Rigveda — Mandala 9

10 madhucchandā vaiśvāmitra:| pavamāna: soma: | gāyatrī |
svādi̭ṣṭhayā̱ madi̭ṣṭhayā̱ pava̭sva soma̱ dhāra̭yā | indrā̭ya̱ pāta̭ve su̱taḥ ||1||
ra̱kṣo̱hā vi̱śvaca̭rṣaṇira̱bhi yoni̱mayo̭hatam | druṇā̭ sa̱dhastha̱māsa̭dat ||2||
va̱ri̱vo̱dhāta̭mo bhava̱ maṃhi̭ṣṭho vṛtra̱hanta̭maḥ | parṣi̱ rādho̭ ma̱ghonā̭m ||3||
a̱bhya̭rṣa ma̱hānā̭ṃ de̱vānā̭ṃ vī̱timandha̭sā | a̱bhi vāja̭mu̱ta śrava̭: ||4||
tvāmacchā̭ carāmasi̱ tadidartha̭ṃ di̱vedi̭ve | indo̱ tve na̭ ā̱śasa̭: ||5||
pu̱nāti̭ te pari̱sruta̱ṃ soma̱ṃ sūrya̭sya duhi̱tā | vārḙṇa̱ śaśva̭tā̱ tanā̭ ||6||
tamī̱maṇvī̭: sama̱rya ā gṛ̱bhṇanti̱ yoṣa̭ṇo̱ daśa̭ | svasā̭ra̱: pāryḙ di̱vi ||7||
tamī̭ṃ hinvantya̱gruvo̱ dhama̭nti bāku̱raṃ dṛti̭m | tri̱dhātṷ vāra̱ṇaṃ madhṷ ||8||
a̱bhī̱3mamaghnyā̭ u̱ta śrī̱ṇanti̭ dhe̱nava̱: śiśṷm | soma̱mindrā̭ya̱ pāta̭ve ||9||
a̱syedindro̱ made̱ṣvā viśvā̭ vṛ̱trāṇi̭ jighnate | śūro̭ ma̱ghā ca̭ maṃhate ||10||
10 medhātithi: kāṇva: | pavamāna: soma: | gāyatrī |
pava̭sva deva̱vīrati̭ pa̱vitra̭ṃ soma̱ raṃhyā̭ | indra̭mindo̱ vṛṣā vi̭śa ||1||
ā va̭cyasva̱ mahi̱ psaro̱ vṛṣḙndo dyu̱mnava̭ttamaḥ | ā yoni̭ṃ dharṇa̱siḥ sa̭daḥ ||2||
adhṷkṣata pri̱yaṃ madhu̱ dhārā̭ su̱tasya̭ ve̱dhasa̭: | a̱po va̭siṣṭa su̱kratṷ: ||3||
ma̱hānta̭ṃ tvā ma̱hīranvāpo̭ arṣanti̱ sindha̭vaḥ | yadgobhi̭rvāsayi̱ṣyasḙ ||4||
sa̱mu̱dro a̱psu mā̭mṛje viṣṭa̱mbho dha̱ruṇo̭ di̱vaḥ | soma̭: pa̱vitrḙ asma̱yuḥ ||5||
aci̭krada̱dvṛṣā̱ hari̭rma̱hānmi̱tro na da̭rśa̱taḥ | saṃ sūryḙṇa rocate ||6||
gira̭sta inda̱ oja̭sā marmṛ̱jyantḙ apa̱syuva̭: | yābhi̱rmadā̭ya̱ śumbha̭se ||7||
taṃ tvā̱ madā̭ya̱ ghṛṣva̭ya u lokakṛ̱tnumī̭mahe | tava̱ praśa̭stayo ma̱hīḥ ||8||
a̱smabhya̭mindavindra̱yurmadhva̭: pavasva̱ dhāra̭yā | pa̱rjanyo̭ vṛṣṭi̱mā~ i̭va ||9||
go̱ṣā i̭ndo nṛ̱ṣā a̭syaśva̱sā vā̭ja̱sā u̱ta | ā̱tmā ya̱jñasya̭ pū̱rvyaḥ ||10||
10 ājīgarti: śuna: śepa :, kṛtrimo vaiśvāmitro devarāta: | pavamāna: soma: | gāyatrī |
e̱ṣa de̱vo ama̭rtyaḥ parṇa̱vīri̭va dīyati | a̱bhi droṇā̭nyā̱sada̭m ||1||
e̱ṣa de̱vo vi̱pā kṛ̱to'ti̱ hvarā̭ṃsi dhāvati | pava̭māno̱ adā̭bhyaḥ ||2||
e̱ṣa de̱vo vi̭pa̱nyubhi̱: pava̭māna ṛtā̱yubhi̭: | hari̱rvājā̭ya mṛjyate ||3||
e̱ṣa viśvā̭ni̱ vāryā̱ śūro̱ yanni̭va̱ satva̭bhiḥ | pava̭mānaḥ siṣāsati ||4||
e̱ṣa de̱vo ra̭tharyati̱ pava̭māno daśasyati | ā̱viṣkṛ̭ṇoti vagva̱num ||5||
e̱ṣa viprai̭ra̱bhiṣṭṷto̱'po de̱vo vi gā̭hate | dadha̱dratnā̭ni dā̱śuṣḙ ||6||
e̱ṣa diva̱ṃ vi dhā̭vati ti̱ro rajā̭ṃsi̱ dhāra̭yā | pava̭māna̱: kani̭kradat ||7||
e̱ṣa diva̱ṃ vyāsa̭ratti̱ro rajā̱ṃsyaspṛ̭taḥ | pava̭mānaḥ svadhva̱raḥ ||8||
e̱ṣa pra̱tnena̱ janma̭nā de̱vo de̱vebhya̭: su̱taḥ | hari̭: pa̱vitrḙ arṣati ||9||
e̱ṣa u̱ sya pṷruvra̱to ja̭jñā̱no ja̱naya̱nniṣa̭: | dhāra̭yā pavate su̱taḥ ||10||
10 hiraṇyastūpa āṅgirasa: | pavamāna: soma: | gāyatrī |
sanā̭ ca soma̱ jeṣi̭ ca̱ pava̭māna̱ mahi̱ śrava̭: | athā̭ no̱ vasya̭saskṛdhi ||1||
sanā̱ jyoti̱: sanā̱ sva1rviśvā̭ ca soma̱ saubha̭gā | athā̭ no̱ vasya̭saskṛdhi ||2||
sanā̱ dakṣa̭mu̱ta kratu̱mapa̭ soma̱ mṛdho̭ jahi | athā̭ no̱ vasya̭saskṛdhi ||3||
pavī̭tāraḥ punī̱tana̱ soma̱mindrā̭ya̱ pāta̭ve | athā̭ no̱ vasya̭saskṛdhi ||4||
tvaṃ sūryḙ na̱ ā bha̭ja̱ tava̱ kratvā̱ tavo̱tibhi̭: | athā̭ no̱ vasya̭saskṛdhi ||5||
tava̱ kratvā̱ tavo̱tibhi̱rjyokpa̭śyema̱ sūrya̭m | athā̭ no̱ vasya̭saskṛdhi ||6||
a̱bhya̭rṣa svāyudha̱ soma̭ dvi̱barha̭saṃ ra̱yim | athā̭ no̱ vasya̭saskṛdhi ||7||
a̱bhya1rṣāna̭pacyuto ra̱yiṃ sa̱matsṷ sāsa̱hiḥ | athā̭ no̱ vasya̭saskṛdhi ||8||
tvāṃ ya̱jñaira̭vīvṛdha̱npava̭māna̱ vidha̭rmaṇi | athā̭ no̱ vasya̭saskṛdhi ||9||
ra̱yiṃ na̭ści̱trama̱śvina̱mindo̭ vi̱śvāyu̱mā bha̭ra | athā̭ no̱ vasya̭saskṛdhi ||10||
11   kāśyapo'sito devalo vā | pavamāna: soma: | gāyatrī |
sami̭ddho vi̱śvata̱spati̱: pava̭māno̱ vi rā̭jati | prī̱ṇanvṛṣā̱ kani̭kradat ||1||
tanū̱napā̱tpava̭māna̱: śṛṅge̱ śiśā̭no arṣati | a̱ntari̭kṣeṇa̱ rāra̭jat ||2||
ī̱ḻenya̱: pava̭māno ra̱yirvi rā̭jati dyu̱mān | madho̱rdhārā̭bhi̱roja̭sā ||3||
ba̱rhiḥ prā̱cīna̱moja̭sā̱ pava̭mānaḥ stṛ̱ṇanhari̭: | de̱veṣṷ de̱va ī̭yate ||4||
udātai̭rjihate bṛ̱haddvāro̭ de̱vīrhi̭ra̱ṇyayī̭: | pava̭mānena̱ suṣṭṷtāḥ ||5||
su̱śi̱lpe bṛ̭ha̱tī ma̱hī pava̭māno vṛṣaṇyati | nakto̱ṣāsā̱ na da̭rśa̱te ||6||
u̱bhā de̱vā nṛ̱cakṣa̭sā̱ hotā̭rā̱ daivyā̭ huve | pava̭māna̱ indro̱ vṛṣā̭ ||7||
bhāra̭tī̱ pava̭mānasya̱ sara̭sva̱tīḻā̭ ma̱hī | i̱maṃ no̭ ya̱jñamā ga̭manti̱sro de̱vīḥ su̱peśa̭saḥ ||8||
tvaṣṭā̭ramagra̱jāṃ go̱pāṃ pṷro̱yāvā̭na̱mā hṷve | indu̱rindro̱ vṛṣā̱ hari̱: pava̭mānaḥ pra̱jāpa̭tiḥ ||9||
vana̱spati̭ṃ pavamāna̱ madhvā̱ sama̭ṅgdhi̱ dhāra̭yā | sa̱hasra̭valśa̱ṃ hari̭ta̱ṃ bhrāja̭mānaṃ hira̱ṇyaya̭m ||10||
viśvḙ devā̱: svāhā̭kṛti̱ṃ pava̭māna̱syā ga̭ta | vā̱yurbṛha̱spati̱: sūryo̱'gnirindra̭: sa̱joṣa̭saḥ ||11||
9 kāśyapo'sito devalo vā | pavamāna: soma: | gāyatrī |
ma̱ndrayā̭ soma̱ dhāra̭yā̱ vṛṣā̭ pavasva deva̱yuḥ | avyo̱ vārḙṣvasma̱yuḥ ||1||
a̱bhi tyaṃ madya̱ṃ mada̱minda̱vindra̱ iti̭ kṣara | a̱bhi vā̱jino̱ arva̭taḥ ||2||
a̱bhi tyaṃ pū̱rvyaṃ mada̭ṃ suvā̱no a̭rṣa pa̱vitra̱ ā | a̱bhi vāja̭mu̱ta śrava̭: ||3||
anṷ dra̱psāsa̱ inda̭va̱ āpo̱ na pra̱vatā̭saran | pu̱nā̱nā indra̭māśata ||4||
yamatya̭miva vā̱jina̭ṃ mṛ̱janti̱ yoṣa̭ṇo̱ daśa̭ | vane̱ krīḻa̭nta̱matya̭vim ||5||
taṃ gobhi̱rvṛṣa̭ṇa̱ṃ rasa̱ṃ madā̭ya de̱vavī̭taye | su̱taṃ bharā̭ya̱ saṃ sṛ̭ja ||6||
de̱vo de̱vāya̱ dhāra̱yendrā̭ya pavate su̱taḥ | payo̱ yada̭sya pī̱paya̭t ||7||
ā̱tmā ya̱jñasya̱ raṃhyā̭ suṣvā̱ṇaḥ pa̭vate su̱taḥ | pra̱tnaṃ ni pā̭ti̱ kāvya̭m ||8||
e̱vā pṷnā̱na i̭ndra̱yurmada̭ṃ madiṣṭha vī̱tayḙ | guhā̭ ciddadhiṣe̱ gira̭: ||9||
9 kāśyapo'sito devalo vā | pavamāna: soma: | gāyatrī |
asṛ̭gra̱minda̭vaḥ pa̱thā dharma̭nnṛ̱tasya̭ su̱śriya̭: | vi̱dā̱nā a̭sya̱ yoja̭nam ||1||
pra dhārā̱ madhvo̭ agri̱yo ma̱hīra̱po vi gā̭hate | ha̱virha̱viṣṣu̱ vandya̭: ||2||
pra yu̱jo vā̱co a̭gri̱yo vṛṣāva̭ cakrada̱dvanḙ | sadmā̱bhi sa̱tyo a̭dhva̱raḥ ||3||
pari̱ yatkāvyā̭ ka̱virnṛ̱mṇā vasā̭no̱ arṣa̭ti | sva̭rvā̱jī si̭ṣāsati ||4||
pava̭māno a̱bhi spṛdho̱ viśo̱ rājḙva sīdati | yadī̭mṛ̱ṇvanti̭ ve̱dhasa̭: ||5||
avyo̱ vāre̱ pari̭ pri̱yo hari̱rvanḙṣu sīdati | re̱bho va̭nuṣyate ma̱tī ||6||
sa vā̱yumindra̭ma̱śvinā̭ sā̱kaṃ madḙna gacchati | raṇā̱ yo a̭sya̱ dharma̭bhiḥ ||7||
ā mi̱trāvarṷṇā̱ bhaga̱ṃ madhva̭: pavanta ū̱rmaya̭: | vi̱dā̱nā a̭sya̱ śakma̭bhiḥ ||8||
a̱smabhya̭ṃ rodasī ra̱yiṃ madhvo̱ vāja̭sya sā̱tayḙ | śravo̱ vasṷ̄ni̱ saṃ ji̭tam ||9||
9 kāśyapo'sito devalo vā | pavamāna: soma: | gāyatrī |
e̱te somā̭ a̱bhi pri̱yamindra̭sya̱ kāma̭makṣaran | vardha̭nto asya vī̱rya̭m ||1||
pu̱nā̱nāsa̭ścamū̱ṣado̱ gaccha̭nto vā̱yuma̱śvinā̭ | te no̭ dhāntu su̱vīrya̭m ||2||
indra̭sya soma̱ rādha̭se punā̱no hārdi̭ codaya | ṛ̱tasya̱ yoni̭mā̱sada̭m ||3||
mṛ̱janti̭ tvā̱ daśa̱ kṣipo̭ hi̱nvanti̭ sa̱pta dhī̱taya̭: | anu̱ viprā̭ amādiṣuḥ ||4||
de̱vebhya̭stvā̱ madā̭ya̱ kaṃ sṛ̭jā̱namati̭ me̱ṣya̭: | saṃ gobhi̭rvāsayāmasi ||5||
pu̱nā̱naḥ ka̱laśe̱ṣvā vastrā̭ṇyaru̱ṣo hari̭: | pari̱ gavyā̭nyavyata ||6||
ma̱ghona̱ ā pa̭vasva no ja̱hi viśvā̱ apa̱ dviṣa̭: | indo̱ sakhā̭ya̱mā vi̭śa ||7||
vṛ̱ṣṭiṃ di̱vaḥ pari̭ srava dyu̱mnaṃ pṛ̭thi̱vyā adhi̭ | saho̭ naḥ soma pṛ̱tsu dhā̭: ||8||
nṛ̱cakṣa̭saṃ tvā va̱yamindra̭pītaṃ sva̱rvida̭m | bha̱kṣī̱mahi̭ pra̱jāmiṣa̭m ||9||
9 kāśyapo'sito devalo vā | pavamāna: soma: | gāyatrī |
pari̭ pri̱yā di̱vaḥ ka̱virvayā̭ṃsi na̱ptyo̭rhi̱taḥ | su̱vā̱no yā̭ti ka̱vikra̭tuḥ ||1||
prapra̱ kṣayā̭ya̱ panya̭se̱ janā̭ya̱ juṣṭo̭ a̱druhḙ | vī̱tya̭rṣa̱ cani̭ṣṭhayā ||2||
sa sū̱nurmā̱tarā̱ śuci̭rjā̱to jā̱te a̭rocayat | ma̱hānma̱hī ṛ̭tā̱vṛdhā̭ ||3||
sa sa̱pta dhī̱tibhi̭rhi̱to na̱dyo̭ ajinvada̱druha̭: | yā eka̱makṣi̭ vāvṛ̱dhuḥ ||4||
tā a̱bhi santa̱mastṛ̭taṃ ma̱he yuvā̭na̱mā da̭dhuḥ | indṷmindra̱ tava̭ vra̱te ||5||
a̱bhi vahni̱rama̭rtyaḥ sa̱pta pa̭śyati̱ vāva̭hiḥ | krivi̭rde̱vīra̭tarpayat ||6||
avā̱ kalpḙṣu naḥ puma̱stamā̭ṃsi soma̱ yodhyā̭ | tāni̭ punāna jaṅghanaḥ ||7||
nū navya̭se̱ navī̭yase sū̱ktāya̭ sādhayā pa̱thaḥ | pra̱tna̱vadro̭cayā̱ ruca̭: ||8||
pava̭māna̱ mahi̱ śravo̱ gāmaśva̭ṃ rāsi vī̱rava̭t | sanā̭ me̱dhāṃ sanā̱ sva̭: ||9||
9 kāśyapo'sito devalo vā | pavamāna: soma: | gāyatrī |
pra svā̱nāso̱ rathā̭ i̱vā'rva̭nto̱ na śra̭va̱syava̭: | somā̭so rā̱ye a̭kramuḥ ||1||
hi̱nvā̱nāso̱ rathā̭ iva dadhanvi̱re gabha̭styoḥ | bharā̭saḥ kā̱riṇā̭miva ||2||
rājā̭no̱ na praśa̭stibhi̱: somā̭so̱ gobhi̭rañjate | ya̱jño na sa̱pta dhā̱tṛbhi̭: ||3||
pari̭ suvā̱nāsa̱ inda̭vo̱ madā̭ya ba̱rhaṇā̭ gi̱rā | su̱tā a̭rṣanti̱ dhāra̭yā ||4||
ā̱pā̱nāso̭ vi̱vasva̭to̱ jana̭nta u̱ṣaso̱ bhaga̭m | sūrā̱ aṇva̱ṃ vi ta̭nvate ||5||
apa̱ dvārā̭ matī̱nāṃ pra̱tnā ṛ̭ṇvanti kā̱rava̭: | vṛṣṇo̱ hara̭sa ā̱yava̭: ||6||
sa̱mī̱cī̱nāsa̭ āsate̱ hotā̭raḥ sa̱ptajā̭mayaḥ | pa̱dameka̭sya̱ pipra̭taḥ ||7||
nābhā̱ nābhi̭ṃ na̱ ā da̭de̱ cakṣṷści̱tsūrye̱ sacā̭ | ka̱verapa̭tya̱mā dṷhe ||8||
a̱bhi pri̱yā di̱vaspa̱dama̭dhva̱ryubhi̱rguhā̭ hi̱tam | sūra̭: paśyati̱ cakṣa̭sā ||9||
9   kāśyapo'sito devalo vā | pavamāna: soma: | gāyatrī |
upā̭smai gāyatā nara̱: pava̭mānā̱yenda̭ve | a̱bhi de̱vā~ iya̭kṣate ||1||
a̱bhi te̱ madhṷnā̱ payo'tha̭rvāṇo aśiśrayuḥ | de̱vaṃ de̱vāya̭ deva̱yu ||2||
sa na̭: pavasva̱ śaṃ gave̱ śaṃ janā̭ya̱ śamarva̭te | śaṃ rā̭ja̱nnoṣa̭dhībhyaḥ ||3||
ba̱bhrave̱ nu svata̭vase'ru̱ṇāya̭ divi̱spṛśḙ | somā̭ya gā̱thama̭rcata ||4||
hasta̭cyutebhi̱radri̭bhiḥ su̱taṃ soma̭ṃ punītana | madhā̱vā dhā̭vatā̱ madhṷ ||5||
nama̱sedupa̭ sīdata da̱dhneda̱bhi śrī̭ṇītana | indu̱mindrḙ dadhātana ||6||
a̱mi̱tra̱hā vica̭rṣaṇi̱: pava̭sva soma̱ śaṃ gavḙ | de̱vebhyo̭ anukāma̱kṛt ||7||
indrā̭ya soma̱ pāta̭ve̱ madā̭ya̱ pari̭ ṣicyase | ma̱na̱ścinmana̭sa̱spati̭: ||8||
pava̭māna su̱vīrya̭ṃ ra̱yiṃ so̭ma rirīhi naḥ | inda̱vindrḙṇa no yu̱jā ||9||
9   kāśyapo'sito devalo vā | pavamāna: soma: | gāyatrī |
somā̭ asṛgra̱minda̭vaḥ su̱tā ṛ̱tasya̱ sāda̭ne | indrā̭ya̱ madhṷmattamāḥ ||1||
a̱bhi viprā̭ anūṣata̱ gāvo̭ va̱tsaṃ na mā̱tara̭: | indra̱ṃ soma̭sya pī̱tayḙ ||2||
ma̱da̱cyutkṣḙti̱ sāda̭ne̱ sindho̭rū̱rmā vi̭pa̱ścit | somo̭ gau̱rī adhi̭ śri̱taḥ ||3||
di̱vo nābhā̭ vicakṣa̱ṇo'vyo̱ vārḙ mahīyate | somo̱ yaḥ su̱kratṷ: ka̱viḥ ||4||
yaḥ soma̭: ka̱laśe̱ṣvā~ a̱ntaḥ pa̱vitra̱ āhi̭taḥ | tamindu̱: pari̭ ṣasvaje ||5||
pra vāca̱mindṷriṣyati samu̱drasyādhi̭ vi̱ṣṭapi̭ | jinva̱nkośa̭ṃ madhu̱ścuta̭m ||6||
nitya̭stotro̱ vana̱spati̭rdhī̱nāma̱ntaḥ sa̭ba̱rdugha̭: | hi̱nvā̱no mānṷṣā yu̱gā ||7||
a̱bhi pri̱yā di̱vaspa̱dā somo̭ hinvā̱no a̭rṣati | vipra̭sya̱ dhāra̭yā ka̱viḥ ||8||
ā pa̭vamāna dhāraya ra̱yiṃ sa̱hasra̭varcasam | a̱sme i̭ndo svā̱bhuva̭m ||9||
9   kāśyapo'sito devalo vā | pavamāna: soma: | gāyatrī |
soma̭: punā̱no a̭rṣati sa̱hasra̭dhāro̱ atya̭viḥ | vā̱yorindra̭sya niṣkṛ̱tam ||1||
pava̭mānamavasyavo̱ vipra̭ma̱bhi pra gā̭yata | su̱ṣvā̱ṇaṃ de̱vavī̭taye ||2||
pava̭nte̱ vāja̭sātaye̱ somā̭: sa̱hasra̭pājasaḥ | gṛ̱ṇā̱nā de̱vavī̭taye ||3||
u̱ta no̱ vāja̭sātaye̱ pava̭sva bṛha̱tīriṣa̭: | dyu̱madi̭ndo su̱vīrya̭m ||4||
te na̭: saha̱sriṇa̭ṃ ra̱yiṃ pava̭ntā̱mā su̱vīrya̭m | su̱vā̱nā de̱vāsa̱ inda̭vaḥ ||5||
atyā̭ hiyā̱nā na he̱tṛbhi̱rasṛ̭gra̱ṃ vāja̭sātaye | vi vāra̱mavya̭mā̱śava̭: ||6||
vā̱śrā a̭rṣa̱ntīnda̭vo̱'bhi va̱tsaṃ na dhe̱nava̭: | da̱dha̱nvi̱re gabha̭styoḥ ||7||
juṣṭa̱ indrā̭ya matsa̱raḥ pava̭māna̱ kani̭kradat | viśvā̱ apa̱ dviṣo̭ jahi ||8||
a̱pa̱ghnanto̱ arā̭vṇa̱: pava̭mānāḥ sva̱rdṛśa̭: | yonā̭vṛ̱tasya̭ sīdata ||9||
8   kāśyapo'sito devalo vā | pavamāna: soma: | gāyatrī |
pari̱ prāsi̭ṣyadatka̱viḥ sindho̭rū̱rmāvadhi̭ śri̱taḥ | kā̱raṃ bibhra̭tpuru̱spṛha̭m ||1||
gi̱rā yadī̱ saba̭ndhava̱: pañca̱ vrātā̭ apa̱syava̭: | pa̱ri̱ṣkṛ̱ṇvanti̭ dharṇa̱sim ||2||
āda̭sya śu̱ṣmiṇo̱ rase̱ viśvḙ de̱vā a̭matsata | yadī̱ gobhi̭rvasā̱yatḙ ||3||
ni̱ri̱ṇā̱no vi dhā̭vati̱ jaha̱ccharyā̭ṇi̱ tānvā̭ | atrā̱ saṃ ji̭ghnate yu̱jā ||4||
na̱ptībhi̱ryo vi̱vasva̭taḥ śu̱bhro na mā̭mṛ̱je yuvā̭ | gāḥ kṛ̭ṇvā̱no na ni̱rṇija̭m ||5||
ati̭ śri̱tī ti̭ra̱ścatā̭ ga̱vyā ji̭gā̱tyaṇvyā̭ | va̱gnumi̭yarti̱ yaṃ vi̱de ||6||
a̱bhi kṣipa̱: sama̭gmata ma̱rjaya̭ntīri̱ṣaspati̭m | pṛ̱ṣṭhā gṛ̭bhṇata vā̱jina̭: ||7||
pari̭ di̱vyāni̱ marmṛ̭śa̱dviśvā̭ni soma̱ pārthi̭vā | vasṷ̄ni yāhyasma̱yuḥ ||8||
8   kāśyapo'sito devalo vā | pavamāna: soma: | gāyatrī |
e̱ṣa dhi̱yā yā̱tyaṇvyā̱ śūro̱ rathḙbhirā̱śubhi̭: | gaccha̱nnindra̭sya niṣkṛ̱tam ||1 ||
e̱ṣa pu̱rū dhi̭yāyate bṛha̱te de̱vatā̭taye | yatrā̱mṛtā̭sa̱ āsa̭te ||2||
e̱ṣa hi̱to vi nī̭yate̱'ntaḥ śu̱bhrāva̭tā pa̱thā | yadī̭ tu̱ñjanti̱ bhūrṇa̭yaḥ ||3||
e̱ṣa śṛṅgā̭ṇi̱ dodhṷva̱cchiśī̭te yū̱thyo̱3 vṛṣā̭ | nṛ̱mṇā dadhā̭na̱ oja̭sā ||4||
e̱ṣa ru̱kmibhi̭rīyate vā̱jī śu̱bhrebhi̭ra̱ṃśubhi̭: | pati̱: sindhṷ̄nā̱ṃ bhava̭n ||5||
e̱ṣa vasṷ̄ni pibda̱nā parṷṣā yayi̱vā~ ati̭ | ava̱ śādḙṣu gacchati ||6||
e̱taṃ mṛ̭janti̱ marjya̱mupa̱ droṇḙṣvā̱yava̭: | pra̱ca̱krā̱ṇaṃ ma̱hīriṣa̭: ||7||
e̱tamu̱ tyaṃ daśa̱ kṣipo̭ mṛ̱janti̭ sa̱pta dhī̱taya̭: | svā̱yu̱dhaṃ ma̱dinta̭mam ||8||
8   kāśyapo'sito devalo vā | pavamāna: soma: | gāyatrī |
pra tḙ so̱tāra̭ o̱ṇyo̱3 rasa̱ṃ madā̭ya̱ ghṛṣva̭ye | sargo̱ na ta̱ktyeta̭śaḥ ||1||
kratvā̱ dakṣa̭sya ra̱thya̭ma̱po vasā̭na̱mandha̭sā | go̱ṣāmaṇvḙṣu saścima ||2||
ana̭ptama̱psu du̱ṣṭara̱ṃ soma̭ṃ pa̱vitra̱ ā sṛ̭ja | pu̱nī̱hīndrā̭ya̱ pāta̭ve ||3||
pra pṷnā̱nasya̱ ceta̭sā̱ soma̭: pa̱vitrḙ arṣati | kratvā̭ sa̱dhastha̱māsa̭dat ||4||
pra tvā̱ namo̭bhi̱rinda̭va̱ indra̱ somā̭ asṛkṣata | ma̱he bharā̭ya kā̱riṇa̭: ||5||
pu̱nā̱no rū̱pe a̱vyaye̱ viśvā̱ arṣa̭nna̱bhi śriya̭: | śūro̱ na goṣṷ tiṣṭhati ||6||
di̱vo na sānṷ pi̱pyuṣī̱ dhārā̭ su̱tasya̭ ve̱dhasa̭: | vṛthā̭ pa̱vitrḙ arṣati ||7||
tvaṃ so̭ma vipa̱ścita̱ṃ tanā̭ punā̱na ā̱yuṣṷ | avyo̱ vāra̱ṃ vi dhā̭vasi ||8||
8   kāśyapo'sito devalo vā | pavamāna: soma: | gāyatrī |
pra ni̱mnenḙva̱ sindha̭vo̱ ghnanto̭ vṛ̱trāṇi̱ bhūrṇa̭yaḥ | somā̭ asṛgramā̱śava̭: ||1||
a̱bhi sṷvā̱nāsa̱ inda̭vo vṛ̱ṣṭaya̭: pṛthi̱vīmi̭va | indra̱ṃ somā̭so akṣaran ||2||
atyṷ̄rmirmatsa̱ro mada̱: soma̭: pa̱vitrḙ arṣati | vi̱ghnanrakṣā̭ṃsi deva̱yuḥ ||3||
ā ka̱laśḙṣu dhāvati pa̱vitre̱ pari̭ ṣicyate | u̱kthairya̱jñeṣṷ vardhate ||4||
ati̱ trī so̭ma roca̱nā roha̱nna bhrā̭jase̱ diva̭m | i̱ṣṇantsūrya̱ṃ na co̭dayaḥ ||5||
a̱bhi viprā̭ anūṣata mū̱rdhanya̱jñasya̭ kā̱rava̭: | dadhā̭nā̱ścakṣa̭si pri̱yam ||6||
tamṷ tvā vā̱jina̱ṃ naro̭ dhī̱bhirviprā̭ ava̱syava̭: | mṛ̱janti̭ de̱vatā̭taye ||7||
madho̱rdhārā̱manṷ kṣara tī̱vraḥ sa̱dhastha̱māsa̭daḥ | cārṷṝ̱tāya̭ pī̱tayḙ ||8||
7   kāśyapo'sito devalo vā | pavamāna: soma: | gāyatrī |
pari̭ suvā̱no gi̭ri̱ṣṭhāḥ pa̱vitre̱ somo̭ akṣāḥ | madḙṣu sarva̱dhā a̭si ||1||
tvaṃ vipra̱stvaṃ ka̱virmadhu̱ pra jā̱tamandha̭saḥ | madḙṣu sarva̱dhā a̭si ||2||
tava̱ viśvḙ sa̱joṣa̭so de̱vāsa̭: pī̱timā̭śata | madḙṣu sarva̱dhā a̭si ||3||
ā yo viśvā̭ni̱ vāryā̱ vasṷ̄ni̱ hasta̭yorda̱dhe | madḙṣu sarva̱dhā a̭si ||4||
ya i̱me roda̭sī ma̱hī saṃ mā̱tarḙva̱ doha̭te | madḙṣu sarva̱dhā a̭si ||5||
pari̱ yo roda̭sī u̱bhe sa̱dyo vājḙbhi̱rarṣa̭ti | madḙṣu sarva̱dhā a̭si ||6||
sa śu̱ṣmī ka̱laśe̱ṣvā pṷnā̱no a̭cikradat | madḙṣu sarva̱dhā a̭si ||7||
7   kāśyapo'sito devalo vā | pavamāna: soma: | gāyatrī |
yatso̭ma ci̱tramu̱kthya̭ṃ di̱vyaṃ pārthi̭va̱ṃ vasṷ | tanna̭: punā̱na ā bha̭ra ||1||
yu̱vaṃ hi sthaḥ sva̭rpatī̱ indra̭śca soma̱ gopa̭tī | ī̱śā̱nā pi̭pyata̱ṃ dhiya̭: ||2||
vṛṣā̭ punā̱na ā̱yuṣṷ sta̱naya̱nnadhi̭ ba̱rhiṣi̭ | hari̱: sanyoni̱māsa̭dat ||3||
avā̭vaśanta dhī̱tayo̭ vṛṣa̱bhasyādhi̱ reta̭si | sū̱norva̱tsasya̭ mā̱tara̭: ||4||
ku̱vidvṛ̭ṣa̱ṇyantī̭bhyaḥ punā̱no garbha̭mā̱dadha̭t | yāḥ śu̱kraṃ dṷha̱te paya̭: ||5||
upa̭ śikṣāpata̱sthuṣo̭ bhi̱yasa̱mā dhḙhi̱ śatrṷṣu | pava̭māna vi̱dā ra̱yim ||6||
ni śatro̭: soma̱ vṛṣṇya̱ṃ ni śuṣma̱ṃ ni vaya̭stira | dū̱re vā̭ sa̱to anti̭ vā ||7||
7   kāśyapo'sito devalo vā | pavamāna: soma: | gāyatrī |
pra ka̱virde̱vavī̭ta̱ye'vyo̱ vārḙbhirarṣati | sā̱hvānviśvā̭ a̱bhi spṛdha̭: ||1||
sa hi ṣmā̭ jari̱tṛbhya̱ ā vāja̱ṃ goma̭nta̱minva̭ti | pava̭mānaḥ saha̱sriṇa̭m ||2||
pari̱ viśvā̭ni̱ ceta̭sā mṛ̱śase̱ pava̭se ma̱tī | sa na̭: soma̱ śravo̭ vidaḥ ||3||
a̱bhya̭rṣa bṛ̱hadyaśo̭ ma̱ghava̭dbhyo dhru̱vaṃ ra̱yim | iṣa̭ṃ sto̱tṛbhya̱ ā bha̭ra ||4||
tvaṃ rājḙva suvra̱to gira̭: so̱mā vi̭veśitha | pu̱nā̱no va̭hne adbhuta ||5||
sa vahni̭ra̱psu du̱ṣṭaro̭ mṛ̱jyamā̭no̱ gabha̭styoḥ | soma̭śca̱mūṣṷ sīdati ||6||
krī̱ḻurma̱kho na ma̭ṃha̱yuḥ pa̱vitra̭ṃ soma gacchasi | dadha̭tsto̱tre su̱vīrya̭m ||7||
7   kāśyapo'sito devalo vā | pavamāna: soma: | gāyatrī |
e̱te dhā̭va̱ntīnda̭va̱: somā̱ indrā̭ya̱ ghṛṣva̭yaḥ | ma̱tsa̱rāsa̭: sva̱rvida̭: ||1||
pra̱vṛ̱ṇvanto̭ abhi̱yuja̱: suṣva̭ye varivo̱vida̭: | sva̱yaṃ sto̱tre va̭ya̱skṛta̭: ||2||
vṛthā̱ krīḻa̭nta̱ inda̭vaḥ sa̱dhastha̭ma̱bhyeka̱mit | sindho̭rū̱rmā vya̭kṣaran ||3||
e̱te viśvā̭ni̱ vāryā̱ pava̭mānāsa āśata | hi̱tā na sapta̭yo̱ rathḙ ||4||
āsmi̭npi̱śaṅga̭mindavo̱ dadhā̭tā ve̱namā̱diśḙ | yo a̱smabhya̱marā̭vā ||5||
ṛ̱bhurna rathya̱ṃ nava̱ṃ dadhā̭tā̱ keta̭mā̱diśḙ | śu̱krāḥ pa̭vadhva̱marṇa̭sā ||6||
e̱ta u̱ tye a̭vīvaśa̱nkāṣṭhā̭ṃ vā̱jino̭ akrata | sa̱taḥ prāsā̭viṣurma̱tim ||7||
7   kāśyapo'sito devalo vā | pavamāna: soma: | gāyatrī |
e̱te somā̭sa ā̱śavo̱ rathā̭ iva̱ pra vā̱jina̭: | sargā̭: sṛ̱ṣṭā a̭heṣata ||1||
e̱te vātā̭ ivo̱rava̭: pa̱rjanya̭syeva vṛ̱ṣṭaya̭: | a̱gneri̭va bhra̱mā vṛthā̭ ||2||
e̱te pū̱tā vi̭pa̱ścita̱: somā̭so̱ dadhyā̭śiraḥ | vi̱pā vyā̭naśu̱rdhiya̭: ||3||
e̱te mṛ̱ṣṭā ama̭rtyāḥ sasṛ̱vāṃso̱ na śa̭śramuḥ | iya̭kṣantaḥ pa̱tho raja̭: ||4||
e̱te pṛ̱ṣṭhāni̱ roda̭sorvipra̱yanto̱ vyā̭naśuḥ | u̱tedamṷtta̱maṃ raja̭: ||5||
tantṷṃ tanvā̱namṷtta̱mamanṷ pra̱vata̭ āśata | u̱tedamṷtta̱māyya̭m ||6||
tvaṃ so̭ma pa̱ṇibhya̱ ā vasu̱ gavyā̭ni dhārayaḥ | ta̱taṃ tantṷmacikradaḥ ||7||
7   kāśyapo'sito devalo vā | pavamāna: soma: | gāyatrī |
somā̭ asṛgramā̱śavo̱ madho̱rmada̭sya̱ dhāra̭yā | a̱bhi viśvā̭ni̱ kāvyā̭ ||1||
anṷ pra̱tnāsa̭ ā̱yava̭: pa̱daṃ navī̭yo akramuḥ | ru̱ce ja̭nanta̱ sūrya̭m ||2||
ā pa̭vamāna no bharā̱'ryo adā̭śuṣo̱ gaya̭m | kṛ̱dhi pra̱jāva̭tī̱riṣa̭: ||3||
a̱bhi somā̭sa ā̱yava̱: pava̭nte̱ madya̱ṃ mada̭m | a̱bhi kośa̭ṃ madhu̱ścuta̭m ||4||
somo̭ arṣati dharṇa̱sirdadhā̭na indri̱yaṃ rasa̭m | su̱vīro̭ abhiśasti̱pāḥ ||5||
indrā̭ya soma pavase de̱vebhya̭: sadha̱mādya̭: | indo̱ vāja̭ṃ siṣāsasi ||6||
a̱sya pī̱tvā madā̭nā̱mindro̭ vṛ̱trāṇya̭pra̱ti | ja̱ghāna̭ ja̱ghana̭cca̱ nu ||7||
7   kāśyapo'sito devalo vā | pavamāna: soma: | gāyatrī |
pra somā̭so adhanviṣu̱: pava̭mānāsa̱ inda̭vaḥ | śrī̱ṇā̱nā a̱psu mṛ̭ñjata ||1
a̱bhi gāvo̭ adhanviṣu̱rāpo̱ na pra̱vatā̭ ya̱tīḥ | pu̱nā̱nā indra̭māśata ||2||
pra pa̭vamāna dhanvasi̱ somendrā̭ya̱ pāta̭ve | nṛbhi̭rya̱to vi nī̭yase ||3||
tvaṃ so̭ma nṛ̱māda̭na̱: pava̭sva carṣaṇī̱sahḙ | sasni̱ryo a̭nu̱mādya̭: ||4||
indo̱ yadadri̭bhiḥ su̱taḥ pa̱vitra̭ṃ pari̱dhāva̭si | ara̱mindra̭sya̱ dhāmnḙ ||5||
pava̭sva vṛtrahantamo̱kthebhi̭ranu̱mādya̭: | śuci̭: pāva̱ko adbhṷtaḥ ||6||
śuci̭: pāva̱ka ṷcyate̱ soma̭: su̱tasya̱ madhva̭: | de̱vā̱vīra̭ghaśaṃsa̱hā ||7||
6 dṛḻahacyuta āgastya: | pavamāna: soma: | gāyatrī |
pava̭sva dakṣa̱sādha̭no de̱vebhya̭: pī̱tayḙ hare | ma̱rudbhyo̭ vā̱yave̱ mada̭: ||1||
pava̭māna dhi̱yā hi̱to̱3'bhi yoni̱ṃ kani̭kradat | dharma̭ṇā vā̱yumā vi̭śa ||2||
saṃ de̱vaiḥ śo̭bhate̱ vṛṣā̭ ka̱viryonā̱vadhi̭ pri̱yaḥ | vṛ̱tra̱hā dḙva̱vīta̭maḥ ||3||
viśvā̭ rū̱pāṇyā̭vi̱śanpṷnā̱no yā̭ti harya̱taḥ | yatrā̱mṛtā̭sa̱ āsa̭te ||4||
a̱ru̱ṣo ja̱naya̱ngira̱: soma̭: pavata āyu̱ṣak | indra̱ṃ gaccha̭nka̱vikra̭tuḥ ||5||
ā pa̭vasva madintama pa̱vitra̱ṃ dhāra̭yā kave | a̱rkasya̱ yoni̭mā̱sada̭m ||6||
6 idhmavāho dārḍhacyuta:  | pavamāna: soma: | gāyatrī |
tama̭mṛkṣanta vā̱jina̭mu̱pasthe̱ adi̭te̱radhi̭ | viprā̭so̱ aṇvyā̭ dhi̱yā ||1||
taṃ gāvo̭ a̱bhya̭nūṣata sa̱hasra̭dhāra̱makṣi̭tam | indṷṃ dha̱rtāra̱mā di̱vaḥ ||2||
taṃ ve̱dhāṃ me̱dhayā̭hya̱npava̭māna̱madhi̱ dyavi̭ | dha̱rṇa̱siṃ bhūri̭dhāyasam ||3||
tama̭hyanbhu̱rijo̭rdhi̱yā sa̱ṃvasā̭naṃ vi̱vasva̭taḥ | pati̭ṃ vā̱co adā̭bhyam ||4||
taṃ sānā̱vadhi̭ jā̱mayo̱ hari̭ṃ hinva̱ntyadri̭bhiḥ | ha̱rya̱taṃ bhūri̭cakṣasam ||5||
taṃ tvā̭ hinvanti ve̱dhasa̱: pava̭māna girā̱vṛdha̭m | inda̱vindrā̭ya matsa̱ram ||6||
6 nṛmedha āṅgirasa: | pavamāna: soma: | gāyatrī |
e̱ṣa ka̱vira̱bhiṣṭṷtaḥ pa̱vitre̱ adhi̭ tośate | pu̱nā̱no ghnannapa̱ sridha̭: ||1||
e̱ṣa indrā̭ya vā̱yavḙ sva̱rjitpari̭ ṣicyate | pa̱vitrḙ dakṣa̱sādha̭naḥ ||2||
e̱ṣa nṛbhi̱rvi nī̭yate di̱vo mū̱rdhā vṛṣā̭ su̱taḥ | somo̱ vanḙṣu viśva̱vit ||3||
e̱ṣa ga̱vyura̭cikrada̱tpava̭māno hiraṇya̱yuḥ | indṷ: satrā̱jidastṛ̭taḥ ||4||
e̱ṣa sūryḙṇa hāsate̱ pava̭māno̱ adhi̱ dyavi̭ | pa̱vitrḙ matsa̱ro mada̭: ||5||
e̱ṣa śu̱ṣmya̭siṣyadada̱ntari̭kṣe̱ vṛṣā̱ hari̭: | pu̱nā̱na indu̱rindra̱mā ||6||
6 priyamedha āṅgirasa: | pavamāna: soma: | gāyatrī |
e̱ṣa vā̱jī hi̱to nṛbhi̭rviśva̱vinmana̭sa̱spati̭: | avyo̱ vāra̱ṃ vi dhā̭vati ||1||
e̱ṣa pa̱vitrḙ akṣara̱tsomo̭ de̱vebhya̭: su̱taḥ | viśvā̱ dhāmā̭nyāvi̱śan ||2||
e̱ṣa de̱vaḥ śṷbhāya̱te'dhi̱ yonā̱vama̭rtyaḥ | vṛ̱tra̱hā dḙva̱vīta̭maḥ ||3||
e̱ṣa vṛṣā̱ kani̭kradadda̱śabhi̭rjā̱mibhi̭rya̱taḥ | a̱bhi droṇā̭ni dhāvati ||4||
e̱ṣa sūrya̭marocaya̱tpava̭māno̱ vica̭rṣaṇiḥ | viśvā̱ dhāmā̭ni viśva̱vit ||5||
e̱ṣa śu̱ṣmyadā̭bhya̱: soma̭: punā̱no a̭rṣati | de̱vā̱vīra̭ghaśaṃsa̱hā ||6||
6 nṛmedha āṅgirasa: | pavamāna: soma: | gāyatrī |
prāsya̱ dhārā̭ akṣara̱nvṛṣṇa̭: su̱tasyauja̭sā | de̱vā~ anṷ pra̱bhūṣa̭taḥ ||1||
sapti̭ṃ mṛjanti ve̱dhaso̭ gṛ̱ṇanta̭: kā̱ravo̭ gi̱rā | jyoti̭rjajñā̱namu̱kthya̭m ||2||
su̱ṣahā̭ soma̱ tāni̭ te punā̱nāya̭ prabhūvaso | vardhā̭ samu̱dramu̱kthya̭m ||3||
viśvā̱ vasṷ̄ni sa̱ṃjaya̱npava̭sva soma̱ dhāra̭yā | i̱nu dveṣā̭ṃsi sa̱dhrya̭k ||4||
rakṣā̱ su no̱ ara̭ruṣaḥ sva̱nātsa̭masya̱ kasya̭ cit | ni̱do yatra̭ mumu̱cmahḙ ||5||
endo̱ pārthi̭vaṃ ra̱yiṃ di̱vyaṃ pa̭vasva̱ dhāra̭yā | dyu̱manta̱ṃ śuṣma̱mā bha̭ra ||6||
6 bindurāṅgirasa: | pavamāna: soma: | gāyatrī |
pra dhārā̭ asya śu̱ṣmiṇo̱ vṛthā̭ pa̱vitrḙ akṣaran | pu̱nā̱no vāca̭miṣyati ||1||
indṷrhiyā̱naḥ so̱tṛbhi̭rmṛ̱jyamā̭na̱: kani̭kradat | iya̭rti va̱gnumi̭ndri̱yam ||2||
ā na̱: śuṣma̭ṃ nṛ̱ṣāhya̭ṃ vī̱rava̭ntaṃ puru̱spṛha̭m | pava̭sva soma̱ dhāra̭yā ||3||
pra somo̱ ati̱ dhāra̭yā̱ pava̭māno asiṣyadat | a̱bhi droṇā̭nyā̱sada̭m ||4||
a̱psu tvā̱ madhṷmattama̱ṃ hari̭ṃ hinva̱ntyadri̭bhiḥ | inda̱vindrā̭ya pī̱tayḙ ||5||
su̱notā̱ madhṷmattama̱ṃ soma̱mindrā̭ya va̱jriṇḙ | cāru̱ṃ śardhā̭ya matsa̱ram ||6||
6 gotamo rāhūgaṇa:| pavamāna: soma: | gāyatrī |
pra somā̭saḥ svā̱dhya1: pava̭mānāso akramuḥ | ra̱yiṃ kṛ̭ṇvanti̱ ceta̭nam ||1||
di̱vaspṛ̭thi̱vyā adhi̱ bhavḙndo dyumna̱vardha̭naḥ | bhavā̱ vājā̭nā̱ṃ pati̭: ||2||
tubhya̱ṃ vātā̭ abhi̱priya̱stubhya̭marṣanti̱ sindha̭vaḥ | soma̱ vardha̭nti te̱ maha̭: ||3||
ā pyā̭yasva̱ samḙtu te vi̱śvata̭: soma̱ vṛṣṇya̭m | bhavā̱ vāja̭sya saṃga̱the ||4||
tubhya̱ṃ gāvo̭ ghṛ̱taṃ payo̱ babhro̭ dudu̱hre akṣi̭tam | varṣi̭ṣṭhe̱ adhi̱ sāna̭vi ||5||
svā̱yu̱dhasya̭ te sa̱to bhuva̭nasya pate va̱yam | indo̭ sakhi̱tvamṷśmasi ||6||
6 śyāvāśva ātreya: | pavamāna: soma: | gāyatrī |
pra somā̭so mada̱cyuta̱: śrava̭se no ma̱ghona̭: | su̱tā vi̱dathḙ akramuḥ ||1||
ādī̭ṃ tri̱tasya̱ yoṣa̭ṇo̱ hari̭ṃ hinva̱ntyadri̭bhiḥ | indu̱mindrā̭ya pī̱tayḙ ||2||
ādī̭ṃ ha̱ṃso yathā̭ ga̱ṇaṃ viśva̭syāvīvaśanma̱tim | atyo̱ na gobhi̭rajyate ||3||
u̱bhe so̭māva̱cāka̭śanmṛ̱go na ta̱kto a̭rṣasi | sīda̭nnṛ̱tasya̱ yoni̱mā ||4||
a̱bhi gāvo̭ anūṣata̱ yoṣā̭ jā̱rami̭va pri̱yam | aga̭nnā̱jiṃ yathā̭ hi̱tam ||5||
a̱sme dhḙhi dyu̱madyaśo̭ ma̱ghava̭dbhyaśca̱ mahya̭ṃ ca | sa̱niṃ me̱dhāmu̱ta śrava̭: ||6||
6 trita āptya: | pavamāna: soma: | gāyatrī |
pra somā̭so vipa̱ścito̱'pāṃ na ya̭ntyū̱rmaya̭: | vanā̭ni mahi̱ṣā i̭va ||1||
a̱bhi droṇā̭ni ba̱bhrava̭: śu̱krā ṛ̱tasya̱ dhāra̭yā | vāja̱ṃ goma̭ntamakṣaran ||2||
su̱tā indrā̭ya vā̱yave̱ varṷṇāya ma̱rudbhya̭: | somā̭ arṣanti̱ viṣṇa̭ve ||3||
ti̱sro vāca̱ udī̭rate̱ gāvo̭ mimanti dhe̱nava̭: | hari̭reti̱ kani̭kradat ||4||
a̱bhi brahmī̭ranūṣata ya̱hvīṝ̱tasya̭ mā̱tara̭: | ma̱rmṛ̱jyantḙ di̱vaḥ śiśṷm ||5||
rā̱yaḥ sa̭mu̱drā~śca̱turo̱'smabhya̭ṃ soma vi̱śvata̭: | ā pa̭vasva saha̱sriṇa̭: ||6||
6 trita āptya: | pavamāna: soma: | gāyatrī |
pra sṷvā̱no dhāra̭yā̱ tanendṷrhinvā̱no a̭rṣati | ru̱jaddṛ̱ḻhā vyoja̭sā ||1||
su̱ta indrā̭ya vā̱yave̱ varṷṇāya ma̱rudbhya̭: | somo̭ arṣati̱ viṣṇa̭ve ||2||
vṛṣā̭ṇa̱ṃ vṛṣa̭bhirya̱taṃ su̱nvanti̱ soma̱madri̭bhiḥ | du̱hanti̱ śakma̭nā̱ paya̭: ||3||
bhuva̭ttri̱tasya̱ marjyo̱ bhuva̱dindrā̭ya matsa̱raḥ | saṃ rū̱paira̭jyate̱ hari̭: ||4||
a̱bhīmṛ̱tasya̭ vi̱ṣṭapa̭ṃ duha̱te pṛśni̭mātaraḥ | cārṷ pri̱yata̭maṃ ha̱viḥ ||5||
samḙna̱mahrṷtā i̱mā giro̭ arṣanti sa̱sruta̭: | dhe̱nūrvā̱śro a̭vīvaśat ||6||
6 prabhūvasurāṅgirasa: | pavamāna: soma: | gāyatrī |
ā na̭: pavasva̱ dhāra̭yā̱ pava̭māna ra̱yiṃ pṛ̱thum | yayā̱ jyoti̭rvi̱dāsi̭ naḥ ||1||
indo̭ samudramīṅkhaya̱ pava̭sva viśvamejaya | rā̱yo dha̱rtā na̱ oja̭sā ||2||
tvayā̭ vī̱reṇa̭ vīravo̱'bhi ṣyā̭ma pṛtanya̱taḥ | kṣarā̭ ṇo a̱bhi vārya̭m ||3||
pra vāja̱mindṷriṣyati̱ siṣā̭sanvāja̱sā ṛṣi̭: | vra̱tā vi̭dā̱na āyṷdhā ||4||
taṃ gī̱rbhirvā̭camīṅkha̱yaṃ pṷnā̱naṃ vā̭sayāmasi | soma̱  jana̭sya̱ gopa̭tim ||5||
viśvo̱ yasya̭ vra̱te jano̭ dā̱dhāra̱ dharma̭ṇa̱spatḙ: | pu̱nā̱nasya̭ pra̱bhūva̭soḥ ||6||
6 prabhūvasurāṅgirasa: | pavamāna: soma: | gāyatrī |
asa̭rji̱ rathyo̭ yathā pa̱vitrḙ ca̱mvo̭: su̱taḥ | kārṣma̭nvā̱jī nya̭kramīt ||1||
sa vahni̭: soma̱ jāgṛ̭vi̱: pava̭sva deva̱vīrati̭ | a̱bhi kośa̭ṃ madhu̱ścuta̭m ||2||
sa no̱ jyotī̭ṃṣi pūrvya̱ pava̭māna̱ vi ro̭caya | kratve̱ dakṣā̭ya no hinu ||3||
śu̱mbhamā̭na ṛtā̱yubhi̭rmṛ̱jyamā̭no̱ gabha̭styoḥ | pava̭te̱ vārḙ a̱vyayḙ ||4||
sa viśvā̭ dā̱śuṣe̱ vasu̱ somo̭ di̱vyāni̱ pārthi̭vā | pava̭tā̱māntari̭kṣyā ||5||
ā di̱vaspṛ̱ṣṭhama̭śva̱yurga̭vya̱yuḥ so̭ma rohasi | vī̱ra̱yuḥ śa̭vasaspate ||6||
6 rahūgaṇa āṅgirasa: | pavamāna: soma: | gāyatrī |
sa su̱taḥ pī̱taye̱ vṛṣā̱ soma̭: pa̱vitrḙ arṣati | vi̱ghnanrakṣā̭ṃsi deva̱yuḥ ||1||
sa pa̱vitrḙ vicakṣa̱ṇo hari̭rarṣati dharṇa̱siḥ | a̱bhi yoni̱ṃ kani̭kradat ||2||
sa vā̱jī ro̭ca̱nā di̱vaḥ pava̭māno̱ vi dhā̭vati | ra̱kṣo̱hā vāra̭ma̱vyaya̭m ||3||
sa tri̱tasyādhi̱ sāna̭vi̱ pava̭māno arocayat | jā̱mibhi̱: sūrya̭ṃ sa̱ha ||4||
sa vṛ̭tra̱hā vṛṣā̭ su̱to va̭rivo̱vidadā̭bhyaḥ | somo̱ vāja̭mivāsarat ||5||
sa de̱vaḥ ka̱vinḙṣi̱to̱3'bhi droṇā̭ni dhāvati | indu̱rindrā̭ya ma̱ṃhanā̭ ||6||
6 rahūgaṇa āṅgirasa: | pavamāna: soma: | gāyatrī |
e̱ṣa u̱ sya vṛṣā̱ ratho'vyo̱ vārḙbhirarṣati | gaccha̱nvāja̭ṃ saha̱sriṇa̭m ||1||
e̱taṃ tri̱tasya̱ yoṣa̭ṇo̱ hari̭ṃ hinva̱ntyadri̭bhiḥ | indu̱mindrā̭ya pī̱tayḙ ||2||
e̱taṃ tyaṃ ha̱rito̱ daśa̭ marmṛ̱jyantḙ apa̱syuva̭: | yābhi̱rmadā̭ya̱ śumbha̭te ||3||
e̱ṣa sya mānṷṣī̱ṣvā śye̱no na vi̱kṣu sī̭dati | gaccha̭ñjā̱ro na yo̱ṣita̭m ||4||
e̱ṣa sya madyo̱ raso'va̭ caṣṭe di̱vaḥ śiśṷ: | ya indu̱rvāra̱māvi̭śat ||5||
e̱ṣa sya pī̱tayḙ su̱to hari̭rarṣati dharṇa̱siḥ | kranda̱nyoni̭ma̱bhi pri̱yam ||6||
6 bṛhanmatirāṅgirasa: | pavamāna: soma: | gāyatrī |
ā̱śura̭rṣa bṛhanmate̱ pari̭ pri̱yeṇa̱ dhāmnā̭ | yatra̭ de̱vā iti̱ brava̭n ||1||
pa̱ri̱ṣkṛ̱ṇvannani̭ṣkṛta̱ṃ janā̭ya yā̱taya̱nniṣa̭: | vṛ̱ṣṭiṃ di̱vaḥ pari̭ srava ||2||
su̱ta ḙti pa̱vitra̱ ā tviṣi̱ṃ dadhā̭na̱ oja̭sā | vi̱cakṣā̭ṇo viro̱caya̭n ||3||
a̱yaṃ sa yo di̱vaspari̭ raghu̱yāmā̭ pa̱vitra̱ ā | sindho̭rū̱rmā vyakṣa̭rat ||4||
ā̱vivā̭sanparā̱vato̱ atho̭ arvā̱vata̭: su̱taḥ | indrā̭ya sicyate̱ madhṷ ||5||
sa̱mī̱cī̱nā a̭nūṣata̱ hari̭ṃ hinva̱ntyadri̭bhiḥ | yonā̭vṛ̱tasya̭ sīdata ||6||
6 bṛhanmatirāṅgirasa: | pavamāna: soma: | gāyatrī |
pu̱nā̱no a̭kramīda̱bhi viśvā̱ mṛdho̱ vica̭rṣaṇiḥ | śu̱mbhanti̱ vipra̭ṃ dhī̱tibhi̭: ||1||
ā yoni̭maru̱ṇo rṷha̱dgama̱dindra̱ṃ vṛṣā̭ su̱taḥ | dhru̱ve sada̭si sīdati ||2||
nū no̭ ra̱yiṃ ma̱hāmi̭ndo̱'smabhya̭ṃ soma vi̱śvata̭: | ā pa̭vasva saha̱sriṇa̭m ||3||
viśvā̭ soma pavamāna dyu̱mnānī̭nda̱vā bha̭ra | vi̱dāḥ sa̭ha̱sriṇī̱riṣa̭: ||4||
sa na̭: punā̱na ā bha̭ra ra̱yiṃ sto̱tre su̱vīrya̭m | ja̱ri̱turva̭rdhayā̱ gira̭: ||5||
pu̱nā̱na i̭nda̱vā bha̭ra̱ soma̭ dvi̱barha̭saṃ ra̱yim | vṛṣa̭nnindo na u̱kthya̭m ||6||
6 medhyātithi: kāṇva: | pavamāna: soma: | gāyatrī |
pra ye gāvo̱ na bhūrṇa̭yastve̱ṣā a̱yāso̱ akra̭muḥ | ghnanta̭: kṛ̱ṣṇāmapa̱ tvaca̭m ||1||
su̱vi̱tasya̭ manāma̱he'ti̱ setṷṃ durā̱vya̭m | sā̱hvāṃso̱ dasyṷmavra̱tam ||2||
śṛ̱ṇve vṛ̱ṣṭeri̭va sva̱naḥ pava̭mānasya śu̱ṣmiṇa̭: | cara̭nti vi̱dyuto̭ di̱vi ||3||
ā pa̭vasva ma̱hīmiṣa̱ṃ goma̭dindo̱ hira̭ṇyavat | aśvā̭va̱dvāja̭vatsu̱taḥ ||4||
sa pa̭vasva vicarṣaṇa̱ ā ma̱hī roda̭sī pṛṇa | u̱ṣāḥ sūryo̱ na ra̱śmibhi̭: ||5||
pari̭ ṇaḥ śarma̱yantyā̱ dhāra̭yā soma vi̱śvata̭: | sarā̭ ra̱seva̭ vi̱ṣṭapa̭m ||6||
6 medhyātithi: kāṇva: | pavamāna: soma: | gāyatrī |
ja̱naya̭nroca̱nā di̱vo ja̱naya̭nna̱psu sūrya̭m | vasā̭no̱ gā a̱po hari̭: ||1||
e̱ṣa pra̱tnena̱ manma̭nā de̱vo de̱vebhya̱spari̭ | dhāra̭yā pavate su̱taḥ ||2||
vā̱vṛ̱dhā̱nāya̱ tūrva̭ye̱ pava̭nte̱ vāja̭sātaye | somā̭: sa̱hasra̭pājasaḥ ||3||
du̱hā̱naḥ pra̱tnamitpaya̭: pa̱vitre̱ pari̭ ṣicyate | kranda̭nde̱vā~ a̭jījanat ||4||
a̱bhi viśvā̭ni̱ vāryā̱bhi de̱vā~ ṛ̭tā̱vṛdha̭: | soma̭: punā̱no a̭rṣati ||5||
goma̭nnaḥ soma vī̱rava̱daśvā̭va̱dvāja̭vatsu̱taḥ | pava̭sva bṛha̱tīriṣa̭: ||6||
6 medhyātithi: kāṇva: | pavamāna: soma: | gāyatrī |
yo atya̭ iva mṛ̱jyate̱ gobhi̱rmadā̭ya harya̱taḥ | taṃ gī̱rbhirvā̭sayāmasi ||1||
taṃ no̱ viśvā̭ ava̱syuvo̱ gira̭: śumbhanti pū̱rvathā̭ | indu̱mindrā̭ya pī̱tayḙ ||2||
pu̱nā̱no yā̭ti harya̱taḥ somo̭ gī̱rbhiḥ pari̭ṣkṛtaḥ | vipra̭sya̱ medhyā̭titheḥ ||3||
pava̭māna vi̱dā ra̱yima̱smabhya̭ṃ soma su̱śriya̭m | indo̭ sa̱hasra̭varcasam ||4||
indu̱ratyo̱ na vā̭ja̱sṛtkani̭kranti pa̱vitra̱ ā | yadakṣā̱rati̭ deva̱yuḥ ||5||
pava̭sva̱ vāja̭sātaye̱ vipra̭sya gṛṇa̱to vṛ̱dhe | soma̱ rāsva̭ su̱vīrya̭m ||6||
6 ayāsya āṅgirasa: | pavamāna: soma: | gāyatrī |
pra ṇa̭ indo ma̱he tana̭ ū̱rmiṃ na bibhra̭darṣasi | a̱bhi de̱vā~ a̱yāsya̭: ||1||
ma̱tī ju̱ṣṭo dhi̱yā hi̱taḥ somo̭ hinve parā̱vati̭ | vipra̭sya̱ dhāra̭yā ka̱viḥ ||2||
a̱yaṃ de̱veṣu̱ jāgṛ̭viḥ su̱ta ḙti pa̱vitra̱ ā | somo̭ yāti̱ vica̭rṣaṇiḥ ||3||
sa na̭: pavasva vāja̱yuśca̭krā̱ṇaścārṷmadhva̱ram | ba̱rhiṣmā̱~ ā vi̭vāsati ||4||
sa no̱ bhagā̭ya vā̱yave̱ vipra̭vīraḥ sa̱dāvṛ̭dhaḥ | somo̭ de̱veṣvā ya̭mat ||5||
sa no̭ a̱dya vasṷttaye kratu̱vidgā̭tu̱vitta̭maḥ | vāja̭ṃ jeṣi̱ śravo̭ bṛ̱hat ||6||
6 ayāsya āṅgirasa: | pavamāna: soma: | gāyatrī |
sa pa̭vasva̱ madā̭ya̱ kaṃ nṛ̱cakṣā̭ de̱vavī̭taye | inda̱vindrā̭ya pī̱tayḙ ||1||
sa no̭ arṣā̱bhi dū̱tyaṃ1 tvamindrā̭ya tośase | de̱vāntsakhi̭bhya̱ ā vara̭m ||2||
u̱ta tvāma̭ru̱ṇaṃ va̱yaṃ gobhi̭rañjmo̱ madā̭ya̱ kam | vi no̭ rā̱ye duro̭ vṛdhi ||3||
atyṷ̄ pa̱vitra̭makramīdvā̱jī dhura̱ṃ na yāma̭ni | indṷrde̱veṣṷ patyate ||4||
samī̱ sakhā̭yo asvara̱nvane̱ krīḻa̭nta̱matya̭vim | indṷṃ nā̱vā a̭nūṣata ||5||
tayā̭ pavasva̱ dhāra̭yā̱ yayā̭ pī̱to vi̱cakṣa̭se | indo̭ sto̱tre su̱vīrya̭m ||6||
6 ayāsya āṅgirasa: | pavamāna: soma: | gāyatrī |
asṛ̭grande̱vavī̭ta̱ye'tyā̭sa̱: kṛtvyā̭ iva | kṣara̭ntaḥ parvatā̱vṛdha̭: ||1||
pari̭ṣkṛtāsa̱ inda̭vo̱ yoṣḙva̱ pitryā̭vatī | vā̱yuṃ somā̭ asṛkṣata ||2||
e̱te somā̭sa̱ inda̭va̱: praya̭svantaśca̱mū su̱tāḥ | indra̭ṃ vardhanti̱ karma̭bhiḥ ||3||
ā dhā̭vatā suhastyaḥ śu̱krā gṛ̭bhṇīta ma̱nthinā̭ | gobhi̭: śrīṇīta matsa̱ram ||4||
sa pa̭vasva dhanaṃjaya praya̱ntā rādha̭so ma̱haḥ | a̱smabhya̭ṃ soma gātu̱vit ||5||
e̱taṃ mṛ̭janti̱ marjya̱ṃ pava̭māna̱ṃ daśa̱ kṣipa̭: | indrā̭ya matsa̱raṃ mada̭m ||6||
5 kavirbhārgava: | pavamāna: soma: | gāyatrī |
a̱yā soma̭: sukṛ̱tyayā̭ ma̱haści̭da̱bhya̭vardhata | ma̱ndā̱na udvṛ̭ṣāyate ||1||
kṛ̱tānīda̭sya̱ kartvā̱ ceta̭nte dasyu̱tarha̭ṇā | ṛ̱ṇā ca̭ dhṛ̱ṣṇuśca̭yate ||2||
ātsoma̭ indri̱yo raso̱ vajra̭: sahasra̱sā bhṷvat | u̱kthaṃ yada̭sya̱ jāya̭te ||3||
sva̱yaṃ ka̱virvi̭dha̱rtari̱ viprā̭ya̱ ratna̭micchati | yadī̭ marmṛ̱jyate̱ dhiya̭: ||4||
si̱ṣā̱satṷ̄ rayī̱ṇāṃ vāje̱ṣvarva̭tāmiva | bharḙṣu ji̱gyuṣā̭masi ||5||
5 kavirbhārgava: | pavamāna: soma: | gāyatrī |
taṃ tvā̭ nṛ̱mṇāni̱ bibhra̭taṃ sa̱dhasthḙṣu ma̱ho di̱vaḥ | cārṷṃ sukṛ̱tyayḙmahe ||1||
saṃvṛ̭ktadhṛṣṇumu̱kthya̭ṃ ma̱hāma̭hivrata̱ṃ mada̭m | śa̱taṃ puro̭ ruru̱kṣaṇi̭m ||2||
ata̭stvā ra̱yima̱bhi rājā̭naṃ sukrato di̱vaḥ | su̱pa̱rṇo a̭vya̱thirbha̭rat ||3||
viśva̭smā̱ itsva̭rdṛ̱śe sādhā̭raṇaṃ raja̱stura̭m | go̱pāmṛ̱tasya̱ virbha̭rat ||4||
adhā̭ hinvā̱na i̭ndri̱yaṃ jyāyo̭ mahi̱tvamā̭naśe | a̱bhi̱ṣṭi̱kṛdvica̭rṣaṇiḥ ||5||
5 kavirbhārgava: | pavamāna: soma: | gāyatrī |
pava̭sva vṛ̱ṣṭimā su no̱'pāmū̱rmiṃ di̱vaspari̭ | a̱ya̱kṣmā bṛ̭ha̱tīriṣa̭: ||1||
tayā̭ pavasva̱ dhāra̭yā̱ yayā̱ gāva̭ i̱hāgama̭n | janyā̭sa̱ upa̭ no gṛ̱ham ||2||
ghṛ̱taṃ pa̭vasva̱ dhāra̭yā ya̱jñeṣṷ deva̱vīta̭maḥ | a̱smabhya̭ṃ vṛ̱ṣṭimā pa̭va ||3||
sa na̭ ū̱rje vya1vyaya̭ṃ pa̱vitra̭ṃ dhāva̱ dhāra̭yā | de̱vāsa̭: śṛ̱ṇava̱nhi ka̭m ||4||
pava̭māno asiṣyada̱drakṣā̭ṃsyapa̱jaṅgha̭nat | pra̱tna̱vadro̱caya̱nruca̭: ||5||
5 ucathya āṅgirasa: | pavamāna: soma: | gāyatrī |
utte̱ śuṣmā̭sa īrate̱ sindho̭rū̱rmeri̭va sva̱naḥ | vā̱ṇasya̭ codayā pa̱vim ||1||
pra̱sa̱ve ta̱ udī̭rate ti̱sro vāco̭ makha̱syuva̭: | yadavya̱ eṣi̱ sāna̭vi ||2||
avyo̱ vāre̱ pari̭ pri̱yaṃ hari̭ṃ hinva̱ntyadri̭bhiḥ | pava̭mānaṃ madhu̱ścuta̭m ||3||
ā pa̭vasva madintama pa̱vitra̱ṃ dhāra̭yā kave | a̱rkasya̱ yoni̭mā̱sada̭m ||4||
sa pa̭vasva madintama̱ gobhi̭rañjā̱no a̱ktubhi̭: | inda̱vindrā̭ya pī̱tayḙ ||5||
5 ucathya āṅgirasa: | pavamāna: soma: | gāyatrī |
adhva̭ryo̱ adri̭bhiḥ su̱taṃ soma̭ṃ pa̱vitra̱ ā sṛ̭ja | pu̱nī̱hīndrā̭ya̱ pāta̭ve ||1||
di̱vaḥ pī̱yūṣa̭mutta̱maṃ soma̱mindrā̭ya va̱jriṇḙ | su̱notā̱ madhṷmattamam ||2||
tava̱ tya i̭ndo̱ andha̭so de̱vā madho̱rvya̭śnate | pava̭mānasya ma̱ruta̭: ||3||
tvaṃ hi so̭ma va̱rdhaya̭ntsu̱to madā̭ya̱ bhūrṇa̭ye | vṛṣa̭ntsto̱tāra̭mū̱tayḙ ||4||
a̱bhya̭rṣa vicakṣaṇa pa̱vitra̱ṃ dhāra̭yā su̱taḥ | a̱bhi vāja̭mu̱ta śrava̭: ||5||
5 ucathya āṅgirasa: | pavamāna: soma: | gāyatrī |
pari̭ dyu̱kṣaḥ sa̱nadra̭yi̱rbhara̱dvāja̭ṃ no̱ andha̭sā | su̱vā̱no a̭rṣa pa̱vitra̱ ā ||1||
tava̭ pra̱tnebhi̱radhva̭bhi̱ravyo̱ vāre̱ pari̭ pri̱yaḥ | sa̱hasra̭dhāro yā̱ttanā̭ ||2||
ca̱rurna yastamī̭ṅkha̱yendo̱ na dāna̭mīṅkhaya | va̱dhairva̭dhasnavīṅkhaya ||3||
ni śuṣma̭mindaveṣā̱ṃ purṷhūta̱ janā̭nām | yo a̱smā~ ā̱didḙśati ||4||
śa̱taṃ na̭ inda ū̱tibhi̭: sa̱hasra̭ṃ vā̱ śucī̭nām | pava̭sva maṃha̱yadra̭yiḥ ||5||
4 avatsāra: kāśyapaḥ | pavamāna: soma: | gāyatrī |
utte̱ śuṣmā̭so asthū̱ rakṣo̭ bhi̱ndanto̭ adrivaḥ | nu̱dasva̱ yāḥ pa̭ri̱spṛdha̭: ||1||
a̱yā ni̭ja̱ghniroja̭sā rathasa̱ṃge dhanḙ hi̱te | stavā̱ abi̭bhyuṣā hṛ̱dā ||2||
asya̭ vra̱tāni̱ nādhṛṣe̱ pava̭mānasya dū̱ḍhyā̭ | ru̱ja yastvā̭ pṛta̱nyati̭ ||3||
taṃ hi̭nvanti mada̱cyuta̱ṃ hari̭ṃ na̱dīṣṷ vā̱jina̭m | indu̱mindrā̭ya matsa̱ram ||4||
4 avatsāra: kāśyapaḥ | pavamāna: soma: | gāyatrī |
a̱sya pra̱tnāmanu̱ dyuta̭ṃ śu̱kraṃ dṷduhre̱ ahra̭yaḥ | paya̭: sahasra̱sāmṛṣi̭m ||1||
a̱yaṃ sūrya̭ ivopa̱dṛga̱yaṃ sarā̭ṃsi dhāvati | sa̱pta pra̱vata̱ ā diva̭m ||2||
a̱yaṃ viśvā̭ni tiṣṭhati punā̱no bhuva̭no̱pari̭ | somo̭ de̱vo na sūrya̭: ||3||
pari̭ ṇo de̱vavī̭taye̱ vājā̭~ arṣasi̱ goma̭taḥ | pu̱nā̱na i̭ndavindra̱yuḥ ||4||
4 avatsāra: kāśyapaḥ | pavamāna: soma: | gāyatrī |
yava̭ṃyavaṃ no̱ andha̭sā pu̱ṣṭampṷṣṭa̱ṃ pari̭ srava | soma̱ viśvā̭ ca̱ saubha̭gā ||1||
indo̱ yathā̱ tava̱ stavo̱ yathā̭ te jā̱tamandha̭saḥ | ni ba̱rhiṣi̭ pri̱ye sa̭daḥ ||2||
u̱ta no̭ go̱vida̭śva̱vitpava̭sva so̱māndha̭sā | ma̱kṣūta̭mebhi̱raha̭bhiḥ ||3||
yo ji̱nāti̱ na jīya̭te̱ hanti̱ śatrṷma̱bhītya̭ | sa pa̭vasva sahasrajit ||4||
4 avatsāra: kāśyapaḥ | pavamāna: soma: | gāyatrī |
pari̱ soma̭ ṛ̱taṃ bṛ̱hadā̱śuḥ pa̱vitrḙ arṣati | vi̱ghnanrakṣā̭ṃsi deva̱yuḥ ||1||
yatsomo̱ vāja̱marṣa̭ti śa̱taṃ dhārā̭ apa̱syuva̭: | indra̭sya sa̱khyamā̭vi̱śan ||2||
a̱bhi tvā̱ yoṣa̭ṇo̱ daśa̭ jā̱raṃ na ka̱nyā̭nūṣata | mṛ̱jyasḙ soma sā̱tayḙ ||3||
tvamindrā̭ya̱ viṣṇa̭ve svā̱duri̭ndo̱ pari̭ srava | nṝntsto̱tṝnpā̱hyaṃha̭saḥ ||4||
4 avatsāra: kāśyapaḥ | pavamāna: soma: | gāyatrī |
pra te̱ dhārā̭ asa̱ścato̭ di̱vo na ya̭nti vṛ̱ṣṭaya̭: | acchā̱ vāja̭ṃ saha̱sriṇa̭m ||1||
a̱bhi pri̱yāṇi̱ kāvyā̱ viśvā̱ cakṣā̭ṇo arṣati | hari̭stuñjā̱na āyṷdhā ||2||
sa ma̭rmṛjā̱na ā̱yubhi̱ribho̱ rājḙva suvra̱taḥ | śye̱no na vaṃsṷ ṣīdati ||3||
sa no̱ viśvā̭ di̱vo vasū̱to pṛ̭thi̱vyā adhi̭ | pu̱nā̱na i̭nda̱vā bha̭ra ||4||
4 avatsāra: kāśyapaḥ | pavamāna: soma: | gāyatrī |
tara̱tsa ma̱ndī dhā̭vati̱ dhārā̭ su̱tasyāndha̭saḥ | tara̱tsa ma̱ndī dhā̭vati ||1||
u̱srā vḙda̱ vasṷ̄nā̱ṃ marta̭sya de̱vyava̭saḥ | tara̱tsa ma̱ndī dhā̭vati ||2||
dhva̱srayo̭: puru̱ṣantyo̱rā sa̱hasrā̭ṇi dadmahe | tara̱tsa ma̱ndī dhā̭vati ||3||
ā yayo̭stri̱ṃśata̱ṃ tanā̭ sa̱hasrā̭ṇi ca̱ dadma̭he | tara̱tsa ma̱ndī dhā̭vati ||4||
4 avatsāra: kāśyapaḥ | pavamāna: soma: | gāyatrī |
pava̭sva go̱jida̭śva̱jidvi̭śva̱jitso̭ma raṇya̱jit | pra̱jāva̱dratna̱mā bha̭ra ||1 ||
pava̭svā̱dbhyo adā̭bhya̱: pava̱svauṣa̭dhībhyaḥ | pava̭sva dhi̱ṣaṇā̭bhyaḥ ||2||
tvaṃ so̭ma̱ pava̭māno̱ viśvā̭ni duri̱tā ta̭ra | ka̱viḥ sī̭da̱ ni ba̱rhiṣi̭ ||3||
pava̭māna̱ sva̭rvido̱ jāya̭māno'bhavo ma̱hān | indo̱ viśvā̭~ a̱bhīda̭si ||4||
4 avatsāra: kāśyapaḥ | pavamāna: soma: | gāyatrī |3 purauṣṇika |
pra gā̭ya̱treṇa̭ gāyata̱ pava̭māna̱ṃ vica̭rṣaṇim | indṷṃ sa̱hasra̭cakṣasam ||1||
taṃ tvā̭ sa̱hasra̭cakṣasa̱matho̭ sa̱hasra̭bharṇasam | ati̱ vāra̭mapāviṣuḥ ||2||
ati̱ vārā̱npava̭māno asiṣyadatka̱laśā̭~ a̱bhi dhā̭vati | indra̭sya̱ hārdyā̭vi̱śan ||3||
indra̭sya soma̱ rādha̭se̱ śaṃ pa̭vasva vicarṣaṇe | pra̱jāva̱dreta̱ ā bha̭ra ||4||
30 amahīyurāṅgirasa: | pavamāna: soma: | gāyatrī |
a̱yā vī̱tī pari̭ srava̱ yasta̭ indo̱ made̱ṣvā | a̱vāha̭nnava̱tīrnava̭ ||1||
pura̭: sa̱dya i̱tthādhi̭ye̱ divo̭dāsāya̱ śamba̭ram | adha̱ tyaṃ tu̱rvaśa̱ṃ yadṷm ||2||
pari̭ ṇo̱ aśva̭maśva̱vidgoma̭dindo̱ hira̭ṇyavat | kṣarā̭ saha̱sriṇī̱riṣa̭: ||3||
pava̭mānasya te va̱yaṃ pa̱vitra̭mabhyunda̱taḥ | sa̱khi̱tvamā vṛ̭ṇīmahe ||4||
ye tḙ pa̱vitra̭mū̱rmayo̭'bhi̱kṣara̭nti̱ dhāra̭yā | tebhi̭rnaḥ soma mṛḻaya ||5||
sa na̭: punā̱na ā bha̭ra ra̱yiṃ vī̱rava̭tī̱miṣa̭m | īśā̭naḥ soma vi̱śvata̭: ||6||
e̱tamu̱ tyaṃ daśa̱ kṣipo̭ mṛ̱janti̱ sindhṷmātaram | samā̭di̱tyebhi̭rakhyata ||7||
samindrḙṇo̱ta vā̱yunā̭ su̱ta ḙti pa̱vitra̱ ā | saṃ sūrya̭sya ra̱śmibhi̭: ||8||
sa no̱ bhagā̭ya vā̱yavḙ pū̱ṣṇe pa̭vasva̱ madhṷmān | cārṷrmi̱tre varṷṇe ca ||9||
u̱ccā tḙ jā̱tamandha̭so di̱vi ṣadbhūmyā da̭de | u̱graṃ śarma̱ mahi̱ śrava̭: ||10||
e̱nā viśvā̭nya̱rya ā dyu̱mnāni̱ mānṷṣāṇām | siṣā̭santo vanāmahe ||11||
sa na̱ indrā̭ya̱ yajya̭ve̱ varṷṇāya ma̱rudbhya̭: | va̱ri̱vo̱vitpari̭ srava ||12||
upo̱ ṣu jā̱tama̱ptura̱ṃ gobhi̭rbha̱ṅgaṃ pari̭ṣkṛtam | indṷṃ de̱vā a̭yāsiṣuḥ ||13||
tamidva̭rdhantu no̱ giro̭ va̱tsaṃ sa̱ṃśiśva̭rīriva | ya indra̭sya hṛda̱ṃsani̭: ||14||
arṣā̭ ṇaḥ soma̱ śaṃ gavḙ dhu̱kṣasva̭ pi̱pyuṣī̱miṣa̭m | vardhā̭ samu̱dramu̱kthya̭m ||15||
pava̭māno ajījanaddi̱vaści̱traṃ na ta̭nya̱tum | jyoti̭rvaiśvāna̱raṃ bṛ̱hat ||16||
pava̭mānasya te̱ raso̱ mado̭ rājannaducchu̱naḥ | vi vāra̱mavya̭marṣati ||17||
pava̭māna̱ rasa̱stava̱ dakṣo̱ vi rā̭jati dyu̱mān | jyoti̱rviśva̱ṃ sva̭rdṛ̱śe ||18||
yaste̱ mado̱ varḙṇya̱stenā̭ pava̱svāndha̭sā | de̱vā̱vīra̭ghaśaṃsa̱hā ||19||
jaghni̭rvṛ̱trama̭mi̱triya̱ṃ sasni̱rvāja̭ṃ di̱vedi̭ve | go̱ṣā ṷ aśva̱sā a̭si ||20||
sammi̭ślo aru̱ṣo bha̭va sūpa̱sthābhi̱rna dhe̱nubhi̭: | sīda̭ñchye̱no na yoni̱mā ||21||
sa pa̭vasva̱ ya āvi̱thendra̭ṃ vṛ̱trāya̱ hanta̭ve | va̱vri̱vāṃsa̭ṃ ma̱hīra̱paḥ ||22||
su̱vīrā̭so va̱yaṃ dhanā̱ jayḙma soma mīḍhvaḥ | pu̱nā̱no va̭rdha no̱ gira̭: ||23||
tvotā̭sa̱stavāva̭sā̱ syāma̭ va̱nvanta̭ ā̱mura̭: | soma̭ vra̱teṣṷ jāgṛhi ||24||
a̱pa̱ghnanpa̭vate̱ mṛdho'pa̱ somo̱ arā̭vṇaḥ | gaccha̱nnindra̭sya niṣkṛ̱tam ||25||
ma̱ho no̭ rā̱ya ā bha̭ra̱ pava̭māna ja̱hī mṛdha̭: | rāsvḙndo vī̱rava̱dyaśa̭: ||26||
na tvā̭ śa̱taṃ ca̱na hruto̱ rādho̱ ditsa̭nta̱mā mi̭nan | yatpṷnā̱no ma̭kha̱syasḙ ||27||
pava̭svendo̱ vṛṣā̭ su̱taḥ kṛ̱dhī no̭ ya̱śaso̱ janḙ | viśvā̱ apa̱ dviṣo̭ jahi ||28||
asya̭ te sa̱khye va̱yaṃ tavḙndo dyu̱mna ṷtta̱me | sā̱sa̱hyāma̭ pṛtanya̱taḥ ||29||
yā tḙ bhī̱mānyāyṷdhā ti̱gmāni̱ santi̱ dhūrva̭ṇe | rakṣā̭ samasya no ni̱daḥ ||30||
30 jamadagnirbhārgava: | pavamāna: soma: | gāyatrī |
e̱te a̭sṛgra̱minda̭vasti̱raḥ pa̱vitra̭mā̱śava̭: | viśvā̭nya̱bhi saubha̭gā ||1||
vi̱ghnanto̭ duri̱tā pu̱ru su̱gā to̱kāya̭ vā̱jina̭: | tanā̭ kṛ̱ṇvanto̱ arva̭te ||2||
kṛ̱ṇvanto̱ vari̭vo̱ gave̱'bhya̭rṣanti suṣṭu̱tim | iḻā̭ma̱smabhya̭ṃ sa̱ṃyata̭m ||3||
asā̭vya̱ṃśurmadā̭yā̱'psu dakṣo̭ giri̱ṣṭhāḥ | śye̱no na yoni̱māsa̭dat ||4||
śu̱bhramandho̭ de̱vavā̭tama̱psu dhū̱to nṛbhi̭: su̱taḥ | svada̭nti̱ gāva̱: payo̭bhiḥ ||5||
ādī̱maśva̱ṃ na hetā̱ro'śṷ̄śubhanna̱mṛtā̭ya | madhvo̱ rasa̭ṃ sadha̱mādḙ ||6||
yāste̱ dhārā̭ madhu̱ścuto'sṛ̭graminda ū̱tayḙ | tābhi̭: pa̱vitra̱māsa̭daḥ ||7||
so a̱rṣendrā̭ya pī̱tayḙ ti̱ro romā̭ṇya̱vyayā̭ | sīda̱nyonā̱ vane̱ṣvā ||8||
tvami̭ndo̱ pari̭ srava̱ svādi̭ṣṭho̱ aṅgi̭robhyaḥ | va̱ri̱vo̱vidghṛ̱taṃ paya̭: ||9||
a̱yaṃ vica̭rṣaṇirhi̱taḥ pava̭māna̱: sa cḙtati | hi̱nvā̱na āpya̭ṃ bṛ̱hat ||10||
e̱ṣa vṛṣā̱ vṛṣa̭vrata̱: pava̭māno aśasti̱hā | kara̱dvasṷ̄ni dā̱śuṣḙ ||11||
ā pa̭vasva saha̱sriṇa̭ṃ ra̱yiṃ goma̭ntama̱śvina̭m | pu̱ru̱śca̱ndraṃ pṷru̱spṛha̭m ||12||
e̱ṣa sya pari̭ ṣicyate marmṛ̱jyamā̭na ā̱yubhi̭: | u̱ru̱gā̱yaḥ ka̱vikra̭tuḥ ||13||
sa̱hasro̭tiḥ śa̱tāma̭gho vi̱māno̱ raja̭saḥ ka̱viḥ | indrā̭ya pavate̱ mada̭: ||14||
gi̱rā jā̱ta i̱ha stu̱ta indu̱rindrā̭ya dhīyate | viryonā̭ vasa̱tāvi̭va ||15||
pava̭mānaḥ su̱to nṛbhi̱: somo̱ vāja̭mivāsarat | ca̱mūṣu̱ śakma̭nā̱sada̭m ||16||
taṃ tri̭pṛ̱ṣṭhe tri̭vandhu̱re rathḙ yuñjanti̱ yāta̭ve | ṛṣī̭ṇāṃ sa̱pta dhī̱tibhi̭: ||17||
taṃ so̭tāro dhana̱spṛta̭mā̱śuṃ vājā̭ya̱ yāta̭ve | hari̭ṃ hinota vā̱jina̭m ||18||
ā̱vi̱śanka̱laśa̭ṃ su̱to viśvā̱ arṣa̭nna̱bhi śriya̭: | śūro̱ na goṣṷ tiṣṭhati ||19||
ā ta̭ indo̱ madā̭ya̱ kaṃ payo̭ duhantyā̱yava̭: | de̱vā de̱vebhyo̱ madhṷ ||20||
ā na̱: soma̭ṃ pa̱vitra̱ ā sṛ̱jatā̱ madhṷmattamam | de̱vebhyo̭ deva̱śrutta̭mam ||21||
e̱te somā̭ asṛkṣata gṛṇā̱nāḥ śrava̭se ma̱he | ma̱dinta̭masya̱ dhāra̭yā ||22||
a̱bhi gavyā̭ni vī̱tayḙ nṛ̱mṇā pṷnā̱no a̭rṣasi | sa̱nadvā̭ja̱: pari̭ srava ||23||
u̱ta no̱ goma̭tī̱riṣo̱ viśvā̭ arṣa pari̱ṣṭubha̭: | gṛ̱ṇā̱no ja̱mada̭gninā ||24||
pava̭sva vā̱co a̭gri̱yaḥ soma̭ ci̱trābhi̭rū̱tibhi̭: | a̱bhi viśvā̭ni̱ kāvyā̭ ||25||
tvaṃ sa̭mu̱driyā̭ a̱po̭'gri̱yo vāca̭ ī̱raya̭n | pava̭sva viśvamejaya ||26||
tubhye̱mā bhuva̭nā kave mahi̱mne so̭ma tasthire | tubhya̭marṣanti̱ sindha̭vaḥ ||27||
pra tḙ di̱vo na vṛ̱ṣṭayo̱ dhārā̭ yantyasa̱ścata̭: | a̱bhi śu̱krāmṷpa̱stira̭m ||28||
indrā̱yendṷṃ punītano̱graṃ dakṣā̭ya̱ sādha̭nam | ī̱śā̱naṃ vī̱tirā̭dhasam ||29||
pava̭māna ṛ̱taḥ ka̱viḥ soma̭: pa̱vitra̱māsa̭dat | dadha̭tsto̱tre su̱vīrya̭m ||30||
30nidhruvi: kāśyapaḥ | pavamāna: soma: | gāyatrī |
ā pa̭vasva saha̱sriṇa̭ṃ ra̱yiṃ so̭ma su̱vīrya̭m | a̱sme śravā̭ṃsi dhāraya ||1||
iṣa̱mūrja̭ṃ ca pinvasa̱ indrā̭ya matsa̱rinta̭maḥ | ca̱mūṣvā ni ṣī̭dasi ||2||
su̱ta indrā̭ya̱ viṣṇa̭ve̱ soma̭: ka̱laśḙ akṣarat | madhṷmā~ astu vā̱yavḙ ||3||
e̱te a̭sṛgramā̱śavo'ti̱ hvarā̭ṃsi ba̱bhrava̭: | somā̭ ṛ̱tasya̱ dhāra̭yā ||4||
indra̱ṃ vardha̭nto a̱ptura̭: kṛ̱ṇvanto̱ viśva̱mārya̭m | a̱pa̱ghnanto̱ arā̭vṇaḥ ||5||
su̱tā anu̱ svamā rajo̱'bhya̭rṣanti ba̱bhrava̭: | indra̱ṃ gaccha̭nta̱ inda̭vaḥ ||6||
a̱yā pa̭vasva̱ dhāra̭yā̱ yayā̱ sūrya̱maro̭cayaḥ | hi̱nvā̱no mānṷṣīra̱paḥ ||7||
ayṷkta̱ sūra̱ eta̭śa̱ṃ pava̭māno ma̱nāvadhi̭ | a̱ntari̭kṣeṇa̱ yāta̭ve ||8||
u̱ta tyā ha̱rito̱ daśa̱ sūro̭ ayukta̱ yāta̭ve | indu̱rindra̱ iti̭ bru̱van ||9||
parī̱to vā̱yavḙ su̱taṃ gira̱ indrā̭ya matsa̱ram | avyo̱ vārḙṣu siñcata ||10||
pava̭māna vi̱dā ra̱yima̱smabhya̭ṃ soma du̱ṣṭara̭m | yo dū̱ṇāśo̭ vanuṣya̱tā ||11||
a̱bhya̭rṣa saha̱sriṇa̭ṃ ra̱yiṃ goma̭ntama̱śvina̭m | a̱bhi vāja̭mu̱ta śrava̭: ||12||
somo̭ de̱vo na sūryo'dri̭bhiḥ pavate su̱taḥ | dadhā̭naḥ ka̱laśe̱ rasa̭m ||13||
e̱te dhāmā̱nyāryā̭ śu̱krā ṛ̱tasya̱ dhāra̭yā | vāja̱ṃ goma̭ntamakṣaran ||14||
su̱tā indrā̭ya va̱jriṇe̱ somā̭so̱ dadhyā̭śiraḥ | pa̱vitra̱matya̭kṣaran ||15||
pra so̭ma̱ madhṷmattamo rā̱ye a̭rṣa pa̱vitra̱ ā | mado̱ yo dḙva̱vīta̭maḥ ||16||
tamī̭ mṛjantyā̱yavo̱ hari̭ṃ na̱dīṣṷ vā̱jina̭m | indu̱mindrā̭ya matsa̱ram ||17||
ā pa̭vasva̱ hira̭ṇyava̱daśvā̭vatsoma vī̱rava̭t | vāja̱ṃ goma̭nta̱mā bha̭ra ||18||
pari̱ vāje̱ na vā̭ja̱yumavyo̱ vārḙṣu siñcata | indrā̭ya̱ madhṷmattamam ||19||
ka̱viṃ mṛ̭janti̱ marjya̭ṃ dhī̱bhirviprā̭ ava̱syava̭: | vṛṣā̱ kani̭kradarṣati ||20||
vṛṣa̭ṇaṃ dhī̱bhira̱ptura̱ṃ soma̭mṛ̱tasya̱ dhāra̭yā | ma̱tī viprā̱: sama̭svaran ||21||
pava̭sva devāyu̱ṣagindra̭ṃ gacchatu te̱ mada̭: | vā̱yumā ro̭ha̱ dharma̭ṇā ||22||
pava̭māna̱ ni to̭śase ra̱yiṃ so̭ma śra̱vāyya̭m | pri̱yaḥ sa̭mu̱dramā vi̭śa ||23||
a̱pa̱ghnanpa̭vase̱ mṛdha̭: kratu̱vitso̭ma matsa̱raḥ | nu̱dasvādḙvayu̱ṃ jana̭m ||24||
pava̭mānā asṛkṣata̱ somā̭: śu̱krāsa̱ inda̭vaḥ | a̱bhi viśvā̭ni̱ kāvyā̭ ||25||
pava̭mānāsa ā̱śava̭: śu̱bhrā a̭sṛgra̱minda̭vaḥ | ghnanto̱ viśvā̱ apa̱ dviṣa̭: ||26||
pava̭mānā di̱vasparya̱ntari̭kṣādasṛkṣata | pṛ̱thi̱vyā adhi̱ sāna̭vi ||27||
pu̱nā̱naḥ so̭ma̱ dhāra̱yendo̱ viśvā̱ apa̱ sridha̭: | ja̱hi rakṣā̭ṃsi sukrato ||28||
a̱pa̱ghnantso̭ma ra̱kṣaso̱'bhya̭rṣa̱ kani̭kradat | dyu̱manta̱ṃ śuṣma̭mutta̱mam ||29||
a̱sme vasṷ̄ni dhāraya̱ soma̭ di̱vyāni̱ pārthi̭vā | indo̱ viśvā̭ni̱ vāryā̭ ||30||
30 kaśyapo mārīca: | pavamāna: soma: | gāyatrī |
vṛṣā̭ soma dyu̱mā~ a̭si̱ vṛṣā̭ deva̱ vṛṣa̭vrataḥ | vṛṣā̱ dharmā̭ṇi dadhiṣe ||1||
vṛṣṇa̭ste̱ vṛṣṇya̱ṃ śavo̱ vṛṣā̱ vana̱ṃ vṛṣā̱ mada̭: | sa̱tyaṃ vṛ̭ṣa̱nvṛṣeda̭si ||2||
aśvo̱ na ca̭krado̱ vṛṣā̱ saṃ gā i̭ndo̱ samarva̭taḥ | vi no̭ rā̱ye duro̭ vṛdhi ||3||
asṛ̭kṣata̱ pra vā̱jino̭ ga̱vyā somā̭so aśva̱yā | śu̱krāso̭ vīra̱yāśava̭: ||4||
śu̱mbhamā̭nā ṛtā̱yubhi̭rmṛ̱jyamā̭nā̱ gabha̭styoḥ | pava̭nte̱ vārḙ a̱vyayḙ ||5||
te viśvā̭ dā̱śuṣe̱ vasu̱ somā̭ di̱vyāni̱ pārthi̭vā | pava̭ntā̱māntari̭kṣyā ||6||
pava̭mānasya viśvavi̱tpra te̱ sargā̭ asṛkṣata | sūrya̭syeva̱ na ra̱śmaya̭: ||7||
ke̱tuṃ kṛ̱ṇvandi̱vaspari̱ viśvā̭ rū̱pābhya̭rṣasi | sa̱mu̱draḥ so̭ma pinvase ||8||
hi̱nvā̱no vāca̭miṣyasi̱ pava̭māna̱ vidha̭rmaṇi | akrā̭nde̱vo na sūrya̭: ||9||
indṷ: paviṣṭa̱ ceta̭naḥ pri̱yaḥ ka̭vī̱nāṃ ma̱tī | sṛ̱jadaśva̭ṃ ra̱thīri̭va ||10||
ū̱rmiryastḙ pa̱vitra̱ ā dḙvā̱vīḥ pa̱ryakṣa̭rat | sīda̭nnṛ̱tasya̱ yoni̱mā ||11||
sa no̭ arṣa pa̱vitra̱ ā mado̱ yo dḙva̱vīta̭maḥ | inda̱vindrā̭ya pī̱tayḙ ||12||
i̱ṣe pa̭vasva̱ dhāra̭yā mṛ̱jyamā̭no manī̱ṣibhi̭: | indo̭ ru̱cābhi gā i̭hi ||13||
pu̱nā̱no vari̭vaskṛ̱dhyūrja̱ṃ janā̭ya girvaṇaḥ | harḙ sṛjā̱na ā̱śira̭m ||14||
pu̱nā̱no de̱vavī̭taya̱ indra̭sya yāhi niṣkṛ̱tam | dyu̱tā̱no vā̱jibhi̭rya̱taḥ ||15||
pra hi̭nvā̱nāsa̱ inda̱vo'cchā̭ samu̱dramā̱śava̭: | dhi̱yā jū̱tā a̭sṛkṣata ||16||
ma̱rmṛ̱jā̱nāsa̭ ā̱yavo̱ vṛthā̭ samu̱draminda̭vaḥ | agma̭nnṛ̱tasya̱ yoni̱mā ||17||
pari̭ ṇo yāhyasma̱yurviśvā̱ vasū̱nyoja̭sā | pā̱hi na̱: śarma̭ vī̱rava̭t ||18||
mimā̭ti̱ vahni̱reta̭śaḥ pa̱daṃ yṷjā̱na ṛkva̭bhiḥ | pra yatsa̭mu̱dra āhi̭taḥ ||19||
ā yadyoni̭ṃ hira̱ṇyaya̭mā̱śuṝ̱tasya̱ sīda̭ti | jahā̱tyapra̭cetasaḥ ||20||
a̱bhi ve̱nā a̭nūṣa̱teya̭kṣanti̱ pracḙtasaḥ | majja̱ntyavi̭cetasaḥ ||21||
indrā̭yendo ma̱rutva̭te̱ pava̭sva̱ madhṷmattamaḥ | ṛ̱tasya̱ yoni̭mā̱sada̭m ||22||
taṃ tvā̱ viprā̭ vaco̱vida̱: pari̭ ṣkṛṇvanti ve̱dhasa̭: | saṃ tvā̭ mṛjantyā̱yava̭: ||23||
rasa̭ṃ te mi̱tro a̭rya̱mā piba̭nti̱ varṷṇaḥ kave | pava̭mānasya ma̱ruta̭: ||24||
tvaṃ so̭ma vipa̱ścita̭ṃ punā̱no vāca̭miṣyasi | indo̭ sa̱hasra̭bharṇasam ||25||
u̱to sa̱hasra̭bharṇasa̱ṃ vāca̭ṃ soma makha̱syuva̭m | pu̱nā̱na i̭nda̱vā bha̭ra ||26||
pu̱nā̱na i̭ndaveṣā̱ṃ purṷhūta̱ janā̭nām | pri̱yaḥ sa̭mu̱dramā vi̭śa ||27||
davi̭dyutatyā ru̱cā pa̭ri̱ṣṭobha̭ntyā kṛ̱pā | somā̭: śu̱krā gavā̭śiraḥ ||28||
hi̱nvā̱no he̱tṛbhi̭rya̱ta ā vāja̭ṃ vā̱jya̭kramīt | sīda̭nto va̱nuṣo̭ yathā ||29||
ṛ̱dhakso̭ma sva̱stayḙ saṃjagmā̱no di̱vaḥ ka̱viḥ | pava̭sva̱ sūryo̭ dṛ̱śe ||30||
30 bhṛgurvāruṇijamadagnirbhārgavo vā | pavamāna: soma: | gāyatrī |
hi̱nvanti̱ sūra̱musra̭ya̱: svasā̭ro jā̱maya̱spati̭m | ma̱hāmindṷṃ mahī̱yuva̭: ||1||
pava̭māna ru̱cārṷcā de̱vo de̱vebhya̱spari̭ | viśvā̱ vasū̱nyā vi̭śa ||2||
ā pa̭vamāna suṣṭu̱tiṃ vṛ̱ṣṭiṃ de̱vebhyo̱ duva̭: | i̱ṣe pa̭vasva sa̱ṃyata̭m ||3||
vṛṣā̱ hyasi̭ bhā̱nunā̭ dyu̱manta̭ṃ tvā havāmahe | pava̭māna svā̱dhya̭: ||4||
ā pa̭vasva su̱vīrya̱ṃ manda̭mānaḥ svāyudha | i̱ho ṣvi̭nda̱vā ga̭hi ||5||
yada̱dbhiḥ pa̭riṣi̱cyasḙ mṛ̱jyamā̭no̱ gabha̭styoḥ | druṇā̭ sa̱dhastha̭maśnuṣe ||6||
pra somā̭ya vyaśva̱vatpava̭mānāya gāyata | ma̱he sa̱hasra̭cakṣase ||7||
yasya̱ varṇa̭ṃ madhu̱ścuta̱ṃ hari̭ṃ hi̱nvantyadri̭bhiḥ | indu̱mindrā̭ya pī̱tayḙ ||8||
tasya̭ te vā̱jino̭ va̱yaṃ viśvā̱ dhanā̭ni ji̱gyuṣa̭: | sa̱khi̱tvamā vṛ̭ṇīmahe ||9||
vṛṣā̭ pavasva̱ dhāra̭yā ma̱rutva̭te ca matsa̱raḥ | viśvā̱ dadhā̭na̱ oja̭sā ||10||
taṃ tvā̭ dha̱rtāra̭mo̱ṇyo̱3: pava̭māna sva̱rdṛśa̭m | hi̱nve vājḙṣu vā̱jina̭m ||11||
a̱yā ci̱tto vi̱pānayā̱ hari̭: pavasva̱ dhāra̭yā | yuja̱ṃ vājḙṣu codaya ||12||
ā na̭ indo ma̱hīmiṣa̱ṃ pava̭sva vi̱śvada̭rśataḥ | a̱smabhya̭ṃ soma gātu̱vit ||13||
ā ka̱laśā̭ anūṣa̱tendo̱ dhārā̭bhi̱roja̭sā | endra̭sya pī̱tayḙ viśa ||14||
yasya̭ te̱ madya̱ṃ rasa̭ṃ tī̱vraṃ du̱hantyadri̭bhiḥ | sa pa̭vasvābhimāti̱hā ||15||
rājā̭ me̱dhābhi̭rīyate̱ pava̭māno ma̱nāvadhi̭ | a̱ntari̭kṣeṇa̱ yāta̭ve ||16||
ā na̭ indo śata̱gvina̱ṃ gavā̱ṃ poṣa̱ṃ svaśvya̭m | vahā̱ bhaga̭ttimū̱tayḙ ||17||
ā na̭: soma̱ saho̱ juvo̭ rū̱paṃ na varca̭se bhara | su̱ṣvā̱ṇo de̱vavī̭taye ||18||
arṣā̭ soma dyu̱matta̭mo̱'bhi droṇā̭ni̱ rorṷvat | sīda̭ñchye̱no na yoni̱mā ||19||
a̱psā indrā̭ya vā̱yave̱ varṷṇāya ma̱rudbhya̭: | somo̭ arṣati̱ viṣṇa̭ve ||20||
iṣa̭ṃ to̱kāya̭ no̱ dadha̭da̱smabhya̭ṃ soma vi̱śvata̭: | ā pa̭vasva saha̱sriṇa̭m ||21||
ye somā̭saḥ parā̱vati̱ ye a̭rvā̱vati̭ sunvi̱re | ye vā̱daḥ śa̭rya̱ṇāva̭ti ||22||
ya ā̭rjī̱keṣu̱ kṛtva̭su̱ ye madhyḙ pa̱styā̭nām | ye vā̱ janḙṣu pa̱ñcasṷ ||23||
te no̭ vṛ̱ṣṭiṃ di̱vaspari̱ pava̭ntā̱mā su̱vīrya̭m | su̱vā̱nā de̱vāsa̱ inda̭vaḥ ||24||
pava̭te harya̱to hari̭rgṛṇā̱no ja̱mada̭gninā | hi̱nvā̱no goradhi̭ tva̱ci ||25||
pra śu̱krāso̭ vayo̱juvo̭ hinvā̱nāso̱ na sapta̭yaḥ | śrī̱ṇā̱nā a̱psu mṛ̭ñjata ||26||
taṃ tvā̭ su̱teṣvā̱bhuvo̭ hinvi̱re de̱vatā̭taye | sa pa̭vasvā̱nayā̭ ru̱cā ||27||
ā te̱ dakṣa̭ṃ mayo̱bhuva̱ṃ vahni̭ma̱dyā vṛ̭ṇīmahe | pānta̱mā pṷru̱spṛha̭m ||28||
ā ma̱ndramā varḙṇya̱mā vipra̱mā ma̭nī̱ṣiṇa̭m | pānta̱mā pṷru̱spṛha̭m ||29||
ā ra̱yimā sṷce̱tuna̱mā sṷkrato ta̱nūṣvā | pānta̱mā pṷru̱spṛha̭m ||30||
30 śataṃ vaikhānasā: | pavamāna: soma:, 19-21 agni: pavamāna: | gāyatrī,18 anuṣṭup |
pava̭sva viśvacarṣaṇe̱'bhi viśvā̭ni̱ kāvyā̭ | sakhā̱ sakhi̭bhya̱ īḍya̭: ||1||
tābhyā̱ṃ viśva̭sya rājasi̱ ye pa̭vamāna̱ dhāma̭nī | pra̱tī̱cī so̭ma ta̱sthatṷ: ||2||
pari̱ dhāmā̭ni̱ yāni̭ te̱ tvaṃ so̭māsi vi̱śvata̭: | pava̭māna ṛ̱tubhi̭: kave ||3||
pava̭sva ja̱naya̱nniṣo̱'bhi viśvā̭ni̱ vāryā̭ | sakhā̱ sakhi̭bhya ū̱tayḙ ||4||
tava̭ śu̱krāso̭ a̱rcayo̭ di̱vaspṛ̱ṣṭhe vi ta̭nvate | pa̱vitra̭ṃ soma̱ dhāma̭bhiḥ ||5||
tave̱me sa̱pta sindha̭vaḥ pra̱śiṣa̭ṃ soma sisrate | tubhya̭ṃ dhāvanti dhe̱nava̭: ||6||
pra so̭ma yāhi̱ dhāra̭yā su̱ta indrā̭ya matsa̱raḥ | dadhā̭no̱ akṣi̭ti̱ śrava̭: ||7||
samṷ tvā dhī̱bhira̭svaranhinva̱tīḥ sa̱pta jā̱maya̭: | vipra̭mā̱jā vi̱vasva̭taḥ ||8||
mṛ̱janti̭ tvā̱ sama̱gruvo'vyḙ jī̱rāvadhi̱ ṣvaṇi̭ | re̱bho yada̱jyase̱ vanḙ ||9||
pava̭mānasya te kave̱ vāji̱ntsargā̭ asṛkṣata | arva̭nto̱ na śra̭va̱syava̭: ||10||
acchā̱ kośa̭ṃ madhu̱ścuta̱masṛ̭gra̱ṃ vārḙ a̱vyayḙ | avā̭vaśanta dhī̱taya̭: ||11||
acchā̭ samu̱draminda̱vo'sta̱ṃ gāvo̱ na dhe̱nava̭: | agma̭nnṛ̱tasya̱ yoni̱mā ||12||
pra ṇa̭ indo ma̱he raṇa̱ āpo̭ arṣanti̱ sindha̭vaḥ | yadgobhi̭rvāsayi̱ṣyasḙ ||13||
asya̭ te sa̱khye va̱yamiya̭kṣanta̱stvota̭yaḥ | indo̭ sakhi̱tvamṷśmasi ||14||
ā pa̭vasva̱ gavi̭ṣṭaye ma̱he so̭ma nṛ̱cakṣa̭se | endra̭sya ja̱ṭharḙ viśa ||15||
ma̱hā~ a̭si soma̱ jyeṣṭha̭ u̱grāṇā̭minda̱ oji̭ṣṭhaḥ | yudhvā̱ sañchaśva̭jjigetha ||16||
ya u̱grebhya̭ści̱dojī̭yā̱ñchūrḙbhyaści̱cchūra̭taraḥ | bhū̱ri̱dābhya̭ści̱nmaṃhī̭yān ||17||
tvaṃ so̭ma̱ sūra̱ eṣa̭sto̱kasya̭ sā̱tā ta̱nūnā̭m | vṛ̱ṇī̱mahḙ sa̱khyāya̭ vṛṇī̱mahe̱ yujyā̭ya ||18||
agna̱ āyṷ̄ṃṣi pavasa̱ ā su̱vorja̱miṣa̭ṃ ca naḥ | ā̱re bā̭dhasva du̱cchunā̭m ||19||
a̱gniṝṣi̱: pava̭māna̱: pāñca̭janyaḥ pu̱rohi̭taḥ | tamī̭mahe mahāga̱yam ||20||
agne̱ pava̭sva̱ svapā̭ a̱sme varca̭: su̱vīrya̭m | dadha̭dra̱yiṃ mayi̱ poṣa̭m ||21||
pava̭māno̱ ati̱ sridho̱'bhya̭rṣati suṣṭu̱tim | sūro̱ na vi̱śvada̭rśataḥ ||22||
sa ma̭rmṛjā̱na ā̱yubhi̱: praya̭svā̱npraya̭se hi̱taḥ | indu̱ratyo̭ vicakṣa̱ṇaḥ ||23||
pava̭māna ṛ̱taṃ bṛ̱hacchu̱kraṃ jyoti̭rajījanat | kṛ̱ṣṇā tamā̭ṃsi̱ jaṅgha̭nat ||24||
pava̭mānasya̱ jaṅghna̭to̱ harḙśca̱ndrā a̭sṛkṣata | jī̱rā a̭ji̱raśo̭ciṣaḥ ||25||
pava̭māno ra̱thīta̭maḥ śu̱bhrebhi̭: śu̱bhraśa̭stamaḥ | hari̭ścandro ma̱rudga̭ṇaḥ ||26||
pava̭māno̱ vya̭śnavadra̱śmibhi̭rvāja̱sāta̭maḥ | dadha̭tsto̱tre su̱vīrya̭m ||27||
pra sṷvā̱na indṷrakṣāḥ pa̱vitra̱matya̱vyaya̭m | pu̱nā̱na indu̱rindra̱mā ||28||
e̱ṣa somo̱ adhi̭ tva̱ci gavā̭ṃ krīḻa̱tyadri̭bhiḥ | indra̱ṃ madā̭ya̱ johṷvat ||29||
yasya̭ te dyu̱mnava̱tpaya̱: pava̭mā̱nābhṛ̭taṃ di̱vaḥ | tena̭ no mṛḻa jī̱vasḙ ||30||
(1-32) 1-3 bharadvājo bārhaspatya:, 4-6 kaśyapo mārīca:, 7-9 gotamo rāhūgaṇa:, 10-12 atrirbhauma:, 13-15 viśvāmitro gāthina:, 16-18 jamadagnirbhārgava:, 19-21 vasiṣṭho maitrāvaruṇi:,22-32 pavitra āṅgiraso  vā vasiṣṭho vā ubhau vā | pavamānaḥ soma:, 10-12 pavamānaḥ pūṣā vā, 23-27 pavamāno'gni:, 25 pavamānaḥ savitā vā, 26 pavamānāgnisavitāra:, 27 viśve devā vā , 31-32 pavamānyadhyetā |gāyatrī, 16 -18 nityadvipadā gāyatrī , 30 purauṣṇik; 27 ,31 ,32, anuṣṭup |
tvaṃ so̭māsi dhāra̱yurma̱ndra oji̭ṣṭho adhva̱re | pava̭sva maṃha̱yadra̭yiḥ ||1||
tvaṃ su̱to nṛ̱māda̭no dadha̱nvānma̭tsa̱rinta̭maḥ | indrā̭ya sū̱rirandha̭sā ||2||
tvaṃ sṷṣvā̱ṇo adri̭bhira̱bhya̭rṣa̱ kani̭kradat | dyu̱manta̱ṃ śuṣma̭mutta̱mam ||3||
indṷrhinvā̱no a̭rṣati ti̱ro vārā̭ṇya̱vyayā̭ | hari̱rvāja̭macikradat ||4||
indo̱ vyavya̭marṣasi̱ vi śravā̭ṃsi̱ vi saubha̭gā | vi vājā̭ntsoma̱ goma̭taḥ ||5||
ā na̭ indo śata̱gvina̭ṃ ra̱yiṃ goma̭ntama̱śvina̭m | bharā̭ soma saha̱sriṇa̭m ||6||
pava̭mānāsa̱ inda̭vasti̱raḥ pa̱vitra̭mā̱śava̭: | indra̱ṃ yāmḙbhirāśata ||7||
ka̱ku̱haḥ so̱myo rasa̱ indu̱rindrā̭ya pū̱rvyaḥ | ā̱yuḥ pa̭vata ā̱yavḙ ||8||
hi̱nvanti̱ sūra̱musra̭ya̱: pava̭mānaṃ madhu̱ścuta̭m | a̱bhi gi̱rā sama̭svaran ||9||
a̱vi̱tā no̭ a̱jāśva̭: pū̱ṣā yāma̭niyāmani | ā bha̭kṣatka̱nyā̭su naḥ ||10||
a̱yaṃ soma̭: kapa̱rdinḙ ghṛ̱taṃ na pa̭vate̱ madhṷ | ā bha̭kṣatka̱nyā̭su naḥ ||11||
a̱yaṃ ta̭ āghṛṇe su̱to ghṛ̱taṃ na pa̭vate̱ śuci̭ | ā bha̭kṣatka̱nyā̭su naḥ ||12||
vā̱co ja̱ntuḥ ka̭vī̱nāṃ pava̭sva soma̱ dhāra̭yā | de̱veṣṷ ratna̱dhā a̭si ||13||
ā ka̱laśḙṣu dhāvati śye̱no varma̱ vi gā̭hate | a̱bhi droṇā̱ kani̭kradat ||14||
pari̱ pra so̭ma te̱ raso'sa̭rji ka̱laśḙ su̱taḥ | śye̱no na ta̱kto a̭rṣati ||15||
pava̭sva soma ma̱ndaya̱nnindrā̭ya̱ madhṷmattamaḥ ||16||
asṛ̭grande̱vavī̭taye vāja̱yanto̱ rathā̭ iva ||17||
te su̱tāso̭ ma̱dinta̭māḥ śu̱krā vā̱yuma̭sṛkṣata ||18||
grāvṇā̭ tu̱nno a̱bhiṣṭṷtaḥ pa̱vitra̭ṃ soma gacchasi | dadha̭tsto̱tre su̱vīrya̭m ||19||
e̱ṣa tu̱nno a̱bhiṣṭṷtaḥ pa̱vitra̱mati̭ gāhate | ra̱kṣo̱hā vāra̭ma̱vyaya̭m ||20||
yadanti̱ yacca̭ dūra̱ke bha̱yaṃ vi̱ndati̱ māmi̱ha | pava̭māna̱ vi tajja̭hi ||21||
pava̭māna̱: so a̱dya na̭: pa̱vitrḙṇa̱ vica̭rṣaṇiḥ | yaḥ po̱tā sa pṷnātu naḥ ||22||
yattḙ pa̱vitra̭ma̱rciṣyagne̱ vita̭tama̱ntarā | brahma̱ tena̭ punīhi naḥ ||23||
yattḙ pa̱vitra̭marci̱vadagne̱ tena̭ punīhi naḥ | bra̱hma̱sa̱vaiḥ pṷnīhi naḥ ||24||
u̱bhābhyā̭ṃ deva savitaḥ pa̱vitrḙṇa sa̱vena̭ ca | māṃ pṷnīhi vi̱śvata̭: ||25||
tri̱bhiṣṭvaṃ dḙva savita̱rvarṣi̭ṣṭhaiḥ soma̱ dhāma̭bhiḥ | agne̱ dakṣai̭: punīhi naḥ ||26||
pu̱nantu̱ māṃ dḙvaja̱nāḥ pu̱nantu̱ vasa̭vo dhi̱yā | viśvḙ devāḥ punī̱ta mā̱ jāta̭vedaḥ punī̱hi mā̭ ||27||
pra pyā̭yasva̱ pra sya̭ndasva̱ soma̱ viśvḙbhira̱ṃśubhi̭: | de̱vebhya̭ utta̱maṃ ha̱viḥ ||28||
upa̭ pri̱yaṃ pani̭pnata̱ṃ yuvā̭namāhutī̱vṛdha̭m | aga̭nma̱ bibhra̭to̱ nama̭: ||29||
a̱lāyya̭sya para̱śurna̭nāśa̱ tamā pa̭vasva deva soma | ā̱khuṃ ci̭de̱va dḙva soma ||30||
yaḥ pā̭vamā̱nīra̱dhyetyṛṣi̭bhi̱: sambhṛ̭ta̱ṃ rasa̭m | sarva̱ṃ sa pū̱tama̭śnāti svadi̱taṃ mā̭ta̱riśva̭nā ||31||
pā̱va̱mā̱nīryo a̱dhyetyṛṣi̭bhi̱: sambhṛ̭ta̱ṃ rasa̭m | tasmai̱ sara̭svatī duhe kṣī̱raṃ sa̱rpirmadhṷ̄da̱kam ||32||
10vatsaprirbhālandana: | pavamāna: soma: |jagatī ,10 triṣṭup |
pra de̱vamacchā̱ madhṷmanta̱ inda̱vo'si̭ṣyadanta̱ gāva̱ ā na dhe̱nava̭: |
ba̱rhi̱ṣado̭ vaca̱nāva̭nta̱ ūdha̭bhiḥ pari̱sruta̭mu̱sriyā̭ ni̱rṇija̭ṃ dhire ||1||
sa rorṷvada̱bhi pūrvā̭ acikradadupā̱ruha̭: śra̱thaya̭ntsvādate̱ hari̭: |
ti̱raḥ pa̱vitra̭ṃ pari̱yannu̱ru jrayo̱ ni śaryā̭ṇi dadhate de̱va ā vara̭m ||2||
vi yo ma̱me ya̱myā̭ saṃya̱tī mada̭: sāka̱ṃvṛdhā̱ paya̭sā pinva̱dakṣi̭tā |
ma̱hī a̭pā̱re raja̭sī vi̱vevi̭dadabhi̱vraja̱nnakṣi̭ta̱ṃ pāja̱ ā da̭de ||3||
sa mā̱tarā̭ vi̱cara̭nvā̱jaya̭nna̱paḥ pra medhi̭raḥ sva̱dhayā̭ pinvate pa̱dam |
a̱ṃśuryavḙna pipiśe ya̱to nṛbhi̱: saṃ jā̱mibhi̱rnasa̭te̱ rakṣa̭te̱ śira̭: ||4||
saṃ dakṣḙṇa̱ mana̭sā jāyate ka̱viṝ̱tasya̱ garbho̱ nihi̭to ya̱mā pa̱raḥ |
yūnā̭ ha̱ santā̭ pratha̱maṃ vi ja̭jñatu̱rguhā̭ hi̱taṃ jani̭ma̱ nema̱mudya̭tam ||5||
ma̱ndrasya̭ rū̱paṃ vi̭vidurmanī̱ṣiṇa̭: śye̱no yadandho̱ abha̭ratparā̱vata̭: |
taṃ ma̭rjayanta su̱vṛdha̭ṃ na̱dīṣvā~ u̱śanta̭ma̱ṃśuṃ pa̭ri̱yanta̭mṛ̱gmiya̭m ||6||
tvāṃ mṛ̭janti̱ daśa̱ yoṣa̭ṇaḥ su̱taṃ soma̱ ṛṣi̭bhirma̱tibhi̭rdhī̱tibhi̭rhi̱tam |
avyo̱ vārḙbhiru̱ta de̱vahṷ̄tibhi̱rnṛbhi̭rya̱to vāja̱mā da̭rṣi sā̱tayḙ ||7||
pa̱ri̱pra̱yanta̭ṃ va̱yya̭ṃ suṣa̱ṃsada̱ṃ soma̭ṃ manī̱ṣā a̱bhya̭nūṣata̱ stubha̭: |
yo dhāra̭yā̱ madhṷmā~ ū̱rmiṇā̭ di̱va iya̭rti̱ vāca̭ṃ rayi̱ṣāḻama̭rtyaḥ ||8||
a̱yaṃ di̱va i̭yarti̱ viśva̱mā raja̱: soma̭: punā̱naḥ ka̱laśḙṣu sīdati |
a̱dbhirgobhi̭rmṛjyate̱ adri̭bhiḥ su̱taḥ pṷnā̱na indu̱rvari̭vo vidatpri̱yam ||9||
e̱vā na̭: soma pariṣi̱cyamā̭no̱ vayo̱ dadha̭cci̱trata̭maṃ pavasva |
a̱dve̱ṣe dyāvā̭pṛthi̱vī hṷvema̱ devā̭ dha̱tta ra̱yima̱sme su̱vīra̭m ||10||
10 hiraṇyastūpa   āṅgirasa: | pavamāna: soma: |jagatī ,9-10 triṣṭup |
iṣu̱rna dhanva̱nprati̭ dhīyate ma̱tirva̱tso na mā̱turupa̭ sa̱rjyūdha̭ni |
u̱rudhā̭reva duhe̱ agra̭ āya̱tyasya̭ vra̱teṣvapi̱ soma̭ iṣyate ||1||
upo̭ ma̱tiḥ pṛ̱cyatḙ si̱cyate̱ madhṷ ma̱ndrāja̭nī codate a̱ntarā̱sani̭ |
pava̭mānaḥ saṃta̱niḥ pra̭ghna̱tāmi̭va̱ madhṷmāndra̱psaḥ pari̱ vāra̭marṣati ||2||
avyḙ vadhū̱yuḥ pa̭vate̱ pari̭ tva̱ci śra̭thnī̱te na̱ptīradi̭teṝ̱taṃ ya̱te |
hari̭rakrānyaja̱taḥ sa̭ṃya̱to mado̭ nṛ̱mṇā śiśā̭no mahi̱ṣo na śo̭bhate ||3||
u̱kṣā mi̭māti̱ prati̭ yanti dhe̱navo̭ de̱vasya̭ de̱vīrupa̭ yanti niṣkṛ̱tam |
atya̭kramī̱darjṷna̱ṃ vāra̭ma̱vyaya̱matka̱ṃ na ni̱ktaṃ pari̱ somo̭ avyata ||4||
amṛ̭ktena̱ ruśa̭tā̱ vāsa̭sā̱ hari̱rama̭rtyo nirṇijā̱naḥ pari̭ vyata |
di̱vaspṛ̱ṣṭhaṃ ba̱rhaṇā̭ ni̱rṇijḙ kṛtopa̱stara̭ṇaṃ ca̱mvo̭rnabha̱smaya̭m ||5||
sūrya̭syeva ra̱śmayo̭ drāvayi̱tnavo̭ matsa̱rāsa̭: pra̱supa̭: sā̱kamī̭rate |
tantṷṃ ta̱taṃ pari̱ sargā̭sa ā̱śavo̱ nendrā̭dṛ̱te pa̭vate̱ dhāma̱ kiṃ ca̱na ||6||
sindho̭riva prava̱ṇe ni̱mna ā̱śavo̱ vṛṣa̭cyutā̱ madā̭so gā̱tumā̭śata |
śaṃ no̭ nive̱śe dvi̱pade̱ catṷṣpade̱'sme vājā̭: soma tiṣṭhantu kṛ̱ṣṭaya̭: ||7||
ā na̭: pavasva̱ vasṷma̱ddhira̭ṇyava̱daśvā̭va̱dgoma̱dyava̭matsu̱vīrya̭m |
yū̱yaṃ hi so̭ma pi̱taro̱ mama̱ sthana̭ di̱vo mū̱rdhāna̱: prasthi̭tā vaya̱skṛta̭: ||8||
e̱te somā̱: pava̭mānāsa̱ indra̱ṃ rathā̭ iva̱ pra ya̭yuḥ sā̱timaccha̭ |
su̱tāḥ pa̱vitra̱mati̭ ya̱ntyavya̭ṃ hi̱tvī va̱vriṃ ha̱rito̭ vṛ̱ṣṭimaccha̭ ||9||
inda̱vindrā̭ya bṛha̱te pa̭vasva sumṛḻī̱ko a̭nava̱dyo ri̱śādā̭: |
bharā̭ ca̱ndrāṇi̭ gṛṇa̱te vasṷ̄ni de̱vairdyā̭vāpṛthivī̱ prāva̭taṃ naḥ ||10||
reṇurvaiśvāmitra: | pavamāna: soma: |jagatī ,10 triṣṭup |
trira̭smai sa̱pta dhe̱navo̭ duduhre sa̱tyāmā̱śira̭ṃ pū̱rvye vyo̭mani |
ca̱tvārya̱nyā bhuva̭nāni ni̱rṇije̱ cārṷ̄ṇi cakre̱ yadṛ̱tairava̭rdhata ||1||
sa bhikṣa̭māṇo a̱mṛta̭sya̱ cārṷṇa u̱bhe dyāvā̱ kāvyḙnā̱ vi śa̭śrathe |
teji̭ṣṭhā a̱po ma̱ṃhanā̱ pari̭ vyata̱ yadī̭ de̱vasya̱ śrava̭sā̱ sado̭ vi̱duḥ ||2||
te a̭sya santu ke̱tavo'mṛ̭tya̱vo'dā̭bhyāso ja̱nuṣī̭ u̱bhe anṷ |
yebhi̭rnṛ̱mṇā ca̭ de̱vyā̭ ca puna̱ta ādidrājā̭naṃ ma̱nanā̭ agṛbhṇata ||3||
sa mṛ̱jyamā̭no da̱śabhi̭: su̱karma̭bhi̱: pra ma̭dhya̱māsṷ mā̱tṛṣṷ pra̱me sacā̭ |
vra̱tāni̭ pā̱no a̱mṛta̭sya̱ cārṷṇa u̱bhe nṛ̱cakṣā̱ anṷ paśyate̱ viśaṷ ||4||
sa ma̭rmṛjā̱na i̭ndri̱yāya̱ dhāya̭sa̱ obhe a̱ntā roda̭sī harṣate hi̱taḥ |
vṛṣā̱ śuṣmḙṇa bādhate̱ vi dṷrma̱tīrā̱dedi̭śānaḥ śarya̱heva̭ śu̱rudha̭: ||5||
sa mā̱tarā̱ na dadṛ̭śāna u̱sriyo̱ nāna̭dadeti ma̱rutā̭miva sva̱naḥ |
jā̱nannṛ̱taṃ pra̭tha̱maṃ yatsva̭rṇara̱ṃ praśa̭staye̱ kama̭vṛṇīta su̱kratṷ: ||6||
ru̱vati̭ bhī̱mo vṛ̭ṣa̱bhasta̭vi̱ṣyayā̱ śṛṅge̱ śiśā̭no̱ hari̭ṇī vicakṣa̱ṇaḥ |
ā yoni̱ṃ soma̱: sukṛ̭ta̱ṃ ni ṣī̭dati ga̱vyayī̱ tvagbha̭vati ni̱rṇiga̱vyayī̭ ||7||
śuci̭: punā̱nasta̱nva̭mare̱pasa̱mavye̱ hari̱rnya̭dhāviṣṭa̱ sāna̭vi |
juṣṭo̭ mi̱trāya̱ varṷṇāya vā̱yavḙ tri̱dhātu̱ madhṷ kriyate su̱karma̭bhiḥ ||8||
pava̭sva soma de̱vavī̭taye̱ vṛṣendra̭sya̱ hārdi̭ soma̱dhāna̱mā vi̭śa |
pu̱rā no̭ bā̱dhāddṷri̱tāti̭ pāraya kṣetra̱viddhi diśa̱ āhā̭ vipṛccha̱te ||9||
hi̱to na sapti̭ra̱bhi vāja̭ma̱rṣendra̭syendo ja̱ṭhara̱mā pa̭vasva |
nā̱vā na sindhu̱mati̭ parṣi vi̱dvāñchūro̱ na yudhya̱nnava̭ no ni̱daḥ spa̭: ||10||
9 ṛṣabho vaiśvāmitra: | pavamāna: soma: |jagatī ,9 triṣṭup  |
ā dakṣi̭ṇā sṛjyate śu̱ṣmyā̱3sada̱ṃ veti̭ dru̱ho ra̱kṣasa̭: pāti̱ jāgṛ̭viḥ |
hari̭ropa̱śaṃ kṛ̭ṇute̱ nabha̱spaya̭ upa̱stirḙ ca̱mvo̱3rbrahma̭ ni̱rṇijḙ ||1||
pra kṛ̭ṣṭi̱heva̭ śū̱ṣa ḙti̱ rorṷvadasu̱ryaṃ1 varṇa̱ṃ ni ri̭ṇīte asya̱ tam |
jahā̭ti va̱vriṃ pi̱turḙti niṣkṛ̱tamṷpa̱pruta̭ṃ kṛṇute ni̱rṇija̱ṃ tanā̭ ||2||
adri̭bhiḥ su̱taḥ pa̭vate̱ gabha̭styorvṛṣā̱yate̱ nabha̭sā̱ vepa̭te ma̱tī |
sa mo̭date̱ nasa̭te̱ sādha̭te gi̱rā nḙni̱kte a̱psu yaja̭te̱ parī̭maṇi ||3||
pari̭ dyu̱kṣaṃ saha̭saḥ parvatā̱vṛdha̱ṃ madhva̭: siñcanti ha̱rmyasya̭ sa̱kṣaṇi̭m |
ā yasmi̱ngāva̭: suhu̱tāda̱ ūdha̭ni mū̱rdhañchrī̱ṇantya̭gri̱yaṃ varī̭mabhiḥ ||4||
samī̱ ratha̱ṃ na bhu̱rijo̭raheṣata̱ daśa̱ svasā̭ro̱ adi̭teru̱pastha̱ ā |
jigā̱dupa̭ jrayati̱ gora̭pī̱cya̭ṃ pa̱daṃ yada̭sya ma̱tuthā̱ ajī̭janan ||5||
śye̱no na yoni̱ṃ sada̭naṃ dhi̱yā kṛ̱taṃ hi̭ra̱ṇyaya̭mā̱sada̭ṃ de̱va eṣa̭ti |
e ri̭ṇanti ba̱rhiṣi̭ pri̱yaṃ gi̱rā'śvo̱ na de̱vā~ apyḙti ya̱jñiya̭: ||6||
parā̱ vya̭kto aru̱ṣo di̱vaḥ ka̱virvṛṣā̭ tripṛ̱ṣṭho a̭naviṣṭa̱ gā a̱bhi |
sa̱hasra̭ṇīti̱ryati̭: parā̱yatī̭ re̱bho na pū̱rvīru̱ṣaso̱ vi rā̭jati ||7||
tve̱ṣaṃ rū̱paṃ kṛ̭ṇute̱ varṇo̭ asya̱ sa yatrāśa̭ya̱tsamṛ̭tā̱ sedha̭ti sri̱dhaḥ |
a̱psā yā̭ti sva̱dhayā̱ daivya̱ṃ jana̱ṃ saṃ sṷṣṭu̱tī nasa̭te̱ saṃ goa̭grayā ||8||
u̱kṣeva̭ yū̱thā pa̭ri̱yanna̭rāvī̱dadhi̱ tviṣī̭radhita̱ sūrya̭sya |
di̱vyaḥ sṷpa̱rṇo'va̭ cakṣata̱ kṣāṃ soma̱: pari̱ kratṷnā paśyate̱ jāḥ ||9||
9 harimanta āṅgirasa: | pavamāna: soma: |jagatī  |
hari̭ṃ mṛjantyaru̱ṣo na yṷjyate̱ saṃ dhe̱nubhi̭: ka̱laśe̱ somo̭ ajyate |
udvāca̭mī̱raya̭ti hi̱nvatḙ ma̱tī pṷruṣṭu̱tasya̱ kati̭ citpari̱priya̭: ||1||
sā̱kaṃ va̭danti ba̱havo̭ manī̱ṣiṇa̱ indra̭sya̱ soma̭ṃ ja̱ṭhare̱ yadā̭du̱huḥ |
yadī̭ mṛ̱janti̱ suga̭bhastayo̱ nara̱: sanī̭ḻābhirda̱śabhi̱: kāmya̱ṃ madhṷ ||2||
ara̭mamāṇo̱ atyḙti̱ gā a̱bhi sūrya̭sya pri̱yaṃ dṷhi̱tusti̱ro rava̭m |
anva̭smai̱ joṣa̭mabharadvinaṃgṛ̱saḥ saṃ dva̱yībhi̱: svasṛ̭bhiḥ kṣeti jā̱mibhi̭: ||3||
nṛdhṷ̄to̱ adri̭ṣuto ba̱rhiṣi̭ pri̱yaḥ pati̱rgavā̭ṃ pra̱diva̱ indṷṝ̱tviya̭: |
pura̭ṃdhivā̱nmanṷṣo yajña̱sādha̭na̱: śuci̭rdhi̱yā pa̭vate̱ soma̭ indra te ||4||
nṛbā̱hubhyā̭ṃ codi̱to dhāra̭yā su̱to̭'nuṣva̱dhaṃ pa̭vate̱ soma̭ indra te |
āprā̱: kratū̱ntsama̭jairadhva̱re ma̱tīrverna dru̱ṣacca̱mvo̱3rāsa̭da̱ddhari̭: ||5||
a̱ṃśuṃ dṷhanti sta̱naya̭nta̱makṣi̭taṃ ka̱viṃ ka̱vayo̱'paso̭ manī̱ṣiṇa̭: |
samī̱ gāvo̭ ma̱tayo̭ yanti sa̱ṃyata̭ ṛ̱tasya̱ yonā̱ sada̭ne puna̱rbhuva̭: ||6||
nābhā̭ pṛthi̱vyā dha̱ruṇo̭ ma̱ho di̱vo̱3'pāmū̱rmau sindhṷṣva̱ntarṷkṣi̱taḥ |
indra̭sya̱ vajro̭ vṛṣa̱bho vi̱bhūva̭su̱: somo̭ hṛ̱de pa̭vate̱ cārṷ matsa̱raḥ ||7||
sa tū pa̭vasva̱ pari̱ pārthi̭va̱ṃ raja̭: sto̱tre śikṣa̭nnādhūnva̱te ca̭ sukrato |
mā no̱ nirbhā̱gvasṷnaḥ sādana̱spṛśo̭ ra̱yiṃ pi̱śaṅga̭ṃ bahu̱laṃ va̭sīmahi ||8||
ā tū na̭ indo śa̱tadā̱tvaśvya̭ṃ sa̱hasra̭dātu paśu̱maddhira̭ṇyavat |
upa̭ māsva bṛha̱tī re̱vatī̱riṣo'dhi̭ sto̱trasya̭ pavamāna no gahi ||9||
9 pavitra āṅgirasa: | pavamāna: soma: |jagatī  |
srakvḙ dra̱psasya̱ dhama̭ta̱: sama̭svarannṛ̱tasya̱ yonā̱ sama̭ranta̱ nābha̭yaḥ |
trīntsa mū̱rdhno asṷraścakra ā̱rabhḙ sa̱tyasya̱ nāva̭: su̱kṛta̭mapīparan ||1||
sa̱myaksa̱myañco̭ mahi̱ṣā a̭heṣata̱ sindho̭rū̱rmāvadhi̭ ve̱nā a̭vīvipan |
madho̱rdhārā̭bhirja̱naya̭nto a̱rkamitpri̱yāmindra̭sya ta̱nva̭mavīvṛdhan ||2||
pa̱vitra̭vanta̱: pari̱ vāca̭māsate pi̱taiṣā̭ṃ pra̱tno a̱bhi ra̭kṣati vra̱tam |
ma̱haḥ sa̭mu̱draṃ varṷṇasti̱ro da̭dhe̱ dhīrā̱ icchḙkurdha̱ruṇḙṣvā̱rabha̭m ||3||
sa̱hasra̭dhā̱re'va̱ te sama̭svarandi̱vo nāke̱ madhṷjihvā asa̱ścata̭: |
asya̱ spaśo̱ na ni mi̭ṣanti̱ bhūrṇa̭yaḥ pa̱depa̭de pā̱śina̭: santi̱ seta̭vaḥ ||4||
pi̱turmā̱turadhyā ye sa̱masva̭rannṛ̱cā śoca̭ntaḥ sa̱ṃdaha̭nto avra̱tān |
indra̭dviṣṭā̱mapa̭ dhamanti mā̱yayā̱ tvaca̱masi̭knī̱ṃ bhūma̭no di̱vaspari̭ ||5||
pra̱tnānmānā̱dadhyā ye sa̱masva̭ra̱ñchloka̭yantrāso rabha̱sasya̱ manta̭vaḥ |
apā̭na̱kṣāso̭ badhi̱rā a̭hāsata ṛ̱tasya̱ panthā̱ṃ na ta̭ranti du̱ṣkṛta̭: ||6||
sa̱hasra̭dhāre̱ vita̭te pa̱vitra̱ ā vāca̭ṃ punanti ka̱vayo̭ manī̱ṣiṇa̭: |
ru̱drāsa̭ eṣāmiṣi̱rāso̭ a̱druha̱: spaśa̱: svañca̭: su̱dṛśo̭ nṛ̱cakṣa̭saḥ ||7||
ṛ̱tasya̭ go̱pā na dabhā̭ya su̱kratu̱strī ṣa pa̱vitrā̭ hṛ̱dya1ntarā da̭dhe |
vi̱dvāntsa viśvā̱ bhuva̭nā̱bhi pa̭śya̱tyavājṷṣṭānvidhyati ka̱rte a̭vra̱tān ||8||
ṛ̱tasya̱ tantu̱rvita̭taḥ pa̱vitra̱ ā ji̱hvāyā̱ agre̱ varṷṇasya mā̱yayā̭ |
dhīrā̭ści̱ttatsa̱mina̭kṣanta āśa̱tā'trā̭ ka̱rtamava̭ padā̱tyapra̭bhuḥ ||9||
9 kakṣīvān dairghatamasa: | pavamāna: soma: |jagatī , 8 triṣṭup |
śiśu̱rna jā̱to'va̭ cakrada̱dvane̱ sva1ryadvā̱jya̭ru̱ṣaḥ siṣā̭sati |
di̱vo reta̭sā sacate payo̱vṛdhā̱ tamī̭mahe suma̱tī śarma̭ sa̱pratha̭: ||1||
di̱vo yaḥ ska̱mbho dha̱ruṇa̱: svā̭tata̱ āpṷ̄rṇo a̱ṃśuḥ pa̱ryeti̭ vi̱śvata̭: |
seme ma̱hī roda̭sī yakṣadā̱vṛtā̭ samīcī̱ne dā̭dhāra̱ samiṣa̭: ka̱viḥ ||2||
mahi̱ psara̱: sukṛ̭taṃ so̱myaṃ madhū̱rvī gavyṷ̄ti̱radi̭teṝ̱taṃ ya̱te |
īśe̱ yo vṛ̱ṣṭeri̱ta u̱sriyo̱ vṛṣā̱'pāṃ ne̱tā ya i̱taṷ̄tiṝ̱gmiya̭: ||3||
ā̱tma̱nvannabho̭ duhyate ghṛ̱taṃ paya̭ ṛ̱tasya̱ nābhi̭ra̱mṛta̱ṃ vi jā̭yate |
sa̱mī̱cī̱nāḥ su̱dāna̭vaḥ prīṇanti̱ taṃ naro̭ hi̱tamava̭ mehanti̱ pera̭vaḥ ||4||
arā̭vīda̱ṃśuḥ saca̭māna ū̱rmiṇā̭ devā̱vyaṃ1 manṷṣe pinvati̱ tvaca̭m |
dadhā̭ti̱ garbha̱madi̭teru̱pastha̱ ā yena̭ to̱kaṃ ca̱ tana̭yaṃ ca̱ dhāma̭he ||5||
sa̱hasra̭dhā̱re'va̱ tā a̭sa̱ścata̭stṛ̱tīyḙ santu̱ raja̭si pra̱jāva̭tīḥ |
cata̭sro̱ nābho̱ nihi̭tā a̱vo di̱vo ha̱virbha̭rantya̱mṛta̭ṃ ghṛta̱ścuta̭: ||6||
śve̱taṃ rū̱paṃ kṛ̭ṇute̱ yatsiṣā̭sati̱ somo̭ mī̱ḍhvā~ asṷro veda̱ bhūma̭naḥ |
dhi̱yā śamī̭ sacate̱ sema̱bhi pra̱vaddi̱vaskava̭ndha̱mava̭ darṣadu̱driṇa̭m ||7||
adha̭ śve̱taṃ ka̱laśa̱ṃ gobhi̭ra̱ktaṃ kārṣma̱nnā vā̱jya̭kramītsasa̱vān |
ā hi̭nvire̱ mana̭sā deva̱yanta̭: ka̱kṣīva̭te śa̱tahi̭māya̱ gonā̭m ||8||
a̱dbhiḥ so̭ma papṛcā̱nasya̭ te̱ raso'vyo̱ vāra̱ṃ vi pa̭vamāna dhāvati |
sa mṛ̱jyamā̭naḥ ka̱vibhi̭rmadintama̱ svada̱svendrā̭ya pavamāna pī̱tayḙ ||9||
5 kavirbhārgava: | pavamāna: soma: |jagatī  |
a̱bhi pri̱yāṇi̭ pavate̱ cano̭hito̱ nāmā̭ni ya̱hvo adhi̱ yeṣu̱ vardha̭te |
ā sūrya̭sya bṛha̱to bṛ̱hannadhi̱ ratha̱ṃ viṣva̭ñcamaruhadvicakṣa̱ṇaḥ ||1||
ṛ̱tasya̭ ji̱hvā pa̭vate̱ madhṷ pri̱yaṃ va̱ktā pati̭rdhi̱yo a̱syā adā̭bhyaḥ |
dadhā̭ti pu̱traḥ pi̱trora̭pī̱cyaṃ1 nāma̭ tṛ̱tīya̱madhi̭ roca̱ne di̱vaḥ ||2||
ava̭ dyutā̱naḥ ka̱laśā̭~ acikrada̱nnṛbhi̭ryemā̱naḥ kośa̱ ā hi̭ra̱ṇyayḙ |
a̱bhīmṛ̱tasya̭ do̱hanā̭ anūṣa̱tā'dhi̭ tripṛ̱ṣṭha u̱ṣaso̱ vi rā̭jati ||3||
adri̭bhiḥ su̱to ma̱tibhi̱ścano̭hitaḥ praro̱caya̱nroda̭sī mā̱tarā̱ śuci̭: |
romā̱ṇyavyā̭ sa̱mayā̱ vi dhā̭vati̱ madho̱rdhārā̱ pinva̭mānā di̱vedi̭ve ||4||
pari̭ soma̱ pra dha̭nvā sva̱staye̱ nṛbhi̭: punā̱no a̱bhi vā̭sayā̱śira̭m |
ye te̱ madā̭ āha̱naso̱ vihā̭yasa̱stebhi̱rindra̭ṃ codaya̱ dāta̭ve ma̱gham ||5||
5 kavirbhārgava: | pavamāna: soma: |jagatī  |
dha̱rtā di̱vaḥ pa̭vate̱ kṛtvyo̱ raso̱ dakṣo̭ de̱vānā̭manu̱mādyo̱ nṛbhi̭: |
hari̭: sṛjā̱no atyo̱ na satva̭bhi̱rvṛthā̱ pājā̭ṃsi kṛṇute na̱dīṣvā ||1
śūro̱ na dha̭tta̱ āyṷdhā̱ gabha̭styo̱: sva1: siṣā̭sanrathi̱ro gavi̭ṣṭiṣu |
indra̭sya̱ śuṣma̭mī̱raya̭nnapa̱syubhi̱rindṷrhinvā̱no a̭jyate manī̱ṣibhi̭: ||2||
indra̭sya soma̱ pava̭māna ū̱rmiṇā̭ tavi̱ṣyamā̭ṇo ja̱ṭhare̱ṣvā vi̭śa |
 pra ṇa̭: pinva vi̱dyuda̱bhreva̱ roda̭sī dhi̱yā na vājā̱~ upa̭ māsi̱ śaśva̭taḥ ||3||
viśva̭sya̱ rājā̭ pavate sva̱rdṛśa̭ ṛ̱tasya̭ dhī̱timṛ̭ṣi̱ṣāḻa̭vīvaśat |
yaḥ sūrya̱syāsi̭reṇa mṛ̱jyatḙ pi̱tā ma̭tī̱nāmasa̭maṣṭakāvyaḥ ||4||
vṛṣḙva yū̱thā pari̱ kośa̭marṣasya̱pāmu̱pasthḙ vṛṣa̱bhaḥ kani̭kradat |
sa indrā̭ya pavase matsa̱rinta̭mo̱ yathā̱ jeṣā̭ma sami̱the tvota̭yaḥ ||5||
5 kavirbhārgava: | pavamāna: soma: |jagatī  |
e̱ṣa pra kośe̱ madhṷmā~ acikrada̱dindra̭sya̱ vajro̱ vapṷṣo̱ vapṷṣṭaraḥ |
a̱bhīmṛ̱tasya̭ su̱dughā̭ ghṛta̱ścuto̭ vā̱śrā a̭rṣanti̱ paya̭seva dhe̱nava̭: ||1||
sa pū̱rvyaḥ pa̭vate̱ yaṃ di̱vaspari̭ śye̱no ma̭thā̱yadi̭ṣi̱tasti̱ro raja̭: |
sa madhva̱ ā yṷvate̱ vevi̭jāna̱ itkṛ̱śāno̱rastu̱rmana̱sāha̭ bi̱bhyuṣā̭ ||2||
te na̱: pūrvā̭sa̱ upa̭rāsa̱ inda̭vo ma̱he vājā̭ya dhanvantu̱ goma̭te |
ī̱kṣe̱ṇyā̭so a̱hyo̱3 na cāra̭vo̱ brahma̭brahma̱ ye jṷju̱ṣurha̱virha̭viḥ ||3||
a̱yaṃ no̭ vi̱dvānva̭navadvanuṣya̱ta indṷ: sa̱trācā̱ mana̭sā puruṣṭu̱taḥ |
i̱nasya̱ yaḥ sada̭ne̱ garbha̭māda̱dhe gavā̭muru̱bjama̱bhyarṣa̭ti vra̱jam ||4||
cakri̭rdi̱vaḥ pa̭vate̱ kṛtvyo̱ raso̭ ma̱hā~ ada̭bdho̱ varṷṇo hu̱rugya̱te |
asā̭vi mi̱tro vṛ̱janḙṣu ya̱jñiyo'tyo̱ na yū̱the vṛ̭ṣa̱yuḥ kani̭kradat ||5||
5 kavirbhārgava: | pavamāna: soma: |jagatī  |
pra rājā̱ vāca̭ṃ ja̱naya̭nnasiṣyadada̱po vasā̭no a̱bhi gā i̭yakṣati |
gṛ̱bhṇāti̭ ri̱pramavi̭rasya̱ tānvā̭ śu̱ddho de̱vānā̱mupa̭ yāti niṣkṛ̱tam ||1
indrā̭ya soma̱ pari̭ ṣicyase̱ nṛbhi̭rnṛ̱cakṣā̭ ū̱rmiḥ ka̱vira̭jyase̱ vanḙ |
pū̱rvīrhi tḙ sru̱taya̱: santi̱ yāta̭ve sa̱hasra̱maśvā̱ hara̭yaścamū̱ṣada̭: ||2||
sa̱mu̱driyā̭ apsa̱raso̭ manī̱ṣiṇa̱māsī̭nā a̱ntara̱bhi soma̭makṣaran |
tā ī̭ṃ hinvanti ha̱rmyasya̭ sa̱kṣaṇi̱ṃ yāca̭nte su̱mnaṃ pava̭māna̱makṣi̭tam ||3||
go̱jinna̱:  somo̭ ratha̱jiddhi̭raṇya̱jitsva̱rjida̱bjitpa̭vate sahasra̱jit |
yaṃ de̱vāsa̭ścakri̱re pī̱taye̱ mada̱ṃ svādi̭ṣṭhaṃ dra̱psama̭ru̱ṇaṃ ma̭yo̱bhuva̭m ||4||
e̱tāni̭ soma̱ pava̭māno asma̱yuḥ sa̱tyāni̭ kṛ̱ṇvandravi̭ṇānyarṣasi |
ja̱hi śatrṷmanti̱ke dṷ̄ra̱ke ca̱ ya u̱rvīṃ gavyṷ̄ti̱mabha̭yaṃ ca naskṛdhi ||5||
5 kavirbhārgava: | pavamāna: soma: |jagatī  |
a̱co̱daso̭ no dhanva̱ntvinda̭va̱: pra sṷvā̱nāso̭ bṛ̱haddi̭veṣu̱ hara̭yaḥ |
vi ca̱ naśa̭nna i̱ṣo arā̭tayo̱'ryo na̭śanta̱ sani̭ṣanta no̱ dhiya̭: ||1||
pra ṇo̭ dhanva̱ntvinda̭vo mada̱cyuto̱ dhanā̭ vā̱ yebhi̱rarva̭to junī̱masi̭ |
 ti̱ro marta̭sya̱ kasya̭ ci̱tpari̭hvṛtiṃ va̱yaṃ dhanā̭ni vi̱śvadhā̭ bharemahi ||2||
u̱ta svasyā̱ arā̭tyā a̱rirhi ṣa u̱tānyasyā̱ arā̭tyā̱ vṛko̱ hi ṣaḥ |
dhanva̱nna tṛṣṇā̱ sama̭rīta̱ tā~ a̱bhi soma̭ ja̱hi pa̭vamāna durā̱dhya̭: ||3||
di̱vi te̱ nābhā̭ para̱mo ya ā̭da̱de pṛ̭thi̱vyāstḙ ruruhu̱: sāna̭vi̱ kṣipa̭: |
adra̭yastvā bapsati̱ goradhi̭ tva̱cya1psu tvā̱ hastai̭rduduhurmanī̱ṣiṇa̭: ||4||
e̱vā ta̭ indo su̱bhva̭ṃ su̱peśa̭sa̱ṃ rasa̭ṃ tuñjanti pratha̱mā a̭bhi̱śriya̭: |
 nida̭ṃnidaṃ pavamāna̱ ni tā̭riṣa ā̱viste̱ śuṣmo̭ bhavatu pri̱yo mada̭: ||5||
5  vasurbhāradvāja: | pavamāna: soma: |jagatī  |
soma̭sya̱ dhārā̭ pavate nṛ̱cakṣa̭sa ṛ̱tena̭ de̱vānha̭vate di̱vaspari̭ |
bṛha̱spatḙ ra̱vathḙnā̱ vi di̭dyute samu̱drāso̱ na sava̭nāni vivyacuḥ ||1||
yaṃ tvā̭ vājinna̱ghnyā a̱bhyanṷ̄ṣa̱tā'yo̭hata̱ṃ yoni̱mā ro̭hasi dyu̱mān |
ma̱ghonā̱māyṷ: prati̱ranmahi̱ śrava̱ indrā̭ya soma pavase̱ vṛṣā̱ mada̭: ||2||
endra̭sya ku̱kṣā pa̭vate ma̱dinta̭ma̱ ūrja̱ṃ vasā̭na̱: śrava̭se suma̱ṅgala̭: |
pra̱tyaṅsa viśvā̱ bhuva̭nā̱bhi pa̭prathe̱ krīḻa̱nhari̱ratya̭: syandate̱ vṛṣā̭ ||3||
taṃ tvā̭ de̱vebhyo̱ madhṷmattama̱ṃ nara̭: sa̱hasra̭dhāraṃ duhate̱ daśa̱ kṣipa̭: |
nṛbhi̭: soma̱ pracyṷto̱ grāva̭bhiḥ su̱to viśvā̭nde̱vā~ ā pa̭vasvā sahasrajit ||4||
taṃ tvā̭ ha̱stino̱ madhṷmanta̱madri̭bhirdu̱hantya̱psu vṛ̭ṣa̱bhaṃ daśa̱ kṣipa̭: |
indra̭ṃ soma mā̱daya̱ndaivya̱ṃ jana̱ṃ sindho̭rivo̱rmiḥ pava̭māno arṣasi ||5||
5  vasurbhāradvāja: | pavamāna: soma: |jagatī, 5 triṣṭup   |
pra soma̭sya̱ pava̭mānasyo̱rmaya̱ indra̭sya yanti ja̱ṭhara̭ṃ su̱peśa̭saḥ |
da̱dhnā yadī̱munnī̭tā ya̱śasā̱ gavā̭ṃ dā̱nāya̱ śūra̭mu̱dama̭ndiṣuḥ su̱tāḥ ||1||
acchā̱ hi soma̭: ka̱laśā̱~ asi̭ṣyada̱datyo̱ na voḻhā̭ ra̱ghuva̭rtani̱rvṛṣā̭ |
athā̭ de̱vānā̭mu̱bhaya̭sya̱ janma̭no vi̱dvā~ a̭śnotya̱muta̭ i̱taśca̱ yat ||2||
ā na̭: soma̱ pava̭mānaḥ kirā̱ vasvindo̱ bhava̭ ma̱ghavā̱ rādha̭so ma̱haḥ |
śikṣā̭ vayodho̱ vasa̭ve̱ su ce̱tunā̱ mā no̱ gaya̭mā̱re a̱smatparā̭ sicaḥ ||3||
ā na̭: pū̱ṣā pava̭mānaḥ surā̱tayo̭ mi̱tro ga̭cchantu̱ varṷṇaḥ sa̱joṣa̭saḥ |
bṛha̱spati̭rma̱ruto̭ vā̱yura̱śvinā̱ tvaṣṭā̭ savi̱tā su̱yamā̱ sara̭svatī ||4||
u̱bhe dyāvā̭pṛthi̱vī vi̭śvami̱nve a̭rya̱mā de̱vo adi̭tirvidhā̱tā |
bhago̱ nṛśaṃsa̭ u̱rva1ntari̭kṣa̱ṃ viśvḙ de̱vāḥ pava̭mānaṃ juṣanta ||5||
5  vasurbhāradvāja: | pavamāna: soma: |jagatī , 5 triṣṭup   |
asā̭vi̱ somo̭ aru̱ṣo vṛṣā̱ harī̱ rājḙva da̱smo a̱bhi gā a̭cikradat |
pu̱nā̱no vāra̱ṃ paryḙtya̱vyaya̭ṃ śye̱no na yoni̭ṃ ghṛ̱tava̭ntamā̱sada̭m ||1||
ka̱virvḙdha̱syā paryḙṣi̱ māhi̭na̱matyo̱ na mṛ̱ṣṭo a̱bhi vāja̭marṣasi |
a̱pa̱sedha̭nduri̱tā so̭ma mṛḻaya ghṛ̱taṃ vasā̭na̱: pari̭ yāsi ni̱rṇija̭m ||2||
pa̱rjanya̭: pi̱tā ma̭hi̱ṣasya̭ pa̱rṇino̱ nābhā̭ pṛthi̱vyā gi̱riṣu̱ kṣaya̭ṃ dadhe |
svasā̭ra̱ āpo̭ a̱bhi gā u̱tāsa̭ra̱ntsaṃ grāva̭bhirnasate vī̱te a̭dhva̱re ||3||
jā̱yeva̱ patyā̱vadhi̱ śeva̭ maṃhase̱ pajrā̭yā garbha śṛṇu̱hi bravī̭mi te |
a̱ntarvāṇī̭ṣu̱ pra ca̭rā̱ su jī̱vasḙ'ni̱ndyo vṛ̱janḙ soma jāgṛhi ||4||
yathā̱ pūrvḙbhyaḥ śata̱sā amṛ̭dhraḥ sahasra̱sāḥ pa̱ryayā̱ vāja̭mindo |
e̱vā pa̭vasva suvi̱tāya̱ navya̭se̱ tava̭ vra̱tamanvāpa̭: sacante ||5||
5 pavitra āṅgirasa: | pavamāna: soma: |jagatī  |
pa̱vitra̭ṃ te̱ vita̭taṃ brahmaṇaspate pra̱bhurgātrā̭ṇi̱ paryḙṣi vi̱śvata̭: |
ata̭ptatanū̱rna tadā̱mo a̭śnute śṛ̱tāsa̱ idvaha̭nta̱statsamā̭śata ||1||
tapo̭ṣpa̱vitra̱ṃ vita̭taṃ di̱vaspa̱de śoca̭nto asya̱ tanta̭vo̱ vya̭sthiran |
ava̭ntyasya pavī̱tāra̭mā̱śavo̭ di̱vaspṛ̱ṣṭhamadhi̭ tiṣṭhanti̱ ceta̭sā ||2||
arṷ̄rucadu̱ṣasa̱: pṛśni̭ragri̱ya u̱kṣā bi̭bharti̱ bhuva̭nāni vāja̱yuḥ |
mā̱yā̱vino̭ mamire asya mā̱yayā̭ nṛ̱cakṣa̭saḥ pi̱taro̱ garbha̱mā da̭dhuḥ ||3||
ga̱ndha̱rva i̱tthā pa̱dama̭sya rakṣati̱ pāti̭ de̱vānā̱ṃ jani̭mā̱nyadbhṷtaḥ |
gṛ̱bhṇāti̭ ri̱puṃ ni̱dhayā̭ ni̱dhāpa̭tiḥ su̱kṛtta̭mā̱ madhṷno bha̱kṣamā̭śata ||4||
ha̱virha̭viṣmo̱ mahi̱ sadma̱ daivya̱ṃ nabho̱ vasā̭na̱: pari̭ yāsyadhva̱ram |
rājā̭ pa̱vitra̭ratho̱ vāja̱mārṷhaḥ sa̱hasra̭bhṛṣṭirjayasi̱ śravo̭ bṛ̱hat ||5||
5 vācya: prajāpati: | pavamāna: soma: |jagatī  |
pava̭sva deva̱māda̭no̱ vica̭rṣaṇira̱psā indrā̭ya̱ varṷṇāya vā̱yavḙ |
kṛ̱dhī no̭ a̱dya vari̭vaḥ svasti̱madṷrukṣi̱tau gṛ̭ṇīhi̱ daivya̱ṃ jana̭m ||1||
ā yasta̱sthau bhuva̭nā̱nyama̭rtyo̱ viśvā̭ni̱ soma̱: pari̱ tānya̭rṣati |
kṛ̱ṇvantsa̱ṃcṛta̭ṃ vi̱cṛta̭ma̱bhiṣṭa̭ya̱ indṷ: siṣaktyu̱ṣasa̱ṃ na sūrya̭: ||2||
ā yo gobhi̭: sṛ̱jyata̱ oṣa̭dhī̱ṣvā de̱vānā̭ṃ su̱mna i̱ṣaya̱nnupā̭vasuḥ |
ā vi̱dyutā̭ pavate̱ dhāra̭yā su̱ta indra̱ṃ somo̭ mā̱daya̱ndaivya̱ṃ jana̭m ||3||
e̱ṣa sya soma̭: pavate sahasra̱jiddhi̭nvā̱no vāca̭miṣi̱rāmṷṣa̱rbudha̭m |
indṷ: samu̱dramudi̭yarti vā̱yubhi̱rendra̭sya̱ hārdi̭ ka̱laśḙṣu sīdati ||4||
a̱bhi tyaṃ gāva̱: paya̭sā payo̱vṛdha̱ṃ soma̭ṃ śrīṇanti ma̱tibhi̭: sva̱rvida̭m |
dha̱na̱ṃja̱yaḥ pa̭vate̱ kṛtvyo̱ raso̱ vipra̭: ka̱viḥ kāvyḙnā̱ sva̭rcanāḥ ||5||
12 veno bhārgava: | pavamāna: soma: |jagatī , 11-12 triṣṭup |
indrā̭ya soma̱ suṣṷta̱: pari̭ sra̱vā'pāmī̭vā bhavatu̱ rakṣa̭sā sa̱ha |
mā te̱ rasa̭sya matsata dvayā̱vino̱ dravi̭ṇasvanta i̱ha sa̱ntvinda̭vaḥ ||1||
a̱smāntsa̭ma̱rye pa̭vamāna codaya̱ dakṣo̭ de̱vānā̱masi̱ hi pri̱yo mada̭: |
ja̱hi śatrṷ̄~ra̱bhyā bha̭ndanāya̱taḥ pibḙndra̱ soma̱mava̭ no̱ mṛdho̭ jahi ||2||
ada̭bdha indo pavase ma̱dinta̭ma ā̱tmendra̭sya bhavasi dhā̱sirṷtta̱maḥ |
a̱bhi sva̭ranti ba̱havo̭ manī̱ṣiṇo̱ rājā̭nama̱sya bhuva̭nasya niṃsate ||3||
sa̱hasra̭ṇīthaḥ śa̱tadhā̭ro̱ adbhṷta̱ indrā̱yendṷ: pavate̱ kāmya̱ṃ madhṷ |
jaya̱nkṣetra̭ma̱bhya̭rṣā̱ jaya̭nna̱pa u̱ruṃ no̭ gā̱tuṃ kṛ̭ṇu soma mīḍhvaḥ ||4||
kani̭kradatka̱laśe̱ gobhi̭rajyase̱ vya1vyaya̭ṃ sa̱mayā̱ vāra̭marṣasi |
ma̱rmṛ̱jyamā̭no̱ atyo̱ na sā̭na̱sirindra̭sya soma ja̱ṭhare̱ sama̭kṣaraḥ ||5||
svā̱duḥ pa̭vasva di̱vyāya̱ janma̭ne svā̱durindrā̭ya su̱havī̭tunāmne |
svā̱durmi̱trāya̱ varṷṇāya vā̱yave̱ bṛha̱spata̭ye̱ madhṷmā̱~ adā̭bhyaḥ ||6||
atya̭ṃ mṛjanti ka̱laśe̱ daśa̱ kṣipa̱: pra viprā̭ṇāṃ ma̱tayo̱ vāca̭ īrate |
pava̭mānā a̱bhya̭rṣanti suṣṭu̱timendra̭ṃ viśanti madi̱rāsa̱ inda̭vaḥ ||7||
pava̭māno a̱bhya̭rṣā su̱vīrya̭mu̱rvīṃ gavyṷ̄ti̱ṃ mahi̱ śarma̭ sa̱pratha̭: |
māki̭rno a̱sya pari̭ṣūtirīśa̱tendo̱ jayḙma̱ tvayā̱ dhana̭ṃdhanam ||8||
adhi̱ dyāma̭sthādvṛṣa̱bho vi̭cakṣa̱ṇo'rṷ̄ruca̱dvi di̱vo ro̭ca̱nā ka̱viḥ |
rājā̭ pa̱vitra̱matyḙti̱ rorṷvaddi̱vaḥ pī̱yūṣa̭ṃ duhate nṛ̱cakṣa̭saḥ ||9||
di̱vo nāke̱ madhṷjihvā asa̱ścato̭ ve̱nā dṷhantyu̱kṣaṇa̭ṃ giri̱ṣṭhām |
a̱psu dra̱psaṃ vā̭vṛdhā̱naṃ sa̭mu̱dra ā sindho̭rū̱rmā madhṷmantaṃ pa̱vitra̱ ā ||10||
nākḙ supa̱rṇamṷpapapti̱vāṃsa̱ṃ giro̭ ve̱nānā̭makṛpanta pū̱rvīḥ |
śiśṷṃ rihanti ma̱taya̱: pani̭pnataṃ hira̱ṇyaya̭ṃ śaku̱naṃ kṣāma̭ṇi̱ sthām ||11||
ū̱rdhvo ga̭ndha̱rvo adhi̱ nākḙ asthā̱dviśvā̭ rū̱pā pra̭ti̱cakṣā̭ṇo asya |
bhā̱nuḥ śu̱kreṇa̭ śo̱ciṣā̱ vya̭dyau̱tprārṷ̄ruca̱droda̭sī mā̱tarā̱ śuci̭: ||12||
(1-48 ) 1-10 akṛṣṭā māṣā:, 11-20 sikatā nivāvarī, 21-30 pṛśniyo'jā:, 31-40 akṛṣṭamāṣādayastraya:,41-45 bhaumo'tri:, 46-48 gṛtsamada: śaunaka: | pavamāna: soma: |jagatī  |
pra ta̭ ā̱śava̭: pavamāna dhī̱javo̱ madā̭ arṣanti raghu̱jā i̭va̱ tmanā̭ |
di̱vyāḥ sṷpa̱rṇā madhṷmanta̱ inda̭vo ma̱dinta̭māsa̱: pari̱ kośa̭māsate ||1||
pra te̱ madā̭so madi̱rāsa̭ ā̱śavo'sṛ̭kṣata̱ rathyā̭so̱ yathā̱ pṛtha̭k |
dhe̱nurna va̱tsaṃ paya̭sā̱bhi va̱jriṇa̱mindra̱minda̭vo̱ madhṷmanta ū̱rmaya̭: ||2||
atyo̱ na hi̭yā̱no a̱bhi vāja̭marṣa sva̱rvitkośa̭ṃ di̱vo adri̭mātaram |
vṛṣā̭ pa̱vitre̱ adhi̱ sāno̭ a̱vyaye̱ soma̭: punā̱na i̭ndri̱yāya̱ dhāya̭se ||3||
pra ta̱ āśvi̭nīḥ pavamāna dhī̱juvo̭ di̱vyā a̭sṛgra̱npaya̭sā̱ dharī̭maṇi |
prāntaṝṣa̭ya̱: sthāvi̭rīrasṛkṣata̱ ye tvā̭ mṛ̱jantyṛ̭ṣiṣāṇa ve̱dhasa̭: ||4||
viśvā̱ dhāmā̭ni viśvacakṣa̱ ṛbhva̭saḥ pra̱bhostḙ sa̱taḥ pari̭ yanti ke̱tava̭: |
vyā̱na̱śiḥ pa̭vase soma̱ dharma̭bhi̱: pati̱rviśva̭sya̱ bhuva̭nasya rājasi ||5||
u̱bha̱yata̱: pava̭mānasya ra̱śmayo̭ dhru̱vasya̭ sa̱taḥ pari̭ yanti ke̱tava̭: |
yadī̭ pa̱vitre̱ adhi̭ mṛ̱jyate̱ hari̱: sattā̱ ni yonā̭ ka̱laśḙṣu sīdati ||6||
ya̱jñasya̭ ke̱tuḥ pa̭vate svadhva̱raḥ somo̭ de̱vānā̱mupa̭ yāti niṣkṛ̱tam |
sa̱hasra̭dhāra̱: pari̱ kośa̭marṣati̱ vṛṣā̭ pa̱vitra̱matyḙti̱ rorṷvat ||7||
rājā̭ samu̱draṃ na̱dyo̱3 vi gā̭hate̱'pāmū̱rmiṃ sa̭cate̱ sindhṷṣu śri̱taḥ |
adhya̭sthā̱tsānu̱ pava̭māno a̱vyaya̱ṃ nābhā̭ pṛthi̱vyā dha̱ruṇo̭ ma̱ho di̱vaḥ ||8||
di̱vo na sānṷ sta̱naya̭nnacikrada̱ddyauśca̱ yasya̭ pṛthi̱vī ca̱ dharma̭bhiḥ |
indra̭sya sa̱khyaṃ pa̭vate vi̱vevi̭da̱tsoma̭: punā̱naḥ ka̱laśḙṣu sīdati ||9||
jyoti̭rya̱jñasya̭ pavate̱ madhṷ pri̱yaṃ pi̱tā de̱vānā̭ṃ jani̱tā vi̱bhūva̭suḥ |
dadhā̭ti̱ ratna̭ṃ sva̱dhayo̭rapī̱cya̭ṃ ma̱dinta̭mo matsa̱ra i̭ndri̱yo rasa̭: ||10||
a̱bhi̱kranda̭nka̱laśa̭ṃ vā̱jya̭rṣati̱ pati̭rdi̱vaḥ śa̱tadhā̭ro vicakṣa̱ṇaḥ |
hari̭rmi̱trasya̱ sada̭neṣu sīdati marmṛjā̱no'vi̭bhi̱: sindhṷbhi̱rvṛṣā̭ ||11||
agre̱ sindhṷ̄nā̱ṃ pava̭māno arṣa̱tyagrḙ vā̱co a̭gri̱yo goṣṷ gacchati |
agre̱ vāja̭sya bhajate mahādha̱naṃ svā̭yu̱dhaḥ so̱tṛbhi̭: pūyate̱ vṛṣā̭ ||12||
a̱yaṃ ma̱tavā̭ñchaku̱no yathā̭ hi̱to'vyḙ sasāra̱ pava̭māna ū̱rmiṇā̭ |
tava̱ kratvā̱ roda̭sī anta̱rā ka̭ve̱ śuci̭rdhi̱yā pa̭vate̱ soma̭ indra te ||13||
drā̱piṃ vasā̭no yaja̱to di̭vi̱spṛśa̭mantarikṣa̱prā bhuva̭ne̱ṣvarpi̭taḥ |
 sva̭rjajñā̱no nabha̭sā̱bhya̭kramītpra̱tnama̭sya pi̱tara̱mā vi̭vāsati ||14||
so a̭sya vi̱śe mahi̱ śarma̭ yacchati̱ yo a̭sya̱ dhāma̭ pratha̱maṃ vyā̭na̱śe |
pa̱daṃ yada̭sya para̱me vyo̭ma̱nyato̱ viśvā̭ a̱bhi saṃ yā̭ti sa̱ṃyata̭: ||15||
pro a̭yāsī̱dindu̱rindra̭sya niṣkṛ̱taṃ sakhā̱ sakhyu̱rna pra mi̭nāti sa̱ṃgira̭m |
marya̭ iva yuva̱tibhi̱: sama̭rṣati̱ soma̭: ka̱laśḙ śa̱tayā̭mnā pa̱thā ||16||
pra vo̱ dhiyo̭ mandra̱yuvo̭ vipa̱nyuva̭: pana̱syuva̭: sa̱ṃvasa̭neṣvakramuḥ |
soma̭ṃ manī̱ṣā a̱bhya̭nūṣata̱ stubho̱'bhi dhe̱nava̱: paya̭semaśiśrayuḥ ||17||
ā na̭: soma sa̱ṃyata̭ṃ pi̱pyuṣī̱miṣa̱mindo̱ pava̭sva̱ pava̭māno a̱sridha̭m |
yā no̱ doha̭te̱ triraha̱nnasa̭ścuṣī kṣu̱madvāja̭va̱nmadhṷmatsu̱vīrya̭m ||18||
vṛṣā̭ matī̱nāṃ pa̭vate vicakṣa̱ṇaḥ somo̱ ahna̭: pratarī̱toṣaso̭ di̱vaḥ |
krā̱ṇā sindhṷ̄nāṃ ka̱laśā̭~ avīvaśa̱dindra̭sya̱ hārdyā̭vi̱śanma̭nī̱ṣibhi̭: ||19||
ma̱nī̱ṣibhi̭: pavate pū̱rvyaḥ ka̱virnṛbhi̭rya̱taḥ pari̱ kośā̭~ acikradat |
tri̱tasya̱ nāma̭ ja̱naya̱nmadhṷ kṣara̱dindra̭sya vā̱yoḥ sa̱khyāya̱ karta̭ve ||20||
a̱yaṃ pṷnā̱na u̱ṣaso̱ vi ro̭cayada̱yaṃ sindhṷbhyo abhavadu loka̱kṛt |
 a̱yaṃ triḥ sa̱pta dṷduhā̱na ā̱śira̱ṃ somo̭ hṛ̱de pa̭vate̱ cārṷ matsa̱raḥ ||21||
pava̭sva soma di̱vyeṣu̱ dhāma̭su sṛjā̱na i̭ndo ka̱laśḙ pa̱vitra̱ ā |
sīda̱nnindra̭sya ja̱ṭhare̱ kani̭krada̱nnṛbhi̭rya̱taḥ sūrya̱māro̭hayo di̱vi ||22||
adri̭bhiḥ su̱taḥ pa̭vase pa̱vitra̱ ā~ inda̱vindra̭sya ja̱ṭharḙṣvāvi̱śan |
tvaṃ nṛ̱cakṣā̭ abhavo vicakṣaṇa̱ soma̭ go̱tramaṅgi̭robhyo'vṛṇo̱rapa̭ ||23||
tvāṃ so̭ma̱ pava̭mānaṃ svā̱dhyo'nu̱ viprā̭so amadannava̱syava̭: |
tvāṃ sṷpa̱rṇa ābha̭raddi̱vasparīndo̱ viśvā̭bhirma̱tibhi̱: pari̭ṣkṛtam ||24||
avyḙ punā̱naṃ pari̱ vāra̭ ū̱rmiṇā̱ hari̭ṃ navante a̱bhi sa̱pta dhe̱nava̭: |
a̱pāmu̱pasthe̱ adhyā̱yava̭: ka̱vimṛ̱tasya̱ yonā̭ mahi̱ṣā a̭heṣata ||25||
indṷ: punā̱no ati̭ gāhate̱ mṛdho̱ viśvā̭ni kṛ̱ṇvantsu̱pathā̭ni̱ yajya̭ve |
gāḥ kṛ̭ṇvā̱no ni̱rṇija̭ṃ harya̱taḥ ka̱viratyo̱ na krīḻa̱npari̱ vāra̭marṣati ||26||
a̱sa̱ścata̭: śa̱tadhā̭rā abhi̱śriyo̱ hari̭ṃ nava̱nte'va̱ tā ṷda̱nyuva̭: |
kṣipo̭ mṛjanti̱ pari̱ gobhi̱rāvṛ̭taṃ tṛ̱tīyḙ pṛ̱ṣṭhe adhi̭ roca̱ne di̱vaḥ ||27||
tave̱māḥ pra̱jā di̱vyasya̱ reta̭sa̱stvaṃ viśva̭sya̱ bhuva̭nasya rājasi |
athe̱daṃ viśva̭ṃ pavamāna te̱ vaśe̱ tvami̭ndo pratha̱mo dhā̭ma̱dhā a̭si ||28||
tvaṃ sa̭mu̱dro a̭si viśva̱vitka̭ve̱ tave̱māḥ pañca̭ pra̱diśo̱ vidha̭rmaṇi |
tvaṃ dyāṃ ca̭ pṛthi̱vīṃ cāti̭ jabhriṣe̱ tava̱ jyotī̭ṃṣi pavamāna̱ sūrya̭: ||29||
tvaṃ pa̱vitre̱ raja̭so̱ vidha̭rmaṇi de̱vebhya̭: soma pavamāna pūyase |
tvāmu̱śija̭: pratha̱mā a̭gṛbhṇata̱ tubhye̱mā viśvā̱ bhuva̭nāni yemire ||30||
pra re̱bha e̱tyati̱ vāra̭ma̱vyaya̱ṃ vṛṣā̱ vane̱ṣvava̭ cakrada̱ddhari̭: |
saṃ dhī̱tayo̭ vāvaśā̱nā a̭nūṣata̱ śiśṷṃ rihanti ma̱taya̱: pani̭pnatam ||31||
sa sūrya̭sya ra̱śmibhi̱: pari̭ vyata̱ tantṷṃ tanvā̱nastri̱vṛta̱ṃ yathā̭ vi̱de |
naya̭nnṛ̱tasya̭ pra̱śiṣo̱ navī̭yasī̱: pati̱rjanī̭nā̱mupa̭ yāti niṣkṛ̱tam ||32||
rājā̱ sindhṷ̄nāṃ pavate̱ pati̭rdi̱va ṛ̱tasya̭ yāti pa̱thibhi̱: kani̭kradat |
sa̱hasra̭dhāra̱: pari̭ ṣicyate̱ hari̭: punā̱no vāca̭ṃ ja̱naya̱nnupā̭vasuḥ ||33||
pava̭māna̱ mahyarṇo̱ vi dhā̭vasi̱ sūro̱ na ci̱tro avya̭yāni̱ pavya̭yā |
gabha̭stipūto̱ nṛbhi̱radri̭bhiḥ su̱to ma̱he vājā̭ya̱ dhanyā̭ya dhanvasi ||34||
iṣa̱mūrja̭ṃ pavamānā̱bhya̭rṣasi śye̱no na vaṃsṷ ka̱laśḙṣu sīdasi |
indrā̭ya̱ madvā̱ madyo̱ mada̭: su̱to di̱vo vi̭ṣṭa̱mbha ṷpa̱mo vi̭cakṣa̱ṇaḥ ||35||
sa̱pta svasā̭ro a̱bhi mā̱tara̱: śiśu̱ṃ nava̭ṃ jajñā̱naṃ jenya̭ṃ vipa̱ścita̭m |
a̱pāṃ ga̭ndha̱rvaṃ di̱vyaṃ nṛ̱cakṣa̭sa̱ṃ soma̱ṃ viśva̭sya̱ bhuva̭nasya rā̱jasḙ ||36||
ī̱śā̱na i̱mā bhuva̭nāni̱ vīya̭se yujā̱na i̭ndo ha̱rita̭: supa̱rṇya̭: |
tāstḙ kṣarantu̱ madhṷmadghṛ̱taṃ paya̱stava̭ vra̱te so̭ma tiṣṭhantu kṛ̱ṣṭaya̭: ||37||
tvaṃ nṛ̱cakṣā̭ asi soma vi̱śvata̱: pava̭māna vṛṣabha̱ tā vi dhā̭vasi |
sa na̭: pavasva̱ vasṷma̱ddhira̭ṇyavadva̱yaṃ syā̭ma̱ bhuva̭neṣu jī̱vasḙ ||38||
go̱vitpa̭vasva vasu̱viddhi̭raṇya̱vidrḙto̱dhā i̭ndo̱ bhuva̭ne̱ṣvarpi̭taḥ |
tvaṃ su̱vīro̭ asi soma viśva̱vittaṃ tvā̱ viprā̱ upa̭ gi̱rema ā̭sate ||39||
unmadhva̭ ū̱rmirva̱nanā̭ atiṣṭhipada̱po vasā̭no mahi̱ṣo vi gā̭hate |
rājā̭ pa̱vitra̭ratho̱ vāja̱mārṷhatsa̱hasra̭bhṛṣṭirjayati̱ śravo̭ bṛ̱hat ||40||
sa bha̱ndanā̱ udi̭yarti pra̱jāva̭tīrvi̱śvāyu̱rviśvā̭: su̱bharā̱ aha̭rdivi |
brahma̭ pra̱jāva̭dra̱yimaśva̭pastyaṃ pī̱ta i̭nda̱vindra̭ma̱smabhya̭ṃ yācatāt ||41||
so agre̱ ahnā̱ṃ hari̭rharya̱to mada̱: pra ceta̭sā cetayata̱ta anu̱ dyubhi̭: |
dvā janā̭ yā̱taya̭nna̱ntarī̭yate̱ narā̭ ca̱ śaṃsa̱ṃ daivya̭ṃ ca dha̱rtari̭ ||42||
a̱ñjate̱ vya̭ñjate̱ sama̭ñjate̱ kratṷṃ rihanti̱ madhṷnā̱bhya̭ñjate |
sindho̭rucchvā̱se pa̱taya̭ntamu̱kṣaṇa̭ṃ hiraṇyapā̱vāḥ pa̱śumā̭su gṛbhṇate ||43||
vi̱pa̱ścite̱ pava̭mānāya gāyata ma̱hī na dhārātyandho̭ arṣati |
ahi̱rna jū̱rṇāmati̭ sarpati̱ tvaca̱matyo̱ na krīḻa̭nnasara̱dvṛṣā̱ hari̭: ||44||
a̱gre̱go rājāpya̭staviṣyate vi̱māno̱ ahnā̱ṃ bhuva̭ne̱ṣvarpi̭taḥ |
hari̭rghṛ̱tasnṷ: su̱dṛśī̭ko arṇa̱vo jyo̱tīra̭thaḥ pavate rā̱ya o̱kya̭: ||45||
asa̭rji ska̱mbho di̱va udya̭to̱ mada̱: pari̭ tri̱dhātu̱rbhuva̭nānyarṣati |
 a̱ṃśuṃ ri̭hanti ma̱taya̱: pani̭pnataṃ gi̱rā yadi̭ ni̱rṇija̭mṛ̱gmiṇo̭ ya̱yuḥ ||46||
pra te̱ dhārā̱ atyaṇvā̭ni me̱ṣya̭: punā̱nasya̭ sa̱ṃyato̭ yanti̱ raṃha̭yaḥ |
yadgobhi̭rindo ca̱mvo̭: sama̱jyasa̱ ā sṷvā̱naḥ so̭ma ka̱laśḙṣu sīdasi ||47||
pava̭sva soma kratu̱vinna̭ u̱kthyo'vyo̱ vāre̱ pari̭ dhāva̱ madhṷ pri̱yam |
ja̱hi viśvā̭nra̱kṣasa̭ indo a̱triṇo̭ bṛ̱hadva̭dema vi̱dathḙ su̱vīrā̭: ||48||
9 uśanā kāvya: | pavamāna: soma: | triṣṭup |
pra tu dra̭va̱ pari̱ kośa̱ṃ ni ṣī̭da̱ nṛbhi̭: punā̱no a̱bhi vāja̭marṣa |
aśva̱ṃ na tvā̭ vā̱jina̭ṃ ma̱rjaya̱nto'cchā̭ ba̱rhī ra̭śa̱nābhi̭rnayanti ||1||
svā̱yu̱dhaḥ pa̭vate de̱va indṷraśasti̱hā vṛ̱jana̱ṃ rakṣa̭māṇaḥ |
pi̱tā de̱vānā̭ṃ jani̱tā su̱dakṣo̭ viṣṭa̱mbho di̱vo dha̱ruṇa̭: pṛthi̱vyāḥ ||2||
ṛṣi̱rvipra̭: purae̱tā janā̭nāmṛ̱bhurdhīra̭ u̱śanā̱ kāvyḙna |
sa ci̭dviveda̱ nihi̭ta̱ṃ yadā̭sāmapī̱cyaṃ1 guhya̱ṃ nāma̱ gonā̭m ||3||
e̱ṣa sya te̱ madhṷmā~ indra̱ somo̱ vṛṣā̱ vṛṣṇe̱ pari̭ pa̱vitrḙ akṣāḥ |
sa̱ha̱sra̱sāḥ śa̭ta̱sā bhṷ̄ri̱dāvā̭ śaśvatta̱maṃ ba̱rhirā vā̱jya̭sthāt ||4||
e̱te somā̭ a̱bhi ga̱vyā sa̱hasrā̭ ma̱he vājā̭yā̱mṛtā̭ya̱ śravā̭ṃsi |
pa̱vitrḙbhi̱: pava̭mānā asṛgrañchrava̱syavo̱ na pṛ̭ta̱nājo̱ atyā̭: ||5||
pari̱ hi ṣmā̭ puruhū̱to janā̭nā̱ṃ viśvāsa̭ra̱dbhoja̭nā pū̱yamā̭naḥ |
athā bha̭ra śyenabhṛta̱ prayā̭ṃsi ra̱yiṃ tuñjā̭no a̱bhi vāja̭marṣa ||6||
e̱ṣa sṷvā̱naḥ pari̱ soma̭: pa̱vitre̱ sargo̱ na sṛ̱ṣṭo a̭dadhāva̱darvā̭ |
ti̱gme śiśā̭no mahi̱ṣo na śṛṅge̱ gā ga̱vyanna̱bhi śūro̱ na satvā̭ ||7||
e̱ṣā ya̭yau para̱māda̱ntaradre̱: kūci̭tsa̱tīrū̱rve gā vi̭veda |
di̱vo na vi̱dyutsta̱naya̭ntya̱bhraiḥ soma̭sya te pavata indra̱ dhārā̭ ||8||
u̱ta sma̭ rā̱śiṃ pari̭ yāsi̱ gonā̱mindrḙṇa soma sa̱ratha̭ṃ punā̱naḥ |
pū̱rvīriṣo̭ bṛha̱tīrjī̭radāno̱ śikṣā̭ śacīva̱stava̱ tā ṷpa̱ṣṭut ||9||
8  uśanā kāvya: | pavamāna: soma: | triṣṭup |
a̱yaṃ soma̭ indra̱ tubhya̭ṃ sunve̱ tubhya̭ṃ pavate̱ tvama̭sya pāhi |
tvaṃ ha̱ yaṃ ca̭kṛ̱ṣe tvaṃ va̭vṛ̱ṣa indu̱ṃ madā̭ya̱ yujyā̭ya̱ soma̭m ||1||
sa ī̱ṃ ratho̱ na bhṷri̱ṣāḻa̭yoji ma̱haḥ pu̱rūṇi̭ sā̱taye̱ vasṷ̄ni |
ādī̱ṃ viśvā̭ nahu̱ṣyā̭ṇi jā̱tā sva̭rṣātā̱ vana̭ ū̱rdhvā na̭vanta ||2||
vā̱yurna yo ni̱yutvā̭~ i̱ṣṭayā̭mā̱ nāsa̭tyeva̱ hava̱ ā śambha̭viṣṭhaḥ |
vi̱śvavā̭ro draviṇo̱dā i̭va̱ tmanpū̱ṣeva̭ dhī̱java̭no'si soma ||3||
indro̱ na yo ma̱hā karmā̭ṇi̱ cakri̭rha̱ntā vṛ̱trāṇā̭masi soma pū̱rbhit |
pai̱dvo na hi tvamahi̭nāmnāṃ ha̱ntā viśva̭syāsi soma̱ dasyo̭: ||4||
a̱gnirna yo vana̱ ā sṛ̱jyamā̭no̱ vṛthā̱ pājā̭ṃsi kṛṇute na̱dīṣṷ |
jano̱ na yudhvā̭ maha̱ta ṷpa̱bdiriya̭rti̱ soma̱: pava̭māna ū̱rmim ||5||
e̱te somā̱ ati̱ vārā̱ṇyavyā̭ di̱vyā na kośā̭so a̱bhrava̭rṣāḥ |
vṛthā̭ samu̱draṃ sindha̭vo̱ na nīcī̭: su̱tāso̭ a̱bhi ka̱laśā̭~ asṛgran ||6||
śu̱ṣmī śardho̱ na mārṷtaṃ pava̱svāna̭bhiśastā di̱vyā yathā̱ viṭ |
āpo̱ na ma̱kṣū sṷma̱tirbha̭vā naḥ sa̱hasrā̭psāḥ pṛtanā̱ṣāṇna ya̱jñaḥ ||7||
rājño̱ nu te̱ varṷṇasya vra̱tāni̭ bṛ̱hadga̭bhī̱raṃ tava̭ soma̱ dhāma̭ |
śuci̱ṣṭvama̭si pri̱yo na mi̱tro da̱kṣāyyo̭ arya̱mevā̭si soma ||8||
7 uśanā kāvya: | pavamāna: soma: | triṣṭup |
pro sya vahni̭: pa̱thyā̭bhirasyāndi̱vo na vṛ̱ṣṭiḥ pava̭māno akṣāḥ |
sa̱hasra̭dhāro asada̱nnya1sme mā̱turu̱pasthe̱ vana̱ ā ca̱ soma̭: ||1||
rājā̱ sindhṷ̄nāmavasiṣṭa̱ vāsa̭ ṛ̱tasya̱ nāva̱mārṷha̱draji̭ṣṭhām |
a̱psu dra̱pso vā̭vṛdhe śye̱najṷ̄to du̱ha ī̭ṃ pi̱tā du̱ha ī̭ṃ pi̱turjām ||2||
si̱ṃhaṃ na̭santa̱ madhvo̭ a̱yāsa̱ṃ hari̭maru̱ṣaṃ di̱vo a̱sya pati̭m |
śūro̭ yu̱tsu pra̭tha̱maḥ pṛ̭cchate̱ gā asya̱ cakṣa̭sā̱ pari̭ pātyu̱kṣā ||3||
madhṷpṛṣṭhaṃ gho̱rama̱yāsa̱maśva̱ṃ rathḙ yuñjantyuruca̱kra ṛ̱ṣvam |
svasā̭ra īṃ jā̱mayo̭ marjayanti̱ sanā̭bhayo vā̱jina̭mūrjayanti ||4||
cata̭sra īṃ ghṛta̱duha̭: sacante samā̱ne a̱ntardha̱ruṇe̱ niṣa̭ttāḥ |
tā ī̭marṣanti̱ nama̭sā punā̱nāstā ī̭ṃ vi̱śvata̱: pari̭ ṣanti pū̱rvīḥ ||5||
vi̱ṣṭa̱mbho di̱vo dha̱ruṇa̭: pṛthi̱vyā viśvā̭ u̱ta kṣi̱tayo̱ hastḙ asya |
asa̭tta̱ utso̭ gṛṇa̱te ni̱yutvā̱nmadhvo̭ a̱ṃśuḥ pa̭vata indri̱yāya̭ ||6||
va̱nvannavā̭to a̱bhi de̱vavī̭ti̱mindrā̭ya soma vṛtra̱hā pa̭vasva |
śa̱gdhi ma̱haḥ pṷruśca̱ndrasya̭ rā̱yaḥ su̱vīrya̭sya̱ pata̭yaḥ syāma ||7||
6 vasiṣṭho maitrāvaruṇi: | pavamāna: soma: | triṣṭup |
pra hi̭nvā̱no ja̭ni̱tā roda̭syo̱ ratho̱ na vāja̭ṃ sani̱ṣyanna̭yāsīt |
indra̱ṃ gaccha̱nnāyṷdhā sa̱ṃśiśā̭no̱ viśvā̱ vasu̱ hasta̭yorā̱dadhā̭naḥ ||1||
a̱bhi tri̭pṛ̱ṣṭhaṃ vṛṣa̭ṇaṃ vayo̱dhāmā̭ṅgū̱ṣāṇā̭mavāvaśanta̱ vāṇī̭: |
vanā̱ vasā̭no̱ varṷṇo̱ na sindhū̱nvi ra̭tna̱dhā da̭yate̱ vāryā̭ṇi ||2||
śūra̭grāma̱: sarva̭vīra̱: sahā̭vā̱ñjetā̭ pavasva̱ sani̭tā̱ dhanā̭ni |
ti̱gmāyṷdhaḥ kṣi̱pradha̭nvā sa̱matsvaṣā̭ḻhaḥ sā̱hvānpṛta̭nāsu̱ śatrṷ̄n ||3||
u̱ruga̭vyūti̱rabha̭yāni kṛ̱ṇvantsa̭mīcī̱ne ā pa̭vasvā̱ pura̭ṃdhī |
a̱paḥ siṣā̭sannu̱ṣasa̱: sva1rgāḥ saṃ ci̭krado ma̱ho a̱smabhya̱ṃ vājā̭n ||4||
matsi̭ soma̱ varṷṇa̱ṃ matsi̭ mi̱traṃ matsīndra̭mindo pavamāna̱ viṣṇṷm |
matsi̱ śardho̱ mārṷta̱ṃ matsi̭ de̱vānmatsi̭ ma̱hāmindra̭mindo̱ madā̭ya ||5||
e̱vā rājḙva̱ kratṷmā̱~ amḙna̱ viśvā̱ ghani̭ghnadduri̱tā pa̭vasva |
indo̭ sū̱ktāya̱ vaca̭se̱ vayo̭ dhā yū̱yaṃ pā̭ta sva̱stibhi̱: sadā̭ naḥ ||6||
6 kaśyapo mārīca: | pavamāna: soma: | triṣṭup |
asa̭rji̱ vakvā̱ rathye̱ yathā̱jau dhi̱yā ma̱notā̭ pratha̱mo ma̭nī̱ṣī |
daśa̱ svasā̭ro̱ adhi̱ sāno̱ avye'ja̭nti̱ vahni̱ṃ sada̭nā̱nyaccha̭ ||1||
vī̱tī jana̭sya di̱vyasya̭ ka̱vyairadhi̭ suvā̱no na̭hu̱ṣyḙbhi̱rindṷ: |
pra yo nṛbhi̭ra̱mṛto̱ martyḙbhirmarmṛjā̱no'vi̭bhi̱rgobhi̭ra̱dbhiḥ ||2||
vṛṣā̱ vṛṣṇe̱ rorṷvada̱ṃśura̭smai̱ pava̭māno̱ ruśa̭dīrte̱ payo̱ goḥ |
sa̱hasra̱mṛkvā̭ pa̱thibhi̭rvaco̱vida̭dhva̱smabhi̱: sūro̱ aṇva̱ṃ vi yā̭ti ||3||
ru̱jā dṛ̱ḻhā ci̭dra̱kṣasa̱: sadā̭ṃsi punā̱na i̭nda ūrṇuhi̱ vi vājā̭n |
vṛ̱ścopari̭ṣṭāttuja̱tā va̱dhena̱ ye anti̭ dū̱rādṷpanā̱yamḙṣām ||4||
sa pra̭tna̱vannavya̭se viśvavāra sū̱ktāya̭ pa̱thaḥ kṛ̭ṇuhi̱ prāca̭: |
ye du̱:ṣahā̭so va̱nuṣā̭ bṛ̱hanta̱stā~stḙ aśyāma purukṛtpurukṣo ||5||
e̱vā pṷnā̱no a̱paḥ sva1rgā a̱smabhya̭ṃ to̱kā tana̭yāni̱ bhūri̭ |
śaṃ na̱: kṣetra̭mu̱ru jyotī̭ṃṣi soma̱ jyoṅna̱: sūrya̭ṃ dṛ̱śayḙ rirīhi ||6||
6 kaśyapo mārīca: | pavamāna: soma: | triṣṭup |
pari̭ suvā̱no hari̭ra̱ṃśuḥ pa̱vitre̱ ratho̱ na sa̭rji sa̱nayḙ hiyā̱naḥ |
āpa̱cchloka̭mindri̱yaṃ pū̱yamā̭na̱: prati̭ de̱vā~ a̭juṣata̱ prayo̭bhiḥ ||1||
acchā̭ nṛ̱cakṣā̭ asaratpa̱vitre̱ nāma̱ dadhā̭naḥ ka̱vira̭sya̱ yonaṷ |
sīda̱nhotḙva̱ sada̭ne ca̱mūṣūpḙmagma̱nnṛṣa̭yaḥ sa̱pta viprā̭: ||2||
pra sṷme̱dhā gā̭tu̱vidvi̱śvadḙva̱: soma̭: punā̱naḥ sada̭ eti̱ nitya̭m |
bhuva̱dviśvḙṣu̱ kāvyḙṣu̱ rantā'nu̱ janā̭nyatate̱ pañca̱ dhīra̭: ||3||
tava̱ tye so̭ma pavamāna ni̱ṇye viśvḙ de̱vāstraya̭ ekāda̱śāsa̭: |
daśa̭ sva̱dhābhi̱radhi̱ sāno̱ avyḙ mṛ̱janti̭ tvā na̱dya̭: sa̱pta ya̱hvīḥ ||4||
tannu sa̱tyaṃ pava̭mānasyāstu̱ yatra̱ viśvḙ kā̱rava̭: sa̱ṃnasa̭nta |
jyoti̱ryadahne̱ akṛ̭ṇodu lo̱kaṃ prāva̱nmanu̱ṃ dasya̭ve kara̱bhīka̭m ||5||
pari̱ sadmḙva paśu̱mānti̱ hotā̱ rājā̱ na sa̱tyaḥ sami̭tīriyā̱naḥ |
soma̭: punā̱naḥ ka̱laśā̭~ ayāsī̱tsīda̭nmṛ̱go na ma̭hi̱ṣo vanḙṣu ||6||
5 nodhā gautama: | pavamāna: soma: | triṣṭup |
sā̱ka̱mukṣo̭ marjayanta̱ svasā̭ro̱ daśa̱ dhīra̭sya dhī̱tayo̱ dhanṷtrīḥ |
 hari̱: parya̭drava̱jjāḥ sūrya̭sya̱ droṇa̭ṃ nanakṣe̱ atyo̱ na vā̱jī ||1||
saṃ mā̱tṛbhi̱rna śiśṷrvāvaśā̱no vṛṣā̭ dadhanve puru̱vāro̭ a̱dbhiḥ |
maryo̱ na yoṣā̭ma̱bhi ni̭ṣkṛ̱taṃ yantsaṃ ga̭cchate ka̱laśa̭ u̱sriyā̭bhiḥ ||2||
u̱ta pra pi̭pya̱ ūdha̱raghnyā̭yā̱ indu̱rdhārā̭bhiḥ sacate sume̱dhāḥ |
mū̱rdhāna̱ṃ gāva̱: paya̭sā ca̱mūṣva̱bhi śrī̭ṇanti̱ vasṷbhi̱rna ni̱ktaiḥ ||3||
sa no̭ de̱vebhi̭: pavamāna ra̱dendo̭ ra̱yima̱śvina̭ṃ vāvaśā̱naḥ |
ra̱thi̱rā̱yatā̭muśa̱tī pura̭ṃdhirasma̱drya1gā dā̱vane̱ vasṷ̄nām ||4||
nū no̭ ra̱yimupa̭ māsva nṛ̱vanta̭ṃ punā̱no vā̱tāpya̭ṃ vi̱śvaśca̭ndram |
pra va̭ndi̱turi̭ndo tā̱ryāyṷ: prā̱tarma̱kṣū dhi̱yāva̭surjagamyāt ||5||
5 kaṇvo ghaura: | pavamāna: soma: | triṣṭup |
adhi̱ yada̭sminvā̱jinī̭va̱ śubha̱: spardha̭nte̱ dhiya̱: sūrye̱ na viśa̭: |
a̱po vṛ̭ṇā̱naḥ pa̭vate kavī̱yanvra̱jaṃ na pa̭śu̱vardha̭nāya̱ manma̭ ||1||
dvi̱tā vyū̱rṇvanna̱mṛta̭sya̱ dhāma̭ sva̱rvide̱ bhuva̭nāni prathanta |
dhiya̭: pinvā̱nāḥ svasa̭re̱ na gāva̭ ṛtā̱yantī̭ra̱bhi vā̭vaśra̱ indṷm ||2||
pari̱ yatka̱viḥ kāvyā̱ bhara̭te̱ śūro̱ na ratho̱ bhuva̭nāni̱ viśvā̭ |
de̱veṣu̱ yaśo̱ martā̭ya̱ bhūṣa̱ndakṣā̭ya rā̱yaḥ pṷru̱bhūṣu̱ navya̭: ||3||
śri̱ye jā̱taḥ śri̱ya ā niri̭yāya̱ śriya̱ṃ vayo̭ jari̱tṛbhyo̭ dadhāti |
śriya̱ṃ vasā̭nā amṛta̱tvamā̭ya̱nbhava̭nti sa̱tyā sa̭mi̱thā mi̱tadraṷ ||4||
iṣa̱mūrja̭ma̱bhya1rṣāśva̱ṃ gāmu̱ru jyoti̭: kṛṇuhi̱ matsi̭ de̱vān |
viśvā̭ni̱ hi su̱ṣahā̱ tāni̱ tubhya̱ṃ pava̭māna̱ bādha̭se soma̱ śatrṷ̄n ||5||
5 praskaṇva: kāṇva: | pavamāna: soma: | triṣṭup |
kani̭kranti̱ hari̱rā sṛ̱jyamā̭na̱: sīda̱nvana̭sya ja̱ṭharḙ punā̱naḥ |
nṛbhi̭rya̱taḥ kṛ̭ṇute ni̱rṇija̱ṃ gā ato̭ ma̱tīrja̭nayata sva̱dhābhi̭: ||1||
hari̭: sṛjā̱naḥ pa̱thyā̭mṛ̱tasyeya̭rti̱ vāca̭mari̱teva̱ nāva̭m |
de̱vo de̱vānā̱ṃ guhyā̭ni̱ nāmā̱''viṣkṛ̭ṇoti ba̱rhiṣi̭ pra̱vācḙ ||2||
a̱pāmi̱vedū̱rmaya̱startṷrāṇā̱: pra ma̭nī̱ṣā ī̭rate̱ soma̱maccha̭ |
na̱ma̱syantī̱rupa̭ ca̱ yanti̱ saṃ cā ''ca̭ viśantyuśa̱tīru̱śanta̭m ||3||
taṃ ma̭rmṛjā̱naṃ ma̭hi̱ṣaṃ na sānā̭va̱ṃśuṃ dṷhantyu̱kṣaṇa̭ṃ giri̱ṣṭhām |
taṃ vā̭vaśā̱naṃ ma̱taya̭: sacante tri̱to bi̭bharti̱ varṷṇaṃ samu̱dre ||4||
iṣya̱nvāca̭mupava̱kteva̱ hotṷ: punā̱na i̭ndo̱ vi ṣyā̭ manī̱ṣām |
indra̭śca̱ yatkṣaya̭tha̱: saubha̭gāya su̱vīrya̭sya̱ pata̭yaḥ syāma ||5||
24 daivodāsi: pratardana: | pavamāna: soma: | triṣṭup |
pra sḙnā̱nīḥ śūro̱ agre̱ rathā̭nāṃ ga̱vyannḙti̱ harṣa̭te asya̱ senā̭ |
bha̱drānkṛ̱ṇvanni̭ndraha̱vāntsakhi̭bhya̱ ā somo̱ vastrā̭ rabha̱sāni̭ datte ||1||
sama̭sya̱ hari̱ṃ hara̭yo mṛjantyaśvaha̱yairani̭śita̱ṃ namo̭bhiḥ |
ā ti̭ṣṭhati̱ ratha̱mindra̭sya̱ sakhā̭ vi̱dvā~ ḙnā suma̱tiṃ yā̱tyaccha̭ ||2||
sa no̭ deva de̱vatā̭te pavasva ma̱he so̭ma̱ psara̭sa indra̱pāna̭: |
kṛ̱ṇvanna̱po va̱rṣaya̱ndyāmu̱temāmu̱rorā no̭ varivasyā punā̱naḥ ||3||
ajī̭ta̱ye'ha̭taye pavasva sva̱stayḙ sa̱rvatā̭taye bṛha̱te |
tadṷśanti̱ viśva̭ i̱me sakhā̭ya̱stada̱haṃ va̭śmi pavamāna soma ||4||
soma̭: pavate jani̱tā ma̭tī̱nāṃ ja̭ni̱tā di̱vo ja̭ni̱tā pṛ̭thi̱vyāḥ |
ja̱ni̱tāgnerja̭ni̱tā sūrya̭sya jani̱tendra̭sya jani̱tota viṣṇo̭: ||5||
bra̱hmā de̱vānā̭ṃ pada̱vīḥ ka̭vī̱nāmṛṣi̱rviprā̭ṇāṃ mahi̱ṣo mṛ̱gāṇā̭m |
śye̱no gṛdhrā̭ṇā̱ṃ svadhi̭ti̱rvanā̭nā̱ṃ soma̭: pa̱vitra̱matyḙti̱ rebha̭n ||6||
prāvī̭vipadvā̱ca ū̱rmiṃ na sindhu̱rgira̱: soma̱: pava̭māno manī̱ṣāḥ |
a̱ntaḥ paśya̭nvṛ̱jane̱māva̭rā̱ṇyā ti̭ṣṭhati vṛṣa̱bho goṣṷ jā̱nan ||7||
sa ma̭tsa̱raḥ pṛ̱tsu va̱nvannavā̭taḥ sa̱hasra̭retā a̱bhi vāja̭marṣa |
indrā̭yendo̱ pava̭māno manī̱ṣyaṃ1śorū̱rmimī̭raya̱ gā i̭ṣa̱ṇyan ||8||
pari̭ pri̱yaḥ ka̱laśḙ de̱vavā̭ta̱ indrā̭ya̱ somo̱ raṇyo̱ madā̭ya |
sa̱hasra̭dhāraḥ śa̱tavā̭ja̱ indṷrvā̱jī na sapti̱: sama̭nā jigāti ||9||
sa pū̱rvyo va̭su̱vijjāya̭māno mṛjā̱no a̱psu dṷduhā̱no adraṷ |
a̱bhi̱śa̱sti̱pā bhuva̭nasya̱ rājā̭ vi̱dadgā̱tuṃ brahma̭ṇe pū̱yamā̭naḥ ||10||
tvayā̱ hi na̭: pi̱tara̭: soma̱ pūrve̱ karmā̭ṇi ca̱kruḥ pa̭vamāna̱ dhīrā̭: |
va̱nvannavā̭taḥ pari̱dhī~rapo̭rṇu vī̱rebhi̱raśvai̭rma̱ghavā̭ bhavā naḥ ||11||
yathāpa̭vathā̱ mana̭ve vayo̱dhā a̭mitra̱hā va̭rivo̱viddha̱viṣmā̭n |
e̱vā pa̭vasva̱ dravi̭ṇa̱ṃ dadhā̭na̱ indre̱ saṃ ti̭ṣṭha ja̱nayāyṷdhāni ||12||
pava̭sva soma̱ madhṷmā~ ṛ̱tāvā̱'po vasā̭no̱ adhi̱ sāno̱ avyḙ |
ava̱ droṇā̭ni ghṛ̱tavā̭nti sīda ma̱dinta̭mo matsa̱ra i̭ndra̱pāna̭: ||13||
vṛ̱ṣṭiṃ di̱vaḥ śa̱tadhā̭raḥ pavasva sahasra̱sā vā̭ja̱yurde̱vavī̭tau |
saṃ sindhṷbhiḥ ka̱laśḙ vāvaśā̱naḥ samu̱sriyā̭bhiḥ prati̱ranna̱ āyṷ: ||14||
e̱ṣa sya somo̭ ma̱tibhi̭: punā̱no'tyo̱ na vā̱jī tara̱tīdarā̭tīḥ |
payo̱ na du̱gdhamadi̭teriṣi̱ramu̱rvi̭va gā̱tuḥ su̱yamo̱ na voḻhā̭ ||15||
svā̱yu̱dhaḥ so̱tṛbhi̭: pū̱yamā̭no̱'bhya̭rṣa̱ guhya̱ṃ cāru̱ nāma̭ |
a̱bhi vāja̱ṃ sapti̭riva śrava̱syā'bhi vā̱yuma̱bhi gā dḙva soma ||16||
śiśṷṃ jajñā̱naṃ ha̭rya̱taṃ mṛ̭janti śu̱mbhanti̱ vahni̭ṃ ma̱ruto̭ ga̱ṇena̭ |
ka̱virgī̱rbhiḥ kāvyḙnā ka̱viḥ santsoma̭: pa̱vitra̱matyḙti̱ rebha̭n ||17||
ṛṣi̭manā̱ ya ṛ̭ṣi̱kṛtsva̱rṣāḥ sa̱hasra̭ṇīthaḥ pada̱vīḥ ka̭vī̱nām |
tṛ̱tīya̱ṃ dhāma̭ mahi̱ṣaḥ siṣā̭sa̱ntsomo̭ vi̱rāja̱manṷ rājati̱ ṣṭup ||18||
ca̱mū̱ṣacchye̱naḥ śa̭ku̱no vi̱bhṛtvā̭ govi̱ndurdra̱psa āyṷdhāni̱ bibhra̭t |
 a̱pāmū̱rmiṃ saca̭mānaḥ samu̱draṃ tu̱rīya̱ṃ dhāma̭ mahi̱ṣo vi̭vakti ||19||
maryo̱ na śu̱bhrasta̱nva̭ṃ mṛjā̱no'tyo̱ na sṛtvā̭ sa̱naye̱ dhanā̭nām |
vṛṣḙva yū̱thā pari̱ kośa̱marṣa̱nkani̭kradacca̱mvo̱3rā vi̭veśa ||20||
pava̭svendo̱ pava̭māno̱ maho̭bhi̱: kani̭krada̱tpari̱ vārā̭ṇyarṣa |
krīḻa̭ñca̱mvo̱3rā vi̭śa pū̱yamā̭na̱ indra̭ṃ te̱ raso̭ madi̱ro ma̭mattu ||21||
prāsya̱ dhārā̭ bṛha̱tīra̭sṛgranna̱kto gobhi̭: ka̱laśā̱~ ā
vi̭veśa | sāma̭ kṛ̱ṇvantsā̭ma̱nyo̭ vipa̱ścitkranda̭nnetya̱bhi sakhyu̱rna jā̱mim ||22||
a̱pa̱ghnannḙṣi pavamāna̱ śatrṷ̄npri̱yāṃ na jā̱ro a̱bhigī̭ta̱ indṷ: |
sīda̱nvanḙṣu śaku̱no na patvā̱ soma̭: punā̱naḥ ka̱laśḙṣu̱ sattā̭ ||23||
ā te̱ ruca̱: pava̭mānasya soma̱ yoṣḙva yanti su̱dughā̭: sudhā̱rāḥ |
hari̱rānī̭taḥ puru̱vāro̭ a̱psvaci̭kradatka̱laśḙ devayū̱nām ||24||
(58) 1-3 maitrāvaruṇirvasiṣṭha:, 4-6 vāsiṣṭha indrapramati:,7-9 vāsiṣṭho vṛṣagaṇa:,10 -12 vāsiṣṭho manyu :, 13-15 vāsiṣṭha upamanyu:, 16-18 vāsiṣṭho vyāghrapād , 19 -21 vāsiṣṭhaḥ śakti:, 22-24 vāsiṣṭhaḥ karṇaśrud ,25 -27 vāsiṣṭho mṛḻīka:, 28-30 vāsiṣṭho vasukra:, 31-44  parāśara: śāktya:, 45-58 kutsa āṅgirasa: | pavamāna: soma: |triṣṭup  |
a̱sya pre̱ṣā he̱manā̭ pū̱yamā̭no de̱vo de̱vebhi̱: sama̭pṛkta̱ rasa̭m |
su̱taḥ pa̱vitra̱ṃ paryḙti̱ rebha̭nmi̱teva̱ sadma̭ paśu̱mānti̱ hotā̭ ||1||
bha̱drā vastrā̭ sama̱nyā̱3 vasā̭no ma̱hānka̱virni̱vaca̭nāni̱ śaṃsa̭n |
ā va̭cyasva ca̱mvo̭: pū̱yamā̭no vicakṣa̱ṇo jāgṛ̭virde̱vavī̭tau ||2||
samṷ pri̱yo mṛ̭jyate̱ sāno̱ avyḙ ya̱śasta̭ro ya̱śasā̱ṃ kṣaito̭ a̱sme |
 a̱bhi sva̭ra̱ dhanvā̭ pū̱yamā̭no yū̱yaṃ pā̭ta sva̱stibhi̱: sadā̭ naḥ ||3||
pra gā̭yatā̱bhya̭rcāma de̱vāntsoma̭ṃ hinota maha̱te dhanā̭ya |
svā̱duḥ pa̭vāte̱ ati̱ vāra̱mavya̱mā sī̭dāti ka̱laśa̭ṃ deva̱yurna̭: ||4||
indṷrde̱vānā̱mupa̭ sa̱khyamā̱yantsa̱hasra̭dhāraḥ pavate̱ madā̭ya |
nṛbhi̱: stavā̭no̱ anu̱ dhāma̱ pūrva̱maga̱nnindra̭ṃ maha̱te saubha̭gāya ||5||
sto̱tre rā̱ye hari̭rarṣā punā̱na indra̱ṃ mado̭ gacchatu te̱ bharā̭ya |
de̱vairyā̭hi sa̱ratha̱ṃ rādho̱ acchā̭ yū̱yaṃ pā̭ta sva̱stibhi̱: sadā̭ naḥ ||6||
pra kāvya̭mu̱śanḙva bruvā̱ṇo de̱vo de̱vānā̱ṃ jani̭mā vivakti |
mahi̭vrata̱: śuci̭bandhuḥ pāva̱kaḥ pa̱dā va̭rā̱ho a̱bhyḙti̱ rebha̭n ||7||
pra ha̱ṃsāsa̭stṛ̱pala̭ṃ ma̱nyumacchā̱mādasta̱ṃ vṛṣa̭gaṇā ayāsuḥ |
ā̱ṅgū̱ṣyaṃ1 pava̭māna̱ṃ sakhā̭yo du̱rmarṣa̭ṃ sā̱kaṃ pra va̭danti vā̱ṇam ||8||
sa ra̭ṃhata urugā̱yasya̭ jū̱tiṃ vṛthā̱ krīḻa̭ntaṃ mimate̱ na gāva̭: |
pa̱rī̱ṇa̱saṃ kṛ̭ṇute ti̱gmaśṛ̭ṅgo̱ divā̱ hari̱rdadṛ̭śe̱ nakta̭mṛ̱jraḥ ||9||
indṷrvā̱jī pa̭vate̱ gonyo̭ghā̱ indre̱ soma̱: saha̱ inva̱nmadā̭ya |
hanti̱ rakṣo̱ bādha̭te̱ paryarā̭tī̱rvari̭vaḥ kṛ̱ṇvanvṛ̱jana̭sya̱ rājā̭ ||10||
adha̱ dhāra̭yā̱ madhvā̭ pṛcā̱nasti̱ro roma̭ pavate̱ adri̭dugdhaḥ |
indu̱rindra̭sya sa̱khyaṃ jṷṣā̱ṇo de̱vo de̱vasya̭ matsa̱ro madā̭ya ||11||
a̱bhi pri̱yāṇi̭ pavate punā̱no de̱vo de̱vāntsvena̱ rasḙna pṛ̱ñcan |
indu̱rdharmā̭ṇyṛtu̱thā vasā̭no̱ daśa̱ kṣipo̭ avyata̱ sāno̱ avyḙ ||12||
vṛṣā̱ śoṇo̭ abhi̱kani̭krada̱dgā na̱daya̭nneti pṛthi̱vīmu̱ta dyām |
indra̭syeva va̱gnurā śṛ̭ṇva ā̱jau pra̭ce̱taya̭nnarṣati̱ vāca̱memām ||13||
ra̱sāyya̱: paya̭sā̱ pinva̭māna ī̱raya̭nneṣi̱ madhṷmantama̱ṃśum |
pava̭mānaḥ saṃta̱nimḙṣi kṛ̱ṇvannindrā̭ya soma pariṣi̱cyamā̭naḥ ||14||
e̱vā pa̭vasva madi̱ro madā̭yodagrā̱bhasya̭ na̱maya̭nvadha̱snaiḥ |
pari̱ varṇa̱ṃ bhara̭māṇo̱ ruśa̭ntaṃ ga̱vyurno̭ arṣa̱ pari̭ soma si̱ktaḥ ||15||
ju̱ṣṭvī na̭ indo su̱pathā̭ su̱gānyu̱rau pa̭vasva̱ vari̭vāṃsi kṛ̱ṇvan |
gha̱neva̱ viṣva̭gduri̱tāni̭ vi̱ghnannadhi̱ ṣṇunā̭ dhanva̱ sāno̱ avyḙ ||16||
vṛ̱ṣṭiṃ no̭ arṣa di̱vyāṃ ji̭ga̱tnumiḻā̭vatīṃ śa̱ṃgayī̭ṃ jī̱radā̭num |
stukḙva vī̱tā dha̭nvā vici̱nvanbandhṷ̄~ri̱mā~ ava̭rā~ indo vā̱yūn ||17||
gra̱nthiṃ na vi ṣya̭ grathi̱taṃ pṷnā̱na ṛ̱juṃ ca̭ gā̱tuṃ vṛ̭ji̱naṃ ca̭ soma |
atyo̱ na kra̭do̱ hari̱rā sṛ̭jā̱no maryo̭ deva dhanva pa̱styā̭vān ||18||
juṣṭo̱ madā̭ya de̱vatā̭ta indo̱ pari̱ ṣṇunā̭ dhanva̱ sāno̱ avyḙ |
sa̱hasra̭dhāraḥ sura̱bhirada̭bdha̱: pari̭ srava̱ vāja̭sātau nṛ̱ṣahyḙ ||19||
a̱ra̱śmāno̱ yḙ'ra̱thā ayṷktā̱ atyā̭so̱ na sa̭sṛjā̱nāsa̭ ā̱jau |
e̱te śu̱krāso̭ dhanvanti̱ somā̱ devā̭sa̱stā~ upa̭ yātā̱ piba̭dhyai ||20||
e̱vā na̭ indo a̱bhi de̱vavī̭ti̱ṃ pari̭ srava̱ nabho̱ arṇa̭śca̱mūṣṷ |
somo̭ a̱smabhya̱ṃ kāmya̭ṃ bṛ̱hanta̭ṃ ra̱yiṃ da̭dātu vī̱rava̭ntamu̱gram ||21||
takṣa̱dyadī̱ mana̭so̱ vena̭to̱ vāgjyeṣṭha̭sya vā̱ dharma̭ṇi̱ kṣoranī̭ke |
ādī̭māya̱nvara̱mā vā̭vaśā̱nā juṣṭa̱ṃ pati̭ṃ ka̱laśe̱ gāva̱ indṷm ||22||
pra dā̭nu̱do di̱vyo dā̭nupi̱nva ṛ̱tamṛ̱tāya̭ pavate sume̱dhāḥ |
dha̱rmā bhṷvadvṛja̱nya̭sya̱ rājā̱ pra ra̱śmibhi̭rda̱śabhi̭rbhāri̱ bhūma̭ ||23||
pa̱vitrḙbhi̱: pava̭māno nṛ̱cakṣā̱ rājā̭ de̱vānā̭mu̱ta martyā̭nām |
dvi̱tā bhṷvadrayi̱patī̭ rayī̱ṇāmṛ̱taṃ bha̭ra̱tsubhṛ̭ta̱ṃ cārvindṷ: ||24||
arvā̭~ iva̱ śrava̭se sā̱timacchendra̭sya vā̱yora̱bhi vī̱tima̭rṣa |
sa na̭: sa̱hasrā̭ bṛha̱tīriṣo̭ dā̱ bhavā̭ soma draviṇo̱vitpṷnā̱naḥ ||25||
de̱vā̱vyo̭ naḥ pariṣi̱cyamā̭nā̱: kṣaya̭ṃ su̱vīra̭ṃ dhanvanta̱  somā̭: |
ā̱ya̱jyava̭: suma̱tiṃ vi̱śvavā̭rā̱ hotā̭ro̱ na di̭vi̱yajo̭ ma̱ndrata̭māḥ ||26||
e̱vā dḙva de̱vatā̭te pavasva ma̱he so̭ma̱ psara̭se deva̱pāna̭: |
ma̱haści̱ddhi ṣmasi̭ hi̱tāḥ sa̭ma̱rye kṛ̱dhi sṷṣṭhā̱ne roda̭sī punā̱naḥ ||27||
aśvo̱ no kra̭do̱ vṛṣa̭bhiryujā̱naḥ si̱ṃho na bhī̱mo mana̭so̱ javī̭yān |
a̱rvā̱cīnai̭: pa̱thibhi̱rye raji̭ṣṭhā̱ ā pa̭vasva saumana̱saṃ na̭ indo ||28||
śa̱taṃ dhārā̭ de̱vajā̭tā asṛgrantsa̱hasra̭menāḥ ka̱vayo̭ mṛjanti |
indo̭ sa̱nitra̭ṃ di̱va ā pa̭vasva purae̱tāsi̭ maha̱to dhana̭sya ||29||
di̱vo na sargā̭ asasṛgra̱mahnā̱ṃ rājā̱ na mi̱traṃ pra mi̭nāti̱ dhīra̭: |
pi̱turna pu̱traḥ kratṷbhiryatā̱na ā pa̭vasva vi̱śe a̱syā ajī̭tim ||30||
pra te̱ dhārā̱ madhṷmatīrasṛgra̱nvārā̱nyatpū̱to a̱tyeṣyavyā̭n |
pava̭māna̱ pava̭se̱ dhāma̱ gonā̭ṃ jajñā̱naḥ sūrya̭mapinvo a̱rkaiḥ ||31||
kani̭krada̱danu̱ panthā̭mṛ̱tasya̭ śu̱kro vi bhā̭sya̱mṛta̭sya̱ dhāma̭ |
sa indrā̭ya pavase matsa̱ravā̭nhinvā̱no vāca̭ṃ ma̱tibhi̭: kavī̱nām ||32||
di̱vyaḥ sṷpa̱rṇo'va̭ cakṣi soma̱ pinva̱ndhārā̱: karma̭ṇā de̱vavī̭tau |
endo̭ viśa ka̱laśa̭ṃ soma̱dhāna̱ṃ kranda̭nnihi̱ sūrya̱syopa̭ ra̱śmim ||33||
ti̱sro vāca̭ īrayati̱ pra vahni̭ṝ̱tasya̭ dhī̱tiṃ brahma̭ṇo manī̱ṣām |
gāvo̭ yanti̱ gopa̭tiṃ pṛ̱cchamā̭nā̱: soma̭ṃ yanti ma̱tayo̭ vāvaśā̱nāḥ ||34||
soma̱ṃ gāvo̭ dhe̱navo̭ vāvaśā̱nāḥ soma̱ṃ viprā̭ ma̱tibhi̭: pṛ̱cchamā̭nāḥ |
soma̭: su̱taḥ pṷ̄yate a̱jyamā̭na̱: somḙ a̱rkāstri̱ṣṭubha̱: saṃ na̭vante ||35||
e̱vā na̭: soma pariṣi̱cyamā̭na̱ ā pa̭vasva pū̱yamā̭naḥ sva̱sti |
indra̱mā vi̭śa bṛha̱tā ravḙṇa va̱rdhayā̱ vāca̭ṃ ja̱nayā̱ pura̭ṃdhim ||36||
ā jāgṛ̭vi̱rvipra̭ ṛ̱tā ma̭tī̱nāṃ soma̭: punā̱no a̭sadacca̱mūṣṷ |
sapa̭nti̱ yaṃ mi̭thu̱nāso̱ nikā̭mā adhva̱ryavo̭ rathi̱rāsa̭: su̱hastā̭: ||37||
sa pṷnā̱na upa̱ sūre̱ na dhātobhe a̭prā̱ roda̭sī̱ vi ṣa ā̭vaḥ |
pri̱yā ci̱dyasya̭ priya̱sāsa̭ ū̱tī sa tū dhana̭ṃ kā̱riṇe̱ na pra ya̭ṃsat ||38||
sa va̭rdhi̱tā vardha̭naḥ pū̱yamā̭na̱: somo̭ mī̱ḍhvā~ a̱bhi no̱ jyoti̭ṣāvīt |
yenā̭ na̱: pūrvḙ pi̱tara̭: pada̱jñāḥ sva̱rvido̭ a̱bhi gā adri̭mu̱ṣṇan ||39||
akrā̭ntsamu̱draḥ pra̭tha̱me vidha̭rmañja̱naya̭npra̱jā bhuva̭nasya̱ rājā̭ |
vṛṣā̭ pa̱vitre̱ adhi̱ sāno̱ avyḙ bṛ̱hatsomo̭ vāvṛdhe suvā̱na indṷ: ||40||
ma̱hattatsomo̭ mahi̱ṣaśca̭kārā̱'pāṃ yadgarbho'vṛ̭ṇīta de̱vān |
ada̭dhā̱dindre̱ pava̭māna̱ ojo'ja̭naya̱tsūrye̱ jyoti̱rindṷ: ||41||
matsi̭ vā̱yumi̱ṣṭaye̱ rādha̭se ca̱ matsi̭ mi̱trāvarṷṇā pū̱yamā̭naḥ |
matsi̱ śardho̱ mārṷta̱ṃ matsi̭ de̱vānmatsi̱ dyāvā̭pṛthi̱vī dḙva soma ||42||
ṛ̱juḥ pa̭vasva vṛji̱nasya̭ ha̱ntā'pāmī̭vā̱ṃ bādha̭māno̱ mṛdha̭śca |
a̱bhi̱śrī̱ṇanpaya̱: paya̭sā̱bhi gonā̱mindra̭sya̱ tvaṃ tava̭ va̱yaṃ sakhā̭yaḥ ||43||
madhva̱: sūda̭ṃ pavasva̱ vasva̱ utsa̭ṃ vī̱raṃ ca̭ na̱ ā pa̭vasvā̱ bhaga̭ṃ ca |
svada̱svendrā̭ya̱ pava̭māna indo ra̱yiṃ ca̭ na̱ ā pa̭vasvā samu̱drāt ||44||
soma̭: su̱to dhāra̱yātyo̱ na hitvā̱ sindhu̱rna ni̱mnama̱bhi vā̱jya̭kṣāḥ |
ā yoni̱ṃ vanya̭masadatpunā̱naḥ samindu̱rgobhi̭rasara̱tsama̱dbhiḥ ||45||
e̱ṣa sya tḙ pavata indra̱ soma̭śca̱mūṣu̱ dhīra̭ uśa̱te tava̭svān |
sva̭rcakṣā rathi̱raḥ sa̱tyaśṷṣma̱: kāmo̱ na yo dḙvaya̱tāmasa̭rji ||46||
e̱ṣa pra̱tnena̱ vaya̭sā punā̱nasti̱ro varpā̭ṃsi duhi̱turdadhā̭naḥ |
vasā̭na̱: śarma̭ tri̱varṷ̄thama̱psu hotḙva yāti̱ sama̭neṣu̱ rebha̭n ||47||
nū na̱stvaṃ ra̭thi̱ro dḙva soma̱ pari̭ srava ca̱mvo̭: pū̱yamā̭naḥ |
a̱psu svādi̭ṣṭho̱ madhṷmā~ ṛ̱tāvā̭ de̱vo na yaḥ sa̭vi̱tā sa̱tyama̭nmā ||48||
a̱bhi vā̱yuṃ vī̱tya̭rṣā gṛṇā̱no̱3'bhi mi̱trāvarṷṇā pū̱yamā̭naḥ |
a̱bhī nara̭ṃ dhī̱java̭naṃ rathe̱ṣṭhāma̱bhīndra̱ṃ vṛṣa̭ṇa̱ṃ vajra̭bāhum ||49||
a̱bhi vastrā̭ suvasa̱nānya̭rṣā̱'bhi dhe̱nūḥ su̱dughā̭: pū̱yamā̭naḥ |
a̱bhi ca̱ndrā bharta̭ve no̱ hira̭ṇyā̱'bhyaśvā̭nra̱thino̭ deva soma ||50||
a̱bhī no̭ arṣa di̱vyā vasṷ̄nya̱bhi viśvā̱ pārthi̭vā pū̱yamā̭naḥ |
a̱bhi yena̱ dravi̭ṇama̱śnavā̭mā̱'bhyā̭rṣe̱yaṃ ja̭madagni̱vanna̭: ||51||
a̱yā pa̱vā pa̭vasvai̱nā vasṷ̄ni mā~śca̱tva i̭ndo̱ sara̭si̱ pra dha̭nva |
bra̱dhnaści̱datra̱ vāto̱ na jū̱taḥ pṷru̱medha̭ści̱ttaka̭ve̱ nara̭ṃ dāt ||52||
u̱ta na̭ e̱nā pa̭va̱yā pa̭va̱svā'dhi̭ śru̱te śra̱vāyya̭sya tī̱rthe |
ṣa̱ṣṭiṃ sa̱hasrā̭ naigu̱to vasṷ̄ni vṛ̱kṣaṃ na pa̱kvaṃ dhṷ̄nava̱draṇā̭ya ||53||
mahī̱me a̭sya̱ vṛṣa̱nāma̭ śū̱ṣe mā~śca̭tve vā̱ pṛśa̭ne vā̱ vadha̭tre |
asvā̭payanni̱guta̭: sne̱haya̱ccā'pā̱mitrā̱~ apā̱cito̭ ace̱taḥ ||54||
saṃ trī pa̱vitrā̱ vita̭tānye̱ṣyanveka̭ṃ dhāvasi pū̱yamā̭naḥ |
asi̱ bhago̱ asi̭ dā̱trasya̭ dā̱tā'si̭ ma̱ghavā̭ ma̱ghava̭dbhya indo ||55||
e̱ṣa vi̭śva̱vitpa̭vate manī̱ṣī somo̱ viśva̭sya̱ bhuva̭nasya̱ rājā̭ |
dra̱psā~ ī̱raya̭nvi̱dathe̱ṣvindu̱rvi vāra̱mavya̭ṃ sa̱mayāti̭ yāti ||56||
indṷṃ rihanti mahi̱ṣā ada̭bdhāḥ pa̱de rḙbhanti ka̱vayo̱ na gṛdhrā̭: |
hi̱nvanti̱ dhīrā̭ da̱śabhi̱: kṣipā̭bhi̱: sama̭ñjate rū̱pama̱pāṃ rasḙna ||57||
tvayā̭ va̱yaṃ pava̭mānena soma̱ bharḙ kṛ̱taṃ vi ci̭nuyāma̱ śaśva̭t |
tanno̭ mi̱tro varṷṇo māmahantā̱madi̭ti̱: sindhṷ: pṛthi̱vī u̱ta dyauḥ ||58||
12 ambarīṣo vārṣāgira:, ṛjiśvā bhāradvājaśca | pavamāna: soma: |anuṣṭup , 11 bṛhatī |
a̱bhi no̭ vāja̱sāta̭maṃ ra̱yima̭rṣa puru̱spṛha̭m | indo̭ sa̱hasra̭bharṇasaṃ tuvidyu̱mnaṃ vi̭bhvā̱saha̭m ||1||
pari̱ ṣya sṷvā̱no a̱vyaya̱ṃ rathe̱ na varmā̭vyata | indṷra̱bhi druṇā̭ hi̱to hi̭yā̱no dhārā̭bhirakṣāḥ ||2||
pari̱ ṣya sṷvā̱no a̭kṣā̱ indu̱ravye̱ mada̭cyutaḥ | dhārā̱ ya ū̱rdhvo a̭dhva̱re bhrā̱jā naiti̭ gavya̱yuḥ ||3||
sa hi tvaṃ dḙva̱ śaśva̭te̱ vasu̱ martā̭ya dā̱śuṣḙ | indo̭ saha̱sriṇa̭ṃ ra̱yiṃ śa̱tātmā̭naṃ vivāsasi ||4||
va̱yaṃ tḙ a̱sya vṛ̭traha̱nvaso̱ vasva̭: puru̱spṛha̭: | ni nedi̭ṣṭhatamā i̱ṣaḥ syāma̭ su̱mnasyā̭dhrigo ||5||
dviryaṃ pañca̱ svaya̭śasa̱ṃ svasā̭ro̱ adri̭saṃhatam | pri̱yamindra̭sya̱ kāmya̭ṃ prasnā̱paya̭ntyū̱rmiṇa̭m ||6||
pari̱ tyaṃ ha̭rya̱taṃ hari̭ṃ ba̱bhruṃ pṷnanti̱ vārḙṇa | yo de̱vānviśvā̱~ itpari̱ madḙna sa̱ha gaccha̭ti ||7||
a̱sya vo̱ hyava̭sā̱ pānto̭ dakṣa̱sādha̭nam | yaḥ sū̱riṣu̱ śravo̭ bṛ̱hadda̱dhe sva1rṇa ha̭rya̱taḥ ||8||
sa vā̭ṃ ya̱jñeṣṷ mānavī̱ indṷrjaniṣṭa rodasī | de̱vo dḙvī giri̱ṣṭhā asrḙdha̱ntaṃ tṷvi̱ṣvaṇi̭ ||9||
indrā̭ya soma̱ pāta̭ve vṛtra̱ghne pari̭ ṣicyase | narḙ ca̱ dakṣi̭ṇāvate de̱vāya̭ sadanā̱sadḙ ||10||
te pra̱tnāso̱ vyṷṣṭiṣu̱ somā̭: pa̱vitrḙ akṣaran |
a̱pa̱protha̭ntaḥ sanu̱tarhṷra̱ścita̭: prā̱tastā~ apra̭cetasaḥ ||11||
taṃ sa̭khāyaḥ puro̱ruca̭ṃ yū̱yaṃ va̱yaṃ ca̭ sū̱raya̭: | a̱śyāma̱ vāja̭gandhyaṃ sa̱nema̱ vāja̭pastyam ||12||
8 rebhasūnū  kāśyapau | pavamāna: soma: |anuṣṭup ,1 bṛhatī|
ā ha̭rya̱tāya̭ dhṛ̱ṣṇave̱ dhanṷstanvanti̱ pauṃsya̭m |
śu̱krāṃ va̭ya̱ntyasṷrāya ni̱rṇija̭ṃ vi̱pāmagrḙ mahī̱yuva̭: ||1||
adha̭ kṣa̱pā pari̭ṣkṛto̱ vājā̭~ a̱bhi pra gā̭hate | yadī̭ vi̱vasva̭to̱ dhiyo̱ hari̭ṃ hi̱nvanti̱ yāta̭ve ||2||
tama̭sya marjayāmasi̱ mado̱ ya i̭ndra̱pāta̭maḥ | yaṃ gāva̭ ā̱sabhi̭rda̱dhuḥ pu̱rā nū̱naṃ ca̭ sū̱raya̭: ||3||
taṃ gātha̭yā purā̱ṇyā pṷnā̱nama̱bhya̭nūṣata | u̱to kṛ̭panta dhī̱tayo̭ de̱vānā̱ṃ nāma̱ bibhra̭tīḥ ||4||
tamu̱kṣamā̭ṇama̱vyaye̱ vārḙ punanti dharṇa̱sim | dū̱taṃ na pū̱rvaci̭ttaya̱ ā śā̭sate manī̱ṣiṇa̭: ||5||
sa pṷnā̱no ma̱dinta̭ma̱: soma̭śca̱mūṣṷ sīdati | pa̱śau na reta̭ ā̱dadha̱tpati̭rvacasyate dhi̱yaḥ ||6||
sa mṛ̭jyate su̱karma̭bhirde̱vo de̱vebhya̭: su̱taḥ | vi̱de yadā̭su saṃda̱dirma̱hīra̱po vi gā̭hate ||7||
su̱ta i̭ndo pa̱vitra̱ ā nṛbhi̭rya̱to vi nī̭yase | indrā̭ya matsa̱rinta̭maśca̱mūṣvā ni ṣī̭dasi ||8||
9 rebhasūnū kāśyapau | pavamāna: soma: | anuṣṭup |
a̱bhī na̭vante a̱druha̭: pri̱yamindra̭sya̱ kāmya̭m | va̱tsaṃ na pūrva̱ āyṷni jā̱taṃ ri̭hanti mā̱tara̭: ||1||
pu̱nā̱na i̭nda̱vā bha̭ra̱ soma̭ dvi̱barha̭saṃ ra̱yim | tvaṃ vasṷ̄ni puṣyasi̱ viśvā̭ni dā̱śuṣo̭ gṛ̱he ||2||
tvaṃ dhiya̭ṃ mano̱yuja̭ṃ sṛ̱jā vṛ̱ṣṭiṃ na ta̭nya̱tuḥ | tvaṃ vasṷ̄ni̱ pārthi̭vā di̱vyā ca̭ soma puṣyasi ||3||
pari̭ te ji̱gyuṣo̭ yathā̱ dhārā̭ su̱tasya̭ dhāvati | raṃha̭māṇā̱ vya1vyaya̱ṃ vāra̭ṃ vā̱jīva̭ sāna̱siḥ ||4||
kratve̱ dakṣā̭ya naḥ kave̱ pava̭sva soma̱ dhāra̭yā | indrā̭ya̱ pāta̭ve su̱to mi̱trāya̱ varṷṇāya ca ||5||
pava̭sva vāja̱sāta̭maḥ pa̱vitre̱ dhāra̭yā su̱taḥ | indrā̭ya soma̱ viṣṇa̭ve de̱vebhyo̱ madhṷmattamaḥ ||6||
tvāṃ ri̭hanti mā̱taro̱ hari̭ṃ pa̱vitrḙ a̱druha̭: | va̱tsaṃ jā̱taṃ na dhe̱nava̱: pava̭māna̱ vidha̭rmaṇi ||7||
pava̭māna̱ mahi̱ śrava̭ści̱trebhi̭ryāsi ra̱śmibhi̭: | śardha̱ntamā̭ṃsi jighnase̱ viśvā̭ni dā̱śuṣo̭ gṛ̱he ||8||
tvaṃ dyāṃ ca̭ mahivrata pṛthi̱vīṃ cāti̭ jabhriṣe | prati̭ drā̱pima̭muñcathā̱: pava̭māna mahitva̱nā ||9||
(16) 1-3andhīgu: śyāvāśvi:,4-6 yāyātirnāhuṣa:,7-9 nahuṣo mānava:,10-12 manu: sāṃvaraṇa:, 13-16 vaiśvāmitro vācyo vā prajāpati: | pavamāna: soma: | anuṣṭup , 2-3  gāyatrī |
pu̱roji̭tī vo̱ andha̭saḥ su̱tāya̭ mādayi̱tnavḙ | apa̱ śvāna̭ṃ śnathiṣṭana̱ sakhā̭yo dīrghaji̱hvya̭m ||1||
yo dhāra̭yā pāva̱kayā̭ paripra̱syanda̭te su̱taḥ | indu̱raśvo̱ na kṛtvya̭: ||2||
taṃ du̱roṣa̭ma̱bhī nara̱: soma̭ṃ vi̱śvācyā̭ dhi̱yā | ya̱jñaṃ hi̭nva̱ntyadri̭bhiḥ ||3||
su̱tāso̱ madhṷmattamā̱: somā̱ indrā̭ya ma̱ndina̭: | pa̱vitra̭vanto akṣarande̱vānga̭cchantu vo̱ madā̭: ||4||
indu̱rindrā̭ya pavata̱ iti̭ de̱vāso̭ abruvan | vā̱caspati̭rmakhasyate̱ viśva̱syeśā̭na̱ oja̭sā ||5||
sa̱hasra̭dhāraḥ pavate samu̱dro vā̭camīṅkha̱yaḥ | soma̱: patī̭ rayī̱ṇāṃ sakhendra̭sya di̱vedi̭ve ||6||
a̱yaṃ pū̱ṣā ra̱yirbhaga̱: soma̭: punā̱no a̭rṣati | pati̱rviśva̭sya̱ bhūma̭no̱ vya̭khya̱droda̭sī u̱bhe ||7||
samṷ pri̱yā a̭nūṣata̱ gāvo̱ madā̭ya̱ ghṛṣva̭yaḥ | somā̭saḥ kṛṇvate pa̱thaḥ pava̭mānāsa̱ inda̭vaḥ ||8||
ya oji̭ṣṭha̱stamā bha̭ra̱ pava̭māna śra̱vāyya̭m | yaḥ pañca̭ carṣa̱ṇīra̱bhi ra̱yiṃ yena̱ vanā̭mahai ||9||
somā̭: pavanta̱ inda̭vo̱'smabhya̭ṃ gātu̱vitta̭māḥ | mi̱trāḥ sṷvā̱nā a̭re̱pasa̭: svā̱dhya̭: sva̱rvida̭: ||10||
su̱ṣvā̱ṇāso̱ vyadri̭bhi̱ścitā̭nā̱ goradhi̭ tva̱ci | iṣa̭ma̱smabhya̭ma̱bhita̱: sama̭svaranvasu̱vida̭: ||11||
e̱te pū̱tā vi̭pa̱ścita̱: somā̭so̱ dadhyā̭śiraḥ | sūryā̭so̱ na da̭rśa̱tāso̭ jiga̱tnavo̭ dhru̱vā ghṛ̱te ||12||
pra sṷnvā̱nasyāndha̭so̱ marto̱ na vṛ̭ta̱ tadvaca̭: | apa̱ śvāna̭marā̱dhasa̭ṃ ha̱tā ma̱khaṃ na bhṛga̭vaḥ ||13||
ā jā̱miratkḙ avyata bhu̱je na pu̱tra o̱ṇyo̭: | sara̭jjā̱ro na yoṣa̭ṇāṃ va̱ro na yoni̭mā̱sada̭m ||14||
sa vī̱ro da̭kṣa̱sādha̭no̱ vi yasta̱stambha̱ roda̭sī | hari̭: pa̱vitrḙ avyata ve̱dhā na yoni̭mā̱sada̭m ||15||
avyo̱ vārḙbhiḥ pavate̱ somo̱ gavye̱ adhi̭ tva̱ci | kani̭krada̱dvṛṣā̱ hari̱rindra̭syā̱bhyḙti niṣkṛ̱tam ||16||
8 trita āptya: | pavamāna: soma: | uṣṇik |
krā̱ṇā śiśṷrma̱hīnā̭ṃ hi̱nvannṛ̱tasya̱ dīdhi̭tim | viśvā̱ pari̭ pri̱yā bhṷva̱dadha̭ dvi̱tā ||1||
upa̭ tri̱tasya̭ pā̱ṣyo̱3rabha̭kta̱ yadguhā̭ pa̱dam | ya̱jñasya̭ sa̱pta dhāma̭bhi̱radha̭ pri̱yam ||2||
trīṇi̭ tri̱tasya̱ dhāra̭yā pṛ̱ṣṭheṣvera̭yā ra̱yim | mimī̭te asya̱ yoja̭nā̱ vi su̱kratṷ: ||3||
ja̱jñā̱naṃ sa̱pta mā̱taro̭ ve̱dhāma̭śāsata śri̱ye | a̱yaṃ dhru̱vo ra̭yī̱ṇāṃ cikḙta̱ yat ||4||
a̱sya vra̱te sa̱joṣa̭so̱ viśvḙ de̱vāso̭ a̱druha̭: | spā̱rhā bha̭vanti̱ ranta̭yo ju̱ṣanta̱ yat ||5||
yamī̱ garbha̭mṛtā̱vṛdho̭ dṛ̱śe cāru̱majī̭janan | ka̱viṃ maṃhi̭ṣṭhamadhva̱re pṷru̱spṛha̭m ||6||
sa̱mī̱cī̱ne a̱bhi tmanā̭ ya̱hvī ṛ̱tasya̭ mā̱tarā̭ | ta̱nvā̱nā ya̱jñamā̭nu̱ṣagyada̭ñja̱te ||7||
kratvā̭ śu̱krebhi̭ra̱kṣabhi̭ṝ̱ṇorapa̭ vra̱jaṃ di̱vaḥ | hi̱nvannṛ̱tasya̱ dīdhi̭ti̱ṃ prādhva̱re ||8||
6 dvita āptya:  | pavamāna: soma: | uṣṇik |
pra pṷnā̱nāya̭ ve̱dhase̱ somā̭ya̱ vaca̱ udya̭tam | bhṛ̱tiṃ na bha̭rā ma̱tibhi̱rjujo̭ṣate ||1||
pari̱ vārā̭ṇya̱vyayā̱ gobhi̭rañjā̱no a̭rṣati | trī ṣa̱dhasthā̭ punā̱naḥ kṛ̭ṇute̱ hari̭: ||2||
pari̱ kośa̭ṃ madhu̱ścuta̭ma̱vyaye̱ vārḙ arṣati | a̱bhi vāṇī̱ṝṣī̭ṇāṃ sa̱pta nṷ̄ṣata ||3||
pari̭ ṇe̱tā ma̭tī̱nāṃ vi̱śvadḙvo̱ adā̭bhyaḥ | soma̭: punā̱naśca̱mvo̭rviśa̱ddhari̭: ||4||
pari̱ daivī̱ranṷ sva̱dhā indrḙṇa yāhi sa̱ratha̭m | pu̱nā̱no vā̱ghadvā̱ghadbhi̱rama̭rtyaḥ ||5||
pari̱ sapti̱rna vā̭ja̱yurde̱vo de̱vebhya̭: su̱taḥ | vyā̱na̱śiḥ pava̭māno̱ vi dhā̭vati ||6||
6 parvatanāradau kāṇvau, kāśyapyau śikhaṇḍinyāvapsarasau vā | pavamāna: soma: | uṣṇik |
sakhā̭ya̱ ā ni ṣī̭data punā̱nāya̱ pra gā̭yata | śiśu̱ṃ na ya̱jñaiḥ pari̭ bhūṣata śri̱ye ||1||
samī̭ va̱tsaṃ na mā̱tṛbhi̭: sṛ̱jatā̭ gaya̱sādha̭nam | de̱vā̱vyaṃ1 mada̭ma̱bhi dviśa̭vasam ||2||
pu̱nātā̭ dakṣa̱sādha̭na̱ṃ yathā̱ śardhā̭ya vī̱tayḙ | yathā̭ mi̱trāya̱ varṷṇāya̱ śaṃta̭maḥ ||3||
a̱smabhya̭ṃ tvā vasu̱vida̭ma̱bhi vāṇī̭ranūṣata | gobhi̭ṣṭe̱ varṇa̭ma̱bhi vā̭sayāmasi ||4||
sa no̭ madānāṃ pata̱ indo̭ de̱vapsa̭rā asi | sakhḙva̱ sakhyḙ gātu̱vitta̭mo bhava ||5||
sanḙmi kṛ̱dhya1smadā ra̱kṣasa̱ṃ kaṃ ci̭da̱triṇa̭m | apādḙvaṃ dva̱yumaṃho̭ yuyodhi naḥ ||6||
6  parvatanāradau kāṇvau |  pavamāna: soma: | uṣṇik |
taṃ va̭: sakhāyo̱ madā̭ya punā̱nama̱bhi gā̭yata | śiśu̱ṃ na ya̱jñaiḥ sva̭dayanta gū̱rtibhi̭: ||1||
saṃ va̱tsa i̭va mā̱tṛbhi̱rindṷrhinvā̱no a̭jyate | de̱vā̱vīrmado̭ ma̱tibhi̱: pari̭ṣkṛtaḥ ||2||
a̱yaṃ dakṣā̭ya̱ sādha̭no̱'yaṃ śardhā̭ya vī̱tayḙ | a̱yaṃ de̱vebhyo̱ madhṷmattamaḥ su̱taḥ ||3||
goma̭nna indo̱ aśva̭vatsu̱taḥ sṷdakṣa dhanva | śuci̭ṃ te̱ varṇa̱madhi̱ goṣṷ dīdharam ||4||
sa no̭ harīṇāṃ pata̱ indo̭ de̱vapsa̭rastamaḥ | sakhḙva̱ sakhye̱ naryo̭ ru̱ce bha̭va ||5||
sanḙmi̱ tvama̱smadā~ adḙva̱ṃ kaṃ ci̭da̱triṇa̭m | sā̱hvā~ i̭ndo̱ pari̱ bādho̱ apa̭ dva̱yum ||6||
((14) 1-3, 10-14   agniścākṣuṣa:, 4-6 cakṣurmānava:, 7-9 manurāpsava: | pavamāna: soma: | uṣṇik |
indra̱maccha̭ su̱tā i̱me vṛṣa̭ṇaṃ yantu̱ hara̭yaḥ | śru̱ṣṭī jā̱tāsa̱ inda̭vaḥ sva̱rvida̭: ||1||
a̱yaṃ bharā̭ya sāna̱sirindrā̭ya pavate su̱taḥ | somo̱ jaitra̭sya cetati̱ yathā̭ vi̱de ||2||
a̱syedindro̱ made̱ṣvā grā̱bhaṃ gṛ̭bhṇīta sāna̱sim | vajra̭ṃ ca̱ vṛṣa̭ṇaṃ bhara̱tsama̭psu̱jit ||3||
pra dha̭nvā soma̱ jāgṛ̭vi̱rindrā̭yendo̱ pari̭ srava | dyu̱manta̱ṃ śuṣma̱mā bha̭rā sva̱rvida̭m ||4||
indrā̭ya̱ vṛṣa̭ṇa̱ṃ mada̱ṃ pava̭sva vi̱śvada̭rśataḥ | sa̱hasra̭yāmā pathi̱kṛdvi̭cakṣa̱ṇaḥ ||5||
a̱smabhya̭ṃ gātu̱vitta̭mo de̱vebhyo̱ madhṷmattamaḥ | sa̱hasra̭ṃ yāhi pa̱thibhi̱: kani̭kradat ||6||
pava̭sva de̱vavī̭taya̱ indo̱ dhārā̭bhi̱roja̭sā | ā ka̱laśa̱ṃ madhṷmāntsoma naḥ sadaḥ ||7||
tava̭ dra̱psā ṷda̱pruta̱ indra̱ṃ madā̭ya vāvṛdhuḥ | tvāṃ de̱vāso̭ a̱mṛtā̭ya̱ kaṃ pa̭puḥ ||8||
ā na̭: sutāsa indavaḥ punā̱nā dhā̭vatā ra̱yim | vṛ̱ṣṭidyā̭vo rītyāpaḥ sva̱rvida̭: ||9||
soma̭: punā̱na ū̱rmiṇā'vyo̱ vāra̱ṃ vi dhā̭vati | agrḙ vā̱caḥ pava̭māna̱: kani̭kradat ||10||
dhī̱bhirhi̭nvanti vā̱jina̱ṃ vane̱ krīḻa̭nta̱matya̭vim | a̱bhi tri̭pṛ̱ṣṭhaṃ ma̱taya̱: sama̭svaran ||11||
asa̭rji ka̱laśā̭~ a̱bhi mī̱ḻhe sapti̱rna vā̭ja̱yuḥ | pu̱nā̱no vāca̭ṃ ja̱naya̭nnasiṣyadat ||12||
pava̭te harya̱to hari̱rati̱ hvarā̭ṃsi̱ raṃhyā̭ | a̱bhyarṣa̭ntsto̱tṛbhyo̭ vī̱rava̱dyaśa̭: ||13||
a̱yā pa̭vasva deva̱yurmadho̱rdhārā̭ asṛkṣata | rebha̭npa̱vitra̱ṃ paryḙṣi vi̱śvata̭: ||14||
26 saptarṣaya: ( 1 bharadvājo bārhaspatya: , 2 kaśyapo mārīca:, 3 gotamo rāhūgaṇa:, 4 bhaumo'tri:, 5 viśvāmitro gāthina:, 6 jamadagnirbhārgava:, 7  maitrāvaruṇirvasiṣṭha: ) |pavamāna: soma: | pragātha:= (1,4,6,8,9,10,12,14,17 bṛhatī; 2,5,7,11,13,15,18 satobṛhatī, ) 3,16 dvipadā virāṭ ; 19-26 pragātha:= ( viṣamā bṛhatī, samā satobṛhatī ) |
parī̱to ṣi̭ñcatā su̱taṃ somo̱ ya ṷtta̱maṃ ha̱viḥ |
da̱dha̱nvā~ yo naryo̭ a̱psva1ntarā su̱ṣāva̱ soma̱madri̭bhiḥ ||1||
nū̱naṃ pṷnā̱no'vi̭bhi̱: pari̭ sra̱vā'da̭bdhaḥ sura̱bhinta̭raḥ |
su̱te ci̭ttvā̱psu ma̭dāmo̱ andha̭sā śrī̱ṇanto̱ gobhi̱rutta̭ram ||2||
pari̭ suvā̱naścakṣa̭se deva̱māda̭na̱: kratu̱rindṷrvicakṣa̱ṇaḥ ||3||
pu̱nā̱naḥ so̭ma̱ dhāra̭yā̱'po vasā̭no arṣasi |
ā ra̭tna̱dhā yoni̭mṛ̱tasya̭ sīda̱syutso̭ deva hira̱ṇyaya̭: ||4||
du̱hā̱na ūdha̭rdi̱vyaṃ madhṷ pri̱yaṃ pra̱tnaṃ sa̱dhastha̱māsa̭dat |
ā̱pṛcchya̭ṃ dha̱ruṇa̭ṃ vā̱jya̭rṣati̱ nṛbhi̭rdhū̱to vi̭cakṣa̱ṇaḥ ||5||
pu̱nā̱naḥ so̭ma̱ jāgṛ̭vi̱ravyo̱ vāre̱ pari̭ pri̱yaḥ |
tvaṃ vipro̭ abha̱vo'ṅgi̭rastamo̱ madhvā̭ ya̱jñaṃ mi̭mikṣa naḥ ||6||
somo̭ mī̱ḍhvānpa̭vate gātu̱vitta̭ma̱ ṛṣi̱rvipro̭ vicakṣa̱ṇaḥ |
tvaṃ ka̱vira̭bhavo deva̱vīta̭ma̱ ā sūrya̭ṃ rohayo di̱vi ||7||
soma̭ u ṣuvā̱ṇaḥ so̱tṛbhi̱radhi̱ ṣṇubhi̱ravī̭nām |
aśva̭yeva ha̱ritā̭ yāti̱ dhāra̭yā ma̱ndrayā̭ yāti̱ dhāra̭yā ||8||
a̱nū̱pe gomā̱ngobhi̭rakṣā̱: somo̭ du̱gdhābhi̭rakṣāḥ |
sa̱mu̱draṃ na sa̱ṃvara̭ṇānyagmanma̱ndī madā̭ya tośate ||9||
ā so̭ma suvā̱no adri̭bhisti̱ro vārā̭ṇya̱vyayā̭ |
jano̱ na pu̱ri ca̱mvo̭rviśa̱ddhari̱: sado̱ vanḙṣu dadhiṣe ||10||
sa mā̭mṛje ti̱ro aṇvā̭ni me̱ṣyo̭ mī̱ḻhe sapti̱rna vā̭ja̱yuḥ |
a̱nu̱mādya̱: pava̭māno manī̱ṣibhi̱: somo̱ viprḙbhi̱ṝkva̭bhiḥ ||11||
pra so̭ma de̱vavī̭taye̱ sindhu̱rna pi̭pye̱ arṇa̭sā |
a̱ṃśoḥ paya̭sā madi̱ro na jāgṛ̭vi̱racchā̱ kośa̭ṃ madhu̱ścuta̭m ||12||
ā ha̭rya̱to arjṷne̱ atkḙ avyata pri̱yaḥ sū̱nurna marjya̭: |
tamī̭ṃ hinvantya̱paso̱ yathā̱ ratha̭ṃ na̱dīṣvā gabha̭styoḥ ||13||
a̱bhi somā̭sa ā̱yava̱: pava̭nte̱ madya̱ṃ mada̭m |
 sa̱mu̱drasyādhi̭ vi̱ṣṭapi̭ manī̱ṣiṇo̭ matsa̱rāsa̭: sva̱rvida̭: ||14||
tara̭tsamu̱draṃ pava̭māna ū̱rmiṇā̱ rājā̭ de̱va ṛ̱taṃ bṛ̱hat |
arṣa̭nmi̱trasya̱ varṷṇasya̱ dharma̭ṇā̱ pra hi̭nvā̱na ṛ̱taṃ bṛ̱hat ||15||
nṛbhi̭ryemā̱no ha̭rya̱to vi̭cakṣa̱ṇo rājā̭ de̱vaḥ sa̭mu̱driya̭: ||16||
indrā̭ya pavate̱ mada̱: somo̭ ma̱rutva̭te su̱taḥ | sa̱hasra̭dhāro̱ atyavya̭marṣati̱ tamī̭ mṛjantyā̱yava̭: ||17||
pu̱nā̱naśca̱mū ja̱naya̭nma̱tiṃ ka̱viḥ somo̭ de̱veṣṷ raṇyati |
a̱po vasā̭na̱: pari̱ gobhi̱rutta̭ra̱: sīda̱nvanḙṣvavyata ||18||
tavā̱haṃ so̭ma rāraṇa sa̱khya i̭ndo di̱vedi̭ve |
pu̱rūṇi̭ babhro̱ ni ca̭ranti̱ māmava̭ pari̱dhī~rati̱ tā~ i̭hi ||19||
u̱tāhaṃ nakta̭mu̱ta so̭ma te̱ divā̭ sa̱khyāya̭ babhra̱ ūdha̭ni |
ghṛ̱ṇā tapa̭nta̱mati̱ sūrya̭ṃ pa̱raḥ śa̭ku̱nā i̭va paptima ||20||
mṛ̱jyamā̭naḥ suhastya samu̱dre vāca̭minvasi |
 ra̱yiṃ pi̱śaṅga̭ṃ bahu̱laṃ pṷru̱spṛha̱ṃ pava̭mānā̱bhya̭rṣasi ||21||
mṛ̱jā̱no vāre̱ pava̭māno a̱vyaye̱ vṛṣāva̭ cakrado̱ vanḙ |
de̱vānā̭ṃ soma pavamāna niṣkṛ̱taṃ gobhi̭rañjā̱no a̭rṣasi ||22||
pava̭sva̱ vāja̭sātaye̱'bhi viśvā̭ni̱ kāvyā̭ |
tvaṃ sa̭mu̱draṃ pra̭tha̱mo vi dhā̭rayo de̱vebhya̭: soma matsa̱raḥ ||23||
sa tū pa̭vasva̱ pari̱ pārthi̭va̱ṃ rajo̭ di̱vyā ca̭ soma̱ dharma̭bhiḥ |
tvāṃ viprā̭so ma̱tibhi̭rvicakṣaṇa śu̱bhraṃ hi̭nvanti dhī̱tibhi̭: ||24||
pava̭mānā asṛkṣata pa̱vitra̱mati̱ dhāra̭yā |
ma̱rutva̭nto matsa̱rā i̭ndri̱yā hayā̭ me̱dhāma̱bhi prayā̭ṃsi ca ||25||
a̱po vasā̭na̱: pari̱ kośa̭marṣa̱tīndṷrhiyā̱naḥ so̱tṛbhi̭: |
ja̱naya̱ñjyoti̭rma̱ndanā̭ avīvaśa̱dgāḥ kṛ̭ṇvā̱no na ni̱rṇija̭m ||26||
(1-16 ) 1-2 gaurivīti: śāktya:; 3,14-16 śaktirvāsiṣṭha:,4-5 ūrūrāṅgirasa:,6-7 ṛjiśvā bhāradvāja:, 8-9 ūrdhvasadmā āṅgirasa:, 10-11 kṛtayaśā āṅgirasa:,12-13 ṛṇacayo rājarṣi: | pavamāna: soma: | kākubha: pragātha:=( viṣamā kakup , samā satobṛhatī ) , 13 yavamadhyā gāyatrī |
pava̭sva̱ madhṷmattama̱ indrā̭ya soma kratu̱vitta̭mo̱ mada̭: | mahi̭ dyu̱kṣata̭mo̱ mada̭: ||1||
yasya̭ te pī̱tvā vṛ̭ṣa̱bho vṛ̭ṣā̱yate̱'sya pī̱tā sva̱rvida̭: |
sa su̱prakḙto a̱bhya̭kramī̱diṣo'cchā̱ vāja̱ṃ naita̭śaḥ ||2||
tvaṃ hya1ṅga daivyā̱ pava̭māna̱ jani̭māni dyu̱matta̭maḥ | a̱mṛ̱ta̱tvāya̭ gho̱ṣaya̭: ||3||
yenā̱ nava̭gvo da̱dhyaṅṅa̭porṇu̱te yena̱ viprā̭sa āpi̱re |
de̱vānā̭ṃ su̱mne a̱mṛta̭sya̱ cārṷṇo̱ yena̱ śravā̭ṃsyāna̱śuḥ ||4||
e̱ṣa sya dhāra̭yā su̱to'vyo̱ vārḙbhiḥ pavate ma̱dinta̭maḥ | krīḻa̭nnū̱rmira̱pāmi̭va ||5||
ya u̱sriyā̱ apyā̭ a̱ntaraśma̭no̱ nirgā akṛ̭nta̱doja̭sā |
a̱bhi vra̱jaṃ ta̭tniṣe̱ gavya̱maśvya̭ṃ va̱rmīva̭ dhṛṣṇa̱vā rṷja ||6||
ā so̭tā̱ pari̭ ṣiñca̱tā'śva̱ṃ na stoma̭ma̱ptura̭ṃ raja̱stura̭m | va̱na̱kra̱kṣamṷda̱pruta̭m ||7||
sa̱hasra̭dhāraṃ vṛṣa̱bhaṃ pa̭yo̱vṛdha̭ṃ pri̱yaṃ de̱vāya̱ janma̭ne |
ṛ̱tena̱ ya ṛ̱tajā̭to vivāvṛ̱dhe rājā̭ de̱va ṛ̱taṃ bṛ̱hat ||8||
a̱bhi dyu̱mnaṃ bṛ̱hadyaśa̱ iṣa̭spate didī̱hi dḙva deva̱yuḥ | vi kośa̭ṃ madhya̱maṃ yṷva ||9||
ā va̭cyasva sudakṣa ca̱mvo̭: su̱to vi̱śāṃ vahni̱rna vi̱śpati̭: |
vṛ̱ṣṭiṃ di̱vaḥ pa̭vasva rī̱tima̱pāṃ jinvā̱ gavi̭ṣṭaye̱ dhiya̭: ||10||
e̱tamu̱ tyaṃ ma̭da̱cyuta̭ṃ sa̱hasra̭dhāraṃ vṛṣa̱bhaṃ divo̭ duhuḥ | viśvā̱ vasṷ̄ni̱ bibhra̭tam ||11||
vṛṣā̱ vi ja̭jñe ja̱naya̱nnama̭rtyaḥ pra̱tapa̱ñjyoti̭ṣā̱ tama̭: |
sa suṣṭṷtaḥ ka̱vibhi̭rni̱rṇija̭ṃ dadhe tri̱dhātva̭sya̱ daṃsa̭sā ||12||
sa sṷnve̱ yo vasṷ̄nā̱ṃ yo rā̱yāmā̭ne̱tā ya iḻā̭nām | somo̱ yaḥ sṷkṣitī̱nām ||13||
yasya̭ na̱ indra̱: pibā̱dyasya̭ ma̱ruto̱ yasya̭ vārya̱maṇā̱ bhaga̭: |
ā yena̭ mi̱trāvarṷṇā̱ karā̭maha̱ endra̱mava̭se ma̱he ||14||
indrā̭ya soma̱ pāta̭ve̱ nṛbhi̭rya̱taḥ svā̭yu̱dho ma̱dinta̭maḥ | pava̭sva̱ madhṷmattamaḥ ||15||
indra̭sya̱ hārdi̭ soma̱dhāna̱mā vi̭śa samu̱drami̭va̱ sindha̭vaḥ |
juṣṭo̭ mi̱trāya̱ varṷṇāya vā̱yavḙ di̱vo vi̭ṣṭa̱mbha ṷtta̱maḥ ||16||
22 agnayo dhiṣṇyā aiśvaraya: | pavamāna: soma: |dvipadā virāṭ |
pari̱ pra dha̱nvendrā̭ya soma svā̱durmi̱trāya̭ pū̱ṣṇe bhagā̭ya|                        1
indra̭ste soma su̱tasya̭ peyā̱: kratve̱ dakṣā̭ya̱ viśvḙ ca de̱vāḥ ||1||           2
e̱vāmṛtā̭ya ma̱he kṣayā̭ya̱ sa śu̱kro a̭rṣa di̱vyaḥ pī̱yūṣa̭:|                       3
pava̭sva soma ma̱hāntsa̭mu̱draḥ pi̱tā de̱vānā̱ṃ viśvā̱bhi dhāma̭ ||2||           4
śu̱kraḥ pa̭vasva de̱vebhya̭: soma di̱ve pṛ̭thi̱vyai śaṃ ca̭ pra̱jāyai̭|                     5
di̱vo dha̱rtāsi̭ śu̱kraḥ pī̱yūṣa̭: sa̱tye vidha̭rmanvā̱jī pa̭vasva ||3||             6
pava̭sva soma dyu̱mnī sṷdhā̱ro ma̱hāmavī̭nā̱manṷ pū̱rvyaḥ|                            7
nṛbhi̭ryemā̱no ja̭jñā̱naḥ pū̱taḥ kṣara̱dviśvā̭ni ma̱ndraḥ sva̱rvit ||4||             8
indṷ: punā̱naḥ pra̱jāmṷrā̱ṇaḥ kara̱dviśvā̭ni̱ dravi̭ṇāni naḥ|                      9
pava̭sva soma̱ kratve̱ dakṣā̱yā'śvo̱ na ni̱kto vā̱jī dhanā̭ya ||5||            10
taṃ tḙ so̱tāro̱ rasa̱ṃ madā̭ya pu̱nanti̱ soma̭ṃ ma̱he dyu̱mnāya̭ |                      11
śiśṷṃ jajñā̱naṃ hari̭ṃ mṛjanti pa̱vitre̱ soma̭ṃ de̱vebhya̱ indṷm ||6||             12
indṷ: paviṣṭa̱ cāru̱rmadā̭yā̱'pāmu̱pasthḙ ka̱virbhagā̭ya                              13
bibha̭rti̱ cārvindra̭sya̱ nāma̱ yena̱ viśvā̭ni vṛ̱trā ja̱ghāna̭ ||7||                14
piba̭ntyasya̱ viśvḙ de̱vāso̱ gobhi̭: śrī̱tasya̱ nṛbhi̭: su̱tasya̭ |                  15
pra sṷvā̱no a̭kṣāḥ sa̱hasra̭dhārasti̱raḥ pa̱vitra̱ṃ vi vāra̱mavya̭m ||8||           16
sa vā̱jya̭kṣāḥ sa̱hasra̭retā a̱dbhirmṛ̭jā̱no gobhi̭: śrīṇā̱naḥ |                   17
pra so̭ma yā̱hīndra̭sya ku̱kṣā nṛbhi̭ryemā̱no adri̭bhiḥ su̱taḥ ||9||               18
asa̭rji vā̱jī ti̱raḥ pa̱vitra̱mindrā̭ya̱ soma̭: sa̱hasra̭dhāraḥ |                     19
a̱ñjantyḙna̱ṃ madhvo̱ rase̱nendrā̭ya̱ vṛṣṇa̱ indu̱ṃ madā̭ya ||10||                       20
de̱vebhya̭stvā̱ vṛthā̱ pāja̭se̱'po vasā̭na̱ṃ hari̭ṃ mṛjanti |                            21
indu̱rindrā̭ya tośate̱ ni to̭śate śrī̱ṇannu̱gro ri̱ṇanna̱paḥ ||11||                 22
12 tryaruṇastraivṛṣṇa:,trasadasyu: paurukutsya: | pavamāna: soma: |1-3 pipīlikamadhyā anuṣṭup , 4-9 ūrdhvabṛhatī,10-12 virāṭ |
paryū̱ ṣu pra dha̭nva̱ vāja̭sātaye̱ pari̭ vṛ̱trāṇi̭ sa̱kṣaṇi̭: | dvi̱ṣasta̱radhyā̭ ṛṇa̱yā na̭ īyase ||1||
anu̱ hi tvā̭ su̱taṃ so̭ma̱ madā̭masi ma̱he sa̭marya̱rājyḙ | vājā̭~ a̱bhi pa̭vamāna̱ pra gā̭hase ||2||
ajī̭jano̱ hi pa̭vamāna̱ sūrya̭ṃ vi̱dhāre̱ śakma̭nā̱ paya̭: | gojī̭rayā̱ raṃha̭māṇa̱: pura̭ṃdhyā ||3||
ajī̭jano amṛta̱ martye̱ṣvā~ ṛ̱tasya̱ dharma̭nna̱mṛta̭sya̱ cārṷṇaḥ | sadā̭saro̱ vāja̱macchā̱ sani̭ṣyadat ||4||
a̱bhya̭bhi̱ hi śrava̭sā ta̱tardi̱thotsa̱ṃ na kaṃ ci̭jjana̱pāna̱makṣi̭tam | śaryā̭bhi̱rna bhara̭māṇo̱ gabha̭styoḥ ||5||
ādī̱ṃ ke ci̱tpaśya̭mānāsa̱ āpya̭ṃ vasu̱ruco̭ di̱vyā a̱bhya̭nūṣata | vāra̱ṃ na de̱vaḥ sa̭vi̱tā vyṷ̄rṇute ||6||
tve so̭ma pratha̱mā vṛ̱ktaba̭rhiṣo ma̱he vājā̭ya̱ śrava̭se̱ dhiya̭ṃ dadhuḥ | sa tvaṃ no̭ vīra vī̱ryā̭ya codaya ||7||
di̱vaḥ pī̱yūṣa̭ṃ pū̱rvyaṃ yadu̱kthya̭ṃ ma̱ho gā̱hāddi̱va ā nira̭dhukṣata | indra̭ma̱bhi jāya̭māna̱ṃ sama̭svaran ||8||
adha̱ yadi̱me pa̭vamāna̱ roda̭sī i̱mā ca̱ viśvā̱ bhuva̭nā̱bhi ma̱jmanā̭ |
yū̱the na ni̱:ṣṭhā vṛ̭ṣa̱bho vi ti̭ṣṭhase ||9||
soma̭: punā̱no a̱vyaye̱ vāre̱ śiśu̱rna krīḻa̱npava̭māno akṣāḥ | sa̱hasra̭dhāraḥ śa̱tavā̭ja̱ indṷ: ||10||
e̱ṣa pṷnā̱no madhṷmā~ ṛ̱tāvendrā̱yendṷ: pavate svā̱durū̱rmiḥ | vā̱ja̱sani̭rvarivo̱vidva̭yo̱dhāḥ ||11||
sa pa̭vasva̱ saha̭mānaḥ pṛta̱nyūntsedha̱nrakṣā̱ṃsyapa̭ du̱rgahā̭ṇi | svā̱yu̱dhaḥ sā̭sa̱hvāntso̭ma̱ śatrṷ̄n ||12||
3 anānata: pārucchepi: | pavamāna: soma: |atyaṣṭi: |
a̱yā ru̱cā hari̭ṇyā punā̱no viśvā̱ dveṣā̭ṃsi tarati sva̱yugva̭bhi̱: sūro̱ na sva̱yugva̭bhiḥ |
dhārā̭ su̱tasya̭ rocate punā̱no a̭ru̱ṣo hari̭: | viśvā̱ yadrū̱pā pa̭ri̱yātyṛkva̭bhiḥ sa̱ptāsyḙbhi̱ṝkva̭bhiḥ ||1||
tvaṃ tyatpa̭ṇī̱nāṃ vi̭do̱ vasu̱ saṃ mā̱tṛbhi̭rmarjayasi̱ sva ā dama̭ ṛ̱tasya̭ dhī̱tibhi̱rdamḙ |
pa̱rā̱vato̱ na sāma̱ tadyatrā̱ raṇa̭nti dhī̱taya̭: | tri̱dhātṷbhi̱rarṷṣībhi̱rvayo̭ dadhe̱ roca̭māno̱ vayo̭ dadhe ||2||
pūrvā̱manṷ pra̱diśa̭ṃ yāti̱ ceki̭ta̱tsaṃ ra̱śmibhi̭ryatate darśa̱to ratho̱ daivyo̭ darśa̱to ratha̭: |
 agma̭nnu̱kthāni̱ pauṃsyendra̱ṃ jaitrā̭ya harṣayan | vajra̭śca̱ yadbhava̭tho̱ ana̭pacyutā sa̱matsvana̭pacyutā ||3||
4 śiśurāṅgirasa: | pavamāna: soma: |paṅkti: |
nā̱nā̱naṃ vā ṷ no̱ dhiyo̱ vi vra̱tāni̱ janā̭nām |
takṣā̭ ri̱ṣṭaṃ ru̱taṃ bhi̱ṣagbra̱hmā su̱nvanta̭miccha̱tīndrā̭yendo̱ pari̭ srava ||1||
jara̭tībhi̱roṣa̭dhībhiḥ pa̱rṇebhi̭: śaku̱nānā̭m |
kā̱rmā̱ro aśma̭bhi̱rdyubhi̱rhira̭ṇyavantamiccha̱tīndrā̭yendo̱ pari̭ srava ||2||
kā̱rura̱haṃ ta̱to bhi̱ṣagṷpalapra̱kṣiṇī̭ na̱nā |
nānā̭dhiyo vasū̱yavo'nu̱ gā i̭va tasthi̱mendrā̭yendo̱ pari̭ srava ||3||
aśvo̱ voḻhā̭ su̱khaṃ ratha̭ṃ hasa̱nāmṷpama̱ntriṇa̭: |
 śepo̱ roma̭ṇvantau bhe̱dau vārinma̱ṇḍūka̭ iccha̱tīndrā̭yendo̱ pari̭ srava ||4||
11 kaśyapo mārīca: | pavamāna: soma: | paṅkti: |
śa̱rya̱ṇāva̭ti̱ soma̱mindra̭: pibatu vṛtra̱hā |
bala̱ṃ dadhā̭na ā̱tmani̭ kari̱ṣyanvī̱rya̭ṃ ma̱hadindrā̭yendo̱ pari̭ srava ||1||
ā pa̭vasva diśāṃ pata ārjī̱kātso̭ma mīḍhvaḥ |
ṛ̱ta̱vā̱kena̭ sa̱tyena̭ śra̱ddhayā̱ tapa̭sā su̱ta indrā̭yendo̱ pari̭ srava ||2||
pa̱rjanya̭vṛddhaṃ mahi̱ṣaṃ taṃ sūrya̭sya duhi̱tābha̭rat |
taṃ ga̭ndha̱rvāḥ pratya̭gṛbhṇa̱ntaṃ some̱ rasa̱māda̭dhu̱rindrā̭yendo̱ pari̭ srava ||3||
ṛ̱taṃ vada̭nnṛtadyumna sa̱tyaṃ vada̭ntsatyakarman |
śra̱ddhāṃ vada̭ntsoma rājandhā̱trā so̭ma̱ pari̭ṣkṛta̱ indrā̭yendo̱ pari̭ srava ||4||
sa̱tyamṷgrasya bṛha̱taḥ saṃ sra̭vanti saṃsra̱vāḥ |
saṃ ya̭nti ra̱sino̱ rasā̭: punā̱no brahma̭ṇā hara̱ indrā̭yendo̱ pari̭ srava ||5||
yatra̭ bra̱hmā pa̭vamāna chanda̱syā̱ṃ3 vāca̱ṃ vada̭n |
grāvṇā̱ somḙ mahī̱yate̱ somḙnāna̱ndaṃ ja̱naya̱nnindrā̭yendo̱ pari̭ srava ||6||
yatra̱ jyoti̱raja̭sra̱ṃ yasmi̭~llo̱ke sva̭rhi̱tam |
tasmi̱nmāṃ dhḙhi pavamānā̱'mṛtḙ lo̱ke akṣi̭ta̱ indrā̭yendo̱ pari̭ srava ||7||
yatra̱ rājā̭ vaivasva̱to yatrā̭va̱rodha̭naṃ di̱vaḥ |
yatrā̱mūrya̱hvatī̱rāpa̱statra̱ māma̱mṛta̭ṃ kṛ̱dhīndrā̭yendo̱ pari̭ srava ||8||
yatrā̭nukā̱maṃ cara̭ṇaṃ trinā̱ke tri̭di̱ve di̱vaḥ |
lo̱kā yatra̱ jyoti̭ṣmanta̱statra̱ māma̱mṛta̭ṃ kṛ̱dhīndrā̭yendo̱ pari̭ srava ||9||
yatra̱ kāmā̭ nikā̱māśca̱ yatra̭ bra̱dhnasya̭ vi̱ṣṭapa̭m |
sva̱dhā ca̱ yatra̱ tṛpti̭śca̱ tatra̱ māma̱mṛta̭ṃ kṛ̱dhīndrā̭yendo̱ pari̭ srava ||10||
yatrā̭na̱ndāśca̱ modā̭śca̱ muda̭: pra̱muda̱ āsa̭te |
kāma̭sya̱ yatrā̱ptāḥ kāmā̱statra̱ māma̱mṛta̭ṃ kṛ̱dhīndrā̭yendo̱ pari̭ srava ||11||
4 kaśyapo mārīca: | pavamāna: soma: | paṅkti: |
ya indo̱: pava̭māna̱syā'nu̱ dhāmā̱nyakra̭mīt |
tamā̭huḥ supra̱jā iti̱ yastḙ so̱māvi̭dha̱nmana̱ indrā̭yendo̱ pari̭ srava ||1||
ṛṣḙ mantra̱kṛtā̱ṃ stomai̱: kaśya̭podva̱rdhaya̱ngira̭: |
soma̭ṃ namasya̱ rājā̭na̱ṃ yo ja̱jñe vī̱rudhā̱ṃ pati̱rindrā̭yendo̱ pari̭ srava ||2||
sa̱pta diśo̱ nānā̭sūryāḥ sa̱pta hotā̭ra ṛ̱tvija̭: |
de̱vā ā̭di̱tyā ye sa̱pta tebhi̭: somā̱bhi ra̭kṣa na̱ indrā̭yendo̱ pari̭ srava ||3||
yattḙ rājañchṛ̱taṃ ha̱vistena̭ somā̱bhi ra̭kṣa naḥ |
a̱rā̱tī̱vā mā na̭stārī̱nmo ca̭ na̱: kiṃ ca̱nāma̭ma̱dindrā̭yendo̱ pari̭ srava ||4||