭yo janayasva ya̱jñaiḥ ||15||
13 bārhaspatyo bharadvāja: | indra: |triṣṭup |
ma̱hā~ indro̭ nṛ̱vadā ca̭rṣaṇi̱prā u̱ta dvi̱barhā̭ ami̱naḥ saho̭bhiḥ |
a̱sma̱drya̭gvāvṛdhe vī̱ryā̭yo̱ruḥ pṛ̱thuḥ sukṛ̭taḥ ka̱rtṛbhi̭rbhūt ||1||
indra̭me̱va dhi̱ṣaṇā̭ sā̱tayḙ dhād bṛ̱hanta̭mṛ̱ṣvama̱jara̱ṃ yuvā̭nam |
aṣā̭ḻhena̱ śava̭sā śūśu̱vāṃsa̭ṃ sa̱dyaści̱d yo vā̭vṛ̱dhe asā̭mi ||2||
pṛ̱thū ka̱rasnā̭ bahu̱lā gabha̭stī asma̱drya1k saṃ mi̭mīhi̱ śravā̭ṃsi |
yū̱theva̭ pa̱śvaḥ pa̭śu̱pā damṷ̄nā a̱smā~ i̭ndrā̱bhyā va̭vṛtsvā̱jau ||3||
taṃ va̱ indra̭ṃ ca̱tina̭masya śā̱kairi̱ha nū̱naṃ vā̭ja̱yanto̭ huvema |
yathā̭ ci̱t pūrvḙ jari̱tāra̭ ā̱suranḙdyā anava̱dyā ari̭ṣṭāḥ ||4||
dhṛ̱tavra̭to dhana̱dāḥ soma̭vṛddha̱: sa hi vā̱masya̱ vasṷnaḥ puru̱kṣuḥ |
saṃ ja̭gmire pa̱thyā̱3 rāyo̭ asmin tsamu̱dre na sindha̭vo̱ yāda̭mānāḥ ||5||
śavi̭ṣṭhaṃ na̱ ā bha̭ra śūra̱ śava̱ oji̭ṣṭha̱mojo̭ abhibhūta u̱gram |
viśvā̭ dyu̱mnā vṛṣṇyā̱ mānṷṣāṇāma̱smabhya̭ṃ dā harivo māda̱yadhyai̭ ||6||
yaste̱ mada̭: pṛtanā̱ṣāḻamṛ̭dhra̱ indra̱ taṃ na̱ ā bha̭ra śūśu̱vāṃsa̭m |
 yena̭ to̱kasya̱ tana̭yasya sā̱tau ma̭ṃsī̱mahi̭ jigī̱vāṃsa̱stvotā̭: ||7||
ā no̭ bhara̱ vṛṣa̭ṇa̱ṃ śuṣma̭mindra dhana̱spṛta̭ṃ śūśu̱vāṃsa̭ṃ su̱dakṣa̭m |
yena̱ vaṃsā̭ma̱ pṛta̭nāsu̱ śatrū̱n tavo̱tibhi̭ru̱ta jā̱mī~rajā̭mīn ||8||
ā te̱ śuṣmo̭ vṛṣa̱bha ḙtu pa̱ścādotta̱rāda̭dha̱rādā pu̱rastā̭t |
ā vi̱śvato̭ a̱bhi samḙtva̱rvāṅindra̭ dyu̱mnaṃ sva̭rvaddhehya̱sme ||9||
nṛ̱vat ta̭ indra̱ nṛta̭mābhirū̱tī va̭ṃsī̱mahi̭ vā̱maṃ śroma̭tebhiḥ |
īkṣe̱ hi vasva̭ u̱bhaya̭sya rāja̱n dhā ratna̱ṃ mahi̭ sthū̱raṃ bṛ̱hanta̭m ||10||
ma̱rutva̭ntaṃ vṛṣa̱bhaṃ vā̭vṛdhā̱namaka̭vāriṃ di̱vyaṃ śā̱samindra̭m |
vi̱śvā̱sāha̱mava̭se̱ nūta̭nāyo̱graṃ sa̭ho̱dāmi̱ha taṃ hṷvema ||11||
jana̭ṃ vajri̱n mahi̭ ci̱nmanya̭māname̱bhyo nṛbhyo̭ randhayā̱ yeṣvasmi̭ |
adhā̱ hi tvā̭ pṛthi̱vyāṃ śūra̭sātau̱ havā̭mahe̱ tana̭ye̱ goṣva̱psu ||12||
va̱yaṃ ta̭ e̱bhiḥ pṷruhūta sa̱khyaiḥ śatro̭:śatro̱rutta̭ra̱ it syā̭ma |
ghnanto̭ vṛ̱trāṇyu̱bhayā̭ni śūra rā̱yā ma̭dema bṛha̱tā tvotā̭: ||13||
13 bārhaspatyo bharadvāja: | indra: |
triṣṭup , 7 virāṭ |
dyaurna ya i̭ndrā̱bhi bhūmā̱ryasta̱sthau ra̱yiḥ śava̭sā pṛ̱tsu janā̭n |
taṃ na̭: sa̱hasra̭bharamurvarā̱sāṃ da̱ddhi sṷ̄no sahaso vṛtra̱tura̭m ||1||
di̱vo na tubhya̱manvi̭ndra sa̱trā 'su̱rya̭ṃ de̱vebhi̭rdhāyi̱ viśva̭m |
ahi̱ṃ yad vṛtrama̱po va̭vri̱vāṃsa̱ṃ hannṛ̭jīṣi̱n viṣṇṷnā sacā̱naḥ ||2||
tūrva̱nnojī̭yān ta̱vasa̱stavī̭yān kṛ̱tabra̱hmendro̭ vṛ̱ddhama̭hāḥ |
rājā̭bhava̱nmadhṷnaḥ so̱myasya̱ viśvā̭sā̱ṃ yat pu̱rāṃ da̱rtnumāva̭t ||3||
śa̱taira̭padran pa̱ṇaya̭ i̱ndrātra̱ daśo̭ṇaye ka̱vaye̱'rkasā̭tau |
va̱dhaiḥ śuṣṇa̭syā̱śuṣa̭sya mā̱yāḥ pi̱tvo nāri̭recī̱t kiṃ ca̱na pra ||4||
ma̱ho dru̱ho apa̭ vi̱śvāyṷ dhāyi̱ vajra̭sya̱ yat pata̭ne̱ pādi̱ śuṣṇa̭: |
u̱ru ṣa sa̱ratha̱ṃ sāra̭thaye ka̱rindra̱: kutsā̭ya̱ sūrya̭sya sā̱tau ||5||
pra śye̱no na ma̭di̱rama̱ṃśuma̭smai̱ śiro̭ dā̱sasya̱ namṷcermathā̱yan |
prāva̱nnamī̭ṃ sā̱pyaṃ sa̱santa̭ṃ pṛ̱ṇagrā̱yā sami̱ṣā saṃ sva̱sti ||6||
vi pipro̱rahi̭māyasya dṛ̱ḻhāḥ puro̭ vajri̱ñchava̭sā̱ na da̭rdaḥ |
sudā̭ma̱n tad rekṇo̭ apramṛ̱ṣyamṛ̱jiśva̭ne dā̱traṃ dā̱śuṣḙ dāḥ ||7||
sa vḙta̱suṃ daśa̭māya̱ṃ daśo̭ṇi̱ṃ tūtṷji̱mindra̭: svabhi̱ṣṭisṷmnaḥ |
ā tugra̱ṃ śaśva̱dibha̱ṃ dyota̭nāya mā̱turna sī̱mupa̭ sṛjā i̱yadhyai̭ ||8||
sa ī̱ṃ spṛdho̭ vanate̱ apra̭tīto̱ bibhra̱d vajra̭ṃ vṛtra̱haṇa̱ṃ gabha̭stau |
tiṣṭha̱ddharī̱ adhyastḙva̱ gartḙ vaco̱yujā̭ vahata̱ indra̭mṛ̱ṣvam ||9||
sa̱nema̱ te'va̭sā̱ navya̭ indra̱ pra pū̱rava̭: stavanta e̱nā ya̱jñaiḥ |
sa̱pta yat pura̱: śarma̱ śāra̭dī̱rdarddhan dāsī̭: puru̱kutsā̭ya̱ śikṣa̭n ||10||
tvaṃ vṛ̱dha i̭ndra pū̱rvyo bhṷ̄rvariva̱syannu̱śanḙ kā̱vyāya̭ |
parā̱ nava̭vāstvamanu̱deya̭ṃ ma̱he pi̱tre da̭dātha̱ svaṃ napā̭tam ||11||
tvaṃ dhuni̭rindra̱ dhuni̭matīṝ̱ṇora̱paḥ sī̱rā na srava̭ntīḥ |
pra yatsa̭mu̱dramati̭ śūra̱ parṣi̭ pā̱rayā̭ tu̱rvaśa̱ṃ yadṷṃ sva̱sti ||12||
tava̭ ha̱ tyadi̭ndra̱ viśva̭mā̱jau sa̱sto dhunī̱cumṷrī̱ yā ha̱ siṣva̭p |
dī̱daya̱dit tubhya̱ṃ somḙbhiḥ su̱nvan dabhīti̭ri̱dhmabhṛ̭tiḥ pa̱kthya1rkaiḥ ||13||
12 bārhaspatyo bharadvāja: | indra:, 9 , 11 viśve
 devā: | triṣṭup |
i̱mā ṷ tvā puru̱tama̭sya kā̱rorhavya̭ṃ vīra̱ havyā̭ havante |
dhiyo̭ rathe̱ṣṭhāma̱jara̱ṃ navī̭yo ra̱yirvibhṷ̄tirīyate vaca̱syā ||1||
tamṷ stuṣa̱ indra̱ṃ yo vidā̭no̱ girvā̭hasaṃ gī̱rbhirya̱jñavṛ̭ddham |
yasya̱ diva̱mati̭ ma̱hnā pṛ̭thi̱vyāḥ pṷrumā̱yasya̭ riri̱ce ma̭hi̱tvam ||2||
sa it tamo̭'vayu̱naṃ ta̭ta̱nvat sūryḙṇa va̱yuna̭vaccakāra |
ka̱dā te̱ martā̭ a̱mṛta̭sya̱ dhāmeya̭kṣanto̱ na mi̭nanti svadhāvaḥ ||3||
yastā ca̱kāra̱ sa kuha̭ svi̱dindra̱: kamā jana̭ṃ carati̱ kāsṷ vi̱kṣu |
kastḙ ya̱jño mana̭se̱ śaṃ varā̭ya̱ ko a̱rka i̭ndra kata̱maḥ sa hotā̭ ||4||
i̱dā hi te̱ vevi̭ṣataḥ purā̱jāḥ pra̱tnāsa̭ ā̱suḥ pṷrukṛ̱t sakhā̭yaḥ |
ye ma̭dhya̱māsa̭ u̱ta nūta̭nāsa u̱tāva̱masya̭ puruhūta bodhi ||5||
taṃ pṛ̱cchanto'va̭rāsa̱: parā̭ṇi pra̱tnā ta̭ indra̱ śrutyānṷ yemuḥ |
arcā̭masi vīra brahmavāho̱ yāde̱va vi̱dma tāt tvā̭ ma̱hānta̭m ||6||
a̱bhi tvā̱ pājo̭ ra̱kṣaso̱ vi ta̭sthe̱ mahi̭ jajñā̱nama̱bhi tat su ti̭ṣṭha |
tava̭ pra̱tnena̱ yujyḙna̱ sakhyā̱ vajrḙṇa dhṛṣṇo̱ apa̱ tā nṷdasva ||7||
sa tu śrṷdhīndra̱ nūta̭nasya brahmaṇya̱to vī̭ra kārudhāyaḥ |
tvaṃ hyā̱3piḥ pra̱divi̭ pitṝ̱ṇāṃ śaśva̭d ba̱bhūtha̭ su̱hava̱ eṣṭaṷ ||8||
protaye̱ varṷṇaṃ mi̱tramindra̭ṃ ma̱ruta̭: kṛ̱ṣvāva̭se no a̱dya |
pra pū̱ṣaṇa̱ṃ viṣṇṷma̱gniṃ pura̭ṃdhiṃ savi̱tāra̱moṣa̭dhī̱: parva̭tā~śca ||9||
i̱ma ṷ tvā puruśāka prayajyo jari̱tāro̭ a̱bhya̭rcantya̱rkaiḥ |
śru̱dhī hava̱mā hṷva̱to hṷvā̱no na tvāvā̭~ a̱nyo a̭mṛta̱ tvada̭sti ||10||
nū ma̱ ā vāca̱mupa̭ yāhi vi̱dvān viśvḙbhiḥ sūno sahaso̱ yaja̭traiḥ |
ye a̭gniji̱hvā ṛ̭ta̱sāpa̭ ā̱surye manṷṃ ca̱krurupa̭ra̱ṃ dasā̭ya ||11||
sa no̭ bodhi purae̱tā su̱geṣū̱ta du̱rgeṣṷ pathi̱kṛd vidā̭naḥ |
ye aśra̭māsa u̱ravo̱ vahi̭ṣṭhā̱stebhi̭rna indrā̱bhi va̭kṣi̱ vāja̭m ||12||
11 bārhaspatyo bharadvāja: | indra: |triṣṭup |
ya eka̱ iddhavya̭ścarṣaṇī̱nāmindra̱ṃ taṃ gī̱rbhira̱bhya̭rca ā̱bhiḥ |
yaḥ patya̭te vṛṣa̱bho vṛṣṇyā̭vān tsa̱tyaḥ satvā̭ purumā̱yaḥ saha̭svān ||1||
tamṷ na̱: pūrvḙ pi̱taro̱ nava̭gvāḥ sa̱pta viprā̭so a̱bhi vā̱jaya̭ntaḥ |
na̱kṣa̱ddā̱bhaṃ tatṷriṃ parvate̱ṣṭhāmadro̭ghavācaṃ ma̱tibhi̱: śavi̭ṣṭham ||2||
tamī̭maha̱ indra̭masya rā̱yaḥ pṷru̱vīra̭sya nṛ̱vata̭: puru̱kṣoḥ |
yo askṛ̭dhoyura̱jara̱: sva̭rvā̱n tamā bha̭ra harivo māda̱yadhyai̭ ||3||
tanno̱ vi vo̭co̱ yadi̭ te pu̱rā ci̭jjari̱tāra̭ āna̱śuḥ su̱mnami̭ndra |
kastḙ bhā̱gaḥ kiṃ vayo̭ dudhra khidva̱: purṷhūta purūvaso'sura̱ghnaḥ ||4||
taṃ pṛ̱cchantī̱ vajra̭hastaṃ rathe̱ṣṭhāmindra̱ṃ vepī̱ vakva̭rī̱ yasya̱ nū gīḥ |
tu̱vi̱grā̱bhaṃ tṷvikū̱rmiṃ ra̭bho̱dāṃ gā̱tumi̭ṣe̱ nakṣa̭te̱ tumra̱maccha̭ ||5||
a̱yā ha̱ tyaṃ mā̱yayā̭ vāvṛdhā̱naṃ ma̭no̱juvā̭ svatava̱: parva̭tena |
acyṷtā cid vīḻi̱tā svo̭jo ru̱jo vi dṛ̱ḻhā dhṛ̭ṣa̱tā vi̭rapśin ||6||
taṃ vo̭ dhi̱yā navya̭syā̱ śavi̭ṣṭhaṃ pra̱tnaṃ pra̭tna̱vat pa̭ritaṃsa̱yadhyai̭ |
sa no̭ vakṣadanimā̱naḥ su̱vahmendro̱ viśvā̱nyati̭ du̱rgahā̭ṇi ||7||
ā janā̭ya̱ druhva̭ṇe̱ pārthi̭vāni di̱vyāni̭ dīpayo̱'ntari̭kṣā |
tapā̭ vṛṣan vi̱śvata̭: śo̱ciṣā̱ tān bra̭hma̱dviṣḙ śocaya̱ kṣāma̱paśca̭ ||8||
bhuvo̱ jana̭sya di̱vyasya̱ rājā̱ pārthi̭vasya̱ jaga̭tastveṣasaṃdṛk |
dhi̱ṣva vajra̱ṃ dakṣi̭ṇa indra̱ haste̱ viśvā̭ ajurya dayase̱ vi mā̱yāḥ ||9||
ā sa̱ṃyata̭mindra ṇaḥ sva̱stiṃ śa̭tru̱tūryā̭ya bṛha̱tīmamṛ̭dhrām |
yayā̱ dāsā̱nyāryā̭ṇi vṛ̱trā karo̭ vajrin su̱tukā̱ nāhṷṣāṇi ||10||
sa no̭ ni̱yudbhi̭: puruhūta vedho vi̱śvavā̭rābhi̱rā ga̭hi prayajyo |
na yā adḙvo̱ vara̭te̱ na de̱va ābhi̭ryāhi̱ tūya̱mā ma̭drya̱drik ||11||
10 bārhaspatyo bharadvāja: | indra: |triṣṭup |
su̱ta it tvaṃ nimi̭śla indra̱ some̱ stome̱ brahma̭ṇi śa̱syamā̭na u̱kthe |
yad vā̭ yu̱ktābhyā̭ṃ maghava̱n hari̭bhyā̱ṃ bibhra̱d vajra̭ṃ bā̱hvori̭ndra̱ yāsi̭ ||1||
yad vā̭ di̱vi pārye̱ suṣvi̭mindra vṛtra̱hatye'va̭si̱ śūra̭sātau |
yad vā̭ dakṣa̭sya bi̱bhyuṣo̱ abi̭bhya̱dara̭ndhaya̱: śardha̭ta indra̱ dasyṷ̄n ||2||
pātā̭ su̱tamindro̭ astu̱ soma̭ṃ praṇe̱nīru̱gro ja̭ri̱tāra̭mū̱tī |
kartā̭ vī̱rāya̱ suṣva̭ya u lo̱kaṃ dātā̱ vasṷ stuva̱te kī̱rayḙ cit ||3||
ganteyā̭nti̱ sava̭nā̱ hari̭bhyāṃ ba̱bhrirvajra̭ṃ pa̱piḥ soma̭ṃ da̱dirgāḥ |
kartā̭ vī̱raṃ narya̱ṃ sarva̭vīra̱ṃ śrotā̱ hava̭ṃ gṛṇa̱taḥ stoma̭vāhāḥ ||4||
asmai̭ va̱yaṃ yad vā̱vāna̱ tad vi̭viṣma̱ indrā̭ya̱ yo na̭: pra̱divo̱ apa̱skaḥ |
su̱te somḙ stu̱masi̱ śaṃsa̭du̱kthendrā̭ya̱ brahma̱ vardha̭na̱ṃ yathāsa̭t ||5||
brahmā̭ṇi̱ hi ca̭kṛ̱ṣe vardha̭nāni̱ tāva̭t ta indra ma̱tibhi̭rviviṣmaḥ |
su̱te somḙ sutapā̱: śaṃta̭māni̱ rāndyā̭ kriyāsma̱ vakṣa̭ṇāni ya̱jñaiḥ ||6||
sa no̭ bodhi puro̱ḻāśa̱ṃ rarā̭ṇa̱: pibā̱ tu soma̱ṃ goṛ̭jīkamindra |
edaṃ ba̱rhiryaja̭mānasya sīdo̱ruṃ kṛ̭dhi tvāya̱ta ṷ lo̱kam ||7||
sa ma̭ndasvā̱ hyanu̱ joṣa̭mugra̱ pra tvā̭ ya̱jñāsa̭ i̱me a̭śnuvantu |
preme havā̭saḥ puruhū̱tama̱sme ā tve̱yaṃ dhīrava̭sa indra yamyāḥ ||8||
taṃ va̭: sakhāya̱: saṃ yathā̭ su̱teṣu̱ somḙbhirīṃ pṛṇatā bho̱jamindra̭m |
ku̱vit tasmā̱ asa̭ti no̱ bharā̭ya̱ na suṣvi̱mindro'va̭se mṛdhāti ||9||
e̱vedindra̭: su̱te a̭stāvi̱ somḙ bha̱radvā̭jeṣu̱ kṣaya̱dinma̱ghona̭: |
asa̱d yathā̭ jari̱tra u̱ta sū̱ririndro̭ rā̱yo vi̱śvavā̭rasya dā̱tā ||10||
10 bārhaspatyo bharadvāja: | indra: |triṣṭup |
vṛṣā̱ mada̱ indre̱ śloka̭ u̱kthā sacā̱ somḙṣu suta̱pā ṛ̭jī̱ṣī |
a̱rca̱tryo̭ ma̱ghavā̱ nṛbhya̭ u̱kthairdyu̱kṣo rājā̭ gi̱rāmakṣi̭totiḥ ||1||
tatṷrirvī̱ro naryo̱ vicḙtā̱: śrotā̱ hava̭ṃ gṛṇa̱ta u̱rvyṷ̄tiḥ |
vasu̱: śaṃso̭ na̱rāṃ kā̱rudhā̭yā vā̱jī stu̱to vi̱dathḙ dāti̱ vāja̭m ||2||
akṣo̱ na ca̱kryo̭: śūra bṛ̱han pra tḙ ma̱hnā ri̭rice̱ roda̭syoḥ |
vṛ̱kṣasya̱ nu tḙ puruhūta va̱yā vyū̱3tayo̭ ruruhurindra pū̱rvīḥ ||3||
śacī̭vataste puruśāka̱ śākā̱ gavā̭miva sru̱taya̭: sa̱ṃcara̭ṇīḥ |
va̱tsānā̱ṃ na ta̱ntaya̭sta indra̱ dāma̭nvanto adā̱māna̭: sudāman ||4||
a̱nyada̱dya karva̭rama̱nyadu̱ śvo 'sa̭cca̱ sanmuhṷrāca̱kririndra̭: |
mi̱tro no̱ atra̱ varṷṇaśca pū̱ṣā 'ryo vaśa̭sya parye̱tāsti̭ ||5||
vi tvadāpo̱ na parva̭tasya pṛ̱ṣṭhādu̱kthebhi̭rindrānayanta ya̱jñaiḥ |
taṃ tvā̱bhiḥ sṷṣṭu̱tibhi̭rvā̱jaya̭nta ā̱jiṃ na ja̭gmurgirvāho̱ aśvā̭: ||6||
na yaṃ jara̭nti śa̱rado̱ na māsā̱ na dyāva̱ indra̭mavaka̱rśaya̭nti |
vṛ̱ddhasya̭ cid vardhatāmasya ta̱nūḥ stomḙbhiru̱kthaiśca̭ śa̱syamā̭nā ||7||
na vī̱ḻave̱ nama̭te̱ na sthi̱rāya̱ na śardha̭te̱ dasyṷjūtāya sta̱vān |
ajrā̱ indra̭sya gi̱raya̭ścidṛ̱ṣvā ga̭mbhī̱re ci̭d bhavati gā̱dhama̭smai ||8||
ga̱mbhī̱reṇa̭ na u̱ruṇā̭matri̱n preṣo ya̭ndhi sutapāva̱n vājā̭n |
sthā ū̱ ṣu ū̱rdhva ū̱tī ari̭ṣaṇyanna̱ktorvyṷṣṭau̱ pari̭takmyāyām ||9||
saca̭sva nā̱yamava̭se a̱bhīka̭ i̱to vā̱ tami̭ndra pāhi ri̱ṣaḥ |
a̱mā cai̭na̱mara̭ṇye pāhi ri̱ṣo madḙma śa̱tahi̭māḥ su̱vīrā̭: ||10||
9 bārhaspatyo bharadvāja: | indra: | triṣṭup |
yā ta̭ ū̱tira̭va̱mā yā pa̭ra̱mā yā ma̭dhya̱mendra̭ śuṣmi̱nnasti̭ |
tābhi̭rū̱ ṣu vṛ̭tra̱hatyḙ'vīrna e̱bhiśca̱ vājai̭rma̱hān na̭ ugra ||1||
ābhi̱: spṛdho̭ mitha̱tīrari̭ṣaṇyanna̱mitra̭sya vyathayā ma̱nyumi̭ndra |
ābhi̱rviśvā̭ abhi̱yujo̱ viṣṷ̄cī̱rāryā̭ya̱ viśo'va̭ tārī̱rdāsī̭: ||2||
indra̭ jā̱maya̭ u̱ta ye'jā̭mayo'rvācī̱nāso̭ va̱nuṣo̭ yuyu̱jre |
tvamḙṣāṃ vithu̱rā śavā̭ṃsi ja̱hi vṛṣṇyā̭ni kṛṇu̱hī parā̭caḥ ||3||
śūro̭ vā̱ śūra̭ṃ vanate̱ śarī̭raistanū̱rucā̱ tarṷṣi̱ yat kṛ̱ṇvaitḙ |
to̱ke vā̱ goṣu̱ tana̭ye̱ yada̱psu vi kranda̭sī u̱rvarā̭su̱ bravai̭te ||4||
na̱hi tvā̱ śūro̱ na tu̱ro na dhṛ̱ṣṇurna tvā̭ yo̱dho manya̭māno yu̱yodha̭ |
indra̱ naki̭ṣṭvā̱ pratya̭styeṣā̱ṃ viśvā̭ jā̱tānya̱bhya̭si̱ tāni̭ ||5||
sa pa̭tyata u̱bhayo̭rnṛ̱mṇama̱yoryadī̭ ve̱dhasa̭: sami̱the hava̭nte |
vṛ̱tre vā̭ ma̱ho nṛ̱vati̱ kṣayḙ vā̱ vyaca̭svantā̱ yadi̭ vitanta̱saitḙ ||6||
adha̭ smā te carṣa̱ṇayo̱ yadejā̱nindra̭ trā̱tota bha̭vā varū̱tā |
a̱smākā̭so̱ ye nṛta̭māso a̱rya indra̭ sū̱rayo̭ dadhi̱re pu̱ro na̭: ||7||
anṷ te dāyi ma̱ha i̭ndri̱yāya̭ sa̱trā te̱ viśva̱manṷ vṛtra̱hatyḙ |
anṷ kṣa̱tramanu̱ saho̭ yaja̱trendra̭ de̱vebhi̱ranṷ te nṛ̱ṣahyḙ ||8||
e̱vā na̱: spṛdha̱: sama̭jā sa̱matsvindra̭ rāra̱ndhi mi̭tha̱tīradḙvīḥ |
vi̱dyāma̱ vasto̱rava̭sā gṛ̱ṇanto̭ bha̱radvā̭jā u̱ta ta̭ indra nū̱nam ||9||
8 bārhaspatyo bharadvāja: | indra: | triṣṭup |
śru̱dhī na̭ indra̱ hvayā̭masi tvā ma̱ho vāja̭sya sā̱tau vā̭vṛṣā̱ṇāḥ |
saṃ yad viśo'ya̭nta̱ śūra̭sātā u̱graṃ no'va̱: pārye̱ aha̭n dā:||1||
tvāṃ vā̱jī ha̭vate vājine̱yo ma̱ho vāja̭sya̱ gadhya̭sya sā̱tau |
tvāṃ vṛ̱treṣvi̭ndra̱ satpa̭ti̱ṃ tarṷtra̱ṃ tvāṃ ca̭ṣṭe muṣṭi̱hā goṣu̱ yudhya̭n ||2||
tvaṃ ka̱viṃ co̭dayo̱'rkasā̭tau̱ tvaṃ kutsā̭ya̱ śuṣṇa̭ṃ dā̱śuṣḙ vark |
 tvaṃ śiro̭ ama̱rmaṇa̱: parā̭hannatithi̱gvāya̱ śaṃsya̭ṃ kari̱ṣyan ||3||
tvaṃ ratha̱ṃ pra bha̭ro yo̱dhamṛ̱ṣvamāvo̱ yudhya̭ntaṃ vṛṣa̱bhaṃ daśa̭dyum |
tvaṃ tugra̭ṃ veta̱save̱ sacā̭ha̱n tvaṃ tuji̭ṃ gṛ̱ṇanta̭mindra tūtoḥ ||4||
tvaṃ tadu̱kthami̭ndra ba̱rhaṇā̭ ka̱: pra yaccha̱tā sa̱hasrā̭ śūra̱ darṣi̭ |
ava̭ gi̱rerdāsa̱ṃ śamba̭raṃ ha̱nprāvo̱ divo̭dāsaṃ ci̱trābhi̭rū̱tī ||5||
tvaṃ śra̱ddhābhi̭rmandasā̱naḥ somai̭rda̱bhīta̭ye̱ cumṷrimindra siṣvap |
tvaṃ ra̱jiṃ piṭhī̭nase daśa̱syanṣa̱ṣṭiṃ sa̱hasrā̱ śacyā̱ sacā̭han ||6||
a̱haṃ ca̱na tatsū̱ribhi̭rānaśyā̱ṃ tava̱ jyāya̭ indra su̱mnamoja̭: |
tvayā̱ yatstava̭nte sadhavīra vī̱rāstri̱varṷ̄thena̱ nahṷṣā śaviṣṭha ||7||
va̱yaṃ tḙ a̱syāmi̭ndra dyu̱mnahṷ̄tau̱ sakhā̭yaḥ syāma mahina̱ preṣṭhā̭: |
prāta̭rdaniḥ kṣatra̱śrīra̭stu̱ śreṣṭho̭ gha̱ne vṛ̱trāṇā̭ṃ sa̱naye̱ dhanā̭nām ||8||
8 bārhaspatyo bharadvāja: | indra:, 8 abhyāvartī cāyamāna: [ dāna: ] | triṣṭup |
kima̭sya̱ made̱ kimva̭sya pī̱tāvindra̱: kima̭sya sa̱khye ca̭kāra |
raṇā̭ vā̱ ye ni̱ṣadi̱ kiṃ te a̭sya pu̱rā vi̭vidre̱ kimu̱ nūta̭nāsaḥ ||1||
sada̭sya̱ made̱ sadva̭sya pī̱tāvindra̱: sada̭sya sa̱khye ca̭kāra |
raṇā̭ vā̱ ye ni̱ṣadi̱ satte a̭sya pu̱rā vi̭vidre̱ sadu̱ nūta̭nāsaḥ ||2||
na̱hi nu tḙ mahi̱mana̭: samasya̱ na ma̭ghavanmaghava̱ttvasya̭ vi̱dma |
na rādha̭sorādhaso̱ nūta̭na̱syendra̱ naki̭rdadṛśa indri̱yaṃ tḙ ||3||
e̱tattyatta̭ indri̱yama̭ceti̱ yenāva̭dhīrva̱raśi̭khasya̱ śeṣa̭: |
vajra̭sya̱ yatte̱ niha̭tasya̱ śuṣmā̭tsva̱nācci̭dindra para̱mo da̱dāra̭ ||4||
vadhī̱dindro̭ va̱raśi̭khasya̱ śeṣo̭'bhyāva̱rtinḙ cāyamā̱nāya̱ śikṣa̭n |
vṛ̱cīva̭to̱ yaddha̭riyū̱pīyā̭yā̱ṃ hanpūrve̱ ardhḙ bhi̱yasāpa̭ro̱ dart ||5||
tri̱ṃśaccha̭taṃ va̱rmiṇa̭ indra sā̱kaṃ ya̱vyāva̭tyāṃ puruhūta śrava̱syā |
vṛ̱cīva̭nta̱: śara̭ve̱ patya̭mānā̱: pātrā̭ bhindā̱nā nya̱rthānyā̭yan ||6||
yasya̱ gāvā̭varu̱ṣā sṷ̄yava̱syū a̱ntarū̱ ṣu cara̭to̱ reri̭hāṇā |
sa sṛñja̭yāya tu̱rvaśa̱ṃ parā̭dādvṛ̱cīva̭to daivavā̱tāya̱ śikṣa̭n ||7||
dva̱yā~ a̭gne ra̱thino̭ viṃśa̱tiṃ gā va̱dhūma̭to ma̱ghavā̱ mahya̭ṃ sa̱mrāṭ |
a̱bhyā̱va̱rtī cā̭yamā̱no da̭dāti dū̱ṇāśe̱yaṃ dakṣi̭ṇā pārtha̱vānā̭m ||8||
8 bārhaspatyo bharadvāja: | gāva:; 2, 8  indro gāvo vā | triṣṭup , 2 – 4 jagatī, 8 anuṣṭup |
ā gāvo̭ agmannu̱ta bha̱drama̭kra̱ntsīda̭ntu go̱ṣṭhe ra̱ṇaya̭ntva̱sme |
pra̱jāva̭tīḥ puru̱rūpā̭ i̱ha syu̱rindrā̭ya pū̱rvīru̱ṣaso̱ duhā̭nāḥ ||1||
indro̱ yajva̭ne pṛṇa̱te ca̭ śikṣa̱tyupedda̭dāti̱ na svaṃ mṷṣāyati |
bhūyo̭bhūyo ra̱yimida̭sya va̱rdhaya̱nnabhi̭nne khi̱lye ni da̭dhāti deva̱yum ||2||
na tā na̭śanti̱ na da̭bhāti̱ taska̭ro̱ nāsā̭māmi̱tro vyathi̱rā da̭dharṣati |
de̱vā~śca̱ yābhi̱ryaja̭te̱ dadā̭ti ca̱ jyogittābhi̭: sacate̱ gopa̭tiḥ sa̱ha ||3||
na tā arvā̭ re̱ṇuka̭kāṭo aśnute̱ na sa̭ṃskṛta̱tramupa̭ yanti̱ tā a̱bhi |
u̱ru̱gā̱yamabha̭ya̱ṃ tasya̱ tā anu̱ gāvo̱ marta̭sya̱ vi ca̭ranti̱ yajva̭naḥ ||4||
gāvo̱ bhago̱ gāva̱ indro̭ me acchā̱ngāva̱: soma̭sya pratha̱masya̭ bha̱kṣaḥ |
i̱mā yā gāva̱: sa ja̭nāsa̱ indra̭ i̱cchāmīddhṛ̱dā mana̭sā ci̱dindra̭m ||5||
yū̱yaṃ gā̭vo medayathā kṛ̱śaṃ ci̭daśrī̱raṃ ci̭tkṛṇuthā su̱pratī̭kam |
bha̱draṃ gṛ̱haṃ kṛ̭ṇutha bhadravāco bṛ̱hadvo̱ vaya̭ ucyate sa̱bhāsṷ ||6||
pra̱jāva̭tīḥ sū̱yava̭saṃ ri̱śantī̭: śu̱ddhā a̱paḥ sṷprapā̱ṇe piba̭ntīḥ |
mā va̭: ste̱na ī̭śata̱ māghaśa̭ṃsa̱: pari̭ vo he̱tī ru̱drasya̭ vṛjyāḥ ||7||
upe̱damṷpa̱parca̭namā̱su goṣūpa̭ pṛcyatām | upa̭ ṛṣa̱bhasya̱ reta̱syupḙndra̱ tava̭ vī̱ryḙ ||8||
6 bārhaspatyo bharadvāja: | indra: | triṣṭup |
indra̭ṃ vo̱ nara̭: sa̱khyāya̭ sepurma̱ho yanta̭: suma̱tayḙ cakā̱nāḥ |
ma̱ho hi dā̱tā vajra̭hasto̱ asti̭ ma̱hāmṷ ra̱ṇvamava̭se yajadhvam ||1||
ā yasmi̱nhaste̱ naryā̭ mimi̱kṣurā rathḙ hira̱ṇyayḙ rathe̱ṣṭhāḥ |
ā ra̱śmayo̱ gabha̭styoḥ sthū̱rayo̱rādhva̱nnaśvā̭so̱ vṛṣa̭ṇo yujā̱nāḥ ||2||
śri̱ye te̱ pādā̱ duva̱ ā mi̭mikṣurdhṛ̱ṣṇurva̱jrī śava̭sā̱ dakṣi̭ṇāvān |
vasā̭no̱ atka̭ṃ sura̱bhiṃ dṛ̱śe kaṃ sva1rṇa nṛ̭taviṣi̱ro ba̭bhūtha ||3||
sa soma̱ āmi̭ślatamaḥ su̱to bhū̱dyasmi̭npa̱ktiḥ pa̱cyate̱ santi̭ dhā̱nāḥ |
indra̱ṃ nara̭: stu̱vanto̭ brahmakā̱rā u̱kthā śaṃsa̭nto de̱vavā̭tatamāḥ ||4||
na te̱ anta̱: śava̭so dhāyya̱sya vi tu bā̭badhe̱ roda̭sī mahi̱tvā |
ā tā sū̱riḥ pṛ̭ṇati̱ tūtṷjāno yū̱thevā̱psu sa̱mīja̭māna ū̱tī ||5||
e̱vedindra̭: su̱hava̭ ṛ̱ṣvo a̭stū̱tī anṷ̄tī hiriśi̱praḥ satvā̭ |
e̱vā hi jā̱to asa̭mātyojāḥ pu̱rū ca̭ vṛ̱trā ha̭nati̱ ni dasyṷ̄n ||6||
5 bārhaspatyo bharadvāja: | indra: | triṣṭup |
bhūya̱ idvā̭vṛdhe vī̱ryā̭ya̱~ eko̭ aju̱ryo da̭yate̱ vasṷ̄ni |
pra ri̭rice di̱va indra̭: pṛthi̱vyā a̱rdhamida̭sya̱ prati̱ roda̭sī u̱bhe ||1||
adhā̭ manye bṛ̱hada̭su̱rya̭masya̱ yāni̭ dā̱dhāra̱ naki̱rā mi̭nāti |
di̱vedi̭ve̱ sūryo̭ darśa̱to bhū̱dvi sadmā̭nyurvi̱yā su̱kratṷrdhāt ||2||
a̱dyā ci̱nnū ci̱ttadapo̭ na̱dīnā̱ṃ yadā̭bhyo̱ ara̭do gā̱tumi̭ndra |
ni parva̭tā adma̱sado̱ na sḙdu̱stvayā̭ dṛ̱ḻhāni̭ sukrato̱ rajā̭ṃsi ||3||
sa̱tyamittanna tvāvā̭~ a̱nyo a̱stīndra̭ de̱vo na martyo̱ jyāyā̭n |
aha̱nnahi̭ṃ pari̱śayā̭na̱marṇo'vā̭sṛjo a̱po acchā̭ samu̱dram ||4||
tvama̱po vi duro̱ viṣṷ̄cī̱rindra̭ dṛ̱ḻhama̭ruja̱: parva̭tasya |
rājā̭bhavo̱ jaga̭taścarṣaṇī̱nāṃ sā̱kaṃ sūrya̭ṃ ja̱naya̱ndyāmu̱ṣāsa̭m ||5||
5 suhotro bhāradvāja: |
indra: | triṣṭup ,4 śakvarī |
abhū̱reko̭ rayipate rayī̱ṇāmā hasta̭yoradhithā indra kṛ̱ṣṭīḥ |
vi to̱ke a̱psu tana̭ye ca̱ sūre'vo̭canta carṣa̱ṇayo̱ vivā̭caḥ ||1||
tvadbhi̱yendra̱ pārthi̭vāni̱ viśvācyṷtā ciccyāvayante̱ rajā̭ṃsi |
dyāvā̱kṣāmā̱ parva̭tāso̱ vanā̭ni̱ viśva̭ṃ dṛ̱ḻhaṃ bha̭yate̱ ajma̱nnā tḙ ||2||
tvaṃ kutsḙnā̱bhi śuṣṇa̭mindrā̱śuṣa̭ṃ yudhya̱ kuya̭va̱ṃ gavi̭ṣṭau |
daśa̭ prapi̱tve adha̱ sūrya̭sya muṣā̱yaśca̱kramavi̭ve̱ rapā̭ṃsi ||3||
tvaṃ śa̱tānyava̱ śamba̭rasya̱ puro̭ jaghanthāpra̱tīni̱ dasyo̭: |
aśi̭kṣo̱ yatra̱ śacyā̭ śacīvo̱ divo̭dāsāya sunva̱te sṷtakre bha̱radvā̭jāya gṛṇa̱te vasṷ̄ni ||4||
sa sa̭tyasatvanmaha̱te raṇā̭ya̱ ratha̱mā ti̭ṣṭha tuvinṛmṇa bhī̱mam |
yā̱hi pra̭pathi̱nnava̱sopa̭ ma̱drikpra ca̭ śruta śrāvaya carṣa̱ṇibhya̭: ||5||
5 suhotro bhāradvāja: | indra: | triṣṭup |
apṷ̄rvyā puru̱tamā̭nyasmai ma̱he vī̱rāya̭ ta̱vasḙ tu̱rāya̭ |
vi̱ra̱pśinḙ va̱jriṇe̱ śaṃta̭māni̱ vacā̭ṃsyā̱sā sthavi̭rāya takṣam ||1||
sa mā̱tarā̱ sūryḙṇā kavī̱nāmavā̭sayadru̱jadadri̭ṃ gṛṇā̱naḥ |
svā̱dhībhi̱ṝkva̭bhirvāvaśā̱na udu̱sriyā̭ṇāmasṛjanni̱dāna̭m ||2||
sa vahni̭bhi̱ṝkva̭bhi̱rgoṣu̱ śaśva̭nmi̱tajñṷbhiḥ puru̱kṛtvā̭ jigāya |
pura̭: puro̱hā sakhi̭bhiḥ sakhī̱yandṛ̱ḻhā rṷroja ka̱vibhi̭: ka̱viḥ san ||3||
sa nī̱vyā̭bhirjari̱tāra̱macchā̭ ma̱ho vājḙbhirma̱hadbhi̭śca̱ śuṣmai̭: |
pu̱ru̱vīrā̭bhirvṛṣabha kṣitī̱nāmā gi̭rvaṇaḥ suvi̱tāya̱ pra yā̭hi ||4||
sa sargḙṇa̱ śava̭sā ta̱kto atyai̭ra̱pa indro̭ dakṣiṇa̱tastṷrā̱ṣāṭ |
i̱tthā sṛ̭jā̱nā ana̭pāvṛ̱dartha̭ṃ di̱vedi̭ve viviṣurapramṛ̱ṣyam ||5||
5 śunahotro bhāradvāja: | indra: | triṣṭup |
ya oji̭ṣṭha indra̱ taṃ su no̭ dā̱ mado̭ vṛṣantsvabhi̱ṣṭirdāsvā̭n |
sauva̭śvya̱ṃ yo va̱nava̱tsvaśvo̭ vṛ̱trā sa̱matsṷ sā̱saha̭da̱mitrā̭n ||1||
tvāṃ hī̱3ndrāva̭se̱ vivā̭co̱ hava̭nte carṣa̱ṇaya̱: śūra̭sātau |
tvaṃ viprḙbhi̱rvi pa̱ṇī~ra̭śāya̱stvota̱ itsani̭tā̱ vāja̱marvā̭ ||2||
tvaṃ tā~ i̭ndro̱bhayā̭~ a̱mitrā̱ndāsā̭ vṛ̱trāṇyāryā̭ ca śūra |
vadhī̱rvanḙva̱ sudhi̭tebhi̱ratkai̱rā pṛ̱tsu da̭rṣi nṛ̱ṇāṃ nṛ̭tama ||3||
sa tvaṃ na̭ i̱ndrāka̭vābhirū̱tī sakhā̭ vi̱śvāyṷravi̱tā vṛ̱dhe bhṷ̄: |
sva̭rṣātā̱ yaddhvayā̭masi tvā̱ yudhya̭nto ne̱madhi̭tā pṛ̱tsu śṷ̄ra ||4||
nū̱naṃ na̭ indrāpa̱rāya̭ ca syā̱ bhavā̭ mṛḻī̱ka u̱ta no̭ a̱bhiṣṭaṷ |
i̱tthā gṛ̱ṇanto̭ ma̱hina̭sya̱ śarma̭ndi̱vi ṣyā̭ma̱ pāryḙ go̱ṣata̭māḥ ||5||
5 śunahotro bhāradvāja: | indra: | triṣṭup |
saṃ ca̱ tve ja̱gmurgira̭ indra pū̱rvīrvi ca̱ tvadya̭nti vi̱bhvo̭ manī̱ṣāḥ |
pu̱rā nū̱naṃ ca̭ stu̱taya̱ ṛṣī̭ṇāṃ paspṛ̱dhra indre̱ adhyṷkthā̱rkā ||1||
pu̱ru̱hū̱to yaḥ pṷrugū̱rta ṛbhvā̱~ eka̭: purupraśa̱sto asti̭ ya̱jñaiḥ |
ratho̱ na ma̱he śava̭se yujā̱no̱3'smābhi̱rindro̭ anu̱mādyo̭ bhūt ||2||
na yaṃ hiṃsa̭nti dhī̱tayo̱ na vāṇī̱rindra̱ṃ nakṣa̱ntīda̱bhi va̱rdhaya̭ntīḥ |
yadi̭ sto̱tāra̭: śa̱taṃ yatsa̱hasra̭ṃ gṛ̱ṇanti̱ girva̭ṇasa̱ṃ śaṃ tada̭smai ||3||
asmā̭ e̱taddi̱vya1rceva̭ mā̱sā mi̭mi̱kṣa indre̱ nya̭yāmi̱ soma̭: |
jana̱ṃ na dhanva̭nna̱bhi saṃ yadāpa̭: sa̱trā vā̭vṛdhu̱rhava̭nāni ya̱jñaiḥ ||4||
asmā̭ e̱tanmahyā̭ṅgū̱ṣama̭smā̱ indrā̭ya sto̱traṃ ma̱tibhi̭ravāci |
asa̱dyathā̭ maha̱ti vṛ̭tra̱tūrya̱ indro̭ vi̱śvāyṷravi̱tā vṛ̱dhaśca̭ ||5||
5 naro bhāradvāja:| indra: | triṣṭup |
ka̱dā bhṷva̱nratha̭kṣayāṇi̱ brahma̭ ka̱dā sto̱tre sa̭hasrapo̱ṣya̭ṃ dāḥ |
ka̱dā stoma̭ṃ vāsayo'sya rā̱yā ka̱dā dhiya̭: karasi̱ vāja̭ratnāḥ ||1||
karhi̭ svi̱ttadi̭ndra̱ yannṛbhi̱rnṝnvī̱rairvī̱rānnī̱ḻayā̭se̱ jayā̱jīn |
tri̱dhātu̱ gā adhi̭ jayāsi̱ goṣvindra̭ dyu̱mnaṃ sva̭rvaddhehya̱sme ||2||
karhi̭ svi̱ttadi̭ndra̱ yajja̭ri̱tre vi̱śvapsu̱ brahma̭ kṛ̱ṇava̭: śaviṣṭha |
ka̱dā dhiyo̱ na ni̱yuto̭ yuvāse ka̱dā goma̭ghā̱ hava̭nāni gacchāḥ ||3||
sa goma̭ghā jari̱tre aśva̭ścandrā̱ vāja̭śravaso̱ adhi̭ dhehi̱ pṛkṣa̭: |
pī̱pi̱hīṣa̭: su̱dughā̭mindra dhe̱nuṃ bha̱radvā̭jeṣu su̱ruco̭ rurucyāḥ ||4||
tamā nū̱naṃ vṛ̱jana̭ma̱nyathā̭ ci̱cchūro̱ yaccha̭kra̱ vi duro̭ gṛṇī̱ṣe |
mā nira̭raṃ śukra̱dugha̭sya dhe̱norā̭ṅgira̱sānbrahma̭ṇā vipra jinva ||5||
5 naro bhāradvāja: | indra: | triṣṭup |
sa̱trā madā̭sa̱stava̭ vi̱śvaja̭nyāḥ sa̱trā rāyo'dha̱ ye pārthi̭vāsaḥ |
sa̱trā vājā̭nāmabhavo vibha̱ktā yadde̱veṣṷ dhā̱raya̭thā asu̱rya̭m ||1||
anu̱ pra yḙje̱ jana̱ ojo̭ asya sa̱trā da̭dhire̱ anṷ vī̱ryā̭ya |
syū̱ma̱gṛbhe̱ dudha̱ye'rva̭te ca̱ kratṷṃ vṛñja̱ntyapi̭ vṛtra̱hatyḙ ||2||
taṃ sa̱dhrīcī̭rū̱tayo̱ vṛṣṇyā̭ni̱ pauṃsyā̭ni ni̱yuta̭: saścu̱rindra̭m |
sa̱mu̱draṃ na sindha̭va u̱kthaśṷṣmā uru̱vyaca̭sa̱ṃ gira̱ ā vi̭śanti ||3||
sa rā̱yaskhāmupa̭ sṛjā gṛṇā̱naḥ pṷruśca̱ndrasya̱ tvami̭ndra̱ vasva̭: |
pati̭rbabhū̱thāsa̭mo̱ janā̭nā̱meko̱ viśva̭sya̱ bhuva̭nasya̱ rājā̭ ||4||
sa tu śrṷdhi̱ śrutyā̱ yo dṷvo̱yurdyaurna bhūmā̱bhi rāyo̭ a̱ryaḥ |
aso̱ yathā̭ na̱: śava̭sā cakā̱no yu̱geyṷge̱ vaya̭sā̱ ceki̭tānaḥ ||5||
5 bārhaspatyo bharadvāja: | indra: | triṣṭup |
a̱rvāgratha̭ṃ vi̱śvavā̭raṃ ta u̱grendra̭ yu̱ktāso̱ hara̭yo vahantu |
kī̱riści̱ddhi tvā̱ hava̭te̱ sva̭rvānṛdhī̱mahi̭ sadha̱māda̭ste a̱dya ||1||
pro droṇe̱ hara̭ya̱: karmā̭gmanpunā̱nāsa̱ ṛjya̭nto abhūvan |
indro̭ no a̱sya pū̱rvyaḥ pa̭pīyāddyu̱kṣo mada̭sya so̱myasya̱ rājā̭ ||2||
ā̱sa̱srā̱ṇāsa̭: śavasā̱namacchendra̭ṃ suca̱kre ra̱thyā̭so̱ aśvā̭: |
a̱bhi śrava̱ ṛjya̭nto vaheyu̱rnū ci̱nnu vā̱yora̱mṛta̱ṃ vi da̭syet ||3||
vari̭ṣṭho asya̱ dakṣi̭ṇāmiya̱rtīndro̭ ma̱ghonā̭ṃ tuvikū̱rmita̭maḥ |
yayā̭ vajrivaḥ pari̱yāsyaṃho̭ ma̱ghā ca̭ dhṛṣṇo̱ daya̭se̱ vi sū̱rīn ||4||
indro̱ vāja̭sya̱ sthavi̭rasya dā̱tendro̭ gī̱rbhirva̭rdhatāṃ vṛ̱ddhama̭hāḥ |
indro̭ vṛ̱traṃ hani̭ṣṭho astu̱ satvā ''tā sū̱riḥ pṛ̭ṇati̱ tūtṷjānaḥ ||5||
5 bārhaspatyo bharadvāja: | indra: | triṣṭup  |
apā̭di̱ta udṷ naści̱trata̭mo ma̱hīṃ bha̭rṣaddyu̱matī̱mindra̭hūtim |
panya̭sīṃ dhī̱tiṃ daivya̭sya̱ yāma̱ñjana̭sya rā̱tiṃ va̭nate su̱dānṷ: ||1||
dū̱rācci̱dā va̭sato asya̱ karṇā̱ ghoṣā̱dindra̭sya tanyati bruvā̱ṇaḥ |
eyamḙnaṃ de̱vahṷ̄tirvavṛtyānma̱drya1gindra̭mi̱yamṛ̱cyamā̭nā ||2||
taṃ vo̭ dhi̱yā pa̭ra̱mayā̭ purā̱jāma̱jara̱mindra̭ma̱bhya̭nūṣya̱rkaiḥ |
brahmā̭ ca̱ giro̭ dadhi̱re sama̭sminma̱hā~śca̱ stomo̱ adhi̭ vardha̱dindrḙ ||3||
vardhā̱dyaṃ ya̱jña u̱ta soma̱ indra̱ṃ vardhā̱dbrahma̱ gira̭ u̱kthā ca̱ manma̭ |
vardhāhai̭namu̱ṣaso̱ yāma̭nna̱ktorvardhā̱nmāsā̭: śa̱rado̱ dyāva̱ indra̭m ||4||
e̱vā ja̭jñā̱naṃ saha̭se̱ asā̭mi vāvṛdhā̱naṃ rādha̭se ca śru̱tāya̭ |
ma̱hāmu̱gramava̭se vipra nū̱namā vi̭vāsema vṛtra̱tūryḙṣu ||5||
5 bārhaspatyo bharadvāja: | indra: | triṣṭup |
ma̱ndrasya̭ ka̱verdi̱vyasya̱ vahne̱rvipra̭manmano vaca̱nasya̱ madhva̭: |
apā̭ na̱stasya̭ saca̱nasya̭ de̱veṣo̭ yuvasva gṛṇa̱te goa̭grāḥ ||1||
a̱yamṷśā̱naḥ paryadri̭mu̱srā ṛ̱tadhī̭tibhiṝta̱yugyṷjā̱naḥ |
ru̱jadarṷgṇa̱ṃ vi va̱lasya̱ sānṷṃ pa̱ṇī~rvaco̭bhira̱bhi yo̭dha̱dindra̭: ||2||
a̱yaṃ dyo̭tayada̱dyuto̱ vya1ktūndo̱ṣā vasto̭: śa̱rada̱ indṷrindra |
i̱maṃ ke̱tuma̭dadhu̱rnū ci̱dahnā̱ṃ śuci̭janmana u̱ṣasa̭ścakāra ||3||
a̱yaṃ ro̭cayada̱ruco̭ rucā̱no̱3'yaṃ vā̭saya̱dvyṛ1tena̭ pū̱rvīḥ |
a̱yamī̭yata ṛta̱yugbhi̱raśvai̭: sva̱rvidā̱ nābhi̭nā carṣaṇi̱prāḥ ||4||
nū gṛ̭ṇā̱no gṛ̭ṇa̱te pra̭tna rāja̱nniṣa̭: pinva vasu̱deyā̭ya pū̱rvīḥ |
a̱pa oṣa̭dhīravi̱ṣā vanā̭ni̱ gā arva̭to̱ nṝnṛ̱casḙ rirīhi ||5||
5 bārhaspatyo bharadvāja: | indra: | triṣṭup |
indra̱ piba̱ tubhya̭ṃ su̱to madā̱yā'va̭ sya̱ harī̱ vi mṷcā̱ sakhā̭yā |
u̱ta pra gā̭ya ga̱ṇa ā ni̱ṣadyā'thā̭ ya̱jñāya̭ gṛṇa̱te vayo̭ dhāḥ ||1||
asya̭ piba̱ yasya̭ jajñā̱na i̭ndra̱ madā̭ya̱ kratve̱ api̭bo virapśin |
tamṷ te̱ gāvo̱ nara̱ āpo̱ adri̱rindu̱ṃ sama̭hyanpī̱taye̱ sama̭smai ||2||
sami̭ddhe a̱gnau su̱ta i̭ndra̱ soma̱ ā tvā̭ vahantu̱ hara̭yo̱ vahi̭ṣṭhāḥ |
tvā̱ya̱tā mana̭sā johavī̱mīndrā yā̭hi suvi̱tāya̭ ma̱he na̭: ||3||
ā yā̭hi̱ śaśva̭duśa̱tā ya̭yā̱thendra̭ ma̱hā mana̭sā soma̱peya̭m |
upa̱ brahmā̭ṇi śṛṇava i̱mā no'thā̭ te ya̱jñasta̱nve̱3 vayo̭ dhāt ||4||
yadi̭ndra di̱vi pārye̱ yadṛdha̱gyadvā̱ sve sada̭ne̱ yatra̱ vāsi̭ |
ato̭ no ya̱jñamava̭se ni̱yutvā̭ntsa̱joṣā̭: pāhi girvaṇo ma̱rudbhi̭: ||5||
5 bārhaspatyo bharadvāja: | indra: | triṣṭup |
ahḙḻamāna̱ upa̭ yāhi ya̱jñaṃ tubhya̭ṃ pavanta̱ inda̭vaḥ su̱tāsa̭: |
gāvo̱ na va̭jri̱ntsvamoko̱ acchendrā ga̭hi pratha̱mo ya̱jñiyā̭nām ||1||
yā tḙ kā̱kutsukṛ̭tā̱ yā vari̭ṣṭhā̱ yayā̱ śaśva̱tpiba̭si̱ madhva̭ ū̱rmim |
tayā̭ pāhi̱ pra tḙ adhva̱ryura̭sthā̱tsaṃ te̱ vajro̭ vartatāmindra ga̱vyuḥ ||2||
e̱ṣa dra̱pso vṛ̭ṣa̱bho vi̱śvarṷ̄pa̱ indrā̭ya̱ vṛṣṇe̱ sama̭kāri̱ soma̭: |
e̱taṃ pi̭ba harivaḥ sthātarugra̱ yasyeśi̭ṣe pra̱divi̱ yaste̱ anna̭m ||3||
su̱taḥ somo̱ asṷtādindra̱ vasyā̭na̱yaṃ śreyā̭ñciki̱tuṣe̱ raṇā̭ya |
e̱taṃ ti̭tirva̱ upa̭ yāhi ya̱jñaṃ tena̱ viśvā̱stavi̭ṣī̱rā pṛ̭ṇasva ||4||
hvayā̭masi̱ tvendra̭ yāhya̱rvāṅara̭ṃ te̱ soma̭sta̱nvḙ bhavāti |
śata̭krato mā̱daya̭svā su̱teṣu̱ prāsmā~ a̭va̱ pṛta̭nāsu̱ pra vi̱kṣu ||5||
4 bārhaspatyo bharadvāja: | indra: | anuṣṭup, 4 bṛhatī |
pratya̭smai̱ pipī̭ṣate̱ viśvā̭ni vi̱duṣḙ bhara | a̱ra̱ṃga̱māya̱ jagma̱ye'pa̭ścāddaghvane̱ narḙ ||1||
emḙnaṃ pra̱tyeta̭na̱ somḙbhiḥ soma̱pāta̭mam | ama̭trebhirṝjī̱ṣiṇa̱mindra̭ṃ su̱tebhi̱rindṷbhiḥ ||2||
yadī̭ su̱tebhi̱rindṷbhi̱: somḙbhiḥ prati̱bhūṣa̭tha | vedā̱ viśva̭sya̱ medhi̭ro dhṛ̱ṣattaṃta̱mideṣa̭te ||3||
a̱smāa̭smā̱ idandha̱so'dhva̭ryo̱ pra bha̭rā su̱tam | ku̱vitsa̭masya̱ jenya̭sya̱ śardha̭to̱'bhiśa̭sterava̱spara̭t ||4||
4 bārhaspatyo bharadvāja: | indra: |uṣṇik |
yasya̱ tyacchamba̭ra̱ṃ made̱ divo̭dāsāya ra̱ndhaya̭: | a̱yaṃ sa soma̭ indra te su̱taḥ piba̭ ||1||
yasya̭ tīvra̱suta̱ṃ mada̱ṃ madhya̱manta̭ṃ ca̱ rakṣa̭se | a̱yaṃ sa soma̭ indra te su̱taḥ piba̭ ||2||
yasya̱ gā a̱ntaraśma̭no̱ madḙ dṛ̱ḻhā a̱vāsṛ̭jaḥ | a̱yaṃ sa soma̭ indra te su̱taḥ piba̭ ||3||
yasya̭ mandā̱no andha̭so̱ māgho̭naṃ dadhi̱ṣe śava̭: | a̱yaṃ sa soma̭ indra te su̱taḥ piba̭ ||4||
24 śaṃyurbārhaspatya:|
 indra: | triṣṭup ,1- 6 anuṣṭup , 7- 9 [ 8 vā ] virāṭ |
yo ra̭yivo ra̱yiṃta̭mo̱ yo dyu̱mnairdyu̱mnava̭ttamaḥ | soma̭: su̱taḥ sa i̭ndra̱ te'sti̭ svadhāpate̱ mada̭: ||1||
yaḥ śa̱gmastṷviśagma te rā̱yo dā̱mā ma̭tī̱nām | soma̭: su̱taḥ sa i̭ndra̱ te'sti̭ svadhāpate̱ mada̭: ||2||
yena̭ vṛ̱ddho na śava̭sā tu̱ro na svābhi̭rū̱tibhi̭: | soma̭: su̱taḥ sa i̭ndra̱ te'sti̭ svadhāpate̱ mada̭: ||3||
tyamṷ vo̱ apra̭haṇaṃ gṛṇī̱ṣe śava̭sa̱spati̭m | indra̭ṃ viśvā̱sāha̱ṃ nara̱ṃ maṃhi̭ṣṭhaṃ vi̱śvaca̭rṣaṇim ||4||
yaṃ va̱rdhaya̱ntīdgira̱: pati̭ṃ tu̱rasya̱ rādha̭saḥ | taminnva̭sya̱ roda̭sī de̱vī śuṣma̭ṃ saparyataḥ ||5||
tadva̭ u̱kthasya̭ ba̱rhaṇendrā̭yopastṛṇī̱ṣaṇi̭ | vipo̱ na yasyo̱tayo̱ vi yadroha̭nti sa̱kṣita̭: ||6||
avi̭da̱ddakṣa̭ṃ mi̱tro navī̭yānpapā̱no de̱vebhyo̱ vasyo̭ acait |
sa̱sa̱vāntstau̱lābhi̭rdhau̱tarī̭bhiruru̱ṣyā pā̱yura̭bhava̱tsakhi̭bhyaḥ ||7||
ṛ̱tasya̭ pa̱thi ve̱dhā a̭pāyi śri̱ye manā̭ṃsi de̱vāso̭ akran |
dadhā̭no̱ nāma̭ ma̱ho vaco̭bhi̱rvapṷrdṛ̱śayḙ ve̱nyo vyā̭vaḥ ||8||
dyu̱matta̭ma̱ṃ dakṣa̭ṃ dhehya̱sme sedhā̱ janā̭nāṃ pū̱rvīrarā̭tīḥ |
 varṣī̭yo̱ vaya̭: kṛṇuhi̱ śacī̭bhi̱rdhana̭sya sā̱tāva̱smā~ a̭viḍḍhi ||9||
indra̱ tubhya̱minma̭ghavannabhūma va̱yaṃ dā̱tre ha̭rivo̱ mā vi vḙnaḥ |
naki̭rā̱pirda̭dṛśe martya̱trā kima̱ṅga ra̭dhra̱coda̭naṃ tvāhuḥ ||10||
mā jasva̭ne vṛṣabha no rarīthā̱ mā tḙ re̱vata̭: sa̱khye ri̭ṣāma |
pū̱rvīṣṭa̭ indra ni̱ṣṣidho̱ janḙṣu ja̱hyasṷṣvī̱npra vṛ̱hāpṛ̭ṇataḥ ||11||
uda̱bhrāṇī̭va sta̱naya̭nniya̱rtīndro̱ rādhā̱ṃsyaśvyā̭ni̱ gavyā̭ |
tvama̭si pra̱diva̭: kā̱rudhā̭yā̱ mā tvā̭dā̱māna̱ ā da̭bhanma̱ghona̭: ||12||
adhva̭ryo vīra̱ pra ma̱he su̱tānā̱mindrā̭ya bhara̱ sa hya̭sya̱ rājā̭ |
yaḥ pū̱rvyābhi̭ru̱ta nūta̭nābhirgī̱rbhirvā̭vṛ̱dhe gṛ̭ṇa̱tāmṛṣī̭ṇām ||13||
a̱sya madḙ pu̱ru varpā̭ṃsi vi̱dvānindro̭ vṛ̱trāṇya̭pra̱tī ja̭ghāna |
tamu̱ pra ho̭ṣi̱ madhṷmantamasmai̱ soma̭ṃ vī̱rāya̭ śi̱priṇe̱ piba̭dhyai ||14||
pātā̭ su̱tamindro̭ astu̱ soma̱ṃ hantā̭ vṛ̱traṃ vajrḙṇa mandasā̱naḥ |
gantā̭ ya̱jñaṃ pa̭rā̱vata̭ści̱dacchā̱ vasṷrdhī̱nāma̭vi̱tā kā̱rudhā̭yāḥ ||15||
i̱daṃ tyatpātra̭mindra̱pāna̱mindra̭sya pri̱yama̱mṛta̭mapāyi |
matsa̱dyathā̭ saumana̱sāya̭ de̱vaṃ vya1smaddveṣo̭ yu̱yava̱dvyaṃha̭: ||16||
e̱nā ma̭ndā̱no ja̱hi śṷ̄ra̱ śatrṷ̄ñjā̱mimajā̭miṃ maghavanna̱mitrā̭n |
a̱bhi̱ṣe̱ṇā~ a̱bhyā̱3dedi̭śānā̱nparā̭ca indra̱ pra mṛ̭ṇā ja̱hī ca̭ ||17||
ā̱su ṣmā̭ ṇo maghavannindra pṛ̱tsva1smabhya̱ṃ mahi̱ vari̭vaḥ su̱gaṃ ka̭: |
a̱pāṃ to̱kasya̱ tana̭yasya je̱ṣa indra̭ sū̱rīnkṛ̭ṇu̱hi smā̭ no a̱rdham ||18||
ā tvā̱ hara̭yo̱ vṛṣa̭ṇo yujā̱nā vṛṣa̭rathāso̱ vṛṣa̭raśma̱yo'tyā̭: |
a̱sma̱trāñco̱ vṛṣa̭ṇo vajra̱vāho̱ vṛṣṇe̱ madā̭ya su̱yujo̭ vahantu ||19||
ā tḙ vṛṣa̱nvṛṣa̭ṇo̱ droṇa̭masthurghṛta̱pruṣo̱ normayo̱ mada̭ntaḥ |
indra̱ pra tubhya̱ṃ vṛṣa̭bhiḥ su̱tānā̱ṃ vṛṣṇḙ bharanti vṛṣa̱bhāya̱ soma̭m ||20||
vṛṣā̭si di̱vo vṛ̭ṣa̱bhaḥ pṛ̭thi̱vyā vṛṣā̱ sindhṷ̄nāṃ vṛṣa̱bhaḥ stiyā̭nām |
vṛṣṇḙ ta̱ indṷrvṛṣabha pīpāya svā̱dū raso̭ madhu̱peyo̱ varā̭ya ||21||
a̱yaṃ de̱vaḥ saha̭sā̱ jāya̭māna̱ indrḙṇa yu̱jā pa̱ṇima̭stabhāyat |
a̱yaṃ svasya̭ pi̱turāyṷdhā̱nīndṷramuṣṇā̱daśi̭vasya mā̱yāḥ ||22||
a̱yama̭kṛṇodu̱ṣasa̭: su̱patnī̭ra̱yaṃ sūryḙ adadhā̱jjyoti̭ra̱ntaḥ |
a̱yaṃ tri̱dhātṷ di̱vi ro̭ca̱neṣa̭̱ tri̱teṣṷ vindada̱mṛta̱ṃ nigṷ̄ḻham ||23||
a̱yaṃ dyāvā̭pṛthi̱vī vi ṣka̭bhāyada̱yaṃ ratha̭mayunaksa̱ptara̭śmim |
a̱yaṃ goṣu̱ śacyā̭ pa̱kvama̱ntaḥ somo̭ dādhāra̱ daśa̭yantra̱mutsa̭m ||24||
33 śaṃyurbārhaspatya:| indra:, 31-33 bṛbustakṣā | gāyatrī, 29 atinicṛta, 31 pādanicṛta, 33 anuṣṭup |
ya āna̭yatparā̱vata̱: sunī̭tī tu̱rvaśa̱ṃ yadṷm | indra̱: sa no̱ yuvā̱ sakhā̭ ||1||
a̱vi̱pre ci̱dvayo̱ dadha̭danā̱śunā̭ ci̱darva̭tā | indro̱ jetā̭ hi̱taṃ dhana̭m ||2||
ma̱hīra̭sya̱ praṇī̭tayaḥ pū̱rvīru̱ta praśa̭stayaḥ | nāsya̭ kṣīyanta ū̱taya̭: ||3||
sakhā̭yo̱ brahma̭vāha̱se'rca̭ta̱ pra ca̭ gāyata | sa hi na̱: prama̭tirma̱hī ||4||
tvameka̭sya vṛtrahannavi̱tā dvayo̭rasi | u̱tedṛśe̱ yathā̭ va̱yam ||5||
naya̱sīdvati̱ dviṣa̭: kṛ̱ṇoṣyṷkthaśa̱ṃsina̭: | nṛbhi̭: su̱vīra̭ ucyase ||6||
bra̱hmāṇa̱ṃ brahma̭vāhasaṃ gī̱rbhiḥ sakhā̭yamṛ̱gmiya̭m | gāṃ na do̱hasḙ huve ||7||
yasya̱ viśvā̭ni̱ hasta̭yorū̱curvasṷ̄ni̱ ni dvi̱tā | vī̱rasya̭ pṛtanā̱ṣaha̭: ||8||
vi dṛ̱ḻhāni̭ cidadrivo̱ janā̭nāṃ śacīpate | vṛ̱ha mā̱yā a̭nānata ||9||
tamṷ tvā satya somapā̱ indra̭ vājānāṃ pate | ahṷ̄mahi śrava̱syava̭: ||10||
tamṷ tvā̱ yaḥ pu̱rāsi̭tha̱ yo vā̭ nū̱naṃ hi̱te dhanḙ | havya̱: sa śrṷdhī̱ hava̭m ||11||
dhī̱bhirarva̭dbhi̱rarva̭to̱ vājā̭~ indra śra̱vāyyā̭n | tvayā̭ jeṣma hi̱taṃ dhana̭m ||12||
abhṷ̄ru vīra girvaṇo ma̱hā~ i̭ndra̱ dhanḙ hi̱te | bharḙ vitanta̱sāyya̭: ||13||
yā ta̭ ū̱tira̭mitrahanma̱kṣūja̭vasta̱māsa̭ti | tayā̭ no hinuhī̱ ratha̭m ||14||
sa rathḙna ra̱thīta̭mo̱'smākḙnābhi̱yugva̭nā | jeṣi̭ jiṣṇo hi̱taṃ dhana̭m ||15||
ya eka̱ ittamṷ ṣṭuhi kṛṣṭī̱nāṃ vica̭rṣaṇiḥ | pati̭rja̱jñe vṛṣa̭kratuḥ ||16||
yo gṛ̭ṇa̱tāmidāsi̭thā̱''pirū̱tī śi̱vaḥ sakhā̭ | sa tvaṃ na̭ indra mṛḻaya ||17||
dhi̱ṣva vajra̱ṃ gabha̭styo rakṣo̱hatyā̭ya vajrivaḥ | sā̱sa̱hī̱ṣṭhā a̱bhi spṛdha̭: ||18||
pra̱tnaṃ ra̭yī̱ṇāṃ yuja̱ṃ sakhā̭yaṃ kīri̱coda̭nam | brahma̭vāhastamaṃ huve ||19||
sa hi viśvā̭ni̱ pārthi̭vā̱~ eko̱ vasṷ̄ni̱ patya̭te | girva̭ṇastamo̱ adhri̭guḥ ||20||
sa no̭ ni̱yudbhi̱rā pṛ̭ṇa̱ kāma̱ṃ vājḙbhira̱śvibhi̭: | goma̭dbhirgopate dhṛ̱ṣat ||21||
tadvo̭ gāya su̱te sacā̭ puruhū̱tāya̱ satva̭ne | śaṃ yadgave̱ na śā̱kinḙ ||22||
na ghā̱ vasu̱rni ya̭mate dā̱naṃ vāja̭sya̱ goma̭taḥ | yatsī̱mupa̱ śrava̱dgira̭: ||23||
ku̱vitsa̭sya̱ pra hi vra̱jaṃ goma̭ntaṃ dasyu̱hā gama̭t | śacī̭bhi̱rapa̭ no varat ||24||
i̱mā ṷ tvā śatakrato̱'bhi pra ṇo̭nuvu̱rgira̭: | indra̭ va̱tsaṃ na mā̱tara̭: ||25||
dū̱ṇāśa̭ṃ sa̱khyaṃ tava̱ gaura̭si vīra gavya̱te | aśvo̭ aśvāya̱te bha̭va ||26||
sa ma̭ndasvā̱ hyandha̭so̱ rādha̭se ta̱nvā̭ ma̱he | na sto̱tāra̭ṃ ni̱de ka̭raḥ ||27||
i̱mā ṷ tvā su̱tesṷte̱ nakṣa̭nte girvaṇo̱ gira̭: | va̱tsaṃ gāvo̱ na dhe̱nava̭: ||28||
pu̱rū̱tama̭ṃ purū̱ṇāṃ sto̭tṝ̱ṇāṃ vivā̭ci | vājḙbhirvājaya̱tām ||29||
a̱smāka̭mindra bhūtu te̱ stomo̱ vāhi̭ṣṭho̱ anta̭maḥ | a̱smānrā̱ye ma̱he hi̭nu ||30||
adhi̭ bṛ̱buḥ pa̭ṇī̱nāṃ varṣi̭ṣṭhe mū̱rdhanna̭sthāt | u̱ruḥ kakṣo̱ na gā̱ṅgyaḥ ||31||
yasya̭ vā̱yori̭va dra̱vadbha̱drā rā̱tiḥ sa̭ha̱sriṇī̭ | sa̱dyo dā̱nāya̱ maṃha̭te ||32||
tatsu no̱ viśvḙ a̱rya ā sadā̭ gṛṇanti kā̱rava̭: | bṛ̱buṃ sa̭hasra̱dāta̭maṃ sū̱riṃ sa̭hasra̱sāta̭mam ||33||
14 śaṃyurbārhaspatya:| indra: pragātha: [= viṣamā bṛhatī, samā satobṛhatī ] |
tvāmiddhi havā̭mahe sā̱tā vāja̭sya kā̱rava̭: |
tvāṃ vṛ̱treṣvi̭ndra̱ satpa̭ti̱ṃ nara̱stvāṃ kāṣṭhā̱svarva̭taḥ ||1||
sa tvaṃ na̭ścitra vajrahasta dhṛṣṇu̱yā ma̱haḥ sta̭vā̱no a̭drivaḥ |
gāmaśva̭ṃ ra̱thya̭mindra̱ saṃ ki̭ra sa̱trā vāja̱ṃ na ji̱gyuṣḙ ||2||
yaḥ sa̭trā̱hā vica̭rṣaṇi̱rindra̱ṃ taṃ hṷ̄mahe va̱yam |
saha̭sramuṣka̱ tuvi̭nṛmṇa̱ satpa̭te̱ bhavā̭ sa̱matsṷ no vṛ̱dhe ||3||
bādha̭se̱ janā̭nvṛṣa̱bheva̭ ma̱nyunā̱ ghṛṣaṷ mī̱ḻha ṛ̭cīṣama |
a̱smāka̭ṃ bodhyavi̱tā ma̭hādha̱ne ta̱nūṣva̱psu sūryḙ ||4||
indra̱ jyeṣṭha̭ṃ na̱ ā bha̭ra̱~ oji̭ṣṭha̱ṃ papṷri̱ śrava̭: |
 yene̱me ci̭tra vajrahasta̱ roda̭sī̱ obhe sṷśipra̱ prāḥ ||5||
tvāmu̱gramava̭se carṣaṇī̱saha̱ṃ rāja̭nde̱veṣṷ hūmahe |
viśvā̱ su no̭ vithu̱rā pi̭bda̱nā va̭so̱'mitrā̭ntsu̱ṣahā̭nkṛdhi ||6||
yadi̭ndra̱ nāhṷṣī̱ṣvā~ ojo̭ nṛ̱mṇaṃ ca̭ kṛ̱ṣṭiṣṷ |
yadvā̱ pañca̭ kṣitī̱nāṃ dyu̱mnamā bha̭ra sa̱trā viśvā̭ni̱ pauṃsyā̭ ||7||
yadvā̭ tṛ̱kṣau ma̭ghavandru̱hyāvā jane̱ yatpū̱rau kacca̱ vṛṣṇya̭m |
a̱smabhya̱ṃ tadri̭rīhi̱ saṃ nṛ̱ṣāhye̱'mitrā̭npṛ̱tsu tu̱rvaṇḙ ||8||
indra̭ tri̱dhātṷ śara̱ṇaṃ tri̱varṷ̄thaṃ svasti̱mat |
cha̱rdirya̭ccha ma̱ghava̭dbhyaśca̱ mahya̭ṃ ca yā̱vayā̭ di̱dyumḙbhyaḥ ||9||
ye ga̭vya̱tā mana̭sā̱ śatrṷmāda̱bhura̭bhipra̱ghnanti̭ dhṛṣṇu̱yā |
adha̭ smā no maghavannindra girvaṇastanū̱pā anta̭mo bhava ||10||
adha̭ smā no vṛ̱dhe bha̱vendra̭ nā̱yama̭vā yu̱dhi |
yada̱ntari̭kṣe pa̱taya̭nti pa̱rṇino̭ di̱dyava̭sti̱gmamṷ̄rdhānaḥ ||11||
yatra̱ śūrā̭sasta̱nvo̭ vitanva̱te pri̱yā śarma̭ pitṝ̱ṇām |
adha̭ smā yaccha ta̱nve̱3 tanḙ ca cha̱rdira̱citta̭ṃ yā̱vaya̱ dveṣa̭: ||12||
yadi̭ndra̱ sarge̱ arva̭taśco̱dayā̭se mahādha̱ne |
a̱sa̱ma̱ne adhva̭ni vṛji̱ne pa̱thi śye̱nā~ i̭va śravasya̱taḥ ||13||
sindhṷ̄~riva prava̱ṇa ā̭śu̱yā ya̱to yadi̱ klośa̱manu̱ ṣvaṇi̭ |
ā ye vayo̱ na varvṛ̭ta̱tyāmi̭ṣi gṛbhī̱tā bā̱hvorgavi̭ ||14||
31 gargo bhāradvāja: | iṃdra:, 1–5 soma:, 20 deva–bhūmi-bṛhaspatīndrā,22- 25 sārñjaya: prastoka: [ dānastuti: ], 26–28 ratha:, 29 -30 duṃdubhi:, 31 duṃdubhīndrau | triṣṭup ; 19 bṛhatī, 23 anuṣṭup , 24 gāyatrī , 25 dvipadā triṣṭup , 27 jagatī |
svā̱duṣkilā̱yaṃ madhṷmā~ u̱tāyaṃ tī̱vraḥ kilā̱yaṃ rasa̭vā~ u̱tāyam |
u̱to nva1sya pa̭pi̱vāṃsa̱mindra̱ṃ na kaśca̱na sa̭hata āha̱veṣṷ ||1||
a̱yaṃ svā̱duri̱ha madi̭ṣṭha āsa̱ yasyendro̭ vṛtra̱hatyḙ ma̱māda̭ |
pu̱rūṇi̱ yaścyau̱tnā śamba̭rasya̱ vi na̭va̱tiṃ nava̭ ca de̱hyo̱3 han ||2||
a̱yaṃ mḙ pī̱ta udi̭yarti̱ vāca̭ma̱yaṃ ma̭nī̱ṣāmṷśa̱tīma̭jīgaḥ |
a̱yaṃ ṣaḻu̱rvīra̭mimīta̱ dhīro̱ na yābhyo̱ bhuva̭na̱ṃ kacca̱nāre ||3||
a̱yaṃ sa yo va̭ri̱māṇa̭ṃ pṛthi̱vyā va̱rṣmāṇa̭ṃ di̱vo akṛ̭ṇoda̱yaṃ saḥ |
a̱yaṃ pī̱yūṣa̭ṃ ti̱sṛṣṷ pra̱vatsu̱ somo̭ dādhāro̱rva1ntari̭kṣam ||4||
a̱yaṃ vi̭daccitra̱dṛśī̭ka̱marṇa̭: śu̱krasa̭dmanāmu̱ṣasā̱manī̭ke |
a̱yaṃ ma̱hānma̭ha̱tā skambha̭ne̱noddyāma̭stabhnādvṛṣa̱bho ma̱rutvā̭n ||5||
dhṛ̱ṣatpi̭ba ka̱laśe̱ soma̭mindra vṛtra̱hā śṷ̄ra sama̱re vasṷ̄nām |
mādhya̭ṃdine̱ sava̭na̱ ā vṛ̭ṣasva rayi̱sthāno̭ ra̱yima̱smāsṷ dhehi ||6||
indra̱ pra ṇa̭: purae̱teva̭ paśya̱ pra no̭ naya prata̱raṃ vasyo̱ accha̭ |
bhavā̭ supā̱ro a̭tipāra̱yo no̱ bhavā̱ sunī̭tiru̱ta vā̱manī̭tiḥ ||7||
u̱ruṃ no̭ lo̱kamanṷ neṣi vi̱dvāntsva̭rva̱jjyoti̱rabha̭yaṃ sva̱sti |
ṛ̱ṣvā ta̭ indra̱ sthavi̭rasya bā̱hū upa̭ stheyāma śara̱ṇā bṛ̱hantā̭ ||8||
vari̭ṣṭhe na indra va̱ndhurḙ dhā̱ vahi̭ṣṭhayoḥ śatāva̱nnaśva̭yo̱rā |
iṣa̱mā va̭kṣī̱ṣāṃ varṣi̭ṣṭhā̱ṃ mā na̭stārīnmaghava̱nrāyo̭ a̱ryaḥ ||9||
indra̭ mṛ̱ḻa mahya̭ṃ jī̱vātṷmiccha co̱daya̱ dhiya̱maya̭so̱ na dhārā̭m |
yatkiṃ cā̱haṃ tvā̱yuri̱daṃ vadā̭mi̱ tajjṷṣasva kṛ̱dhi mā̭ de̱vava̭ntam ||10||
trā̱tāra̱mindra̭mavi̱tāra̱mindra̱ṃ havḙhave su̱hava̱ṃ śūra̱mindra̭m |
hvayā̭mi śa̱kraṃ pṷruhū̱tamindra̭ṃ sva̱sti no̭ ma̱ghavā̭ dhā̱tvindra̭: ||11||
indra̭: su̱trāmā̱ svavā̱~ avo̭bhiḥ sumṛḻī̱ko bha̭vatu vi̱śvavḙdāḥ |
bādha̭tā̱ṃ dveṣo̱ abha̭yaṃ kṛṇotu su̱vīrya̭sya̱ pata̭yaḥ syāma ||12||
tasya̭ va̱yaṃ sṷma̱tau ya̱jñiya̱syā'pi̭ bha̱dre saṷmana̱se syā̭ma |
sa su̱trāmā̱ svavā̱~ indro̭ a̱sme ā̱rācci̱ddveṣa̭: sanu̱taryṷyotu ||13||
ava̱ tve i̭ndra pra̱vato̱ normirgiro̱ brahmā̭ṇi ni̱yuto̭ dhavante |
u̱rū na rādha̱: sava̭nā pu̱rūṇya̱po gā va̭jrinyuvase̱ samindṷ̄n ||14||
ka ī̭ṃ stava̱tkaḥ pṛ̭ṇā̱tko ya̭jāte̱ yadu̱graminma̱ghavā̭ vi̱śvahāvḙt |
pādā̭viva pra̱hara̭nna̱nyama̭nyaṃ kṛ̱ṇoti̱ pūrva̱mapa̭ra̱ṃ śacī̭bhiḥ ||15||
śṛ̱ṇve vī̱ra u̱gramṷgraṃ damā̱yanna̱nyama̭nyamatinenī̱yamā̭naḥ |
e̱dha̱mā̱na̱dviḻu̱bhaya̭sya̱ rājā̭ coṣkū̱yate̱ viśa̱ indro̭ manu̱ṣyā̭n ||16||
parā̱ pūrvḙṣāṃ sa̱khyā vṛ̭ṇakti vi̱tartṷrāṇo̱ apa̭rebhireti |
anā̭nubhūtīravadhūnvā̱naḥ pū̱rvīrindra̭: śa̱rada̭startarīti ||17||
rū̱paṃrṷ̄pa̱ṃ prati̭rūpo babhūva̱ tada̭sya rū̱paṃ pra̭ti̱cakṣa̭ṇāya |
indro̭ mā̱yābhi̭: puru̱rūpa̭ īyate yu̱ktā hya̭sya̱ hara̭yaḥ śa̱tā daśa̭ ||18||
yu̱jā̱no ha̱ritā̱ rathe̱ bhūri̱ tvaṣṭe̱ha rā̭jati |
ko vi̱śvāhā̭ dviṣa̱taḥ pakṣa̭ āsata u̱tāsī̭neṣu sū̱riṣṷ ||19||
a̱ga̱vyū̱ti kṣetra̱māga̭nma devā u̱rvī sa̱tī bhūmi̭raṃhūra̱ṇābhṷ̄t |
bṛha̭spate̱ pra ci̭kitsā̱ gavi̭ṣṭāvi̱tthā sa̱te ja̭ri̱tra i̭ndra̱ panthā̭m ||20||
di̱vedi̭ve sa̱dṛśī̭ra̱nyamardha̭ṃ kṛ̱ṣṇā a̭sedha̱dapa̱ sadma̭no̱ jāḥ |
aha̭ndā̱sā vṛ̭ṣa̱bho va̭sna̱yanto̱davra̭je va̱rcina̱ṃ śamba̭raṃ ca ||21||
pra̱sto̱ka innu rādha̭sasta indra̱ daśa̱ kośa̭yī̱rdaśa̭ vā̱jino̭'dāt |
divo̭dāsādatithi̱gvasya̱ rādha̭: śāmba̱raṃ vasu̱ pratya̭grabhīṣma ||22||
daśāśvā̱ndaśa̱ kośā̱ndaśa̱ vastrādhi̭bhojanā | daśo̭ hiraṇyapi̱ṇḍāndivo̭dāsādasāniṣam ||23||
daśa̱ rathā̱npraṣṭi̭mataḥ śa̱taṃ gā atha̭rvabhyaḥ | a̱śva̱thaḥ pā̱yavḙ'dāt ||24||
mahi̱ rādho̭ vi̱śvaja̭nya̱ṃ dadhā̭nānbha̱radvā̭jāntsārñja̱yo a̱bhya̭yaṣṭa ||25||
vana̭spate vī̱ḍva̭ṅgo̱ hi bhū̱yā a̱smatsa̭khā pra̱tara̭ṇaḥ su̱vīra̭: |
gobhi̱: sana̭ddho asi vī̱ḻaya̭svā''sthā̱tā tḙ jayatu̱ jetvā̭ni ||26||
di̱vaspṛ̭thi̱vyāḥ paryoja̱ udbhṛ̭ta̱ṃ vana̱spati̭bhya̱: paryābhṛ̭ta̱ṃ saha̭: |
a̱pāmo̱jmāna̱ṃ pari̱ gobhi̱rāvṛ̭ta̱mindra̭sya̱ vajra̭ṃ ha̱viṣā̱ ratha̭ṃ yaja ||27||
indra̭sya̱ vajro̭ ma̱rutā̱manī̭kaṃ mi̱trasya̱ garbho̱ varṷṇasya̱ nābhi̭: |
 semāṃ no̭ ha̱vyadā̭tiṃ juṣā̱ṇo deva̭ ratha̱ prati̭ ha̱vyā gṛ̭bhāya ||28||
upa̭ śvāsaya pṛthi̱vīmu̱ta dyāṃ pṷru̱trā tḙ manutā̱ṃ viṣṭhi̭ta̱ṃ jaga̭t |
sa dṷndubhe sa̱jūrindrḙṇa de̱vairdū̱rāddavī̭yo̱ apa̭ sedha̱ śatrṷ̄n ||29||
ā kra̭ndaya̱ bala̱mojo̭ na̱ ā dhā̱ niḥ ṣṭa̭nihi duri̱tā bādha̭mānaḥ |
apa̭ protha dundubhe du̱cchunā̭ i̱ta indra̭sya mu̱ṣṭira̭si vī̱ḻaya̭sva ||30||
āmūra̭ja pra̱tyāva̭rtaye̱māḥ kḙtu̱maddṷndu̱bhirvā̭vadīti |
samaśva̭parṇā̱ścara̭nti no̱ naro̱'smāka̭mindra ra̱thino̭ jayantu ||31||
22 śaṃyurbārhaspatya: [tṛṇapāṇi:] |1-10agni:; 11- 15, 20 – 21 maruta: [ 13-15 liṃgoktā vā ], 16-19 pūṣā, 22 dyāvābhūmī vā pṛśnirvā | pragātha:; =[ 1,3 bṛhatī; 2, 4 satobṛhatī; 5 bṛhatī, 6 mahāsatobṛhatī; 7 mahābṛhatī, 8 mahāsatobṛhatī; 9 bṛhatī, 10 satobṛhatī; 11 kakup , 12 satobṛhatī ], 13 purauṣṇik ,14 bṛhatī, 15 atijagatī, 16 kakup , 17 satobṛhatī, 18 purauṣṇik, 19-20 bṛhatī , 21 mahābṛhatī yavamadhyā, 22 anuṣṭup |
ya̱jñāya̭jñā vo a̱gnayḙ gi̱rāgi̭rā ca̱ dakṣa̭se | prapra̭ va̱yama̱mṛta̭ṃ jā̱tavḙdasaṃ pri̱yaṃ mi̱traṃ na śa̭ṃsiṣam ||1
ū̱rjo napā̭ta̱ṃ sa hi̱nāyama̭sma̱yurdāśḙma ha̱vyadā̭taye | bhuva̱dvājḙṣvavi̱tā bhuva̭dvṛ̱dha u̱ta trā̱tā ta̱nūnā̭m ||2
vṛṣā̱ hya̭gne a̱jaro̭ ma̱hānvi̱bhāsya̱rciṣā̭ | aja̭sreṇa śo̱ciṣā̱ śośṷcacchuce sudī̱tibhi̱: su dī̭dihi ||3
ma̱ho de̱vānyaja̭si̱ yakṣyā̭nu̱ṣaktava̱ kratvo̱ta da̱ṃsanā̭ | a̱rvāca̭: sīṃ kṛṇuhya̱gne'va̭se̱ rāsva̱ vājo̱ta va̭ṃsva ||4
yamāpo̱ adra̭yo̱ vanā̱ garbha̭mṛ̱tasya̱ pipra̭ti | saha̭sā̱ yo ma̭thi̱to jāya̭te̱ nṛbhi̭: pṛthi̱vyā adhi̱ sāna̭vi ||5
ā yaḥ pa̱prau bhā̱nunā̱ roda̭sī u̱bhe dhū̱mena̭ dhāvate di̱vi | ti̱rastamo̭ dadṛśa̱ ūrmyā̱svā śyā̱vāsva̭ru̱ṣo vṛṣā śyā̱vā a̭ru̱ṣo vṛṣā̭ ||6
bṛ̱hadbhi̭ragne a̱rcibhi̭: śu̱kreṇa̭ deva śo̱ciṣā̭ | bha̱radvā̭je samidhā̱no ya̭viṣṭhya re̱vanna̭: śukra dīdihi dyu̱matpā̭vaka dīdihi ||7
viśvā̭sāṃ gṛ̱hapa̭tirvi̱śāma̭si̱ tvama̭gne̱ mānṷṣīṇām | śa̱taṃ pū̱rbhirya̭viṣṭha pā̱hyaṃha̭saḥ same̱ddhāra̭ṃ śa̱taṃ himā̭: sto̱tṛbhyo̱ ye ca̱ dada̭ti ||8
tvaṃ na̭ści̱tra ū̱tyā vaso̱ rādhā̭ṃsi codaya | a̱sya rā̱yastvama̭gne ra̱thīra̭si vi̱dā gā̱dhaṃ tu̱ce tu na̭: ||9
parṣi̭ to̱kaṃ tana̭yaṃ pa̱rtṛbhi̱ṣṭvamada̭bdhai̱rapra̭yutvabhiḥ | agne̱ heḻā̭ṃsi̱ daivyā̭ yuyodhi̱ no'dḙvāni̱ hvarā̭ṃsi ca ||10
ā sa̭khāyaḥ saba̱rdughā̭ṃ dhe̱numa̭jadhva̱mupa̱ navya̭sā̱ vaca̭: | sṛ̱jadhva̱mana̭pasphurām ||11
yā śardhā̭ya̱ mārṷtāya̱ svabhā̭nave̱ śravo'mṛ̭tyu̱ dhukṣa̭ta | yā mṛ̭ḻī̱ke ma̱rutā̭ṃ tu̱rāṇā̱ṃ yā su̱mnairḙva̱yāva̭rī ||12
bha̱radvā̭jā̱yāva̭ dhukṣata dvi̱tā | dhe̱nuṃ ca̭ vi̱śvado̭hasa̱miṣa̭ṃ ca vi̱śvabho̭jasam ||13
taṃ va̱ indra̱ṃ na su̱kratu̱ṃ varṷṇamiva mā̱yina̭m | a̱rya̱maṇa̱ṃ na ma̱ndraṃ sṛ̱prabho̭jasa̱ṃ viṣṇu̱ṃ na stṷṣa ā̱diśḙ ||14
tve̱ṣaṃ śardho̱ na mārṷtaṃ tuvi̱ṣvaṇya̭na̱rvāṇa̭ṃ pū̱ṣaṇa̱ṃ saṃ yathā̭ śa̱tā | saṃ sa̱hasrā̱ kāri̭ṣaccarṣa̱ṇibhya̱ ā~ ā̱virgū̱ḻhā vasṷ̄ karatsu̱vedā̭ no̱ vasṷ̄ karat ||15
ā mā̭ pūṣa̱nnupa̭ drava̱ śaṃsi̭ṣa̱ṃ nu tḙ apika̱rṇa ā̭ghṛṇe | a̱ghā a̱ryo arā̭tayaḥ ||16
mā kā̭ka̱mbīra̱mudvṛ̭ho̱ vana̱spati̱maśa̭stī̱rvi hi nīna̭śaḥ | mota sūro̱ aha̭ e̱vā ca̱na grī̱vā ā̱dadha̭te̱ veḥ ||17
dṛtḙriva te'vṛ̱kama̭stu sa̱khyam | acchi̭drasya dadha̱nvata̱: supṷ̄rṇasya dadha̱nvata̭: ||18
pa̱ro hi martyai̱rasi̭ sa̱mo de̱vairu̱ta śri̱yā | a̱bhi khya̭: pūṣa̱npṛta̭nāsu na̱stvamavā̭ nū̱naṃ yathā̭ pu̱rā ||19
vā̱mī vā̱masya̭ dhūtaya̱: praṇī̭tirastu sū̱nṛtā̭ | de̱vasya̭ vā maruto̱ martya̭sya vejā̱nasya̭ prayajyavaḥ ||20
sa̱dyaści̱dyasya̭ carkṛ̱tiḥ pari̱ dyāṃ de̱vo naiti̱ sūrya̭: | tve̱ṣaṃ śavo̭ dadhire̱ nāma̭ ya̱jñiya̭ṃ ma̱ruto̭ vṛtra̱haṃ śavo̱ jyeṣṭha̭ṃ vṛtra̱haṃ śava̭: ||21
sa̱kṛddha̱ dyaura̭jāyata sa̱kṛdbhūmi̭rajāyata | pṛśnyā̭ du̱gdhaṃ sa̱kṛtpaya̱stada̱nyo nānṷ jāyate ||22
15 ṛjiśvā bhāradvāja: | viśve devā: |triṣṭup , 15 śakvarī |
stu̱ṣe jana̭ṃ suvra̱taṃ navya̭sībhirgī̱rbhirmi̱trāvarṷṇā sumna̱yantā̭ |
ta ā ga̭mantu̱ ta i̱ha śrṷvantu sukṣa̱trāso̱ varṷṇo mi̱tro a̱gniḥ ||1||
vi̱śovi̭śa̱ īḍya̭madhva̱reṣvadṛ̭ptakratumara̱tiṃ yṷva̱tyoḥ |
di̱vaḥ śiśu̱ṃ saha̭saḥ sū̱numa̱gniṃ ya̱jñasya̭ ke̱tuma̭ru̱ṣaṃ yaja̭dhyai ||2||
a̱ru̱ṣasya̭ duhi̱tarā̱ virṷ̄pe̱ stṛbhi̭ra̱nyā pi̭pi̱śe sūro̭ a̱nyā |
mi̱tha̱sturā̭ vi̱cara̭ntī pāva̱ke manma̭ śru̱taṃ na̭kṣata ṛ̱cyamā̭ne ||3||
pra vā̱yumacchā̭ bṛha̱tī ma̭nī̱ṣā bṛ̱hadra̭yiṃ vi̱śvavā̭raṃ ratha̱prām |
dyu̱tadyā̭mā ni̱yuta̱: patya̭mānaḥ ka̱viḥ ka̱vimi̭yakṣasi prayajyo ||4||
sa me̱ vapṷśchadayada̱śvino̱ryo ratho̭ vi̱rukmā̱nmana̭sā yujā̱naḥ |
yena̭ narā nāsatyeṣa̱yadhyai̭ va̱rtiryā̱thastana̭yāya̱ tmanḙ ca ||5||
parja̭nyavātā vṛṣabhā pṛthi̱vyāḥ purī̭ṣāṇi jinvata̱mapyā̭ni |
satya̭śrutaḥ kavayo̱ yasya̭ gī̱rbhirjaga̭taḥ sthāta̱rjaga̱dā kṛ̭ṇudhvam ||6||
pāvī̭ravī ka̱nyā̭ ci̱trāyu̱: sara̭svatī vī̱rapa̭tnī̱ dhiya̭ṃ dhāt |
gnābhi̱racchi̭draṃ śara̱ṇaṃ sa̱joṣā̭ durā̱dharṣa̭ṃ gṛṇa̱te śarma̭ yaṃsat ||7||
pa̱thaspa̭tha̱: pari̭patiṃ vaca̱syā kāmḙna kṛ̱to a̱bhyā̭naḻa̱rkam |
sa no̭ rāsacchu̱rudha̭śca̱ndrāgrā̱ dhiya̭ṃdhiyaṃ sīṣadhāti̱ pra pū̱ṣā ||8||
pra̱tha̱ma̱bhāja̭ṃ ya̱śasa̭ṃ vayo̱dhāṃ sṷpā̱ṇiṃ de̱vaṃ su̱gabha̭sti̱mṛbhva̭m |
hotā̭ yakṣadyaja̱taṃ pa̱styā̭nāma̱gnistvaṣṭā̭raṃ su̱hava̭ṃ vi̱bhāvā̭ ||9||
bhuva̭nasya pi̱tara̭ṃ gī̱rbhirā̱bhī ru̱draṃ divā̭ va̱rdhayā̭ ru̱drama̱ktau |
bṛ̱hanta̭mṛ̱ṣvama̱jara̭ṃ suṣu̱mnamṛdha̭gghuvema ka̱vinḙṣi̱tāsa̭: ||10||
ā yṷvānaḥ kavayo yajñiyāso̱ marṷto ga̱nta gṛ̭ṇa̱to va̭ra̱syām |
a̱ci̱traṃ ci̱ddhi jinva̭thā vṛ̱dhanta̭ i̱tthā nakṣa̭nto naro aṅgira̱svat ||11||
pra vī̱rāya̱ pra ta̱vasḙ tu̱rāyā'jā̭ yū̱theva̭ paśu̱rakṣi̱rasta̭m |
sa pi̭spṛśati ta̱nvi̭ śru̱tasya̱ stṛbhi̱rna nāka̭ṃ vaca̱nasya̱ vipa̭: ||12||
yo rajā̭ṃsi vima̱me pārthi̭vāni̱ triści̱dviṣṇu̱rmana̭ve bādhi̱tāya̭ |
tasya̭ te̱ śarma̭nnupada̱dyamā̭ne rā̱yā ma̭dema ta̱nvā̱3 tanā̭ ca ||13||
tanno'hi̭rbu̱dhnyo̭ a̱dbhira̱rkaistatparva̭ta̱statsa̭vi̱tā cano̭ dhāt |
tadoṣa̭dhībhira̱bhi rā̭ti̱ṣāco̱ bhaga̱: pura̭ṃdhirjinvatu̱ pra rā̱ye ||14||
nū no̭ ra̱yiṃ ra̱thya̭ṃ carṣaṇi̱prāṃ pṷru̱vīra̭ṃ ma̱ha ṛ̱tasya̭ go̱pām |
kṣaya̭ṃ dātā̱jara̱ṃ yena̱ janā̱ntspṛdho̱ adḙvīra̱bhi ca̱ kramā̭ma̱ viśa̱ ādḙvīra̱bhya1śnavā̭ma ||15||
15 ṛjiśvā bhāradvāja: | viśve devā: |triṣṭup |
hu̱ve vo̭ de̱vīmadi̭ti̱ṃ namo̭bhirmṛḻī̱kāya̱ varṷṇaṃ mi̱trama̱gnim |
a̱bhi̱kṣa̱dāma̭rya̱maṇa̭ṃ su̱śeva̭ṃ trā̱tṝnde̱vāntsa̭vi̱tāra̱ṃ bhaga̭ṃ ca ||1||
su̱jyoti̭ṣaḥ sūrya̱ dakṣa̭pitṝnanāgā̱stve sṷmaho vīhi de̱vān |
dvi̱janmā̭no̱ ya ṛ̭ta̱sāpa̭: sa̱tyāḥ sva̭rvanto yaja̱tā a̭gniji̱hvāḥ ||2||
u̱ta dyā̭vāpṛthivī kṣa̱tramu̱ru bṛ̱hadro̭dasī śara̱ṇaṃ sṷṣumne |
ma̱haska̭ratho̱ vari̭vo̱ yathā̭ no̱'sme kṣayā̭ya dhiṣaṇe ane̱haḥ ||3||
ā no̭ ru̱drasya̭ sū̱navo̭ namantāma̱dyā hū̱tāso̱ vasa̱vo'dhṛ̭ṣṭāḥ |
yadī̱marbhḙ maha̱ti vā̭ hi̱tāso̭ bā̱dhe ma̱ruto̱ ahvā̭ma de̱vān ||4||
mi̱myakṣa̱ yeṣṷ roda̱sī nu de̱vī siṣa̭kti pū̱ṣā a̭bhyardha̱yajvā̭ |
śru̱tvā hava̭ṃ maruto̱ yaddha̭ yā̱tha bhūmā̭ rejante̱ adhva̭ni̱ pravi̭kte ||5||
a̱bhi tyaṃ vī̱raṃ girva̭ṇasama̱rcendra̱ṃ brahma̭ṇā jarita̱rnavḙna |
śrava̱diddhava̱mupa̭ ca̱ stavā̭no̱ rāsa̱dvājā̱~ upa̭ ma̱ho gṛ̭ṇā̱naḥ ||6||
o̱māna̭māpo mānuṣī̱ramṛ̭kta̱ṃ dhāta̭ to̱kāya̱ tana̭yāya̱ śaṃ yoḥ |
yū̱yaṃ hi ṣṭhā bhi̱ṣajo̭ mā̱tṛta̭mā̱ viśva̭sya sthā̱turjaga̭to̱ jani̭trīḥ ||7||
ā no̭ de̱vaḥ sa̭vi̱tā trāya̭māṇo̱ hira̭ṇyapāṇiryaja̱to ja̭gamyāt |
yo datra̭vā~ u̱ṣaso̱ na pratī̭kaṃ vyūrṇu̱te dā̱śuṣe̱ vāryā̭ṇi ||8||
u̱ta tvaṃ sṷ̄no sahaso no a̱dyā de̱vā~ a̱sminna̭dhva̱re va̭vṛtyāḥ |
syāma̱haṃ te̱ sada̱midrā̱tau tava̭ syāma̱gne'va̭sā su̱vīra̭: ||9||
u̱ta tyā me̱ hava̱mā ja̭gmyāta̱ṃ nāsa̭tyā dhī̱bhiryu̱vama̱ṅga vi̭prā |
atri̱ṃ na ma̱hastama̭so'mumukta̱ṃ tūrva̭taṃ narā duri̱tāda̱bhīkḙ ||10||
te no̭ rā̱yo dyu̱mato̱ vāja̭vato dā̱tāro̭ bhūta nṛ̱vata̭: puru̱kṣoḥ |
da̱śa̱syanto̭ di̱vyāḥ pārthi̭vāso̱ gojā̭tā̱ apyā̭ mṛ̱ḻatā̭ ca devāḥ ||11||
te no̭ ru̱draḥ sara̭svatī sa̱joṣā̭ mī̱ḻhuṣma̭nto̱ viṣṇṷrmṛḻantu vā̱yuḥ |
ṛ̱bhu̱kṣā vājo̱ daivyo̭ vidhā̱tā pa̱rjanyā̱vātā̭ pipyatā̱miṣa̭ṃ naḥ ||12||
u̱ta sya de̱vaḥ sa̭vi̱tā bhago̭ no̱'pāṃ napā̭davatu̱ dānu̱ papri̭: |
tvaṣṭā̭ de̱vebhi̱rjani̭bhiḥ sa̱joṣā̱ dyaurde̱vebhi̭: pṛthi̱vī sa̭mu̱draiḥ ||13||
u̱ta no'hi̭rbu̱dhnya̭: śṛṇotva̱ja eka̭pātpṛthi̱vī sa̭mu̱draḥ |
viśvḙ de̱vā ṛ̭tā̱vṛdho̭ huvā̱nāḥ stu̱tā mantrā̭: kaviśa̱stā a̭vantu ||14||
e̱vā napā̭to̱ mama̱ tasya̭ dhī̱bhirbha̱radvā̭jā a̱bhya̭rcantya̱rkaiḥ |
gnā hu̱tāso̱ vasa̱vo'dhṛ̭ṣṭā̱ viśvḙ stu̱tāso̭ bhūtā yajatrāḥ ||15||
16 ṛjiśvā bhāradvāja: | viśve devā:| triṣṭup , 13 – 15 uṣṇik, 16 anuṣṭup |
udu̱ tyaccakṣu̱rmahi̭ mi̱trayo̱rā~ eti̭ pri̱yaṃ varṷṇayo̱rada̭bdham |
ṛ̱tasya̱ śuci̭ darśa̱tamanī̭kaṃ ru̱kmo na di̱va udi̭tā̱ vya̭dyaut ||1||
veda̱ yastrīṇi̭ vi̱dathā̭nyeṣāṃ de̱vānā̱ṃ janma̭ sanu̱tarā ca̱ vipra̭: |
ṛ̱ju martḙṣu vṛji̱nā ca̱ paśya̭nna̱bhi ca̭ṣṭe̱ sūro̭ a̱rya evā̭n ||2||
stu̱ṣa ṷ vo ma̱ha ṛ̱tasya̭ go̱pānadi̭tiṃ mi̱traṃ varṷṇaṃ sujā̱tān |
a̱rya̱maṇa̱ṃ bhaga̱mada̭bdhadhītī̱nacchā̭ voce sadha̱nya̭: pāva̱kān ||3||
ri̱śāda̭sa̱: satpa̭tī̱~rada̭bdhānma̱ho rājña̭: suvasa̱nasya̭ dā̱tṝn |
yūna̭: sukṣa̱trānkṣaya̭to di̱vo nṝnā̭di̱tyānyā̱myadi̭tiṃ duvo̱yu ||4||
dyau̱3ṣpita̱: pṛthi̭vi̱ māta̱radhru̱gagnḙ bhrātarvasavo mṛ̱ḻatā̭ naḥ |
viśva̭ ādityā adite sa̱joṣā̭ a̱smabhya̱ṃ śarma̭ bahu̱laṃ vi ya̭nta ||5||
mā no̱ vṛkā̭ya vṛ̱kyḙ samasmā aghāya̱te rī̭radhatā yajatrāḥ |
yū̱yaṃ hi ṣṭhā ra̱thyo̭ nasta̱nūnā̭ṃ yū̱yaṃ dakṣa̭sya̱ vaca̭so babhū̱va ||6||
mā va̱ eno̭ a̱nyakṛ̭taṃ bhujema̱ mā tatka̭rma vasavo̱ yaccaya̭dhve |
viśva̭sya̱ hi kṣaya̭tha viśvadevāḥ sva̱yaṃ ri̱pusta̱nva̭ṃ rīriṣīṣṭa ||7||
nama̱ idu̱graṃ nama̱ ā vi̭vāse̱ namo̭ dādhāra pṛthi̱vīmu̱ta dyām |
namo̭ de̱vebhyo̱ nama̭ īśa eṣāṃ kṛ̱taṃ ci̱deno̱ nama̱sā vi̭vāse ||8||
ṛ̱tasya̭ vo ra̱thya̭: pū̱tada̭kṣānṛ̱tasya̭ pastya̱sado̱ ada̭bdhān |
tā~ ā namo̭bhiruru̱cakṣa̭so̱ nṝnviśvā̭nva̱ ā na̭me ma̱ho ya̭jatrāḥ ||9||
te hi śreṣṭha̭varcasa̱sta ṷ nasti̱ro viśvā̭ni duri̱tā naya̭nti |
su̱kṣa̱trāso̱ varṷṇo mi̱tro a̱gniṝ̱tadhī̭tayo vakma̱rāja̭satyāḥ ||10||
te na̱ indra̭: pṛthi̱vī kṣāma̭ vardhanpū̱ṣā bhago̱ adi̭ti̱: pañca̱ janā̭: |
 su̱śarmā̭ṇa̱: svava̭saḥ sunī̱thā bhava̭ntu naḥ sutrā̱trāsa̭: sugo̱pāḥ ||11||
nū sa̱dmāna̭ṃ di̱vyaṃ naṃśi̭ devā̱ bhāra̭dvājaḥ suma̱tiṃ yā̭ti̱ hotā̭ |
ā̱sā̱nebhi̱ryaja̭māno mi̱yedhai̭rde̱vānā̱ṃ janma̭ vasū̱yurva̭vanda ||12||
apa̱ tyaṃ vṛ̭ji̱naṃ ri̱puṃ ste̱nama̭gne durā̱dhya̭m | da̱vi̱ṣṭhama̭sya satpate kṛ̱dhī su̱gam ||13||
grāvā̭ṇaḥ soma no̱ hi ka̭ṃ sakhitva̱nāya̭ vāva̱śuḥ | ja̱hī nya1triṇa̭ṃ pa̱ṇiṃ vṛko̱ hi ṣaḥ ||14||
yū̱yaṃ hi ṣṭhā sṷdānava̱ indra̭jyeṣṭhā a̱bhidya̭vaḥ | kartā̭ no̱ adhva̱nnā su̱gaṃ go̱pā a̱mā ||15||
api̱ panthā̭maganmahi svasti̱gāma̭ne̱hasa̭m | yena̱ viśvā̱: pari̱ dviṣo̭ vṛ̱ṇakti̭ vi̱ndate̱ vasṷ ||16||
17 ṛjiśvā bhāradvāja: | viśve devā: | triṣṭup , 7-12 gāyatrī, 14 jagatī |
na taddi̱vā na pṛ̭thi̱vyānṷ manye̱ na ya̱jñena̱ nota śamī̭bhirā̱bhiḥ |
u̱bjantu̱ taṃ su̱bhva1: parva̭tāso̱ ni hī̭yatāmatiyā̱jasya̭ ya̱ṣṭā ||1||
ati̭ vā̱ yo ma̭ruto̱ manya̭te no̱ brahma̭ vā̱ yaḥ kri̱yamā̭ṇa̱ṃ nini̭tsāt |
tapṷ̄ṃṣi̱ tasmai̭ vṛji̱nāni̭ santu brahma̱dviṣa̭ma̱bhi taṃ śo̭catu̱ dyauḥ ||2||
kima̱ṅga tvā̱ brahma̭ṇaḥ soma go̱pāṃ kima̱ṅga tvā̭hurabhiśasti̱pāṃ na̭: |
kima̱ṅga na̭: paśyasi ni̱dyamā̭nānbrahma̱dviṣe̱ tapṷṣiṃ he̱tima̭sya ||3||
ava̭ntu̱ māmu̱ṣaso̱ jāya̭mānā̱ ava̭ntu mā̱ sindha̭va̱: pinva̭mānāḥ |
ava̭ntu mā̱ parva̭tāso dhru̱vāso'va̭ntu mā pi̱taro̭ de̱vahṷ̄tau ||4||
vi̱śva̱dānī̭ṃ su̱mana̭saḥ syāma̱ paśyḙma̱ nu sūrya̭mu̱ccara̭ntam |
tathā̭ kara̱dvasṷpati̱rvasṷ̄nāṃ de̱vā~ ohā̱no'va̱sāga̭miṣṭhaḥ ||5||
indro̱ nedi̭ṣṭha̱mava̱sāga̭miṣṭha̱: sara̭svatī̱ sindhṷbhi̱: pinva̭mānā |
pa̱rjanyo̭ na̱ oṣa̭dhībhirmayo̱bhura̱gniḥ su̱śaṃsa̭: su̱hava̭: pi̱teva̭ ||6||
viśvḙ devāsa̱ ā ga̭ta śṛṇu̱tā ma̭ i̱maṃ hava̭m | edaṃ ba̱rhirni ṣī̭data ||7||
yo vo̭ devā ghṛ̱tasnṷnā ha̱vyena̭ prati̱bhūṣa̭ti | taṃ viśva̱ upa̭ gacchatha ||8||
upa̭ naḥ sū̱navo̱ gira̭: śṛ̱ṇvantva̱mṛta̭sya̱ ye | su̱mṛ̱ḻī̱kā bha̭vantu naḥ ||9||
viśvḙ de̱vā ṛ̭tā̱vṛdha̭ ṛ̱tubhi̭rhavana̱śruta̭: | ju̱ṣantā̱ṃ  yujya̱ṃ paya̭: ||10||
sto̱tramindro̭ ma̱rudga̭ṇa̱stvaṣṭṛ̭mānmi̱tro a̭rya̱mā | i̱mā ha̱vyā jṷṣanta naḥ ||11||
i̱maṃ no̭ agne adhva̱raṃ hota̭rvayuna̱śo ya̭ja | ci̱ki̱tvāndaivya̱ṃ jana̭m ||12||
viśvḙ devāḥ śṛṇu̱temaṃ hava̭ṃ me̱ ye a̱ntari̭kṣe̱ ya upa̱ dyavi̱ ṣṭha |
ye a̭gniji̱hvā u̱ta vā̱ yaja̭trā ā̱sadyā̱sminba̱rhiṣi̭ mādayadhvam ||13||
viśvḙ de̱vā mama̭ śṛṇvantu ya̱jñiyā̭ u̱bhe roda̭sī a̱pāṃ napā̭cca̱ manma̭ |
mā vo̱ vacā̭ṃsi pari̱cakṣyā̭ṇi vocaṃ su̱mneṣvidvo̱ anta̭mā madema ||14||
ye ke ca̱ jmā ma̱hino̱ ahi̭māyā di̱vo ja̭jñi̱re a̱pāṃ sa̱dhasthḙ |
te a̱smabhya̭mi̱ṣaye̱ viśva̱māyu̱: kṣapa̭ u̱srā va̭rivasyantu de̱vāḥ ||15||
agnī̭parjanyā̱vava̭ta̱ṃ dhiya̭ṃ me̱'sminhavḙ suhavā suṣṭu̱tiṃ na̭: |
iḻā̭ma̱nyo ja̱naya̱dgarbha̭ma̱nyaḥ pra̱jāva̭tī̱riṣa̱ ā dha̭ttama̱sme ||16||
stī̱rṇe ba̱rhiṣi̭ samidhā̱ne a̱gnau sū̱ktena̭ ma̱hā nama̱sā vi̭vāse |
a̱sminno̭ a̱dya vi̱dathḙ yajatrā̱ viśvḙ devā ha̱viṣi̭ mādayadhvam ||17||
10 bārhaspatyo bharadvāja: |pūṣā | gāyatrī, 8 anuṣṭup |
va̱yamṷ tvā pathaspate̱ ratha̱ṃ na vāja̭sātaye | dhi̱ye pṷ̄ṣannayujmahi ||1||
a̱bhi no̱ narya̱ṃ vasṷ vī̱raṃ praya̭tadakṣiṇam | vā̱maṃ gṛ̱hapa̭tiṃ naya ||2||
adi̭tsantaṃ cidāghṛṇe̱ pūṣa̱ndānā̭ya codaya | pa̱ṇeści̱dvi mra̭dā̱ mana̭: ||3||
vi pa̱tho vāja̭sātaye cinu̱hi vi mṛdho̭ jahi | sādha̭ntāmugra no̱ dhiya̭: ||4||
pari̭ tṛndhi paṇī̱nāmāra̭yā̱ hṛda̭yā kave | athḙma̱smabhya̭ṃ randhaya ||5||
vi pṷ̄ṣa̱nnāra̭yā tuda pa̱ṇeri̭ccha hṛ̱di pri̱yam | athḙma̱smabhya̭ṃ randhaya ||6||
ā ri̭kha kiki̱rā kṛ̭ṇu paṇī̱nāṃ hṛda̭yā kave | athḙma̱smabhya̭ṃ randhaya ||7||
yāṃ pṷ̄ṣanbrahma̱coda̭nī̱mārā̱ṃ bibha̭rṣyāghṛṇe | tayā̭ samasya̱ hṛda̭ya̱mā ri̭kha kiki̱rā kṛ̭ṇu ||8||
yā te̱ aṣṭrā̱ goo̭pa̱śā''ghṛ̭ṇe paśu̱sādha̭nī | tasyā̭ste su̱mnamī̭mahe ||9||
u̱ta no̭ go̱ṣaṇi̱ṃ dhiya̭maśva̱sāṃ vā̭ja̱sāmu̱ta | nṛ̱vatkṛ̭ṇuhi vī̱tayḙ ||10||
10 bārhaspatyo bharadvāja: | pūṣā | gāyatrī |
saṃ pṷ̄ṣanvi̱duṣā̭ naya̱ yo añja̭sānu̱śāsa̭ti | ya e̱vedamiti̱ brava̭t ||1 ||
samṷ pū̱ṣṇā ga̭memahi̱ yo gṛ̱hā~ a̭bhi̱śāsa̭ti | i̱ma e̱veti̭ ca̱ brava̭t ||2||
pū̱ṣṇaśca̱kraṃ na ri̭ṣyati̱ na kośo'va̭ padyate | no a̭sya vyathate pa̱viḥ ||3||
yo a̭smai ha̱viṣāvi̭dha̱nna taṃ pū̱ṣāpi̭ mṛṣyate | pra̱tha̱mo vi̭ndate̱ vasṷ ||4||
pū̱ṣā gā anvḙtu naḥ pū̱ṣā ra̭kṣa̱tvarvataḥ | pū̱ṣā vāja̭ṃ sanotu naḥ ||5||
pūṣa̱nnanu̱ pra gā i̭hi̱ yaja̭mānasya sunva̱taḥ | a̱smāka̭ṃ stuva̱tāmu̱ta ||6||
māki̭rneśa̱nmākī̭ṃ riṣa̱nmākī̱ṃ saṃ śā̭ri̱ keva̭ṭe | athāri̭ṣṭābhi̱rā ga̭hi ||7||
śṛ̱ṇvanta̭ṃ pū̱ṣaṇa̭ṃ va̱yamirya̱mana̭ṣṭavedasam | īśā̭naṃ rā̱ya ī̭mahe ||8||
pūṣa̱ntava̭ vra̱te va̱yaṃ na ri̭ṣyema̱ kadā̭ ca̱na | sto̱tāra̭sta i̱ha sma̭si ||9||
pari̭ pū̱ṣā pa̱rastā̱ddhasta̭ṃ dadhātu̱ dakṣi̭ṇam | puna̭rno na̱ṣṭamāja̭tu ||10||
6 bārhaspatyo bharadvāja: |pūṣā | gāyatrī |
ehi̱ vāṃ vi̭muco napā̱dāghṛ̭ṇe̱ saṃ sa̭cāvahai | ra̱thīṝ̱tasya̭ no bhava ||1||
ra̱thīta̭maṃ kapa̱rdina̱mīśā̭na̱ṃ rādha̭so ma̱haḥ | rā̱yaḥ sakhā̭yamīmahe ||2||
rā̱yo dhārā̭syāghṛṇe̱ vaso̭ rā̱śira̭jāśva | dhīva̭todhīvata̱: sakhā̭ ||3||
pū̱ṣaṇa̱ṃ nva1jāśva̱mupa̭ stoṣāma vā̱jina̭m | svasu̱ryo jā̱ra u̱cyatḙ ||4||
mā̱turdi̭dhi̱ṣuma̭brava̱ṃ svasṷrjā̱raḥ śṛ̭ṇotu naḥ | bhrātendra̭sya̱ sakhā̱ mama̭ ||5||
ājāsa̭: pū̱ṣaṇa̱ṃ rathḙ niśṛ̱mbhāste ja̭na̱śriya̭m | de̱vaṃ va̭hantu̱ bibhra̭taḥ ||6||
6 bārhaspatyo bharadvāja: |pūṣā | gāyatrī, 6 anuṣṭap |
ya ḙnamā̱didḙśati kara̱mbhāditi̭ pū̱ṣaṇa̭m | na tena̭ de̱va ā̱diśḙ ||1||
u̱ta ghā̱ sa ra̱thīta̭ma̱: sakhyā̱ satpa̭tiryu̱jā | indro̭ vṛ̱trāṇi̭ jighnate ||2||
u̱tādaḥ pa̭ru̱ṣe gavi̱ sūra̭śca̱kraṃ hi̭ra̱ṇyaya̭m | nyai̭rayadra̱thīta̭maḥ ||3||
yada̱dya tvā̭ puruṣṭuta̱ bravā̭ma dasra mantumaḥ | tatsu no̱ manma̭ sādhaya ||4||
i̱maṃ ca̭ no ga̱veṣa̭ṇaṃ sā̱tayḙ sīṣadho ga̱ṇam | ā̱rātpṷ̄ṣannasi śru̱taḥ ||5||
ā tḙ sva̱stimī̭maha ā̱rea̭ghā̱mupā̭vasum | a̱dyā ca̭ sa̱rvatā̭taye̱ śvaśca̭ sa̱rvatā̭taye ||6||
6 bārhaspatyo bharadvāja: |iṃdrāpūṣaṇau | gāyatrī |
indrā̱ nu pū̱ṣaṇā̭ va̱yaṃ sa̱khyāya̭ sva̱stayḙ | hu̱vema̱ vāja̭sātaye ||1||
soma̭ma̱nya upā̭sada̱tpāta̭ve ca̱mvo̭: su̱tam | ka̱ra̱mbhama̱nya i̭cchati ||2||
a̱jā a̱nyasya̱ vahna̭yo̱ harī̭ a̱nyasya̱ sambhṛ̭tā | tābhyā̭ṃ vṛ̱trāṇi̭ jighnate ||3||
yadindro̱ ana̭ya̱drito̭ ma̱hīra̱po vṛṣa̭ntamaḥ | tatra̭ pū̱ṣābha̭va̱tsacā̭ ||4||
tāṃ pū̱ṣṇaḥ sṷma̱tiṃ va̱yaṃ vṛ̱kṣasya̱ pra va̱yāmi̭va | indra̭sya̱ cā ra̭bhāmahe ||5||
utpū̱ṣaṇa̭ṃ yuvāmahe̱'bhīśṷ̄~riva̱ sāra̭thiḥ | ma̱hyā indra̭ṃ sva̱stayḙ ||6||
4 bārhaspatyo bharadvāja: | pūṣā |triṣṭup , 2 jagatī |
śu̱kraṃ tḙ a̱nyadya̭ja̱taṃ tḙ a̱nyadviṣṷrūpe̱ aha̭nī̱ dyauri̭vāsi |
viśvā̱ hi mā̱yā ava̭si svadhāvo bha̱drā tḙ pūṣanni̱ha rā̱tira̭stu ||1||
a̱jāśva̭: paśu̱pā vāja̭pastyo dhiyaṃji̱nvo bhuva̭ne̱ viśve̱ arpi̭taḥ |
aṣṭrā̭ṃ pū̱ṣā śi̭thi̱rāmu̱dvarī̭vṛjatsa̱ṃcakṣā̭ṇo̱ bhuva̭nā de̱va ī̭yate ||2||
yāstḙ pūṣa̱nnāvo̭ a̱ntaḥ sa̭mu̱dre hi̭ra̱ṇyayī̭ra̱ntari̭kṣe̱ cara̭nti |
tābhi̭ryāsi dū̱tyāṃ sūrya̭sya̱ kāmḙna kṛta̱ śrava̭ i̱cchamā̭naḥ ||3||
pū̱ṣā su̱bandhṷrdi̱va ā pṛ̭thi̱vyā i̱ḻaspati̭rma̱ghavā̭ da̱smava̭rcāḥ |
yaṃ de̱vāso̱ ada̭duḥ sū̱ryāyai̱ kāmḙna kṛ̱taṃ ta̱vasa̱ṃ svañca̭m ||4||
10 bārhaspatyo bharadvāja: |indrāgnī |bṛhatī, 7-10 anuṣṭap |
pra nu vo̭cā su̱teṣṷ vāṃ vī̱ryā̱3 yāni̭ ca̱krathṷ: |
ha̱tāso̭ vāṃ pi̱taro̭ de̱vaśa̭trava̱ indrā̭gnī̱ jīva̭tho yu̱vam ||1||
baḻi̱tthā ma̭hi̱mā vā̱mindrā̭gnī̱ pani̭ṣṭha̱ ā | sa̱mā̱no vā̭ṃ jani̱tā bhrāta̭rā yu̱vaṃ ya̱māvi̱heha̭mātarā ||2||
o̱ki̱vāṃsā̭ su̱te sacā̱~ aśvā̱ saptī̭ i̱vāda̭ne | indrā̱ nva1gnī ava̭se̱ha va̱jriṇā̭ va̱yaṃ de̱vā ha̭vāmahe ||3||
ya i̭ndrāgnī su̱teṣṷ vā̱ṃ stava̱tteṣvṛ̭tāvṛdhā | jo̱ṣa̱vā̱kaṃ vada̭taḥ pajrahoṣiṇā̱ na dḙvā bha̱satha̭śca̱na ||4||
indrā̭gnī̱ ko a̱sya vā̱ṃ devau̱ marta̭ściketati |
viṣṷ̄co̱ aśvā̭nyuyujā̱na ī̭yata̱ eka̭: samā̱na ā rathḙ ||5||
indrā̭gnī a̱pādi̱yaṃ pūrvāgā̭tpa̱dvatī̭bhyaḥ | hi̱tvī śiro̭ ji̱hvayā̱ vāva̭da̱ccara̭ttri̱ṃśatpa̱dā nya̭kramīt ||6||
indrā̭gnī̱ ā hi ta̭nva̱te naro̱ dhanvā̭ni bā̱hvoḥ | mā no̭ a̱sminma̭hādha̱ne parā̭ varkta̱ṃ gavi̭ṣṭiṣu ||7||
indrā̭gnī̱ tapa̭nti mā̱'ghā a̱ryo arā̭tayaḥ | apa̱ dveṣā̱ṃsyā kṛ̭taṃ yuyu̱taṃ sūryā̱dadhi̭ ||8||
indrā̭gnī yu̱vorapi̱ vasṷ di̱vyāni̱ pārthi̭vā | ā na̭ i̱ha pra ya̭cchataṃ ra̱yiṃ vi̱śvāyṷpoṣasam ||9||
indrā̭gnī ukthavāhasā̱ stomḙbhirhavanaśrutā | viśvā̭bhirgī̱rbhirā ga̭tama̱sya soma̭sya pī̱tayḙ ||10||
15 bārhaspatyo bharadvāja:|
indrāgnī |gāyatrī;1-3, 13 triṣṭup ,14 bṛhatī,15 anuṣṭap|
śnatha̭dvṛ̱tramu̱ta sa̭noti̱ vāja̱mindrā̱ yo a̱gnī sahṷrī sapa̱ryāt |
i̱ra̱jyantā̭ vasa̱vya̭sya̱ bhūre̱: saha̭stamā̱ saha̭sā vāja̱yantā̭ ||1||
tā yo̭dhiṣṭama̱bhi gā i̭ndra nū̱nama̱paḥ sva̭ru̱ṣaso̭ agna ū̱ḻhāḥ |
diśa̱: sva̭ru̱ṣasa̭ indra ci̱trā a̱po gā a̭gne yuvase ni̱yutvā̭n ||2||
ā vṛ̭trahaṇā vṛtra̱habhi̱: śuṣmai̱rindra̭ yā̱taṃ namo̭bhiragne a̱rvāk |
yu̱vaṃ rādho̭bhi̱raka̭vebhiri̱ndrāgnḙ a̱sme bha̭vatamutta̱mebhi̭: ||3||
tā hṷve̱ yayo̭ri̱daṃ pa̱pne viśva̭ṃ pu̱rā kṛ̱tam | i̱ndrā̱gnī na ma̭rdhataḥ ||4||
u̱grā vi̭gha̱ninā̱ mṛdha̭ indrā̱gnī ha̭vāmahe | tā no̭ mṛḻāta ī̱dṛśḙ ||5||
ha̱to vṛ̱trāṇyāryā̭ ha̱to dāsā̭ni̱ satpa̭tī | ha̱to viśvā̱ apa̱ dviṣa̭: ||6||
indrā̭gnī yu̱vāmi̱me̱3'bhi stomā̭ anūṣata | piba̭taṃ śambhuvā su̱tam ||7||
yā vā̱ṃ santi̭ puru̱spṛho̭ ni̱yuto̭ dā̱śuṣḙ narā | indrā̭gnī̱ tābhi̱rā ga̭tam ||8||
tābhi̱rā ga̭cchataṃ na̱rope̱daṃ sava̭naṃ su̱tam | indrā̭gnī̱ soma̭pītaye ||9||
tamī̭ḻiṣva̱ yo a̱rciṣā̱ vanā̱ viśvā̭ pari̱ṣvaja̭t | kṛ̱ṣṇā kṛ̱ṇoti̭ ji̱hvayā̭ ||10||
ya i̱ddha ā̱vivā̭sati su̱mnamindra̭sya̱ martya̭: | dyu̱mnāya̭ su̱tarā̭ a̱paḥ ||11||
tā no̱ vāja̭vatī̱riṣa̭ ā̱śūnpi̭pṛta̱marva̭taḥ | indra̭ma̱gniṃ ca̱ voḻha̭ve ||12||
u̱bhā vā̭mindrāgnī āhu̱vadhyā̭ u̱bhā rādha̭saḥ sa̱ha mā̭da̱yadhyai̭ |
u̱bhā dā̱tārā̭vi̱ṣāṃ ra̭yī̱ṇāmu̱bhā vāja̭sya sā̱tayḙ huve vām ||13||
ā no̱ gavyḙbhi̱raśvyai̭rvasa̱vyai̱3rupa̭ gacchatam |
sakhā̭yau de̱vau sa̱khyāya̭ śa̱mbhuvḙndrā̱gnī tā ha̭vāmahe ||14||
indrā̭gnī śṛṇu̱taṃ hava̱ṃ yaja̭mānasya sunva̱taḥ | vī̱taṃ ha̱vyānyā ga̭ta̱ṃ piba̭taṃ so̱myaṃ madhṷ ||15||
14 bārhaspatyo bharadvāja: | sarasvatī| gāyatrī; 1-3, 13 jagatī; 14 triṣṭup |
i̱yama̭dadādrabha̱samṛ̭ṇa̱cyuta̱ṃ divo̭dāsaṃ vadhrya̱śvāya̭ dā̱śuṣḙ |
yā śaśva̭ntamāca̱khādā̭va̱saṃ pa̱ṇiṃ tā tḙ dā̱trāṇi̭ tavi̱ṣā sa̭rasvati ||1||
i̱yaṃ śuṣmḙbhirbisa̱khā i̭vāruja̱tsānṷ girī̱ṇāṃ ta̭vi̱ṣebhi̭rū̱rmibhi̭: |
pā̱rā̱va̱ta̱ghnīmava̭se suvṛ̱ktibhi̱: sara̭svatī̱mā vi̭vāsema dhī̱tibhi̭: ||2||
sara̭svati deva̱nido̱ ni ba̭rhaya pra̱jāṃ viśva̭sya̱ bṛsa̭yasya mā̱yina̭: |
u̱ta kṣi̱tibhyo̱'vanī̭ravindo vi̱ṣamḙbhyo asravo vājinīvati ||3||
pra ṇo̭ de̱vī sara̭svatī̱ vājḙbhirvā̱jinī̭vatī | dhī̱nāma̭vi̱trya̭vatu ||4||
yastvā̭ devi sarasvatyupabrū̱te dhanḙ hi̱te | indra̱ṃ na vṛ̭tra̱tūryḙ ||5||
tvaṃ dḙvi sarasva̱tyavā̱ vājḙṣu vājini | radā̭ pū̱ṣeva̭ naḥ sa̱nim ||6||
u̱ta syā na̱: sara̭svatī gho̱rā hira̭ṇyavartaniḥ | vṛ̱tra̱ghnī va̭ṣṭi suṣṭu̱tim ||7||
yasyā̭ ana̱nto ahrṷtastve̱ṣaśca̭ri̱ṣṇura̭rṇa̱vaḥ | ama̱ścara̭ti̱ rorṷvat ||8||
sā no̱ viśvā̱ ati̱ dviṣa̱: svasṝ̭ra̱nyā ṛ̱tāva̭rī | ata̱nnahḙva̱ sūrya̭: ||9||
u̱ta na̭: pri̱yā pri̱yāsṷ sa̱ptasva̭sā̱ sujṷṣṭā | sara̭svatī̱ stomyā̭ bhūt ||10||
ā̱pa̱pruṣī̱ pārthi̭vānyu̱ru rajo̭ a̱ntari̭kṣam | sara̭svatī ni̱daspā̭tu ||11||
tri̱ṣa̱dhasthā̭ sa̱ptadhā̭tu̱: pañca̭ jā̱tā va̱rdhaya̭ntī | vājḙvāje̱ havyā̭ bhūt ||12||
pra yā ma̭hi̱mnā ma̱hinā̭su̱ ceki̭te dyu̱mnebhi̭ra̱nyā a̱pasā̭ma̱pasta̭mā |
ratha̭ iva bṛha̱tī vi̱bhvanḙ kṛ̱topa̱stutyā̭ ciki̱tuṣā̱ sara̭svatī ||13||
sara̭svatya̱bhi no̭ neṣi̱ vasyo̱ māpa̭ spharī̱: paya̭sā̱ mā na̱ ā dha̭k |
ju̱ṣasva̭ naḥ sa̱khyā ve̱śyā̭ ca̱ mā tvatkṣetrā̱ṇyara̭ṇāni ganma ||14||
11 bārhaspatyo bharadvāja: |aśvinau | triṣṭup |
stu̱ṣe narā̭ di̱vo a̱sya pra̱santā̱'śvinā̭ huve̱ jara̭māṇo a̱rkaiḥ |
yā sa̱dya u̱srā vyuṣi̱ jmo antā̱nyuyṷ̄ṣata̱: paryu̱rū varā̭ṃsi ||1||
tā ya̱jñamā śuci̭bhiścakramā̱ṇā ratha̭sya bhā̱nuṃ rṷrucū̱ rajo̭bhiḥ |
pu̱rū varā̱ṃsyami̭tā̱ mimā̭nā̱'po dhanvā̱nyati̭ yātho̱ ajrā̭n ||2||
tā ha̱ tyadva̱rtiryadara̭dhramugre̱tthā dhiya̭ ūhathu̱: śaśva̱daśvai̭: |
mano̭javebhiriṣi̱raiḥ śa̱yadhyai̱ pari̱ vyathi̭rdā̱śuṣo̱ martya̭sya ||3||
tā navya̭so̱ jara̭māṇasya̱ manmopa̭ bhūṣato yuyujā̱nasa̭ptī |
śubha̱ṃ pṛkṣa̱miṣa̱mūrja̱ṃ vaha̭ntā̱ hotā̭ yakṣatpra̱tno a̱dhrugyuvā̭nā ||4||
tā va̱lgū da̱srā pṷru̱śāka̭tamā pra̱tnā navya̭sā̱ vaca̱sā vi̭vāse |
yā śaṃsa̭te stuva̱te śambha̭viṣṭhā babhū̱vatṷrgṛṇa̱te ci̱trarā̭tī ||5||
tā bhu̱jyuṃ vibhi̭ra̱dbhyaḥ sa̭mu̱drāttugra̭sya sū̱numṷ̄hathū̱ rajo̭bhiḥ |
a̱re̱ṇubhi̱ryoja̭nebhirbhu̱jantā̭ pata̱tribhi̱rarṇa̭so̱ niru̱pasthā̭t ||6||
vi ja̱yuṣā̭ rathyā yāta̱madri̭ṃ śru̱taṃ hava̭ṃ vṛṣaṇā vadhrima̱tyāḥ |
da̱śa̱syantā̭ śa̱yavḙ pipyathu̱rgāmiti̭ cyavānā suma̱tiṃ bhṷraṇyū ||7||
yadro̭dasī pra̱divo̱ asti̱ bhūmā̱ heḻo̭ de̱vānā̭mu̱ta ma̭rtya̱trā |
tadā̭dityā vasavo rudriyāso rakṣo̱yuje̱ tapṷra̱ghaṃ da̭dhāta ||8||
ya ī̱ṃ rājā̭nāvṛtu̱thā vi̱dadha̱draja̭so mi̱tro varṷṇa̱ścikḙtat |
ga̱mbhī̱rāya̱ rakṣa̭se he̱tima̭sya̱ droghā̭ya ci̱dvaca̭sa̱ āna̭vāya ||9||
anta̭raiśca̱kraistana̭yāya va̱rtirdyu̱matā yā̭taṃ nṛ̱vatā̱ rathḙna |
sanṷtyena̱ tyaja̭sā̱ martya̭sya vanuṣya̱tāmapi̭ śī̱rṣā va̭vṛktam ||10||
ā pa̭ra̱mābhi̭ru̱ta ma̭dhya̱mābhi̭rni̱yudbhi̭ryātamava̱mābhi̭ra̱rvāk |
dṛ̱ḻhasya̭ ci̱dgoma̭to̱ vi vra̱jasya̱ duro̭ vartaṃ gṛṇa̱te ci̭trarātī ||11||
11 bārhaspatyo bharadvāja: | aśvinau | triṣṭup ,1 virāṭ ,11 ekapadā triṣṭup|
kva1 tyā va̱lgū pṷruhū̱tādya dū̱to na stomo̭'vida̱nnama̭svān |
ā yo a̱rvāṅnāsa̭tyā va̱varta̱ preṣṭhā̱ hyasa̭tho asya̱ manma̭n ||1||
ara̭ṃ me ganta̱ṃ hava̭nāyā̱smai gṛ̭ṇā̱nā yathā̱ pibā̭tho̱ andha̭: |
pari̭ ha̱ tyadva̱rtiryā̭tho ri̱ṣo na yatparo̱ nānta̭rastutu̱ryāt ||2||
akā̭ri vā̱mandha̭so̱ varī̭ma̱nnastā̭ri ba̱rhiḥ sṷprāya̱ṇata̭mam |
u̱ttā̱naha̭sto yuva̱yurva̭va̱ndā ''vā̱ṃ nakṣa̭nto̱ adra̭ya āñjan ||3||
ū̱rdhvo vā̭ma̱gnira̭dhva̱reṣva̭sthā̱tpra rā̱tirḙti jū̱rṇinī̭ ghṛ̱tācī̭ |
pra hotā̭ gū̱rtama̭nā urā̱ṇo'yṷkta̱ yo nāsa̭tyā̱ havī̭man ||4||
adhi̭ śri̱ye dṷhi̱tā sūrya̭sya̱ ratha̭ṃ tasthau purubhujā śa̱toti̭m |
pra mā̱yābhi̭rmāyinā bhūta̱matra̱ narā̭ nṛtū̱ jani̭manya̱jñiyā̭nām ||5||
yu̱vaṃ śrī̱bhirda̭rśa̱tābhi̭rā̱bhiḥ śu̱bhe pu̱ṣṭimṷ̄hathuḥ sū̱ryāyā̭: |
pra vā̱ṃ vayo̱ vapu̱ṣe'nṷ papta̱nnakṣa̱dvāṇī̱ suṣṭṷtā dhiṣṇyā vām ||6||
ā vā̱ṃ vayo'śvā̭so̱ vahi̭ṣṭhā a̱bhi prayo̭ nāsatyā vahantu |
pra vā̱ṃ ratho̱ mano̭javā asarjī̱ṣaḥ pṛ̱kṣa i̱ṣidho̱ anṷ pū̱rvīḥ ||7||
pu̱ru hi vā̭ṃ purubhujā de̱ṣṇaṃ dhe̱nuṃ na̱ iṣa̭ṃ pinvata̱masa̭krām |
stuta̭śca vāṃ mādhvī suṣṭu̱tiśca̱ rasā̭śca̱ ye vā̱manṷ rā̱timagma̭n ||8||
u̱ta ma̭ ṛ̱jre pura̭yasya ra̱ghvī sṷmī̱ḻhe śa̱taṃ pḙru̱ke ca̭ pa̱kvā |
śā̱ṇḍo dā̭ddhira̱ṇina̱: smaddi̭ṣṭī̱ndaśa̭ va̱śāso̭ abhi̱ṣāca̭ ṛ̱ṣvān ||9||
saṃ vā̭ṃ śa̱tā nā̭satyā sa̱hasrā'śvā̭nāṃ puru̱panthā̭ gi̱re dā̭t |
bha̱radvā̭jāya vīra̱ nū gi̱re dā̭ddha̱tā rakṣā̭ṃsi purudaṃsasā syuḥ ||10||
ā vā̭ṃ su̱mne vari̭mantsū̱ribhi̭: ṣyām ||11||
6 bārhaspatyo bharadvāja: |uṣā: | triṣṭup |
udṷ śri̱ya u̱ṣaso̱ roca̭mānā̱ asthṷra̱pāṃ normayo̱ ruśa̭ntaḥ |
kṛ̱ṇoti̱ viśvā̭ su̱pathā̭ su̱gānyabhṷ̄du̱ vasvī̱ dakṣi̭ṇā ma̱ghonī̭ ||1||
bha̱drā da̭dṛkṣa urvi̱yā vi bhā̱syuttḙ śo̱cirbhā̱navo̱ dyāma̭paptan |
ā̱virvakṣa̭: kṛṇuṣe śu̱mbhamā̱noṣo̭ devi̱ roca̭mānā̱ maho̭bhiḥ ||2||
vaha̭nti sīmaru̱ṇāso̱ ruśa̭nto̱ gāva̭: su̱bhagā̭murvi̱yā pra̭thā̱nām |
apḙjate̱ śūro̱ astḙva̱ śatrū̱nbādha̭te̱ tamo̭ aji̱ro na voḻhā̭ ||3||
su̱gota tḙ su̱pathā̱ parva̭teṣvavā̱te a̱pasta̭rasi svabhāno |
sā na̱ ā va̭ha pṛthuyāmannṛṣve ra̱yiṃ di̭vo duhitariṣa̱yadhyai̭ ||4||
sā va̭ha̱ yokṣabhi̱ravā̱toṣo̱ vara̱ṃ vaha̭si̱ joṣa̱manṷ |
tvaṃ di̭vo duhita̱ryā ha̭ de̱vī pū̱rvahṷ̄tau ma̱ṃhanā̭ darśa̱tā bhṷ̄: ||5||
utte̱ vaya̭ścidvasa̱tera̭papta̱nnara̭śca̱ ye pi̭tu̱bhājo̱ vyṷṣṭau |
a̱mā sa̱te va̭hasi̱ bhūri̭ vā̱mamuṣo̭ devi dā̱śuṣe̱ martyā̭ya ||6||
6 bārhaspatyo bharadvāja: | uṣā:| triṣṭup |
e̱ṣā syā no̭ duhi̱tā di̭vo̱jāḥ kṣi̱tīru̱cchantī̱ mānṷṣīrajīgaḥ |
yā bhā̱nunā̱ ruśa̭tā rā̱myāsvajñā̭yi ti̱rastama̭saścida̱ktūn ||1||
vi tadya̭yuraruṇa̱yugbhi̱raśvai̭ści̱traṃ bhā̭ntyu̱ṣasa̭śca̱ndrara̭thāḥ |
agra̭ṃ ya̱jñasya̭ bṛha̱to naya̭ntī̱rvi tā bā̭dhante̱ tama̱ ūrmyā̭yāḥ ||2||
śravo̱ vāja̱miṣa̱mūrja̱ṃ vaha̭ntī̱rni dā̱śuṣa̭ uṣaso̱ martyā̭ya |
ma̱ghonī̭rvī̱rava̱tpatya̭mānā̱ avo̭ dhāta vidha̱te ratna̭ma̱dya ||3||
i̱dā hi vo̭ vidha̱te ratna̱mastī̱dā vī̱rāya̭ dā̱śuṣa̭ uṣāsaḥ |
i̱dā viprā̭ya̱ jara̭te̱ yadu̱kthā ni ṣma̱ māva̭te vahathā pu̱rā ci̭t ||4||
i̱dā hi ta̭ uṣo adrisāno go̱trā gavā̱maṅgi̭raso gṛ̱ṇanti̭ |
vya1rkeṇa̭ bibhidu̱rbrahma̭ṇā ca sa̱tyā nṛ̱ṇāma̭bhavadde̱vahṷ̄tiḥ ||5||
u̱cchā di̭vo duhitaḥ pratna̱vanno̭ bharadvāja̱vadvi̭dha̱te ma̭ghoni |
su̱vīra̭ṃ ra̱yiṃ gṛ̭ṇa̱te ri̭rīhyurugā̱yamadhi̭ dhehi̱ śravo̭ naḥ ||6||
11 bārhaspatyo bharadvāja: | maruta:| triṣṭup |
vapu̱rnu tacci̭ki̱tuṣḙ cidastu samā̱naṃ nāma̭ dhe̱nu patya̭mānam |
martḙṣva̱nyaddo̱hasḙ pī̱pāya̭ sa̱kṛcchu̱kraṃ dṷduhe̱ pṛśni̱rūdha̭: ||1||
ye a̱gnayo̱ na śośṷcannidhā̱nā dviryattrirma̱ruto̭ vāvṛ̱dhanta̭ |
a̱re̱ṇavo̭ hira̱ṇyayā̭sa eṣāṃ sā̱kaṃ nṛ̱mṇaiḥ pauṃsyḙbhiśca bhūvan ||2||
ru̱drasya̱ ye mī̱ḻhuṣa̱: santi̭ pu̱trā yā~śco̱ nu dādhṛ̭vi̱rbhara̭dhyai |
vi̱de hi mā̱tā ma̱ho ma̱hī ṣā setpṛśni̭: su̱bhve̱3 garbha̱mādhā̭t ||3||
na ya īṣa̭nte ja̱nuṣo'yā̱ nva1ntaḥ santo̭'va̱dyāni̭ punā̱nāḥ |
niryaddu̱hre śuca̱yo'nu̱ joṣa̱manṷ śri̱yā ta̱nva̭mu̱kṣamā̭ṇāḥ ||4||
ma̱kṣū na yeṣṷ do̱hasḙ cida̱yā ā nāma̭ dhṛ̱ṣṇu mārṷta̱ṃ dadhā̭nāḥ |
na ye stau̱nā a̱yāso̭ ma̱hnā nū ci̭tsu̱dānu̱rava̭ yāsadu̱grān ||5||
ta idu̱grāḥ śava̭sā dhṛ̱ṣṇuṣḙṇā u̱bhe yṷjanta̱ roda̭sī su̱mekḙ |
adha̭ smaiṣu roda̱sī svaśo̭ci̱rāma̭vatsu tasthau̱ na roka̭: ||6||
a̱ne̱no vo̭ maruto̱ yāmo̭ astvana̱śvaści̱dyamaja̱tyara̭thīḥ |
a̱na̱va̱so a̭nabhī̱śū ra̭ja̱stūrvi roda̭sī pa̱thyā̭ yāti̱ sādha̭n ||7||
nāsya̭ va̱rtā na ta̭ru̱tā nva̭sti̱ marṷto̱ yamava̭tha̱ vāja̭sātau |
to̱ke vā̱ goṣu̱ tana̭ye̱ yama̱psu sa vra̱jaṃ dartā̱ pārye̱ adha̱ dyoḥ ||8||
pra ci̱trama̱rkaṃ gṛ̭ṇa̱te tu̱rāya̱ mārṷtāya̱ svata̭vase bharadhvam |
ye sahā̭ṃsi̱ saha̭sā̱ saha̭nte̱ reja̭te agne pṛthi̱vī ma̱khebhya̭: ||9||
tviṣī̭manto adhva̱rasyḙva di̱dyuttṛ̭ṣu̱cyava̭so ju̱hvo̱3 nāgneḥ |
a̱rcatra̭yo̱ dhuna̭yo̱ na vī̱rā bhrāja̭jjanmāno ma̱ruto̱ adhṛ̭ṣṭāḥ ||10||
taṃ vṛ̱dhanta̱ṃ mārṷta̱ṃ bhrāja̭dṛṣṭiṃ ru̱drasya̭ sū̱nuṃ ha̱vasā vi̭vāse |
di̱vaḥ śardhā̭ya̱ śuca̭yo manī̱ṣā gi̱rayo̱ nāpa̭ u̱grā a̭spṛdhran ||11||
11 bārhaspatyo bharadvāja: | mitrāvaruṇau | triṣṭup |
viśvḙṣāṃ vaḥ sa̱tāṃ jyeṣṭha̭tamā gī̱rbhirmi̱trāvarṷṇā vāvṛ̱dhadhyai̭ |
saṃ yā ra̱śmeva̭ ya̱matu̱ryami̭ṣṭhā̱ dvā janā̱~ asa̭mā bā̱hubhi̱: svaiḥ ||1||
i̱yaṃ madvā̱ṃ pra stṛ̭ṇīte manī̱ṣopa̭ pri̱yā nama̭sā ba̱rhiraccha̭ |
ya̱ntaṃ no̭ mitrāvaruṇā̱vadhṛ̭ṣṭaṃ cha̱rdiryadvā̭ṃ varū̱thya̭ṃ sudānū ||2||
ā yā̭taṃ mitrāvaruṇā suśa̱styupa̭ pri̱yā nama̭sā hū̱yamā̭nā |
saṃ yāva̭pna̱:stho a̱pasḙva̱ janā̭ñchrudhīya̱taści̭dyatatho mahi̱tvā ||3||
aśvā̱ na yā vā̱jinā̭ pū̱taba̭ndhū ṛ̱tā yadgarbha̱madi̭ti̱rbhara̭dhyai |
pra yā mahi̭ ma̱hāntā̱ jāya̭mānā gho̱rā martā̭ya ri̱pave̱ ni dī̭dhaḥ ||4||
viśve̱ yadvā̭ṃ ma̱ṃhanā̱ manda̭mānāḥ kṣa̱traṃ de̱vāso̱ ada̭dhuḥ sa̱joṣā̭: |
pari̱ yadbhū̱tho roda̭sī cidu̱rvī santi̱ spaśo̱ ada̭bdhāso̱ amṷ̄rāḥ ||5||
tā hi kṣa̱traṃ dhā̱rayḙthe̱ anu̱ dyūndṛ̱ṃhethe̱ sānṷmupa̱mādi̭va̱ dyoḥ |
dṛ̱ḻho nakṣa̭tra u̱ta vi̱śvadḙvo̱ bhūmi̱mātā̱ndyāṃ dhā̱sinā̱yoḥ ||6||
tā vi̱graṃ dhai̭the ja̱ṭhara̭ṃ pṛ̱ṇadhyā̱ ā yatsadma̱ sabhṛ̭tayaḥ pṛ̱ṇanti̭ |
 na mṛ̭ṣyante yuva̱tayo'vā̭tā̱ vi yatpayo̭ viśvajinvā̱ bhara̭nte ||7||
tā ji̱hvayā̱ sada̱medaṃ sṷme̱dhā ā yadvā̭ṃ sa̱tyo a̭ra̱tiṝ̱te bhūt |
tadvā̭ṃ mahi̱tvaṃ ghṛ̭tānnāvastu yu̱vaṃ dā̱śuṣe̱ vi ca̭yiṣṭa̱maṃha̭: ||8||
pra yadvā̭ṃ mitrāvaruṇā spū̱rdhanpri̱yā dhāma̭ yu̱vadhi̭tā mi̱nanti̭ |
na ye de̱vāsa̱ oha̭sā̱ na martā̱ aya̭jñasāco̱ apyo̱ na pu̱trāḥ ||9||
vi yadvāca̭ṃ kī̱stāso̱ bhara̭nte̱ śaṃsa̭nti̱ ke ci̭nni̱vido̭ manā̱nāḥ |
ādvā̭ṃ bravāma sa̱tyānyu̱kthā naki̭rde̱vebhi̭ryatatho mahi̱tvā ||10||
a̱vori̱tthā vā̭ṃ cha̱rdiṣo̭ a̱bhiṣṭaṷ yu̱vormi̭trāvaruṇā̱vaskṛ̭dhoyu |
anu̱ yadgāva̭: sphu̱rānṛ̭ji̱pyaṃ dhṛ̱ṣṇuṃ yadraṇe̱ vṛṣa̭ṇaṃ yu̱naja̭n ||11||
11 bārhaspatyo bharadvāja: |
indrāvaruṇau | triṣṭup , 9-10 jagatī |
śru̱ṣṭī vā̭ṃ ya̱jña udya̭taḥ sa̱joṣā̭ manu̱ṣvadvṛ̱ktaba̭rhiṣo̱ yaja̭dhyai |
ā ya indrā̱varṷṇāvi̱ṣe a̱dya ma̱he su̱mnāya̭ ma̱ha ā̭va̱varta̭t ||1||
tā hi śreṣṭhā̭ de̱vatā̭tā tu̱jā śūrā̭ṇā̱ṃ śavi̭ṣṭhā̱ tā hi bhū̱tam |
ma̱ghonā̱ṃ maṃhi̭ṣṭhā tuvi̱śuṣma̭ ṛ̱tena̭ vṛtra̱turā̱ sarva̭senā ||2||
tā gṛ̭ṇīhi nama̱syḙbhiḥ śū̱ṣaiḥ su̱mnebhi̱rindrā̱varṷṇā cakā̱nā |
vajrḙṇā̱nyaḥ śava̭sā̱ hanti̭ vṛ̱traṃ siṣa̭ktya̱nyo vṛ̱janḙṣu̱ vipra̭: ||3||
gnāśca̱ yannara̭śca vāvṛ̱dhanta̱ viśvḙ de̱vāso̭ na̱rāṃ svagṷ̄rtāḥ |
praibhya̭ indrāvaruṇā mahi̱tvā dyauśca̭ pṛthivi bhūtamu̱rvī ||4||
sa itsu̱dānu̱: svavā̭~ ṛ̱tāvendrā̱ yo vā̭ṃ varuṇa̱ dāśa̭ti̱ tman |
i̱ṣā sa dvi̱ṣasta̭re̱ddāsvā̱nvaṃsa̭dra̱yiṃ ra̭yi̱vata̭śca̱ janā̭n ||5||
yaṃ yu̱vaṃ dā̱śva̭dhvarāya devā ra̱yiṃ dha̱ttho vasṷmantaṃ puru̱kṣum |
a̱sme sa i̭ndrāvaruṇā̱vapi̭ ṣyā̱tpra yo bha̱nakti̭ va̱nuṣā̱maśa̭stīḥ ||6||
u̱ta na̭: sutrā̱tro de̱vago̭pāḥ sū̱ribhya̭ indrāvaruṇā ra̱yiḥ ṣyā̭t |
yeṣā̱ṃ śuṣma̱: pṛta̭nāsu sā̱hvānpra sa̱dyo dyu̱mnā ti̱rate̱ tatṷriḥ ||7||
nū na̭ indrāvaruṇā gṛṇā̱nā pṛ̱ṅktaṃ ra̱yiṃ saṷśrava̱sāya̭ devā |
i̱tthā gṛ̱ṇanto̭ ma̱hina̭sya̱ śardho̱'po na nā̱vā dṷri̱tā ta̭rema ||8||
pra sa̱mrājḙ bṛha̱te manma̱ nu pri̱yamarca̭ de̱vāya̱ varṷṇāya sa̱pratha̭: |
a̱yaṃ ya u̱rvī ma̭hi̱nā mahi̭vrata̱: kratvā̭ vi̱bhātya̱jaro̱ na śo̱ciṣā̭ ||9||
indrā̭varuṇā sutapāvi̱maṃ su̱taṃ soma̭ṃ pibata̱ṃ madya̭ṃ dhṛtavratā |
yu̱vo ratho̭ adhva̱raṃ de̱vavī̭taye̱ prati̱ svasa̭ra̱mupa̭ yāti pī̱tayḙ ||10||
indrā̭varuṇā̱ madhṷmattamasya̱ vṛṣṇa̱: soma̭sya vṛṣa̱ṇā vṛ̭ṣethām |
i̱daṃ vā̱mandha̱: pari̭ṣiktama̱sme ā̱sadyā̱sminba̱rhiṣi̭ mādayethām ||11||
8 bārhaspatyo bharadvāja: |
indrāviṣṇū| triṣṭup |
saṃ vā̱ṃ karma̭ṇā̱ sami̱ṣā hi̭no̱mīndrā̭viṣṇū̱ apa̭saspā̱re a̱sya |
ju̱ṣethā̭ṃ ya̱jñaṃ dravi̭ṇaṃ ca dhatta̱mari̭ṣṭairnaḥ pa̱thibhi̭: pā̱raya̭ntā ||1||
yā viśvā̭sāṃ jani̱tārā̭ matī̱nāmindrā̱viṣṇṷ̄ ka̱laśā̭ soma̱dhānā̭ |
pra vā̱ṃ gira̭: śa̱syamā̭nā avantu̱ pra stomā̭so gī̱yamā̭nāso a̱rkaiḥ ||2||
indrā̭viṣṇū madapatī madānā̱mā soma̭ṃ yāta̱ṃ dravi̭ṇo̱ dadhā̭nā |
saṃ vā̭mañjantva̱ktubhi̭rmatī̱nāṃ saṃ stomā̭saḥ śa̱syamā̭nāsa u̱kthaiḥ ||3||
ā vā̱maśvā̭so abhimāti̱ṣāha̱ indrā̭viṣṇū sadha̱mādo̭ vahantu |
ju̱ṣethā̱ṃ viśvā̱ hava̭nā matī̱nāmupa̱ brahmā̭ṇi śṛṇuta̱ṃ giro̭ me ||4||
indrā̭viṣṇū̱ tatpa̭na̱yāyya̭ṃ vā̱ṃ soma̭sya̱ mada̭ u̱ru ca̭kramāthe |
akṛ̭ṇutama̱ntari̭kṣa̱ṃ varī̱yo'pra̭thataṃ jī̱vasḙ no̱ rajā̭ṃsi ||5||
indrā̭viṣṇū ha̱viṣā̭ vāvṛdhā̱nā'grā̭dvānā̱ nama̭sā rātahavyā |
ghṛtā̭sutī̱ dravi̭ṇaṃ dhattama̱sme sa̭mu̱draḥ stha̭: ka̱laśa̭: soma̱dhāna̭: ||6||
indrā̭viṣṇū̱ piba̭ta̱ṃ madhvo̭ a̱sya soma̭sya dasrā ja̱ṭhara̭ṃ pṛṇethām |
ā vā̱mandhā̭ṃsi madi̱rāṇya̭gma̱nnupa̱ brahmā̭ṇi śṛṇuta̱ṃ hava̭ṃ me ||7||
u̱bhā ji̭gyathu̱rna parā̭ jayethe̱ na parā̭ jigye kata̱raśca̱naino̭: |
indra̭śca viṣṇo̱ yadapa̭spṛdhethāṃ tre̱dhā sa̱hasra̱ṃ vi tadai̭rayethām ||8||
6 bārhaspatyo bharadvāja: |
dyāvāpṛthivī|jagatī |
ghṛ̱tava̭tī̱ bhuva̭nānāmabhi̱śriyo̱rvī pṛ̱thvī ma̭dhu̱dughḙ su̱peśa̭sā |
dyāvā̭pṛthi̱vī varṷṇasya̱ dharma̭ṇā̱ viṣka̭bhite a̱jare̱ bhūri̭retasā ||1||
asa̭ścantī̱ bhūri̭dhāre̱ paya̭svatī ghṛ̱taṃ dṷhāte su̱kṛte̱ śuci̭vrate |
rāja̭ntī a̱sya bhuva̭nasya rodasī a̱sme reta̭: siñcata̱ṃ yanmanṷrhitam ||2||
yo vā̭mṛ̱jave̱ krama̭ṇāya rodasī̱ marto̭ da̱dāśa̭ dhiṣaṇe̱ sa sā̭dhati |
pra pra̱jābhi̭rjāyate̱ dharma̭ṇa̱spari̭ yu̱voḥ si̱ktā viṣṷrūpāṇi̱ savra̭tā ||3||
ghṛ̱tena̱ dyāvā̭pṛthi̱vī a̱bhīvṛ̭te ghṛta̱śriyā̭ ghṛta̱pṛcā̭ ghṛtā̱vṛdhā̭ |
u̱rvī pṛ̱thvī ho̭tṛ̱vūryḙ pu̱rohi̭te̱ te idviprā̭ īḻate su̱mnami̱ṣṭayḙ ||4||
madhṷ no̱ dyāvā̭pṛthi̱vī mi̭mikṣatāṃ madhu̱ścutā̭ madhu̱dughe̱ madhṷvrate |
dadhā̭ne ya̱jñaṃ dravi̭ṇaṃ ca de̱vatā̱ mahi̱ śravo̱ vāja̭ma̱sme su̱vīrya̭m ||5||
ūrja̭ṃ no̱ dyauśca̭ pṛthi̱vī ca̭ pinvatāṃ pi̱tā mā̱tā vi̭śva̱vidā̭ su̱daṃsa̭sā |
sa̱ṃra̱rā̱ṇe roda̭sī vi̱śvaśa̭mbhuvā sa̱niṃ vāja̭ṃ ra̱yima̱sme sami̭nvatām ||6||
6 bārhaspatyo bharadvāja: | savitā |jagatī, 4-6 triṣṭup |
udu̱ ṣya de̱vaḥ sa̭vi̱tā hi̭ra̱ṇyayā̭ bā̱hū a̭yaṃsta̱ sava̭nāya su̱kratṷ: |
ghṛ̱tena̭ pā̱ṇī a̱bhi prṷṣṇute ma̱kho yuvā̭ su̱dakṣo̱ raja̭so̱ vidha̭rmaṇi ||1||
de̱vasya̭ va̱yaṃ sa̭vi̱tuḥ savī̭mani̱ śreṣṭhḙ syāma̱ vasṷnaśca dā̱vanḙ |
yo viśva̭sya dvi̱pado̱ yaścatṷṣpado ni̱veśa̭ne prasa̱ve cāsi̱ bhūma̭naḥ ||2||
ada̭bdhebhiḥ savitaḥ pā̱yubhi̱ṣṭvaṃ śi̱vebhi̭ra̱dya pari̭ pāhi no̱ gaya̭m |
hira̭ṇyajihvaḥ suvi̱tāya̱ navya̭se̱ rakṣā̱ māki̭rno a̱ghaśa̭ṃsa īśata ||3||
udu̱ ṣya de̱vaḥ sa̭vi̱tā damṷ̄nā̱ hira̭ṇyapāṇiḥ pratido̱ṣama̭sthāt |
ayo̭hanuryaja̱to ma̱ndraji̭hva̱ ā dā̱śuṣḙ suvati̱ bhūri̭ vā̱mam ||4||
udṷ̄ ayā~ upava̱kteva̭ bā̱hū hi̭ra̱ṇyayā̭ savi̱tā su̱pratī̭kā |
di̱vo rohā̭ṃsyaruhatpṛthi̱vyā arī̭ramatpa̱taya̱tkacci̱dabhva̭m ||5||
vā̱mama̱dya sa̭vitarvā̱mamu̱ śvo di̱vedi̭ve vā̱mama̱smabhya̭ṃ sāvīḥ |
vā̱masya̱ hi kṣaya̭sya deva̱ bhūrḙra̱yā dhi̱yā vā̭ma̱bhāja̭: syāma ||6||
5 bārhaspatyo bharadvāja: |
indrāsomau|triṣṭup |
indrā̭somā̱ mahi̱ tadvā̭ṃ mahi̱tvaṃ yu̱vaṃ ma̱hāni̭ pratha̱māni̭ cakrathuḥ |
yu̱vaṃ sūrya̭ṃ vivi̱dathṷryu̱vaṃ sva1rviśvā̱ tamā̭ṃsyahataṃ ni̱daśca̭ ||1||
indrā̭somā vā̱saya̭tha u̱ṣāsa̱mutsūrya̭ṃ nayatho̱ jyoti̭ṣā sa̱ha |
upa̱ dyāṃ ska̱mbhathu̱: skambha̭ne̱nāpra̭thataṃ pṛthi̱vīṃ mā̱tara̱ṃ vi ||2||
indrā̭somā̱vahi̭ma̱paḥ pa̭ri̱ṣṭhāṃ ha̱tho vṛ̱tramanṷ vā̱ṃ dyaura̭manyata |
 prārṇā̭ṃsyairayataṃ na̱dīnā̱mā sa̭mu̱drāṇi̭ paprathuḥ pu̱rūṇi̭ ||3||
indrā̭somā pa̱kvamā̱māsva̱ntarni gavā̱midda̭dhathurva̱kṣaṇā̭su |
ja̱gṛ̱bhathu̱rana̭pinaddhamāsu̱ ruśa̭cci̱trāsu̱ jaga̭tīṣva̱ntaḥ ||4||
indrā̭somā yu̱vama̱ṅga tarṷtramapatya̱sāca̱ṃ śrutya̭ṃ rarāthe |
yu̱vaṃ śuṣma̱ṃ narya̭ṃ carṣa̱ṇibhya̱: saṃ vi̭vyathuḥ pṛtanā̱ṣāha̭mugrā ||5||
3 bārhaspatyo bharadvāja: |
bṛhaspati:| triṣṭup |
yo a̭dri̱bhitpra̭thama̱jā ṛ̱tāvā̱ bṛha̱spati̭rāṅgira̱so ha̱viṣmā̭n |
dvi̱barha̭jmā prāgharma̱satpi̱tā na̱ ā roda̭sī vṛṣa̱bho ro̭ravīti ||1||
janā̭ya ci̱dya īva̭ta u lo̱kaṃ bṛha̱spati̭rde̱vahṷ̄tau ca̱kāra̭ |
ghnanvṛ̱trāṇi̱ vi puro̭ dardarīti̱ jaya̱ñchatrṷ̄~ra̱mitrā̭npṛ̱tsu sāha̭n ||2||
bṛha̱spati̱: sama̭jaya̱dvasṷ̄ni ma̱ho vra̱jāngoma̭to de̱va e̱ṣaḥ |
a̱paḥ siṣā̭sa̱ntsva1rapra̭tīto̱ bṛha̱spati̱rhantya̱mitra̭ma̱rkaiḥ ||3||
4 bārhaspatyo bharadvāja: |
somārudrau| triṣṭup |
somā̭rudrā dhā̱rayḙthāmasu̱ryaṃ1 pra vā̭mi̱ṣṭayo'ra̭maśnuvantu |
damḙdame sa̱pta ratnā̱ dadhā̭nā̱ śaṃ no̭ bhūtaṃ dvi̱pade̱ śaṃ catṷṣpade ||1||
somā̭rudrā̱ vi vṛ̭hata̱ṃ viṣṷ̄cī̱mamī̭vā̱ yā no̱ gaya̭māvi̱veśa̭ |
ā̱re bā̭dhethā̱ṃ niṝ̭tiṃ parā̱caira̱sme bha̱drā saṷśrava̱sāni̭ santu ||2||
somā̭rudrā yu̱vame̱tānya̱sme viśvā̭ ta̱nūṣṷ bheṣa̱jāni̭ dhattam |
ava̭ syataṃ mu̱ñcata̱ṃ yanno̱ asti̭ ta̱nūṣṷ ba̱ddhaṃ kṛ̱tameno̭ a̱smat ||3||
ti̱gmāyṷdhau ti̱gmahḙtī su̱śevau̱ somā̭rudrāvi̱ha su mṛ̭ḻataṃ naḥ |
pra no̭ muñcata̱ṃ varṷṇasya̱ pāśā̭dgopā̱yata̭ṃ naḥ sumana̱syamā̭nā ||4||
19 pāyurbhāradvāja: | { saṃgrāmāśiṣa: } 1 varma, 2 dhanu:, 3 jyā , 4 ārtnī, iṣudhi:,  6 [ pūrvārdha:] sārathi :, 6 {uttarārdha:} raśmaya: , 7 aśvā: , 8 ratha: , 9 rathagopā:, 10 brāhmaṇa–pitṛ-soma-dyāvā-pṛthivī-pūṣāṇa: ; 11-12, 15-16 iṣava:, 13 pratoda:, 14 hastaghna:, 17 yuddhabhūmi-kavaca–brahmaṇaspatyādaya:, 18 varma–soma–varuṇā:, 19 devabrahmāṇī| triṣṭup ;  6,10 jagatī;  12,13,15,16,19 anuṣṭup , 17 paṅkti: |
jī̱mūta̭syeva bhavati̱ pratī̭ka̱ṃ yadva̱rmī yāti̭ sa̱madā̭mu̱pasthḙ |
anā̭viddhayā ta̱nvā̭ jaya̱ tvaṃ sa tvā̱ varma̭ṇo mahi̱mā pi̭partu ||1||
dhanva̭nā̱ gā dhanva̭nā̱jiṃ ja̭yema̱ dhanva̭nā tī̱vrāḥ sa̱mado̭ jayema |
dhanu̱: śatro̭rapakā̱maṃ kṛ̭ṇoti̱ dhanva̭nā̱ sarvā̭: pra̱diśo̭ jayema ||2||
va̱kṣyantī̱vedā ga̭nīganti̱ karṇa̭ṃ pri̱yaṃ sakhā̭yaṃ pariṣasvajā̱nā |
yoṣḙva śiṅkte̱ vita̱tādhi̱ dhanva̱ñjyā i̱yaṃ sama̭ne pā̱raya̭ntī ||3||
te ā̱cara̭ntī̱ sama̭neva̱ yoṣā̭ mā̱teva̭ pu̱traṃ bi̭bhṛtāmu̱pasthḙ |
apa̱ śatrṷ̄nvidhyatāṃ saṃvidā̱ne ārtnī̭ i̱me vi̭ṣphu̱rantī̭ a̱mitrā̭n ||4||
ba̱hvī̱nāṃ pi̱tā ba̱hura̭sya pu̱traści̱ścā kṛ̭ṇoti̱ sama̭nāva̱gatya̭ |
i̱ṣu̱dhiḥ saṅkā̱: pṛta̭nāśca̱ sarvā̭: pṛ̱ṣṭhe nina̭ddho jayati̱ prasṷ̄taḥ ||5||
rathe̱ tiṣṭha̭nnayati vā̱jina̭: pu̱ro yatra̭yatra kā̱maya̭te suṣāra̱thiḥ |
a̱bhīśṷ̄nāṃ mahi̱māna̭ṃ panāyata̱ mana̭: pa̱ścādanṷ yacchanti ra̱śmaya̭: ||6||
tī̱vrānghoṣā̭nkṛṇvate̱ vṛṣa̭pāṇa̱yo'śvā̱ rathḙbhiḥ sa̱ha vā̱jaya̭ntaḥ |
a̱va̱krāma̭nta̱: prapa̭daira̱mitrā̭nkṣi̱ṇanti̱ śatrū̱~rana̭pavyayantaḥ ||7||
ra̱tha̱vāha̭naṃ ha̱vira̭sya̱ nāma̱ yatrāyṷdha̱ṃ nihi̭tamasya̱ varma̭ |
tatrā̱ ratha̱mupa̭ śa̱gmaṃ sa̭dema vi̱śvāhā̭ va̱yaṃ sṷmana̱syamā̭nāḥ ||8||
svā̱du̱ṣa̱ṃsada̭: pi̱taro̭ vayo̱dhāḥ kṛ̭cchre̱śrita̱: śaktī̭vanto gabhī̱rāḥ |
ci̱trasḙnā̱ iṣṷbalā̱ amṛ̭dhrāḥ sa̱tovī̭rā u̱ravo̭ vrātasā̱hāḥ ||9||
brāhma̭ṇāsa̱: pita̭ra̱: somyā̭saḥ śi̱ve no̱ dyāvā̭pṛthi̱vī a̭ne̱hasā̭ |
pū̱ṣā na̭: pātu duri̱tādṛ̭tāvṛdho̱ rakṣā̱ māki̭rno a̱ghaśa̭ṃsa īśata ||10||
su̱pa̱rṇaṃ va̭ste mṛ̱go a̭syā̱ danto̱ gobhi̱: saṃna̭ddhā patati̱ prasṷ̄tā |
yatrā̱ nara̱: saṃ ca̱ vi ca̱ drava̭nti̱ tatrā̱smabhya̱miṣa̭va̱: śarma̭ yaṃsan ||11||
ṛjī̭te̱ pari̭ vṛṅdhi̱ no'śmā̭ bhavatu nasta̱nūḥ | somo̱ adhi̭ bravītu̱ no'di̭ti̱: śarma̭ yacchatu ||12||
ā ja̭ṅghanti̱ sānvḙṣāṃ ja̱ghanā̱~ upa̭ jighnate | aśvā̭jani̱ pracḙta̱so'śvā̭ntsa̱matsṷ codaya ||13||
ahi̭riva bho̱gaiḥ paryḙti bā̱huṃ jyāyā̭ he̱tiṃ pa̭ri̱bādha̭mānaḥ |
ha̱sta̱ghno viśvā̭ va̱yunā̭ni vi̱dvānpumā̱npumā̭ṃsa̱ṃ pari̭ pātu vi̱śvata̭: ||14||
ālā̭ktā̱ yā rurṷśī̱rṣṇyatho̱ yasyā̱ ayo̱ mukha̭m | i̱daṃ pa̱rjanya̭retasa̱ iṣvai̭ de̱vyai bṛ̱hannama̭: ||15||
ava̭sṛṣṭā̱ parā̭ pata̱ śara̭vye̱ brahma̭saṃśite | gacchā̱mitrā̱npra pa̭dyasva̱ māmīṣā̱ṃ kaṃ ca̱nocchi̭ṣaḥ ||16||
yatra̭ bā̱ṇāḥ sa̱mpata̭nti kumā̱rā vi̭śi̱khā i̭va |
tatrā̭ no̱ brahma̭ṇa̱spati̱radi̭ti̱: śarma̭ yacchatu vi̱śvāhā̱ śarma̭ yacchatu ||17||
marmā̭ṇi te̱ varma̭ṇā chādayāmi̱ soma̭stvā̱ rājā̱mṛte̱nānṷ vastām |
u̱rorvarī̭yo̱ varṷṇaste kṛṇotu̱ jaya̭nta̱ṃ tvānṷ de̱vā ma̭dantu ||18||
yo na̱: svo ara̭ṇo̱ yaśca̱ niṣṭyo̱ jighā̭ṃsati | de̱vāstaṃ sarvḙ dhūrvantu̱ brahma̱ varma̱ mamānta̭ram ||19||