Rigveda — Mandala 7

25 maitrāvaruṇirvasiṣṭha:| agni: | virāṭ ,19-25  triṣṭup |
a̱gniṃ naro̱ dīdhi̭tibhira̱raṇyo̱rhasta̭cyutī janayanta praśa̱stam |
dū̱re̱dṛśa̭ṃ gṛ̱hapa̭timatha̱ryum ||1||
tama̱gnimaste̱ vasa̭vo̱ nyṛ̭ṇvantsuprati̱cakṣa̱mava̭se̱ kuta̭ścit |
da̱kṣāyyo̱ yo dama̱ āsa̱ nitya̭: ||2||
preddho̭ agne dīdihi pu̱ro no'ja̭srayā sū̱rmyā̭ yaviṣṭha |
tvāṃ śaśva̭nta̱ upa̭ yanti̱ vājā̭: ||3||
pra te a̱gnayo̱'gnibhyo̱ vara̱ṃ niḥ su̱vīrā̭saḥ śośucanta dyu̱manta̭: |
yatrā̱ nara̭: sa̱māsa̭te sujā̱tāḥ ||4||
dā no̭ agne dhi̱yā ra̱yiṃ su̱vīra̭ṃ svapa̱tyaṃ sa̭hasya praśa̱stam |
 na yaṃ yāvā̱ tara̭ti yātu̱māvā̭n ||5||
upa̱ yameti̭ yuva̱tiḥ su̱dakṣa̭ṃ do̱ṣā vasto̭rha̱viṣma̭tī ghṛ̱tācī̭ |
upa̱ svaina̭ma̱rama̭tirvasū̱yuḥ ||6||
viśvā̭ a̱gne'pa̭ da̱hārā̭tī̱ryebhi̱stapo̭bhi̱rada̭ho̱ jarṷ̄tham |
pra ni̭sva̱raṃ cā̭taya̱svāmī̭vām ||7||
ā yastḙ agna idha̱te anī̭ka̱ṃ vasi̭ṣṭha̱ śukra̱ dīdi̭va̱: pāva̭ka |
u̱to na̭ e̱bhiḥ sta̱vathai̭ri̱ha syā̭: ||8||
vi ye tḙ agne bheji̱re anī̭ka̱ṃ martā̱ nara̱: pitryā̭saḥ puru̱trā |
u̱to na̭ e̱bhiḥ su̱manā̭ i̱ha syā̭: ||9||
i̱me naro̭ vṛtra̱hatyḙṣu̱ śūrā̱ viśvā̱ adḙvīra̱bhi sa̭ntu mā̱yāḥ |
ye me̱ dhiya̭ṃ pa̱naya̭nta praśa̱stām ||10||
mā śūnḙ agne̱ ni ṣa̭dāma nṛ̱ṇāṃ māśeṣa̭so̱'vīra̭tā̱ pari̭ tvā |
pra̱jāva̭tīṣu̱ duryā̭su durya ||11||
yama̱śvī nitya̭mupa̱yāti̭ ya̱jñaṃ pra̱jāva̭ntaṃ svapa̱tyaṃ kṣaya̭ṃ naḥ |
svaja̭nmanā̱ śeṣa̭sā vāvṛdhā̱nam ||12||
pā̱hi no̭ agne ra̱kṣaso̱ ajṷṣṭātpā̱hi dhū̱rterara̭ruṣo aghā̱yoḥ |
tvā yu̱jā pṛ̭tanā̱yū~ra̱bhi ṣyā̭m ||13||
seda̱gnira̱gnī~ratya̭stva̱nyānyatra̭ vā̱jī tana̭yo vī̱ḻupā̭ṇiḥ |
sa̱hasra̭pāthā a̱kṣarā̭ sa̱meti̭ ||14||
seda̱gniryo va̭nuṣya̱to ni̱pāti̭ same̱ddhāra̱maṃha̭sa uru̱ṣyāt |
 su̱jā̱tāsa̱: pari̭ caranti vī̱rāḥ ||15||
a̱yaṃ so a̱gnirāhṷtaḥ puru̱trā yamīśā̭na̱: samidi̱ndhe ha̱viṣmā̭n |
pari̱ yametya̭dhva̱reṣu̱ hotā̭ ||16||
tve a̭gna ā̱hava̭nāni̱ bhūrī̭śā̱nāsa̱ ā jṷhuyāma̱ nityā̭ | u̱bhā kṛ̱ṇvanto̭ vaha̱tū mi̱yedhḙ ||17||
i̱mo a̭gne vī̱tata̭māni ha̱vyā 'ja̭sro vakṣi de̱vatā̭ti̱maccha̭ | prati̭ na īṃ sura̱bhīṇi̭ vyantu ||18||
mā no̭ agne̱'vīra̭te̱ parā̭ dā du̱rvāsa̱se'ma̭taye̱ mā no̭ a̱syai |
mā na̭: kṣu̱dhe mā ra̱kṣasa̭ ṛtāvo̱ mā no̱ dame̱ mā vana̱ ā jṷhūrthāḥ ||19||
nū me̱ brahmā̭ṇyagna̱ uccha̭śādhi̱ tvaṃ dḙva ma̱ghava̭dbhyaḥ suṣūdaḥ |
rā̱tau syā̭mo̱bhayā̭sa̱ ā tḙ yū̱yaṃ pā̭ta sva̱stibhi̱: sadā̭ naḥ ||20||
tvama̭gne su̱havo̭ ra̱ṇvasa̭ṃdṛksudī̱tī sṷ̄no sahaso didīhi |
mā tve sacā̱ tana̭ye̱ nitya̱ ā dha̱ṅmā vī̱ro a̱smannaryo̱ vi dā̭sīt ||21||
mā no̭ agne durbhṛ̱taye̱ sacai̱ṣu de̱veddhḙṣva̱gniṣu̱ pra vo̭caḥ |
mā tḙ a̱smāndṷrma̱tayo̭ bhṛ̱mācci̭dde̱vasya̭ sūno sahaso naśanta ||22||
sa marto̭ agne svanīka re̱vānama̭rtye̱ ya ā̭ju̱hoti̭ ha̱vyam |
sa de̱vatā̭ vasu̱vani̭ṃ dadhāti̱ yaṃ sū̱rira̱rthī pṛ̱cchamā̭na̱ eti̭ ||23||
ma̱ho no̭ agne suvi̱tasya̭ vi̱dvānra̱yiṃ sū̱ribhya̱ ā va̭hā bṛ̱hanta̭m |
yena̭ va̱yaṃ sa̭hasāva̱nmade̱mā'vi̭kṣitāsa̱ āyṷṣā su̱vīrā̭: ||24||
nū me̱ brahmā̭ṇyagna̱ uccha̭śādhi̱ tvaṃ dḙva ma̱ghava̭dbhyaḥ suṣūdaḥ |
rā̱tau syā̭mo̱bhayā̭sa̱ ā tḙ yū̱yaṃ pā̭ta sva̱stibhi̱: sadā̭ naḥ ||25||
11maitrāvaruṇirvasiṣṭha:|āprīsūktaṃ= (1 idhma: samiddho'gnirvā, 2 narāśaṃsa:,3 iḻa :, 4 barhi:, 5 devīrdvāra: , 6 uṣāsānaktā, 7 daivyo hotārau pracetaso, 8 tisro devya: sarasvatīḻābhāratya:, 9 tvaṣṭā , 10 vanaspati : , 11 svāhākṛtaya: } | triṣṭup |
ju̱ṣasva̭ naḥ sa̱midha̭magne a̱dya śocā̭ bṛ̱hadya̭ja̱taṃ dhū̱mamṛ̱ṇvan |
upa̭ spṛśa di̱vyaṃ sānu̱ stūpai̱: saṃ ra̱śmibhi̭statana̱: sūrya̭sya ||1||
narā̱śaṃsa̭sya mahi̱māna̭meṣā̱mupa̭ stoṣāma yaja̱tasya̭ ya̱jñaiḥ |
ye su̱krata̭va̱: śuca̭yo dhiya̱ṃdhāḥ svada̭nti de̱vā u̱bhayā̭ni ha̱vyā ||2||
ī̱ḻenya̭ṃ vo̱ asṷraṃ su̱dakṣa̭ma̱ntardū̱taṃ roda̭sī satya̱vāca̭m |
ma̱nu̱ṣvada̱gniṃ manṷnā̱ sami̭ddha̱ṃ sama̭dhva̱rāya̱ sada̱minma̭hema ||3||
sa̱pa̱ryavo̱ bhara̭māṇā abhi̱jñu pra vṛ̭ñjate̱ nama̭sā ba̱rhira̱gnau |
ā̱juhvā̭nā ghṛ̱tapṛ̭ṣṭha̱ṃ pṛṣa̭dva̱dadhva̭ryavo ha̱viṣā̭ marjayadhvam ||4||
svā̱dhyo̱3 vi duro̭ deva̱yanto'śi̭śrayū ratha̱yurde̱vatā̭tā |
pū̱rvī śiśu̱ṃ na mā̱tarā̭ rihā̱ṇe sama̱gruvo̱ na sama̭neṣvañjan ||5||
u̱ta yoṣa̭ṇe di̱vye ma̱hī na̭ u̱ṣāsā̱naktā̭ su̱dughḙva dhe̱nuḥ |
ba̱rhi̱ṣadā̭ puruhū̱te ma̱ghonī̱ ā ya̱jñiyḙ suvi̱tāya̭ śrayetām ||6||
viprā̭ ya̱jñeṣu̱ mānṷṣeṣu kā̱rū manyḙ vāṃ jā̱tavḙdasā̱ yaja̭dhyai |
ū̱rdhvaṃ no̭ adhva̱raṃ kṛ̭ta̱ṃ havḙṣu̱ tā de̱veṣṷ vanatho̱ vāryā̭ṇi ||7||
ā bhāra̭tī̱ bhāra̭tībhiḥ sa̱joṣā̱ iḻā̭ de̱vairma̭nu̱ṣyḙbhira̱gniḥ |
sara̭svatī sārasva̱tebhi̭ra̱rvākti̱sro de̱vīrba̱rhiredaṃ sa̭dantu ||8||
tanna̭stu̱rīpa̱madha̭ poṣayi̱tnu deva̭ tvaṣṭa̱rvi ra̭rā̱ṇaḥ sya̭sva |
yato̭ vī̱raḥ ka̭rma̱ṇya̭: su̱dakṣo̭ yu̱ktagrā̭vā̱ jāya̭te de̱vakā̭maḥ ||9||
vana̭spa̱te'va̭ sṛ̱jopa̭ de̱vāna̱gnirha̱viḥ śa̭mi̱tā sṷ̄dayāti |
sedu̱ hotā̭ sa̱tyata̭ro yajāti̱ yathā̭ de̱vānā̱ṃ jani̭māni̱ veda̭ ||10||
ā yā̭hyagne samidhā̱no a̱rvāṅindrḙṇa de̱vaiḥ sa̱ratha̭ṃ tu̱rebhi̭: |
ba̱rhirna̭ āstā̱madi̭tiḥ supu̱trā svāhā̭ de̱vā a̱mṛtā̭ mādayantām ||11||
10 maitrāvaruṇirvasiṣṭha:| agni: |  triṣṭup |
a̱gniṃ vo̭ de̱vama̱gnibhi̭: sa̱joṣā̱ yaji̭ṣṭhaṃ dū̱tama̭dhva̱re kṛ̭ṇudhvam |
 yo martyḙṣu̱ nidhrṷviṝ̱tāvā̱ tapṷrmūrdhā ghṛ̱tānna̭: pāva̱kaḥ ||1||
protha̱daśvo̱ na yava̭se'vi̱ṣyanya̱dā ma̱haḥ sa̱ṃvara̭ṇā̱dvyasthā̭t |
āda̭sya̱ vāto̱ anṷ vāti śo̱ciradha̭ sma te̱ vraja̭naṃ kṛ̱ṣṇama̭sti ||2||
udyasya̭ te̱ nava̭jātasya̱ vṛṣṇo'gne̱ cara̭ntya̱jarā̭ idhā̱nāḥ |
acchā̱ dyāma̭ru̱ṣo dhū̱ma ḙti̱ saṃ dū̱to a̭gna̱ īya̭se̱ hi de̱vān ||3||
vi yasya̭ te pṛthi̱vyāṃ pājo̱ aśrḙttṛ̱ṣu yadannā̭ sa̱mavṛ̭kta̱ jambhai̭: |
senḙva sṛ̱ṣṭā prasi̭tiṣṭa eti̱ yava̱ṃ na da̭sma ju̱hvā̭ vivekṣi ||4||
tamiddo̱ṣā tamu̱ṣasi̱ yavi̭ṣṭhama̱gnimatya̱ṃ na ma̭rjayanta̱ nara̭: |
ni̱śiśā̭nā̱ ati̭thimasya̱ yonaṷ dī̱dāya̭ śo̱cirāhṷtasya̱ vṛṣṇa̭: ||5||
su̱sa̱ṃdṛktḙ svanīka̱ pratī̭ka̱ṃ vi yadru̱kmo na roca̭sa upā̱ke |
di̱vo na tḙ tanya̱turḙti̱ śuṣma̭ści̱tro na sūra̱: prati̭ cakṣi bhā̱num ||6||
yathā̭ va̱: svāhā̱gnaye̱ dāśḙma̱ parīḻā̭bhirghṛ̱tava̭dbhiśca ha̱vyaiḥ |
tebhi̭rno agne̱ ami̭tai̱rmaho̭bhiḥ śa̱taṃ pū̱rbhirāya̭sībhi̱rni pā̭hi ||7||
yā vā̭ te̱ santi̭ dā̱śuṣe̱ adhṛ̭ṣṭā̱ giro̭ vā̱ yābhi̭rnṛ̱vatī̭ruru̱ṣyāḥ |
tābhi̭rnaḥ sūno sahaso̱ ni pā̭hi̱ smatsū̱rīñja̭ri̱tṝñjā̭tavedaḥ ||8||
niryatpū̱teva̱ svadhi̭ti̱: śuci̱rgātsvayā̭ kṛ̱pā ta̱nvā̱3 roca̭mānaḥ |
ā yo mā̱troru̱śenyo̱ jani̭ṣṭa deva̱yajyā̭ya su̱kratṷ: pāva̱kaḥ ||9||
e̱tā no̭ agne̱ saubha̭gā didī̱hyapi̱ kratṷṃ su̱ceta̭saṃ vatema |
viśvā̭ sto̱tṛbhyo̭ gṛṇa̱te ca̭ santu yū̱yaṃ pā̭ta sva̱stibhi̱: sadā̭ naḥ ||10||
10 maitrāvaruṇirvasiṣṭha:|agni: | triṣṭup |
pra va̭: śu̱krāya̭ bhā̱navḙ bharadhvaṃ ha̱vyaṃ ma̱tiṃ cā̱gnaye̱ supṷ̄tam |
yo daivyā̭ni̱ mānṷṣā ja̱nūṃṣya̱ntarviśvā̭ni vi̱dmanā̱ jigā̭ti ||1||
sa gṛtso̭ a̱gnistarṷṇaścidastu̱ yato̱ yavi̭ṣṭho̱ aja̭niṣṭa mā̱tuḥ |
saṃ yo vanā̭ yu̱vate̱ śuci̭da̱nbhūri̭ ci̱dannā̱ samida̭tti sa̱dyaḥ ||2||
a̱sya de̱vasya̭ sa̱ṃsadyanī̭ke̱ yaṃ martā̭saḥ śye̱taṃ ja̭gṛ̱bhre |
ni yo gṛbha̱ṃ paurṷṣeyīmu̱voca̭ du̱roka̭ma̱gnirā̱yavḙ śuśoca ||3||
a̱yaṃ ka̱viraka̭viṣu̱ pracḙtā̱ martḙṣva̱gnira̱mṛto̱ ni dhā̭yi |
sa mā no̱ atra̭ juhuraḥ sahasva̱: sadā̱ tve su̱mana̭saḥ syāma ||4||
ā yo yoni̭ṃ de̱vakṛ̭taṃ sa̱sāda̱ kratvā̱ hya1gnira̱mṛtā̱~ atā̭rīt |
tamoṣa̭dhīśca va̱nina̭śca̱ garbha̱ṃ bhūmi̭śca vi̱śvadhā̭yasaṃ bibharti ||5||
īśe̱ hya1gnira̱mṛta̭sya̱ bhūre̱rīśḙ rā̱yaḥ su̱vīrya̭sya̱ dāto̭: |
mā tvā̭ va̱yaṃ sa̭hasāvanna̱vīrā̱ māpsa̭va̱: pari̭ ṣadāma̱ mādṷvaḥ ||6||
pa̱ri̱ṣadya̱ṃ hyara̭ṇasya̱ rekṇo̱ nitya̭sya rā̱yaḥ pata̭yaḥ syāma |
na śeṣo̭ agne a̱nyajā̭tama̱styacḙtānasya̱ mā pa̱tho vi dṷkṣaḥ ||7||
na̱hi grabhā̱yāra̭ṇaḥ su̱śevo̱'nyoda̭ryo̱ mana̭sā̱ manta̱vā ṷ |
adhā̭ ci̱doka̱: puna̱ritsa e̱tyā ''no̭ vā̱jya̭bhī̱ṣāḻḙtu̱ navya̭: ||8||
tvama̭gne vanuṣya̱to ni pā̭hi̱ tvamṷ naḥ sahasāvannava̱dyāt |
saṃ tvā̭ dhvasma̱nvada̱bhyḙtu̱ pātha̱: saṃ ra̱yiḥ spṛ̭ha̱yāyya̭: saha̱srī ||9||
e̱tā no̭ agne̱ saubha̭gā didī̱hyapi̱ kratṷṃ su̱ceta̭saṃ vatema |
viśvā̭ sto̱tṛbhyo̭ gṛṇa̱te ca̭ santu yū̱yaṃ pā̭ta sva̱stibhi̱: sadā̭ naḥ ||10||
9 maitrāvaruṇirvasiṣṭha:| vaiśvānaro'gni: | triṣṭup |
prāgnayḙ ta̱vasḙ bharadhva̱ṃ gira̭ṃ di̱vo a̭ra̱tayḙ pṛthi̱vyāḥ |
yo viśvḙṣāma̱mṛtā̭nāmu̱pasthḙ vaiśvāna̱ro vā̭vṛ̱dhe jā̭gṛ̱vadbhi̭: ||1||
pṛ̱ṣṭo di̱vi dhāyya̱gniḥ pṛ̭thi̱vyāṃ ne̱tā sindhṷ̄nāṃ vṛṣa̱bhaḥ stiyā̭nām |
sa mānṷṣīra̱bhi viśo̱ vi bhā̭ti vaiśvāna̱ro vā̭vṛdhā̱no varḙṇa ||2||
tvadbhi̱yā viśa̭ āya̱nnasi̭knīrasama̱nā jaha̭tī̱rbhoja̭nāni |
vaiśvā̭nara pū̱rave̱ śośṷcāna̱: puro̱ yada̭gne da̱raya̱nnadī̭deḥ ||3||
tava̭ tri̱dhātṷ pṛthi̱vī u̱ta dyaurvaiśvā̭nara vra̱tama̭gne sacanta |
tvaṃ bhā̱sā roda̭sī̱ ā ta̭ta̱nthāja̭sreṇa śo̱ciṣā̱ śośṷcānaḥ ||4||
tvāma̭gne ha̱rito̭ vāvaśā̱nā gira̭: sacante̱ dhuna̭yo ghṛ̱tācī̭: |
pati̭ṃ kṛṣṭī̱nāṃ ra̱thya̭ṃ rayī̱ṇāṃ vai̭śvāna̱ramu̱ṣasā̭ṃ ke̱tumahnā̭m ||5||
tve a̭su̱ryaṃ1 vasa̭vo̱ nyṛ̭ṇva̱nkratu̱ṃ hi tḙ mitramaho ju̱ṣanta̭ |
tvaṃ dasyū̱~roka̭so agna āja u̱ru jyoti̭rja̱naya̱nnāryā̭ya ||6||
sa jāya̭mānaḥ para̱me vyo̭manvā̱yurna pātha̱: pari̭ pāsi sa̱dyaḥ |
tvaṃ bhuva̭nā ja̱naya̭nna̱bhi kra̱nnapa̭tyāya jātavedo daśa̱syan ||7||
tāma̭gne a̱sme iṣa̱mera̭yasva̱ vaiśvā̭nara dyu̱matī̭ṃ jātavedaḥ |
yayā̱ rādha̱: pinva̭si viśvavāra pṛ̱thu śravo̭ dā̱śuṣe̱ martyā̭ya ||8||
taṃ no̭ agne ma̱ghava̭dbhyaḥ puru̱kṣuṃ ra̱yiṃ ni vāja̱ṃ śrutya̭ṃ yuvasva |
vaiśvā̭nara̱ mahi̭ na̱: śarma̭ yaccha ru̱drebhi̭ragne̱ vasṷbhiḥ sa̱joṣā̭: ||9||
7 maitrāvaruṇirvasiṣṭha:| vaiśvānaro'gni: | triṣṭup |
pra sa̱mrājo̱ asṷrasya̱ praśa̭stiṃ pu̱ṃsaḥ kṛ̭ṣṭī̱nāma̭nu̱mādya̭sya |
indra̭syeva̱ pra ta̱vasa̭skṛ̱tāni̱ vandḙ dā̱ruṃ vanda̭māno vivakmi ||1||
ka̱viṃ ke̱tuṃ dhā̱siṃ bhā̱numadrḙrhi̱nvanti̱ śaṃ rā̱jyaṃ roda̭syoḥ |
pu̱ra̱ṃda̱rasya̭ gī̱rbhirā vi̭vāse̱'gnervra̱tāni̭ pū̱rvyā ma̱hāni̭ ||2||
nya̭kra̱tūngra̱thino̭ mṛ̱dhravā̭caḥ pa̱ṇī~ra̭śra̱ddhā~ a̭vṛ̱dhā~ a̭ya̱jñān |
prapra̱ tāndasyṷ̄~ra̱gnirvi̭vāya̱ pūrva̭ścakā̱rāpa̭rā̱~ aya̭jyūn ||3||
yo a̭pā̱cīne̱ tama̭si̱ mada̭ntī̱: prācī̭śca̱kāra̱ nṛta̭ma̱: śacī̭bhiḥ |
tamīśā̭na̱ṃ vasvo̭ a̱gniṃ gṛ̭ṇī̱ṣe'nā̭nataṃ da̱maya̭ntaṃ pṛta̱nyūn ||4||
yo de̱hyo̱3 ana̭mayadvadha̱snairyo a̱ryapa̭tnīru̱ṣasa̭śca̱kāra̭ |
sa ni̱rudhyā̱ nahṷṣo ya̱hvo a̱gnirviśa̭ścakre bali̱hṛta̱: saho̭bhiḥ ||5||
yasya̱ śarma̱nnupa̱ viśve̱ janā̭sa̱ evai̭sta̱sthuḥ sṷma̱tiṃ bhikṣa̭māṇāḥ |
vai̱śvā̱na̱ro vara̱mā roda̭syo̱rāgniḥ sa̭sāda pi̱troru̱pastha̭m ||6||
ā de̱vo da̭de bu̱dhnyā̱3 vasṷ̄ni vaiśvāna̱ra udi̭tā̱ sūrya̭sya |
ā sa̭mu̱drādava̭rā̱dā para̭smā̱dāgnirda̭de di̱va ā pṛ̭thi̱vyāḥ ||7||
7  maitrāvaruṇirvasiṣṭha:| agni: | triṣṭup |
pra vo̭ de̱vaṃ ci̭tsahasā̱nama̱gnimaśva̱ṃ na vā̱jina̭ṃ hiṣe̱ namo̭bhiḥ |
bhavā̭ no dū̱to a̭dhva̱rasya̭ vi̱dvāntmanā̭ de̱veṣṷ vivide mi̱tadrṷ: ||1||
ā yā̭hyagne pa̱thyā̱3 anu̱ svā ma̱ndro de̱vānā̭ṃ sa̱khyaṃ jṷṣā̱ṇaḥ |
ā sānu̱ śuṣmai̭rna̱daya̭npṛthi̱vyā jambhḙbhi̱rviśva̭mu̱śadha̱gvanā̭ni ||2||
prā̱cīno̭ ya̱jñaḥ sudhi̭ta̱ṃ hi ba̱rhiḥ prī̭ṇī̱te a̱gnirī̭ḻi̱to na hotā̭ |
ā mā̱tarā̭ vi̱śvavā̭re huvā̱no yato̭ yaviṣṭha jajñi̱ṣe su̱śeva̭: ||3||
sa̱dyo a̭dhva̱re ra̭thi̱raṃ ja̭nanta̱ mānṷṣāso̱ vicḙtaso̱ ya ḙṣām |
vi̱śāma̭dhāyi vi̱śpati̭rduro̱ṇe̱3'gnirma̱ndro madhṷvacā ṛ̱tāvā̭ ||4||
asā̭di vṛ̱to vahni̭rājaga̱nvāna̱gnirbra̱hmā nṛ̱ṣada̭ne vidha̱rtā |
dyauśca̱ yaṃ pṛ̭thi̱vī vā̭vṛ̱dhāte̱ ā yaṃ hotā̱ yaja̭ti vi̱śvavā̭ram ||5||
e̱te dyu̱mnebhi̱rviśva̱māti̭ranta̱ mantra̱ṃ ye vāra̱ṃ naryā̱ ata̭kṣan |
pra ye viśa̭sti̱ranta̱ śroṣa̭māṇā̱ ā ye mḙ a̱sya dīdha̭yannṛ̱tasya̭ ||6||
nū tvāma̭gna īmahe̱ vasi̭ṣṭhā īśā̱naṃ sṷ̄no sahaso̱ vasṷ̄nām |
iṣa̭ṃ sto̱tṛbhyo̭ ma̱ghava̭dbhya ānaḍyū̱yaṃ pā̭ta sva̱stibhi̱: sadā̭ naḥ ||7||
7  maitrāvaruṇirvasiṣṭha:| agni: | triṣṭup |
i̱ndhe rājā̱ sama̱ryo namo̭bhi̱ryasya̱ pratī̭ka̱māhṷtaṃ ghṛ̱tena̭ |
naro̭ ha̱vyebhi̭rīḻate sa̱bādha̱ āgniragra̭ u̱ṣasā̭maśoci ||1||
a̱yamu̱ ṣya suma̭hā~ avedi̱ hotā̭ ma̱ndro manṷṣo ya̱hvo a̱gniḥ |
vi bhā a̭kaḥ sasṛjā̱naḥ pṛ̭thi̱vyāṃ kṛ̱ṣṇapa̭vi̱roṣa̭dhībhirvavakṣe ||2||
kayā̭ no agne̱ vi va̭saḥ suvṛ̱ktiṃ kāmṷ sva̱dhāmṛ̭ṇavaḥ śa̱syamā̭naḥ |
ka̱dā bha̭vema̱ pata̭yaḥ sudatra rā̱yo va̱ntāro̭ du̱ṣṭara̭sya sā̱dhoḥ ||3||
praprā̱yama̱gnirbha̭ra̱tasya̭ śṛṇve̱ vi yatsūryo̱ na roca̭te bṛ̱hadbhāḥ |
a̱bhi yaḥ pū̱ruṃ pṛta̭nāsu ta̱sthau dyṷtā̱no daivyo̱ ati̭thiḥ śuśoca ||4||
asa̱nnittve ā̱hava̭nāni̱ bhūri̱ bhuvo̱ viśvḙbhiḥ su̱manā̱ anī̭kaiḥ |
stu̱taści̭dagne śṛṇviṣe gṛṇā̱naḥ sva̱yaṃ va̭rdhasva ta̱nva̭ṃ sujāta ||5||
i̱daṃ vaca̭: śata̱sāḥ saṃsa̭hasra̱muda̱gnayḙ janiṣīṣṭa dvi̱barhā̭: |
śaṃ yatsto̱tṛbhya̭ ā̱paye̱ bhavā̭ti dyu̱mada̭mīva̱cāta̭naṃ rakṣo̱hā ||6||
nū tvāma̭gna īmahe̱ vasi̭ṣṭhā īśā̱naṃ sṷ̄no sahaso̱ vasṷ̄nām |
iṣa̭ṃ sto̱tṛbhyo̭ ma̱ghava̭dbhya ānaḍyū̱yaṃ pā̭ta sva̱stibhi̱: sadā̭ naḥ ||7||
6 maitrāvaruṇirvasiṣṭha:| agni: | triṣṭup |
abo̭dhi jā̱ra u̱ṣasā̭mu̱pasthā̱ddhotā̭ ma̱ndraḥ ka̱vita̭maḥ pāva̱kaḥ |
dadhā̭ti ke̱tumu̱bhaya̭sya ja̱ntorha̱vyā de̱veṣu̱ dravi̭ṇaṃ su̱kṛtsṷ ||1||
sa su̱kratu̱ryo vi dura̭: paṇī̱nāṃ pṷnā̱no a̱rkaṃ pṷru̱bhoja̭saṃ naḥ |
hotā̭ ma̱ndro vi̱śāṃ damṷ̄nāsti̱rastamo̭ dadṛśe rā̱myāṇā̭m ||2||
amṷ̄raḥ ka̱viradi̭tirvi̱vasvā̭ntsusa̱ṃsanmi̱tro ati̭thiḥ śi̱vo na̭: |
 ci̱trabhā̭nuru̱ṣasā̭ṃ bhā̱tyagre̱'pāṃ garbha̭: pra̱sva1 ā vi̭veśa ||3||
ī̱ḻenyo̭ vo̱ manṷṣo yu̱geṣṷ samana̱gā a̭śucajjā̱tavḙdāḥ |
su̱sa̱ṃdṛśā̭ bhā̱nunā̱ yo vi̱bhāti̱ prati̱ gāva̭: samidhā̱naṃ bṷdhanta ||4||
agnḙ yā̱hi dū̱tyaṃ1 mā ri̭ṣaṇyo de̱vā~ acchā̭ brahma̱kṛtā̭ ga̱ṇena̭ |
sara̭svatīṃ ma̱ruto̭ a̱śvinā̱po yakṣi̭ de̱vānra̭tna̱dheyā̭ya̱ viśvā̭n ||5||
tvāma̭gne samidhā̱no vasi̭ṣṭho̱ jarṷ̄thaṃ ha̱nyakṣi̭ rā̱ye pura̭ṃdhim |
pu̱ru̱ṇī̱thā jā̭tavedo jarasva yū̱yaṃ pā̭ta sva̱stibhi̱: sadā̭ naḥ ||6||
5 | maitrāvaruṇirvasiṣṭha:| agni: | triṣṭup
u̱ṣo na jā̱raḥ pṛ̱thu pājo̭ aśre̱ddavi̭dyuta̱ddīdya̱cchośṷcānaḥ |
vṛṣā̱ hari̱: śuci̱rā bhā̭ti bhā̱sā dhiyo̭ hinvā̱na ṷśa̱tīra̭jīgaḥ ||1||
sva1rṇa vasto̭ru̱ṣasā̭maroci ya̱jñaṃ ta̭nvā̱nā u̱śijo̱ na manma̭ |
a̱gnirjanmā̭ni de̱va ā vi vi̱dvāndra̱vaddū̱to dḙva̱yāvā̱ vani̭ṣṭhaḥ ||2||
acchā̱ giro̭ ma̱tayo̭ deva̱yantī̭ra̱gniṃ ya̭nti̱ dravi̭ṇa̱ṃ bhikṣa̭māṇāḥ |
su̱sa̱ṃdṛśa̭ṃ su̱pratī̭ka̱ṃ svañca̭ṃ havya̱vāha̭mara̱tiṃ mānṷṣāṇām ||3||
indra̭ṃ no agne̱ vasṷbhiḥ sa̱joṣā̭ ru̱draṃ ru̱drebhi̱rā va̭hā bṛ̱hanta̭m |
ā̱di̱tyebhi̱radi̭tiṃ vi̱śvaja̭nyā̱ṃ bṛha̱spati̱mṛkva̭bhirvi̱śvavā̭ram ||4||
ma̱ndraṃ hotā̭ramu̱śijo̱ yavi̭ṣṭhama̱gniṃ viśa̭ īḻate adhva̱reṣṷ |
sa hi kṣapā̭vā̱~ abha̭vadrayī̱ṇāmata̭ndro dū̱to ya̱jathā̭ya de̱vān ||5||
5 maitrāvaruṇirvasiṣṭha:| agni: | triṣṭup |
ma̱hā~ a̭syadhva̱rasya̭ prake̱to na ṛ̱te tvada̱mṛtā̭ mādayante |
ā viśvḙbhiḥ sa̱ratha̭ṃ yāhi de̱vairnya̭gne̱ hotā̭ pratha̱maḥ sa̭de̱ha ||1||
tvāmī̭ḻate aji̱raṃ dū̱tyā̭ya ha̱viṣma̭nta̱: sada̱minmānṷṣāsaḥ |
yasya̭ de̱vairāsa̭do ba̱rhira̱gne'hā̭nyasmai su̱dinā̭ bhavanti ||2||
triści̭da̱ktoḥ pra ci̭kitu̱rvasṷ̄ni̱ tve a̱ntardā̱śuṣe̱ martyā̭ya |
ma̱nu̱ṣvada̭gna i̱ha ya̭kṣi de̱vānbhavā̭ no dū̱to a̭bhiśasti̱pāvā̭ ||3||
a̱gnirī̭śe bṛha̱to a̭dhva̱rasyā̱'gnirviśva̭sya ha̱viṣa̭: kṛ̱tasya̭ |
kratu̱ṃ hya̭sya̱ vasa̭vo ju̱ṣantā'thā̭ de̱vā da̭dhire havya̱vāha̭m ||4||
āgnḙ vaha havi̱radyā̭ya de̱vānindra̭jyeṣṭhāsa i̱ha mā̭dayantām |
i̱maṃ ya̱jñaṃ di̱vi de̱veṣṷ dhehi yū̱yaṃ pā̭ta sva̱stibhi̱: sadā̭ naḥ ||5||
3 maitrāvaruṇirvasiṣṭha:| agni: | triṣṭup |
aga̭nma ma̱hā nama̭sā̱ yavi̭ṣṭha̱ṃ yo dī̱dāya̱ sami̭ddha̱: sve dṷro̱ṇe |
ci̱trabhā̭nu̱ṃ roda̭sī a̱ntaru̱rvī svā̭hutaṃ vi̱śvata̭: pra̱tyañca̭m ||1||
sa ma̱hnā viśvā̭ duri̱tāni̭ sā̱hvāna̱gniḥ ṣṭa̭ve̱ dama̱ ā jā̱tavḙdāḥ |
sa no̭ rakṣiṣadduri̱tāda̭va̱dyāda̱smāngṛ̭ṇa̱ta u̱ta no̭ ma̱ghona̭: ||2||
tvaṃ varṷṇa u̱ta mi̱tro a̭gne̱ tvāṃ va̭rdhanti ma̱tibhi̱rvasi̭ṣṭhāḥ |
tve vasṷ suṣaṇa̱nāni̭ santu yū̱yaṃ pā̭ta sva̱stibhi̱: sadā̭ naḥ ||3||
3  maitrāvaruṇirvasiṣṭha:|vaiśvānaro'gni:| triṣṭup|
prāgnayḙ viśva̱śucḙ dhiya̱ṃdhḙ'sura̱ghne manma̭ dhī̱tiṃ bha̭radhvam |
bharḙ ha̱virna ba̱rhiṣi̭ prīṇā̱no vai̭śvāna̱rāya̱ yata̭ye matī̱nām ||1||
tvama̭gne śo̱ciṣā̱ śośṷcāna̱ ā roda̭sī apṛṇā̱ jāya̭mānaḥ |
tvaṃ de̱vā~ a̱bhiśa̭steramuñco̱ vaiśvā̭nara jātavedo mahi̱tvā ||2||
jā̱to yada̭gne̱ bhuva̭nā̱ vyakhya̭: pa̱śūnna go̱pā irya̱: pari̭jmā |
 vaiśvā̭nara̱ brahma̭ṇe vinda gā̱tuṃ yū̱yaṃ pā̭ta sva̱stibhi̱: sadā̭ naḥ ||3||
3  maitrāvaruṇirvasiṣṭha:| agni: | triṣṭup , 1 bṛhatī |
sa̱midhā̭ jā̱tavḙdase de̱vāya̭ de̱vahṷ̄tibhiḥ |
ha̱virbhi̭: śu̱kraśo̭ciṣe nama̱svino̭ va̱yaṃ dā̭śemā̱gnayḙ ||1||
va̱yaṃ tḙ agne sa̱midhā̭ vidhema va̱yaṃ dā̭śema suṣṭu̱tī ya̭jatra |
va̱yaṃ ghṛ̱tenā̭dhvarasya hotarva̱yaṃ dḙva ha̱viṣā̭ bhadraśoce ||2||
ā no̭ de̱vebhi̱rupa̭ de̱vahṷ̄ti̱magnḙ yā̱hi vaṣa̭ṭkṛtiṃ juṣā̱ṇaḥ |
 tubhya̭ṃ de̱vāya̱ dāśa̭taḥ syāma yū̱yaṃ pā̭ta sva̱stibhi̱: sadā̭ naḥ ||3||
15 maitrāvaruṇirvasiṣṭha:| agni: |gāyatrī |
u̱pa̱sadyā̭ya mī̱ḻhuṣa̭ ā̱syḙ juhutā ha̱viḥ | yo no̱ nedi̭ṣṭha̱māpya̭m ||1||
yaḥ pañca̭ carṣa̱ṇīra̱bhi ni̭ṣa̱sāda̱ damḙdame | ka̱virgṛ̱hapa̭ti̱ryuvā̭ ||2||
sa no̱ vedo̭ a̱mātya̭ma̱gnī ra̭kṣatu vi̱śvata̭: | u̱tāsmānpā̱tvaṃha̭saḥ ||3||
nava̱ṃ nu stoma̭ma̱gnayḙ di̱vaḥ śye̱nāya̭ jījanam | vasva̭: ku̱vidva̱nāti̭ naḥ ||4||
spā̱rhā yasya̱ śriyo̭ dṛ̱śe ra̱yirvī̱rava̭to yathā | agrḙ ya̱jñasya̱ śoca̭taḥ ||5||
semāṃ vḙtu̱ vaṣa̭ṭkṛtima̱gnirjṷṣata no̱ gira̭: | yaji̭ṣṭho havya̱vāha̭naḥ ||6||
ni tvā̭ nakṣya viśpate dyu̱manta̭ṃ deva dhīmahi | su̱vīra̭magna āhuta ||7||
kṣapa̭ u̱sraśca̭ dīdihi sva̱gnaya̱stvayā̭ va̱yam | su̱vīra̱stvama̭sma̱yuḥ ||8||
upa̭ tvā sā̱taye̱ naro̱ viprā̭so yanti dhī̱tibhi̭: | upākṣa̭rā saha̱sriṇī̭ ||9||
a̱gnī rakṣā̭ṃsi sedhati śu̱kraśo̭ci̱rama̭rtyaḥ | śuci̭: pāva̱ka īḍya̭: ||10||
sa no̱ rādhā̱ṃsyā bha̱reśā̭naḥ sahaso yaho | bhaga̭śca dātu̱ vārya̭m ||11||
tvama̭gne vī̱rava̱dyaśo̭ de̱vaśca̭ savi̱tā bhaga̭: | diti̭śca dāti̱ vārya̭m ||12||
agne̱ rakṣā̭ ṇo̱ aṃha̭sa̱: prati̭ ṣma deva̱ rīṣa̭taḥ | tapi̭ṣṭhaira̱jaro̭ daha ||13||
adhā̭ ma̱hī na̱ āya̱syanā̭dhṛṣṭo̱ nṛpī̭taye | pūrbha̭vā śa̱tabhṷjiḥ ||14||
tvaṃ na̭: pā̱hyaṃha̭so̱ doṣā̭vastaraghāya̱taḥ | divā̱ nakta̭madābhya ||15||
12 maitrāvaruṇirvasiṣṭha:| agni: | pragātha: (=viṣamā bṛhatī , samā satobṛhatī )  |
e̱nā vo̭ a̱gniṃ nama̭so̱rjo napā̭ta̱mā hṷve | pri̱yaṃ ceti̭ṣṭhamara̱tiṃ sva̭dhva̱raṃ viśva̭sya dū̱tama̱mṛta̭m ||1||
sa yo̭jate aru̱ṣā vi̱śvabho̭jasā̱ sa dṷdrava̱tsvā̭hutaḥ |
su̱brahmā̭ ya̱jñaḥ su̱śamī̱ vasṷ̄nāṃ de̱vaṃ rādho̱ janā̭nām ||2||
uda̭sya śo̱cira̭sthādā̱juhvā̭nasya mī̱ḻhuṣa̭: |
uddhū̱māso̭ aru̱ṣāso̭ divi̱spṛśa̱: sama̱gnimi̭ndhate̱ nara̭: ||3||
taṃ tvā̭ dū̱taṃ kṛ̭ṇmahe ya̱śasta̭maṃ de̱vā~ ā vī̱tayḙ vaha |
viśvā̭ sūno sahaso marta̱bhoja̭nā̱ rāsva̱ tadyattvema̭he ||4||
tvama̭gne gṛ̱hapa̭ti̱stvaṃ hotā̭ no adhva̱re | tvaṃ potā̭ viśvavāra̱ pracḙtā̱ yakṣi̱ veṣi̭ ca̱ vārya̭m ||5||
kṛ̱dhi ratna̱ṃ yaja̭mānāya sukrato̱ tvaṃ hi ra̭tna̱dhā asi̭ |
ā na̭ ṛ̱te śi̭śīhi̱ viśva̭mṛ̱tvija̭ṃ su̱śaṃso̱ yaśca̱ dakṣa̭te ||6||
tve a̭gne svāhuta pri̱yāsa̭: santu sū̱raya̭: | ya̱ntāro̱ ye ma̱ghavā̭no̱ janā̭nāmū̱rvāndaya̭nta̱ gonā̭m ||7||
yeṣā̱miḻā̭ ghṛ̱taha̭stā duro̱ṇa ā~ api̭ prā̱tā ni̱ṣīda̭ti |
tā~strā̭yasva sahasya dru̱ho ni̱do yacchā̭ na̱: śarma̭ dīrgha̱śrut ||8||
sa ma̱ndrayā̭ ca ji̱hvayā̱ vahni̭rā̱sā vi̱duṣṭa̭raḥ | agnḙ ra̱yiṃ ma̱ghava̭dbhyo na̱ ā va̭ha ha̱vyadā̭tiṃ ca sūdaya ||9||
ye rādhā̭ṃsi̱ dada̱tyaśvyā̭ ma̱ghā kāmḙna̱ śrava̭so ma̱haḥ | tā~ aṃha̭saḥ pipṛhi pa̱rtṛbhi̱ṣṭvaṃ śa̱taṃ pū̱rbhirya̭viṣṭhya ||10||
de̱vo vo̭ draviṇo̱dāḥ pū̱rṇāṃ vi̭vaṣṭyā̱sica̭m | udvā̭ si̱ñcadhva̱mupa̭ vā pṛṇadhva̱mādidvo̭ de̱va o̭hate ||11||
taṃ hotā̭ramadhva̱rasya̱ pracḙtasa̱ṃ vahni̭ṃ de̱vā a̭kṛṇvata | dadhā̭ti̱ ratna̭ṃ vidha̱te su̱vīrya̭ma̱gnirjanā̭ya dā̱śuṣḙ ||12||
7 maitrāvaruṇirvasiṣṭha:| agni:| dvipadā triṣṭup|
agne̱ bhava̭ suṣa̱midhā̱ sami̭ddha u̱ta ba̱rhirṷrvi̱yā vi stṛ̭ṇītām 1
u̱ta dvāra̭ uśa̱tīrvi śra̭yantāmu̱ta de̱vā~ ṷśa̱ta ā va̭he̱ha ||1||2
agnḙ vī̱hi ha̱viṣā̱ yakṣi̭ de̱vāntsva̭dhva̱rā kṛ̭ṇuhi jātavedaḥ 3
sva̱dhva̱rā ka̭rati jā̱tavḙdā̱ yakṣa̭dde̱vā~ a̱mṛtā̭npi̱praya̭cca ||2|| 4
vaṃsva̱ viśvā̱ vāryā̭ṇi pracetaḥ sa̱tyā bha̭vantvā̱śiṣo̭ no a̱dya 5
tvāmu̱ te da̭dhire havya̱vāha̭ṃ de̱vāso̭ agna ū̱rja ā napā̭tam ||3|| 6
te tḙ de̱vāya̱ dāśa̭taḥ syāma ma̱ho no̱ ratnā̱ vi da̭dha iyā̱naḥ ||4|| 7
25 maitrāvaruṇirvasiṣṭha:| indra:, 22-25 sudā: paijavana: | triṣṭup |
tve ha̱ yatpi̱tara̭ścinna indra̱ viśvā̭ vā̱mā ja̭ri̱tāro̱ asa̭nvan |
tve gāva̭: su̱dughā̱stve hyaśvā̱stvaṃ vasṷ devaya̱te vani̭ṣṭhaḥ ||1||
rājḙva̱ hi jani̭bhi̱: kṣeṣye̱vā'va̱ dyubhi̭ra̱bhi vi̱duṣka̱viḥ san |
pi̱śā giro̭ maghava̱ngobhi̱raśvai̭stvāya̱taḥ śi̭śīhi rā̱ye a̱smān ||2||
i̱mā ṷ tvā paspṛdhā̱nāso̱ atra̭ ma̱ndrā giro̭ deva̱yantī̱rupa̭ sthuḥ |
a̱rvācī̭ te pa̱thyā̭ rā̱ya ḙtu̱ syāma̭ te suma̱tāvi̭ndra̱ śarma̭n ||3||
dhe̱nuṃ na tvā̭ sū̱yava̭se̱ dudṷkṣa̱nnupa̱ brahmā̭ṇi sasṛje̱ vasi̭ṣṭhaḥ |
tvāminme̱ gopa̭ti̱ṃ viśva̭ ā̱hā ''na̱ indra̭: suma̱tiṃ ga̱ntvaccha̭ ||4||
arṇā̭ṃsi citpaprathā̱nā su̱dāsa̱ indro̭ gā̱dhānya̭kṛṇotsupā̱rā |
śardha̭ntaṃ śi̱myumu̱catha̭sya̱ navya̱: śāpa̱ṃ sindhṷ̄nāmakṛṇo̱daśa̭stīḥ ||5||
pu̱ro̱ḻā ittu̱rvaśo̱ yakṣṷrāsīdrā̱ye matsyā̭so̱ niśi̭tā̱ apī̭va |
śru̱ṣṭiṃ ca̭kru̱rbhṛga̭vo dru̱hyava̭śca̱ sakhā̱ sakhā̭yamatara̱dviṣṷ̄coḥ ||6||
ā pa̱kthāso̭ bhalā̱naso̭ bhana̱ntā'li̭nāso viṣā̱ṇina̭: śi̱vāsa̭: |
ā yo'na̭yatsadha̱mā ārya̭sya ga̱vyā tṛtsṷbhyo ajaganyu̱dhā nṝn ||7||
du̱rā̱dhyo̱3 adi̭tiṃ sre̱vaya̭nto'ce̱taso̱ vi ja̭gṛbhre̱ parṷṣṇīm |
ma̱hnāvi̭vyakpṛthi̱vīṃ patya̭mānaḥ pa̱śuṣka̱vira̭śaya̱ccāya̭mānaḥ ||8||
ī̱yurartha̱ṃ na nya̱rthaṃ parṷṣṇīmā̱śuśca̱neda̭bhipi̱tvaṃ ja̭gāma |
su̱dāsa̱ indra̭: su̱tukā̭~ a̱mitrā̱nara̭ndhaya̱nmānṷṣe̱ vadhri̭vācaḥ ||9||
ī̱yurgāvo̱ na yava̭sā̱dago̭pā yathākṛ̱tama̱bhi mi̱traṃ ci̱tāsa̭: |
pṛśni̭gāva̱: pṛśni̭nipreṣitāsaḥ śru̱ṣṭiṃ ca̭krurni̱yuto̱ ranta̭yaśca ||10||
eka̭ṃ ca̱ yo vi̭ṃśa̱tiṃ ca̭ śrava̱syā vai̭ka̱rṇayo̱rjanā̱nrājā̱ nyasta̭: |
da̱smo na sadma̱nni śi̭śāti ba̱rhiḥ śūra̱: sarga̭makṛṇo̱dindra̭ eṣām ||11||
adha̭ śru̱taṃ ka̱vaṣa̭ṃ vṛ̱ddhama̱psvanṷ dru̱hyuṃ ni vṛ̭ṇa̱gvajra̭bāhuḥ |
vṛ̱ṇā̱nā atra̭ sa̱khyāya̭ sa̱khyaṃ tvā̱yanto̱ ye ama̭da̱nnanṷ tvā ||12||
vi sa̱dyo viśvā̭ dṛṃhi̱tānyḙṣā̱mindra̱: pura̱: saha̭sā sa̱pta da̭rdaḥ |
vyāna̭vasya̱ tṛtsa̭ve̱ gaya̭ṃ bhā̱gjeṣma̭ pū̱ruṃ vi̱dathḙ mṛ̱dhravā̭cam ||13||
ni ga̱vyavo'na̭vo dru̱hyava̭śca ṣa̱ṣṭiḥ śa̱tā sṷṣupu̱: ṣaṭ sa̱hasrā̭ |
ṣa̱ṣṭirvī̱rāso̱ adhi̱ ṣaḍdṷvo̱yu viśvedindra̭sya vī̱ryā̭ kṛ̱tāni̭ ||14||
indrḙṇai̱te tṛtsa̭vo̱ vevi̭ṣāṇā̱ āpo̱ na sṛ̱ṣṭā a̭dhavanta̱ nīcī̭: |
du̱rmi̱trāsa̭: prakala̱vinmimā̭nā ja̱hurviśvā̭ni̱ bhoja̭nā su̱dāsḙ ||15||
a̱rdhaṃ vī̱rasya̭ śṛta̱pāma̭ni̱ndraṃ parā̱ śardha̭ntaṃ nunude a̱bhi kṣām |
indro̭ ma̱nyuṃ ma̭nyu̱myo̭ mimāya bhe̱je pa̱tho va̭rta̱niṃ patya̭mānaḥ ||16||
ā̱dhreṇa̭ ci̱ttadveka̭ṃ cakāra si̱ṃhya̭ṃ ci̱tpetvḙnā jaghāna |
ava̭ sra̱ktīrve̱śyā̭vṛśca̱dindra̱: prāya̭ccha̱dviśvā̱ bhoja̭nā su̱dāsḙ ||17||
śaśva̭nto̱ hi śatra̭vo rāra̱dhuṣṭḙ bhe̱dasya̭ ci̱cchardha̭to vinda̱ randhi̭m |
martā̱~ ena̭: stuva̱to yaḥ kṛ̱ṇoti̭ ti̱gmaṃ tasmi̱nni ja̭hi̱ vajra̭mindra ||18||
āva̱dindra̭ṃ ya̱munā̱ tṛtsa̭vaśca̱ prātra̭ bhe̱daṃ sa̱rvatā̭tā muṣāyat |
a̱jāsa̭śca̱ śigra̭vo̱ yakṣa̭vaśca ba̱liṃ śī̱rṣāṇi̭ jabhru̱raśvyā̭ni ||19||
na ta̭ indra suma̱tayo̱ na rāya̭: sa̱ṃcakṣe̱ pūrvā̭ u̱ṣaso̱ na nūtnā̭: |
deva̭kaṃ cinmānyamā̱naṃ ja̭gha̱nthā'va̱ tmanā̭ bṛha̱taḥ śamba̭raṃ bhet ||20||
pra ye gṛ̱hādama̭madustvā̱yā pa̭rāśa̱raḥ śa̱tayā̭tu̱rvasi̭ṣṭhaḥ |
na tḙ bho̱jasya̭ sa̱khyaṃ mṛ̭ṣa̱ntā'dhā̭ sū̱ribhya̭: su̱dinā̱ vyṷcchān ||21||
dve naptṷrde̱vava̭taḥ śa̱te gordvā rathā̭ va̱dhūma̭ntā su̱dāsa̭: |
arha̭nnagne paijava̱nasya̱ dāna̱ṃ hotḙva̱ sadma̱ paryḙmi̱ rebha̭n ||22||
ca̱tvāro̭ mā paijava̱nasya̱ dānā̱: smaddi̭ṣṭayaḥ kṛśa̱nino̭ nire̱ke |
ṛ̱jrāso̭ mā pṛthivi̱ṣṭhāḥ su̱dāsa̭sto̱kaṃ to̱kāya̱ śrava̭se vahanti ||23||
yasya̱ śravo̱ roda̭sī a̱ntaru̱rvī śī̱rṣṇeśī̭rṣṇe viba̱bhājā̭ vibha̱ktā |
sa̱ptedindra̱ṃ na sra̱vato̭ gṛṇanti̱ ni yṷdhyāma̱dhima̭śiśāda̱bhīkḙ ||24||
i̱maṃ na̭ro marutaḥ saśca̱tānu̱ divo̭dāsa̱ṃ na pi̱tara̭ṃ su̱dāsa̭: |
a̱vi̱ṣṭanā̭ paijava̱nasya̱ keta̭ṃ dū̱ṇāśa̭ṃ kṣa̱trama̱jara̭ṃ duvo̱yu ||25||
11 maitrāvaruṇirvasiṣṭha:| indra: | triṣṭup |
yasti̱gmaśṛ̭ṅgo vṛṣa̱bho na bhī̱ma eka̭: kṛ̱ṣṭīścyā̱vaya̭ti̱ pra viśvā̭: |
yaḥ śaśva̭to̱ adā̭śuṣo̱ gaya̭sya praya̱ntāsi̱ suṣvi̭tarāya̱ veda̭: ||1||
tvaṃ ha̱ tyadi̭ndra̱ kutsa̭māva̱: śuśrṷ̄ṣamāṇasta̱nvā̭ sama̱rye |
dāsa̱ṃ yacchuṣṇa̱ṃ kuya̭va̱ṃ nya̭smā̱ ara̭ndhaya ārjune̱yāya̱ śikṣa̭n ||2||
tvaṃ dhṛ̭ṣṇo dhṛṣa̱tā vī̱taha̭vya̱ṃ prāvo̱ viśvā̭bhirū̱tibhi̭: su̱dāsa̭m |
pra paurṷkutsiṃ tra̱sada̭syumāva̱: kṣetra̭sātā vṛtra̱hatyḙṣu pū̱rum ||3||
tvaṃ nṛbhi̭rnṛmaṇo de̱vavī̭tau̱ bhūrī̭ṇi vṛ̱trā ha̭ryaśva haṃsi |
tvaṃ ni dasyu̱ṃ cumṷri̱ṃ dhuni̱ṃ cā'svā̭payo da̱bhīta̭ye su̱hantṷ ||4||
tava̭ cyau̱tnāni̭ vajrahasta̱ tāni̱ nava̱ yatpuro̭ nava̱tiṃ ca̭ sa̱dyaḥ |
ni̱veśa̭ne śatata̱māvi̭veṣī̱raha̭ñca vṛ̱traṃ namṷcimu̱tāha̭n ||5||
sanā̱ tā ta̭ indra̱ bhoja̭nāni rā̱taha̭vyāya dā̱śuṣḙ su̱dāsḙ |
vṛṣṇḙ te̱ harī̱ vṛṣa̭ṇā yunajmi̱ vyantu̱ brahmā̭ṇi puruśāka̱ vāja̭m ||6||
mā tḙ a̱syāṃ sa̭hasāva̱npari̭ṣṭāva̱ghāya̭ bhūma harivaḥ parā̱dai |
 trāya̭sva no'vṛ̱kebhi̱rvarṷ̄thai̱stava̭ pri̱yāsa̭: sū̱riṣṷ syāma ||7||
pri̱yāsa̱ ittḙ maghavanna̱bhiṣṭau̱ naro̭ madema śara̱ṇe sakhā̭yaḥ |
ni tu̱rvaśa̱ṃ ni yādva̭ṃ śiśīhyatithi̱gvāya̱ śaṃsya̭ṃ kari̱ṣyan ||8||
sa̱dyaści̱nnu te ma̭ghavanna̱bhiṣṭau̱ nara̭: śaṃsantyuktha̱śāsa̭ u̱kthā |
ye te̱ havḙbhi̱rvi pa̱ṇī~radā̭śanna̱smānvṛ̭ṇīṣva̱ yujyā̭ya̱ tasmai̭ ||9||
e̱te stomā̭ na̱rāṃ nṛ̭tama̱ tubhya̭masma̱drya̭ñco̱ dada̭to ma̱ghāni̭ |
teṣā̭mindra vṛtra̱hatyḙ śi̱vo bhū̱: sakhā̭ ca̱ śūro̭'vi̱tā ca̭ nṛ̱ṇām ||10||
nū i̭ndra śūra̱ stava̭māna ū̱tī brahma̭jūtasta̱nvā̭ vāvṛdhasva |
upa̭ no̱ vājā̭nmimī̱hyupa̱ stīnyū̱yaṃ pā̭ta sva̱stibhi̱: sadā̭ naḥ ||11||
10 maitrāvaruṇirvasiṣṭha:| indra: | triṣṭup |
u̱gro ja̭jñe vī̱ryā̭ya sva̱dhāvā̱ñcakri̱rapo̱ naryo̱ yatka̭ri̱ṣyan |
jagmi̱ryuvā̭ nṛ̱ṣada̭na̱mavo̭bhistrā̱tā na̱ indra̱ ena̭so ma̱haści̭t ||1||
hantā̭ vṛ̱tramindra̱: śūśṷvāna̱: prāvī̱nnu vī̱ro ja̭ri̱tāra̭mū̱tī |
kartā̭ su̱dāse̱ aha̱ vā ṷ lo̱kaṃ dātā̱ vasu̱ muhu̱rā dā̱śuṣḙ bhūt ||2||
yu̱dhmo a̭na̱rvā kha̭ja̱kṛtsa̱madvā̱ śūra̭: satrā̱ṣāḍja̱nuṣe̱maṣā̭ḻhaḥ |
vyā̭sa̱ indra̱: pṛta̭nā̱: svojā̱ adhā̱ viśva̭ṃ śatrū̱yanta̭ṃ jaghāna ||3||
u̱bhe ci̭dindra̱ roda̭sī mahi̱tvā ''pa̭prātha̱ tavi̭ṣībhistuviṣmaḥ |
ni vajra̱mindro̱ hari̭vā̱nmimi̭kṣa̱ntsamandha̭sā̱ madḙṣu̱ vā ṷvoca ||4||
vṛṣā̭ jajāna̱ vṛṣa̭ṇa̱ṃ raṇā̭ya̱ tamṷ ci̱nnārī̱ narya̭ṃ sasūva |
 pra yaḥ sḙnā̱nīradha̱ nṛbhyo̱ astī̱naḥ satvā̭ ga̱veṣa̭ṇa̱: sa dhṛ̱ṣṇuḥ ||5||
nū ci̱tsa bhrḙṣate̱ jano̱ na rḙṣa̱nmano̱ yo a̭sya gho̱ramā̱vivā̭sāt |
ya̱jñairya indre̱ dadha̭te̱ duvā̭ṃsi̱ kṣaya̱tsa rā̱ya ṛ̭ta̱pā ṛ̭te̱jāḥ ||6||
yadi̭ndra̱ pūrvo̱ apa̭rāya̱ śikṣa̱nnaya̱jjyāyā̱nkanī̭yaso de̱ṣṇam |
a̱mṛta̱ itparyā̭sīta dū̱ramā ci̭tra̱ citrya̭ṃ bharā ra̱yiṃ na̭: ||7||
yasta̭ indra pri̱yo jano̱ dadā̭śa̱dasa̭nnire̱ke a̭driva̱: sakhā̭ te |
va̱yaṃ tḙ a̱syāṃ sṷma̱tau cani̭ṣṭhā̱: syāma̱ varṷ̄the̱ aghna̭to̱ nṛpī̭tau ||8||
e̱ṣa stomo̭ acikrada̱dvṛṣā̭ ta u̱ta stā̱murma̭ghavannakrapiṣṭa |
rā̱yaskāmo̭ jari̱tāra̭ṃ ta̱ āga̱ntvama̱ṅga śa̭kra̱ vasva̱ ā śa̭ko naḥ ||9||
sa na̭ indra̱ tvaya̭tāyā i̱ṣe dhā̱stmanā̭ ca̱ ye ma̱ghavā̭no ju̱nanti̭ |
vasvī̱ ṣu tḙ jari̱tre a̭stu śa̱ktiryū̱yaṃ pā̭ta sva̱stibhi̱: sadā̭ naḥ ||10||
10 maitrāvaruṇirvasiṣṭha:| indra: | triṣṭup |
asā̭vi de̱vaṃ goṛ̭jīka̱mandho̱ nya̭smi̱nnindro̭ ja̱nuṣḙmuvoca |
bodhā̭masi tvā haryaśva ya̱jñairbodhā̭ na̱: stoma̱mandha̭so̱ madḙṣu ||1||
pra ya̭nti ya̱jñaṃ vi̱paya̭nti ba̱rhiḥ so̭ma̱mādo̭ vi̱dathḙ du̱dhravā̭caḥ |
nyṷ bhriyante ya̱śaso̭ gṛ̱bhādā dū̱raṷpabdo̱ vṛṣa̭ṇo nṛ̱ṣāca̭: ||2||
tvami̭ndra̱ sravi̭ta̱vā a̱paska̱: pari̭ṣṭhitā̱ ahi̭nā śūra pū̱rvīḥ |
tvadvā̭vakre ra̱thyo̱3 na dhenā̱ reja̭nte̱ viśvā̭ kṛ̱trimā̭ṇi bhī̱ṣā ||3||
bhī̱mo vi̭ve̱ṣāyṷdhebhireṣā̱mapā̭ṃsi̱ viśvā̱ naryā̭ṇi vi̱dvān |
indra̱: puro̱ jarhṛ̭ṣāṇo̱ vi dṷ̄dho̱dvi vajra̭hasto mahi̱nā ja̭ghāna ||4||
na yā̱tava̭ indra jūjuvurno̱ na vanda̭nā śaviṣṭha ve̱dyābhi̭: |
sa śa̭rdhada̱ryo viṣṷṇasya ja̱ntormā śi̱śnadḙvā̱ api̭ guṝ̱taṃ na̭: ||5||
a̱bhi kratvḙndra bhū̱radha̱ jmanna tḙ vivyaṅmahi̱māna̱ṃ rajā̭ṃsi |
svenā̱ hi vṛ̱traṃ śava̭sā ja̱ghantha̱ na śatru̱ranta̭ṃ vividadyu̱dhā tḙ ||6||
de̱vāści̭tte asu̱ryā̭ya̱ pūrve'nṷ kṣa̱trāya̭ mamire̱ sahā̭ṃsi |
indro̭ ma̱ghāni̭ dayate vi̱ṣahyendra̱ṃ vāja̭sya johuvanta sā̱tau ||7||
kī̱riści̱ddhi tvāmava̭se ju̱hāveśā̭namindra̱ saubha̭gasya̱ bhūrḙ: |
avo̭ babhūtha śatamūte a̱sme a̭bhikṣa̱ttustvāva̭to varū̱tā ||8||
sakhā̭yasta indra vi̱śvaha̭ syāma namovṛ̱dhāso̭ mahi̱nā ta̭rutra |
va̱nvantṷ smā̱ te'va̭sā samī̱ke̱3'bhī̭tima̱ryo va̱nuṣā̱ṃ śavā̭ṃsi ||9||
sa na̭ indra̱ tvaya̭tāyā i̱ṣe dhā̱stmanā̭ ca̱ ye ma̱ghavā̭no ju̱nanti̭ |
vasvī̱ ṣu tḙ jari̱tre a̭stu śa̱ktiryū̱yaṃ pā̭ta sva̱stibhi̱: sadā̭ naḥ ||10||
9  maitrāvaruṇirvasiṣṭha:| indra: | virāṭ, 9  triṣṭup |
pibā̱ soma̭mindra̱ manda̭tu tvā̱ yaṃ tḙ su̱ṣāva̭ harya̱śvādri̭: | so̱turbā̱hubhyā̱ṃ suya̭to̱ nārvā̭ ||1||
yaste̱ mado̱ yujya̱ścāru̱rasti̱ yena̭ vṛ̱trāṇi̭ haryaśva̱ haṃsi̭ | sa tvāmi̭ndra prabhūvaso mamattu ||2||
bodhā̱ su mḙ maghava̱nvāca̱memāṃ yāṃ te̱ vasi̭ṣṭho̱ arca̭ti̱ praśa̭stim | i̱mā brahma̭ sadha̱mādḙ juṣasva ||3||
śru̱dhī hava̭ṃ vipipā̱nasyādre̱rbodhā̱ vipra̱syārca̭to manī̱ṣām | kṛ̱ṣvā duvā̱ṃsyanta̭mā̱ sace̱mā ||4||
na te̱ giro̱ api̭ mṛṣye tu̱rasya̱ na sṷṣṭu̱tima̭su̱rya̭sya vi̱dvān | sadā̭ te̱ nāma̭ svayaśo vivakmi ||5||
bhūri̱ hi te̱ sava̭nā̱ mānṷṣeṣu̱ bhūri̭ manī̱ṣī ha̭vate̱ tvāmit | māre a̱smanma̭ghava̱ñjyokka̭: ||6||
tubhyedi̱mā sava̭nā śūra̱ viśvā̱ tubhya̱ṃ brahmā̭ṇi̱ vardha̭nā kṛṇomi | tvaṃ nṛbhi̱rhavyo̭ vi̱śvadhā̭si ||7||
nū ci̱nnu te̱ manya̭mānasya da̱smoda̭śnuvanti mahi̱māna̭mugra | na vī̱rya̭mindra te̱ na rādha̭: ||8||
ye ca̱ pūrva̱ ṛṣa̭yo̱ ye ca̱ nūtnā̱ indra̱ brahmā̭ṇi ja̱naya̭nta̱ viprā̭: |
a̱sme tḙ santu sa̱khyā śi̱vāni̭ yū̱yaṃ pā̭ta sva̱stibhi̱: sadā̭ naḥ ||9||
6 maitrāvaruṇirvasiṣṭha:| indra: | triṣṭup |
udu̱ brahmā̭ṇyairata śrava̱syendra̭ṃ sama̱rye ma̭hayā vasiṣṭha |
 ā yo viśvā̭ni̱ śava̭sā ta̱tāno̭paśro̱tā ma̱ īva̭to̱ vacā̭ṃsi ||1||
ayā̭mi̱ ghoṣa̭ indra de̱vajā̭mirira̱jyanta̱ yacchu̱rudho̱ vivā̭ci |
na̱hi svamāyṷściki̱te janḙṣu̱ tānīdaṃhā̱ṃsyati̭ parṣya̱smān ||2||
yu̱je ratha̭ṃ ga̱veṣa̭ṇa̱ṃ hari̭bhyā̱mupa̱ brahmā̭ṇi jujuṣā̱ṇama̭sthuḥ |
vi bā̭dhiṣṭa̱ sya roda̭sī mahi̱tvendro̭ vṛ̱trāṇya̭pra̱tī ja̭gha̱nvān ||3||
āpa̭ścitpipyuḥ sta̱ryo̱3 na gāvo̱ nakṣa̭nnṛ̱taṃ ja̭ri̱tāra̭sta indra |
yā̱hi vā̱yurna ni̱yuto̭ no̱ acchā̱ tvaṃ hi dhī̱bhirdaya̭se̱ vi vājā̭n ||4||
te tvā̱ madā̭ indra mādayantu śu̱ṣmiṇa̭ṃ tuvi̱rādha̭saṃ jari̱tre |
eko̭ deva̱trā daya̭se̱ hi martā̭na̱smiñchṷ̄ra̱ sava̭ne mādayasva ||5||
e̱vedindra̱ṃ vṛṣa̭ṇa̱ṃ vajra̭bāhu̱ṃ vasi̭ṣṭhāso a̱bhya̭rcantya̱rkaiḥ |
sa na̭: stu̱to vī̱rava̭ddhātu̱ goma̭dyū̱yaṃ pā̭ta sva̱stibhi̱: sadā̭ naḥ ||6||
6 maitrāvaruṇirvasiṣṭha:| indra: | triṣṭup |
yoni̭ṣṭa indra̱ sada̭ne akāri̱ tamā nṛbhi̭: puruhūta̱ pra yā̭hi |
aso̱ yathā̭ no'vi̱tā vṛ̱dhe ca̱ dado̱ vasṷ̄ni ma̱mada̭śca̱ somai̭: ||1||
gṛ̱bhī̱taṃ te̱ mana̭ indra dvi̱barhā̭: su̱taḥ soma̱: pari̭ṣiktā̱ madhṷ̄ni |
 visṛ̭ṣṭadhenā bharate suvṛ̱ktiri̱yamindra̱ṃ johṷvatī manī̱ṣā ||2||
ā no̭ di̱va ā pṛ̭thi̱vyā ṛ̭jīṣinni̱daṃ ba̱rhiḥ so̭ma̱peyā̭ya yāhi |
vaha̭ntu tvā̱ hara̭yo ma̱drya̭ñcamāṅgū̱ṣamacchā̭ ta̱vasa̱ṃ madā̭ya ||3||
ā no̱ viśvā̭bhirū̱tibhi̭: sa̱joṣā̱ brahma̭ juṣā̱ṇo ha̭ryaśva yāhi |
 varī̭vṛja̱tsthavi̭rebhiḥ suśiprā̱'sme dadha̱dvṛṣa̭ṇa̱ṃ śuṣma̭mindra ||4||
e̱ṣa stomo̭ ma̱ha u̱grāya̱ vāhḙ dhu̱rī̱3vātyo̱ na vā̱jaya̭nnadhāyi |
 indra̭ tvā̱yama̱rka ī̭ṭṭe̱ vasṷ̄nāṃ di̱vī̭va̱ dyāmadhi̭ na̱: śroma̭taṃ dhāḥ ||5||
e̱vā na̭ indra̱ vārya̭sya pūrdhi̱ pra tḙ ma̱hīṃ sṷma̱tiṃ vḙvidāma |
iṣa̭ṃ pinva ma̱ghava̭dbhyaḥ su̱vīrā̭ṃ yū̱yaṃ pā̭ta sva̱stibhi̱: sadā̭ naḥ ||6||
6 maitrāvaruṇirvasiṣṭha:| indra: | triṣṭup |
ā tḙ ma̱ha i̭ndro̱tyṷgra̱ sama̭nyavo̱ yatsa̱mara̭nta̱ senā̭: |
patā̭ti di̱dyunnarya̭sya bā̱hvormā te̱ mano̭ viṣva̱drya1gvi cā̭rīt ||1||
ni du̱rga i̭ndra śnathihya̱mitrā̭na̱bhi ye no̱ martā̭so a̱manti̭ |
ā̱re taṃ śaṃsa̭ṃ kṛṇuhi nini̱tsorā no̭ bhara sa̱ṃbhara̭ṇa̱ṃ vasṷ̄nām ||2||
śa̱taṃ tḙ śiprinnū̱taya̭: su̱dāsḙ sa̱hasra̱ṃ śaṃsā̭ u̱ta rā̱tira̭stu |
ja̱hi vadha̭rva̱nuṣo̱ martya̭syā̱'sme dyu̱mnamadhi̱ ratna̭ṃ ca dhehi ||3||
tvāva̭to̱ hī̭ndra̱ kratve̱ asmi̱ tvāva̭to'vi̱tuḥ śṷ̄ra rā̱tau |
viśvedahā̭ni taviṣīva ugra̱~ oka̭: kṛṇuṣva harivo̱ na ma̭rdhīḥ ||4||
kutsā̭ e̱te harya̭śvāya śū̱ṣamindre̱ saho̭ de̱vajṷ̄tamiyā̱nāḥ |
sa̱trā kṛ̭dhi su̱hanā̭ śūra vṛ̱trā va̱yaṃ tarṷtrāḥ sanuyāma̱ vāja̭m ||5||
e̱vā na̭ indra̱ vārya̭sya pūrdhi̱ pra tḙ ma̱hīṃ sṷma̱tiṃ vḙvidāma |
iṣa̭ṃ pinva ma̱ghava̭dbhyaḥ su̱vīrā̭ṃ yū̱yaṃ pā̭ta sva̱stibhi̱: sadā̭ naḥ ||6||
5 maitrāvaruṇirvasiṣṭha:| indra: | triṣṭup |
na soma̱ indra̱masṷto mamāda̱ nābra̭hmāṇo ma̱ghavā̭naṃ su̱tāsa̭: |
tasmā̭ u̱kthaṃ ja̭naye̱ yajjujo̭ṣannṛ̱vannavī̭yaḥ śṛ̱ṇava̱dyathā̭ naḥ ||1||
u̱kthaṷkthe̱ soma̱ indra̭ṃ mamāda nī̱thenī̭the ma̱ghavā̭naṃ su̱tāsa̭: |
yadī̭ṃ sa̱bādha̭: pi̱tara̱ṃ na pu̱trāḥ sa̭mā̱nada̭kṣā̱ ava̭se̱ hava̭nte ||2||
ca̱kāra̱ tā kṛ̱ṇava̭nnū̱nama̱nyā yāni̭ bru̱vanti̭ ve̱dhasa̭: su̱teṣṷ |
janī̭riva̱ pati̱reka̭: samā̱no ni mā̭mṛje̱ pura̱ indra̱: su sarvā̭: ||3||
e̱vā tamā̭huru̱ta śṛ̭ṇva̱ indra̱ eko̭ vibha̱ktā ta̱raṇi̭rma̱ghānā̭m |
mi̱tha̱stura̭ ū̱tayo̱ yasya̭ pū̱rvīra̱sme bha̱drāṇi̭ saścata pri̱yāṇi̭ ||4||
e̱vā vasi̭ṣṭha̱ indra̭mū̱taye̱ nṝnkṛ̭ṣṭī̱nāṃ vṛ̭ṣa̱bhaṃ su̱te gṛ̭ṇāti |
sa̱ha̱sriṇa̱ upa̭ no māhi̱ vājā̭nyū̱yaṃ pā̭ta sva̱stibhi̱: sadā̭ naḥ ||5||
5  maitrāvaruṇirvasiṣṭha:| indra: | triṣṭup |
indra̱ṃ naro̭ ne̱madhi̭tā havante̱ yatpāryā̭ yu̱naja̭te̱ dhiya̱stāḥ |
śūro̱ nṛṣā̭tā̱ śava̭saścakā̱na ā goma̭ti vra̱je bha̭jā̱ tvaṃ na̭: ||1||
ya i̭ndra̱ śuṣmo̭ maghavante̱ asti̱ śikṣā̱ sakhi̭bhyaḥ puruhūta̱ nṛbhya̭: |
tvaṃ hi dṛ̱ḻhā ma̭ghava̱nvicḙtā̱ apā̭ vṛdhi̱ pari̭vṛta̱ṃ na rādha̭: ||2||
indro̱ rājā̱ jaga̭taścarṣaṇī̱nāmadhi̱ kṣami̱ viṣṷrūpa̱ṃ yadasti̭ |
tato̭ dadāti dā̱śuṣe̱ vasṷ̄ni̱ coda̱drādha̱ upa̭stutaścida̱rvāk ||3||
nū ci̭nna̱ indro̭ ma̱ghavā̱ sahṷ̄tī dā̱no vāja̱ṃ ni ya̭mate na ū̱tī |
anṷ̄nā̱ yasya̱ dakṣi̭ṇā pī̱pāya̭ vā̱maṃ nṛbhyo̭ a̱bhivī̭tā̱ sakhi̭bhyaḥ ||4||
nū i̭ndra rā̱ye vari̭vaskṛdhī na̱ ā te̱ mano̭ vavṛtyāma ma̱ghāya̭ |
goma̱daśvā̭va̱dratha̭va̱dvyanto̭ yū̱yaṃ pā̭ta sva̱stibhi̱: sadā̭ naḥ ||5||
5  maitrāvaruṇirvasiṣṭha:| indra: | triṣṭup |
brahmā̭ ṇa i̱ndropa̭ yāhi vi̱dvāna̱rvāñca̭ste̱ hara̭yaḥ santu yu̱ktāḥ |
viśvḙ ci̱ddhi tvā̭ vi̱hava̭nta̱ martā̭ a̱smāka̱micchṛ̭ṇuhi viśvaminva ||1||
hava̭ṃ ta indra mahi̱mā vyā̭na̱ḍbrahma̱ yatpāsi̭ śavasi̱nnṛṣī̭ṇām |
ā yadvajra̭ṃ dadhi̱ṣe hasta̭ ugra gho̱raḥ sankratvā̭ janiṣṭhā̱ aṣā̭ḻhaḥ ||2||
tava̱ praṇī̭tīndra̱ johṷvānā̱ntsaṃ yannṝnna roda̭sī ni̱netha̭ |
ma̱he kṣa̱trāya̱ śava̭se̱ hi ja̱jñe'tṷ̄tujiṃ ci̱ttūtṷjiraśiśnat ||3||
e̱bhirna̭ i̱ndrāha̭bhirdaśasya durmi̱trāso̱ hi kṣi̱taya̱: pava̭nte |
prati̱ yaccaṣṭe̱ anṛ̭tamane̱nā ava̭ dvi̱tā varṷṇo mā̱yī na̭: sāt ||4||
vo̱cemedindra̭ṃ ma̱ghavā̭namenaṃ ma̱ho rā̱yo rādha̭so̱ yaddada̭nnaḥ |
yo arca̭to̱ brahma̭kṛti̱mavi̭ṣṭho yū̱yaṃ pā̭ta sva̱stibhi̱: sadā̭ naḥ ||5||
5  maitrāvaruṇirvasiṣṭha:| indra: | triṣṭup |
a̱yaṃ soma̭ indra̱ tubhya̭ṃ sunva̱ ā tu pra yā̭hi hariva̱stado̭kāḥ |
 pibā̱ tva1sya suṣṷtasya̱ cāro̱rdado̭ ma̱ghāni̭ maghavanniyā̱naḥ ||1||
brahma̭nvīra̱ brahma̭kṛtiṃ juṣā̱ṇo̭'rvācī̱no hari̭bhiryāhi̱ tūya̭m |
a̱sminnū̱ ṣu sava̭ne mādaya̱svopa̱ brahmā̭ṇi śṛṇava i̱mā na̭: ||2||
kā tḙ a̱styara̭ṃkṛtiḥ sū̱ktaiḥ ka̱dā nū̱naṃ tḙ maghavandāśema |
viśvā̭ ma̱tīrā ta̭tane tvā̱yā'dhā̭ ma indra śṛṇavo̱ have̱mā ||3||
u̱to ghā̱ te pṷru̱ṣyā̱3 idā̭sa̱nyeṣā̱ṃ pūrvḙṣā̱maśṛ̭ṇo̱ṝṣī̭ṇām |
adhā̱haṃ tvā̭ maghavañjohavīmi̱ tvaṃ na̭ indrāsi̱ prama̭tiḥ pi̱teva̭ ||4||
vo̱cemedindra̭ṃ ma̱ghavā̭namenaṃ ma̱ho rā̱yo rādha̭so̱ yaddada̭nnaḥ |
yo arca̭to̱ brahma̭kṛti̱mavi̭ṣṭho yū̱yaṃ pā̭ta sva̱stibhi̱: sadā̭ naḥ ||5||
5  maitrāvaruṇirvasiṣṭha:| indra: | triṣṭup |
ā no̭ deva̱ śava̭sā yāhi śuṣmi̱nbhavā̭ vṛ̱dha i̭ndra rā̱yo a̱sya |
ma̱he nṛ̱mṇāya̭ nṛpate suvajra̱ mahi̭ kṣa̱trāya̱ pauṃsyā̭ya śūra ||1||
hava̭nta u tvā̱ havya̱ṃ vivā̭ci ta̱nūṣu̱ śūrā̱: sūrya̭sya sā̱tau |
tvaṃ viśvḙṣu̱ senyo̱ janḙṣu̱ tvaṃ vṛ̱trāṇi̭ randhayā su̱hantṷ ||2||
ahā̱ yadi̭ndra su̱dinā̭ vyu̱cchāndadho̱ yatke̱tumṷpa̱maṃ sa̱matsṷ |
nya1gniḥ sī̭da̱dasṷro̱ na hotā̭ huvā̱no atra̭ su̱bhagā̭ya de̱vān ||3||
va̱yaṃ te ta̭ indra̱ ye ca̭ deva̱ stava̭nta śūra̱ dada̭to ma̱ghāni̭ |
yacchā̭ sū̱ribhya̭ upa̱maṃ varṷ̄thaṃ svā̱bhuvo̭ jara̱ṇāma̭śnavanta ||4||
vo̱cemedindra̭ṃ ma̱ghavā̭namenaṃ ma̱ho rā̱yo rādha̭so̱ yaddada̭nnaḥ |
yo arca̭to̱ brahma̭kṛti̱mavi̭ṣṭho yū̱yaṃ pā̭ta sva̱stibhi̱: sadā̭ naḥ ||5||
12 maitrāvaruṇirvasiṣṭha:| indra: |gāyatrī, 10-12  virāṭ |
pra va̱ indrā̭ya̱ māda̭na̱ṃ harya̭śvāya gāyata | sakhā̭yaḥ soma̱pāvnḙ ||1||
śaṃsedu̱kthaṃ su̱dāna̭va u̱ta dyu̱kṣaṃ yathā̱ nara̭: | ca̱kṛ̱mā sa̱tyarā̭dhase ||2||
tvaṃ na̭ indra vāja̱yustvaṃ ga̱vyuḥ śa̭takrato | tvaṃ hi̭raṇya̱yurva̭so ||3||
va̱yami̭ndra tvā̱yavo̱'bhi pra ṇo̭numo vṛṣan | vi̱ddhī tva1sya no̭ vaso ||4||
mā no̭ ni̱de ca̱ vakta̭ve̱'ryo ra̭ndhī̱rarā̭vṇe | tve api̱ kratu̱rmama̭ ||5||
tvaṃ varmā̭si sa̱pratha̭: puroyo̱dhaśca̭ vṛtrahan | tvayā̱ prati̭ bruve yu̱jā ||6||
ma̱hā~ u̱tāsi̱ yasya̱ te'nṷ sva̱dhāva̭rī̱ saha̭: | ma̱mnātḙ indra̱ roda̭sī ||7||
taṃ tvā̭ ma̱rutva̭tī̱ pari̱ bhuva̱dvāṇī̭ sa̱yāva̭rī | nakṣa̭māṇā sa̱ha dyubhi̭: ||8||
ū̱rdhvāsa̱stvānvinda̭vo̱ bhuva̭nda̱smamupa̱ dyavi̭ | saṃ tḙ namanta kṛ̱ṣṭaya̭: ||9||
pra vo̭ ma̱he ma̭hi̱vṛdhḙ bharadhva̱ṃ pracḙtase̱ pra sṷma̱tiṃ kṛ̭ṇudhvam | viśa̭: pū̱rvīḥ pra ca̭rā carṣaṇi̱prāḥ ||10||
u̱ru̱vyaca̭se ma̱hinḙ suvṛ̱ktimindrā̭ya̱ brahma̭ janayanta̱ viprā̭: | tasya̭ vra̱tāni̱ na mi̭nanti̱ dhīrā̭: ||11||
indra̱ṃ vāṇī̱ranṷttamanyume̱va sa̱trā rājā̭naṃ dadhire̱ saha̭dhyai | harya̭śvāya barhayā̱ samā̱pīn ||12||
27 (1-25)  maitrāvaruṇirvasiṣṭha: , 26 pūrvārdharcasya śaktirvāsiṣṭho vā    (śāṭyāyane brāhmaṇe),26-27 śaktirvāsiṣṭho vā (tāṇḍake brāhmaṇe) | indra: | pragātha: – (bṛhatī , satobṛhatī),3 dvipadā virāṭ |
mo ṣu tvā̭ vā̱ghata̭śca̱nā''re a̱smanni rī̭raman |
ā̱rāttā̭ccitsadha̱māda̭ṃ na̱ ā ga̭hī̱ha vā̱ sannupa̭ śrudhi ||1||
i̱me hi tḙ brahma̱kṛta̭: su̱te sacā̱ madhau̱ na makṣa̱ āsa̭te |
 indre̱ kāma̭ṃ jari̱tāro̭ vasū̱yavo̱ rathe̱ na pāda̱mā da̭dhuḥ ||2||
rā̱yaskā̭mo̱ vajra̭hastaṃ su̱dakṣi̭ṇaṃ pu̱tro na pi̱tara̭ṃ huve ||3||
i̱ma indrā̭ya sunvire̱ somā̭so̱ dadhyā̭śiraḥ |
tā~ ā madā̭ya vajrahasta pī̱taye̱ hari̭bhyāṃ yā̱hyoka̱ ā ||4||
śrava̱cchrutka̭rṇa īyate̱ vasṷ̄nā̱ṃ nū ci̭nno mardhiṣa̱dgira̭: |
sa̱dyaści̱dyaḥ sa̱hasrā̭ṇi śa̱tā dada̱nnaki̱rditsa̭nta̱mā mi̭nat ||5||
sa vī̱ro apra̭tiṣkuta̱ indrḙṇa śūśuve̱ nṛbhi̭: |
yastḙ gabhī̱rā sava̭nāni vṛtrahantsu̱notyā ca̱ dhāva̭ti ||6||
bhavā̱ varṷ̄thaṃ maghavanma̱ghonā̱ṃ yatsa̱majā̭si̱ śardha̭taḥ |
vi tvāha̭tasya̱ veda̭naṃ bhajema̱hyā dū̱ṇāśo̭ bharā̱ gaya̭m ||7||
su̱notā̭ soma̱pāvne̱ soma̱mindrā̭ya va̱jriṇḙ |
paca̭tā pa̱ktīrava̭se kṛṇu̱dhvamitpṛ̱ṇannitpṛ̭ṇa̱te maya̭: ||8||
mā srḙdhata somino̱ dakṣa̭tā ma̱he kṛ̭ṇu̱dhvaṃ rā̱ya ā̱tujḙ |
ta̱raṇi̱rijja̭yati̱ kṣeti̱ puṣya̭ti̱ na de̱vāsa̭: kava̱tnavḙ ||9||
naki̭: su̱dāso̱ ratha̱ṃ paryā̭sa̱ na rī̭ramat |
indro̱ yasyā̭vi̱tā yasya̭ ma̱ruto̱ gama̱tsa goma̭ti vra̱je ||10||
gama̱dvāja̭ṃ vā̱jaya̭nnindra̱ martyo̱ yasya̱ tvama̭vi̱tā bhuva̭: |
a̱smāka̭ṃ bodhyavi̱tā rathā̭nāma̱smāka̭ṃ śūra nṛ̱ṇām ||11||
udinnva̭sya ricya̱teṃ'śo̱ dhana̱ṃ na ji̱gyuṣa̭: |
 ya indro̱ hari̭vā̱nna da̭bhanti̱ taṃ ripo̱ dakṣa̭ṃ dadhāti so̱mini̭ ||12||
mantra̱makha̭rva̱ṃ sudhi̭taṃ su̱peśa̭sa̱ṃ dadhā̭ta ya̱jñiye̱ṣvā |
pū̱rvīśca̱na prasi̭tayastaranti̱ taṃ ya indre̱ karma̭ṇā̱ bhuva̭t ||13||
kastami̭ndra̱ tvāva̭su̱mā martyo̭ dadharṣati |
śra̱ddhā ittḙ maghava̱npāryḙ di̱vi vā̱jī vāja̭ṃ siṣāsati ||14||
ma̱ghona̭: sma vṛtra̱hatyḙṣu codaya̱ ye dada̭ti pri̱yā vasṷ |
tava̱ praṇī̭tī haryaśva sū̱ribhi̱rviśvā̭ tarema duri̱tā ||15||
tavedi̭ndrāva̱maṃ vasu̱ tvaṃ pṷṣyasi madhya̱mam |
sa̱trā viśva̭sya para̱masya̭ rājasi̱ naki̭ṣṭvā̱ goṣṷ vṛṇvate ||16||
tvaṃ viśva̭sya dhana̱dā a̭si śru̱to ya ī̱ṃ bhava̭ntyā̱jaya̭: |
tavā̱yaṃ viśva̭: puruhūta̱ pārthi̭vo'va̱syurnāma̭ bhikṣate ||17||
yadi̭ndra̱ yāva̭ta̱stvame̱tāva̭da̱hamīśī̭ya |
 sto̱tāra̱middi̭dhiṣeya radāvaso̱ na pā̭pa̱tvāya̭ rāsīya ||18||
śikṣḙya̱minma̭haya̱te di̱vedi̭ve rā̱ya ā kṷhaci̱dvidḙ |
na̱hi tvada̱nyanma̭ghavanna̱ āpya̱ṃ vasyo̱ asti̭ pi̱tā ca̱na ||19||
ta̱raṇi̱ritsi̭ṣāsati̱ vāja̱ṃ pura̭ṃdhyā yu̱jā |
ā va̱ indra̭ṃ puruhū̱taṃ na̭me gi̱rā ne̱miṃ taṣṭḙva su̱drva̭m ||20||
na dṷ:ṣṭu̱tī martyo̭ vindate̱ vasu̱ na sredha̭ntaṃ ra̱yirna̭śat |
su̱śakti̱rinma̭ghava̱ntubhya̱ṃ māva̭te de̱ṣṇaṃ yatpāryḙ di̱vi ||21||
a̱bhi tvā̭ śūra nonu̱mo'dṷgdhā iva dhe̱nava̭: |
īśā̭nama̱sya jaga̭taḥ sva̱rdṛśa̱mīśā̭namindra ta̱sthuṣa̭: ||22||
na tvāvā̭~ a̱nyo di̱vyo na pārthi̭vo̱ na jā̱to na ja̭niṣyate |
a̱śvā̱yanto̭ maghavannindra vā̱jino̭ ga̱vyanta̭stvā havāmahe ||23||
a̱bhī ṣa̱tastadā bha̱rendra̱ jyāya̱: kanī̭yasaḥ | pu̱rū̱vasu̱rhi ma̭ghavantsa̱nādasi̱ bharḙbhare ca̱ havya̭: ||24||
parā̭ ṇudasva maghavanna̱mitrā̭ntsu̱vedā̭ no̱ vasṷ̄ kṛdhi |
a̱smāka̭ṃ bodhyavi̱tā ma̭hādha̱ne bhavā̭ vṛ̱dhaḥ sakhī̭nām ||25||
indra̱ kratṷṃ na̱ ā bha̭ra pi̱tā pu̱trebhyo̱ yathā̭ |
śikṣā̭ ṇo a̱sminpṷruhūta̱ yāma̭ni jī̱vā jyoti̭raśīmahi ||26||
mā no̱ ajñā̭tā vṛ̱janā̭ durā̱dhyo̱3 māśi̭vāso̱ ava̭ kramuḥ |
tvayā̭ va̱yaṃ pra̱vata̱: śaśva̭tīra̱po'ti̭ śūra tarāmasi ||27||
14 (1-9)  maitrāvaruṇirvasiṣṭha: , 10–14 vasiṣṭhaputrā:| 1-9 vasiṣṭhaputrā: indro vā ; 10 – 14 vasiṣṭha : | triṣṭup |
śvi̱tyañco̭ mā dakṣiṇa̱taska̭pardā dhiyaṃji̱nvāso̭ a̱bhi hi pra̭ma̱nduḥ |
u̱ttiṣṭha̭nvoce̱ pari̭ ba̱rhiṣo̱ nṝnna mḙ dū̱rādavi̭tave̱ vasi̭ṣṭhāḥ ||1||
dū̱rādindra̭manaya̱nnā su̱tena̭ ti̱ro vai̭śa̱ntamati̱ pānta̭mu̱gram |
pāśa̭dyumnasya vāya̱tasya̱ somā̭tsu̱tādindro̭'vṛṇītā̱ vasi̭ṣṭhān ||2||
e̱vennu ka̱ṃ sindhṷmebhistatāre̱vennu ka̭ṃ bhe̱damḙbhirjaghāna |
e̱vennu ka̭ṃ dāśarā̱jñe su̱dāsa̱ṃ prāva̱dindro̱ brahma̭ṇā vo vasiṣṭhāḥ ||3||
juṣṭī̭ naro̱ brahma̭ṇā vaḥ pitṝ̱ṇāmakṣa̭mavyaya̱ṃ na kilā̭ riṣātha |
yacchakva̭rīṣu bṛha̱tā rave̱ṇendre̱ śuṣma̱mada̭dhātā vasiṣṭhāḥ ||4||
uddyāmi̱vettṛ̱ṣṇajo̭ nāthi̱tāso'dī̭dhayurdāśarā̱jñe vṛ̱tāsa̭: |
vasi̭ṣṭhasya stuva̱ta indro̭ aśrodu̱ruṃ tṛtsṷbhyo akṛṇodu lo̱kam ||5||
da̱ṇḍā i̱vedgo̱aja̭nāsa āsa̱npari̭cchinnā bhara̱tā a̭rbha̱kāsa̭: |
abha̭vacca purae̱tā vasi̭ṣṭha̱ ādittṛtsṷ̄nā̱ṃ viśo̭ aprathanta ||6||
traya̭: kṛṇvanti̱ bhuva̭neṣu̱ reta̭sti̱sraḥ pra̱jā āryā̱ jyoti̭ragrāḥ |
trayo̭ gha̱rmāsa̭ u̱ṣasa̭ṃ sacante̱ sarvā̱~ ittā~ anṷ vidu̱rvasi̭ṣṭhāḥ ||7||
sūrya̭syeva va̱kṣatho̱ jyoti̭reṣāṃ samu̱drasyḙva mahi̱mā ga̭bhī̱raḥ |
vāta̭syeva praja̱vo nānyena̱ stomo̭ vasiṣṭhā̱ anvḙtave vaḥ ||8||
ta inni̱ṇyaṃ hṛda̭yasya prake̱taiḥ sa̱hasra̭valśama̱bhi saṃ ca̭ranti |
ya̱mena̭ ta̱taṃ pa̭ri̱dhiṃ vaya̭nto'psa̱rasa̱ upa̭ sedu̱rvasi̭ṣṭhāḥ ||9||
vi̱dyuto̱ jyoti̱: pari̭ sa̱ṃjihā̭naṃ mi̱trāvarṷṇā̱ yadapa̭śyatāṃ tvā |
tatte̱ janmo̱taika̭ṃ vasiṣṭhā̱'gastyo̱ yattvā̭ vi̱śa ā̭ja̱bhāra̭ ||10||
u̱tāsi̭ maitrāvaru̱ṇo va̭siṣṭho̱rvaśyā̭ brahma̱nmana̱so'dhi̭ jā̱taḥ |
dra̱psaṃ ska̱nnaṃ brahma̭ṇā̱ daivyḙna̱ viśvḙ de̱vāḥ puṣka̭re tvādadanta ||11||
sa pra̭ke̱ta u̱bhaya̭sya pravi̱dvāntsa̱hasra̭dāna u̱ta vā̱ sadā̭naḥ |
ya̱mena̭ ta̱taṃ pa̭ri̱dhiṃ va̭yi̱ṣyanna̭psa̱rasa̱: pari̭ jajñe̱ vasi̭ṣṭhaḥ ||12||
sa̱tre ha̭ jā̱tāvi̭ṣi̱tā namo̭bhiḥ ku̱mbhe reta̭: siṣicatuḥ
samā̱nam | tato̭ ha̱ māna̱ udi̭yāya̱ madhyā̱ttato̭ jā̱tamṛṣi̭māhu̱rvasi̭ṣṭham ||13||
u̱ktha̱bhṛta̭ṃ sāma̱bhṛta̭ṃ bibharti̱ grāvā̭ṇa̱ṃ bibhra̱tpra va̭dā̱tyagrḙ |
upai̭namādhvaṃ sumana̱syamā̭nā̱ ā vo̭ gacchāti pratṛdo̱ vasi̭ṣṭhaḥ ||14||
25 maitrāvaruṇirvasiṣṭha:|viśve devā:, 16 ahi:, 17 ahirbudhnya:|dvipadā virāṭ ,22-25 triṣṭup |
pra śu̱kraitṷ de̱vī ma̭nī̱ṣā a̱smatsuta̭ṣṭo̱ ratho̱ na vā̱jī ||1||
vi̱duḥ pṛ̭thi̱vyā di̱vo ja̱nitra̭ṃ śṛ̱ṇvantyāpo̱ adha̱ kṣara̭ntīḥ ||2||
āpa̭ścidasmai̱ pinva̭nta pṛ̱thvīrvṛ̱treṣu̱ śūrā̱ maṃsa̭nta u̱grāḥ ||3||
ā dhū̱rṣva̭smai̱ dadhā̱tāśvā̱nindro̱ na va̱jrī hira̭ṇyabāhuḥ ||4||
a̱bhi pra sthā̱tāhḙva ya̱jñaṃ yātḙva̱ patma̱ntmanā̭ hinota ||5||
tmanā̭ sa̱matsṷ hi̱nota̭ ya̱jñaṃ dadhā̭ta ke̱tuṃ janā̭ya vī̱ram ||6||
uda̭sya̱ śuṣmā̭dbhā̱nurnārta̱ bibha̭rti bhā̱raṃ pṛ̭thi̱vī na bhūma̭ ||7||
hvayā̭mi de̱vā~ ayā̭turagne̱ sādha̭nnṛ̱tena̱ dhiya̭ṃ dadhāmi ||8||
a̱bhi vo̭ de̱vīṃ dhiya̭ṃ dadhidhva̱ṃ pra vo̭ deva̱trā vāca̭ṃ kṛṇudhvam ||9||
ā ca̭ṣṭa āsā̱ṃ pātho̭ na̱dīnā̱ṃ varṷṇa u̱graḥ sa̱hasra̭cakṣāḥ ||10||
rājā̭ rā̱ṣṭrānā̱ṃ peśo̭ na̱dīnā̱manṷttamasmai kṣa̱traṃ vi̱śvāyṷ ||11||
avi̭ṣṭo a̱smānviśvā̭su vi̱kṣvadyṷṃ kṛṇota̱ śaṃsa̭ṃ nini̱tsoḥ ||12||
vyḙtu di̱dyuddvi̱ṣāmaśḙvā yu̱yota̱ viṣva̱grapa̭sta̱nūnā̭m ||13||
avī̭nno a̱gnirha̱vyānnamo̭bhi̱: preṣṭho̭ asmā adhāyi̱ stoma̭: ||14||
sa̱jūrde̱vebhi̭ra̱pāṃ napā̭ta̱ṃ sakhā̭yaṃ kṛdhvaṃ śi̱vo no̭ astu ||15||
a̱bjāmu̱kthairahi̭ṃ gṛṇīṣe bu̱dhne na̱dīnā̱ṃ raja̭: su̱ ṣīda̭n ||16||
mā no'hi̭rbu̱dhnyo̭ ri̱ṣe dhā̱nmā ya̱jño a̭sya sridhadṛtā̱yoḥ ||17||
u̱ta na̭ e̱ṣu nṛṣu̱ śravo̭ dhu̱: pra rā̱ye ya̭ntu̱ śardha̭nto a̱ryaḥ ||18||
tapa̭nti̱ śatru̱ṃ sva1rṇa bhūmā̭ ma̱hāsḙnāso̱ amḙbhireṣām ||19||
ā yanna̱: patnī̱rgama̱ntyacchā̱ tvaṣṭā̭ supā̱ṇirdadhā̭tu vī̱rān ||20||
prati̭ na̱: stoma̱ṃ tvaṣṭā̭ juṣeta̱ syāda̱sme a̱rama̭tirvasū̱yuḥ ||21||
tā no̭ rāsanrāti̱ṣāco̱ vasū̱nyā roda̭sī varuṇā̱nī śṛ̭ṇotu |
varṷ̄trībhiḥ suśara̱ṇo no̭ astu̱ tvaṣṭā̭ su̱datro̱ vi da̭dhātu̱ rāya̭: ||22||
tanno̱ rāya̱: parva̭tā̱stanna̱ āpa̱stadrā̭ti̱ṣāca̱ oṣa̭dhīru̱ta dyauḥ |
vana̱spati̭bhiḥ pṛthi̱vī sa̱joṣā̭ u̱bhe roda̭sī̱ pari̭ pāsato naḥ ||23||
anu̱ tadu̱rvī roda̭sī jihātā̱manṷ dyu̱kṣo varṷṇa̱ indra̭sakhā | a
nu̱ viśvḙ ma̱ruto̱ ye sa̱hāso̭ rā̱yaḥ syā̭ma dha̱ruṇa̭ṃ dhi̱yadhyai̭ ||24||
tanna̱ indro̱ varṷṇo mi̱tro a̱gnirāpa̱ oṣa̭dhīrva̱nino̭ juṣanta |
śarma̭ntsyāma ma̱rutā̭mu̱pasthḙ yū̱yaṃ pā̭ta sva̱stibhi̱: sadā̭ naḥ ||25||
15 maitrāvaruṇirvasiṣṭha:| viśve devā:| triṣṭup |
śaṃ na̭ indrā̱gnī bha̭vatā̱mavo̭bhi̱: śaṃ na̱ indrā̱varṷṇā rā̱taha̭vyā |
śamindrā̱somā̭ suvi̱tāya̱ śaṃ yoḥ śaṃ na̱ indrā̭pū̱ṣaṇā̱ vāja̭sātau ||1||
śaṃ no̱ bhaga̱: śamṷ na̱: śaṃso̭ astu̱ śaṃ na̱: pura̭ṃdhi̱: śamṷ santu̱ rāya̭: |
śaṃ na̭: sa̱tyasya̭ su̱yama̭sya̱ śaṃsa̱: śaṃ no̭ arya̱mā pṷrujā̱to a̭stu ||2||
śaṃ no̭ dhā̱tā śamṷ dha̱rtā no̭ astu̱ śaṃ na̭ urū̱cī bha̭vatu sva̱dhābhi̭: |
śaṃ roda̭sī bṛha̱tī śaṃ no̱ adri̱: śaṃ no̭ de̱vānā̭ṃ su̱havā̭ni santu||3||
śaṃ no̭ a̱gnirjyoti̭ranīko astu̱ śaṃ no̭ mi̱trāvarṷṇāva̱śvinā̱ śam |
śaṃ na̭: su̱kṛtā̭ṃ sukṛ̱tāni̭ santu̱ śaṃ na̭ iṣi̱ro a̱bhi vā̭tu̱ vāta̭: ||4||
śaṃ no̱ dyāvā̭pṛthi̱vī pū̱rvahṷ̄tau̱ śama̱ntari̭kṣaṃ dṛ̱śayḙ no astu |
śaṃ na̱ oṣa̭dhīrva̱nino̭ bhavantu̱ śaṃ no̱ raja̭sa̱spati̭rastu ji̱ṣṇuḥ ||5||
śaṃ na̱ indro̱ vasṷbhirde̱vo a̭stu̱ śamā̭di̱tyebhi̱rvarṷṇaḥ su̱śaṃsa̭: |
śaṃ no̭ ru̱dro ru̱drebhi̱rjalā̭ṣa̱: śaṃ na̱stvaṣṭā̱ gnābhi̭ri̱ha śṛ̭ṇotu ||6||
śaṃ na̱ somo̭ bhavatu̱ brahma̱ śaṃ na̱: śaṃ no̱ grāvā̭ṇa̱: śamṷ santu ya̱jñāḥ |
śaṃ na̱: svarṷ̄ṇāṃ mi̱tayo̭ bhavantu̱ śaṃ na̭: pra̱sva1: śamva̭stu̱ vedi̭: ||7||
śaṃ na̱: sūrya̭ uru̱cakṣā̱ udḙtu̱ śaṃ na̱ścata̭sraḥ pra̱diśo̭ bhavantu |
śaṃ na̱: parva̭tā dhru̱vayo̭ bhavantu̱ śaṃ na̱: sindha̭va̱: śamṷ sa̱ntvāpa̭: ||8||
śaṃ no̱ adi̭tirbhavatu vra̱tebhi̱: śaṃ no̭ bhavantu ma̱ruta̭: sva̱rkāḥ |
śaṃ no̱ viṣṇu̱: śamṷ pū̱ṣā no̭ astu̱ śaṃ no̭ bha̱vitra̱ṃ śamva̭stu vā̱yuḥ ||9||
śaṃ no̭ de̱vaḥ sa̭vi̱tā trāya̭māṇa̱: śaṃ no̭ bhavantū̱ṣaso̭ vibhā̱tīḥ |
śaṃ na̭: pa̱rjanyo̭ bhavatu pra̱jābhya̱: śaṃ na̱: kṣetra̭sya̱ pati̭rastu śa̱mbhuḥ ||10||
śaṃ no̭ de̱vā vi̱śvadḙvā bhavantu̱ śaṃ sara̭svatī sa̱ha dhī̱bhira̭stu |
śama̭bhi̱ṣāca̱: śamṷ rāti̱ṣāca̱: śaṃ no̭ di̱vyāḥ pārthi̭vā̱: śaṃ no̱ apyā̭: ||11||
śaṃ na̭: sa̱tyasya̱ pata̭yo bhavantu̱ śaṃ no̱ arva̭nta̱: śamṷ santu̱ gāva̭: |
śaṃ na̭ ṛ̱bhava̭: su̱kṛta̭: su̱hastā̱: śaṃ no̭ bhavantu pi̱taro̱ havḙṣu ||12||
śaṃ no̭ a̱ja eka̭pādde̱vo a̭stu̱ śaṃ no'hi̭rbu̱dhnya1: śaṃ sa̭mu̱draḥ |
śaṃ no̭ a̱pāṃ napā̭tpe̱rura̭stu̱ śaṃ na̱: pṛśni̭rbhavatu de̱vago̭pā ||13||
ā̱di̱tyā ru̱drā vasa̭vo juṣante̱daṃ brahma̭ kri̱yamā̭ṇa̱ṃ navī̭yaḥ |
śṛ̱ṇvantṷ no di̱vyāḥ pārthi̭vāso̱ gojā̭tā u̱ta ye ya̱jñiyā̭saḥ ||14||
ye de̱vānā̭ṃ ya̱jñiyā̭ ya̱jñiyā̭nā̱ṃ mano̱ryaja̭trā a̱mṛtā̭ ṛta̱jñāḥ |
te no̭ rāsantāmurugā̱yama̱dya yū̱yaṃ pā̭ta sva̱stibhi̱: sadā̭ naḥ ||15||
9 maitrāvaruṇirvasiṣṭha:| viśve devā: | triṣṭup |
pra brahmai̭tu̱ sada̭nādṛ̱tasya̱ vi ra̱śmibhi̭: sasṛje̱ sūryo̱ gāḥ |
vi sānṷnā pṛthi̱vī sa̭sra u̱rvī pṛ̱thu pratī̭ka̱madhyedhḙ a̱gniḥ ||1||
i̱māṃ vā̭ṃ mitrāvaruṇā suvṛ̱ktimiṣa̱ṃ na kṛ̭ṇve asurā̱ navī̭yaḥ |
i̱no vā̭ma̱nyaḥ pa̭da̱vīrada̭bdho̱ jana̭ṃ ca mi̱tro ya̭tati bruvā̱ṇaḥ ||2||
ā vāta̭sya̱ dhraja̭to ranta i̱tyā apī̭payanta dhe̱navo̱ na sūdā̭: |
ma̱ho di̱vaḥ sada̭ne̱ jāya̭mā̱no'ci̭kradadvṛṣa̱bhaḥ sasmi̱nnūdha̭n ||3||
gi̱rā ya e̱tā yu̱naja̱ddharī̭ ta̱ indra̭ pri̱yā su̱rathā̭ śūra dhā̱yū |
pra yo ma̱nyuṃ riri̭kṣato mi̱nātyā su̱kratṷmarya̱maṇa̭ṃ vavṛtyām ||4||
yaja̭nte asya sa̱khyaṃ vaya̭śca nama̱svina̱: sva ṛ̱tasya̱ dhāma̭n |
vi pṛkṣo̭ bābadhe̱ nṛbhi̱: stavā̭na i̱daṃ namo̭ ru̱drāya̱ preṣṭha̭m ||5||
ā yatsā̱kaṃ ya̱śaso̭ vāvaśā̱nāḥ sara̭svatī sa̱ptathī̱ sindhṷmātā |
yāḥ su̱ṣvaya̭nta su̱dughā̭: sudhā̱rā a̱bhi svena̱ paya̭sā̱ pīpyā̭nāḥ ||6||
u̱ta tye no̭ ma̱ruto̭ mandasā̱nā dhiya̭ṃ to̱kaṃ ca̭ vā̱jino̭'vantu |
mā na̱: pari̭ khya̱dakṣa̭rā̱ cara̱ntyavī̭vṛdha̱nyujya̱ṃ te ra̱yiṃ na̭: ||7||
pra vo̭ ma̱hīma̱rama̭tiṃ kṛṇudhva̱ṃ pra pū̱ṣaṇa̭ṃ vida̱thyaṃ1 na vī̱ram |
bhaga̭ṃ dhi̱yo̭'vi̱tāra̭ṃ no a̱syāḥ sā̱tau vāja̭ṃ rāti̱ṣāca̱ṃ pura̭ṃdhim ||8||
acchā̱yaṃ vo̭ maruta̱: śloka̭ e̱tvacchā̱ viṣṇṷṃ niṣikta̱pāmavo̭bhiḥ |
u̱ta pra̱jāyai̭ gṛṇa̱te vayo̭ dhuryū̱yaṃ pā̭ta sva̱stibhi̱: sadā̭ naḥ ||9||
8  maitrāvaruṇirvasiṣṭha:| viśve devā: | triṣṭup |
ā vo̱ vāhi̭ṣṭho vahatu sta̱vadhyai̱ ratho̭ vājā ṛbhukṣaṇo̱ amṛ̭ktaḥ |
a̱bhi tri̭pṛ̱ṣṭhaiḥ sava̭neṣu̱ somai̱rmadḙ suśiprā ma̱habhi̭: pṛṇadhvam ||1||
yū̱yaṃ ha̱ ratna̭ṃ ma̱ghava̭tsu dhattha sva̱rdṛśa̭ ṛbhukṣaṇo̱ amṛ̭ktam |
saṃ ya̱jñeṣṷ svadhāvantaḥ pibadhva̱ṃ vi no̱ rādhā̭ṃsi ma̱tibhi̭rdayadhvam ||2||
u̱voci̭tha̱ hi ma̭ghavande̱ṣṇaṃ ma̱ho arbha̭sya̱ vasṷno vibhā̱ge |
u̱bhā tḙ pū̱rṇā vasṷnā̱ gabha̭stī̱ na sū̱nṛtā̱ ni ya̭mate vasa̱vyā̭ ||3||
tvami̭ndra̱ svaya̭śā ṛbhu̱kṣā vājo̱ na sā̱dhurasta̭me̱ṣyṛkvā̭ |
va̱yaṃ nu tḙ dā̱śvāṃsa̭: syāma̱ brahma̭ kṛ̱ṇvanto̭ harivo̱ vasi̭ṣṭhāḥ ||4||
sani̭tāsi pra̱vato̭ dā̱śuṣḙ ci̱dyābhi̱rvivḙṣo haryaśva dhī̱bhiḥ |
va̱va̱nmā nu te̱ yujyā̭bhirū̱tī ka̱dā na̭ indra rā̱ya ā da̭śasyeḥ ||5||
vā̱saya̭sīva ve̱dhasa̱stvaṃ na̭: ka̱dā na̭ indra̱ vaca̭so bubodhaḥ |
asta̭ṃ tā̱tyā dhi̱yā ra̱yiṃ su̱vīra̭ṃ pṛ̱kṣo no̱ arvā̱ nyṷhīta vā̱jī ||6||
a̱bhi yaṃ de̱vī niṝ̭tiści̱dīśe̱ nakṣa̭nta̱ indra̭ṃ śa̱rada̭: su̱pṛkṣa̭: |
upa̭ triba̱ndhurja̱rada̭ṣṭime̱tyasva̭veśa̱ṃ yaṃ kṛ̱ṇava̭nta̱ martā̭: ||7||
ā no̱ rādhā̭ṃsi savita sta̱vadhyā̱ ā rāyo̭ yantu̱ parva̭tasya rā̱tau | sa
dā̭ no di̱vyaḥ pā̱yuḥ si̭ṣaktu yū̱yaṃ pā̭ta sva̱stibhi̱: sadā̭ naḥ ||8||
8 maitrāvaruṇirvasiṣṭha:| 1-6 savitā , 6 uttarārdhasya bhago vā , 7-8  vājina: | triṣṭup |
udu̱ ṣya de̱vaḥ sa̭vi̱tā ya̭yāma hira̱ṇyayī̭ma̱mati̱ṃ yāmaśi̭śret |
nū̱naṃ bhago̱ havyo̱ mānṷṣebhi̱rvi yo ratnā̭ purū̱vasu̱rdadhā̭ti ||1||
udṷ tiṣṭha savitaḥ śru̱dhya1sya hira̭ṇyapāṇe̱ prabhṛ̭tāvṛ̱tasya̭ |
vyu1rvīṃ pṛ̱thvīma̱mati̭ṃ sṛjā̱na ā nṛbhyo̭ marta̱bhoja̭naṃ suvā̱naḥ ||2||
api̭ ṣṭu̱taḥ sa̭vi̱tā de̱vo a̭stu̱ yamā ci̱dviśve̱ vasa̭vo gṛ̱ṇanti̭ |
sa na̱: stomā̭nnama̱sya1ścano̭ dhā̱dviśvḙbhiḥ pātu pā̱yubhi̱rni sū̱rīn ||3||
a̱bhi yaṃ de̱vyadi̭tirgṛ̱ṇāti̭ sa̱vaṃ de̱vasya̭ savi̱turjṷṣā̱ṇā |
a̱bhi sa̱mrājo̱ varṷṇo gṛṇantya̱bhi mi̱trāso̭ arya̱mā sa̱joṣā̭: ||4||
a̱bhi ye mi̱tho va̱nuṣa̱: sapa̭nte rā̱tiṃ di̱vo rā̭ti̱ṣāca̭: pṛthi̱vyāḥ |
ahi̭rbu̱dhnya̭ u̱ta na̭: śṛṇotu̱ varū̱tryeka̭dhenubhi̱rni pā̭tu ||5||
anu̱ tanno̱ jāspati̭rmaṃsīṣṭa̱ ratna̭ṃ de̱vasya̭ savi̱turi̭yā̱naḥ |
bhaga̭mu̱gro'va̭se̱ joha̭vīti̱ bhaga̱manṷgro̱ adha̭ yāti̱ ratna̭m ||6||
śaṃ no̭ bhavantu vā̱jino̱ havḙṣu de̱vatā̭tā mi̱tadra̭vaḥ sva̱rkāḥ |
ja̱mbhaya̱nto'hi̱ṃ vṛka̱ṃ rakṣā̭ṃsi̱ sanḙmya̱smadyṷyava̱nnamī̭vāḥ ||7||
vājḙvāje'vata vājino no̱ dhanḙṣu viprā amṛtā ṛtajñāḥ |
a̱sya madhva̭: pibata mā̱daya̭dhvaṃ tṛ̱ptā yā̭ta pa̱thibhi̭rdeva̱yānai̭: ||8||
7 maitrāvaruṇirvasiṣṭha:|
viśve devā: | triṣṭup |
ū̱rdhvo a̱gniḥ sṷma̱tiṃ vasvo̭ aśretpratī̱cī jū̱rṇirde̱vatā̭timeti |
bhe̱jāte̱ adrī̭ ra̱thyḙva̱ panthā̭mṛ̱taṃ hotā̭ na iṣi̱to ya̭jāti ||1||
pra vā̭vṛje supra̱yā ba̱rhirḙṣā̱mā vi̱śpatī̭va̱ bīri̭ṭa iyāte |
vi̱śāma̱ktoru̱ṣasa̭: pū̱rvahṷ̄tau vā̱yuḥ pū̱ṣā sva̱stayḙ ni̱yutvā̭n ||2||
jma̱yā atra̱ vasa̭vo ranta de̱vā u̱rāva̱ntari̭kṣe marjayanta śu̱bhrāḥ |
a̱rvākpa̱tha ṷrujrayaḥ kṛṇudhva̱ṃ śrotā̭ dū̱tasya̭ ja̱gmuṣo̭ no a̱sya ||3||
te hi ya̱jñeṣṷ ya̱jñiyā̭sa̱ ūmā̭: sa̱dhastha̱ṃ viśvḙ a̱bhi santi̭ de̱vāḥ |
tā~ a̭dhva̱ra ṷśa̱to ya̭kṣyagne śru̱ṣṭī bhaga̱ṃ nāsa̭tyā̱ pura̭ṃdhim ||4||
āgne̱ giro̭ di̱va ā pṛ̭thi̱vyā mi̱traṃ va̭ha̱ varṷṇa̱mindra̭ma̱gnim |
ārya̱maṇa̱madi̭ti̱ṃ viṣṇṷmeṣā̱ṃ sara̭svatī ma̱ruto̭ mādayantām ||5||
ra̱re ha̱vyaṃ ma̱tibhi̭rya̱jñiyā̭nā̱ṃ nakṣa̱tkāma̱ṃ martyā̭nā̱masi̭nvan |
dhātā̭ ra̱yima̭vida̱syaṃ sa̭dā̱sāṃ sa̭kṣī̱mahi̱ yujyḙbhi̱rnu de̱vaiḥ ||6||
nū roda̭sī a̱bhiṣṭṷte̱ vasi̭ṣṭhaiṝ̱tāvā̭no̱ varṷṇo mi̱tro a̱gniḥ |
yaccha̭ntu ca̱ndrā ṷpa̱maṃ no̭ a̱rkaṃ yū̱yaṃ pā̭ta sva̱stibhi̱: sadā̭ naḥ ||7||
7 maitrāvaruṇirvasiṣṭha:| viśve devā: | triṣṭup |
o śru̱ṣṭirvi̭da̱thyā̱3 samḙtu̱ prati̱ stoma̭ṃ dadhīmahi tu̱rāṇā̭m |
yada̱dya de̱vaḥ sa̭vi̱tā su̱vāti̱ syāmā̭sya ra̱tnino̭ vibhā̱ge ||1||
mi̱trastanno̱ varṷṇo̱ roda̭sī ca̱ dyubha̭kta̱mindro̭ arya̱mā da̭dātu |
didḙṣṭu de̱vyadi̭tī̱ rekṇo̭ vā̱yuśca̱ yanni̭yu̱vaite̱ bhaga̭śca ||2||
sedu̱gro a̭stu maruta̱: sa śu̱ṣmī yaṃ martya̭ṃ pṛṣadaśvā̱ avā̭tha |
u̱tema̱gniḥ sara̭svatī ju̱nanti̱ na tasya̭ rā̱yaḥ pa̭rye̱tāsti̭ ||3||
a̱yaṃ hi ne̱tā varṷṇa ṛ̱tasya̭ mi̱tro rājā̭no arya̱māpo̱ dhuḥ |
su̱havā̭ de̱vyadi̭tirana̱rvā te no̱ aṃho̱ ati̭ parṣa̱nnari̭ṣṭān ||4||
a̱sya de̱vasya̭ mī̱ḻhuṣo̭ va̱yā viṣṇo̭re̱ṣasya̭ prabhṛ̱the ha̱virbhi̭: |
vi̱de hi ru̱dro ru̱driya̭ṃ mahi̱tvaṃ yā̭si̱ṣṭaṃ va̱rtira̭śvinā̱virā̭vat ||5||
mātra̭ pūṣannāghṛṇa irasyo̱ varṷ̄trī̱ yadrā̭ti̱ṣāca̭śca̱ rāsa̭n |
ma̱yo̱bhuvo̭ no̱ arva̭nto̱ ni pā̭ntu vṛ̱ṣṭiṃ pari̭jmā̱ vāto̭ dadātu ||6||
nū roda̭sī a̱bhiṣṭṷte̱ vasi̭ṣṭhaiṝ̱tāvā̭no̱ varṷṇo mi̱tro a̱gniḥ |
yaccha̭ntu ca̱ndrā ṷpa̱maṃ no̭ a̱rkaṃ yū̱yaṃ pā̭ta sva̱stibhi̱: sadā̭ naḥ ||7||
7 maitrāvaruṇirvasiṣṭha:|1 agnīndramitrāvaruṇāśvibhagapūṣabrahmaṇaspatisomarudrā:, 2-6  bhaga:,    7 uṣasa:| triṣṭup , 1 jagatī |
prā̱tara̱gniṃ prā̱tarindra̭ṃ havāmahe prā̱tarmi̱trāvarṷṇā prā̱tara̱śvinā̭ |
prā̱tarbhaga̭ṃ pū̱ṣaṇa̱ṃ brahma̭ṇa̱spati̭ṃ prā̱taḥ soma̭mu̱ta ru̱draṃ hṷvema ||1||
prā̱ta̱rjita̱ṃ bhaga̭mu̱graṃ hṷvema va̱yaṃ pu̱tramadi̭te̱ryo vi̭dha̱rtā |
ā̱dhraści̱dyaṃ manya̭mānastu̱raści̱drājā̭ ci̱dyaṃ bhaga̭ṃ bha̱kṣītyāha̭ ||2||
bhaga̱ praṇḙta̱rbhaga̱ satya̭rādho̱ bhage̱māṃ dhiya̱muda̭vā̱ dada̭nnaḥ |
bhaga̱ pra ṇo̭ janaya̱ gobhi̱raśvai̱rbhaga̱ pra nṛbhi̭rnṛ̱vanta̭: syāma ||3||
u̱tedānī̱ṃ bhaga̭vantaḥ syāmo̱ta pra̭pi̱tva u̱ta madhye̱ ahnā̭m |
u̱todi̭tā maghava̱ntsūrya̭sya va̱yaṃ de̱vānā̭ṃ suma̱tau syā̭ma ||4||
bhaga̭ e̱va bhaga̭vā~ astu devā̱stena̭ va̱yaṃ bhaga̭vantaḥ syāma |
taṃ tvā̭ bhaga̱ sarva̱ ijjo̭havīti̱ sa no̭ bhaga purae̱tā bha̭ve̱ha ||5||
sama̭dhva̱rāyo̱ṣaso̭ namanta dadhi̱krāvḙva̱ śuca̭ye pa̱dāya̭ |
a̱rvā̱cī̱naṃ va̭su̱vida̱ṃ bhaga̭ṃ no̱ ratha̭mi̱vāśvā̭ vā̱jina̱ ā va̭hantu ||6||
aśvā̭vatī̱rgoma̭tīrna u̱ṣāso̭ vī̱rava̭tī̱: sada̭mucchantu bha̱drāḥ |
ghṛ̱taṃ duhā̭nā vi̱śvata̱: prapī̭tā yū̱yaṃ pā̭ta sva̱stibhi̱: sadā̭ naḥ ||7||
6 maitrāvaruṇirvasiṣṭha:| viśve devā: | triṣṭup |
pra bra̱hmāṇo̱ aṅgi̭raso nakṣanta̱ pra kra̭nda̱nurna̭bha̱nya̭sya vetu |
pra dhe̱nava̭ uda̱pruto̭ navanta yu̱jyātā̱madrī̭ adhva̱rasya̱ peśa̭: ||1||
su̱gastḙ agne̱ sana̭vitto̱ adhvā̭ yu̱kṣvā su̱te ha̱rito̭ ro̱hita̭śca |
ye vā̱ sadma̭nnaru̱ṣā vī̭ra̱vāho̭ hu̱ve de̱vānā̱ṃ jani̭māni sa̱ttaḥ ||2||
samṷ vo ya̱jñaṃ ma̭haya̱nnamo̭bhi̱: pra hotā̭ ma̱ndro ri̭rica upā̱ke |
yaja̭sva̱ su pṷrvaṇīka de̱vānā ya̱jñiyā̭ma̱rama̭tiṃ vavṛtyāḥ ||3||
ya̱dā vī̱rasya̭ re̱vato̭ duro̱ṇe syo̭na̱śīrati̭thirā̱cikḙtat |
suprī̭to a̱gniḥ sudhi̭to̱ dama̱ ā sa vi̱śe dā̭ti̱ vārya̱miya̭tyai ||4||
i̱maṃ no̭ agne adhva̱raṃ jṷṣasva ma̱rutsvindrḙ ya̱śasa̭ṃ kṛdhī naḥ |
ā naktā̭ ba̱rhiḥ sa̭datāmu̱ṣāso̱śantā̭ mi̱trāvarṷṇā yaje̱ha ||5||
e̱vāgniṃ sa̭ha̱syaṃ1 vasi̭ṣṭho rā̱yaskā̭mo vi̱śvapsnya̭sya staut |
iṣa̭ṃ ra̱yiṃ pa̭pratha̱dvāja̭ma̱sme yū̱yaṃ pā̭ta sva̱stibhi̱: sadā̭ naḥ ||6||
5 maitrāvaruṇirvasiṣṭha:| viśve devā: | triṣṭup |
pra vo̭ ya̱jñeṣṷ deva̱yanto̭ arca̱ndyāvā̱ namo̭bhiḥ pṛthi̱vī i̱ṣadhyai̭ |
yeṣā̱ṃ brahmā̱ṇyasa̭māni̱ viprā̱ viṣva̭gvi̱yanti̭ va̱nino̱ na śākhā̭: ||1||
pra ya̱jña ḙtu̱ hetvo̱ na sapti̱rudya̭cchadhva̱ṃ sama̭naso ghṛ̱tācī̭: |
stṛ̱ṇī̱ta ba̱rhira̭dhva̱rāya̭ sā̱dhūrdhvā śo̱cīṃṣi̭ deva̱yūnya̭sthuḥ ||2||
ā pu̱trāso̱ na mā̱tara̱ṃ vibhṛ̭trā̱: sānaṷ de̱vāso̭ ba̱rhiṣa̭: sadantu |
ā vi̱śvācī̭ vida̱thyā̭mana̱ktvagne̱ mā no̭ de̱vatā̭tā̱ mṛdha̭skaḥ ||3||
te sī̭ṣapanta̱ joṣa̱mā yaja̭trā ṛ̱tasya̱ dhārā̭: su̱dughā̱ duhā̭nāḥ |
jyeṣṭha̭ṃ vo a̱dya maha̱ ā vasṷ̄nā̱mā ga̭ntana̱ sama̭naso̱ yati̱ ṣṭha ||4||
e̱vā no̭ agne vi̱kṣvā da̭śasya̱ tvayā̭ va̱yaṃ sa̭hasāva̱nnāskrā̭: |
rā̱yā yu̱jā sa̭dha̱mādo̱ ari̭ṣṭā yū̱yaṃ pā̭ta sva̱stibhi̱: sadā̭ naḥ ||5||
5 maitrāvaruṇirvasiṣṭha:| dadhikā:, 1 dadhikāśvyuṣo' gnibhagendraviṣṇupūṣabrahmaṇaspatyādityadyāvāpṛthivyāpa:| triṣṭup ,1 jagatī|
da̱dhi̱krāṃ va̭: pratha̱mama̱śvino̱ṣasa̭ma̱gniṃ sami̭ddha̱ṃ bhaga̭mū̱tayḙ huve |
indra̱ṃ viṣṇṷṃ pū̱ṣaṇa̱ṃ brahma̭ṇa̱spati̭mādi̱tyāndyāvā̭pṛthi̱vī a̱paḥ sva̭: ||1||
da̱dhi̱krāmu̱ nama̭sā bo̱dhaya̭nta u̱dīrā̭ṇā ya̱jñamṷpapra̱yanta̭: |
iḻā̭ṃ de̱vīṃ ba̱rhiṣi̭ sā̱daya̭nto̱'śvinā̱ viprā̭ su̱havā̭ huvema ||2||
da̱dhi̱krāvā̭ṇaṃ bubudhā̱no a̱gnimupa̭ bruva u̱ṣasa̱ṃ sūrya̱ṃ gām |
bra̱dhnaṃ ma̭ṃśca̱torvarṷṇasya ba̱bhruṃ te viśvā̱smaddṷri̱tā yā̭vayantu ||3||
da̱dhi̱krāvā̭ pratha̱mo vā̱jyarvā'gre̱ rathā̭nāṃ bhavati prajā̱nan |
sa̱ṃvi̱dā̱na u̱ṣasā̱ sūryḙṇā''di̱tyebhi̱rvasṷbhi̱raṅgi̭robhiḥ ||4||
ā no̭ dadhi̱krāḥ pa̱thyā̭manaktvṛ̱tasya̱ panthā̱manvḙta̱vā ṷ |
śṛ̱ṇotṷ no̱ daivya̱ṃ śardho̭ a̱gniḥ śṛ̱ṇvantu̱ viśvḙ mahi̱ṣā amṷ̄rāḥ ||5||
4 maitrāvaruṇirvasiṣṭha:| savitā | triṣṭup |
ā de̱vo yā̭tu savi̱tā su̱ratno̭'ntarikṣa̱prā vaha̭māno̱ aśvai̭: |
haste̱ dadhā̭no̱ naryā̭ pu̱rūṇi̭ nive̱śaya̭ñca prasu̱vañca̱ bhūma̭ ||1||
uda̭sya bā̱hū śi̭thi̱rā bṛ̱hantā̭ hira̱ṇyayā̭ di̱vo antā̭~ anaṣṭām |
nū̱naṃ so a̭sya mahi̱mā pa̭niṣṭa̱ sūra̭ścidasmā̱ anṷ dādapa̱syām ||2||
sa ghā̭ no de̱vaḥ sa̭vi̱tā sa̱hāvā ''sā̭viṣa̱dvasṷpati̱rvasṷ̄ni |
 vi̱śraya̭māṇo a̱mati̭murū̱cīṃ ma̭rta̱bhoja̭na̱madha̭ rāsate naḥ ||3||
i̱mā gira̭: savi̱tāra̭ṃ suji̱hvaṃ pū̱rṇaga̭bhastimīḻate supā̱ṇim |
ci̱traṃ vayo̭ bṛ̱hada̱sme da̭dhātu yū̱yaṃ pā̭ta sva̱stibhi̱: sadā̭ naḥ ||4||
4 maitrāvaruṇirvasiṣṭha:|rūdra:| jagatī, 4 triṣṭup |
i̱mā ru̱drāya̭ sthi̱radha̭nvane̱ gira̭: kṣi̱preṣa̭ve de̱vāya̭ sva̱dhāvnḙ |
aṣā̭ḻhāya̱ saha̭mānāya ve̱dhasḙ ti̱gmāyṷdhāya bharatā śṛ̱ṇotṷ naḥ ||1||
sa hi kṣayḙṇa̱ kṣamya̭sya̱ janma̭na̱: sāmrā̭jyena di̱vyasya̱ ceta̭ti |
ava̱nnava̭ntī̱rupa̭ no̱ dura̭ścarānamī̱vo rṷdra̱ jāsṷ no bhava ||2||
yā tḙ di̱dyudava̭sṛṣṭā di̱vaspari̭ kṣma̱yā cara̭ti̱ pari̱ sā vṛ̭ṇaktu naḥ |
 sa̱hasra̭ṃ te svapivāta bheṣa̱jā mā na̭sto̱keṣu̱ tana̭yeṣu rīriṣaḥ ||3||
mā no̭ vadhī rudra̱ mā parā̭ dā̱ mā tḙ bhūma̱ prasi̭tau hīḻi̱tasya̭ |
ā no̭ bhaja ba̱rhiṣi̭ jīvaśa̱ṃse yū̱yaṃ pā̭ta sva̱stibhi̱: sadā̭ naḥ ||4||
4 maitrāvaruṇirvasiṣṭha:|āpa:| triṣṭup |
āpo̱ yaṃ va̭: pratha̱maṃ dḙva̱yanta̭ indra̱pāna̭mū̱rmimakṛ̭ṇvate̱ḻaḥ |
taṃ vo̭ va̱yaṃ śuci̭mari̱prama̱dya ghṛ̭ta̱pruṣa̱ṃ madhṷmantaṃ vanema ||1||
tamū̱rmimā̭po̱ madhṷmattamaṃ vo̱'pāṃ napā̭davatvāśu̱hemā̭ |
yasmi̱nnindro̱ vasṷbhirmā̱dayā̭te̱ tama̭śyāma deva̱yanto̭ vo a̱dya ||2||
śa̱tapa̭vitrāḥ sva̱dhayā̱ mada̭ntīrde̱vīrde̱vānā̱mapi̭ yanti̱ pātha̭: |
tā indra̭sya̱ na mi̭nanti vra̱tāni̱ sindhṷbhyo ha̱vyaṃ ghṛ̱tava̭jjuhota ||3||
yāḥ sūryo̭ ra̱śmibhi̭rāta̱tāna̱ yābhya̱ indro̱ ara̭dadgā̱tumū̱rmim |
te si̭ndhavo̱ vari̭vo dhātanā no yū̱yaṃ pā̭ta sva̱stibhi̱: sadā̭ naḥ ||4||
4 maitrāvaruṇirvasiṣṭha:| ṛbhava:, 4 viśve devā vā | triṣṭup |
ṛbhṷkṣaṇo vājā mā̱daya̭dhvama̱sme na̭ro maghavānaḥ su̱tasya̭ |
ā vo̱'rvāca̱: krata̭vo̱ na yā̱tāṃ vibhvo̱ ratha̱ṃ narya̭ṃ vartayantu ||1||
ṛ̱bhuṝ̱bhubhi̭ra̱bhi va̭: syāma̱ vibhvo̭ vi̱bhubhi̱: śava̭sā̱ śavā̭ṃsi |
vājo̭ a̱smā~ a̭vatu̱ vāja̭sātā̱vindrḙṇa yu̱jā ta̭ruṣema vṛ̱tram ||2||
te ci̱ddhi pū̱rvīra̱bhi santi̭ śā̱sā viśvā̭~ a̱rya ṷpa̱ratā̭ti vanvan | i
ndro̱ vibhvā̭~ ṛbhu̱kṣā vājo̭ a̱ryaḥ śatro̭rmitha̱tyā kṛ̭ṇava̱nvi nṛ̱mṇam ||3||
nū dḙvāso̱ vari̭vaḥ kartanā no bhū̱ta no̱ viśve'va̭se sa̱joṣā̭: |
sama̱sme iṣa̱ṃ vasa̭vo dadīranyū̱yaṃ pā̭ta sva̱stibhi̱: sadā̭ naḥ ||4||
4 maitrāvaruṇirvasiṣṭha:| āpa: | triṣṭup |
sa̱mu̱drajyḙṣṭhāḥ sali̱lasya̱ madhyā̭tpunā̱nā ya̱ntyani̭viśamānāḥ |
indro̱ yā va̱jrī vṛ̭ṣa̱bho ra̱rāda̱ tā āpo̭ de̱vīri̱ha māma̭vantu ||1||
yā āpo̭ di̱vyā u̱ta vā̱ srava̭nti kha̱nitri̭mā u̱ta vā̱ yāḥ sva̭ya̱ṃjāḥ |
sa̱mu̱drārthā̱ yāḥ śuca̭yaḥ pāva̱kāstā āpo̭ de̱vīri̱ha māma̭vantu ||2||
yāsā̱ṃ rājā̱ varṷṇo̱ yāti̱ madhyḙ satyānṛ̱te a̭va̱paśya̱ñjanā̭nām |
ma̱dhu̱ścuta̱: śuca̭yo̱ yāḥ pā̭va̱kāstā āpo̭ de̱vīri̱ha māma̭vantu ||3||
yāsu̱ rājā̱ varṷṇo̱ yāsu̱ somo̱ viśvḙ de̱vā yāsūrja̱ṃ mada̭nti |
vai̱śvā̱na̱ro yāsva̱gniḥ pravi̭ṣṭa̱stā āpo̭ de̱vīri̱ha māma̭vantu ||4||
4 maitrāvaruṇirvasiṣṭha:|1 mitrāvaruṇau,2 agni:, 3 viśve devā:, 4nadya: |  jagatī ,4 atijagatī śakvvarī vā |
ā māṃ mi̭trāvaruṇe̱ha ra̭kṣataṃ kulā̱yaya̭dvi̱śvaya̱nmā na̱ ā ga̭n |
a̱ja̱kā̱vaṃ du̱rdṛśī̭kaṃ ti̱ro da̭dhe̱ mā māṃ padyḙna̱ rapa̭sā vida̱ttsarṷ: ||1||
yadvi̱jāma̱nparṷṣi̱ vanda̭na̱ṃ bhuva̭daṣṭhī̱vantau̱ pari̭ ku̱lphau ca̱ deha̭t |
a̱gniṣṭacchoca̱nnapa̭ bādhatāmi̱to mā māṃ padyḙna̱ rapa̭sā vida̱ttsarṷ: ||2||
yaccha̭lma̱lau bhava̭ti̱ yanna̱dīṣu̱ yadoṣa̭dhībhya̱: pari̱ jāya̭te vi̱ṣam |
viśvḙ de̱vā niri̱tastatsṷvantu̱ mā māṃ padyḙna̱ rapa̭sā vida̱ttsarṷ: ||3||
yāḥ pra̱vato̭ ni̱vata̭ u̱dvata̭ uda̱nvatī̭ranuda̱kāśca̱ yāḥ |
tā a̱smabhya̱ṃ paya̭sā̱ pinva̭mānāḥ śi̱vā de̱vīra̭śipa̱dā bha̭vantu̱ sarvā̭ na̱dyo̭ aśimi̱dā bha̭vantu ||4||
3 maitrāvaruṇirvasiṣṭha:| ādityā: | triṣṭup |
ā̱di̱tyānā̱mava̭sā̱ nūta̭nena sakṣī̱mahi̱ śarma̭ṇā̱ śaṃta̭mena |
a̱nā̱gā̱stve a̭diti̱tve tu̱rāsa̭ i̱maṃ ya̱jñaṃ da̭dhatu̱ śroṣa̭māṇāḥ ||1||
ā̱di̱tyāso̱ adi̭tirmādayantāṃ mi̱tro a̭rya̱mā varṷṇo̱ raji̭ṣṭhāḥ |
a̱smāka̭ṃ santu̱ bhuva̭nasya go̱pāḥ piba̭ntu̱ soma̱mava̭se no a̱dya ||2||
ā̱di̱tyā viśvḙ ma̱ruta̭śca̱ viśvḙ de̱vāśca̱ viśva̭ ṛ̱bhava̭śca̱ viśvḙ |
indro̭ a̱gnira̱śvinā̭ tuṣṭuvā̱nā yū̱yaṃ pā̭ta sva̱stibhi̱: sadā̭ naḥ ||3||
3 maitrāvaruṇirvasiṣṭha:| ādityā: | triṣṭup |
ā̱di̱tyāso̱ adi̭tayaḥ syāma̱ pūrdḙva̱trā va̭savo martya̱trā |
sanḙma mitrāvaruṇā̱ sana̭nto̱ bhavḙma dyāvāpṛthivī̱ bhava̭ntaḥ ||1||
mi̱trastanno̱ varṷṇo māmahanta̱ śarma̭ to̱kāya̱ tana̭yāya go̱pāḥ |
mā vo̭ bhujemā̱nyajā̭ta̱meno̱ mā tatka̭rma vasavo̱ yaccaya̭dhve ||2||
tu̱ra̱ṇyavo'ṅgi̭raso nakṣanta̱ ratna̭ṃ de̱vasya̭ savi̱turi̭yā̱nāḥ |
pi̱tā ca̱ tanno̭ ma̱hānyaja̭tro̱ viśvḙ de̱vāḥ sama̭naso juṣanta ||3||
3 maitrāvaruṇirvasiṣṭha:| dyāvāpṛthivī|triṣṭup |
pra dyāvā̭ ya̱jñaiḥ pṛ̭thi̱vī namo̭bhiḥ sa̱bādha̭ īḻe bṛha̱tī yaja̭tre |
te ci̱ddhi pūrvḙ ka̱vayo̭ gṛ̱ṇanta̭: pu̱ro ma̱hī da̭dhi̱re de̱vapṷtre ||1||
pra pṷ̄rva̱je pi̱tarā̱ navya̭sībhirgī̱rbhiḥ kṛ̭ṇudhva̱ṃ sada̭ne ṛ̱tasya̭ |
ā no̭ dyāvāpṛthivī̱ daivyḙna̱ janḙna yāta̱ṃ mahi̭ vā̱ṃ varṷ̄tham ||2||
u̱to hi vā̭ṃ ratna̱dheyā̭ni̱ santi̭ pu̱rūṇi̭ dyāvāpṛthivī su̱dāsḙ |
a̱sme dha̭tta̱ṃ yadasa̱daskṛ̭dhoyu yū̱yaṃ pā̭ta sva̱stibhi̱: sadā̭ naḥ ||3||
3 maitrāvaruṇirvasiṣṭha:| vāstoṣpati:| triṣṭup |
vāsto̭ṣpate̱ prati̭ jānīhya̱smāntsvā̭ve̱śo a̭namī̱vo bha̭vā naḥ |
yattvema̭he̱ prati̱ tanno̭ juṣasva̱ śaṃ no̭ bhava dvi̱pade̱ śaṃ catṷṣpade ||1||
vāsto̭ṣpate pra̱tara̭ṇo na edhi gaya̱sphāno̱ gobhi̱raśvḙbhirindo |
a̱jarā̭saste sa̱khye syā̭ma pi̱teva̭ pu̱trānprati̭ no juṣasva ||2||
vāsto̭ṣpate śa̱gmayā̭ sa̱ṃsadā̭ te sakṣī̱mahi̭ ra̱ṇvayā̭ gātu̱matyā̭ |
pā̱hi kṣema̭ u̱ta yoge̱ vara̭ṃ no yū̱yaṃ pā̭ta sva̱stibhi̱: sadā̭ naḥ ||3||
8 maitrāvaruṇirvasiṣṭha:| vāstoṣpati:, 2- 8 indra:( 2-8 prasvāpinī upaniṣad ) |1 gāyatrī, 2-4 upariṣṭādbṛhatī, 5-8 anuṣṭup |
a̱mī̱va̱hā vā̭stoṣpate̱ viśvā̭ rū̱pāṇyā̭vi̱śan | sakhā̭ su̱śeva̭ edhi naḥ ||1||
yada̭rjuna sārameya da̱taḥ pi̭śaṅga̱ yaccha̭se | vī̭va bhrājanta ṛ̱ṣṭaya̱ upa̱ srakvḙṣu̱ bapsa̭to̱ ni ṣu sva̭pa ||2||
ste̱naṃ rā̭ya sārameya̱ taska̭raṃ vā punaḥsara | sto̱tṝnindra̭sya rāyasi̱ kima̱smāndṷcchunāyase̱ ni ṣu sva̭pa ||3||
tvaṃ sṷ̄ka̱rasya̭ dardṛhi̱ tava̭ dardartu sūka̱raḥ | sto̱tṝnindra̭sya rāyasi̱ kima̱smāndṷcchunāyase̱ ni ṣu sva̭pa ||4||
sastṷ mā̱tā sastṷ pi̱tā sastu̱ śvā sastṷ vi̱śpati̭: | sa̱santu̱ sarvḙ jñā̱taya̱: sastva̱yama̱bhito̱ jana̭: ||5||
ya āste̱ yaśca̱ cara̭ti̱ yaśca̱ paśya̭ti no̱ jana̭: | teṣā̱ṃ saṃ ha̭nmo a̱kṣāṇi̱ yathe̱daṃ ha̱rmyaṃ tathā̭ ||6||
sa̱hasra̭śṛṅgo vṛṣa̱bho yaḥ sa̭mu̱drādu̱dāca̭rat | tenā̭ saha̱syḙnā va̱yaṃ ni janā̭ntsvāpayāmasi ||7||
pro̱ṣṭhe̱śa̱yā va̭hyeśa̱yā nārī̱ryāsta̭lpa̱śīva̭rīḥ | striyo̱ yāḥ puṇya̭gandhā̱stāḥ sarvā̭: svāpayāmasi ||8||
25  maitrāvaruṇirvasiṣṭha:| maruta: | triṣṭup , 1-11 dvipadā virāṭ |
ka ī̱ṃ vya̭ktā̱ nara̱: sanī̭ḻā ru̱drasya̱ maryā̱ adha̱ svaśvā̭:                    1
naki̱rhyḙṣāṃ ja̱nūṃṣi̱ veda̱ te a̱ṅga vi̭dre mi̱tho ja̱nitra̭m ||1||             2
a̱bhi sva̱pūbhi̭rmi̱tho va̭panta̱ vāta̭svanasaḥ śye̱nā a̭spṛdhran              3
e̱tāni̱ dhīro̭ ni̱ṇyā ci̭keta̱ pṛśni̱ryadūdho̭ ma̱hī ja̱bhāra̭ ||2||          4
sā viṭ su̱vīrā̭ ma̱rudbhi̭rastu sa̱nātsaha̭ntī̱ puṣya̭ntī nṛ̱mṇam           5
yāma̱ṃ yeṣṭhā̭: śu̱bhā śobhi̭ṣṭhāḥ śri̱yā sammi̭ślā̱ ojo̭bhiru̱grāḥ ||3||  6
u̱graṃ va̱ oja̭: sthi̱rā śavā̱ṃsyadhā̭ ma̱rudbhi̭rga̱ṇastuvi̭ṣmān               7
śu̱bhro va̱: śuṣma̱: krudhmī̱ manā̭ṃsi̱ dhuni̱rmuni̭riva̱ śardha̭sya dhṛ̱ṣṇoḥ ||4||8
sanḙmya̱smadyu̱yota̭ di̱dyuṃ mā vo̭ durma̱tiri̱ha praṇa̭ṅnaḥ                           9
pri̱yā vo̱ nāma̭ huve tu̱rāṇā̱mā yattṛ̱panma̭ruto vāvaśā̱nāḥ ||5||       10
svā̱yu̱dhāsa̭ i̱ṣmiṇa̭: suni̱ṣkā u̱ta sva̱yaṃ ta̱nva1: śumbha̭mānāḥ ||6|| 11
śucī̭ vo ha̱vyā ma̭ruta̱: śucī̭nā̱ṃ śuci̭ṃ hinomyadhva̱raṃ śuci̭bhyaḥ |
ṛ̱tena̭ sa̱tyamṛ̭ta̱sāpa̭ āya̱ñchuci̭janmāna̱: śuca̭yaḥ pāva̱kāḥ ||12||
aṃse̱ṣvā ma̭rutaḥ khā̱dayo̭ vo̱ vakṣa̭:su ru̱kmā ṷpaśiśriyā̱ṇāḥ |
vi vi̱dyuto̱ na vṛ̱ṣṭibhī̭ rucā̱nā anṷ sva̱dhāmāyṷdhai̱ryaccha̭mānāḥ ||13||
pra bu̱dhnyā̭ va īrate̱ mahā̭ṃsi̱ pra nāmā̭ni prayajyavastiradhvam |
sa̱ha̱sriya̱ṃ damya̭ṃ bhā̱game̱taṃ gṛ̭hame̱dhīya̭ṃ maruto juṣadhvam ||14||
yadi̭ stu̱tasya̭ maruto adhī̱thetthā vipra̭sya vā̱jino̱ havī̭man |
ma̱kṣū rā̱yaḥ su̱vīrya̭sya dāta̱ nū ci̱dyama̱nya ā̱dabha̱darā̭vā ||15||
atyā̭so̱ na ye ma̱ruta̱: svañco̭ yakṣa̱dṛśo̱ na śu̱bhaya̭nta̱ maryā̭: |
te ha̭rmye̱ṣṭhāḥ śiśa̭vo̱ na śu̱bhrā va̱tsāso̱ na pra̭krī̱ḻina̭: payo̱dhāḥ ||16||
da̱śa̱syanto̭ no ma̱ruto̭ mṛḻantu variva̱syanto̱ roda̭sī su̱mekḙ |
ā̱re go̱hā nṛ̱hā va̱dho vo̭ astu su̱mnebhi̭ra̱sme va̭savo namadhvam ||17||
ā vo̱ hotā̭ johavīti sa̱ttaḥ sa̱trācī̭ṃ rā̱tiṃ ma̭ruto gṛṇā̱naḥ |
ya īva̭to vṛṣaṇo̱ asti̭ go̱pāḥ so adva̭yāvī havate va u̱kthaiḥ ||18||
i̱me tu̱raṃ ma̱ruto̭ rāmayantī̱me saha̱: saha̭sa̱ ā na̭manti |
i̱me śaṃsa̭ṃ vanuṣya̱to ni pā̭nti gu̱ru dveṣo̱ ara̭ruṣe dadhanti ||19||
i̱me ra̱dhraṃ ci̭nma̱ruto̭ junanti̱ bhṛmi̭ṃ ci̱dyathā̱ vasa̭vo ju̱ṣanta̭ |
apa̭ bādhadhvaṃ vṛṣaṇa̱stamā̭ṃsi dha̱tta viśva̱ṃ tana̭yaṃ to̱kama̱sme ||20||
mā vo̭ dā̱trānma̭ruto̱ nira̭rāma̱ mā pa̱ścādda̭ghma rathyo vibhā̱ge |
ā na̭: spā̱rhe bha̭jatanā vasa̱vye̱3 yadī̭ṃ sujā̱taṃ vṛ̭ṣaṇo vo̱ asti̭ ||21||
saṃ yaddhana̭nta ma̱nyubhi̱rjanā̭sa̱: śūrā̭ ya̱hvīṣvoṣa̭dhīṣu vi̱kṣu |
adha̭ smā no maruto rudriyāsastrā̱tāro̭ bhūta̱ pṛta̭nāsva̱ryaḥ ||22||
bhūri̭ cakra maruta̱: pitryā̭ṇyu̱kthāni̱ yā va̭: śa̱syantḙ pu̱rā ci̭t |
ma̱rudbhi̭ru̱graḥ pṛta̭nāsu̱ sāḻhā̭ ma̱rudbhi̱ritsani̭tā̱ vāja̱marvā̭ ||23||
a̱sme vī̱ro ma̭rutaḥ śu̱ṣmya̭stu̱ janā̭nā̱ṃ yo asṷro vidha̱rtā |
a̱po yena̭ sukṣi̱taye̱ tare̱mā'dha̱ svamoko̭ a̱bhi va̭: syāma ||24||
tanna̱ indro̱ varṷṇo mi̱tro a̱gnirāpa̱ oṣa̭dhīrva̱nino̭ juṣanta |
śarma̭ntsyāma ma̱rutā̭mu̱pasthḙ yū̱yaṃ pā̭ta sva̱stibhi̱: sadā̭ naḥ ||25||
7  maitrāvaruṇirvasiṣṭha:|maruta:| triṣṭup |
madhvo̭ vo̱ nāma̱ mārṷtaṃ yajatrā̱: pra ya̱jñeṣu̱ śava̭sā madanti |
ye re̱jaya̭nti̱ roda̭sī cidu̱rvī pinva̱ntyutsa̱ṃ yadayā̭suru̱grāḥ ||1||
ni̱ce̱tāro̱ hi ma̱ruto̭ gṛ̱ṇanta̭ṃ praṇe̱tāro̱ yaja̭mānasya̱ manma̭ |
a̱smāka̭ma̱dya vi̱dathḙṣu ba̱rhirā vī̱tayḙ sadata pipriyā̱ṇāḥ ||2||
naitāva̭da̱nye ma̱ruto̱ yathe̱me bhrāja̭nte ru̱kmairāyṷdhaista̱nūbhi̭: |
ā roda̭sī viśva̱piśa̭: piśā̱nāḥ sa̭mā̱nama̱ñjya̭ñjate śu̱bhe kam ||3||
ṛdha̱ksā vo̭ maruto di̱dyuda̭stu̱ yadva̱ āga̭: puru̱ṣatā̱ karā̭ma |
mā va̱stasyā̱mapi̭ bhūmā yajatrā a̱sme vo̭ astu suma̱tiścani̭ṣṭhā ||4||
kṛ̱te ci̱datra̭ ma̱ruto̭ raṇantā'nava̱dyāsa̱: śuca̭yaḥ pāva̱kāḥ |
 pra ṇo̭'vata suma̱tibhi̭ryajatrā̱: pra vājḙbhistirata pu̱ṣyasḙ naḥ ||5||
u̱ta stu̱tāso̭ ma̱ruto̭ vyantu̱ viśvḙbhi̱rnāma̭bhi̱rnaro̭ ha̱vīṃṣi̭ | da
dā̭ta no a̱mṛta̭sya pra̱jāyai̭ jigṛ̱ta rā̱yaḥ sū̱nṛtā̭ ma̱ghāni̭ ||6||
ā stu̱tāso̭ maruto̱ viśva̭ ū̱tī acchā̭ sū̱rīntsa̱rvatā̭tā jigāta |
ye na̱stmanā̭ śa̱tino̭ va̱rdhaya̭nti yū̱yaṃ pā̭ta sva̱stibhi̱: sadā̭ naḥ ||7||
6 maitrāvaruṇirvasiṣṭha:| maruta:| triṣṭup |
pra sā̭ka̱mukṣḙ arcatā ga̱ṇāya̱ yo daivya̭sya̱ dhāmna̱stuvi̭ṣmān |
u̱ta kṣo̭danti̱ roda̭sī mahi̱tvā nakṣa̭nte̱ nāka̱ṃ niṝ̭terava̱ṃśāt ||1||
ja̱nūści̭dvo marutastve̱ṣyḙṇa̱ bhīmā̭sa̱stuvi̭manya̱vo'yā̭saḥ |
pra ye maho̭bhi̱roja̭so̱ta santi̱ viśvo̭ vo̱ yāma̭nbhayate sva̱rdṛk ||2||
bṛ̱hadvayo̭ ma̱ghava̭dbhyo dadhāta̱ jujo̭ṣa̱nninma̱ruta̭: suṣṭu̱tiṃ na̭: |
ga̱to nādhvā̱ vi ti̭rāti ja̱ntuṃ pra ṇa̭: spā̱rhābhi̭rū̱tibhi̭stireta ||3||
yu̱ṣmoto̱ vipro̭ marutaḥ śata̱svī yu̱ṣmoto̱ arvā̱ sahṷriḥ saha̱srī |
yu̱ṣmota̭: sa̱mrāḻu̱ta ha̭nti vṛ̱traṃ pra tadvo̭ astu dhūtayo de̱ṣṇam ||4||
tā~ ā ru̱drasya̭ mī̱ḻhuṣo̭ vivāse ku̱vinnaṃsa̭nte ma̱ruta̱: puna̭rnaḥ |
yatsa̱svartā̭ jihīḻi̱re yadā̱virava̱ tadena̭ īmahe tu̱rāṇā̭m ||5||
pra sā vā̭ci suṣṭu̱tirma̱ghonā̭mi̱daṃ sū̱ktaṃ ma̱ruto̭ juṣanta |
ā̱rācci̱ddveṣo̭ vṛṣaṇo yuyota yū̱yaṃ pā̭ta sva̱stibhi̱: sadā̭ naḥ ||6||
12 maitrāvaruṇirvasiṣṭha:| 1-11 maruta:, 12 rūdra: ( mṛtyuvimocinī ṛk ) |
pragātha: = ( viṣamā bṛhatī, samā satobṛhatī ), 7-8, 9-11 gāyatrī, 12 anuṣṭup  |
yaṃ trāya̭dhva i̱dami̭da̱ṃ devā̭so̱ yaṃ ca̱ naya̭tha| tasmā̭ agne̱ varṷṇa̱ mitrārya̭ma̱nmarṷta̱: śarma̭ yacchata ||1||
yu̱ṣmāka̭ṃ devā̱ ava̱sāha̭ni pri̱ya ī̭jā̱nasta̭rati̱ dviṣa̭: |
pra sa kṣaya̭ṃ tirate̱ vi ma̱hīriṣo̱ yo vo̱ varā̭ya̱ dāśa̭ti ||2||
na̱hi va̭ścara̱maṃ ca̱na vasi̭ṣṭhaḥ pari̱maṃsa̭te | a̱smāka̭ma̱dya ma̭rutaḥ su̱te sacā̱ viśvḙ pibata kā̱mina̭: ||3||
na̱hi va̭ ū̱tiḥ pṛta̭nāsu̱ mardha̭ti̱ yasmā̱ arā̭dhvaṃ naraḥ |
a̱bhi va̱ āva̭rtsuma̱tirnavī̭yasī̱ tūya̭ṃ yāta pipīṣavaḥ ||4||
o ṣu ghṛ̭ṣvirādhaso yā̱tanāndhā̭ṃsi pī̱tayḙ |
i̱mā vo̭ ha̱vyā ma̭ruto ra̱re hi ka̱ṃ mo ṣva1nyatra̭ gantana ||5||
ā ca̭ no ba̱rhiḥ sada̭tāvi̱tā ca̭ naḥ spā̱rhāṇi̱ dāta̭ve̱ vasṷ |
asrḙdhanto marutaḥ so̱mye madhau̱ svāhe̱ha mā̭dayādhvai ||6||
sa̱svaści̱ddhi ta̱nva1: śumbha̭mānā̱ ā ha̱ṃsāso̱ nīla̭pṛṣṭhā apaptan |
viśva̱ṃ śardho̭ a̱bhito̭ mā̱ ni ṣḙda̱ naro̱ na ra̱ṇvāḥ sava̭ne̱ mada̭ntaḥ ||7||
yo no̭ maruto a̱bhi dṷrhṛṇā̱yusti̱raści̱ttāni̭ vasavo̱ jighā̭ṃsati |
dru̱haḥ pāśā̱nprati̱ sa mṷcīṣṭa̱ tapi̭ṣṭhena̱ hanma̭nā hantanā̱ tam ||8||
sāṃta̭panā i̱daṃ ha̱virmarṷta̱stajjṷjuṣṭana | yu̱ṣmāko̱tī ri̭śādasaḥ ||9||
gṛha̭medhāsa̱ ā ga̭ta̱ marṷto̱ māpa̭ bhūtana | yu̱ṣmāko̱tī sṷdānavaḥ ||10||
i̱heha̭ vaḥ svatavasa̱: kava̭ya̱: sūrya̭tvacaḥ | ya̱jñaṃ ma̭ruta̱ ā vṛ̭ṇe ||11||
trya̭mbakaṃ yajāmahe su̱gandhi̭ṃ puṣṭi̱vardha̭nam | u̱rvā̱ru̱kami̭va̱ bandha̭nānmṛ̱tyormṷkṣīya̱ māmṛtā̭t ||12||
12 maitrāvaruṇirvasiṣṭha:| 1 sūrya: , 2-12 mitrāvaruṇau | triṣṭup|
yada̱dya sṷ̄rya̱ bravo'nā̭gā u̱dyanmi̱trāya̱ varṷṇāya sa̱tyam |
va̱yaṃ dḙva̱trādi̭te syāma̱ tava̭ pri̱yāso̭ aryamangṛ̱ṇanta̭: ||1||
e̱ṣa sya mi̭trāvaruṇā nṛ̱cakṣā̭ u̱bhe udḙti̱ sūryo̭ a̱bhi jman |
viśva̭sya sthā̱turjaga̭taśca go̱pā ṛ̱ju martḙṣu vṛji̱nā ca̱ paśya̭n ||2||
ayṷkta sa̱pta ha̱rita̭: sa̱dhasthā̱dyā ī̱ṃ vaha̭nti̱ sūrya̭ṃ ghṛ̱tācī̭: |
dhāmā̭ni mitrāvaruṇā yu̱vāku̱: saṃ yo yū̱theva̱ jani̭māni̱ caṣṭḙ ||3||
udvā̭ṃ pṛ̱kṣāso̱ madhṷmanto asthu̱rā sūryo̭ aruhacchu̱kramarṇa̭: |
yasmā̭ ādi̱tyā adhva̭no̱ rada̭nti mi̱tro a̭rya̱mā varṷṇaḥ sa̱joṣā̭: ||4||
i̱me ce̱tāro̱ anṛ̭tasya̱ bhūrḙrmi̱tro a̭rya̱mā varṷṇo̱ hi santi̭ |
i̱ma ṛ̱tasya̭ vāvṛdhurduro̱ṇe śa̱gmāsa̭: pu̱trā adi̭te̱rada̭bdhāḥ ||5||
i̱me mi̱tro varṷṇo dū̱ḻabhā̭so'ce̱tasa̭ṃ ciccitayanti̱ dakṣai̭: |
api̱ kratṷṃ su̱ceta̭sa̱ṃ vata̭ntasti̱raści̱daṃha̭: su̱pathā̭ nayanti ||6||
i̱me di̱vo ani̭miṣā pṛthi̱vyāści̭ki̱tvāṃso̭ ace̱tasa̭ṃ nayanti |
pra̱vrā̱je ci̭nna̱dyo̭ gā̱dhama̭sti pā̱raṃ no̭ a̱sya vi̭ṣpi̱tasya̭ parṣan ||7||
yadgo̱pāva̱dadi̭ti̱: śarma̭ bha̱draṃ mi̱tro yaccha̭nti̱ varṷṇaḥ su̱dāsḙ |
tasmi̱nnā to̱kaṃ tana̭ya̱ṃ dadhā̭nā̱ mā ka̭rma deva̱heḻa̭naṃ turāsaḥ ||8||
ava̱ vedi̱ṃ hotrā̭bhiryajeta̱ ripa̱: kāści̭dvaruṇa̱dhruta̱: saḥ |
pari̱ dveṣo̭bhirarya̱mā vṛ̭ṇaktū̱ruṃ su̱dāsḙ vṛṣaṇā u lo̱kam ||9||
sa̱svaści̱ddhi samṛ̭tistve̱ṣyḙṣāmapī̱cyḙna̱ saha̭sā̱ saha̭nte |
yu̱ṣmadbhi̱yā vṛ̭ṣaṇo̱ reja̭mānā̱ dakṣa̭sya cinmahi̱nā mṛ̱ḻatā̭ naḥ ||10||
yo brahma̭ṇe suma̱timā̱yajā̭te̱ vāja̭sya sā̱tau pa̭ra̱masya̭ rā̱yaḥ |
sīkṣa̭nta ma̱nyuṃ ma̱ghavā̭no a̱rya u̱ru kṣayā̭ya cakrire su̱dhātṷ ||11||
i̱yaṃ dḙva pu̱rohi̭tiryu̱vabhyā̭ṃ ya̱jñeṣṷ mitrāvaruṇāvakāri |
viśvā̭ni du̱rgā pi̭pṛtaṃ ti̱ro no̭ yū̱yaṃ pā̭ta sva̱stibhi̱: sadā̭ naḥ ||12||
7  maitrāvaruṇirvasiṣṭha:| mitrāvaruṇau | triṣṭup |
udvā̱ṃ cakṣṷrvaruṇa su̱pratī̭kaṃ de̱vayo̭reti̱ sūrya̭stata̱nvān |
a̱bhi yo viśvā̱ bhuva̭nāni̱ caṣṭe̱ sa ma̱nyuṃ martye̱ṣvā ci̭keta ||1||
pra vā̱ṃ sa mi̭trāvaruṇāvṛ̱tāvā̱ vipro̱ manmā̭ni dīrgha̱śrudi̭yarti |
yasya̱ brahmā̭ṇi sukratū̱ avā̭tha̱ ā yatkratvā̱ na śa̱rada̭: pṛ̱ṇaithḙ ||2||
prorormi̭trāvaruṇā pṛthi̱vyāḥ pra di̱va ṛ̱ṣvādbṛ̭ha̱taḥ sṷdānū |
spaśo̭ dadhāthe̱ oṣa̭dhīṣu vi̱kṣvṛdha̭gya̱to ani̭miṣa̱ṃ rakṣa̭māṇā ||3||
śaṃsā̭ mi̱trasya̱ varṷṇasya̱ dhāma̱ śuṣmo̱ roda̭sī badbadhe mahi̱tvā |
aya̱nmāsā̱ aya̭jvanāma̱vīrā̱: pra ya̱jñama̭nmā vṛ̱jana̭ṃ tirāte ||4||
amṷ̄rā̱ viśvā̭ vṛṣaṇāvi̱mā vā̱ṃ na yāsṷ ci̱traṃ dadṛ̭śe̱ na ya̱kṣam |
druha̭: sacante̱ anṛ̭tā̱ janā̭nā̱ṃ na vā̭ṃ ni̱ṇyānya̱citḙ abhūvan ||5||
samṷ vāṃ ya̱jñaṃ ma̭haya̱ṃ namo̭bhirhu̱ve vā̭ṃ mitrāvaruṇā sa̱bādha̭: |
pra vā̱ṃ manmā̭nyṛ̱case̱ navā̭ni kṛ̱tāni̱ brahma̭ jujuṣanni̱māni̭ ||6||
i̱yaṃ dḙva pu̱rohi̭tiryu̱vabhyā̭ṃ ya̱jñeṣṷ mitrāvaruṇāvakāri |
viśvā̭ni du̱rgā pi̭pṛtaṃ ti̱ro no̭ yū̱yaṃ pā̭ta sva̱stibhi̱: sadā̭ naḥ ||7||
6  maitrāvaruṇirvasiṣṭha:| 1-3 sūrya:, 4-6 mitrāvaruṇau | triṣṭup |
utsūryo̭ bṛ̱hada̱rcīṃṣya̭śretpu̱ru viśvā̱ jani̭ma̱ mānṷṣāṇām |
 sa̱mo di̱vā da̭dṛśe̱ roca̭māna̱: kratvā̭ kṛ̱taḥ sukṛ̭taḥ ka̱rtṛbhi̭rbhūt ||1||
sa sṷ̄rya̱ prati̭ pu̱ro na̱ udgā̭ e̱bhiḥ stomḙbhireta̱śebhi̱revai̭: |
pra no̭ mi̱trāya̱ varṷṇāya vo̱co'nā̭gaso arya̱mṇe a̱gnayḙ ca ||2||
vi na̭: sa̱hasra̭ṃ śu̱rudho̭ radantvṛ̱tāvā̭no̱ varṷṇo mi̱tro a̱gniḥ |
yaccha̭ntu ca̱ndrā ṷpa̱maṃ no̭ a̱rkamā na̱: kāma̭ṃ pūpurantu̱ stavā̭nāḥ ||3||
dyāvā̭bhūmī adite̱ trāsī̭thāṃ no̱ ye vā̭ṃ ja̱jñuḥ su̱jani̭māna ṛṣve |
mā heḻḙ bhūma̱ varṷṇasya vā̱yormā mi̱trasya̭ pri̱yata̭masya nṛ̱ṇām ||4||
pra bā̱havā̭ sisṛtaṃ jī̱vasḙ na̱ ā no̱ gavyṷ̄timukṣataṃ ghṛ̱tena̭ |
ā no̱ janḙ śravayataṃ yuvānā śru̱taṃ mḙ mitrāvaruṇā̱ have̱mā ||5||
nū mi̱tro varṷṇo arya̱mā na̱stmanḙ to̱kāya̱ vari̭vo dadhantu |
su̱gā no̱ viśvā̭ su̱pathā̭ni santu yū̱yaṃ pā̭ta sva̱stibhi̱: sadā̭ naḥ ||6||
6 maitrāvaruṇirvasiṣṭha:| 1-4 sūrya:, 5 sūrya – mitrāvaruṇā:, 6 mitrāvaruṇau aryamā ca | triṣṭup |
udvḙti su̱bhago̭ vi̱śvaca̭kṣā̱: sādhā̭raṇa̱: sūryo̱ mānṷṣāṇām |
cakṣṷrmi̱trasya̱ varṷṇasya de̱vaścarmḙva̱ yaḥ sa̱mavi̭vya̱ktamā̭ṃsi ||1||
udvḙti prasavī̱tā janā̭nāṃ ma̱hānke̱tura̭rṇa̱vaḥ sūrya̭sya |
sa̱mā̱naṃ ca̱kraṃ pa̭ryā̱vivṛ̭tsa̱nyadḙta̱śo vaha̭ti dhū̱rṣu yu̱ktaḥ ||2||
vi̱bhrāja̭māna u̱ṣasā̭mu̱pasthā̭dre̱bhairudḙtyanuma̱dyamā̭naḥ |
e̱ṣa mḙ de̱vaḥ sa̭vi̱tā ca̭cchanda̱ yaḥ sa̭mā̱naṃ na pra̭mi̱nāti̱ dhāma̭ ||3||
di̱vo ru̱kma ṷru̱cakṣā̱ udḙti dū̱rea̭rthasta̱raṇi̱rbhrāja̭mānaḥ |
nū̱naṃ janā̱: sūryḙṇa̱ prasṷ̄tā̱ aya̱nnarthā̭ni kṛ̱ṇava̱nnapā̭ṃsi ||4||
yatrā̭ ca̱krura̱mṛtā̭ gā̱tuma̭smai śye̱no na dīya̱nnanvḙti̱ pātha̭: |
prati̭ vā̱ṃ sūra̱ udi̭te vidhema̱ namo̭bhirmitrāvaruṇo̱ta ha̱vyaiḥ ||5||
nū mi̱tro varṷṇo arya̱mā na̱stmanḙ to̱kāya̱ vari̭vo dadhantu |
su̱gā no̱ viśvā̭ su̱pathā̭ni santu yū̱yaṃ pā̭ta sva̱stibhi̱: sadā̭ naḥ ||6||
5 maitrāvaruṇirvasiṣṭha:| mitrāvaruṇau| triṣṭup |
di̱vi kṣaya̭ntā̱ raja̭saḥ pṛthi̱vyāṃ pra vā̭ṃ ghṛ̱tasya̭ ni̱rṇijo̭ dadīran |
ha̱vyaṃ no̭ mi̱tro a̭rya̱mā sujā̭to̱ rājā̭ sukṣa̱tro varṷṇo juṣanta ||1||
ā rā̭jānā maha ṛtasya gopā̱ sindhṷpatī kṣatriyā yātama̱rvāk |
iḻā̭ṃ no mitrāvaruṇo̱ta vṛ̱ṣṭimava̭ di̱va i̭nvataṃ jīradānū ||2||
mi̱trastanno̱ varṷṇo de̱vo a̱ryaḥ pra sādhi̭ṣṭhebhiḥ pa̱thibhi̭rnayantu |
brava̱dyathā̭ na̱ āda̱riḥ su̱dāsa̭ i̱ṣā ma̭dema sa̱ha de̱vago̭pāḥ ||3||
yo vā̱ṃ garta̱ṃ mana̭sā̱ takṣa̭de̱tamū̱rdhvāṃ dhī̱tiṃ kṛ̱ṇava̭ddhā̱raya̭cca |
u̱kṣethā̭ṃ mitrāvaruṇā ghṛ̱tena̱ tā rā̭jānā sukṣi̱tīsta̭rpayethām ||4||
e̱ṣa stomo̭ varuṇa mitra̱ tubhya̱ṃ soma̭: śu̱kro na vā̱yavḙ'yāmi |
a̱vi̱ṣṭaṃ dhiyo̭ jigṛ̱taṃ pura̭ṃdhīryū̱yaṃ pā̭ta sva̱stibhi̱: sadā̭ naḥ ||5||
5 maitrāvaruṇirvasiṣṭha:| mitrāvaruṇau | triṣṭup |
prati̭ vā̱ṃ sūra̱ udi̭te sū̱ktairmi̱traṃ hṷve̱ varṷṇaṃ pū̱tada̭kṣam |
yayo̭rasu̱rya1makṣi̭ta̱ṃ jyeṣṭha̱ṃ viśva̭sya̱ yāma̭nnā̱citā̭ jiga̱tnu ||1||
tā hi de̱vānā̱masṷrā̱ tāva̱ryā tā na̭: kṣi̱tīḥ ka̭ratamū̱rjaya̭ntīḥ |
a̱śyāma̭ mitrāvaruṇā va̱yaṃ vā̱ṃ dyāvā̭ ca̱ yatra̭ pī̱paya̱nnahā̭ ca ||2||
tā bhūri̭pāśā̱vanṛ̭tasya̱ setṷ̄ dura̱tyetṷ̄ ri̱pave̱ martyā̭ya |
ṛ̱tasya̭ mitrāvaruṇā pa̱thā vā̭ma̱po na nā̱vā dṷri̱tā ta̭rema ||3||
ā no̭ mitrāvaruṇā ha̱vyajṷṣṭiṃ ghṛ̱tairgavyṷ̄timukṣata̱miḻā̭bhiḥ |
prati̭ vā̱matra̱ vara̱mā janā̭ya pṛṇī̱tamu̱dno di̱vyasya̱ cāro̭: ||4||
e̱ṣa stomo̭ varuṇa mitra̱ tubhya̱ṃ soma̭: śu̱kro na vā̱yavḙ'yāmi |
a̱vi̱ṣṭaṃ dhiyo̭ jigṛ̱taṃ pura̭ṃdhīryū̱yaṃ pā̭ta sva̱stibhi̱: sadā̭ naḥ ||5||
19 maitrāvaruṇirvasiṣṭha:| mitrāvaruṇau, 4-13 ādityā:, 14-16 sūrya: |gāyatrī,10-15  pragātha: = (samā bṛhatī, viṣamā satobṛhatī ), 16 pura uṣṇik |
pra mi̱trayo̱rvarṷṇayo̱: stomo̭ na etu śū̱ṣya̭: | nama̭svāntuvijā̱tayo̭: ||1||
yā dhā̱raya̭nta de̱vāḥ su̱dakṣā̱ dakṣa̭pitarā | a̱su̱ryā̭ya̱ prama̭hasā ||2||
tā na̭: sti̱pā ta̭nū̱pā varṷṇa jaritṝ̱ṇām | mitra̭ sā̱dhaya̭ta̱ṃ dhiya̭: ||3||
yada̱dya sūra̱ udi̱te'nā̭gā mi̱tro a̭rya̱mā | su̱vāti̭ savi̱tā bhaga̭: ||4||
su̱prā̱vīra̭stu̱ sa kṣaya̱: pra nu yāma̭ntsudānavaḥ | ye no̱ aṃho̭'ti̱pipra̭ti ||5||
u̱ta sva̱rājo̱ adi̭ti̱rada̭bdhasya vra̱tasya̱ ye | ma̱ho rājā̭na īśate ||6||
prati̭ vā̱ṃ sūra̱ udi̭te mi̱traṃ gṛ̭ṇīṣe̱ varṷṇam | a̱rya̱maṇa̭ṃ ri̱śāda̭sam ||7||
rā̱yā hi̭raṇya̱yā ma̱tiri̱yama̭vṛ̱kāya̱ śava̭se | i̱yaṃ viprā̭ me̱dhasā̭taye ||8||
te syā̭ma deva varuṇa̱ te mi̭tra sū̱ribhi̭: sa̱ha | iṣa̱ṃ sva̭śca dhīmahi ||9||
ba̱hava̱: sūra̭cakṣaso'gniji̱hvā ṛ̭tā̱vṛdha̭: | trīṇi̱ ye ye̱murvi̱dathā̭ni dhī̱tibhi̱rviśvā̭ni̱ pari̭bhūtibhiḥ ||10||
vi ye da̱dhuḥ śa̱rada̱ṃ māsa̱mādaha̭rya̱jñama̱ktuṃ cādṛca̭m |
a̱nā̱pyaṃ varṷṇo mi̱tro a̭rya̱mā kṣa̱traṃ rājā̭na āśata ||11||
tadvo̭ a̱dya ma̭nāmahe sū̱ktaiḥ sūra̱ udi̭te | yadoha̭te̱ varṷṇo mi̱tro a̭rya̱mā yū̱yamṛ̱tasya̭ rathyaḥ ||12||
ṛ̱tāvā̭na ṛ̱tajā̭tā ṛtā̱vṛdho̭ gho̱rāso̭ anṛta̱dviṣa̭: |
teṣā̭ṃ vaḥ su̱mne sṷccha̱rdiṣṭa̭me nara̱: syāma̱ ye ca̭ sū̱raya̭: ||13||
udu̱ tyadda̭rśa̱taṃ vapṷrdi̱va ḙti pratihva̱re | yadī̭mā̱śurvaha̭ti de̱va eta̭śo̱ viśva̭smai̱ cakṣa̭se̱ ara̭m ||14||
śī̱rṣṇaḥśī̭rṣṇo̱ jaga̭tasta̱sthuṣa̱spati̭ṃ sa̱mayā̱ viśva̱mā raja̭: |
sa̱pta svasā̭raḥ suvi̱tāya̱ sūrya̱ṃ vaha̭nti ha̱rito̱ rathḙ ||15||
taccakṣṷrde̱vahi̭taṃ śu̱kramu̱ccara̭t | paśyḙma śa̱rada̭: śa̱taṃ jīvḙma śa̱rada̭: śa̱tam ||16||
kāvyḙbhiradā̱bhyā ''yā̭taṃ varuṇa dyu̱mat | mi̱traśca̱ soma̭pītaye ||17||
di̱vo dhāma̭bhirvaruṇa mi̱traścā yā̭tama̱druhā̭ | piba̭ta̱ṃ soma̭mātu̱jī ||18||
ā yā̭taṃ mitrāvaruṇā juṣā̱ṇāvāhṷtiṃ narā | pā̱taṃ soma̭mṛtāvṛdhā ||19||
10  maitrāvaruṇirvasiṣṭha:|
aśvinau| triṣṭup |
prati̭ vā̱ṃ ratha̭ṃ nṛpatī ja̱radhyai̭ ha̱viṣma̭tā̱ mana̭sā ya̱jñiyḙna |
yo vā̭ṃ dū̱to na dhi̭ṣṇyā̱vajī̭ga̱racchā̭ sū̱nurna pi̱tarā̭ vivakmi ||1||
aśo̭cya̱gniḥ sa̭midhā̱no a̱sme upo̭ adṛśra̱ntama̭saści̱dantā̭: |
acḙti ke̱turu̱ṣasa̭: pu̱rastā̭cchri̱ye di̱vo dṷhi̱turjāya̭mānaḥ ||2||
a̱bhi vā̭ṃ nū̱nama̭śvinā̱ suho̭tā̱ stomai̭: siṣakti nāsatyā viva̱kvān |
pū̱rvībhi̭ryātaṃ pa̱thyā̭bhira̱rvāksva̱rvidā̱ vasṷmatā̱ rathḙna ||3||
a̱vorvā̭ṃ nū̱nama̭śvinā yu̱vākṷrhu̱ve yadvā̭ṃ su̱te mā̭dhvī vasū̱yuḥ |
ā vā̭ṃ vahantu̱ sthavi̭rāso̱ aśvā̱: pibā̭tho a̱sme suṣṷtā̱ madhṷ̄ni ||4||
prācī̭mu devāśvinā̱ dhiya̱ṃ me'mṛ̭dhrāṃ sā̱tayḙ kṛtaṃ vasū̱yum |
viśvā̭ aviṣṭa̱ṃ vāja̱ ā pura̭ṃdhī̱stā na̭: śaktaṃ śacīpatī̱ śacī̭bhiḥ ||5||
a̱vi̱ṣṭaṃ dhī̱ṣva̭śvinā na ā̱su pra̱jāva̱dreto̱ ahra̭yaṃ no astu |
ā vā̭ṃ to̱ke tana̭ye̱ tūtṷjānāḥ su̱ratnā̭so de̱vavī̭tiṃ gamema ||6||
e̱ṣa sya vā̭ṃ pūrva̱gatvḙva̱ sakhyḙ ni̱dhirhi̱to mā̭dhvī rā̱to a̱sme |
ahḙḻatā̱ mana̱sā yā̭tama̱rvāga̱śnantā̭ ha̱vyaṃ mānṷṣīṣu vi̱kṣu ||7||
eka̭smi̱nyogḙ bhuraṇā samā̱ne pari̭ vāṃ sa̱pta sra̱vato̱ ratho̭ gāt |
na vā̭yanti su̱bhvo̭ de̱vayṷktā̱ ye vā̭ṃ dhū̱rṣu ta̱raṇa̭yo̱ vaha̭nti ||8||
a̱sa̱ścatā̭ ma̱ghava̭dbhyo̱ hi bhū̱taṃ ye rā̱yā ma̭gha̱deya̭ṃ ju̱nanti̭ |
pra ye bandhṷṃ sū̱nṛtā̭bhisti̱rante̱ gavyā̭ pṛ̱ñcanto̱ aśvyā̭ ma̱ghāni̭ ||9||
nū me̱ hava̱mā śṛ̭ṇutaṃ yuvānā yāsi̱ṣṭaṃ va̱rtira̭śvinā̱virā̭vat |
dha̱ttaṃ ratnā̭ni̱ jara̭taṃ ca sū̱rīnyū̱yaṃ pā̭ta sva̱stibhi̱: sadā̭ naḥ ||10
9 maitrāvaruṇirvasiṣṭha:| aśvinau|virāṭ, 8-9   triṣṭup |
ā śṷbhrā yātamaśvinā̱ svaśvā̱ giro̭ dasrā jujuṣā̱ṇā yu̱vāko̭: | ha̱vyāni̭ ca̱ prati̭bhṛtā vī̱taṃ na̭: ||1||
pra vā̱mandhā̭ṃsi̱ madyā̭nyasthu̱rara̭ṃ gantaṃ ha̱viṣo̭ vī̱tayḙ me | ti̱ro a̱ryo hava̭nāni śru̱taṃ na̭: ||2||
pra vā̱ṃ ratho̱ mano̭javā iyarti ti̱ro rajā̭ṃsyaśvinā śa̱toti̭: | a̱smabhya̭ṃ sūryāvasū iyā̱naḥ ||3||
a̱yaṃ ha̱ yadvā̭ṃ deva̱yā u̱ adri̭rū̱rdhvo viva̭kti soma̱sudyu̱vabhyā̭m | ā va̱lgū vipro̭ vavṛtīta ha̱vyaiḥ ||4||
ci̱traṃ ha̱ yadvā̱ṃ bhoja̭na̱ṃ nvasti̱ nyatra̭ye̱ mahi̭ṣvantaṃ yuyotam | yo vā̭mo̱māna̱ṃ dadha̭te pri̱yaḥ san ||5||
u̱ta tyadvā̭ṃ jura̱te a̭śvinā bhū̱ccyavā̭nāya pra̱tītya̭ṃ havi̱rde | adhi̱ yadvarpa̭ i̱taṷ̄ti dha̱tthaḥ ||6||
u̱ta tyaṃ bhu̱jyuma̭śvinā̱ sakhā̭yo̱ madhyḙ jahurdu̱revā̭saḥ samu̱dre | nirī̭ṃ parṣa̱darā̭vā̱ yo yu̱vākṷ: ||7||
vṛkā̭ya ci̱jjasa̭mānāya śaktamu̱ta śrṷtaṃ śa̱yavḙ hū̱yamā̭nā |
yāva̱ghnyāmapi̭nvatama̱po na sta̱rya̭ṃ ciccha̱ktya̭śvinā̱ śacī̭bhiḥ ||8||
e̱ṣa sya kā̱rurja̭rate sū̱ktairagrḙ budhā̱na u̱ṣasā̭ṃ su̱manmā̭ |
i̱ṣā taṃ va̭rdhada̱ghnyā payo̭bhiryū̱yaṃ pā̭ta sva̱stibhi̱: sadā̭ naḥ ||9||
8 maitrāvaruṇirvasiṣṭha:| aśvinau | triṣṭup |
ā vā̱ṃ ratho̱ roda̭sī badbadhā̱no hi̭ra̱ṇyayo̱ vṛṣa̭bhiryā̱tvaśvai̭: |
ghṛ̱tava̭rtaniḥ pa̱vibhī̭ rucā̱na i̱ṣāṃ vo̱ḻhā nṛ̱pati̭rvā̱jinī̭vān ||1||
sa pa̭prathā̱no a̱bhi pañca̱ bhūmā̭ trivandhu̱ro mana̱sā yā̭tu yu̱ktaḥ |
viśo̱ yena̱ gaccha̭tho deva̱yantī̱: kutrā̭ ci̱dyāma̭maśvinā̱ dadhā̭nā ||2||
svaśvā̭ ya̱śasā yā̭tama̱rvāgdasrā̭ ni̱dhiṃ madhṷmantaṃ pibāthaḥ |
vi vā̱ṃ ratho̭ va̱dhvā̱3 yāda̭mā̱no'ntā̭ndi̱vo bā̭dhate varta̱nibhyā̭m ||3||
yu̱voḥ śriya̱ṃ pari̱ yoṣā̭vṛṇīta̱ sūro̭ duhi̱tā pari̭takmyāyām |
yaddḙva̱yanta̱mava̭tha̱: śacī̭bhi̱: pari̭ ghra̱ṃsamo̱manā̭ vā̱ṃ vayo̭ gāt ||4||
yo ha̱ sya vā̭ṃ rathirā̱ vasta̭ u̱srā ratho̭ yujā̱naḥ pa̭ri̱yāti̭ va̱rtiḥ |
tena̭ na̱: śaṃ yoru̱ṣaso̱ vyṷṣṭau̱ nya̭śvinā vahataṃ ya̱jñe a̱smin ||5||
narā̭ gau̱reva̭ vi̱dyuta̭ṃ tṛṣā̱ṇā'smāka̭ma̱dya sava̱nopa̭ yātam |
pu̱ru̱trā hi vā̭ṃ ma̱tibhi̱rhava̭nte̱ mā vā̭ma̱nye ni ya̭mandeva̱yanta̭: ||6||
yu̱vaṃ bhu̱jyumava̭viddhaṃ samu̱dra udṷ̄hathu̱rarṇa̭so̱ asri̭dhānaiḥ |
pa̱ta̱tribhi̭raśra̱maira̭vya̱thibhi̭rda̱ṃsanā̭bhiraśvinā pā̱raya̭ntā ||7||
nū me̱ hava̱mā śṛ̭ṇutaṃ yuvānā yāsi̱ṣṭaṃ va̱rtira̭śvinā̱virā̭vat |
dha̱ttaṃ ratnā̭ni̱ jara̭taṃ ca sū̱rīnyū̱yaṃ pā̭ta sva̱stibhi̱: sadā̭ naḥ ||8||
7  maitrāvaruṇirvasiṣṭha:| aśvinau | triṣṭup |
ā vi̭śvavārāśvinā gataṃ na̱: pra tatsthāna̭mavāci vāṃ pṛthi̱vyām |
aśvo̱ na vā̱jī śu̱napṛ̭ṣṭho asthā̱dā yatse̱dathṷrdhru̱vase̱ na yoni̭m ||1||
siṣa̭kti̱ sā vā̭ṃ suma̱tiścani̱ṣṭhā'tā̭pi gha̱rmo manṷṣo duro̱ṇe |
yo vā̭ṃ samu̱drāntsa̱rita̱: pipa̱rtyeta̭gvā ci̱nna su̱yujā̭ yujā̱naḥ ||2||
yāni̱ sthānā̭nyaśvinā da̱dhāthḙ di̱vo ya̱hvīṣvoṣa̭dhīṣu vi̱kṣu |
ni parva̭tasya mū̱rdhani̱ sada̱nteṣa̱ṃ janā̭ya dā̱śuṣe̱ vaha̭ntā ||3||
ca̱ni̱ṣṭaṃ dḙvā̱ oṣa̭dhīṣva̱psu yadyo̱gyā a̱śnavai̭the̱ ṛṣī̭ṇām |
pu̱rūṇi̱ ratnā̱ dadha̭tau̱ nya1sme anu̱ pūrvā̭ṇi cakhyathuryu̱gāni̭ ||4||
śu̱śru̱vāṃsā̭ cidaśvinā pu̱rūṇya̱bhi brahmā̭ṇi cakṣāthe̱ ṛṣī̭ṇām |
prati̱ pra yā̭ta̱ṃ vara̱mā janā̭yā̱'sme vā̭mastu suma̱tiścani̭ṣṭhā ||5||
yo vā̭ṃ ya̱jño nā̭satyā ha̱viṣmā̭nkṛ̱tabra̭hmā sama̱ryo̱3 bhavā̭ti |
upa̱ pra yā̭ta̱ṃ vara̱mā vasi̭ṣṭhami̱mā brahmā̭ṇyṛcyante yu̱vabhyā̭m ||6||
i̱yaṃ ma̭nī̱ṣā i̱yama̭śvinā̱ gīri̱māṃ sṷvṛ̱ktiṃ vṛ̭ṣaṇā juṣethām |
i̱mā brahmā̭ṇi yuva̱yūnya̭gmanyū̱yaṃ pā̭ta sva̱stibhi̱: sadā̭ naḥ ||7||
6  maitrāvaruṇirvasiṣṭha:| aśvinau | triṣṭup |
apa̱ svasṷru̱ṣaso̱ nagji̭hīte ri̱ṇakti̭ kṛ̱ṣṇīra̭ru̱ṣāya̱ panthā̭m |
aśvā̭maghā̱ goma̭ghā vāṃ huvema̱ divā̱ nakta̱ṃ śarṷma̱smadyṷyotam ||1||
u̱pāyā̭taṃ dā̱śuṣe̱ martyā̭ya̱ rathḙna vā̱mama̭śvinā̱ vaha̭ntā |
yu̱yu̱tama̱smadani̭rā̱mamī̭vā̱ṃ divā̱ nakta̭ṃ mādhvī̱ trāsī̭thāṃ naḥ ||2||
ā vā̱ṃ ratha̭mava̱masyā̱ṃ vyṷṣṭau sumnā̱yavo̱ vṛṣa̭ṇo vartayantu |
syūma̭gabhastimṛta̱yugbhi̱raśvai̱rāśvi̭nā̱ vasṷmantaṃ vahethām ||3||
yo vā̱ṃ ratho̭ nṛpatī̱ asti̭ vo̱ḻhā tri̭vandhu̱ro vasṷmā~ u̱srayā̭mā |
ā na̭ e̱nā nā̭sa̱tyopa̭ yātama̱bhi yadvā̭ṃ vi̱śvapsnyo̱ jigā̭ti ||4||
yu̱vaṃ cyavā̭naṃ ja̱raso̭'mumukta̱ṃ ni pe̱dava̭ ūhathurā̱śumaśva̭m |
niraṃha̭sa̱stama̭saḥ sparta̱matri̱ṃ ni jā̭hu̱ṣaṃ śi̭thi̱re dhā̭tama̱ntaḥ ||5||
i̱yaṃ ma̭nī̱ṣā i̱yama̭śvinā̱ gīri̱māṃ sṷvṛ̱ktiṃ vṛ̭ṣaṇā juṣethām |
i̱mā brahmā̭ṇi yuva̱yūnya̭gmanyū̱yaṃ pā̭ta sva̱stibhi̱: sadā̭ naḥ ||6||
5  maitrāvaruṇirvasiṣṭha:| aśvinau | triṣṭup |
ā goma̭tā nāsatyā̱ rathe̱nā'śvā̭vatā puruśca̱ndreṇa̭ yātam |
a̱bhi vā̱ṃ viśvā̭ ni̱yuta̭: sacante spā̱rhayā̭ śri̱yā ta̱nvā̭ śubhā̱nā ||1||
ā no̭ de̱vebhi̱rupa̭ yātama̱rvāksa̱joṣa̭sā nāsatyā̱ rathḙna |
yu̱vorhi na̭: sa̱khyā pitryā̭ṇi samā̱no bandhṷru̱ta tasya̭ vittam ||2||
udu̱ stomā̭so a̱śvino̭rabudhrañjā̱mi brahmā̭ṇyu̱ṣasa̭śca de̱vīḥ |
ā̱vivā̭sa̱nroda̭sī̱ dhiṣṇye̱me acchā̱ vipro̱ nāsa̭tyā vivakti ||3||
vi cedu̱cchantya̭śvinā u̱ṣāsa̱: pra vā̱ṃ brahmā̭ṇi kā̱ravo̭ bharante |
ū̱rdhvaṃ bhā̱nuṃ sa̭vi̱tā de̱vo a̭średbṛ̱hada̱gnaya̭: sa̱midhā̭ jarante ||4||
ā pa̱ścātā̭nnāsa̱tyā pu̱rastā̱dāśvi̭nā yātamadha̱rāduda̭ktāt |
ā vi̱śvata̱: pāñca̭janyena rā̱yā yū̱yaṃ pā̭ta sva̱stibhi̱: sadā̭ naḥ ||5||
5  maitrāvaruṇirvasiṣṭha:| aśvinau | triṣṭup |
atā̭riṣma̱ tama̭saspā̱rama̱sya prati̱ stoma̭ṃ deva̱yanto̱ dadhā̭nāḥ |
pu̱ru̱daṃsā̭ puru̱tamā̭ purā̱jā'ma̭rtyā havate a̱śvinā̱ gīḥ ||1||
nyṷ pri̱yo manṷṣaḥ sādi̱ hotā̱ nāsa̭tyā̱ yo yaja̭te̱ vanda̭te ca |
a̱śnī̱taṃ madhvo̭ aśvinā upā̱ka ā vā̭ṃ voce vi̱dathḙṣu̱ praya̭svān ||2||
ahḙma ya̱jñaṃ pa̱thāmṷrā̱ṇā i̱māṃ sṷvṛ̱ktiṃ vṛ̭ṣaṇā juṣethām |
śru̱ṣṭī̱veva̱ preṣi̭to vāmabodhi̱ prati̱ stomai̱rjara̭māṇo̱ vasi̭ṣṭhaḥ ||3||
upa̱ tyā vahnī̭ gamato̱ viśa̭ṃ no rakṣo̱haṇā̱ sambhṛ̭tā vī̱ḻupā̭ṇī |
samandhā̭ṃsyagmata matsa̱rāṇi̱ mā no̭ mardhiṣṭa̱mā ga̭taṃ śi̱vena̭ ||4||
ā pa̱ścātā̭nnāsa̱tyā pu̱rastā̱dāśvi̭nā yātamadha̱rāduda̭ktāt |
ā vi̱śvata̱: pāñca̭janyena rā̱yā yū̱yaṃ pā̭ta sva̱stibhi̱: sadā̭ naḥ ||5||
6  maitrāvaruṇirvasiṣṭha:| aśvinau |pragātha:=(viṣamā bṛhatī, samā satobṛhatī) |
i̱mā ṷ vā̱ṃ divi̭ṣṭaya u̱srā ha̭vante aśvinā |
 a̱yaṃ vā̭ma̱hve'va̭se śacīvasū̱ viśa̭ṃviśa̱ṃ hi gaccha̭thaḥ ||1||
yu̱vaṃ ci̱traṃ da̭dathu̱rbhoja̭naṃ narā̱ codḙthāṃ sū̱nṛtā̭vate |
a̱rvāgratha̱ṃ sama̭nasā̱ ni ya̭cchata̱ṃ piba̭taṃ so̱myaṃ madhṷ ||2||
ā yā̭ta̱mupa̭ bhūṣata̱ṃ madhva̭: pibatamaśvinā |
du̱gdhaṃ payo̭ vṛṣaṇā jenyāvasū̱ mā no̭ mardhiṣṭa̱mā ga̭tam ||3||
aśvā̭so̱ ye vā̱mupa̭ dā̱śuṣo̭ gṛ̱haṃ yu̱vāṃ dīya̭nti̱ bibhra̭taḥ |
ma̱kṣū̱yubhi̭rnarā̱ hayḙbhiraśvi̱nā ''dḙvā yātamasma̱yū ||4||
adhā̭ ha̱ yanto̭ a̱śvinā̱ pṛkṣa̭: sacanta sū̱raya̭: |
tā ya̭ṃsato ma̱ghava̭dbhyo dhru̱vaṃ yaśa̭ścha̱rdira̱smabhya̱ṃ nāsa̭tyā ||5||
pra ye ya̱yura̭vṛ̱kāso̱ rathā̭ iva nṛpā̱tāro̱ janā̭nām |
u̱ta svena̱ śava̭sā śūśuvu̱rnara̭ u̱ta kṣi̭yanti sukṣi̱tim ||6||
8  maitrāvaruṇirvasiṣṭha:| uṣasa:| triṣṭup |
vyu1ṣā ā̭vo divi̱jā ṛ̱tenā̭''viṣkṛṇvā̱nā ma̭hi̱māna̱māgā̭t |
apa̱ druha̱stama̭ āva̱rajṷṣṭa̱maṅgi̭rastamā pa̱thyā̭ ajīgaḥ ||1||
ma̱he no̭ a̱dya sṷvi̱tāya̭ bo̱dhyuṣo̭ ma̱he saubha̭gāya̱ pra ya̭ndhi |
ci̱traṃ ra̱yiṃ ya̱śasa̭ṃ dhehya̱sme devi̱ martḙṣu mānuṣi śrava̱syum ||2||
e̱te tye bhā̱navo̭ darśa̱tāyā̭ści̱trā u̱ṣaso̭ a̱mṛtā̭sa̱ āgṷ: |
ja̱naya̭nto̱ daivyā̭ni vra̱tānyā̭pṛ̱ṇanto̭ a̱ntari̭kṣā̱ vya̭sthuḥ ||3||
e̱ṣā syā yṷjā̱nā pa̭rā̱kātpañca̭ kṣi̱tīḥ pari̭ sa̱dyo ji̭gāti |
a̱bhi̱paśya̭ntī va̱yunā̱ janā̭nāṃ di̱vo dṷhi̱tā bhuva̭nasya̱ patnī̭ ||4||
vā̱jinī̭vatī̱ sūrya̭sya̱ yoṣā̭ ci̱trāma̭ghā rā̱ya ī̭śe̱ vasṷ̄nām |
ṛṣi̭ṣṭutā ja̱raya̭ntī ma̱ghonyu̱ṣā ṷcchati̱ vahni̭bhirgṛṇā̱nā ||5||
prati̭ dyutā̱nāma̭ru̱ṣāso̱ aśvā̭ści̱trā a̭dṛśrannu̱ṣasa̱ṃ vaha̭ntaḥ |
yāti̭ śu̱bhrā vi̭śva̱piśā̱ rathḙna̱ dadhā̭ti̱ ratna̭ṃ vidha̱te janā̭ya ||6||
sa̱tyā sa̱tyebhi̭rmaha̱tī ma̱hadbhi̭rde̱vī de̱vebhi̭ryaja̱tā yaja̭traiḥ |
ru̱jaddṛ̱ḻhāni̱ dada̭du̱sriyā̭ṇā̱ṃ prati̱ gāva̭ u̱ṣasa̭ṃ vāvaśanta ||7||
nū no̱ goma̭dvī̱rava̭ddhehi̱ ratna̱muṣo̱ aśvā̭vatpuru̱bhojo̭ a̱sme |
mā no̭ ba̱rhiḥ pṷru̱ṣatā̭ ni̱de ka̭ryū̱yaṃ pā̭ta sva̱stibhi̱: sadā̭ naḥ ||8||
7  maitrāvaruṇirvasiṣṭha:| uṣasa: | triṣṭup |
udu̱ jyoti̭ra̱mṛta̭ṃ vi̱śvaja̭nyaṃ vi̱śvāna̭raḥ savi̱tā de̱vo a̭śret |
kratvā̭ de̱vānā̭majaniṣṭa̱ cakṣṷrā̱vira̭ka̱rbhuva̭na̱ṃ viśva̭mu̱ṣāḥ ||1||
pra me̱ panthā̭ deva̱yānā̭ adṛśra̱nnama̭rdhanto̱ vasṷbhi̱riṣkṛ̭tāsaḥ |
abhṷ̄du ke̱turu̱ṣasa̭: pu̱rastā̭tpratī̱cyāgā̱dadhi̭ ha̱rmyebhya̭: ||2||
tānīdahā̭ni bahu̱lānyā̭sa̱nyā prā̱cīna̱mudi̭tā̱ sūrya̭sya |
yata̱: pari̭ jā̱ra i̭vā̱cara̱ntyuṣo̭ dadṛ̱kṣe na puna̭rya̱tīva̭ ||3||
ta idde̱vānā̭ṃ sadha̱māda̭ āsannṛ̱tāvā̭naḥ ka̱vaya̭: pū̱rvyāsa̭: |
gū̱ḻhaṃ jyoti̭: pi̱taro̱ anva̭vindantsa̱tyama̭ntrā ajanayannu̱ṣāsa̭m ||4||
sa̱mā̱na ū̱rve adhi̱ saṃga̭tāsa̱: saṃ jā̭nate̱ na ya̭tante mi̱thaste |
te de̱vānā̱ṃ na mi̭nanti vra̱tānyama̭rdhanto̱ vasṷbhi̱ryāda̭mānāḥ ||5||
prati̭ tvā̱ stomai̭rīḻate̱ vasi̭ṣṭhā uṣa̱rbudha̭: subhage tuṣṭu̱vāṃsa̭: |
gavā̭ṃ ne̱trī vāja̭patnī na u̱cchoṣa̭: sujāte pratha̱mā ja̭rasva ||6||
e̱ṣā ne̱trī rādha̭saḥ sū̱nṛtā̭nāmu̱ṣā u̱cchantī̭ ribhyate̱ vasi̭ṣṭhaiḥ |
dī̱rgha̱śruta̭ṃ ra̱yima̱sme dadhā̭nā yū̱yaṃ pā̭ta sva̱stibhi̱: sadā̭ naḥ ||7||
6  maitrāvaruṇirvasiṣṭha:| uṣasa: | triṣṭup |
upo̭ ruruce yuva̱tirna yoṣā̱ viśva̭ṃ jī̱vaṃ pra̭su̱vantī̭ ca̱rāyai̭ |
abhṷ̄da̱gniḥ sa̱midhe̱ mānṷṣāṇā̱maka̱rjyoti̱rbādha̭mānā̱ tamā̭ṃsi ||1
viśva̭ṃ pratī̱cī sa̱prathā̱ uda̭sthā̱druśa̱dvāso̱ bibhra̭tī śu̱krama̭śvait |
hira̭ṇyavarṇā su̱dṛśī̭kasaṃdṛ̱ggavā̭ṃ mā̱tā ne̱tryahnā̭maroci ||2||
de̱vānā̱ṃ cakṣṷ: su̱bhagā̱ vaha̭ntī śve̱taṃ naya̭ntī su̱dṛśī̭ka̱maśva̭m |
u̱ṣā a̭darśi ra̱śmibhi̱rvya̭ktā ci̱trāma̭ghā̱ viśva̱manu̱ prabhṷ̄tā ||3||
anti̭vāmā dū̱re a̱mitra̭muccho̱rvīṃ gavyṷ̄ti̱mabha̭yaṃ kṛdhī naḥ |
yā̱vaya̱ dveṣa̱ ā bha̭rā̱ vasṷ̄ni co̱daya̱ rādho̭ gṛṇa̱te ma̭ghoni ||4||
a̱sme śreṣṭhḙbhirbhā̱nubhi̱rvi bhā̱hyuṣo̭ devi prati̱rantī̭ na̱ āyṷ: |
 iṣa̭ṃ ca no̱ dadha̭tī viśvavāre̱ goma̱daśvā̭va̱dratha̭vacca̱ rādha̭: ||5||
yāṃ tvā̭ divo duhitarva̱rdhaya̱ntyuṣa̭: sujāte ma̱tibhi̱rvasi̭ṣṭhāḥ |
sāsmāsṷ dhā ra̱yimṛ̱ṣvaṃ bṛ̱hanta̭ṃ yū̱yaṃ pā̭ta sva̱stibhi̱: sadā̭ naḥ ||6||
5  maitrāvaruṇirvasiṣṭha:| uṣasa: | triṣṭup |
prati̭ ke̱tava̭: pratha̱mā a̭dṛśrannū̱rdhvā a̭syā a̱ñjayo̱ vi śra̭yante |
uṣo̭ a̱rvācā̭ bṛha̱tā rathḙna̱ jyoti̭ṣmatā vā̱mama̱smabhya̭ṃ vakṣi ||1
prati̭ ṣīma̱gnirja̭rate̱ sami̭ddha̱: prati̱ viprā̭so ma̱tibhi̭rgṛ̱ṇanta̭: |
u̱ṣā yā̭ti̱ jyoti̭ṣā̱ bādha̭mānā̱ viśvā̱ tamā̭ṃsi duri̱tāpa̭ de̱vī ||2||
e̱tā u̱ tyāḥ pratya̭dṛśranpu̱rastā̱jjyoti̱ryaccha̭ntīru̱ṣaso̭ vibhā̱tīḥ |
ajī̭jana̱ntsūrya̭ṃ ya̱jñama̱gnima̭pā̱cīna̱ṃ tamo̭ agā̱dajṷṣṭam ||3||
acḙti di̱vo dṷhi̱tā ma̱ghonī̱ viśvḙ paśyantyu̱ṣasa̭ṃ vibhā̱tīm |
āsthā̱dratha̭ṃ sva̱dhayā̭ yu̱jyamā̭na̱mā yamaśvā̭saḥ su̱yujo̱ vaha̭nti ||4||
prati̭ tvā̱dya su̱mana̭so budhantā̱'smākā̭so ma̱ghavā̭no va̱yaṃ ca̭ |
ti̱lvi̱lā̱yadhva̭muṣaso vibhā̱tīryū̱yaṃ pā̭ta sva̱stibhi̱: sadā̭ naḥ ||5||
5  maitrāvaruṇirvasiṣṭha:| uṣasa: | triṣṭup |
vyu1ṣā ā̭vaḥ pa̱thyā̱3 janā̭nā̱ṃ pañca̭ kṣi̱tīrmānṷṣīrbo̱dhaya̭ntī |
su̱sa̱ṃdṛgbhi̭ru̱kṣabhi̭rbhā̱numa̭śre̱dvi sūryo̱ roda̭sī̱ cakṣa̭sāvaḥ ||1
vya̭ñjate di̱vo antḙṣva̱ktūnviśo̱ na yu̱ktā u̱ṣaso̭ yatante |
saṃ te̱ gāva̱stama̱ ā va̭rtayanti̱ jyoti̭ryacchanti savi̱teva̭ bā̱hū ||2||
abhṷ̄du̱ṣā indra̭tamā ma̱ghonyajī̭janatsuvi̱tāya̱ śravā̭ṃsi |
vi di̱vo de̱vī dṷhi̱tā da̭dhā̱tyaṅgi̭rastamā su̱kṛte̱ vasṷ̄ni ||3||
tāva̭duṣo̱ rādho̭ a̱smabhya̭ṃ rāsva̱ yāva̭tsto̱tṛbhyo̱ ara̭do gṛṇā̱nā |
yāṃ tvā̭ ja̱jñurvṛ̭ṣa̱bhasyā̱ ravḙṇa̱ vi dṛ̱ḻhasya̱ duro̱ adrḙraurṇoḥ ||4||
de̱vaṃdḙva̱ṃ rādha̭se co̱daya̭ntyasma̱drya̭ksū̱nṛtā̭ ī̱raya̭ntī |
vyu̱cchantī̭ naḥ sa̱naye̱ dhiyo̭ dhā yū̱yaṃ pā̭ta sva̱stibhi̱: sadā̭ naḥ ||5||
3  maitrāvaruṇirvasiṣṭha:| uṣasa: | triṣṭup |
prati̱ stomḙbhiru̱ṣasa̱ṃ vasi̭ṣṭhā gī̱rbhirviprā̭saḥ pratha̱mā a̭budhran |
vi̱va̱rtaya̭ntī̱ṃ raja̭sī̱ sama̭nte āviṣkṛṇva̱tīṃ bhuva̭nāni̱ viśvā̭ ||1||
e̱ṣā syā navya̱māyu̱rdadhā̭nā gū̱ḍhvī tamo̱ jyoti̭ṣo̱ṣā a̭bodhi |
agra̭ eti yuva̱tirahra̭yāṇā̱ prāci̭kita̱tsūrya̭ṃ ya̱jñama̱gnim ||2||
aśvā̭vatī̱rgoma̭tīrna u̱ṣāso̭ vī̱rava̭tī̱: sada̭mucchantu bha̱drāḥ |
ghṛ̱taṃ duhā̭nā vi̱śvata̱: prapī̭tā yū̱yaṃ pā̭ta sva̱stibhi̱: sadā̭ naḥ ||3||
6  maitrāvaruṇirvasiṣṭha:| uṣasa: |pragātha:=(viṣamā bṛhatī, samā satobṛhatī )|
pratyṷ adarśyāya̱tyu1cchantī̭ duhi̱tā di̱vaḥ |
apo̱ mahi̭ vyayati̱ cakṣa̭se̱ tamo̱ jyoti̭ṣkṛṇoti sū̱narī̭ ||1||
udu̱sriyā̭: sṛjate̱ sūrya̱: sacā̭~ u̱dyannakṣa̭tramarci̱vat |
tavedṷṣo̱ vyuṣi̱ sūrya̭sya ca̱ saṃ bha̱ktena̭ gamemahi ||2||
prati̭ tvā duhitardiva̱ uṣo̭ jī̱rā a̭bhutsmahi |
yā vaha̭si pu̱ru spā̱rhaṃ va̭nanvati̱ ratna̱ṃ na dā̱śuṣe̱ maya̭: ||3||
u̱cchantī̱ yā kṛ̱ṇoṣi̭ ma̱ṃhanā̭ mahi pra̱khyai dḙvi̱ sva̭rdṛ̱śe |
tasyā̭ste ratna̱bhāja̭ īmahe va̱yaṃ syāma̭ mā̱turna sū̱nava̭: ||4||
tacci̱traṃ rādha̱ ā bha̱roṣo̱ yaddī̭rgha̱śrutta̭mam |
yattḙ divo duhitarmarta̱bhoja̭na̱ṃ tadrā̭sva bhu̱najā̭mahai ||5||
śrava̭: sū̱ribhyo̭ a̱mṛta̭ṃ vasutva̱naṃ vājā̭~ a̱smabhya̱ṃ goma̭taḥ |
co̱da̱yi̱trī ma̱ghona̭: sū̱nṛtā̭vatyu̱ṣā ṷccha̱dapa̱ sridha̭: ||6||
10 maitrāvaruṇirvasiṣṭha:| indrāvaruṇau |jagatī |
indrā̭varuṇā yu̱vama̭dhva̱rāya̭ no vi̱śe janā̭ya̱ mahi̱ śarma̭ yacchatam |
 dī̱rghapra̭yajyu̱mati̱ yo va̭nu̱ṣyati̭ va̱yaṃ ja̭yema̱ pṛta̭nāsu dū̱ḍhya̭: ||1||
sa̱mrāḻa̱nyaḥ sva̱rāḻa̱nya ṷcyate vāṃ ma̱hāntā̱vindrā̱varṷṇā ma̱hāva̭sū |
viśvḙ de̱vāsa̭: para̱me vyo̭mani̱ saṃ vā̱mojo̭ vṛṣaṇā̱ saṃ bala̭ṃ dadhuḥ ||2||
anva̱pāṃ khānya̭tṛnta̱moja̱sā sūrya̭mairayataṃ di̱vi pra̱bhum |
indrā̭varuṇā̱ madḙ asya mā̱yino'pi̭nvatama̱pita̱: pinva̭ta̱ṃ dhiya̭: ||3||
yu̱vāmidyu̱tsu pṛta̭nāsu̱ vahna̭yo yu̱vāṃ kṣema̭sya prasa̱ve mi̱tajña̭vaḥ |
ī̱śā̱nā vasva̭ u̱bhaya̭sya kā̱rava̱ indrā̭varuṇā su̱havā̭ havāmahe ||4||
indrā̭varuṇā̱ yadi̱māni̭ ca̱krathu̱rviśvā̭ jā̱tāni̱ bhuva̭nasya ma̱jmanā̭ |
kṣemḙṇa mi̱tro varṷṇaṃ duva̱syati̭ ma̱rudbhi̭ru̱graḥ śubha̭ma̱nya ī̭yate ||5||
ma̱he śu̱lkāya̱ varṷṇasya̱ nu tvi̱ṣa ojo̭ mimāte dhru̱vama̭sya̱ yatsvam |
ajā̭mima̱nyaḥ śna̱thaya̭nta̱māti̭radda̱bhrebhi̭ra̱nyaḥ pra vṛ̭ṇoti̱ bhūya̭saḥ ||6||
na tamaṃho̱ na dṷri̱tāni̱ martya̱mindrā̭varuṇā̱ na tapa̱: kuta̭śca̱na |
yasya̭ devā̱ gaccha̭tho vī̱tho a̭dhva̱raṃ na taṃ marta̭sya naśate̱ pari̭hvṛtiḥ ||7||
a̱rvāṅna̭rā̱ daivye̱nāva̱sā ga̭taṃ śṛṇu̱taṃ hava̱ṃ yadi̭ me̱ jujo̭ṣathaḥ |
yu̱vorhi sa̱khyamu̱ta vā̱ yadāpya̭ṃ mārḍī̱kami̭ndrāvaruṇā̱ ni ya̭cchatam ||8||
a̱smāka̭mindrāvaruṇā̱ bharḙbhare puroyo̱dhā bha̭vataṃ kṛṣṭyojasā |
yadvā̱ṃ hava̭nta u̱bhaye̱ adha̭ spṛ̱dhi nara̭sto̱kasya̱ tana̭yasya sā̱tiṣṷ ||9||
a̱sme indro̱ varṷṇo mi̱tro a̭rya̱mā dyu̱mnaṃ ya̭cchantu̱ mahi̱ śarma̭ sa̱pratha̭: |
a̱va̱dhraṃ jyoti̱radi̭teṝtā̱vṛdho̭ de̱vasya̱ śloka̭ṃ savi̱turma̭nāmahe ||10||
10 maitrāvaruṇirvasiṣṭha:| indrāvaruṇau |jagatī |
yu̱vāṃ na̭rā̱ paśya̭mānāsa̱ āpya̭ṃ prā̱cā ga̱vyanta̭: pṛthu̱parśa̭vo yayuḥ |
dāsā̭ ca vṛ̱trā ha̱tamāryā̭ṇi ca su̱dāsa̭mindrāvaru̱ṇāva̭sāvatam ||1||
yatrā̱ nara̭: sa̱maya̭nte kṛ̱tadhva̭jo̱ yasmi̭nnā̱jā bhava̭ti̱ kiṃ ca̱na pri̱yam |
yatrā̱ bhaya̭nte̱ bhuva̭nā sva̱rdṛśa̱statrā̭ na indrāvaru̱ṇādhi̭ vocatam ||2||
saṃ bhūmyā̱ antā̭ dhvasi̱rā a̭dṛkṣa̱tendrā̭varuṇā di̱vi ghoṣa̱
ārṷhat | asthu̱rjanā̭nā̱mupa̱ māmarā̭tayo̱'rvāgava̭sā havanaśru̱tā ga̭tam ||3||
indrā̭varuṇā va̱dhanā̭bhirapra̱ti bhe̱daṃ va̱nvantā̱ pra su̱dāsa̭māvatam |
brahmā̭ṇyeṣāṃ śṛṇuta̱ṃ havī̭mani sa̱tyā tṛtsṷ̄nāmabhavatpu̱rohi̭tiḥ ||4||
indrā̭varuṇāva̱bhyā ta̭panti mā̱ghānya̱ryo va̱nuṣā̱marā̭tayaḥ |
yu̱vaṃ hi vasva̭ u̱bhaya̭sya̱ rāja̱tho'dha̭ smā no'vata̱ṃ pāryḙ di̱vi ||5||
yu̱vāṃ ha̭vanta u̱bhayā̭sa ā̱jiṣvindra̭ṃ ca̱ vasvo̱ varṷṇaṃ ca sā̱tayḙ |
yatra̱ rāja̭bhirda̱śabhi̱rnibā̭dhita̱ṃ pra su̱dāsa̱māva̭ta̱ṃ tṛtsṷbhiḥ sa̱ha ||6||
daśa̱ rājā̭na̱: sami̭tā̱ aya̭jyavaḥ su̱dāsa̭mindrāvaruṇā̱ na yṷyudhuḥ |
sa̱tyā nṛ̱ṇāma̭dma̱sadā̱mupa̭stutirde̱vā ḙṣāmabhavande̱vahṷ̄tiṣu ||7||
dā̱śa̱rā̱jñe pari̭yattāya vi̱śvata̭: su̱dāsa̭ indrāvaruṇāvaśikṣatam |
śvi̱tyañco̱ yatra̱ nama̭sā kapa̱rdino̭ dhi̱yā dhīva̭nto̱ asa̭panta̱ tṛtsa̭vaḥ ||8||
vṛ̱trāṇya̱nyaḥ sa̭mi̱theṣu̱ jighna̭te vra̱tānya̱nyo a̱bhi ra̭kṣate̱ sadā̭ |
havā̭mahe vāṃ vṛṣaṇā suvṛ̱ktibhi̭ra̱sme i̭ndrāvaruṇā̱ śarma̭ yacchatam ||9||
a̱sme indro̱ varṷṇo mi̱tro a̭rya̱mā dyu̱mnaṃ ya̭cchantu̱ mahi̱ śarma̭ sa̱pratha̭: |
a̱va̱dhraṃ jyoti̱radi̭teṝtā̱vṛdho̭ de̱vasya̱ śloka̭ṃ savi̱turma̭nāmahe ||10||
5  maitrāvaruṇirvasiṣṭha:| indrāvaruṇau | triṣṭup |
ā vā̭ṃ rājānāvadhva̱re va̭vṛtyāṃ ha̱vyebhi̭rindrāvaruṇā̱ namo̭bhiḥ |
pra vā̭ṃ ghṛ̱tācī̭ bā̱hvordadhā̭nā̱ pari̱ tmanā̱ viṣṷrūpā jigāti ||1||
yu̱vo rā̱ṣṭraṃ bṛ̱hadi̭nvati̱ dyauryau se̱tṛbhi̭rara̱jjubhi̭: sinī̱thaḥ |
pari̭ no̱ heḻo̱ varṷṇasya vṛjyā u̱ruṃ na̱ indra̭: kṛṇavadu lo̱kam ||2||
kṛ̱taṃ no̭ ya̱jñaṃ vi̱dathḙṣu̱ cārṷṃ kṛ̱taṃ brahmā̭ṇi sū̱riṣṷ praśa̱stā |
upo̭ ra̱yirde̱vajṷ̄to na etu̱ pra ṇa̭: spā̱rhābhi̭rū̱tibhi̭stiretam ||3||
a̱sme i̭ndrāvaruṇā vi̱śvavā̭raṃ ra̱yiṃ dha̭tta̱ṃ vasṷmantaṃ puru̱kṣum |
pra ya ā̭di̱tyo anṛ̭tā mi̱nātyami̭tā̱ śūro̭ dayate̱ vasṷ̄ni ||4||
i̱yamindra̱ṃ varṷṇamaṣṭa me̱ gīḥ prāva̭tto̱ke tana̭ye̱ tūtṷjānā |
su̱ratnā̭so de̱vavī̭tiṃ gamema yū̱yaṃ pā̭ta sva̱stibhi̱: sadā̭ naḥ ||5||
5 maitrāvaruṇirvasiṣṭha:| indrāvaruṇau | triṣṭup |
pu̱nī̱ṣe vā̭mara̱kṣasa̭ṃ manī̱ṣāṃ soma̱mindrā̭ya̱ varṷṇāya̱ juhva̭t |
ghṛ̱tapra̭tīkāmu̱ṣasa̱ṃ na de̱vīṃ tā no̱ yāma̭nnuruṣyatāma̱bhīkḙ ||1||
spardha̭nte̱ vā ṷ deva̱hūye̱ atra̱ yeṣṷ dhva̱jeṣṷ di̱dyava̱: pata̭nti |
yu̱vaṃ tā~ i̭ndrāvaruṇāva̱mitrā̭nha̱taṃ parā̭ca̱: śarvā̱ viṣṷ̄caḥ ||2||
āpa̭ści̱ddhi svaya̭śasa̱: sada̭:su de̱vīrindra̱ṃ varṷṇaṃ de̱vatā̱ dhuḥ |
kṛ̱ṣṭīra̱nyo dhā̱raya̭ti̱ pravi̭ktā vṛ̱trāṇya̱nyo a̭pra̱tīni̭ hanti ||3||
sa su̱kratṷṝta̱cida̭stu̱ hotā̱ ya ā̭ditya̱ śava̭sā vā̱ṃ nama̭svān |
ā̱va̱varta̱dava̭se vāṃ ha̱viṣmā̱nasa̱ditsa sṷvi̱tāya̱ praya̭svān ||4||
i̱yamindra̱ṃ varṷṇamaṣṭa me̱ gīḥ prāva̭tto̱ke tana̭ye̱ tūtṷjānā |
su̱ratnā̭so de̱vavī̭tiṃ gamema yū̱yaṃ pā̭ta sva̱stibhi̱: sadā̭ naḥ ||5||
8  maitrāvaruṇirvasiṣṭha:| varuṇa: | triṣṭup |
dhīrā̱ tva̭sya mahi̱nā ja̱nūṃṣi̱ vi yasta̱stambha̱ roda̭sī cidu̱rvī |
pra nāka̭mṛ̱ṣvaṃ nṷnude bṛ̱hanta̭ṃ dvi̱tā nakṣa̭traṃ pa̱pratha̭cca̱ bhūma̭ ||1||
u̱ta svayā̭ ta̱nvā̱3 saṃ va̭de̱ tatka̱dā nva1ntarvarṷṇe bhuvāni |
kiṃ mḙ ha̱vyamahṛ̭ṇāno juṣeta ka̱dā mṛ̭ḻī̱kaṃ su̱manā̭ a̱bhi khya̭m ||2||
pṛ̱cche tadeno̭ varuṇa di̱dṛkṣūpo̭ emi ciki̱tuṣo̭ vi̱pṛccha̭m |
sa̱mā̱naminmḙ ka̱vaya̭ścidāhura̱yaṃ ha̱ tubhya̱ṃ varṷṇo hṛṇīte ||3||
kimāga̭ āsa varuṇa̱ jyeṣṭha̱ṃ yatsto̱tāra̱ṃ jighā̭ṃsasi̱ sakhā̭yam |
pra tanmḙ voco dūḻabha svadhā̱vo'va̭ tvāne̱nā nama̭sā tu̱ra i̭yām ||4||
ava̭ dru̱gdhāni̱ pitryā̭ sṛjā̱ no'va̱ yā va̱yaṃ ca̭kṛ̱mā ta̱nūbhi̭: |
ava̭ rājanpaśu̱tṛpa̱ṃ na tā̱yuṃ sṛ̱jā va̱tsaṃ na dāmno̱ vasi̭ṣṭham ||5||
na sa svo dakṣo̭ varuṇa̱ dhruti̱: sā surā̭ ma̱nyurvi̱bhīda̭ko̱ aci̭ttiḥ |
asti̱ jyāyā̱nkanī̭yasa upā̱re svapna̭śca̱nedanṛ̭tasya prayo̱tā ||6||
ara̭ṃ dā̱so na mī̱ḻhuṣḙ karāṇya̱haṃ de̱vāya̱ bhūrṇa̱ye'nā̭gāḥ |
acḙtayada̱cito̭ de̱vo a̱ryo gṛtsa̭ṃ rā̱ye ka̱vita̭ro junāti ||7||
a̱yaṃ su tubhya̭ṃ varuṇa svadhāvo hṛ̱di stoma̱ upa̭śritaścidastu |
śaṃ na̱: kṣeme̱ śamu̱ yogḙ no astu yū̱yaṃ pā̭ta sva̱stibhi̱: sadā̭ naḥ ||8||
7  maitrāvaruṇirvasiṣṭha:| varuṇa:| triṣṭup |
rada̭tpa̱tho varṷṇa̱: sūryā̭ya̱ prārṇā̭ṃsi samu̱driyā̭ na̱dīnā̭m |
sargo̱ na sṛ̱ṣṭo arva̭tīṝtā̱yañca̱kāra̭ ma̱hīra̱vanī̱raha̭bhyaḥ ||1||
ā̱tmā te̱ vāto̱ raja̱ ā na̭vīnotpa̱śurna bhūrṇi̱ryava̭se sasa̱vān |
a̱ntarma̱hī bṛ̭ha̱tī roda̭sī̱me viśvā̭ te̱ dhāma̭ varuṇa pri̱yāṇi̭ ||2||
pari̱ spaśo̱ varṷṇasya̱ smadi̭ṣṭā u̱bhe pa̭śyanti̱ roda̭sī su̱mekḙ |
ṛ̱tāvā̭naḥ ka̱vayo̭ ya̱jñadhī̭rā̱: pracḙtaso̱ ya i̱ṣaya̭nta̱ manma̭ ||3||
u̱vāca̭ me̱ varṷṇo̱ medhi̭rāya̱ triḥ sa̱pta nāmāghnyā̭ bibharti |
vi̱dvānpa̱dasya̱ guhyā̱ na vo̭cadyu̱gāya̱ vipra̱ upa̭rāya̱ śikṣa̭n ||4||
ti̱sro dyāvo̱ nihi̭tā a̱ntara̭sminti̱sro bhūmī̱rupa̭rā̱: ṣaḍvi̭dhānāḥ |
gṛtso̱ rājā̱ varṷṇaścakra e̱taṃ di̱vi pre̱ṅkhaṃ hi̭ra̱ṇyaya̭ṃ śu̱bhe kam ||5||
ava̱ sindhu̱ṃ varṷṇo̱ dyauri̭va sthāddra̱pso na śve̱to mṛ̱gastuvi̭ṣmān |
ga̱mbhī̱raśa̭ṃso̱ raja̭so vi̱māna̭: supā̱rakṣa̭traḥ sa̱to a̱sya rājā̭ ||6||
yo mṛ̱ḻayā̭ti ca̱kruṣḙ ci̱dāgo̭ va̱yaṃ syā̭ma̱ varṷṇe̱ anā̭gāḥ |
anṷ vra̱tānyadi̭teṝ̱dhanto̭ yū̱yaṃ pā̭ta sva̱stibhi̱: sadā̭ naḥ ||7||
7  maitrāvaruṇirvasiṣṭha:|
varuṇa:, ( 7 pāśavimocanī) | triṣṭup |
pra śu̱ndhyuva̱ṃ varṷṇāya̱ preṣṭhā̭ṃ ma̱tiṃ va̭siṣṭha mī̱ḻhuṣḙ bharasva |
ya ī̭ma̱rvāñca̱ṃ kara̭te̱ yaja̭traṃ sa̱hasrā̭magha̱ṃ vṛṣa̭ṇaṃ bṛ̱hanta̭m ||1||
adhā̱ nva̭sya sa̱ṃdṛśa̭ṃ jaga̱nvāna̱gneranī̭ka̱ṃ varṷṇasya maṃsi |
sva1ryadaśma̭nnadhi̱pā u̱ andho̱'bhi mā̱ vapṷrdṛ̱śayḙ ninīyāt ||2||
ā yadru̱hāva̱ varṷṇaśca̱ nāva̱ṃ pra yatsa̭mu̱dramī̱rayā̭va̱ madhya̭m |
adhi̱ yada̱pāṃ snubhi̱ścarā̭va̱ pra pre̱ṅkha ī̭ṅkhayāvahai śu̱bhe kam ||3||
vasi̭ṣṭhaṃ ha̱ varṷṇo nā̱vyādhā̱dṛṣi̭ṃ cakāra̱ svapā̱ maho̭bhiḥ |
sto̱tāra̱ṃ vipra̭: sudina̱tve ahnā̱ṃ yānnu dyāva̭sta̱tana̱nyādu̱ṣāsa̭: ||4||
kva1 tyāni̭ nau sa̱khyā ba̭bhūvu̱: sacā̭vahe̱ yada̭vṛ̱kaṃ pu̱rā ci̭t |
bṛ̱hanta̱ṃ māna̭ṃ varuṇa svadhāvaḥ sa̱hasra̭dvāraṃ jagamā gṛ̱haṃ tḙ ||5||
ya ā̱pirnityo̭ varuṇa pri̱yaḥ santvāmāgā̭ṃsi kṛ̱ṇava̱tsakhā̭ te |
mā ta̱ ena̭svanto yakṣinbhujema ya̱ndhi ṣmā̱ vipra̭: stuva̱te varṷ̄tham ||6||
dhru̱vāsṷ tvā̱su kṣi̱tiṣṷ kṣi̱yanto̱ vya1smatpāśa̱ṃ varṷṇo mumocat |
avo̭ vanvā̱nā adi̭teru̱pasthā̭dyū̱yaṃ pā̭ta sva̱stibhi̱: sadā̭ naḥ ||7||
5  maitrāvaruṇirvasiṣṭha:| varuṇa: | gāyatrī, 5 jagatī|
mo ṣu va̭ruṇa mṛ̱nmaya̭ṃ gṛ̱haṃ rā̭janna̱haṃ ga̭mam | mṛ̱ḻā sṷkṣatra mṛ̱ḻaya̭ ||1||
yademi̭ prasphu̱ranni̭va̱ dṛti̱rna dhmā̱to a̭drivaḥ | mṛ̱ḻā sṷkṣatra mṛ̱ḻaya̭ ||2||
kratva̭: samaha dī̱natā̭ pratī̱paṃ ja̭gamā śuce | mṛ̱ḻā sṷkṣatra mṛ̱ḻaya̭ ||3||
a̱pāṃ madhyḙ tasthi̱vāṃsa̱ṃ tṛṣṇā̭vidajjari̱tāra̭m | mṛ̱ḻā sṷkṣatra mṛ̱ḻaya̭ ||4||
yatkiṃ ce̱daṃ va̭ruṇa̱ daivye̱ janḙ'bhidro̱haṃ ma̭nu̱ṣyā̱3ścarā̭masi |
aci̭ttī̱ yattava̱ dharmā̭ yuyopi̱ma mā na̱stasmā̱dena̭so deva rīriṣaḥ ||5||
7  maitrāvaruṇirvasiṣṭha:| vāyu:, 5 -7 indravāyū| triṣṭup |
pra vī̭ra̱yā śuca̭yo dadrire vāmadhva̱ryubhi̱rmadhṷmantaḥ su̱tāsa̭: |
vaha̭ vāyo ni̱yuto̭ yā̱hyacchā̱ pibā̭ su̱tasyāndha̭so̱ madā̭ya ||1||
ī̱śā̱nāya̱ prahṷti̱ṃ yasta̱ āna̱ṭ śuci̱ṃ soma̭ṃ śucipā̱stubhya̭ṃ vāyo |
kṛ̱ṇoṣi̱ taṃ martyḙṣu praśa̱staṃ jā̱tojā̭to jāyate vā̱jya̭sya ||2||
rā̱ye nu yaṃ ja̱jñatū̱ roda̭sī̱me rā̱ye de̱vī dhi̱ṣaṇā̭ dhāti de̱vam |
adha̭ vā̱yuṃ ni̱yuta̭: saścata̱ svā u̱ta śve̱taṃ vasṷdhitiṃ nire̱ke ||3||
u̱cchannu̱ṣasa̭: su̱dinā̭ ari̱prā u̱ru jyoti̭rvividu̱rdīdhyā̭nāḥ |
gavya̭ṃ cidū̱rvamu̱śijo̱ vi va̭vru̱steṣā̱manṷ pra̱diva̭: sasru̱rāpa̭: ||4||
te sa̱tyena̱ mana̭sā̱ dīdhyā̭nā̱: svena̭ yu̱ktāsa̱: kratṷnā vahanti |
indra̭vāyū vīra̱vāha̱ṃ ratha̭ṃ vāmīśā̱nayo̭ra̱bhi pṛkṣa̭: sacante ||5||
ī̱śā̱nāso̱ ye dadha̭te̱ sva̭rṇo̱ gobhi̱raśvḙbhi̱rvasṷbhi̱rhira̭ṇyaiḥ |
indra̭vāyū sū̱rayo̱ viśva̱māyu̱rarva̭dbhirvī̱raiḥ pṛta̭nāsu sahyuḥ ||6||
arva̭nto̱ na śrava̭so̱ bhikṣa̭māṇā indravā̱yū sṷṣṭu̱tibhi̱rvasi̭ṣṭhāḥ |
vā̱ja̱yanta̱: svava̭se huvema yū̱yaṃ pā̭ta sva̱stibhi̱: sadā̭ naḥ ||7||
7 maitrāvaruṇirvasiṣṭha:| 1,3 vāyu: , 2, 4-7 indravāyū  | triṣṭup |
ku̱vida̱ṅga nama̭sā̱ ye vṛ̱dhāsa̭: pu̱rā de̱vā a̭nava̱dyāsa̱ āsa̭n |
te vā̱yave̱ mana̭ve bādhi̱tāyā'vā̭sayannu̱ṣasa̱ṃ sūryḙṇa ||1||
u̱śantā̭ dū̱tā na dabhā̭ya go̱pā mā̱saśca̭ pā̱thaḥ śa̱rada̭śca pū̱rvīḥ |
indra̭vāyū suṣṭu̱tirvā̭miyā̱nā mā̭rḍī̱kamī̭ṭṭe suvi̱taṃ ca̱ navya̭m ||2||
pīvo̭annā~ rayi̱vṛdha̭: sume̱dhāḥ śve̱taḥ si̭ṣakti ni̱yutā̭mabhi̱śrīḥ |
te vā̱yave̱ sama̭naso̱ vi ta̭sthu̱rviśvennara̭: svapa̱tyāni̭ cakruḥ ||3||
yāva̱ttara̭sta̱nvo̱3 yāva̱dojo̱ yāva̱nnara̱ścakṣa̭sā̱ dīdhyā̭nāḥ |
śuci̱ṃ soma̭ṃ śucipā pātama̱sme indra̭vāyū̱ sada̭taṃ ba̱rhiredam ||4||
ni̱yu̱vā̱nā ni̱yuta̭: spā̱rhavī̭rā̱ indra̭vāyū sa̱ratha̭ṃ yātama̱rvāk |
i̱daṃ hi vā̱ṃ prabhṛ̭ta̱ṃ madhvo̱ agra̱madha̭ prīṇā̱nā vi mṷmuktama̱sme ||5||
yā vā̭ṃ śa̱taṃ ni̱yuto̱ yāḥ sa̱hasra̱mindra̭vāyū vi̱śvavā̭rā̱: saca̭nte |
ābhi̭ryātaṃ suvi̱datrā̭bhira̱rvākpā̱taṃ na̭rā̱ prati̭bhṛtasya̱ madhva̭: ||6||
arva̭nto̱ na śrava̭so̱ bhikṣa̭māṇā indravā̱yū sṷṣṭu̱tibhi̱rvasi̭ṣṭhāḥ |
vā̱ja̱yanta̱: svava̭se huvema yū̱yaṃ pā̭ta sva̱stibhi̱: sadā̭ naḥ ||7||
5  maitrāvaruṇirvasiṣṭha:| vāyu: , 2, 4 indravāyū  | triṣṭup |
ā vā̭yo bhūṣa śucipā̱ upa̭ naḥ sa̱hasra̭ṃ te ni̱yuto̭ viśvavāra |
upo̭ te̱ andho̱ madya̭mayāmi̱ yasya̭ deva dadhi̱ṣe pṷ̄rva̱peya̭m ||1||
pra sotā̭ jī̱ro a̭dhva̱reṣva̭sthā̱tsoma̱mindrā̭ya vā̱yave̱ piba̭dhyai |
pra yadvā̱ṃ madhvo̭ agri̱yaṃ bhara̭ntyadhva̱ryavo̭ deva̱yanta̱: śacī̭bhiḥ ||2||
pra yābhi̱ryāsi̭ dā̱śvāṃsa̱macchā̭ ni̱yudbhi̭rvāyavi̱ṣṭayḙ duro̱ṇe |
ni no̭ ra̱yiṃ su̱bhoja̭saṃ yuvasva̱ ni vī̱raṃ gavya̱maśvya̭ṃ ca̱ rādha̭: ||3||
ye vā̱yava̭ indra̱māda̭nāsa̱ ādḙvāso ni̱tośa̭nāso a̱ryaḥ |
ghnanto̭ vṛ̱trāṇi̭ sū̱ribhi̭: ṣyāma sāsa̱hvāṃso̭ yu̱dhā nṛbhi̭ra̱mitrā̭n ||4||
ā no̭ ni̱yudbhi̭: śa̱tinī̭bhiradhva̱raṃ sa̭ha̱sriṇī̭bhi̱rupa̭ yāhi ya̱jñam | vā
yo̭ a̱smintsava̭ne mādayasva yū̱yaṃ pā̭ta sva̱stibhi̱: sadā̭ naḥ ||5||
8  maitrāvaruṇirvasiṣṭha:| indrāgnī| triṣṭup |
śuci̱ṃ nu stoma̱ṃ nava̭jātama̱dyendrā̭gnī vṛtrahaṇā ju̱ṣethā̭m |
u̱bhā hi vā̭ṃ su̱havā̱ joha̭vīmi̱ tā vāja̭ṃ sa̱dya ṷśa̱te dheṣṭhā̭ ||1||
tā sā̭na̱sī śa̭vasānā̱ hi bhū̱taṃ sā̭ka̱ṃvṛdhā̱ śava̭sā śūśu̱vāṃsā̭ |
kṣaya̭ntau rā̱yo yava̭sasya̱ bhūrḙ: pṛ̱ṅktaṃ vāja̭sya̱ sthavi̭rasya̱ ghṛṣvḙ: ||2||
upo̭ ha̱ yadvi̱datha̭ṃ vā̱jino̱ gurdhī̱bhirviprā̱: prama̭timi̱cchamā̭nāḥ |
arva̭nto̱ na kāṣṭhā̱ṃ nakṣa̭māṇā indrā̱gnī johṷvato̱ nara̱ste ||3||
gī̱rbhirvipra̱: prama̭timi̱cchamā̭na̱ īṭṭḙ ra̱yiṃ ya̱śasa̭ṃ pūrva̱bhāja̭m |
indrā̭gnī vṛtrahaṇā suvajrā̱ pra no̱ navyḙbhistirataṃ de̱ṣṇaiḥ ||4||
saṃ yanma̱hī mi̭tha̱tī spardha̭māne tanū̱rucā̱ śūra̭sātā̱ yatai̭te |
adḙvayuṃ vi̱dathḙ deva̱yubhi̭: sa̱trā ha̭taṃ soma̱sutā̱ janḙna ||5||
i̱māmu̱ ṣu soma̭suti̱mupa̭ na̱ endrā̭gnī saumana̱sāya̭ yātam |
nū ci̱ddhi pa̭rima̱mnāthḙ a̱smānā vā̱ṃ śaśva̭dbhirvavṛtīya̱ vājai̭: ||6||
so a̭gna e̱nā nama̭sā̱ sami̱ddho'cchā̭ mi̱traṃ varṷṇa̱mindra̭ṃ voceḥ |
yatsī̱māga̭ścakṛ̱mā tatsu mṛ̭ḻa̱ tada̭rya̱mādi̭tiḥ śiśrathantu ||7||
e̱tā a̭gna āśuṣā̱ṇāsa̭ i̱ṣṭīryu̱voḥ sacā̱bhya̭śyāma̱ vājā̭n |
mendro̭ no̱ viṣṇṷrma̱ruta̱: pari̭ khyanyū̱yaṃ pā̭ta sva̱stibhi̱: sadā̭ naḥ ||8||
12  maitrāvaruṇirvasiṣṭha:| indrāgnī|gāyatrī, 12  anuṣṭup |
i̱yaṃ vā̭ma̱sya manma̭na̱ indrā̭gnī pū̱rvyastṷtiḥ | a̱bhrādvṛ̱ṣṭiri̭vājani ||1||
śṛ̱ṇu̱taṃ ja̭ri̱turhava̱mindrā̭gnī̱ vana̭ta̱ṃ gira̭: | ī̱śā̱nā pi̭pyata̱ṃ dhiya̭: ||2||
mā pā̭pa̱tvāya̭ no na̱rendrā̭gnī̱ mābhiśa̭staye | mā no̭ rīradhataṃ ni̱de ||3||
indrḙ a̱gnā namo̭ bṛ̱hatsṷvṛ̱ktimera̭yāmahe | dhi̱yā dhenā̭ ava̱syava̭: ||4||
tā hi śaśva̭nta̱ īḻa̭ta i̱tthā viprā̭sa ū̱tayḙ | sa̱bādho̱ vāja̭sātaye ||5||
tā vā̭ṃ gī̱rbhirvi̭pa̱nyava̱: praya̭svanto havāmahe | me̱dhasā̭tā sani̱ṣyava̭: ||6||
indrā̭gnī̱ ava̱sā ga̭tama̱smabhya̭ṃ carṣaṇīsahā | mā no̭ du̱:śaṃsa̭ īśata ||7||
mā kasya̭ no̱ ara̭ruṣo dhū̱rtiḥ praṇa̱ṅmartya̭sya | indrā̭gnī̱ śarma̭ yacchatam ||8||
goma̱ddhira̭ṇyava̱dvasu̱ yadvā̱maśvā̭va̱dīma̭he | indrā̭gnī̱ tadva̭nemahi ||9||
yatsoma̱ ā su̱te nara̭ indrā̱gnī ajo̭havuḥ | saptī̭vantā sapa̱ryava̭: ||10||
u̱kthebhi̭rvṛtra̱hanta̭mā̱ yā ma̭ndā̱nā ci̱dā gi̱rā | ā̱ṅgū̱ṣairā̱vivā̭sataḥ ||11||
tāviddu̱:śaṃsa̱ṃ martya̱ṃ durvi̭dvāṃsaṃ rakṣa̱svina̭m | ā̱bho̱gaṃ hanma̭nā hatamuda̱dhiṃ hanma̭nā hatam ||12||
6  maitrāvaruṇirvasiṣṭha:| sarasvatī , 3 sarasvān | triṣṭup |
pra kṣoda̭sā̱ dhāya̭sā sasra e̱ṣā sara̭svatī dha̱ruṇa̱māya̭sī̱ pūḥ |
pra̱bāba̭dhānā ra̱thyḙva yāti̱ viśvā̭ a̱po ma̭hi̱nā sindhṷra̱nyāḥ ||1||
ekā̭ceta̱tsara̭svatī na̱dīnā̱ṃ śuci̭rya̱tī gi̱ribhya̱ ā sa̭mu̱drāt |
rā̱yaśceta̭ntī̱ bhuva̭nasya̱ bhūrḙrghṛ̱taṃ payo̭ duduhe̱ nāhṷṣāya ||2||
sa vā̭vṛdhe̱ naryo̱ yoṣa̭ṇāsu̱ vṛṣā̱ śiśṷrvṛṣa̱bho ya̱jñiyā̭su |
sa vā̱jina̭ṃ ma̱ghava̭dbhyo dadhāti̱ vi sā̱tayḙ ta̱nva̭ṃ māmṛjīta ||3||
u̱ta syā na̱: sara̭svatī juṣā̱ṇopa̭ śravatsu̱bhagā̭ ya̱jṇe a̱smin |
mi̱tajñṷbhirnama̱syai̭riyā̱nā rā̱yā yu̱jā ci̱dutta̭rā̱ sakhi̭bhyaḥ ||4||
i̱mā juhvā̭nā yu̱ṣmadā namo̭bhi̱: prati̱ stoma̭ṃ sarasvati juṣasva |
tava̱ śarma̭npri̱yata̭me̱ dadhā̭nā̱ upa̭ stheyāma śara̱ṇaṃ na vṛ̱kṣam ||5||
a̱yamṷ te sarasvati̱ vasi̭ṣṭho̱ dvārā̭vṛ̱tasya̭ subhage̱ vyā̭vaḥ |
vardha̭ śubhre stuva̱te rā̭si̱ vājā̭nyū̱yaṃ pā̭ta sva̱stibhi̱: sadā̭ naḥ ||6||
6  maitrāvaruṇirvasiṣṭha:| sarasvatī, 4-6 sarasvān  | 1-2= pragātha: (1 bṛhatī, 2 satobṛhatī ), 3 prastārapaṃkti:, 4-6 gāyatrī|
bṛ̱hadṷ gāyiṣe̱ vaco̭'su̱ryā̭ na̱dīnā̭m |
sara̭svatī̱minma̭hayā suvṛ̱ktibhi̱: stomai̭rvasiṣṭha̱ roda̭sī ||1||
u̱bhe yattḙ mahi̱nā śṷbhre̱ andha̭sī adhikṣi̱yanti̭ pū̱rava̭: |
sā no̭ bodhyavi̱trī ma̱rutsa̭khā̱ coda̱ rādho̭ ma̱ghonā̭m ||2||
bha̱dramidbha̱drā kṛ̭ṇava̱tsara̭sva̱tyaka̭vārī cetati vā̱jinī̭vatī |
gṛ̱ṇā̱nā ja̭madagni̱vatstṷvā̱nā ca̭ vasiṣṭha̱vat ||3||
ja̱nī̱yanto̱ nvagra̭vaḥ putrī̱yanta̭: su̱dāna̭vaḥ | sara̭svantaṃ havāmahe ||4||
ye tḙ sarasva ū̱rmayo̱ madhṷmanto ghṛta̱ścuta̭: | tebhi̭rno'vi̱tā bha̭va ||5||
pī̱pi̱vāṃsa̱ṃ sara̭svata̱: stana̱ṃ yo vi̱śvada̭rśataḥ | bha̱kṣī̱mahi̭ pra̱jāmiṣa̭m ||6||
10  maitrāvaruṇirvasiṣṭha:| 1 indra:, 2,4-8 bṛhaspati:, 3,9 indrābrahmaṇaspatī, 10 indrābṛhaspatī | triṣṭup |
ya̱jñe di̱vo nṛ̱ṣada̭ne pṛthi̱vyā naro̱ yatra̭ deva̱yavo̱ mada̭nti |
indrā̭ya̱ yatra̱ sava̭nāni su̱nve gama̱nmadā̭ya pratha̱maṃ vaya̭śca ||1||
ā daivyā̭ vṛṇīma̱he'vā̭ṃsi̱ bṛha̱spati̭rno maha̱ ā sa̭khāyaḥ |
yathā̱ bhavḙma mī̱ḻhuṣe̱ anā̭gā̱ yo no̭ dā̱tā pa̭rā̱vata̭: pi̱teva̭ ||2||
tamu̱ jyeṣṭha̱ṃ nama̭sā ha̱virbhi̭: su̱śeva̱ṃ brahma̭ṇa̱spati̭ṃ gṛṇīṣe |
indra̱ṃ śloko̱ mahi̱ daivya̭: siṣaktu̱ yo brahma̭ṇo de̱vakṛ̭tasya̱ rājā̭ ||3||
sa ā no̱ yoni̭ṃ sadatu̱ preṣṭho̱ bṛha̱spati̭rvi̱śvavā̭ro̱ yo asti̭ |
kāmo̭ rā̱yaḥ su̱vīrya̭sya̱ taṃ dā̱tparṣa̭nno̱ ati̭ sa̱ścato̱ ari̭ṣṭān ||4||
tamā no̭ a̱rkama̱mṛtā̭ya̱ juṣṭa̭mi̱me dhā̭sura̱mṛtā̭saḥ purā̱jāḥ |
śuci̭krandaṃ yaja̱taṃ pa̱styā̭nā̱ṃ bṛha̱spati̭mana̱rvāṇa̭ṃ huvema ||5||
taṃ śa̱gmāso̭ aru̱ṣāso̱ aśvā̱ bṛha̱spati̭ṃ saha̱vāho̭ vahanti |
saha̭ści̱dyasya̱ nīla̭vatsa̱dhastha̱ṃ nabho̱ na rū̱pama̭ru̱ṣaṃ vasā̭nāḥ ||6||
sa hi śuci̭: śa̱tapa̭tra̱: sa śu̱ndhyurhira̭ṇyavāśīriṣi̱raḥ sva̱rṣāḥ |
bṛha̱spati̱: sa svā̭ve̱śa ṛ̱ṣvaḥ pu̱rū sakhi̭bhya āsu̱tiṃ kari̭ṣṭhaḥ ||7||
de̱vī de̱vasya̱ roda̭sī̱ jani̭trī̱ bṛha̱spati̭ṃ vāvṛdhaturmahi̱tvā |
da̱kṣāyyā̭ya dakṣatā sakhāya̱: kara̱dbrahma̭ṇe su̱tarā̭ sugā̱dhā ||8||
i̱yaṃ vā̭ṃ brahmaṇaspate suvṛ̱ktirbrahmendrā̭ya va̱jriṇḙ akāri |
a̱vi̱ṣṭaṃ dhiyo̭ jigṛ̱taṃ pura̭ṃdhīrjaja̱stama̱ryo va̱nuṣā̱marā̭tīḥ ||9||
bṛha̭spate yu̱vamindra̭śca̱ vasvo̭ di̱vyasyḙśāthe u̱ta pārthi̭vasya |
dha̱ttaṃ ra̱yiṃ stṷva̱te kī̱rayḙ cidyū̱yaṃ pā̭ta sva̱stibhi̱: sadā̭ naḥ ||10||
7  maitrāvaruṇirvasiṣṭha:| indra:, 7 indrābṛhaspatī | triṣṭup |
adhva̭ryavo'ru̱ṇaṃ du̱gdhama̱ṃśuṃ ju̱hota̭na vṛṣa̱bhāya̭ kṣitī̱nām |
gau̱rādvedī̭yā~ ava̱pāna̱mindro̭ vi̱śvāhedyā̭ti su̱taso̭mami̱cchan ||1||
yadda̭dhi̱ṣe pra̱divi̱ cārvanna̭ṃ di̱vedi̭ve pī̱timida̭sya vakṣi |
 u̱ta hṛ̱dota mana̭sā juṣā̱ṇa u̱śanni̭ndra̱ prasthi̭tānpāhi̱ somā̭n ||2||
ja̱jñā̱naḥ soma̱ṃ saha̭se papātha̱ pra tḙ mā̱tā ma̭hi̱māna̭muvāca |
endra̭ paprātho̱rva1ntari̭kṣaṃ yu̱dhā de̱vebhyo̱ vari̭vaścakartha ||3||
yadyo̱dhayā̭ maha̱to manya̭mānā̱ntsākṣā̭ma̱ tānbā̱hubhi̱: śāśa̭dānān |
yadvā̱ nṛbhi̱rvṛta̭ indrābhi̱yudhyā̱staṃ tvayā̱jiṃ saṷśrava̱saṃ ja̭yema ||4||
prendra̭sya vocaṃ pratha̱mā kṛ̱tāni̱ pra nūta̭nā ma̱ghavā̱ yā ca̱kāra̭ |
ya̱dedadḙvī̱rasa̭hiṣṭa mā̱yā athā̭bhava̱tkeva̭la̱: somo̭ asya ||5||
tave̱daṃ viśva̭ma̱bhita̭: paśa̱vyaṃ1 yatpaśya̭si̱ cakṣa̭sā̱ sūrya̭sya |
gavā̭masi̱ gopa̭ti̱reka̭ indra bhakṣī̱mahi̭ te̱ praya̭tasya̱ vasva̭: ||6||
bṛha̭spate yu̱vamindra̭śca̱ vasvo̭ di̱vyasyḙśāthe u̱ta pārthi̭vasya |
dha̱ttaṃ ra̱yiṃ stṷva̱te kī̱rayḙ cidyū̱yaṃ pā̭ta sva̱stibhi̱: sadā̭ naḥ ||7||
7  maitrāvaruṇirvasiṣṭha:| viṣṇu:, 4-6 indrāviṣṇū | triṣṭup |
pa̱ro mātra̭yā ta̱nvā̭ vṛdhāna̱ na tḙ mahi̱tvamanva̭śnuvanti |
u̱bhe tḙ vidma̱ raja̭sī pṛthi̱vyā viṣṇo̭ deva̱ tvaṃ pa̭ra̱masya̭ vitse ||1||
na tḙ viṣṇo̱ jāya̭māno̱ na jā̱to deva̭ mahi̱mnaḥ para̱manta̭māpa |
uda̭stabhnā̱ nāka̭mṛ̱ṣvaṃ bṛ̱hanta̭ṃ dā̱dhartha̱ prācī̭ṃ ka̱kubha̭ṃ pṛthi̱vyāḥ ||2||
irā̭vatī dhenu̱matī̱ hi bhū̱taṃ sṷ̄yava̱sinī̱ manṷṣe daśa̱syā |
vya̭stabhnā̱ roda̭sī viṣṇave̱te dā̱dhartha̭ pṛthi̱vīma̱bhito̭ ma̱yūkhai̭: ||3||
u̱ruṃ ya̱jñāya̭ cakrathuru lo̱kaṃ ja̱naya̭ntā̱ sūrya̭mu̱ṣāsa̭ma̱gnim |
dāsa̭sya cidvṛṣaśi̱prasya̭ mā̱yā ja̱ghnathṷrnarā pṛta̱nājyḙṣu ||4||
indrā̭viṣṇū dṛṃhi̱tāḥ śamba̭rasya̱ nava̱ puro̭ nava̱tiṃ ca̭ śnathiṣṭam |
śa̱taṃ va̱rcina̭: sa̱hasra̭ṃ ca sā̱kaṃ ha̱tho a̭pra̱tyasṷrasya vī̱rān ||5||
i̱yaṃ ma̭nī̱ṣā bṛ̭ha̱tī bṛ̱hanto̭rukra̱mā ta̱vasā̭ va̱rdhaya̭ntī |
ra̱re vā̱ṃ stoma̭ṃ vi̱dathḙṣu viṣṇo̱ pinva̭ta̱miṣo̭ vṛ̱janḙṣvindra ||6||
vaṣa̭ṭ te viṣṇavā̱sa ā kṛ̭ṇomi̱ tanmḙ juṣasva śipiviṣṭa ha̱vyam |
vardha̭ntu tvā suṣṭu̱tayo̱ giro̭ me yū̱yaṃ pā̭ta sva̱stibhi̱: sadā̭ naḥ ||7||
7 maitrāvaruṇirvasiṣṭha:| viṣṇu:| triṣṭup |
nū marto̭ dayate sani̱ṣyanyo viṣṇa̭va urugā̱yāya̱ dāśa̭t |
pra yaḥ sa̱trācā̱ mana̭sā̱ yajā̭ta e̱tāva̭nta̱ṃ narya̭mā̱vivā̭sāt ||1||
tvaṃ vi̭ṣṇo suma̱tiṃ vi̱śvaja̭nyā̱mapra̭yutāmevayāvo ma̱tiṃ dā̭: |
parco̱ yathā̭ naḥ suvi̱tasya̱ bhūre̱raśvā̭vataḥ puruśca̱ndrasya̭ rā̱yaḥ ||2||
trirde̱vaḥ pṛ̭thi̱vīme̱ṣa e̱tāṃ vi ca̭krame śa̱tarca̭saṃ mahi̱tvā |
pra viṣṇṷrastu ta̱vasa̱stavī̭yāntve̱ṣaṃ hya̭sya̱ sthavi̭rasya̱ nāma̭ ||3||
vi ca̭krame pṛthi̱vīme̱ṣa e̱tāṃ kṣetrā̭ya̱ viṣṇu̱rmanṷṣe daśa̱syan |
dhru̱vāso̭ asya kī̱rayo̱ janā̭sa urukṣi̱tiṃ su̱jani̭mā cakāra ||4||
pra tattḙ a̱dya śi̭piviṣṭa̱ nāmā̱'ryaḥ śa̭ṃsāmi va̱yunā̭ni vi̱dvān |
taṃ tvā̭ gṛṇāmi ta̱vasa̱mata̭vyā̱nkṣaya̭ntama̱sya raja̭saḥ parā̱ke ||5||
kimittḙ viṣṇo pari̱cakṣya̭ṃ bhū̱tpra yadva̭va̱kṣe śi̭pivi̱ṣṭo a̭smi |
mā varpo̭ a̱smadapa̭ gūha e̱tadyada̱nyarṷ̄paḥ sami̱the ba̱bhūtha̭ ||6||
vaṣa̭ṭ te viṣṇavā̱sa ā kṛ̭ṇomi̱ tanmḙ juṣasva śipiviṣṭa ha̱vyam |
vardha̭ntu tvā suṣṭu̱tayo̱ giro̭ me yū̱yaṃ pā̭ta sva̱stibhi̱: sadā̭ naḥ ||7||
6  maitrāvaruṇirvasiṣṭha:| (vṛṣṭikāma ), kumāra āgneyo vā |parjanya:|  triṣṭup |
ti̱sro vāca̱: pra va̭da̱ jyoti̭ragrā̱ yā e̱taddu̱hre ma̭dhudo̱ghamūdha̭: |
sa va̱tsaṃ kṛ̱ṇvangarbha̱moṣa̭dhīnāṃ sa̱dyo jā̱to vṛ̭ṣa̱bho ro̭ravīti ||1||
yo vardha̭na̱ oṣa̭dhīnā̱ṃ yo a̱pāṃ yo viśva̭sya̱ jaga̭to de̱va īśḙ |
sa tri̱dhātṷ śara̱ṇaṃ śarma̭ yaṃsattri̱vartu̱ jyoti̭: svabhi̱ṣṭya1sme ||2||
sta̱rīrṷ tva̱dbhava̭ti̱ sūta̭ u tvadyathāva̱śaṃ ta̱nva̭ṃ cakra e̱ṣaḥ |
pi̱tuḥ paya̱: prati̭ gṛbhṇāti mā̱tā tena̭ pi̱tā va̭rdhate̱ tena̭ pu̱traḥ ||3||
yasmi̱nviśvā̭ni̱ bhuva̭nāni ta̱sthusti̱sro dyāva̭stre̱dhā sa̱srurāpa̭: |
traya̱: kośā̭sa upa̱seca̭nāso̱ madhva̭: ścotantya̱bhito̭ vira̱pśam ||4||
i̱daṃ vaca̭: pa̱rjanyā̭ya sva̱rājḙ hṛ̱do a̱stvanta̭ra̱ṃ tajjṷjoṣat |
ma̱yo̱bhuvo̭ vṛ̱ṣṭaya̭: santva̱sme sṷpippa̱lā oṣa̭dhīrde̱vago̭pāḥ ||5||
sa rḙto̱dhā vṛ̭ṣa̱bhaḥ śaśva̭tīnā̱ṃ tasmi̭nnā̱tmā jaga̭tasta̱sthuṣa̭śca |
tanma̭ ṛ̱taṃ pā̭tu śa̱taśā̭radāya yū̱yaṃ pā̭ta sva̱stibhi̱: sadā̭ naḥ ||6||
3  maitrāvaruṇirvasiṣṭha:|{ vṛṣṭikāma:} kumāra āgneyo vā | parjanya: | gāyatrī, 2 pādanicṛta |
pa̱rjanyā̭ya̱ pra gā̭yata di̱vaspu̱trāya̭ mī̱ḻhuṣḙ | sa no̱ yava̭samicchatu ||1||
yo garbha̱moṣa̭dhīnā̱ṃ gavā̭ṃ kṛ̱ṇotyarva̭tām | pa̱rjanya̭: puru̱ṣīṇā̭m ||2||
tasmā̱ idā̱syḙ ha̱virju̱hotā̱ madhṷmattamam | iḻā̭ṃ naḥ sa̱ṃyata̭ṃ karat ||3||
10 maitrāvaruṇirvasiṣṭha:|maṇḍūkā: { parjanya: } | triṣṭup , 1 anuṣṭup |
sa̱ṃva̱tsa̱raṃ śa̭śayā̱nā brā̭hma̱ṇā vra̭tacā̱riṇa̭: |
vāca̭ṃ pa̱rjanya̭jinvitā̱ṃ pra ma̱ṇḍūkā̭ avādiṣuḥ ||1||
di̱vyā āpo̭ a̱bhi yadḙna̱māya̱ndṛti̱ṃ na śuṣka̭ṃ sara̱sī śayā̭nam |
gavā̱maha̱ na mā̱yurva̱tsinī̭nāṃ ma̱ṇḍūkā̭nāṃ va̱gnuratrā̱ samḙti ||2||
yadī̭menā~ uśa̱to a̱bhyava̭rṣīttṛ̱ṣyāva̭taḥ prā̱vṛṣyāga̭tāyām |
a̱khkha̱lī̱kṛtyā̭ pi̱tara̱ṃ na pu̱tro a̱nyo a̱nyamupa̱ vada̭ntameti ||3||
a̱nyo a̱nyamanṷ gṛbhṇātyenora̱pāṃ pra̭sa̱rge yadama̭ndiṣātām |
ma̱ṇḍūko̱ yada̱bhivṛ̭ṣṭa̱: kani̭ṣka̱npṛśni̭: sampṛ̱ṅkte hari̭tena̱ vāca̭m ||4||
yadḙṣāma̱nyo a̱nyasya̱ vāca̭ṃ śā̱ktasyḙva̱ vada̭ti̱ śikṣa̭māṇaḥ |
sarva̱ṃ tadḙṣāṃ sa̱mṛdhḙva̱ parva̱ yatsu̱vāco̱ vada̭tha̱nādhya̱psu ||5||
gomā̭yu̱reko̭ a̱jamā̭yu̱reka̱: pṛśni̱reko̱ hari̭ta̱ eka̭ eṣām |
sa̱mā̱naṃ nāma̱ bibhra̭to̱ virṷ̄pāḥ puru̱trā vāca̭ṃ pipiśu̱rvada̭ntaḥ ||6||
brā̱hma̱ṇāso̭ atirā̱tre na some̱ saro̱ na pū̱rṇama̱bhito̱ vada̭ntaḥ |
sa̱ṃva̱tsa̱rasya̱ tadaha̱: pari̭ ṣṭha̱ yanma̭ṇḍūkāḥ prāvṛ̱ṣīṇa̭ṃ ba̱bhūva̭ ||7||
brā̱hma̱ṇāsa̭: so̱mino̱ vāca̭makrata̱ brahma̭ kṛ̱ṇvanta̭: parivatsa̱rīṇa̭m |
a̱dhva̱ryavo̭ gha̱rmiṇa̭: siṣvidā̱nā ā̱virbha̭vanti̱ guhyā̱ na ke ci̭t ||8||
de̱vahi̭tiṃ jugupurdvāda̱śasya̭ ṛ̱tuṃ naro̱ na pra mi̭nantye̱te |
sa̱ṃva̱tsa̱re prā̱vṛṣyāga̭tāyāṃ ta̱ptā gha̱rmā a̭śnuvate visa̱rgam ||9||
gomā̭yuradāda̱jamā̭yuradā̱tpṛśni̭radā̱ddhari̭to no̱ vasṷ̄ni |
gavā̭ṃ ma̱ṇḍūkā̱ dada̭taḥ śa̱tāni̭ sahasrasā̱ve pra ti̭ranta̱ āyṷ: ||10||
25  maitrāvaruṇirvasiṣṭha:| {rākṣoghnaṃ} indrāsomau , 8 ,16 ,19 -22  indra:, 9, 12-13 soma:, 10-14 agni:,11 devā:, 17 grāvāṇa:, 18 maruta:, 23 {pūrvārdhasya} vasiṣṭhāśī:, {uttarārdhasya} pṛthivyantarikṣe| triṣṭup , 1-6,18, 21 ,23 jagatī ; 7 jagatī triṣṭubvā,  25 anuṣṭup |
indrā̭somā̱ tapa̭ta̱ṃ rakṣa̭ u̱bjata̱ṃ nya̭rpayataṃ vṛṣaṇā tamo̱vṛdha̭: |
parā̭ śṛṇītama̱cito̱ nyo̭ṣataṃ ha̱taṃ nu̱dethā̱ṃ ni śi̭śītama̱triṇa̭: ||1||
indrā̭somā̱ sama̱ghaśa̭ṃsama̱bhya1ghaṃ tapṷryayastu ca̱rura̭gni̱vā~ i̭va |
bra̱hma̱dviṣḙ kra̱vyādḙ gho̱raca̭kṣase̱ dveṣo̭ dhattamanavā̱yaṃ ki̭mī̱dinḙ ||2||
indrā̭somā du̱ṣkṛto̭ va̱vre a̱ntara̭nārambha̱ṇe tama̭si̱ pra vi̭dhyatam |
yathā̱ nāta̱: puna̱reka̭śca̱nodaya̱ttadvā̭mastu̱ saha̭se manyu̱macchava̭: ||3||
indrā̭somā va̱rtaya̭taṃ di̱vo va̱dhaṃ saṃ pṛ̭thi̱vyā a̱ghaśa̭ṃsāya̱ tarha̭ṇam |
utta̭kṣataṃ sva̱ryaṃ1 parva̭tebhyo̱ yena̱ rakṣo̭ vāvṛdhā̱naṃ ni̱jūrva̭thaḥ ||4||
indrā̭somā va̱rtaya̭taṃ di̱vasparya̭gnita̱ptebhi̭ryu̱vamaśma̭hanmabhiḥ |
tapṷrvadhebhira̱jarḙbhira̱triṇo̱ ni parśā̭ne vidhyata̱ṃ yantṷ nisva̱ram ||5||
indrā̭somā̱ pari̭ vāṃ bhūtu vi̱śvata̭ i̱yaṃ ma̱tiḥ ka̱kṣyāśvḙva vā̱jinā̭ |
yāṃ vā̱ṃ hotrā̭ṃ parihi̱nomi̭ me̱dhaye̱mā brahmā̭ṇi nṛ̱patī̭va jinvatam ||6||
prati̭ smarethāṃ tu̱jaya̭dbhi̱revai̭rha̱taṃ dru̱ho ra̱kṣaso̭ bhaṅgu̱rāva̭taḥ |
indrā̭somā du̱ṣkṛte̱ mā su̱gaṃ bhū̱dyo na̭: ka̱dā ci̭dabhi̱dāsa̭ti dru̱hā ||7||
yo mā̱ pākḙna̱ mana̭sā̱ cara̭ntamabhi̱caṣṭe̱ anṛ̭tebhi̱rvaco̭bhiḥ |
āpa̭ iva kā̱śinā̱ saṃgṛ̭bhītā̱ asa̭nna̱stvāsa̭ta indra va̱ktā ||8||
ye pā̭kaśa̱ṃsaṃ vi̱hara̭nta̱ evai̱rye vā̭ bha̱draṃ dū̱ṣaya̭nti sva̱dhābhi̭: |
aha̭ye vā̱ tānpra̱dadā̭tu̱ soma̱ ā vā̭ dadhātu̱ niṝ̭teru̱pasthḙ ||9||
yo no̱ rasa̱ṃ dipsa̭ti pi̱tvo a̭gne̱ yo aśvā̭nā̱ṃ yo gavā̱ṃ yasta̱nūnā̭m |
ri̱puḥ ste̱naḥ stḙya̱kṛdda̱bhramḙtu̱ ni ṣa hī̭yatāṃ ta̱nvā̱3 tanā̭ ca ||10||
pa̱raḥ so a̭stu ta̱nvā̱3 tanā̭ ca ti̱sraḥ pṛ̭thi̱vīra̱dho a̭stu̱ viśvā̭: |
prati̭ śuṣyatu̱ yaśo̭ asya devā̱ yo no̱ divā̱ dipsa̭ti̱ yaśca̱ nakta̭m ||11||
su̱vi̱jñā̱naṃ ci̭ki̱tuṣe̱ janā̭ya̱ saccāsa̭cca̱ vaca̭sī paspṛdhāte |
tayo̱ryatsa̱tyaṃ ya̭ta̱radṛjī̭ya̱staditsomo̭'vati̱ hantyāsa̭t ||12||
na vā u̱ somo̭ vṛji̱naṃ hi̭noti̱ na kṣa̱triya̭ṃ mithu̱yā dhā̱raya̭ntam |
hanti̱ rakṣo̱ hantyāsa̱dvada̭ntamu̱bhāvindra̭sya̱ prasi̭tau śayāte ||13||
yadi̭ vā̱hamanṛ̭tadeva̱ āsa̱ mogha̭ṃ vā de̱vā~ a̭pyū̱he a̭gne |
kima̱smabhya̭ṃ jātavedo hṛṇīṣe drogha̱vāca̭ste niṝ̱thaṃ sa̭cantām ||14||
a̱dyā mṷrīya̱ yadi̭ yātu̱dhāno̱ asmi̱ yadi̱ vāyṷsta̱tapa̱ pūrṷṣasya |
adhā̱ sa vī̱rairda̱śabhi̱rvi yṷ̄yā̱ yo mā̱ mogha̱ṃ yātṷdhā̱netyāha̭ ||15||
yo māyā̭tu̱ṃ yātṷdhā̱netyāha̱ yo vā̭ ra̱kṣāḥ śuci̭ra̱smītyāha̭ |
indra̱staṃ ha̭ntu maha̱tā va̱dhena̱ viśva̭sya ja̱ntora̭dha̱maspa̭dīṣṭa ||16||
pra yā jigā̭ti kha̱rgalḙva̱ nakta̱mapa̭ dru̱hā ta̱nvaṃ1 gūha̭mānā |
va̱vrā~ a̭na̱ntā~ ava̱ sā pa̭dīṣṭa̱ grāvā̭ṇo ghnantu ra̱kṣasa̭ upa̱bdaiḥ ||17||
vi ti̭ṣṭhadhvaṃ maruto vi̱kṣvi1cchata̭ gṛbhā̱yata̭ ra̱kṣasa̱: saṃ pi̭naṣṭana |
vayo̱ ye bhū̱tvī pa̱taya̭nti na̱ktabhi̱rye vā̱ ripo̭ dadhi̱re de̱ve a̭dhva̱re ||18||
pra va̭rtaya di̱vo aśmā̭namindra̱ soma̭śitaṃ maghava̱ntsaṃ śi̭śādhi |
prāktā̱dapā̭ktādadha̱rāduda̭ktāda̱bhi ja̭hi ra̱kṣasa̱: parva̭tena ||19||
e̱ta u̱ tye pa̭tayanti̱ śvayā̭tava̱ indra̭ṃ dipsanti di̱psavo'dā̭bhyam |
śiśī̭te śa̱kraḥ piśṷnebhyo va̱dhaṃ nū̱naṃ sṛ̭jada̱śani̭ṃ yātu̱madbhya̭: ||20||
indro̭ yātū̱nāma̭bhavatparāśa̱ro ha̭vi̱rmathī̭nāma̱bhyā̱3vivā̭satām |
a̱bhīdṷ śa̱kraḥ pa̭ra̱śuryathā̱ vana̱ṃ pātrḙva bhi̱ndantsa̱ta ḙti ra̱kṣasa̭: ||21||
ulṷ̄kayātuṃ śuśu̱lūka̭yātuṃ ja̱hi śvayā̭tumu̱ta koka̭yātum |
su̱pa̱rṇayā̭tumu̱ta gṛdhra̭yātuṃ dṛ̱ṣadḙva̱ pra mṛ̭ṇa̱ rakṣa̭ indra ||22||
mā no̱ rakṣo̭ a̱bhi na̭ḍyātu̱māva̭tā̱mapo̭cchatu mithu̱nā yā ki̭mī̱dinā̭ |
pṛ̱thi̱vī na̱: pārthi̭vātpā̱tvaṃha̭so̱'ntari̭kṣaṃ di̱vyātpā̭tva̱smān ||23||
indra̭ ja̱hi pumā̭ṃsaṃ yātu̱dhāna̭mu̱ta striya̭ṃ mā̱yayā̱ śāśa̭dānām |
vigrī̭vāso̱ mūra̭devā ṛdantu̱ mā te dṛ̭śa̱ntsūrya̭mu̱ccara̭ntam ||24||
prati̭ cakṣva̱ vi ca̱kṣvendra̭śca soma jāgṛtam | rakṣo̭bhyo va̱dhama̭syatama̱śani̭ṃ yātu̱madbhya̭: ||25||